مثلها عام 1991 أكثر من 300 تلميذ وتلميذة من معهد سيدة لبنان ، هاريس بارك، سيدني أستراليا، وقد حولناها الى عدة أشخاص.
**
الأشخاص:
رزق الله "زوج منتورة"
منتورة "زوجة رزق الله"
مسعود
مخول
يوسف
سليمان "إبن رزق الله وحبيب كيركي"
وهيبة
سعدى
ريما
كيركي "إبنة باهيمو وحبيبة سليمان"
ماكو "تاجر هندي"
باهيمو "زعيم هندي"
زمزومي "ساحر هندي"
مجموعة من الهنود
**
المشهد الاول
"مهاجرون لبنانيون في غابة الأمازون يحملون الحقائب"
مخول:
قرّبوا.. شو بكن خايفين؟
سعدى:
سامعه صوت طبول..
مخول:
وأيمتى كان صوت الطبل بيخوّفنا نحنا اللبنانيين؟
سعدى:
معك حق.. اللي تعوّد ع صوت المدافع ما لازم يخاف من
صوت الطبل..
مخول:
تنذكر ما تنعاد هيديكي الايام.. نحنا هلّق ببلاد الخير.. ببلاد الدولار..
وهيبة:
ع فيقه.. حدا منكن عارف قديش سعر صرف الدولار
ببلادنا؟
مخول:
أفضل ما تعرفي.. صار بالآلاف..
وهيبة:
باطل الأباطيل.. وكيف بدّو ياكل الشعب اللبناني؟.. العمى
بقلبن هالحكّام إذا ما لقيوا شي تا ياكلوا بياكلوا ولادنا..
سعدى:
نحنا هربنا من لبنان.. وألله يطرحلن البركه فيه..
وهيبة:
وأهلك.. نسيتيهن؟
سعدى:
قلتلّن يجوا وما إجوا.. كل واحد يقبّع شوكو بإيدو..
وهيبة:
لا تكوني قاسيه عليهن..
سعدى:
وليش تا يبقوا بوطن مش باقي..
وهيبة:
باقي.. باقي.. دعس عن رقبة الما بيريد..
سعدى:
ولمين بدّو يبقى.. لزمرة حكّام ما بيعرفوا ألله؟
وهيبة:
المهم يبقى ونحنا منرجع منعمرو..
سعدى:
بعد ستعشر سنة حرب، رجعنا متل ما كنّا.. ورجعت
صورهن تعبّي شوارعنا.. فيكي تقوليلي شو غيّرت
هالحرب..
"يتدخّل مسعود"
مسعود:
غيّرتنا نحنا.. بعد ما كنّا لبنانيين صرنا مغتربين..
سعدى:
مغتربين بلا وزاره.. ولِك تفوه عليهن وع وزارتن.. هيك
أريحلنا..
مسعود:
يا جماعه روقوا.. نحنا بغابات الأمازون ولازم نلاقي
أهلنا..
سعدى:
وإذا ما لقيناهن راحت علينا..
وهيبة:
يا بني وطني لكم لبنانكم ولي لبناني.. ألله يرحمك يا
جبران..
سعدى:
ألله يرحمك يا لبنان..
وهيبة:
لبنان ما بيموت، رح يبقى عايش بترابو.. بشعبو.. بكل دقّة قلب من قلوبنا..
سعدى:
حكي شعرا.. يا وهيبه افهميني.. كل وطن مرتكز ع
الطائفيّه مش ممكن يعيش.. رح يوقع ع ضهرو.. وكل
سنتين تلاته رح تجتاحو الحروب وتطيشر شعوبو
بغابات جديده متل هالغابات..
مخول:
خلّصوني من حكي السياسه.. وقولولي وين راحوا
الباقيين..
مسعود:
رزق الله ومنتورة وسامي وسليمان راحوا من حد النهر..
مخول:
أنا خايف تعقصن الحيّات.. يا مسعود ندهلك شي صوت..
مسعود:
"بأعلى صوته"
يا سامعين الصوت.. نحنا هون.. يا لبنانيي ردّوا عليي..
"تدخل مجموعة من الهنود"
سعدى:
راحت علينا.. كل واحد يصلّي ع دينو..
باهيمو:
شلوتو مينو.. شلوتو مينو.. هز فز شلوتو مينو إندو رز
وهيبة:
دخيلكن شو عم بيقول: بدّن ياكلونا؟
مخول:
لا تخافي.. لو بدن ياكلونا كانوا شعّلوا النار..
وهيبة:
ألله يخرب بيتو اللي خرب بلادنا.. يا ريتني مت بضربة
مدفع ولا وصلت لهون..
باهيمو:
ليبانوس؟
مسعود:
ليبانوس ونص.. ولك كيف عرفتنا؟
باهيمو:
شروالو دندول..
مسعود:
العمى شو ذكي.. عرفنا لبنانيين من دندولة الشروال.. إي
والله لولا شروالي أكلوكن إنتو والشنط..
باهيمو:
إنتو مينتو؟
مسعود:
نحنا لبنانيين.. انقسمنا قسمين.. ناس راحوا من حد النهر
ونحنا جينا لهون..
باهيمو:
شو إنتو منتو جيتو إنّا؟
سعدى:
جينا تا نعيش.. لقمة الخبز ببلادنا صار حقّا دم.. حكّامنا
مجرمين وشعبنا معتّر..
باهيمو:
ويل ويل ويل..
سعدى:
شو بدنا نخبركن عن الويل الما فارقنا لا بالنهار ولا
بالليل..
باهيمو:
إنتو منتو فيكو تيكو؟
سعدى:
وكيف بدنا نحكي وشفافنا مقطبين؟ إذا حكينا مرّه بيسدّوا
بوزنا ألف مره..
باهيمو:
إنتو مينتو كيف؟
سعدى:
كيف؟ بيخطفونا.. بتكون نايم بالشرق بتصير نايم
بالغرب..
باهيمو:
مظلون آه مظلون..
سعدى:
مظلوم يا سيدنا مظلوم.. شعبنا ما لو قايمه تقوم
باهيمو:
إنتو كنّي؟
سعدى:
كنت غنّي، وكنت إرقص.. وكنت مبسوطه كتير الدني
مش سايعتني.. وهلّق صرنا شعب مشرد حامل ولادو
تحت باطو وبطونن فاضيه..
وهيبة:
غنّي يا سعدى.. بركي بيتركونا لحالنا..
