مملكة الحكي

Charbel Baini

Mamlaket Alhaki

The Kingdom of talk

قصائد مختارة من كتب الشاعر

الغلاف للفنانة رندى بعيني

**

مملكة الحكي

ـ1ـ

 .. وْفَكَّرتْ حَالِي حْكِيتْ!

تَارِي الْحَكِي غْبَاشِه

بْشُوفُو أَنَا وْمَاشِي

لَمْعِةْ قَدَحْ كبْرِيتْ

ـ2ـ

لا تْقُولْ إِنِّي سْمِعْتْ!

حَكْيِي أَنَا مَلْمُوسْ،

حْرُوفُو عَ وَرْقَه جْمَعْتْ

وْعِلَّقْتُنْ بْدَبُّوسْ

قُونِه عَ صدْر الكَوْنْ

مَغْرُومْ فِيهَا اللَّوْنْ

وْفِيهَا الْعطر مَحْبُوسْ

ـ3ـ

وْصِرْتْ بِلْيَالِي الْبِكِي

إِجْبُلْ مِنِ تْرَاب الْحَكِي

إِنْسَانْ..

إِسْأَلْ: يْجَاوِبْنِي

إِزْعَلْ: يْعَاتِبْنِي

وْيِرْسُمْ عَ كَفِّي مَمْلَكِه

بْخِيطَانْ

مِنْ دخَّانْ..

وِيْقُولْ: يَا إِبْنِي

إِنْتَ الْمَلَكْ

مَا أَجْمَلَكْ

شْلَحْت الدِّنِي كِلاَّ

بْإِيدَكْ تَا تِتْسَلَّى

أَللّـه خَلَقْهَا مْشَرْبَكِه

لا تْزَعّلُو لأَللّـه

بِشْطَارْتَكْ حِلاَّ...

ـ4ـ

.. وِضْحِكِتْ لِمِّنْ قِلْتْ:

وْصِلْتْ..

لوَيْنْ؟.. مُشْ مَعْرُوفْ!

وِالدَّرْبْ قدَّامِي

مَرْصُوصْ بِعْضَامِي

بْآهَاتْ.. كِيفْ مَا مِلْتْ

بِتْفَرْفِطِ كْلامِي

بْنَهْدَاتْ وِقْفُوا صْفُوفْ

عَ شْطُوطْ أَحْلاَمِي

.. وْيَا وَقْعِةِ التِّفْكِيرْ

الْـ مَا بَعِدْهَا وَقْعَه:

مَلْيُونْ حَرْف زْغِيرْ

بْيِتْجَمّعُوا نْوَاطِيرْ

عَ جْوَانِبِ الدَّمْعَه

وْفُورْ يَا دَمِّي

وْزِيدْ يَا هَمِّي

كِيفْ بَدِّي إِكْتُب بْسِرْعَه

وِالْعُمرْ وَلْعَه؟!

كِيفْ بَدِّي رَافِقِ الْكِلْمِه

وْمُشْ آمْنِه الرَّجْعَه؟!

**

الغربة الطويلة

ـ1ـ

كَتْبُونِي عَ شْفَاف وْلادُنْ

قَصِيدِه لِبْلادُنْ

الْمَزْرُوعَه بالنَّارْ

بِالْحُزْن وْبِالدَّمَارْ

وْعَ فَرْشِةِ النِّهَايِه.. قَالُولِي:

يَا غُرْبِةِ الأَيَّام الطَّوِيلِه

حْكِيلُنْ عَ اللِّي صَارْ

مَعْ دَمْعَات الْعِينَيْنْ الْخَجُولِه

اللِّي تْجَمَّدِتْ عَ خْدُود الطُّفُولِه

وْمَا غَسَّلِتْ آثَار بْعَادُنْ!

ـ2ـ

.. وْقَالُولِي: تَعَبْنَا تِعِبْ

وِالْعُمْر ابْتَلَى

وْمِنْ عَرَقِ صْلاوَاتْنَا شِرِبْ

كْتَاب الصَّلا

وِبْيُوتْنَا اللِّي فِيهَا تْرِبَّيْنَا

وْعِمَّرْنَا مْدَامِيكَا بْإِيدَيْنَا

وِغْزَلْنَا سَاحَاتَا بْإِجْرَيْنَا

نَكْرِتْنَا!

وِالأُم اللِّي بِكْيِت علَيْنَا

وْخِبَّيْنَا صُوَرْهَا بْعِينَيْنَا

قَبْل الشَّمِسْ مَا تْغِيبْ

وِدَّيْنَالاَ مْكَاتِيبْ

لاَ فَتْحِتُنْ

لاَ قِرْيِتُنْ

وْبِالْمَوْقَدِه الْـ قِدَّامْ بَابَا حَرْقِتُنْ

مْأَكَّدْ عَ طُول غْيَابْنَا نِسْيِتْنَا

وْمَاتِتْ بِقَلْبَا الطَّاهِر مْحَبِّتْنَا!

ـ3ـ

يَا غُرْبِة الأيَّامْ الطَّوِيلِه

يَا غُرْبِة الشَّقَا وِالضَّنَى

قَبِلْ مَا تِحْكِيلُنْ حْكِيلِي

شُو اللِّي مِتْخَبَّالِي أَنَا؟!

**

مجنون عم يسأل

ـ1ـ

غُرْبِه.. عْيُونَا سُودْ

مَا عُمرْهَا "عِشْرِينْ"

قَالِتْ: بِـ شُو مَوْعُودْ

يَا شَاعْرِي الْمِسْكِينْ

عَمْ تِرْسُم الرَّجْعَه

عَ مْوَاجْ مُرْتِفْعَه

وْبَيْنَك وْبَيْنَا سْنِينْ؟

.. وْهَوْنْ عِنْدَكْ بَيْتْ

هَوْنِيكْ مَا عِنْدَكْ

حْمِلْتْ الشَّقَا وْفِلَّيْتْ

مَا فِي حَدَا سَنْدَكْ

لا الْحكِمْ بَدُّو يَاكْ

وْلا شَعْبَكْ تْبَنَّاكْ

وِالأرْضْ قِرْفِتْ مِنْ عَرَقْ زِنْدَكْ..

وَحْدِي أَنَا اللِّي حْمِيتَك مْنِ الْغَدِرْ

تَا قْوِيتْ عَ ظْرُوفَكْ

شُو إِنْتْ.. لَوْلا الْهَجِرْ؟!

مَتْعُوبْ بِحْرُوفَكْ

مَصْلُوبْ فَوْق الشِّعِرْ

وِالدَّمّ عَ كْفُوفَكْ!..

كَحْشُوكْ: ضِبَّيْتَكْ

بَغْضُوكْ: حِبَّيْتَكْ

جِمَّعِتْ مَالِي: سْخِيتْ عَ بْلادَكْ

تْزوَّجِتْ مِنِّي: حْرِمِتْنِي وْلادَكْ

لَيْشْ مُشْ قِنْعَانْ؟!

عَايِشْ بْقَلْبِي.. وْقَلْبَكْ بْلُبْنَانْ!

ـ2ـ

قِلْتِلّهَا: مَا خِنْتِكْ بْهَالْعُمرْ

وْلاَ نْسِيتْ أَتْعَابِكْ

تْحِمَّلْتْ فِيكِي الْقَهرْ

تَا وْفِيتِكْ عْذَابِكْ

وْيَا ما بْعَرَقْ جِسْمِي

عِطَّرْتْ إِجْرَيْكِي

لَمْلِمْلِكْ النِّعْمِه

تَا إِشْلَحَا عْلَيْكِي

جِيتِكْ أَنَا وِزْغِيرْ

وِنْسِيتْ تَا إِجْهَلْ

تْعِبِتْ فِيكِي كْتِيرْ

وِالْعُمرْ عم يِطْوَلْ..

وْوَيْنْ بَدِّي صِيرْ؟!

مَجْنُونْ عَمْ يِسْأَلْ!

**

غريبة

ـ1ـ

غَرِيبِه الْمَطَارِحْ غَرِيبِه

وْضِحْكَات الطُّفُولِه أَنِينْ

يَا شَمْسِ الْمَحَبِّه لا تْغِيبِي

ضَوِّي.. أَنَا لَيْلِي حَزِينْ

ـ2ـ

سَرْقِتْنِي الطُّرْقَات الطَّوِيلِه

وْرِمْيِتْنِي عَ بْوَاب بْوَابْ

يَا طْيُور الْمَسَافِه حْكِيلِي

لَيْش انْكَتَبْلِي الْعَذَابْ؟!

ـ3ـ

مِشْتَاقَه لِعْيُون الأَحِبَّه

لْضِحْكَاتُنْ بِلْيَالِي السَّهَرْ

تَا قِللُّو: يَا حُزْن تْخَبَّى

رَح يِرْجَع عَ بْلادِي.. الْقَمَرْ

**

تراب عم يمشي..

لقد اتضح لي، بما لا يقبل الشك، أن الشاعر المرحوم إيليا أبو شديد قد سبقني بسنوات إلى القول : تراب باقي تراب وتراب عم يمشي.. لذلك، واعترافاً بحقّه في الأولوية، أهدي إلى روحه الطاهرة هذه القصيدة:

ـ1ـ

مِتْلِ الصَّخِرْ بِتْكُونْ يَا إِنْسَانْ

وْمِتْلِ الْوَرَقْ بِتْصِيبَكْ الرَّعْشِه!

كلِّ الْخَلِيقَه الْـ خَالِقَا الدَّيَّانْ:

تْرَابْ رِجْعِ تْرَابْ.. وِتْرَابْ عَمْ يِمْشِي

ـ2ـ

خَافْ رَبَّكْ لا تْخَافْ النَّاسْ

شُو بْتِنْفَعَكْ هَـ الأُبَّهَه.. دَخْلَكْ

وْإِنْتْ لَوْ بِتْدُوقْ مِرّ الْكَاسْ

بِتْصِيرْ تِضْحَكْ عَ زِغِرْ عَقْلَكْ

ـ3ـ

تْيَابَكْ جْدِيدِه وْجِسْمَكْ مْوَسَّخْ

وْشَكْلَكْ حلُو مْنِ بْعِيدْ يَا إِنْسَانْ

محْتَال إِنْتْ.. وْعَقْلَكْ مْلَطَّخْ

بْإِشْيَا بَعدْ مَا بْيَعْرِفَا الشَّيْطَانْ!

ـ4ـ

لا تِرْكَع تْصَلِّي لإِله الْكَوْنْ

وْمِلْيَانْ قَلْبَكْ بِالْحِقدْ عَ النَّاسْ

وْظِلْمَكْ ـ إِذَا بْتِظْلُمْ ـ يَا رَبّ الْعَوْنْ

بْتِدْبَح طفل مِنْشَانْ تِشْرَبْ كَاسْ

ـ5ـ

مُشْ كل صَلا بِتْطَلّعَكْ لَفَوْقْ

حَتَّى وَلَوْ صِلَّيْتْ لَيْل نْهَارْ

وْشُو نَفْعَك تْصَلِّي بْقِلِّةْ ذَوْقْ

وِعْيُونْ عَمْ تِقْدَحْ لَهِيب وْنَارْ؟!

**

دنيي غريبه

ـ1ـ

غَرِيبْ.. وْضَايِع بْدِنْيِي غَرِيبِه

مَلاَنِه هَمّْ

مَلاَمِحْ وِجّهَا الأَسْمَرْ كَئِيبِه

بِـ لَوْنْ الدَّمّْ

سَمَاهَا بْتِرْعُد.. وْغَيْمَا.. عَجِيبِه

بِيشَتِّي سَمّْ!

وْكِل مَا تْمِدّْ إِيدَيْهَا الرَّهِيبِه

وْتِفْتَحْ تِمّْ

بْيِكْتَرْ شَعِبْهَا.. بَسّ الِمْصِيبِه

مَا عِنْدُو أُمّْ!

ـ2ـ

وْإِذَا حِمْلَكْ عَ هَـ الدِّنْيِي شِي زَوْرَقْ

بِـ دُونْ شْرَاعْ

وْشِفْت الأَرْضْ فِسْتَانَا مْخَزَّقْ

عَ شَكْل ضْيَاعْ

فِيهَا الفَقرْ وِالصَّدْر الِمْعَبَّقْ

وْكِلْ مِينْ جَاعْ

عَنِ الطُّرْقَاتْ حَوِّشْ غُمرْ زَنْبَقْ

وْعَ صَخْرَه رْكَاعْ

وْقُولْ: الزَّهرْ لِلْمِتْلِي تْحَرَّقْ

عَ عِمْرُو الْـ ضَاعْ

وْكَرَامِةْ وَهمْ مِتْكَبَّرْ.. مْزَوْزَقْ

حَيَاتُو بَاعْ!

ـ3ـ

دِنْيِي.. شَمسْهَا انْطَفْيِتْ بْإِيدِي

وْقَمَرْهَا غَابْ

حْصَدْت الضَّيْمْ كِرْمَالاَ حَصِيدِه

وْغَزَلْتُو تْيَابْ

وْعَصَرْت الْيَأسْ بِدْمُوعِي الْعَنِيدِه

وْسَكَبْتُو شْرَابْ

وْغَسَلْت الْحُزنْ بِبْحُورِي السَّعِيدِه

وْفَتَحْت بْوَابْ

وْنَفَضْت غْبَارْهَا وْصَارِت جْدِيدِه

بَلاَ أَتْعَابْ!

**

رجال القوافل

ـ1ـ

رْجَال الْقَوَافِلْ عَجّلُوا بِالسَّيْرْ

وْتَرْكُوا رْبُوع الأَرْزْ زِعْلانِه

زَرْعُوا الْمَوَاسِمْ.. وِالْمَوَاسِمْ خَيْرْ

وْنَصْبُوا خْيَامُنْ بِـ وَطَنْ تَانِي

زِعل النِّدِي وِانْبَح صَوت الطَّيْرْ

وْتِكْيِت غْصُون الْحَوْر دِبْلانِه!

ـ2ـ

وِاللِّي هَجَرْ بَكِّيرْ

صَعبْ تَا يِرْجَعْ

هِرْبَانْ مِنْ تِهْجِيرْ

بِـ قُوّة الْمَدْفَعْ

مْنِ سْيَاسْة حْزَازِيرْ

مِنْ ظُلم أَوْسَعْ

مِنْ تِمّ بَحْر كْبِيرْ

أَطْفَالْ عَمْ يِبْلَعْ!

ـ3ـ

أَطْفَالْ مِتل الزَّهر مِرْمِيِّه

عَ حَفِّة خْنَادِقْ حَفَرْهَا الظّلمْ

وِعْيُونُن الْـ بِاللَّيْل مضْوِيِّه

عَ فَجر سَاطِعْ.. عَ بَقَايَا حلْمْ

انْطَفْيِتْ.. وْصَارِتْ أَلْفْ خَبْرِيِّه

عَنْ أَرْضْ مشْتَاقَه لْطَعْم السِّلْمْ

ـ4ـ

وِاللِّي بِيعِيشْ الْغَدرْ

مُشْ عَيْبْ لَوْ يِرْحَلْ

وْيِدْعَسْ بِـ بَطْن الْبَحرْ

وِالْهَجرْ يِتْحَمَّلْ

صَعْبِه اللِّي دَاق الْغَدرْ

بِالْحَقّ يِتْأَمَّلْ

وْيِحْلَمْ بِـ فَرْشِةْ زَهرْ

عَ بْسَاطْ مِن مُخْمَلْ!

ـ5ـ

لَكِنْ إِذَا مْنِتْذَكَّر الأَيَّامْ

الْـ كانِتْ قَبلْ مَا الْحرْبْ تِتْفَجَّرْ

كِيفْ كِنَّا نْسَابِق الأَحْلامْ

وْعَ مْلُوك الْكَوْنْ نِتْكَبَّرْ

مِنْقُولْ: فَرْحِتْنَا وَقتْ مَا نْنَامْ

تَحتْ فَيِّةْ أَرزنا الأَخْضَرْ

ـ6ـ

وْنِطْوِي كْتَابْ الأَمْسْ

وْنِبْنِي سَعَادِتْنَا

الْعُرسْ مَنُّو عُرسْ

مِنْ دُونْ سَكْرِتْنَا

نِحْنَا الْـ عَطَيْنَا الشَّمْسْ

مِنْ نُورْ بَهْجِتْنَا

مَا مْنِرْضَى الْيَأسْ

يِلْعَبْ بِـ عِيشِتْنَا!

**

صوتي مبحوح

ـ1ـ

صَوْتِي مَبْحُوح وْحنْجِرْتِي

نِشْفِتْ مِنْ هَبَّات غْبَارِكْ

وِالْغِنِّيِّه الْـ كانِتْ إِنْتِي

انْدَبْحِتْ وِانْشَلْحِتْ عَ حْجَارِكْ

ردِّي الْغِنِّيِّه يَا بْلادِي

وِالضِّحْكِه لِشْفَاف زْغَارِكْ

ردِّيلِي عِزِّي وْأَمْجَادِي

تَا ضَوِّي النّجْم مْقَابِيلِكْ

صَوتِي مَبْحُوح.. وْعَمْ إِحْلَمْ

إِرْجَعْ يَا بْلادِي إِتْعَلَّمْ

دَوْزِن الْعُود وْغَنِّيلِكْ:

"يَا غْزَيِّلْ يَا بُو الْهِبَا

يَا هَاوِي يَا مْعَذِّبَا

يَلْلاَّ نِرْجَعْ عَ بْلادِي

وِنْرَجِّعْ عَهْد الصِّبَا

ـ2ـ

يَا غْزَيِّلْ قللُّو وْقللُّو:

عَلَم الأرْزِه مِنْجِلُّو

وْبَاقِيلْنَا لُبْنَانْ كِلُّو

مْنِ السَّاحِلْ حَتَّى الرُّبَى

ـ3ـ

يَا غْزَيِّلْ بِـ غُرْبِتْنَا

مَا نْسِينَاهَا لْضَيْعِتْنَا

بَشِّرْهَا بِـ رَجْعِتْنَا

قَبْل الشَّمْس الْغَارِبَه

ـ4ـ

يَا غْزَيِّلْ شُو مَا صَابَا

نِحْنَا نِحْنَا أَحْبَابَا

وْمَجْبُولِين مْنِ تْرَابَا

هَاك الأرضْ الطَّيِّبَه"

ـ5ـ

صَوْتِي مَبْحُوح.. وْكِرْمَالِكْ

رَحْ إِغْزُلْ مِنْ "أُوفِي" شَالِكْ

وْإِفْرَحْ لَمَّا نَايِي يِبْكِي

وِيْنَزِّلْ دَمْعَاتُو قْبَالِكْ

شُو بَدِّي إِحْكِي تَا إِحْكِي

عَمْ جَرِّبْ مِنْ صَخْر جْبَالِكْ

وْمِنْ قُوِّةْ إِيمَان رْجَالِكْ

إِسْرُقْ يَا بْلادِي مُوَّالِكْ:

"قَالُولي: الْمَالْ.. قِلْتِلُّنْ: مَا بَدِّي

بَدِّي الْمَجْدْ شَامِيِّه عَ خَدِّي

أَنَا مْنِ بْلادْ أَرْزَاتَا جَوَاهِرْ

وْتُرَابَا تِبِرْ عَمْ يِلْمَعْ بِـ يَدِّي"

ـ6ـ

صَوتِي مَبْحُوح.. وْآمَالِي

إِمْحِي بِالنَّغْمِه لَيَالِي

وْرَنْدِحْ شْوَيِّةْ قِرَّادِي

عَمْ تِكْبَرْ وِتْعِيش بْبَالِي

حَابِبْ غَنِّيلِك يَا بْلادِي

وْخَايِفْ مِنْ حَالِي عَ حَالِي:

"ردِّي يَا بْلادِي ردِّي

الضَّرْبَات كْتَارْ

يَا نبْع الْجَارِي حَدِّي

وْقَلْبِي عَ نَارْ

ـ7ـ

مَهْمَا صَابِكْ لا تْقُولِي

نِسْيُوا الأيَّامْ

وْنِسْيُوا عَهد الطّفُولِه

بْغُرْبِةْ أَحْلاَمْ

الرُّوح بْحُبِّكْ مَجْبُولِه

مْنِ الصَّعْب نْنَامْ

وْعَمّ نْشُوفِكْ مَقْتُولِه

بْإِيدَيْنْ الْعَارْ.."

ـ8ـ

صَوْتِي مَبْحُوح.. وْإِيمَانِي

فِيكِي يَا بْلادِي خَلاَّنِي

إِرْفَع الصَّوْت وْغَنِّيلِكْ

رَحْ إِزْرَعْ إِسْمِكْ عَ شْفَافِي

وْإِحْملْ صَلِيبِكْ عَ كْتَافِي

وْإِطْفِي بِالدَّمْعَه غَلِيلِكْ

بَرْكِي يَا بْلادِي الْحَنُونِه

بْصَوْتِي وِبْدَمْعَات عْيُونِي

بْرِدِّلِّكْ نِتْفِه مْنِ جْمِيلِكْ..

**

كمشتين فلوس

ـ1ـ

لا تْمُوتْ هَونْ بْغربتَكْ لا تْمُوتْ

وْتِتْرُك تْرَابَكْ يِلْعَنَكْ بِالْقَبْرْ

رُوحْ قَضِّي عُمْرَك بْبَيْرُوتْ

وْنَفِّض جْنَاحَكْ مِنِ غْبَارْ الْقَهْرْ

ـ2ـ

بْتِبْقَى غَرِيب بْغُربتَك يَا صَاحْ

حَتَّى وَلَوْ مِلْيَانْ بَيْتَكْ بِالْخَدَمْ

يَلّلا سَوَا نِتْعَمْشَق بْكَمْشِة رْيَاحْ

وْنِرْجَع عَلَى لُبْنَانْ.. عَ أَرْض الشَّمَمْ

ـ3ـ

يَللاّ سَوَا نِطْرُد غَريب الدَّارْ

الْـ وَلَّعْ بِـ قَلْب الدَّارْ حقد وْنَارْ

الْـ خَلاَّ السَّمَا تِسْوَدّ بِسْمُومُو

وْخَلاَّ بكِذْبُو الْجَارْ يِدْبَحْ جَارْ

ـ4ـ

نِحْنَا اللّي كِنَّا عَايْشِينْ بْعِزّْ

نِتْغَنْدَر وْنِمْشِي مِتِلْ طَاوُوسْ

غْدَرْنَا بْبَلَدْنَا وِبْشُموخ الأَرْزْ

وْبِعْنَا الْكَرَامِه بْكَمِشْتَيْنْ فْلُوسْ

ـ5ـ

عَمْ نِرْكُض نْجَمِّعْ بِـ غُرْبِتْنَا سَرَابْ

وْنِفْنِي الْعُمر وِنْضَيّعو بِالْوَهْمْ

وولادْنَا الْـ ناسيينْهُنْ خَلف الِبْوَابْ

عَمْ يِكْبَرُوا وْبِقْلُوبْهُنْ شِلاَّلْ سَمّْ

**

قدموس

ـ1ـ

.. وْبِتْضَلّْ يَا قدْمُوسْ

يَا سَيِّد الأَسْيَادْ

حِبْر وْقَلَمْ وِدْرُوسْ

وْدَفتريَن جْدَادْ

ـ2ـ

يَا مْعَلِّم الأَجْيَالْ

بِكْتَابَكْ قْرِينَا

كِيفْ هَـ الأَطْفَالْ

مِنْوَسِّع جْبِينَا

ـ3ـ

الْيَوْمْ صِرْنَا كْتَارْ

وْكِنْتْ وَحْدَكْ بَسّْ

تِكْتُبْ عَ ضَوِّ النَّارْ

وِتْشِعّ مِتل الشَّمْسْ

ـ4ـ

وْمَرْكَبَكْ لِلْيَوْمْ

بَعْدُو بْعِينَيْنَا

لا تْخَافْ نِحْنَا النَّوْمْ

مَا بْيِقْدر عْلَيْنَا

ـ5ـ

بْعِيدَك.. يا رَبّ الْحَرْفْ

عم زيدْ إِيمانِي

تَا أُوصْفُو.. مْنِ الْوَصفْ

رَحْ يِتْعَب لْسَانِي

ـ6ـ

تْلامِيذ مِتل الزَّهر

عَمْ يرقصوا بْعِيدَك

سِكْرُوا.. وْكان السّكرْ

مِنْ رِيحة نْبِيدَكْ

ـ7ـ

شُو بْخَبِّرُنْ عَنَّكْ

يَا بدر مَا لُو غْيَابْ؟!

رَحْ فَهِّمُنْ إِنَّكْ

مَيِّتْ إِلَكْ أَجْيَالْ

وْبَعْدَكْ مَا صِرْت تْرَابْ!

**

جنون

ـ1ـ

جْنُونِي أَقْوَى مْنِ جْنُونُنْ

جْنُونِي أَقْوَى مْنِ جْنُونُنْ

كِل مَا جَنُّوا.. بْجِنّ زْيَادِه

وْكل مَا رَاقُوا.. مِتْل الْعَادِه

بْشُوف الدَّمْعَه بِعْيُونُنْ

ـ2ـ

جَمْعِتْنَا الصّدْفِه الْمَلْعُونِه

بْدِنْيِي.. مَا اعْتَرْفِتْ بِفْنُونِي

أَشْعَارِي.. قَالِت: لِلنَّارْ

وْأَفْكَارِي.. ملاَّ أَفْكَارْ

وْتَا حَتَّى إِتْرُكْ تِذْكَارْ

جِنَّيْت وْخزَّقْت تْيَابِي

وْصرْت إِتْزَحْلَق عَ رْكَابِي

انْبِسْطُوا كلُّنْ وْهَنُّونِي

بْعَنْتَرِيَّاتِي الْمَجْنُونِه!

