مثلها عام 1993 أكثر من 300 تلميذ وتلميذة من الصفوف الابتدائية في معهد سيدة لبنان، هاريس بارك ـ سيدني أستراليا، وقد تم نقلها الى عدة أشخاص فقط.
**
الأشخاص:
نبيل
نبيلة (زوجة نبيل)
ريما (بعمر 16 سنة، إبنة نبيل)
سامي (ابن حنتور)
سعدى (زوجة سامي وابنة بو ساسين)
محسن ـ غندور ـ ابو العز
سلوى
بو ساسين ـ ام ساسين
حنتور
نجيبة (زوجة حنتور)
كومبارس
(شباب وبنات بعمر 16 سنة)
ساسين (ابن بو ساسين)
رمزا
عدنان
منتورة
**
المشهد الاول
(تدخل نبيلة وهي تغني على لحن أغنية فريد الأطرش: يا جميل)
نبيلة:
ـ1ـ
يا نبيل يا نبيل يا نبيل
من وجَّك قلبي عليل
يا ممرَّض بطني معاك
يا مركَّض فكري وراك
خليني روح وِنْساك
بيّك ما عرف ربَّاك
قمَّرجي ومفقّرني
شاغلني ومحيّرني
ـ2ـ
يا نبيل يا نبيل يا نبيل
مين غيرَك ماشي ذليل
بدّك هالدنيي فداك
تركّضها وتمشي وراك
تمضي تشاكات ع هواك
ما بيتشقّف منها تشاك
كذباتك بتقرفني
ولا كذبه بتشرّفني
ـ3ـ
يا نبيل يا نبيل يا نبيل
من كرشك بيخاف الفيل
لا نجوم بتضوي سماك
ولا شمس بتهوى عُلاك
العيشه شو حلوه بلاك
القمّرجي منّو ملاك
كاشتفتك يا تقبرني
ع الحكي لا تجبرني
....
تفوه ع هالدني، تفوه ع هالغربه، تفوه ع الساعه اللي فيها
تزوجت. حدا بيتزوّج قمّرجي.. حدا بيتزوّج زلمي طول
شواربو مترين وما في براسو عقل.. مغروم بالبوكار
ماشين؟!
(يدخل نبيل)
نبيل:
عيب يا مرا، جرّصتيني، صوتِك واصل لآخر الشارع، وشارعنا كل سكّانو لبنانيين
نبيلة:
هودي لبنانيين؟ هودي قمّرجيي..
نبيل:
يا حبيبتي شو فيها؟ منروح نتسلّى شوي..
نبيلة:
آخ لو بتسمع نسوانُن شو عم بتبربر عليهُن.. كنت بتستحي تمشي معُن.
نبيل:
حطّي بالخرج، نسوانُن عم تلعب أكتر منُّن، روحي شي مرّه ع "الكلوب" وشوفي بعينك.
نبيلة:
من هيك ولادُن فالتين، لا تخلّيني ذكّرك شو عملتْ بنت بو الياس.
نبيل:
بنت جهلانه وخربت بيتها..
نبيلة:
إمّا وبيّا اللي خربوا بيتها.. كل الليل تاركينها لوحدها، شو بدّك ياها تعمل.. تركع تصلّي؟
نبيل:
نحنا شو بدنا فيهُن.. أنا وياكي متفقين وهيدا شي بيكفّي؟
نبيلة:
من هلّق بلّشنا نختلف.. يا أنا يا البوكار ماشين.
نبيل:
نطريني تا عوِّض شوي.. وما بعود إدعس "بالكلوب".
نبيلة:
القمَّرجي ما بعمرو عوَّض.. متل القرد بيلحس المبرد وبيتغذى بدمّاتو
نبيل:
صدقيني، صرت عم إنتبه لحالي، تصوّري إنّو صرت عم إمشي ع "الكلوب" تا وفّر بنزين.
نبيلة:
تاري هيدي فكرتك هالفكره! عشرين رجّال كانوا ماشيين بالشارع، فكروهن ماشيين بمظاهره، قاموا حطوهُن ع "النيوز".
نبيل:
ع "النيوز"؟!.. حلفي برحمة بيّك.
نبيلة:
برحمة بيي، كان راسك أزغر راس ع التلفزيون وشواربك أطول شوارب.
نبيل:
بِشرفِك.. ما قلتي إنّو زوجي بينشال فيه الراس.
نبيلة:
إي وحياتَك ما عدت أعرف وين بدّي خبّي راسي.
نبيل:
شافتني بنتي ريما ما هيك؟
نبيلة:
لأ.. ما خليتها تشوفك..
نبيل:
ليش بتستحي فيي؟
نبيلة:
أنا اللي بستحي فيك قدّامها.. بنتك ريما صارت صبيّه، وما بدّي تصير متلك، وتطلع قمّرجيي.
نبيل:
انا بنتي ما بتطلع الا محاميه او دكتورة..
نبيلة:
إبن المحامي شو بيطلع؟
نبيل:
بيطلع محامي..
نبيلة:
وإبن الطبيب؟
نبيل:
طبيب..
نبيلة:
وإبن القمرجي؟
نبيل:
قمّرجي..
نبيلة:
يعني متلك يا حبيب قلبي.
نبيل:
هيدا مالي وأنا حر إصرفو متل ما بدي..
نبيلة:
وريما بنتي وأنا العم إتعب تا ربيها..
نبيل:
ألله ينجيني من لسانك..
نبيلة:
إسّه ما شفت شي.. يا أنا يا البوكار ماشين..
نبيل:
(يرفع يده كي يصفع نبيلة)
حلّي عنّي.. قلتلّك حلي عنّي وإلا بطيرلِك صوابِك..
نبيلة:
وطّي إيدك.. المرا الآدميي ما بتنضرب..
نبيل:
المرا الآدميي بتطيع زوجها..
نبيلة:
ع خراب بيتها؟
نبيل:
ع كل شي..
نبيلة:
روح.. وْلِكْ روح.. رجّال ع الفاضي بس..
نبيل:
أنا رايح وإذا جد شي بتعرفي نمرة "الكلوب"، بس لا تدقيلي إلا لأمر ضروري.. بخاطرك..
نبيلة:
عم تخرب بيتك يا نبيل.. رجاع لهون..
نبيل:
خلّيه يخرب لستين ألف قرد ما يرجع..
نبيلة:
إذا كان هيك عليي وعلى أعدائي يا رب.. قال حبّيتو لأن إسمو ع إسمي: نبيل ونبيله، طلع أبو فتيله..
(تنده ابنتها ريما(
ريما.. ريما.. وينك يا بنت؟
)تدخل ريما(
ريما:
نعم ماما.. شو بتريدي؟
نبيلة:
أنا واصلي مشوار، مش رح إتأخّر، كم ساعه وبرجع.. وإنتي صرتي صبيه هلّق.. ديري بالك ع حالك، ولا تفتحي الباب لحدا.. فهمتي؟.. باي رورو..
ريما:
باي ماما..
(تجلس ريما وحيدة بالبيت وتبدأ بالغناء(
ـ1ـ
وحدي بهالليل رح إبقى
وحدي بهالليل
مرقلك يا نوم شي مرقه
وميِّل هالميل
لا عيون الناس مشتلقه
ولا نجم سهيل
كتبوا الدمعات ع الورقه
حكايات الويل
ـ2ـ
لا عندي إم تنطرني
ولا عندي بيّ
لا عندي زنود تغمرني
وتقلّلي: خيّ
جدّي اللي كان يسهّرني
فارق هالحيّ
يا رب الكون صبّرني
وارحمني.. خطيّ
**
المشهد الثاني
(ساسين وعدنان يركبان الدراجات بالشارع)
ساسين:
قيم "بَيْكك" من الشارع بدّي إمرق..
عدنان:
ليك.. إذا بتمد إيدك ع "بَيْكي" بدي إكسرها..
ساسين:
إنت بدّك تكسر إيدي.. هلّق بفرجيك
"يهجم ساسين على عدنان ويضربه"
عدنان:
عم تضربني؟ رايح إشكيك لبيّك ولامك..
ساسين:
بيي وامي مش بالبيت، لا تعذّب حالك
عدنان:
إذا كان هيك أنا رح إضربك متل ما ضربتني..
"يتضارب ساسين وعدنان.. تقترب رمزا ومنتورة منهما"
رمزا:
شو بكن علقانين.. واصل صوتكن لآخر الشارع؟
عدنان:
ساسين ضربني بالأول..
منتورة:
ليش ضربتو يا ساسين؟
ساسين:
حضرتو شالح "بَيْكو" بنص الشارع وما بيخليني إمرق.
رمزا:
شو يعني "بَيْكو"؟ مش عم إفهم..
