كان يا ما كان

Charbel Baini

Kan ya ma kan

once upon a time

قصائد مختارة من كتب الشاعر

Cover by Randa Baini 

**

قصائد الكتاب:

ـ كان يا ما كان  ـ أولاد العز  ـ مار نقولا  ـ بلوزا  ـ انت الوحيد  ـ جايي لعنا  ـ بطركنا الغالي  ـ طرحه  ـ زهر انساني  ـ يا رفيق بيّك  ـ كتير انساني  ـ يوبيل فضي  ـ عيد الأمومه  ـ شو همني؟  ـ ناطرينك  ـ جرن المعمودية  ـ بعنا الوطن للغول  ـ طرابلس  ـ ابنك أنا  ـ صدى لبنان  ـ مصطفى وعصام  ـ كفوف الدلال  ـ عمرك سنه  ـ يسلم تجمّع  ـ أجمل طير  ـ استقلال 2017  ـ عيد استقلال لبنان 2018  ـ استقلال 2019  ـ تكريم رمضاني  ـ شهر الصوم  ـ رمضان الصوم  ـ رمضان 2019  ـ عيد التحرير  ـ مجلس الجالية  ـ ميلاد 2016  ـ ميلاد 2017  ـ عيد ميلاد 2018  ـ طفل اليمن  ـ ليش الكره؟  ـ عيد الوئام  ـ درع القداسة  ـ فرقة أرز لبنان  ـ مار الياس  ـ راس مسقا  ـ ولاد ضيعتنا  ـ مار مارون  ـ مركب حضارة  ـ حمام السلم  ـ طاب اللقا  ـ اجراس قلبي  ـ كفرصارون  ـ كنز كبير  ـ زهرة الكورة  ـ أيطو  ـ ليش يا ألله؟  ـ غلة المشوار  ـ مصطفى الحلوة  ـ ملكي والملكه  ـ يا كبير ضيعه  ـ أودري  ـ آشلي  ـ عيلة نادر  ـ حصان  ـ بوسيلا  ـ روّاد  ـ عيدية  ـ مصطفى حجازي  ـ شوية فرح  ـ قصايد شعر  ـ رندح يا وجع  ـ غنّوا  ـ نجمة حبيب  ـ سركيس كرم  ـ لطيف مخايل  ـ غربة وطن  ـ الحب اللي كان  ـ عزير  ـ كلارك  ـ انت بعيني  ـ عيد القديسة بترونله  ـ اهدن  ـ بسام  ـ كونستانس  ـ سامي مظلوم  ـ آميل  ـ اسماعيل  ـ رفيق غنوم  ـ خيي انطوان  ـ خيي جورج  ـ خيي جوزاف  ـ خيي ميشال  ـ مرسال  ـ الياس الأبّو  ـ روبير  ـ طوني نادر  ـ جوزاف نادر  ـ ايلي ناصيف  ـ كارول  ـ رفيق  ـ نانسي  ـ ابن العز  ـ نادين  ـ ليليان  ـ تمانين  ـ عيد النقيب  ـ ابن خيي  ـ وين الصاحب؟  ـ علي  ـ سلة  ـ بطرام  ـ استاذ  ـ ابن الكورة  ـ كامل  ـ تذكرتين  ـ شموخ  ـ زين  ـ ريّس  ـ بيوت الشعب  ـ حرق  ـ رغيف  ـ ملاك زغير  ـ لطيف، بهية وشربل  ـ لطيف وشربل  ـ عصام، لطيف وشربل  ـ مروان وشربل  ـ حفلة زجلية فايسبوكية  ـ حجر  ـ على دلعونا  ـ العالم العربي  ـ هيهات يا بو الزلف  ـ انتو الاهل  ـ جوعان  ـ الحرف ما بيموت  ـ حفلة زجل  ـ ضوّي  ـ مشيرتنا  ـ مروان ـ يا بهية ـ ماري ميسي ـ ريتا فنيانوس ـ طوني زخيا ـ ميشال الراهب ـ إيليا بعيني ـ نانسي عكر ـ ليلى نادر الراهب ـ منصور الخوري ـ غسان الحسامي ـ جمانة بعيني ـ يوسف إيليا بعيني ـ

**

كان يا ما كان

بـِ غابر الأزمان

في ناس عاشوا هون

بيشرّفوا البلدان

وجودُن ع وسع الكون

وشلوشُن بلبنان

**

أولاد العز

ـ1ـ

لمّا هجرنا بلاد الأرز

حسّينا الأرض بتنهز

وشفنا تمّ البحر كبير

متل الجرح الْـ عم بينز

يبلع أم وطفل زغير

ويشرّد أولاد العز

ونحنا الـ بكّانا التهجير

وفوق جنون الموج نفزّ

حملنا النير بضهر النير

وخناجر بالصدر تغزّ

محينا الغربه بالتعمير

وصاروا يرشّوا علينا الرزّ

وصار الإسم كبير كتير

وكل شعوب الأرض تقول:

"وجود اللبنانيي كنز"

ـ2ـ

لمّا هجرنا.. وصرنا كتارْ

حكمنا كل المسكونه

رفضنا نركع للدولار

ولا للإشيا الملعونه

خدنا بركة ناس كبار

ورضا الأم الحنونه

وكل ما الدهر علينا جار

نعلّق أرزتنا قونه

ونتذكر هاك الختيار

القاعد تحت الزيتونه

وركوة قهوه بهاك الدار

تنده: يلاّ اشْربوني

وضحكة جارتنا والجار

الـ خبيتُن جوّا عيوني

ـ3ـ

ولاد العز الـ بكتابي

هنّي القصايد كلاّ

ختيرت.. وبعدو شْبابي

بالأشعار بيتسلّى

تذكرهن.. شرّع بابي

وع قلبي الناس يدلاّ

حبّوني.. محيوا غْيابي

وخلّوا الغربه تتحلّى

هودي أهلي وأصحابي

أللـه يحرسهُنْ أللـه

**

مصطفى وعصام

حفل تكريم الدكتور مصطفى الحلوة بتاريخ 10/12/2020:

ـ1ـ

وْلِكْ.. كيف بدّي كيف إشكركُنْ

والخير كلّو من بيادركُنْ

يا ريت فيي جمّع الدمعات

تا تسكبوها في محابركُنْ

من حبّكُن عم إشرب الجرعات

جرعات شهدتلا منابركُنْ

إنتو إذا بتوَقِّف الساعات

بْتُوقَف تا تحكي عن مآثركُنْ

بالشعر أو بالنثر في لمعات

بسطوركُن بتشع شعلة نور

بلون الدهب ورقة دفاتركُنْ

ـ2ـ

ويا مصطفى الحلوه.. كتابك صار

شلال.. للعطشان من شعبي

متل الكذب.. كل ما يمرّ نهار

بحلم تا شوفك قاعد بجنبي

بحروف حبَّك صرت تطفي النار

بعصر "الكورونا" مع ألف ضربه

رح خبّرك عن مبدع وجبّار

إسمو "عصام" وساكن بقلبي

أسس جوايز.. كللا بالغار

موتو طعنّي وظاهره الحربه

إنتَ وعصام.. وْمع أسامي كتار

زرعتوا الفرح بظروفنا الصعبه

لا الأرض ندهتنا وْلا هاك الدار

منبكي وقت ما منسمع الأخبار

مكتوب إنّو نموت بالغربه

ـ3ـ

لولا "الكورونا" كنت شفتك هون

جايي وحامل أرزة بلادي

يا مصطفى نحنا بأبعد كون

وقرّبتنا من بعضنا زْياده

كتابك حروفو بألف لون ولون

متل الزهر.. والشعر سجّاده

من طرابلس مدّيت إلنا العون

من بلاد هيي الحلم شو ما صار

كل القلوب بتعبدا عباده

ـ4ـ

رح إشكرك تا يصير يحكي الشكر

ويخبّرك قدّيش ممنونك

ذكرك ببالي صار أحلى ذكر

يا مصطفى شو ما طلبت رح قول:

شربل بأمرك.. تكرم عيونك

**

درع القداسه

إحدى حفلات الطائفة المارونية ـ سيدني

ـ1ـ

سْمَحُولي قُول هَـ الْكَلْمِه الزّغِيرِه

لراعِي أبْرَشِيِّتْنا الشَّريفِه

اللِّي زَار بْلادْنا زْيارَه قَصِيرِه

تا حَتَّى يْساعِد الْعَيْلِه الضّعِيفِه

خْسَارَه غْيابَك.. خْسارَه كْبِيرِه

عَن الْحَفْلِه.. بِهَـ اللَّيْلِه الظَّرِيفِه

بَيّ الْكِلّ.. عاطِفْتَكْ دْخِيرِه

وْقُونِه وْصَلِيب مْصَوَّر عْلَيْهُنْ

وِجَّكْ إِنْت يا عَبْدُو خَلِيفِه

ـ2ـ

عَبْدُو خَليفِه.. سْيادة الْمُطْرانْ

دِرْع الْقَداسِه وْمَنْبَع الإيمان

حَبّ إِنّو يْكُون مَعْنا الْيَوْم

بَسّ الظّرُوف بْتِجْبُر الإِنْسانْ

يِتْغَيَّب..يْفارِق كِبار الْقَومْ

بْهَـ الليْلِة الْـ كِلاَّ سَخا وْإِحْسانْ

مُطْرانْنا.. مُطْران فِكْر وْصَومْ

إِسْمو انْحَفَرْ عَ كَعْب أَرْزِتْنا

وْحامِل بِقَلْبُو الطَّايْفِه وْلُبْنانْ

ـ3ـ

سْيَادة الْمُطْران.. هَـ الْبَيّ الْحَنُونْ

مْحَبّتُو بِالْقَلبْ أَكْبَرْ ما تْكُونْ

زَارِعْ بِـ صَدْرُو الأَرْزِة الْخَضْرَا

وْعَمْ يِسْقِيَا الدَّمَّاتْ وِدْمُوع العُيُونْ

سَلَّمْ أُمُور الطَّايْفِه لْعَدْرَا

بِبْلادْنا، عَ طُولْ، بِتْدِير الشّؤونْ

وْخَلَّى الْعُمرْ بِقْداسْتُو سَكْرَه

ما فاقْ مِنَّا غَيْر ما تْبارَكْ

بْبَرْكِةْ شَفِيع الطَّايْفِه مارُونْ

**

أجمل طير

عمادة الطفل داني روبير عبيد، الذي توفّاه اللّـه شابّاً يافعاً، بعد أن صدمته سيارة مسرعة بالقرب من منزله.

ـ1ـ

يا مِيةْ هَلا بِـ طَلِّة الأَصْحابْ

وْيا مِيةْ هَلا بِوْجُودْكُن مَعْنا

فْرِحْنا.. فْرِحْنا كْتِير يا أَحْبابْ

وِمْنِ الْفَرَحْ  كَرْجِتْ مَدامِعْنا

ـ2ـ

عَمْ شُوفْ كلّ النّاسْ فِرْحانِه

بْهَـ الْحَفْلِةْ اللِّي ما إِلاَ تاني

وْعَمْ شُوفْ بَيْن النَّاسْ أَجْملْ طَيْر

أَهْلُو اخْتارُولُو إِسِمْ داني

يا فَرْحِة الْقَلْب بْصَدْر رُوبَيْرْ

هَـ الْبُلبُل الْـ مَلاَّ الدِّني غْناني

إِبِنْ ضَيْعَه مْعَوّدِه عَ الْخَيْرْ

وْلِلْكَوْن هِدْيِتْ شَعْب إِنْساني

مِنْ كِتِرْ خَوْفُنْ مِنْ إِلَهْ الدَّيْرْ

لَفُّوا الصَّبي وِتْجَمّعُوا حْوالَيْهْ

وْعَمّدُوهْ.. وْصارْ نصْرانِي

ـ3ـ

يا رَيْت بْتِفْهَمْ يارَيْتْ

إِنّو خْلِقْت بْأَعْظَمْ بَيْتْ

أَهْلَكْ ناسْ بْيِنْحَبُّوا

شَمْعِةْ إِخْلاصُنْ ضُوَّيْتْ

إِمَّكْ عَ دَيْهَا تْرَبُّوا

عْيالْ.. بْتِهْذِيبُنْ جِنَّيْتْ

وْبَيَّكْ يِقْبِرْني رَبُّو

إِلاَّ صَوْتُو ما اسْتِحْلَيْتْ

حامِلْ هَـ النَّاس بْقَلْبُو

وْأَطْيَبْ مِنْ قَلْبُو ما لْقَيْتْ

يَلاَّ تا نِشْرَبْ نَخْبُو

وْلا تْلُومُوني لَوْلا قِلْتْ:

حِبَّيْتُو.. وَاللَّـه حِبَّيْتْ

ـ4ـ

اللَّيْلِه أَنا رَحْ غَيِّر الْعادِه

وْإِشْرَبْ تا دُوخْ.. وْإِسْكَر زْيادِه

كْرامِةْ بَشَرْ فِي عِندْهُنْ إِحْساسْ

وْمَنْبَع صَداقَه وْحُبّ وِسْعادِه

كْرامِةْ طفلْ عَ طُولْ عَمْ يِنْباسْ

تْطَلَّع بْأُمُّو وْغَمَّض عْيُونُو

وْغَطّ راسُو بْجِرْن الِعْمادِه

**

يسلم تجمّع

ألقيتها في إحدى حفلات تجمّع المسنين العرب في سيدني عام 1989

ـ1ـ

بْحِبّكُنْ.. لا تِسْأَلُوني لَيْش؟

بْشُوف فِيكُنْ كِلّ أَيَّامي

وْقِدّيْش جِمَّعْتُو سَهَر قِدَّيْش

مِنْشَانْ تِحْلاَ شْوَيّ أَحْلامِي

ـ2ـ

يِسْلَم تَجَمُّعْ جَامِع الأَحْبابْ

وْيِسْلَمْ رَئيسُو راشِد الْحِلاَّبْ

انْ قالْ: آخْ.. قْلُوبْنا بْتِبْكِي

انْ قالْ: خَيّ.. بْتِرْقُص الضِّحْكِه

وْكِلْمِةْ: يا أَهْلا.. بْتِفْتَح الأَبْوابْ

ـ3ـ

الشِّعْر لَوْلاكُنْ ما إِسْمُو شِعْرْ

وْبَيْناتْكُنْ زَيْن الْحَسَنْ عَ طُولْ

الْكِلْمِه الْـ بِيقُولاَ لَوْ بْيِمْرُق عُمْرْ

الأَجْيالْ بِتْخَبِّرْ شُو كانْ يْقُولْ

**

عمرك سنه

عمادة الطفلة باسكال سهيل صافي، 16/6/1990

ـ1ـ

لِمِّنْ عَ وِجِّكْ طَرْطَش الْمَيْرونْ

شِفْتُو ضِحِكْ قِدِّيسْنا مارُونْ

وْتَمْتَمْ لحالُو: سَجّلُوا باسْكالْ

بِدْفاتْري.. تا بْطايْفِتْنا تْكُونْ

سِمْعُوا الأَبُونا.. عَمّدِكْ بِالْحالْ

وْبِكْيِتْ بَعدْ ما عَمّدوكي عْيُونْ

لَكِنْ تا تِبْقَى ظَابْطَه الأَحْوالْ

بْإِيَّامْ فِيها الطَّائِفِيِّه جْنُونْ

بْمارْ جِرْس الرُّومْ عِمْلُوا إِحْتِفالْ

تْمَثّلِتْ فِيهْ الطَّوايِفْ كِلّها

تا يْكُونْ رَبّ الْكايْنِه مَمْنُونْ

ـ2ـ

أُمِّك وْبَيِّكْ أَخّروكي عامْ

تا يْعَمّدوكي وِالْفَلَكْ صَافِي

وْلِمِّنْ عَ بابْ الْيَأسْ قَلْبُنْ صَامْ

تْنَعْشَرْ شَهرْ.. قَالُوا: الْوَقتْ كافِي

عَزْمُوا الْحَبايِبْ.. زَيّنُوا الأَيَّامْ

تا إِشْكرُنْ.. رَحْ تِتْعَب شْفافِي

زْهُور الْمَحَبِّه مْكَوّمِينَا كْوامْ

بِقْلُوب مِتل الْفَجْر شِفَّافِه

وْلَوْ ما يْكُونُوا أَهلْ لِلإِكْرامْ

ما كانْ إِسْمِكْ يا بِنتْ (صافي)

ـ3ـ

عُمْرِك سِنِه.. شُو بْخَبّرِك عَنْ عُمرْ

حَرْقِت سْنِينُو الْحَرْب وِالأَهْوالْ؟

كِنَّا عَ دَعْسِتْنا يْفَرِّخْ زَهرْ

وْعَ زْنُودْنا تِغْفَى وْتِرْبَى عْيالْ

وْكِنَّا بْضِحْكِةْ غُنْج نِمْحي الْقَهرْ

وِنْنامْ مَلْوَى الْعَيْن.. فاضِي الْبالْ

وِالْيَومْ يا باسْكالْ صَفَّى الْعُهرْ

يِخْلَقْ عَ ذَوْقُو رْجالْ.. مَنَّا رْجالْ

بْيِسْكَروا بِالدَّمّ.. مُشْ بِالْخَمرْ

وْبِيتاجْرُوا بِجْماجِم الأَطْفالْ

لَكِنْ بَعد ما ماتْ فِينا الصّبرْ

وْقِلْنا: الْحِقدْ رَكَّعْ شُموخ جْبالْ

شِفْنا بْعِينَيْكي شَارْقَه الآمالْ

ـ4ـ

زْغِيرِه.. ما بَدِّي خَوّفِكْ يا زْغَيَّرَه

مِنْ كايْنِه مِتْعَجِرْفِه مِتْكَبَّرَه

الدَّمْعاتْ فَوْق خْدُودْها قْناطيرْ

وْضِحْكاتْها مْنِ (وْحُوشْها) مِسْتَنْظِرَه

أَعْمارْها بِيلِفّها التّعْتِيرْ

وْبِتْعِيشْ ما بْتِحْسُب حِساب الآخِرَه

لا تْفَكّريني يْئِستْ أَوْ عَقْلي زْغِيرْ

رَحْ تِكْبَري.. وْرَحْ تِقْشَعي هَـ الْمَسْخَرَه

كِيفْ الْغَنِي بْيِرْتاحْ عَ ضَهْر الْفَقِيرْ

وِالأَرْض عَمْ تِبْرُمْ عَ كَفّ الزَّعْبَرَه

بْحَلّفِكْ بَسّ تِكْبَري وْجِنْحِك يْطَيرْ

ضَلِّي وَفِيِّه لِلأَهلْ مِهْما يْصِيرْ

إِنْتي خْلِقْتي مِنْ أَسَاسِكْ.. جَوْهَرَه

**

كفوف الدّلال

عمادة الطفل طلال سهيل صافي، 25/7/1992

ـ1ـ

غَمَّض عْيُونُو وْنامْ يِحْلَمْ بِالصَّبِي

تا يْزَيّنُو بْزَهْراتْ تَلَّتْها الْجَمالْ

تِدْبَل سْنِينُو بِالسَّاعاتْ الْمتْعِبِه

وْيِرْسُمْ صُوَرْ أَطْفالْ عَ كْفُوف الدَّلالْ

وْتِرْقُصْ عَلَى إِيدَيْه لعْبِه مْدَهّبِه

خايِف عْلَيْها تِبْرُد بْلَيْل الْمُحالْ

وْكِرْمالْ عَيْن الْحُلْم.. ما خَلَّى نَبِي

إِلاَّ وْعَ بابُو دَقّ.. دَقَّات الرّجالْ

وْفَجْأَه بِيطِلّ الطّفْل عالي الْمَرْتَبِه

بْتِصْرُخْ (دَلالْ) وْفَرْحِتا وِسْع الدِّني:

زَلْغِطْ إِنِتْ.. طلّ الصَّبي يا (بو طَلالْ)

ـ2ـ

رَحْ إِغِمْرُو بِالْحُبّ، قَللِّي، وْبِالْحَنانْ

وْرَحْ إِزْرَعُو بَوْساتْ عَتَّقْها الزَّمانْ

هَيْدا وَحِيدي الْـ طَلّ مِنْ صَبْري الطَّويل

هَيْدا اللِّي خَلاّ الْهَجْر يِغْرَقْ بِالأَمانْ

قَبْلُو، افْتَكَرْت الْعُمْر رِحْلِةْ مُسْتَحيلْ

وْإِنُّو الْكفْر بِكْتِيرْ أَقْوَى مْن الإِيمانْ

تاري الْـ خَلَقْ هَـ الأَرْض ما بْيِخْلَقْ بَخِيلْ

يا غُرْبِةْ الأَيَّامْ هَنِّيني كْمانْ

وْهَنِّي (دَلال) بْثَمْرِة الْبَطْن الأَصِيلْ

وْهَنِّي الْبَنات بْرَفِّة الْجنْح الْمُصَانْ

وْهَنِّي حَبايِبْ قَلبْ.. رِبْحَنْلُنْ جْميلْ

وْقُول لْكنايِس ضَيعْتي: إِبْنِكْ سُهَيْلْ

شَاحِدْ وَحِيدُو مِنْ أَرزْ لُبْنانْ

**

بعنا الوطن للغول

عمادة الطفلين جورج وإيلي بو رزق، 2001

ـ1ـ

طَفِّحْ يا بونا جِرْن الِعْمادِه

الطِّفْلَيْن بَدُّن يِغِطْسُوا زْيادِه

جُورجْ خالِقْ  بِالتّقَى مَجْبُولْ

مِتِلْ عَمُّو.. بْيِنْعَطَى شْهادِه

ـ2ـ

وْإِيلي.. عَ جِنْح الْمَوْهَبِه مَحْمُولْ

مِتِلْ بَيُّو.. الْـ شَرَّفْ بْلادي

مِتِل أُمُّو.. الْـ لَفظْها مَعْسُولْ

مْنِ كْفِرْحَبُو.. شُو طَبعْها هادي

ـ3ـ

كَتِّرْ يا بُونا الْمَيّ.. مُشْ مَعْقُولْ

بَدّنا مْنِ الْمَيْرُون زُوَّادِه

بِعْنا الْوَطَنْ لِلْغُولْ.. مَلاَّ غُولْ

فَارِشْ جِتَتْ هَـ النَّاسْ سجَّادِه

ـ4ـ

وِمْقَسَّم بْلادي بْعرْض وْطُولْ

وْعَمْ تِمْدَحُو جَوْقاتْ رِدَّادِي

مْن الطَّائِفِيِّه بالْنا مَشْغُولْ

وْعَمْ يِحْشِيَا نِيرانْ وِقَّادِه

ـ5ـ

حَطُّوا عْلَيْنا كمْ وَرْقِةْ بُولْ

وْسَفّرُونا.. وْمِشْيِت الْعادِه

نِحْنا بْغُرْبِه.. قُول شُو ما تْقُولْ

الدّولارْ فِيها بْيِنْعَبَدْ عَ طُولْ

وْنَكْرُوا الْمَسِيحْ السيِّد الْفادي

**

جرن المعموديّة

عمادة الطفلة سامنتا حنا، 20/6/1993

ـ1ـ

جُرْن الْمَعْمُودِيِّه كانْ

ناطِرْ سَامِنْتا تا تْطِلّ

ناطِرْها.. صَرْلُو مْنِ زْمانْ

يْفَتِّشْ عَنْها بْيُوت الْكِلّ

قَلْلّو: يا رَبِّي الدَّيَّانْ

بْعَتْها.. الْمَيِّي رَحْ بِتْقِلّ

وَحْدي، بِكْنِيسِه، ضِجْرانْ

وْهِيّي النّجْمِه الْـ عَمْ بِتْهِلّ

أُمَّا غَذِّتْها بْإِيمانْ

وْبَيَّا حْوالَيْها بِيضَلّ

بْتِضْحَكْلُو.. بْيِضْحَكْلا كْمانْ

بْيِفْتَحْ قَلْبُو حَتَّى تْغِلّ

نجْمِه.. وْشِرْقِتْ مِنْ لُبْنانْ

تا تْضَوِّي عَتْماتْ الْهَجْرْ

وْتِزْرَعْ غُرْبِتْنا بِالْفُلّ

ـ2ـ

يا مَنْصُورَه غَنِّي الْيَوْم

غِنِّيِّه تْرَقِّصْ هَـ النَّاسْ

مِنْ مدِّه وِدَّعْنا الصَّوْم

وْبِالفُصْح حْضِرْنا الْقِدَّاسْ

مَعْمُودِيِّتْها وِالنَّوْم

ما بْيِتْلاقُوا.. صُبِّي الْكاسْ

تا نِشْرَب بِصِحِّةْ قَوْمْ

كِلُّنْ إِخْلاص وْإِحْساسْ

تا نْبَوِّسْ سامِنْتا دَوْمْ

وْبِعْمادِتْها الْـ كلاَّ طُهْر

نْهَنِّي الْياسْ وْمَرْت الْياسْ

ـ3ـ

بَيِّكْ يا سامِنْتا كْبيرْ

وْأُمِّكْ أَخْلاقَا صُورَه

بِتْشُوفِي فِيها التّقْدِيرْ

شَمْس.. وْبِتْوَزِّعْ نُورَا

حِبَّيْتُنْ؟.. قُولي: قْناطِيرْ

بْقَلْبُنْ بِنْيُولي قْصُورَا

كُوني مِتْلُنْ حَتَّى يْصِيرْ

فَجْرِكْ فَجْر الْمَعْمُورَه

كُوني مِتْلُن حَتَّى يْطِيرْ

صِيتِكْ لِبْلاد الأَرْزاتْ

وْتِفْرَح فِيكي الْمَنْصُورَه

**

روّاد

أمسية صدور كتاب (شربل بعيني بأقلامهم) لكلارك بعيني، 1/12/1987

ـ1ـ

يا كْلاركْ.. إِسْمَكْ لِلْوَفَا عِنْوانْ

يا إِبِنْ ضَيْعَه مْسَوسَحَه الأَكْوانْ

يا إِبِن أَطْهَر أُمّ مَوْجُودِه

مْن زْهُورْها بْيِتْلَوَّن الْبُستانْ

ـ2ـ

كْتابَكْ فَتَحْ آفاقْ لِخْلُودي

كْتابَكْ غَمَرْني بْنِعْمِة الإِخْوانْ

رُوَّادْ.. يا بْيُوت الشِّعرْ جُودي

بْهَـ الْكَونْ مِتْلُنْ ما انْوَجَدْ إِنْسانْ

ـ3ـ

مْنِ تْنَيْنْ عَيْن الْبُغضْ مَحْسُودِه:

مِنْ ناسْ سَكْبُوا الدَّمّ عَ الْوَرْقَه

وْمِن ناسْ فِدْيُوا بْدَمْهُن لُبْنانْ

**

غنّوا

قدمت بها المونسنيور ميشال بو ملحم، آب 1991

ـ1ـ

الْمُونسنيُور مَعْنا.. تْهَنُّوا

مِيشَال الْـ ما فِي مِنُّو

ما بْتِشْرُقْ شَمْس بْهَـ الْكَوْن

إِلاَّ ما يِضْحَكْ سِنُّو

ـ2ـ

بُو مِلْحِم.. بِوْجُودُو هَوْن

قَدَّمْ لِرْعِيِّتْنا الْعَوْن

وْزَوْزَقْ غُرْبِتْنا بِاللَّوْن

تْهَنُّوا، يا حْبابي، تْهَنُّوا

**

ناطرينك

قدّمت بها المطران عبده خليفة في احتفال القربانة الأولى في معهد سيّدة لبنان، عام 1984

ـ1ـ

يا عَبْدُو.. الرَّبّ بَارَكْلَكْ يَمِينَكْ

وْقَلَّكْ: دَوْم رَحْ إِبْقَى مُعِينَكْ

وْتا حَتَّى تْبارِك الأَجْيالْ كِلاَّ

بْزِيد سْنِينْ عُمْري عَ سْنِينَكْ

ـ2ـ

يا سَيِّدْنا.. إِنتْ إِنْسانْ.. صَلَّى

عَ مَدْبَحْ حُبَّك اللِّي مْقَدّرِينَكْ

إِنْتَ رُوحْ لِلْعَالَـم تْجَلَّى

وِلْهَـ السَّبَبْ.. بِتْشُوفْنا عَ طُولْ

مَع الأَطْفالْ نِحْنا ناطْرِينَكْ

**

شو همّني؟

كتبتها لتلقيها المرشحة لملكة جمال الجالية العربيّة في مدينة مالبورن الآنسة كلوديا بعيني.

ـ1ـ

مَلْكِةْ جَمال بْكُونْ

أَوْ ما بْكُونْ؟

شُو هَمّني؟

الْـ بِيهِمّني تِضْحَك عْيُونْ

أَطْفالْ عَمْ تِبْكي

نِسْيِت الضِّحْكِه

نامِتْ عَلَى سْرير الْوَجَعْ

وِالْخَوْف عَ الْوِجّ انْطَبَعْ

هَوْدي مْلايِكْة السَّمَا

الْـ بِيسَاعِدُنْ قِدِّيسْ

الْـ بِيفَرِّحُنْ قِدِّيسْ

كِرْمالُنْ بْتِرْخَصْ دِمَا

أَطْفالْ.. هِنِّي وْلادْنا

هِنِّي الْفَرَح بِعْيادْنَا

وْلَمَّا بْيِمْشُوا عَ الأَرْضْ

فَوْق الأَرضْ.. أَكْبادْنَا

ـ2ـ

مَلْكِةْ جَمالْ بْكُونْ

أَوْ ما بْكُونْ؟

الِمْهمّ نَجْحِتْ حَفلْتِي

مَعْ ناسْ صَارُوا عَيلْتِي

قَلْبي إِلُنْ مَدْيُونْ

وْمَمْنُون طُول الْعُمْر

الدُّولارْ صَفَّى فْنُونْ

وْدَبْكِه.. وْكم مَوَّالْ

الدُّولارْ صَفَّى زَهرْ

يْفَرِّحْ قَلبْ أَطْفالْ

نامُوا بْحُضن الْقَهْرْ

**

عيد الأمومه

ليلة عيد الأم، 11/5/1991

ـ1ـ

يِسْعُدْ مَسَاكُنْ بِـ 11 أَيَّارْ

شَهْر الأُمُومِه الْـ حَنِّت عْلَيْنا

الْعِيدْ بُكْرا.. قَدّمُوا الأَزْهارْ

لِلسّاكْنِه جُوَّاتْ عِينَيْنا

ـ2ـ

لِلأُمّ يَللِّي صَيّرِتْنا كْبارْ

ومن الصعب نقدر نوفيا دَيْنا

بتسهر علينا الليل يطفي نْهار

وْلَوْ مِنْ سَهَرْها.. ما تْرِبَّيْنا

**

يوبيل فضّي

ألقيت هذه القصيدة نيابة عني بمناسبة اليوبيل الفضّي لإحدى الرهبنات في القدس

ـ1ـ

بْيُوبِيلْ فُضِّي جِيتْ هَنِّيكُنْ

يَا فَرْحِة القُدْس بْأَسامِيكُنْ

إِنْتُو الْقَدَاسِه والطُّهْرْ

مْنِ دْمُوعْكُنْ.. شَالُوا الْعِطْرْ

وِالْوَرْد فَتَّحْ عَ أياديكُنْ

ـ2ـ

أَيَّا مَجْد.. ما لَفّكُنْ شَالُو

وْصَوَّرْ عِينَيْكُنْ عَ وَرَقْ بالُو

سْنِينْكُنْ ما بْتِنْتِهي

بْأَعْمالْكُنْ عَمْ تِزْدِهِي

حتَّى الإيمان يْوَسِّع مْجالُو

ـ3ـ

مِنْ غُربْتي.. مْنِ بْلادْ ما بْتُوعَى

إلاَّ عَلى صَيْحاتْ مَسْمُوعَه

ضْوِيتْ التَّهانِي شْمُوعْ

وْبِالْقَلْب صَرْخِةْ جُوعْ

يا مينْ يِمْحِي غُرْبتي وْجُوعا!

ـ4ـ

طالِعْ عَلَى بالي الْبِكي

مِنْ فَرْحتي.. وْإِلْغِي الْحَكِي

بْيُوبيلْكُنْ ما في حَكي يِنْقالْ

يا سَاكْنينْ الْبالْ.. جُوَّا الْبَالْ

بْنيتُوا مَجْد هَـ الْمَمْلَكِه

**

كتير إنساني

ألقيت في حفلة واحد وعشرين جورج فهد من بلدة راس مسقا

ـ1ـ

جايِي أَنا تا شارِك مْحِبِّينْ

ما يَوْم بِهَـ الْعُمْر نِسْيُونِي

وَقْت الْـ بِيكُونُوا شْوَيّ مِجْتِمْعِينْ

بْيِذِكْرُوا إِسْمِي.. بْيِذِكْرُونِي

وِلْهَـ السَّبَبْ عَ وَاحِدْ وْعِشْرِينْ

جُورْج الْفَهْد أَوّلْ ما عِزْمونِي

احْتَرْت شُو بِهْدِيكْ يا إِبْن الْعَرِينْ

حْمِلْت قَلْبِي عَ طَبَقْ إِلْماسْ

وِكْتَبْت شِعْرِي بْدَمْعِة عْيُونِي

ـ2ـ

ما بَعْرفَكْ.. لَكِنْ حَكُولِي النَّاسْ

إِنَّكْ شَهْم.. خِلْقَانْ إِنْسانِي

حُبّ الْفَضِيلِه آخْدُو نِبْرَاسْ

وفَضْلَكْ عَظِيمْ.. وْما إِلُو تانِي

بَيَّكْ حَبِيب الْقَلْب.. خَلَّى الْكاسْ

يْبُوسْ خَيُّو.. وْيِدْبَح قْنانِي

رْضعْت الْفِهْم وِالْحُبّ والإِحْساسْ

مِنْ صَدْر أُمّ بْيِنْحِنِيلا الرَّاسْ

الأُمّ الْحَنُونِه الْـ إِسْمها.. آنِه

ـ3ـ

وْهَلَّقْ يا أَعْظَمْ ناسْ.. يا أَحْبابْ

رَحْ تِخلَصْ الْحَفْلِه بَعدْ نِتْفِه

وْبَعْد اللِّقَا.. بْيِتْفَرّقُوا الأَصْحابْ

كِلْمِنْ بِيرُوح بْدَرْب مُخْتِلْفِه

لَكِنْ بِـ إِذْن الرَّبّ.. هَـ الدُّولابْ

بْيِبْرُم.. تا حَتّى نِجْتِمعْ عَنْ قُرْبْ

وَقْت اللِّي بَدّنا نْزَوّجُو لْهَـ الشَّبّْ

الْـ شَمْعِةْ مِيلادُو، اليَوْم، عَمْ يِطْفِي

**

بوسيلاّ

ـ1ـ

الطّفِلِه الْـ إِسْما بُوسِيلاَّ

ناوَلْناها.. الْحَمدللَّـه

مِتْرِبَّايِه بْبَيْت كْبِيرْ

عَايِشْ بِمْحَبِّة أَللَّـه

ـ2ـ

فَتْحِتْ قَلْبَا لْطِفْل زْغِيرْ

ساكِنْ جُوَّات الْقرْبانْ

قَالِتْلُو: بْحِبَّك كْتِيرْ

يَا يَسُوعْ.. وْبِتْرَجَّاكْ

تْوَقِّفْ هَـ الْحَرْب بْلُبْنانْ

ـ3ـ

مِتْل عْيُونا ما فِي عْيُونْ

كَوَّنْها الرَّبّ الدَّيَّانْ

بِحْلاوِةْ أُمَّا (بِيرُونْ)

وِلْطَافِةْ بَيَّا رِينِيهْ

هَـ الْـ كِلُّو حُبّ وْإِيمانْ

ـ4ـ

عَ قْبالْ الْفَرْحَه يا رَبّ

الْـ رَحْ نِفْرَحْها بَسّ تِكْبَرْ

وِتْحْضالا بِـ أَجْمَلْ شَبّْ

بْيِعْبَدْها.. لَكِنْ مِنْ بَعْدْ

أَللَّـه وِالأَرْز الأَخْضَرْ

**

يا رفيق بيّك

ألقيتها في واحد وعشرين أَنتُوني روحانا رَحْمِه، 13 أيار 1995

1ـ

أَوْسَعْ مِنِ الأحلام سَاحِة فَرْحِتَكْ

يَا أَمَلْ بَيَّكْ .. يَا ضِحْكِةْ مَيْمِتَكْ

إِيلينْ .. لَوْ بِتْقِيسْ عمرَكْ بِالصَّلا

مْأَكَّدْ عَ حَبَّات الْمَسابِحْ رَبِّتَكْ

وْيامَا وْياما رَسْمِتَكْ بَدْر الْفَلا

وْمِنْ خَوْفْها .. بْقَلْبِ الدّخيرِه خَبِّتَكْ

تِسْرُق مِنِ الشَّمْعاتْ أنوار الحلا

وتسرُقْ مِنِ البَخُّور شَمِّةْ ريحِتَكْ

يَا وْحَيِّـدْ .. وْإِسْمَكْ عَلَى شْفَافِ الْمَلا

مِنْ أَنْتونِي الْقِدِّيسْ رَكْعِتْ شَحْدِتَكْ

وْتا يِفْرَحْ الْقِدِّيسْ .. إِسْمُو عَطْيِتَكْ

ـ2ـ

بِالْواحِدْ وْعِشْرِينْ .. بَيَّكْ زَقْفِتُو

وِصْلِتْ عَ بَسْلُوقِيتْ .. وِعْيُوا رْجَالْها

وْهَزِّتْ جْبَال الأرزْ قُوِّةْ دَبْكِتُو

وْمِنْ دَمْعِةِ الأفراح سِقْيِتْ حَالْها

وْهَـ الْغِرْبِة الْـ رَبَّى بْسَمَاهَا شَيْبِتُو

كِرْمَالْ عَيْنَكْ إِنْتْ مُشْ كِرْمَالْها

يَا رْفِيقْ بَيَّكْ .. يا مْدَوَّرْ بَسْمِتُو

يَا عَيْلِتُو .. اللّي فِيكْ كِلّ عْيَالْها

خَلِّيكْ حَدّو قَامْتَكْ عَ قَامِتُو

هَـ الْقَامِةْ اللّي كِنْتْ إِنْت خْيَالْها

مِنْ مِجِدْلَيَّا رْضِعِتْ .. كَفِّي سَكْرِتُو

مْنِ نْبيدْ بَسْلُوقيتْ شَمسِ بلادنَا

الْـ نَطْرِتْ شَبَابَكْ تَا يْطِلّ قْبَالْها

ـ3ـ

بَعْدَكْ شَبَاب وْكِلّ هَـ الدّنْيِي إِلَكْ

عَ كْتَافْهَا ..عَ رَاسْهَا عَم تِحْمِلَكْ

أُوعَا تْغِرَّكْ هَـ الدِّنِي بْطَعْمَا الْحِلُو

خَايِف أَنَا تْسَمِّمْ عَسَلهاْ .. وْتِقْتِلَكْ

خَلّيك إبن الأصْلْ .. شَامِخْ بِالْعلو

خَلّيكْ إِبن الطهر . أَلـله مْرَسْمَلَكْ

بْتِبْقَى الصَّبِي .. بْتِبْقَى الْوَحيد الْـ ما إِلُو

تَانِي .. وْعَ نَغْمَاتْ الأبُوِّه نْدَلِّلَكْ

وْكِيف ما بَرَمْت.. بِعْيُونْنا إنت الملَكْ

**

زهر إنساني

عمادة الطفلين طوني وميراي بشارة

ـ1ـ

ميراي.. طوني زهرتين زغار

متلُن ما عنّا زهر إنساني

من طلّتُن بدر السّما بيغار

وْبِتصير عين الشمس رِمْدانه

ـ2ـ

طفلين.. لمّا تقبّلوا الأسرار

غطّى الفرح قلب المعمداني

حمل الجرن.. عمَّد بِـ مَي ونار

وْرندح بِـ صوتو لحن سرياني

ـ3ـ

وجورج بيُّنْ.. جرجس الجبّار

جَبْلُن التّنّين حِلْوانِه

وأمُّن مهى.. قطفتْ فرحها غْمَارْ

والوجّ يِنقُفْ نور ربّاني

ـ4ـ

هودي (بْشَارَه).. قالت الأطيار

وكرمال عَيْنُنْ غَنِّتْ غْنَانِي

جِدُّن (مَلَكْ) والمملكه أقمار

ومار يوسِف.. جِدُّنْ التَّاني

ـ5ـ

وْسِتّنْ (بَدِرْ).. هِدْيِتْ الدنيي بْدَارْ

وْسِتّن (رينيه).. بالطّهر خلقانِه

طفلين من لبنان.. مهما صار

البيكون شِلْشُو من تراب الأرز

كيف ما بَرَم بيضلّ لبناني

**

ملاك زغير

غنّتها الأخت مارلين شديد في جنّازة الطفل الملاك جفري.

ـ1ـ

جِفْري.. جِفْرِي مْلاك زْغِيرْ

طَيَّرْ عَ السَّما الزَّرْقَا

وْنِحْنا اللِّي مِنْحِبُّو كْتِيرْ

وَلَّعْ بِقْلُوبْنا الْحَرْقَه

ـ2ـ

ناطِرْ تا يْقَابِلْ يِسُوعْ

لأَوَّلْ مَرَّه بِالْقُرْبانْ

تْيَابُو الْبَيْضَا وْضَوّ شْمُوعْ

رَحْ يِبْقُوا بْسَيّدِةْ لُبْنانْ

يِحْكُوا عَنْ ظُلْم الْفِرْقَه

ـ3ـ

أُمُّو وْبَيّو زِعْلانِينْ

لا تِتْرُك قَلْبُنْ مَقْهُورْ

وْأَهْل الدَّامورْ حِزْنانينْ

خَلِّي عَيْنَك عَ الدَّامُورْ

وْأَرْض بْلادِي الْمِحْتِرْقَه

**

رغيف

قدّمت بها رئيس جمعيّة كفرصارون الخيرية الأستاذ إيلي ناصيف عام 1990 في حفل عاد ريعه لبناء مستوصف النجدة الشعبية في البلدة.

ـ1ـ

رَئيسِكْ يَا كفْرصَارُونْ

عَ إِسْمُو شُو فِينِي ضِيفْ؟!

خَيِّي.. وِرْفِيقِي الْمَدْيُونْ

لِعْيُونُو.. وِالدَّيْن رْغِيفْ

ـ2ـ

عَ شكْلُو.. مْن الصَّعْب يْكُونْ

تِشْرِيفُو زَاد التِّشْرِيفْ

دِينَيْن بْتِسْمَعْ وِعْيُونْ

شُو بْيِحْكي إِيلي ناصيفْ

**

حرق

قدّمت بها الأستاذ أنطونيوس بو رزق في يوم محمد زهير الباشا عام 1989

ـ1ـ

حْرُوفُو عَمْ بِتْبَلْسِمْ حِرْقْ

مِزْمِنْ.. فَوْق جْبِين الشَّرْقْ

وْأَشْعارُو مْرايِه سِحْرِيِّه

ياما عْلَيْها تْمَرَّى خَلْقْ

ـ2ـ

شُو رَحْ يِحْكِي بْهَـ السَّهْرِيِّه

وكلماتو شراقيط البرق

الليله بهالكلمه المضويه

شُو رَح يْقِلّلُو لِلْبَاشَا

الشَّاعر أنطونيوس بُو رزْقْ

**

بيوت الشعب

قدّمت بها الأستاذ جوزاف بو ملحم في يوم محمد زهير الباشا عام 1989

ـ1ـ

بْحِبّو.. بْحِبُّو بْدُون قْيَاسْ

مْحَبِّه بْيِفْرَحْ فِيهَا الرَّبّ

قَلْبُو دِنْيِي من الإحْساسْ

وْكيفْ بَدُّو يِرْتاح الْقَلبْ؟!