ـ3ـ

عَاشَرْتُنْ.. تَارِي عَ الْعِشْرِه

النَّفْسِيِّه بْتِتْغَيَّرْ دِغْرِي

وْمَا بْيِنْفَعْنِي مَهْمَا صْرَخْتْ

وْمَهْمَا بْرَمْت.. وْمَهْمَا دخْتْ

رَحْ إِبْقَى جُوَّات بْلادُنْ

وِوْلادِي عَ شكل وْلادُنْ!

ـ4ـ

وْهَاكْ الْمَاضِي الْـ بَعْدُو مْعَلَّقْ

عَ مَشْنِقْة الْحلم الأَزْرَقْ

فرَّخْ قَبْلِي زْرَار زْرَار

وْبَعْدِي نَاطِرْ مَا فرَّخْتْ

وْمِتل الْـ عَامل قَبْرُو تَخْتْ

نِمتْ.. وْمُشْ حَاسِسْ بِنْهَارْ!

**

زهر أسود

ـ1ـ

.. وْعَمِ تْهَنُّونِي

بْأَحْلامْ ضَاعِتْ قبل ما تُولَدْ

وْهَرْبِتْ مِنِ خْيَالِي وْمِنِ جْنُونِي

وْزَرْعِتْ وَهِمْ مَجْنُونْ بِعْيُونِي

فَرَّخْ زَهرْ أَسْوَدْ؟!

ـ2ـ

دْمُوعْ عَمْ تِكْرُجْ وَرَاهَا دْمُوعْ

وْمَا عِدْتْ أَعْرِفْ نَامْ

أُمِّي تْغَنِّيلِي:

"نَامْ يَا طَير الْحَمَامْ"

وْتِبْكِي مْقَابيلِي

وْشُوفْ بِعْيُونَا لَهِيبْ شْمُوعْ

ـ3ـ

حوَّشْتْ نَارْ وْنُورْ مِنْ عُمْرِي

وْوِزَّعتْ بَاقاتْ الزَّهر عَ النَّاسْ

النَّاسْ خَانُوا وْيَبَّسُوا زَهْرِي

هَالْـ كنتْ حَاسِب صَعب إِنُّو يْبَاسْ

تَارِي اللِّي عاش الْغدرْ

بْيِدْبَحْ بـِ ضِفْرُو.. الزَّهرْ!

ـ4ـ

يَا سَامْعِينْ الصَّوْتْ لا تْخَافُوا

صَوْتِي صَدَى حْكَاياتْ

وْيَامَا عَلَى شْفَافِي

نِيَّمْتْ غِنِّيَّاتْ

وْصِرْتْ غَنِّيهَا أَنا وْغَافِي

وِالحلم حامِلْنِي عَلَى كْتَافُو

وْلِمِّنْ فِقِتْ حِسَّيْتْ حلْمي ماتْ

مِنّو لَحالُو.. وْمَا حَدَا شَافُو!

**

وداع شاعر

ـ1ـ

حفْلِة وِدَاعْ؟!.. وْلَيْشْ حَتَّى نْوَدِّعَكْ

وْنِلْقِي الْقَصَايِدْ وِالْخُطَبْ عَ مَسْمَعَك

وْنِحْنَا إِذَا مْنِقْرَا قَصِيدِه كْتَبِتْهَا

عَنْ أَهْلَك.. وْعَنْ أَرْضَكْ الْـ حِبَّيْتْهَا

مَهْمَا بْعِدِتْ.. مِنْطِيرْ تَا نْصَفِّي مَعَكْ؟!

ـ2ـ

إِنْتْ شَاعِرْ.. وِالذِّكَا مِنْ مَقْلَعَكْ

وِالْقَوَافِي بْتِرْتِوِي مِنْ مَنْبَعَكْ

يِعْنِي.. إِذَا غِنَّيْتْ بِتْخَلِّي الدِّنِي

تِرْقُصْ، وْقِدَّامْ شِعْرَكْ تِنْحِنِي

وِمِتْلِ الْخيَالْ تْصِيرْ تِمْشِي وْتِتْبَعَكْ

ـ3ـ

لَمَّا الْقَدَرْ فَجَّرْ حَنَايَا مَدْمَعَكْ

وْصَفَّى بضَرْبَاتُو الْقَوِيِّه يْوَجِّعَكْ

الْتَفُّوا حبَايِبْ قَلْبَكْ وْخَبُّوكْ

بِقْلُوبُنْ.. وْمِنْ كِتِرْ مَا حَبُّوكْ

وقْفُوا مَعَكْ.. ضدّ اللِّي بَدُّو يْرَكِّعَكْ

ـ4ـ

مِنْحِبَّكْ.. وْمِنْ هَيْكْ عَمَّا نِقْشَعَكْ

بْأَحْلامْنَا الْـ بِعْيُونْنَا عَمْ تِزْرَعَكْ

إِنْت الْوَفَا.. إِنْت الصّدق وِالْحُبّْ

وْعِنْدَكْ شَهَامِه شَامْخَه بِالْقَلبْ

عَ كِلّ أَبْنَاء الْبَشَرْ عَمْ تِرْفَعَكْ

ـ5ـ

مَخْجُول حَتَّى هَـ الْقَصِيدِه سَمّعَكْ

وْكِلّ القَصَايِدْ رَاكْعَه عَ مَرْكَعَكْ

لكِنْ.. قَبل ما تْعُودْ عَ أرض الْوَطَنْ

هَـ الأَرْض يَللِّي تْلاعَبِتْ فِيهَا الْفِتَنْ

حَابِبْ تَا قِلَّكْ بَسّ: أَللّـه يْكُونْ مَعَكْ.

**

جايِي

ـ1ـ

جَايِي إِنِتْ جَايِي

يَا مَرْكَب الْبِدَايِه

مِنْ أَحْلام وْلادْ

خِلْقُوا بْقَلْب حْكَايِه

مَا بْتَعْرِفْ نِهَايِه

تَا يْعِيشُوا بِبْلادْ

مْرَاجِيحَا بِالْعَالِي

وِنْجُومَا دَوَالِي

وِسْنِينَا أَعْيَادْ

ـ2ـ

جَايِي مِتْلِ الْمَارِدْ

وِالْكَوْن قْبَالَكْ سَاجِدْ

وِالزَّلْغُوطَه بْدِينَيْكْ

وِالنِّجْمِه الْـ مَا بْتُوعَى

عَبِّتْ جَرَّه مْنِ دْمُوعَا

تَا تْغَسِّلَّكْ إِجْرَيْكْ

يَا لْـ كِنْت الدِّنْيِي كِلاَّ

جَايِي.. وِبْقُوِّةْ أَللَّـه

حُب وْهَنَا بْعِينَيْكْ

ـ3ـ

جَايِي مْنِ الْحَرَايِقْ

نُور وعُطر وْزَنَابِقْ

وِجْبِينَكْ مِتل التَّلْجْ

وْضِحْكَات الطُّفُولِه

اللِّي مْصَادرَه وْمَقْتُولِه

صَارِتْ وِسْع الْمَرْجْ

وِالرَّايِه الْمِنْهَانِه

يَا وَطَنِي اللّبْنَانِي

مَرْفُوعَه بْأَعْلَى بُرْجْ

ـ4ـ

شُو بْتِنْفَع الطَّوَايِفْ

وِالْخَالِقْ مِنْهَا خَايِفْ

لَو تِرْكَع وْتِتْعَبَّدْ؟!

وْشُو بْتِنْفَع السَّعَادِه

بِالصَّلاَ وِالْعِبَادِه

وْشَعْبَكْ عَمْ يِتْشَرَّدْ؟!

وْعِدْنِي بْحَقّ طْفَالَكْ

وِبْصَلِيبَكْ وِهْلالَكْ

تِبْقَى حُرّ مْوَحَّدْ

تَا تْزَلْغِط لْيَالِينَا

وْتِرْجَع إنت فِينَا

يَا وَطَنِي تِتْمَجَّدْ..

**

تركوني إفرح..

ـ1ـ

لأَولْ مَرَّه مِنْ سِنْتَيْنْ

عَمْ حِسّ بْطَعْم الْفَرْحَه

صَابِتْنِي الدِّنْيِي بِالْعَيْنْ

جَرْحِتْنِي.. وْرِجْعِتْ مِنْ شَهرْ

غَمْرِتْنِي.. وْدَاوِتْ جرْحَا

ـ2ـ

تْركُونِي إِفْرَحْ يَا نَاسْ

وْإِمْسَحْ عَنْ خَدِّي الدَّمْعَه

لَوْ بِتْدُوقُوا مرّ الْكَاسْ

اللِّي شْرِبْتُو بْعَتم الأيَّامْ

بْتِخْتِصْرُوا الْعمر بْجمْعَه!

ـ3ـ

يَا مِينْ يْرَكِّبْلِي جْنَاحْ

وِيْطَيّرْنِي بِالْعَالِي

بَدِّي إِتْغَلَّبْ عَ رْيَاحْ

نَفْخِتْلِي بْعِينَيِّي غْبَارْ

وْرِمْيِتْنِي بْأَصْعَبْ حَالِه!

ـ4ـ

وْيَا مِينْ يْغَنِّيلِي صَوْتْ

وِيْدِقِّلِّي مُوسِيقَى

فَالِتْ مِنْ إِيدَيْن الْمَوْتْ

وْعَمْ إِتْشَلْقَحْ تَحْت الشَّمْسْ

وْمُصّ النُّور مْنِ عْرُوقَا!

ـ5ـ

شَامِخْ.. مَعْ إِنِّي إِنْسَانْ

مَا بْيُؤْمِنْ بِطْلُوعْ الضَّوّْ

حَارَبْت الْحُقْد بْإِيمَانْ

سْرَقْتُو مِنْ بَخُّورْ الدَّيْرْ

وِحْرَقْتُو.. وْعِطَّرْت الْجَوّْ!

ـ6ـ

هَنُّونِي.. هَنُّوا الْمَظْلُومْ

الْـ مَا بْعمْرُو دَاق الرَّحْمِه

رِجْعِتْ تِتْجَمَّعْ الِغْيُومْ

وِتْبَشِّرْ بِمْوَاسِمْ خَيْرْ

وْتِسْكُبْ عَ الأَرْض النِّعْمِه!

**

طلة الغايب

بْطَلِّة الْغَايِبْ.. فِرْحِت السَّهْرَه

وْسِكْر الْوَتَرْ.. ما أَجْمَل السَّكْرَه

رَقَّص الأَرْزِه النَّاطْرَه بِالْجُرْد

رَجْعِةْ حَبَايِبْ طَوّلُوا السَّفْرَه

وْلُبْنان.. يَللِّي ما بْيَعْرِف حقْدْ

قَتْلُوا طْفَالُو وْشَوّهُوا الذّكْرَى

شَعْبِي أَنا.. رَحْ حَلّفُوا بِالْمَجْدْ

بِالأَرْز.. بِالدَّمَّاتْ.. وِبْصنِّينْ

يْوَحِّدْ صُفُوفُو الْيَوْم.. مُشْ بُكْرَا

ـ3ـ

تْرَكْنا الأَهْل بِبْلادْنا سْوِيِّه

أَحْباب صَفُّوا الْيَوْم خَبْرِيِّه

لا عْيُون فِيها تِقْشَعُن وِتْقُولْ:

بَلَّل صُورْكُن دَمْع عِينَيِّي

ما فِي بَسطْ مِن بَعدْكُن مَقْبُولْ

وْلا فِي مُوسيقَى تْأَثِّر عْلَيِّي

نِير الأَسَى عَمْ جَرْجرُو عَ طُولْ

طْلُوع الْفَجْر بِبْكِي عَلَى لُبْنانْ

وْعِند الْمَسَا بِبْكِي عَلَى خَيِّي

**

كيف انطوى عمري؟

خمسون الشاعر، 10 شباط 2001

ـ1ـ

عَمْ تِرْكُض الأَيَّامْ

روزْنامْتِي تِعْبِتْ

وْتِعْبِتْ مَعَا أَوْهامْ

بِـ غُربْتِي لِعْبتْ

يا رَيْت فِيِّي نامْ

وِالنَّوْم يِنْسانِي

بِـ أَرْض عِطْشَانِه

لِدْمُوعْ عِينَيِّي

تا حَبِّبَا فِيِّي

وْغَنِّيلْهَا غْنانِي

ما سِمْعِتَا الأَحْلامْ

ـ2ـ

طُولِي.. شُو نَفْع الطُّولْ

وِالْعُرْض رِيشِةْ طَيْر؟!

جِسْمِي.. هَوَا مَحْمُولْ

وْضجْرانْ مِنِّي السَّيْرْ

وَقّفُوا السَّاعاتْ

فِزْعانْ إِنِّي شِيبْ

وْتِتْبَهْدَلْ الشَّعْراتْ

اللّي مْعَوّدِه التِّرْتِيبْ

كِيفْ انْطَوَى عُمْرِي

وْما قْدِرْت طالْ الْبَدْر؟

الْبَدْر رَحْ بِيغِيبْ

نْطُورْ يا بَدْرِي

تا وَدّعَكْ بِالشِّعْرْ

ـ3ـ

عْيُونِي.. جْرار الْوَيْلْ

وِبْكَحِّل عْيُونِي

خايِفْ صَهيلْ اللّيْلْ

ما يِعْلُن جْنُونِي

كل ما فْتَحتْ دَيِّي

بِتْلِمّ غَبْرِة ناسْ

عَمْ يِضْحَكُوا عْلَيِّي

بْقَلْبُنْ حقْد يُوضاسْ

بِالْبَحْر رِمْيُونِي

وِالْمَوْجْ ضَهْر الْخَيْلْ

خِيَّلْت عَ ظْنُونِي

وْمَقْطُوعْ مِنِّي الْحَيْلْ

ـ4ـ

غَيّرُوا إِسْمِي

وِالشَّكْل وِالْعِنْوانْ

عُمْرِي أَنا نَسْمِه

مْنِ صَرْخِتَا فِزْعانْ

لَوْ تِنْتِهِي دْرُوبِي

بِتْمُوتْ مَشْياتِي!

وْلَوْ تِنْمَحَا ذْنُوبِي

بِتْعِيشْ حَكْياتِي!

دْرُوبِي تَعَبْ إِنْسَانْ

ذْنُوبِي فَرَحْ شَيْطانْ

ما بْتِعجْبُو حْياتِي!

ـ5ـ

كلّ ما الشّمسْ تِطْلَعْ

عَمْ يِنْطِفِي نُورِي

يا عُمْر لا تِسْرَعْ

ما فَتَّحُوا زْهُوري

بَعْدُو الْبُرْعُمْ طِفْلْ

مِنْ دُونْ بَيْت.. وْأَهْلْ

مَصْمَصْ عْرُوقُو النَّحْلْ

تا يِبْسِتْ جْذُورِي

وْيا طْيُور الْفَجْرْ

زُورِي الطِّفلْ زُوري

وْلا تِفْتَحِي تِمِّكْ

وِتْفَلْفِشي هَمِّكْ

هَمِّكْ.. جْنُونْ الْهَجْرْ

وْخايِف عَلَى طْيُورِي

ـ6ـ

عَمْ يِنْدَهْ التَّابُوتْ

عَ الزَّهْر الِمْزَوْزَقْ

سْكُوتْ.. قِلْت: سْكُوتْ

ما زالْ بَدِّي مُوتْ

لَيْش تا إِخْلَقْ؟

لَيْشْ.. قِللِّي: لَيْشْ

تَا إِكْبَرْ وْإِعْتَقْ؟

وْكِذْبِه كْبِيرِه الْعَيْشْ

مْنِسْتَقِبْلُو بْزَنْبَقْ..

وْمِنْوَدّعُو بْزَنْبَقْ!

**

يتيمة

عمرها سبع سنوات لا غير، ومع ذلك أجبروها على بيع الحلوى ليلاً ونهاراً، فما كان منها، بعد أن أعياها التعب والسهر، إلا أن أسندت رأسها على "صدر الحلويات" وغطت بنوم عميق.

ـ1ـ

يا تقبريني.. السحر بجفونك

وصدر الحلو.. مَنّو حلو بدونِك

صرمايتك بشوارب الحكّام

يا زْغيرتي.. كيف الدّني بتنام

وربّ السّما ساكتْ عنْ الاجرام

تا هَيْك إنتي تْغمّضي عيونك

ـ2ـ

وين تختِكْ.. وينْ فرْشِه مْلوّنه

بْلون العيُون الْـ منْ وسخْنا مْسَوْدَنِه

صار الرّصيف فْراشْ، قدّامْ البشرْ

بيصّوروكي، بيكتبوا عنّك خبرْ

لكنْ إيدَيْهُنْ يابْسِه وِمْعَوْدَنِه

ما انمدّتْ.. ولا خلّصوكي من القدرْ

ـ3ـ

وين إنتي وينْ.. تا ضمّكْ

تا شَبّعِكْ من عاطفِةْ إِمّكْ

تا كون بَيّك.. غَنّجِكْ، قلّكْ:

جوّاتْ قلبي فارش مْحَلّكْ

نامي، يا روحي، وْطَيّري هَمِّكْ

وحوش الخليقَه طامعَه بْدَمِّكْ

**

تعبان

ـ1ـ

تِعْبِتْ عُيوني منْ جنون الاغتراب

ودبل الحكي بَكّير

مدري الزمن سكّر بِوجّي البابْ

مدْري القدرْ شالِحْ عَ كِتْفي النير

سنين العمر سرحت متل مزرابْ

مَيّي بالِعْها بيرْ

والبير جُرن زْغيرْ

حَدّو قَلْم وكْتابْ

ـ2ـ

ما عادْ عندي حَيْلْ

تا إغلُبْ النَّطْرَه

سامعْ صَهيل الخيلْ

جايي متل ذكرى

بتمرُقْ عَ وجّ الليل

تا تِنْمِحي بُكرا

ـ3ـ

تِعْبان ماشي والهموم تْقالْ

والرّيح عَمْ بِتْشَقلبْ سْنيني

السّرْساب صيَّرْني شبه رِجّالْ

مهموم راسي ومحترِق دِيني

لا بْلادْ تِنْدَهني.. ولا أطفالْ

لا زنود تغمرني.. تْدَفِّيني

عايش وحيد وفوق ضَهْري حْمالْ

من غربتي، يا ربّ، نجّيني

**

غبار السفر

ـ1ـ

غْبار السَّفرْ علْقانْ بِتْيابي

بْيِكْتَر لَحالو.. خَزَّق جْيابي

لَوْنُو بلَوْن الْعَتمْ والشِّحْوارْ

أَسْوَد بيخَوِّف.. جَنّ منّو كْتارْ

وْكيفْ بَدُّو يْطلّ صَوبي نْهارْ

وْكلّ العُمر أحْلام كِذّابِه

ـ2ـ

غْبارْ.. ما بْيِرْحَم بِكي الْمشْتاقْ

لِحْجارْ بَيْت زْغيرْ.. صاروا عْتاقْ

هَوْنيكْ بِـ ضَيْعَه عَ كِتْف الرِّيحْ

بَيْنا وْبَيْن الشَّمْس رَسْمتْ زيحْ

وْعَ الزِّيحْ نَصْبِتْ كَوْمة مْراجيح

تا تْمَرْجح الأشْعارْ والأشْواق

ـ3ـ

بَعْدا متلْ ما تْركِتْها مْن زْمانْ

حبّ وْضِيافِه.. وْتَضْحيه وإيمانْ

وْجيرانْ مِن ضِحْكاتُن بْيشْرُق قَمَرْ

كلْمةْ يا أَهْلا اسْتَقْبَلِتْ كلّ الْبَشَرْ

وْرَغْم الْبُغضْ والْحرْب وجْنون الْخَطَرْ

الْجِيرانْ بِقْيُوا.. تا بِقِي لُبنان

ـ4ـ

كيف بَدّي حَقِّقْ رْجُوعي

وْطَيرْ الأمَلْ غرْقان بِدْمُوعي

الإيدَيْن عَم بِتْلَوِّح بْمَنْديلْ

صرْلُو زَمَنْ بيرَدِّدْ مْواويل:

جُوعْ الْوَطَنْ مِتل الْهُموم تْقيلْ

ولُبْنانْ مُشْ عَمْ يِشْعُرْ بْجُوعي

**

اشتقنا

ـ1ـ

موجات البحر بْتطوينا

وبِتشلّع كل مْفارقنا

بْتشلحنا دمعه ع المينا

جْنون النطره عم يحرقنا

يا بْلادي اللي بتحبّينا

لا تخلّي الغربه تخنقنا

إنتي فينا.. ضلّي فينا

وحياة الأرزات.. اشْتقنا

ـ2ـ

اشتقنا للراحوا وتركونا

وكانوا الدبكه والدلعونا

وشمس الضحكه العم بتزهّر

"فوق غصنك يا ليمونَه"

من جنوني أبيات بعمِّر

تا الغربه تخفّفلي جْنونا

مراية عمري عم بتكسِّر

فيها وجوه اللي حبّونا

ـ3ـ

اشتقنا والله.. اشتقنا عْليكي

يا ضيعه.. مدّي إيديكي

حنّي علينا.. ولا تنسينا 

خبينا بزرقة عينيكي

كبرنا فيكي.. لا تجافينا

كلما بعدنا.. مْنرجع لَيْكي

الغربه مهما عتقوا سْنينا

ما منسى غبرة إجْريكي

ـ4ـ

الذكريات الحلوه بتمرُق

وما بفكّر إنّي عايشها

متل الزيبق.. لمّا بتدلُق

ضحكتها.. مين بيكمشها؟ 

عارف إيامي عم إحرُق

وعيوني.. القهر مْطمَّشها

وعارف شمسي مش رح تشرُق

وجودي بالغربه.. غاششها

**

دمعي

ـ1ـ

لو كان دمعي حكي

ما دقتْ طعم البكي

لكن دموعي سراب

بتكرُج ملبّكه

وع الخدّ في بوّاب

بيخسر المعركه

بيفتحلها الأبواب

بتعلن شريعة غاب

بتسقط المملكه

ـ2ـ

لو كان دمعي حجر

ما ضربت فيه البشر

كان الحجر بيصير

عمران وسع النظر

تا ينام طفل زغير

حامل عَ كتفو السهر

وتا إشطب التعتير

من قلب أم انقهر

ببني شي سور كبير

يوقف بوجّ القدر

ـ3ـ

لو كان دمعي حطبْ

شعّلت فيه الأدب

وعملت منّو سيف

بيشعّ منّو اللهبْ

ومحيت كلمة "حيف"

"يا حيف" مين الْـ كتبْ:

نحنا الـ حَمَيْنا الضيف

نحنا اللي صُنّا النّسَبْ

جمعنا الشتي بالصيف

وما قدرنا نجمع عرب

**

رسالة 

جندي لبناني شهيد

مهرجان دعم عائلات شهداء الجيش اللبناني 19/9/2014

ـ1ـ

من هون.. من عرسال

عم أكتب رْساله

للساكنه بْبالي

أمي الحنونه الـ دمعتا شلال

وبركتا رسمال

وقللاّ: يا عينيي

لا تفزعي عليي

الوديان تختي واللحاف جْبال

سهران ع بلادي

ع ضحكة وْلادي

وْحَدّي يا ماما رْجال..

البيموت.. ما بينقال عنّو مات

لدم الشهيد بتركع الكلمات

وبتزلغط الإمّات

لجنودنا الأبطال

ـ2ـ

بتتذكري يمّي

لمّا خسرت دمّي

بمخيّم البارد

كان الطقس بارد

والوحوش كتار

ألعن من التتار

ما عرفت مين تبرّع بدمّو

مسلم.. مسيحي.. ما حدا همّو

تا صار دمي شعب

عم يمشي بالشريان

تا صار دمّي قلب

وإسم القلب.. لبنان

ـ3ـ

يمّي.. إذا رح موت

بتزيّني البيوت

وبترفعي الأرزه

ع عتبة بْوابك

بموتي أنا.. اعتزي

ولا تبيّني مْصابك

رصاصه.. إذا بتفوت

بصدري أنا مش هم

همّي.. يا أحلى أم

ما تنجرح بيروت

ـ4ـ

لا تفزعي من الجوع

لو غاب جسر البيت

الـ ضوّى حياتو شموع

بيرشح تابوتو زيت

بالجيش..

ما في أم منهانه

بالجيش..

ما في عيال جوعانه

نحنا إذا مننصاب

في بضهرنا غيّاب

وفي شعب لبناني

ـ5ـ

وقبل ما ينهي رسالتو

ويطمّنا عن حالتو

دبحوا البطل!

مات البطل!

