الصوت العالي

شربل بعيني

Charbel Baini

الصوت العالي

Assawt alaali

The loud voice

قصائد مختارة من كتب الشاعر

Cover by: Rand Baini

**

لقد سخّرتُ مالي في خدمة حرفي، وجنّدت حرفي في خدمة الإنسانيّة، فساعدني يا ربّ كي أمتلكَ الحقيقة.

شربل

**

شو هالوضع؟

ـ1ـ

يا وضع.. شو هالوضع؟

صار الزمن محتار

والطرح متل الجمع

والتلج متل النار

ـ2ـ

وصار الحكي المسموع

بيضحّك الطرشان

بالعين ما في دموع

تا نخفف الأحزان

ـ3ـ

وصارت ع ضو اللمع

تشتي الدنيي غبار

بلدان كلاّ قمع

بتطعم شعوبا الجوع

والجوع شو غدّار

**

زيّح الصوره

ـ1ـ

رح ينتهي المشوار يا ربّي

سنين العمر رح ينطفي نورا

خبّيت ناس كتير بـ قلبي

وفي ناس زرتا.. وما عدت زورا

ـ2ـ

وفي ناس صاروا بهالدني مسبّه

وفي ناس فيك تشمّ بخّورا

حاولت إنفض غبرة الغربه

تاري الغربه مرتفع سورا

ـ3ـ

لولاك كنت وقعت بـ دربي

إنزل بجوره.. وأغطس بجوره

ما ندمت.. قادر إرفع الرقبه

ما خطيت.. حتّى وزّع ندورا

ـ4ـ

إمي، يا ربّي، عرفت تربّي

عيله ما عاشت يوم مقهوره

وبيي عطاني من الصلا طلبه

وقللي: يا إبني زيّح الصوره

**

على دلعونا

ـ1ـ

على دلعونا وعلى دلعونا

ما قتلنا حدا.. ليش حبستونا؟

حكمتو هالدنيي بجندي وباروده

ورجّف إجريكن "فَيْروس كورونا"

ـ2ـ

كل دوله عظمى.. ما عادت عظمى

"كورونا" بياكل لحما مع عضما

بنيوا قنابل مدري شو إسما

ونسيوا المستشفى.. حتى يشفونا

ـ3ـ

كذبه قوّتكن.. كذبه مشهوره

كشفها "فَيْروس" غطّى المعموره

قرفنا ضحكتكن جوّات الصوره

حاكم يا ألله.. كل الحكمونا

ـ4ـ

يا ربي.. داوي بعطفك مرضانا

كتروا اللي ماتوا.. إرحم موتانا

ما كانوا قعدوا وحكموا لولانا

نحنا انتخبنا العم يسرقونا

**

طير الفينيق

ـ1ـ

ليش قللي ليش يا لبنان

ع طول عم بتلفّك الأحزان

هالإنفجار الصار بكّى الصخر

ونحنا بكينا دم بالهجران

ـ2ـ

بيكفي بقى موت ودموع وقهر

يا الكل عمرك موطن الإنسان

حكام لازم ينتهوا بالقبر

بس القبر ما بيحضن الزعران

ـ3ـ

خليك واقف.. متل أرز الرب

لولا ركعت هالكون رح يركع

نحنا معك مهما تْطُول الدرب

نحنا جناحك إسمك منرفع

ـ4ـ

منبنيك والله القلب فوق القلب

بدل الحجر.. لا تخاف ما منفزع

ع طول عم بتقوم بعد الحرب

طير الفينيق ان مات رح يرجع

**

منامات

ـ1ـ

ما دام بيّي مات

حدّو أنا رح فوت

ورح إدفُن منامات

رسمت ضيَع وبيوت

ـ2ـ

وأموال ومْقامات

وكذبات لفّا سكوت

ونسيت "بو الهمّات"

مش أقوى من طاغوتْ

ـ3ـ

الـ بتخلفو الإمّات

رح ينتهي وممقوت

وإنّو العمر كلمات

بس تنكتب بتموت

ـ4ـ

ويا ما انحنت قامات

وانزويت بتابوت

**

صور

ـ1ـ

ع طول قاتلني الضجر

بركان بالراس انفجر

غربه طويله.. عشتها

عمري بلياليها انهدر

ـ2ـ

وهاك البلاد الشفتها

بالحلم أغلى من الدرر

بلحظة تعاسه حذفتها

وما عاد مسمعلا خبر

ـ3ـ

بيوت الشعر حلّفتها

تا تكون أقوى من القدر

دموع البشر جفّفتها

بالشعر.. ما عرفوا البشر

ـ4ـ

مسّحتها.. نضّفتها..

تاري القلب متل الحجر

وبقيت حقيقه عرفتها

مهما تعبنا بهالدني

منروح وبتبقى الصور

**

حبقه

ـ1ـ

ليش القلب مجروح

من ضحكة الحبقه

هالريحتا بتفوح

ومنسرقا سرقه؟

ـ2ـ

والحبقه فيها روح

من هالبشر أنقى

منطّ فوق سطوح

وعميان بالخلقه

ـ3ـ

منبني صروح صروح

ومنحلم بملقى

أحباب تركوا جروح

وحرقه بضهر حرقه

ـ4ـ

رح إسأل ومبحوح:

شو بتنفع الفرقه

وفي ناس رح بتروح

وفي ناس رح تبقى؟

**

بحر أحزان

ـ1ـ

الْبَحرْ أَسْودْ..

الْبَحِرْ كَلبْ كِلْبَانْ،

مَا بِيعَضّ إِلاَّ الشّطُوط

الْـ أَبْعَدْ مْنِ الأُفُقْ.

أَنَا بَحرْ أَحْزَانْ..

شَطِّي مَا بْتَعرْفُو شَمْسْ..

مَا بِتْزُورُو غَيْمِه..

سَمْكِي مَا بْيِسْبَحْ..

لَوْنُو بْلَوْن الْمَيّْ.

ـ2ـ

هْنِيَّالْ قَلْب الشَّخْتُورَه الْـ مَا إِلْهَا شْرَاعْ..

بِالْقَلِيلِه بِتْعِيشْ بْفَضَاوِة بَالْ..

بْتِبْقَى عَ الشَّطّْ..

الشَّطّ مَا بْيِغْدُرْ..

مَا بْيَاكُلْ..

مَا بِيعَضّ..

الشّطّ رِجَّالْ خِتْيَارْ مَا لُو سْنَانْ.

ـ3ـ

الْعَتمْ مقْرِف كْتِيرْ

بْيِشْبَه غُرَابْ أَعْوَرْ..

الْعَتمْ غُولْ..

بْيَاكُلْ النّجْمَاتْ وِالْغَيْم وِالْقَمَرْ..

مَرَّه نَقَلْنِي الْحُلْم عَ مْغَارْتُو،

شِفِتْ إِشْيَا مَا بِيصَدِّقْهَا عَقلْ..

شِفِتْ قَبُّوطْ

عَمْ يِبْلَعْ حَجَرْ أَكْبَرْ مْنِ الأَرْضْ

وْشِفِتْ غَيِمْتَيْنْ زْغَارْ

عَمْ يِرِقْصُوا عَ دَقِّةْ طَبلْ مَفْخُوتْ.

ـ4ـ

قَللِّي الصّبحْ:

شُو بَاكْ ضَايِعْ بَينْ غْبَارْ وَهْمِيِّه

مِتل اللِّي بَدُّو يِنتحِر بْحَبْل الْفَزَعْ

عْيُونَكْ عَمْ يَاكِلْهَا الدَّمْعْ،

وِجْرَيْكْ عَمْ تِبْرَى عَلَى دْرُوب الْعُمرْ؟!

هِزَّيْتْ رَاسِي وْجَاوَبْتُو..

مَا سِمِعْنِي..

يِمْكِنْ نِسِي إِنُّو أَنَا حَكْيِي سْكُوتْ.

ـ5ـ

سْقِيتْ الأَزَلْ مِنْ عَرَقْ جِسْمِي،

دَاخْ وْسِكِرْ..

وْصَارْ يِضْحَكْ مِتِلْ شِي مَجْنُونْ

وِيْشَقْلِبْ قَدَرْ عَ تْلالْ أَعْلَى مْنِ الْعلُو.

الأَزَلْ وَاحِدْ سِكِّيرْ

لَيْشْ نِحْتِرْمُو؟

تَعُوا تَا نِشِطْبُو مْنِ عْقُولْنَا.

**

توابيت

ـ1ـ

ما عادْ فِيّي إِسْمَعْ صَوْتُنْ

ضحكاتُنْ..

غَدْر الشّيْطانْ

والورد العا صْدُورُنْ مَوْتْ

دِرْتِلُّنْ ضَهْرِي

وِمْشيتْ

ـ2ـ

الْبَشاعَه كلاَّ بِوْجُوهُنْ

حَكْيُنْ مِتل السِّلّ القاتِلْ

الْـ بِيقَرِّبْ صَوبُنْ

يا دِلّو

قِرَّبِتْ عْلَيْهُنْ

وِبْكيتْ

ـ3ـ

قْلُوبُنْ مِسْوَدِّه

مِنْ كِذْبُنْ

وِبْيُوتُنْ

هِشْلِتْ طُرْقاتا

تِعْبِتْ مِنْ سُكّانا

الْـ صاروا

تْوابيتْ

تْجِرّ تْوابيتْ

**

شو صار؟

ـ1ـ

شُو صَارْ..

تَا انْبَحّْ صَوْت الرَّعْدْ

الْـ كانْ يِهْدُرْ بِالشِّتِي

وِيْقَلِّقْ عْيُون الْبَشَرْ؟!

ـ2ـ

شُو صَارْ..

تَا غَابِتْ عَن الأَرْض الشَّمسْ

هَللِّي حَاكُوهَا بِالصّلاة الأَقْدَمِينْ

وْرَسْمُوا صُوَرْهَا

فَوْق عِينَيْهُنْ؟!

ـ3ـ

شُو صَارْ..

تَا سَمْع اللَّيَالِي خَفّ،

وْمَا عَادْ يِحْضُنْ وَشْوَشَات الْعَاشْقِينْ

وِيْدَارِيَا،

وِيْقُولْ: يَا أَهْلاَ فِيَا؟!

ـ4ـ

شُو صَارْ؟!..

وْتَمْتَمْ طفل كَمْشِةْ حَكِي:

مَات الْهَنَا بْلَيْل الدَّمَارْ

وِتْطَلَّعْ بْوِجِّي..

وْبِكِي.

**

الغيرة العميا

ـ1ـ

عَرُّونِي، تَرْكُونِي إِرْجفْ،

ما الْتَفْتُوا صَوْبِي،

وْلا قَالُوا شِي كِلْمِه بَيْضَا!

عِينَيْهُنْ جَلْدِتْنِي بْسَوْط الْغِيرِه الْعَمْيَا،

ضَرْبِتْنِي تَا مَاتْ السَّوْطْ،

وبَيَّنْ عَضْمِي..

وْعَضْمِي بْيِخْجَلْ يِظْهِرْ حَالُو!

ـ2ـ

سِمْعُونِي..

عَمْ غَنِّي بْصَوْت

بْيِرْمِي الطَّيْر الْعَالِي

وْبِيسَبِّح أَللَّـه..

صَارُوا يْرشُّوا غْبَار بْوجِّي

تَا عِمْيُوا عْيَونِي،

وْنَشَّفْ حَلْقِي،

وْضِعْت وْضَاعْ الصَّوْت بْصَدْرِي..

ـ3ـ

قَالولي: إِسْمَكْ " مَنْبُوذْ "

بْحَيْث مْغَيَّرْ عَنَّا كْتِيرْ

إِنت بْتِمْشِي مِتل الطَّايِرْ

وْنِحْنَا مْنِمْشِي مِتل اللَّعْنِه

الْـ عُمرَا دْهُورْ

إنت بْتُوقَف بِالشَّمْس

وْمَا بْيِظْهَرْ ظِلَّكْ،

وْنِحْنَا مْنِعْمل ظِلّ مْعَتَّمْ

بِيخَوِّفْ طفل الْـ بِالشَّارِعْ!

ـ4ـ

قَالُولِي: يَا بْتِرْحَلْ بُكْرَا

يِمَّا مْنِزْرَعْ دَرْبَك شَوْكْ،

وْمِنْخَلِّي الرَّجْفِه تْفَرِّخْ

وِتْزَهِّرْ عَ شْفَافَكْ

وْسَبُّونِي..

وْجَلْدُونِي بْسَوْط الْغِيرِه الْعَمْيَا

الْـ خَلِّتْنِي ضَايِع محْتَارْ..

الشعلة، العدد 145، 8 كانون الأول 1970

**

دمع

ـ دَمعْ.. دَمعْ.. دَمعْ..

رَحْ نِغْرَقْ بِالدَّمعْ.

عَ الِمْخَدِّه دَمْعْ..

عَ الِمْحَارِمْ دَمْعْ..

عَ الِخْدُودْ الْـ مِتْل الْمَرْمَرْ

عَمِ يْدَبْدِبْ دَمعْ..

ـ تْرِكْنِي..

ـ إِبْنِكْ مَاتْ.. لَكِنْ إِبْنِكْ إِبْنِي

ـ ضِلَّيْت تْقِللُّو:

اللِّي مَا عِنْدُو أَرضْ مِتل الْمَيِّتْ

ـ مِتل الْمَيِّتْ..

ـ وْإِنْتْ لَيْشْ بَعْدَكْ عَايِشْ؟

إِنْتَ مَيِّتْ..

مِنْ وَقْت اللِّي ضَاعِتْ أَرْضَكْ

صِرْت تْرَابْ مْضَيَّعْ أَرْضُو.

ـ كِنْتْ تِينِه يَابْسِه

وْكَانُوا الرِّيحْ

الْـ عَمْ بِتْصِيحْ

وْتِرْمِي الْخَوْف عَ الطّرْقَاتْ.

كِنْت الْعَتْمِه الْـ عَمْ بِتْئِنّْ..

وْكَانُوا النِّجْمِه

الْـ عَمْ تِضَّحَّكْ خَلْف الْغَيْمِه.

كِنْت الْعُودْ الْعَارِي..

وْكَانُوا النَّارْ الْـ عَمْ تِتْرَقْوَصْ بِالْبَرَارِي.

كِنْت الْغَنْمِه..

وْكَانُوا الْجزَّار الْـ عَمْ بِيسِنّ سْكَاكِينُو

عَ حْجَار الْوَعدْ.

ـ وْهَلَّقْ؟!

ـ صِرت الْوَعِي..

قَلْبِي الْـ كَانْ يِرْجِفْ مِنْ صَوْت الْمَدْفَعْ

صَار مْحَجَّرْ..

دَيِّي الْـ رِبْيِتْ عَ التِّزْقِيفْ..

قْطَعْتَا.

صَوْتِي الْـ كَانْ يْهَوْبِرْ..

وِيْعَيِّطْ..

وْيْحَيِّي..

كِلْ مَا سِمْع خْطَابْ

بَلْعُو الصَّدَى.

صَوْتِي تْغَيَّرْ.. وْأَنَا تْغِيَّرْتْ.

**

مارد

من بَعد كَمْشِة عمرْ

جايي متل شي حلْم

حامل بإيدو الزهرْ

والزهر راية سِلْم

وعَمْ يوقَف قْبالي

طولو.. العيون تْرِدّ

عرضو.. السّهل والجُرْد

قلت: هيدا إِنْت

بَعْدك متل ما كنتْ

نغمة فرح خلْقِتْ بِمُوّالي

شعلة حكي عَمْ تِحْرُق لْيالي

سيدني 2016

**

كمشتين فلوس

ـ1ـ

لا تْمُوتْ هَونْ بْغربتَكْ لا تْمُوتْ

وْتِتْرُك تْرَابَكْ يِلْعَنَكْ بِالْقَبْرْ

رُوحْ قَضِّي عُمْرَك بْبَيْرُوتْ

وْنَفِّض جْنَاحَكْ مِنِ غْبَارْ الْقَهْرْ

ـ2ـ

بْتِبْقَى غَرِيب بْغُربتَك يَا صَاحْ

حَتَّى وَلَوْ مِلْيَانْ بَيْتَكْ بِالْخَدَمْ

يَلّلا سَوَا نِتْعَمْشَق بْكَمْشِة رْيَاحْ

وْنِرْجَع عَلَى لُبْنَانْ.. عَ أَرْض الشَّمَمْ

ـ3ـ

يَللاّ سَوَا نِطْرُد غَريب الدَّارْ

الْـ وَلَّعْ بِـ قَلْب الدَّارْ حقد وْنَارْ

الْـ خَلاَّ السَّمَا تِسْوَدّ بِسْمُومُو

وْخَلاَّ بكِذْبُو الْجَارْ يِدْبَحْ جَارْ

ـ4ـ

نِحْنَا اللّي كِنَّا عَايْشِينْ بْعِزّْ

نِتْغَنْدَر وْنِمْشِي مِتِلْ طَاوُوسْ

غْدَرْنَا بْبَلَدْنَا وِبْشُموخ الأَرْزْ

وْبِعْنَا الْكَرَامِه بْكَمِشْتَيْنْ فْلُوسْ

ـ5ـ

عَمْ نِرْكُض نْجَمِّعْ بِـ غُرْبِتْنَا سَرَابْ

وْنِفْنِي الْعُمر وِنْضَيّعو بِالْوَهْمْ

وولادْنَا الْـ ناسيينْهُنْ خَلف الِبْوَابْ

عَمْ يِكْبَرُوا وْبِقْلُوبْهُنْ شِلاَّلْ سَمّْ

**

الصوت العالي

ـ1ـ

عَالِي صَوْتِي عَالِي

يَا وَطَنِي الْجَرِيحْ

عَمْ يِهْدُرْ بِاللَّيَالِي

اللِّي مْجَرَّحَه تِجْرِيحْ

وِيْخَرْطِشْ إِسْمَكْ صُورَه

عَ إِيدَيْنِ الْمَعْمُورَه

وِيْلَوِّنْ فِيك الرِّيحْ

ـ2ـ

عَمْ جَرِّبْ حَوِّشْ نِجْمِه

يَا وَطَنِي لُبْنَانْ

تَا بْنُورَا شِقّ الْعَتْمِه

الْمَزْرُوعَه وَيْنْ مَا كَانْ

وْخَلِّي النَّاس تْشُوفْ

اللِّي مْخَبَّى عَ الْمَكْشُوفْ

وْوَعِّي فِيك الإِنْسَانْ

ـ3ـ

سْنِينَكْ اللِّي عِشْتَا

مَا بِعْتِبِرْهَا سْنِينْ

شِفْتَا أَنَا شِفْتَا

عَمْ تِحْنِيلَك جْبِينْ

وِتْقِلَّكْ: إِنْتَ الْبَاقِي

بِالصَّخْر وْبِالسَّوَاقِي

وْبِقْلُوب الْمنْسِيِّينْ

ـ4ـ

إِنْتَ الْحُلْم الأَكْبَرْ

وِالْغَلِّه الْـ مُشْ مَحْصُودِه

يَا نَبْع الْـ عَمْ تِتْفَجَّرْ

مِنْ عِينَيِّي عَ خْدُودِي

لَوْ يِنْطِفِي الزَّمَانْ

وْمَا يِرْجَعْ اللِّي كَانْ

رَحْ إِبْقَى الصَّوْت الْعَالِي

وِمْجَال الْكَوْن مْجَالِي

وِحْدُودَك حْدُودِي!..

**

وين إنت وين؟

مهرجان عيد الإستقلال الذي دعت إليه فرقة أرز لبنان الفلكلورية ـ سيدني 1988

ـ1ـ

وَيْن إِنْتَ وَيْنْ

عَمْ إِسْأَلَكْ.. جَاوِبْ

ما يَوْم قَدْرِتْ عَيْنْ

دَمْعَاتْهَا تْحَارِبْ؟!

وِالنَّارْ.. يَا اسْتِقْلالْ

بِالْقَلبْ شِعْلانِه

مِنْ نَاسْ عَبْدُوا الْمَالْ

وْعَ بَيْدَر خْيَانِه

جَمْعُوا وَطَنْ وِعْيَالْ

تَا يْدَلِّل الدِّلاَّلْ

عَ شَعْب لُبْنَانِي!

ـ2ـ

غَنُّوكْ.. تَا انْبَحّ الْقَصَبْ

وِاخْضَرّْ مِنْ صَوْتُو الْغَضَبْ

يَا كِلْمِة الْـ مَا بْتِنَّسَى

مَهْمَا يْجَرِّحْنَا الأَسَى

وْمَهْمَا الْبُوم يْنِقّْ

بِتْضَلّْ شَمْس الْحَقّْ

وْنِحْنَا بْنُورَكْ مَاشْيِينْ

تَا نُوصَل لْصَنِّينْ

تَا نُوصَل لْبَيْرُوتْ

لْعَكَّارْنَا.. وْجَزِّينْ

لأَرْزَاتْ مَا بِتْمُوتْ

لِطْرَابْلُسْ.. وِالشُّوفْ

لِجْبَيْل مَهْد حْرُوفْ

لِشْطُوطْ نَاقُورَه

لْزَيْتُونْ بِالْكُورَه

لْصُورْ أُمّ النُّورْ

لْصَيْدَا.. لِلدَّامُورْ

لِبْعَلْبَكْ الْمَقْلَعْ

لِجْنُوبْ ما بْيِرْكَعْ

بِيرَكِّع الْمَدْفَعْ

خَلِّيكْ يَا اسْتِقْلاَلْ

عِيد وْفَرَحْ أَطْفَالْ

بِالشَّمْس عَمْ تِلْعَبْ

وِتْزَيِّن الْمَلْعَبْ

ـ3ـ

وْفِرْقِةْ اَرز لُبْنَانْ

هَـ الـ غَنّتَكْ بِالْهَجْرْ

خَلِّتْ شَعْب مِنْهَانْ

يِفْرَحْ بِمَلْقَى الْفَجْرْ

وْإِنْت الْفَجْر عَ طُولْ

بِتْفَيِّقْ شْبَابِيكْ

غِيَّابْ فِرْحُوا فِيكْ

وْرَقْصُوا عَ دَقّ طْبُولْ

ـ4ـ

وَيْن إِنْت وَيْنْ؟!

بْشَمْخِةْ جَوَارِحْنَا

عُمْرَكْ مَا صِرْت تْنَيْنْ

وْلا رْضِيتْ تِدْبَحْنَا

مَهْمَا غْرَاب الْبَيْنْ

بِالْبَيْنْ يِشْلَحْنَا

نِحْنَا شَعْب لُبْنَانْ

بْتِتْغَيَّرْ الْبُلْدَانْ

بْتِتْطَايَرْ التِّيجَانْ

وْمِنْضَلّنَا نِحْنَا..

**

دم الشهيد

ـ1ـ

دَمّ الشَّهِيدْ مِتْلِ الْقَمحْ بِالأَرْضْ

بْيِنْمَى تَا يِعْطِي لِلشُّعُوب طْحِينْ

بْيِنْمَى تَا يِقْضِي عَ جْيُوش الْبُغْضْ

الْـ دَعْسِتْ بِإِجْرَيْهَا رْقَاب الآمْنِينْ

ـ2ـ

لَوْلا الشَّهِيدْ مَا انْسَقْيِتْ أْرَاضِي

وْلا الزَّرْعْ فَرَّخْ بَيْنْ إِيدَيْنَا

وْلا ضَلّ عِنَّا حَاضِر وْمَاضِي

وِالرَّكْض مِتْعَمْشَقْ بِـ إِجْرَيْنَا

ـ3ـ

كِنَّا صِفِرْ عَ هَامِش الأَيَّامْ

وِمْنِسْتِحِي نِحْمِلْ أَسَامِينَا

لَوْلا الشَّهِيد الْـ بِالْخَنَادِقْ نَامْ

وْكِلّ هَمُّو بَسّ يِحْمِينَا

ـ4ـ

مَا فِي هَوِيِّةْ شَعْبْ بِالْمَعْمُورْ

إِلاَّ وْخَتَمْهَا بْإِصْبَعُو فَادِي

شَمْعِةْ شَبَابُو بْلَعْنِة الدَّيْجُورْ

ضَوَّى عَ مَدبَحْ أَرْزِةِ بْلادِي

ـ5ـ

وْمَا فِي شَعِبْ بَاقِي بْأَرْضُو يَوْمْ

مِنْ دُونْ شهَادِه وْتَضْحِيِةْ أَبْطَالْ

وْلا فِي جِفِنْ إِنْسَانْ دَاق النَّوْمْ

مِنْ دُونْ كَرَامِه وْمَجْد إِسْتِقْلالْ

**

كلّن متّفقين

ـ1ـ

كلُّنْ.. كلُّنْ مِتِّفْقِينْ

بِالْيَسَار وْبِالْيَمِينْ

يِتْسَلُّوا بْأَرْوَاح النَّاسْ

وْيِقْضُوا عَ الشَّعْب الْمسْكِينْ

ـ2ـ

أُوعَا.. اُوعَا شُو ما صَارْ

تِمْشِي مَعْ زمْرِةْ تَتَارْ

لازِمْ نِحْرِقْهَا بِالنَّارْ

بْقَلب مْحَجَّرْ ما بِيلِينْ

ـ3ـ

فَتِّحْ عَيْنَكْ حَتَّى تْشُوفْ

الإِشْيَا كِلاَّ عَ الْمَكْشُوفْ

نِحْنَا مْنَاكُلْ ضَرْب سْيُوفْ

وْهِنِّي بْقَصْرُنْ فِرْحَانِينْ

ـ4ـ

مِسْلِمْ.. نِصْرَانِي.. ما هَمّْ

إِنْتَ عِنْدَكْ بَيّ وْأمّْ

إِنْتَ بِشْرَايِينَكْ دَمّْ

مُلْكَكْ.. مُشْ مُلْك شِيَاطِينْ

ـ5ـ

لا تِتْكَتَّفْ قِدَّامِي

وْتِتْلَهَّى بْمَرْكَزْ سَامِي

بْبَيْتَكْ مَوْجُود حْرَامِي

عَمْ يِسْرُقْ بِـ إِسْم الدِّينْ

ـ6ـ

لا تْقِلِّي: شَاعِرْ مَغْرُورْ

طَالِب شُهْرَه وْمَجْد قْصُورْ

عَمْ بِكْتُبْ تَا شَعْبِي يْثُورْ

وْيِدْبَحْ بِـ ضِفْرُو مْجَانِينْ

**

جنوب لبنان

ـ1ـ

إِنْت الْمَارِدْ..

إِنْت الشِّعْلِه الْـ عَمْ بِتْضَوِّي بْلَيْل الذُّلّْ

إِنْت الْغَلِّه الْمُشْتَاقَه لإيدَيْن الْحَاصِدْ

إِنْت الْحُلْم بِلْيَالِينَا

وِالدَّمّ الْـ عَمْ يِجْرِي فِينَا

يَا جْنُوبِي الْـ رَحْ تِبْقَى صَامِدْ

مَهْمَا قِسْيُوا عْلَيْك الْكلّْ

ـ2ـ

مِنْ دُونَكْ شُو نَفْع الأَرْض

اللُّبْنَانيِّه بْطُول وْعُرْضْ

لازِمْ نِتْكَاتَفْ يَا جْنُوبْ

وْنِمْحِي عَنْ وِجَّك حْرُوبْ

خَلِّتْ طِفْلَكْ يِتْشَرَّدْ

وْيِمْشِي بِالْعَتْمَات دْرُوبْ

وْعَ جلجلة الْحقد الأَسْوَدْ

الْمَشْقُوعَه بِحْجَارْ الْبُغْضْ

شَعْبَكْ مِنْهَانْ وْمَصْلُوبْ

ـ3ـ

خْسَارِتْنَا.. مَرْبَحْ عَ طُولْ

لا تْفَكِّرْ بِخْسَارِتْنَا

بُكْرَا بْتِسْمَع دَقّ طْبُولْ

لَمَّا مْنِعْلُنْ وِحْدِتْنَا

دِنْيِتْنَا مْنِ الْلاَمَعْقُولْ

جَنِّةْ أَرْضَكْ دِنْيِتْنَا

روَّضْنَا مْنِ الرِّيح خْيُولْ

شْكَلْنَا الشَّمْس بْرَايِتْنَا

وْمَهْمَا خْيُول الإِعْدَى تْجُولْ

بِتْرَكِّعْهَا سَاحِتْنَا..

ـ4ـ

ضَلَّكْ قَاوِمْ مَهْمَا صَارْ

أَحْبَابَكْ بِالدِّنْيِي كْتَارْ

إِنْتْ النَّسْمِه الْـ عَمْ إِتْنَشَّقْ

وِالشَّمس اللِّي عَمْ تِتْسَرَّقْ

فَوْق جْبَالِي

وْمِنْ وَبْرَات الْغَيْم الأَزْرَقْ

تِغْزُلْ شَالِي..

ـ5ـ

لَوْ كَان الشِّعر بْواريدْ

كِنت بْشِعْري سِلَّحْتَكْ

وِرْسَمْتِلَّكْ مَلْيُونْ إِيدْ

تَا تْدَافِعْ عَنْ مَصْلِحْتَكْ

يَا طِفْلِي الْخِلْقَانْ جْدِيدْ

وْبَعْدِي لْهَلَّقْ مَا حْمِلْتَكْ

رَحْ إِعْمِلَّكْ أَجْمَل عِيدْ

وْحَوِّشْلَكْ أَزْهَار الْكًوْنْ

وْحَيِّكْلَكْ فَرْشِةْ تَخْتَك..

ـ6ـ

حُرِّيتَكْ.. خُبْزي وِالْقُوتْ

وْغَايِةْ أَهْدَافِي كِلاَّ

مَا بَدِّي مَالْ وْيَاقُوتْ

وْلا بِالنِّجْمِه إِتْحَلِّى

بَدِّي عَ أَرْضَكْ يْمُوتْ

الْغَازِي الْـ بَعْدُو مُحْتَلاَّ

وْإِعْمِلُّو بْإِيدي تَابُوتْ

مِنْ لَعْنَاتْ وْلاد زْغَارْ

شبْعُوا حْرُوبْ وْدَم وْنَارْ

وِاشْتَاقُوا لْرَحْمِةْ أَللـه..

**

يوم لبنان

ـ1ـ

الْيَوْم عِيد الْبَيّْ.. يَا بَيِّي

يَا وَطَنْ.. عَمْ بِتْئِنّ لَيْلِيِّه

صَرْلِي عُمر حَوِّشْلَك الْقصْدَانْ

تَا قَدِّمُنْ بِالْعِيدْ.. عِيدِيِّه

تَارِي الشِّعرْ مَا بْيِطْعم الْجُوعَانْ

وْلا بْتِنْفَع الْمَحْزُونْ غِنِّيِّه

مَهْمَا عْيُونَكْ تِذْرُف الأَحْزَانْ

حْبَسْتَكْ فَرَحْ جُوَّاتْ عِينَيِّي

وْمَهْمَا الْغُرْبِه تْغَيِّر الإِنْسَانْ

وْتِزْرَعْ بِـ فِكْرُو خْبَارْ وَهْمِيِّه

بْتِبْقَى إِلَكْ: آياتْ مِنْ لُبْنَانْ

تْمَجّدَكْ بِالْهَجْرْ يَوْمِيِّه

وْغِيَّابْ، يِخْزِي الْعَيْنْ، وَينْ مَا كَانْ

بِزْنُودُنْ الْبُلْدَانْ مِبْنِيِّه

وْشَطْحَاتْ صُورَه.. رَاسِمَا فَنَّانْ

فِيهَا الْهَنَا.. فِيهَا شعب فِرْحَانْ

رِجْعِتْ إِلُو الْجَنِّه الإِلَهِيِّه..