ـ2ـ

الْكِلْمِه اللِّي بْيِكْتِبْهَا أْساسْ

انْبَنْيِتْ فَوْقُو بْيُوت الشَّعْبْ

وْنَخّ عْلَيْها الْحَقّ وباسْ

حْرُوفَا.. وْحارَبْ فيها الْكذْبْ

جُوزاف بُو ملحِمْ يا ناسْ

حُبّ.. وْعَم بِيوَزِّعْ حُبّ

**

ريّس

قدّمت بها رئيس تجمّع المسنين العرب السيد راشد الحلاب في يوم محمد زهير الباشا عام 1989

ـ1ـ

قَادِرْ بِـ قَلْبُو بَسّ يِجْمَعْنا

وِيْكَفْكِفْ بْإيدُو مَدامِعْنا

وِصْفُوفْنا الْـ ما تْوَحّدِتْ بِالْعُمْرْ

تْوَحّدِتْ لَمَّا انْوَجَدْ مَعْنا

ـ2ـ

رَيِّس تَجَمُّعْ لِلشَّبَاب السّمْرْ

الْـ قدَّامْ مَجْد سْنِينُن رْكَعْنا

اشْتَقْنَا لْكِلْمِه جَامْعَه بِالْهَجْرْ

قْلُوبْنا عَمْ تِنْشوِي عَ الْجَمْرْ

يا رَاشِد الْحِلاّب.. سَمِّعْنا

**

زين

قدّمت بها الشاعر زين الحسن في يوم محمد زهير الباشا عام 1989

ـ1ـ

مْنِ زْمانْ صَرْلِي بَعرْفُو مْنِ زْمانْ

شَاعِرْ.. عَ إِيدُو رِبْيِت الأَوْزانْ

مِن بَعْد أَللَّـه بْيِعْبَد بْلادُو

وْأَرْزاتْ صَيَّفْ تَحتها الدَّيَّانْ

ـ2ـ

ما هَمّ لَوْلا بْيِخْسَر وْلادُو

عَ شَرْط تِبْقَى لْشَعبْها أَوْطانْ

زَيْن الْحَسَنْ بِيكُون مِيلادُو

لَمَّا السَّلام بْيُولَد بْلُبْنانْ

**

شموخ

قدّمت بها الأستاذ عصمت الأيوبي في يوم محمد زهير الباشا عام 1989

مَهْما يْصِيرْ

بْيِبْقَى كْبِيرْ

شْمُوخُو مْنِ شْمُوخ بْلادُو

زَيَّنْ شِعْرُو بِتْصَاوِيرْ

عَمَّرْ فَوْقَا أَمْجادُو

عِصْمَتْ كِلْماتُو تْبَاشِيرْ

رَدِّتْ لِلْكَون عْيَادُو

**

تذكرتين

قدّمت بها الشاعر فؤاد نعمان الخوري في يوم محمد زهير الباشا عام 1989

ـ1ـ

ضَاعْ، قَالُوا، وْشَحّ دَمْع الْعَيْنْ

وِالْمُغْتَرِبْ عَ طُولْ ضَايِعْ بَيْنْ:

أَرضْ اللِّي فِيها زَارِع دْمُوعُو

وْأَرْض اللِّي فِيهَا لقمْتُو بِالدَّيْنْ

ـ2ـ

بَسّ الْقَصَايِدْ صَعْب تا يْجُوعُوا

بْيِضْوُوا بلَيْل الشَّاعِر شْمُوعُو

وْفُؤاد خُوري مْأَكَّد رْجُوعُو

ما فِي شِعْر رَاضِي بْتِذْكِرْتَيْنْ

**

كامل

قدّمت بها الأستاذ كامل المر في يوم محمد زهير الباشا عام 1989

رَبَّى الْحَرفْ

بْأَصْعَبْ ظَرْفْ

وْضَوَّى بْكِلْماتُو مْشَاعِلْ

مَهْما قُولْ

بْشِعْرِي.. وْجُولْ

مَا بْيِطْلَعْ حَكْيِي كامِلْ

إِلاَّ ما يْوَافِقْ كامِلْ

**

إبن الكورة

قدّمت بها الشاعر نعيم خوري في يوم محمد زهير الباشا عام 1989

عَ صَخْرَه بْأَعْلَى صنِّينْ

حَفْرُولُو إِسْمُو حْسَاسِينْ

وْصَفَّى التّلْج يْغَطِّي الإِسْمْ

مْن الْبَرْدْ.. وْيِزْعَل تِشْرِينْ

بْشَرْشفْ أَبيَضْ خَرْج الرَّسْمْ

وْما بْعُمْرُو داقْ التّلْوِينْ

إِلاَّ بْرِيشِه مَسْحُورَه

حامِلْها إِبْن الْكُورَه

نَعِيم الْخُوري مْنِ سْنِينْ

**

أستاذ

قدّمت بها الأستاذ فؤاد نمور في يوم محمد زهير الباشا عام 1989

أَدِيب كْبِير وْمَشْهُورْ

مْنِ حْرُوفُو بِيشِعّ النُّورْ

وِمْعَلّم عَلَّمْنا الْحَرْفْ

وْزَيَّنَّا بْبَاقَاتْ زْهُورْ

الْـ ما تْعَلَّمْ عِنْدُو بِالصَّفّ

يِرْجَعْ يِتْعَلَّمْ وِيْقُولْ:

أسْتاذِي فُؤاد نَمُّورْ

**

بطرّام

قدّمت بها الشاعر نعيم خوري عام 1987

ـ1ـ

كْبِيرْ بْشِعْرُو.. بْأَخْلاقُو

اللِّي كِبْرِتْ فِيهَا الأَيَّامْ

بْيِسْكُبْ دَمُّو عَ وْراقُو

تا يْلَوِّنْ كلّ الأَحْلامْ

ـ2ـ

سْنِين الْغُرْبِه ما رَاقُوا

وْلا انْطَفِيتْ فِينَا الآلامْ

لَوْلا كِلْمات اشْتاقُوا

لِلأَرْض الْـ عَطْيِت نَعِيمْ

خُوري.. وْسَمُّوها بْطُرَّامْ

**

سلة

قدمت بها الشاعر عصام ملكي عام 1988

ـ1ـ

طَلِّةْ مَحَبِّه طَلّتُو

بِقْصَايْدُو الْكَون اغْتَنَى

وْعَ جْبال شُهْرَه عَلّتُو

تا صَار أَقْوَى مْنِ الْفَنَا

ـ2ـ

تْرَأَّسْ عَ عُصْبِه خَلّتُو

يِتْعَبْ.. تَا يِزْداد الْجَنَى

عِصَام ملْكِي سَلّتُو

ما يَوْم رِجْعِتْ فَاضِيِه

عِبَّيْتْها بْشِعْرِي أَنا

**

طرحه

في إحد اعراس الجالية 1977

بْإِيدِي الْيَمِين بْصَلِّب عْلَيْكُنْ

وِبْقُولْ: يِسْعدْ هَـ الْمَسَا

الْغُرْبِه بْتِقْهُرْ.. بَسّ عِينَيْكُنْ

ما يَوْم بِتْدُوق الأَسَى

مْشِيتُو الْمَسَافِه وْتَحْت إِجْرَيْكُنْ

فَرَّخْ زَهْر ما بْيِنْتَسَى

جَمَّعْ بَيَاض كْفُوف إِيدَيْكُنْ

وْفَصَّل الطَّرْحاتْ عَ قْيَاس الْحَلاَ

تَا كلّ ما الصّبْح انْجَلَى

لأَحْلَى الصَّبايا يْلَبِّسَا

**

إنت الوحيد

حفلة تجمّع المسنين العرب

ـ1ـ

يا هَـ التَّجَمُّعْ.. مُشْ عاجِبْنِي كْتيرْ

إِسْم التَّجَمُّعْ لازْمُو تَغْيِيرْ

مْسِنِّين!.. مِينْ بِيقُولْ عَنْكُنْ مِينْ؟

غَيْر الْـ ما عِنْدُو عْيُونْ أَوْ تفْكِيرْ

إِنْتُو بْعَيْنِي كَمِشْتَيْن سْنِينْ

إِنْتُو بْعَيْني عُمْر ما لُو حْدُودْ

مَهْما كِبِرْ بِيضَلّ شَبّ زْغِيرْ

ـ2ـ

زَهْرَه، بْغُرْبِةْ شَوْك، فاحِتْ بِالْعُطورْ

يا هَـ التَّجَمُّعْ.. زِيدْ غُرْبِتْنا زْهُورْ

إنتْ الْوَحِيدْ اللِّي عْطَيْت بْلا ثَـمَنْ

إنْت الْوَحيدْ اللِّي غْلِبتْ مَوْج الْبُحُورْ

إنْت الْوَحِيدْ الْواقِف بْوِجّ الْفِتَنْ

وَقْفِةْ بَطَل جَبَّارْ مَرْفُوع اللِّوَا

خَلَّص بْلادُو مْن الزَّعامِه وِالْفُجُورْ

ـ3ـ

بْلادُو.. بْلادِي.. بْلادَكْ.. وْشُو هَمّ؟

ما دامْ جامِعْنا الْعِرقْ وِالدَّمْ

ما دامْ نِحْنا لِلْحَضَارَه حَرْفْ

وْنِحْنا الأُخُوِّه الْـ ما احْتاجِتْ أُمّ

وْما دامْ حِبْر الضَّادْ صَعْبِه يْجِفّ

وِكْتابْنا الْقُرْآن والإِنْجِيلْ

إِيمانْنا بْهَـ الْكَوْن بَدُّو يْعِمّ

ـ4ـ

جايِي.. وْمُشْ عارِفْ بِأَيَّا لْسَانْ

أُشْكُر اللِّجْنِه الْمفضْلِه عْلَيْنا

خْصُوصِي الرَّئيسْ الشَّاعِرْ الإِنْسانْ

الْـ أَغْلَى مْنِ الضَّوّ الْـ بِـ عِينَيْنا

شَاعِرْ غَريب بْغُربتُو فَنَّانْ

بْيِزْرَع زْهُورُو عَ الْوَرَقْ.. مِنْشَانْ

تِبْقَى زْهُورُو بَينْ إِيدَيْنَا

**

بلوزا

في إحدى حفلات بلدة بلوزا

ـ1ـ

يا بْلَوْزا.. سَيِّدْنا الْيَوْمْ

جَايِي يْبَارِكْ خِبْزَاتِكْ

إِسْمُو تِرْتِيلِه بِالصَّوْمْ

عَطْفُوا نَوَّرْ عَتْماتِكْ

كِرْمالُو ما تْخَلِّي النَّوْمْ

يِطْفِي الشَّمْع بْسَهْراتِكْ

كِرْمالُو خَلِّيكِي دَوْمْ

قانا.. وْصُبِّي نْبِيداتِكْ

ضْيُوفِكْ، بِهَـ الْحَفْلِه قَوْمْ

يا ما حِلْفُوا بِحْياتِكْ

ـ2ـ

يا بْلَوْزا.. شُو ما حْكِينا

الْغُرْبِه رَحْ تِمْحِي الْكِلْماتْ

بْعدْنا عَنِّكْ وِشْقِينا

وْهاكْ الْحُلْم الصَّافِي ماتْ

ضِحْكِه مْنِ الْقَلْب عْطِينَا

دِبْلِتْ بِالْهَجْر الْبَسْماتْ

بِـ حُضْنِكْ رِبَّيْتِينا

وْقِسْتِي بِالشّبْر الْقَاماتْ

اشْتَقْنالِكْ.. لا تِنْسِينا

مدِّي إِيدِكْ.. لاقينا

إِنْتي يا أَحْلى الإِمَّات

**

مار نقولا

ألقيتها في حفلة خيريّة يعود ريعها لترميم كنيسة القديس نقولا في صافيتا، 20/12/1980

ـ1ـ

أهْلا وْسَهلا بْطلِّة الأَحْبابْ

بْهَـ اللَّيْلة الْـ فيها الْقَمرْ ما غابْ

بْهَـ السَّهْرة الْـ كِلاَّ حَلا وْحِلْوِينْ

الْـ مِنْ حِسِنْهُنْ حِسْن الطَّبيعَه خابْ

انْشَاللَّـه مْنِبْقَى هَيْك مَبْسُوطِينْ

تا نْفَهِّم الْعالَـمْ كِيف الْغِيَّابْ

ما يَوْم خانُوا وْكَسّرُوا قْوانِينْ

وْما يَوْم رِضْيُوا يِنْفِتِح هَـ الْبابْ

نِحْنا خْلِقْنا قَوْم مِتِّحْدِينْ

لا الدِّينْ فَرَّقْنا.. وَلا الأَحْزابْ

وِانْ كانْ فِينا النَّاسْ مَغْشُوشِينْ

وْقالُوا: بْتِحْكِمْنا شَرِيعِةْ غابْ

نِحْنا بْـإيدَيْنا انْزَرْعِت بْساتينْ

وْكِلّ كِلْمِه بْيِحِسْبُولا حْسَابْ

نِحْنا الْـ عَطَيْنا الأَرْضْ قِدِّيسِينْ

يِعْنِي.. بَلا إِنْجِيلْنا وْقُرآنْنا

ما فِي حَدا بْهَـ الْكَوْن كِلُّو تابْ

ـ2ـ

وْجُوهْ أَجْمَلْ مِنْ قَمَرْ نُوَّارْ

وِقْلُوب مِتْل التَّلْج بِـ آدارْ

أَللَّـه يِحْمِيكُنْ مِن الْحِسَّادْ

يَللِّي الشَّمْس مِنْ نُورْكُنْ بِتْغارْ

مَهْما تْغِرَّبْتُو وْصِرْتُو بْعادْ

عَ طُولْ بَعْدا مْلَبَّكِي الأَفْكارْ

عَ بْلادْكُنْ.. ما هَمّ أَيَّا بْلادْ

الِمْهِمّ فِيها بَعْد بَيّ كْبِيرْ

وْأمّ بَعْدُو قَلبْها عَ نارْ

ـ3ـ

نِحْنا جَماعَه مْعَوّدِه عَ الْخَيْرْ

بْرَوْض الْفَضِيلِه مْشَغّلِه عْقُولا

وْمِنْشانْ تِشْرُق شَمْس تِمّ الْغَيْرْ

مْنِمْشِي طَريق الْجُلْجُلِه بْطُولا

يِعْنِي الْهَجْر.. يِعْنِي السَّما وِالطَّيْر

بْتِشْهَدْ عَلَى الْكِلْمِه اللِّي رَحْ قُولا

بْأَرْض صَافِيتا فِي عِنَّا دَيْر

حامِل إسم قِدِّيسْنا نْقُولا

سَقْفُو انْهَدَمْ.. وِتْطايَرْ الْقَرْمِيدْ

لازِم بِنَخْوِتْنا صُرُوحُو نْشِيدْ

كْرامِة صَافِيتا وْشَعبْها الْـ ما أَكْبَرُو

كْرامِة شَفِيعَا.. الْـ بِالْقَداسِه عَم يْزِيدْ

نْقُولا.. اللّي إِسْمُو بَسّ إِنّو تِذْكِرُو

بِيرُوحْ يَوْم النّحْس وِلْيالِي النّهيدْ

بِقْلُوبنا.. بْأَمْوالْنا مِنْعَمِّرُو

تا الربّ يِحْمينا وْيِحْمي عْيالْنا

بْراس السِّنِه.. وِبْعِيدْ مِيلادُو الْمَجِيدْ

ـ4ـ

وْهَلَّقْ انْشَاللَّـه بْتِفْرَحُوا مَعْنا

وِبْتِرْقِصُوا.. وِبْتِسْكَرُوا لِلْفَجْر

انْ خِلْصِت الْخَمْرَه مِنْ مَدامِعْنا

مْنِعْصُرْ.. تا نِسْكُب لِلْحَبايِب خَمْر

حَتَّى إِذَا ضَاقِتْ مَجَامِعْنا

قْلُوبْنا مْنِفْتَحِلْكُنْ وِالصَّدْر

أَهْل نِحْنا.. الْحُبّ جامِعْنا

وْأُمّ وِحْدِه أُمّنا يا ناس

أُمّنا الغُرْبِه وْدُموع الْقَهْر

**

أيطو

حفلة جمعيّة أيطو الخيريّة، 25/10/1986

ـ1ـ

يِسْعِدْ مَساكُنْ بِـ شَهرْ تِشْرينْ

بْلَيْلِةْ سَبتْ.. بِالْخامِس وِعْشرينْ

بْلَيْلِةْ َرَحْ.. لَيْلِةْ هَنَا.. وِالنَّاسْ

عَ فَردْ قَلب وْرَبّ مِجْتِمْعينْ

يا رَيتْ بِبْلادي بْيِصْفَى الْكاسْ

تا يِرْجَعُوا الأَحْبابْ مِتِّحْدِينْ

نِحْنا شَعبْ مَجْبول بِالإِحْساسْ

مْنُؤمِن بِأَللَّـه وِبْأَرزْ لُبْنانْ

وْما يَوْم فَرَّقْنا الْعِرِقْ وِالدِّينْ

ـ2ـ

إِنْتُو الْوَفا وِالْحُبّ وِالإِحْسانْ

وْصَرْح الْبُطُولِه الشَّامِخ بْنَيْتُو

وْمِنْشانْ يِبْقَى بْهَـ الدِّنِي إِنْسانْ

مْعَمَّرْ عَ صَخْر التَّضْحِيِه بَيْتُو

وْمِنْشانْ يِبْقَى بْقَلبْكُنْ إِيمانْ

حْرَقْتُو الْعُمرْ تا الْعَتمْ ضوَّيْتُو

وْمِن كِتِر ما خْدَمْتُو الْوَطَنْ لُبْنانْ

إِسْمُو صَلا لِلْكَون صِلَّيْتُو

صِرْتُو أَرزْ مَزْروعْ بِالْبُلْدانْ

وِالنَّاسْ تِحْكي لْبَعضْها وِتْقُولْ:

أَللَّـه بْسَماهْ وْعَ الأَرضْ أَيْطُو

ـ3ـ

أَيْطُو الْحَبِيبِه الْغالْيِه عْلَيْنا

أَغْلى من النُّور الْـ بِـ عِينَيْنا

هِدْيِت بْلادي شْمُوعْ مضْوِيِّه

وْزَرْعِتْ كَرَمْ عَ كْفُوفْ إِيدَيْنا

خَلْف الْبَحرْ.. مِينْ غَيرْها هِيِّي

كَرَّمْ الأَرْزِه.. أَوْ وِفِي دَيْنَا؟

يا رَيْت عِنْدَا أَلْف جَمْعِيِّه

مْوَزّعَه بْهَـ الْكَونْ.. حَتّى نْقُولْ:

عَ إِسمْ أَيْطُو الْكَونْ سِمَّيْنا

ـ4ـ

عِيشُوا سَوَا وِالإيدْ تِشْبُكْ إِيدْ

لُبْنانْ شُو محْتاجْ لِـ أْيادي

تْحَيِّكْ أَمَلْ.. تِغْزُلْ شِي حُلْم جْديدْ

تا الْمَجْد يِعْبُد إِسِمْنا عْبادِه

مَهْما اللَّيالِي تْجِنّ.. فَجْر الْعِيدْ

جَايي وْجايِبْ نُورْ بِزْيادِه

شْبِعْنا شَقَا.. شْبِعْنا جَفَا وْتِنْهِيدْ

حَلُّو بَقَى شَمْل الشَّعبْ يِلْتَمّ

تَحتْ فَيِّةْ أَرزِة بْلادي

**

زهرة الكورة

ألقيتها في حفلة رأس مسقا، 7/3/1992

ـ1ـ

ناطِرْ عَ دَرْب الْوَعْد لاقِيكي

يا راسْمَسْقا، وْصِيرْ غَنِّيكِي

غِمَّضْت عَيْنِي، حْلمْت حُلْم كْبِيرْ

فتَّحْت عَيْنِي عَ أَهاليكي

أَحْبابْ.. مِتْلُنْ صَعْب إِنُّو يْصِيرْ

شِرْبُوا الْفَضِيلِه مِنْ سَواقِيكِي

لَوْلا الْحَربْ والْمَوت والتّهجيرْ

كانُوا انْزَرْعُوا كلّهُنْ فِيكِي

لا سافْرُوا.. وْلا جَمّعُوا التّعتيرْ

وْلا فَيْلَتُوا الدَّمعاتْ تِبْكيكي

ـ2ـ

يا زَهْرةْ الْكُورَه الْمُخْضَرَّه

يا نجْمةْ الأرْض الشّمالِيِّه

لفَّيْت كلّ مْحَبّتي بْصرَّه

وْخِبَّيتْها جُوَّاتْ عِينَيِّي

وْزِيَّنْتها بِوْرودْ مِحْمَرَّه

تا قَدِّمُنْ، يا راسْمَسْقا، الْيَوْمْ

لأَحْبابْ نَوَّرْ فَضْلُن عْلَيِّي

ـ3ـ

جَمْعيّتِكْ.. جَمْعِيِّةْ الإِحْسانْ

تْأَلّفِتْ.. تا تِرْفَعْ الإِنْسانْ

أَعْمالْها.. أَعْلامْ عَمْ بِتْلُوحْ

عَ بْراجْ مِبْنِيِّه بْصَخر صُوَّانْ

أَعْضاءها.. سَكْنُوا الْقَلب والرُّوحْ

كلُّنْ فَضِيلِه وْتَضْحِيِّه وْإِيمانْ

زَرْعُوا الْغُرْبِه زْهُور عَمْ بِتْفُوحْ

وْلَوْلا زْهُورُنْ ما انْعَرَفْ نيسانْ

هاماتْهُنْ.. تِيجانْ فَوْق صْرُوحْ

وْطَلاّتْهُنْ.. طَلِّةْ قَمَر فِرْحانْ

وْقاماتْهُنْ.. أَرْزاتْ مِنْ لُبْنانْ

ـ4ـ

وْمُسْتَوصفِكْ.. مُسْتوْصفْ الرَّحْمِه

بْجَنَّاتْ حُبُّو عْيُونْنا بْتِسْرَحْ

فاتِحْ عَ كَفُّو عْيادِةْ الْحِكْمِه

وْتارِكْ بِقَلْبُو لِلأَمَلْ مَطْرَحْ

ضَوَّى بْضِحْكِةْ أَرْمَلِه الْعَتْمِه

وْمَحَّى بْإِيمانُو ظْرُوفْ عَمْ تِجْرَحْ

وْلَوْلا سَخَا الْغِيَّابْ.. هَـ الْكِلْمِه

ما انْقَالِتْ.. وْلا زَلْغَط الْمَسْرَحْ

يا رَاسْمَسْقَا.. بْصَرْتِك بْنَوْمِي

عَمْ تِضْحَكي.. تا يِضْحَك الْمَظْلُومْ

وْعَمْ تِفْرَحي.. تا شَعِبْنا يِفْرَحْ

**

كنز كبير

ألقيت في يوم المسنين ـ سيدني 1988

ـ1ـ

ضِحْكُوا.. وْقَالُوا عَنْكُن: مْسِنِّينْ

وِالرَّاسْ عَمْ بِتْكَلِّلُو الشَّيْبِه

تِخْمِينْ مَا عِرْفُوا بَعْد تِخْمِينْ

إِنُّو الْحَامِلْ فَوْق رَاسُو تَلْجْ

بْيِشْبَه جَبَلْ صَنِّينْ بِالْغُرْبِه؟!

ـ2ـ

عْتَاقْ.. ما بِيهِمّ.. ضَلُّوا عْتَاقْ

جْدِيدْ هَـ الأَيَّامْ ما بْيِنْطَاقْ

إِنْتُو الْفَضِيلِه بْكلّ أَشْكَالا

وْقَلْب الْمَحّبِّه لْحُبّكُنْ مِشْتَاقْ

وِبْلادْنَا.. اللِّي قَلِّتْ رْجَالا

وْإِيد الأَعَادِي طَالت الأَعْنَاقْ

ارْتَاحِتْ.. وَقِتْ ما رِخْيِت حْمَالا

عَ كْتَافْكُنْ.. يَا كْبَارْنَا الْمَاشْيِينْ

مِسْلِمْ.. مَسِيحِي.. عَ الدّرُوب.. رْفَاقْ

ـ3ـ

بْحِبّكُنْ.. وِبْحِبّ تِبْقُوا دَوْمْ

مشْعَلْ هِدَايِه.. وْصَرْخِةْ الْمَظْلُومْ

لَوْلا تَعَبْكُنْ ما وْصِلْنَا الْيَوْمْ

نِغْزِي الْبُحُور وْنِسِتْحِلّ نْجُومْ

يا عْيُون حِلْفِتْ ما تْدُوق النَّوْمْ

مِنْشَانْ نِغْفَى وِالسَّعَادِه تْدُومْ

نِحْنَا شَعبْ.. شُو رَح يْفِيدُو الصَّوْمْ

لازِمْ عَ دَمّ دْيَابْنَا نِفْطَرْ

وَقْت الْـ بِيمُوتُوا.. بْلادْنَا بِتْقُومْ

ـ4ـ

يَا دِلّ شَعْب بْيِهْمُل الْخِتْيَارْ

وْيَا دِلّ أُمِّه كْبَارْهَا ضَاعُوا

الْخِتْيَارْ كَنْز كْبِيرْ مَهْمَا صَارْ

الْـ عَمْ يِشْلَحُوه طْفَالْهُنْ جَاعُوا

مْرَايِةْ تَارِيخْ بْتِعْكُس الأَنْوَارْ

وْمَنْبَعْ خُلُود لْكِلّ أَتْبَاعُو

وْحَرْبِه بصَدْر الْخَايِن الْغَدَّارْ

وْخَنْجَرْ بِـ قَلْب الْـ تَاجْرُوا فِينَا

وِبْكِلْ وَقَاحَه بْلادْنَا بَاعُوا

ـ5ـ

لُبْنَانْ أَرْض الْكلّ بَدُّو يْضَلّ

وِالْـ مُشْ عَ ذَوْقُو يْعَلِّق حْبَالُو

مَهْمَا عَ طرْقَاتُو الرّجَال تْقِلّْ

بْأَرْض سِيدْنِي كِتْرِتْ رِجَالُو

**

كفرصارون

ألقيتها عام 1996، في حفلة جمعية كفرصارون الخيرية التي عاد ريعها لبناء مستوصف النجدة الشعبية في البلدة.