وتا يبوّسو.. نخّ الجبل

وانهز من كتر الزعل

ومن تم مَيْمه ساهره

تقرا الرساله الطاهره

سمعوا زْلاغيط.. الأمل

ـ5ـ

.. وتطلّعت صوب البحر

وعَ صوتها غطّى القهر

وصاحت: يا خيي الـ بالهجر

حزن اليتامى دم

مسّح دموع الأم

وغفيت ع عتبة باب

المكتوب بتشمّو

وجمله بحرف دمّو

هَـ الأحمر القاني:

"في بضهرنا غيّاب

وفي شعب لبناني"

**

أنا وبيّي

مهرجان دعم عائلات شهداء الجيش اللبناني 19/9/2014

ـ1ـ

بصرتك بنومي حامل شبيّه

وراكع تصلّي.. وعينك عليي

وبصوت يائس، منطفي ومبحوح

سألتك: شو بدّك.. قول يا بيي؟

وشوشتني: ليش الوطن مجروح

ومنكسّه أرزات دهريّه؟

وليش البطل عم ينتهي مدبوح؟

جيش الوطن نعمه إلهيه

خايف يا ابني ع البلاد تروح

وتضيع خلف غبار وهميّه

كتبلي قصيده تهد أعلى صروح

انبنيت كذب ع شطوط رمليه

لبنان بيتي.. مش سفينة نوح

تجمّع بشر.. تا يغدروا فيي

قلّن: ما بدّي أم وحده تنوح

ع وْلادها.. بلعبه سياسيه

ع طول عم شوف القبر مفتوح

أبطالْ عم يفدوا الوطنْ بالروح

تا يْرجّعوا الضحكه السماويه

ـ2ـ

وقّف يا بيي.. مطلبك بركان

وابنك غريب بعتمة الهجران

وْلِكْ كيف بدّي نفـّذو.. والعمر

رح ينتهي.. أو منتهي من زْمان

كتبت الشعر.. ما كان ينفع شعر

ما في ولا كلمه غلبت الشيطان

عنّا زعامه ملفلفه بالعهر

وعنّا شعب بمحبّتُن سكرانْ

عايش سنينو بالبكي والقهر

ورغم العذاب.. بعيشتو فرحان

من دون رئيس.. وطق يا هالقصر

والبرلمان متختخ.. وْخِربانْ

وجنودنا عم ينحروهن نحر

وما رفّ جفن فلان وفليتان

صارت دِما الأبطال ما لها سعر

والروس عم تنباع بالدكان

خنقوا وطن.. بدّو يماشي العصر

لا كهربا.. ولا ميّ للعطشان

والطائفيّه ناخرتهن نخر

نسيوا شو معنى الدين والايمان

بيت العباده عم يوزّع كفر

وعم يقتل الانسان بالانسان

ونحنا، يا بيي، هون صرنا الفخر

وتتلمذت بصفوفنا الأكوان

حكمنا الدني.. رشّوا علينا الزهر

وببلادنا بيتقاتلوا الجيران

رح قولها ع السطح.. تهدر هدر

لبنان بدّو رجال.. مش خصيان

أطخنْ شَنبْ.. ما عاد عندو شَعرْ

يا ريت مرّه.. بتحكم النسوان

ما قدرت إعلن ع الزعامه النصر

عايش وحيد.. بغربتي يئسان

متلي ومتلك.. شعبنا بالهجر

واللي بقي.. مظلوم أو طفران

بـ"روكوود"، يا بيي، حدّ منك قبر

تمنيّت لولا كان بالأوطان

قبري أنا.. يا مجدليا الصبر

سيدني حياتي.. وجنّة البلدان

ما بخونها.. ولا بطعنا بالضهر

بترخص لها الدمّات بالشريان

بيتين شعر حفرتهن بالصدر:

انْ ما كان عنّا جيش يحمي الأرض

وخلفو الشعب.. بالطول أو بالعرض

رح ضل إبكي ع الوطن لبنان

**

مغترب

طلب أن يأتوه بحفنة من تراب لبنان، كي تعطّر ترابه في القبر:

جمّع تيابو.. ضبّها وزعلان

يترك وطن أرزات.. عم يبكي دما

شياطين عم بتهجّر الانسان

ولعت جهنم فوق هالقطعة سما

نص الشعب مزروع وين ما كان

واللي بقي مظلوم.. هيك بينسمى

حامل معو ترابات من لبنان

وكاتب وصيه ان مات بالهجران

تنزل معو بالقبر.. تا يشم الحمى

**

طفل البحر الملاك

وجدوا الطفل آلان كردي، ابن السنتين، جثة هامدة على الشاطىء، بعد أن بصقه البحر، ليرميه أمام أعيننا جميعاً، وقد أدار قفاه نحو جلادي البشرية، وكأنه يقول: هذه الأرض لا تعنيني، أنا مسكني الجنة.

ـ1ـ

درلُن إجْرَك.. إجْرَك فيهن

يا طفل البحر القديس

ع إجرامن رح هنّيهن

إجرامن أقوى من بليس

ـ2ـ

درلن إجْرَك.. لا تتأخّر

إنت ملاك.. وهني وحوش

صبّاطك من روسن أكبر

دَعْوِس بالصباط جيوش

ـ3ـ

ما منستاهل ضحكة سنّك

ما منستاهل نفرح فيك

افتكروا انو ارتاحوا منك

نحنا بالشعر منحييك

ـ4ـ

قللو لألله شو ما بدك

سمّي بالإسم الأشباح

قللو الدنيي كلاّ ضدك

لازم يمحيها ويرتاح

**

يوضاس

ـ1ـ

بدن ياني أنطر موتي

وموتي مش رح يتحقق

مهما خنقوا فكري وصوتي

حرفي من آلامي بيخلق

بيصفي الدمعه المجنونه

الما قدرت تحبسها عيوني

قلتلا ببحوري كوني

ولا تكوني خْيالي ع المفرق

ـ2ـ

بدّن ياني إلغي حالي

وإعلن إفلاسي للناس

خزّق كتبي.. ووزع مالي

وغرّق أحلامي بالكاس

والناس اللي مشيوا حدي

وحملوني بأيام الشدّه

قالولي بوجوهُن: هدّي

مش ممكن يربح يوضاس

**

مخدة حجر

تعليقي على صورة طفل صغير ينام على حجر ويفترش الارض

مخدة حجر.. نوم الهنا

تراب الأرض فرشة سنا

لا تخاف ألله بيحرسك

نكايه بـ أصحاب الغنى

بحيّك بـ دمعي ملبسك

ومتل إبني بقدّسك

تا تعيش بـ قلبي أنا

**

وحش أزرق

ـ1ـ

مين قال لونك، يا بحر، أزرق

وفيك المراكب دوم عم تغرق؟

هـ الناس يللي بلعتُن أمواج

ومتل الغنم ماتوا فواج فواج

دمُّن برقبة مين.. يا أحمق؟

ـ2ـ

تركوا بلادُن.. خايفين الموتْ

شافوك حلم كبير.. فات الفَوْت

غدرت فيهُن.. غرّقت العيال

وبعدك بتاكل، يا وحش، أطفال

صرخوا: يا ألله.. وضاع فيك الصوت

ـ3ـ

روح غسّل موجك من الدّم

الريحه كريهه.. آخ لو بتشم

فوق ظلم الحرب إنت ظلمت

ما رحمت طفل زغير.. ما تألّمت

بحلف أنا.. بحلف ما عندك أم 

**

خوتان

ع طول يا لبنان

بشوفك بأحلامي

بلاقي الأرز زعلان

وقلب الشعب دامي

وكمشة بشر خوتان

بتألّه أْسامي

أزلام أو خصيان

ما عندُن كْرامه

ما عندهُن إيمان

يصير الحكم سامي

بينتخبوا مين ما كان

حْرامي ورا حْرامي

**

طفل الحجر

رأيت إبن سبع سنوات يحمل حجراً أثقل منه فكتبت:

ليش قللي ليش قسيت هالدني

وكرمال "لقمه" ركّعت أطفالها؟

تقل الحجر تقلك يا طفل الولدني

إنت البطل.. مش عيب إنك تنحني

بدنيي ما عادت تفتخر برجالها

**

مجنون

شعبي أنا.. مجنون يا ربّي

مألّه زعيمو.. وشالحك برّا

وفرحان إنّو يعيش بالكذبه

ومن كم ورقة تين يتعرّى

عم ياكل الضربه ورا الضربه

وبعدو بزعيمو عم بيتدرّى

أللـه رحوم كتير يا شعبي

عم يحرسك تا تعيش حر كبير

ومنّك زعيمك عم بيتبرّا

**

أولاد العز

ـ1ـ

لمّا هجرنا بلاد الأرز

حسّينا الأرض بتهتز

وشفنا تمّ البحر كبير

متل الجرح الْـ عم بينز

يبلع أم وطفل زغير

ويشرّد أولاد العز

ونحنا الـ بكّانا التهجير

وفوق جنون الموج نفزّ

حملنا النير بضهر النير

وخناجر بالصدر تغزّ

محينا الغربه بالتعمير

وصاروا يرشّوا علينا الرزّ

وصار الإسم كبير كتير

وكل شعوب الأرض تقول:

"وجود اللبنانيي كنز"

ـ2ـ

لمّا هجرنا.. وصرنا كتارْ

حكمنا كل المسكونه

رفضنا نركع للدولار

ولا للإشيا الملعونه

خدنا بركة ناس كبار

ورضا الأم الحنونه

وكل ما الدهر علينا جار

نعلّق أرزتنا قونه

ونتذكر هاك الختيار

القاعد تحت الزيتونه

وركوة قهوه بهاك الدار

تنده: يلاّ اشْربوني

وضحكة جارتنا والجار

الـ خبيتُن جوّا عيوني

ـ3ـ

ولاد العز الـ بكتابي

هنّي القصايد كلاّ

ختيرت.. وبعدو شْبابي

بالأشعار بيتسلّى

تذكرهن.. شرّع بابي

وع قلبي الناس يدلاّ

حبّوني.. محيوا غْيابي

وخلّوا الغربه تتحلّى

هودي أهلي وأصحابي

أللـه يحرسهُنْ أللـه

**

مشوار

ـ1ـ

مشْوارْ جينا.. وْكيفْ رَحْ نِرْجَعْ

وكل ما ضحِكْنا.. الْعَيْن عَمْ تِدْمَعْ

وْلَيْش حَتَّى نْكَمِّلْ الْمشْوارْ

وِبْآخِرْ الْمشْوارْ رَحْ نِرْكَعْ

ـ2ـ

لا الدّارْ عَمْ تِحْضُنْ أَهالي الدَّارْ

وْلا الرَّبّ صَرْخِةْ ظُلْم عَمْ يِسْمَعْ

عَ الأَبْرِيا.. بْيِتْسَلَّطُوا الأشْرارْ

وْما في حَدا من خالْقُو بْيِفْزَعْ

ـ3ـ

عَمْ يِخْطفُوا بْنَيَّاتْ سِمْر زْغارْ

ما فَطَّمُوا.. نِصُّنْ عَمِ بْيِرْضَعْ

قالُوا بِـ إسْم السَّيِّد الْجَبَّارْ

مَعْلَيْش لَولا الطّفْل يِتْوَجَّعْ

ـ4ـ

وْمَعْلَيْش طُهْر الْبِنْت لَولا انْهارْ

قدّامْ بَغْل مْوَصَّلْ مْقَطَّعْ

وْمَعْلَيشْ مُجْرِم.. قاتِلْ وْقهّارْ

يِنْكَحْ شَمْس.. والْعَرْضْ يِتْشَلَّعْ

ـ5ـ

نِسْوانْ عَم بِـ بيعُنْ السِّمْسارْ

لِرْجالْ.. حَقّنْ زِبِل ما بْتِدْفَعْ

لِرْجالْ.. دَهْنُوا وْجُوهُن بْشِحْوارْ

بْتِفْنَى الدّني.. والفَحْم ما بْيِلْمَعْ

ـ6ـ

قالُوا: حَلالْ نْقَتِّل الْكفَّارْ

وْيِصِيرْ دَمّ النّاسْ.. مُسْتَنْقَعْ

قَتْلُوا بَعْض.. وِالْجارْ صَفَّى الْجارْ

وْبَعْدُو بِـ "جَنّة رَبّنا" بْيِطْمَعْ

ـ7ـ

هَدْمُوا الدِّني.. صارْ الْقَتلْ زنّارْ

بيلِفّ كَوْن مْشَرْبَكْ مْخَلّعْ

مشْوارْ أَوِّلْتُو حَريق وْنارْ

وِبْآخْرُو.. عَمْ يِصْرُخ الْمَدْفَعْ

**

رح ينتهي المشوار

ـ1ـ

رح ينتهي المشوار يا ربّي

سنين العمر رح ينطفي نورا

خبّيت ناس كتير بـ قلبي

وفي ناس زرتا.. وما عدت زورا

ـ2ـ

وفي ناس صاروا بهالدني مسبّه

وفي ناس فيك تشمّ بخّورا

حاولت إنفض غبرة الغربه

تاري الغربه مرتفع سورا

ـ3ـ

لولاك كنت وقعت بـ دربي

إنزل بجوره.. وأغطس بجوره

ما ندمت.. قادر إرفع الرقبه

ما خطيت.. حتّى وزّع ندورا

ـ4ـ

إمي، يا ربّي، عرفت تربّي

عيله ما عاشت يوم مقهوره

وبيي عطاني من الصلا طلبه

وقللي: يا إبني زيّح الصوره

**

وين المحبه؟

ـ1ـ

ليش ساكت هيك يا ربّي 

انت المحبّه.. ووين المحبّه؟

صار البغض بين البشر نبراس

الأجيال قللي كيف منربّي؟

والكل صاروا يألهوا يوضاس

وصارت الكذبه تصدّق الكذبه

ـ2ـ

مدّيت إيدي.. قلت بنشل ناس

شايف بـ عيني ظروفُن الصعبه

جرّبت خفّف بس مر الكاس

شلحوا بْدينيي أكبر مسبّه

تاري الشرف ع طول عم ينداس

والشرّ لعبه.. والضغينه أساس

ومجبور إنّي فوت باللعبه

**

دموعك

من وحي صورة لطفلة مشردة تبكي حظها التعيس في شرقنا العربي المنكوب

أوسخ حروب اختزلت دموعك

ومال الغني مسروق من جوعك

ان كنتي ع دين "المصطفى" رح قول

"محمد" بكي لما انطفوا شموعك

ان كنتي الصليب بترسمي ع طول

ع جبهتك مصلوب يسوعك

**

لا تنتحر

ـ1ـ

لا تنتحر.. كرمال كيس طحين

أو ألف ليره.. حق منقوشه

بتموت وحدك إنت يا مسكين

بيبقى زعيم الخمر والسوشي

ـ2ـ

والأم هالْـ سهرت عليك سنين

تقلاّ يا أمي من الحزن طوشي

وعيلتك رح تتركا لَـ مين

لحكّام حقّن بس خرطوشه

ـ3ـ

لبنان بدّو رجال ما بتلين

لا تخذلو بظروف مغشوشه

ولّع الثوره.. شعّل البنزين

تا تعيش إنتْ بموطنك لبنان

وتقضي على وحوشك مع وحوشي

**

منامات

ما دام بيّي مات

حدّو أنا رح فوت

ورح إدفُن منامات

رسمت ضيَع وبيوت

وأموال ومْقامات

وكذبات لفّا سكوت

ونْسيت "بو الهمّات"

مش أقوى من طاغوتْ

الـ بتخلفو الإمّات

رح ينتهي وممقوت

وإنّو العمر كلمات

بس تنكتب بتموت

ويا ما انحنت قامات

وانزويت بتابوت

**

شعر ووزن

ـ1ـ

قَالُوا: انْتِبِهْ.. فِي بْحُورْ فِي أَوْزَانْ

مِنْشَانْ يِبْقَى الشِّعْر بِقْصُورُو

قِلْتِلهُنْ: شِعْرِي أَنَا إِيمَانْ

وِسْع الْمُحِيطْ الْـ بَالِع بْحُورُو

ـ2ـ

وَيْن الْوَزن؟! ضَاع الْوَزن وِالنَّاسْ

عَمْ يِدْبَحُوا بَعْضُنْ بِـ أَوْطَانِي

وْوَزْنَاتْ أَللّـه الْيَوم عَمْ تِنْدَاسْ

وِالأَرْضْ عَمْ تِمْشِي خْلَيْفَانِي

ـ3ـ

الشِّعر عِنْدِي.. وْيِسْمَحُوا النّقَّادْ

أَهْدَاف تِتْفَاعَلْ بِلا تَفْعِيلْ

أَحْكَامْ تِخْلَقْ مُجْتَمَعْ وِبْلادْ

وِبْيُوتْ تِحْضُنْ أَلف جِيل وْجِيلْ

ـ4ـ

الشِّعر عِنْدِي.. كمْ بَوْسِه وْإِيدْ

تْغِلّ تِمْحِي مْنِ الصّدُور الْهَمّْ

وِشْفَافْ تِكْتُبْ عَ الْهَوَا مْوَاعِيدْ

وْأَحْبَابْ تَحْت جْوَانْحُو تِلْتَمّْ

ـ5ـ

الشِّعر عِنْدِي.. مِتل طَيْر حْمَامْ

رِجْعِ بْغُصنْ زَيْتُونْ مِنْقَارُو

أَمَّا الْغُرَاب الأَسْوَد الْمنْضَامْ

طَار وْيَا حَسْرَه انْقَطْعِت خْبَارُو

ـ6ـ

الشِّعر عِنْدِي.. دْمُوعْ بَيّ وْأُمّْ

وْثَوْرِة شَعبْ بِـ وِجّْ ظُلاَّمُو

وْقِصِّةْ بَطَلْ خَرْطَشْ بِحِبر الدَّمّْ

سْيُوف تِقْطَعْ نَسل حُكَّامُو

ـ7ـ

الشِّعر مَنُّو وَزنْ.. مَهْمَا يْصِيرْ

نِحْنَا الْـ خَلَقْنَا الْوَزن وعْبَدْنَاهْ

إِبن الْخَلِيلْ الْـ بَلَّش التِّعْتِيرْ

فَبْرَكْ عَ ذَوْقُو الْوَزن.. وِلْحِقْنَاهْ

ـ8ـ

عَادَاتْ.. خَلِّتْ شَرقنا يِنْهَارْ

وِالغَرْب يِبْسُطْ عَ الدِّنِي مْجَالُو

عِنَّا.. التَّمَرُّد عَ الْقَوَاعِدْ عَارْ!

وْعِنْدُو.. الْحَرفْ تَا يْفَهِّم طْفَالُو!

ـ9ـ

عَادَاتْ.. هِيِّي بِالْحَقِيقَه قْيُودْ

جْنَازِيرْ.. فَوق كْتَاف أُمِّتْنَا

خَلُّوا الأَدِيب بْكلّ رَاحَه يْجُودْ

وْيِكْتُبْ عَ صَدر الْكَوْنْ كِلْمِتْنَا..

**

شو هـ الدني؟

ـ1ـ

شُو هَـ الدِّنِي.. شُو هَـ الدِّنِي؟

تَا تْعِيشْ فِيهَا كْبِيرْ

صَعْب كْتِيرْ

وِالأَصْعَب مْنِ الْكِلّْ

إِنُّو تْضَلّْ

بِهَـ الدِّنِي عَايِشْ دَنِي!

ـ2ـ

ما عَادْ فِيك تْقُولْ: يَا قَلْبِي

رَحْ زَيّنَكْ بِالْحُبّْ

الْحُبّْ صَفَّى كِذْبْ

كِلُّو تْجَارَه وْمَنْفَقَه

وْأَلْف قِصَّه مْلَفَّقَه

يِعْنِي حَبِيبَكْ صَارْ مِتْل الْعَقِرْبِه!

ـ3ـ

وْما عادْ فيكْ تْأَمّنُو

لْخَيَّكْ إِذَا زَارَكْ

وْنَامْ بِدْيَارَكْ

لَيْحِطّْ عَيْنُو عَ الْمَرَا

وْيِعْمِلْ بِبَيْتَكْ مَجْزَرَه

وْبِالآخْرَه.. شُو الآخْرَه

خَيَّكْ مَا فِيكْ تَخْوّنُو

ـ4ـ

انْ جِرَّبتْ تِعْمِلْ قِيمْتَكْ

مَعْ نَاسْ ما عِنْدُنْ إِبَا

وْدَمَّاتْ قَلْبَكْ تِسْكِبَا

بْحَيْث الْكَرَمْ مِنْ شِيمْتَكْ

لَمَّا شِي مَرَّه بْيِلْتِقُوكْ

بِيجَرّبُوا تَا يِخْنِقُوكْ

بَرْكِي بْيِمْحُوا جْمِيلْتَكْ!

**

القنديل

مثلت كمسرحية في بلدة مجدليا ـ زغرتا سنة 1969

ـ1ـ

لَوَيْن بَعْدَكْ يَا قَدَرْ لَوَيْنْ

مَاشِي بْوِجَّكْ وِالدَّربْ عَتْمِه؟

وْلَيْش حَتَّى تْفَرِّقْ الْقَلْبَيْنْ

الْـ ضَوُّوا الْعَتمْ بِتْشِرْقُط الْبَسْمِه؟

ـ2ـ

كَانِتْ تِجِي تَا تْدَرْدِش بْهَاللَّيْلْ

مَعْ شَبّْ أَسْمَرْ حَبِّتُو

وِانْ غَارْ مَرَّه وْغَابْ نَجْم سْهَيْلْ

وْمَا عَادْ رَنِّتْ ضِحْكِتُو

تِرْكُضْ عَ قِنْدِيلاَ تْعَبِّي زَيْتْ

وِيْشَعْشِع الْقِنْدِيلْ وِيْضَوِّي

وْصِدْفِه انْطَفَى.. وْمَا عَادْ ضَوَّى الْبَيْتْ

وْلا عَادْ يِقْدِرْ يِلْمَحَا هُوِّي!

ـ3ـ

.. وْصَارْ يِقْعُدْ يِنْطِرَا وْيِبْكِي

وْيِتْذَكَّر لْيَالِي الْهَنَا وِالْحُبّْ

وْفِي يَوْم طَلِّتْ رَاسْهَا مِتْكِي

وْقِنْدِيلْهَا فَاضِي.. وْفَاضِي الْقَلْبْ

ـ4ـ

ـ يَا حُلوتي.. قْنَادِيلْ هَـ الْعُشَّاقْ

مْزَيّتِه بِالْحُبّ بِالأَشْوَاقْ

وْلَيْش حَتَّى طَافْيِه الْقِنْدِيلْ

وْقِنْدِيلِك لْنَار الْهَوَى مِشْتَاقْ

ـ تْرِكْنِي.. انْقَطَعْ حَبْل الْهَوَى

ـ بَيْنَاتْنَا؟

ـ .. وْمَا عَادْ يِنْفَعْنَا الْحَكِي

ـ وِالسِّنْديَانِه، جِذِعْهَا الْقَاسِي الْتَوَى

وْتَا تِشْتِكِي.. لَمِينْ بَدّهَا تِشْتِكِي؟

ـ ضجْرَانْ قَلْبِي مْنِ الْعِتَابْ

ـ وْزِهْقَانْ فِكْرِي مْن الْعَذَابْ

ـ لْسَانَكْ..

ـ لْسَانِي؟

ـ .. يَبَّسْ زْهُورِي

وْمَرْمَغَا بَيْن التُّرَابْ

ـ عَمْ يِكِذْبُوا عْلَيْكِي

شَافُوا السَّمَا

اسْتَحْلُوا السَّمَا

الْـ جُوَّاتْ عِينَيْكِي

لا تْصَدّقِي الْعُزَّالْ

عَمْ يِكِذْبُوا

وْمَا بْيِتْعَبُوا

تَا تِنْقِطِعْ الِحْبَالْ

وْقِنْدِيلِكْ الْمِطْفِي

بْحَلّفِكْ ضَوِّيهْ

وْلا تْسَكّرِي الدَّرْفِه

شُبَّاكِكْ خَلِّيهْ

مَفْتُوحْ لِلنَّسْمِه

لِلْكِلْمِه.. لِلْبَسْمِه

وْقِنْدِيلِكْ الْحِزْنَانْ

حَتَّى يْصِيرْ فرْحَانْ

لَيْلِيِّه زَيْتِيهْ

وْعَبِّيهْ لِلشِّفِّه

وِارْجَعِي ضَوِّيهْ

قِنْدِيلِكْ الْمِطْفِي

ـ تْرَاكْ قِنْدِيلِي

ـ الْقِنْدِيلْ بَدِّي وَلّعُو

بِالنَّارْ

وْعَلِّم الْـ بِيطَلّعُو

أَخْبَارْ

إِنُّو الْحَقِيقَه شَمْسْ

مَا بْتِحْجِبَا فْتِيلِه

ـ5ـ

وْضَوُّوا سَوَا الْقِنْدِيلْ

وِاللَّيْل فَرَّخْ شَمْسْ

وْصَار الْحَكِي مْوَاوِيلْ

وْطوْيُوا كْتَاب الأَمْسْ

وِتْشَابَكُوا الإِيدَيْنْ

وِتْغَامَزُوا الْعِينَيْنْ

وْبَدْر السَّمَا بِيطِلّْ

كِلْ مَا اجْتَمَعْ قَلْبَيْنْ

**

جوعان

ألقيتها عام 1988 عبر أثير إذاعة إس بي إس الحكوميّة، أثناء جمع التبرعات للصليب الأحمر.

ـ1ـ

جُوعانْ.. سَامِعْ صَرخْتُو مْنِ بْعِيدْ

بَعْدُو طفْل ما كَمَّل السّنْتَيْنْ

عْضَام صَدْرُو نافْرَه تْجاعيدْ

وْعَ خْدُودْ صَفْرَا وَقْعِت الْعِنَيْنْ

ـ2ـ

جُوعان.. كل النَّاسْ سِمْعُوا الصَّوتْ

وْدَبِّت النَّخْوِه بِالدِّنِي كلاَّ

إِبنْ أَللَّـه بْيِنْشُل مْنِ الْمَوْت

ما فِي بَخِيل بْيَعْرفُو أَللَّـه

**

فنّان

ـ1ـ

الْفَنّْ.. تِخْلُطْ حُبّ بِشْوَيِّةْ عَذابْ

وِتْرِشّ فَوْقُنْ كِلّ ضِحْكَات الْهَوَا

وِتْقِصّ مِنْ دُونْ خَوْف مَشْنِقْة الْغِيابْ

وْتِعْزُمْ شَمْس عَ الأَرْض تَا يْعِيشُوا سَوَا

ـ2ـ

الْفَنّ.. إِنّو تْكُونْ أَكْبَرْ مِنْ خَيَالْ

مِنْ كمْ كِلْمِه بْيِنْعِجِقْ فِيها السُّؤَالْ

تَا تْصِيرْ إِيدَكْ سَيْف تِقْضِي عَ الْخَطَرْ

تَا يْصِيرْ صَوْتَكْ رِيحْ.. وِدْمُوعَكْ مَطَرْ

تا تْصِيرْ إِنْت الْـ كانْ وِالْبَدُّو يْكُونْ

تْرَبِّي صَفَاوِةْ بَالْ بِـ حضْن الْجُنُونْ

وْمِنَّكْ وْفِيكْ بْيِنْعَمُوا كلّ الْبَشَرْ

ـ3ـ

شْقَاعْ الْحَكِي مِدْماكْ.. حَكْيَكْ إِنْتِصَارْ

وْلَوْلا جْبِينَكْ ما انْوَجَدْ إِكْلِيلْ غَارْ

بْتِنْقُلْ وَطَنْ عَ مَسْرَحَكْ

وْبِتْضَلّ وَاقِفْ مَطْرَحَكْ

وِكْتَارْ هَللِّي بْيَعِرْفُوك كْتارْ

كِلِمْتَكْ إِنْذَارْ

شُهرتَكْ مِنْ نارْ

وْطَلّتَكْ.. بَاقِةْ وَردْ بِتْسَوْسِحَكْ

لَكنْ عَذَابَكْ.. لِلْكَمَال.. بْيِفْرِحَكْ

وْضِدّ هَجْمات الْغُرُورْ مْسَلّحَكْ

وَحْدُو غُرُورَكْ بَسّ.. قَادِرْ يِدْبَحَكْ.