ـ2ـ

الْيَوْمْ عِيدْ الْبَيّ.. يَا عْيُونِي

يَا مَارِقْ بْإِيَّامْ مَجْنُونِه

كِيفْ بَدِّي عَيّدَكْ وِالنَّارْ

عَمْ تحصُد الأَهْل اللِّي رَبُّونِي

وْعَ الأَلْفْ لِيرَه تْسَلَّط الدُولارْ

بْطُونْ الْبَشَرْ لِلْغَرب مَرْهُونِه

وْعَ خْدُودْ وِجَّكْ خَيّمُوا الأَشْرَارْ

وْتَحت الْخِيَمْ.. أَجْسَادْ مَدْفُونِه

بْحَلّفَكْ بِالأَرْزْ.. مَهْمَا صَارْ

لاَ تِيأَس مْنِ النَّصْرْ.. لا تِنْهَارْ

بَعْدَكْ عَ صَدر الْـ هَاجَرُوا.. قُونِه

ـ3ـ

الْيَوْمْ عِيدْ الْبَيّ.. يَا حُبِّي

يَا وَطَنْ.. دَقُّوا شْلُوشَكْ بْقَلْبِي

تْغَذَى بْدَمِّي.. الدَّمّ عَ حْسَابَكْ

بِـ كل نِقْطَه زَارع مْحَبِّه

شُوف الأَسَى بِعْيُونْ غِيَّابَكْ

بْيِحْكِي قِصَصْ أَيَّامُنْ الصَّعْبِه

كِيفْ رَكْعُوا سْنِينْ عَ بْوَابَكْ

يْدِقُّوا عَ صَدْرُنْ.. تِرْجَع الطَّلْبِه

وْلُوهْ.. شُو اللِّي صَار.. شُو صَابَكْ

مَا عِدْتْ تِنْدَه: عُودْ يَا شَعْبِي؟!

قَلُّوا اللِّي فِيكْ.. وْطَيْشَرُوا حْبَابَكْ

يَللِّي تْرَابُنْ حَنّ لِتْرَابَكْ

.. حْرَامْ تِدْفُنْ شَعب بِالْغُرْبِه!

**

بلادنا

ـ1ـ

بْلادْنا.. اللِّي هَجْرِتا الأَحْلامْ

بَعْدا حُلمْ بِالْعَيْن بَسّ نْنامْ

مْنِتْقَلَّبْ.. وْمِنْصِيرْ نِشْتَقْلاَ

وِنْقُولْ: بُكْرا بْتِرْجَعْ الأَيَّامْ

قِللِّي يا أَللَّـه: شُو بِهُنْ أَهْلاَ

نِسْيُوا الْفَضِيلِه وْشَجّعُوا الإِجْرامْ؟

وِشْفَافْنا مْنِ الشَّوْق تِنْدَهْلا

وِقْلُوبْنا عَمْ تِنْزُف الآلامْ

مَهْما الزَّعَامِه تِغْرَق بْجهْلاَ

لُبْنانْ باقي لْكِلّ سِكّانُو

دْروز وْنَصَارَى وْحَدُّنْ الإِسْلامْ

ـ2ـ

قِدَّيْش صِرنا نْحِبّها قِدَّيْش؟

بْلادْ.. صَلْبُوها عَ خَطّ النَّارْ

بْلاد قادُوها عَلَى الطِّمَّيْش

وْبَعْدا لْهَلَّقْ جَاهْلِه شُو صارْ

بِتْمُوتْ فِيها انْ قِلْت مَرَّه: لَيْشْ

قَتْلُوا الأُمُومِه وْفِي بْحِضْنا زْغارْ؟

بِتْمُوتْ فِيها انْ قِلْت: وَيْن الْجَيْشْ

وْكِيفْ تقْسِيمُو حَصَلْ بِنْهارْ؟

وْلَوْ مُتّ كِرْمالاَ أَنا.. مَعْلَيْشْ

الِمْهِمْ يِبْقَى مَوْطَني لُبْنانْ

وْإِمْسَحْ بِـ دَمِّي عَنْ جبينُو الْعارْ

**

مشلح من الفل

كل ما صَباح يْطِلّْ

وِنْوَدِّعْ مَسَا

مِنْقُولْ كِل شِي صَارْ بُكْرَا بْيِنَّسَى..

الأَرْضْ اللِّي لِبْسِتْ مَشْلَح مْنِ الفلّْ

مَهْمَا كْوِيتَا بْنَارْ

وِرْمِيتَا بْدَمَارْ

ما بْتِبْدِلُو بْتَوب الأَسَى..

**

تاريخ هجرتنا

ـ1ـ

أَرْضَك فْرَاشِي وْجَوَّك لْحَافِي

وْهَمَّكْ صَلِيب مْكَسَّر كْتَافِي

نِحْنَا إِذَا فْرِحْنَا بْتَارِيخْ هِجْرِتْنَا

لا تِفْتِكِرْ مِنْحِبّ غُرْبِتْنَا

يَا وَطَنِي الْمتْشَرَّدْ وْحَافِي

ـ2ـ

مْنِفْرَحْ كَرَامِةْ أُمّ حَضْنِتْنَا

وْوَقْت الِـ بْكِينَا بْحُبّ عَزِّتْنَا

وْوَقْت الِـ بْرَدْنَا بْرِيشْ غَطِّتْنَا

وْنَيّمِتْنَا بْحضِنْهَا الدَّافِي

ـ3ـ

وْبِنْجَاحْنَا أَوّل مَا هَنِّتْنَا

وِاسْتَقْبَلِتْ بِالشّكرْ خِدْمِتْنَا

أستْرَالْيَا.. الْـ إِسْمَا عَلَى شْفَافِي

أَرضْنَا الْحُرَّه الْمِضْيَافِه..

**

طاووس

ـ1ـ

إِنْتْ.. يَا إِنْت الْـ عَمِ بْتِسْهَرْ

وْيِسْهَرْ مَعَكْ كاسَكْ

فرْحَانْ.. قَاعِدْ هَيْك عَمْ تِسْكَرْ؟!

الْخَيْرْ بِخْوَابِيكْ

وِبْوَابَكْ مْسَكَّرْ

وْمَا يَوْمْ وِجْعَكْ عَ حَدَا رَاسَكْ

هْنِيَّالْ قَلْبَكْ كِيفْ مَا بْتِضْجَرْ؟!

ـ2ـ

إِنْتْ.. يَا مَاشِي عَلَى الْمَرْمَرْ

وْرَقبْتَكْ تِعْبِتْ مِنِ الْجَوْهَرْ

وْمِتِل شِي طَاوُوس بْتِمْشِي.. بْتِتْكَبَّرْ

شُو مِسْتِحِي حَاكِيكْ؟!

شُو مِسْتِحِي حَاكِيكْ؟!

زْغِيرْ إِنْت زْغِيرْ.. وْأَزْغَرْ مِنِ الأَزْغَرْ!

**

جرح كبير

ـ1ـ

ضْحِكْتُوا عْلَيْنَا كْتِيرْ

وْصَارْ وَقِتْنَا نِحْنَا

نْدَاوِي الْجرحْ الِكْبِيرْ

الْـ فَجَّرْ جَوَارِحْنَا

ـ2ـ

الْـ خَلاَّ الزَّمَانْ يْصِيرْ

يْشَقْلِبْ مَطَارِحْنَا

وِبْسَاعِة التِّعْتِيرْ

يْشَمِّرْ تَا يِدْبَحْنَا..

**

ارجعوا

ـ1ـ

اشْتَقْنَا يَا بْلادِي اشْتَقْنَا

لِبْرُودَات الصّبْحِيِّه

وْلِلشَّمْس الْـ بِتْفَيِّقْنَا

بِجْدَايِلْهَا السِّحْرِيِّه

لِلطَّيْر الْـ عَمْ يِسْرِقْنَا

وْيِنْتُفْ تِينِه حْمَيْرِيِّه

اشْتَقْنَا تْرِفّ بْيَارِقْنَا

فَوْق الأَرْض الْمِحْمِيِّه

اللِّي فْلَحْنَاها وِعْرِقْنَا

اللِّي حْرَسْنَاهَا لَيْل نْهَارْ

تَا تِبْقَى لُبْنَانِيِّه

ـ2ـ

وْيَا أَهْلِي.. يَا مُغْتِرْبِينْ

أَشْعَارِي الْـ كِلاَّ إِحْسَاسْ

سْمَعُوهَا.. وْخَبُّوهَا سْنِينْ

بِقْلُوب بْتِسْكِنْهَا النَّاسْ

وْعَ بْلادي الْـ فِيهَا حْسَاسِينْ

غَنِّتْنَا مِنْ دُون قِيَاسْ

ارْجَعُوا.. يَا أَغْلَى مْحِبِّينْ

بِالْغُرْبِه مْنِبْقَى مْسَاكِينْ

مَهْمَا يْغَطِّينَا الإِلْمَاسْ!

**

عيب إنّي إتركو

عَيْب إِنِّي إِتِرْكُو وْإِرْحَلْ

هَـ الْـ كَانْ مَلْوَى الْكَوْنْ

وْلَوْن أَبْهَى لَوْنْ

وْأَجْمَل مِنِ الأَجْمَلْ

ما نْسِيتْ خَيْرَاتُو.. وْصَعِبْ إِنْسَى

بِقْسَى يا إِبْنِي عْلَيْك

عَ زَقْزَقِةْ عِينَيْكْ

وِعْلَيْه ما بِقْسَى

بْشُوفُو وَقِتْ ما بْنَامْ

مَجْرُوحْ.. وِجْرُوحُو

شْفَاف انْتَلُوا بِكْلامْ

وِبْيِستْحُوا يْبُوحُوا

بْسِرّ اللّي رَاحُوا أَو عَم يْرُوحُوا

مِن ظُلْم هَـ الأَيَّامْ!

**

فخر

كِنْتُو فَخْرْ

كِنْتُو فَخْرْ

شُو اللِّي حَصَلْ حَتَّى انْقَلَبْتُوا عَارْ

مِنْ بَعْدْ مَا عِشْتُوا دَهْرْ

تِمْشُوا وْتَحْتْ إِجْرَيْكُنْ يْفَرِّخْ زَهْرْ

وْعَ رُوسْكُنْ مَرْفُوع تاجْ الْغَارْ؟!

**

زينة الأسامي

ـ1ـ

يَا وَطَنِي.. يَا زِينة الأَسَامِي

مِنْ يَوْم مَا قَتْلُوكْ

وْبِالْبُغضْ رِمْيُوكْ

اسْتَحْيِت الأَسَامِي

وِانْمَحْيِت الأَسَامِي!

ـ2ـ

وْنِحْنَا اللِّي انْسَلَخْنَا

عَنْ أَرْضَك الْمَغْزُولِه بْدَمْعَاتْنَا وِصْرِيخْنَا

بِالْغُرْبِه رْسَمْنَاكْ

وَطَنْ وِسْكَنَّاكْ

وْصِرْنَا فِيكْ نِسْعَدْ

وْنِفْرَح وْنِتْهَنَّى

شَرْبِل وْأَحْمَدْ

وْمَعْرُوف وْحَنَّا

ـ3ـ

يَا وَطَنِي.. يَا هَدَفِي السَّامِي

لا تْخَاف مْنِ الْحَرَامِي

الْـ عَمْ يِسْرُقْ أَسَامِي

بَعْدَكْ بِغُرْبِتْنَا

مْسَيَّجْ بِمْحَبِّتْنَا

وِبْوِحْدِة كِلْمِتْنَا

مَهْمَا الدِّنِي جَارِتْ أَوْ قَامِتْ الْقِيَامِه!

**

ميمتي

ـ1ـ

.. وْبِتْذَكّرِكْ يَا مَيْمتِي مَوْقِدْ

بِتْذَكّرِكْ تَنُّورْ

بِتْذَكّرِكْ مَسْنِدْ

وْبَيْتْ مِنْ دُونْ سُورْ

بِتْذَكّرِكْ قَلْب وْعَطَا وِزْهُورْ

ـ2ـ

.. وْبِتْذَكّرِكْ وِبْقُولْ:

يَا رَيْتْ كَانْ الْمَوْتْ أَقْرَبْ مِنِ التّذْكَارْ

مَا كَانْ دَمْعِي سْيُولْ

وْلا كانْ دَمِّي نَارْ

يَا ميْمتِي اللِّي مْشَرّدِه بِالْبَرْدْ

شُو صَارْ بِاللِّي قَبْلْ

شُو صَارْ بِاللِّي بَعْدْ

بْعَصْرْ صَفَّى الصَّخْر مِتل الرَّمْلْ

وِالْبَيْتْ عَمْ يِنْهَدّْ!

**

تبرّع..

ـ1ـ

تْبَرَّعْ..

الطّفلْ جَاع وْشَيخْنَا تْشَرَّدْ

وْمِينْ أَكْرَمْ مِنَّك وْأَجْوَدْ

يَا قَلْبْ مِنْ أَوْسَعْ دِنِي أَوْسَعْ!

ـ2ـ

تْبَرَّعْ..

مُشْ هَمّ مِسْلِمْ كِنْتْ

أَوْ كِنْت نصْرَانِي

لُبنان مُلْكَكْ إِنْتْ

مَا بْتِملكُو دْيَانِه!

ـ3ـ

دُولارْ... عَشْرَه.. أْلُوفْ.. كِلُّو مْنِيحْ

الِمْهِمْ نِقْوَى عَ مْهَبّ الرِّيحْ

الْـ عَمِ يْشَلِّعْ بِالْوَطَنْ

وْيِبْدُرْ بِأَرْضُو خْرَابْ وِدْمُوع وْمِحَنْ

وْنِخْنُقْ بِإِيدَيْنَا غْرَاب الْبَيْنْ

وْنِرْوِي بْدَمُّو عَطَش الإِيدَيْنْ..

ـ4ـ

تْبَرَّعْ..

فِي ناس عَمْ بِتْمُوتْ

مِنْ قِلِّة الإِسْعَافْ

مِنْ ظُلمْ.. خَلاَّ بْيُوتْ

رَهْن الدَّوَا وِالْقُوتْ

وْعَ طْفَالْهَا بِتْخَافْ

وْيَا سَاكِن الْهجْرانْ

يَا نُورْ عِينَيِّي

كِل مَا سألْ لُبْنَانْ

بِتْفِيضْ حِنِّيِّه

وْكِلْ مَا بِكِي إِنْسَانْ

بِتْقُولْ: يَا خَيِّي

تَا صِرْتْ لِلأَوْطَانْ

نِعْمِه إِلَهِيِّه..

ـ5ـ

تْبَرَّعْ..

يَا قَلْب مِنْ أَوْسَعْ دِنِي أَوْسَعْ..

**

نسر الجو

ـ1ـ

يَا نسْر الْجَوّْ

عَلِّي.. وْلا تْخَاف الْغَيْمَاتْ

وْعَ حْدُودْ الضَّوّْ

غِطّ.. وْنَفِّضْ بِالرِّيشَاتْ

وِجّ الإِيَّامْ الْمغْبَرَّه

ـ2ـ

يَا صَوْت الرِّيحْ

الْـ عَمْ تِصْفُرْ بِـ دِينَيْنَا

رْسَمْنالَكْ زِيحْ

بَيْن الدَّمْع وْعِينَيْنَا

وْبَيْن الآهَاتْ الْمِحْمَرَّه

ـ3ـ

إِنْتَ مِنْ هَوْنْ

وَقِّفْ يَا مَجْد وْغَنِّي

صِيَّرْنَا الْكَوْنْ

جَنِّه.. وْنَاطُور الْجَنِّه

أَرْزَات الرَّبّ الْمخْضَرَّه

**

بداية المشوار

1ـ

مطلق طفل عم يبتدي المشوار

بـ هالدني.. رح نسمع نحيبو

بيشوف قدّامو حكم أشرار

وإنسان عم تكتر مطاليبو

ـ2ـ

بأول شبابو همتو قنطار

وبنص عمرو الخوف بيصيبو

ومتل الكذب رح ينتهي ختيار

الدكتور مش قادر ع تطبيبو

ـ3ـ

هالطفل جايي ع زمن غدّار

من الصعب يفهم كيف تركيبو

بأيا عدل عم نشلحو بالنار؟

بأيا عدل ع الكون منجيبو؟

**

أدب راقي

ـ1ـ

صار الأدب "قطش وشلح" يا رفاق

متلو تعاسه صعب تا نلاقي

بيصدر ديوان تخربش البزّاق

وبيكرموا الـ كتبوه يا رفاقي

ـ2ـ

بـ هالأدب لا تشوهوا الأذواق

ع صفحة التاريخ مش باقي

قالوا: أدب راقي.. تا شبعوا نفاق

حابب أدبنا يكون مش راقي

**

لعبة

ـ1ـ

بِالْعِيد.. هْدِينِي لُعْبِه

يَا أُمِّي.. وِجَّا زْغَيَّرْ

وْقَلْبَا أَكْبَرْ مِنْ قَلْبِي

وْفُسْتَانَا لَوْنُو أَحْمَرْ

ـ2ـ

وْقُولِي لِلطِّفْل الْمَوْلُودْ

يِهْدِينِي مْغَارَه جْدِيدِه

بْيُوتَا مِبْنِيِّه بِجْرُودْ

حَابِبْ لَوِّنْهَا بْإِيدِي

ـ3ـ

وْحَابِبْ سَكِّنْ فِيهَا وْلادْ

مَا عِنْدُنْ أُمّ وْلا بَيّْ

تَا يْحِسُّوا بْطَعْم الأَعْيَادْ

وْيْقُولُوا مْنِ قْلُوبُنْ: خَيّْ

**

نسيوا

ـ1ـ

لِـمْ كِبْرُوا.. نَكْرُوه وْلادُو

قِرْفُوا مْنِ الْعُمْر اللِّي فِيهْ

نِسْيُوا حِنِّيتُو وِجْهَادُو

نِسْيُوا الْحُبّ الْـ عَمْ يِعْطِيهْ!

ـ2ـ

قَالُولُو وِالْحِقْد جْبَالْ:

إِنْت كْبِرْت.. خْرِفْت.. انْشَالْ

مْنِ الْبَيْت.. وْخَلِّصْنَا شْوَيّْ

تِعْبِتْ مِنْ حَكْيَكْ الِعْيَالْ

ـ3ـ

أَقْسَى مِنَّكْ مَا فِي بَيّْ!

وْمِتْل اللِّي انْكَسْرِتْ نَظْرَاتُو

وْدِبْلِتْ عَ خْدُودُو دَمْعَاتُو

تْطَلَّعْ فِيهُنْ.. غَصّ وْقَالْ:

هَـ الْـ بِيرَبِّي هَيْك عْيَالْ

أَفْضَلْ لَوْ يِطْفِي سَاعَاتُو!

**

ربي

كتبتها بعمر 16 سنة

ـ1ـ

هَـ الْعَصرْ.. عَصْرِي أَنَا

شُو هَـ الْعَصرْ؟!

عَصْر الْقَنَابِلْ وِالْفَنَا

عَصْر الْكُفرْ

عَصْر اللِّي مَوَّتْ بِالْغِنَى

أَهْل الْفُقرْ

مَا فِي طُهْر.. مَات الْهَنَا

بْعَصْر الْعُهرْ

وْقِصْر الْعُمْر.. أَحْسَنْ لِنَا

ظْلام الْقَبرْ

ـ2ـ

رَبِّي.. الزَّلازِلْ هَادْمِه

كُوخ وْقَصْرْ

وْبَعْدَا الْقُلُوب الظَّالْمِه

مِتْل الصَّخْرْ

رَبِّي.. الْقِيَامِه قَايْمِه

رَبِّي.. الصَّبْرْ

ـ3ـ

وْلا تْضَلّ عَنْ هَـ الْكَايْنِه

غَاضّ النَّظَرْ

وْسَاعْة الْخَطَرْ حَايْنِه

سَاعْة الْخَطَرْ

هَيْدِي خَلِيقَه خَايْنِه

حَابِّي الضَّرَرْ

حَالا بِـ حَالا دَايْنِه

رَغْم الْقَدَرْ

وْقِدَّيْش فِكْرَا مْضَايْنِه

وْهِيِّي بَشَرْ؟

**

مين هيّي؟

ـ1ـ

مِينْ هِيِّي مِينْ.. يَا شَاعِرْ

الْـ سَرْقِتْ قَلبْ مَوْعُود بِالآمَالْ

وْخَلِّتْ حَيَاتَكْ بَاقِة مْشَاعِرْ

وِمْخَيّلِه فِيهَا الْخَيَالْ جْبَالْ

ـ2ـ

بِتْجَسِّدْ بْشِعْرَكْ أَلفْ ثَائـرْ

وْبِتْرَكِّعْ بْسَاحَكْ أَلفْ خِيَّالْ؟

وْتَا فَهّمَكْ قِدَّيْشنِي شَاطِرْ

وْقِدَّيْش عِنْدِي مْنِ الذّكَا رِسْمَالْ

ـ3ـ

سْمَحْلِي شِي مَرَّه بْإِسِمْهَا جَاهِرْ:

هَيْدِي بْلادَكْ.. حُلْمَك الْـ بِالْبَالْ

الْـ فَضَّيْت حَتَّى تْحَقِّقُو مْحَابِرْ

وِنْطَرْت تَا تِسْتَقْبِلُو أَجْيَالْ

ـ4ـ

كْتَارْ مِتْلَكْ عَقلْهُنْ طَايِرْ

بِمْحَبِّتَا.. وِلْهَالسَّبَبْ بِتْشُوفْ

أَطْفَالْنَا بْهَالْكَوْن خِلْقُوا رْجَالْ!

**

فقر وعيد

ـ1ـ

هَـ الْقِصَّه بْتِحْكِي عَنْ بَيْت

فِي مِتْلُو بْهَالدِّنْيِي كْتِيرْ

فَرْشُو: تَخْت وْقِنْدِيلْ زَيْت

وْسِتّ كْرَاسِي مَعْ حَصِيرْ

ـ2ـ

وْسِكَّانُو شِي سَبْع نْفُوسْ:

أُمّ وْبَيّ وْخَمْس وْلادْ

ما شَمُّوا رِيحِةْ الِفْلُوسْ

وْلا حَسُّوا مَرَّه بْأَعْيَادْ

ـ3ـ

بَيُّنْ أَعْمَى.. وْيَا لَطِيفْ

أُمُّنْ خِدَّامِة بْيُوتْ

إِجْرِتْهَا شِي كَم رْغِيفْ

لَوْلاهُنْ كَانِتْ بِتْمُوتْ

ـ4ـ

وْقَبلْ مَا يْنَامُوا يْصَلُّوا

وِيْقُولُوا: يَا رَبّ الْكَوْنْ

الْـ ما بِيخَافَكْ يَا دِلُّو

مِدّلْنَا يَا أَللّـه الْعَوْنْ

ـ5ـ

وْمَرَّه كَانُوا سِهْرَانِينْ

سِمْعُوا دَقَّه عَلَى الْبَابْ

صَرْخُوا كِلُّنْ.. قَالُوا: مِينْ

تْفَضَّلْ.. مَا سِمْعُوا جَوَابْ

ـ6ـ

افْتَكْرُوا إِنُّو صَوْت الرِّيحْ

وْصَوْت التَّلْج عَ الأَشْجَارْ

أَوْ شِي بُومِه عَمْ بِتْصِيحْ

رِجْعُوا الْتَفُّوا حَوْل النَّارْ

ـ7ـ

السَّاعَه تْنَعْش انْدَقُّوا جْرَاسْ

الدَّيْر.. وْكَانْ الْعَتْم غْمِيقْ

وْكِلْمِنْ وَاعِي مِنْ هَـ النَّاسْ

صَار يْقُول لِلنَّايـمْ: فِيقْ

ـ8ـ

وْصَرْخُوا كِلُّنْ: بْهَالْعِيدْ

صَعْب نْزُورَكْ يَا يَسُوعْ

ما فِي عِنَّا تَوْب جْدِيدْ

ما فِي عِنَّا غَيْر دْمُوعْ

ـ9ـ

وْقَالِتْلُنْ أُمُّنْ: رَحْ رُوحْ

زُورُو بْهَالْيَوْم السَّعِيدْ

وْصَلّيلُو وْإِشْكِيلُو وْنُوحْ

بَرْكِي بْيِرْحَمْنَا بْهَالْعِيدْ

ـ10ـ

وْفَتْحِتْ بَاب الْبَيْت وْصَارْ

التَّلْج يْفُوت وِالزَّمْهَرِيرْ

وْصَرْخُوا الْخَمْس وْلاد زْغَارْ:

عَمْ نِبْرُدْ يَا مَاما كْتِيرْ

ـ12ـ

انْصَابِتْ أُمُّنْ بِالْجَمْدِه

شَافِتْ صُنْدُوقَه كْبِيرِه

قَالِتْ: مِينْ جَابَا لْعِنْدِي

مَعْقُول تْكُونْ لِلْجِيرِه؟

ـ13ـ

فَتْحِتْهَا وْلَقْيِتْ وَرْقَه

قِرْيِتْهَا وْكَرْجِتْ دَمْعَه

عِرْفِتْ إِنُّو الصُّنْدُوقَه

هْدِيِّه مِنْ أَهْل الضَّيْعَه

ـ14ـ

وِبْهَالصُّنْدُوقَه مَوْجُودْ

تْيَاب جْدِيدِه وِفْسَاتِينْ

رَكْعُوا وْصَلُّوا لِلْمَوْلُودْ

وْخَتْمُوا صْلاتُنْ بِالآمِينْ

**

حرقني بنورك

كل شيء حلال، ولكن ما كلّ شيء ينفع، كل شيء حلال ولكن ما كلّ شيء يبني، يجب أن لا يسعى أحد إلى مصلحته بل إلى مصلحة غيره

ـ1ـ

حْرِقْنِي.. حْرِقْنِي.. حْرِقْنِي بْنُورَكْ

وِرْجَاعْ بْمَيَّات بْحُورَكْ

غَطِّسْنِي

يَا رَبّ الْمِتْشَوَّقْ زُورَكْ

تَا فِيِّي حَقِّق نْدُورَكْ

قَدِّسْنِي

ـ2ـ

رْسِمْنِي سَيْف بْوِجّ الظُّلْمْ

خْلِقْنِي يَقْظَه بْلَيْلِةْ حُلْمْ

فَجِّرْنِي حُبّ وْإِحْسَاسْ

وْتِرْتِيلِه عَ شْفَاف النَّاسْ

وِحْمَامِه تْبَشِّرْ بِالسِّلْـمْ

يَا رَبّ الْقَاعِدْ بِالْبَالْ

نْفِخْنِي غَيْمِه وِسْع الأَرْضْ

تَا شَتِّي لْهَـ النَّاسْ غْلالْ

وْإِجْرُفْ مِنْ قِدَّامُنْ بُغْضْ

وْحَيِّكْ بَدْل الْبُغْض سْلاَلْ

زَيِّنْهَا بْبَاقَات الْوَرْدْ

النَّاطِرْ عَ شْفَاف الأَطْفَالْ

ـ3ـ

زْرَعْنِي نَخْلِه بْأَبْعَدْ صَحْرَا

تَا فَيِّي بْسَاعَات الْحَرّ

تَا بَوْرِدْ قَلْب الْـ بِيمِرّ

وْضَايِعْ بَيْن الأَمْس وْبُكْرَا

يَا رَبِّي.. سَاعِدْنِي جِرّ

بِكْتَافِي الصّلْبَان الْحَمْرَا

تَا الْمُسْتَعْبَدْ رِدُّو حُرّ

وْبَعِّدْ عَنُّو مُرّ الْكَاسْ

وِالْمُتْعَصِّبْ خَلِّي يْقِرّ

إِنِّكْ وَاحِدْ مَا بْتِتْجَزَّأْ

بَيْن طْوَايِفْ شغْل النَّاسْ

**

تجارة

وقال لهم يسوع: لماذا تحاولون أن تحرجوني، هاتوا ديناراً لأراه، فأعطوه ديناراً، فقال: لمن هذه الصورة وهذا الكلام؟. قالوا: لقيصر. فقال لهم: إدفعوا ما لقيصر لقيصر، وما للّـه للّـه

ـ1ـ

تْجَارَه.. تْجَارَه صَفَّى الدِّينْ

بْإِيدَيْن رْجَال مْلاعِينْ

شْيُوخ وْكَهْنِه وْحَاخَامَاتْ

عَ شْفَافُنْ مَطْبُوعَه الْـ (هَاتْ)

وْبِجْيُوبُنْ خَبُّوا مْلايِينْ.

ـ2ـ

فلْفَشْت بْطَيَّات الأَرْضْ

تَا نْكَوْيِتْ إِيدَيِّي بْنَارْ

لْقِيتْ الدِّنْيِي كِلاَّ بُغْضْ

وْتُجَّار بْتِخْدَعْ تُجَّارْ

لْقِيت الطِّفْلِه مِنْ دُونْ عَرْضْ

وِجْبِينَا مْلَطَّخْ بِالْعَارْ

لَكِنْ حَاسِسْ عِنْدِي فَرْضْ

قِلَّكْ يَا أَللَّـه شُو صَارْ

بْرَمْت الدِّنْيِي طُول وْعُرْضْ

تَا أَعْرِفْ لَيْش الْكفَّارْ

انْقَرْضُوا مْنِ شْوَارِعْنَا قَرْضْ

وْصَفُّوا بِمْعَابِدْنَا كْتَارْ!

ـ3ـ

وْشِفْت بْعِينَيِّي الإِنْسَانْ

الْمِتْنَقِّلْ بَيْن الأَدْيَانْ

سَاعَه بْيُؤْمِنْ بِالإِنْجِيلْ

وْسَاعَه بْيُؤْمِنْ بِالْقُرْآنْ

مْفَكَّرْ دِينَكْ قَال وْقِيلْ

وْكِتْبَكْ نِزْلِتْ كِيفْ مَا كَانْ

وْبَيْنُو وْبَيْنَكْ مَلْيُونْ جِيلْ

وْإِيمَانْ يْطَحْبِشْ إِيمَانْ

مْفَكَّرْ إِنُّو بْهَـ التِّدْجِيلْ

رَحْ يِرْضِيك وْيِرْضِينَا

وْمَا بْيِرْضِي غَيْر الشّيطَانْ!

ـ4ـ

وْشِفْتُنْ شِرْبُوا بِالْقِدَّاسْ

الْخَمْرَه.. تَا الإِيمَان يْعِمّْ

وْشِفْتُنْ حِرْمُوهَا عَ النَّاسْ

وْحِسْبُوها أَقْوَى مْنِ السَّمّْ

وْشِفْت الإِشْيَا الْـ مَا بْتِنْقَاسْ

لا بِالنَّوْعِيِّه وِالْكَمّْ

صَفِّتْ بِالأَدْيَان أْسَاسْ

وِطْقُوسُنْ فِيهَا بِتِمّْ

يَا خَالِقْنَا جْنَاس جْنَاسْ

مُشْ رَحْ صَدِّقْ إِنُّو كَانْ

أَصْل الْعَالَـمْ بَيّ وْأمّْ!

ـ5ـ

قَالُولِي: لا تْوَجِّعْ رَاسَكْ

وِتْحَمِّلْ هَـ الدِّمِّه كْتِيرْ

وْهِنِّي الْـ خَدْمُولَكْ قِدَّاسَكْ

هِنِّي اللِّي بْتِأْدِينُنْ صَارُوا

يْوَعُّوا هَـ الدِّنْيِي بَكِّيرْ

ـ6ـ

وْحِكْيُولِي إِشْيَا بِتْخَوِّفْ

عَنَّكْ.. عَنْ نِيرَان جْهَنَّمْ

وْسَأْلُونِي تَا حَتَّى خَفِّفْ

أَشْعَارِي وْعَ الْمَاضِي إِنْدَمْ

وِحْيَاتَكْ يَا أَللَّـه عَارِفْ

إِنَّكْ مِتْلِي عَمْ تِتْأَلَّمْ

مِنْ عَالَـمْ مَا عَاد يْشَرِّفْ

أَدْيَانُو بِتْحَارِبْ بَعْضَا

وْبَعْدُو بِالْجَنِّه عَمْ يِحْلَمْ!

