شربل بعيني
قصائد مخطوطة
بلابل
1966
بعمر 15 سنة
**
إبن سركيس
ـ1ـ
تفضلي طلعي بسيّارتي
لا تنطري السرفيس
إسمي أنا يا جارتي
شربل إبن سركيس
ـ2ـ
ـ صدفه جميله كتير
جمعتنا سوا
ـ وانشالله بكرا نصير
من أهل الهوى
ـ3ـ
ـ لا تشرب من البير
وترميه بحجاره
ـ بشرب أنا التعتير
تا إبسط الجاره
ـ4ـ
ـ يمكن إنت شاعر!؟
ـ والشاعر الحسّاس
بالحب بيتاجر
بقلوب كل الناس
**
أجمل الحلوين
ـ1ـ
لا القمر متلك
ولا شمس صنين
قلبي بيندهلك
يا أجمل الحلوين
ـ2ـ
البدر تمنى يكون بدالك
حاجي عليه تشوفي حالك
يا ما انحسدوا من جمالك
وغاروا زهرات الياسمين
ـ3ـ
قلبي مغروم بدلالك
وعليي ما درتي بالك
عني لو بيغيب خيالك
رح فكّر إيامي سنين
ـ4ـ
الدنيي عم تضحك لوجودك
حنّي شويّه ع معبودك
نغمة حبي برنة عودك
من قلبي إخدت تلحين
**
أقوى غري
ـ1ـ
غمرني وشد وفرفك الجسم الطري
ولا تستحي من الجسم لو إنّو عري
ألله خلقنا بهالدني لفترة زمان
وبكرا، يا روحي، بالقبر رح نهتري
ـ2ـ
مش حق إنّو تزعّل النسوان
ومن دونهن ما فيك بوسه تشتري
لا تخاف مني.. ومن جسم بردان
بدّو دفى.. قللي يا روحي بتأمري
ـ2ـ
شباع منّي شباع وعليك الأمان
بسهر معك ع طول ما قلت اسهري
اشتاق التخت عم يصرخوا الجسمان
لزّقونا، عجّلوا، بأقوى غري
**
الضيعه بلبنان
ـ1ـ
الضيعه بلبنان
جنّة عدن صورتها
بنات وصبيان
دمّاتُن من ميّتها
ـ2ـ
ع تلال تلال منشوره
بسحبة موّال مسحوره
بفضاوة بال مستوره
شعلة إيمان عيلتها
ـ3ـ
بسياج الخير مسيّجه
وبتاج العز متوّجه
ع العين صبايا مروّجه
تا تعبّي المي بجرتها
ـ4ـ
السحر بجمالا مسحور
بتتغنّى بإسما الطيور
فاحت فيها ريحة زهور
والنحل يبوّس زهرتها
ـ5ـ
بتعطي الخير غمار غمار
من شمسا شعّت أنوار
غفيت ع نغمة أطيار
وما صحيت من غفوتها
ـ6ـ
بضيعتنا اللبنانيه
لمّا تطل الصبحيه
الشمس بتسبح بالميه
وبتنسى عنا بلوزتها
**
انت وانا
ـ1ـ
إنت وأنا يا حبيبي
كتبنا قصتنا الغريبه
تحت ع رمل السواقي
فوق ع التله القريبه
ـ2ـ
وهون شو بيحلالنا
نغفى سوى بعرزالنا
نخلق حلم ما بينوجد
إلا بسما آمالنا
ـ3ـ
وياما تمرجحنا سوا
ع حبال طيرها الهوا
ننسى الدني وآلامها
بالحب منلاقي الدوا
ـ4ـ
ونبني سوا هالمملكه
الأبعد من جنون الحكي
بسور السعاده مزنره
لا خوف فيها ولا بكي
**
بدّي إتجنّد
ـ1ـ
بدّي إتجنّد بدّي
عطوني تياب الجنديه
تا يصفّي إسمي جندي
بين جنود الحريّه
ـ2ـ
تركوني إحمل مدفع
ع حدودي اللبنانيه
وبإيدي الرايه إرفع
فيها الأرزه الدهريّه
وشعبك يا بلادي إجمع
شباب وختياريه
شعبي لازم يتطوّع
ع الجبهه الجنوبيه
ـ3ـ
خلّوني شنّ الغاره
ورجّع أرضي المسلوبه
والأيادي الغداره