ساسين:
"يشير الى الدراجة"
شفتي "بَيْكو".. هيدي "بَيْكو"..
رمزا:
هيدي "بَيْك" بالانكليزي، وبسيكلات بالفرنسي، ودرّاجه بالعربي..
عدنان:
"يتطلع بساسين بتعجب"
درّاجه!؟.. بحياتك سمعت بهالاسم؟
ساسين:
نَءْ.. شو قالت؟
رمزا:
قلت: درّاجه.. دال راء ألف جيم وتاء مربوطه
عدنان:
والله بدّك زلغوطه.. تا أعرف هالتاء المربوطه وين مربوطه.. اسمعي يا رمزا.. انا ما بحب العربي.. بيي بيضربني إذا بحكي عربي.
رمزا:
بيّك غلطان.. اللي بيعرف لغه تانيه.. بيربح انسان تاني..
ساسين:
وأنا ما بروح ع المدرسه.. بضل مريض..
منتورة:
ليش من شو بتشكي؟
ساسين:
معي وجع بدروسي، ودوخه بفرضي، وقلّة قابليه لمعلمتي
منتورة:
ما عندك شي حساسيه من أمّك.. من بيّك..
ساسين:
لا.. الحمدللله، أنا وأهلي متفقين، لا بيسألوني وين كنت ولا بسألُن وين كانوا؟
منتورة:
وإذا إجا بيّك وشافك عم تتقاتل مع رفقاتك؟
ساسين:
بيعمل حالو ما شافني..
منتورة:
مش معقول.. مش معقول..
عدنان:
معقول ونص.. الأهل صار بدُّن الستره بهالايام، محسوبكن أنا، جبت البوليس عشر مرّات لبيّي..
رمزا:
وشو كانت تعمل امّك؟
عدنان:
كانت تعطيني "فورتي سنس" تا دقّ للبوليس..
رمزا:
إنت بدّك مجمع أطبا.. يوصفوا لزقه لبيّك ولزقتين لامّك..
عدنان:
العمى شو هاللزقه.. فيكي تحلّي عنّا يا بنت وتتركينا نتخانق، وإذا ما بتروحي بدنا نتخانق معك انتي..
ساسين:
انتبه.. لا تقوم تجيب إمّا وبيّا
عدنان:
يمكن يكونوا مطلقين..
رمزا:
امي وبيي متفقين ودايرين بالن ع حالن، ما يوم تخانقوا، بعدن رمز العيله اللبنانيه المقدسه..
عدنان:
بتضربا انت.. أو بضربا أنا..
ساسين:
حبيب القلب وقّف.. ما بدي مشاكل..
عدنان:
خير انشالله شو في؟
ساسين:
بيي عامل حفله خيريه.. وبدّي ياك تقنع امك وبيك يحضروها..
عدنان:
ما هلّق كنت عم تضربني..
ساسين:
مش سامع المثل شو بيقول: ضرب الحبيب زبيب.. تفضّل هيدي عشر بطاقات..
عدنان:
ورمزا ومنتورة.. مش رح تلزقُن بكم بطاقه..
ساسين:
امي لزقت اهلُن بخمسين بطاقه.. لأنن قاعدين ع طاولة الشرف..
عدنان:
وأهلي وين بدّن يقعدوا؟
ساسين:
أكيد ع طاولة الشرف..
"يخرج عدنان وساسين"
رمزا:
والله هالحفلات شحّدت أهلنا الملح.. بدل ما يعلموا بناتُن الطبخ.. عم بيعلموهن الرقص..
منتورة:
والشب الما عندو حلق بدينيه، ما بتاخدو البنت..
رمزا:
كانت ستّي تقول: رزق الله ع ايام زمان، كانت البنت بعمر تسع سنين تطبخ أكلة مجدرة..
منتورة:
بهالايام ما منعرف نقلي بيضه.. ألله يرحم موتى "ماكدونالد" و"كانتاكي فرايد تشيكن" وإلا كنا متنا من الجوع.
رمزا:
آخ ع شي سندويشة فلافل.. آخ ع شي صحن فاصوليا.. ولِكْ آخ ع شي جاط كبّه.
منتورة:
إسّا طنجرة محشي كوسى وبتفتحي مطعم.. بخاطرك..
“تخرج منتورة”
رمزا:
قصتنا متل قصة ساسين وعدنان.. كل ليله بيلتقيوا وكل ليله بيتخانقوا، وبعد نتفه بيتفقوا وبيصيروا يتعانقوا.. بتسألُن ليش؟ ما بيعرفو ليش!.. يمكن الضجر، يمكن الضياع، يمكن الخوف من الغربه.. قولوا: ألله..
**
المشهد الثالث
"ام ساسين تحضّر للحفلة الخيرية.. بو ساسين يحمل طبشورة"
بو ساسين:
عجلّي يرحم موتاكي.. رح نتأخّر
أم ساسين:
بعد عنّا طاولة الشرف ومنخلص من هاللبكه..
بو ساسين:
ما هون المصيبه.. مين بدنا نقعّد ع طاولة الشرف؟
أم ساسين:
بدّها سؤال؟.. الشخصيات الرسميه بس..
بو ساسين:
فإذن انحلت المسأله..
أم ساسين:
روح حيّزلي ع الأرض محل طاولة الشرف تا شوف قديش بتاخد وسعه..
"بو ساسين يرسم بالطبشورة زيحاً طويلاً”
بس.. بس.. هالقد بيكفّي.
"يدخل نبيل"
نبيل:
مرحبا كيفكم يا جماعه..
أم ساسين:
الحمدلله.. نحنا فرحانين كتير إنك جايي ع الحفله مع الست نبيلة..
نبيلة:
ولو.. مشروع خيري متل هيدا وما منشجعو؟
أم ساسين:
ألله يبارك فيكن..
نبيل:
سمعنا انو في طاولة شرف..
أم ساسين:
للرسميين بس..
نبيل:
حسبونا من الرسميين، وزيدولكن كرستين، وحده لي ووحده لمرتي..
بو ساسين:
شو.. بطوّل الطاوله أكتر
أم ساسين:
طوّلا شي مترين بعد..
"يدخل سامي"
سامي:
شو يا عمي ومرت عمي.. مبيّن عم بتحيّزوا ع الأرض..
ام ساسين:
عم منخطط لطاولة الشرف: طولا، عرضا، ووين لازم تكون..
سامي:
حدا بهالجاليه افضل من صهركن وبنتكن؟
ام ساسين:
أكيد لأ.. انتو اكتر تنين بتساعدونا بحفلاتنا الخيريه، وألله يقدّرنا ع مكافاتكن..
سامي:
فإذن حطّونا ع طاولة الشرف وبيكون ألله قدّركن ع مكافاتنا..
بو ساسين:
شو.. بطوّل الطاوله أكتر؟
سامي:
طوّلا، طوّلا يا عمي.. شو دافع حقها؟
أم ساسين:
طوّلا شي مترين بعد..
“يدخل محسن”
محسن:
العوافي يا أوادم..
ام ساسين:
ألله يعافيك.. شو مبكّر ع السهره؟
محسن:
قلت بمرق ساعدكن شوي..
ام ساسين:
بعد عنّا طاولة الشرف ومنخلص من هاللبكه..
محسن:
بدي محلّي يكون ع طاولة الشرف.. حدّ الوزير تماماً.. في مسأله بتهمّو كتير لازم إحكيلو عنها..
أم ساسين:
حدّ الوزير؟!
بو ساسين:
شو.. بطوّل الطاوله أكتر؟
محسن:
طوّلا طوّلا.. ألله يطوّل عليك برحمتو
ام ساسين:
طوّلا شي مترين بعد..
"تدخل سلوى.. تنظر إليها ام ساسين وتسألها"
كيفك يا ست سلوى..
سلوى:
محسوبتك متل ما بتعرفي.. رئيسة جمعيّة مكافحة التمييز الاجتماعي.. وعم حضّر لاتحاد ادبي فني كمان..
ام ساسين:
أهلا وسهلا.. بس حضرتك مبكّره شوي
سلوى:
حبّيت إحكي معكن قبل ما يصير شي غلط..
ام ساسين:
خير انشالله شو في؟
سلوى:
عرفنا انو في طاولة شرف، وأنا وأعضاء الجمعية أحق الناس فيها
ام ساسين:
كلكن بدكن تقعدوا ع طاولة الشرف!؟
سلوى:
ومش مسموح ينقص منّا حدا
ام ساسين:
يا رئيسة جمعية مكافحة التمييز الاجتماعي.. هيك رح بيصير في تمييز..
سلوى:
نحنا منظبطو.. بس إنتو لازم تظبطونا
ام ساسين:
منقعّد حضرتك بس.. وباقي الأعضاء منقعدن ع أحسن طاوله
سلوى:
أبداً ما منقبل.. يا كلّنا يا بلانا..