**

بيني وبينك

ان خطاياها الكثيرة مغفورة لها لأنها أحبّت كثيراً

يسوع

ـ1ـ

بَيْنِي وْبَيْنَكْ غَمْضِةْ عَيْنْ

لا تْفَكِّرْ إِنِّي نَاسِي

بْشُوفَكْ قِدَّامِي إِيدَيْنْ

تْوَزِّعْ.. وِبْشُوفَكْ جِنْحَيْنْ

حْمَامِه.. وْنِحْنَا عَمّ نْطِيرْ

فِيهُنْ بِالظَّرْف الْقَاسِي

ـ2ـ

بَيْنِي وْبَيْنَكْ وَمْضِةْ بَرْقْ

بْتِضْوِي وِبْسرْعَه بِتْزُولْ

وْمَا بْيِنْفَعْ لَوْ تَرْكِت حِرْقْ

مْبَيَّنْ فَوْق جْبِينْ الشَّرْقْ

وِالْغَيْمَاتْ الْـ عَمْ تِتْجَمَّعْ

رَحْ بِتْمَشِّي فَوْقُو سْيُولْ

ـ3ـ

بَيْنِي وْبَيْنَكْ خَلْجِةْ رُوحْ

بْتِفْصِلْنِي عَنْ آثَامِي

عَنْ هَـ الدِّنْيِي الْـ كِلاَّ جْرُوحْ

الْـ مَهْمَا بَعِّدْ فِيهَا وْسُوحْ

سْهُولا.. جْبَالا.. وِالوِدْيَانْ

عَمْ تِتْكَرَّرْ قِدَّامِي

ـ4ـ

بَيْنِي وْبَيْنَكْ صَرْخَه وْبَسّْ

غْفِرْلِي يَا رَبّ غْفِرْلِي

مَهْمَا عْمِلْت بْعُمْرِي نَحْسْ

وْمَهْمَا غْدَرْتْ بْضَوّ الشَّمْسْ

بْتِبْقَى الْبَيّ الْـ مَا فِي مِنُّو

النَّاطِرْ حَتَّى يِنْدَهْلِي!!

**

يهود، نصارى، وإسلام

لقد أبغضت أعيادكم ورذلتها ولا أطيق رؤيتها، واحتفالاتكم الطقسية لا أتحمّلها، ومحرقاتكم وتقادمكم لا أرتضي ولا ألتفت إليها، أَقصِ عني ترانيمك فلا أطيق سماع نغم عيدانك، بل ليجرِ العدل كالمياه والبرّ كنهر لا ينضب

عاموس

ـ1ـ

مَهْمَا الْغِيرِه تْدِقّ بْوَابِي

مُشْ رَحْ إِفْتَحْلاَ يَا رَبّْ

وْمَهْمَا الشَّهْوِه تْغرّ شْبَابِي

بِسْتَبْدِلْهَا بْكِلْمِةْ حُبّْ

حَتَّى لَوْ زَتُّونِي بْغَابِه

كِلاَّ ظُلْم وْحِقْد وْكِذْبْ

مُشْ رَحْ إِقْرَا بْغَيْر كْتَابِي

يَللِّي إِنْت كْتَبْت حْرُوفُو

بَرْكِي بِتْعَمَّدْ بِالصَّلْبْ

ـ2ـ

ما بَدِّي مْلاَيِكْتِي يْقُولُوا:

هَيْدَا وَاحِدْ مِنْ مَلْيُونْ

نَقَّى شَمْعَه بْتِطْلَعْ طُولُو

وْضَوَّاهَا.. وْهُوِّي مَدْيُونْ

مَهْمَا النّدْر تْغِرّ مْيُولُو

مُشْ رَحْ إِنْدُرْ مَهْمَا يْكُونْ

بَعْرِف مَا بْتِنْدَقّ طْبُولُو

وْلا بْتِفْتَحْلُو بْوَاب الْجَنِّه

وْلا بْتِرْضَى يِدْخُلْ مَجْنُونْ!

ـ3ـ

وْبَعْرِفْ إِنَّكْ ما بْتِتْرِكْنِي

مَهْمَا تِسْوَدّ الإِيَّامْ

مَاشِي.. وْإِيدَكْ بِتْبَارِكْنِي

إِنْت الْعَيْن الْـ مَا بِتْنَامْ

أَصْلِي تْرَاب.. وْبَسّ تِفْرِكْنِي

الإِيدَيْنْ.. بْصَفِّي أَحْلاَمْ

مُشْ مُمْكِنْ واحِدْ يِمْلِكْنِي

وْبَعْدُو عَمْ بِيمَيِّزْ بَيْنْ

يَهُود نْصَارَى وْإِسْلامْ...

**

خطايا

لا تحكموا على أحد قبل الأوان، حتى يجيء الربّ الذي هو وحده ينير ما خفي في الظلام، ويكشف نيّات القلوب فينال كل واحد من اللـه ما يستحقّه من المديح

بولس

ـ1ـ

إِشْيَا كْتِيرْ مْخَبَّى بْقَلْبِي

بِطْرِدْهَا وِبْتِرْجَعْ لِيِّي

جَاوِبْنِي دَخْلَكْ يَا رَبِّي

هَـ الهَفْوَات اللِّي نْسِينَاهَا

وِبْطِيبِةْ قَلْب عْمِلْنَاهَا

هَيْدِي رَحْ تِحْسِبْهَا خْطِيِّه؟!

ـ2ـ

وِاللِّي انْغَرْمُوا وْتِعْبِتْ حَالُنْ

ظَلْمِتْهُنْ إِشْيَا دِينِيِّه

شُو بَدُّو يْصَفِّي بْأَحْوَالُنْ

وْإِنْت خْلَقْت الشَّهْوِه بْتُوعَى

بْجِسْمُنْ.. صَرْخَه مُشْ مَسْمُوعَه

هَيْدِي رَحْ تِحْسِبْهَا خْطِيِّه؟!

ـ3ـ

وِالأمّ الْـ زَوْجَا قِمَّرْجِي

وْمَا بِتْشُوفُو لِلصِّبْحِيِّه

جَاعُوا طْفَالا.. كَرْجِتْ كَرْجِه

وْفَتْحِتْ بَاب الْبَيْت وْصَارْ

الْجِنْس يْطَعْمِي وْلاد زْغَارْ

هَيْدِي رَحْ تِحْسِبْهَا خْطِيِّه؟!

ـ4ـ

وِالإِنْسَان الضَّايِعْ حَقُّو

بْدِنْيِي قْوَانِينَا مَالِيِّه

اسْتَحْلَى رْغِيفْ مْحَمَّرْ.. سَرْقُو

مُشْ تَا يْكَدِّسْ مَال حْرَامْ

تَا يْعَبِّي بَطْنُو وِيْنَامْ

هَيْدِي رَحْ تِحْسِبْهَا خْطِيِّه؟!

ـ5ـ

وِالشَّعْب اللِّي كِتْرُوا دْيَابُو

وْطِمْعُولُو بْبَيْتُو حْرَامِيِّه

شُو ذَنْبُو لَوْلا عَ عْتَابُو

خَلاَّ دَمّ الإِعْدَى يْفُورْ

وْخَلَّصْ نَفْسُو.. وْمَات الزُّورْ

هَيْدِي رَحْ تِحْسِبْهَا خْطِيِّه؟!

**

انت الباقي

بيعوا ما تملكون وتصدّقوا بثـمنه على الفقراء، واقتنوا أموالاً لا تبلى وكنزاً في السماوات لا ينفذ، حيث لا لص يدنو ولا سوس  يفسد. فحيث يكون كنزكم يكون قلبكم

يسوع

ـ1ـ

سْمِعْتُنْ عَمْ يِحْتَجُّوا عْلَيْكْ

بْحَيْث الْمَوْت بْإِيدَكْ سَيْفْ

مَوِّتْنِي.. بْبِسْلَكْ إِجْرَيْكْ

وِقْبِلْنِي بْجَنَّاتَكْ ضَيْفْ

ـ2ـ

رْحَمْت النَّاس كْتِير كْتِيرْ

لِمِّنْ خِلَّصْتُنْ مِنْ كَوْنْ

مَجْهُول.. وْكِلُّو حْزَازِيرْ

بْيِمْشُوهْ.. وْبِيضَلُّوا هَوْنْ

ـ3ـ

بِعْذَابُنْ عَمْ يِتْسَلُّوا

وْيِفْتِكْرُوا عْذَابُنْ أَفْرَاحْ

آدَمْ وِرْتُولُو مْحَلُّو

وْمَا دَاقُوا طَعْم التّفَّاحْ!

ـ4ـ

خْلِقْت الأَرْض بْصُورِةْ جَنِّه

عَبْدُوا الصُّورَه وْكِرْهُوا الْحَقّْ

يَا عايِشْ فِيِّي طَمِنِّي

وْخَبِّينِي بْعِينَيْك الزِّرْقْ..

ـ5ـ

كِلّ الْـ مَاتُوا قَبْلِي ارْتَاحُوا

مَاتُوا.. وِالْبَسْمِه عَ تْمَامُنْ

مَا فْقِدْنَالُنْ لِمِّنْ رَاحُوا

مَرْقُوا.. وِانْتَهْيِتْ إِيَّامُنْ

ـ6ـ

إِنْت الْبَاقِي.. وْنِحْنَا الْمَرْقَه

قِدَّام عْيُونَكْ يَا رَبّْ

مُشْ عَمْ بِحْصُد عُمْرِي سِرْقَه

زْرَعْت كْلامَكْ جُوَّا الْقَلْبْ

ـ7ـ

قْرِيتْ التَّوْرَه والإِنْجِيلْ

وِالآيَاتْ الْـ بِالْقُرْآنْ

لْقِيتَكْ (كَفِّه) مَا بِتْمِيلْ

مَهْمَا يِحْتَالْ الإِنْسَانْ!

**

أوثان

لو كان لكم إيمان مقدار حبّة من خردل وقلتم لهذه الجمّيزة: انقلعي وانغرسي في البحر، لأطاعتكم

يسوع

ـ1ـ

دَخْلَكْ يَا رَبّ الأَكْوَانْ

كِل شِي خْلِقْتُو.. مِنَّكْ كَانْ

إِنْت الْمِتْجَسَّدْ بِالإِشْيَا

الْقَادِرْ يِفْهَمْهَا الإِنْسَانْ

ـ2ـ

عَبْدُوا الشَّمْس.. وْنُورَا إِنْتْ

وْعَبْدُوا النّجْمِه الْـ خَلْفَا كِنْتْ

وِالْبَدْر اللِّي بْإِيدَكْ صنْتْ

تَا يْضَوِّي بْلَيْل الْخلاَّنْ

ـ3ـ

وْعَبْدُوا الثَّوْر بْحَيْثُو كْبِيرْ

وْلَحْمَاتُو بِتْغَذِّي كْتِيرْ

وْعَبْدُوا النَّار الْـ عَمْ بِتْطِيرْ

بَالْجَوّ.. وْتِخْلَقْ بُرْكَانْ

ـ4ـ

وْعَبْدُوا الْفَجْر الْـ مَحَّى اللَّيْلْ

وْعَبْدُوا الْغَيْب بْتَانِي مَيْلْ

وْكِلّ مَا انْصَبّ عْلَيْهُنْ وَيْلْ

بْيِلْتِجْيُوا لْبَاقِي (الأَوْثَانْ)

ـ5ـ

كلُّنْ.. مِنْ دُونْ مَا شَافُوكْ

مِنْ مَخْلُوقَاتَكْ عِرْفُوكْ

عَبْدُوا (الإِشْيَا) تَا عَبْدُوكْ

مِنْ دُونْ تِبْشِيرْ وأَدْيَانْ

**

عقول زغار

فدخل الهيكل وأخذ يطرد الذين يبيعون فيه ويشترون.. وأخذ يعلّمهم فيقول: أما جاء في الكتاب: بيتي بيت صلاة لجميع الناس وأنتم جعلتموه مغارة لصوص

يسوع

ـ1ـ

سْمَعُوا كْلاَمُنْ عَمْ بِتْقُولْ!

سْمِعْنَا كْلاَمُنْ وِحْيَاتَكْ

بَسّ فْعَالُنْ مُشْ مَعْقُولْ

نِسْكُتْ عَنْهَا يَا يَسُوعْ

وْعَمْ بِتْشَوِّهْ حَكْيَاتَكْ!

ـ2ـ

جَيْش الرَّحْمِه!!.. أَيَّا رَحْمِه؟

ضِحْكُوا عْلَيْنَا وْضِحْكُوا عْلَيْكْ

وْعِمْلُولَكْ بِالدِّنْيِي نَقْمِه

زَرْعُوا الشَّر بْقَلْب النَّاسْ

وْمَنْعُوها تا تْقَرِّبْ لَيْكْ!

ـ3ـ

فْزِعْنَا مِنَّكْ.. مِنْ أَعْمَالُنْ

فْزِعْنَا نِمْشِي عَ طرْقَاتَكْ

هَوْدِي رْجَالَكْ شُو عَ بَالُنْ

طَعْنُوك بْحَرْبَات الْحِقْدْ

وْشِرْبُوا عَ الْمَذْبَحْ دَمَّاتَكْ!

ـ4ـ

بِتْشُوف الْغِيرِه بِعْيُونُنْ

سَوْدَا مِتل اللَّيْل الْعَابِقْ

وِبْتِخْجَلْ مِنْ كِتْر فْنُونُنْ

لِمْ بِتْلاقِي الْوَاحِدْ مِنُّنْ

خَيُّو عَ الدِّرْهَمْ بِيسَابِقْ!

ـ5ـ

وْبِتْشُوف اللَّعْنِه عَ شْفَافُنْ

عَمْ تِتْمَرْجَحْ لَيْل نْهَارْ

وِبْيِتْبَاهُوا بْعُرْض كْتَافُنْ

بِجْمَاجِمْ أَكْبَرْ مِنْ حَلِّه

لَكِنْ فِيهَا عْقُول زْغَارْ

ـ6ـ

مُشْ كِلُّنْ.. أُوعَا تِظْلِمْنِي،

عَ هَـ الصُّورَه يَللِّي عْطَيْتَا

إِنْت بْتَعْرِف أَكْتَرْ مِنِّي

بَسّ الْكِلْمِه يَللِّي بْقَلْبِي

بْتِحْرُقْ قَلْبِي لَوْ مَا حْكَيْتَا.

**

النبي

أيّها النّاس من كان يعبد محمداً فإن محمداً قد مات، ومن كان يعبد اللـه فإن اللـه حيّ لا يموت

أبو بكر الصدّيق

ـ1ـ

يَا ما رْكَعِتْ عَ مَرْكَعَكْ

وْيَا ما اسْتَجَبْت لْمَطْلَبِي

إنْت الْكَلام الْـ بِسْمَعَكْ

يَا أَعْظَم وْأَشْرَفْ نَبِي

يَا مْحَمَّد الْعَايِشْ مَعَكْ

بِجْوَارْحِي.. وْحُبَّكْ رِبِي

بْقَلْبِي.. صَعب تَا ضَيِّعَكْ

إِنْت الإِيمَان بْمَذْهَبِي

ـ2ـ

سْمَحْلِي إِذَا رَحْ إِشْتِكِي

مْنِ الزِّمْرِة الْـ إِكْلِتْ جَنَاكْ

بْحَيْث الْقَلبْ لَوْ مَا حِكِي

بِيكُونْ عَمْ يِرْفُضْ دُعَاكْ

عِشْت بْفقرْ.. وِالْمَمْلَكِه

اللِّي بْنِيتْهَا.. بْنِيتَا بْتُقَاكْ

صَارِتْ وَرَاك مْشَرْبَكِه

شْيَاطِينْ عَمْ تِلْعَبْ فِيَا

وِلْصُوصْ عَمْ تِطْلُبْ حِمَاكْ

**

بين الجنّة وجهنم

ما عبدتك خوفاً من نارك، ولا طمعاً في جنّتك، ولكن وجدتك أهلاً للعبادة فعبدتك

علي بن أبي طالب

ـ1ـ

مادِدْلَكْ إِيدِي يَا رَبِّي

وْعَ الْكَفّ مْطَرَّزْ عِنْوَانِي

وْصُورِةْ عِينَيِّي مَعْ قَلْبِي

وِالْكِلْمَات الْـ فَوْقْ لْسَانِي

لا تْرَجِّعْهَا.. خِدْهَا بْإِيدَكْ

بَارِكْهَا.. صَيِّرْهَا أْمَانِه

بُكْرَا لَمَّا يْشَرْقِطْ عِيدَكْ

مِنْ إِيدِي بْيِشْرُقْ إِيمَانِي

ـ2ـ

بُكْرَا.. وِالْبُكْرَا مْسَافِتْهَا

عُمْر مْعَلَّقْ فَوْق عْتَابَكْ

بْدَايِه.. مَعْرُوفِه نْهَايِتْهَا

غَبْرَه وْعَمْ بِتْدقّ بْوَابَكْ

حَمِّلْهَا الصّدْق وْخَلِّيهَا

إِيدِي.. تْفَلْفِشْلَكْ بِكْتَابَكْ

تِجْمَعْ كِلْمَاتُنْ.. تِمْحِيهَا

كِذْبُوا عَ الْعَالَـمْ بِغْيَابَكْ

ـ3ـ

مِنُّنْ قَالُوا بْنَار جْهَنَّمْ

رَحْ بِتْعَذِّبْنَا شْيَاطِينْ

وْنِحْنَا كِتْرِةْ مَا مْنِتْأَلَّـمْ

ما عْرِفْنَا هَـ الأَرْضْ لْمِينْ

جَايِي عْلَيْهَا غَصْبِنْ عَنِّي

وْعَ كْتَافِي مِرْمِيِّه سْنِينْ

مُشْ مَعْقُول تْكُون الْجَنِّه

وْكِل مْلايِكْتَا مْجَانِينْ!

ـ4ـ

وْمِنُّنْ قَالوا بِالْفِرْدَوْسْ

رَحْ مِنْلاقِي الْخَيْر حْمَالْ

وِصْبَايَا أَحْلَى مْنِ الشَّمْسْ

بَعْدُنْ مَا عِرْفُوا رِجَّالْ

انْ كَانْت الْجَنِّه مِتْعَه وْبَسّْ

سْمَحْلِي قُول الْـ مَا بْيِنْقَالْ

شُو بْيِنْفَعْنِي خْلاصْ النَّفْسْ

بْجَنِّه كِلاَّ.. جِنْس وْمَالْ

**

راهبة

كل من ترك بيوتاً أو إخوة أو أخوات أو أباً أو أماً أو زوجة أو أبناء أو حقولاً من أجل اسمي، ينال مئة ضعف ويرث الحياة الأبدية

يسوع

ـ1ـ

الرَّاهْبِه اللِّي بْتِنْسَمَى

لِلرَّبّ.. لازِمْ تِخْتِشِي

مِنْ هَيْبتُو.. وْمَا تِنْتِشِي

بْلَذَّاتْ لَعْنِتْهَا السَّمَا

ـ2ـ

لازِمْ.. عَ كَفَّا.. مْلايْكِه

تِخْلَق.. وْتِقْشَعْ حَالْهَا

تَا النَّاسْ لَمَّا بْتِشْتِكِي

وِيْطُوفْ بِعْيُونَا الْبِكِي

بْكِلْمِه تْرَيِّحْ بَالْهَا

ـ3ـ

وِالدَّيْرْ يَللِّي اخْتَارتُو

لازِمْ تْقَدِّسْ حِرْمِتُو

وِتْضَلّ بَيْضَا صَفْحِتُو

تَا سَاعِة الْـ بَدَّكْ تِجِي

يفُوح الْعِطرْ الِبْنَفْسَجِي

مِنْ تَوْبْ أَبْيَضْ لِبْسِتُو..

**

انت الكل

من أراد أن يتبعني، فلينكر نفسه ويحمل صليبه ويتبعني، إذ ماذا ينفع الإنسان لو ربح العالـم كلّه وخسر نفسه

يسوع

ـ1ـ

عَمْ شُوفَكْ بِمْغَارَه وْحَدَّكْ

رَكْعُوا بْهَايِمْ تَا يْدَفُّوكْ

وِاللِّي شْكَلْتُنْ شَامِه بْخَدَّكْ

مْنِ الأَشْجَارْ اللِّي خْلِقْتِلُّنْ

قَصُّوا الْخَشْبَاتْ.. وْصَلْبُوكْ!

ـ2ـ

عَمْ شُوفَكْ هَادِرْ بِالْمَعْبَدْ

تِضْرُبْ بِالْكِرْبَاج لْصُوصْ

تَا تْخَلِّي الْعَالَـمْ يِتْجَدَّدْ

بِالإِيمَانْ.. الْـ صَايِرْ هَلَّقْ

حَرْق شْمُوع وْحِفْظ نْصُوصْ!

ـ3ـ

عَمْ شُوفَكْ وَاقِفْ بِالأرْدُنْ

حَدّ النَّهْر تْعَمِّدْ نَاسْ

وِالنَّاس الْـ عِمَّدْتُنْ بَعْدُنْ

مِنْ أَوْسَخْ أَوْسَاخ الأَرْضْ

عَصْرُوا الْخَمْرَه وْصَبُّوا الْكَاسْ!

ـ4ـ

عَمْ شُوفَكْ إِيدَكْ مَرْفُوعَه

تَا تِشْفِي الأَعْمَى الْمَقْهُورْ

وِالأَعْمَى الْـ خِلَّيْتُو يُوعَى

وِزْرَعْت النُّور بْعِينَيْهْ

لِمِّنْ شَاف اغْتَالْ النُّورْ!

ـ5ـ

عَمْ شُوفَكْ وِالنَّاس الْـ حَوْلَكْ

جَاعُوا.. وِالسَّمْكَات قْلالْ

مِنْ قُوِّةْ جُوعُنْ نَدْهُولَكْ

لَكِنْ لِمِّنْ شِبْعُوا صَارُوا

يْقُولُوا عْلَيْك الْـ مَا بْيِنْقَالْ!

ـ6ـ

وِسْمِعْتَكْ بِتْقِلُّنْ: حِبُّوا

وْكُونُوا مِلْح الأَرْض الصَّافِي

لَمَّا خْلَصْت كْلامَكْ سَبُّوا

الْكِلْمِه الْـ قِلْتَا.. بْحَيْث الشَّرّْ

عَمْ يِمْشِي عَ دْرُوبُنْ حَافِي!

ـ7ـ

وِسْمِعْتَكْ بِتْقِلُّنْ: رُوحُوا

دقُّوا بْوَاب الْـ مَا بْتِنْدَقّْ

وْعَنْ دَرْبِي مَا بْرِيدْ تْزِيحُوا

لَكِنْ لَمَّا تْرَكْتُنْ.. زَاحُوا

وْخَنْقُوا بْكِذْبُنْ صَوْت الْحَقّْ!

ـ8ـ

وِسْمِعْتَكْ بِتْقِلُّنْ: طُوبَى

لِلِّي مِتْل التَّلْج قْلُوبُنْ

افْتَكْرُوا شَمْسَكْ حَانْ غْرُوبَا

دَهْنُوا قْلُوبُنْ إِشْيَا سَوْدَا

وْخَبُّوهُنْ جُوَّات جْيُوبُنْ!

ـ9ـ

وْقِدَّامْ الْيَهُودْ الْـ كَانُوا

عَمْ بِيصِيحُوا: بَدَّكْ صَلْبْ

بِيلاطُوسْ بَيَّنْ إِيمَانُو

وْمَارْ بُطْرُسْ بِـ سَاعَةْ خَوْفُو

نَكْرَكْ قِدَّامُنْ يَا رَبّْ!

ـ10ـ

هَوْدِي وْلاَدِكْ.. قِلْتْ لأمَّكْ

وْدِلَّيْت عْلَيْنَا بْإِيدَيْكْ

وْلِمِّنْ مِتّْ.. شْرِبْنَا دَمَّكْ

وِسْرَقْنَا تْيَابَكْ تَا نْبِيعَا

وْبِالسَّاحَه دِلَّلْنَا عْلَيْكْ!

ـ11ـ

وْبِالآخِرْ.. شِفْتَكْ وِالصَّخْرَه

عَمْ تِنْزَاح.. وْإِنْت تْطِلّْ

مَاشي فَوْق الأَمْس وْبُكْرَا

تَا النَّاسْ الْـ ما عِرْفَتْ بَعْدْ

تَعْرِفْ إِنَّكْ إِنْت الْكِلّْ..

**

مستقبل أيّامي

قل آمنّا باللـه وما أنزل علينا وما أنزل على إبراهيم واسماعيل واسحق ويعقوب والأسباط وما أوتي موسى وعيسى والنبيّون من ربّهم لا نفرّق بين أحد منهم ونحن له مسلمون

سورة آل عمران

ـ1ـ

ما بَدِّي إِتْوَاسَطْ مَعْهُنْ

ما بَدِّي أُوصَلْ بِالشِّفْعَه

مُشْ وَحْدُنْ هِنِّي بْتِسْمَعْهُنْ

وْلا بْتِقْبَل عَ حْسَابَكْ دَفْعَه

قِدِّيسِينْ.. سْمِعْنَا عَنْهُنْ

وْنِحْنَا مِتْلُنْ بَدّنَا نِسْعَى

تَا نْصَفِّي يَا أَللَّـه مِنْهُنْ

نُوقَفْ قِدَّامَكْ وِنْضَوِّي

حَدَّكْ مَا بِتْدُوب الشَّمْعَه

ـ2ـ

ما بَدِّي إِطْمَعْ بِالْجَنِّه

بَدِّي كُون بْقُرْبَكْ بَسّْ

تَا حَتَّى أَنْوَارَكْ مِنِّي

تِسْطَعْ.. وِتْصَيِّرْنِي شَمْسْ

بِفْرَحْ كِلْمَا لإِسْمَكْ غَنِّي

وِالدِّنْيِي بْتِتْحَوَّلْ عُرْسْ

وْبَعْرِفْ مَا بْتِتْخَلَّى عَنِّي

وَحْدَكْ مِسْتَقْبَل إِيَّامِي

وْغَيْرَكْ تِذْكَار مْنِ الأَمْسْ

ـ3ـ

رَحْ بِيقُولُوا عَنِّي كَافِرْ

قِلُّنْ مُشْ هَيْك الْكُفَّارْ

يَللِّي الْبَرْكِه مِنَّكْ نَاطِرْ

مُشْ مُمْكِنْ تِرْمِينِي بْنَارْ

يَا رَبّ اللِّي بْفِكْرِي مْسَافِرْ

مِنْ دُونَكْ مَا فِي أَفْكَارْ

إنْت الْعَقْل الْكَافِي الْقَادِرْ

تِخْلِقْنِي بْهَيْئَات كْتِيرِه

وْتِرْجَعْ تِمْحِينِي بِنْهَارْ

ـ4ـ

سَاعِدْنِي.. سَاعِدْنِي أَكْتَرْ

تَا غَيِّرْ هَـ النَّاس الْـ هَوْنْ

تَا إِصْرُخ: أَللَّـهْ وأَكْبَرْ

تَا صَلِّبْ يَا رَبّ الْعَوْنْ

تَا أَدِّنْ وِالْفَجْر مْنَوَّرْ

تَا قَدِّسْ وِيْدُوب اللَّوْنْ

سَاعِدْنِي أُوقَفْ عَ الْمِنْبَرْ

وِبْإِيدَيِّي كِتْبَكْ كِلاَّ

وْوَحِّدْ بِـ كِتْبَكْ هَـ الْكَوْنْ

**

خرافات

الويل لكم، يا معلّمي الشريعة، استوليتم على مفتاح المعرفة، فلا أنتم دخلتم، ولا تركتم الداخلين يدخلون

يسوع

ـ1ـ

بَدُّنْ يَانِي إِنِّي صَدِّقْ

قِصِّةْ حَوَّا وْبَعْلاَ آدَمْ

وِاللِّي بِيفَتِّشْ وِيْدَقِّقْ

بْصِحِّةْ هَـ الْقِصَّه التِّعْبَانِه

الْـ لِعْبِتْ بِالْعَقْل الإِنْسَانِي

عَ مَوْتَاهُنْ مَا بْيِتْرَحَّمْ!

ـ2ـ

وْبَدُّنْ يَانِي إِنِّي قُولْ:

مُوسَى شَقّ الْبَحْر وْصَارْ

يْمَرِّقْ نَاسْ، دْجَاجْ، عْجُولْ

وْخَلَّصْ شَعْبُو مْنِ الْفِرْعَوْنْ

دَخْلَكْ يَا مْسَيِّرْ هَـ الْكَوْنْ

لَيْش خْلِقْت عْقُول زْغَارْ

بِتْفَكِّرْ إِنَّكْ قِهَّارْ

حَامِلْ سَيْف مْشَرْقَط نَارْ

تَا تْقَتِّلْ مَا تْخَلِّي هَوْنْ

إِلاَّ هَـ الشَّعْب الْمُخْتَارْ!

ـ3ـ

وْبَدُّنْ يَانِي إِنِّي خَبِّرْ

قِصِّةْ هَـ التِّنِّينْ الْـ كَانْ

رَحْ يِمْحِي إِتْر النِّسْوَانْ

لَو مَا إنت شْوَيِّه تْدَبِّرْ

وِتْوَدِّي شَيْخ الْفُرْسَانْ

وْلَيْش (النِّسْوَانْ) يَا رَبِّي

هَوْن السِّرّ بْهَـ الْكِذْبِه!

ـ4ـ

لَوْ لِي مْرُوِّه إِنِّي عِدّْ

خْرَافَات الْـ عَمْ نِلْحَقْهَا

بَيْن الْمَزْح وْبَيْن الْجَدّْ

بِتْصَفِّي دِينَيْك تْسِدّْ

وِتْقُول لْحَالَكْ يَا رَبِّي:

الْمُؤْمِن عَيْب يْصَدِّقْهَا!

**

كلمات

إن الذين آمنوا ثـم كفروا ثـم آمنوا ثـم كفروا ثـم ازدادوا كفراً لـم يكن اللـه ليغفر لهم ولا ليهديهم سبيلا

سورة النساء

القصيدة الأولى:

مْحَمَّد اللِّي كَانْ صَرْخَةْ حُبّْ

وِنْبُوّتُو إِحْسَاسْ

فَسّرُوا كْلامُو جِهَاد وْحَرْبْ

وِجْنَاسْ ضِدّ جْنَاسْ!

شْيُوخْ عِنْدُنْ لِلْحِقِد وِالْكِذْبْ

وِالتَّفْرِقَه نِبْرَاسْ

حَوّلُوا الْقُرْآنْ دسْتُورْ حِزْبْ

وِالِوْرَاقْ.. كْيَاسْ!

**

القصيدة الثانية:

.. وْبِيعَلّقُوا الصّلْبَانْ عَ صْدُورُنْ

وْبِيكَبّرُوا الِقْيَاسْ

تَا يْسَتّرُوا بْصلْبَانُنْ شْرُورُنْ

عَن عْيُون النَّاسْ

**

القصيدة الثالثة:

تَاج الْمَسِيح الْـ كَانْ مِنْ بِلاَّنْ

تَا الدَّمّ غَطَّى الرَّاسْ

حَرْقُوه.. قَالُوا: كَهْنِة الأَدْيَانْ

بْيِلْبَقِلْهَا الإِلْمَاسْ!

**

القصيدة الرابعة:

الأَرْضْ هِيِّي الأَرْضْ

بِالطُّولْ أَوْ بِالعُرْضْ

وْبَعْدُو "الشَّعبْ" مَوْعُودْ

بْأَرْضْ فِيهَا الْمَنّْ

فِيهَا الْكَرَمْ وِالْجُودْ

وْإِيدَيْنْ تِخْلَقْ فَنّْ

تْعَمِّرْ سَهل وِجْرُودْ

تَا تْرَجِّع "اليَهُودْ"!

**

القصيدة الخامسة:

لَيْش الدِّينْ مْغَيَّرْ دَرْبُو

وِرْجَالُو عَ دْرُوبَكْ تِعْبُوا

هِنِّي يَللِّي اخْتَارُوا دَرْبَكْ

وْفَزْعُوا تَا مِتْلَكْ يِنْصِلْبُوا؟!

**

القصيدة السادسة:

سُبْحَانَكْ يَا بَيّ الْكلّ

عَنَّكْ أَعْمَالَكْ بِتْدِلّْ

مَهْمَا تْكُون الْعِلِّه كْبِيرِه

بْنقْطِةْ مَيّ.. بْعشْبِه زْغِيرِه

بِتْدَاوِي الْجِسْم الْمِعْتَلّْ

ـ2ـ

مَا فِي صَخْرَه بْأَرْض زْرَعْتَا

إِلاَّ وْحَدَّا مْهَدِّه وْمُخْلْ

وْمَا في رَقْبِةْ شَخْص رْفَعْتَا

إِلاَّ وْوِطَّيْتَا مِنْ قَبْلْ

وِالْعَيْلِه الْـ بِالبَيْت جْمَعْتَا

فِرْفَطَّا بِجْرُود وْسَهْلْ

دِنْيِي.. وْعَ ذَوْقَكْ وْزَّعْتَا

الإِخْوِه بْيِخْتِلْفُوا مَعْ بَعْضُنْ

وِالإِعْدَى بْيِجْتِمْعُوا "أَهْلْ"!