سعدى:
"تغني والهنود يرقصون"
ـ1ـ
مدَّيْت إِيدِي.. وْكِنْت عَنِّي بْعِيدْ
لا مْسِكِتْ إِيدِي وْلا الْفَرَحْ زَهَّرْ
يَا رَيْت فِيِّي إِرْجَع مْنِ جْدِيدْ
إِعْطِيكْ إِيدِي.. وِالْعُمرْ يِكْبَرْ
وِتْصِيرْ إِيدِي التَّلّْ
وِعْيُونَكْ الزَّهْرَاتْ
وْمِنِ شْفَافِي تْطِلّْ
عُصْفُورِة الْغَابَاتْ
تْرَدِّدْ مَوَاوِيلَكْ
وْعَنْ شَوْق عِينَيِّي
حْكَايَاتْ تِحْكِيلَكْ
تَا تْصِيرْ غِنِّيِّه
وَحْدِي أَنَا وْهِيِّي
مْنِقْدِر نْغَنِّيلَكْ
ـ2ـ
مِدَّيْتْ إِيدِي.. لَيْشْ
مَا خِدْتها بْإِيدَكْ؟!
ما عْرِفِتْنِي قِدَّيْشْ
مِتْشَوّقَه لْعِيدَكْ؟!
يَا حْرُوفْ كِبْرِتْ هَوْنْ
يَا شِعْر حُبّ وْلَوْنْ
يَا صَوْت شَعْب كْبِيرْ
عَاطِيهْ أَللّـه الْعَوْنْ
تْرِكْنِي.. تْرِكْنِي طِيرْ
إِيدَك وْإِيدِي جْنَاحْ
وْمَلْعَبْ عِينَيْنَا الْكَوْنْ.
**
المشهد الثاني
"الهنود يخرجون مخول ووهيبة وسعدى عن المسرح ويبقى معهم مسعود. فجأة يبدأون بالغناء"
الهنود:
هز فز شلوتو مينو إندو رز
مسعود:
"يغني وهو خائف"
خطي خطي خطي خطيّ
خدوني مع أهل الحيّ
لحماتي ما بيكفّوا
وكرشي كلّو معبّى ميّ
الهنود:
هز فز شلوتو مينو إندو رز
مسعود:
لا عندي رز ولا شي
ولا بعرف إطبخ محشي
انكنّو انغشيتوا فيّي
استأجرت مبارح كرشي
الهنود:
هز فز شلوتو مينو إندو رز
مسعود:
يا تعتيرك يا مسعود
رح بيشكّوا فيك العود
عدّ للخمسه بعدك هون
بعد الخمسه مش موجود
الهنود:
هز فز شلوتو مينو إندو رز
"يبدأون بإشعال النار عن طريق قدح حجر بحجر"
مسعود:
قبل ما تشعل هالنار
وتاخدوني ع الدويره
عندو مطلب هالختيار
يصوفر بيهالصوفيره
"يبدأ مسعود بالصفير، يهرب الهنود"
يا هيك تكون الصوفيرات يا بلا.. دخيلكن لحقوني..
"يخرج هارباً وهو يصفّر"
**
المشهد الثالث
"يدخل مخول وسعدى ووهيبة"
سعدى:
شو بو مسعود عم يرجف من الفزع؟
مخول:
قطعولو قلبو الهنود..
وهيبة:
شفت الهنود عم يضحكوا هنّي وراكضين..
سعدى:
لا تقولولي كانوا رح ياكلوا مسعود..
مخول:
حبّوا يمزحوا معو شوي.. قاموا حلّولو أعصابو..
سعدى:
يقطع المزح انشالله.. والله لو عملوا معي متل ما عملوا مع
مسعود كنت عملت الما بينعمل..
مخول:
وشو كنتي عملتي؟
سعدى:
كنت صلّيت لمار مانوس حدشيت..
مخول:
مار مانوس بعيد كتير من هون.. صعب يسمعك..
سعدى:
كنت صليت لمار مارون..
وهيبة:
مار مارون مشغول بلبنان ومش فاضيلك..
سعدى:
شو بكن عم بتسكروها بوجّي.. كنت صليت لألله وقلتلو يا
ألله وديلي شي قديس بيفهم هندي..
مخول:
بدل ما توجعي راس ربنا، اتصلي بمنظمة الأمم المتحده
تا توديلك عاصفه أمازونيه ما بتخلّي حدا طيّب..
وهيبة:
أف شو كترت هالمنظمات اللي بتعتني بالإنسان، صارت
أكتر من القبائل المتوحشه..
مخول:
هالقبيله اللي وقعنا فيها بنت مربى، بتطعمي ما بتاكل..
بتنيّم ما بتنام.. بتريّح ما بترتاح.. عندا الضيافه شي مقدس
متل جدودنا ألله يرحمهن..
وهيبة:
والله معك حق.. الجماعه قدمولنا خيمن وناموا برا..
مخول:
لازم نساعدن بالفلاحه.. ونعلمن كيف يزرعوا الفجل
والخس والملفوف والبقدونس والبندوره..
وهيبة:
والبرغل..
مخول:
البرغل ما بينزرع يا وهيبه
وهيبة:
ما بيهم.. المهم ناكل صحن تبوله.. ولهالسبب لازم نعلمن
كيف يجرشوا القمح تا يصير برغل..
مخول:
خلوا ايديكن تكعنش ايديهن تا تفرح الأرض وتكبر الغله..