ام ساسين:
شو يعني بتقاطعوا الحفله؟
سلوى:
ومنقاطع كل حفلاتكن كمان..
ام ساسين:
طيّب متل ما بتريدي.. بس رح تنحشروا شوي..
سلوى:
ما بيهم.. المهم نقعد ع طاولة الشرف..
بو ساسين:
شو.. بطوّل الطاوله أكتر؟
ام ساسين:
طوّلا شي مترين بعد
"تدخل نجيبة وهي تتكلم انكليزية رديئة"
نجيبة:
هالو دارلينغ..
ام ساسين:
هالو مدام نجيبه.. هاو آر يو..
نجيبة:
مي فيري غود.. يو غود؟
ام ساسين:
كرستك رح تكون ع الطاولة رقم تلاته..
نجيبة:
وات.. مي نمبر تري.. نو مي نمبر وان
ام ساسين:
ما بقى عنّا مطرح ع طاولة الشرف.. تسكرت
نجيبة:
نمبر وان.. أور نو وان
أم ساسين:
مش عم إفهم عليكي.. بترجاكي تحكي عربي
نجيبة:
يو ليرن إنغليش.. مي نو سبيك أرابيك.. نمبر وان أور نو وان..
ام ساسين:
لا تقوليلي بدك تخربطي الحفله إذا ما بتقعدي ع طاولة الشرف؟
نجيبة:
مي بيغ ترابل.. نمبر وان أور نو وان..
ام ساسين:
تكرم عيونك.. ما بتكوني إلا مبسوطة..
نجيبة:
سي يو أون نمبر وان
بو ساسين:
شو.. بطوّل الطاوله اكتر؟
ام ساسين:
طوّلا شي مترين بعد
“يدخل ابو العز”
أبو العز:
يا حضرات الناس.. أنا وين بقعد؟
ام ساسين:
الاسم بالخير..
ابو العز:
أبو العز.. ما بحياتك سمعتي بأبو العز؟
ام ساسين:
والنعم بحضرتك يا ابو العز.. انت ع الطاوله رقم اربعه..
ابو العز:
أربعه؟!.. ابو العز اللي بيفز.. ما بيقعد إلآ ع الزيح
بو ساسين:
شو.. بطوّل الطاوله أكتر؟
ام ساسين:
طوّلا شي مترين بعد
“يدخل غندور وهو يعص بين رجليه ويفتّش عن الحمام”
غندور:
بحياتِك.. فيكي تقوليلي وين..
ام ساسين:
ع طاولة الشرف..
غندور:
لا تفهميني غلط.. بدي ياكي تقوليلي وين..
ام ساسين:
ع طاولة الشرف
غندور:
"بأعلى صوته"
يا مدام.. بدّي شخّ.. وين الحمّام؟
ام ساسين:
ع طاولة الشرف
غندور:
شو؟
"يدير يظهره للجمهور وكأنه يبول على المسرح"
ام ساسين:
"تغني"
شرف شرف شرف
ع طاولة الشرف
دفاع كتير
حتى يصير
في عندك شرف
بو ساسين:
شو.. بطوّل الطاوله أكتر؟
ام ساسين:
طوّلا مترين
تا نقعّد تنين
جايين من الفقر
واغتنيوا بالهجر
ونسيوا الله وين
بو ساسين:
وصل الزيح للمطبخ..
ام ساسين:
شرف شرف شرف
ع طاولة الشرف
لحوق الزيح
أوعا تزيح
وعبّي بطنك شرف
بو ساسين:
خلصت الطبشوره..
ام ساسين:
شرف شرف شرف
ع وزن الخَرَف
الخلق كبير
شو ما يصير
عم بيوزّع شرف
**
المشهد الرابع
"الشباب والبنات سهرانين في الشارع”
رمزا:
شو بكي يا منتوره.. مبيّن بالشارع؟ لازم تكوني نايمه هلّق..
منتورة:
أهلي افتكروني نايمه، قاموا سكّروا الباب وراحوا ع السهره.. قلت بطلع شم نتفة هوا..
رمزا:
أنا متلك تماماً.. قلت بطلع بشوف نجوم السما..
منتوره:
أنا ما بحب شوف السما.. لأن أهلي عم بيشوفوني نجوم الضهر..
"رمزا تحاول أن تشعل سيجارة، تمنعها منتورة"
شو عم تعملي يا رمزا.. عيب.. بعدك زغيره؟
رمزا:
لو كنت زغيره ما تركتني امي وحدي بالبيت؟
منتورة:
امك وبيّك عارفين إنك عم بتدخني؟
رمزا:
حطّي بالخرج.. ليش هنّي فاضيين، ما عندن وقت يحكّوا براسُن..
منتورة:
ليش شو بيشتغلوا؟
رمزا:
بالنهار نايمين.. وبالليل سهرانين.. وأنا عم شوفُن بس بمنامي..
منتورة:
الظاهر ما حدا مرتاح.. مبارح أنا رحت لعند ريما، قالتلي إمّها: ريما تركت البيت، وما حدا بيعرف وين هيي..
رمزا:
بتكون اشتاقت لبيها وراحت لعندو..
منتورة:
وأنا اشتقت لبيي كمان..
رمزا:
هيّي بيّها طلّق أمها.. وانتي بيّك بالبيت، يعني بعدك محظوظه شوي..
"يدخل ساسين وهو يحمل الكثير من الأغراض"
ساسين:
معانا شراشف، مسجلات، ساعات، قداحات، كبّايات، فناجين..
منتورة:
شو يا ساسين.. عامل (بابا نويل).. وبيّك وأمك عم يعملوا حفلات خيريه..
ساسين:
عطوني نص السعر، ربع السعر، بس اشتريوا..
رمزا:
"تصرخ بتعجب"
يا ساسين هيدي مسجلتي..
منتورة:
وهيدي ساعتي.. شو يا ساسين سارق بيوت الشارع..
ساسين:
الرزق السايب بيعلّم الناس الحرام..
رمزا:
اعطيني المسجله لهون.. هلق بيي بيخنقني..
منتورة:
هات الساعه لهون.. ما بقى عندي غيرا.. امي باعت كل شي..
ساسين:
إنتو بيتكن فاضي بالمره.. المره التانيه مش رح إسرقو..
منتورة:
بحياة ألله اسرقو.. أنا رايحه اتصل بالبوليس..
رمزا:
لا تروحي أحسنلك.. شو نسيتي انو بيّك مطلوب للعداله؟.. وما صرلو شهرين طالع من الحبس..
منتورة:
الناس كذّابين.. أنا بيّي ما بيبيع حشيشه..
"يدخل عدنان وهو يستمع للحديث"
عدنان:
مين باع خيّي؟.. فيكي تقوليلي؟ خيي مات عمرو ستعشر سنه.. بيّك قتلو.. أنا بكره بيّك..
منتورة:
بدّي قصّ لسانك يا أكبر كذّاب باستراليا..
ساسين:
شو بكُن علقتوا من كلمتين.. ما ع الحساب نحنا ضد أهلنا مش ضد بعضنا
رمزا:
أنا فزعانه روح ع البيت.. قدّام بيتنا ما في ضو بلديه..
عدنان:
كان في ضو وأنا كسرتو..
رمزا:
بتقلّل عقلك ع اللمبه؟
عدنان:
الحجر اللي شلحتو كسر اللمبه ورجع كسر شباككُن..
رمزا:
هيدا انت اللي كسرت شباكنا.. صحيح انك ازعر..
ساسين:
إذا هوّي كسر شباك واحد.. أنا كسرت شبابيك خمس سيارات مارقه بالشارع.. وبعدو الفاعل مجهول الهويّه.. بطل ما هيك؟
رمزا:
يا عيب الشوم عليكن.. عم بتجرصوا أهلكن..
عدنان:
إذا هنّي مش سئلانين.. ليش تا نوجّع راسنا.. كم مره قلنالُن نحنا فزعانين.. لازم تبقوا معنا.. فيكن تقولولي شو كانوا يقولوا؟
ساسين:
نحنا مش فاضيين.. نحنا تعبانين.. نحنا نعسانين..
رمزا:
نحنا طفرانين.. نحنا مخنوقين.. روحوا العبوا..
عدنان:
روحوا ناموا.. انقبروا موتوا.. حلّوا عنّا
منتورة:
بس.. بس.. هالقد بيكفّي.. أهلنا ما عندُن وقت إلا للخناق..
رمزا:
خناقة امي وبيّي بتضحّك.. بتبلّش بالتبويس بتنتهي بالبوليس..
ساسين:
بسيطه.. أنا بيّي كان بدّو يضرب امي بالبراد.. بس ما قدر حملو..