**

القصيدة السابعة:

هَـ الأَصْحَابْ اللِّي حِبَّيْتُنْ

وْمِنْ دَمْعَات الْعَيْن سْقَيْتُنْ

تَرْكُونِي مْعَلَّق بِلْسَانِي

ضِحْكُوا عْلَيِّي وْعَ أَحْزَانِي

وْطَعْنُوا مَطْرَحْ مَا خِبَّيْتُنْ!

ـ2ـ

حْمِلْتُنْ بَسْمِه فَوْق التِّمّْ

رِبَّيْتُنْ.. كِنْتِلُّنْ أُمّْ

رِضَّعْتُنْ.. عَضُّولِي بْزَازِي

وْمَا عْرِفْت بْإِيَّام الْعَازِه

رَحْ يِسْقُونِي بْإِيدُنْ سَـمّْ

ـ3ـ

دَخْلَكْ يَا أَللَّـه سَاعِدْنِي

لاَقِي الشَّخْص اللِّي بْيِسْعِدْنِي

تَا شُوفَكْ بِعْيُونُو وْإِفْرَحْ

مَادِدْ إِيدَكْ وِسْع الْمَطْرَحْ

تَا عَنُّنْ كِلُّنْ تِبْعِدْنِي!

**

خسروك

طوبى للمساكين في الروح لان لهم ملكوت السماوات.. طوبى للجياع والعطاش الى البرّ لأنهم يشبعون.. طوبى لأنقياء القلوب لأنهم يرون اللـه

يسوع

ـ1ـ

تْطَلَّعْ فِيهُنْ.. مَا بِتْشُوفْ

غَيْر الْغِشّ بْعِينَيْهُنْ

غَيْر الرَّجْفِه بْإِيدَيْهُنْ

وْصَوْب النَّار صْفُوف صْفُوف

بْيِمْشُوا.. وِالتَّوْب عْلَيْهُنْ!

ـ2ـ

هِنِّي اللَّعْنِه وْهِنِّي الْكِذْبْ

وِشْرُورُنْ مَا أَكْتَرْهَا

خِلْقُوا.. لَكِنْ مِنْ دُونْ قَلْبْ

وْتَا مَا يْضَلُّوا لْوَحْدُنْ فِرْجِه

حَطُّوا بْدَال الْقَلْب سْفِنْجِه

يَا دِلّ اللِّي بْيِعْصِرْهَا!

ـ3ـ

وْنِسْيُوا إِنُّو حْسَابُنْ قَرَّبْ

وِعْمُارُنْ أَقْصَرْ مِنْ تَكِّه!

وْنِسْيُوا إِنُّو الْـ ما بْيِتْحَسَّبْ

لآخِرْتُو.. مْأَكَّدْ رَحْ يِبْكِي

خِسْرُوا مْحَبِّتْنَا وِالأَصْعَبْ

خِسْرُوك بْحَيْثَكْ مَا بْتِحْكِي!

ـ4ـ

عَارِفْ مَهْمَا إِكْتُبْ ضِدُّنْ

بَاقِي فِيهُنْ نَاس مْنَاحْ

عَاشُوا بْهَـ الدِّنْيِي صِلاَّحْ

نِبْرَاسُنْ قَهْر الشَّيْطَانْ

نِبْرَاسُنْ خَيْر الإِنْسَانْ

الْمِتْشَوَّقْ تَا يْلاَقِي عِنْدُنْ

بَرْكِه وِقْدَاسِه وْإِيمَانْ

ـ5ـ

هَوْدِي الْـ بِتْمَنَّى يَا رَبِّي

فَرِّخْ شَامِيِّه عَ خَدُّنْ

إِتْعَمْشَقْ فِيهُنْ تَا قَلْبِي

يِتْعَطَّرْ مِنْ رِيحِةْ وَرْدُنْ

**

حرقهن كلّن

احملوا نيري وتعلّموا منّي تجدوا الرّاحة لنفوسكم، فأنا وديع متواضع القلب، ونيري هيّن وحملي خفيف

يسوع

ـ1ـ

رْسَمْتِلَّكْ بِعْيُونِي صُورَه

أَجْمَلْ مِنْ كِلّ الْمَعْمُورَه

وْخِبَّيْتَكْ بِـ قَلْبِي وْصِرْتْ

إِحْرِقْلَكْ قَلْبِي بَخُّورَه

وْعَتْمِةْ أَيَّامِي نُوَّرْتْ

بِنْجُومَكْ.. تَا يْشَرْقِطْ نُورَا

يَللِّي وْلاَ مَرَّه تْغِيَّرْتْ

غَيِّرْنِي.. عْمِلْنِي عُصْفُورَه

يَامَا وْيَامَا بْفِكْرِي طِرْتْ

لْجَنِّةْ حُبَّكْ يَا يَسُوعْ

وْغِسَّلت النَّفْس مْنِ شْرُورَا

ـ2ـ

يَا طِفْل الْـ عَمْ تِخْلَقْ هَلَّقْ

بِمْغَارَه.. وِاللَّيْل مْخَزَّقْ

بِشْرُورُو.. بْآهَاتُو الْحَمْرَا

بْجِنْسُو.. وِبْخَمْرُو الِمْعَتَّقْ

خَلِّي الشَّمْس تْشَعْشِعْ بُكْرَا

وْخَلِّي الْمَرْج يْحَاكِي الزَّنْبَقْ

وْخَلِّي بْلادِي الْـ زَايِدْ قَهْرَا

تِتْنَعَّمْ بِالْجَوّ الأَزْرَقْ

يَا إِبْن الْعِزِّه وِالْقُدْرَه

لا تْمَوِّتْ أَرْضِي.. خَلِّصْهَا

وْخَلِّيهَا بْمِيلادَكْ تِخْلَقْ!

ـ3ـ

مَا إِلْنَا غَيْرَكْ.. نَجِّينَا

مْنِ مْصَايِبْ عَمْ تِنْزلْ فِينَا

مْنِ حْرُوب تْفَرِّقْ وِتْبَعِّدْ

بَيْن النَّاسْ الْـ بَاعِتْ دِينَا

لا تِتْرِكْهَا بْعَطْفَكْ جَدِّدْ

إِيمَانَا.. وْوَصِّلْهَا لْمِينَا

حُبَّكْ.. يَا أَعْظَمْ مِنْ سَيِّدْ

يَا رَبّ الْـ عَمْ بِتْآخِينَا

هَـ الْعَتْمَات السَّوْدَا بَدِّدْ

عَنَّا.. عَنْ هَـ الأرْض الْـ صَارِتْ

تِتْلاَعَبْ فِيهَا شْيَاطِينَا!

ـ4ـ

مَا عْرِفْنَا هَـ الْعُمْر بْيِقْصَرْ

وِنْهَايِتْنَا مَا بْتِتْغَيَّرْ

تَا زْرَعْنَا الْكِذْب وْخِلَّيْنَا

الشَّرّ الأَسْوَد يِعْلاَ وْيِعْمَرْ

وْكِيفْ مَا تْطِلَّعْنَا بْعِينَيْنَا

نْشُوف اللَّوْن الأَبْيَضْ أَحْمَرْ

نِحْنَا يْئِسْنَا.. حِنّ عْلَيْنَا

وْخَلِّصْنَا مْنِ الْوَحْش الأَكْبَرْ

الْوَحْش الْـ عَمْ يِقْطَعْ إِيدَيْنَا

الْوَحْش الْـ عَمْ يِسْرُق أَرْوَاحْ

النَّاسْ.. وْبِـ دَمَّاتُنْ يِسْكَرْ!

ـ5ـ

لَوْلا وْجُودَكْ مَا فِي وْجُودْ

يَا طِفْل الْعَدْرَا الْمَوْلُودْ

بْدِنْيِي مَا فِيهَا إيمَانْ

بْدِنْيِي عَمْ تِحْكِمْهَا قْرُودْ!

يَللِّي زِيَّنْت الأَكْوَانْ

وْلُوَّنْت الْعَالَـمْ تَا يْسُودْ

الْعَدْلْ.. وْتِتْخَالَط أَلْوَانْ

كِرْهُوكْ وْكِرْهُوا الْمَقْصُودْ

وِاسْتَحْيُوا بْلَوْن الإِنْسَانْ

وِاغْتَالُوا بَعْضُنْ عَنْ قَصْدْ

حُمْر وْبِيض وْصفْر وْسُودْ!

ـ6ـ

.. وْهَـ الْبِنْت اللِّي خْلقْتَا أُمّْ

تَحْت جْنَاحَا الشَّمْل تْلِمّْ

وِزْرَعْت بْبَطْنَا الأَرْوَاحْ

صَارِت سِلْعِةْ لَحْم وْدَمّْ!

وِاللِّي سِلَّمْتُو الْمفْتَاحْ

تَا نَسْلَكْ مِنْ نَسْلُو يْعِمّْ

صَفَّى يْبِيعْ اللَّذِّه.. وْرَاحْ

يْتَاجِرْ بِالسَّمّ الْفَتَّاكْ

وِيْجَرِّبْ بِطْفَالُو السَّمّْ!

ـ7ـ

حِبَّيْتَكْ.. مَا شِفْتَكْ.. لَكِنْ

كِنْت الرُّوح بْجِسْمِي سَاكِنْ

بْدَقَّات الْقَلْب الْمَسْمُوعَه

بِالْهِمِّه.. بِالزّنْد الْمَاكِنْ

نَيِّمْنِي وِتْرِكْنِي أُوعَى

شَمْس.. بْلَيْل الظّلْم الدَّاكِنْ

تَا هَـ النَّاس الْـ دَابُوا شْمُوعَا

تَاخُد مِنِّي النُّور.. وْصَفِّي

إِمْحِي قْبُور وْضَوِّي مْسَاكِنْ

ـ8ـ

تْرِكْنِي وَحْدِي إِمْشِي بْدَرْبَكْ

الدَّرْب الْـ بِتْوَصِّلْنِي لْحُبَّكْ

كِتْرُوا رْجَالَكْ.. لَكِنْ قَلُّوا

وَقْت الْـ مِشْيُوا مْرَاحِلْ صَلْبَكْ

وِالدِّين اللِّي رْسَمْتُو كِلُّو

تَا يْوَصِّل لِلْجَنِّه شَعْبَكْ

بَاعُوه.. وْبَعْدُنْ بِيصَلُّوا

حْرِقْهُنْ كِلُّنْ مِنْ دُونْ شَفْقَه

كِلُّنْ شَكُّوا الْحَرْبِه بْقَلْبَكْ!

**

شموع جديدة

ان كانت حبّة الحنطة لا تقع في الأرض وتموت، تبقى وحدها، وإذا ماتت أخرجت حبّاً كثيراً

يسوع

ـ1ـ

وَقِّفْنِي عَ حْدُود الْوَيْلْ

وْحَمِّلْنِي النُّور بْإِيدِي

بَرْكِي بْيِسْرُق عَتْم اللَّيْلْ

مِنْ نُورِي شْمُوع جْدِيدِه

ـ2ـ

زْرَعْنِي عَ حْفَافِي الإِيَّامْ

زَهْرَه.. وْغَرِّقْنِي بِاللَّوْنْ

تَا لَوِّنْ كِلّ الأَحْلامْ

الْـ عَمْ تِمْرقْ بِعْيُون الْكَونْ

ـ3ـ

صَيِّرْنِي حْكَايِه مْخَرْطَشْهَا

بْإِيدَكْ.. تَا تْخَبِّرْهَا النَّاسْ

لْبَعْضَا.. وْعَ شْفَافَا تْطَرْطِشْهَا

مِتْل الْخَمْرَه الْـ مِنْ دُون كَاسْ

ـ4ـ

يَا رَبّ.. الْـ عَمْ يِمْرقْ هَلَّقْ

مِنْ عُمْرِي مُشْ مُمكِنْ يِرْجَعْ

لا تِنْسِينِي بْمَاضِي مْخَزَّقْ

لَبِّسْنِي الْحَاضِرْ تَا إِلْمَعْ

ـ5ـ

شْلَحْنِي بْشِي دِنْيِي مِنْسِيِّه

تَا نَفِّضْ غَبْرِتْهَا.. وْصِيرْ

إِزْرَعْهَا بْأُوف الْغِنِّيِّه

الْـ وَقْعِتْ مِنْ تِمّ عْصَافِيرْ

ـ6ـ

وْبِالسَّاعاتْ الْـ عَمْ تِتْأَخَّرْ

نْفِخْنِي رِيح وْوَمْضِةْ بَرْقْ

بَرْكِي بْتِسْرَعْ فِيِّي أَكْتَرْ

وِبْتُوصَلْ عَ بْلاد الشَّرْقْ

ـ7ـ

طَيِّرْنِي فْرَاشِه بِالْجَوّْ

حِمْلِتْ فَوْق جْنَاحَا هْمُومْ

تَا إِحْرُق حَالِي بْشِي ضَوّْ

وْإِرْجَعْ بَعْد الْمَوْتِه قُومْ..

**

إعتراف

هكذا يكون الفرح في السماء بخاطىء واحد يتوب أكثر من الفرح بتسعة وتسعين من الأبرار لا يحتاجون الى التوبة

يسوع

ـ1ـ

كان لْوَحْدُو عَمْ بِيصَلِّي

وْدَمْعَاتُو عَ الْخَدّ سْيُولْ

صِفَّيْت بْدِينَيِّي مَلِّي

حَكْيَاتُو اللِّي عَمْ بِتْقُولْ:

ـ تَا قِلَّكْ: مُشْ خَاطِي.. خَاطِي

وِالذِّلّ بْيِنْخُرْ بِعْضَامِي

وِبْقَفْوِةْ إِيَّامِي لاطِي

وْعَمْ تِخْجَلْ مِنِّي أَيَامِي

بِحْكِي.. وْمَا بُوزِنْ حَكْيَاتِي

وْبِفْرَحْ لَمَّا الشَّرّ يْعِمّْ

وْعَ طُول بْحَضِّرْ مَازَاتِي

تَا إِسْكَرْ مِنْ دَمْع وْدَمّْ

مْنِ السِّرْقَه.. لازِمْ إِيدَيِّي

تِنْقَصّ وْتِنْزَتّ بْنَارْ

وْلازِمْ يِنْطِفْيُوا عِينَيِّي

خِبَّيْت بْعِينَيِّي الْعَارْ

وْيَا رَبِّي.. الْكِذْبَاتْ السَّوْدَا

الْـ عَمْ إِكْذِبْهَا مَا بْتِنْعَدّْ

رَحْ إِخْرُبْ هَـ الدِّنْيِي الْـ بَعْدَا

مَا حَطِّتْ لِشْرُورِي حَدّْ!

ـ2ـ

وْفَجْأَه عَلَّى صَوْتُو وْقَالْ:

الإِنْسَانْ بْيِبْقَى إِنْسَانْ

بْيِتْعَبْ تَا يْجَمِّعْ أَمْوَالْ

وْبِيرُوح لْعِنْدَكْ عرْيَانْ!

ـ3ـ

وْقِلْت لْحَالِي: مِينْ الأَعْظَمْ

رِجَّال الدِّينْ الْمَغْرُورْ

أَمْ هَـ الإِنْسَان الْـ عَمْ يِنْدَمْ

تَا يْشِعّ بْعَتْمَاتُو النُّورْ؟!

**

ما بدّنا نستشهد

فيضربون سيوفهم سككاً، وأسنّتهم مناجل، فلا ترفع أمّة على أمّة سيفاً، ولا يتعلّمون الحرب من بعد، ويقيم كلّ واحد تحت عريشته وتينته ولا أحد يذعره

ميخا: سادس الأنبياء، معنى اسمه المسكين.

ـ1ـ

بْيِقْضُوا عَ النَّاس وْبِيقُولُوا:

صَارُوا شُهْدَا

أْسَامِيهُنْ مَكْتُوبِه بْنُورْ

وْعُمْرُن لِبْلادُنْ مَنْدُورْ!

وْمَوْتُنْ.. شُو مَوْتُنْ؟!.. غَنُّولُو

فَرْحِةْ أُمّ بْكِلْمِةْ زُورْ

وْبَعْدَا مُشْ فِهْمَانِه بَعْدَا!

ـ2ـ

مَيِّزْ دَخْلَكْ يَا خَالِقْنَا

بَيْن الظَّالِـمْ وِالْمَظْلُومْ

بَيْن اللِّي بْإِيدُو بْيِخْنِقْنَا

وْبَيْن الْـ بِيمَسِّح دْمُومْ

خْلِقْنَا.. حَتَّى نْعِيش الْعُمْرْ

وْيِطْلَع مِنْ عِينَيْنَا فَجْرْ

يْضَوِّي الدِّنْيِي بْلَيْل الغَدْرْ

وْيِرْجَعْ مِنْ مَقْبِرْتُو يْقُومْ

ـ3ـ

كِذْبُنْ.. أَكْتَرْ مَا بْتِتْصَوَّرْ

بِتْشُوفُو عَ شْفَافُنْ أَصْفَرْ

يَابِسْ مِتْل اللَّعْنِه وْنَاطِرْ

دِينَيْن بْخَمْرَاتُو تِسْكَرْ

كِذْبُنْ.. مِنْ أَوِّلْتُو تَاجِرْ

صَفْقَاتُو مُشْ مُمْكِن تِخْسَرْ

مِعْمَرْجِي وِبْيُوتُو مْقَابِرْ

عَمْ نِدْفَعْلُو حَقَّا وْهِيِّي

مْنِ جْمَاجِمْنَا عَمْ تِتْعَمَّرْ!

ـ4ـ

خْلِقْنَا.. حَتَّى نْمَجِّدْ إِسْمَكْ

وْنِرْسُمْ وِسْع الدِّنْيِي رَسْمَكْ

نِتْطَلَّعْ فِيهْ وْمَا نِتْعَبْ

وْتَاخِدْنَا يَا أَللَّـه بْحِلْمَكْ

تَا نِكْبَرْ وِيْشِيبْ الرَّاسْ

وْعَ طْرَافِينَا عْيَال بْتِلْعَبْ

بِمْحَبِّه.. بْخَيْر.. بْإِحْسَاسْ

وْمَا يْقَرِّبْ صَوْبَا يُوضَاسْ

وَاحِدْ.. وِبْكِذْبُو تِتْجَرَّبْ

تَا يْعَبِّي بْدَمَّاتَا الْكَاسْ

وِيْفَرْفِطْ عُنْقُود مْدَهَّبْ!

ـ5ـ

مُشْ مُمْكِنْ نِتْرُكْ حَاضِرْنَا

وْمُسْتَقْبَلْنَا يْضِيعُوا سْوِيِّه

وْهَللِّي طِلْعُوا مْنِ خْوَاصِرْنَا

نْقَدِّمْهُنْ لِلْمَوْت هْدِيِّه

لِزْعَاماتُنْ حَتَّى تِقْوَى

لِسْيَاسَاتُنْ هَـ الْمِجْوِيِّه

لِخْزَانَاتُنْ هَللِّي بْتِحْوَى:

أَمْوالْ.. جْوَاهِرْ وِصْبَايَا

وْأَزْلامْ انْخَصْيُوا صُبْحِيِّه!

ـ6ـ

تْأَخَّرْنَا حَتَّى نِتْعَلَّمْ

كِيفْ نْقَاوِمْ طَبْع مْأَجْرَمْ

كِيف نْخَلِّي الْكِلْمِه السَّوْدَا

تِتْمَحَّى.. وِاللَّيْل مْعَتَّمْ

وْكِل مَا طَلْبُوا نْقَدِّمْ شُهْدَا

عَنُّنْ.. عَنْ جَاهُن الِمْعَظَّمْ

نُوقَفْ بِوْجُوهُنْ.. نِتْحَدَّى

وِبْإِيدَيْنَا سَيْف مْسَمَّمْ

حَتَّى الرَّقْبِه الْـ رَحْ مِنْقِدَّا

نْقِدَّا.. وْنِحْنَا عَمّ نْقُولْ:

مُشْ مُمْكِنْ يَا أَللَّـه نِرْحَمْ

ـ7ـ

يَامَا وْيَامَا بْإِسْم الدِّينْ

خَدْعُونَا رْجَال مْلاَعِينْ

قَالُوا: رْجَالَكْ.. مُشْ مَعْقُولْ

عَ الْجَنِّه يْفُوت شْيَاطِينْ!

مْصِيبِتْنَا.. إِنُّو عَ طُولْ

مِنْصَدِّقْهُنْ يَا أَللَّـه

كْتَابَكْ بِـ إِيدُنْ مَحْمُولْ

وْنِحْنَا كِتْبَكْ مِنْجِلاَّ

لَكِن بِـ ذات الْمَكْيُولْ

رَحْ مِنْكَيِّلُّنْ أَكْتَرْ

يَللِّي بْإِسْمَكْ دَبْحُوا عْقُولْ

رَحْ مِنْحَاكِمْهُنْ يَا رَبّْ

بْإِسْمَكْ.. تَا بْإِسْمَكْ نِكْبَرْ

ـ8ـ

مَا بَدّنَا نِسْتَشْهِدْ.. بَدّنَا

نْمُوت الْمَوْتِه اللِّي بْتِخْتَارَا

وَحْدَكْ إِنْت الْـ بِتْسَاعِدْنَا

نِقْضِي عَ زُمْرَه غَدَّارَه

كِلْمَا قْرِبْنَا.. بِتْبَعِّدْنَا

وْبِتْنَسِّينَا جْهَنّم.. نَارَا

هَيْدِي.. شُو هَيْدِي سَيِّدْنَا

زُمْرَه.. وْعَمْ تِتْبَاهَى بْعَارَا

فَتْحِتْ مَصْرِفْهَا بْمَعْبَدْنَا

وِبْمَوْطَنَّا بَيْت دْعَارَه؟!

ـ9ـ

الْمَوْتِه اللِّي بْتِتْسَمَّى حَقّْ

هِيِّي اللِّي بْأَمْرَكْ بِتْصِيرْ

كِلْمَا التَّارِيخْ بْيِنْشَقّْ

مِنْلاقِي بْقَلْبُو حْزَازِيرْ:

أَحْكَام بتِلْغِي أَحْكَامْ

وِنْظَام بْيِقْوَى عَ نْظَامْ

وِقْصُور بْتِعْلُفْ أَزْلامْ

وْأَسْيَاد بْتِشْبَعْ تِبْخِيرْ

وِاللِّي تْطَوَّعْ حَتَّى يِحْمِي

بْلادُو مْنِ الْمُسْتَعْمِرْ.. صَارْ

غِنِّيِّه مِنْسِيِّه وْكِلْمِه

مُشْ سَامِعْ فِيهَا تِذْكَارْ!

أَمَّا الإِعْدَى الْـ كَان يْحَارِبْ

صَفُّوا بِبْلادُو.. حُكَّامْ!

وِالنَّاس الْـ قِدَّامُنْ سَاكِبْ

دَمُّو.. تَا يْحَقِّقْ أَحْلامُنْ

صَفُّوا لِلإِعْدِى.. خِدَّامْ!

ـ10ـ

مُشْ كِلّ "شْهَادِه" بْتِتْسَمَّى

شْهَادِه.. وْلازِمْلا تِقْدِيسْ

مِتْل الأُمّ الْـ مَاتِتْ لَمَّا

هَدَّدْ عَيْلِتْهَا تَلْبِيسْ

مِتْل الْـ عَطْيُوا الدِّنْيِي نُورْ

وْمِحْيُوا بْكِلْمِتْهُنْ دَيْجُورْ

وْمِتْل اللِّي انْصَلْبُوا بِالزُّورْ

تَا يْنَفِّذْ أَحْكَامُو بْلِيسْ!

ـ11ـ

عَمّ نْرُوح وْكِلّ شِي بَاقِي

الْبَيْت.. الأَرْضْ الْـ كِلاَّ سْوَاقِي

وِحْدُود انْرَسْمِتْ عَ الْوَرْقَه

تَا تِفْصُلْ عَالَـمْ مِتْلاَقِي

مَعْ بَعْضُو.. بْدِنْيِي رَحْ تِبْقَى

تْطَعِّم خْلاَقِي بِخْلاَقِي!

ـ12ـ

مَهْمَا بْعِدْنَا مْنِبْقَى إِخْوِه

بِذْرِتْنَا بِذْرِه مَعْرُوفِه!

شُو بْيِنْفَعْنِي عُوز الْقُوِّه

مَعْ إِخْوِه كَانِتْ بِصْفُوفِي

وْلِحْقِت مْصَالِحْهَا.. وْصَارِتْ

أَيَّامَا تْسَابِقْ أَيَّامِي

نْسِيتَا.. نِسْيِتْنِي.. وِاحْتَارِتْ

فِينَا الْحِيرِه.. وْصَفَّى الدَّهْرْ

يْصَوِّرْهَا إِعْدَى قِدَّامِي

ـ13ـ

مُشْ رَحْ إِقْتُلْ خَيِّي بْإِيدِي

وْإِحْملْ عَ كْتَافِي دَمَّاتُو

بَدِّي إِنْشُرْ فِكْرَه جْدِيدِه:

هَللِّي بْيِسْتَشْهِدْ يَا رَبِّي

بْدِنْيِي مِنْ أَوِّلْتَا كِذْبِه

بِيرَوِّحْ ضِيعَان حْيَاتُو!

**

لقيتك حبّ

يا ربّ قد اختبرتني وعرفتني. أنت عرفت جلوسي وقيامي، فهمت فكري من بعيد، مسلكي ومربضي ذريت وكل طرقي عرفت. لأنه ليس كلمة في لساني إلاّ وأنت يا ربّ عرفتها كلّها

داود النبي

ـ1ـ

مُشْ عَارِفْ شُو بَدِّي قِلَّكْ

يَللِّي فَوْق لْسَانِي مْحَلَّكْ

يَللِّي الْفِكْرَه الْـ عَمْ فَكِّرْهَا

وِالْكِلْمَات الْـ عَمْ إِنْشِرْهَا

بِخْطُوط حْرُوفُنْ مِتْمَلَّكْ!

ـ2ـ

قالُولِي: إِنَّكْ مَا بْتِرْحَمْ

مِنْ ظُلاَّم الْعَالَـمْ أَظْلَمْ

وْلِمِّنْ عَاشَرْتَكْ يَا رَبِّي

لْقِيتَكْ حُبّ وْحَكْيُنْ كِذْبِه

وْصِفَّيْت بْجَنَّاتَكْ إِحْلَـمْ

ـ3ـ

وْقَالُولِي عَنَّكْ نِصْرَانِي..

مِسْلِم وِكْتَابَكْ قُرْآنِي..

وْيَهُودِي وْشَعْبَكْ مُخْتَارْ..

لَكِنْ لَمَّا عْرِفْتَكْ صَارْ

تِغْيِير بْجَوْهَرْ إِيمَانِي

ـ4ـ

شِفْتَكْ "كِلُّنْ" مُجْتِمْعِينْ

بْمِيزَانَكْ مَا بْيِرْجَحْ دِينْ

وْشِفْتُنْ طِمْعَانِينْ بْحُبَّكْ

وِكْتَابُنْ مِفْتَاح لْقَلْبَكْ

وْبِتْلاقِيهُنْ مُخْتِلْفِينْ!

ـ5ـ

إِنْت الرَّبّ الْـ مَادِدْ إِيدُو

لْمُطْلَقْ إِنْسَانْ بْهَالأَرْضْ

بَسّ الْمُتْعَصِّبْ لا تْشِيدُو

مَهْمَا تْعَصَّبْلَك رَحْ يِبْقَى

مُسْتَنْقَعْ إِجْرَام وْبُغْضْ!

ـ6ـ

خَلِّينَا بْهَـ الدِّنْيِي إِخْوِه

نْعِيش وْنِحْنَا مِتِّفْقِينْ

مْنِ مْحَبِّتْنَا بْتِخْلَقْ قُوِّه

كِلْمَا بْإِيدَكْ بِتْبَارِكْهَا

بْتِتْلاشَى الأَدْيَان بْدِينْ!

**

أول كلمة

أَوَ لا يعلمون أن اللـه يعلم ما يسرّون وما يعلنون

سورة البقرة

ـ1ـ

يَا رَبّ الْـ قِدَّامَكْ وَاقِفْ

تَا تْرَاجِعْ خَطْوَات مْشِيتَا

وِتْعِدّ ذْنُوبِي الْـ مُشْ عَارِفْ

لَمَّا خْطِيتَا إِنِّي خْطِيتَا

بْوِجِّي عْيُون وْمَنِّي شَايِفْ

وْعَتْمِةْ إِيَّامِي مَا ضْوِيتَا

عِشْت الْعُمْر بْطُولُو.. وْخَايِفْ

مِنَّكْ.. مِنْ حَالِي.. مْنِ النَّاسْ

مْنِ وْصَايَاك اللِّي مَا نْسِيتَا!

ـ2ـ

يَا ربّي الْعَادِلْ.. رَيِّحْنِي

خْلِقْت ضْعِيف وْإِنْت الأَقْوَى

إِنْسَان زْغَيَّرْ.. سَامِحْنِي

مْسِكْت بْإِيدَكْ كِل شِي بِحْوَى:

الْبَحْر.. الأَرْض.. رْبُوع الْجَنِّه

الحُبّ.. الْبُغْضْ.. الْعَدْل.. الشَّكْوَى

وْعَارِفْ شُو رَحْ يِصْدُرْ مِنِّي

قَبْل صْدُورُو.. لا تِظْلِمْنِي

وْمَشِّينِي عَ دْرُوب التَّقْوَى

ـ3ـ

بْحِبَّكْ.. مَهْمَا كِتْرُوا ذْنُوبِي

بْحِبَّكْ.. مَهْمَا اللَّيْل يْجِنّْ

بْحِبَّكْ مَاشِي فَوْق دْرُوبِي

بْحِبَّكْ ضِحْكِةْ خَدّ وْسِنّْ

وْإِيدَيْن تْسَتِّرْلِي عْيُوبِي

وِتْآسِينِي لَمَّا بْعِنّْ

يَا أَجْمَلْ سَطْر بْمَكْتُوبِي

يَا أَوّل كِلْمِه بِسْمَعْهَا

وْبَعْدَا بْدِينَيِّي بِتْرِنّْ

ـ4ـ

مِنْ دُونَكْ مَا فِينِي عِيشْ

إِنْت رْفِيقِي الْـ مَا بْيِتْغَيَّرْ

شِكَّيْتَكْ بِجْنَاحِي رِيشْ

مِنْ وَقْت اللِّي كِنْت زْغَيَّرْ

وْعَنْ حُبَّكْ نَازِل تِفْتِيشْ

تَا يْصَفِّي هَـ الْعُمْر مْنَوَّرْ

يَا رَبّ.. تْرِكْنِي دَرْوِيشْ

وْلا تْحَبِّبْنِي بْمَال الأَرْضْ

فِيك الْـ مَا بْيِكْبَرْ.. مَا بْيِكْبَرْ!

**

نور الحق

إن الآب يحبّ الإبن، فجعل كلّ شيء في يده. من آمن بالإبن فله الحياة الأبديّة، ومن لـم يؤمن بالإبن لا يرَ الحياة الأبديّة، بل يحلّ عليه غضب اللـه.

يسوع

ـ1ـ

أُفْ.. شُو بْحِبَّكْ يَا يَسُوعْ!

نْهَارَكْ وَحْدُو مَحَّى اللَّيْلْ

وْنُورْ الْحَقّ يْشِدّ طْلُوعْ

وْشَمْس الْبِرّ تْغَطِّي الْوَيْلْ

ـ2ـ

الإِبْن الْخَاطِي.. الإِبْن الضَّالْ

اهْتَدْيُوا.. وِالْعُمْيَانْ شَافُوا

حُبَّكْ عَمْ يِعْطِينَا غْلاَلْ

حَكْيَكْ.. مَا حدا خافوُ

ـ3ـ

مَشِّينَا دْرُوبَكْ يَا نُورْ

تَا نِقْوَى عَ الْخَطَايَا

حَرِّرْنَا مِنْ هَـ الدَّيْجُورْ

الْـ سَوَّدْ قَلْب الْبَرَايَا

ـ4ـ

كِلّ مَا بْيِشْرُقْ نُور الشَّمْس:

نِحْنَا بْحُبُّنْ فِرْحَانِينْ

آبْ .. وْإِبْن.. وْرُوحْ الْقِدْسْ

تَلاتِه.. بْأَللَّـه.. مِتِّحْدِينْ

**

حكيي ضاع

حْكِيتْ كْتِيرْ.. وْحَكْيِي ضَاعْ

يِئْسَان بْعَصْر الْقِلِّه

بْلاقِي هَـ النَّاس بْتِنْبَاعْ

لِلشَّرْ.. وْعَمْ بِتْصَلِّي

بْتِقْتُل طِفْل.. بْتِمْحِي ضْياعْ

بْإِسْمَكْ!.. هَـ الإِسْم الْقُدُّوسْ

وْقِللِّي.. شُو فِيكْ تْقِللِّي؟!