"يخرج مسعود ووهيبة، تبقى سعدى جالسة لوحدها"
سعدى:
ـ1ـ
غريبه المطارح غريبه
وضحكات الطفوله أنين
يا شمس المحبه لا تغيبي
ضوّي.. أنا ليلي حزين
ـ2ـ
سرقتني الطرقات الطويله
ورميتني ع بواب بواب
يا طيور المسافه حكيلي
ليش انكتبلي العذاب؟
ـ3ـ
مشتاقه لعيون الأحبه
لضحكاتن بليالي السهر
تا قللو: يا حزن تخبّى
رح يرجع ع بلادي القمر
**
المشهد الرابع
"يدخل رزق الله ومنتورة"
منتورة:
شو هالعيشه الما بتنطاق
خلّصني يا رزق الله
دمي نشّف.. خلقي ضاق
رجّعني دخيل ألله
رزق الله:
روقي شويّه روقي شويّ
رح بتلمي هنود الحي
نحنا بـ هالضيعه ضيوف
نوم وأكل ولبس وميّ
منتورة:
يللي بـ هالضيعه ضيوف
بيناموا وبطنن مكشوف
مدافع تضرب ع جونه
ومدافع تضرب ع الشوف
رزق الله:
يا منتوره رجعتنا
يمكن تقطع لقمتنا
هوني لا حرب ولا ضرب
وهونيكي يا جرصتنا
منتورة:
لا تندهني منتوره
منتوره تغيّر إسما
صفّى إسما تنّوره
ما بتغطيلا جسما
رزق الله:
التنوره طلعت فرجه
هيدي مش خرجك.. خرجي
نسيتي لمن كنا نقول
الفرنجي والله برنجي
منتورة:
يا رزق الله عيب عليك
ترضى بـ هالعيشه هيك
وجّك أسود متل الفحم
والغبره سمكت ع جريك
رزق الله:
بالقليله صرت بنط
متل الفاره ومتل القط
بتغذى لحم تماسيح
وبتزيّن بـ ريش البط
منتورة:
الغابه كلاّ بدّا بخ
البرغش رح بيسممني
وين البسط ووين الجخ
مْنِ بلادي لا تحرمني
رزق الله:
وطي صوتك.. منتوره
ما بيسوى نعاملهن هيك
منتوره:
لا تموتني مقهوره
يا رزق الله الحق عليك
"يدخل بعض اللبنانيين"
ريما:
شو بكن يا جماعه واصل صوتكن للقبيله التانيه..
رزق الله:
هلق شي ظبطت الأمور وصرنا نفهم ع الهنود ويفهموا
علينا بدك ترجعي يا منتوره؟
منتورة:
لحد هون وبس.. واصله معي لمنخاري، من بعد الفرشه
والحمّام، نام ع الأرض بلا حرام.. شو الدني خربت؟
رجعوني ع بلادي هلق هلق..
يوسف:
ركبوها ع شي فيل وودوها.. روحه بلا رجعه..
منتورة:
ما فشر.. أنا ما بركب إلا بطيران الشرق الاوسط..
يوسف:
وينك يا مخول؟
مخول:
"يحمل تلفون بأنتين طويل"
خاتم لبيك.. عبدك بين إيديك..
يوسف:
بعدك مركب الانتين؟
مخول:
ما بشيلو إلا بساحة البرج..
يوسف:
اختنا منتوره بدها ترجع ع لبنان.. فيك تحكيلا مع الميدل
إيست؟
مخول:
وشو بدي قلّن إذا لقط الخط؟
يوسف:
قلّن في معنا حرمه مستقيمه وبدها تخلّف ببيروت
منتورة:
ولاه يوسف.. أنا مش مستقيمه.. فهمت؟
يوسف:
يا منتوره نحنا عم نكذب كذبه بيضا تا يودولنا طيّاره..
منتورة:
إذا كان هيك.. أنا حبلي وبشهري التنعش كمان..
مخول:
اسمعوا.. اسمعوا.. لقط الخط.. ألو ميدل إيست.. مخول
عم يحكي.. مين مخول؟ مخول ما غيرو.. إي إي هيدا
الما خلّيتوه يفوّت دجاجاتو ع الطياره. شو بني؟ معنا
حرمه مستقيمه بشهرا التنعش.. إي إي بشهرا التنعش..
معقول ونص.. هيدي تركيبتا غير شكل.. فيكن تودولنا
طياره؟ وين؟ حد نهر الأمازون.. شو وصّلنا لهونيك؟ عم
تسأل بنت الأوادم شو وصّلنا لهون؟
ريما:
قللا إنتو وصلتونا لهون..
مخول:
طيارتكن هيي اللي وصلتنا لهون.. ايوه أيوه أنا رح
إسألن: حدا منكن إجا بإير إنديا؟
ريما:
نحنا ما منشجع إلا الركوب الوطني..
مخول:
ألو.. هودي الجماعه ما بيركبوا إلا ع الوطنيّه.. شو شو
عم بتقولي؟ خليهن يركبوا مع غيركن.. الو الو ولك ألو..
انقطع الخط..
ريما:
حتى الطيران ضد ابناء الشرق الاوسط..
رزق الله:
يا جماعه.. لازم نرضى بعيشتنا وبدل ما نهرب لازم
نحسّن الوطن اللي نحنا عايشين فيه.. ولازم نبتعد عن
المشاكل ونربي عيالنا وننشر حضارتنا..
منتورة:
ليش ضلّ عنّا حضاره تا ننشرا؟
رزق الله:
بكرا بتشوفي..
منتورة:
وشو بدي شوف؟ حضارة بلادنا الأعتق من حجارة بعلبك
هدمناها.. رجعوا ع بلادكن وتركوا هالهنود عايشين ع
بركة ألله..
رزق الله:
لازم نعلّمن..
يوسف:
"يهمس بإذن مخول"
كيف يهربوا حشيشه..
رزق الله:
لازم نفهمن..
يوسف:
ما يضاربوا ع بعضن بالسوق..
رزق الله:
لازم نمدنن..
يوسف:
تا يخلقوا زعامه قويّه متل زعامتنا.. بيموت الشعب
وبيضلّوا عايشين..
رزق الله:
شعب هالبلاد آدمي.. خلّوا ولادكن ينخرطوا بولادو..
يصيروا اخوه.. يلعبوا سوا.. يتعلموا سوا.. وتحت كل
شجره افتحولن مدرسه..
يوسف:
إذا بدكن تضلوا تسمعوا متل هالحكي الفارغ رح تقلعوا
تيابكن وتلبسوا تنانير قش.. نحنا جينا ع هالبلاد تا نجمّع
قرشين.. وكيف لازم نجمعن ألله بيدبّر..
رزق الله:
ألله ما بيدبّر ع الحرام..
يوسف:
ألله بيدبّر ع كل شي..
رزق الله:
انت غلطان وألله مش رح يوفقك..
يوسف:
حروب الدني كلاّ كان ألله يتدخّل فيها وكل الأطراف كانت
تستنجد فيه.. وبس يموت حدا منّن بيسموه شهيد
وبيسأجرولو شقّه بالجنه.. آكل شارب نايم قايم ع آخر
طرز..
رزق الله:
مش مظبوط هالحكي.. ليك يا يوسف.. اذا مشيت بالطريق
الغلط بدي اكتب لبيك وخبرو كل شي..
يوسف:
ما بيلحق يوصل مكتوبك بيكون بيي عطاك عمرو..
رزق الله:
عيب يا يوسف عيب..
يوسف:
لا عيب ولا بلّوط.. أنا سافرت كرمال عيون الدولار وكل
شي ابعد من الدولار ما بيهمني..