ـ4ـ

فَنّانْ إِنْت.. الدَّمّ عَ شْفَافَكْ

وِالإِضْطِهاد مْخَزَّقْ لْحَافَكْ

بْبَيْتَكْ إِذَا بِتْنَامْ

بِتْقَلّقَكْ حُكَّامْ

رِكْبِت سْنِينْ الْعُمْر عَ كْتَافَكْ

إِتِّحادَكْ صَوْتْ

وِانْشِقَاقَكْ مَوْتْ

حِطّ إِيد بْإِيدْ

حَيِّكِلْنَا مْوَاعِيدْ

وْلا تْخَافْ مِنْ طاغُوت بِيخَافَكْ

وْمِنْشَانْ يُوعَى الْعَالَـم مْنِ جْدِيدْ

وِتْصِير أَنَّاتْ الْبِكِي زْغَارِيدْ

عَلِّقْ عَ صَدْر الْمَوْج مِقْدَافَكْ.

**

دياب الشّعب

ـ1ـ

محْتَارْ كِيف بْبَلِّشْ الأَشْعَارْ

وِالْحرْفْ عَمْ بِيئِنّ بِكْتَابِي

مِنْ ظُلْمْ نَاس مْوَلّعِينْ النَّارْ

وْتَا يِدْبَحُونَا أَلّفُوا عْصَابِه

لَكِنْ كَرَامِةْ طُفل أَوْ خِتْيَارْ

عَمْ يِلْعَبُوا فِيهُنْ مِتِلْ طَابِه

وْكِرْمَالْ يِبْقَى الْجَارْ حَدّ الْجَارْ

بَدِّي بْيُوت الشِّعر فَجِّرْهَا

وْخَلِّص مِنِ الْوَيْلات أَحْبَابِي

ـ2ـ

كْرَامِةْ شَعب إِيدَيْهْ مَفْتُوحَه

وْعَ فْعَالْ الْخَيْرْ مِعْتَادِه

كْرَامِةْ وَطَنْ عِمْلُوه مَرْجُوحَه

وْرِكْبُوا عَ ضَهْرُو.. وْطَوّلُوا زْيَادِه

كْرَامِة الأَرْزِه التَّاكْيِه شْلُوحَا

أمّنَا.. اللِّي مْنِعْبِدَا عْبَادِه

دْيَاب الشَّعبْ رَحْ تِنْزِهِق رُوحَا

وْنِتِّفِقْ إِسْلامْ وِنْصَارَى

وْبِالْجَوّ نِرْفَعْ رَايِة بْلادِي

ـ3ـ

يَا نَاسْ، وَاللَّـه، طَوّلِتْ هَـ الْحَرْبْ

الْـ شَرّدِتْنَا بْأَلْف دَرْبْ وْدَرْبْ

سْقِينَا الدِّنِي مْنِ دْمُوع عِينَيْنَا

وْبِالْوَقْتْ ذَاتُو النَّارْ جُوَّا الْقَلْبْ

وْمَا عَادْ فِي مْطَارِحْ بِـ إِيدَيْنَا

اهْتَرْيِتْ إِيدَيْنَا مْنِ مْسَامِيرْ الصَّلْبْ

يَا رَبّ خَلِّي عَيْنَك عْلَيْنَا

نِحْنَا الْـ زَرَعْنَا فَوْقْ بِالْعَالِي

الأَرْز اللِّي إِسْمُو الْيَوْم.. أَرْز الرَّبّْ

ـ4ـ

رْجَالْنَا ضَحُّوا تَا تِتْسَمَّعْ

هَـ الأَرْضْ.. شُو مَكْتُوبْ بِكْتَابُنْ:

" هَوْدِي بَشَرْ نَارُنْ عَم بْتِلْمَعْ

وْمَا فِي حَدَا دَنَّسْ حِمَى غابُنْ

هَوْدِي اللِّي قَلْبْ الأَرْزْ عَمْ يُوجَعْ

مِنْ يَوْمْ مَا مِضْيُوا عَلَى غْيَابُنْ

هَوْدِي الْـ بَلا عِزُّنْ صَعبْ يِرْجَعْ

عِزّ الدِّنِي الْمَزْرُوعْ بِتْرَابُنْ

هَوْدِي الْـ بِـصَدْرُنْ حَارَبُوا الْمَدْفَعْ

وْتَا يْضَلّ قِطْعَه مْنِ السَّمَا لُبْنَانْ

رِضْيُوا يْضَحُّوا بْخِيرِة شْبَابُنْ"

ـ5ـ

التَّارِيخْ خَبَّرْ كِيفْ صيَّرْنَا الدِّنِي

جَنِّةْ نَعِيم مْزَيّنِه بْأَفْكَارْهَا

وْصَارِتْ شُعُوبْ الأَرْضْ كِلاَّ تِنْحِنِي

قدَّامْ حُرِّيِّه.. وْمَجدْ أَحْرَارْهَا

وِاللِّي انْظَلَمْ بِبْلادْ فِيهَا شَيْطَنِه

وْمَا عَادْ مَيَّزْ لَيْلهَا مْنِ نْهَارْهَا

بْيِلْتِجِي لِلُبْنَانْ.. لِلْعَيْش الْهَنِي

بِبْلادْ دَاخْ الشِّعر مِنْ شِعَّارْهَا

شُو صَابْنَا؟!.. حَتَّى الرَّوَائِحْ مِنْتِنِه

وِالْجَمَاجِمْ شَوَّهتْ أَزْهَارْهَا

وْمُطْلَقْ زَعِيمْ بْفَرْدْ كِلْمِه مِفْتِنِه

بْيِزْرَعْ بَلَدْنَا جُوع وِجْنُون وْدِمَا

وْبِيصِيرْ يِتْدَفَّى عَ لهْبِةْ نَارْهَا؟!

ـ6ـ

وَيْنْ صِرْنَا؟!..وْلَيْشْ بَلْعِتْنَا الدُّرُوبْ

وِغْبَارْهَا مَحَّى أَسَامِينَا؟!

وْكِلّ عُمْرَا الشَّمْسْ سَاعَات الْغُرُوبْ

تِتْحَمَّم بْمَيِّةْ سَوَاقِينَا

وِتْشِعّْ ضِحْكِتْهَا.. إِذَا مْنِضْحَك.. شْعُوبْ

وِتْغِصّ بِالدَّمْعَه.. لَوِ بْكِينَا

حْرَامْ الدُّولاب يْدُورْ بِالْمَقْلُوبْ

وْخِتْيَارْنَا يِنْطُرْ عَلَى الْمِينَا

كِرْمَالْ عَيْنْ الثَّعْلَب الْمَغْضُوبْ

الْعَامِلْ نَاطُور الأَرْضْ وِالْكَرْمَاتْ

وْبِالسِّرّ عَمْ يِسْرُقْ دَوَالِينَا!

ـ7ـ

قَسّمُونَا شْوَارِع وْسَاحَاتْ

ورِمْيُوا الْبُغُضْ بِقْلُوبْنَا الْحلْوِه

اسْتِقْلالْنَا، الْـ مَا لِحِقْ يِخْلَقْ.. مَاتْ

صَلْبُوه فَوْق حْنَاكُنْ الرَّخْوِه

وْصَفَّى التَّعَايُشْ كَوْمِة نْفَايَاتْ

لِمِّنْ سَفَكْنَا دَمّنَا بْنَشْوِه

وْصَارِت عْلَيْنَا تِمْرُقْ السَّاعَاتْ

وِعْقَارِبَا مْنِ الْقَهْر عَمْ تِلْوِي

وْنِحْنَا عَمِ نْوَدِّعْ هَنَا الْغَفْوَاتْ

وْأَحْلامْ مَاتِتْ غَدْر بِالْغَفْوِه

كِرْمَالْ تِفْنِي بَعضْهَا زْعَامَاتْ

الشَّعْبْ عِنْدَا.. سْلالِـم وْدَرْجَاتْ

وِالدِّينْ أَقْرَبْ دَرْب.. لِلثَّرْوِه

ـ8ـ

بْلادْنَا.. أَللَّـه خَلَقْهَا مْغَيَّرَه

عَنْ غَيْرهَا.. وْقَلاَّ: أَنَا رَحْ إِدْعَمِكْ

وْرَحْ حَوّلِكْ لِلطَّائِفِيِّه مَقْبَرَه

وْتِرْجمِي عَ طُولْ هَللِّي بْيِرْجمِكْ

أَرْزِي أَنَا.. لِلْكَوْن كِلُّو مَفْخَرَه

وْضِحْكِة شْفَافِي مْصَوّرَه عَ مَبْسَمِكْ

شَعْبِكْ.. مَا بَدِّي يَوْمْ يِحْمِلْ مَبْخَرَه

وِيْبَخِّر لْحُكَّامْ غِشّ بْتِحْكِمِكْ

هَيْدِي زَعَامِه قْلُوبْهَا مِتْحَجّرَه

بْتِرْكَع تْصَلِّي كِذب سَاعات النَّهَارْ

وْمِنْ دُونْ شَفْقَه بْلَيْلهَا عَمْ تِعْدِمِكْ!

ـ9ـ

تَا نِحِسْبَكْ شِي يَوْم زِقَّفْت لْزَعِيمْ

لازِمْ بِسِرْعَه تْقِصّ صَابِيعَكْ

وِتْصِيحْ بِالْعَالِي: اغْفِرْلِي يَا رَحِيمْ

وْتِحْنِي الرَّقْبِه وْتِسْكُب دْمُوعَكْ

هُوِّي اللِّي خَلاَّ بْلادْنَا تْعِيش بْجَحِيمْ

وْهُوِّي الْـ حَرَقْ عَ مَدْبَحُو شْمُوعَكْ

وْهُوِّي الْـ هَدَمْ عَنْ قَصْد جَنَّاتْ النَّعِيمْ

وْهُوِّي الْـ سَرَقْ تَا تْمُوتْ مِنْ جُوعَكْ

وْهُوِّي اللِّي مِنُّو خَافْ شَيْطَانْ الرَّجِيمْ

وَقْت الْـ قَتَلْ إِمَّاتْنَا وْبَيَّاتْنَا

وْمَنْعَكْ يَا خَيِّي تْحَقِّقْ رْجُوعَكْ

ـ10ـ

حَلَّكْ بَقَى تِفْهَمْ شُو عَمْ قِلَّكْ:

بْلادَكْ اخْتَرْبِتْ مِنْ زَعَامِتْهَا

الْـ عِرْفِتْ يَا خَيِّي كِيفْ تِتْمَلَّكْ

بْخَيْرَاتْهَا.. وْكَفَّا عَ رَقْبِتْهَا

وْقِدّامْ عَيْنَا الشَّعْبْ عَمْ يِهْلَكْ

وْلِلْغَيْرْ عَمْ بِتْبِيعْ غَلِّتْهَا

شُوف الأَسَى الْخِلْقَانْ مَعْ طِفْلَكْ

وِسْمَاعْ كِيفْ بِتْرِنّ ضِحْكِتْهَا

فِيقْ دَخْلَكْ فِيقْ مِنْ جهْلَكْ

وْهَاتْ إِيدَكْ حِطّهَا بْإِيدِي

مِنْشَانْ نِطْفِي نَارْ فِتْنِتْهَا

ـ11ـ

هَاتْ إِيدَكْ هَاتْ.. يَا خَيِّي

بْإِيدَك وْإِيدِي السِّحرْ مِتْخَبَّى

تْنَيْنَاتْنَا بْقُوِّه إِلَهِيِّه

مْنِقْضِي عَ زِمْرَه مْضَيّعَه رَبَّا

كِذْبِت عْلَيْنَا بْأَلْف خَبْرِيِّه

وْرَضّعِتْنَا سْمُومْ مِنْ عبَّا

سْمُومْهَا، نَعْرَاتْ دِينِيِّه

وِزْهُورْ سَوْدَا مْزَيّنِه دَرْبَا

عَجِّلْ بَقَى تَا نِحْمِلا سْوِيِّه

وِبْبَحرْ مَا لُو آخِر نْكِبَّا

إِنْت وْأَنَا.. يَا نُورْ عِينَيِّي

لازِم نْحَارِبْ هَـ الزَّعَامِه كْتِيرْ

وِنْشِكّ سَيْف حْقُوقْنَا بْقَلْبَا

ـ12ـ

إِنْت وْأَنَا.. الْـ مِنْخَلِّصْ الأَجْيَالْ

مِنْ ظُلْم شَتَّتْنَا بِـ هَـ الْغُرْبِه

وِالْهَمّ فَوْق صْدُورْنَا أَحْمَالْ

وِالنَّارْ تَاكُلْ قَلْبَكْ وْقَلْبِي

إِنْت وْأَنَا.. لِبْلادْنَا رِسْمَالْ

وِكْنُوزْنَا حَبَّات هَـ التّرْبِه

الْـ مَا بْتِنْشَرَى يَا صَاحْبِي بِالْمَالْ

وْلا بْتِنْهَدَى بِمْغَلَّف وْعِلْبِه

وْلا يَوْمْ رِضْيِتْ يِنْقبر دجَّالْ

جُوَّاتْهَا.. وْلا اسْتَقْبَلِتْ كِذْبِه

يَلْلاَّ سَوَا تَا نْحَقِّقْ الآمَالْ

وْنِمْسَحْ غَشَاوِةْ حِقْدُن الْمَلْعُونْ

وْنِفْلَح وْنِزْرَعْ أَرْضنَا.. مْحَبِّه

ـ13ـ

عَارِفْ أَنَا.. عَمْ إِكْتُب بْشِعْرِي

نْهَايْتِي.. وِنْهَايْتِي اسْتِشْهَادْ

وْعَمْ إِسْرُق الأَيَّامْ مِنْ عُمْرِي

وْأَيَّامْ عُمْرِي كلّهَا أَمْجَادْ

مَا هَمّنِي لَوْ يِطْعَنُوا صَدْرِي

وْمَا هَمّنِي لَوْ صَارْ جِسْمِي رْمَادْ

الْـ بِيهِمّنِي.. مَا يِنْفتحْ قَبْرِي

إِلاَّ بْبِلادِي.. وْيِنْكتبْ فَوْقُو:

مَاتْ تَا يِفْدِي شَعب وِبْلادْ..

**

قلبي وطن

ـ1ـ

لَيْشْ دَخْلَكْ لَيْشْ يَا رَبِّي

تْرَكتْ قَلْبِي يُولَعْ وْيِسْوَدّْ

وْغَيْرَكْ يَا رَبِّي مَا سَكَنْ قَلْبِي

وْلا يَوْم جِرَّحْتُو بْشَوْك الْبُغْضْ

وْلا فْرَشْتْ عَ خْدُودُو غْبَار الأَرْضْ

قَلْبِي وَطَنْ مَزْرُوعْ بِمْحَبِّه

حْرَامْ يَا رَبِّي الْوَطَنْ يِنْهَدّْ

ـ2ـ

لَوْ كَانْ شِي مَرَّه سْمِعتْ مِنِّي

كِلْمِه زْغِيرِه تِجْرَحَكْ.. لَعْنِه

كِنْتْ نِتْفِه عَ الْجُرح عِضَّيْتْ

وْكِنْت نْدَرتْ.. كِنْت رْكَعتْ صِلَّيْتْ

وْصِرْت مَجِّدْ إِسْمَكْ وْغَنِّي

كِرْمَالْ تِطْرُدْ ناسْ مِتِّفْقِينْ

يِقْضُوا عَ شَعْب مْعَتَّر وْمِسْكِينْ

بِيغَمّضُوا عْيُونُو بْإِسْم الدِّينْ

بْإِسْم الْعُرُوبِه وِالدَّهَبْ وِالْبَنْزِينْ

بْإِسْم الدُّولارْ وْكِلّ شِي فِي مْنَافْقِينْ

بْإِسْم السِّيَادِه وِالْحَضَارَه وِالْيَقِينْ

بْإِسْم الْعَدَالِه.. بْإِسْم كِلّ الْمَحْرُومِينْ

بْإِسْم الْقَضِيِّه.. بْإِسْم نَاسْ مْشَرّدِينْ

وْمِتِلْ شِي بَطِّيخْ عَ السِّكِّينْ

بْيِدْبَحُوهْ عَ عَتْبِة بْوَابُو

وْبِيوَزّعُوا تْيَابُو

وْبِالرَّغْمْ مِنْ جرْحُو وْمِنِ عْذَابُو

بْيِرْكَعْ يْقِلَّكْ: " يَا رَبّ الْكَوْنْ

إِنْتْ هَيْك حْكَمْتْ

وْنِحْنَا بْحِكْمَكْ رَاضْيِينْ

إِنْتْ هَيْكْ رْسَمْتْ

وْنِحْنَا الْعَبِيدْ الطَّايْعِينْ

وْمِنْ مِينْ غَيْرَكْ قِلّنَا مِنْ مِينْ

مْنِطْلُبْ يَا رَبّ الْعَوْنْ؟!"

ـ3ـ

وْحَقّ السَّمَا وِالأَرْضْ مَغْشُوشِينْ

وْمِتلْ شِي قِطْعَانْ مِنْقَادِينْ

لِرْجَالْ سَمُّوهنْ رْجَالْ الدِّينْ

لأَهْل السِّيَاسِه الْكِذَّابِينْ النِّصَّابِينْ

دَمّنَا بَاعُوه بِمْلاَيِينْ

وْعَلّبُوا لْحُومَاتْنَا مِتْل الْبَقَرْ

مِتل سَمْك الطُّونْ وِالسَّرْدِينْ

وْنِحْنَا اللِّي إِنْت جْبَرْتْنَا نِخْلَقْ بَشَرْ

عَ قَدّ مَا مِنْخَافْ يَوْم الآخرَه

مْنِنْحِنِي قِدَّامَك وْمِنْقُولْ:

" مَعْقُولْ عِنْدُنْ عِذِرْهُنْ مَعْقُولْ

عْطِيهُنْ يَا رَبّ الْمَغِفْرَه؟!"

ـ4ـ

.. وْشُو بْخَبّرَكْ يَا رَبّ عَنْ بَيْرُوتْ

مْدِينْةِ الْمرْجانْ وِالْيَاقُوتْ

سَرْقُوا مْحَلاَّتَا

وْهَدْمُوا بِنَايَاتَا

وْصَلُّوا وْصَامُوا شَهرْ حَتَّى تْمُوتْ

وْمُسْتَحِيل تْمُوتْ

مْدِينْةِ الْـ مَسْمِحِلْهَا تِحْكِي

وْسَاعِةْ مَا بَدَّا تِضْحَكْ وْتِبْكِي

وْتِرْفَعْ إِيدَيْهَا لِلسَّمَا وْتِشْكِي

بِـ شَرقْ.. دَاعِسْ فَوْقْ مِنْخَارُو طَاغُوتْ

بِـ شَرْقْ.. صَفَّى لْكِلّ سكّانُو تَابُوتْ!

ـ5ـ

بَيْرُوتْ.. هِيِّي الْعُرس وِالْعُرْسانْ

وْهِيِّي الطَّبل وِالزَّمْرْ

لَوْلا لْيَالِيهَا الرَّقصْ مَا كانْ

وْلا انْهَزّ بَطن وْخَصْرْ

وْيا ما الْفَرَحْ عَ شْطُوطْهَا سهْرَانْ

يْحَاكِي مْوَاجْ الْبَحْرْ

وِانْ كَانْ شِي مَرَّه الْقَمَرْ ضجْرانْ

وْحَاسِسْ بِنِتْفِةْ قَهْرْ

بْيِنْزل يْقَطِّفْ زَهرْ مِنْ بستانْ

غَافي عَ حفِّة نهرْ

وْيِقْعَدْ يْأَلِّفْ عَنْ جبل لبنانْ

أَحْلى قْصَايِد شِعْرْ

ـ6ـ

بَيْروت.. يا بَيْرُوت.. يَا مْدِينِه

مْزَيّنِه.. وْمُشْ نَاقْصَه زِينِه

تْنَعْشَرْ سِنِه عَمْ بِحْلَمِكْ بِاللَّيْلْ

قَوْلِكْ أَنَا مَكْتُوب عَ جْبِينِي

عِيشْ عُمْرِي بِالْهَجْر وِالْوَيْلْ

إِشْرَب دْمُوعِي وْآكُلْ سْنِينِي؟!

ـ7ـ

بَيْرُوتْ.. يا بَيروت.. مِشْتَقْلِكْ

وْما هَمّنِي لَوْلا تْهِدَّمْتِي

وْما هَمّنِي لَوْ هَجّرُوا أَهْلِكْ

وْقِدَّامْ عَيْنِكْ يِدْبَحُوا طِفلِكْ

الْـ بيهِمّنِي تْضَلِّي عَ إِيمَانِكْ

بْأَرْزِكْ، بِصنِّينِكْ، بِلُبنانِكْ

وِبْكِلّ أَدْيَانِكْ

وْما تِيْأَسِي إِنْتِي

إِنْتِي إِذا يْئِسْتِي

بِتْكُون ضَرْبِه قَاضْيِه عْلَيْنَا

بْتِطْفِي أَمَلْنَا وْنُورْ عِينَيْنَا..

ـ8ـ

وْشُو بْخَبّرَكْ عَنْ شَبّ إِسْمُو "جْنُوبْ"

عَن شَبّ أَسْمَر مِتل طَرْبِينْ الْحَبَقْ

عَنْ شَبّ مارِدْ بَعد مِتلُو ما انْخَلَقْ

مَلْيُون ضَرْبِه بْيِضِرْبُوهْ

وْمليُون جَلْدِه بْيِجِلْدُوهْ

وِبْيِخْلَقُوا مِنّو أَلف "مَصْلُوبْ"!

شُو بْخَبّرَكْ يَا رَبّ.. يَا جَبّارْ

عَنْ وَحشنةْ كفَّارْ

خَتْمُوا عَ تذْكرْتُو إِسم "مَغْضُوبْ"

وْكَتْبُوا عَ صَدرُو جُملْتَيْنْ زْغَارْ:

"مَحْكُومْ إِنُّو يْشُوفْ بِعْيُونُو دَمَارْ

ويِفْلَح ويِزْرَع كلّ أَرْضاتُو حْرُوبْ

حَتّى إِذَا جاع وْعِطِشْ يا رَبّْ

مَمنوع يِشْرَبْ غَير دَمّ ونارْ

وْمَمْنوع يلبسْ غَيرْ ذلّ وْعَارْ!

ـ9ـ

دقَّيْت عَ بْوابَكْ سْنِينْ سْنِينْ

وْمَا كنتْ تِسْمَعْنِي

وْصرْتْ صَرِّخْ متل صَرْخات الْجَنِينْ

الْجَايِي غَصبْ عَنُّو

عَ كَوْنْ.. صَعْبِه يِنْتِفِعْ مِنُّو

عَ كَوْن.. سكَّانُو انْتَهُوا وْجَنُّوا

وْما عِدْتْ فِيك تْقُول: هَوْدِي مَظْلُومِينْ

وْهَوْدِي نَصَارَى.. وْحَدّ مِنُّنْ مسلْمِينْ

وْهَوْدِي يَهُودْ مْشَتَّتِينْ مْطَيْشَرينْ

وْهَوْدِي تَتَرْ

هَوْدِي نَوَرْ

هَوْدِي جَمَاعَه مْوَحّدينْ

كِلُّنْ يَا رَبِّي ظَالْمِينْ

كِلُّنْ طُغَاةْ

لا بْيؤمنوا بْإِنْجِيلْ

لا بيؤمنوا بْقُرآنْ

حَتَّى وَلا بْتَوْرَاةْ

وْلا حَاسْبِينْ حْسابْ يَوم الدِّينْ!

ـ10ـ

يئسانْ مِنْ حالي أَنا يئسانْ

يئسَانْ حَتَّى الْمَوْتْ

وِانْبَحّ فِيِّي الصَّوْتْ

بْصَرِّخْ.. بْصَرِّخْ بَيْن هَـ الطّرْشَانْ

بَرْكِي بْيِسْمَعْ صَرخْتِي إِنْسَانْ

بَعْدُو بْيُؤمِنْ فِيكْ عَنْ وِجْدانْ

تَا مِدّ إِيدِي وْإِشْبِكَا بْإِيدُو

وْكِلّ شِي إِنِتْ يَا رَبّ بِتْرِيدُو

مِنَّفِّذُو بِـ تَضْحِيِه وْإِيمَانْ

عَ شَرْطْ.. عَفْوَكْ لَوْ أَنا شَارَطْتْ

يْكُونْ يخدُم مَصلحة لُبْنَانْ..

**

وآخرتها شو؟

ـ1ـ

.. وْآخْرِتْهَا شُو؟!

كَمْشِةْ عُمرْ مَرْقِتْ

وْبَعْدُو غْرَاب الْبَيْنْ

عَمْ يِنْفُض رْيَاشُو

بِبْلادْ ضَاعِتْ بَيْنْ

أَطْمَاعْ حَنَّا وْزَيْنْ

وِبْدَمّهَا اخْتَنْقِتْ!