**

موتي

من آمن بي وإن مات فسيحيا

ـ1ـ

خِدْنِي عَ جَنَّاتَكْ خِدْنِي

تْعِذَّبْت كْفايِه وِتْعِبْتْ

مْأَكَّدْ مَوْتِي رَحْ يِسْعِدْنِي

وْيِسْرِقْنِي بْسرْعَه.. يْبَعِّدْنِي

عَنْ دِنْيِي.. بْنِيرانَا لْعِبْتْ

ـ2ـ

موِّتْني.. تْعِبْت مْنِ النَّطْرَه

مْنِ الْخَوْف الْجايي مَعْ بُكْرا

عارِفْ ايّامي مَعْدُودِه

بْتِدْبَل مِتْل الزَّهْر خْدُودي

وْعُمْري رَحْ بيصَفِّي ذِكْرى

ـ3ـ

خِدْني.. وِارْميني عَ جْرَيْكْ

كِلّ الْـ عَمْ شُوفُنْ قِدَّامي

ما قِدْروا يْدلُّوني عْلَيكْ

يا ما تاجَرْ فِيكْ حْرامي

يا أللـه؟؟ فَتِّحْ عِينَيْك

**

جزمة أللـه

ـ1ـ

فِينِي شِقّ الْبَحْر.. وْصِيرْ

إِلْعَبْ عَ رَمْلاتُو.. وْطِيرْ

بَيْن مْوَاجُو الْفِزْعَانِه

مِنْ ضَرْبَاتِي وْهِرْبَانِه

وْأَنَا إِضْحَكْ وِلْسَانِي

عَمْ يِتْحَلَّى بْإِشْيَا كْتِيرْ

مْنِ جْنَيْنَاتِي الْمِلْيَانِه

فْوَاكِي بِتْنَقِّطْ سكَّرْ

أَطْيَبْ مِنْهَا ما بيصِيرْ

لكِنْ.. لَوْلا بِتْذَكَّرْ

إِنِّي إِنْسَانْ مْعَتَّرْ

قَدّ مَا سِنّ سْنَانِي

وْإِرْجَعْ إِخْلَقْ مِنْ تَانِي

مَا فِينِي آكُلْ أَكْتَرْ

مِنْ مُطْلَقْ إِنْسَانْ زْغِيرْ!

ـ2ـ

.. وْفِينِي بِالْعَالَـمْ إِتْسَلَّى

وْإِتْكَبَّرْ عَ الدِّنْيِي كِلاَّ

وْإِتْسَبَّحْ عَ شْطُوطْ النُّورْ

وْإِتْزَحْلَقْ عَ مْرُوجْ زْهُورْ

وْإِزْرَعْ جَنِّه بْأَرْض الْبُورْ

وْعَ النّجم الْعَالِي إِتْعَلَّى

لَكِنْ.. مَهْمَا بْنِيت قْصُورْ

وْشِنْكَلْت بْإِيدي الْمَعْمُورْ

بِالآخِر بِرْجَعْ صَرْصُورْ

خَايِفْ مِنْ جَزْمِة أَللَّـه..

**

درجتين زغار

ـ1ـ

بَيْنِي وْبَيْن الرَّبّْ

دَرِجْتَيْن زْغَارْ

أَوّل دَرْجِه: الْكِذْبْ

وِالْكِذْبْ أَكْبَرْ عَارْ

وْتَانِي دَرْجِه: الْحُبّْ

الْـ بَايِعْنِي للدُّولارْ

ـ2ـ

جِرَّبتْ حَتَّى أُوعَى

مِنْ أَحْلامِي الِكْبَارْ

وِالإِشْيَا الْمَقْشُوعَه

صَدِّقْهَا.. شُو مَا صَارْ!

هَـ الدِّنْيِي الْمَفْجُوعَه

مِنْ ضَرْبَات الدَّمَارْ

مَهْمَا شْرِبت دْمُوعَا

بِتْضَلَّكْ شِعْلِةْ نَارْ!

ـ3ـ

بْتِرْكُضْ عَ أَوْهَامَكْ

وْأَوْهَامَكْ بِتْضِيعْ

وْبِتْفَشْكِلْ أَيَّامَكْ

بِبْقَايَا رَبِيعْ

انْدَفَنْ بِـ أَحْلامَكْ

عَ عْيُون الْجَمِيعْ

وْرَشَّلَّكْ قدَّامَكْ

كَمِشْتَيْن غْبَارْ

ـ4ـ

مَهْمَا الشّمس وِطْيِتْ

لا تِكْمِشْهَا بْإِيدَيْكْ

بِتْغِرَّكْ.. لَوْلا انْطَفْيِتْ

وِبْتِعْمِيلَكْ عِينَيْكْ

أَيَّامَكْ لَمَّا ابْتَدْيِتْ

حَطِّتْ عَيْنَا عْلَيْكْ

وْكِل مَا دِرْهمْ عَطْيِتْ

عَمْ تِسْرُق قِنْطَارْ!

**

الجنه ملكي

ـ1ـ

قَدْ ما تْكُون السَّما بْعيدِه

بَدّي أوصَلاّ يا رَبّ

عارف رح تمسكني بإيدي

وترافقني بعتم الدرب

حابب صلّي طلبه جديده

محفوره ع وتار القلب

تا إتقدس.. بركي عيدي

بيوزّع أزهار الحب

ـ2ـ

الجنّه ملكي.. ملك الناس

البيحبّوك بدون قياس

وصّلني عليها.. باركني

ضوّيني شمعه بقداس

الرحله صعبه.. لا تتركني

والخطيّه جْناس جْناس

مع غيرك أوعا تشركني

وحدك لعيوني نبراس

ـ3ـ

يا ربي.. لا تبعّد عنّي

أحلى هديه.. قربك مني

مش عارف شو بدّي قلّلا

الْخَلايِقْ.. عَمْ بتجنّني

رح انكر هالدنيي كلاّ

وقدّام عرشك أوقف غنّي:

مش هاممني إلا ألله

وملايكتو بهاك الجنّه

**

غلطان

ـ1ـ

ضحك وقللي: ما في ألله

بكيت وقلتلو: غلطان

مين كوّن هالدنيي كلاّ

وقلّك تخلق يا إنسان؟

وحدو هوّي

العندو القوه

يمشّي ع ذوقو الأكوان

لا تتسلّى

وتنكر ألله

وألله الزارع فيك لْسان

حتّى تحكي

مش تا تشكي

وْتِطْفي بالقلب الإيمان

ـ2ـ

أبعد منك.. من تفكيرك

هللي بتشمّو مناخيرك

إنتَ ضيفو

وعلى كيْفو

محرّك شْهيقك وزْفيرك

لولا قطعتو

ونتفه منعتو

يدخل صدرك.. يا تعتيرك

هيدا ألله

الما بتشوفو

الدنيي كلاّ

فوق كفوفو

ـ3ـ

هوّي الزهره الـ بالبستان

العصفور الطاير بالجو

هوّي الموسم ع الأغصان

والشمس اللي بتعطي ضوّ

هوّي الكلمه

تنعّم فيها

هوّي النجمه

البتناجيها

بنقطة ميي

الـ روح الـ فيي

عم يحييها

هيدا الله

لا تتخلّى

عنّو.. عن فرحه ناسيها

عمرك ولعه

متل الشمعه

وحدو اللي بيقدر يطفيها

**

أنت الملك

ـ1ـ

انْخَطْبِتْ إِلَكْ!

مِن أَيمْتَى انْخَطْبِتْ إِلَكْ

هَـ الرَّاهْبِه الْـ كِلاَّ بُغْضْ

الْـ مِنْ كِذبْها اسْوَدِّتْ أَرْضْ

وْإِنْت الْمَلَكْ،

يا خَالْقِي، إِنْت الْمَلَكْ؟

ـ2ـ

تْطَلَّعْ بِوِجَّا وْشُوفْ

كِيف الْعُيُون بْيِرْقِصُوا

وْكِيف الْجفْن مَنْتُوفْ

وْكيف الشّفافْ بْيِعقْصُوا

إِيدَينْ عَمْ بِتْدَلِّلَكْ

ـ3ـ

هَـ الرَّاهْبِه..

مُشْ رَاهْبِه

أَعْمالْها عَ طُولْ

بِتْدِلّ إِنَّا عَقْرَبِه

وْمِنْخافْ حَتَّى نْقُول:

احْرِقْها يا أَللَّـه بْنار.. ما بْتِلْبَقْ إِلَكْ

ـ4ـ

كاسْ النَّمِيمِه سَكْبِتُو

وْصَكّ الْخِيَانِه كَتْبِتُو

وِالطُّهْر ياما ذَلِّتُو

تا تْحَرْقِصَكْ وِتْزَعِّلَكْ

ـ5ـ

وْنِسْيِتْ بِأَنُّو نْهَايِتَا

عَمْ تِقْتِرِبْ.. وِحْكايِتَا

كلّ الْخَلِيقَه حِكْيِتَا

وْصَرْخِتْ: يا رَبّ الْكايْنِه ما أَعْدَلَكْ

**

بديرك يا مار يوحنا

قرب دير "مار يوحنا" في منطقة "مونت درويت" في سيدني أستراليا توجد اذاعة صوت المحبة

ـ1ـ

بديرك يا مار يوحنّا

القديس الكلّو تِقْديس

عايِش راهِبْ مِنْ عنّا

قِدّاسو أحْلَى قْداديس

ـ2ـ

بدَيْرك يا مارْ يُوحَنّا

عَمْ إسمعْ صوت تْراتيل

ورَفْقَه تْصَلّي وتتمنّى

يخيّم عَ النّاس الإنْجيل

ـ3ـ

بدَيْرك يا مار يوحنا

الْحَرْديني مَعْ شَمْعاتو

نْعِمْة الله راهِب بَنّى

عَمّر دَيْرو بِصْلاتو

ـ4ـ

بدَيْرك يا مارْ يوحنا

مارْ شربل مارِقْ صِدْفه

حامل أرزة مَوْطنّا

وقنديل الزَّيت المِخْفي

ـ5ـ

بدَيْرك يا مار يوحنا

"صوت المحبّه" طالِعْ

إذاعه ما في منّا

بْتِهْدي ألله للسَّامِعْ

**

القديسة فيرونيكا

ـ1ـ

فِيرونيكا جُولْياني

يا قَلْب قَلْبي إنْتي

قالِتْلا وًفِرْحانِه:

تْقِدَّسْتي يا بِنْتي

وِالعَدْرا الْـ حَبِّتْها

جْروحاتو هِدْيِتْها

الإبن الْعا صَليبو

تا تِعْلُنْ قَداسِتْها

ـ2ـ

بالتَّقْوَى عِمْلاقَه

مِتْلا ما بْيِتْلاقى

أورسولا الصَّبِيّه

الرَّاهْبِه الكَبُّوشِيّه

صارِتْ فيرونيكا

بْنِعْمِه إلهِيّه

ـ3ـ

الْحُب.. يِعْني ألله

قِدّامْ عَيْنا تْجَلَّى

يا رَمْز الْقَداسِه

نْكَرْتي الدِّنْيِي كِلاّ

عْطِيني مِنْ آلامِكْ

شَوْكِه مِنْ إكليلِك

تا إرْكَعْ قِدّامِكْ

أنا وْعَمْ صَلّيلِك

ـ4ـ

بِبْلادي حَبّوكي

وِبْقْلوبُن خَبّوكي

وْبِنْيُولِك كْنيسه

تا حَتَّى يْناجوكي

حيطانا.. شْبابيكا

بْتنْدَه: يا فْرونيكا

عيشي بـِ"الِقْصَيْبِه"

ضَيْعَه لُبْنانيّه

بِالْمَتِنْ مُضْوِيِّه

كلاّ حُبّ وهَيْبِه

**

مار جرجس

ـ1ـ

شِفْتَكْ جايي عَ حْصَانَكْ

فارِس قدّيس ومُنْصانْ

يا مار جِرْجِسْ إيمانَك

وَعّى بالنّاس الإيمانْ

ـ2ـ

هانُوك الرّومان كْتيرْ

طَلْبوا مِنَّك وَثَني تْصيرْ

كرْمال أَلله حْملت النِّيرْ

وْعِمَّدْت جْيُوش الرُومانْ

ـ3ـ

التنين الْعَمْ يِنْفُخ نارْ

وِيْخَوّفْ أَطفالْ زْغارْ

حاربْتُو.. مِحَّيْت العارْ

وِتْمَجَّد فيك الإنسانْ

ـ4ـ

قالُوا إنَّك مِنْ بَيْرُوت

بِنْيُوا عَ إِسْمَك الِبْيُوتْ

شَعْبَك.. شَعْبي.. عَم بيمُوتْ

التّنين مْخَوّف لُبْنانْ

ـ5ـ

يا مار جِرْجِسْ عَمْ صَلِّي

تْخَلّصْنا مِنْ هَالْعِلِّه

حْروبْ، وأَمْراض، وْقِلّه

وتِهْجير، وْمَوْت، وْأحْزانْ

**

بصليلك يا مار مارون

ـ1ـ

بْصَلّيلَكْ يا مارْ مارونْ

وْبِطْبَعْ عَ شْفَافي إسْمَكْ

مْرافَقْني مَطْرَحْ ما بْكونْ

حامِلْ بِقلْبي رَسْمَكْ

يا بَيّ الْما مِتْلَكْ بَيّْ

يا خَيّ وْأكْبَرْ مِنْ خَيّْ

يا قِدِّيس الْذِكْرَكْ حَيّْ

النّور بْيِشْرُق مِنْ جِسْمَكْ

ـ2ـ

عَ طولْ بْتِحْكي الأزْمانْ

حارَبْتْ الوَثَنِيّه

وْشَعْبَكْ وِزَّعْتُو بْلُبْنانْ

وْإِسّسَتْ الْمارُونِيّه

يا رَيّسْ دَيْرْ الرّهْبانْ

ناسِكْ.. صَوْمِعْتَكْ إيمانْ

بِوْجُودَكْ فِرِحْ الدَّيّانْ

وْزِيّنتْ الْمَسِيحيّه

ـ3ـ

سِرْياني.. مِنْ سُورِيّا

بَخّورَكْ عَطّر هَالْكَوْنْ

وْصِرْت الدّنيي تِهْدِيَّا

وِتْلَوّنْها بْأجْمَلْ لَوْن

يا إنْطاكي الْفَرْحَه زيدْ

الْعالَمْ تِشْريدْ وْتِنْهيدْ

مِشْتاقينْ يْطِلّ العيدْ

عْمِلَّكْ شِي عَجِيبِه هَوْنْ

**

نادي العدرا

ـ1ـ

كل ما بتتفشكل إيامَك

وبتمحي الدمعه أنغامَك

نادي العدْرا

الـْ كلاّ قدره

وحدا الـ بتحقق أحلامَك

ـ2ـ

ناديها بليالي الهَمّ

متل العدرا ما في أم

وقلاّ كوني

يا حنونه

أجمل ترتيله بالتمّ

ـ3ـ

صليلا تا تمَحّي القهر

وتخفّف آلام الهجر

ما في منّا

ضحكة سنّا

شمس وعم بتزوزق فجر

ـ4ـ

يا أمي.. يا أم الكلّ

تحت جناحِك رح منضَل

حنّي علينا

بـ عينينا

زرعنالك مَنتور وفلّ

**

نعمة الله الحرديني

ـ1ـ

نعمة الله الحرديني

الإسم البيخَلّيني

صوب الجنّه طير

يا عدرا ضُمّيني

بالمشلح غطيني

ورديني طفل زْغِيرْ

ـ2ـ

قدّيس مْنِ بْلادي

مُش لازملُو شْهاده

كبيرْ.. وفعلُو كبيرْ

من أرض العِباده

عم آخُدْ زُوّاده

بهالعُمر القصيرْ

ـ3ـ

نِبَّهتْ الْبَريّه

تْخلّصْ نَفْسا هِيّي

تا ألله يْنَجِّيها

في بإيدَك شْبِيِّه

بالتَقْوى مُضْوِيّه

سْمَحْلي إقْرا فيها

ـ4ـ

يا نعمة الله بقلبي

خبّيتَك.. تا ربّي

يَعْرِف إِنّي بْحِبَّك

عمْ يِتْعَذَّب شَعْبِي

سَهِّلْ دَرْبُو وْدَرْبي

وْمَشّينا عَ درْبَك

**

يا قديسه رفقه

ـ1ـ

بِـ هالسَّما الزَّرقا

عَمْ شوفِكْ يا رفقا

مْنِ الْقَداسِه جايي

يا حلمي الرّح يبقى

فوق شْفافي حَبْقَه

وشَمْعَه بْقَلْب حْكايِه

ـ2ـ

بالصّبح بْناديلِكْ

وبالليل بْصَلّيلِكْ

حتّى تِبْقي حَدّي

مشْ رَحْ إنْسَى جْميلِكْ

مِسَّحْتِي بْمَندِيلِكْ

دَمْعَه حَرقِتْ خَدِّي

ـ3ـ

يا قَدِّيسِه رَفْقَا

إنتي وأنا رِفْقَه

مِنْ أوَّلْ سْنِينِي

بحلِفْلِكْ يا رفْقَا

مُشْ رَحْ حِبِّكْ سِرْقَه

بَعْرِفْ بِتْحبّيني

ـ4ـ

يا شمس حِمْلايا

ضوّي عَ البَرايا

وِعْطِيني مِنْ نُورِكْ

جِمَّعْت النَّوايا

وْلِفَّيْت الهَدايا

مأكَّدْ جايي زورِك

**

يسوع اللي بحبّو

ـ1ـ

يسوع اللي بحبّو

متواضع القلب

عم إمشي ع دربو

تا يسهّلي الدرب

ـ2ـ

مين متلك حبيبي

بيفديني بالصلب

عملك شي عجيبه

بهالدنيي الغريبه

تطفّي نار الحرب

ـ3ـ

بمدرستك بتعلّم

حب الناس.. وصير

ضوّي ليل معتّم

بعيون الفقير

عشت سنيني إحلم

صوب الجنّه طير

خدني.. مش رح اندم

من دنيي حزازير

شلحني ضحكه بميتم

ناطرها طفل زغير

ـ4ـ

يسوع اللي بحبّو

علّمني المحبه

سامح اللي صلبو

تا يسامحني ربي

**

ريتا دي كاشيا

ـ1ـ

هونيك بضيعه بعيده

رُوكَابُورِينا إسْما

خلقتْ قدّيسه جديده

حامل بـ قلبي رَسْما

بيني وبينا سبع بحور

يا ريتا محّي الديجور

الأمومه بتوزّع نُور

الطهر بيشرُق من جِسْما

ـ2ـ

ريتا دِي كاشْيا هيّي

راهبه أوغِسْطينِيّه

كان إسْما مارغريتا

يسوع سمّاها ريتا

وقدّملا الجنّه هديّه

يا ريت بِتْماتَل فيها

حتّى بقلبي خبيها

هالنعمه الالهيه

ـ3ـ

زرعتي العريشه بالدير

الغصن اليابس فتّح خير

يا دير المِجِدْليّه

ريتا الكلاّ حنيّه

عَ دربا عم جِدّ السير

صوّر كَسْمي ع كَسْما

أكبر من دِنْيِي إسما

غنيّه عَ شفاف الطير

**

شربل مخلوف قدّيسي

ـ1ـ

شربل مخلوف قدّيسي

يا قلبي عمِّرْلو كْنيسِه

زيِّنْها بْورد وِبْزَنْبَقْ

مِتْلُو بهالكون ما بيِخْلَقْ

قديسْ.. وأرضُو قِدّيسِه

ـ2ـ

دِنْيِتنا انْطفيِتْ شَمْعاتا

قْناديلا خِلْصِتْ زَيْتاتا

يا شربل ضَوّي قِنْديلَك

بالميّ.. الجرّه مقابيلك

تا تِمْحي بْنورَك عَتْماتا

ـ3ـ

بعكفرا هديتنا رسمَك

عنّايا عطيتنا إسمك

يا إسم مقدّس من ألله

مشهور بهالدنيي كلاّ

والدّم بْيِرشَحْ منْ جسمَكْ

ـ4ـ

سوسحت الدنيي بْعَجايِبْ

خِفّفتْ كْتير المَصايبْ

شربل مخلوف مين متلَكْ

فضّلتْ الدير عَ أهلَك

يسوع وإمّو الْحَبايب

**

طفل مغاره

ـ1ـ

طفل مغاره.. وشجرة عيد

الدنيي فرحانه من جْديد

يا طفل الْجايي لعنّا

فرشتِلَّك قلبي.. تهنا

غيرك بِـ قلبي ما بريد

ـ2ـ

إنتْ النّور بْعَتْم النّاس

والقربانه بالقدّاس

جايبلَكْ أحلى هديّه

إنتَ بْتَعرفْ شو هيّي:

قلبي وفكري والإحساسْ

ـ3ـ

مولود.. وْمَنَّكْ مولُودْ

من مَرْيَم بِنِتْ داوود

مار يوسفْ لِمّنْ شافَكْ

شافْ الحِكْمِه ع شفافَكْ

والقداسه الْما لْها حْدود

ـ4ـ

متواضَع.. متلَك ما في

إِله.. ومجدَك كافي

خلقتْ بْمِزوَد بَهايِم

يا ربّي الْعِزَّك دايِم

بِمشي ع دروبَك حافي

**

عواهر

كتبتها بعمر 14 سنة

ـ1ـ

هالـ قَالْ انو الْبِنْت أَغْلَى مْنِ الْجَوَاهِرْ

وْأَغْلَى مْنِ الْحَفِر بِـ قَصرْ عَامِرْ

كان قصدو يْقُولْ لِلْعَالَـمْ بِأَسْرُو

رَبِّي وْلادَكْ.. وْخَلِّيكْ سَاهِرْ

ـ2ـ

إِذَا عْيُونَكْ عَ أَطْفَالَكْ مَا سِهْرُوا

رَحْ بِتْصِيرْ أُمْثُولِه يَا شَاطِرْ

مِتْل الْغَنِي اللِّي شَادْ قَصْرُو

حَتَّى يْكُونْ زَلْمِي مْنِ الأَكَابِرْ

ـ3ـ

شَكّ السَّيْف، يَا حَسْرَه، بِـ صَدْرُو

وَقْت الْـ شَافْ أَوْلادُو اللِّي كِبْرُوا

سِكْرَانِينْ.. وِبْنَاتُو عَوَاهِرْ!

**

مهرّب حشيشة

ـ1ـ

مْهَرِّبْ حَشِيشِه.. وْقَافْ يَا مَجْنُونْ

وِانْحِنِيلُو بْكلّ طَاعَه وْإِفْتِخَارْ

جَبَّار!.. مَا بِيخَافْ مِنْ قَانُونْ

وِالْمَالْ تَحْت مْخَدّتُو قِنْطَارْ!

ـ2ـ

مْهَرِّبْ حَشِيشِه.. قَاتِلْ مْلايِينْ

بْمَسْحُوقْ مِتْل السَّمّ.. نِيَّالُو

فَاتِحْ مَطَارْ.. مْرَافَق الْحلْوِينْ

وِالصّدقْ وِالإِخْلاصْ رِسْمَالُو!

ـ3ـ

زِلْمُوا، يَا رَبِّي تْزِيدْ، بِالْمِيَّاتْ

بِيخَوّفُوا الطُّرْقَاتْ وِالسَّاحَاتْ

تَا يْوَزّعُوا اللّذِه عَ كِلّ النَّاسْ

أَطْفَالْ مِتْل الزَّهْر وِبْنَيَّاتْ!

ـ4ـ

هَيْك الرّجَال تْكُونْ يَا رَبِّي

تَاجْرُوا وْرِبْحُوا بوَزْنَاتَكْ

وْإِنتْ لَوْ مَا تْكُونْ مِتْخَبِّي

كِنْت ظْهَرِتْ لِلنَّاسْ ضَرْبَاتَكْ!

**

يا سايق

كتبتها بعمر 14 سنة

ـ1ـ

يَا سَايِقْ.. رَوِّقْ بَالَكْ

حَاجِي مَعْجُوقْ

يَا نَاسِي زِغْر طْفَالَكْ

عَ مَهْلَكْ سُوقْ

ـ2ـ

لَيْش مْعَجَّلْ يَا سَايِقْ

شُو فِي عِنْدَكْ؟

حَالَك بْحَالَكْ عَاجِقْ

رَاعِيكْ جِلْدَكْ

لَيشْ مَا بِتْضَلَّكْ رَايِقْ

كِرْمَالْ وِلْدَكْ

كاسَات الْمَوْت الْغَارِقْ

رَيْتَك مَا تْدُوقْ

ـ3ـ

يا سَايِق سُوقْ عَ مَهْلَكْ

حَتَّى تْوَصِّلْ

الرُّكَّابْ.. وْدَشِّرْ جِهْلَكْ

عَقْلَكْ شَغِّلْ

وْحِنّ خْطَيِّه عَ طِفْلَكْ

حَاجِي تْعَجِّلْ

أَهْل الرُّكَّابْ وْأَهْلَكْ

قَلْبُنْ مَحْرُوقْ

**

يا ليل

ـ1ـ

رْكِبْنَا فَوْق ضْهُور الْخَيْل

وْسَابَقْنَا هَبَّات الرِّيحْ

زْرَعْنَا اللَّيْل بْشَوْك الْوَيْلْ

وْجِرَّحْنَا نْجُومُو تِجْرِيحْ

ـ2ـ

وِالضَّوّ اللِّي بْتَانِي مَيْلْ

ضِحِكْ بْعِبُّو وْصَار يْصِيحْ:

انْكَنَّكْ رَحْ تِرْجَعْ يَا لَيْلْ

شِقّ الْخَابِي وْعَبِّي الْكَاسْ

وْشَرْبِي النَّاس نْبِيد مْنِيحْ

**

أمي

ـ1ـ

أُمِّي.. يَا أُمِّي.. يَا فِكِرْ شَارِدْ

طُول اللَّيَالِي سَاهِر وْسَاجِدْ

ما بِنْسَى عَ الْعُمرْ عَهْد الطُّفُولِه

ما بِنْسَى حْكَايْتِكْ عَنْ شَبّ مَارِدْ

ما بِنْسَى سَاعِة الْـ كِنْتِي تْقُولِي

إِلَهِي يِحِرْسَكْ مِنْ عَيْن حَاسِدْ

ـ2ـ

أُمِّي.. يَا أُمّي.. تِسْلَمِي لْطِفْلِكْ

تِسْلَمِي لِلصَارْ شَبّ كْبِيرْ

لا تْفَكّرِي رَحْ يِنْتَسَى فَضْلِكْ

مَهْمَا يَا ماما بِالدِّنِي بيصِيرْ

قِدَّامِك الْـ مَا بْيِنْحِني بْيِهْلِكْ

نَيْرُونْ بَعْدُو بِالْقَبرْ بِيصِيحْ:

عَفْوِك يَا أُمِّي.. كِنْت قَاسِي كْتِيرْ

**

إنتي الفرحة

ـ1ـ

بَدِّي قِلِّكْ كِلْمِه زْغِيرِه:

بْحِبِّك.. بْحِبِّكْ

يَا عْيُونِي مْنِ عْيُون الْغِيرِه

خَبِّينِي بْقَلْبِكْ

ـ2ـ

إِنْتِي الْفَرْحَه بْسَاعِةْ هَمِّي

وْضِحْكَاتِي كِلاَّ

وْحضْنِكْ مَمْلِكْتِي يَا أُمِّي

وِالْحَاكِمْ أَللَّـه

يَا صَوْتِي الْـ سَافَرْ لِبْعِيدْ

يَا غِنِّيِّه بْلَيْلِةْ عِيدْ

بْحِبِّكْ.. بْحِبِّكْ

ـ3ـ

مِينْ غَيْرِكْ صَيَّرْنِي حْكَايِه

مِينْ غَيْرِكْ قُولِي؟

وْبَشَّرْنِي بِالْمَجْد الْجَايِي

يْزَهِّرْ بِحْقُولِي

لِمِّنْ فَوْق شْفَافِي بْيِمْرُقْ

إِسْمِكْ.. شَمْس العُمْر بْتِشْرُقْ

وِبْقُول: بْحِبِّكْ..

**

نور العين

ـ1ـ

كِلْمَا تْطِلَّعْت بْعِينَيْكِي

بْفَكِّرْ حَالِي زْغِيرْ

عَمْ إِرْجَعْ عَرْبِشْ عَ دَيْكِي

وْإِرْسُم تْصَاوِيرْ

عَ خْدُودْ

أَحْلَى مِنْ دِنِي

عَ زْنُودْ

حِضْن الْوَلْدَنِي

عَ شْفَافْ تِغْنِجْلِي غُنِجْ

عَ صَدِرْ أَوْسَعْ مِنْ مَرِجْ

عَ رْكَابْ مِعْتَادِه عَ حِمْلِي كْتِيرْ

ـ2ـ

يا أُمّ مِتْلا ما انْوَجِدْ

يا جَفْن فَايِقْ لِلأَبَدْ

تَا غَمِّضْ الْعِينَيْنْ

بْعُمْرِي عَبْدْت تْنَيْنْ:

أَللَّـه الساكِنْ بِالسَّمَا

وْإِنْتِي يا نُور الْعَيْنْ

**

غنّي

ـ1ـ

بِفْرَحْ.. كِلْ مَا يْقُولُوا: غَنِّي

وْكِلْ مَا شْفَافُنْ تِسْأَلْ عَنِّي

وِعْيُونُنْ تِغْمُرْنِي بْحُبَّا

وِتْخَبِّينِي بْجَنِّةْ قَلْبَا

وْيَا أَللّـه شُو حلْوِه الْجَنِّه!

ـ2ـ

صَوْتِي.. رَحْ بِيخَلِّي السَّهْرَه

تْوَدِّعْ يَوْمْ.. تْلاَقِي بُكْرَا

وْيَا نَاطِرْ عَ شْطُوطْ السَّكْرَه

عَبِّي الْقَنِّينِه مِنْ فَنِّي

وْدِقّ الْكَاسْ.. وْقِلِّلي: غَنِّي

ـ3ـ

دِقِّيلُنْ يَا طَبْلِه دِقِّي

وْيَا عُودْ تْقَاسِيمَكْ نَقِّي

هَوْدِي حْبَابِي الْـ صَانُوا حَقِّي

وْخَلُّوا النُّورْ يْشَرْقِطْ مِنِّي

وْكِرْمَال عْيُونُنْ رَحْ غَنِّي

**

تغرّبوا

ـ1ـ

تْغَرَّبُوا رْجَال بْلادِي

يا بْلادي.. لَيْش تْغَرَّبُوا

وْأَرْضِكْ أَرْض الْمَبَادِي

وْمِنْ نَبْع فْنُونِكْ يِشْرَبُوا؟!