"يخرج يوسف"
رزق الله:
لازم نفهّم كبار الهنود عن ألاعيب يوسف وأمثالو..
مخول:
ما لازم حدا يقول عن زيتو عكر..
رزق الله:
إذا فيك دمله بتفقيا تا تنام مرتاح.. ويوسف دملّه بهالمجتمع
لازم نفقيا تا ينام المجتمع مرتاح..
ريما:
صدقوني في إيد غريبه عم تلعب بوحدة القبائل..
رزق الله:
الإيد مش غريبه.. منّا وفينا.. السياسه بلشت تلعب
والوجاهه عميت قلوب كتيره..
ريما:
في منّن ما بقى يلبسوا إلا تنانير الشرف..
رزق الله:
حتى الشرف صار عندو تنوره!
ريما:
تنورة الشرف بتنعشر لون والتنوره العاديه بسته..
منتورة:
ألله يرحم سته.. كانت تنورتا متل قوس القدح.. وما
تكبرت ع حدا..
مخول:
وصلتلك هالخبريّه يا بو سليمان أم بعد؟
رزق الله:
أيّا خبريّه؟ هات فهمني..
مخول:
إبنك سليمان بيحب بنت هنديه إسما كيركي
رزق الله:
اسما بكركي؟!
مخول:
كيركي.. كيركي.. من دون الباء..
رزق الله:
إذا كان هالحكي صحيح ألله ما يخليني إذا بخليه
طيّب..
ريما:
"تتكلم همساً"
شي وصل الموس لدقنو نسي شو قال من خمس دقايق..
"تتكلم مع رزق الله"
كيركي بنت آدميّه كتير.. هيي رفيقتي وأنا بعرفا منيح..
رزق الله:
مش رح تكون آدميه أكتر من بنت عمّو.. العمى بقلبو كان
رح يخطبها..
ريما:
إبنك بيحبّا وهيي بتحبّو..
رزق الله:
يحبّن القرد انشالله.. دخيلك ركضي عليي يا منتوره.. بلّش
ضغطي يعلا..
منتورة:
ما كنت تسمع كلمتي ونرجع ع لبنان.. تحمّل وجع إذا فيك
تتحمل..
رزق الله:
بدّي إقبرك يا سليمان
منتورة:
أنا رح صفّ مع إبني لأن "كيركي" بنت حلوه وصارت
تحكي متلنا..
رزق الله:
كيركي ما عندا دين.. كافره..
منتورة:
ومين منّا مش كافر؟ اللي حرق بلادنا شو؟ اللي قتل
ولادنا شو؟ اللي دبح ع الهويّه شو؟ اللي سد بوزو وبلادو
عم تحترق شو؟ اللي ترك مرتو وولادو صيصان شو؟
اللي سرق خيّو تا يجمّع مال حرام شو؟ اللي تاجر
بالحشيشه شو؟ اللي بيكذب مية كذبه بالنهار شو؟ اللي
شوّهوا تعاليم الأديان شو؟ "كيركي" بنت ألله إذا كنا نحنا
ولاد ألله..
"يخرج الجميع"
**
المشهد الخامس
"سليمان يغني"
سليمان:
ـ1ـ
"كيركي" الحلوه جايي
تا تِحْكيلي حكايِه
يا مْرايه تْخَبّي بالأرضْ
"كيركي" حلوه كفايِه
بِفْزَع تنكسري من البُغضْ
وما يْعود عِنْدا مْرايِه
ـ2ـ
"كيركي" اللي حِبّيتا
وكْتَبْتا غِنّيّه
دَلِّتْني عَ بَيْتا
وما حَنّتْ عْلَيّي
لِمِّنْ قَلْبي عْطَيْتا
سَرْقِتْلي عِينّيّي
"تمشي كيركي باتجاه سليمان وتغمض عينيه"
حبّيتك يا كيركي من يوم اللي شرقت شمس وجّك الحلو
ونورتلي عتمات غربتي..
كيركي:
"تلفظ الحاء هاء"
بهبّك يا سليمان..
سليمان:
أنا خايف كتير يا حبيبتي.. يمكن أهلي وأهلك ما يوافقوا
كيركي:
نن.. نن.. أنا بهبك.. بهبك..
سليمان:
المسافه بين أهلي وأهلك بعيده، لا بيقدروا يتفاهموا مع
بعض وعاداتن مختلفه..
كيركي:
نن.. نن.. أنا بهبك.. بهر، جبل، وادي.. كتير كتير..
سليمان:
لو وقّفوا جبل بيني وبينك بدي هدّو.. لو شلحوا وادي بدي
إمشيا.. عيونك بحر وأنا غريق وما حدا بيخلصني غيرك
يا كيركي..
"يدخل رزق الله وباهيمو"
رزق الله:
سليمان.. بعّد عن طريق هالبنت
سليمان:
أنا بحبّا يا بيّي وما في حدا بيقدر يبعدني عنها..
باهيمو:
كيركي.. كيركي.. ارجعي ع خيمتك هلّق..
كيركي:
كيركي بيهب سليمان بابا..
باهيمو:
قلتلك هلّق.. يعني هلّق..
"تخرج كيركي غاضبة، يلحق بها سليمان وهو يصيح"
سليمان:
كيركي أنا بحبّك كتير..
" يلحق رزق الله بابنه"
**
المشهد السادس
"باهيمو يروح ويجيء على المسرح بغضب، يدخل يوسف ومخول"
يوسف:
السلام على سيدنا الزعيم باهيمو..
مخول:
السلام على صاحب أطول ريشه وأجمل تنوره..
يوسف:
السلام على الزعامه التاريخيه..
باهيمو:
مين.. أنا؟!
يوسف:
مين متلك قدر يحكي لغتنا بهالسرعه؟ مين متلك قدر يجمع
الفهم والعلم بفرد إيد؟ إنت زعيم إبن زعيم أباً عن جد..
باهيمو:
بس نحنا ما عنا زعامه..
يوسف:
هلق صار عنا..
باهيمو:
الزعامه مكلفه كتير.. وأنا هندي فقير..
يوسف:
إذا جماعتك ساعدتني بقدر أمنلك كل شي.. وبخليك تقبر
الفقر..
باهيمو:
انت بعدك عم بتبيع طحين مجنون؟
يوسف:
هيدا مش طحين مجنون يا سيدنا.. هيدا طحين الزعامه..
باهيمو:
إذا كان الطحين بيعمل زعامه.. أنا باكل منّو كمان..