ـ2ـ

.. وْآخْرِتْهَا شُو؟!

وْأَطْفَالْنَا الْـ مِنْ حَقُّن يْنَامُوا

وْيِحْلَمُوا بِالنُّورْ

سَيْهَرُوا الدَّيْجُورْ

مِنْ كِتِرْ مَا انْضَامُوا

بِبْلادْ كلاَّ جُورْ

وْعَمْ تِرْتِمِي بِبْحُورْ

كذْب وْأَنَانِيِّه

وْصَفْقَاتْ مَالِيِّه

وْإِحْتِيَال وْزُورْ!

ـ3ـ

.. وْآخْرِتْهَا شُو؟!

وْمَا ضَلّْ عِنَّا بَيْتْ

وَاقِفْ بِوِجّ الرِّيحْ

يِنْدَه عَلَى السِّكَّيْتْ:

يا رَيتْ رَسْمُوا زِيحْ

بَين الْكذبْ وِالْحَقّْ

ما كانْ ضَوِّي شْحِيحْ

وْلا كانْ حَيْطِي انْشَقّْ

"يا بَيْتنا الْمَشْلُوحْ عَ الطُّرْقَاتْ

وِتْشَرّدُوا حْبَابَكْ

وْعَ عَتْبِة بْوَابَكْ

حُبّ الْفَضِيلِه مَاتْ

وِانْطَمّ بِتْرَابَكْ

لَسْبِدّْ ما تِتْرَاجَع الأَيَّامْ

عَن ظُلمها الْمَقْصُودْ

وْتِتْغَيَّرْ بْإِسْم الشَّعبْ حُكَّامْ

قِرْفَان مِنْهَا الدُّودْ"..

ـ4ـ

.. وْآخْرِتْهَا شُو؟!

سَاعَه بْيِرْضَى فْلانْ

وْسَاعَاتْ بِيهاجِمْ

وْعَمْ يِحْترقْ لُبْنانْ

وْتِتْطَايَر جْمَاجِمْ

مُشْ عَارْفِينْ لْمِينْ؟!

"جِيرانْ عاشُوا الْعُمرْ

عَ طُولْ مِتِّحْدِينْ

ما بْيِسْأَلُوا عَنْ دِينْ

دِينُنْ إِيمان وْفَخرْ

بِالأَرْز وِبْصِنِّينْ

لَكِنْ بِسَاعِةْ قَهْرْ

مِشْيُوا بْطَرِيقْ الْغَدْرْ

مَعْ زُمْرِة شْيَاطِينْ"

ـ5ـ

.. وْآخْرِتْهَا شُو؟!

الأيَّامْ تَرْكِتْنَا

بْبَحْر الْخَطِيِّه نْعُومْ

وْنِسْيِتْ عَ وِجَّا رْسُومْ

مِنْ وَهجْ ضِحْكِتْنَا

مِنْ لَوْن أَحْلَى غْيُومْ

مَرْقِتْ عَ تَلِّتْنَا

"افْتَكْرِتْ سْيُول الْحقْدْ

مْنِ زْمَانْ جَرْفِتْنَا

وْجَرْفِت حْرُوف الْمَجْدْ

مِنْ فَوْق صَفْحِتْنَا!"

ـ6ـ

.. وْآخْرِتْهَا شُو؟!

وْبَعِدْنَا بْلُبْنَانْ

مْنِنْحِنِي لِفْلانْ

وْمِنْأَلِّه فْلَيْتَانْ

وِنْدُورْ بِمْدَارُو

الإِنْسَانْ أَللَّـه أَوْجَدُو إِنْسَانْ

تَا يِرْفَع شْعَارُو

وِيْمَجّدُو هُوِّي

وَحْدُو إِلَه الْحُبّ وِالْقُوِّه

الْـ مِنْ نَفْخِتُو بْيِلْوِي

أَكْبَرْ زَعِيمْ.. وْمِنْ هَوَا غْبَارُو

بْيِتْطَايَرُوا نْفَارِيتْ.. أَنْصَارُو

ـ7ـ

.. وْآخْرِتْهَا شُو؟!

ما عَادْ فِينَا دَمّْ

عَ كِتِرْ ما تْعِبْنَا

وْزَادِتْ مَصَايِبْنَا

ضِعْنَا بْزَاوَايَا الْعَتْمْ

لا الشَّمْسْ بَعْدَا شَمْسْ

وْلا نُورْهَا بْيِلْمَعْ

حَتَّى غْنَانِي الأَمْسْ

بِالْكَادْ نِتْسَمَّعْ

صِرْنَا عْذَاب النَّفْسْ

وْصِرْنَا التّنْهِيدَاتْ

وْلَوْلا مَرَقْ شِي عرْسْ

مِنْخَزِّق الزِّيناتْ

ـ8ـ

.. وْآخْرِتها شُو؟!

وْنِحْنَا اللِّي عَمْ نِخْسَرْ

هَـ الأَرْضْ وِالأَحْبَابْ

اللِّي تْحَوّلُوا لِتْرَابْ

كِرْمَالْ يِتْمَخْطَرْ

فَوْقُو الزَّعِيمْ السَّافِل النّصَّابْ

يَللِّي بْتِمُّو نْيَابْ

بِتْقَرْقِط الْخَنْجَرْ

ـ9ـ

يَا رَيْت فِيِّي خَلِّص بْلادِي

مِنْ كِلّ آلامَا

وْتِدْجِيلْ حُكَّامَا

وْتبْوِيسْ الأْيَادِي

وْيَا رَيتْ فِيِّي إِشترِي بْدَمِّي

أَمْن الشَّعبْ كِلُّو

وْبَدْل "الْعَشِيرِه" يْقَدِّس "الأُمِّه"

وِيْوَحِّد الْكِلْمِه

وْما يْعُود يِقْدِرْ جَيْش يِحْتَلُّو

ـ10ـ

.. وْآخْرِتْها شُو؟!

قْرِفْنَا الْحَكِي يَا ناسْ

قْرِفْنا الشِّربْ وِالْكاسْ

قْرِفْنا الْمَحَبِّه وِالزَّهرْ

قْرِفْنَا نْأَدِّنْ بِالْفَجْرْ

أَوْ نِحْضَر الْقدَّاسْ

قْرِفْنَا نْكَمِّلْ هَـ الْعُمرْ

الْخَالِي مْنِ الإِحْسَاسْ.

**

فخّار يكسّر فخّار

ـ1ـ

خَايِفْ مِنْ هَـ الْـ وِقْفُوا بْدَرْبِي

الْـ شَكُّوا صَابِيعُنْ بِعْيُونِي

الْـ سَكْبُولِي بْدِينَيِّي الْكِذْبِه

الْـ زَتُّونِي بْدِنْيِي مَجْنُونِه

النَّاس الْـ عَمْ بِيبِيعُوا حَالُنْ

لِلشَّيْطَان الْـ وِقْفِ قْبَالُنْ

عَارِي مِنْ وَرْقَات التِّينْ

تَا صَارُوا بْفَيَّات خْيَالُنْ

يِمْشُوا وْهِنِّي فِزْعَانِينْ!

ـ2ـ

زْرَعْتِلُّنْ طُرْقَاتُنْ زَهْرْ

قَطْفُوا الزَّهْر وْضِحْكُوا عْلَيِّي

سْقِيتُنْ مِنْ قَلْفِيتِي خَمْرْ

شِرْبُوا الْخَمْر وْعِلْقُوا فِيِّي

شُو بَدِّي إِعْملْ يَا رَبِّي

مِلْكُوا الأَرْض.. مْلِكْت الْغُرْبِه

خَلِّصْنِي مِنْ ظلْمُنْ.. وَقِّفْ

عَ بْوَابِي مَارِدْ بِيخَوِّفْ

وِبْيَعْرِفْ أَسْرَار اللّعْبِه!

ـ3ـ

أَرْقَامُنْ.. إِكْلِتْ أَرْقَامِي

وِحْسَابُنْ.. غَطَّى عَ حْسَابِي

وْطوْلِتْ بِعْيُونُنْ أَيَّامِي

دَقُّوا عَ أَوْتَار عْصَابِي

افْتَكْرُوا إِنُّو جْنُونِي قَرَّبْ

وْأَعْصَابِي مْنِ الدَّقّ بْتِتْعَبّْ

وْمَا عِرْفُوا وَقْت الْـ بِتْعَذَّبْ

بْيِتْجَدَّدْ عُمْرِي بِعْذَابِي!

ـ4ـ

سَرْقُوا عَنْ طَاوِلْتِي الْخُبْزْ

وْتَرْكُوا طْفَالِي عَمْ بِتْصَرِّخْ

قَالُولِي: طَعْمِيهُنْ عِزّْ

تَا عِزَّكْ بِالْبَطْن يْفَرِّخْ

تَارِي الْـ مَا عِنْدُو أَطْفَالْ

عَمْ يِقْتُلْ تَا يْجَمِّعْ مَالْ

مَا بِيهِمُّو تِفْنَى عْيَالْ

بِيهِمُّو هَـ الْكَوْن يْدَوِّخْ!

ـ5ـ

خَايِفْ مِنْ إِيدَيْهُنْ تِطْوَلْ

وِتْطَال الْغُرْبِه وْسِكَّانَا

خَايِفْ مِنْ إِجْرَامُنْ يُوصَلْ

وْيِقْضِي عَ مْحَبِّةْ إِنْسَانَا

خَايِفْ مِنْ إِشْيَا مَجْهُولِه

مِنْ نَاسْ بْتِخْلَقْ بِاللَّيْلْ

عْيُونُنْ مَفْتُوحَه وْمَسْطُولِه

وْعَ شْفَافُنْ صَرْخَات الْوَيْلْ

ـ6ـ

لَوْ فِيِّي إِخْلَقْ مِنْ حَالِي

عَالَـمْ.. يَعْرِفْ شُو اللِّي صَارْ

يِمْكِنْ كِنْت بْطَمِّنْ بَالِي

وْبِزْرَعْ خَلْف اللَّيْل نْهَارْ

لَكِنْ كِلُّنْ مِلْهِيِّينْ

وْعَمْ بِيمُوتُوا فِرْحَانِينْ

نِبَّهْتُنْ.. قَالُوا: مِسْكِينْ

فخَّار يْكَسِّرْ فخَّارْ!

ـ7ـ

وَيْنُنْ؟!.. وَيْنُنْ؟!.. شُو اللِّي صَابُنْ

الْـ كَانِتْ أَمْجَادُنْ مضْوِيِّه

الأَرْض انْتَلْيِتْ مِنْ أَحْبَابُنْ

وْبَعْدَا عْقُولُنْ هِيِّي هِيِّي؟!

مَا عِرْفُوا الْمَاضِي مَا بْيِرْجَعْ

وِالْحَاضِرْ مُشْ مُمْكِنْ يِرْكَعْ

وْمَهْمَا رَكْضُوا.. مَوْتُنْ أَسْرَعْ

وْآخِرْتُنْ لِلشَّرّ هْدِيِّه؟!

ـ8ـ

وَيْنُنْ؟!.. وَيْنُنْ هَللِّي كَانُوا

تُوعَى الدِّنْيِي مِنْ كِلْمَاتُنْ

وِالْقَلْب الْـ ضَيَّعْ إِيمَانُو

يْلاقِي إِيمَانُو بْحَكْيَاتُنْ؟!

ضَاعُوا لِمِّنْ مَجْدُنْ ضَاعْ

وْصَارُوا السِّلْعَه الْـ عَمْ تِنْبَاعْ

وِبْيُوتُنْ لِلْغَيْر مْشَاعْ

وِالشَّوْك مْغَطَّى طرْقَاتُنْ

ـ9ـ

يَا شَعْبِي الْوَاقِفْ بِالْعَتْمِه

وِالنُّور بْقِنْدِيلَكْ حَامِلْ

نَاطِرْ حَتَّى تْقِلُّنْ كِلْمِه

تِضْوِي وْتِكْبَرْ قَدّ النِّجْمِه

أَوْ تِزْغَرْ وِتْصَفِّي مْشَاعِلْ

دَبْحُوكْ.. وْدَهْنُوا جَزْمَاتُنْ

بَاعُوكْ.. وْعَبُّوا خَزْنَاتُنْ

وْبَعْدَكْ عَمْ تِسْمَعْ حَكْيَاتُنْ

قَاتِلْهُنْ.. يَا شَعْبِي.. قَاتِلْ

ـ10ـ

يَا رَيْت بْتَعْرِف الِحْكَايِه

اللِّي حْرُوفَا انْكَتْبِتْ بِالدَّمّْ

الْـ بَعْدُنْ مَا حَطُّولا نْهَايِه

وْلا اسْتَحْيُوا مِنْ دَمْعِةْ أمّْ

وْلا مِنْ صَرْخِةْ طفْل زْغِيرْ

عَمْ يِشْحَدْ مِنْ كِتْر الْجُوعْ

وَاقِفْ عَ بْوَاب التِّعْتِيرْ

وْعَ خْدُودُو حَبَّات دْمُوعْ

وِبْقَلْبُو عَمْ يِغْلِي السَّمّْ

ـ11ـ

وْيَا رَيْت بْيِرْجَعْ مَاضِينَا

وِالتِّهْجِير يْصَفِّي ذِكْرَى

تْرَكْنَا مْحَارِمْنَا عَ الْمِينَا

بَرْكِي بْتِسْتَقْبِلْنَا بُكْرَا

تْرَكْنَاهَا بْيَارِقْ مَرْفُوعَه

تِحْكِي حْكَايِتْنَا بِدْمُوعَا

بَرْكِي الْحَقّ بْيِرْجَعْ يُوعَى

وِيْمَسِّحْ عَنْ وِجُّو الْغَبْرَه

ـ12ـ

وِصْلُوا عْلَيْك.. وْوِصْلُوا عْلَيِّي

وْمَا بْتِفْرُقْ لَوْلا اغْتَالُونِي

مَا دَامَكْ رَحْ تِبْقَى فِيِّي

الْقَلْب.. الرُّوحْ.. وْضَوّ عْيُونِي

حْكِيتِلَّكْ كِلْمِه بِالسَّابِقْ

شِفْتَكْ فَوْق الْكِلْمِه مَارِقْ

وِمْغَطَّى عْيُونَكْ.. وِالسَّارِقْ

عَمْ يِسْرُقْ مِنْ بَيْت الْمُونِه!

ـ13ـ

فَبْرِكْ مِنْ ضَافِيرَكْ خَنْجَرْ

شِكُّوا بْصَدْرُنْ لا تِتْأَخَّرْ

إِيدَيْهُنْ خَنْقِتْ أَنْفَاسَكْ

وْإِجْرَامُنْ عَمْ يِقْوَى أَكْتَرْ

سَاعِدْنِي وَحِّدْ قِدَّاسَكْ

مَعْ تأْدِينَكْ.. حَتَّى يِكْبَرْ

جِسْمَكْ.. وِيْخَافُوا مْنِ قْيَاسَكْ

قِدَّام الْمَارِدْ يَا شَعْبِي

عَ طُول الْحُكَّامْ بْتِزْغَرْ.

**

صوتي مبحوح

ـ1ـ

صَوْتِي مَبْحُوح وْحنْجِرْتِي

نِشْفِتْ مِنْ هَبَّات غْبَارِكْ

وِالْغِنِّيِّه الْـ كانِتْ إِنْتِي

انْدَبْحِتْ وِانْشَلْحِتْ عَ حْجَارِكْ

ردِّي الْغِنِّيِّه يَا بْلادِي

وِالضِّحْكِه لِشْفَاف زْغَارِكْ

ردِّيلِي عِزِّي وْأَمْجَادِي

تَا ضَوِّي النّجْم مْقَابِيلِكْ

صَوتِي مَبْحُوح.. وْعَمْ إِحْلَمْ

إِرْجَعْ يَا بْلادِي إِتْعَلَّمْ

دَوْزِن الْعُود وْغَنِّيلِكْ:

"يَا غْزَيِّلْ يَا بُو الْهِبَا

يَا هَاوِي يَا مْعَذِّبَا

يَلْلاَّ نِرْجَعْ عَ بْلادِي

وِنْرَجِّعْ عَهْد الصِّبَا

ـ2ـ

يَا غْزَيِّلْ قللُّو وْقللُّو:

عَلَم الأرْزِه مِنْجِلُّو

وْبَاقِيلْنَا لُبْنَانْ كِلُّو

مْنِ السَّاحِلْ حَتَّى الرُّبَى

ـ3ـ

يَا غْزَيِّلْ بِـ غُرْبِتْنَا

مَا نْسِينَاهَا لْضَيْعِتْنَا

بَشِّرْهَا بِـ رَجْعِتْنَا

قَبْل الشَّمْس الْغَارِبَه

ـ4ـ

يَا غْزَيِّلْ شُو مَا صَابَا

نِحْنَا نِحْنَا أَحْبَابَا

وْمَجْبُولِين مْنِ تْرَابَا

هَاك الأرضْ الطَّيِّبَه"

ـ5ـ

صَوْتِي مَبْحُوح.. وْكِرْمَالِكْ

رَحْ إِغْزُلْ مِنْ "أُوفِي" شَالِكْ

وْإِفْرَحْ لَمَّا نَايِي يِبْكِي

وِيْنَزِّلْ دَمْعَاتُو قْبَالِكْ

شُو بَدِّي إِحْكِي تَا إِحْكِي

عَمْ جَرِّبْ مِنْ صَخْر جْبَالِكْ

وْمِنْ قُوِّةْ إِيمَان رْجَالِكْ

إِسْرُقْ يَا بْلادِي مُوَّالِكْ:

"قَالُولي: الْمَالْ.. قِلْتِلُّنْ: مَا بَدِّي

بَدِّي الْمَجْدْ شَامِيِّه عَ خَدِّي

أَنَا مْنِ بْلادْ أَرْزَاتَا جَوَاهِرْ

وْتُرَابَا تِبِرْ عَمْ يِلْمَعْ بِـ يَدِّي"

ـ6ـ

صَوتِي مَبْحُوح.. وْآمَالِي

إِمْحِي بِالنَّغْمِه لَيَالِي

وْرَنْدِحْ شْوَيِّةْ قِرَّادِي

عَمْ تِكْبَرْ وِتْعِيش بْبَالِي

حَابِبْ غَنِّيلِك يَا بْلادِي

وْخَايِفْ مِنْ حَالِي عَ حَالِي:

"ردِّي يَا بْلادِي ردِّي

الضَّرْبَات كْتَارْ

يَا نبْع الْجَارِي حَدِّي

وْقَلْبِي عَ نَارْ

ـ7ـ

مَهْمَا صَابِكْ لا تْقُولِي

نِسْيُوا الأيَّامْ

وْنِسْيُوا عَهد الطّفُولِه

بْغُرْبِةْ أَحْلاَمْ

الرُّوح بْحُبِّكْ مَجْبُولِه

مْنِ الصَّعْب نْنَامْ

وْعَمّ نْشُوفِكْ مَقْتُولِه

بْإِيدَيْنْ الْعَارْ.."

ـ8ـ

صَوْتِي مَبْحُوح.. وْإِيمَانِي

فِيكِي يَا بْلادِي خَلاَّنِي

إِرْفَع الصَّوْت وْغَنِّيلِكْ

رَحْ إِزْرَعْ إِسْمِكْ عَ شْفَافِي

وْإِحْملْ صَلِيبِكْ عَ كْتَافِي

وْإِطْفِي بِالدَّمْعَه غَلِيلِكْ

بَرْكِي يَا بْلادِي الْحَنُونِه

بْصَوْتِي وِبْدَمْعَات عْيُونِي

بْرِدِّلِّكْ نِتْفِه مْنِ جْمِيلِكْ..

**

قرف

ألقيتها عام 1993، يوم كرّمت جمعيّة بنت جبيل في سيدني الأستاذ محمود بيضون، وقد أحدثت ضجة أدبية وإعلامية لم يسبق لها مثيل في أدبنا الاغترابي.

ـ1ـ

نَفِّضْ عَنْ إِيدَيْك الْوَيْلْ

بْغُرْبِه.. غَطَّى نْهَارَا لَيْلْ

وْعَلِّقْ عَ كْفُوف الطّرْقَاتْ

شَمْس وْبَدْر وْنَجْم سْهَيْلْ

وْمِنْ رَوْضَكْ حَوِّشْ بَاقَاتْ

ما بْتِحْمِلْهَا ضْهُور الْخَيْلْ

وْمِنْ شِعْرَكْ جَمِّعْ أَبْيَاتْ

مِنْشَافِه مِنْ تَانِي مَيْلْ

وْلَفْلِف بِالشُّكْر الْكِلْمَاتْ

وْقَدِّمْهُنْ وِالْعِطْر يْفُوحْ

لِلْـ غَابُوا مِنْ بِنْت جْبَيْلْ

ـ2ـ

غُيَّابِكْ يا بِنْت النُّورْ

زَرْعُوكِي جُوَّات الْقَلْبْ

وْضَوُّولِكْ شَمْع وْبَخُّورْ

وْهِدْيُوكِي مْحَاصِيلْ الْغَرْبْ

حِمْلُوا وْلادُنْ.. قَطْعُوا بْحُورْ

وْمَا خَافُوا مْسَامِيرْ الصَّلْبْ

وِقْفُوا بْوِجّ الْكِذْبِه سُورْ

وْمِحْيُوا الإِشْيَا الْـ مَا بْتِنْحَبّْ

بْكِلْمِتْهُنْ.. قَصُّوا السَّاطُورْ

الْـ عَمْ بِيقِصّ رْقَابْ الشَّعْبْ

شَعْبِكْ وَاقِفْلِكْ نَاطُورْ

عْيُونُو مْمَسْمَرْهَا عَ الدَّرْبْ

وِالْحَرْب اللِّي انْوَجْدِتْ زُورْ

حَرْقِتْ مَسِّينُو هَـ الْحَرْبْ

ـ3ـ

إِبْنِكْ شَاعِرْ خَلاَّ الْكَوْنْ

يْدَاوِي جْرُوحُو بِالْبَسْمِه

مَحْمُودِكْ.. شَطْحَات اللَّوْنْ

الْـ عَمْ تِفْرَحْ فِيهَا الرَّسْمِه

تْرَابِكْ.. مِنْ هَوْنِيك لْهَوْنْ

حِمْلُو عَ جْنَاح النَّسْمِه

شُو بْقِللُّو؟!.. مِدِّيلِي الْعَوْنْ

إِسْمُو مْرَايِه بْدَفْتَرْ شِعْرْ

وْحَابِبْ يِتْمَرَّى إِسْمِي!

ـ4ـ

"جُرْح تْرَابُو".. صَفَّى اللَّحْنْ

اللِّي تْدَوْزَنْ عَ وْتَار وْتَارْ

جَمَّعْ كِلْمَاتُو بِالصَّحْنْ

وْطَعْمَاهُنْ لِوْلاد زْغَارْ

كِلْمَاتُو.. بْيِشْحَنْهُنْ شَحْنْ

فِيهُنْ نَار بْتِطْفِي النَّارْ

الْغُرْبِه طَحْنِتْ قَلْبُو طَحْنْ

الدِّنْيِي بَعَيْنُو: بِنْت جْبَيْلْ

وْشِعْرُو كِلُّو لْهَاك الدَّارْ

ـ5ـ

كِرَّمْتِينَا بْتِكْرِيمُو

بَيْضُون.. الْـ أَنْقَى مْنِ التَّلْجْ

تْرِسْمَلْنَا بِتْعَالِيمُو

صِرْنَا وْرُودْ تْحَاكِي الْمَرْجْ

مِنْ حِضْنِكْ صَعْب نْقِيمُو

غِرْقَان بْوَهْجِكْ يَا وَهْجْ

وْرَاجِعْلِكْ.. أَللَّـه يْدِيمُو

رَاجِعْ تَا يْحَطِّمْ أَصْنَامْ

نَصْبُوا مْشَانِقْنَا عَ الْبُرْجْ

ـ6ـ

اشْتَقْنَالِكْ يَا بِنْت الْخَيْرْ

وْبِنْت الأَرْض الْمَفْجُوعَه

بْلادِي.. اللِّي غَنَّاهَا الطَّيْرْ

لَيشْ غِرْقَانِه بِدْمُوعَا؟!

بْتُوقَعْ كِلّ مَا تْجِدّ السَّيْرْ

وْبِتْفَشْكِلْنَا بِوْقُوعَا

حَرْقُوا الْجَامِعْ.. حَرْقُوا الدَّيْرْ

وْخَنْقُوا الْكِلْمِه الْمَسْمُوعَه

وْرِكْبُوهَا مَلْيُونْ "زْبَيْرْ"

وْهِيِّي تَحْتُنْ مَوْجُوعَه!

ـ7ـ

بدِّي سِبُّنْ.. بدِّي فِشّْ

خُلْقِي.. وْقُول الْـ مَا بْيِنْقَالْ

أَرْضِي عَمْ يِحْكِمْهَا الْغُشّْ

غَطُّوا عَوْرِتْهَا بِالْمَالْ

الْـ مَا بْيِنْغَرّ بْسِحْر الْقِرْشْ

بِتْعَلِّمْ عَ زْنُودُو حْبَالْ

الْـ مَا بْيِمْشِي.. بْيِمْشِي بِالدَّفْشْ

اللِّي بْيُوقَعْ بِتْجِرُّو جْمَالْ

اللِّي بْيِحْكِي.. فِي بْتِمُّو قَشّْ

اللِّي بْيِهْرُبْ.. خِسْرُو الِعْيَالْ

مَا بْتِسْمَعْ غِيرْ كِلْمِةْ "هِشّْ"

جْحَاشْ.. وْنَاقِصْهُنْ خِيَّالْ!

ـ8ـ

شُو رْبِحْنَا مِنْ حَرْب سْنِينْ؟!