عدنان:
قصّتكن بتضحّك.. أنا امي دارت ع بيّي السيّاره وكانت قتلتو.. قام بيّي دار عليها "الساميترالاّ" وكانت دكّتو بالحبس..
منتورة:
سمعوا منّي كل واحد منكن يرجع ع بيتو.. قبل ما يرجعوا أهلكن
"يخرج الجميع وتبقى رمزا لوحدها"
رمزا:
كلّن بيروحوا وببقى وحدي
كلّن بيناموا وببقى وحدي
لا امي حدّي ولا بيي حدّي
جابوني ع الغربه
ورميوني بهالشده
**
المشهد الخامس
"بو ساسين وام ساسين"
ام ساسين:
وْلِكْ شو عملنا يا بو ساسين.. لعبنا بمصريات الحفله الخيريه وخسرناهُن.. شو رح نقول للناس الساعدونا..
بو ساسين:
هنّي ما ساعدونا أبداً.. كانوا عم يدفعوا تا يقعدوا ع طاولة الشرف.. شو نسيتي؟
ام ساسين:
يا جرصتي قدّام الناس..
بو ساسين:
لا تكبّريها.. هلّق بيكونوا نسيوا..
"يبدأ الغناء المشترك”
ام ساسين:
خربتنا البوكار ماشين
خربتنا يا بو ساسين
كل المال اللي قبضناه
راح ومش معروف لمين
بو ساسين:
أوّل ما لعبنا بخمسه
صرنا بعشره ع الدعسه
الدولار يطير بكبسه
وْبِدْقيقه تطير العشرين
ام ساسين:
تعبت إيديْنا وصرنا
نتديّن كل ما خسرنا
بساعه بساعتين طْفِرنا
وع البيت رجعنا باكيين
بو ساسين:
تركنا العيله المستوره
توقع معنا بالجوره
عيَّشناها مقهوره
تجوع.. ونحنا ملهيين
ام ساسين:
جينا ع الغربه وقلنا
بقوّة ألله ترسملنا
لعبنا قمّرنا جهلنا
وصرنا هلّق طفرانين
بو ساسين:
يا عيب الشوم علينا
هالعيله الما ربّيْنا
قمنا دبحناها بدّيْنا
ورجعنا بعنا السكين
ام ساسين:
وحدو وحدو القمّرجي
صفّى بهالدنيي فرجه
ما بيطلع ولا درجه
عم ينزل تسعه وتسعين
بو ساسين:
ع السما منّي طالع
وبجهنم جسمي والع
ندمان وجفني دامع
تركت ولادي عريانين
ام ساسين:
سامحني يا بي الكل
ع "البوكا" مش ممكن طلّ
خسرت ولادي.. عقلي اختل
وفي متلي كتير مساكين
بو ساسين:
"يغمر ام ساسين وهي تبكي"
طاروا المصريات بفرد ليله.. فدا صرمايتك.. منعمل حفله تانيه.. ومنحط فيها طاولة شرف اطول من التران.. بس اضحكي..
**
المشهد السادس
"مكتبTAB للمراهنة: يقامر فيه غندور ونبيل وسلوى وابو العز"
غندور:
لقطتّو.. لقطتّو.. آه يا غندور آه.. دفع عشره بالدولار، ألله وكيلك يا ابو العز سحبتو من بين عشرين حصان..
ابو العز:
بقديش سلختو يا غندور؟
غندور:
سلختو بمية دولار بس.. ولو كان معي غيرا، كنت سلختو بأكتر..
ابو العز:
يعني ربحت ألف دولار.. مبلغ مش قليل.. الف مبروك..
غندور:
أنا رايح اقبض.. لازم اضربلي كم حصان بالشوط التاني..
ابو العز:
انا حظي متل البطيخ ع طول ابيض.. العمى شو صابو حصاني؟ كان الاول وفجأه كوّع وراح ع الحمّام.. بسيطه.. ألله بيعوّض..
"تقترب منه سلوى"
سلوى:
العمى شو هالحظ متل الزفت..
ابو العز:
شو بكي يا سلوى.. لا تقوليلي خدتي نفس الحصان اللي "عملها" هوّي وعم يركض؟
سلوى:
لا.. أنا خدت مقصوف الرقبه.. قام ربح مقصوف الدينه
ابو العز:
شو عم بتقولي؟!.. مش عم افهم عليكي أبداً
سلوى:
وْلِكْ يا زلمي.. أنا خدت "ترايفاكتا" ع كل الجهات.. ولا حصان طلع آدمي وإجا ع الصوره..
ابو العز:
هاتي تا شوف.. العمى العمى كلُّن ختياريّه..
سلوى:
وشو بدّك ياني نقّيهُن شباب.. يا المتلنا تعا لعنا..
ابو العز:
دخلك إنتي كيف بتنقي الاحصنه؟
سلوى:
بغمض عيوني وبفتحهُن.. ومحل ما بينزل إصبعي بقيّد الرقم..
ابو العز:
إقري الأسامي أهون..
سلوى:
وليش أنا بعرف إنكليزي يا عزيزي..
"نبيل يقاطعهما"
نبيل:
يايْ شو هالحظ التعبان؟!
سلوى:
شو باك يا نبيل طالع خلقك؟
نبيل:
كان ربح ع المنخار.. وحياتكُن لو كان حصاني عندو منخار طويل كان فلح الأرض.. تفوه ع هالحظ.. منخارو أفطس متل منخاري.. صرلي سنه بلعبو ولا مرّه سوّدلي وجّي..
ابو العز:
ألله يستر ما يكونوا سالخينو ابره منيّختو الأرض.. دخلك شو أصلو؟
نبيل:
بيّو عربي وإمّو أستراليه وهوّي بندوق كبير خربلي بيتي..
غندور:
طاروا مصرياتي.. شو بدي قول لمرتي مش عارف.. حدا منكن يساعدني.. يهديني كذبه زغيره بس..
نبيل:
سماع يا غندور.. انا عندي كذبه بتسوى الف دولار..
غندور:
عجّل.. قول.. ببوس ايدك..
نبيل:
إنت وراجع ع البيت هجموا عليك الحراميه وسرقولك مصرياتك..
غندور:
من دون ما يضربوني..
نبيل:
"يضرب غندور"
أكيد ضربوك.. خود هالبوكس ع عينك.. هلّق فيك ترجع ع البيت إنت ورافع راسك..
سلوى:
سماع مني يا غندور شو بدك بهالشغله.. الكذب ما بيدوم.. عندك اربع ولاد زغار عم بيرحوا ع المدارس.. بطّل اللعب بقى..
غندور:
وْلِكْ أنا هربت من لبنان لأنّو بيي كان يوعظني كتير.. فيكي تفلّي عنّي.. ما بيكفّيني البوكس الأكلتو..
سلوى:
بيّك بدّو صالحك.. وأنا بدّي صالحك..
غندور:
دخلِك.. فيكي تقوليلي شو عم تعملي هون؟
سلوى:
أنا مريضه بالقمار.. وما بدّي ياك تمرض متلي..
ابو العز:
أيّها الطبيب طبّب نفسك..
سلوى:
وقت الكان لازم طبّب نفسي ما قدرت.. خربت بيتي..
"يبدأ الجميع بالغناء"
ابو العز:
المخ كبير.. العقل زغير
وحصان بيربح ع حصان
ونحنا منخسر مال كتير
وواحدنا بيرجع طفران
نبيل:
سلختو بميّه وفجأه صار
يكزدر كأنّو بمشوار
تاري حصاني طلع حمار
وطلّعني متلو خسران
سلوى:
يا تعتيري ويا دلِّي
إنا بالبيت محلِّي
ولادي بيعيشوا القلّه
ما عطيتن حب وتحنان
غندور:
قوموا يللا حتى نروح
عيلتنا بترد الروح
وتا نداوي القلب المجروح
منبني هالبيت الخربان
**
المشهد السابع
"سعدى تغني"
سعدى:
ـ1ـ
ضعنا ضعنا إي ضعنا
ضعنا بهالغربه ضعنا
منروح شرق.. منرجع غرب
وما منعرف شو بيوجعنا؟
ـ2ـ
واحدنا بيحتار كتير
كيف بيوفي ديناتو
وعندو ابنو بعدو زغير
وما بينزل عن ديّاتو
ـ3ـ
يا تعتيرك يا لبنان
ولادك بالغربه تاهوا
بدوي صفّى إسمو "بان"
وبدويّه إسما "باهو"
ـ4ـ
بيّي وبيّو علقانين
ويمكن إتطلّق هلّق
وأنا وزوجي متفقين
ورغم الحبّ منتطلّق
"تسمع صراخ إبيها.. تختبىء"
بو ساسين:
مش ممكن إرضى.. بنتي بدّي طلّقها.. مش رح تبقى مع إبن حنتور ولا دقيقه
محسن:
يا بو ساسين روق.. ما في شي ما بيتصلّح..