يوسف:
بالصحه والعافيه انشالله.. وحياتك أول شمّه ببلاش..
باهيمو:
انت شاطر كتير..
يوسف:
تلميذ حضرتك.. سيدنا..
باهيمو:
ليش انت بتحبني.. والليبانوس كلّن بيحبّوا خيي وبدّن
يعملوه زعيم؟
يوسف:
عميان يا سيدنا، ما عندن بعد نظر.. فيك تقللي بأيش حيّك
أحسن منك.. لا عندو طولك.. ولا عندو فهمك.. حتى
رقصتو مش أحلى من رقصتك.. عاش الزعيم باهيمو..
مخول:
عاش الزعيم باهيمو.. عاش الزعيم باهيمو..
باهيمو:
أنا الزعيم باهيمو.. وما في زعيم غيري..
يوسف ومخول:
عاش الزعيم باهيمو..
"يخرج باهيمو"
يوسف:
إذا تزعّم باهيمو وقع الحكم بإيدينا..
مخول:
ما لقيت تنقي إلا هالبهيم..
يوسف:
شو.. بدّك ياني جبلك أمين الريحاني؟ هيدا بيمشي ع
ذوقنا، وكل دهب القبائل بيتجمع بجيبتنا..
مخول:
وأيمتى رح نبتدي الحمله الانتخابيه لهالبهيم؟
يوسف:
إسمو من اليوم ورايح الزعيم باهيمو.. ولا تنسى تقول
لأصحابنا يعملوا المستحيل تا ما يتزوج سليمان وكيركي..
مخول:
شو بدنا فيهن.. خليهن يحبوا بعضن تا يشبعوا..
يوسف:
يا مسكين.. اذا سليمان صاهر باهيمو راحت علينا..
بالعربي المشبرح.. خسرنا باهيمو.. حدا بيحط جاسوس
ببيت الزعيم.. أعوذ بالله. فإذن سليمان وكيركي لازملن
تظبيط..
مخول:
حط إيدك بالمي البارده.. سليمان وكيركي قضيتهن
منتهيه..
يوسف:
عظيم.. عظيم.. بس إياك حدا ينتبه.. حركش من تحت
لتحت ولا تخلي حدا يشوفك..
مخول:
لا تخاف.. أنا بتخبّى وبحركش غيري تا يحركش..
يوسف:
حركش قد ما فيك.. لا تخلّي مرا مع زوجها.. ولا ابن مع
بيّو.. ولا اخت مع خيّا.. وكل ما تخرب عيله منربح
زبونات جداد..
مخول:
وجيبتنا بتنتلي وحياتنا بتتغيّر..
يوسف:
يللا يا مخول.. قدامنا شغل كتير.. ولازم نتغداهن قبل
يتعشونا.. يللا.. يللا..
"يخرج يوسف ومخول"
**
المشهد السابع
"ريما وسعدى بانتظار كيركي"
ريما:
كيركي تأخّرت كتير.. قولك حابسها باهيمو بالخيمه تا ما
تلتقي بسليمان؟
سعدى:
روقي شوي.. هلّق بتطل..
ريما:
أنا خايفه عليها كتير.. كيركي صارت رفيقتي وأنا بحبّا
متل اختي.. قولك وين صارت؟ لازم نعلّمها تقرا وتكتب..
سعدى:
وطي صوتك.. وصلت كيركي..
ريما:
وين كنتي؟ تشوش بالي عليكي..
كيركي:
نسيت كتابي بالخيمه ورجعت تا جيبو..
ريما:
افتحي كتابك وقوليلي شو تعلمتي..
كيركي:
"تقرأ بالكتاب"
بابا.. ماما..
سعدى:
ألله يحمي البابا والماما.. كيركي بلشت تقرا..
كيركي:
أكل بابا ماما..
ريما:
لأ.. لأ.. أكل بابا موزاً
كيركي:
نن.. نن.. أكل بابا ماما..
ريما:
اسمعي يا كيركي.. اذا ما بتقولي أكل بابا موزاً، رح
ترجعي ع الخيمه وما تلاقي ماما..
كيركي:
ماما بح.. أكل بابا موزاً..
ريما:
عظيم عظيم.. كملي قرايه..
كيركي:
أكل بابا بقرة..
ريما:
يا كيركي شو صابك؟ ساعه ماما وساعه بقره.. قولي:
أكل بابا باكراً..
كيركي:
بابا إنتو مينتو فيز..
سعدى:
شو يا كيركي الظاهر نسيتي انو اتفقنا ما تحكي إلا
لبناني..
كيركي:
ليبانوس صعبه كتير..
سعدى:
مش صعبه أبداً.. يوم عن يوم بتصيري تحكي متلنا..
كيركي:
إذا بتجيبوا سليمان معكن بتعلّم بسرعه.. أنا بهب سليمان
كتير..
ريما:
حاء مش هاء.. قولي أنا بحب سليمان.. مش أنا "بهب"
سليمان
كيركي:
"ببطء"
أنا.. بهب.. سليمان
سعدى:
تركيها "تهبّو" كيف ما بدّا..
ريما:
سليمان "بيهبّك" كتير يا كيركي
كيركي:
بوسه إلك وبوسه لسعدى.. ومليون بوسه لسليمان..
ريما:
رح سلموا ياهن لا تخافي..
"تخرج كيركي"
سعدى:
يا عمي شو طيبين هالناس.. ألله يبعّد عنهن ولاد الحرام
العم يسرقوهن.. العم بيعلموهن إشيا ما بتتصدق.. وكل
همّن يغتنيوا وناسيين قديش عمرهن قصير..
ريما:
روحي تا نروح.. رح تدغش الدني..
**
المشهد الثامن
"يدخل التاجر الهندي ماكو وهو يحمل العديد من الاغراض"
ماكو:
ـ1ـ
ماكو ماكو أنا ماكو
هندي وبيرمي شباكو
بحب الصيد كتير كتير
قولوا: فليحيا ماكو
ـ2ـ
مرّه تصيّدت التمساح
صفّى يشكيلي أمرو
وقّع بالنهر المفتاح
وبيّو رح يقصف عمرو
ـ3ـ
وفي مرّه خنزير زغير
تركتو يرعى بحقولي
قدّملي خنزير كبير
لو نتفه بيطلع طولي
ـ4ـ
زبوناتي لبنانيين
بيشتريوا مني الصيدات
ما بياكلوا لحم سعادين
رح يقطعولي العنزات
"تدخل سعدى"
سعدى:
ماكو.. ماكو.. لوين رايح؟
ماكو:
نفّقت.. بح.. ما في لحم معزي..