كِذَاب الْـ بِيقُول الْعَكْسْ:

رْبِحْنَا أَطْفَال مْسَاكِينْ

مَا شَافُوا بِعْيُونُنْ شَمْسْ

رْبِحْنَا إِخْوِه مَلْجُومِينْ

خِصْيُوهُنْ بِـ كِلْمِةْ "هِسّْ"

رْبِحْنَا أَحْزَاب دْكَاكِينْ

بِتْقَتِّلْ أَعْضَاءَا بَسّْ!

رْبِحْنَا كِتَّابْ مْلاعِينْ

عَاشُوا عَ الْقَبْض وْعَ الدَّسّْ

رْبِحْنَا الدِّينْ الْـ مَنُّو دِينْ

الْـ تَاجَرْ بِاللِّفْت وْبِالْخَسّْ

رْبِحْنَا حُكَّامْ شْيَاطِينْ

لَوْ مِتْنَا.. مُشْ رَحْ بِتْحِسّْ

كَبْسُونَا طُون وْسَرْدِينْ

وِالْعُلْبِه.. سَمُّوهَا حَبْسْ

رْبِحْنَا شَوْفَاتْ فْسَاتِينْ

سَوْدَا.. مَا بْتِتْلاقَى بْعِرْسْ!

نِحْنَا مْنِخْلَقْ مَقْبُورِينْ

نِسّْ.. وْعَمْ بِيزَمِّطْ مَوْتْ

لا بَقَى تْزَمِّطْ يَا نِسّْ!

ـ9ـ

جْنُوبِكْ.. مَلْعَبْ لِلْيَهُودْ

وْنِحْنَا عَمْ نِرْقُصْ وِنْفُزّْ

وِنْعَلِّقْ أَعْلام الْجُودْ

فَوْق الصَّدْر الْـ عَمْ بِيهِزّْ

خَايِفْ آيَات التَّلْمُودْ

تِمْحِيلِكْ آيَات الْعِزّْ

وْيِهْدُوكِي مْوَاسِمْ بَارُودْ

وْتِتْخَبَّى شْوَالات الرِّزّْ

خَايِفْ يُوحَنَّا وْمَحْمُودْ

يْصِيرُوا لُغْز بْقَلْب اللُّغْزْ

يْضِيعُوا.. وِيْضِيع الْمَقْصُودْ

وْكِلّ مَا شِبْعُوا يْعَضُّوا الْبِزّْ!

يَا بِنْت جْبَيْل الْمَرْصُودْ

إِسْمِكْ بِالْقَلْب الْـ بِينِزّْ

أمِّتْنَا.. شَعْبَا مَفْقُودْ

بْتِسْقِي دَمُّو لِلْحُكَّامْ

وْحُكَّامَا بِتْقِللاَّ: طُزّْ!

ـ10ـ

مْنُوقَفْ بِالصَّفّ تْوَابِيتْ

ما بِتْسَاعَا مْقَابِرْنَا

وْعَمْ تِنْغُلْ فِينَا بْرَاغِيتْ

بِتْزَكْزِكْ بِخْوَاصِرْنَا

مْنِضْحَكْ مِنْ كِتْر التِّنْكِيتْ

وْمِنْقَرِّقْ عَ مْسَاطِرْنَا

وْمِنْصَلِّي يْهُبّ الْكِبْرِيتْ

وْبِلْسَانَاتُو يْحَمِّرْنَا

وِمْنِنْدَهْ زِلْـم طْوَاغِيتْ

تْحِنّ عْلَيْنَا.. وْتِقْبِرْنَا

ـ11ـ

بِنْت جْبَيْل بْتِسْمَحْلِي

حَاكِيك وْقَلْبِي مَفْتُوحْ

أُمِّتْنَا جِهْلِتْ جَهْلِه

ما خَلِّتْ لِلْعِزّ صْرُوحْ

ما بْتِمْشِي دْرُوب السَّهْلِه

عَ الدَّرْب الصَّعْبِه بِتْرُوحْ

مِعْتَادِه تَاكُلْ قَتْلِه

وْبَعْد الْقَتْلِه تْعِدّ جْرُوحْ

الأُمِّه الْـ حَاكِمْهَا بَهْلِي

يا بِتْلَيِّسْ تِمَّا بْطِينْ

يا بْتِنْشُرْ عَرْضَا عَ سْطُوحْ!

ـ12ـ

مِسْلِم، قَالُوا، وْنصْرَانِي

عِلْقُوا عَ الْجُبْنِه مَرَّه

نْيُويُورْكِيِّه.. حِرْزَانِه

مْبَارِحْ وِصْلِتْ مِنْ بَرَّا

قَال الأَوّلْ لِلتَّانِي:

تْرِكْهَا.. وْعَيْنُو مِحْمَرَّه

قَال التَّانِي: إِيمَانِي

بِيقِللِّي كْسُور الْجَرَّه

.. وْعَ الْجُبْن الأَمِيرْكانِي

دْيَانِه هَجْمِتْ عَ دْيَانِه

وْمِحْيُوا الشَّعْب اللُّبْنَانِي

"وْمِنْ بَرَّا ضْرُوبْ يَا خَرَّا"!

ـ13ـ

قْرِفْت.. قْرِفْت مْنِ الْحَالِه

اللِّي وْصِلْنَالا بْهَالأَيَّامْ

التِّبْر تْحَوَّل لِنْخَالِه

الْبُومِه لِبْسِتْ رِيش نْعَامْ

الْكِذْبِه.. صَارِتْ نِقَّالِه

الصَّادِقْ عَ الْكِذْب بْيِنْلامْ!

عِنْد الشَّيْطَان فْعَالِه

جَبْرِتْ أَللَّـه وَحْدُو يْنَامْ

مِينْ عَمْ يِكْذبْ يَا خَالِي

قَسْمُوا أَللَّـه تْلاتْ أَقْسَامْ

وْقَتْلُوا عْيَالَكْ وِعْيَالِي

بْإِسْمُو.. هَـ الإِسْم الْقُدُّوسْ

يَهُود.. نْصَارَى وْإِسْلامْ؟!

ـ14ـ

بْلادَكْ كَانِتْ غِنِّيِّه

دَبْحُوهَا.. وْشَعْبَا تْقَسَّمْ

وْلِزْعَامِتْهَا الْمِجْوِيِّه

سَلَّمْ إِبْنُو وِاسْتَسْلَمْ

عَمْ تِحْكِمْهَا عَقْلِيِّه

مِنْ فِكْرَا الْفِكْر تْسَمَّمْ

نَرْجِسِيِّه وْرِجْعِيِّه

عَ شْفَافَا الْكِذْب مْعَلَّمْ!

بْلادَكْ.. بَرَّا مِضْوِيِّه

وْمِنْ جُوَّا قَلْبَا مْعَتَّمْ

هَيْدِي بْلادْ الْحُرِّيِّه

الْـ حُرِّيِّتْهَا مُلْك وْحُوشْ

بْلَحْمَاتَا عَمْ تِتْنَعَّمْ!

ـ15ـ

سَكِّرْ تِمَّكْ.. فَاق الْجَارْ

تِمَّكْ لازِمْ يِتْسَكَّرْ!

جَارَكْ بِيسَجِّلْ أَخْبَارْ

بْيِعْصِرْهَا بْإِدْن الْمَخْفَرْ

زَرْعُوا جَاسُوسُنْ بِالدَّارْ

وْإِنْت مْغَمَّضْ يَا مْعَتَّرْ

جَارَكْ.. صَدْر كْنَافِه صَارْ

وْبَعْدَكْ مَنْقُوشِةْ زَعْتَرْ!

ـ16ـ

الْغُرْبِه الْـ بَزْقِتْنَا حْكَايِه

خَايِفْ شُو بَدِّي قِلَّلا:

مِنْفَشِّخْ رَايِحْ جَايِي

وْبِالْفَشْخَات مْنِتْسَلَّى

عَمْ مِنْخَلِّفْ تُوصَايِه

خْلاَيِفْنَا يَا مَشّاللَّـه

تِمُّنْ مِتْل الْكُوسَايِه

الشَّاطِرْ يِحْشِيهَا كِلاَّ!

مُشْ عَمْ تِنْفَعْ تِرْبَايِه

الدِّنْيِي مِنُّنْ يَا دِلاَّ

جِيل وْبَدُّو تِنْقَايِه

وْتَا نْنَقِّي.. قُولُوا: أَللَّـه!

ـ17ـ

جِينَا عَ الْغُرْبِه وْقِلْنَا:

بْقُوِّةْ أَللَّـه تْرِسْمَلْنَا

تْجِوَّزْنَا.. وْخِلَّفْنَا وْلادْ

وْمِنْ بَعْد الْجَازِه جْهِلْنَا

طِلَّقْنَا.. وْصِفَّيْنَا بْعَادْ

بْتِقْرَفْ مِنَّا عْمَايِلْنَا!

قِلْنَا: الْحُرِيِّه أَمْجَادْ..

مَرْكَبْ.. قَادِرْ يِحْمِلْنَا

حْرَقْنَا الْمَرْكَبْ.. صَفَّى رْمَادْ

وِبْدِخَّانُو تْكِحَّلْنَا

تْحِرَّرْنَا!.. دَاخِتْ الِبْلادْ

وْمِنْ كِتْر الدَّوْخَه.. قْتِلْنَا!

ـ18ـ

الْحُرِيِّه.. فْهِمْنَاهَا "سَاكْسْ"

وْ"سَاكْسْ" الْحُرِيِّه أَمْرَاضْ

مْحَمَّدْ.. صَفَّى إِسْمُو "مَاكْسْ"

تْفَرْنَجْ.. تَا يْزَوْبِنْ فِيَّاضْ!

وْنَجِيبِه.. بْيِبْسِطْهَا "رَاكْسْ"

الْكَلْب الْـ بِتْرَكِّبْلُو حْفَاضْ!

يَا أَللَّـه مْوَدَّالَكْ "فَاكْسْ"

قِلَّكْ إِنُّو نْكَايِه فِيكْ

دْجَاجِتْهُنْ عِمْلُوهَا دِيكْ

وِالدِّيكْ، بْهَالْغُرْبِه، بَاضْ!

ـ19ـ

طَلِّقْ.. أُوعَا تْرَبِّي عْيَالْ

شَبِّيطَكْ أَقْوَى شَبِّيطْ!

مَرْتَكْ بِتْزَمِّطْ أَطْفَالْ

وْإِنْتَ قِرْفَان التِّزْمِيطْ

كِبْرِتْ.. صَعْبِه تْمَشِّي الْحَالْ

جُورِتْهَا بَدَّا تِبْلِيطْ!

ضَلّ تْنَقَّلْ فَوْق تْلالْ

وْحَوِّشْ بِالإِدْن زْلاغِيطْ

طَالِعْ، مِنْ زِغْرَكْ، خِيَّالْ

فَحْل.. وْبِتْحِبّ التِّلْبِيطْ!

سِبْحَانُو الْـ رَسْمَكْ رِجَّالْ

عَامُودَكْ وَاقِفْ بِيضَلّ

أَعْوَجْ.. لازِمْلُو تِزْبِيطْ!

ـ20ـ

قْرِفْت النَّظْم.. قْرِفْت الشِّعْرْ

مِنْ يَوْم الْـ أَشْعَرْ طَاوُوسْ

الطَّاوُوس الْـ مَا بْيِطْلَعْ شِبْرْ

بْأَشْعَارُو صَفَّى جَامُوسْ

عَرْبَشْ عَ أَبْيَات الْعُهْرْ

وْصَارْ يِهْجِي جِدُّو قَدْمُوسْ

وِيْعَلِّقْ عَ بْوَاب الْهَجْرْ

مْنَاشِير الْكِذْب بْدَبُّوسْ

يِعْمِي قَلْبُو.. خَلاَّ الكُفْرْ

شْفَاف الْقِدِّيسِين يْبُوسْ!

يِعْمِي قَلْبُو.. بْيَاخُد صِفْرْ

وِبْصِفْرُو عَمْ يِعْطِي دْرُوسْ!

شَاعِرْ.. شِعْرُو مِتْل الشَّعْرْ

وْقَادُوسُو مِلاَّ قَادُوسْ

يَا كِلْمِه بَرَّاتْ السَّطْرْ

حِنِّي عَ السَّطْر الْمَهْوُوسْ

إِنْتِي الْمَجْد وْإِنْتِي الْفَخْرْ

وْإِنْتِي الشِّعْلِه الْـ مَا بِتْنُوسْ

خَلِّيكِي بْإِيدَيْن الْجَمْرْ

لا تْبِيعِي حَالِكْ لِتْيُوسْ.

ـ21ـ

تْيُوس.. وْلازِمْهُنْ تِرْخِيصْ

أَكْبَرْ كِذْبِه شْهَادَاتُنْ

بِتْحِسّ بْحَكْيُنْ تِخْبِيصْ

بْيُوت الْمَيّ بْحَكْيَاتُنْ

إِمُّنْ حِيص وْبَيُّنْ بِيصْ

وْجِدُّنْ نَاكِرْ إِمَّاتُنْ

بَيْضَاتُنْ بَدَّا تِفْقِيصْ

قَفِّتْ فَوْقَا لْسَانَاتُنْ

بَيْضَه مِحْشِيِّه تِفْنِيصْ

وْبَيْضَه مِحْشِيِّه تِخْصِيصْ

وْمَا بِتْفَقِّصْ بَيْضَاتُنْ!

ـ22ـ

بْيِنْقِدْنَا نَاقِدْ مَمْحُونْ

مَا بْيَعْرِفْ يِقْرَا إِسْمُو

وْبِيبَلِّشْ يِلْزِقْنَا فْنُونْ

بِشْعَه.. وِالأَبْشَعْ كَسْمُو

تَا يْحِبَّكْ.. قِللُّو: مَمْنُونْ

جَادِلْ.. بِتْصَفِّي خَصْمُو

وْلا تِنْسَى تْقَشِّرْ لَيْمُونْ

وْتِدْحَشْلُو الْمَوْز بْجِسْمُو

بْيَاكُلْ، مَا بْيِشْبَعْ، طَاحُونْ

عَمْ يِجْتَرّ حْرُوف حْرُوفْ

وْعَمْ يِتْصَبَّبْ عَ رَسْمُو!

ـ23ـ

وْمُشْ رَحْ إِسْكُتْ عَنْ فَنَّانْ

دَوَّخْ أَللَّـه بْتِطْبِيلُو

فَنُّو مْلَقْوَطْ كِيفْ مَا كَانْ

تْشِهْنُقْ كِرّ مْوَاوِيلُو

لَوْ زِنَّا فَنُّو بْمِيزَانْ

بْيِضْحَكْ عَ الْفَنّ الْكِيلُو!

بْيِحْكِي لِفْلانِه وِفْلانْ

حَبّ "الصَّافِي" يْغَنِّيلُو

وْ"فَيْرُوز" الْـ صَلِّتْ لُبْنَانْ

صَعْب تْهَدِّي مْقَابِيلُو

وْ"عَبْد الْوَهَّاب" الإِنْسَانْ

تَلْفَنْلُو مْنِ الْجَنِّه وْقَالْ:

رَفْعُوا فَوْق تْمَاثِيلُو!

ـ24ـ

لا تِزْعَلْ مِنِّي وِتْقُولْ:

رِخَّصْت شْوَيّ الْكِلْمَاتْ

عَصْرَكْ بِاللَّعْنِه مَجْبُولْ

بْحُورَكْ بِتْشَمِّسْ حَلْمَاتْ

وْتِلْفِزْيُونَكْ مِتْل الْغُولْ

بْيِعْرُضْ بِالزِّلْط النّجْمَاتْ

شِي بِالعُرْض وْشِي بِالطُّولْ

وْقَامَات تْكَبِّسْ قَامَاتْ!

عَالَـمْ حَشَّاشْ وْمَهْبُولْ

عَمْ يِتْغَذَّى بِالدَّمَّاتْ

وْعَمْ يِرْقُصْ عَ دَقّ طْبُولْ

بَخْشِتْ فِينَا الصَّمَّامَاتْ!

أَدْيَانُو؟!.. شِي مُشْ مَعْقُولْ

قَامِتْ عَ بَعْضَا قْيَامَاتْ!

وِبْلادَكْ.. فِيقْ يَا مَسْطُولْ

الْـ بَعْدُو عَايِشْ فِيهَا.. مَاتْ!

**

وحش المذاهب

ـ1ـ

فِزْعَان.. إِرْجَعْ إِقْرَف مْنِ جْديد

وْتَعِّب مَعي كل الْـ بيحبُّوني

مْنَرْفز صرت.. ما بْيِلْبَق التِّنْهيدْ

لْشاعرْ بيعلِّقْ كلمتو.. قُونِه

سمعت النّباح.. وْلَيْش حتّى زِيد

تْهُبْهُب جْرَاوِي رَح يِطِرْشوني؟!

سْمِعْتْ الشَّتايِمْ.. لَيْش حَتَّى عِيدْ

أَنّاتْ فِكر.. كْتِيرْ مَلْعُونِه؟!

وبُكرا، يا بِنت جبيل، جايي الْعيد

وْجايِبْ مَعُو عَطْف الْـ بيهَنُّونِي

ما عادْ بَدّي شْفافْ سَوْدا وْإِيدْ

تِشْلَح حَكِي وِتْقَلِّقْ ظْنُوني

صِرْت خايفْ يصدُق التّهديدْ

بِبْلادْ.. عَمْ بِتصير مَجْنُونِه

بَدْلِ الهدايا.. بْيِزْرَعوا بْواريد

وْبَدْل التَّهاني.. سْيَاخْ مَسْنونِه

وْمَهما، يا بِنْت جْبَيْل، كنت بْعيد

لَسْبِد ما رَجِّعْلِك دْيوني

سْألت شَعْبِك.. قُولْ شو بِتْريد؟!

بِهْديك قَلْبي! انْكانْ قَلْبي زْغِيرْ

يا رُوح رُوحِي.. بْقَدِّمْ عْيُوني

ـ2ـ

ما عادْ بَدّي فَيِّقْ الْحِيطانْ

وْلا إِطْعَمْ الجُوعان كِلْماتي

صَرْلِي سِنِه عَم شَيِّعْ الإِنسان

الْـ قَضَّى حَيَاتُو فَوْقْ صَفْحَاتِي

لا فِي صَداقَه تِنْعُش الْعطشانْ

ولا في صديق يْلِمّ دَمعاتي

ولا في صَلا بِتْزَوْزِق الإِيمانْ

وْلا فِي مَعابِدْ خَرْجْ رَكْعاتِي

وَحْش الْمَذاهِبْ.. شَوَّه الأَدْيانْ

بْيِجْعُرْ.. إذا بِغْرَق بِضِحْكاتِي

مَجْنُون، كاسِر.. فَزَّع الدَّيَّانْ

وْما فَزَّعْ اللّي شَوَّهوا حْيَاتِي

زَربُو بْقِنُّنْ.. دَعَّسْ الصِّيصانْ

دْجَاجُنْ هِشِلْ.. بِقْيُوا دْجَاجَاتِي

وْما فِي وْلا بَيْضَه تْرَجِّح الْقِبّانْ

وْفَشْرُوا بْعَيْنُنْ بِيعْ بَيْضَاتِي

ـ3ـ

الْجَنِّه حلمْ.. عَم نِحْلَمُو عَ طُولْ

وْمِنْخَاف نِخْسَرْهَا.. إِذَا خْطِينَا

نقطة ضُعف فِينَا.. وْمُشْ مَعْقُولْ

كِيف السِّياسِه كَمْشِتَا فِينا؟!

بِالْحَرْب.. بتدقّ الإِيمانْ طْبُولْ

بْتِتْخَشَّعْ.. بْتِخْفِي شَيَاطينا

عيسى مَعِي.. محمَّد معي.. بِتقُولْ

أَللـه مَعِي.. ضِدّ الْـ بيعادينا

بِتْجِرّنا لِلْمَوت مِتل الْغُولْ

مْنِسْتَشْهِدْ.. بْتِنْسَى أَسَامِينا

وْبِالسّلم.. قَحِّة سِلّ عم بتجول

سِكِينْ.. بتقصقص أيادينا

مَمْنُوعْ نِحْكِي.. صادْرِتْ الِعْقُولْ

مْنرجُف إِذا سْأَلْنا وْإِذا مْشينا

انْ عارَضْتْها.. وِكْشَفِتْها عَ أْصُولْ

انْ عِرَّيتْ كِذْبَا.. وِحْرَقِتْ دِينَا

بِتْكَفّرَكْ.. بِتْصَيّرَك مَسْطولْ

مَوْتَكْ حَلال بْإِسِم بَارِينا

يَا ربّ، مَرَّه بَسّ، وَدّي سْيُولْ

تجرُف شْلُوشا مِن أَراضينا

ما في وْلا دين.. وْما الْتَقَالو فْحُولْ

وَدّي شي شفرَه تْكُون شِغل الشَّرْق

تِخْصي الفحُول الْـ عم بْتِخصينا

ـ4ـ

كافِر إِنِتْ، قالوا، وبِالتِّكْفِيرْ

كَفْروا، لأَنُّنْ كَفَّروا مَخْلُوقْ

لا كْبيرْ حامي جَنّتو وْلا زْغِيرْ

السِّعر واحِدْ.. بَسّ ما في سُوقْ

آدَم ، إِذا ما كانْ بَيّي، بْصِيرْ

إِبِن حَوّا.. وْضَايِع الْخازوقْ

تِفسيرْ.. بَدّو مْنِ السَّما.. تِفْسِيرْ

إِخوانْ نِحنا.. لا تْزِيدوا شْقُوقْ

بِالْكُومبيُوتر.. ناس عَمّ بِتْطيرْ

وصْلُوا الْقَمَرْ.. قَطْفُوا الْغُروب شْروقْ

ونحنا، يا حَسْرَه، مْنركُب التّعتير

وسُوقْ جَحْشَكْ، يا حبيبـي، سُوقْ

ـ5ـ

مِينَكْ إنت، يا طَنْجرَه عَ النَّارْ

تا تنقُر التِّكفيرْ عَ دَفَّكْ

مينَكْ إِنِتْ، يا كَمِشتَيْن غْبارْ

والريح، متل الخوف، بِتْلِفَّكْ

ذنوبك، يا عرنوس الخطيّه، كتار

وْبِتْكَدِّس الأحكام عَ رَفَّكْ

لا تقول: قالوا.. كلنا تجّار

أللـه ما حاضَر يوم بِـ صَفَّكْ

مِسْلم مسيحي بالإِيمان كْبارْ

تا تْفَرِّقُنْ.. بِتْسَمِّيُنْ كُفَّارْ

وِبْتِدْبَحُنْ بالدَّور عَ كَفَّكْ

ـ6ـ

كِلْمِنْ عَ دِينُو.. الربّ بِيعِينُو

وِبْيِرزقو عَ قَدّ نِيَّاتُو

وْما بْيِرْحَم الْـ بِيتاجِر بْدِينُو

وْبِتْفَرِّقْ الأَحْباب كِلْماتُو

لَحْظَه بْلَحْظَه بْيِقعد يْزِينُو

وْبِيحاسْبُو بْأَصْدَق حِساباتُو

بِينَفّضُو.. بْتُوقَعْ شَياطِينو

عُيُونُن حمر بِـ لَون نَظْراتو

وْبْيِسْأَلُو : اللّي وَكّلَكْ مِينو؟!

يا مجرم الْـ كِتْرِتْ عِصاباتُو

هَللّي بِيحبّ الخالِق يْهينُو

يْهِينْ خَيُّو.. يْكَفِّرْ الإِنْسَانْ

الْـ خِلْقُو شَبِيهُو بْكِلّ حَالاتُو

**

يا جنوبي..