بو ساسين:
ما منرضى نصلّح.. اللي انكسر انكسر..
محسن:
بس بنتك بتحب زوجها..
بو ساسين:
بنتي أنا؟!.. تحبّا الحيّه انشالله..
محسن:
حكيلك كلمه يا أم ساسين..
أم ساسين:
بدّنا نطلّق..
محسن:
ألله لا يشد الضهر فيكي.. إجا صهركن يا جماعه..
بو ساسين:
ما منحكي معو أبداً.. أنا جيت ع بيتو بس تا رجّع بنتي..
محسن:
أفضل شي ناخد رأي البنت.. وينك يا سعدى؟
"تظهر سعدى، يركض نحوها زوجها سامي"
سامي:
سعدى.. سعدى إنتي نور عيوني ما هيك؟
سعدى:
وانتَ قلبي العم بيدق بصدري تا عيش كرمالك بس..
بوساسين:
"يهمس بإذن أم ساسين"
هيدا اللي كنّا خايفين منّو..
"تدخل نجيبة مع زوجها حنتور وهي تصرخ"
نجيبة:
ليك يا صبي.. سمعني منيح.. إذا بنت بو ساسين بترجع كنتي مش رح سمّيك إبني.. فهمت؟
سامي:
بأمرك يا امي..
ام ساسين:
وإنتي يا سعدى اسمعيني منيح.. إذا ابن حنتور بيضل صهري بدّي إنكر إنّك بنتي..
سعدى:
بأمرك يا ماما..
"تقترب من زوجها"
كيفك يا سامي؟.. اشتقتلك كتير..
سامي:
وأنا كما اشتقتلك.. إنتي روحي..
سعدى:
انشالله مش عم تتعب بالشغل؟
سامي:
لمّن كنتي معي ما كنت اتعب.. بس هلّق انا تعبان يا سعدى
سعدى:
تقبرني انشالله..
بو ساسين:
أنا اللي بدّي اقبرك.. ما قلتلك ما تحكي معو..
حنتور:
ولا مقصوف الرقبه.. شي شفتا انحلّيت..
محسن:
يا جماعه اتركوهن يتفاهموا.. الولاد بيحبّوا بعضن..
بو ساسين:
نحنا بنتنا ما بتطيق ابنكن.. فهمانين؟
حنتور:
ونحنا ابنّا ما بيطيق بنتكن.. مبسوطين؟
ام ساسين:
فإذن، تعوا نتفق.. بنتنا بتاخد البنت والبيت، وابنكن بياخد الصبي والسيّاره
سامي:
أنا بدّي سعدى وبس..
سعدى:
وأنا بدّي سامي وبس..
ام ساسين:
يبسبس رقبتك انشالله.. كل واحد منكن رح ياخد حقّو.. انتي بتاخدي البنت وحضرتو بياخد الصبي..
سامي:
مش ناقص إلاّ تبيعوا ولادنا بسوق الجمعه.. أنا بحب سعدى وغير ألله ما بيفرّقني عنها..
سعدى:
وانا بحب سامي وغير ألله ما بيفرّقني عنّو..
حنتور:
ما فشرتوا.. كل هالمشاكل بين الاهل وبدكن تتراضوا؟
سعدى:
نحنا ما بعمرنا اختلفنا..
ام ساسين:
لا بقى تقروشي يا بنت.. شو نسيتي انو بيِّك مختلف مع بيّو؟
سامي:
زوجِك خسر مع بيّي ألفين دولار ع طاولة القمار.. نحنا شو دخلنا؟
ام ساسين:
ولِكْ كيف شو دخلكن؟.. كل ما أهلكن يخسروا لازم تخسروا انتو..
سعدى:
انتو بعدكن مزوجين ونحنا العم منطلّق..
محسن:
بتعرفي ليش يا سعدى.. لانو هنّي المالكين وانتو المملوكين؟
سعدى:
نحنا مالكين ولادنا.. وما حدا خصّوا فينا.. صح يا سامي..
سامي:
مليون صح يا سعدى..
سعدى:
إذا ما بتتركونا نعيش ع ذوقنا.. رح جبلكن البوليس..
ام ساسين:
شو عم تحكي يا بنت.. يا ضيعان الحليب اللي رضعتيه..
سعدى:
وانتي كمان يا امي.. رح جبلك البوليس..
ام ساسين:
يا بنت أنا امك.. لا تجرصينا..
سعدى:
ما عندي ام الا زوجي.. ولا عندي بي الا زوجي..
نجيبة:
مشّي معي يا سامي مرتك فاجره.. بكرا بتموتك..
سامي:
بموت انا وياها وبعيش انا وياها.. برّا..
بو ساسين:
عم تكحشونا.. بكرا بتشوفوا..
سعدى:
برّا.. برّا
"يخرجون"
سامي:
اشتقت للولاد كتير يا سعدى..
سعدى:
لو بتشوف قديش اشتاقولك هنّي كمان..
سامي:
يا حياتي..
سعدى:
حبيبي إنتّ وروحي إنتَ.. لا حدّ قبلَك ولا بعدَك إنتَ
**
المشهد الثامن
"منتورة تلتقي بريما"
منتورة:
إنتي هون يا ريما؟
ريما:
اشتقت لأمي.. قلت بجي بشوفا وبشوفكن كمان..
منتورة:
امك باعت البيت وراحت..
ريما:
لوين راحت.. ما بتعرفي؟
منتورة:
راحت وما ودعت حدا بالشارع.. بس كنت شوفا ع طول باكيه والدمعه بعيونا..
ريما:
ليش صار فينا هيك؟
"تبكي"
منتورة:
لا تبكي يا ريما.. كلنا بالهوا سوا.. صاروا أهلنا عم بيفنصوا بخراب بيوتُن.. وصار الطلاق عندُن شرف.. والبيت الما فيه طلاق ما فيه بركه..
ريما:
طيّب.. بيّي وين؟
منتورة:
بيّك باع الدني بقشرة بصله، وبسمع من رجال الشارع إنّو مقضّى وقتو "بكينزغروس"..
ريما:
شو هيدا "كينزغروس"؟
منتورة:
شارع بنات الهوى..
ريما:
بيّي أنا؟
منتورة:
إيْ.. بيّك انتي.. يقطع لساني انشالله.. ما كنت لازم خبّرك..
ريما:
يا عيب الشوم.. بيّي طلّق امي تا يرافق بنات الهوى؟ شي بيقرّف..
منتورة:
كل ليلة سبت بينزل يسهر هوّي والشّلّه التعبانه متلو..
ريما:
إذا كان هيك دبّارو عندي..
منتورة:
شو رح تعملي يا ريما؟
ريما:
أهلنا ضاعوا وضيّعونا.. لازم نلاقيهُن ويلاقونا..
منتورة:
أنا مستعده ساعدك.. بيّي مش أحسن من بيّك..
ريما:
إذا كان هيّك قولي لرفيقتنا رمزا تحضّر حالا كمان.. نحنا التلاته رح نعمل انقلاب عائلي بهالجاليه..
منتورة:
شو رح نعمل.. حطّيني بالصورة..
ريما:
أنا وانتي ورمزا رح ننزل ليلة السبت الجايي ع "كينزغروس".. ولازم نلبس تياب متل بنات الهوى..
منتورة:
صحيح انك مجنونه..
ريما:
يا برجع بنت عيله.. يا بحرق هالعيله وبحترق معها..
"تخرج ريما غاضبة.. تدخل رمزا"
رمزا:
سمعت صوت ريما.. وين راحت؟
منتورة:
راحت تقتل بيّها..
رمزا:
ريما بتحب بيّها كتير مش ممكن تقتلو..
منتورة:
ما بتسمعي المتل شو بيقول: ومن الحب ما قتل..
رمزا:
كل شهرين بتوقع جريمه بهالجاليه.. وقدّيش بدنا نخبّي تا نخبّي؟
منتورة:
مصيبتنا إنّو بدنا نبلع الحريّه بفرد غبّ.. يا رمزا الحريّه بتخنق.. واللي بتخنقو الحريّه بيحوزق كل إيّامو..
رمزا:
لازم نفهم شو الحريّه.. قدّيش وسْعا وقديش غمقا.. وكيف لازم نتعامل معها، قبل ما نتحرّك بهالبلد..
منتورة:
طلاق، تهريب مخدرات، قمار، مشاكل عائليه، حفلات تفنيص، كذب ع الدقون، آفات عم تنخر بجسم هالجاليه وما حدا سئلان..
رمزا:
وبس نحكي عنُّنْ.. بيقولوا: عيب يا بنات نحنا مش هيك..