ـ1ـ

مِينْ مَا بْيِذْكُرْ حَرْب بْلادِي

وْكِيفْ الدَّمْعَه تْشِقّ عْيُونْ

وِشْهَادِه تِلْحَقْهَا شْهَادِه

وْشَعْبِي بِالْكِذْبِه مَدْفُونْ؟!

ـ2ـ

مِينْ مَا بْيِذْكُرْ صَرْخِةْ أُمُّو

بْوِجّ التّهْجِير الْمَلْعُونْ

وِالشَّهْقَه الْـ وِقْفِتْ عَ تِمُّو

وِظْنُونُو الْـ زَرْعِتْهَا ظْنُونْ؟!

ـ3ـ

مِينْ مَا بْيِذْكُرْ مَوْت طْفَالُو

عَ حْوَاجِزْ فَيْلَتْهَا جْنُونْ

وِالْخَوْف يْجَرْجِرْ بِخْيَالُو

وِالْمَوْت بْأَرْضُو طَاحُونْ؟!

ـ4ـ

مِينْ مَا بْيِذْكُرْ هَاكْ النَّجْدِه

الشَّعْبِيِّه بْبَلْدِةْ أَمْيُونْ

وْمِسْتَوْصَفْ عَمْ يِرْسُمْ مَجْدِي

ضِحْكِه.. عَ شْفَاف الْمَحْزُونْ؟!

ـ5ـ

مِينْ مَا بْيِذْكُرْ أَرْض الْكُورَه

وْطَلِّةْ قَامَات الزَّيْتُونْ

الْكُورَه.. مَا عَادِتْ مَقْهُورَه

شَعْبَا مِنْ أَكْرَمْ مَا يْكُونْ؟!

ـ6ـ

وِالْغِيَّابْ الْـ تَرْكُوا بْلادُنْ

وْدَمُّنْ لِبْلادُنْ مَرْهُونْ

هِدْيُوهَا ضِحْكَاتْ وْلادُنْ

وْضَحُّوا بِالْغَالِي تَا يِبْنُوا

مِسْتَوْصَفْ بِكْفِرْصَارُونْ؟!

**

إبنك أنا

ألقيت في حفلة خيرية عاد ريعها للمعاقين من أبناء مدينة طرابلس الفيحاء.

ـ1ـ

يَا طْرَابْلُسْ.. جَايِي تَا غَنِّيلِكْ

وِحْكَايِة الْـ بِالْقَلْب إِحْكِيلِكْ

وْعَنْ أَهْلِك الْـ كِلُّنْ لَطَافِه وْذَوْقْ

فِشّ قَلْبِي شْوَيّ.. إِشْكِيلِكْ

صَارُوا بْفَضْلُنْ طَامْرِينِي لْفَوْقْ

وْكِيفْ بَدِّي رَجِّع جْمِيلِكْ؟!

ـ2ـ

يَا طْرَابْلُسْ.. صَرْلِي سْنِين سْنِينْ

نَاطِرْ تَا إِرْجَعْ بَوِّس تْرَابِكْ

وْكَحِّل عْيُونِي بْمَنْظَر بْسَاتِينْ

مْطَرّزِه بِزْهُورْهَا تْيَابِكْ

وْسَاحَات مِتْلا ما انْوَجَدْ.. تِخْمِينْ

التَّل نَجْمِه مَدْخَلاَ بَابِكْ

يَا مْدِينة الْـ ما بْيِنْحِنِيلاَ جْبِينْ

دَاخ الدَّهْر مِنْ قُوِّة شْبَابِكْ

بْحَلّفِكْ حِنِّي عَ مُغْتِرْبِينْ

عِتْق الْجُرح بِقْلُوبُنْ وْصَارِتْ

تِنْزِل دُمُوعُنْ دَمّ عَ غْيَابِكْ!

ـ3ـ

إِبْنِكْ أَنَا.. وْرِضْعَانْ مِنْ صَدْرِكْ

لا تْصَدّقِي.. مَهْمَا انْحَكَى أَوْ صَارْ

مْنِ الْقَلْب صَعْبِه يِنْمَحَى ذِكْرِكْ

مَهْمَا لِعِبْ فِينَا غَريب الدَّارْ

وْلَوْلا بْيِنْقَصْ يَوْم مِنْ عُمْرِكْ

فَوْق عُمْرِك رَح بْزِيد عْمَارْ

يَا مْدِينة الْـ مَا بْتِفِرْقِي دَيْرِكْ

عَنْ جَامْعِكْ.. نِحْنَا اشْتَقْنَا كْتِيرْ

وْبَعْدُو الْوَطَنْ لُبْنَان فَوْق النَّارْ!

ـ4ـ

يَا حَبِيبِةْ قَلْب شَاعِرْ مِسْتِحِي

يْقِلِّكْ قَصِيدِةْ شِعِرْ فَجَّرْهَا الْوَحِي

إِنْتِي الْقَصَايِدْ كِلّهَا.. إِنْتِي الْبُيُوتْ

وْشَمْس الْحَضَارَه بْطَلّتِكْ بِتْسَوْسِحِي

يَا مْدِينْةِ الأَحْبَابْ حَاجِتْنَا سُكُوتْ

بْحُزْنِكْ.. يَا فَيْحَا.. قْلُوبْنَا عَمْ تِجْرَحِي

لازِمْ عَدُوِّكْ يِنْتِهِي بْعَتْم التَّابُوتْ

وْيِرْجَعْ حَبِيبِكْ يِنْعَم بْحُضْن الْهَنَا

وْقِدَّامْ عَيْنُو كِل خَايِنْ تِدْبَحِي.

ـ5ـ

الْكِلْمِه الأَخِيرَه بْقُولْهَا: تْبَرَّعْ

مِينْ قَدّ حَاتِـمْ طَيّ خَلّدْتُو السّنِينْ؟!

وْلَوْ مَا قْلُوب بْهَالدِّنِي تُوجَعْ

أَصْحَابْهَا لِلْخَيْر خِلْقَانِينْ

مَا كَانْ فِينَا نْقَاوِم الْمَدْفَعْ

وْلا كَانْ فِينَا نْحَارِب شْيَاطِينْ

وْلا كانْ فِينَا لأَرضْنَا نِرْجَعْ

وْلا كانْ فِينَا نْبَلْسِم جْرُوحَاتْ

إِخْوِه.. الْبُغِضْ صَيَّرْهُن.. مْعَاقِينْ!

**

صدى لبنان

ألقيت في حفلة جريدة صدى لبنان، 1986

ـ1ـ

يا صَدى لُبْنانْ.. طَال الإِنْتِظَارْ

تَا إِلْتِقِيكي.. وْخَبّرِكْ شُو صَارْ

كانُوا الْبَشَرْ يِتْماتْلُوا فِينَا

وْكِنَّا لْعُمْر الدَّهْر نِعْطِي عْمَارْ

صِرْنا شَعْب ناطِرْ عَلَى الْمِينا

هِرْبانْ مِنْ حِكَّامْ ذُلّ وْعارْ

دَاسُوا الْحَضَارَه وْمَجْد ماضِينَا

وْجَوّعُونا.. وْشَبّعُوا الدُّولارْ

يا صَدَى لُبْنانْ.. وَعِّينَا

الْكَوْن كِلُّو بْحَربْنا مِحْتارْ

وِبْلادْنا كِتْرُوا شيَاطِينَا

الْـ حَطِّتْ حَوَاجِزْ بَيْن جَار وْجارْ

شْياطِينْ مُشْ مَعْرُوفْ شُو دِينَا

بْتاكُلْ.. بْتاكُلْ مِنْ لُحومْ النَّاسْ

وْطَبْخاتْها عَ طُول فَوْق النَّارْ

ـ2ـ

يا صَدَى لُبْنانْ.. فِي عِنْدِي سُؤالْ

بِعِرْفِكْ حُرَّه وْجَوابِكْ عَنْ يَقِينْ

هَـ الأَرْض يَللِّي هْمُومْها بِالبَالْ

وْعَ شْفافْنا نَغْماتْ وِتْلاحِينْ

وْمِنْشَان تِحْصُدْ خَيْرها أَجْيالْ

سْقِينَا تْرَابَا دْمُوع مُغْتِرْبينْ:

لَيْش فِيها تْكاتْرُوا الأَنْذَالْ؟

وْلَيْش فِيها لِعْبِت شْياطِينْ؟

وْلَيْش حَتَّى يِدْبَحُوا أَطْفَالْ

وْتِتْهَجَّر مْنِ بْيُوتْها مْلايِينْ؟

وْلَيْش بَاعُوا مَجْد إِسْتِقْلالْ

مُشْ مُلْك بَيُّنْ.. مُلكْنا نِحْنَا

وْمَدْفُوعْ حَقُّو دَمّنا مْنِ سْنِينْ؟

ـ3ـ

يا صَدَى لُبنانْ.. عِنَّا ناسْ

دَقُّوا الطّبْل لِلْغَاصِب الْمُحْتَلّْ

افْتَكْرُوا فِي عِنْدُو لِلضِّيافِه قْياسْ

رَشُّوا عَ إِجْرَيْه الْوَردْ وِالْفُلّْ

يا كِلْمِة الْحَقّ وْصَدَى الإِحْسَاسْ

يا حْرُوفْ مَزْرُوعَه عَ تِمّ الْكِلّْ

خَبّريهُنْ عَنْ ظُلْم أَنْجاسْ

بَدْل الْخَمرْ صَبُّوا لْشَعْبِكْ خَلّْ

قُولِيلْهُنْ: هَـ الأَرْض ما بْتِنْداسْ

وِالأَرْز.. أَرْز الرَّبّ ما بْيِنْذَلّْ

قُولِيلْهُنْ: بُكْرَا بْيِصْفَى الْكاسْ

حَرْب الْوَطَنْ مُشْ بَيْن دِين وْدِينْ

لُبْنانْ قِطْعَه مْنِ السَّما بِيضَلّْ.

**

أجراس قلبي

حفلة معهد سيّدة لبنان ـ هاريس بارك، 12 تموز 1984

ـ1ـ

يِسْعِدْ مَساكُنْ بِتْنَعِشْ تَمُّوزْ

شَهْر الْبَردْ وِالسِّنْ تِنْقُر سِنّ

قَلْبي أَنا بِـ غُربْتي مَحْجُوزْ

لأَهْل الْكَرَم وِالتَّضْحِيِّه وِالْفَنّ

وْمِين غَيْركُنْ بِمْحَبّتي بِيفُوزْ

مِينْ غَيْركُن أَجْراس قَلْبِي رَنّ

وْلَو ما جْنُوني اليَوم ما بيجُوزْ

مِنْ فَرحْتِي، يا ناسْ، كِنْت بْجِنّ

ـ2ـ

هَـ الثَّانَوِيِّه الْـ كانْ صَعْب تْصِيرْ

صَارِت فَخْر لِلْجالْيِه وْبَيْرَقْ

وِبْتَعْرفُوا قِدَّيْش تِعْبُوا كْتِيرْ

راهْباتْنا.. تا الْحُلْم يِتْحَقَّقْ

هِنِّي اللِّي سِهْرُوا وْشَغّلُوا التِّفْكِيرْ

وْهِنِّي الْـ عَ إِيدُنْ مَجدْها تْزَوْزَقْ

وْهِنِّي اللِّي صَلُّوا هَـ الصَّلا بَكِّيرْ:

فَوْق الزّغار بْسَيّدِة لُبْنانْ

شِعِّي يا عَدْرا بْتَوْبِك الأَزْرَقْ

ـ3ـ

أحباب إنتُو للأَبَدْ أَحْبابْ

وِوْجُوهْكُنْ قِنْدِيل سَهْرِتْنا

بِغْيابْكُنْ أَرْز الْوَطَنْ مِنْصابْ

وِمْصِيبْتُو هِيِّي مْصِيبِتْنا

شِدُّوا الْهِمِّه شْوَي يا غِيَّابْ

خْلاص الْوَطَنْ.. تِوْحيدْ كِلْمِتنا

تا تِرْجَعُولُو مْشَرّعَه الأَبْوابْ

وْتا نْفَرّحُو بْتِهْذِيبْ عَيْلِتْنا

جِيبُوا الزّغار نْدَرِّسُنْ بِكْتابْ

جِلدتُو مْنِ غْصُون أَرْزِتْنا

ـ4ـ

يا رَيْت فِيِّي إِعْصُر دْمُوعي

تا تِشرَبُوها بْهَـ الْمَسَا خَمْرَه

وْيا رَيْت فِيِّي دَوِّب شْمُوعي

كِرْمالْكُنْ إِنْتو بْهَـ السَّهْرَه

ما هَمّ لَو عانَيْت مِنْ جُوعِي

الِمْهِم تِكْبَرْ سَيّدِةْ لُبْنانْ

الْـ رَفْعِتْ إِسمْ لُبْنان وِالْعَدْرَا

**

طاب اللّقا

حفلة معهد سيّدة لبنان، أَيلول 1987

ـ1ـ

طاب اللِّقا.. وِالْهَجرْ مُش مَعْقُول

يِبْقَى مْفَرّق بِيْننا عَ طُولْ

شْهُور السِّنِه اللِّي بَعّدِتْنا كْتِيرْ

تْبَيَّضْ سِجِلاَّ الأَسْود بْأَيْلُولْ

ـ2ـ

بْأَيْلُول.. حَفْلِتْنا ضِوِي مِشْعالْها

تا مَدْرَسِتْنا دَوْم تِقْشَعْ حالْها

الرَّاهْباتْ تِعْبُوا وْسَيْهَرُوا النِّجْماتْ

وْعَلّمُوا بَدْر الدُّجَى مُوَّالْها

وْزَرْعُوا بْزَوايَا حْدُودْها أَرْزاتْ

حَتَّى الزّغار يْطَيّرُوا بِمْجالْها

وْكِلْ ما تْهبّ بْأَرْضنا النَّكْباتْ

شَقّ الصّبحْ.. تِسْمَع جْبال الأَرْزْ

صَوْت طالِع مِنْ صُدور رْجالْها

ـ3ـ

يا سَيّدةْ لُبْنانْ.. شَعّ النُّورْ

مْنِ حْجارْ بَيْضَا شَامْخَه فِيكي

وِالْجالْيِه اللِّي قَلبْها مَقْهُورْ

عَ بْلادْها.. مْنِ الْقَلبْ تِعْطِيكي

بْحَيْثِك نَغَمْ بِيرَندحُو الْعُصْفُورْ

وْمِتْل الصَّلاَ بْيِرْكَع يْصَلِّيكِي

وِالرَّاهْبِه اللِّي عُمرْها مَنْدُورْ

حِلْفِتْ بِـ باقي الْعُمْر تِبْنِيكِي

يا سَيّدِةْ لُبْنانْ.. شُو الْبخُّورْ؟

الْبَخُّورْ هُوِّي جَالْيِه مْحِبِّه

عَمْ تِحترِقْ مِنْشَانْ تِضْوِيكي

ـ4ـ

مُشْ هَمّ نِسْهَرْ لِلصّبحْ بَكِّيرْ

الِمْهِمّ صَرْحِكْ يِرْتِفِعْ أَكْتَرْ

وْيِضَلّ حِضْنِكْ مَلْعب عْصَافِيرْ

مِنْخافْ يِطْلَع جِنحْها مْكَسَّرْ

يا سيّدِةْ لُبْنانْ.. مَهْما يْصِيرْ

مِنْضَلّ نِشْبُكْ إِيدْنا بْإِيدِكْ

وْنِحْنا وْياكِي بْهَـ الدّنِي نِكْبَرْ

**

حمام السلم

إحدى حفلات جمعيّة بلوزا الخيرية ـ سيدني

ـ1ـ

بْلادِي.. إِذَا رَحْ يِنْطِفي عِزَّا

بْعَلِّقْ عيُوني شْمُوعْ عَ أَرْزَا

قْناديلْ ما بِتْنُوصْ طُول الْعُمْرْ

مْزَيّتِي بِالدَّمّ.. يا بْلَوْزَا

ـ2ـ

يا ضَيْعِة اللِّي بْحِبّهَا عْبادِه

وِبْحِبّ شَعْبِكْ هَوْن.. بِزْيادِه

عَلَّى جْبِينِكْ تا يْطال الْغَيْمْ

وِيْقَطِّف النّجْماتْ لِبْلادِي

ـ3ـ

قِضَّيْت عُمْري رَوِّض الْهجْرانْ

وْإِحملْ صَليبي كْرامِة الإِنْسانْ

فَرْد مَطْلَبْ بِسْأَلَكْ يا رَبّْ:

رَجِّعْ حَمام السِّلمْ عَ الأَوْطانْ

**

مركب حضارة

حفلة معهد سيّدة لبنان، 6/7/1985

ـ1ـ

سَعِيدِه يا حْبايِبْنا سَعِيدِه

وْيا أَهْلا بْطَلِّة الْوِجّ الْبَهِيِّه

زَهْر الْكَوْن لَوْ بِجْمَع بإِيدي

تا عَبِّرْ عَن شُعُوري.. بْضَلّ عاجزْ

رِدّ جْمِيل إِيدَينْ السَّخِيِّه

ـ2ـ

تا نْكُون مِتل النّجْم بِالْعالِي

آيِةْ جَمال مْشَعْشَعَه بِالضَّوّ

وْمَرْكَبْ حَضارَه بْعَتْمِة لْيالي

شَقّ الْبَحرْ.. ما خاف غَدْر النَّوّ

لازِمْ يا أَغْلى وْأَعْظَم أْهالي

نْضَحِّي مَع الرَّاهْبات بِالْغالي

حتّى الْمَدارِس تِرْتِفِع بِالْجَوّ

ـ3ـ

هِنِّي اللِّي عَطْيُوا الْحَرْف رِسْمالُو

وْرَبُّوا الطّفلْ تا يْرَيّحُوا بالُو

هِنِّي اللِّي زَرْعُوا بْكِلّ بُقْعَه دَيْر

وْبِالثَّقافِه زَيّنُوا دْيالُو

وْلَوّنُوا رِيشَاتْ أَجْمَلْ طَيْر

طَيْر الْمَحَبِّه اللِّي السَّما مْجالُو

يَلاَّ يا أَهْل التَّضْحِيِّه وِالْخَيْر

نِخْدُمْ مَصَالِح جِيلْنا الطَّالِعْ

وْنِضْوِي مَع الرَّاهْباتْ مِشْعالُو

ـ5ـ

وْيَلاَّ سَوا نْعَمِّر بِهَـ الْغُرْبِه

مْدارِس حْجارَا قَلْبَك وْقَلْبِي

مِنْشانْ تا نْنامْ الْفِكر مِرْتاحْ

وْنِمْشِي بْسُهُولِه دْرُوبْنا الصَّعْبِه

وِالْخَيّ يِكْبَرْ حَدّ خَيُّو جْناحْ

يْشِعّ بْسماهُنْ نُور الِمْحَبِّه

وِتْفُوحْ مِنُّنْ رِيحة التّفّاحْ

زِينِة جَبَلْنا الصّامِد الشّامِخْ

مِتلْ أَرْزَك إِنْت يا رَبِّي

ـ6ـ

تْذَكّروني.. تْذَكّرُوا كْلامي

شاعِرْ أَنا مِن خِلقِتي فنّانْ

المال لا وْجاهَه وَلا زْعامِه

وْلا يَوْم فَبْرَك بِالدِّنِي إِنْسانْ

وْتا تُوصَلُوا لِلْمَرْكَز السَّامِي

رَبّوا الطّفل عَ الْخَير والإخْلاص

وْيِعْبُد بَعد أَللَّـه أرزْ لُبْنانْ

**

مار مارون

حفلة الطائفة المارونيّة بمناسبة عيد القديس مارون، 7/2/1987

ـ1ـ

يِسْعدْ مَساكُنْ.. كل ما النّجْماتْ

تِضْوِي.. وْتِحْلَى كْتِيرْ سَهْرِتْنا

يِسْعد مْساكُنْ.. أَهْل وِبْنَيَّاتْ

وْشُبَّانْ صَارُوا فَخْر أُمِّتْنا

لا تْواخْذُونا انْ قَلِّتْ الزِّيناتْ

شِفْنا الْقَمَرْ مِن وِجّكُنْ سَاطِعْ

رْضِينا تْكُونُوا، الْيَوْم، زِينِتْنا

ـ2ـ

يا مارْ مارُون.. الدَّمْع بِعْيُونِي

عَ بْلادْ فِيها النَّاسْ مَجْنُونِه

الْحَرْب عِنْدَا تَسْلِيِةْ أَطْفالْ

وْأَلْعاب بِشْياطِينْ مَسْكُونِه

وْكِيفْ بَدُّو يِنْشِرِحْ هَـ الْبَالْ

وِهْمُومْها بِالْقلْب مَدْفُونِه؟

الأَرْض اللِّي غَنِّتْ مَجدْها أَجْيالْ

صَارِتْ بِـ إِيد الْغَيْر مَرْهُونِه

بِشْفاعْتَكْ.. مِنْصُون إِسْتِقْلالْ

وِبْلادْنا بِتْضَلّ أَرْض الْكلّ

تا نْعَلِّقَا عَ صْدُورْنا.. قُونِه

ـ2ـ

لَيشْ الزَّمَنْ بِيدُور بِالْمَقْلُوبْ

وْأَرْض الْقَدَاسِه.. تْجِنّ فِيها حْرُوبْ

وْتِطْوَلْ وْتِطْوَلْ هَـ الْمَسافِه كْتِيرْ

ما بَيْن أَرْز شْمالْنا وِجْنُوبْ

سْنينْ عِشْناها بِهَـ التّعْتيرْ

تا صَارْ قَلبْ الصّخْر عَمْ بِيدُوبْ

يا مارْ مارُونْ.. كْبِيرْ إِنْت كْبِيرْ

قِدَّامْ أَللَّـه بْطَلّتَكْ مَهْيُوبْ

خَلِّص بْلادِي.. شِكّهَا نْواطِيرْ

وْما يْكُونْ فِيها غَالِبْ وْمَغْلُوبْ

نِحْنَا تْعِبْنا.. النِّيرْ فَوْق النِّيرْ

هَـ الشَّعْب يَللِّي كانْ نُور الْكَوْنْ

صَفَّى عَ جُلْجلْة الْغَدرْ مَصْلُوبْ

**

ولاد ضيعتنا

حفلة جمعيّة رأس مسقا الخيريّة عام 1987 سيدني

ـ1ـ

يا مِيةْ هَلاَ بِوْجُودْ أَحْبابِي

بْضِحْكاتْ عَطْيِتْ نُورْ سَهْرِتْنا

يا راسْمَسْقَا الْـ حَضْنِك كْتابِي

مِنْ كِتِرْ ما مِنْحِبّ غِيَّابِكْ

مِنْقُول: هَوْدي وْلادْ ضَيْعِتْنا

ـ2ـ

يا رَاسْمَسْقَا.. سْنِينْ خَلْف سْنِينْ

بْقِلِّكْ شِعْر وِالأَرْض محْتِرْقَه

احْتَلِّت بْلادِي زُمْرِة شْياطِينْ

احْتَرْفُوا الْقَتْل والنَّهْب وِالسِّرْقَه

زَرْعُوا الْفِتْنِه بَيْن دِين وْدِينْ

وْقَسّمُونا.. وْحَبّذُوا الْفِرْقَه

يا رَاسْمَسْقَا.. خَبّري مْساكِينْ

لَوْلا بْغَدْرُن كلّنا مِنْمُوتْ

وِحْدِة شَعْب لُبْنان رَحْ تِبْقَى

ـ3ـ

مَحْرُوق قَلْبِي كْتِيرْ يا إِخْوانْ

عَ طفْل ماتِتْ مَيْمتُو حَدُّو

عَ بْلادْ كانِتْ زِينة الْبُلْدانْ

حَرْقُوا ضِيَعْها.. وْصَرْحها هَدُّوا

عَ شَعْب.. إِسْمُو شَرَّف الإِنْسانْ

مَرْفُوع رَاسُو وْما حَدَا قَدُّو

قِدَّامْ مَجْدُو رَكْعِت التِّيجانْ

وِالْعِزّ شَامِه مْزَيّنِه خَدُّو

لِعْبُوا بْتارِيخُو.. شَوّهُوا الأَدْيانْ

وْمَلْيُون جَيْش تْقاسَمُوا حدُّو

خَلِّيكْ رَمْز الْحُبّ يا لُبْنانْ

وْلا تْخاف لَوْلا انْبَحِّت غْنانِيكْ

الْغِيَّابْ حِلْفُوا مَجْدَكْ يْرِدُّوا

ـ4ـ

هْجَرْناكْ يا لُبْنانْ.. ما مْنِنْلامْ

خَنْق الْفِكر.. ما بْتِقْبَلُو الأَقْلامْ

مْن الصَّعْب يِرْضُوا بْعِيشِتُنْ أَحْرارْ

بِبْلادْ مُشْ مَسْمُوحْ فِيها كْلامْ

وْمِن كِتر ما رْفَضْنا نْسِيب الدَّارْ

دِقْنا الْغَدر وِالْقَهْر وِالآلام

مْشِينا عَ دَرْب الْجلْجلِه.. تا صَارْ

دَمْع الْيَتامَى يِجْرُف الأَحْلامْ

هْجَرْناك.. وَقْت الْجارْ خان الْجارْ

وْوَقْت اللِّي حِمْلتْ هَمّنا الأَيَّامْ

هْجَرْناكْ.. لَكِن قَلبْنا عَ نارْ

وِعْقُولْنا عَمْ تِنْخِرَا الأَوْهامْ

هْجَرْناكْ.. مُشْ مَعْقُول.. وِالتِّذْكارْ

بَعْدًو أَمانِه غَالْيِه عَ طُولْ:

حَبِّة تْراب بْصدْرنا بِتْنامْ

ـ5ـ

لَوْلا الْمَحَبِّه الطَّاهْرَه بِالْقَلبْ

وْهاك الأَيادي الْـ عَم بْتِتْبَرَّعْ

ما انْبَنْيِت بْأَرْضَكْ مَراكِزْ طُبّ

تْداوي طفْل عِينَيْه عَمْ تِدْمَعْ

وْرَاسْمَسْقَا.. الْتَفّ حَوْلا الشَّعْب

تَا يِنْبِنِي الْمُسْتَوْصَفْ وْيُوسَعْ

هَـ الضَّيْعِة الْخَضْرا.. بْإِذْن الرَّبّ

بْتِسْتَقْبِل الأَفْراح يا لُبْنانْ

وْما يْعُود مَرَّه قَلبْها يُوجَعْ

**

طرابلس

إحدى حفلات جمع التبرعات لمدينة طرابلس ـ الفيحاء 1978 سيدني

ـ1ـ

إِنْتِي الْحُلم.. يا مْدِينْة الْفَيْحَاءْ

وْإِنْتِي أَمَلْنَا عِنْدْ غَدْرَات الزَّمَنْ

قِدَّامْ إِسْمِكْ رَكْعِت الأَسْمَاءْ

وْزِدْتِي بْتَارِيخِكْ فَوْقْ أَمْجَاد الْوَطَنْ

ـ2ـ

إِسْلامْ وِنْصَارَى.. مَا عِنْدِكْ فَرْقْ

رَبّ وَاحِدْ.. رَبّْ كلّ النَّاسْ

الْـ مَا يَوْمْ مَيَّزْ بَيْنْ عِرْق وْعِرْقْ

وْلا مْنِ الْبَشَرْ فَضَّل جْنَاسْ جْنَاسْ

نِحْنَا شَعبْ وَاحِدْ بِأَرْض الشَّرْقْ

عِشْنَا الْعُمرْ نِشْرَبْ سَوَا بِالْكَاسْ

وِالْمَادْنِه تِنْدَه جَرَسْنَا.. يْدِقّْ

تَا نْأَدِّنْ الإِنْجِيل بِالْجَامِعْ

وِنْرَتِّلْ الْقُرْآنْ بِالْقِدَّاسْ

ـ3ـ

لَمَّا انْسَلَخْنَا عَنْ وَطَنَّا الْمُفْتَخَرْ

نِزْلِتْ دُمُوع عْيُونْنَا مِتْل الْمَطَرْ

وْصِرْنا نْكِدّ وْنِشْتِغِل لَيْل وْنَهَارْ

وْنِجْمَعْ بِغِرْبِتْنَا اللآلِي وِالدُّرَرْ

وْنِحْلَمْ بِأَجْمَلْ أُمّْ رَبِّتْنَا زْغَارْ

طال انْتِظَارَا.. وْبَيَّن عْلَيْهَا الْكبَرْ

وْنِحْلَمْ بِحضْن الْوَالِد الْخِتْيَارْ

وِبْأَرْضْ عَمْ يِلْعَبْ بِتَارِيخَا الْقَدَرْ

يَلْلاَّ سَوَا نِطْرُدْ غَرِيب الدَّارْ

وْنِصْرُخْ بِوِجُّو: مُوتْ يَا غَدَّارْ

نِحْنَا بَشَرْ غِيرْ شكلْ عَنْ كلّ الْبَشَرْ

ـ4ـ

بْحَلّفِكْ بِقْلُوبْ مِحْتِرْقَه

ضَلِّي وَفِيِّه لأَرزْنَا الْجَبَّارْ

عِمْلُوا الأَعَادِي بْقَلبْنَا حَرْقَه

وَقتْ اللِّي زَرْعُوا بِـ وَطَنَّا النَّارْ

وْرَشُّوا عَلَى طُرْقَاتْنَا الْفِرْقَه

وْعِمْيُوا عِينَيْنَا بْكَمِشْتَيْن غْبَارْ

حَلاَّ بَقَى.. نْشُوف السَّمَا زَرْقَا

وْنِخْجَل وْنِمْسَحْ عَنْ شَرَفْنَا الْعَارْ

وِتْصِيرْ فِينَا تِفْرَح الْمَرْقَه

مَهْمَا قِسِي عْلَيْنَا الزَّمَان وْجَارْ..

**

راس مَسقا

إحدى حفلات جمعية راسمسقا الخيرية ـ سيدني

ـ1ـ

يَا رَاسْ مَسْقَا الْـ كِلِّك مْحَبِّه

فِيكِي الطَّوَايِفْ عَايْشِه بْنِعْمِه

مْأَكَّدْ بِـ أَرْضِكْ.. هَيْكَلُو رَبِّي

عَمَّرْ قَبل ما تِنْتِعِشْ نَسْمِه

وْقَللاَّ: يَا أَسْرَار الدِّنِي تْخَبِّي

بِرْبُوع عَمْ تِضْوِي مِتِلْ نجْمِه

وْبِقْلُوبْ.. صُورَه مْزَغَّرَه لْقَلْبِي

وْبِعْقُولْ نَاسْ تْعَوّدُوا عَ الْخَيْرْ

قدَّامْ مَجْدُنْ رَكْعِت الْكِلْمِه!

ـ2ـ

يَا ضَيْعِة اللِّي بْتِقْسِمَا وَادِي

يَا رَمزْ كِلّ طْوَايِف بْلادِي

الدِّينْ عِنْدِك: تَضْحِيِه وْإِيمَانْ

مُشْ تِجَارَه وْغِشّ وِسْيَادِه

يا رَاسْ مَسْقَا.. لَوْ حِكِي الدَّيَّانْ

وْسَأْلِكْ: شُو بَدِّكْ إِعْمل بْلُبْنانْ؟

قُولِي: احْفَظُو.. تَا رَايْتُو تِنْصَانْ

وْيِبْقَى عَ طُول الدَّهر وِالأَزْمَانْ

جْرَاسْ دَيْر.. وْجَامِع عْبَادِه.

**

آشلي

قربانة ابنة ابن أخي آشلي شربل بعيني 17/10/2020

ـ1ـ

"آشلي" قالت ليسوع

يا يسوع إسمي آشلي

لقربانتك في عندي جوع

هيك ربّوني أهلي

ـ2ـ

وبسبعتش تشرين

آشلي فرحت بالقربان

صلّت وقالت آمين

وبقلبا شعلة إيمان

ـ3ـ

وإمّا وبيّا حواليها

وإختا وخيّا فرحانين

شوفوا التوب اللي عليها

متل التلج العا صنين

ـ4ـ

يا "آشلي" جايي هنّي

أهلك بـ هالقربانه

أستراليا أحلى جنّه

لكن أصلك لبناني

**

عيد التحرير

يوم كرّمني مجلس الجالية اللبنانية 2014

ـ1ـ

جايي بعيدك.. يا تحرير

إسكب عَ جْريك الأشعار

وغنيلك والقلب كبير

غنيّه تمجّد أحرار

رفضوا الذل.. وكسروا النير

وخلّوا الإعدى تدوق العار

متل جنوبك صعب يصير

مكلل بأكاليل الغار

شعبو كبير كتير كتير

أكبر من صيحات النار

ما بيتلاقى طفل زغير

أطفالو، بالشده، كبار

رح ينسوا عنتر والزير

لمّا بيحكوا للتاريخ

كيف قاوم هاك الختيار

ـ2ـ

إسمك مشهور ومحبوب

عايش بعيون الأجيال

إسمك بالدنيي مكتوب

بدمعة أم.. بدم رجال

مسيّج بشرايين قلوب

عم تنبض فيها الآمال

رح غيّر اسمك يا جنوب

وسمّيك جنوب الأبطال

**

مار الياس

حفلة بناء كنيسة مار الياس في حدشيت 2013

ـ1ـ

يا ريت فينا نحضر القدّاس

بهاك الكنيسه البالخيال بْنيت

ناخد البركه.. نزور مار الياس

العا مذبحو شمعات عمري ضْويت

قدّيس صفّى للدني نبراس

وآيات فيها مجد ألله قريت

تاج النبوّه.. مركبو إحساس

شاف السما.. وما شافتو توابيت

جايي لعنّا يطرد الوسواس

من أرض.. كلاّ بغض وطْواغيت

من أرض.. بالجزمات عم تنداس

وملفلفه بالشر كيف ما مْشيت

فيها الحروب جناس تمحي جناس

والكل ملهيين بالتنكيت

يوضاس بيورّت إبن يوضاس

والشعب عندو كمشة براغيت

بعيدك يا مار الياس بارك ناس

بنيوا كنيسه تمجّدك ع طول

بجنّه زغيري إسمها حدشيت

ـ2ـ

يا جبال.. علّي قامتِك يا جْبال

حدشيت عطيت بطركِك دانيال

لقداستو.. عم تشهد الأجيال

والأرز.. أرز الرب عنّو قال:

تا يبارك البطرك شعب لبنان

بساحاتها.. رفعوا إلو.. تمثال

**

مجلس الجالية

حفلة عيد الميلاد 2014

ـ1ـ

يا مجلس.. بهالجاليه عيدك

عيد الفرح.. والحب والإيمان

حاضن ضيعنا.. ربنا يزيدك

صاير ع صدر التضحيه نيشان

كفّك سنابل قمحنا.. وإيدك

بيدر سعاده بتغمر الانسان

الميلاد.. ع جدول مَواعيدك

منشان تضوي شجرة الأعياد

نقّيتْ أرزه من جبل لبنان

ـ2ـ

يا مجلس اللي مفرّح جبالَكْ

وقفة بطوله بيوقفوا رجالك

ما تعبت.. مهما طوّل المشوار

غنّى الهجر أبيات موالك

وكرمال عينك دقّت الأوتار

لحن الشكر.. والشكر رسمالك

للخير بس.. مسخّر الدولار

صار الدولار ألوف.. نيّالك

انت الوحيد الكللوك بغارْ

وكل القصايد راكعه قبالك

**

تكريم رمضاني

يوم كرّمني في أواخر شهر رمضان المبارك  تجمّع الوطنيين الاستراليين العرب برئاسة الاستاذ موسى مرعي ـ 2015

ـ1ـ

انشالله بشهر الصوم والغفران

شمس المحبّه بتغمر الأكوان

يا رمضان.. بيلبق التبخير

بإيامك الـ بتوزّع الايمان

ـ2ـ

واليوم، يوم الحب والتقدير

موسى عطاني من الوفا نيشان

إبن مرعي.. كبير ابن كبير

ابن الجنوب الصامد المنصان

ـ3ـ

متلي ومتلو لفّنا التهجير

رحنا.. وتركنا القلب بالأوطان

وبعدو ببلدنا.. الغش والتزوير

مركّع وطن.. ومفرّق الجيران

ـ4ـ

شياطين.. عم تحرق قلوب كتير

وع طفالنا عم تهدم البنيان

باسم الإله بتعلن التكفير

وكل الكفر تكْذُب على الرحمان

ـ5ـ

مسلم أنا.. من يوم كنت زغير

إسلمت بإلإنجيل يا إخوان

أسلم بقلبك.. حارب التعتير

أسلم بآيه نزلت بقرآن

ـ6ـ

أسلم لربّك.. صوب عرشو طير

ولا تخاف يزعل منّك فليتان

ولا تقول بعد الموت شو بيصير

تا تزور جنّه ساكنا الرضوان

لازم، بإسمو، ترحم الانسان

**

شهر الصوم

إفطار مجلس الجالية اللبنانية 5/7/2015

ـ1ـ

يا رمضان.. الكلّك محبّه

بشهرك ع طولْ بيجتمع شعبي

يا ريت فيني شهور متلك جيب

وخلّي السنه تتجمّع بقلبي

كنت بِمْحي من الدني التعذيب

بغيّر ظروف بلادنا الصعبه

بوقّف الفوضى.. بشجّع الترتيب

بزرع زهور السلم بـ دربي

يا مجلس بهالجاليه.. لا تغيب

خليك ضاوي بعتمة الغربه

الإعضا بـ قلبي.. مع علي كرنيب

بهنّي ضيع للخير منتسبه

وبقول كلمه كلّها تهذيب:

في ناس عم بيتاجروا بربّي

وواجب علينا نحارب الكذبه

ـ2ـ

يا صايم.. وعم تفطر قبالي

غالي ع قلبي كتير.. يا غالي

ألله عطاك من السما نعمه

منشان حتّى تنوّر ليالي

خلي المحبّه تسبق الكلمه

بدون المحبه.. قلبنا خالي

بضحكه زغيره لوّن النسمه

بكلمة هلا.. بتوسّع مجالي

بإيام شهر الصوم والرحمه

متل ما نحنا اجتمعنا اليوم

يتجمّعوا.. يتوحّدوا بهالصوم

تا تزلغط الأرزات بجبالي

وتا يفرح الديّان بالعالي

**

ميلاد 2016

ألقيتها بالعشاء الميلادي الذي أقامه مجلس الجالية اللبنانية

ـ1ـ

ما أجملو هالعيد يجمعنا

ورغم الحرب يمسح مدامعنا

وهالمجلس المليان بالإيمان

بالتضحيّه.. بمحبّة الانسان

كل ما وقعنا شويْ.. يرفعنا

ـ2ـ

حاضنْ بِـ قلبو ناس مغتربين

وبيوحّد الأديان كلاّ بدين

دين المحبّه.. الباركو ربّي

وعَ فرد قلبْ بيجتمع شعبي

من شمالنا، لجنوبنا، لصنين

ـ3ـ

بعيد الميلاد.. الْـ صار عيد الكل

قلوب الحبايب متل زهر الفل

مولد نبينا وفرحة الميلاد

يا خالق الأكوان هَـ الاعياد

كلما التقوا.. بدر السّما بيطل

ـ4ـ

هيك إنتو وهيك بتضلّوا

رمز الأخوّه للشعب كلّو

خلّوا إيديكن تشبك الايدين

نحنا شعب واحد ما صار تنين

حدّ الشمس عم يرسم مْحلّو

**

رمضان الصوم

ألقيتها بإفطار مجلس الجالية اللبنانية الذي يرأسه السيد علي كرنيب 10/6/2018

ـ1ـ

رمضان الصّوم لمّا يطلّ

بالكون كلّو بيفرح الإيمان

وبتزهّر التّقوى عَ وجّ الكلّ

وبيلتقي الانسان بالإنسان

يا علي كرنيب وزّع فلّ

المجلس بـ قلبو وحّد الهجران

الإفطار ذكرى محبّبه بيضلّ

بيلغي الحواجز بين هالبلدان

يا ريت شهر الحب ما بيفلّ

تا نضل نتلاقى ع طول العمر

إخوان.. متلُن ما انوجد إخوان

ـ2ـ

ضلّوا حبايب.. هالعمر إيام

بيمرُق علينا متل بصر منام

تركنا الوطن تا نعيش بمحبّه

خلّوا المحبّه تحقق الأحلام

وقولوا القدس يا "ترمب" مش لعبه

القرش القبضتو كان مال حرام

ما كان فيك تمرّق الكذبه

لو كان عنا بالشرق حكّام

غزّه الأبيّه بتاكل الضربه

دم البطوله للنصر رسّام

وطفل الوطن بيصيح: يا ربّي

قللي بـ أيا أرض بدّي نام

جوعان.. ماشي الشوك بـ دربي

وخيام تبلع بالمسافه خيام

التفتوا علينا ظروفنا صعبه

التهجير راخي فوق جوعي صْيام

يا أهل سيدني بتسكنوا بقلبي

ما هم شو لون العلَم والدين

أهل الكرَم بيشرّفوا الأعلام

**

استقلال 2017

القيتها في حفل استقلال لبنان الذي أحياه مجلس الجالية اللبنانية برئاسة السيد علي كرنيب

ـ1ـ

المجلس.. عم بيعيّد عيد

إستقلال بلاد الأرز

الارض اللي شبعت تمجيد

وخلتنا نغرق بالعز

أبطال.. ويا شعري شيد

ورش عليهن ورد ورز

وفوق الكلمه محبّه زيد

بالحبّ الدنيي بتهتز

غنّوا للشعب أْناشيد

وجروحن كانت بتنز

ع مجدن ما بقدر زيد

هنّي المجد.. وهنّي الفخر

وهنّي المال.. وهنّي الكنز

ـ2ـ

ومن عيلتنا في "أديب

البعيني" شيخ الأبطال

ضحّى بدمو.. ومش غريب

يفدي بروحو الإستقلال

بقلّك يا علي كرنيب

لبنان بدّو هيك رجال

من الشوف لضهر القضيب

من جنوب بيحلم بشمال

لبنان باقي بالصليب

لبنان باقي بالهلال

لبنان باقي مهما نغيب

بقلوب شيوخ وأطفال

إسمو لبنان الحبيب

إسمو بالغربه رسمال

وبيرق عزّو ما بينطال

**

طفل اليمن

ألقيتها في حفل خيري لدعم أطفال اليمن

ـ1ـ

طفل اليمن مظلوم يا إخوان

متشرّد وحفيان او جوعان

تا نساعدو لازم إيدينا تصير

بيدر قمح ودموعنا طوفان

ـ2ـ

نامت ع تختو قنابل التدمير

الألعاب صارت بالحرب حجران

سياسات عم تقضي ع طفل زغير

كتروا المصايب والحقد بركان

ـ3ـ

بيتقاتلوا.. وبيكتر التكفير

كرمال منصب مهتري من زمان

وقدّام عينُن قدس عم بتطير

بإمضا رئيس بيلحق النسوان

ـ4ـ

ما كان قدر "ترامب" يعمل زير

لو شاف عنّا رجال مش خصيان

فلسطين إلنا.. يخفّف التزوير

فشرت بعينو يوزّع البلدان

ـ5ـ

يا ابن العرب رح تسمع التحقير

وتخجل بأنك من بني عربان

عشت عمرك ضيّق التفكير

بتقتل بإسم الواحد الديّان

ـ6ـ

بتهدم مدن.. بتسبب التهجير

شيطان عم بتخوّف الشيطان

بأيّا ضمير بتعلن التكبير

وعم تحرق الأطفال بالنيران؟

ـ7ـ

ألله ما بدّو أحزمة تفجير

ولا بيفتح الجنّه لبشر خوتان

المؤمن بربّو ما بيرمي النير

ولا بيظلم الإنسان بالأديان

ـ8ـ

يا دمعة المش لازما تفسير

خلّي الكَرَم يتحوّل لبستان

ومتل الحلم تتطاير عصافير

ومن أرض سيدني نسعف الإنسان

ـ9ـ

شعب اليمن عم يحصد التعتير

سقفو انهدم وتطاير البنيان

ورافض تا يركع هالشعب الكبير

إلا لـ إلهو خالق الأكوان

**

ميلاد 2017

ألقيتها بدعوة من رئيس مجلس الجالية اللبنانية السيد علي كرنيب بمناسبة عيد الميلاد المجيد 10/12/2017