ـ1ـ

إنت الأوَّلْ.. إنت الأوَّلْ

وْبَعْدَكْ مِحَيّت الأَرْقَامْ

بْهَامَات الأَبْطَالْ مْكَلَّلْ

بْصَرْخَه.. نِسْيِتْها الأَقْلامْ

يا جْنُوبي.. يا طفل مْدَلَّلْ

هِدْيُوك بْعِيدَكْ ألْغامْ

عَنْ حُبَّكْ مُشْ رَحْ نِتْحَوَّلْ

مَهْمَا تْشَرِّدْنا الإيامْ

وْمَهْمَا الْفِتْنِه تِطْلَعْ.. تِنْزَلْ

مَا مْنِتْرُك شَعْبَكْ مِنْضَامْ

عَدُوَّك.. بِالشَّر مْأَصَّلْ

دمّو بيفَوِّرْ إجْرَامْ

كِذّابْ مْنَافِقْ ما بْيِسْأَلْ

هَمُّو يِقْضِي عَ الإسْلامْ

هَمُّو النَّصَارَى تِتْشَنْطَلْ

وِالنِّجْمِه تْرَكِّعْ أَعْلامْ

عَدُوَّكْ يَا جْنُوبي مْبَهْدَلْ

مِتْلِ الدّبَّان الْمَا بْيِخْجَلْ

بِتْكِشُّو.. بيِرْجَعْ يِتْسَلَّلْ

بدّو عَ فَرْشِتْنَا.. يْنامْ

ـ2ـ

قاوِمْ بِـ ضافيرَكْ قاوِمْ

هْدِينَاكْ الْقَامَاتْ سْلالِـمْ

قَانَا.. ما نِشْفُوا دَمَّاتَا

قَتْلُوا فيها الطّفل الحالِـمْ

قَتْلوا الْبَي الـ بِجْنَيْناتا

فاتِـحْ لِلأطيار مْطاعِمْ

قَتْلوا الأم الـ عَ دَيَّاتا

رقْصِتْ بِالأَعْراس مْحارِمْ

قَتْلوا الْعَدْرا وِصْلاوَاتَا

وِالإمامْ الْـ بَعْدُو صَايِمْ

عَدُوِّتْنَا.. اللّعْنِه بْذَاتَا

هِزَّا.. رَبِّيهَا.. مَحِّيهَا

مَلْعُون اللِّي بَدّو يْسَاوِمْ

ـ3ـ

يَا دِلّ الْـ ما بْيِحْمِي أَرْضُو

يَا دِلّ الْـ عايِشْ جَبَانْ

يَا دِل الْمستَرْخِص عَرْضُو

وْعَمْ بِيبِيعُو لْمِين مَا كانْ

وَحْدُو شَعْبَكْ كاتِبْ فَرْضُو

وْعَمْ بِتْزَقِّفْلُو الأزْمَانْ

ومهما عْلَيْكْ الْقُوِّه فَرْضُوا

ما بْيِرْكَعْ فِيكْ الإنْسانْ

أَبْطالَكْ صَعْبِه يِنْقِرْضُوا

هِنِّي الْحَق بْطُولُو وْعَرْضُو

وْعَمْ يِكْبَرْ فيهُنْ لُبْنَانْ

ـ4ـ

عامِلْ.. باقِي الْجَبَل الْعَالِي

وْمُشْ رَحْ يُوطَى مَهْما يْكُونْ

ضَحُّوا كِرْمَالُو بِالْغَالِي

وِانْزَرْعِتْ بِتْرَابُو عْيُونْ

عَ صْخورو تْبَوْدَرْ مُوّالي

الْفَالِتْ مِنْ شَاعِرْ مَجْنُونْ

وْعَ تْلالُو وِقَّفْت عْيَالِي

قَامَاتُنْ شَجَر الزَّيْتُونْ

يا جْنُوبي تَا تْرَيِّحْ بَالِي

لازِمْ تِفْضَحْ.. أُوعا تْبَالِي

الْـ بِيخُونَكْ.. أَللّـه بِيخُونْ

ـ5ـ

بنْت جْبَيْل.. الأَرْض الْخَضْرا

الْـ خِلْقِتْ بالْعِزّ وبالْقِدْرَه

غِنَّيتِلاّ غْنَانِي كْتِيرِه

تَا دَاوِي بِالْكِلْمِه.. قَهْرَا

جِيرِتْهَا.. يَا مَحْلَى الْجِيرِه

شَعْبَا.. بِيخَبِّرْ عَنْ طُهْرَا

بِنْت جْبَيْل كْبيرِه.. كْبيرِه

مِن عُمْر البُطولِه عُمْرا

يا جْنُوبِي .. شِي بَوْسِه زْغِيرِه

شْلَحْهَا فَوْق خْدُودَا الْحَمْرَا

بْحِبَّا.. أُوعَا تِفْتَحْ سِيرِه

بْعَتْلِي مِينْ يْطَفِّي الْجَمْرَه!

ـ6ـ

إنْسانَك.. هُوّي عنْوانَكْ

وْمِقْرِيِّه حْروفو.. إنْسانَكْ

لِلضَّيْف مْشَرَّع أَبْوابو

وْبِالْخَيْر مْعَبَّى بُسْتانَكْ

مَجْدو مْعَلَّق فَوْق عْتابُو

وِبْيِرْخَص مَجْدو مِنْشانَك

وِعْذَابُو.. مَشْهور عْذابُو

اسْتَشْهَد مَعْ إِبْنُو بْمِيدانَك

العالَـم ما بْيِشْعُر بِمْصابو

دَمُّو فَجَّرلَكْ أَلْوانَك

خْلاَصُو.. مَرْهون بْأَحْبابو

اللِّي زَرْعوا سْنِينُنْ بِتْرابو

خْلاصُو.. مَرْهُون بْلبنانَك

ـ7ـ

حُكَّامَك.. مَنْشور وْكِلْمِه

لا تْصَدِّق كِلْمِةْ حُكّامَكْ

الْحاكِمْ ما في بْقَلْبُو رَحْمِه

قاعِدْ عَ كِرْسِي مْنِ عْضامَكْ

عَلِّمْ أَطْفالَكْ عَ النَّقْمِه

بَرْكي بْتِتْغَيَّرْ إِيَّامَك

بَرْكي بْيِبْنُوا فينا الأُمِّه

اللِّي بْتِقْدِرْ تِرْفَعْ أَعْلامَك

حُكَّامَك ما فِيهُنْ زَلْمِي

بَعْدُنْ عَمْ بِيمِصّوا الْحَلْمِه

وِيْبُوسُوا إِجْرَيْن الْحرْمِه

صارْ وَقْتْ يْبُوسُوا.. أَقْدامَكْ

**

أنا.. ومار جرجس

ألقيتها في العاشر من شباط 2001، ليلة تكريمي من قبل رابطة الجمعيات اللبنانية في السانت جورج، بمناسبة نيلي لقب (أمير الأدباء اللبنانيين في عالـم الإنتشار  لعام 2000) من المجلس القاري للجامعة اللبنانية الثقافيّة في العالـم ـ قارة أميركا الشماليّة.

ـ1ـ

يَا مَارْ جِرْجِسْ.. عِيرْنِي سَيْفَكْ

بِالشَّرْقْ بَعْدُو بْيِنْفُخْ التَّنِّينْ

ضَيْفَكْ أَنَا.. لا تِخِذْلُو لْضَيْفَكْ

حَابِبْ تَا إحْمِي طِفْل بِفْلَسْطِينْ

تْفِرْنَجْتْ؟!.. مُشْ مَعْقُولْ.. يَا حَيْفَكْ

لُبْنانْ أَرْضَكْ.. لا تْمَحِّي سْنِينْ

مَلْعَبْ حْصَانَكْ.. تَلْجَكْ وْصَيْفَكْ

أُسْطُورْتَكْ.. إِيمَانْ الِمْحِبِّينْ

لازِمْ عَ شِبْعَا نْرَجّعُو لْطَيْفَكْ

وْمَعْ سَيْف ذُو الْفَقَّارْ مِتِّحْدِينْ

نِطْرُد الإِعْدَا.. نْجِنّْ عَ كَيْفَكْ

وْنِبْنِي وَطَنْ.. أَقْوَى مْنِ السِّكِّينْ

ـ2ـ

إِنْت مِنْ لُبْنَانْ.. عَلِّي الرَّاسْ

التَّارِيخْ خَبَّرْ قِصّتَكْ عِنَّا

حِيطَان دَيْرَكْ دَوْمْ عَمْ تِنْبَاسْ

ما فِي حَدَا رَحْ يِسِرْقَك مِنَّا

خَلِّصْ وَطَنَّا.. مْصَايْبُو أَجْنَاسْ

الْجُوعْ.. عَ بْوَابْ الشّعبْ غَنَّى

وْصَارِتْ الْهُجْرَه حُلْم كُلّ النَّاسْ

وْأَكْبَرْ جَرِيمِه يْضِيعْ مَوْطَنَّا!

لُبْنَان بَاقِي.. جَامِعْ وْقُدَّاسْ

لْبْنَانْ بَاقِي.. لأَحْمَد وْحَنَّا

ـ3ـ

يَا مَارْ جِرْجِسْ.. عِيرْنِي حْصَانَكْ

تَا رَقّصُو بِجْنُوبْ لُبْنَانَكْ

تْحَرَّر جْنُوبَكْ.. رَكَّع الْمُحْتَلّْ

صَلِّي.. تَا يْحْمِي الرَّبّ.. فِتْيَانَكْ

أَبْطَالْ.. وِقْفُوا فَوْقْ هَاكْ التَّلّْ

بِالدَّمْ يِسْقُوا تْرَابْ وِدْيَانَكْ

أَبْطَالْ.. رَسْمُنْ بِالْفِكِرْ بِيضَلّْ

شَالُوا الْقَهْر مِنْ قَلْب إِنْسَانَكْ

دِينُنْ.. لا تِسْأَلْ.. صَارْ دِين الْكِلّْ

التِّحْرِيرْ.. وَحَّدْ كِلّْ أَدْيَانَكْ

ـ4ـ

سَاعِدْ طِفْل.. مِتْسَلَّح بْمِقْلاعْ

وْحَامِلْ بِـ إِيدُو حْجَارْ مَسْنُونِه

دَمّ الطّفل.. لا يْفَكّرُوا بْيِنْبَاعْ

مْحَمَّد الدُّرَّه.. اسْتَوْطَن عْيُونِي

لَيْش الْعَرَبْ ما بْيَعِرْفُوا الإِجْمَاعْ؟

وْلَيْش الْبُطُولِه.. حْرُوفْ مَرْهُونِه؟

أَطْفال.. عَمْ بِيحارْبوا الأطماعْ

وِجْيُوشْنَا بِالرَّمْلْ مَدْفُونِ!!

حُكَّامْ.. ما بِيهِمّ أَقْصَى ضَاعْ

أَوْ ضَاعِتْ كْنِيسِه بِالْقُدسْ قُونِه!

حُكَّامْنَا: كُرْسِي وْعَبْد مِنْصَاعْ

وِبْلادْ فِيهَا النَّاسْ مَسْجُونِه

يَا مَارْ جِرْجِسْ.. هَاتْ حَلِّه تْسَاعْ

تَا إِحْرُق.. اللِّي طَلّعُوا جْنُونِي

ـ5ـ

يَا مَارْ جِرْجِسْ.. زِيدْ جَمْعِيَّاتْ

اتَّحْدِتْ.. عَ إِسْمَكْ بَسّْ.. بِالْهُجْرانْ

بِالسّانْت جُورْجْ.. شْبَابْ وِبْنَيَّاتْ

عَاشُوا سَوا إِخْوَانْ.. شُو إِخْوَانْ؟!

حُبُّنْ شَمسْ.. أَعْمَالُنْ تْرَيَّاتْ

مِتْلُنْ مَا صَدَّرْ عَ الْهَجِرْ.. لُبْنَانْ

لَو قِلْتْ: آخْ.. بْيِرِكْضُوا مِيَّاتْ

لَوْ قِلْتْ: خَيّْ.. بْيِرقُص الْمِيدَانْ

أَللّـه.. إِذَا بِيقَدِّم هْدِيَّات

جَمَّعْ رَوَابِطْ إِسِمْهَا إِسْمَكْ

وْلَفُّن هْدِيِّه.. كْرَامِة الإِنْسَانْ

ـ6ـ

الْيَوْم بِطْفِي شَمْعِة الْخَمْسِينْ

يَا مَارْ جِرْجِس.. خَفِّف الْغُرْبِه

الأَحْبَابْ حَبُّوا يِنِقْلُوا صِنِّينْ

مَعْ شَيبْتُو.. تَا يْعَرِّم بْقَلْبِي

الأحْبَابْ حَبُّوا يِزْرَعُوا بْسَاتِينْ

بْغُربةْ شَقَا.. تَا تْزَهِّر مْحَبِّه

الْحُبّ وَحْدُو بْيِطْرُد شْيَاطِينْ

شَكّوا بِـ صَدْر الأَوْفِيَا حَرْبِه

قَالُوا "المجلس" منشرى تخمين

وقالوا إمارة هَـ الأَدَبْ.. لُعْبِه!

جوزيف حايك ريّسو مْنِ سْنِينْ

طَوِّل بِـ عُمْرُو كْتِيرْ يَا رَبِّي

حَبّ يِنْشُرْ مَجْد مُغْتِرْبِينْ

وْمَا فِي مَجْد بِتْحَجّمُو كِذْبِه!

وْقَالُوا وْقَالُوا.. جَوْقِة مْسَاكينْ

شَرْبِلْ أَميرْ مْتَوّج مْنِ الشّعبْ

وْيَا فَرْحِة الْـ بِيتَوّجُو.. شَعْبِي

**

بعلبك

ـ1ـ

حْملْت الشّمس بالإيد

تا نَوِّر بْعَلْبَكْ

باخوسْ نَدَهْني وقالْ:

بْحِبَّكْ أنا بْحِبَّكْ

رِجْفُوا إيديّي كْتيرْ

مِنْ فَرحتي رَحْ طيرْ

رْميتْ الشّمسْ عَ الأرضْ

ورْكضْت صَوْب جْبَيلْ

..وِمْلَبَّكْ

ـ2ـ

وجْبَيْل قُونِه عَ الْبَحْر

بِتْقَدِّس الْمَوْجاتْ

قالت: يا إبْني رْجاعْ

لمّ الشّمس لا تْخافْ

مُشْ حَقّ تِتْغَبَّرْ

وِتْضيعْ قِيمِتْها

بْعَلْبَكْ مَدِينِتْها

عْواميدْها مَرْمَرْ

يا الْـ إنْت مالِكْها

بْتقدرْ على التّاريخ تِتْكَبَّرْ

ـ3ـ

ورْجعْت عَ بْعَلْبَكْ

لْقيتْ الشّمس بِتْزَيِّنْ عْواميدْ

وْمَعْبَدْ قَديمْ

جْديدْ

متل الكذب ضاوي

ما بْيِنْطفي مهما تْمُرّ سْنينْ

نْكايِه بْطَمَعْ قايينْ

وِمْلُوك وِسْلاطينْ

وِجْيُوش وِشْياطينْ

وَحْدُو الْـ بِقِي مَع قَلْعتُو

إيد ألأُلُوهَه زَرْعتُو

بلبنانْ

حارس جبل صنّينْ

ـ4ـ

خارطةْ لُبْنانْ قدّامي

كلّ الْمدُنْ نجْماتْ

وكلّ الضِّيَعْ أَزْهارْ

بْتِرْقُص مع النَّسْماتْ

ووحدي بْهالْغُرْبه

تعبانْ مِن حالي

بِهْرُب من خْيالي

بْبَوِّسْ إسمْ لُبْنان عَ الْوَرْقَه

بَوساتْ لازمْ إقْطفا سِرْقَه

وْغِصّ بالحَرْقَه

مَصْلُوب عَ هَمّي

ماشي عَ قَبْري

متل طفل زْغِير

.. وناطِر قَبر أمّي

سيدني 2016

**

حزّورة

لمّا الْشّعر بيصيرْ أُسْطُورَه

انْكَتْبِتْ بِدَمْع العَيْن

لا تْخافْ لَولا انْكَسْرِت الصُّورَه

وْبِرْوازْها شَعَّرْ

بيضَلّ فيكْ تْخَلّص مْنِ الرَّسْم

إِسْمَيْن أَوْ أَكْتَرْ

إِسْم اللي مَدِّتْ للسَّما إِيدَيْنْ

وإِسْمي أنا

هَالْـ صارْ حَزّورَه

سيدني 2016

**

مارد

من بَعد كَمْشِة عمرْ 

جايي متل شي حلْم

حامل بإيدو الزهرْ

والزهر راية سِلْم

وعَمْ يوقَف قْبالي

طولو.. العيون تْرِدّ

عرضو.. السّهل والجُرْد

قلت: هيدا إِنْت

بَعْدك متل ما كنتْ

نغمة فرح خلْقِتْ بِمُوّالي

شعلة حكي عَمْ تِحْرُق لْيالي

**

ولاد.. شو بعمل؟

ـ1ـ

.. وْطِرْتْ فَوْق جْبَالْ

أَعْلَى مْنِ الْخَيَالْ

مْفَرَّخ علَيْهَا الْمُسْتَحِيلْ

شَافُونِي الِوْلادْ..

صَاحُوا: عَلاء الدِّينْ.. عَلاء الدِّينْ

وْصَارُوا يْنِطُّوا بِالْهَوَا،

وْيِتْعَمشقُوا فِيِّي..

تَا يِرْمُونِي!

ـ2ـ

.. وْطِرْتْ

وِجْوَانْحِي بْلا رِيشْ،

وْجِسْمِي مْغَطَّى بْغَبْرِة الأَيَّامْ،

وْقِنْدِيلْ سِحْرِي مْعَلّقُو بِرَقبتِي

مَع سِتّ سَبْع حْجَار رَمْلِيِّه..

وِتْعَمشقُوا فِيِّي.. تَا يِرْمُونِي

وْلادْ.. شُو بِعْمل؟!

ـ3ـ

كِيف مِدْرِي كِيفْ

متل الْيَأس طَلُّوا؟!

بْكِيت.. وِدْمُوعِي سَرَابْ

وِمْغَاوِر عْيُونِي مَا إِلْهَا بْوَابْ.

ـ4ـ

أَللـه.. يَا أَللـه،

ضَاعْ صَوْتِي، تْبَخَّرْ

بَلعتُو دِينَيْنْ طَرْشَا،

الصَّوت متل السَّيْفْ،

مَعْقُول؟!

عَ شَرط يِبقَى بْهَـ الدِّنِي مَسْمُوع.

ـ5ـ

أَللـه،

يَا أَللـه..

وِانْكَسَرْ ضَهْرِي،

مْحَرْدَبْ صرْتْ،

عِكَّازْتِي آلآمْ،

حزن، دْمُوعْ..

وْعَمْ يِضْحَكُوا عْلَيِّي؟!

مْسَاكِينْ..

صَعْبِه يُوصَلُوا لِيِّي،

وِالسِّحر كِلُّو بْإِصْبَعِي

وْإِسْمِي عَ تِـمّ الرِّيحْ..

وْبَعْدُنْ، يَا حَسْرَه، بْيِطْمَعُوا

يِتْعمشقوا فيِّي وْيِرْمُونِي..

وْلادْ.. شُو بِعملْ؟!

الشعلة، العدد 156، 10 شباط 1971

**

ردولي إبني من الموت

ـ1ـ

وِقْفِتْ..

عَ إِيدَيْهَا غْبَارْ

بْنِصّ الدّكَّان الْمَنْفُوخْ

بْأَجْسَادْ النَّاسْ الضّجْرَانِه

وْقَالِتْلُنْ كِلْمَات بْتِدْبَحْ:

ـ رِدُولِي إِبْنِي مْنِ الْمَوْتْ!

ـ2ـ

.. وْطَارِتْ عَنْ أَحْنَاكْ النَّاسْ

ضِحْكَات بْتِقْرَفْ مِنْ حَالاَ..

كِلْمَاتْ..

مْقَطَّعْهَا الْبُغْضْ،

خَزْقِتْ دِينَيْهَا وْمَا خَافِتْ..

وِقْفِتْ بِوْجُوهُنْ تِتْحَدَّى،

وْصَابِيعَا تْفَرْفِطْ نَظْرَاتُنْ:

ـ إِنْتٌو يَللِّي غْدَرْتُوا بْإِبْنِي

إِنْتُو يَللِّي سْرَقْتُوا إِبْنِي

إِنْتُو يَللِّي قْتَلْتُوا إِبْنِي

رِدُّولِي إِبْنِي مْنِ الْمَوْتْ!

ـ3ـ

ـ شُو بَدّنَا فِيهَا لا تْرِدُّوا

فِسْتَانَا مْرَقَّعْ بِالْوَحْلْ

وْعَمْ يِعْرَقْ جِسْمَا مْطَالِيبْ

مَا بْتِتْحَقَّقْ مَهْمَا يْكُونْ.

ـ4ـ

ـ مَجْنُونِه..

وْبِعْيُونَا غْيَابْ

وْغَبْرِةْ إِيدَيْهَا بِتْخَوِّفْ

يِمْكِنْ تِعْمِينَا

تِرْمِينَا

بِبْحُورْ الْـ حَافِرْهَا الصَّوْتْ.

ـ5ـ

ـ مَجْنُونِه؟!

وِجْنُونِي حَقّ،

وْشَمْعَه رَحْ بِتْصَفِّي مْشَاعِلْ،

تِحْرِقْلُنْ أَوْكار الْعَارْ

الْـ عَمْ يِتْلَطُّولاَ بْعَتْمَاتَا

الْـ عَمْ بِتْزِدْلُنْ رِيحِةْ تِمُّنْ

وْتِسْكُبْ بِخْوَابِينَا.. سَمُّنْ.

ـ6ـ

ـ مَجْنُونِه؟!

وِجْنُونِي ثَوْرَه..

تِفْلَحْ، تِزْرَعْ، تِسْقِي "بُكْرَا"..

تْغَيِّرْهَا..

تْصَيِّرْهَا عْيَادْ

مْرَاجِيحَا بْتِفْرَحْ بِوْلادْ

اشْتَاقُوا لِزْلاغِيط الْفَرْحَه

اشْتَاقُوا لِلْخَاتِمْ وِالطَّرْحَه

لْشَنْطَه يَوْمِيِّه بْتِتْعَطَّرْ

بِعْطُورْ مْنَاقِيشْ الزَّعْتَرْ.

ـ7ـ

ـ مَجْنُونِه؟!

وِجْنُونِي حْكَايِه

إِخْدُوهَا الثّوَّارْ بْدَايِه

لْفَجْر الْحُرِّيِّه اللِّي زَهَّرْ

وِزْهُورُو عَ طُول بْتِكْبَرْ

فَوْق عْرُوقْ الزّنْد الْمَاكِنْ

الْـ عَمَّرْ لِلأَيْتَام مْسَاكِنْ

زَيَّنْهَا بِبْيَارِقْ رِيحْ

صَارِت لِلنَّصْر مْرَاجِيحْ.

ـ8ـ

ـ كِلُّنْ.. كِلُّنْ قَتْلُوا إِبْنِي

إِبْنِي الْـ مَا بْعمْرُو تَعَبّنِي

يَللِّي رِبَّيْتُو وْفِرْحَانِه

إِدْلُقْ بِـ دِينَيْه غْنَانِي

يِضْحَكْلِي.. يْمَشِّطْ شَعْرَاتِي

وِيْمِدّ بْضِحْكَاتُو حْيَاتِي

وِحْيَاة عْيُونُو الْـ مَا بْتِدْبَلْ

مُشْ رَحْ خَلِّي عْمَارُنْ تِطْوَلْ.

**

بحر الغربة

ـ1ـ

بَحْر الْغُرْبِه وَاسِعْ.. وَاسِعْ

عِنْدُو شْفَافْ

وْعِنْدُو عْيُونْ

وْضَافِيرُو خْنَاجِرْ مَا بْتِرْحَمْ..

يَا رَيْت بْتِنْدَهْلِي الأَرْضْ

يَا رَيْت بْيِرْجَعْلِي الْمَاضِي

بْبَحْر الْغُرْبِه سْكَبْت دْمُوعِي..

ـ2ـ

لَيْش الإِجْرَام بْيِسْرِقْنَا

وْبِيخَبِّينَا بْعَتْمِةْ لَيْلُو

لَيْش الْمَوْت..

الْمَوْت الأَسْودْ..

مَوْت اللَّعْنِه الْـ مَا لُو نْهَايِه

بْيِلْعَبْ فِينَا

وْبِيجَرْجِرْنَا بْسَاحِةْ ذِلُّو؟!

ـ3ـ

نِحْنَا الْـ كِنَّا وَقْت الْـ كِنَّا:

تْصَاوِيرْ مْخَرْطَشْهَا طفْل..

أَحْلامْ بْتِخْلَقْ بِالْيَقْظَه..

نِحْنَا الْـ كِنَّا وَقْت الْـ كِنَّا:

أَوْسَعْ مِنْ جِهَّات الأَرْضْ..

أَعْتَقْ مِنْ تَارِيخْ..

وْأَكْبَرْ مِنْ أَمْجَاد النَّاس الْـ مَاتُوا.

نِحْنَا الْـ كِنَّا وَقْت الْـ كِنَّا:

نْصَيِّرْ وَاقِعْ..

نِضْوِي حَاضِرْ..

نِرْسُمْ عَ حِيطَانْ الكَوْن مِسْتَقْبَلْنَا.

ـ4ـ

لِعْبُوا فِينَا..

شطْرَنْج افْتَكْرُونَا وْصَارُوا:

هَيْدَا.. كِشّْ

وْهَيْدَا.. مَاتْ

وْيَا مَا مَاتْ..

نِصّ الْـ بِقْيُوا..

وِاللِّي بِقْيُوا..

بِقْيُوا حْجَارَه بِـ إِيدَيْهُنْ.

ـ5ـ

لِعْبُوا فِينَا..

تْصَاوِيرْ افْتَكْرُونَا وْصَارُوا:

يِمْحُوا الْعِينَيْنْ الْـ عَمْ تِقْشَعْ

يِلْغُوا شْفَافْ الْـ بَدَّا تِحْكِي

يْقِصُّوا الإِيدَيْن الْمَرْفُوعَه

بْوِجّ الطُّغْيَانْ الْـ عَمْ يِكْبَرْ

بْوِجّ الْجُوع الْـ عَمْ يِحْصدْنَا..

لَكِنْ نِسْيُوا إِنُّو نِحْنَا

مِنْ هَـ الدَّمّ الْـ عَمْ يِتْفَجَّرْ

فِينَا نْفَبْرِكْ جِيلْ جْدِيدْ

يِرْسُمْ حِيطَانْ.. شْبَابِيكْ

وِيْخَرْطِشْ أَوْطَانْ..

وْيِلْغِي كِلّ شِي فِي بِالأَرْضْ مْقَابِرْ.

**

حكاية بطل

ـ1ـ

.. وْبِيخَبّرُوا أَخْبَارْ وِحْكَايَاتْ

عَنْ بَطَلْ..

لَفّ الْحَقِيقَه بِالأَمَلْ

وْخَبَّى بْقَلْبُو تْرَابْ وِسْوَاقِي

وَأَشْجَارْ عَمْ تِشْلَحْ تَمَرْ لِلنَّاسْ

وْصِدْفِه.. عَ تَلاَّت الْمَحَبِّه مَاتْ

وْمَا انْعَرَفْ كِيفْ مَاتْ!

ـ2ـ

ضَاعْ..

قَالُوا: ضَاعْ

بَيْن الْجِتَتْ

بَيْن الدُّمُوعْ الْحُمْرْ..

وِتْبَخَّرْ..

مَظْبُوطْ.. وِتْبَخَّرْ

بَسّ.. عَمْ بِيعِيشْ بِالْقِصَّه

الْحَرْف مَا بِيمُوتْ.. نِيَّالُو.

ـ3ـ

قَالُوا: حِمِلْ سَيْفُو وَرَحَلْ

لَوَيْنْ؟!

مُشْ مَعْرُوفْ!