ـ2ـ

تْغَرّبُوا.. وْرَاحُوا لبْعِيدْ

حَتَّى يْلاَقُوا فَجْر جْدِيدْ

يا بْلادِي طَوَّل الْعِيدْ

النَّاس.. هْمُوم بْيِسْكِبُوا

ـ3ـ

يَا عْصَافِير الْبَريِّه

يَا نَغْمِةْ حُبّ وْحُرِّيِّه

مِنْ يَوْم الْـ سَافَرْ بَيِّي

الْمَكْتُوب.. بْدَمْعِي بِكْتِبُو

**

يا بلادي

ـ1ـ

هَـ القِصَّه بْتِحْكِي عَنْ نَاسْ

لازِمْ نِحْكِي عَنُّنْ

هَجْرُوا بْلادُنْ.. شِرْبُوا الْكَاسْ

وْنِحْنَا صِرْنَا مِنُّنْ

ـ2ـ

لا تْقُولُوا بِيهَاجِرْ شَعْبْ

الشَّعْب بْيِبْقَى مْحَلُّو

لَكِنْ مِنْ وَيْلاتْ الْحَرْبْ

الْمَرَاكِبْ بِيطِلُّوا

يَا بْلادِي.. يَا دَمّ الْقَلْبْ

الْـ فَلُّوا.. لَيْش تَا فَلُّوا

وْتَرْكُوا خْيَالاتُنْ عَ الدَّرْبْ

وْبِيحِبُّوكِي كِلُّنْ؟

ـ3ـ

سِيدْنِي الأُمّ الْحِلْوِه السَّمْرَا

الْـ مَا مْنِنْسَاهَا نِحْنَا

غَمْرِتْنَا يَا بْلادِي غَمْرَه

وْبَعْد الْحُزْن فْرِحْنَا

حِبَّيْنَاهَا.. يْطَوِّلْ عُمْرَا

احْتَلِّتْ جَوَارِحْنَا

هِيِّي وِالأَرْزَات الْخَضْرَا

يَا بْلادِي مِنْحِبُّنْ

**

جدّي

ـ1ـ

اشْتَقْتِلَّكْ يَا جدِّي

يَا جدِّي كْتِيرْ

لازِمْ تِبْقَى حَدِّي

تَا جْنَاحِي يْطِيرْ

إِنْتَ اللّي ربَّيْتنِي

وْإِنْتَ اللّي خَلَّيْتنِي

حِبَّكْ يَا جدِّي..

يا جدِّي كْتِيرْ

ـ2ـ

هَـ الدَّمْعَه الْـ بِعْيُونِي

عَ فْرَاقَك يَا عْيُونِي

خَلِّتْنِي مَجْنُونِه

وِالْعُمْر حْزَازِيرْ

عَمْ بِبْرُدْ بِغْيَابَكْ

غَطِّينِي بِتْيَابَكْ

تْيَابَكْ يا جدّي..

بِتْدَفِّي كْتِيرْ

ـ3ـ

يا نَبْع الْحِنِّيِّه

إِنْتَ وْأُمِّي وْبَيِّي

كْبِرْتُوا بِـ عِينَيِّي

وِبْقَلْبِي الزّغِيرْ

مِينْ بَدُّو يِغْمُرْنِي

وْقِصَص يْخَبِّرْنِي؟

حْكَايَاتَكْ يَا جدّي..

بِتْسَلِّي كْتِيرْ

**

يا حمام

ـ1ـ

قَرَّبْ صَوْبِي طَيْر حْمَامْ

وْقَلِّي: غَنِّيلِي تَا نَامْ

يَا حَمَامْ

هَـ الأَيَّامْ

مُشْ رَح تِتْرُكْ عَيْن تْنَامْ

ـ2ـ

وْجُوه النَّاس رْسُوم رْسُوم

بْتِتْحَرَّكْ.. وِالشَّاشِه هْمُومْ

انْ ضِحْكِتْ شَمْس بْتِبْكِي نْجُومْ

عُمْر وْمَارِقْ بَصْر مْنَامْ

ـ3ـ

مَهْمَا الأُوفْ تْوَعِّي اللَّيْلْ

وْيِسْهَرْ مَعْنَا نَجْم سْهَيْلْ

بْيِبْقَى الْخَوْف بْتَانِي مَيْل

عَمْ يِزْرَعْ فِينَا الأَوْهَامْ

ـ4ـ

وْلاد زْغَار.. نْهَار جْدِيدْ

عَ شْفَافُنْ ضِحْكَاتْ الْعِيدْ

لَكِنْ عُمْرُنْ حلْم بْعِيدْ

وْهَيْهَات تْصِحّ الأَحْلامْ!

**

فتّح يا ضمير

من مسرحية خلصت اللعبة

ـ1ـ

فَتِّحْ يَا ضَمِيرْ.. فَتِّحْ يَا ضَمِيرْ

النَّاس اشْتَاقُوا عْلَيْكْ

وعَ تِفْتِيحِةْ عِينَيْكْ

ما بْيِسْوَى تْنَام كْتِيرْ

ـ2ـ

بْهَالْعَصْر مَا فِي إِلاَّ

صَوْت الْمَصَارِي طَالِعْ

وْحكْم الدِّنِي كِلاَّ

لِلْفِي عِنْدُو مَصَانِعْ

جَوَاهِر وْحَرِيرْ

ـ3ـ

فِي كْتَارْ خِلْقُوا يْجِخُّوا

مْنِ الْجَخّ عِمْيُوا عْيُونُنْ

وِكْتَارْ خِلْقُوا يْنِخُّوا

تَا حَتَّى يْعَبُّوا بْطُونُنْ

مِنْ فَضْلِة الأَمِيرْ

**

مَهْمَا الرِّيحْ

من مسرحية خلصت اللعبه

ـ1ـ

مَهْمَا الرِّيحْ تِصْفُر بِالْبَرِيِّه

وِتْزِتّ الْخَوْفْ عَ شْطُوطْ السَّهْرِيِّه

لَـ غَنِّي وْصِيحْ

بِـ وِجّ الرِّيحْ

وْإِسْهَرْ وِاللَّيْل سِهْرَان بْعيِنَيِّي

ـ2ـ

مَهْمَا الْحُبّ يغْمُرْنِي بْرِيشَاتُو

وْيِكْتبْنِي حَرْف عَ صَفْحِةْ حَيَاتُو

مَا بِشْبَعْ حُبّْ

لَوْ دَاب الْقَلْبْ

وْقَالُوا: مِسْكِينْ شُو حلْوِه صِفَاتُو

ـ3ـ

مَا بِرْضَى كُون أُسْطُورَه وْرِوَايِه

وْيِحْكُونِي النَّاسْ لِوْلادُن حِكَايِه

أَنَا بَدِّي صِيرْ

نَغْمِةْ عَصَافِيرْ

تا تْبَشِّرْ النَّاسْ بِالْعِيدْ اللِّي جَايِي

**

يوم الفرح

من مسرحية خلصت اللعبه

ـ1ـ

قَالُوا ابْتَدَى يَوْم الْفَرَحْ

وِالْحُزن خَزَّقْ بَدْلِتُو

وِالطّفل مَطْرَحْ مَا انْجَرَحْ

دَاوَى الْجرح بِـ ضِحْكِتُو

ـ2ـ

قَالُوا الْعَتمْ فَلّ وْرَحَلْ

قِلْنَا الْعَتمْ مَا لُو مَحَلّْ

بَدْر السَّمَا الْيَوْم اكْتَمَلْ

غَنُّوا يَا نَاس لْطَلِّتُو

ـ3ـ

نِحْنَا إِذَا جَار الْقَدَرْ

مَرَّه عَلَيْنَا وِانْتَصَرْ

لا تْفَكِّرُوا مْنِتْرُكْ أَثَرْ

مِنْ عَيْلِتُو وْذِرِّيِّتُو

ـ4ـ

جِينَا وْعَ صَخْرَات الدِّنِي

لْقِينَا التَّوَاضُعْ مِنْحِنِي

بْنِينَا قَصرْ مَا بْيِنْبِنِي

لَوْ مَا إِيدَيْنَا بِنْيِتُو

**

أبو الحن

ـ1ـ

جايي لْعنْدي أبُو الْحِنّ

بْتِمُّو قشّه.. وعَمْ بيعِنّ

قلتلّو: دخلَكْ شو باكْ

فاتِحْ بِـ تِمَّكْ شبّاكْ

قلّلي: هلّق قابِعْ سِنّ

ـ2ـ

مْورَّم خَدّو ع الْمَيْليْن

سألتُو: هالصّحه من ويْن

تْطلَّعْ فيّي وْصار يِبْكي

وْبَدّو يِحْكي.. وما بْيِحْكي

خايِف لَـ صيبو بالعيْن

ـ3ـ

وأبو الْحِن الْـ مُشْ نقّارْ

مَنْتوف، مْوَسَّخ، ثرثارْ

بِتْطَعْميهْ بْيِحْكي عْلَيْك

بِالوِج بْيصرُخ: يا بَيْك

وْبِالْقَفا أكبَرْ غَدَّارْ

ـ4ـ

كلّ النّاس اشْتَلْقوا عْليهْ

بُرْكان الشَّرّ بْعينَيْه

ووجّو عَم بينَقّط سَمّ

ما بْيِخْجل.. ما عنْدو دمّ

الْمَيّ بْتِسْرح عَ إجريْه

ـ5ـ

بَعِّدْ عَنُّو.. رْسِمْلُو حدّ

لا تاخُدْ كلماتو جَدّ

الْشّر بْيِطْلَعْ منْ تِمُّو

يَوم الْـ خَلّفتُو امّو

من دون لا بيّ ولا جِدّ

**

عدنان

قصّة حقيقية عن مغترب لبناني ضيّع عمره سدى

ـ1ـ

إجا عَ سيدني عدنانْ

تا يِحْكي إِنِكْليزي

مرقِتْ سنه.. وصار فهْمان

إِنّو هاللّغَّه "إيزي"

ـ2ـ

السيّاره بيقِلّلا: Car

والإبْريقْ بيقِلّلو:  Jar

لكنْ أوّل ما تْعَلَّم:

Let’s go to the bar

ـ3ـ

وبَلَّش يِشْرَب وِيْتَقِّلْ

والويسْكي تْهزّ لْسانو

وْصَفّى يِحْكي وما يْكَمِّلْ

عرفوا تْخَرْبَط ميزانو

ـ4ـ

صار البنت يْقِللا شبّ

والشبّ يْقِلّلو: يا سِتّ

عِمِلْ مشْكل.. بَيّو انْسَبّ

يا حَسْرَه مِن كعب الدِّسْت

ـ5ـ

وْلمِّن وعي من السّكْرَه

وْشاف مِنْخارو قَدّ التَّلّ

قلُّنْ: رح إرجع بُكْرا

بِـ هالبلد مُشْ رَحْ ضلّْ

ـ6ـ

قلّلو جارو: يا عدنان

خلّي بِـ قلبك إيمان

ليش ما بْتِحكي عَرَبي

وْبِتْفَرّح أرْزِة لُبْنانْ

ـ7ـ

ومتل ما قللو جارو

صار يِحكي باللبناني

وتا يِشْرَب.. يا شِحّارو

ما عاد يْعدّ قْناني

ـ8ـ

وْصَفّى بالشارع مشهورْ

بَنْطَلُونو بْيِرْشَح مَيّ

وِلْسانو بْيِحكي بالزّورْ

لُغّه ما بْيِفْهَمها حَيّ

ـ9ـ

ليش تْغَرّب؟ سَأْلوا النّاس

بلادو كانت أسْتَرْلُو

باع الدّني بْمَزِّة كاسْ

وْضَيّع هالعُمر كلّو

**

يا ستّار

قصة حقيقية عن إنسان غَيّره حبّه لامرأة، رغم عشّاقها الكثر، كانت من أوفى وأشرف النساء لزوجها، لا بل جعلت منه رجل أعمال ناجح، ورب عائلة رفض أن يتزوج من غيرها، بعد وفاتها بمرض السرطان.

ـ1ـ

جايي عَ الغربِه مَهْموم

بدّو يْغَيِّرْ كلّ الْكَوْن

قلّلي: سيدني كلاّ سْمومْ

ألله مُشْ رَحْ يِنْزلْ هَوْنْ

ـ2ـ

وْتا يْنَزّل أَلله عَ الأرضْ

لازمْ يِزْرعها بالبُغض

ولازم يِغْزي بيوت النّاس

وما يِرْحم بنت ولا عَرْض

ـ3ـ

هَيْك بِفْكْرو ألله صارْ

قاتلْ، سرّاق، وغدّارْ

وما بْيِطْلَع عَ جنّاتو

إلا الْمُجْرِم.. يا ستّار

ـ4ـ

خفت يِعْمِلّو قِصّه

وِيْوَقِّعنا بالْجرْصَه

شْكيتو لْكل رجال الدين

قالوا: ما إلْنا خِصّه

ـ5ـ

وبالْحارَه عنّا شَقْرا

أَذْكى منها ما بيصير

بِالْفَرْشه قضّت عُمْرا

ونامِتْ مَعْ عشّاق كْتيرْ

ـ6ـ

خِبّرتا قِصّة هالشّب

اللي بْحِبّو متل وْلادي

قامِت وِقْفِتلو عَ الدّرب

تا يْشُوفا نِتْفِه زْياده

ـ7ـ

وْلِمِّنْ شافا قِدّامو

صار يْنَفِّض هِنْدامو

وصار يْمَشّط شَعْراتو

متل العايش بِمْنامو

ـ8ـ

منْ أوّل مَرَّه يا خَيّ

بيلاقيها بكلمة "هايْ"

وبْيِعْزمها عَ القَهْوه

وبيشَرْبيها شْوَيْ شْوَي

ـ9ـ

ضحكه هَوْن.. وْبَوْسه هَوْن

مِحْيِتْ أَفْكارُو كِلاّ

صارتْ هِيّي بْعَيْنو الكونْ

وِبْقَلْبا ساكِنْ أَلله

ـ10ـ

وصار يِشْرب بيرَه وويسْكي

وكلّ الـ بيكَفِّر إِنْسان

بيعِدّو أكبر شَيْطانْ

ومَن سيدني ما عاد يشْكي

ـ11ـ

ومن بعد سنْتَين زْمانْ

شِفْتُو مَع إبْنو "عدنان"

قلتلّو: مجْد الأُمِّه

قلّلي: قْرفت مْن الْعِرْبانْ

ـ12ـ

وْبَلّش يِحكيلي بالْحُبّ

وما سمعْتو ولا مرّه سبّ

شاف ألله بْإبنو "عدنان"

وسَكَّر ع الباقي.. وانْضَبّْ

**

حرامي

ـ1ـ

الشّعب انْتَخْبو.. وقلّلو: كُونْ

مْمثلنا بْمَجْلس هَـ الشّعبْ

تاري هَـ النايِبْ  مَلْعونْ

مْعَوَّد عَ السّرقه وْعَ الكذبْ

ـ2ـ

وْبَلّشْ يِسْرُق كيفْ ما كانْ

وْيِفْتَح عَ حْسابو دكّان

وِحْقُوق الشّعب الْمِسْكين

صارتْ كوسى وباتِنْجان

ـ3ـ

وْبَلّشْ يْعَبّي جْيابُو

وِجْيابُو بِتْساع كْتيرْ

وَظّف أهلُو وأصْحابُو

وْبَرْطَلْ تا يْصَفّي وزيرْ

ـ4ـ

وبالوزارَه.. الشّطارَه

ما خلّا فيها بارَه

وْكتْروا أزلامو وْصارُوا

متل الْحارْجي بِرْبارَه

ـ5ـ

فَكَّرْ حالُو بِـ لُبْنانْ

كل شي بالدوله فلتانْ

لكن نحنا بسيدني هونْ

منْحاكِمْ أكبَرْ إِنْسان

ـ6ـ

تْطلّع فيه القاضي وقالْ:

رِسْمالَك أكبر رسمالْ

عَ سيدني جايي مَنْتُوف

كيفْ قدرتْ تْجَمّع مالْ

ـ7ـ

وَطّى راسُو.. والإعْلام

عَمْ بيصَوّر دَمْعاتُو

أوّل لَيْلِه بْحَبْسُو نام

وْمِحْيِت سيدني دَعْساتو

**

الخي جناح

صورة طفل يحضن أخته الصغيرة على رصيف طريق مطار بيروت الدولي، دون أن يلتفت لهما أحد.

ـ1ـ

الخي، قالوا: جناح

بحضنو الأخت ترتاح

ونسيوا يقولوا: الخي

بيصير أم وبي

بإيدو الأمل مفتاح

ـ2ـ

لا تخاف ألله كبير

وحضنك قصر دافي

نيّمتها بسرير

أوسع من مْسافه

ـ3ـ

هيك الأخوّه تكون

بعصر الظلم والقهر

العم يحكمو نيرون

الرح ينتهي بالقبر

ـ4ـ

وانتْ رح بتعيش

أكبر من البخشيش

اللي بجيبة التمساح

بكرا بينبت ريش

بجناحك وبتطير

مع اختك.. وبتصير

كل الدني أفراح

ـ5ـ

يا ريتني حدّك

تا إمسح الدمعات

عن خدّها وخدّك

وتا رجّع الساعات

وغيّر حكم خصيان

عم يسرقوا مالي

وشوّه إسم لبنان

العا قلبنا غالي

**

يدوم عزك

كِرْمَالْ عَيْنِكْ بَسّْ.. يَا بْلادِي

زْرَعِتْ بِالْغُرْبِه شِعرْ وِزْهُورْ

وْضِلَّيْتْ طُولْ الْوَقْتْ عَمْ نَادِي:

يْدُومْ عِزِّكْ.. وِالْقَلِبْ مَقْهُورْ

**

الشعر

الشِّعرْ مَنُّو شِعرْ مِنْ دُونِي

وْلاَ كَانْ هَزّ مْشَاعِر الإِنْسَانْ

لَوْ مَا عَ أَرْضُو إِسْكُب عْيُونِي

حَتَّى بْدُمُوعِي يِرْتِوِي الْعِطْشَانْ

**

شعري احفظوا

أَللَّـهْ مَا أَحْلَى الْمَسَا مَعْكُنْ

إِنْتُو يَا أَغْلَى نَاسْ بِعْيُونِي

شِعْرِي ارْتَمَى يْبَوِّسْ مَسَامِعْكُنْ

شِعْرِي احْفَظُوا.. وْمَا هَمّْ تِنْسُونِي

**

شعري صلا

شَاعِرْ أَنَا.. وْتَا تِفْهَمُوا شِعْرِي:

شِعْرِي صَلاَ.. الإِمَّاتْ صَلُّوهَا

مَعْ كِلّ بَيْتْ سْنِينْ مِنْ عُمْرِي

وِبْكِلّ كِلْمِه دْمُوعْ شِرْبُوهَا

**

دم وويل

مْغَمَّضْ عْيُونَكْ.. تَايِه بْهَاللَّيْلْ

وْمَزْرُوعْ دَرْبَكْ بِالشَّقَا وِالظُّلْمْ

فِيقْ دَخْلَكْ فِيقْ مِنْ هَـ الْحُلْمْ

شْبِعِتْ يَا لُبْنَانْ دَمّ وْوَيْلْ

**

غريب الدار

يَللاَّ سَوَا نِطْرُدْ غَرِيب الدَّارْ

الْـ وَلَّعْ بِـقَلْب الدَّارْ حِقْد وْنَارْ

الْـ خَلاَّ السَّمَا تِسْوَدّ بِسْمُومُو

وْخَلاَّ بْكِذْبُو الْجَارْ يِدْبَحْ جَارْ

**

جربت

جِرَّبْتْ حَتَّى أُوصْفك.. مَا قْدِرْتْ

جِمَّعِتْ فِكْرِي.. بْأَلْفْ دِنْيِي طِرْتْ

وِالْعَبْقَرِيِّه الْـ آخْدِتْنِي رْفِيقْ

هَرْبِتْ.. بَعِدْ مَا صُورْتك صوَّرْتْ

**

دبحوا طفالك

يَا أَرْزِة بْلادِي هَانُوكِي كْتِيرْ

نَاسْ نِصَّابِينْ مَا عِنْدُنْ ضَمِيرْ

رَفْعُوا لِوَاكِي كِذْبْ قِدَّام الْبَشَرْ

وْدَبْحُوا طْفَالِكْ غَدرْ بِقَلْب السّريرْ

**

مشتاق

مشْتَاقْ لِعْيُونِكْ أَنَا مشْتَاقْ

يا حُلم جايِي مِنْ سَهَرْ عشَّاقْ

يا نَارْ عَمْ تِحْرُقْ قَلبْ مِسْكِينْ

مَجْنُونْ فِيكِي جْنُونْ مَا بْيِنْطَاقْ

**

كبير النفس

كْبِيرْ النَّفسْ.. لَوْلا وَقَعْ قَلْبُو

عَ الأَرْضْ.. مَا بِينِخّ تَا يْلِمُّو

أَمَّا اللَّئِيمْ الْـ مَا حَدَا حَبُّو

لَوْ ضَيَّعُو.. بْيِسْرُقْ قَلبْ إِمُّو

**

سكران

سكْرَانْ وَحْدِي بْغُربْتِي سكْرَانْ

وِمْسَكَّر بْوَابِي بْوِجّ النَّاسْ

بْحَاكِي كْرَاسِي الْبَيْتْ وِالْحِيطَانْ

وِبْصِيرْ إِتْخَانَقْ أَنَا وِالْكَاسْ

**

لا ترحلي

إِنْتِي الطُّهرْ إِنْتِي.. يَا شَمْعَه بْدَيْرْ

يَا زَنْبَقَه.. الْـ غَارْ السِّحرْ مِنِّكْ

طَلّتِكْ كانِتْ سَعَادِه وْخَيْرْ

لا تِرْحَلِي.. مَا لِي غِنَى عَنِّكْ

**

وحش الخطيّه

بْيُوتْ حَدّْ بْيُوتْ بِتْعَمِّر ضْيَاعْ

شْعُوبْ بَدَّا تْعِيشْ بِمْحَبِّه

لكِنْ إِذَا وَحْش الْخَطِيِّه جَاعْ

بْيِقْضِي عَ كِلّ النَّاسْ يَا رَبِّي

**

أسرار

شُو خَبَّر الْعُصْفُورْ هَاك السَّوْسَنِه

عَنْ حُبّنَا.. عَنْ طَيْش عَهْد الْوَلْدَنِه؟

وْشُو دَخَّل الْعُصْفُور تَا يِنْقُلْ حَكِي

وتا يِنْبُش الأَسْرَارْ وِيْوَعِّي الدِّنِي

**

سرقوها

سَرَقُوهَا غَدرْ عَن صدْرِي

وِعْيُونْهَا بِالدَّمعْ مِلْيَانِه

قِلتِلّهَا عَ السَّكِتْ: يَا عُمْرِي

قَوْلِكْ بَعِدْ رَحْ نِلْتِقِي تَانِي؟

**

حشاش

حشَّاشْ.. عَمْ تِشْرَبْ جُنُون وْسَمّْ

تَا تِنْتِشِي.. وْبَسْط الْخَلِيقَه تْلِمّْ

مِتْل الْقِرِدْ عَمْ تِلْحَس الْمبْرَدْ

مَبْسُوطْ.. لكِنْ مِخْتِنِقْ بِالدَّمْ

**

ملاك

بْحِبِّكْ.. بْحِبِّكْ.. قَدّ بَحْر وْجَوّ

وَقَدّ الْقَمَرْ وِالشَّمْسْ وِالْعَتْمِه

شِفْتِك قْبَالِي يَوْم شِفْت الضَّوّ

مْلاكْ.. بَعْدِي بِبْصَرُو بْنَوْمِي

**

أرزات

بْيُوتْنَا عَ الصَّخْر مِبْنِيِّه

وِعْيَالْنَا أَرْزَاتْ مِحْمِيِّه

بْكِلْمِه.. مَا فِيكُنْ تِفرطُوا الِعْيَالْ

حَتَّى وَلاَ بْمَلْيُونْ خَبْرِيِّه

**

لحن عمري

لا تْقُولِيلِي: ضْجِرتْ مِنِّي

صَعب إِضْجَرْ مِنْ لَحِنْ عُمْرِي

مِنْ صَوْت جِنِّيِّه عَم تْغَنِّي

غْنَانِي انْسَرْقِتْ مِنْ كُتبْ شِعْرِي

**

جنّه

حَاكَيْتِكْ غَصْبِنْ عَنِّي

وْكَانْ عَمْ يِخْدَعْنِي ظَنِّي

فِكَّرْت بْقُرْبِكْ فِي النَارْ

تَارِي بْقُرْبِكْ فِي الجَنِّه

**

مقبرة الرجال

التّارِيخْ وَحْدُو بَسّ مَقْبِرْةِ الرّجَالْ

هْنِيَّالْ يَللِّي بْيِنْقِبِرْ فِيهَا

صَفْحَاتْ عَمْ تِحْكِي قِصَصْ أَبْطَالْ

بِالْكَادْ إِيدْ الدَّهرْ تِطْوِيهَا

**

شو قصتك؟

بَسّ قُولِي بَسّ شُو بَدِّكْ

شُو قِصّتِكْ؟.. شُو مَطْلَبِكْ قُولِي؟

انْ قِلْتِي: الْقَمَرْ.. بِزْرَعْ قَمَرْ حَدِّكْ

وْبِسْقِيهْ دَمْع عْيُونْ مَخْجُولِه

**

نهار العيد

قِرْفَانْ مِنَّكْ يَا نْهَار الْعِيدْ

مِنْ طَلّتَكْ.. مِنْ كِلّ تَوْب جْدِيدْ

بْحَيْث الطّفل بِبْلادْنَا عرْيَانْ

بْيِسْتَقْبِل الأَعْيَادْ بِالتِّنْهِيدْ

**

زينات

كلْمَا عَنِ عْيُونِي تْغِيب الشَّمْسْ

بِسْرُق نْهَارِي وْبِعِجْنُو بِالأَمْسْ

بِالْعَتْمِة الْـ فِيهَا غْزَلْت كْتِيرْ

زِينَاتْ.. لازِمْ عَلِّقَا بْشِي عُرْسْ

**

صلبوا المسيح

صَلْبُوا الْمَسِيحْ.. تْقَاسَمُوا تْيَابُو

وْضِحْكُوا تَا شِبْعُوا عَ الإِلَه الرَّبّ

انْشَقِّت الأَرْضْ.. تْصَرْصَعُوا وْتَابُوا

وَقْت اللِّي مَات مْنِ الضَّربْ وِالصَّلْبْ

**

فرشة زهر

نْطَرْتِكْ عَ مَفْرَقْ بَيْتِك لْيَالِي طْوَالْ

تَا إِلْمَحِكْ لَنُّو دْقِيقَه بْهَالْعُمرْ

تَا إِرسمِكْ صُورَه.. عَلِّقَا بِالْبَالْ

وْغَمِّضْ عْيُونِي وْنَامْ عَ فَرْشِةْ زَهرْ

**

بعلبك

يَا بْعَلْبَكْ.. الْـ عَمْ يِعْبَدُوكِي الآلْهَه

يَا مَرْكَع الشَّمْس وْضَمِير الْكَوْنْ

مْدِينْتِكْ عَمْ تِنْتِحِبْ.. شُو صَابْهَا؟

سَامِعْ أَنِين طْفَالْهَا مِنْ هَوْنْ

**

أطفال

أَطْفَالْ عَمْ تِتْشَرَّد بْهَالْكَوْنْ

تِحْكِي ظُلمْ إِمَّاتْهَا وْبَيَّاتْهَا

خِلْقِتْ.. مَا عِرْفِتْ لَيْشْ هِيِّي هَوْنْ

وْمِينْ الْـ زَرَعْ بِالْبَطْنْ فَجْر حْيَاتْهَا!

**

متكبر

مِتْكَبَّرْ.. وْعَايِشْ حَيَاتَكْ كلّهَا

تِضْحَكْ عَ حَالَكْ قَبل كلّ النَّاسْ

تْوَعَّى.. تْوَعَّى.. قَبلْ مَا تُوصَلّهَا

حَالِه.. مَا تَرْكِتْ لِلْخَلِيقَه أْسَاسْ

**

غربة

لا تْقُولْ إِنِّي كْتَبْت بِالْغُرْبِه

الْغُرْبِه بْتِكْتُب شِعرْ عَ ذَوْقَا

بْتِمْحِي بْإِيدَا الْكِلْمِةِ الصَّعْبِه

وْبِتْخِطّ كِلْمِه هَيّنِه فَوْقَا

**

كرمك أنا

عْطِينِي الْعَرشْ وِالتَّاجْ يَا رَبِّي

وْسَيْف الْحَقِيقَه الْـ حَامْلُو بْإِيدَكْ

تَا رِدّ هَـ الضَّرْبَاتْ عَنْ شَعْبِي

كَرْمَكْ أَنَا.. وْشَعْبِي عْنَاقِيدَكْ

**

إسلام ومسيحيه

مِنْشَانْ طُول اللَّيْلْ إِقْدرْ نَامْ

وِتْصِيرْ وِسْع الْكَوْن عِينَيِّي

بْعَيْنِي الْيَمِينْ بْرَكِّز الإِسْلامْ

وْبِالشّمَالِيِّه.. الْمَسِيحِيِّه

**

زوادة

لَمَّا بْنَوْمِي بِحْلَم وْلادِي

الْـ مَاتُوا تَا يِفْدُوا أَرْزِة بْلادِي

بْحِسّ إِنِّي خِدْت مِنْ مَوْتُنْ.. هَنَا

وْإِنِّي عْطَيْت الْمَجدْ.. زُوَّادِه

**

ليش؟

لَيْش صِرْنَا بْهَالدِّنِي مْسَبِّه

وِتْشَرْشَحِتْ بِالْكَوْنْ قِيمِتْنَا

وْلَيْشْ انْسَلَخْنَا عَنْ أَرزْ رَبِّي

وْجِينَا انْزَرَعْنَا بْحُرْشْ غُرْبِتْنَا؟!

**

دمع ودم

بْلادِي يَا دَمْع وْدَمّ مَجْبُولِينْ

بْصَرْخَاتْ أمّ مْضَيّعَه طْفَالاَ

صَرْلاَ عَ شبَّاكَا سْنِينْ سْنِينْ

نَاطْرَه.. وْنَاطِرْ مَعَا خْيَالاَ

**

سهرانه

شِفْتِكْ بِعَتْم اللَّيْلْ سهْرَانِه

مِتل الْقَمَرْ.. مِتلْ الشَّجَرْ وِالْبُومْ

خِفتْ.. وْمِنْ خَوْفِي يَا شيطَانِه

بْأَرْضِي وْقَعتْ.. وِعْجزْتْ إِنِّي قُومْ

**

شجرة ميلاد

شَجْرِةْ مِيلادْ.. وْبَاقة غْنَانِي

وْأَطْفَال بِالأَعْيَادْ فرْحَانِه

كلّ الدِّنِي أَعْيَادْهَا أَعْيَادْ

إِلاَّ بْلادْ الأَرزْ.. حزْنَانِه!

**

كف الليل

عَارِفْ أَنَا.. إِسْمِي عَ كَفّ اللَّيْلْ

وِاللَّيْل عَمْ يِغْدُرْ بِنِجْمَاتُو

عَارِفْ أَنَا.. بْشِعْرِي جْنُون الْوَيْلْ

وِالْمَوْتْ عَمْ يِلْطَى بْأَبْيَاتُو

**

شفاف الزهر

.. وْلَيْشْ سَمُّوكِي سِنِه جْدِيدِه

وْأَرْضِي الْحَبِيبِه مْجَرّحَه بِعْذَابْ

دِبْلُوا شْفَاف الزَّهرْ عَ إِيدِي

وْبَعْدِكْ بِوِجِّي مْسَكّرَه الأَبْوَابْ

**

اشتقت يا لبنان

اشْتَقتْ يَا لُبْنَانْ عَ رْبُوعَكْ

عَ أَرْضَكْ اللِّي مْقَدّسِه بْدَمَّاتْ

أَطْفَالْ.. لَوْلاَ بْتِنطفِي شْمُوعَكْ

مِتل النّجِمْ بِتْشِعّْ بِالْعَتْمَاتْ

**

بنتنا

قَالُوا: إِذَا بْسِكِّينْ مُش رَحْ تِلْحَقَا

وِتْعِيدْ قِصِّةْ إِمّهَا مَعْ بَيّهَا

هَايْ بِنتنَا.. أَشْرَفْ إِذَا مِنْطَلِّقَا

وْلاَ تْضَلّ تِشْرَبْ مِنْ خَوَابِي مَيّهَا!