ـ1ـ

بعشره كانون.. العيد عيّدنا

سبقنا الدني.. هيدي عوايدنا

المجلس إذا بيقول صار العيد

بتزيّن الفرحه موائدنا

يسوع بدّو يخلق من جديد

ويقضي على طاغوت شردنا

عيسى المسيح بقولها وبزيد

إسمو بمساجدنا ومعابدنا

ومن دون لا هيصه.. ولا تمجيد

أهلا ميلادك دوم.. سيدنا

ـ2ـ

يا علي كرنيب بدّي قول

بأعمالكن عم تندوخ العقول

بتوحدوا الإنسان بالأعمال

بتوب المحبه الـ بالتقى مغزول

قلال هللي وحدونا قلال

وكتار هللي شرّدونا سْيول

بيتاجر بحق الشعب محتال

عم يلحق الفستان والمريول

مين سلّم المفتاح للدجّال

تا يبيع "قدس" مقدّسه للغول

وسَّخ العيد.. وحطّم الآمال

وخلا السلام يضيع هالمسطول

يا ترامب مهما تزوّر الأحوال

فلسطين إلنا.. بقلبنا ع طول

ـ3ـ

يا مجلس البالجاليه رسمال

إسمك علم جوا القلب محمول

رح قول كلمه حبستها بالبال

المعنى اللي فيها بالصدق مجبول

لا يشوهوا الميلاد بالأموال

ولا بالهدايا وكترة المعمول

الميلاد حب بيجمع الأطفال

الميلاد ضحكه ريقها معسول

الميلاد إنتو.. فخر للأجيال

الميلاد هالسهره اللي جمعتنا

هيدي الحقيقه بدون دق طبول

**

فرقة ارز لبنان

ألقيتها بمناسبة مرور أربعين سنة على تأسيس فرقة ارز لبنان الفلكلورية 16/12/2017

ـ1ـ

أربعين سنه.. ولكْ كيف مرقت قولْ

يا بْنِ العاقوري الـ بالوفا مجبول

سنين تعبت من شقا الهجران

وبعدك قوي.. انشالله العمر بيطول

ـ2ـ

صرلي زمن عم جمّع الأوزان

تا إمدحك.. والشعر ما بيزول

بتطل متل الحلم ع الوجدان

وبتصادق، وصدقك حَكي معسول

ـ3ـ

فرقة أرز لبنان وين ما كان

بيرق محبه، بالدهب مشغول

قدّام إسمك في إسم أوطان

همّك، إيمانك، تنتصر ع طول

ـ4ـ

وْحَدّك شباب، بنات، مع نسوان

رقصوا الدبكه وطيروا العقول

كل اللي فلّوا من قديم زمان

اجتمعوا الليله بحب مش معقول

ـ5ـ

زرعوا الفرحه بقلبك الزعلان

عرفوا في غصّه والدموع سيول

بميلاد رب الناس والأكوان

لازم الضحكه ع الشفاف تجول

ـ6ـ

درّبتهن بالعز والتحنان

تا صار إسمن بالعَلَم مجدول

قامات متل جبال من صوان

ودبكات صوتا بالمجد مغزول

ـ7ـ

أرزات خضرا جامعا بستان

وقلبك وطن.. صار الوطن مسؤول

لفرقة أرز لبنان.. يا لبنان

حضّر وسام الأرز.. دقّ طبول

ـ8ـ

إيلي عاقوري مبدع وفنان

لمن ع صدرو بيرقص النيشان

بيصير ع أشرف صدر محمول

**

عيد استقلال لبنان 2018

ألقيت باحتفال مجلس الجالية اللبنانية في مدينة بانكستاون ـ سيدني، بمناسبة عيد استقلال لبنان الخامس وسبعين

ـ1ـ

ما أجملك بالعيد يا تشرين

حفرنا الإسم بقلوب مغتربين

يا دلّ شعبي بدون إستقلال

لا تفرّطوا بالمجد يا محبين

ـ2ـ

لبنان.. هالسهل وشموخ جبال

ضحى بشبابو سنين خلف سنين

بلاد الأرز ما بتنشرى بالمال

رجال البطوله ركّعوا التنين

ـ3ـ

بجنوبنا عم يخلقوا الأبطال

وبشمالنا الأرزات سهرانين

ولولا بأيا أرض مرّ خيال

إنسان لبناني.. الصخر بيلين

ـ4ـ

بيشلح ع كتف الكون أجمل شال

علم وحضاره.. وما بيحني جبين

عندو المحبه والوفا رسمال

وعندو الكَرَم أزهار وبساتين

ـ5ـ

أجيال ربّت ع التقى أجيال

وقفت بـ وجّ الـ سيّسوا هالدين

لكن، بعيدك سيّئه الأحوال

رغم الفرح بالخامس وسبعين

ـ6ـ

بعدا الزعامه بتسرق بتحتال

وبعدو الشعب مسكين.. شو مسكين

منجمع دول تا نشحد الأموال

وْلِكْ عيب نحنا نصير شحّادين

ـ7ـ

ما في حكومه تنفّذ الأشغال

بلا كهربا.. وبالعتم غرقانين

والميّ.. ما في ميّ.. والشلال

نازل هدر ع البحر.. ألله يعين

ـ8ـ

وطرقاتنا فيها الجور أشكال

حتّى الزفت ضد الشعب.. تخمين

نقطة حليب بيشحدوا الأطفال

وغالي الدوا.. والناس طفرانين

ـ9ـ

يا "مجلس" اللي الشعر فيك انقال

ما رضيت مرّه تربّح السكين

زرعت الأمل.. عشنا براحة بال

إخوان فينا بتنضرب أمثال

وقلوب متل التلج ع صنين

**

عيد ميلاد 2018

ألقيتها في حفل أقامه مجلس الجالية اللبنانية

ـ1ـ

لما الميلاد يطل عم نفرح

وننسى مصايب عمرنا بتجرح

إنتو الأهل.. إنتو فرح هالعيد

بغربه طويله قلوبنا بتدبح

حبّيتكنُ.. والحب منّو جديد

وصعبه إذا حبّيت إتزحزح

من هون رح هنّي الوطن البعيد

بركي السلام بيسرح ويمرح

وحدا المحبه بهالزمن بتفيد

بتضوي العتم ودروبنا بتفتح

يا مجلس بهالجاليه رح عيد

شعر اللي قلتو وزيّن المسرح

بالإغتراب محبتك بتزيد

بتجمع بشر.. بتوزّع مواعيد

وتارك بقلبك للوطن مطرح

ـ2ـ

بسأل يسوع الطفل بالمزود

ليش البشر عن بعضها بتبعد

وليش الحرب بتصير بين شعوب

بترجع بعد سنتين تتوحد

بعد البكي.. منحمل صبر أيوب

تا نعيش حد القاتل ونسعد

ماشي الوطن لبنان بالمقلوب

الأزمات خلّت جوّنا ملبّد

بدنا وطن بين الدول مهيوب

بالشعر.. بالألحان يتمجّد

ما في حدا محّى كذب وعيوب

ما في حدا درب الوطن عبّد

أزلام كلّن تا يعبّوا جيوب

حسّ الرجوله عندُن مجمّد

ونحنا الـ هجرنا والقلب بيدوب

صادر حكم بطردنا.. مأبّد

يا يسوع الطفل شنّوا حروب

تا يرفعوا دولارن الأوحد

بيشرّدوا ملايين فوق دروب

كرمال حاكم أجرم وعربد

يهود عصرك علّقوا المصلوب

هيدا إنت يا سيدي الأمجد

واليوم صلبوا شعبنا المحبوب

وسكتت دني.. تاريخها أسود

ـ3ـ

الليله أنا رح عيّد الميلاد

مع ناس هنّي العيد بالغربه

سبقنا الدني.. لبسنا تياب جداد

وخبّيت هالأحباب بـ قلبي

ع غيبتُن بكيت سما البلاد

وبرجعتُن عم تفرح التربه

صعبه تا ينسوا موطن الأجداد

وتا يغدروا بـ هالبلد.. صعبه

**

عيلة نادر

ألقيتها بسهرة عيد الميلاد في منزل الصديق العزيز جوزاف وجيه نادر 24/12/2018

ـ1ـ

جايي أنا.. والشعر ماشي دبدبه

تا عيّد بهالعيد أغلى حبايبي

جوزاف نادر كل عمرو بمكتبي

بيزورني.. يا سنين لا تتعجبي

ـ2ـ

هلق انا جايي تا حقق مطلبي

وبليلة الميلاد قوم بواجبي

جايي تا قلّو بالشعر حبك ربي

بغربة صداقه مقدسه بمذهبي

ـ3ـ

دقت الشقا ومرقت سنين مكهربه

وخسرت ناس كتير راحوا كركبه

بحلف بأللـه وكم شعره شايبه

حدّي وقفت ما تركتني يا صاحبي

ـ4ـ

هالبيت بيتي.. يا حروفي حوربي

من يوم بو ميلاد.. هالبي الأبي

بحبّن أنا.. فيكي القصيده تكتبي

ع قلوب بيضا.. طاهره ومهذبه

ـ5ـ

ويا شمس نور الحب أوعا تحجبي

نجوم الطرب كرمالنا متأهبه

والفن هون الفن.. غنّي واطربي

وع الطبل دقي.. وع الكمنجه إلعبي

ـ6ـ

الأصوات حلوه.. والنوايا طيّبه

قومي ارقصي وتغنجي وتشبشبي

وحياة ألله.. وكل ما ذكرتو نبي

عيلة بني "نادر" عظيمه مأدبه

ـ7ـ

بالمرتبه.. وصلت لأعلى مرتبه

ولهالسبب رح قول جمله مدهبه:

هيي الصبي وأم الصبي وبي الصبي

**

ليش الكره؟

ألقيتها بدعوة من جمعية النهضة العراقية احتفاء بأسبوع التناغم والوئام 31/3/2019

ـ1ـ

جمعيّة النهضه في عندا إلتزام

تنوّر دروب الناس بليالي الظلام

بيوم التناغم جمّعتنا بالهجر

بشعوب حد شعوب تا نعيش بوئام

شمعة تسامح ضوّت بغربة عمر

تا تفهّم الإنسان يمشي بإحترام

بنيوزيلندا الموت خيّم والغدر

قتّل بشر عم يحلموا يعيشوا بسلام

أكبر جريمه بتُرتكب بـ هالعصر

تا أوصف المجرم.. ما في عندي كلام

جنون التطرف زاد.. تا صار القبر

يخجل من الموت وضحايا الانتقام

إنجيلنا وقرآننا مصدر فخر

مصدر محبه واتحاد وانسجام

لا يقتلوا بإسمُن.. ولا يزيدوا القهر

ولا يشوهوا الأديان تا يعمّ الكفر

إجرام يقضوا ع البشر إجرام

ـ2ـ

ليش الكره، ليش الضغينه والحروب

وليش الشعوب بتفرح بموت الشعوب

ألله خلقنا وقال عيشوا بهالدني

من دون بغض من دون تعصب أو ذنوب

جينا ع سيدني من زمان الولدنه

عشنا.. وشمس الحب ما بتعرف غروب

وجي بـ وجك كل إيام السنه

ولِكْ إنت جاري.. إنت ستّار العيوب

بغداد هون.. وهون لبنان الهني

لازم بآيات المحبه نغتني

ونعيش إخوه.. قلوبنا أشرف قلوب

**

مصطفى حجازي

يوم تكريمه من قبل السانتور شوكت مسلماني 2019

ـ1ـ

أنا بالشعر ما بدي إجازه

تا إحكي للبشر عن إعتزازي

أنا بعتز بـ صاحب عصامي

بإسمو كْبِرْتْ.. واعتزّت أسامي

تا صفّى الاسم مرفوع ومجازي

يا مية هلا "بمصطفى حجازي"

ـ2ـ

فضلك عليي كبير تا ردّو

بأرض الكرامه مرتسم حدّو

يا ابن الجنوب البار نيّالك

تكرّمت حتّى يكرّمو جبالك

"شوكت" أنا رح بوّسو بخدّو

هـ "المسلماني" هون مين قدّو

ـ3ـ

يا "مصطفى" بس إلمح خيالك

دقّات قلبي صعب يتهدّوا

شكراً إلك.. ممنون أفضالك

أفضال.. صعب كتير ينعدّوا

**

عيد الوئام

ألقيتها باحتفال مجلس الجالية اللبنانية في سيدني بيوم الوئام 21/3/2019

ـ1ـ

اهلا وسهلا بناس متحدين

ببلاد قلّت بالدني بلدانها

اختزلوا البشر تا تعرفوها مين

شقّوا الصدور بينقرا عنوانها

ـ2ـ

يا مجلس بهالجاليه.. جايين

نرفع ونبني بالقلب بنيانها

كرّمت أرض مقدسه من سنين

سيدني المدينه بتكبر بسكانها

ـ3ـ

عشنا بربوعا ناس فرحانين

رشت علينا حبّ مع إحسانها

جينا عليها شعوب مغتربين

منحكي لغات توحّدت بلسانها

ـ4ـ

جينا عليها بألف ملّه ودين

احترمت شعوب الكون مع أديانها

أوزي أنا.. أوزي إنت.. تخمين

بسيدني الجيره بتفرح بجيرانها

ـ5ـ

بنيوزيلندا هاجَموا مْصَلّين

بالطائفيه قتّلوا إنسانها

من حقد ناس بيخلقوا شياطين

فزعت جهنم واستحى شيطانها

ـ6ـ

ما في ديانه بتحضن مْلاعين

لو يفهموا انجيلها وقرآنها

أكبر جريمه بهجرنا مندين

ومنشارك قلوب البشر أحزانها

ـ7ـ

كل الخليقه عيلة محبين

ومنحترم ألوانها وإيمانها

بعيد الوئام اليوم مجتمعين

مع جاليه رفعت إسم لبنان

تا يكتب التاريخ عن لبنانها

**

خيي انطوان

بهدي شعري لأكبر خَيْ

كان الأم.. وكان البَيْ

"بو سركيس" كبير البيت

ضحكة سنّو شو حبيت

"أنطوان" الـ متلو ما لقَيْت

أرزه.. وعم تعطينا فَيْ

**

أودري

توفي والدها المرحوم دجيمي سيفاكوس زوج ابنة اخي مالاني، وهي لم تكمل الاسبوع الرابع من عمرها:

ـ1ـ

قلتلّو: بنتك ملكه

غصّ وما قدر يحكي

قلتلو: ضحكتلي كتير

طلّت من تمّو الضحكه

ـ2ـ

ودجيمي السافر لبعيد

مأكّد عم بيشوف العيد

فرحان بفرحة بنتو

العم بتضوّي بتوب جديد

ـ3ـ

وأودري عم تطفي الشمعه

وإسمو بقلبا محفور

حبست بعيونا الدمعه

ما بدا تشوفو مقهور

ـ4ـ

ومالني ما بيمرق يوم

إلاّ وبتخبّر قصّه

كيف وليش سرقت النوم

وزرعت بقلبا الغصّه

ـ5ـ

وتولا مع أرثر ع طول

دفّوا بنتك بالأحضان

محبتهن.. شي مش معقول

من ريحة أجمل إنسان

ـ6ـ

وهديتها ستّا ترّوز:

من محبتها أجمل شال

بدّي قلّك: ما بيجوز

رح تخوت جدّا ميشال

ـ7ـ

مش رح إحكيلك عن أم

متلا ما بتخلقْ إمّات

ع طول بأودري بتهتم

تا ما تفكّر بيّا مات

ـ8ـ

أودري غنّوجة العيال

تطمّن.. لا تخاف عليها

خليك دايماً فاضي البال

شوف الأهل حواليها

ـ9ـ

يا دجيمي نحنا ضيوفك

جينا نشكر معروفك

أودري من أجمل ما يكون

كل ما نشوفا.. منشوفك

**

وين الصاحب؟

من وحي كلام الصديق جوزاف بو ملحم

وقتك ضايع يا جوزاف

بإشيا مش معقول تصير

شربل ع "زوزو" بيخاف

بْلا أصحاب.. بْلا تعتير

وين الصاحب؟ قللي.. وقافْ

خبّرني.. وزيد التفسير

ليش اللي دمّاتو خْفاف

وكريم الكف.. وأمير

بس يقلّو المصريات

بعيون الـ بيحبّوا الـ هات

أتقل منّو ما بيصير!؟

**

كلارك

صاحب موسوعة شربل بعيني بأقلامهم

ـ1ـ

كلارك بْعيني بالستّين

هَنُّوه وقولوا: آمين

بركي بيفرَح بِعْيالو

وْأًوَّلْهُنْ بنتو ياسمين

ـ2ـ

العيلِه حَدُّو هْنِيّالو

كْرامِة عَيْنُو مجْتِمْعين

ملبُورن سيدني وجبالو

فرحِتْ.. وِتْزَيَّن صنّين

ـ3ـ

وْمَرْتُو روزانا قْبالُو

حَضْنِتْ ولادُو الْحِلْوينْ

وإمُّو تا يْشِعّ مْجالُو

سِهْرتْ ع التِّرْبايِه سْنِينْ

ـ4ـ

وْنِحْنا تا نْرَيِّحْ بالُو

مِنْقِلّو: مَبْرُوك العِيدْ

وْعَ عْقبالْ الْمِيِّه وْتِسْعِينْ

**

ابن خيي

شربل بعيني.. هو الابن الأكبر لأخي مرسال، سمّاه على اسمي كي يبقى هذا الاسم في العائلة

يا إبن خيي.. هات ضحكه هات

وسع الدني.. تا هالدني نهنّي

مجنون هالْـ بيقول: عمّك مات

شربل بعيني إنتْ.. بعدك هونْ

حامل إسم شربل بعد منّي

**

حصان

أهداني الصديق نواف صابر البعيني صورة تمثل حصاناً عربياً أصيلاً، كتب عليها "شموخ شربل"، فإليه أهدي هذه الابيات مع محبتي:

ـ1ـ

يا نوّاف حْصانك صار

رمز الكلمه والأشعار

شْموخي ما بينعد شْموخ

من دونك يا شيخ الدار

ـ2ـ

من "حب" حْصانك رح دوخ

وإتبودر بـ أحلى غْبار

ضَهْرو مَجْد.. جْلالو جوخ

وهديّه من ناس كْبار

**

عيد النقيب

الى نقيب شعراء الزجل في لبنان الشاعر جورج ابو أنطون بمناسبة عيد ميلاده

عيدك عيد الشعر.. وصار

عيدك عيد المغتربين

إسمك جرجي.. طفّي النّار

وِبْرِمْحك شِكّ التّنين

رمحَكْ.. باقَه من الأشعارْ

أَطْيَب من حدّ السّكّين

**

تمانين

عندما بلغ الشاعر عصام ملكي الثمانين من العمر

يا سنين وطي رقبتك يا سنين

عصام ملكي زهّر تمانين

هوّي اللي ضوّى غربتو بنورو

وقلبو بقي شمعه ببشمزين

**

ليليان

الى الاعلامية اللبنانية الراقية والقديرة ليليان اندرواس

ـ1ـ

صوتِكْ صدى الوديان يا ليليان

يا نغمة اللي مْدَوْزنا الْفادي

منْ كل قلبي بْقول للديّان

يْزيد عُمرِك عُمر بِزْياده

ـ2ـ

يا ناقله الهجران عَ الأوطان

وِقْفِتْلِك الأشْعار ردّاده

يا زارعه بْقلبِك أرز لبنانْ

إندراوس.. صار وين ما كان

إسم عيله مشرَّف بْلادي

**

نادين

الى الاعلامية نادين شعّار

ـ1ـ

يا نادين بقلك بس

كنتي فوق المنبر شمس

صوتك موسيقى والحان

ولسانك وحّد بلدان

بلغّه بْيِفْهمها الانسان

ألله يحميكي من النحس

ـ2ـ

نادين.. زهرة حب عَ حِلاّ

شعلة ذكا رح قلّها اسمالله

لبنان لمن صدّر الشعّار

نقّى بنت قد الدني كلاّ

**

إبن العز

عيد ميلاد الصديق ريمون ابو عاصي

يا "رَيْمُن" يا إبن العز

عاصي.. ومش عاصي ألله

بيشهدلك لبنان الأرز

وسيدني.. والدنيي كلاّ

بعيدك القلوب بتعتز

والعيله بتضويلك شمع

تعلّى.. يا كبير.. تعلّى

**

نانسي

نانسي عكر هي ابنة بنت عمتي سهام ومن سكان بلدة طورزا ـ قضاء بشري

ـ1ـ

أجمل منّك ما شافوا

يا نانسي اللبنانيه

لو ما باسِكْ بشْفافو

الورد الأحمر ليليه

غمزات خدودك خافوا:

ما في ورده جوريه

ـ2ـ

طورزا.. اللي طرّزتيها

بالكحله الْـ فوق عيونِكْ

فرحت لمّا سْكنتيها

وبالمحبّه غْمرتيها

صعبه تا توفي ديونِك

**

رفيق

الى ابن مزرعة الشوف الاستاذ رفيق البعيني

ـ1ـ

انت بقلبي يا "رفيق"..