وْبَعدْ مُدِّه مْنِ الزَّمَنْ

قَالُوا: طِفل بَصْرُو بْمَنَامُو

قَاعِدْ عَ عَرْش الْمَجْدْ

وِمْغَطَّى بِالْوَرْدْ

وِمْغَمَّضْ عْيُونُو!

ـ4ـ

الأَبْطَالْ.. أَعْتَقْ مِنْ زَمَنْ

أَكْبَرْ مِنِ الْكِلْمِه اللِّي بَدّنَا نِحْكِيَا

هِنِّي الدَّهَبْ..

هِنِّي الْخَوَاتِـمْ بِالْعِلَبْ..

هِنِّي فَرَحْنَا الدَّايِم بْحُضْن الْوَطَنْ..

هِنِّي الْحُدُود الْـ عَم تْزَيِّحْهَا الْقُلُوبْ..

هِنِّي الدُّرُوبْ السَّالْكِه بْلَيْل الأَلَـمْ.

ـ5ـ

يَا كِلْمِة الْـ مَا يَوْمْ قِرْيِتْهَا الْعُيُونْ

لِفِّي عِينَيْهُنْ بِالْعَجَبْ!

**

لصوص الهيكل

ـ1ـ

ثُورْ..

ثُورْ..

شُو نَاطِرْ يَا شَعْبِي.. ثُورْ

فَبْرِكْ مِنْ ضَافِيرَكْ سَيْفْ

وْمِنْ آهَات وْلادَكْ تَوْبْ

مَا بْتِحْرُقْ خِيطَانُو النَّارْ.

ـ2ـ

قْصُورُنْ حَطِّمْهَا..

مْصَارِفْهُنْ..

خَلِّيهُنْ مِنْ ضَرْبِةْ كَفّْ

يْنِخُّوا قِدَّامَكْ وِعْيُونُنْ

عَمْ تِسْكُبْ دَمْعَات كْبَارْ.

ـ3ـ

لا تِفْزَعْ مِنُّنْ.. لا تِفْزَعْ

هَوْدِي هِنِّي لْصُوص الْهَيْكَلْ

يَللِّي عَ كْتَافُنْ كِرْبَاجْ

مْعَلَّمْ.. مِنْ هَاك الأَيَّامْ

الْـ شَرْقَطْ مِنْ صَابِيعَا.. نْهَارْ.

ـ4ـ

عَلِّي..

عَلِّي..

عَلِّي صَوْتَكْ..

بَرْكِي بْيِجْرُفْ سَدّ الذُّلّ

الْـ بَعْدُو بِيجَمِّعْ أَوْسَاخْ

مْنِ السُّرْقَاتْ اللِّي سَرْقُوهَا

مْنِ الْكِذْبَاتْ اللِّي كِذْبُوهَا

مْنِ النَّهْجَاتْ الْـ رِكْبِتْ صَدْرُنْ

كِلْ مَا غَطّْ اللَّيْل وْطَارْ.

ـ5ـ

لا تِسْكُتْ عَنُّنْ وِتْطَنِّشْ..

هِنِّي الْـ بَاعُولَكْ أَرْضَاتَكْ

هِنِّي الْـ شِرْبُولَكْ دَمَّاتَكْ

وْهِنِّي بْسَاعِةْ جُوعَكْ دَقُّوا

كَاسُنْ بْكَاس.. الدُّولارْ.

ـ6ـ

رَضِّعْ طِفْلَكْ حِقْد عْلَيْهُنْ..

قِللُّو تَا يْهَجِّي أْسَامِيهُنْ

وِيْعَلِّقْ عَ خَشْبِةْ تَخْتُو

تْصَاوِيرْ وْجُوهُنْ الِمْرِتِّه

الْيَابِسْ عَ خْدُودَا.. مِنْخَارْ.

ـ7ـ

صِبِّلُّو مْنِ عْضَام الْـ مَاتُوا

فَرْد زْغَيَّرْ..

شِدِّلُّو مْنِ غْصُون الأَرْزِه

قَوْس النِّشَّابْ الْـ عَ سْهَامُو

مَحْفُورَه آيَات التَّارْ.

ـ8ـ

خَلِّصْنَا بْزِنْدَكْ خَلِّصْنَا

رَجِّعْنَا.. تْعِبْنَا مْنِ الْغُرْبِه

وْنِسْيِتْنَا الأَرْضْ.. وْنِسْيِتْنَا

كْرُوم دْوَالِينَا الْـ بِالْعَالِي

الْـ مَاصِصْلاَ عْنَاقِيدَا.. غْبَارْ.

ـ9ـ

نْطَرْنَا تَا نِسْمَعْ خَبْرِيِّه

كِيفْ الإِيدَيْن شْبَكْتُوهَا

وْكِيفْ دْعَسْتُوا حْوَاجِزْ بُغْضُنْ

وْكِيفْ شِكَّيْتُوا بْقَلْبُنْ رَايِه

وْكِيفْ عِمَّرْتُوا حْجَارْ الدَّارْ.

ـ10ـ

نْطَرْنَا.. وِنْطَرْنَا.. وِنْطَرْنَا..

تَا سَرْقِتْنَا الْحَرْب وْصِرْنَا

دَمْعَه بِعْيُون الْخَبْرِيِّه

الْـ كَتْبِتْ بَيْنَا وْبَيْنَكْ عَهْدْ:

مِنَّكْ مَا بَدَّا أَخْبَارْ!

**

عالـم أعمى

ـ1ـ

الْعَالَـمْ عَمْ يِمْشِي خْلَيْفَانِي!

الْعَالَـمْ عَمْ يِمْشِي خْلَيْفَانِي!

وِيْجِرّ الأَيَّامْ بْشَعْرَا،

يْوَقِّعْهَا عَ الأَرْضْ

وْيِدْعَسْ عَ صَفْحَاتَا الْبَيْضَا

وْيِزْوِي مِتْل الأَعْمَى الْـ ضَيَّعْ دَرْبُو!

ـ2ـ

لا الأُمّ بْتِحْضُنْ أَطْفَالاَ

وْلا الْبَيّ بْيِتْعَبْ وِبْيِجْنِي،

وِالطّفْل الْـ كَارِه مَدْرِسْتُو

الْغَبْرَه عَمْ تِنْصُبْ مَرْجُوحَه

وْتِتْمَرْجَحْ عَ شَنْطِةْ كِتْبُو!

ـ3ـ

.. وْهَاك الْحَاكِمْ يَللِّي تْرَبَّعْ عَ الْعَرْشْ

وْسَحْرِتْنَا وْعُودُو:

"بْخَلِّي بْلاَدِي تْصِيرْ حْكَايِه،

بْغَطِّي الْفقْر بْشَرْشفْ أَبْيَضْ،

بِزْرَعْ خُبْز بْتِمّ النَّاسْ.."

خَانْ بْلاَدُو

وْخَان النَّاسْ

الْـ تِعْبُوا فِيهَا وْمَا خَلُّوهَا

تِشْعُرْ لَحْظِه إِنُّنْ تِعْبُوا!

ـ4ـ

وِالْكِتَّابْ.. الْـ لازِمْ حَرْفُنْ

يِضْوِي بْعَتْمَات الأَيَّامْ

بَاعُوا حْرُوفُنْ بِالسُّوقْ السَّوْدَا

وْمَا خَافُوا لَعْنِةْ هَـ الأَجْيَالْ الْجَايِي

مِنْ تَحْت حْجَار التَّارِيخْ

الْـ مَا دَاق الْحِنِّيِّه قَلْبُو!

ـ5ـ

وْخَادِمْ بَيْت الرَّبّ.. الْـ كَانْ

نَاوِي عَ الْفِرْدَوْس يْفُوتْ..

لَطَّخْ إِيدُو بْدَمّ الْعُمْلِه

وْوَسَّخْ عَقْلُو بْشَهْوِةْ جِسْمُو

وْمِنْ تِمُّو طِلْعِتْ حَيَّاتْ

تْبُخّ سْمُومَا بْكَاس الْـ عِطْشُوا

وْمِنْ مَيَّاتْ كْلامُو.. شِرْبُوا!

ـ6ـ

وِالأَزْهَارْ.. الْـ حَبِّتْ رَوْضَا

وْغَطَّاهَا بِتْرَابُو..

وْصَارِتْ تِتْنَاسَلْ فِيهْ وْتِتْكَاتَرْ..

كِرْهِتْ رَوْضَا..

وْبَلَّشْ جِسْمَا

يِتْقَزَّزْ مِنْ رِيحِةْ عُشْبُو!

ـ7ـ

وِالْبَحْر الْـ خَلاَّ أَسْمَاكُو

مِنْ يَوْم الْـ كَوِّنْتُو "الْكِلْمِه"

تِسْرَحْ عَ كَيْفَا وْتِتْسَلَّى

بِسْهُولْ الْمَيّ الْمُخْضَرَّه

بِجْبَال الْمَوْجَات الْحُرَّه..

بَلَّشْ يِعْرِضْهَا عَ شْطُوطُو

تَا يْبِيعَا لأَوّل صَيَّادْ

مْعَلَّقْ بِالصّنَّارَه.. كِذْبُو!

ـ8ـ

الْعَالَـمْ عَمْ يِمْشِي خْلَيْفَانِي!

وْنِحْنَا عَمْ نِمْحِي طُرْقَاتُو

وْنِفْرَحْ لَمَّا بْيُوقَعْ فِينَا

الْوَقْعَه الْـ بِتْخَلِّينَا نُوجَعْ

وِنْفَرْفِكْ إِيدَيْنَا وْنِبْكِي

وْمَا نَعْرِفْ كِيفْ بَدّنَا نْسِبُّو!

**

القدر كذّاب.. القدر مجرم

ـ1ـ

رْكَعتْ صَلِّي لإلَهْ مَا عِنْدُو سَمَا

اللَّيْلْ غَافِي، وِالْبُوم مْفَتّح عْيُونُو

البُوم شَيْطَان الْعَتمْ!

رْكَعِتْ صَلِّي،

وِالصَّوْتْ ضَايِعْ بَيْنْ أَنَّات الشّفَافْ،

وِالرِّيحْ عَمْ تِدْفَى عَلَى لْهِيتْ الشَّجَرْ..

ـ2ـ

بِتْقُول الأسْطُورَه:

لِمِّنْ كِنْتْ طفل زْغِيرْ

مِتل حَبْقَه شْلُوشْهَا عَ الْمَيّْ

كِنْتْ إِغْزُل الأيّام بِـ إِجْرَيِّي

كِنْتْ غَنِّي للأَزَلْ..

وِالْيَوْمْ ضَايِعْ بَيْنْ عَتْمَاتْ الزَّوَايَا

وِالدّرُوبْ

عَمْ يَاكِلْنِي الصَّدَى.

ـ3ـ

بِتْقُول الأسْطُورَه:

.. وْطَلّ الرَّبِيعْ

حَامِلْ الضِّحْكِه لِشْفَاف الْحَزَانَى،

وْجَايِبْ مَعُو هْدَايَا:

نَرجسْ، حَبَقْ، شَوْكْ، عِلَّيْقْ..

وْحِبَّيْتْ برْعُمْ وَرد ما تْفَتَّحْ

قَلِّي الْقَدَرْ: لا تْخَافْ

مِدّ إِيدَكْ خَلْفْ ضَهْرَكْ وِاقْطِفُو..

هَيْكْ مَا بِتْشُوفَكْ النَّحْلاَتْ.

مَاتْ.. مَاتْ..

الْقَدَرْ كِذَّاب، الْقَدَرْ مُجْرِمْ!

ـ4ـ

أَنَا قِدِّيسْ..

إِصْبعِي بْيِضْوِي بْلَيْلات الْقَدَرْ

حْمِلْتْ الأَرْضْ،

وِبْنَفختِي طْفِيتْ الشَّمسْ،

وِبْرُوسْ صَابِيعِي كْمَشْت الْقَمَرْ..

عُمْرِي:

نَسْمِةْ هَوَا.. 

بَرق وْرَعدْ

مِينْ قَالْ عِنْدِي عُمر؟!

ـ5ـ

غِطَّيْتْ وِجِّي بْإِيدَيِّي

وْصِرتْ إِمْشِي تَا أُوصَلْ

وْمَا أُوصَل..

الْهَدَفْ: 

سْرَابْ، 

ظلّ،

كَمْشِةْ خْيَالْ بْعَقلْ مَجْنُون!

الدِّنْيِي مَا فِي لِهَا نْهَايِه..

لِهَا بْدَايِه!

كذبْ..

نِحْنَا بْدَايِةْ هَـ الدِّنِي

وْنِحْنَا النّهَايِه!

**

أللـه.. ونقطة زيت

ـ1ـ

لا تِزْعَلْ دَخْلَكْ يَا رَبّْ

كْتَار بْهَـ الدِّنْيِي مْجَانِينْ

بِيدقّوا جْرَاسُنْ عَنْ كِذْبْ

لْشَخْص مْفَبْرَكْ مِنْ جَفْصِينْ

وْجَفْصِينُو عَمْ يِرْشَحْ زَيْتْ

وِبْيِتْحَوَّلْ دَيْرَكْ بَيْتْ

وْنِسْوَانْ تْبَخِّرْ لِلدِّينْ

وْحُبَّكْ.. هَـ الأَسْمَى مْنِ الْحُبّْ

بْيِنْزِلْ بِمْزَاد التُّجَّارْ

وْبِنْدُورَات التِّعْبَانِينْ

دَخْلَكْ يَا أَللَّـه شُو صَارْ

بِيشُوفُوكْ بْنِقْطِةْ زَيْتْ

وِبْيِنْسُوا إِنَّكْ أَللَّـه

خْلَقْتُنْ كِلُّنْ عَ السِّكَّيْتْ

وْكِوَّنْت الدِّنْيِي كِلاَّ؟!

ـ2ـ

ما شَافُوك بْأَرْز الرَّبّْ

الْـ مَاتِتْ عَ إِجْرَيْه سْنِينْ

الْـ غِفْيِتْ بِـ فَيَّاتُو شْعُوبْ

الْـ غَنِّتْلُو حْنَاجِرْ وِقْلُوبْ؟!

ما مِشْيُوا عَ هَاكْ الدَّرْبْ

الْـ بِتْوَصِّلْهُنْ عَ صَنِّينْ

أَوْ عَ بْعَلْبَكْ؟!

لا تِزْعَلْ.. هَوْدِي مْسَاكِينْ

بِالْعَجَايِبْ بِيشُوفُوكْ

غْفِرْلُنْ.. هِنِّي اللِّي صَلْبُوكْ

وْهِنِّي الْـ بِكْيُوا مِنْ صَلْبَكْ

بَسّ الْـ مِتْلِي بِيحِبُّوكْ

بِيحِبُّوكْ بْحَيْثَكْ بَيّْ

أَوْسَعْ مِنْ جَنِّه.. قَلْبَكْ

ـ3ـ

ما انْتَبْهُوا لْدَوْرِةْ هَـ الأَرْضْ

وْسُرْعِتْهَا الْـ صَارِتْ.. وَقْفِه

وِالنِّجْمَاتْ الْـ عِنْدَا فَرْضْ

تِفْتَحْ بِالْعَتْمِه شُرْفِه

وِتْضَلّ تْشَعْشِعْ عَ طُولْ؟!

غْفِرْلِي دَخْلَكْ لَوْلا بْقُولْ:

مَسْطُول وْأَكْبَرْ مَسْطُولْ

كِلْمِنْ بِيآمِنْ يَا رَبّْ

مِنْ نقْطِةْ زَيْت وْقِنْدِيلْ

وِخْرَافَاتْ.. وْدَقّ طْبُولْ

وْإِنْت الْعُرْض.. وْإِنْت الطُّولْ

وِالْجِيلْ الْـ عَمْ يِخْلقْ جِيلْ

وِمْسَافَاتْ الْـ عَمْ نِقْطَعْهَا

وِالْخَيْرَاتْ الْـ عَمْ نِزْرَعْهَا

يَا عَايِشْ فِينَا وْمَقْتُولْ

بِعْجَايِبْ.. لَوْلا بْتِقْشَعْهَا

بْتِضْحَكْ مِنْ كِتْر التِّدْجِيلْ!

ـ4ـ

خْلِقْت الشَّمْس.. بْنُورَكْ شَافُوا!

خْلِقْت اللَّيْل.. بْعَتْمَكْ خَافُوا!

خْلِقْت الْبَحْر.. بْمَيَّكْ طَافُوا!

وْبَعْدُنْ عَمْ يِتْسَلُّوا فِيكْ

يَا عُمْر الْـ مَا بْيِنْقَصْ عُمْرُو

يَا شْرِيكْ الْـ مَا عِنْدُو شْرِيكْ

هِنِّي بْدُونَكْ عَمْ يِفْتِقْرُوا

وْنِحْنَا دَايْماً مِنْلاقِيكْ

بْأَزْغَرْ مَخْلُوقَات الْكَوْنْ

بِالزَّهْرَه الْـ غَامِرْهَا اللَّوْنْ

بِالْعُصْفُور الْـ عَمْ بِيغَنِّي

بِالنَّحْلِه الْـ ما بْتِطْلُبْ عَوْنْ

بِالْخَفْقَه الْـ عَمْ تِطْلَعْ مِنِّي

بِالطِّفْل الْـ عَمْ يِرْبَى هَوْنْ

بِالْيَوْم الْـ عَمْ يَرْجَعْ غَيْرُو

بِفْصُول الْـ بِتْجِرّ فْصُولْ

بِالإِنْسَان الْمَاشِي بْسَيْرُو

وْسَيْرُو بِتْخَطِّطْلُو عْقُولْ

مَهْمَا صَلُّولَكْ.. لا تْصَدِّقْ

هَوْدِي ضِحْكُوا عْلَيْك كْتِيرْ

هَوْدِي نْبِيدَاتُنْ لا تْعَتِّقْ

نْبِيدُنْ تِزْوِير بْتِزْوِيرْ

ـ5ـ

كل شِي خْلِقْتُو بْيِحْكِي عَنَّكْ

عَنْ حُبَّكْ.. عَنْ ضِحْكِةْ سِنَّكْ

عَنْ هَـ الإِيدَيْن الْمَفْتُوحَه

عَنْ هَـ الْخَيْر الْفَايِضْ عَنَّكْ

إنْت الشَّجْرَه الْـ فَوْق التَّلِّه

إنْت الْقَمْحَه بْوَكْر النَّمْلِه

يَا خَالِقْ.. وِبْتِخْلَقْ هَلَّقْ

بْرَعْشِةْ قَلْبْ.. بْزَهْرِةْ زَنْبَقْ

مِنْ دُونْ عْجَايِبْ مِنْصَلِّي

نِحْنَا مْنُؤْمِنْ فِيك وْبَسّْ

وْكِلْ مَا تْغِيبْ عْلَيْنَا الشَّمْسْ

مِنْصَفِّي لْحُلْمَكْ نِتْحَرَّقْ

إِنْت الْحُلْم الْـ عَمْ يِتْحَقَّقْ!

**

صحابي

ـ1ـ

إِيدِي مِدَّيْتَا لِصْحَابِي

الْـ قَصْدُونِي وْوِقْفُوا عَ بْوَابِي

فِكَّرْتُنْ لِمِّنْ قَصْدُونِي

عِرْفُونِي بْقَدِّسْ أَحْبَابِي

يَا رَبِّي بْلَحْظَه إِكْلُونِي

وْرِمْيُولِي عْضَامِي بِالْغَابِه!

ـ2ـ

وِجُّنْ.. أَوَّلْ مَا بِتْشُوفُو

بْتِفْرَحْ بِتْقَاسِيمُو عْيُونَكْ

وِبْتِقْرَا بْطَيَّات حْرُوفُو

مْحَبِّه.. مَا انْوَجْدِت مِنْ دُونَكْ

تَارِي بْعَقْلَكْ رَحْ بِيطُوفُوا

تَا يْدِقُّوا عَ وْتَار جْنُونَكْ!

ـ3ـ

كَانُوا طِمْعَانِين بْمَالِي

وْعَنُّنْ مَا بْخَبِّي أَمْوَالْ

رْيَاحِتْهُنْ بِتْرَيِّحْ بَالِي

وْضِيقِتْهُنْ بِتْهِدّ الْحَالْ

يَا حَسْرَه.. خِرْبُوا أَحْوَالِي

وَقْت الْـ رِيَّحْتِلُّنْ بَالْ!

ـ4ـ

كِذَّابِين.. وْعَمّ يِحْكُولَكْ

عَنْ قِيمِة صِدْق الإِنْسَانْ

تَا بْحَكْيُنْ نِتْفِه يُوحُولَكْ

إِنُّنْ شِعْلِه مْنِ الإِيمَانْ

وِبْغَمْضِةْ عَيْن بْيِصْلُولَكْ

فَخَّيْن.. وْكَانْ اللِّي كَانْ!

ـ5ـ

دِنْيِي.. وْعَمْ يِسْكِنْهَا لْصُوصْ

سَمُّوهُنْ بِالزُّور.. رْفَاقْ!

بْضَوِّي قْنَادِيلُنْ.. بِتْنُوصْ

بْقَلْبُنْ عَتْمِه مَا بْتِنْطَاقْ

سَرْقُونِي وْدَعْسُوا عَ نْصُوصْ

انْكَتْبِتْ وِالإِيَّامْ عْتَاقْ!

ـ6ـ

صِدَّقْتُنْ.. وِحْبَالْ الْكِذْبِه

عَمْ تِتْعَلَّقْلِي بِالسِّرّْ

بْشَجْرَه بِيسَمُّوهَا (الصّحْبِه)

وْرَاقَا عَ طُول بْتِصْفَرّْ

سْقِيتَا الدَّمَّات اللِّي بْقَلْبِي

شِرْبِتْ.. لَكِنْ قَلْبِي هَرّْ!

ـ7ـ

مُشْ خَايِفْ مِنُّنْ.. مُشْ خَايِفْ

ضَافِيرِي بْتُوصَلْ لِعْيُونُنْ

بِتْقِصّ الْمِنْخَار الْوَاقِفْ

مِتْل اللَّعْنِه تَحْت قْرُونُنْ

مِتْل (الْكَوْمِه) فَوْقْ شْفَايِفْ

مَشْقُوقَه.. مِنْ كِتْر فْنُونُنْ!

ـ8ـ

ما عِرْفُوا خْسَارِتْهُنْ أَكْبَرْ

وِبْمَوْتِي بْطُونُنْ رَحْ تِزْغَرْ

وِاللِّي بْيَاكُلْ أَوَّلْ لُقْمِه

مُشْ مِتْل اللِّي بْيَاكُلْ أَكْتَرْ

وِالصّحْبِه الْـ قَتْلُوهَا بْنَقْمِه

مُشْ مُمْكِنْ تِرْجَعْ تِتْكَرَّرْ!

ـ9ـ

مَا عِرْفُوا قِدَّامَكْ وَحْدَكْ

حْسَابُن رَحْ بِيكُون كْبِيرْ

آخِر مْحَطَّاتُنْ عِنْدَكْ

وْحِكْمَكْ مَا بَدُّو تفْسِيرْ

اللِّي بْيِخْدَعْ أَصْحَابُو.. بَدَّكْ

تْزِتُّو بْنِيرَان التِّطْهِيرْ!

ـ10ـ

ما عِرْفُوا مِنْ مَوْتِي بِرْجَعْ

مَارِدْ.. ضِحْكِةْ سِنِّي بْتِلْمَعْ

وْإِيمَانِي أَقْوَى يَا رَبِّي

بْإِنْسَان لْغَيْرَكْ مَا بْيِرْكَعْ

وْإِنُّو كِلْ مَا تْمُوتْ مْحَبِّه

عَنْ كَعْبَا مَحَبَّات مْنِجْمَعْ!

ـ11ـ

أَصْحَاب الْكِذْبِه الْمَنْحُوسِه

مِين الْـ سَمَّاهُنْ أَصْحَابْ؟!

لا خُورِي بْيِخْدُمْ بِكْنِيسِه

وْلا شَيْخْ بْيِمْشَحْ نِصَّابْ

يَا رَبِّي.. النِّيِّه التّلْبِيسِه

مُشْ مُمْكِنْ يِغْفِرْلاَ كْتَابْ!

**

يا رب

ختيرتْ كتير وصفّيتْ

بالفرشه نام وانضبّْ

مملكتي حيطان البيت

وعم تقصر قدّامي الدربْ

مش خايف مهما انذليتْ

عارف رح تغمرني بحبّْ

مش خايف.. إسمك حبّيتْ

وخبّيتك جوّات القلب

حتّى شوفك شو تمنّيتْ

بوّس جروحات الصلبْ

ركعت بهالغربه وصلّيتْ

بركي بترحمني يا رب

**

وديان

ـ1ـ

وِدْيَانْ..

الْخَوْف مْزَهَّرْ فِيَا

وِالْيَأْس عَمَّا يِسْقِيَا

كِيفْ بَدِّي إِمْشِيَا

وْحِفْيَانْ

ـ2ـ

عَتْمَاتْ فِيهَا مْطَيْشَرَه

بْإِكْلِيلْ بُغْض مْزَنَّرَه

وِزْهُورْ سَوْدَا مْزَهَّرَه

عَ حْفَافِيَا

ـ3ـ

مْفَرَّخْ بِأَرْضَا النَّحْسْ

وْبَلْعِتْ قَمَرْهَا الشَّمْسْ

وِالشَّمْسْ يَللِّي مْضَوِّيَا

بْيِقْدرْ بِدَمْعَه يِطْفِيَا

ـ4ـ

مِتْل الْعُيُون الدَّامْعَه

وِالضَّايْعَه

أَحْزَانْ فِيهَا مْعَشْعَشِه

بْتِمْشِي الْعُمرْ عَ الْبَقْبَشِه

لا قَاشْعَه

وْلا رَايْدِه مِينْ يِهْدِيَا

مْنِ الْكِبْرِيَا!

**