تصير بخنجر مضروبه
وإرجع ع الضيعه زياره
مزيّن بالمجد دروبي
إسقي زهور الدواره
وإهدي الورد لمحبوبي
**
بعدني تلميذ
ـ1ـ
دقت طعم الحب
ولقيتو لذيذ
لكن طويله الدرب
بعدني تلميذ
ـ2ـ
بدل ما قضّي السهر
عم إدرس بكتبي
صرت خبّر هالقمر
مين السرق قلبي
بليلات مليانه سمر
عم تقترب مني
ويرندح لحالو الوتر:
يا حلوتي حنّي
ـ4ـ
تلميذ بعدي.. وللسمر
عم إنصب حبالي
ما هم إمشي ع الجمر
إيام وليالي
المهم كاسات الخمر
ما تبوح بالأسرار
ليش تا شفافن حمر
وزغار بعد زغار
**
بعمري انا حبيت
ـ1ـ
بعمري أنا حبّيت
مرتين وبس
مرّه بعمر الولدنه
في بنت متل السوسنه
استحليتها
وبدّك الدغري يا دني
حبّيتها
بلا عرس
ـ2ـ
كان عمرها سبعه
انشالله العمر كلّو
وعمري أنا تسعه
وهالقلب يا دلّو
عم زيدها بسنتين
مش أكتر
وصرت بدموع العين
عم إسكر
ـ3ـ
ومتل الكذب.. من دون وعي
مسكتها وشديت ع زنودا
وبستها بعنقا
وكتبت البوسات ع خدودا
حكاية الفرقه
وما قدرت اندهلا ارجعي
ـ4ـ
وخلصت الحفله
حفلة غرام
طفل مع طفله
متل الحمام
ومن بعد تسع سنين
نسيت هاك الحب
وتكاتروا الحلوين
واندق باب القلب
ـ5ـ
حبيت حلوه خدودها تفّاح
الظاهر ما حبّتني
راحت وتركتني
والقلب عم بيدق
وعم تهرب الافراح
رح قول كلمة حق:
بعدني لليوم
ما دقت طعم النوم
وكيف رح ارتاح
والباب ما بينشق
بقللو يا قلبي فتاح
ومضيّع المفتاح
**
حبيت السمرا
ـ1ـ
حبيت السمرا.. وحبيت
عمّرلا بـ قلبي بيت:
وقللا: يا عيني وروحي
إنتي بلسم لجروحي
لمّا من قبالي تروحي
خيالك بعيوني خبيت
ـ2ـ
السمرا ال ألله خالقها
وجوات قلبي معلّقها
كيف ما بدي إعشقها
وعمري كلو إلها عطيت
ـ3ـ
بستحلي تضحك مره
وتطفي بـ قلبي الجمره
عليي غضبانه السمرا
يا ريت بترضى يا ريت
ـ4ـ
إنتي النور ال بعيوني
بتمنى بقربي تكوني
وحبي ع طول تصوني
غيرك، والله، ما تمنيت
**
خفت عليكي
ـ1ـ
خفت عليكي كتير كتير
ووقفت عيوني نواطير
وكل ما شَعرك جن وطار
إتعمشق بالشَّعر وطير
ـ2ـ
وياما تغنّيت بإسمك
وقت هديتيني رسمك
وجرار الطيب اندلقوا
حتى يتعطّر جسمك
ـ3ـ
والورده الحد البركه
تكيت وصارت تبكي
غارت من ضحكة سنك
وغصّت ما قدرت تحكي
ـ4ـ
قلتيلي: لا تخاف الحب
رسمَك، إسمَك.. جوّا القلب
وقلتيلي: لا تخاف الناس
حدّك رح إمشي هالدرب
**
خيانة
ـ1ـ
ليش قولي ليش خنتيني؟
وبغدرك الناري كويتيني
حرقتي القلب
محيتي الدرب
وبجهنم الحمرا رميتيني
ـ2ـ
قلبي عطيتك.. شو عطيتيني؟
غير الغدر
الكلو مكر
صرخت ارحميني وما رحمتيني
عم حس ليل نهار
عم إحترق بالنار
ونهر الغضب نازل من جبيني
ـ3ـ
محيتي القصايد تا محيتيني
محيتي الغزل والحب
ومشيتي خلف الكذب
يا خاينه.. عمري سلبتيني