سعدى:
بتحبني يا ماكو؟
ماكو:
شو عم تحكي يا بنت؟ ما بيكفيني سليمان وكيركي.. القبيله
رح تشعل.. وفي لبنانيين عم بيحركشوا من تحت لتحت..
سعدى:
بس أنا بحبّك كتير.. بتعرف ليش؟ لأنك صرت تحكي
لبناني أحسن منيّ أنا..
ماكو:
تعلمت إحكي لبناني تا مشّي شغلي.. مش تا حبّ..
سعدى:
حكيك قهرني كتير يا ماكو.. معقول قلبك حجر..
ماكو:
روحي جيبي سليمان وكيركي تا حاكمن.. وإذا طلع معن
حق.. معقول حبّك..
سعدى:
"تنده بصوت عالٍ"
سليمان.. كيركي.. تعوا بسرعه..
"يدخل سليمان وكيركي"
سليمان:
شو في يا سعدى؟.. هلق إذا شافوني مع كيركي رح توقع
مصيبه..
سعدى:
توقع ألف مصيبه.. بس ما يوقع قلبي
كيركي:
سعدى.. سعدى.. إنتي مغرومه..
سعدى:
مغرومه بواحد جبان خايف يحبني وبدّو يحاكمكن إنتي
وسليمان.. وإذا اقتنع بحبكن يمكن يحبني..
سليمان:
تفضّل يا ماكو نحنا جاهزين..
ماكو:
محكمه.. إنتي يا بنت شو إسمك؟
كيركي:
أنا إسمي كيركي بنت باهيمو..
ماكو:
وإنت يا شب شو إسمك؟
سليمان:
إسمي سليمان إبن رزق الله..
ماكو:
قديش صرلك بتحب كيركي؟
سليمان:
من يوم الخلقتني إمي..
ماكو:
هيدا غلط غلط غلط..
سعدى:
هيدا صح صح صح.. بس إنت أعمى وقلبك حجر..
ماكو:
ممنوع تقاطعي القاضي..
سعدى:
ولك كلمه تانيه رح قطّعت فرم فرم وإعملك كبّه نيّه..
ماكو:
كيركي وسليمان خالفوا تعاليم جدودن.. ومستحيل
يتزوجوا..
سعدى:
إذا منعتوا سليمان يتزوج كيركي لازم نرحل من هالبلاد..
كيركي:
أنا بهب سليمان كتير..
سليمان:
"يغمر كيركي"
وانا بحبّك كتير يا كيركي.. إنتي روحي..
ماكو:
صار لازم حب سعدى..
سعدى:
عم تحكي جد.. إنت بتحبني..
ماكو:
من يوم ما شفتك.. وغرقت بعيونك الحلوين..
كيركي:
أنا فرهانه كتير.. الف مبروك
سليمان:
ما لازم حدا يعرف بحبّكن تا ما يصيبكن متل ما صابنا..
"يغمرون بعضهم البعض ويخرجون"
**
المشهد التاسع
"تخل وهيبة وهي تغني"
وهيبة:
ـ1ـ
أنا أكبر ضحيّه
من الحرب اللبنانيّه
بيي وامي ببيتي اندبحوا
ببركة دم قبالي انشلحوا
وزرعوا الدمعه بعينيي
ـ2ـ
بردانه.. وقحّاتي بتزيد
وعم ودّي قحّاتي لبعيد
ما بينفعني شراب السعله
بودّع سعله.. بتخلق سعله
كتر البرد أثّر فيي
ـ3ـ
إخدوني على بلاد هنود
زتّوني بخيمه من جلد قرود
البرد يفوت يقرّب أجلي
وشهر شباط يطل بعجله
وكل القح ركب عليي
ـ4ـ
قولولي شو اللي عم بيصير
تعترنا وكبّش فينا التعتير
قتلوا أهلي وحرقوا جبلي
وبعد الغربه دبحوا أملي
وسقيوا فيه البريّه
:يدخل مخول"
مخول:
إنتي عم بتغنّي والبلاد خربانه..
وهيبة:
شو في؟.. شو صار؟
مخول:
سليمان خطف كيركي
وهيبة:
خطف كيركي؟!
مخول:
أيوه.. والهنود عم يخطفوا عن بوجنب.. يا بترجع
كيركي.. يا بيقضوا ع اللبنانيين..
"يدخل مسعود"
مسعود:
هلّق كرمال إنتايه.. رح تخرب الحكايه.. من الأول
عوجه..
مخول:
وشو هيي العوجه؟
مسعود:
المقتايه..
مخول:
العمى شو دمّك بارد، البلاد رح تخرب وبالك بالمقتايه..
روح ضب حالك وأنا بقوّملك مقتايتك.. مبسوط..
مسعود:
ألله يرضى عليك..
"تدخل ريما وسعدى"
ريما:
صحيح انو سليمان خطف كيركي..
مخول:
خطفها وخربت البلاد..
سعدى:
"تكلم نفسها"
ع قبالي أنا.. عجّل يا ماكو.. تحرّك يا ماكو.. ولِك خطفني
يا ماكو..
ريما:
قولكن وين مخبايين هلّق؟
مخول:
لازم نفتّش وين ما كان تا ترجع كيركي لأهلا وإلاّ راحت
علينا
وهيبة:
البنت اللي بتطلع من بيت أهلا عيب ترجعلو..
مخول:
لازم ترجع كيركي.. الحاله تعبانه.. الهنود زعلانين..
"يدخل ماكو تركض سعدى لاستقباله"
سعدى:
شو عم بيصير يا ماكو؟ صحيح انو الهنود عم يخطفوا
اللبنانيين؟
ماكو:
الهنود ما خطفوا حدا أبداً..
سعدى:
ومين عم يخطف هالناس؟
ماكو:
يوسف وجماعتو..
مخول:
"بغضب"
عيب تحكي هيك يا ماكو.. عم تتهم إنسان بريء وهيدا
شي ما بيجوز..
ماكو:
مبارح وقعوا بالفخ تنين لبنانيين لابسين تنانير هندية وعم
يخطفوا من الجهتين.. وللأسف اعترفوا إنو يوسف
وباهيمو متفقين مع بعضن..
مخول:
إنت واحد كذّاب يا ماكو.. عيب تتهم زعيمك باهيمو
بالخيانه..