منتورة ورمزا:
نحنا هيك.. مبلى هيك
ومصيبتنا كبيره كتير
يا غافي فتّح عينيك
تا تشوف قدّيش في تعتير
**
المشهد التاسع
"يدخل نبيل وغندور وابو العز"
ابو العز:
الزعيم مات يا جماعه.. شو لازم نعمل فيكُن تقولولي؟
نبيل:
هلّق سمعت بالخبر.. لازم نعملّو جنّاز ما صار لحدا..
غندور:
بس مرتو ما بدّها حدا يتدخّل.. هيّي بتحضّر كل شي..
نبيل:
حطّت إيدا ع مالو وبكرا بتجيب بدالو..
غندور:
سكوت.. المرحوم كان يحبّها كتير..
نبيل:
هيّي ما كانت تحبّو أبداً.. كانت تلعب هيك وهيك.. وألله يستر ما تكون خنقتو..
ابو العز:
با ظالم إلك ألله.. رح تموت عليه، حاطّين بريق المي حد منها.. تا كل ما تغبى يطرشوها بالمي..
نبيل:
طيب.. طيب.. بس نحنا شو لازم نعمل؟
ابو العز:
لازم نتحرّك بسرعه.. الزعيم قبل ما يموت قللي بالحرف الواحد: عنّا بضاعه كتير لازم تنباع..
نبيل:
بكرا جنّاز المرحوم.. ما فينا نتحرّك..
ابو العز:
ما فينا ننطر لبكرا.. من اليوم لازم نتحرّك ونحضّر البضاعه..
نبيل:
ليش السرعه فيك تخبّرني؟
ابو العز:
بكرا جنّاز الزعيم.. وكل زبوناتنا الكبار بيجوا ع الجنّاز.. عرضوا عليهم البضاعه بأرخص الاسعار تا نتخلص منها..
غندور:
انتبهوا من البوليس، البوليس بهالبلد متل الكلب.. بيشم ريحة الحشيشه..
نبيل:
الزعيم زلمي معروف.. بيبيع حشيشه بالجمله، وبيترع بالمفرق.. مأكّد كل الجمعيات الخيرية رح تكون موجوده..
ابو العز:
ألله يرحمو.. كان بيّاع حشيشه.. بس كان كريم كتير..
غندور:
أكيد رح يعملولو حفلة تأبين..
ابو العز:
وشو بدّن يقولولو دخلك.. بيني وبينك إذا عدّينا اللي ماتوا بسببو يمكن ما بيستقبلوه بجهنم..
غندور:
مش عارف ليش مشينا بهالطريق؟
نبيل:
المال يا غندور.. بيحلّ الركاب..
غندور:
كان فينا نشتغل بتقوى ألله.. صحيح انو حبّيت اغتني بسرعه.. بس أنا ما اغتنيت.. أنا انتعبت وتعّبت غيري.. نحنا عم نقتل بشر يا جماعه..
نبيل:
وانا كمان صرت كرهان حالي، وعم فكّر دايماً: شو بيصيبني لو بنتي ريما تعوّدت ع الحشيشه؟ بس كيف بدّي أدفع الدّيْنات اللي عليي.. هون المصيبه؟
ابو العز:
المرحوم إذا كان مرحوم، راح وترك كل زعرنتو ومالو وراه.. فيكن تقولولي شو إخد معو؟
غندور:
إخد أعمالو الوسخه..
ابو العز:
لا تنسى انت متلو..
غندور:
كنت متلو.. ومن اليوم ورايح ما بدّي غير راحة الفكر، خدوا هيدي بضاعتكن، ونصيحتي إلكُن: حرقوا هالبضاعه قبل ما تحرقكن..
"يخرج"
نبيل:
هلّق بيغيب ساعه وبيرجع.. علقان ع الدبق ومش عارف..
ابو العز:
روح تا نعزّي بالمرحوم.. أحسن ما نبصرو بنومنا..
**
المشهد العاشر
"تدخل نبيلة وهي تغني"
نبيلة:
ـ1ـ
كان الزمان وكان
في عنّا أهل مناح
وبنيّات وصبيان
يناموا فكرن مرتاح
وتغيّر الزمان
وصفّى العالم يئسان
وتفرفطوا كل الجيران
ـ2ـ
ما في طفل عطشان
مستحلي نقطة ميّ
وما في حدا زعلان
عاش وبيقول خطيّ
إلا وبهالزمان
واحدنا صار تعبان
عم بيفنّص هوّي وطفران
ـ3ـ
قصّتنا يا إخوان
لو يحكيا التاريخ
بتضحِّك مين ما كان
ما صارت بالمريخ
تركنا الوطن لبنان
وصفّينا بالهجران
أعمى وعم بيقود عميان
"تدخل منتورة"
منتورة:
شو يا خالتي نبيلة.. هيئتك منرفزه كتير.. شو القصه؟
نبيلة:
عم فتّش ع ريما.. بنتي ضاعت يا منتورة.. رفيقتك ضاعت..
منتورة:
لا تخافي عليها.. ريما قويّه وشطّوره..
نبيلة:
شفتيها شي؟ أنا بعرف انو ريما بتحبّك وما بتتخلّى عنّك..
منتورة:
ريما طلبت منّي ومن رمزا إنّو نرافقها ع "كينزغروس" تا تربّي بيّها.. وقالت بالصوت الواحد: يا برجع بنت عيله يا بحرق هالعيله وبحترق معها..
نبيلة:
هيدي ريما اللي أنا ربّيتها.. بنت أصل وشريفه..
منتورة:
شو رأيك تنزلي معنا وتشوفي بعينك شو رح تعمل؟
نبيلة:
رح إنزل لوحدي.. ع شرط ما تخبّري ريما.. خلّيها مفاجأة.. اتفقنا؟
منتورة:
اتفقنا.. هلّق بخاطرك وبشوفك ليلة السبت..
"تخرج منتورة.. تدخل سلوى"
سلوى:
نبيلة انتي هون.. والله فرحت كتير بشوفتك.. يا ريتك ما بعتي البيت.. صار حقّو أغلى بتلات مرّات..
نبيلة:
أنا بيتي هوي عيلتي.. ومن اليوم ورايح رح فتّش عن عيلتي تا إسترجع بيتي.. وانتي شو أخبار جمعيتك؟
سلوى:
حالتنا بهالجاليه ما عادت تنطاق، كل تنين بيألّفو جمعيّه، وبس يصير انتخاب بيدور حلش الشعر، وكل واحد من هالتنين بدّو يصير رئيس..
نبيلة:
كل هالقد الحاله تعبانه؟
سلوى:
ألله وكيلِك شي بيضحّك.. كل ضيعه عندها جمعيتين.. وكل جمعيّه مقدّمه دعوى قضائيه ضد التانيه..
نبيلة:
من هيك قوّتنا ضايعه بهالبلد.. لو كنّا وحّدنا جمعيّاتنا كنّا عملنا جامعه..
سلوى:
جامعه.. قصدك جامعه.. جامعه..
نبيلة:
إي جامعه.. تعترف فيها أستراليا وتدعما الدوله اللبنانيه..
سلوى:
دخيلِك.. خلينا هيك أشرفلنا..
نبيلة:
الشعب اللبناني شعب طموح.. ولولا طموحو ما سافر
سلوى:
مش عم إفهم.. شو دخل هيدي بهيدي؟
نبيلة:
تركيني فهّمِك.. نحنا شعب بيحب الوجاهه، وما منحب حدا يكون أحسن منّا.. ولهالسبب كلنا بدنا الرئاسه.. يا بكون رئيس.. يا بخرب الأرض..
سلوى:
والله معِك حق.. قرياقوس لمّن ما جدّدولو قام فسّد ع إعضا الجمعيه.. كل العم يقبضوا من الدوله ويشتغلوا كم يوم بالسر تا يعيشوا، جبلُن التفتيش وخرب بيتُن..
نبيلة:
لهالدرجه طلع ظالم؟
سلوى:
والمصيبه انّن كلّن ولاد خيّو، وبنات اختو.. وولاد عمّو.. قرايبين متل ما بتعرفي..
نبيلة:
بس ما تنسي إنّو في جمعيات عم تشتغل للصالح العام..
سلوى:
قلال كتير.. بينعدّوا ع الصابيع..
نبيلة:
صحيح قلال.. بس عم يشتغلوا..
سلوى:
إذا رحتي لعند الطبيب تا تفحصي حالك، ما بيقلّك عينِك منيحه، إجرك منيحه، كرشِك منيح.. بيقلِّك: عينِك رمدانه بدّها قطره، إجرك مكسوره بدها تجبير، كرشِك منفوخ لازم توقّفي شرب البيره.. ونحنا بهالجاليه لازم نداوي الجرح وما نخاف.. جاليه عددها نص مليون نسمه، فيها مليون زعيم..