**

لازم نقاوم

تَا نْكُونْ أَقْوَى مْنِ الرِّيَاحْ الْعَاتْيِه

الْـ حَصْدِتْ سَنَابِلْنَا اللِّي بَعْدَا خُضْرْ

لازِم نْقَاوِمْ هَـ الْعَادَات الْبَالْيِه

وْعَ كلّ مَفْرَقْ دَرْبْ نِزْرَعْ زَهْرْ

**

حكاية شعب

شَاعِرْ أَنَا.. وِالشِّعرْ عَ شْفَافِي حِكِي

حْكَايِةْ شَعبْ.. لَـ مِينْ بَدُّو يِشْتِكِي

صَلْبُوهْ، مِتل الرَّبّ، فَوْق الْجُلْجُلِه

وْشِرْبُوا الدّمُوع وْهَيّصُوا لِمِّنْ بِكِي

**

وين الخلاص؟

يَا رَبّ لا تِحْرُمْ أَرضْ لُبْنَانْ

زِينْةِ الأَعْيَادْ.. وَينْ مَا كَانْ

وِدَّيْت إِبْنَكْ تَا يْخَلِّصْنَا

وَيْن الْخَلاصْ.. وْشَعبْنَا يِئْسَانْ؟!

**

كمشة هوا

أَحْلَى مَسَا.. لَمَّا الْبَسْمِه بْشُوفْهَا

عَ شْفَافْ نَاس مْبَيّنِه مَعْرُوفْهَا

سْأَلْهَا عَ "كِلْمِه" أَوْ عَلَى "كَمْشِةْ هَوَا"

بِتْجَاوِب الأَمْوَالْ فَوْق كْفُوفْهَا

**

كنا وكان

يَا نَاسْ.. كِنَّا وْكَانْ فِي عِنَّا وَطَنْ

مَا انْوَجَدْ مِتْلُو عَلَى طُول الزَّمَنْ

وْهَلَّقْ، يَا حَسْرَه، صَارْ مَلْعَبْ لِلْخَرَابْ

وِتْشَتَّتُوا الأَحْبَابْ مِنْ كِتْر الْمِحَنْ

**

خمسة

لَوْ كَانْ مِتْلِي بْهَـ الدِّنِي أَللَّـه خَلَقْ

خَمْسِه.. وْزَرَعْهُنْ بِالْقَارَات الْخَمْسْ

كَانْ خُبْز النَّاسْ صَفَّى مِنْ وَرَقْ

وْعَبُّوا كَاسَاتُنْ مِنْ شُعَاع الشَّمْسْ

**

شوق

لاَ تْقُولْ إِنُّو بْعِدْتْ عَنِّي كْتِيرْ

مْسَافِه قَرِيبِه بَيْنَكْ وْبَيْنِي

قرْب الْمَدَى مِنْ شَوْق الِعْصَافِيرْ

وْقرْب النّجُومْ اللِّي بْسَمَا عَيْنِي

**

أمل

بِبْعَتْ الْمَكْتُوبْ.. مَا بْيِرْجَعْ جَوَابْ

وِبْصِيرْ نَاطِرْ حَدّ صنْدُوق الْبَرِيدْ

الْبُوسْطَجِي بِيغِيبْ عَنْ عَيْنِي وْضَبَابْ

بِيلِفّ قَلْبِي بْحُلْم عَمْ يِخْلَقْ جْدِيدْ

**

عومي

مَرْقِت سْنِين مْحَمّلِه فَوْقَا سْنِينْ

وْبَعْدِكْ يَا أَرْض الْعِزّ مَظْلُومِه

تْمِنَّيْتْ لَوْ بِعْصَاةْ مُوسَى إِسْتعِينْ

وْقِلِّكْ بَعد مَا يِغْرَقُوا: عُومِي

**

مجنون

كل الْـ بِيأَلِّفْ كِلِمْتَيْن زْغَارْ

صَفَّى بْهَالْغُرْبِه أَدِيب كْبِيرْ

أَمَّا الأَدِيب الْـ كِلْمِتُو مِنْ نَارْ

مَجْنُونْ.. رَحْ يِبْقَى عَ طُولْ زْغِيرْ!

**

يا أمي

دَامْعَه عْيُونِكْ يَا أمِّي كْتِيرْ

عَ بْلادْ جَبْرُوكِي تِتِرْكِيهَا

أَللَّه بْمِيلادُو بْيِرْفَع التِّعْتِيرْ

وِبْيِرْجَع يْضَوِّي لَيَالِيهَا

**

شروال

بَدَّكْ يَا شَاعِرْنَا الشِّعرْ شِرْوَالْ

مِنْ عَهدْ جِدَّكْ.. تَا تْهَنِّينِي

وْنِحْنَا بْعَصرْ مَارِدْ.. ذَكِي.. قِتَّالْ

كَسَّرْ عَ رَاسَكْ أَلْف قَنِّينِه؟!

**

كلو هوا

يَا مَا سْمِعِتْ أَخْبَارْ عَنْ بُخْلِكْ

وْإِنِّكْ عَ قِرْش بْتِدْبَحِي غَيْرِكْ

كِلُّو هَوَا الْـ عَمْ تِجْمَعِي بْسَطْلِكْ

وْعَمْ تِدْفَعِي حَقّ الْهَوَا عُمْرِكْ

**

كذاب

عَمْ بِينَادُوكْ النَّاسْ يَا كِذّابْ

وْبَعْدَكْ عَ حَالَكْ مَا بْتِتْغَيَّرْ

مْنِ شْهِيقَكْ.. هْبُوبْ الْهَوَا بْيِرْتَابْ

وِزْفِيرَكْ.. غْبَار الْكِذِبْ طَيَّرْ

**

بلبل

صَوْتَكْ حلُو يَا بُلْبُل الْبسْتَانْ

يَا طَيْر غَنَّى بْهَالدِّنِي وْرَنْدَحْ

يَا صَوْتْ مِنْ بَحِّةْ صَدَى الْوِدْيَانْ

يَا نَغْمِة الْـ فِيهَا السَّمَا بْتِفْرَحْ

**

أمل لبنان

يِسْعدْ مَسَاكُنْ يَا أَعَزّ حْبَابْ

يَا أَمَلْ لُبْنَانْ.. يَا غِيَّابْ

جِينَا تَا نِسْهَرْ وِالْمَسَا يْخَبِّرْ

كْرَامِةْ عِينَيْنَا هَـ الْقَمَرْ مَا غَابْ

**

بحور العهر

عَ كِتِرْ مَا غْرِقْنَا بْبُحُور الْعُهْرْ

صَارِتْ خَطَايَانَا مِسِتْحِيِّه

مِنْ حَالْهَا.. مِنْ عَصْر خَلاَّ الْعُمْرْ

يِتْخَبَّط بْأَمْرَاضْ جِنْسِيِّه

**

جنة وطنا

كلّ شِرْبِةْ مَيّ مِنْ نَبْع الصَّفَا

بْتِسْوَى الدِّنِي مِنْ شَرِقْهَا لِلْغَرْبْ

جَنِّةْ وَطَنَّا.. صَعْبْ حَتَّى نَعْرِفَا

إِلاَّ مَا نِزْرَعْ قَلبْنَا بِالْحُبّْ

**

حربايه

حَضِّرْ قَضِيبْ لإِبْنَكْ وْقِللُّو:

تْهَذَّبْ.. مَا بَدِّي يَاكْ حِرْبَايِه

أَشْرَفْ إِذَا بِتْفَصْفِصُو كِلُّو

وْلا يْضَلّ إِبْنَكْ خَرْجْ تِنْقَايِه

**

هيدا النصيب

بَيْنْ الشَّرَفْ وِالْحُبّ نِقَّيْت الْحَبِيبْ

الْـ بَاعْ الطَّهَارَه لْنَاسْ غَيْرِي مِنْ زَمَانْ

قِلتْ: بِرْضَى بْقِسِمْتِي.. هَيْدَا النَّصِيبْ

وْمَعْلَيْشْ لَوْ مَا شِفْتْ لَوْن الأُرْجُوَانْ!

**

بحبك

لَيْش الْحَربْ عَمْ تِسْرِقَكْ مِنِّي

وْتِزْرَع الآهَات بِـ قَلْبَكْ

مَا فِي حَدَا بِيبَيْعِدَكْ عَنِّي

قَدّ أَللَّـه الْـ بِالسَّمَا بْحِبَّكْ

**

مجرم

إِنْتْ مُجْرِمْ.. إِنْتْ عَمْ تِقْتُل وْلادْ

يَا زَعِيم الْحَيّ.. يَا نَبْع الْفَسَادْ

وْحَقّ أَللَّـه.. وْحَقّ كلّ الأَنْبِيَا

مْنِ حْجَارْ قَبْرَكْ بَسّ مِنْعَمِّر بْلادْ!

**

أحسنلك

أَعْزَبْ إِذَا بِتْضَلّ أَحْسَنْلَكْ

مَا عَادْ فِيكْ تْأَمِّن لْحرْمِه

عْطِيهَا الْقَلبْ.. بِتْنِقّ مِنْ بُخْلَكْ

وِبْتِتِرْكَكْ.. وِبْتِنْكُر النِّعْمِه

**

إنتو الوحي

زْعِلْتِي لأَنِّي مْخَاصَم النِّسْوَانْ

هَـ الْكلّ عُمْرِي زَيِّنُنْ بِالزَّهْرْ

إِنْتُو عْيُونِي.. وْجَنِّة الرِّضْوَانْ

وْإِنْتُو الْوَحِي لْمَلْيُون قِطْعِةْ شِعْرْ

**

متل السحر

كلّ نقْطِةْ دَمّ نِزْلِتْ عَ التّرَابْ

فَرَّخْ مَكَانَا حُلْم أَوْسَعْ مِنْ دِنِي

وْخَلِّتْ وَطَنَّا يْزِيحْ عَنْ صَدْرُو الْعَذَابْ

وْمِتل السِّحر يِرْجَعْ لَحَالُو يِنْبِنِي

**

حكايتي

حْكَايْتِي.. رَحْ إِنْشِرَا بِكْتَابْ

تَا تْكُونْ عِبْرَه لْكِلّ أَجْنَاس الْبَشَرْ

شْهُورْ عِشْتَا بِالضَّيَاعْ وْبِالْعَذَابْ

حَتَّى الْقَلبْ مِنْ ظلمْهُنْ كَان انْفَجَرْ

**

بيّي

عِنْدَكْ يَا بَيِّي بْقَلبْنَا تِذْكَارْ

مَحْفُورْ عَنْ إِيمَانْ تَا تْشِيب السّنِينْ

رِبَّيْتْنَا بْتَقْوَى تَا صِرْنَا كْبَارْ

لا تْخَافْ.. نِحْنَا عَ الأَمَانِه مْحَافْظِينْ

**

باب الأمل

شُو صَابْنَا لَوْلا سَفِينِةْ نُوحْ

مَا تِنْبِنِي.. هَـ الْكَوْن يَا دِلّو؟!

بَاب الأَمَلْ حَتَّى يْضَلّ مَفْتُوحْ

لازِم تْتُوبُوا وْتِرْكَعُوا تْصَلُّوا

**

هنيال قلبي

هْنِيَّالْ قَلْبِي فَرحْتُو كْبِيرِه

حِبَّيْت حِلْوِه شَعرها أَشْقَرْ

وِعْيُون زرْق بْتِشْبَه دْخِيرِه

مْعَلّقَه عَ وِجّ مِنْ مَرْمَرْ

**

الموت

الْمَوْتْ نَشْوِه وْإِنْتِصَارْ وْكِبْرِيَا

وْتِكْسِيرْ رَقْبِةْ هَـ الدِّنِي الْـ نِحْنَا فِيَا

وْتِخْلِيص أَنْفُسْنَا عَلَى طُول الأَبَدْ

مِنْ هَـ الْخَطَايَا الْـ كلّ لَحْظَه مْنِخْطِيَا

**

قمة شموخ

لازِم بْلادِي تْعِيشْ عَ ذَوْقَا

وْمَا تْخَافْ غَيْر الْخَالِق الدَّيَّانْ

قِمِّةْ شُمُوخْ.. وْمَا حَدَا فَوْقَا

مَهْمَا عْلَيْهَا تْطَاوَلُوا الْجِيرَانْ

**

يسوع

بْلَيْل بَارِدْ.. لا نْجُوم وْلا شْمُوعْ

وْبِمْغَارِة الْـ كلاَّ قَهرْ وِدْمُوعْ

عَ فْرَاشْ قَشّ بْمَعْلفْ بْهَايِمْ

مِنْ أمّنَا الْعَدْرَا خِلِقْ يَسُوعْ

**

حلم

حْلِمْتْ حُلْم كْبِيرْ يَا لُبْنَانْ

حْلِمتْ إِنَّكْ ضَاحِكْ وْفِرْحَانْ

وْإِنُّو السِّلـمْ غَطَّى الْجَبَلْ وِالسَّهْلْ

وْرِجْعُوا اللِّي تَرْكُوا أَرْضَكْ مْنِ زْمَانْ

**

مزهرية ورد

بِالصَّيْفْ إِنْتِي مَزْهَرِيِّةْ وَرْدْ

كل يَوْم عَمْ بِتْفَتِّح مْوَاعِيدْ

لكِنْ إِذَا بِيطِلّ فَصْل الْبَرْدْ

بَدِّكْ عَ صدْرِي ضُمِّك مْنِ جْدِيدْ

**

ما بتفهموا

مَا بْتِفْهَمُوا.. مَهْمَا تْقُولُوا وْتِدِّعُوا

وْمَهْمَا عْلِيتُوا بِالْفَضَا رَحْ تُوقَعُوا

إِنْتُو إِذَا مْشِيتُوا الْمَسَافِه كلّهَا

بْتِضْجَرُوا مِنْ حَالْكُنْ.. وِبْتِرْجَعُوا

**

عيب

عَيْب وَاللَّـه عَيْب يَا خَيِّي

تْعَرِّم بْأَنْفَاسْ مِنْحِبْسِه

مِنْ يَوْم مَا عِمْلُوكْ.. شَخْصِيِّه

مِنْ رِيحْتَكْ عَمْ تِقْرَف الْكرْسِي

**

بنت الأصل

لْوَيْنْ إِنْتِي رَايْحَه وْمَا بْتِسْأَلِي

زَوْجِكْ أَنَا.. شُو نَاسْيِه هَـ الْمَسْأَلِه؟!

عُودِي لأَصْلِكْ يَا مَرَا.. بْيِكْفِي جِهِلْ

بِنْت الأَصلْ مَا بْتِنْزِل لْهَالْمَنْزَلِه

**

قمار

مَجْنُونْ.. بَاع الْبَيْتْ تَا يِلْعَب قْمَارْ

مِنْشَانْ حَتَّى يْرِدّ كِلّ خْسَارْتُو

وْلَمَّا انْطَوَى اللَّيْل وْطِلِع فَجْر النّهَارْ

رُوحُوا اسْأَلُوا الْخُورِي شُو صَار بْحَالْتُو

**

شعرك وشَعرك

شَاعِر.. وْشِعْرَكْ مِتِلْ شَعْرَكْ

مَنْفُوش مِنْ كِتْر الذِّكَا وِالْعِلْمْ!

أَوْزَانْ مَا بْتِنْعَدّ.. عَ ضَهْرَكْ

حَامِلْ.. وْبَعْدَكْ مِتِل صَخْر الصَّمّْ

**

حرية

مَهْمَا كَان الْبَحْر كْبِيرْ

مَنُّو أَكْبَرْ مِنْ عِينَيِّي

وْمِنْ قَلْبِي الْـ عَمْ يِعْطِي كْتِيرْ

مِنْ دَمَّاتُو.. لِلْحُرِيِّه

**

فوفو

أَحَلَى وْأَنْعَمْ مَا بَقَى تْشُوفُوا

حِلْوِه جَبَلْهَا الرَّبّ بِكْفُوفُو

وْنَخّ الْجَمَال وْبَاس إِيدَيْهَا

وْقَال الْقَمَرْ: شَمْس الدِّنِي.. فُوفُو

**

غلطان

مُشْ حَقّ نِتْحَاسَبْ أَنَا وِيَّاكْ

وِنْقُول يَللِّي بْقَلبْنَا لِلنَّاسْ

غِلْطَانْ.. عَمْ قِلَّكْ.. وْبِتْرَجَّاكْ

تْحَافِظْ عَ رُوح الْحُبّ وِالإِحْسَاسْ

**

ختيرت

خِتْيَرْت.. وِالتَّلْجَاتْ عَ رَاسِي

بْيِحْكُوا حْكَايَات الْعُمر كِلُّو

عِشْتْ عُمْرِي خَايِفْ.. وْنَاسِي

هَالْـ خِفتْ مِنُّو.. صَعبْ أُوصَلُّو

**

يا ريت

يَا رَيْتْ فِيِّي عَلِّم وْلادِي

يْحِبُّوا الْكَرَمْ وِالْجُودْ

مْحَبِّة الشِّلاَّلْ لِلْوَادِي

وِالْكَرْم لِلعنْقُودْ

**

متل الفقير

كلّ عُمْرِي حِسّ إِنُّو الْوَرْدْ

عطْشَان بِجْنَيْنِةْ حَيَاتِي كْتِيرْ

وْدِنْقَانْ مِنْ كِتْر التَّلجْ وِالْبَرْدْ

مِتْل الْفَقَيرْ الْـ لاحْقُو التِّعْتِيرْ

**

باعوا تراباتا

الأَرْزِه الْـ بِأَعْلَى جْبَالْ عَمْ تِبْكِي

وْتِدْبَل غْصُونَا الطَّاهْرَه وْتِتْكِي

مِنْ يَوْم مَا بَاعُوا تْرَابَاتَا

وْخَنْقُوا عَ تِمّ طْفَالْهَا الضِّحْكِه!

**

يأس السنين

مَشْغُول بَالِي عْلَيْك يَا لُبْنَانْ

وْرِخْص الدَّمعْ مِنْ كِتْرِة دْمُوعِي

طَلِّتْ سِنِه جْدِيدِه.. وْأَنَا يِئْسَانْ

يَأْس السّنِين الْـ حَرْقِت رْبُوعِي

**

أنا سيدك

عْلَيِّي أَنَا.. عَمْ تِرْفَعِي إِيدِكْ؟!

يَا مْتَوّجِه عَ مَملْكِةْ قَلْبِي

لِمِّنْ شْبِعْتِي كْتِيرْ مِنْ حُبِّي

قِلْتِي: عَبدْ.. لكِنْ أَنَا سِيدِكْ

**

بيكفي بقى

عِمَّرْت بَيْت وْصِرْت تِتْفَلْسَفْ

وِتْشُوفْ حَالَكْ عَ الدِّنِي كِلاَّ

بْيِكْفِي بَقَى.. الْحجْرَانْ رَحْ تِقْرَفْ

وْتِنْدَه تَا حَتَّى تُوقَف مْحَلاَّ!

**

غصة

كلّ عِيد وْعَامْ إِنْتِي بْخَيْرْ

يَا رُوحْ رُوحِي وْبَهْجِة عْيَادِي

يَا سْنَابِل الْقَمْح وْرِيشَات الطَّيْرْ

يَا غَصِّة الْـ بِالْقَلْبْ.. يَا بْلاَدِي

**

ليرات

الْيَهُودْ.. صَلْبُوا الرَّبّ مَرَّه وَاحْدِه

وْنِحْنَا، بْدَقِيقَه، مْنِصِلْبُو مَرَّاتْ

شْيَاطِينْ عَمْ بِتْمِصّ فِينَا وْقَاعْدِه

تْصَوِّرْ عَ صَفْحَات الْقَلْب.. لِيرَاتْ

**

خبروني

خَبّرُونِي خْبَارْ بِتْشَيِّبْ وَلَدْ

خَبّرُونِي كِيفْ جِهَّلْتِي الْبَلَدْ

وْكِيفْ صِرْتِي مْزنطرَه بَعْد الْغِيَابْ

وِمْقَسّمِه السَّاعَاتْ تَا تْبِيعِي الْجَسَدْ!

**

حبي أنا

مْأَكَّدْ فْزِعْتِي كْتِيرْ مِنْ حُبِّي

الْـ مَا بْيِرْحَمْ.. اللِّي بْيَعْرِف يْرَبِّي

حُبِّي أَنَا نِيرَانْ وِجْنُون وْخَطَرْ

وْمَفْقُودْ.. يَللِّي بْيِسْكُن بْقَلْبِي

**

إياك

إِيَّاكْ تِنْصَحْ خَيَّك.. تْوَعِّيهْ

بِبْلادْ فِيهَا الْمُرّ بِطَعْم الْحلُو

وْإِيَّاكْ إِنُّو تْمِدّ إِيدَكْ تِنْشِلُو

وْلَوْلا غِرِقْ.. يِغْرَقْ.. شُو بَدَّكْ فِيهْ

**

زورق

رَبِّي عَطَانِي الْمَوْهَبِه وْقَللِّي:

مِنْ تِحتْ إِيدِي شِعْرَك بْيِمْرَقْ

أَنَا الْـ زَرَعْتَكْ فَوْقْ عَ التَّلِّه

وْأَنَا الْـ قَدَفْتَكْ بِالْبَحرْ.. زَوْرَقْ

**

جهال

كلّ وَاحِدْ صَارْ بِالْغُرْبِه أَدِيبْ

وْأسْتَاذْ.. نَاقِصْ يِحْمِل بْإِيدُو قَضِيبْ

لكِنْ، يَا حَسْرَه، بْيِطْلَعُوا بَعدْ الْفَحصْ

جِهَّالْ.. صَعْب كْتِيرْ تَا يْنِصُّوا مْكَاتِيبْ

**

لا تعيدني

لا تْعَيِّدْنِي.. مَا بَدِّي يَاكْ

تِحْمِل هْدَايَا بْأَلْف لَوْن وْلَوْنْ

بْحَقّ الْهَدَايَا.. رُوحْ وَدِّي تْشَاكْ

عَ بْلادْنَا اللِّي انْصَلْبِت بْهَالْكَوْنْ

**

عنق وخد

كلّ مَرَّه بْشِمّ فِيهَا الْوَرْدْ

بْلاَقِي عَبِيرُو بْكِلّ شَمِّه عَمِ يْطِيرْ

لكِنْ إِذَا شِمَّيْتْ عُنْق وْخَدّْ

بْتِتْعَطَّرْ الأَنْفَاسْ.. وِبْيِبْقَى الْعَبِيرْ

**

قصة عذابك

قِصِّةْ عَذَابِكْ.. لَوْ شِي مَرَّه بِحْكِيَا

بِتْشَيِّبْ طْفَال الدِّنِي أَخْبَارْهَا

يَا أَرْض عَطْيِتْ كِلّ شِي فِي أَنْبِيَا

شَمْسِكْ عَظِيمِه بْتِشْرُق مْنِ غْبَارْهَا

**

وجع

لَيْش الْوَجَعْ عَمْ يَاكُل عْضَامِي

وْيِصْحَا مَعِي وِيْنَامْ؟!

فِزْعَانْ مِنْ تِكْرَارْ آلامي

بْرُوزْنَامْةِ الأَيَّامْ

**

صلبوك

صَلْبُوكْ فَوْق الْجُلْجُلِه وْصَارُوا

يْتَاجْرُوا بِدْمُوعَكْ وْدَمَّكْ

وِالدَّمّ لِمِّنْ رِخْصِت سْعَارُو

سَنُّوا السّيَاخ.. وْقَطّعُوا لَحْمَكْ

**

عتم

خْلِقْت.. وْخِلْقَان قْبَالِي

الضَّوّ الْمَسْرُوق مْنِ النَّجْمْ

الْـ بَدَّدْ عَتْم اللَّيَالِي

وْخَلاَّنِي إِمْشِي بِالْعَتْمْ

**

قلب مدبوح

مْجَانِينْ يَللِّي قَسّمُوا الِبْلادْ

وْسَلّمُوا مْفَاتِيحْهَا لِلْغَيْرْ

هَـالْـ رَبِّتُنْ بِدْمُوعْهَا.. وِبْعَادْ

عَنْ قَلْبهَا الْمَدْبُوحْ مِتل الطَّيْرْ

**

مستبدة

مِستْبِدِّه كْتِيرْ وِبْتِخْرُب بْيُوتْ

وْقِدَّامْ كِذْبَا.. الْكِذْب بِينَدِّي

عَ دْمَاغْهَا صَعْبِه الْحَقِيقَه تْفُوتْ

مَسْدُودْ رَاسَا.. وْمَا إِلُو سَدِّه

**

أنا صايـم

لا تْسِبّ قِدَّامِي.. أَنَا صَايِمْ

نْدَرْت الْفقرْ أَيَّامْ شَهْر الصَّوْمْ

وْطُول الْعُمرْ عَمْ بِسْكَرْ وْحَالِـمْ

بْجَنِّه مَا فِيهَا غَيْرْ بَسْط وْنَوْم!

**

دياب

قِرْفَانْ مِنْ حَالِي أَنَا قِرْفَانْ

وْمَا عِدْت أَمِّنْ بِالدِّنِي لإِنْسَانْ

صرْت شُوف النَّاسْ كِلاَّ دْيَابْ

الآدَمِي فِيهُنْ مِتِل شيطَانْ

**

لا

لا تِمْدَحْنِي.. قِللِّي الْحَقّْ

الْحَقّ بْيِرْبَحْ مَهْمَا كَانْ

بْفَضِّلْ إِسْمَعْ كِلْمِةْ "لأْ"

وْلا إِسْمَعْ كِذْب وْبُهْتَانْ

**

عز ومجد

لَوْلاَ بْبَلَدْنَا مَاتْ مُطْلَقْ فَرْدْ

وَيْن مَا كِنَّا الْعُيُون بْيِدْمَعُوا

نِحْنَا شَعْبْ رِضْعَانْ عِزّ وْمَجْدْ

مُشْ مِتِلْ يَللِّي بْيِرْضَعُوا.. وْمَا بْيِشْبَعُوا

**

وصية

وْصِيِّه بْوَصِّيكُنْ قَبِلْ مَا رُوحْ

عِيشُوا بْسَعَادِه هَـ الْعُمرْ كِلُّو

وِانْ كَانْ شِي مَرَّه الْقَلبْ مَجْرُوحْ

بْضِحْكِه زْغِيرِه الْمُرّ بِتْحَلُّوا

**

باب

رَحْ يِقِتْلُونِي.. صَاحْ هَـ الْكِذَّابْ

الْـ عَمْ يِكْذبْ عْلَيْنَا بْأَقْوَالُو

وْهُوِّي بْعَيْن النَّاسْ مِتل الْبَابْ

بْيِغْلُقْ.. بْيِفْتَحْ بِالْهَوا.. لْحَالُو!

**

يا حلوه

وَقْتِكْ يَا حِلْوِه ضَايِعْ بْهَالْمَدْرَسِه

وْأَصْعَبْ عُلُوم بْهَالدِّنِي عَمْ تِدْرسِي!

إِنْتِي إِذَا بْتِتْعَلّمِي فْنُون الْهَوَى

أَنْفَاسْ كِلّ النَّاسْ فِيكِي تِحْبِسِي

**

حرف زغير

مُشْ حَقّ تِحْسِدْنِي عَ هَـ الْحَرْف الزّغِيرْ

يَللِّي كْتَبْتُو بَسّ تَا إِرْضِي الضَّمِيرْ

وْخَلِّي بْلادِي الْـ غِرْقِت بْبَحْر الدِّمَا

تْصَفِّي شَمْس.. وِيْشَعْشِع الْبَدْر الْمُنِيرْ

**

بواب العتاب

يَا رَيْت بِقْدِرْ سَكِّر بْوَاب الْعِتَابْ

وْأُوقَفْ عَ نِصّ الدَّرْبْ وِالدِّنْيِي غِيَابْ

وْقِلِّكْ: أَنَا لَوْلا عْيُونِكْ مُشْ أَنَا

وْلَوْلا وْجُودِكْ هَـ الْعُمرْ كِلُّو عَذَابْ

**

بقدر ركعك

قَالِتْ: بِلَيْلِه وَاحْدِه رَحْ شَبِّعَكْ

بَسْط وْغِوَى.. وْمِتْل الْعَجِيبِه رَجّعَكْ

قِلْتِلّهَا: مْنِ الصَّعْب إِنِّكْ تِقدرِي

قَالِتْ: يَا بَهْلِي.. سْكُوتْ.. بِقْدرْ رَكِّعَكْ

**

قصة

لَمَّا التّلجْ عَ جْبَالْنَا حَطّ الرِّحَالْ

وْنَزَّلْ عَنِ كْتَافُو الْعَرِيضَه حْمَالْ

سْمِعتْ صَرْخِة طفلْ مِنْ تَحت التَّلجْ:

فَوْق الْغَضَبْ لا تْزِيدْ.. يَا حَامِي الجبَالْ

**

ضيعة الأحباب

يَا ضَيْعِةْ الأَحْبَابْ شُو بْحِبِّكْ أَنَا

إِنْتِي الدِّنِي.. إِنْتِي الْمَحَبِّه وِالْهَنَا

لَيْش بَسّ نْغِيبْ عَنْ أَرْضِك نْهَارْ

مِنْحِسّ وَاللَّـه هَيْكْ مِدْرِي شُو بِنَا؟!

**

كرمال الزعيم

بْيِتْخَانَقُوا الْجِيرَانْ كِرْمَالْ الزَّعِيمْ

الْـ بَاعْ الْكَرَامِه وِالشَّهَامِه وِالضَّمِيرْ

وْخَلاَّ قْلُوب طْفَالْ رِبْيِتْ عَ الْحَصِيرْ

تْدُوقْ طَعْم الْحِقْد.. وِتْعِيش بْجَحِيمْ

**

إرنستين

لا الْفُلّ مِتْلا.. وْلا زْهُور الْيَاسَمِينْ

وْلا طْيُورْ عَمْ تِتْمَرْجَحْ بْغَيْمَاتْ

أَللَّـه خَلَقْهَا وْقَالْ: إِرْنِسْتِينْ

بْتِسْوَى الْقَمَرْ وِالشَّمْسْ وِالنِّجْمَاتْ

**

ندى

كِرْمَالْ عَيْنِكْ هَـ الْوَرْد رَحْ إِقْطِفُو

وْإِشْلَحُو عَ دَرْب بَيْتِكْ يَا نَدَى

وْإِتْرِكُو لِلرِّيحْ حَتَّى تْصَفْصِفُو

مِتْل النّجُوم الْـ مَا بْيِقْشَعْهَا حَدَا

**

ضياع

شُو هَـ الضَّيَاعْ الْـ عَايْشِينُو الْيَوْمْ

مْنِمْشِي مِتِلْ أَشْبَاحْ عَمْيَا عَ الطَّرِيقْ

بِالْكَادْ إِنُّو نْدُوقْ طَعْم النَّوْمْ

حَتَّى إِذَا نِمْنَا.. صَعبْ نِرْجَع نْفِيقْ!

**

كوني أمينة

كُونِي أَمِينِه.. وِالصِّدقْ مِنْ شِيمْتِكْ

يَللِّي رْضعْتِي الصِّدقْ لَـ آخِرْ مَدَى

وْلا تْدِيرِي لْكِلّ كِلْمِه دَينْتِكْ

كِلّ كِلْمِه مِفْتِنِه شِغْل الْعِدَى

**

نبع الشعر

بْخَافْ نَبْع الشِّعرْ تِنْضَبْ مَيّتُو

وْمَا تْعُودْ رَبَّات الشّعرْ حَدِّي

سَاعِتَا.. قَلْبِي بِيوَدِّعْ مَيْمِتُو

وْبِهْجُرْ الْفَرْشِه.. بْسِيبْ الِمْخَدِّه

**

أَبطال

يَا رَبّ.. هَـ الأَبْطَالْ خَبِّرْهُنْ

عَنْ نَصِرْنَا الْـ مَا كَانْ لَوْلاهُنْ

مْنِنْسَى الدِّنِي.. مْنِنْسَى أَسَامِينَا

بَسّ صَعْبِ كْتِيرْ نْنْسَاهُنْ

**

لا تفكري

لا تْفَكّرِي إِنِّكْ طَلِيقَه بْهَالْبَلَدْ

وِالْمُجْتَمَعْ حَامِي حْقُوقِكْ كِلّهَا

نِحْنَا شَعبْ مَا يَوْمْ خِلَّيْنَا الْجَسَدْ

يْدَنِّسْ كَرَامِتْنَا وْبِطَيْشُو يْذِلّهَا

**

مسامحك

مْسَامْحِكْ.. مِنْ يَوْم مَا طْلَبْتِي السَّمَاحْ

وِتْبَلْسَمُوا بِالصّدرْ أَنَّاتْ الْجِرَاحْ

غْدَرْتِي ـ شُو هَمّ ـ الْغَدرْ سنِّةْ هَـ الدِّنِي

وْيَا مَا اللَّيَالِي غَدْرِت بْنُور الصَّبَاحْ!