"يخرج غاضباً"
ماكو:
يوسف وجماعتو إنتو بتعرفوهن أكتر مني.. أما باهيمو
فدبارو عندي لا تخافوا..
"يخرج ماكو"
سعدى:
ألله معك يا ماكو.. خطفني لا تتأخّر..
**
المشهد العاشر
"سليمان وكيركي"
سليمان:
لا تخافي يا حبيبتي بكرا بيرضوا أهلنا ومنتزوج
كيركي:
يوسف ومخول عم يلعبوا بعقل بيي ويبيعوه هشيشه
سليمان:
ماكو رح بيساعدنا ويكشف الحقيقه..
كيركي:
ماكو بيهب سعدى يا سليمان ومش ممكن يقرّ وين نهنا
متخبايين..
سليمان:
لولاه كنا متنا من الجوع.. كل يوم بيجبلنا أكل طازه.. ألله
يقويه..
كيركي:
أنا خايفه يستعينوا بالساهر زمزومي تا يلاقونا..
سليمان:
شو عم بتقولي.. معقول الساحر زمزومي يعرف
مطرحنا..
كيركي:
شاطر كتير.. اللي بيضيع من القبيله كان يرجّعو
زمزومي..
سليمان:
بلشت خاف يا كيركي.. بس أنا ما بؤمن بالسحر..
كيركي:
فإذن لازم نتخبّى منيح..
"تدخل سعدى"
سليمان:
مين دلّك علينا يا سعدى.. كيف وصلتي لهون؟
سعدى:
ماكو دلّني ع مطرحكن.. قلت بجيب فستان العرس
لكيركي.. ما لازم تتزوج بالتنوره الهنديه.. بدها تصير
كنتنا..
كيركي:
شكراً يا سعدى.. ماكو بيهبك كتير وهوّي اللي خبّانا
هون..
سعدى:
وأنا بحبّو كتير.. إذا إنتو تزوجتوا بتنحل قضيتي أنا
وماكو.. وبيصير فينا نعلن محبتنا..
سليمان:
خبرينا شو عم بيصير؟
سعدى:
ما بدي فزّعكن.. بس القيامه قايمه.. والناس مقسومين
قسمين.. قسم بدو ترجع كيركي وقسم بدّو ياها تتزوج
سليمان..
كيركي:
ومين أكتر؟
سعدى:
بقلّك بعد ما تتزوجي..
كيركي:
فهمت عليكي.. الأشرار كتار
سعدى:
لا تخافي.. حبيبي ماكو قدر يتغلّب ع بيّك باهيمو.. تلات
ارباع الهنود صاروا معو..
سليمان:
وشو عن بيي أنا.. أكيد بعدو معنّد..
سعدى:
إمّك مش عم تتركو يرتاح.. دايماً نق نق ع راسو تا يوافق
ع زواجكن..
كيركي:
سلميلنا ع ماكو..
سعدى:
لازم روح هلق.. انتبهوا منيح ولا تتراجعوا عن قراركن
بالزواج لو مهما صار..
كيركي وسليمان:
"بصوت واحد"
أكيد مش رح نتراجع.. ع قبالك يا سعدى..
سعدى:
ألله يسمع منكن..
"يخرج الجميع"
**
المشهد الحادي عشر
"يدخل رزق الله ومنتورة"
منتورة:
لمّن كنت قلّك لازم نرجع ع لبنان.. كنت تعطيني مليون
حجّه تا ما نرجع.. وهلق صار بدّك ترجع تا يتزوج
سليمان بنت خيّك صالح..
رزق الله:
بنت خيي أحسن وأحلى من كيركي بمليون مرّه..
منتورة:
بنت خيّك بيطلعلا شوارب.. وكنت ساعد إمها تا نشلط
الشعرات.. بينما كيركي من دون ماكياج بتجنن.. يخرب
بيتا شو حلوه..
رزق الله:
لا بقى تكذبي عليي يا منتوره.. إنتي أكتر مني ما بدّك
هالزواج يصير..
منتورة:
إنت وافق.. وأنا رح زلغط..
رزق الله:
وبدك تزلغطي كمان؟
منتورة:
ورح ضلّ زلغط.. تا توصل زلاغيطي ع لبنان..
رزق الله:
فإذن.. أنا موافق..
منتورة:
لي لي لي لي لي لي
"يخرج رزق الله ومنتورة.. يدخل يوسف ومخول وباهيمو"
باهيمو:
سامعين زلاغيط أم سليمان.. الظاهر رزق الله وافق ع
زواج ابنو من بنتي..
يوسف:
إذا إنت ما بتوافق هالزواج مش رح يتم..
باهيمو:
برمت الدني تا لاقيهن ما لقيتن.. مدري وين مخبايين..
يوسف:
وليش ما بتستعين بالساحر زمزومي.. كنت دايماً تخبرني
عنّو وعن شطارتو بالسحر..
باهيمو:
معك ألف حق.. لازم ننده زمزومي
مخول:
جبتو معي لا تخاف.. زمزومي ناطر برّا.. فوت يا
زمزومي..
"يدخل زمزومي وهو يرتدي تنورة هندية ملونة، ويضع طوقاً من الصدف يصل لركبتيه"
باهيمو:
أهلا بأشطر ساحر بكل القبائل.. بدّي ياك تلاقيلي سليمان
وكيركي.. وبعطيك وقيّة دهب..
يوسف:
وإلك مني وقية دهب تانيه إذا بتلاقيهن.. فرجينا
شطارتك..
زمزومي:
حوشو.. موشو.. فوشو..
"يظهر الخوف عليه"
حوشو.. موشو.. فوشو.. أنا مش قادر كمّل.. حب سليمان
وكيركي أقوى من السحر..
يوسف:
جرّب أكتر وخود نص كيلو دهب..
زمزومي:
حوشو.. موشو.. فوشو.. وينكن.. طلّوا.. لا تتخبّوا.. أنا
ناطركن..
باهيمو:
شو صار طمّني؟
زمزومي:
القضيه صعبه.. الحب أقوى من السحر.. بخاطركن..
يوسف:
ضل يقول: حوشو.. موشو.. فوشو.. تا طلعت القضيه
فوفاش.. شو لازم نعمل هلّق؟
باهيمو:
ما عاد فينا نعمل شي.. بسببكن أنتو.. صرت مكروه من
شعبي.. ولهالسبب إنتو لازم تتركوا القبيله حالاً.. ما بدّي
شوف وجوهكن بعد اليوم.. وكيركي رح تتزوج..