نبيلة:
ولِكْ يا سلوى شو بكي.. النصّ مليون نسمه كيف بدّو يكون فيهُن مليون زعيم؟!
سلوى:
لأن زعماء هالجاليه بألف وجه ولسان..
نبيلة:
وأوادم هالجاليه.. ليش ما حدا بيذكرُن؟
سلوى:
لأنُّن أوادم.. مش سئلانين إذا بينذكروا أو ما بينذكروا.. فيكي تقوليلي شو بتربح الشمس إذا قلتي عنها حلوه مضوايه متل دهب الأساور؟ والأوادم متل الشمس بيحموا المجتمع لأنُّن أوادم.
نبيلة:
ما أتقل دمِّك بس تبلشي تتفلسفي..
سلوى:
تركيني من الفلسفه وقوليلي شو أخبار بنتك ريما؟
نبيلة:
ريما عم بتخطط لشي أكبر من عمرها.. وأنا لازم ساعدها.. بخاطرك، صار لازم روح من الشارع..
سلوى:
بعد شوي جنّاز المرحوم.. ما بدّك تعزّي فيه؟
نبيلة:
نبيل زوجي بيكون بالجناز.. وأفضل ما التقي فيه وتصير بيننا خناقه..
“تحاول الخروج”
سلوى:
انطريني تا روحي معك.. عندي مقابله بالجريده وما لازم إتأخّر..
"تخرجان معاً"
**
المشهد الحادي عشر
"مكتب يجلس عليه سامي وعلامات الغضب تظهر على وجهه، وبقربه زوجته سعدى"
سعدى:
روق.. بترجاك روق.. اعصابك تلفانه ما عادت تتحمّل..
سامي:
شي بيقرّف.. عملتلّن جريده تنقل أخبار بلادُن.. توصّل أخبارُن ع لبنان.. توحّد الجاليه، وتنشر الأدب والتراث اللبناني.. صاروا بدّن يحولوها لنشر صورُن ومسبّاتُن، وأدبُن المسروق.. وأكيد هيدا شي ما بينطاق..
سعدى:
ألله يخليك لا تنرفز.. صحتك بالدني..
“يدخل ابو العز”
أبو العز:
صباح الخير يا أوادم..
سعدى:
أهلا وسهلا فيك يا ابو العز..
ابو العز:
رئيس التحرير موجود؟
سعدى:
لحظه وبيكون معك..
سامي:
شو هالزياره الحلوه يا ابو العز.. يا اهلا يا اهلا
ابو العز:
انت بتعرف انّو في انتخابات، ومحسوبك مرشح مستقل.. بدّي حطّ اعلان بالجريده يطلع صفحه كامله ع مدّة شهر..
سامي:
أكيد بدّك تعلن عن برنامجك الانتخابي..
ابو العز:
هيك يعني..
سامي:
فإذن، رح منخلي صورتك تاخد ربع صفحه.. والبرنامج تلات ارباع..
ابو العز:
صورتي ربع صفحه.. ولو كبّرا شوي..
سامي:
طيّب.. رح نعملا نص صفحه.. شو رأيك؟
ابو العز:
كبرلي صورتي أكتر.. احسن ما شوف غير جريده..
سامي:
رح إعملا صفحه كامله.. مبسوط هيك؟
ابو العز:
كلّك ذوق استاذ سامي.. يا تكون الصحافه هيك يا بلا.. والله لفقّع حماتي، قالت: شو هالتيع الآخدتو بنتي.. بشرفك يا استاذ سامي أنا تيع؟
سامي:
"يتكلّم بصوت منخفض"
تيعين مش تيع واحد..
ابو العز:
شو قلت.. ما سمعتك شو قلت؟
سامي:
عم قلّك: انشالله بتنجح بالانتخابات..
ابو العز:
"يخرج وهو يصيح"
عليي وعلى حماتي يا رب
"تدخل سلوى ومعها منتورة ورمزا ويوسف"
سلوى:
مرحبا.. أولاً بهنيكن بهالجريده.. ضربت السوق من أول عدد.. تانياً، لا تواخذوني لأني تأخرت شوي.. كنت عم جمّع مواهبنا الشّابه بهالجاليه..
سعدى:
شي عظيم كتير..
سلوى:
ورح تكون جريدتكن الجريده الوحيده الرح تنقل أخبار اتحادنا الادبي والفني بإذن الله..
سعدى:
هيدا شي بيشرفنا.. وانشالله نكون عند حسن ظنكن..
سلوى:
نحنا قرفانين من هالاوضاع الادبيه والفنيّه بهالجاليه..
سعدى:
بتمنالكن التوفيق.. انشالله بتصيروا أكتر وأكبر..
سلوى:
يا ست سعدى.. هالمواهب الواقفه قدّامك، بيطلعوا ربع الاعضاء، هودي فجر الأدب والفن.. مثلاً، حضرتو خيّك ساسين، أكيد بتعرفيه بس ما بتعرفي قديشو موهوب بالشعر.. بيذكرك بجبران خليل جبران ونزار قبّاني..
سعدى:
خيّي أنا.. كل ايامو كسلان بالمدرسه.. وبيضلّ واقف ع الحيط..
ساسين:
بترجاكي لا تهينيني لأني خيّك.. أنا اعظم شاعر.. أنا الله خلقني وكسر القالب.. أنا..
سعدى:
وأنا بعرفك أكتر من حالك.. قوم روح لعند امّك هلّق.. وبلا فضايح..
ساسين:
لو كنتي بتعرفي خيّك منيح.. ما كنتي حكيتي هيك قدّام رئيستنا الست سلوى
سعدى:
طيب.. معقول كون غلطانه.. هات سمعني شي قصيده..
ساسين:
كرمال عيونك بس يا اختي الحبيبه.. رح سمعِك آخر قصيده كتبتها، وبترجاكي تنشريها ع الصفحه الأولى..
سعدى:
تقبرني ريتك.. هات سمعني يا خيي..
ساسين:
كلنا للوطن
للعلى للعلم
ملء عين الزمن
سيفنا والقلم
سعدى:
يخرب بيتك يا خيي سارق النشيد اللبناني.. هيدا كتبو رشيد نخله ألله يرحمو..
سلوى:
"تهمس باذن ساسين"
كل شي حفّظتك أشعار ما طلع براسك إلا النشيد اللبناني؟
ساسين:
"يهمس باذن سلوى"
نسيتُن كلّن.. منيح اللي حافظ النشيد
سعدى:
شو عم بتوشوشوا بعضكن فيني أعرف؟
سلوى:
كنت عم قلّو لا تخاف.. انت شاعر..
سعدى:
بس هيدا النشيد الوطني اللبناني..
سلوى:
أكيد هيدا النشيد الوطني اللبناني.. مبارح حفّظتن ياه تا يغنّوه بأول احتفال.. الظاهر حب يسمعك ياه بصوتو..
سعدى:
إذا كان هيك.. ولا يهمك..
سلوى:
هالبنت اللي قدامك إسما منتوره.. بس صوتها احلى من صوت فيروز..
سعدى:
أهلا وسهلا فيكي يا منتورة.. فيكي تقوليلي شو رصيدك الفني؟
منتورة:
بحياتك وضّحي السؤال أكتر.. مش عم افهم عليكي..
سعدى:
كم عندك غنيّه؟
منتورة:
عندي أكتر من عشرين غنيّه متل: على جسر اللوزيّه، طلّوا حبابنا طلّوا.. ولبنان يا قطعة سما..
سعدى:
خلص.. خلص.. لا تكفّي
سلوى:
بترجاكي تعطيها فرصه..
سعدى:
بهالبلد في حقوق الملكيه.. يعني الواحد بيخترب بيتو اذا سرق قطعه ادبيه، او غنيّه او لحن موسيقي.. يعني ما في لعب.. عم تفهموا..
"يدخل سامي"
سامي:
شو عم بيصير هون.. ليش صوتك طالع يا مرا؟
سعدى:
معك حق.. كل شي مسروق بهالبلد..
رمزا:
استاذ سامي.. اذا بتريد اسمعني.. انا اسمي رمزا.. مش رح غني ولا رح قول شعر.. أنا دخلت ع الاتحاد الادبي الفني كمشجعه بس..
سامي:
نشكرالله اللي طلع حدا منكن عندو شوية عقل.. شو فيني اخدمك يا رمزا..
"تسحب صورة من جزدانها"
رمزا:
شفت هيدا يا خواجه.. بيسوى الدني كلها..
سامي:
ومين حضرتو؟
رمزا:
خيي حبيبي.. يقبرني انشالله..