**

بَيْك

.. وْبَدَّك الْكِرْسِي تْكُونْ مِنْ قِدَّامْ

تَا تْعَرِّمْ.. وْيِنْقَالْ عَنَّكْ بَيْكْ

أَكْبَرْ شَرَفْ بِتْنَالْ لَوْ بِتْنَامْ

تَا نْقَعِّد الْكِرْسِي شِي مَرَّه عْلَيْكْ

**

شفافك

شْفَافك نَبعْ.. مَهْمَا شْرِبِتْ مِنُّو

عَمْ ضَلّْ حِسّ بْنَارْ تِكْوِينِي

جِرَّبْت حَتَّى إِبْتِعِدْ عَنُّو

وْإِنْسَى لَهِيبِي.. لْقيتْ مَا فِينِي

**

صرت إكذب

صِرْتْ إِكْذبْ..صِرْت أَقْسَى مْنِ الْحَجَرْ

مِنْ كِتِرْ مَا هَـ النَّاسْ غَشُّونِي

مِنْشَانْ حَتَّى كُونْ بِعْيُونُنْ قَمَرْ

سِكَّنْتْ عَتْم اللَّيْل بِعْيُونِي

**

غير شكل

غيرْ شكلْ بَدِّي كُونْ يَا رَبِّي

إِحْملْ بِقَلْبِي أَعْظَمْ مْحَبِّه

وْأفْرُش عْيُونِي عَ دْرُوب النَّاسْ

وْإِطْعَمْ الْـ بِيجُوعْ مِنْ قَلْبِي

**

نرفوز

إِيَّاكْ إِنُّو تْضِيعْ يَا نَرْفُوزْ

وِتْصَيِّر الْـ بِيجُوزْ مَا بِيجُوزْ

بِتْصِيرْ مِتْل حْجَارة الطَّاحُونْ

وْمِتل الجرَار الْـ دَقّ فِيهَا الْكُوزْ

**

دمع الندي

بْدَمْع النِّدِي رَحْ غَسِّل خْدُودِي

وْإِغْزُلْ بِـ عَتْم اللَّيْلْ شَعْرَاتِي

وْشِقّ الْقَمِيص وْفَيْلِت نْهُودِي

تَا تْعَانِق الأَرْيَاحْ.. تَلاَّتِي

**

نبي الكل

يَا نَبِيّ الْكلّ.. يَا مْحَمَّدْ

بْصَلِّيلَك بْإِيمَانْ لَيْل نْهَارْ

رَبّ السَّمَا بْقُرْآنَك تْمَجَّدْ

وْخِلَّصْت شَعْبَكْ مِنْ جَحِيم النَّارْ

**

خطية

لَيش انْصَلَبْ يَسُوعْ كِرْمَالِي

وْبَعْدَا الْخَطِيِّه مْكَبّشِي تِكْبِيشْ

بْعَقْلِي.. بْجِسْمِي.. بْكِلّ أَوْصَالِي

وْمِتل الْغَرِيزِه بْدَاخْلِي بِتْعِيشْ

**

عزم الطبيعة

شِكّ رمْحَكْ بِالشَّمسْ.. وِصْرَاخْ

جِبْت الشَّمسْ قِنْدِيلْ لِبْلادِي

وْمِنْ هَيْبتِي عَزْم الطَّبِيعَه دَاخْ

لِمِّن حْمِلْت الْمَجْد.. زُوَّادِه

**

معقول

مَعْقُولْ حَقِّقْ كِل آمَالِي

وْإِزْرَعْ صَابِيعِي نْجُومْ بِالْعَالِي

لَكِنْ، يَا قَلْبِي، الشِّي الْـ مُشْ مَعْقُولْ

إِنْسَى الأَرْض وِتْرَابْهَا الْغَالِي

**

يا عيوني

مَا عِدْت فِينِي إِكْذُب عْلَيْكِي

وِلْهَالسَّبَبْ رَحْ قُولْ يَا عْيُونِي:

تْمِنَّيْت لَوْ مَا كُونْ وِتْكُونِي

وْلا شُوفْ هَـ الدَّمْعَه بْعِينَيْكِي

**

زنت حالي

زِنْتْ حَالِي.. لْقيتْ إِنُّو الرِّيشْ

أَتْقَلِ مْنِ الْجِسْم وِخْيَالِي

خِفْت وِانْهِمَّيْتْ عَ حَالِي

بْحَيْث الْعِطرْ بِيمُوتْ بَسّ يْعِيشْ

**

وتر حساس

يَا رَبّ قَوِّينِي عَ هَـ الشَّيْطَانْ

الْـ قَاعِد بْيِنْقُرْ عَ وَتَرْ حِسَّاسْ

وِيْقُولْ: عِيش بْغُربتَكْ فِرْحَانْ

النَّاسْ بِبْلادَكْ.. مَا عَادِتْ نَاسْ

**

نار الوجع

نَار الْوَجَعْ عَمْ تِحْرُق ضْلُوعِي

وْمَا عِدْت مِنْ ظُلْم الْقَدَرْ عَمْ شُوفْ

وِالنُّورْ عَمْ يِهْرُب مِنِ شْمُوعِي

مِتْل اللَّئِيم النَّاكِر الْمَعْرُوفْ

**

زمرة شياطين

مَا بْرِيدْ إِنُّو تْحِبْنِي.. وِتْكُونْ

حَيِّه مْغِطَّايِه بْكَوْمِة قَشّْ

السَّمّ تَحْت نْيَابَكْ.. وْمَسْكُونْ

بْزمْرِة شْيَاطِينْ كذْب وْغِشّْ

**

تربية

بِتْحِبّ إِبْنَكْ؟.. حَقَّكْ تْحِبُّو

وْدَمّ قَلْبَكْ تِسِكْبُو بْقَلْبُو

بَسّ خَلِّي الْعَقْل قَبل الْحُبّْ

يِزْرَعْ بُذُور التَّرْبِيِّه بْدَرْبُو

**

كذب ومنفقة

لا تْأَمِّنْ لْمَرْتَكْ.. يَا رُوح الرُّوحْ

وْلا تْغَنِّجَا وْتِعْمِيلْهَا قَلْبَا

شُو عَرَّفَكْ مَا بْتِتِرْكَكْ وِتْرُوحْ

وِيْكُونْ كِذْب وْمَنْفَقَه.. حُبَّا؟!

**

جبران

مَهْمَا الْجَهَالِه تْسَوِّد وْجُوه الْبَشَرْ

وْتِزْرَع الطُّرْقَاتْ بِحْرُوب وْخَطَرْ

مِنْضَلّ فِينَا نْحَارِبَا بِكْتَابْ

كَتْبُو النَّبِي جُبْرَانْ عَ ضَوّ الْقَمَرْ

**

زهرة

قْطَفتْ زَهْرَه.. وْقِلْت تَا شِمَّا

جِنَّيْت لِمِّنْ فَتّحِت تِمَّا

وْقَالِتْ: حَرَام عْلَيْك يَا إِنْسَانْ

تِسْرُق الطِّفْلِه مِنْ حُضنْ إِمَّا

**

تركني

تْرِكْنِي.. شْبِعتْ مِنْ دِنْيِتِي قَهْر وْعَذَابْ

وْحَرْقِة الْـ بِالْقَلْب مَا إِلْهَا دَوَا

قَتْلُوا وَحِيدِي الْـ كَانْ زِينِةْ هَـ الشَّبَابْ

وْخَلُّوا حَيَاتِي سْنِينْ بِمْهَبّ الْهَوَا

**

حقوق وأحلام

عَمْ يِظْلمُوك كْتِيرْ يَا لُبْنَانْ

وْيِحِرْمُوك تْعِيشْ أَيَّامَكْ

يَللِّي عْطَيْت حْقُوقْ هَـ الإِنْسَانْ

لازِم تْحَقِّق إِنْت أَحْلامَكْ

**

العمر ضحكة

الْعُمرْ ضِحْكِه.. وْإِذَا مَا ضْحِكْتْ

بِتْعِيشْ حَامِلْ هَمّ عَ ضَهْرَكْ

بْتِمْرُقْ حَيَاتَكْ تَافْهَه.. وْعَ السَّكْتْ

بِتْصِيرْ تِضْجَرْ إِنْتْ مِنْ عُمْرَكْ

**

طير يا عصفور

طِيرْ دَخْلَكْ طِيرْ يَا عُصْفُورْ

وْوَصِّلْ سَلامِي لْكِلّ أَحْبَابِي

قِضَّيْتْ عُمْرِي بْغُربتِي مَقْهُورْ

مِتْل الْفَرَاشِه الضَّايْعَه بْغَابِه

**

أيتام

ضْرِبْهَا عَ بَطْنَا.. طَرِّحَا مَعْلَيشْ

شُو مْفَزَّعَكْ؟!.. نِحْنَا مْنِسْمَحْلَكْ

وْلادْنَا تْرَبُّوا عَلَى الطِّمَّيْشْ

أَيْتَامْ عَاشُوا.. فِيقْ مِنْ جِهْلَكْ!

**

خايف أنا

خَايِفْ أَنَا.. أَطْفَالْنَا تِغْرَقْ

بِوْحُول دِنْيِي شَحّ فِيهَا الطُّهْرْ

وْيِمْشُوا بْغَابِه لَونْهَا مْزَوْزَقْ

الشَّوْك فِيهَا مْفَكّرِينُو زَهْرْ

**

لئيم

لا تْكُونْ لَئِيمْ وْتِنْكُر الْمَعْرُوفْ

رِدّ الْجَمِيلْ وْزِيدْ قِبَّانُو

وْلا تْدِيرْ ضَهْرَكْ سَاعِة الْـ بِتْشُوفْ

خَيَّكْ جُوعَان وْمَادِد لْسَانُو

**

مروج نور

قَولْكُنْ.. رَحْ غَمِّضْ عْيُونِي

عَ مْرُوجْ نُور.. الطُّهرْ ضَاوِيهَا

وْإِجْمَع تْرَابَا.. وْعَلّقُو قُونِه

تَا مْنِ الْوَسَاخَه إِحْتِمِي فِيهَا؟!

**

محبتي

مْحَبّتِي.. مَا بْبِيعْهَا بْغِيرِه وْحَسَدْ

وْلا بْوَسِّخَا بْشَهْوَاتْ فَجَّرْهَا الْجَسَدْ

مَا دَامْ لِبْس الطُّهرْ بَدْلاتْ الْفَنَا

رَحْ خَبِّيَا بِالْقَلْب عَ طُول الأَبَدْ

**

معنى السلام

كِلْمَا تْغِيبْ الشَّمْس وِيْطلّ الصَّبَاحْ

أَحْلامْ عَمْ تِرْكُضْ وَرَا أَحْلامْ

مْنِحْلَمْ بِأَرْزِه ضَمَّدِتْ كِلّ الْجِرَاحْ

وْفَهّمِتْ هَـ النَّاسْ شُو مِعْنِى السَّلامْ

**

ملاك

خَلِّيكْ حَدِّي مَا شْبِعتْ مِنْ مَبْسَمَكْ

وْلا مِنْ أَشَايِرْ بِالإِيدَيْن بْتِرْسِمَا

بْخَرْطِشْ عَلَى الْحِيطَانْ بَدِّي إِرْسمَكْ

تَا ضَلّ شُوفَكْ.. يَا مَلاك مْنِ السَّمَا

**

ما في شتي

مَا فِي شِتِي.. يَا وَيْلنَا مِنْ غَضْبِتُو

رَبّ السَّمَا.. لَمَّا بْيِضْرُبْ ضَرْبِتُو

صَلُّوا يَا نَاسْ.. وْلا تْمِلُّوا مْنِ الصَّلاَ

خَيْر الْمَوَاسِمْ كِلّهَا.. بِمْحَبِّتُو

**

أنبيا

شُو صَابْنَا.. لَوْ مَا يِجُوا هَـ الأَنْبِيَا

الْـ زَرْعُوا آيَاتُنْ عَ شْفَاف الْكَوْنْ

الْـ رَسْمُوا دِنِي بِـ أَلْف لَوْن وْلَوْنْ

وْخَلُّوا الْخَلِيقَه تْعِيشْ تِتْمَتَّعْ فِيَا؟!

**

المال

الْمَالْ.. لا وْجَاهَه وَلا زْعَامِه

وْلا يَوْمْ فَبْرَكْ بِالدِّنِي إِنْسَانْ

تَا تُوصَلُوا لِلْمَرْكَزْ السَّامِي

حِبُّوا بَعدْ أَللَّـه.. أَرزْ لُبْنَانْ

**

لازم نجوع

لازِمْ نْجُوع وْنِعْطَش وْنِبْكِي

وْنِبْرُدْ.. تَا نَعْرِفْ قِيمْتَكْ يَا رَبّْ

يَللِّي زْرَعتْ عَ شْفَافْنَا الضِّحْكِه

وْكِنَّا بْذَات الْوَقْت عَمّ نْسِبّْ

**

وعد

مْنُوعْدَكْ يَا رَبّ بِالْيَوْم الْعَظِيمْ

نِكْبَر وْنِمْشِي عَ الطَّرِيق الْمُسْتَقِيمْ

قْبِلْنَاكْ نِحْنَا بْكِلّ تَقْوَى وْإِحْتِرَامْ

خَلِّيكْ جُوَّا الْقَلبْ.. تَا نْعِيش بْنَعِيمْ

**

بخاطرك

بْخَاطْرِكْ.. عَمْ قُولْهَا.. وْقَلْبِي حَزِينْ

يَا أَرْضْ.. دَمْع وْدَمّ سِقْيُوا تْرَابْهَا

يَا نجْمِة الصُّبْح وْأَمَل الِمْهَاجْرِينْ

يَا بْيُوت بِزْنُودِي رْفَعْت عْتَابْهَا

**

كم ريشه

يَا خَالِقْ الدِّنْيِي مَا بَدِّي غَيْرْ

حُبَّكْ.. رضَاكْ.. الأَوْسَع مْنِ السَّهْلْ

وْبَدِّي تْفَرِّخْ كَمْ رِيشِةْ طَيْرْ

عَ جْوَانْحِي.. تَا طِيرْ صَوْب الأَهْلْ

**

دياب الشعب

لا تْصَدّقُوا الأَخْبَارْ كِلاَّ كِذْبْ

نِحْنَا الْـ دَفَعْنَا دَمّنَا بْهَالْحَرْبْ

مَاتْ مِنَّا أْلُوفْ خَلْف أْلُوفْ

وْعَ ضَهرْنَا اصْطَلْحُوا دْيَاب الشَّعْبْ

**

هزة

هَزِّه.. صْرَخْنَا.. تْكَسّرُوا جْرَارْ النَّحلْ

وِانْهَدّْ قِنّ وْقَتَّلْ الصِّيصَانْ

انْشَقِّتْ الأَرْض وْهَجّرِتْ كِلّ النَّملْ

وْصَارِتْ عَ بَعْضَا تِنْدَه الْحِيطَانْ

**

ممنونك

بِرْكُضْ وَرَاكِي يَا غَزَالِه شَارْدِه

بَرْكِي عْيُونِي بْتِلْمَح عْيُونِكْ

وْبَرْكِي عَ صدْرِكْ بِاللَّيَالِي الْبَارْدِه

بِتْكِي.. وْأَنَا عَمْ قُول: مَمْنُونِكْ

**

صداقة

مَا فِي صَدَاقَه دَايْمِه عَ طُولْ

أَلْعَابْ نِحْنَا بْأَلْفْ إِيدْ وْإِيدْ

وِفْصُولْ عَمْ تِكْرُجْ وَرَاهَا فْصُول

بَعْد الدَّفَى مِنْدَنِّق مْنِ جْدِيدْ

**

فل

إسْلامْ وِنْصَارَى عَمِ نْقِلَّكْ

بْصَوْت وَاحِدْ: فِلّ عَنَّا فِلّْ

أَحْرَارْ نِحْنَا.. وْصَعبْ تَا تِحْتَلّْ

وْتِرْخِي عَ شِبْر مْن الْوَطَنْ ظِلَّكْ

**

دكاكين

مُشْ حَقّ فِيكِي الْبُغْض يِتْمَخْطَرْ

وْيِفْتَح دْكَاكِينْ عَ حْسَابُو

يَا أَرْضْ.. كِلْمَا حِزْنِك تْفَجَّرْ

بْيِقْضِي عَ نَاس تْهَجّرُوا وْغَابُوا

**

تركوني

تْرِكُونِي إِلْعَب بْدِنْيِي سَخِيفِه

وْمِتْل الرِّيحْ طَيِّرْلاَ غْبَارَا

وْبِإِيدِي شَقْلِب عْقُولاَ الْخَفِيفِه

الْـ خَلِّتْ شَيْبهَا يْنَاطِحْ زْغَارَا

**

جان أَلْفا

يَا جَانْ أَلْفَا.. الْـ رَسْمَك بْبَالِي

مَهْمَا الْمَسَافِه تْبَيْعدَكْ عَنِّي

يَا حُلمْ شَتَّتْ عَتْمِة لْيَالِي

وْخَلاَّ الْكَوَاكِبْ تِنْحِسِدْ مِنِّي

**

الدين للديان

الدِّينْ لِلدَّيَّانْ.. مُشْ لِلنَّاسْ

حَاجِي بَقَى عَ النَّارْ تِسْكُبْ زَيْتْ

لا بْيِنْفَعَكْ جَامِعْ وَلا قِدَّاسْ

وْأَكْبَرْ ضَغِينِه بِالْقَلبْ خِبَّيْتْ

**

لولا الأهل

لَوْلا الأَهلْ مَا طَلّقُوا الأَحْبَابْ

وِتْشَرّدُوا الأَطْفَال بِالشَّارِعْ

هِنِّي اللِّي رِمْيُوا وْلادْهُنْ بِخْرَابْ

وْهِنِّي الْـ بِيعِرْسُنْ قَوّصُوا مْدَافِعْ!

**

بيروت

يَا مَا بَشَرْ صَلُّوا تَا حَتَّى تْمُوتْ

هَاك الْمَدِينِه السَّاحْرَه بَيْرُوتْ

كِلّ الْمُدُنْ بُنْيَانْهَا مْنِ حْجَارْ

وْهِيِّي الْوَحِيدِه مْعَمّرَه بْيَاقُوتْ

**

أم

مِينْ شَافْ زَهْرَه مْفَتّحَه بِالتِّمّْ

وْعَمْ تِنْسَقَى مْنِ بْحُورْ دَمْع وْدَمّْ؟

لِلِّي مَا شَافَا بْقُولْ: يَا مسْكِينْ

الظَّاهِرْ يِتِيمْ خْلِقْت.. مِنْ دُونْ أُمّْ

**

هدى

كِلْ مَا تْقُولِي: نَامْ عَ زِنْدِي

بِعْطِي الْبَشَرْ آمَالْ مِنْ عِنْدِي

وْأَحْلامْ زَهْرَه مْسَوْسَحَه بْنُوَّارْ

كِبْرِتْ تَا صَارِتْ يَا هُدَى.. قَدِّي

**

قرد

مَا أَبْشَعَكْ.. مَهْمَا لْبِستْ وِعْمِلْتْ

الظَّاهِرْ بِغَابَاتْ الشَّقَا خِلْقَانْ

صُورَه كَرِيهَه مْنِ الْبِدَايِه حْمِلْتْ

صُورِةْ قِردْ.. مِنْ غَابْتُو هِرْبَانْ

**

صرح البطولة

يَا مَوْطن.. الْـ بِالْمَجْد زَهَّرْ وِاغْتَنَى

تَا صَارْ يِصْرُخْ: مَا حَدَا مِتْلِي أَنَا

كِلّ الأَعَادِي تَحْت إِجْرِي دَعَستْهَا

وْصَرْح الْبُطُولِه فَوْق هَامَاتِي انْبَنَى

**

خيمة وسيول

لا تْبَعِّدْ عَنْ أَللَّـه كْتِيرْ

وْتِنْغَرّ بْحَالَكْ عَ طُولْ

الْخَيْمِه الْـ فَوْق رَاسَكْ بِتْطِيرْ

بْلَحْظَه.. وِبْتِجْرِفْهَا سْيُولْ

**

مش معقول

مَسْمِر عْيُونَكْ بِالْفَضَا.. وْلا تْقُولْ:

ضَهْرِي انْكَسَرْ مِنْ كِتْرِة التِّطْلِيعْ

اللِّي صَوَّرَكْ إِنْسَانْ.. مُشْ مَعْقُولْ

يِتْرُكْ "مَثِيلُو" يِنْحِنِي وِيْضِيعْ

**

كونستانس

رَاهْبِه.. انْخَطْبِتْ لسَيِّدْنَا الْمَسِيحْ

وْمِشْيِتْ طَرِيق الْجُلْجُلِه وِالصَّلْبْ

تَرْكِت بْلادَا.. وْقَطْعِتْ الْبَحْر الْفَسِيحْ

تَا تْكُونْ نُور الشَّعْب بِـ عَتْم الدَّرْبْ

**

قبر

بْرَمْت الدِّنِي.. وِقْطَعْت بَرّ وْبَحْرْ

جِمَّعِتْ مَالِي.. بْنِيتْ أَحْلَى قَصْرْ

وْضَلّ يِنْقَصْنِي تْلاَتِ حْرُوفْ

لَوْ بِجْمَعُنْ.. بِيعَمّرُولِي.. قَبْرْ

**

تقمص

الْعُصْفُورَه الْـ طَارِتْ بِالْجَوّْ

تَا يْغَلْغِلْ بِجْنَاحَا الضَّوّْ

هِيِّي الْـ خَلِّتْنِي إِتْقَمَّصْ

دَوْر الشَّخْتُورَه وِالنَّوّْ

**

نهر المرارة

لا تْدِيرْ ضَهْرَكْ لِمِّن بْتِلْسَحْ

مْنِ جْرَارْ خَيَّكْ كِلّ عَسْلاتُو

نَهْر الْمَرَارَه بْيِبْتِدِي مَطْرَحْ

كَان النَّحلْ يِنْعَمْ بِزَهْرَاتُو

**

الشاعر والغربة

الشَّاعِرْ وِالْغُرْبِه عَ طُولْ

رْفَاق مْنِ سْنِين بْعِيدِه

مِنْ يَوْم الْـ عَطْيِتْنَا حْقُول

بْلادِي.. أَزْهَار جْدِيدِه

**

زوان بلادك

فَضِّلْ زِوَان بْلادَكْ وْنَقِّيهْ

وْلا تِشْتِرِي الْقَمْح الصَّلِيبِي بْقِرْشْ

مَعْقُولْ لَمَّا بْتِطِبْخُو تْلاقِيهْ

مَزْغُولْ.. حَبَّاتُو رِيَاء وْغِشّْ

**

إنتي

يا رَايْحَه.. وْمُشْ تَارْكِه عِنْوَانْ

وَيْن الْوَفَا.. وْبِقْلُوبْنَا سْكَنْتِي؟!

عَارِفْ أَنَا.. بَيْتِكْ قَلبْ لُبْنَانْ

مِنْ بَعْد مَا صِرْتِي الْوَطَنْ إِنْتِي!

**

نار

حَرْقُوا بْلاَدِي.. وَقَالُوا: هَيْكْ

حْرَقْنَاهَا.. وْصَارْ اللِّي صَارْ.

يَا شَعْبِي اللِّي جِنْيُوا عْلَيْكْ

لازِمْ يِنْزَتُّوا بِالنَّارْ

**

ماشي الحال

لا تْقُولُولِي: مَاشِي الْحَالْ

الْحَالِه بَعْدَا مَلْعُونِه

رَحْ خَبِّي بْلادِي بْعِرْزَالْ

وْنَيِّمْ شَعْبِي بِعْيُونِي

**

وسواس

مُشْ لازِمْ إِسْكُتْ عَنْ نَاسْ

بَاعُونِي.. تَا شِرْبُوا كَاسْ

وْحِرْمُونِي إِرْجَعْ عَ بْلاَدْ

مَشْنُوقَه بْحَبْل الْوِسْوَاسْ

**

جروح

لَيْش حَتَّى تْطَوِّلْ هَيْكْ

بِغْيَابَكْ يا رُوح الرُّوحْ؟

الظَّاهِرْ كل ما اشْتَقْت عْلَيْكْ

عَم بِتْنِزّ بْقَلْبِي جْرُوح

**

حرية

عْطِينِي الْحُرِّيِّه وِرْمِينِي

بْغابِه.. ما بْيَعْرِفْها إِنْسْ

مِنْ وَهْج الْحُرِّيِّه فِينِي

إِخْلقْ ناسْ وْفَبْرِكْ شَمْسْ

**

وطن

بَيْتَكْ وَطَنْ.. مِينْ قَالْ ما زِرْت الْوَطَنْ؟

وْنِسَّيْتني بِمْحَبّتَكْ كِل الْمِحَنْ

وْعِلّمتْني وَحِّدْ شَعبْ عَمْ تِحصْدُو

الإِيد الْغَرِيبِه.. وْتِزْرَع بْأَرْضُو الْفِتَنْ

**

أسمر خروبي

مَهْما قَالُولي الْحِلْوِينْ

رَحْ بِتْضَلِّي الْمَحْبُوبِه

الْـ عَمْ إِكْتُبْ إِسْما عَ جْبِينْ

لَوْنُو أَسْمَرْ خَرُّوبِي

**

فساد وغدر

شْبِعْنا فَسَاد وْغَدْر يا بْلادي

يا الْـ كلّ عُمْرِك مَوْطن الإِنْسانْ

تْنَيْن بَسّ عْبَدْتُن عْبادِه:

أَللَّـه السّاكِن بِالسَّما.. وْلُبْنانْ

**

شاعر قدير

مِينْ قَالْ إِنُّو ماتْ شَاعِرْنا الْقَدِيرْ

الْـ صَفَّى قَمَرْ مِنْ بَعْد ما دَبْحُوا الْقَمَرْ

مِينْ قَالْ إِنُّو ماتْ هَـ الْحَرف الِكْبِيرْ

الْـ خَلَّى الضِّحْكِه تْشِع عَ شْفاف الْبَشَرْ

**

إِحباط

بِبْنِي.. وْغَيْرِي بْيِهْدُم مْنِ جْدِيدْ

بْهَـ الْجالْيِه الْـ عَمْ تِعْبُد الدُّولارْ

الْـ ما بْتِحْترِمْ شَاعِرْ وَلا ناقِدْ عَنِيدْ

حَتَّى الْصَّحافِه، عِندْها، كذْب وْدمارْ

**

وين الأدبا؟

سْأَلْتِي بْحَسْرَه: وَيْن هِنِّي الأُدَبَا

الْـ زَرْعُوا الْمَهْجَرْ شِعْر وِغْنانِي

نِحْنا، يا حِلْوِه، بْجالْيِه ما بْيِعْجِبَا

غَيْر الرَّقْص.. وِتْفَتِّح قْنانِي

**

رئيس

يا رَئيس بْلادْنا الْـ كِلَّكْ وَفَا

عَجِّلْ بَقَى بِخْلاصْنا دَخْلَكْ

أَمْراضْنا زْعامات إِنْت بْتَعْرِفَا

كْوِيها بْنارَك قَبْل ما نِهْلَكْ

**

جهلان

ما كِنْت عارِفْ فِي بْصدْري قَلْب

جهْلان جَهْلِه مْطَيّرَه صْوابُو

إِلاّ وَقْت ما دِقْت طَعْم الْحُبّ

وْصِرْت إِتْلَوَّى منِ عْذَابُو

**

مين قال؟

مِينْ قَالْ بَدِّي مْنِ السَّمَا نجْمِه؟

مِين قَالْ بَدِّي حَوِّش الْغَيْمِه؟

بَدِّي أَنا عِيش بْسَعادِه وْبَسّ

لَوْلا السَّعادِه بِغْرَق بْهَمِّي

**

نقص

لا تِظلْمُونِي كْتِيرْ يا أَحْبابْ

لَوْلا حَصَل مِنِّي نَقصْ شِي يَوْمْ

وْتِرْمُوا عْلَيِّي كلّ أَنْواع الْعِتابْ

مِنْ زَغِرْتِي ما بْطِيق طَعْم اللَّوْمْ

**

لعبة

بَدّنا وَطَنْ مَجْبُول بِمْحَبِّه

وْمِبْنِي عَ صَخْرِةْ قَلْبَك وْقَلْبِي

بْيِكْفِي هْدَمْنا صَرْح أُمِّتْنا

وْصِرْنا بْإِيدَيْن الْقَدَرْ لُعْبِه

**

مال

يا ما بَشَر عَمْ تِسْرُق وْتِحْتالْ

وْبَعْدُنْ ما بنْيُوا كُوخْ فَوْق الأَرْضْ

وْيا ما بَشَرْ عَمْ تِهْرُب مْن الْمالْ

وِالْمال رَاكِض خَلفْ مِنُّنْ رَكْضْ

**

طلاق

الأَهْل.. لازِم يِتْركُوا وْلادُنْ

يْعِيشُوا سَوَا طُول الْعُمْرْ

أَشْرَف يْطِيقُوا حَرْقِة بْعادُنْ

وْلا يْطَلّقُوهُنْ عِنْد مَطْلَع فَجْرْ

**

تفاحة

شفتِك ع باب البيت مرتاحه

حبّيت صوبك اعمل سياحه

تا بوس تمِّك بوستين زغار

واقطف عن الخدين تفّاحه

**

بنت مربى

تْرَكْتِي بْلادِكْ بِنْت مَرْبَى وْأَصْلْ

تْرَكْتِي الْجِبال الشَّامْخَه وِالسَّهْلْ

وْجِيتِي لْخَلفْ الْبَحْر تا تْعِيشِي بْشَرَفْ

وَيْن الشَّرَفْ؟.. يا غَارْقَه بْوَحْل الْجهْلْ

**

كزودرة

الْعُمْر مْأَكَّدْ كَزْدُورَه

وْعَمْ تِمْشِيها الْمَعْمُورَه

مَهْما تْبَعِّدْنا الأَيَّامْ

مْنِبْقَى جُوَّات الصُّورَه

**

لا تغبّر تيابك

لا تْغَبِّر تْيابَكْ.. مِجِدْلاوِي

بِغْبارْ ناس الْحقدْ عامِيهُنْ

افْتَكْرُوكْ جبْنِه.. وْقطْعِة حْلاوِه

طْلعتْ شَمْس.. بْنار تِكْوِيهُنْ

**

مش أصلي

ما بَدّنا زْعامِه مِنْتِقْلِه

لْوَاحِد مُجْرِمْ، مُفْتِنْ، بَهْلِي

حَكْيُو مُقْرِفْ.. شَكْلُو مُقْرِفْ

مُسْتَوْرَدْ دَمُّو.. مُشْ أَصْلِي

**

جروحات

قْرِيتْ شِعْرِي.. بْحِبّ إِنَّكْ تِفْهَمُو

وْتِرْجَع تْعِيد قْرَايْتُو مْنِ جْدِيدْ

جْرُوحَاتْ عُمْرِي.. صَعْب تَا يِتْبَلْسَمُوا

وِبْيُوتْ.. مَفْرُوشِه شَقَا وْتِنْهِيدْ!

**

أوتار

لمّنْ صابيعو عَ الوْتار بْيِلْعَبُوا

قصّة رَحيل شْعوبْنا عَم يِكْتبوا

النّغمات تِسْألْ والقلوب تْعيدْها

لَوْلا الْغُرْبه جَرّبوا.. ما تْغَرَّبُوا

**

حجر

ما في حجر بالأرض بيحاكي البشر

لو ما إيدين الفن ندهتلو

الإزميل لمّن بوّس خدود الحجر

صاروا البشر يِتْباوَسوا مِتْلو

**

زمن يئسان

صار الزمن يئسان من حالو

والناس فيه كتير فزعانه

اللي تشردوا أوسع من مجالو

وكيف ما التفت قبور مليانه

**

إهدن 

مين قال اهدن ارض صخريه

فوق الجبل بتنام ليليه

ما في بحر تا يغنجا ع طول

ويخفف من الشوب صيفيه

من اهدن بطال السما.. ومعقول

بنسمة هواها ادعس الميه

وكرمالها بجيب البحر ع اصول

وبقدمو لعيونها هديه

بحرك يا اهدن دمع عينيي

**