يوسف:
إذا نحنا رحنا منقطع عنك الطحين المجنون..
مخول:
كمان رح تخسر الزعامه..
باهيمو:
بخسر الف زعامه ولا بخسر بنتي.. إنتو شرشحتوا
شعبكن وأنا شرشحت شعبي.. صدقوني أنا ندمان كتير..
لازم تتركوا القبيله حالاً.. ويا دلكن إذا بلمح واحد منكن..
يوسف:
إنت الخسران.. فكرناك شي زعيم قمت طلعت بهيم..
باهيمو:
برّا.. برّا.. قبيلتي ما بتتشرف بناس متلكن.. إنتو خربتوا
بلادكن وجيتوا تخربوا بلادنا.. نشكر الله اللي في ناس
أوادم متل صهري سليمان
مخول:
هلّق صار صهرك.. بالاول لازم تعرف وين متخبايين..
باهيمو:
"بأعلى صوته"
برّا..
"يهجم على يوسف ومخول. يخرج الجميع"
**
المشهد الثاني عشر
"زلاغيط ودق طبول.. تدخل ريما وهي تصرخ"
ريما:
أهل سليمان وكيركي وافقوا.. اندهوا ع العرسان..
مسعود:
يا سليمان رجاع لهون.. بيت حماك وافقوا..
ريما:
عرسك قرّب يا كيركي.. بلشنا نعلق الزينه ونقشّق
زلاعيمنا..
مسعود:
إذا بدكن تعرفوا وين سليمان وكيركي مخبايين جيبوا
الساحر زمزومي..
ريما:
زمزومي تزمزم رقبتك.. هلّق هيدا بتعدّو ساحر؟ صدقني
لو كان بيعرف وين سليمان وكيركي كان دل باهيمو من
زمان..
وهيبة:
ومين قلّك إنو باهيمو ما جابو.. ضل يقول حوشو موشو
فوشو وما طلع بإيدو شي.. طلع الحب أقوى من السحر..
مسعود:
هلّق القضيه مختلفه.. السحر رح بيكون بخدمة الحب..
ندهولو صوت وهوي بيجي..
ريما:
"تصرخ"
زمزومي.. وينك يا زمزومي..
مسعود:
زمزومي ما بيعرف عربي..
ريما:
بيعرف.. بيعرف.. عم ياخد دروس ليليه.. وصفّى بيحكي
متل زعما بلادنا..
مسعود:
هالقد صار كتّير حكي؟
وهيبة:
عم بيقش المال قش.. مبارح برّج لحماتي وخبّرني خبار
بتجنن.. ياي شو حلوه..
ريما:
هاتي خبرينا.. بركي منجن سوا ومنرتاح..
وهيبة:
قللا لحماتي بعد تلات أشاير بدك تطلعي لفوق..
ريما:
لوين يعني لفوق؟!
وهيبة:
لفوق.. يعني ع السما..
ريما:
ع السما.. وشو قالتلو حماتك؟
وهيبة:
سحبت عصاتا وهفتو ع راسو..
ريما:
يا ساتر.. وشو عمل زمزومي؟
وهيبة:
شمع خيطو وهرب..
ريما:
وشو عملت حماتك؟
وهيبة:
لحقتو وهيي عم تقللو: بدي طلّعك قبل مني ع السما..
مسعود:
مسكين زمزومي بدل ما يريحك من حماتك.. كانت حماتك
ريحتنا منو..
ريما:
شو بو تأخّر؟.. حدا منكن يضربلو تلفون..
مسعود:
لا يا ريما لا.. إذا بدك تحكي مع زمزومي رح يحولولك
الخط ع كندا.. ومن كندا بيحولوكي ع قبرص.. ومن
قبرص بيحولوكي ع لبنان.. ومن لبنان بيحولوكي ع
الأمازون وبيقولوك تفضلي إحكي مع زمزومي..
ريما:
هلق خط زمزومي بدو كل هالدوره العالميه؟
مسعود:
هيك بدا المصلحه الوطنيّه..
وهيبة:
وليش كل هاللبكه.. رجعوا اندهولو صوت ما بتشوفوه إلا
شرّف..
"يدخل جميع الممثلين"
باهيمو:
مين بدك تندهي يا وهيبه؟
وهيبة:
بدنا ننده زمزومي بركي بيدلنا وين متخبى سليمان
وكيركي..
باهيمو:
أكيد رح يضحك عليكن متل ما ضحك عليي..
ريما:
"تصرخ"
زمزومي.. وينك يا زمزومي؟
"يدخل زمزومي وهو يرقص ويصيح"
زمزومي:
أنا زمزومي.. أنا زمزومي.. أنا زمزومي..
منتورة:
ولك فهمنا إنك زمزومي.. بس ما قلتلنا شو فيك تعمل تا
تلاقي إبني..
زمزومي:
أنا بعمل كتير.. كتير.. أنا زمزومي
باهيمو:
ولاه.. إذا ما بتلاقي بنتي هالمره.. حسابك عندي..
زمزومي:
حوشو.. موشو.. فوشو.. سليمان وكيركي بيحبوا بعضن
كتير.. وبدّن يتزوجوا..
رزق الله:
هيدا شي منعرفو.. خبرنا شي تاني..
زمزومي:
حوشو.. موشو.. فوشو.. سليمان وكيركي جايين تيابن
بيضا متل التلج..
منتورة:
متل التلج العا صنين.. هيدي بدلة العرس..
"يدخل سليمان وكيركي بثياب بيضاء ومعهما ماكو وسعدى"
سعدى:
"ترقص أمام كيركي وترش عليها الأزهار وتغني"
آويها يا كيركي يا بنت الحسب والنسب
آويها.. يا أحلى إسم بالقلب انكتب
آويها.. ما بينوجد متلك بخيمات الهنود
آويها.. ولا بينوجد متلك بخيمات العرب
لي لي لي
"سليمان يقبل يد باهيمو.. كيركي تقبل يديْ رزق الله ومنتورة"
زمزومي:
حوشو موشو فوشو.. عليكن الأمان يا كيركي وسليمان
باهيمو:
حاج تهشهش وتوشوش.. خلوا الطبل يدق.. اليوم فرحتنا..
ماكو:
قبل ما يدق الطبل.. أنا بدي إحكي..
باهيمو:
إحكي يا ماكو..
ماكو:
"يركع أمام سعدى"
بتتزوجيني يا سعدى؟
سعدى:
نعم.. نعم.. نعم..
"زلاغيط"
**