سامي:
وشو بتريدي إعملو؟
رمزا:
بدي ياك تنشر صورتو.. وتكتب عنّو مقال حلو متل فضل حكايتك..
سامي:
متل شو يعني؟
رمزا:
صرلو خمس سنين بيقدّم ع الشهاده وبيسقط..
سامي:
والسنه نجح.. ما هيك؟
رمزا:
لأ.. كمان سقط.. بس بكلمتين منّك فيك تقول انو نجح..
سامي:
بدك ياني اكذب تا نجحلك خيّك بالشهاده.. شو مفكرتيني حمار؟
رمزا:
كذبه بيضا.. ما فيها شي.. يمكن تشجعو وينجح بالمره الجايه..
سامي:
طلعوا برا.. طلعوا برا..
سلوى:
نحنا الاتحاد الادبي الفني..
سامي:
"بانفعال شديد"
برّا.. برّا
"يغمى عليه ويقع ارضاً"
سلوى:
هيئتو مات.. هزّوه تا شوف..
سامي:
بعدكن هون.. برّا
**
المشهد الثاني عشر
"تابوت المرحوم في الساحة. حفلة تأبين"
محسن:
يا كبير ابن كبير
يا كفّ العطا
لكل طنجره يا زير
في عندَك غطا
وبحيرة التعتير
انت مبلّطا
ام ساسين:
بلاط ايطالي.. حق المتر ابرتين وشمّه..
محسن:
المتلك صعب تا يموت
يا نبع الحنان
يا نمر من بيروت
يا مزيّن الهجران
سيدني بيلفّا سكوت
ورح ينفلق لبنان
نجيبة:
ورح ننفلق نحنا كمان..
محسن:
عرفناك بيّ
عرفناك ام
عرفناك خيّ
عرفناك عمّ
دجاجه وبيضا دهب
حولك بشر تلتم
ام ساسين:
هيدي معك حقّ فيها.. بيضو دهب 18، وأبيضو دهب 24
محسن:
زعلنا زعلنا كتير ع مصابك
يا عنتر العم يحسبوا حسابك
تفوه ع هالكون.. شو صابك؟
طويت الدنب رح يفقعوا حبابك
ام ساسين:
ليش هوّي أول واحد بيطوي دنبو.. يا ما ملوك قبلو طويوا رقبتُن..
محسن:
جود دخلك جود بالموجود
قبرك مزار عمايلك عنقود
كل القبور مشوبه بتضل
وقبرك ع طول بداخلو في برود
نجيبة:
مأكد مركبلو مكيّف هوائي.. بس ع الرطوبه بدّو يقطّن..
محسن:
يا مبلسم قلوب البشر
يا ضارب الفقر بحجر
"الروز رايز" شبّاكا انكسر
"والفورد" بالدقّ انحشر
وما في حدا متلك.. فشر
ام ساسين:
فشر ومليون فشر يكون حدا متلو.. حضرتو أكبر نصّاب بهالبلد..
محسن:
تابوتك المحمول
ع كتاف الدني
كان عم بيقول
مدري شو بني؟
ضهري انكسر
بطني انفجر
ما لو أثر
أكبر غني
نجيبة:
دخيلكن افتحوا التابوت ليقوم هرب..
محسن:
ألله يرحمو يا جماعه.. البقيّه بحياتكن..
سلوى:
اللي خلّف ما مات.. انشالله بيكون زرع وفرع..
محسن:
يا جماعه، الدني رح تشتي.. خلّوا التعزيه للبيت..
نبيل:
حملوا التابوت منيح تا ندوّروا بالشوارع..
محسن:
ما فينا ندوّرو بالشوارع.. هون غير لبنان..
نبيل:
زعيم متل هيدا، بيحوالو ع كذا مليون بيروح فطس.. هالشي مش مقبول ابداً
محسن:
هالبلد ما فيها لا كبير ولا زغير.. العتره ع البيروح..
نبيل:
مش رح خليه يروح فطيس.. يا حاملين التابوت ارقصوا بالتابوت..
"موسيقى حماسية"
نجيبة:
انتبهوا رح يوقع غطا التابوت ويطبّ المرحوم..
ام ساسين:
قولِك بتابوتو في حشيشه؟
سلوى:
ألله ما يرحمو.. كانوا يحشولو ضراسو بالحشيشه..
نجيبة:
بعدك ما نسيتي ابنك يا سلوى؟
سلوى:
وكيف بدّي إنساه وهوّي القتلو
ام ساسين:
وليش جيتي تحضري دفنتو؟
سلوى:
تا إتأكد انو مات.. أنا بسببو لهيت حالي بالجمعيات الادبيه والفنيه تا انسى موت ابني.. صحيح إني ما قدرت حاكمو ولا قدرت ثبّت عليه شي.. بس ألله رح ياخد بتاري..
نجيبة:
يا رب خود بتار كل اللي ماتوا بالحشيشه..
**
المشهد الثالث عشر
"منطقة كينزكروس، شارع بنات الهوى، تدخل ريما ومنتورة ورمزا، وعلى أعينهن نظارات سوداء، ويلبسن فساطين قصيرة"
ريما:
خلّوا عينيكن عشره عشره.. بس تشوفو بيي انتو تخبّوا ودلّوني عليه..
منتورة:
يمكن بيّك ما يجي اليوم.. كان بجنّاز المرحوم..
رمزا:
رح يجي.. شي خلص الجنّاز.. شفتو ركب بالسياره هوّي وأصحابو.. وسمعتو عم بيقول بصوت عالي: الليله ليلتنا..
ريما:
فإذن انتبهوا منيح.. منتوره انتي وقفي ع هيديك الزاويه.. وانتي يا رمزا وقفي مقابيلا وأنا رح اوقف هون.. بس خلّونا قراب من بعضنا.. تا نقدر نحمي حالنا..
"يدخل نبيل ورفاقه"
منتورة:
انتبهي يا ريما.. العصفور بالقفص..
نبيل:
شو هالرف الحمام هيدا.. انشالله يكون السعر مناسب..
ابو العز:
شوف هيدي.. ياي شو حلوه..
غندور:
قمر والله قمر.. تطلّع يا نبيل تطلّع.. بنت زغيره متل القمر..
نبيل:
لو بدّا ميّه بدي إعطيها هيّي..
غندور:
ع الحساب ما معك مصاري..
نبيل:
هلّق صار معي..
"يقترب من ريما ويسألها"
هاو ماتش دارلينغ
ريما:
"تصرخ"
بيّي.. شو عم تعمل هون؟
نبيل:
إنتي شو عم تعملي هون؟
ريما:
عدنا التقينا يا بيّي..
نبيل:
وين التقينا يا ريما؟!
ريما:
ما بيهم وين.. المهم التقينا..
نبيل:
يا ريتني متّ ولا شفتِك هون..
ريما:
ويا ريتني متّ ولا شفتَك هون..
نبيل:
شو جابك لهون يا بنتي؟
ريما:
إنت وامي جبتوني لهون..
نبيل:
حدا بيجيب بنتو لهون يا ريما؟
ريما:
مشاكلكن.. سهركن.. قماركن.. طلاقكن.. هني الوصلوني لهون..
نبيل:
اغفريلي يا بنتي..
ريما:
لشو اغفرلك وكل شي بيناتنا انقطع.. موتنا كعيله كان عظيم يا بيّي..
نبيل:
إذا كان موتنا كعيله كان عظيم.. قيامتنا رح بتكون أعظم..
ريما:
نحنا انتهينا يا بيّي.. امي راحت بطريق.. وانت رحت بطريق.. وانا طريقي هون..
نبيل:
حطّي ايدك بإيدي تا نبلّش عن جديد..
ريما:
وامي؟
نبيل:
منلاقيها..
ريما:
صعبه نلاقيها يا بيّي..
"تدخل نبيلة"
نبيلة:
أنا هون يا ريما.. أنا هون يا عيون أمك.. منتورة خبّرتني كل شي.. وجيت تا شوف بنتي الشريفه شو رح تعمل تا ترجّع عيلتها..
نبيل:
"يركع امام ابنته وزوجته"
بترجاكن سامحوني.. أنا كنت ضايع.. واليوم خلقت من جديد..
"يتعانق الجميع وريما تغني"
ريما:
لا ما بدّي
صير الخبريّه
الدمعه العا خدّي
وآه الغنيّه
رجّعني يا ربّي
لضحكات الطفوله
لنظراتي الخجوله
للورد العا دربي
رجعني يا ربي
ع هاك الدار
ع امي وبيّي
ومحيلي اللي صار
لا نحنا فقنا
ولا هنّي فاقوا
لا نحنا اشتقنا
ولا هني اشتاقوا
وتدق المحبّه
ع بواب الغربه
جاوبها يا ربي
**