وغرقان بجروحي تركتيني
ومين غيرك رح يداويني؟
**
زهره
لا تغمزي الشبّان بالجيره
بعدك بريئه كتير وزغيره
بفزع، يا حلوه، توقعي بالحب
ومتل الكذب بتلفّك الحيره
درب الغرام بعيد.. أصعب درب
بيحرق قلوب الناس بالغيره
ووحدي أنا.. عم إزرعك بالقلب
زهره.. يا زهره قبال عينك شب
ناطر تا حتّى يشمّك.. كبيره
**
سمرا وزغيره
ـ1ـ
سمرا وزغيري
وكلاّ ظرافه
شفتا بالجيره
وبكل لطافه
عزمتا العزيمه
بنيّه سليمه
انشلحت ع سْريري
تغطّت بلحافي
ـ2ـ
قالت نعسانه
عيوني دبلانه
وحاسّه بـ حالي
نتفه بردانه
ناولني شالي
ودخلك غطيني
بجسمك دفّيني
ببرد الليالي
ـ3ـ
طلبت.. لا تردا
يا صبي عجّل
وانشلح حدّا
هالقصه كمّل
ساعه ضلينا
نفرفك إيدينا
وفجأه غمرتني
وجسما صار دافي
فاقت.. لقيتني
ع الأرض غافي
**
شهر العسل
ـ1ـ
ما بتذكري بشهر العسل
قديش سمّعتِك غزل
وبالليل معملنا مشي
وما وقّف دقيقه العمل
ـ2ـ
وقديش كنتي تضحكي
وكفوف ديكي تفرفكي
وتتغنجي عليي
وحوشك أنا بديي
وداعبك من دون حكي
ـ3ـ
ونغفى سوى وننام
ع فراش من أحلام
وغطّت العتمه
جسمك وجسمي
اتحدوا سوا الأجسام
ـ4ـ
والتم عانق تم
وكان يقظه الحلم
ولمن فقتْ بكير
شفتِك زعلتي كتير
سألتي بدون تفكير
ليش انتهى هالفيلم؟
**
طلاق
ـ1ـ
قلبي مريض كتير صرلو زمان
وغيرك حدا.. ما حب
وين العطف؟ وين المحبّه والحنان؟
وحبّك دوا هالقلب
ـ2ـ
ع مملكة قلبي إنتْ كنت الملَك
وكنت الدني والروح
وكنت نجمه بالسما وصدري الفلَك
بس القلب مجروح
ـ3ـ
بُعدك سبب هالجرح يا قاسي
وقربك حلم عمري
طلّقتني.. وحبي إلك ناسي
ورح موت من قهري
ـ4ـ
ليش قللي ليش أنتَ هيك
بتلعب بأعصابي
حرمه أنا.. من الصعب بإيديك
تلعب بهالطابه
ـ5ـ
حرمه أنا.. ومعوده ع القهر
فيي الأنوثه نور
بالعتم رح بتعيش طول العمر
معذّب ومقهور
**
عودي إلي
ـ1ـ
نزلت دموعي دم ع خدودي
ع رنّة وتر مجروح من عودي
وصرت اصرخ فاقد الاحساس
عودي إلي يا حلوتي عودي
ـ2ـ
عودي إلي تا تسكني بقلبي
وجودك سراج منوّر بدربي
وحبّك أنا رح صون مع حبّي
وكرمال عينك إحفظ عهودي
ـ3ـ
عودي إلي تا الحلم يتحقّق
وما عود إنطر بعد ع المفرق
غيابِك قهر.. والقلب عم يشهق
عودي بقى الإيام معدوده
ـ4ـ
عودي إلي تا نرجع نغنّي
غناني الهوى ونعيش بالجنه
وتا يغمرك هالقلب مستني
برجوعك بيتحقق وجودي
ـ5ـ
عودي إلي يا حلوتي مشتاق
ع جناح طير الحب والأشواق
باب الأمل لما بوجّي ضاق
صارت بواب الحب مسدوده
**
عيد الفصح
ـ1ـ
بالعيد يا شعبي
شو فرح قلبي
وحسّيت إنّو العيد
عم يفرش بدربي
زهور وزغاريد
وحسّيت يا ربي
إنّك بقربي
ـ2ـ
عيد الفصح محلاه لمّا طل
حامل بإيدو تاج من غفران
تاج السعاده والهنا للكل
تاج المحبّه لكل بني الإنسان
ـ3ـ
انشالله، يا شعبي، تضل
سيّد.. على طول المدى
دعوتي.. من القلب رح بتطل
وعند رب الكون في إلها صدى
**
غاب الحبيب
ـ1ـ
لا تسألوني شو بني
لا تسألوا
غاب الحبيب صرلو سنه
وأكتر إلو
ـ2ـ
غاب وطوّل بغيابو
أغلى حبيب
غاب ودشّر أحبابو
متل الغريب
ـ3ـ
غاب ونسي هالقاسي
إنّي بحبّو
عذّبني وحبي ناسي
ما قْسى قلبو
ـ4ـ
ويا طير الطاير صوبو
دخلك قلّو
بدي إمشي ع دربو
شو ما صرلو
ـ5ـ
وبعدي بنطر تا يرجع
أغلى محبوب
وبقعد وحدي إتوجع
ع دروب دروب
ـ6ـ
قلب المحبوب محجّر
يا ربّ يحن
مسكينه، وعقلي معتّر
نتفه وبيجن
**
غني معي يا طيور
ـ1ـ
زقزقي وغنّي معي يا طيور
السهره بأولها
وتجمّعي بباقة فرح يا زهور
حابب تا غازلها
ـ2ـ
ويا هالنجوم البالسما
قلبي أنا مسرور
شعّي بعتمات الحمى
لا تبخلي بالنور
ـ3ـ
عارف أنا.. فوق الخليقه ساهره
يا حبوب من إلماس..
كوني عقد ع صدرها.. شو ناطره
تا يحسدوها الناس
ـ4ـ
ست الحلا عم تزرع المشوار
ع دروب أحلامي
كرمالها.. بمشي ع جمر النار
تا قلّها نامي
ولنو دقيقه بس
ع زنود من أزهار
وتغيب عنا الشمس
ونهار يطفي نهار
**
قديش عمرك صار
ـ1ـ
شو.. يا مشالله مقصره الفستان
ومن دون خجل عم تغمزي الشبّان
جهلتي.. ومعك عم تجهل الجيره
وقديش عمرك صار يا زغيره؟
ـ تنعشر سنه.. بِـ ستعش نيسان!
ـ2ـ
بالسن إنتي يا بنت طفله
لا تعشقي غير إمّك وبيّك
وبعيد ميلادك زيّني الحفله
تا تفرَحي مع إختك وخيّك
وبس تكبري ع السكت.. ع غفله
محسوبك بيهجم على حيّك
وبيخطفك.. تا يعيشّك بالحب
وعندي قفل، يا حلوتي، بالقلب
ورح تفتحي، بضحكة هنا، قفلي
**
متكبر
ع شو إنتْ يا شب متكبّر
يا تراب ماشي بهالدني
يمكن بحالك تعتني
وتجر خلفك كم سنه وتكبر
ومهما تجر سنين يا معتّر
رح توقع بآخر سنه
ورح تنتهي.. وشو حالك مفكّر
**
هيك صار
ـ1ـ
بوّست خدّك.. تا شبع خدّك
سألتك بعد، يا حلوتي، بدّك
قلتي: بعد
بدّي بعد
حسّيت أحلى من الحلا ردّك
ـ2ـ
وركضت نوّس
قنديلك وبوّس
شفاف متل النار
وغايبه إنتي
عن الوعي كنتي
ورح خبّرك شو صار
ـ3ـ
صار في حربين
بين هالجسمين
جسم عم بيئن
وجسم رح بيجن
وإيدك بإيدي
والعين تغمز عين
وبعدك عم تزيدي
وتبوّسي الخدين
وتعملي البدّك
ما قدرت صدّك
**
يا معلمي
ـ1ـ
عارف أنا.. كانت حياتي مِعْتِمه
لولاك.. لولا نور مصباحك
مشيتني بدرب العلم يا معلمي
وخزّقت توب الجهل برياحك
ـ2ـ
إنت الملك.. عم تحكم الأكوان
وتنوّر العتمات بصباحك
ومتل البلابل فوق هالأغصان
عم تكتب التاريخ بجناحك
ـ3ـ
سلاحك قلم عم يزرع التفكير
وحميتنا من الجهل بسلاحك
الكون كلو متل بيت زغير
ما بينفتح إلا بمفتاحك
**