وانت "بعيني" ليل نهار

ولاد العيله يا صديق

بيطلّوا من البطن كبار

ـ2ـ

ابن العم.. وع الطريق

كتبتلك إسمك بالغار

انشالله ما بتشوف الضيق

ولا الدمعه بتكويك بنار

بشكيلك يا أحلى رْفيق

وجودي بالغربه.. غدّار

**

كارول

الى زهرة العيلة البعينية كارول عدنان البعيني

ـ1ـ

لمّن نخّ وقال: "بحبِّك

يا كارول.. خبّيني بقلبِك"

صارت أشعاري أزهار

تا رشّ الأزهار بدربِك

ـ2ـ

شفتو فارس.. حبّو نار

لأميره.. متلا ما صار

يا بعينيّه ليل نهار

رح قلّك: يقبرني ربِّك

**

كونستانس

بمناسبة عيد ميلادها الثامن والثمانين

بالرهبنه ما اروعك

وبين البشر ما أبدعك

كونستانس انتي الراهبه

العا طول أللـه بيسمعك

سنينك بعز مدهبه

كيف ما مشيتي بهالدني

يسوع عم يمشي معك

**

روميو

إلى الصديق الشاعر روميو عويس الذي حضن أشعاري في جريدته "صدى لبنان" في سبعينيات القرن الماضي، يوم لم يسمع بي أحد في أستراليا

ـ1ـ

كنت مهجّر.. كنت بعيد

لقيت "الصدى" بالغربه

جريده.. والإسم جديد

ضايع بظروفي الصعبه

ـ2ـ

وروميو حتى الفرحه يزيد

كرّمني.. وكرّم كتبي

يا روميو شو ما بتريد

بنفّذ.. لكن عندي شرط

تضلّك ساكن بـ قلبي

**

إيلي ناصيف

ـ1ـ

ايلي ناصيف المحبوب

لحظه.. ما راح من البالْ

مشينا سوا دروب دروب

شفتو أرزه فوق جبالْ

ـ2ـ

خِلق كبير وعاش كبير

بأعمالو فرحت أعمالْ

صاحب متلو ما بيصيرْ

منْ قلبي مش رَحْ ينشال

**

جوزاف نادر

ـ1ـ

عندي الصاحب متل الخيْ

وجوزاف نادر.. يا خيي

لمّا بشوفك بصرخ: خيْ

وجودك بالقرب هديّه

ـ2ـ

كل ما عنّي بعدت شويْ

التكّه بحسبّها ميّه

خليك حدّي.. ارحمني خطيْ

بعرف ما بتقسى عليي

ـ3ـ

سقيني من ينبوعك ميْ

غطّسني بالحنيّه

العدرا ومار الياس الحيْ

يحموك ويحموا "نادر"

هالعيله اللبنانيه

**

طوني نادر

ـ1ـ

من الطيّاره شي طلَّيْت

فتحلي قلبو والبيت

وصفّى ياخدني مشاوير

ع مْطارح فيها جنّيت

ـ2ـ

متل بلادي حلوه كتير

ناقصها زيتون وزيت

وضيعه متلا ما بيصير

كبرنا فيها ع السكّيْت

طوني نادر خي كبير

متلو بهالدنيي ما لقَيْت

**

ملكي والملكه

دعتني الدكتورة بهية ابو حمد الى عشاء بشهر رمضان المبارك بحضور سيادة المطران مار ملاطيوس ملكي فقلت:

ـ1ـ

يا سيدنا ملكي اليوم

هـ السهره بدّا ملكه

بهيه بتشرف قوم

طله وقامه مع ضحكه

عطينا البركه منك دوم

ويا ريت تزيد البركه

حتى نقول بشهر الصوم

خدنا البركه من ملكي

ـ2ـ

علي جايي يتعشّى

ويفطر مع أغلى الأحباب

قلبي حدو بيتمشى

بغداد وهوي اصحاب

يا سيدنا اللي موشّى

توبك بالأحمر عنّاب

بهيه بدي غشّا

وإرسمها أرزه بكتاب

**

خيي جوزاف

جوزاف خيي رفيق عمري كان

وبعدو ملاكي بعتمة الهجران

انْ ضيّعتني بتشوفني حدّو

ع طول عم إنسى القلب عندو

وبرجع لحالي معذّب ويئسان

**

بسام

رئيس رابطة آل البعيني في مزرعة الشوف

ـ1ـ

ريّس عيله بعينيّه

ودكتور الطبّ بإيدو

بقدّملو قلبي هديّه

ومن عمري عمر بزيدو

ـ2ـ

هوّي البسمه المضويّه

بسّام.. وألله يشيدو

إسمو بقلب الهويّه

بعيني.. وريّسنا ع طول

هيك العيله بتريدو

**

روبير

الى روح الصديق روبير النجار

كان صوتك متل حلم بمسمعي

تقلّي قصايد.. كلّها عاشت معي

ولمن خبر موتك وصلني يا روبير

صاروا القصايد نار تحرق مدمعي

**

سامي مظلوم

ـ1ـ

كرّمني سامي مظلوم

وركبّلي جوانح تا طير

من ملبورن قدّملي نجوم

قدّمتلو قلب زغير

ـ2ـ

انشالله العز ببيتو يدوم

إبن العز بإسمو كبير

تا يصونو أللـه رح صوم

فضلو عليي كبير كتير

**

خيي جورج

ـ1ـ

جاري وخيّي عَ الميليْن

يا ما مسَّحْلي دموعي

الحبّ اللي بْقلبو من وين

جابو؟.. تا يضوّي شموعي

ـ2ـ

عنّي ما بْيِبْعد مترين

جورج الساكن بربوعي

لمّا بشوفو بخلّي العين

ترقِّص قلبي بضلوعي

**

مرسال

ـ1ـ

لا تفتكر بنساك يا خيي

بعدك دمع ساكن بـ عينيي

هنيال قلبك يا زْغير البيت

قبلي شفت أمي وشفت بيي

ـ2ـ

ما في قمر بيموت صبحيّه

وانت القمر والشمس والنجمات

وقت الصلا بحاكيك ليليه

تا حس «بو شربل» بعد ما مات

**

خيي ميشال

ميشال بعيد شْويّه

بملبورن ساكن يا خْطيّه

بسمع صوتو بآخر الليل

بيوصلّي مقطوع الحيل

بصفّي بَوِّس بالموبايل

تا حتّى بَوِّس خيي

**

رفيق غنوم

ـ1ـ

مهندس زراعي.. معلوم

ع كتفو في خمس نجوم

ألّف عنّي أحلى كتاب

وتركني لوحدي مهموم

ـ2ـ

لمّن ودّعني.. الأصحاب

قلّوا.. والدمعات غيوم

وهلّق كل ما اندق الباب

بصرخ بالعالي وبقول:

تفضّل يا رفيق غنّوم

**

اسماعيل

الى الفنان العراقي اسماعيل فاضل

ـ1ـ

غنّالي مصر وبيروت

وبغداد اللي بحبّا كتير

أشعاري دخلت البيوت

بصوتو.. الْـ متلو ما بيصير

ـ2ـ

دهب.. والجوهر ياقوت

والنغمه صوت عصافير

اسماعيل فاضل عم بيفوت

ع قلبي.. ويشبع تقدير

**

آميل

إلى الدكتور آميل شدياق

ـ1ـ

ترجملي الرباعيات

للّغه الإنكليزيّه

خلّدني بأجمل أبيات

دخّلني العالميّه

ـ2ـ

دكتور آميل.. الكلمات

بيصيّرها سحريه

يا "شدياق" محبّه هات

الْـ متلك بيساوي ميّه

**

الياس الأبّو

ـ1ـ

إبن عمّي الياس.. الكلّ

بيقولولو: يا "أبّو"

قلبو أبيض متل الفلّ

الحبّ بيمشي عَ دربو

ـ2ـ

لمّن عَ سيدني بيطلّ

بينزل عندي ضيف كبير

بفرح فيه كتير كتير

وبيسكّني بـ قلبو

**

مصطفى الحلوة

ـ1ـ

من سيدني جايي قلّك

صفّى بالقلب محلّك

يا مصطفى.. حرفي صار

يتشاوف فيك.. يجلّك

ـ2ـ

تكريمك إكليل الغار

بعتم الغربه زرعت نهار

يا كبير ورافقت كبار

نحنا منتفيّا بظلّك

**

غربة وطن

تكريماً للشاعر لطيف مخايل على كتابه غربة وطن

ـ1ـ

يا لطيف.. الشاعر الفنّان

إنت الأدب.. والحب آدابك

إسمك لمع باللطف.. بالتحنان

سكنت القلوب.. سآل أصحابك

في ناس قالوا الشعر كيف ما كان

ووقف الشعر ناطور ع بوابك

حقل العزيمه غنّتْ بلبنان

من شعرك.. المقهور ع غيابك

ع الأرز شفتك شالح الألوان

وخايف ع أرزه مزيّنه غابك

لو جنّ ألله وغرّق الأكوان

بيعيش أرز الرب بكتابك

ـ2ـ

"غربة وطن" هالإسم كلّل شيبتي

من نص قرن رفيق عمري وغربتي

تاري الوجع لمّا تفارق موطنك

بيكسر الرقبه.. وهيك كسَّر رقبتي

انشالله بترجع.. والفرح بـ معجنك

تخبز فرح للناس.. تلغي مصيبتي

إنتْ قادر يا لطيف.. ومعدنك

معدن دهب.. موجود كلّو بعلبتي

وزّع دهب.. لا تخاف، هيدا مخزنك

لو متّ.. أوعا تقول مش رح إفتحا

بردة معنى بتفتحا بـ غيبتي

ـ3ـ

بسميك شاعر.. ما غلط مره معي

بسمّيك خيي.. والأخوّه مرجعي

بسمّيك إبني.. والإبن رمز الهنا

لكن "بو حاتم" زتّ كلمه بمسمعي

اسمحلي يا شربل صعب إعطيك الجنى

هيدا الصبي محفور إسمو بأضلعي

هيدا إبن.. ما بيخلقو إلا أنا

والألمعي بيكون بيّو ألمعي

**

رندح يا وجع

ألقيتها في حفل إطلاق ديوان "رندح يا وجع" للشاعر فؤاد نعمان الخوري، عام 1989ـ سيدني.

ـ1ـ

يَا قَلْبْ.. قِلُّو شُو مْخَبَّالُو

مِنْ شِعرْ.. قَبْلَكْ مَا حَدَا قَالُو

تَارِكْ حَنِينُو يْسَاهِرْ ضْيُوفُو

وْجَايِي عَ سَهْرَه مْعَتّقَه بْبَالُو

ـ2ـ

جَايِي يْقِلُّنْ: يَا بَشَرْ شُوفُوا

بْيُوت الْمَحَبِّه بْضَيْعِة خْيَالُو

مَطْرَح مَا كَانْ يْفَيْلِتْ رْفُوفُو

عُصْفُور بِحْوَيْتِي.. الْهَوَا شَالُو

ـ3ـ

وْحِمْلُو عَ غُرْبِه.. وْزَادْ مَعْرُوفُو

وْصَفَّى غَنِي.. الأَحْبَابْ رِسْمَالُو

جُبْرَانْ.. زَارُو وْبَارَك حْرُوفُو

بِـ جَائِزِه انْغَزْلِتْ عَ مِغْزَالُو

ـ4ـ

وْإِخْدُو بْإِيدُو وْبَلّشُوا يْطُوفُوا

بْعَالَـمْ خَيَالِي.. مَا حَدَا طَالُو

إِلاَّ فُؤادْ.. الْـ زَارِعْ "بْأُوفُو"

إِخْلاصْ.. أَبْعَدْ مِنْ حَكِي مْجَالُو

ـ5ـ

بْتِشْبَعْ دِنِي مْنِ مْوَاسِم كْفُوفُو

بْتِفْرَحْ سَمَا بْسَحْبَاتْ مُوَّالُو

بْتِشْرُقْ شَمسْ مِنْ لَمْعِة سْيُوفُو

كلّ مَا الْعَتمْ يِهْجُمْ عَلَى جْبَالُو

ـ6ـ

تْعَلَّمْ وَجَعْنَا الْحَرْفْ بِصْفُوفُو

تَا صَارْ يِحْكِي وْيِشْتِكِي لْحَالُو

وْلِمِّنْ عِرِفْ مِتْحَسّنِه ظْرُوفُو

قَلُّو بُو طُونِي: يَا وَجَعْ رَنْدِحْ

صَار الْوَجَعْ يِتْمَايَل قْبَالُو.

**

قصايد شعر

ألقيتها في حفل إطلاق ديوان "رندح يا وجع" للشاعر فؤاد نعمان الخوري، عام 1989ـ سيدني.

ـ1ـ

رَنْدِحْ يَا وَجَعْ

كِبْر الْجُرحْ فِينَا

وِجْنُون الطَّمَعْ

هَجَّرْ أَهالينَا

وْصِرْنا عَ شَطّ الْبَحرْ

نُوقَعْ قَصَايِدْ شِعْرْ

وِالْمَوْج يِمْحِينَا

ـ2ـ

يَا مِيةَ أَهْلا وْمَرْحَبَا

بْطَلاَّت مِضْوِيِّه

بِقْلُوب كِلّ ما تْصَاحِبَا

بِتْفِيضْ حِنِّيِّه

إِنْتُو الْقَصِيدِه الْـ بِكْتِبَا

بِرْمُوشْ عِينَيِّي

إِنْتُو النَّغْمِه الْـ بِسْكِبَا

عَ شْفافْ غِنِّيِّه

ـ3ـ

رَنْدِحْ يا وَجَعْ

تَا يِسْكَر الْمِينَا

وِطْيُور الضِّيَعْ

تِحْفَظْ أَسَامِينَا

وِيْطِلّ فَجْر جْدِيدْ

حَامِلْ بِـ إِيدُو الْعِيدْ

تَا الْعِيدْ يِهْدِينَا

ـ4ـ

مَحْفُورْ عَ جْدايِلْ دَهَبْ

عَ تْرابْ بِحْوَيْتا الأَبِي

فُؤادْ عَمْ يِنْبُضْ أَدَبْ

تَا يْعِيشْ جُبْران النَّبِي

بِبْيُوت سَكْنِتْها اللّعَبْ

وِانْهَدْيِتْ لأَغْلَى صَبِي

ـ5ـ

رَنْدِحْ يَا وَجَعْ

فُؤادْ فَيَّقْنا

وْعَ وْتار السَّمَعْ

أَنْغامْ عَلَّقْنا

وْصَارِتْ ضِيَعْنا حْرُوفْ

تُوقَعْ بِعِبّ الأُوفْ

تَا الأُوفْ تِسْرِقْنا..

ـ6ـ

كْتابْ كِبْرِت كِلمتُو

بِوْجُودْ غِيَّابُو

وْشَاعِر بْيِنْزُف نَغمتُو

تَا يْفَرِّح حْبابُو

إِيد الْمَحَبِّه الْـ رَسمتُو

عَ جَبْهِة تْرَابُو

بَيْن الْقَصَايِدْ قَسمْتُو

وِتْوَزَّع كْتابُو.

**

شويّة فرح

مهداة للشاعر فؤاد نعمان الخوري بمناسبة صدور ديوانه (رندح يا وجع) 1989.

ـ1ـ

بِيعْنِي شْوَيِّةْ فَرَحْ

يِقْضِي عَ أَحْزانِي

الْخَوْف عَ خْدُودِي انْشَلَحْ

وِالْهَجْر بَكَّانِي

وْقِدَّامْ عِينَيِّي انْدَبَحْ

شَعْبي اللُّبْناني

ـ2ـ

بِيعْني..بِدْفَعْ سَلَفْ

آهاتْ مِحْمَرَّه

وِسْنِينْ آكِلْها التَّلَفْ

لِفَّيْتها بْصِرَّه

وْخِبَّيْتها بْعِبّ الْخَرَفْ

وِنْسِيتْها بَرَّا

ـ3ـ

بِيعْني مِنَّكْ نَغَمْ

يا إِبن خُورِينَا

يْمَحِّي بْنَبْراتُو الأَلَـمْ

وِالأُوفْ تِحْيِينَا

عْلَيْنا بْهَـ الْغُرْبِه انْحَكَمْ

.. وِحْرُوفَك الْمِينَا

**

سركيس كرم

ـ1ـ

سركيس إسمو هزّني من زمان

ع إسم بيي.. حروف من مرجان

سركيس كرم.. ع طول راسو فوق

تا من النجوم يحيّك التيجان

إبن الأدب، ابن الشرف والذوق

إنسان لمّا بينذكر إنسان

ع رقبتي لفّ المحبّه طوق

مفضل عليي.. وكتّر الإحسان

قلبو وطن.. عندو لإهدن شوق

ناجى بطل لبنان بالميدان

وغنى الأرزه اللي بجبل لبنان

ـ2ـ

هيك الرجال تكون يا ربّي

بتوقف معك بمواقف الصعبه

سركيس ما بيغدر بأصحابو

حروف المحبه مزيّنه كتابو

وكلّو ع كلّو شعلة محبّه

**

لطيف مخايل

ـ1ـ

كيف بدّي بالشعر حاكيك

وإنت الشعر.. والشعر عايش فيك

بيوت المعنى بتعرف فْضالك

عمّرتها ع أعظم مداميك

ـ2ـ

ع الحرف لمّا بيوقع خيالك

منّو لَحالو بيركض يحييك

يا لطيف انْ شحِّتْ رجالك

وحدك بتكفي.. ربّنا يقوّيك

ـ3ـ

مجد الزجل بيعيش بعيالك

والد وإخوه.. مجدهم كافيك

بِـ عيلة مخاييل نيّالك

ع الإستقامه قدرت تربيك

ـ4ـ

كبير.. حقّك تقشع بحالك

عالي.. وشعرك قادر يعلّيك

بطلب تا ألله يزيد أمثالك

كرّمتني بأشعار شو أشعار

وعارف أنا من الصعب تا كافيك

**

نجمة حبيب

ـ1ـ

نجمه حبيب بتشبه النجمه

بأنوارها عم تطرد العتمه

بكيِتْ شعب متشرّد ومسكين

وحملتْ بـ قلبا صورة فلسطين

وبكل كلمه بتنصر الحرمه

ـ2ـ

بتكتب أدب بيشرّف الآداب

بتروي قصص فيها ألم وعذاب

عندا قلم ما انباع للحكام

عندا فكر بيوزّع الأحلام

وكتابها.. بينقال عنّو كتاب

ـ3ـ

"نجمه" عظيمه ضاويه بالهجر

مرّه وحيده بتمرق بهالعمر

لو قلت عنها مبدعه.. معروف

بحروف إسما زيّنت الحروف

وإلا لعيونا ما انكتب هالشعر

**

ليش يا أللـه

إلى أرواح مجموعة أطفال مغتربين ماتوا دهساً بسيارة رجل سكران:

ــ1ـ

رح ضلّ إسأل: ليش يا أللـه

بتضلّ فينا هيك تتسلى؟

تركنا الوطن تا نعيش بالهجران

وما ضلّ فينا طفل ما صلّى

ـ2،

تاري الصلا ما بتبعد السكران

عيون الطفوله قادر يذلاّ

مبارح دعس أطفال من لبنان

بيسووا يا أللـه هالدني كلاّ

ـ3ـ

طيور السما.. بنيات مع صبيان

طاروا لعندك.. مجدك تجلى

أنت الإله الخالق الأكوان

ليلى الامومه شو رح تقلا؟

-4-

جايي تا إشكي وتسمع الأزمان

إيد العداله ليش بتشلاّ؟

بشوفك ع طول بترحم الزعران

أمّا الأوادم.. آخ يا دلاّ

ـ5ـ

عارف أنا عم يحكم الشيطان

مش حق عن هالكون تتخلّى

ما عاد يؤمن فيك هالإنسان

رخّص حياتو والكفر غلّى

ـ6ـ

حروب عم تترك شقا وأحزان

بلدان صار الموت محتلاّ

ولو ما إيماني من صخر صوّان

بدل الـ "نعم" كنت سمعت "كلاّ"

ـ7ـ

عيال عاشوا بحب ويإيمان

ليش تركت هالشرّ يوصلاّ

رحام قلب الأم يا ديّان

ما في حكي بيقدر يعزّي قلوب

عيلة صقر مع بيت عبدالله

**

غلة المشوار

الى نقيب الزجل اللبناني الشاعر جورج ابو انطون

ـ1ـ

غلّة المشوار.. هالمشوار

ما بينتهي.. خلّي الأمل زادك

البيقول عنّك بالعمر ختيار

يشوف الحياة بوجّ أولادك

يا جورج بو أنطون شعرك صار

غناني فرح.. بتشرّف بلادك

ـ2ـ

غلّة المشوار.. إكليل غار

بيتوّجك.. بيكتّر عيادك

شعرك زرع بالعتم شمس نهار

ضد الظلم بتفجّر عنادك

مارد زجل.. مهما زمانك دار

عايش انت بسنين أمجادك

**

إهدن

يوم اطلاق البث المباشر لراديو اهدن

ـ1ـ

إذاعه.. وإسم عم يخطر ع بالي

تا إرجع شوفها حلمت الليالي

يا إهدن كيف تا صرتي حقيقه

وأنا العم عيش في عالم خيالي

ـ2ـ

يا أطهر أم.. شرّفتي الخليقه

وحضنتي شعب من أغلى الغوالي

سنين الهجر رح إمحي بدقيقه

ما دام اليوم حنّيتي ع حالي

**

لطيف، بهية وشربل

حوار زجلي بين الدكتورة بهية ابو حمد والشاعرين لطيف مخايل وشربل بعيني

لطيف:

لبسِتْ البدله واعلنتْ "بَاتي" الكفاح

ونحنا فرحْنا بعَودة ليالي الملاح

ولمّا بنظرات العيون تصّوبي

بنرفع العشره قبل ما تسلّي السلاح

شربل:

واقف أنا حد البهاء ومختفي

ما شافني شاعر باخلاقو وفي

تاري البهيه بتسرق عيون البشر

وبتلبسك يا صاحبي القبع الخفي

بهية:

مين اللي قال اليوم شربل مختفي

وشعر القداسه من حروفك مكتفي

عيون البشر من نورك بتاخد نصيب

حتى بقبع المجد دوماً تحتفي

لطيف:

الشعّار برعاية بهيه بيشكروا

وعطفها من الصعب نحنا ننكروا

مُشْ بس بنسى شربل بعَيني انا

اسمي نسيتو وما عدت اتذّكرو

شربل:

خرفان صاير.. والخرف ما بتنكرو

واسمي أنا من الصعب انك تذكرو

شربل بعيني يا لطيف بغربتو

متل الجبل.. بتقول يا ما اكبرو

شربل:

قريت شعرك يا بهيه عن حذر

ما رضيت ردد اسم شاعر منذكر

بحبو أنا.. لكن عدوي بالزجل

هيك الزجل بيكون تا يرضي البشر

لطيف:

عَ كلمة الخرفان بصرخ يا لطيف

لطّف يا شربل جوّنا وداري لطيف

اسمك واسمي وكل اسم بينحذف

لمّا تطل نعومة الجنس اللطيف

شربل:

كرمال عينك يا بهيه مع لطيف

رح قول شعر مدهب وشكلو ظريف

من بعد خبرة عمر يا ست البهاء

من الصعب اني زعل الجنس اللطيف

لطيف:

بجيرة بهيه وشربل استحلَيت عيش

عيشه هنيّه لا ضجيج ولا خشيش

زعّل يا شربل صاحبك بيسامحَك

زعّل مرا بتنام برّا ع الحشيش

شربل:

ما بزعلك وحياة عينك بغمرك

بعطف الاخوه وبالمحبه بزنرك

لكن أنا خايف عليك من الهوى

توقع شي وقعه يا لطيف ونخسرك

**

لطيف وشربل

حوار زجلي بين الشاعرين لطيف مخايل وشربل بعيني

شربل:

يا حسرتي ع الشعر قدام الدلال

سوزان شمس مكعنشه بدر الكمال

زاغت عيون الناس من انوارها

تا صار شربل واقف بفي الجمال

لطيف:

يا شربل بعَيني تنعّم بالهنا

بسمتك بتزيح عن قلبي الضنى

واقف جنب سوزان حسّادك كتار

ومن اكبرالحسّاد يا شربل انا

شربل:

يا لطيف القلب فضلك ما نسي

وبيوت شعرك باللطافه مكدسه

ما زال عمري صار ع بواب الفنا

تركني مع الحلوين إفتح مدرسه

لطيف:

يا مأسّس مدرسه عيّن حرَسْ

تراقب صبايا حبّن بقلبي انغرس

افضل مَ انطرهن ع باب المدرسه

ويدّق قلبي كل ما يدّق الجرَس

شربل:

قلبك إذا بيدق يا شب الحلو

بمليون أهلا ومرحبا بستقبلو

لكن إذا بشوفك ع باب المدرسه

من فوق سطح المدرسه بكب الدلو

لطيف:

شفتَكْ عَ سطح المدرسه زلمي كبير

حامل دلو بالايد وبتركض كتير

عرفتَكْ مدير المدرسه ووضعك خطير

خفت ع الطلّاب من سوء المصير

دغري قْفلتْ لبْوابْ من اربع جْنابْ

تا خلّص الطلّاب من شر المدير

شربل:

وصل البوليس وقال مينو هالصبي

الواقف يلطّش ع بنات مهذبه

لولا المدير وكم كلمه مأدبه

كان الصبي ع الحبس رايح كركبه

بس الحنون كتير متلي يا لطيف

بيوقف ع راس السطح نجمه مدهبه

لطيف:

هَيدا الصبي يا شربل مفتّل شَنَبْ

ياما لعنتر عبس دقلّو الطنَبْ

تركلي الصبايا والبوليس على جنَبْ

وعالسطح ضلّك متل ناطور العنب

ما شفتَك على السطح نجمه مدّهبه

نجمه ولكن متل نجمة بو دَنب

شربل:

أكبر شرف تا كون نجمة بو دنب

ضوي العتم.. المع بليلات الأدب

شرفتني بهالاسم ورفعت النسب

مش متل يللي بيشتهي كروم العنب

دنبك قصير وحابب تطال النجوم

خليك فوق الأرض شرقوطة حطب

لطيف:

ع القافيه والوزن مُش لازم تزيح

مفروض توضع بين بطْلْ وحق زيح

بنجمه اذا تشّبهت حكيك مش صحيح

نورك بضو الشمس بيصفّي شحيح

يا ريتني حطبه انا او عود شيح

كنتْ منّك ع القليله بستريح

وبيحرقوني مع وراق اليابسه

ودفّي المغاره اللّي وْلِدْ فيها المسيح

شربل:

إسمك لطيف وليش تا صفّى قبيح

بتقتل بشر قدّام سيّدنا المسيح

تراك الزجل كرمال ألله واستريح

عم تنتقد إنسان شبّعتو مديح

بحبك أنا ولو كنت حطبه وعود شيح

هيك علمني مسيحي بالصحيح

رح إرحمك بالشعر لا تزيد الجفا

عن حب شربل ليش دخلك عم تزيح؟

لطيف:

اسمحلي يا شربل اختم باحلى كلام

رح طَمنك باقي صديقك ع الدوام

لكن اذا شي يوم صوّبت السهام

لا تنتظر منّي محبه وانسجام

لذّة حوار الشعر فجوه واِلتآم

ما يكون ناعم متل ريشات النعام

ولولا صَبَحْ بيناتنا بطش وحروب

بَعدْ الحروب ماّكدي دَورْ السلام

شربل:

ع طول بين اللطف والالفه انسجام

وبين الشعر والشعر شو بيحلى الكلام

شو ما قلت رح ضل حبك ع التمام

وتبقى بعيني الشاعر العالي المقام

واحلى حمامة حب بتجيب السلام

لكن إذا تحديت شربل يا لطيف

لا تزعل ان صوبت لعيونك سهام

**

عصام، لطيف وشربل

حوار زجلي بين الشعراء عصام ملكي ولطيف مخايل وشربل بعيني

عصام ملكي:

يا ميلاد الرعد يا الطف سفير

عرفتك شو انت وحبك بقلبي نما

بهاالصورة الفيها انا لقيتك امير

وعا يْمينك وعا شْمالك نجوم السما

**

شربل بعيني:

بين النجوم اليوم ضيعنا السفير

صفى قمر بيشع ب أعلى سما

زاغت عيوني وصرت عم افزع كتير

لا تواخذوني صرت خاف من العمى

**

لطيف مخايل:

شرّف سفير بلادنا وزار الحِما

لا تخاف يا شربل بعَيني من العما

بطلّة رعد رعدت على سدني الدني

وبدل المطر شتت نجوم من السما

**

شربل بعيني:

يا لطيف اللطف بكلامك حكي

وخلّى "الرعد" بدل الشتي يشتي بكي

هنيال قلبو حد منّو نجمتين

لكن أنا صارت حياتي مشربكه

**

لطيف مخايل:

عَ قصّة الغيري وكلام الترغلي

هَيدا حكي مردود لا تقولو إلي

بيتَك سمالله يا بعَيني طابقين

مفروض من عطر الصبايا ينتلي

**

شربل بعيني:

ليش دخلك ليش بتزرّك إلي

وع طول عم بتعيد نفس المسأله

ختيرت حتى طال نجمه من السما

وبدل العطر بالآخ بيتي منتلي

**

لطيف مخايل:

كلمة انا ختيرت حاجتها كفى

الشعر وجمال القافيه صَوبك لفا

وجودك متل كانون والدُنيا صقيع

ولو كان ما في نار منحّس بدَفا

**

شربل بعيني:

حبّيت إنّي روح صوب الختيره

تا شوف بعدو الحب عندي يا ترى

تاري أنا مغروم بالجنس اللطيف

وجوّات قلبي ساكنه مليون مرا

**

عيدية

الى الصديق جوزاف نادر بمناسبة عيد الميلاد المجيد

ـ1ـ

بالعيد شو بهديك يا جوزاف

ما عاد عندي زهر تا إهديك

خايف لَقلبي من الفرح يوقاف

لمّن بمولد ربّنا بهنّيك

ـ2ـ

يسوع غطّى مغارتو النفناف

وماشي ع وجّ التلج تا لاقيك

لا تخاف من عتم الدني لا تخاف

شقعت النجوم قبالك مداميك

ـ3ـ

كبير متل جبالنا.. ومنشاف

وكفّك بيادر.. ربّنا عاطيك

كتابك مجد.. نقّى الشهامه غْلاف

وبدنا عمر، يا شريك، تا نقريك

ـ4ـ

رفاقي أنا.. بـ هالدني أصناف

ورفيق عمري اليوم رح سمّيك

بين الحبايب يا جوزاف وقاف

تا سمّعك رنّة وتر مع أوف

والناس كل الناس تحلف فيك

**

يا كبير ضيعه

الى المختار الياس ابي خطار، سيدني ـ ميلاد 2019

ـ1ـ

كانوا يقولوا فلان بي الكل

رح قلّهن: في بيّ واحد انت

يا كبير ضيعه شعبها مِنْجلّ

ومنقدرك يا الياس وين ما كنت

ـ2ـ

منفرح إذا ع ديارنا بتطل

بتجيب ريحة أرض حلوه صنت

جنون الزعل بيطل بس تفل

وبتضل معنا لحظة الـ بيّنت

ـ3ـ

أرزة تواضع واقفه ع التلّ

وقلوبنا بميزان حبّك زنت

بهالعيد رح نهديك ورد وفل

ونقرّ إنّك بالصدور سكنت

ـ4ـ

كبير جيت.. كبير رح بتضل

محبّة أهالي ضيعتك ما خنت

يا الياس بو خطار.. يا مختار

فرحت كنيسة ضيعتي يا جار

بـ مجدليا لمّن تكوّنت

**

استقلال 2019

ـ1ـ

ليش جايي قول يا تشرين

من دون خبز.. من دون دوا وبنزين؟

ولبنان زادوا فوق همّو حْمال

سياسات ناقصها العقل والدين

ـ2ـ

لا الشعب قادر يطعم الأطفال

حتّى المدارس صارت دْكاكين

الدولار عم يسرق خبز العيال

نهبوا ليرات الناس.. سرّاقين

ـ3ـ

والنار عم تحصد ضيع وتلال

أجمل وطن عم تحرقوا شياطين

من الإغتراب منرسل الأموال

بلمح البصر بتطير الملايين

ـ4ـ

حتّى الزباله كوّما الزبّال

بين البيوت الْـ ساكنا محبّين

ما في حدا عم يفضح المحتال

نصّ اللي حكموا الشعب محتالين

ـ5ـ

عم يوعدونا بس بالأقوال

وأفعالهن بطّيخ ع السكين

ع طول عم منضيّع الآمال

وعم ننتخب نفس السياسيين

ـ6ـ

يا مجلس بهالجاليه شو انقال؟

قلنا سوا.. وسنين تطوي سنين

لبنان بدّو رجال.. أقوى رجال

ونسوان قلبُن من صخر صنّين

ـ7ـ

بدّنا الأرزه تنتفض بجبال

وتحضُن بـ فيّاتا المغتربين

ساعتا مجد الدني بينطال

وبيصير فينا نعيّد استقلال

ونفرح إذا بتطل يا تشرين

**

عْزَيْر

مسقط رأس الفنان المهجري الياس اسحق في سوريا

ـ1ـ

يا عْزيْر من بْلاد الغربه

بهديكي الدمّات بقلبي

مهما إبرم مهما شوفْ

ما بلاقي أعظم من شعبي

ـ2ـ

من إيدِك طلّ المعروفْ

ومن نبعِك حليانه الشربه

مدّي للمظلوم كْفوف

تا إرسم ع كفّك دربي

ـ3ـ

جاييكي متل الملهوف

مشتقلِك.. والغربه صعبه

بالأهلا بتلاقي ضْيوف

بابِك ما تسكّر يا حُبّي

ـ4ـ

يا عْزَيْر بتتباهى حروف

بإسمك.. تا الإنسان تربّي

إنسانِك قلبو مكشوف

وعم يسكن بـ قلبو ربّي

**

الحب اللي كان

أمسية كتاب السيدة نبيهة حدارة 1/12/2019

ـ1ـ

يا نبيهه.. "الحب يللي كان"

عارف أنا بيعيش بالأوطان

ع "التل" مطرح ما تمشّيتي

"بطرابلس" هالْـ شعبها إنسان

ـ2ـ

أيقونة الثوره اللي حبّيتي

زرعت بـ قلبي الفخر والإيمان

جيتي ع غربه فكرك عْطَيْتي

كتبتي تا يعلا للأدب بنيان

ـ3ـ

قلتي بتواضع.. تا تعلّيتي

عم إبتدي بالحرف يا إخوان

ومقهى "أبو رياض" خلّيتي

يعيش بكتابك أجمل الأزمان

ـ4ـ

وعن عيون الشرّ خبّيتي

بنيّات ضيعه مفتّحه بنيسان

وع قدّ ما للرب صلّيتي

الظاهر سمع طلباتك الديّان

ـ5ـ

نور مع ياسين نقّيتي

بالحب حتّى يوحدوا الأديان

يا نبيهه العتم ضوّيتي

بعيله عظيمه هون بالهجران

ـ6ـ

أقمار جوّا البيت ربّيتي

تسلم أمومه قلبها سهران

تمنّيت متلك.. شو تمنّيتي

يعمّ السلم.. صار الشعب يئسان

ـ7ـ

وأستراليا اللي عمرك هْدَيْتي

تصفّي أملنا.. وأجمل البلدان

بسيدني العظيمه بيتك وبيتي

أجمل مدينه يا نبيهه.. بسّ

منضلّ نحلم بالوطن لبنان

**

علي

الى صديق الغربة الدكتور علي بزي

شربل.. علي.. ولاد السنه

بالواحد وخمسين

دكتور أغلى من الدني

مع شاعرو المسكين

رفقة عمر

بغربة قهر

وسنين تطوي سنين

**

انت بعيني

الى كل فرد من أفراد عائلة "بعيني" التي بها أفتخر وأعتز

ـ1ـ

انت "بعيني" علّي الراس

دمّك دمّي مهما كان

جدّك جدّي.. من الاساس

ما بتلعب فيك الأديان

درزي ماروني القياس

وقياسك مجد الانسان

وين ما كنت.. وكتروا الناس

أصل "بعيني" رح بيعود

لمزرعة الشوف بلبنان

ـ2ـ

يا بعيني.. هالإسم كبير

جوّات العين محلّو

حروفو الخمسه عم بتطير

تا بقلب الكون يغلّوا

خلّي إسمك عالي كتير

جلّو.. تا الناس تجلّو

الشبّ بلا عيونو بيصير

متل الأعمى يا دلّو

ـ3ـ

يا "بعيني" بهالاسم اعْتَزّ

متل الزهره بِجْنينه

لولا "الحاسد" صيتك هَزّ

وحاول يسرق منك عِزّ

وإسم العيله عم يِبْتَزّ

شو ما قلّك رح بيقول:

يا "بعيني" إنت بعيني

**

عيد القديسة بترونلة

بمناسبة عيد شفيعة والدتي المرحومة بترونلة 31 أيار 2015

ـ1ـ

كنتي العيد.. وغاب العيد

لمن غبتي يا ماما

عشت الغربه بالتنهيد

اتوجّع من آلاما

ـ2ـ

بترونله.. عيد جديد

رح ضيفو ع الروزنامه

بحبك يا ماما.. وبزيد:

متلك ما بيخلق إمّات

إنتي الدنيي واحلاما

**

حجر

مهداة الى النحّات فؤاد الورهاني

ما في حجر بالأرض بيحاكي البشر

لو ما إيدين الفن ندهتلو

الإزميل لمّن بوّس خدود الحجر

صاروا البشر يِتْباوَسوا مِتْلو

**

مروان وشربل

حوار زجلي بين الشاعرين دكتور مروان كساب وشربل بعيني

مروان كساب:

يا شربل اللي في الك عالشعر دين

عملاق نجمك شعشع على الفرقدين

بالرثا القلتو لسعيد الدنيتين

دمعة خلود الشعر نزلت دمعتين

من شعرك ومن شعر شاعرنا سعيد

تخلد سعيد العقل فيهم مرتين

**

شربل بعيني:

لما الشعر بيدوخ يا مروان

بيكون شارب خمرة فنونك

شعر الفصيح بترشقو بقصدان

متل الدهب.. والرب بيصونك

عيونك إذا بتبكي على لبنان

بتركض الكلمه تكحل عيونك

**

مروان كساب:

عملقتني زيادي باياتك

وجوانحي من فضل ريشاتك

الشعر حافظلك يا خيي جميل

اللي بغربتك رابي عا دياتك

شعرك يا شربل جنن التحليل

ولبنان ما بيجهل جمالاتك

ومن بحر اشعارك دراري بشيل

تا طرز كلامي بخيالاتك

لا تلومني لشعرك اذا عم ميل

طالما الشعر شفتو انا بذاتك

وان كان عندي شعر ومواويل

هودي صدى بحات نبراتك

وشعري اذا عندو حلا وتكحيل

بيكون جايب كل هالتجميل

من ذوقك ومن كحل كلماتك

**

شربل بعيني:

العملاق اسمو بالشعر مروان

شعر الفصيح ورنة القصدان

مهما تفلسفنا وكتبنا حروف

تلاميذ نحنا بصفك.. ومعروف

دكتور أنت.. ومركزك منصان

**

مروان كساب:

انت الباخلاقك عشت موصوف

والحق كل منا ضروري يشوف

وبظل شعرك عايش الإلهام

وبجوك طيور القوافي رفوف

متواضع ولو كنت عالاكام

بقلب البنفسج سارح ومخطوف

زودتنا من غربتك أحلام

وصار البيسافر صوبها مخطوف

شاعر وشعرك عيش الأيام

والنثر منك طوفتو بتطوف

وسجل بهالتاريخ مني كلام

كلا من روض الصدق مقطوف

نحنا كتبنا حروف عن المام

فيها رسمنا الواقع المألوف

وانت عنا العبقري المقدام

وبدر الهامك بدون خسوف

بالنثر بالشعر بالإعلام

وحدك الزدت على الحروف حروف

**

شربل بعيني:

فصل الربيع بيحضن الازهار

يا حاضن الشعار والاشعار

كبير انت كبير يا مروان

وجيشك بحقل المعرفه جرار

متل الشمس بتشع بالاكوان

لا تخاف لولا غابت الأقمار

من تنورين الارز.. من لبنان

هالضيعة الضوت سما الاحرار

خليك حدي هون بالهجران

فيك برفع راس.. بمحي الهجر

وما بزعلك لو صار شو ما صار

**

مروان كساب:

شعرك بقلبي ورود البساتين

رجع ربيعي غصب عن تشرين

ولا فرق ما بين شربل ومروان

هيك ححكيوا كل المحبين

عرفتك بقلبك نعمة الايمان

وقصايدك ترنيمة شعانين

وانت وانا بعمق القلب اخوان

وبالشكل والمضمون متفقين

عملاق انت وشاغل الاكوان

وطبق الاصل عنك جبل صنين

الغربي بصميمك كتبت العنوان

ومن روحها الصوان صار يلين

توجتها بالعطف والتحنان

وبلسمت فيها قلوب مغتربين

وقدام شعرك حنيت التيجان

وما كان همك تحمل نياشين

وبعرف انا لو همك النيشان

كانوا على صدرك بالملايين

شاعر انت نيشانك الانسان

وهيدا العم تزيدو انت تزيين

بقلبي انت بتضل شو ما كان

واحساسك حملتو بالشرايين

لو زعلت مني بتجرح الوجدان

بجرح اقسى من قسا السكين

انت اللي دمعك بارك الديوان

يللي طبعتو بدمعتي من سنين

بتبقى بقلبي عا مدى الازمان

وشعرك رصيدي وفايق التتمين

وبغربتك فيك قشعت لبنان

ومجدليا وارز تنورين

**

شربل بعيني:

غلبتني.. وغير هيك مش رح قول

شختورتي ما بتغلب الاسطول

بالارتجالي أنت شيخ الكل

بتصير المعقول مش معقول

يا أرز واقف فوق أعلى تل

ما يوم شفتك عم تشك نزول

شامخ انت ع طول رح بتضل

تا تدمج المعلوم بالمجهول

مروان عقدة شعر ما بتنحل

البيحلها الله الخلقها بس

مهما تفكر بالدني العقول

**

مروان كساب:

شربل قلوب الكل بتملي

وحتى العلقم قادر تحلي

والبدر كيفما طل أما هل

بيكون منك سارق الطلي

انت الجبل وبكون حدك تل

وفي فرق بين الطود والتلي

شاعر. اصيل وكلمتك تنجل

من طيبها عم تنفح الفلي

وبمحبتك جامع رصيد الكل

من دون ما قلك ولا تقلي

وكلما مواسم شعرنا بتقل

البيدر انت بتضل والغلي

وشاعر انا بين العسى والعل

وانت القدير تعالج العلي

ومن شعرك الدفاق ما منمل

اللي بهيكلو الإلهام بيصلي

والعقدة المش عم تلاقي حل

بشعرك يا شربل في لها حلي

**

شربل بعيني:

مروان.. عم تشفق على حالي

وتزيد بالاشعار رسمالي

دكتور أنت.. وكلمتك قانون

وشعرك دهب ما بيلزمو نخاله

البيجاوبك.. مسكين رح بيكون

بينك وبينو جبال يا غالي

جربت مره وقلت هيدا جنون

وقلت الهريبه اليوم احلالي

انت شاعر عبقري.. ومجنون

هللي بيرضى يوقف قبالك

بيركع وقت ما بيلمح خيالك

وبيصيح.. مارد واقف قبالي

**

مروان كساب:

صوتك عندم بنبرتو يدوي

الصوان فيك تنمردو تلوي

وشعاعك الأحلام شو تمنو

حتى الليل الدامس تضوي

ويا ما الصبايا الغيد بيحنو

حتى عا قلبن عطفك يجوي

وما خاب شاعر عبقري ظنو

فيك اللي كلك شعر ومروي

حتى الخمر العتق بدنو

ما بيفرق انت او هوي

ويا ما بشر بقصايدك جنو

الفيها الصحاري قادر تروي

ومنها رحيق العاطفي جنو

ولو زرعتها بالصخر بيسوي

لكن القانون لا تسنو

منشان بيني وبينك تسوي

عواطفك لو ما بيتانو

قادر تدفع شعرنا خوي

وحتى الحقيقه الناس يتبنو

وعالحقيقه اكتر نضوي

الحق ما بيهرب حدا منو

ومين اللي بدو يصدقك انو

من الضعف بدها تهرب القوي

**

شربل بعيني:

محتار يا مروان شو بقلك

وعارف انت بقلوبنا محلك

لو كان فيي خلد الإنسان

بحلف بالله بخلدك كلك

روح الصداقه مجسده بمروان

والعبقريه دوم بتجلك

انت ارزه من جبل لبنان

ونحنا ع طول منحتمي بظلك

ما كان شعرك هون كيف ما كان

مشيت درب الحرف والقصدان

وقلوبنا ع الدرب بتدلك

**

مروان كساب:

ما عادت حروف البلاغه تساع

اسمك العاطي عز للمذياع

دوزنت فينا وتار مضطربي

وزرعت فينا رقة الاطباع

ومن شعرك الموزون منطربي

الروح وكلامك بلسم الاوجاع

وخمرتك عا طول منشربي

وكاس الوحي لأحلامها مطواع

والجبال جايز تنقلب خربي

لكن شموخك انت ما بيوقاع

مهما بعدت بتضلك بقربي

بقلبي وحب القلب ما بينباع

وما زال شعرك عايش بقلبي

بقلو شعر شربل يا قلبي اسماع

خصوصي بفضلك صارت الغربي

منبر الشعر وقمة الابداع

**

شربل بعيني:

تعبت حروفي وانت ما بتتعب

بتضل تعطي الشعر المدهب

ما بقول عنك شاعر وفنان

رح قول انت الصاحب الاقرب

نجمك ضوي ب عتمة الهجران

ونجم المحبه من الصعب يغرب

انت منبع شعر يا مروان

لا تلومني لولا قلت عطشان

وجايي تا اطفي حرقتي واشرب

**

مروان كسّاب:

شربل إذا بتشجعو لمروان

بيموج بحر الشوق بالقصدان

وبقول من شعرك ما في اروع

بالعاميي ورونق الاوزان

ومين اللي قدك انتج وابدع

تا صرت كلك مملكي وتيجان

وعا منبرك كلما طلعت مطلع

يمرجح صدى اشعارك الوديان

والقوافي تخشع وتركع

منك تا تقدر تاخد القربان

بالمكرمي منك ولا اودع

وذوقك بيرجح كفة الميزان

وبالمعمعه منك ما في اشجع

كلمتك بترجف الفرسان

وايمانك بلبنان ما تزعزع

رغم الضياع وقلة الايمان

وكلما بيجيني لخاطري مقطع

من حلاوة شعرك الرنان

لا تلومني لو صرت اتشلع

ما زال شعرك شلع الصوان

لومني ان كنت ما بدمع

من شعرك الموجوع عالانسان

ومفروض فيي أتعب واجمع

مجمع البحرين والأكوان

واكتر ما فيها المطبعه تطبع

وجاوب عليك ونقز النسيان

وقلك تا نقدر نظهر ونلمع

اكتبنا حرف عندك بشي ديوان

وبتضل انت الأصل والمرجع

متلما الغربي لها لبنان

وبتضل انت لشعرنا المنبع

والعجب كلما عم منجرع

لنبعك بيضلو قلبنا عطشان

**

شربل بعيني:

مروان.. حظي كبير اني بعرفك

شاعر قدير.. وبالصدق ما اشرفك

تعلمت منك كيف عملق كلمتي

كل الهنا.. كل الوفا باحرفك

انت مبدع.. عم تحلي دنيتي

انت نادر.. والهجر ما اتلفك

رح حلفك تبقى صديقي بغربتي

وغير هيك يا مروان مش رح حلفك

**

حفلة زجلية فايسبوكية

من حسن حظي انني نشرت على الفايس بوك صورة رمانتين أنعمت علي بهما شجرة الرمان لأول مرة، فإذا بالشاعر لطيف مخائيل يداعبني برداته الجميلة، ولكن المدهش حقاً هو أن الدكتورة بهية ابو حمد دخلت زجلياً على الخط، وكأنها أبرمت اتفاقاً سرياً مع صهر مجدليا، كي أجيبهما شعرياً، بينما راحت الفنانة ميرنا نعمة تشجع الفريقين وكأنها تصب فوق النار زيتاً كي تظهر الى العلن هذه الابيات الخالدة:

لطيف:

شَربلنا مُشْ عاداتو

يحندقنا برّماناتو

مخبّاهن بلكي النسوان

صدفه ع بيتو فاتو

**

شربل:

لا تحندقني بالنسوان

كرمال تدوق الرمان

انت بتعرف يا لطيف

طعميتك قلبي من زمان

**

لطيف:

يا نسر المعتاد تْطيرْ

وتحلِّق هونيك وهون

لَوْ من قلبك كَلتْ بصير

شاعر حجمي بحجم الكونْ

**

بهية:

النسوان بتطلب رمان

من شاعر بي القصدان

بيدوقوا الحبه بقربك

حتى يمشوا ع دربك

يا شربل منو معقول

تبقى عشقان وعا طول

تخبي الرمان بعبَكْ

تا تخلي حوا تحبك

وتغفيها بـ قلبك

عا نغمة عودك رنّان

**

شربل:

ـ1ـ

يا لطيف الـ نسرك طار

وقدملي جناحو زنار

انت كبير.. خلقت كبير

واشعارك أحلى الأشعار

ـ2ـ

رمانات قلبي للحب

يا بهيه الدكتوره

لكن شعري بدو قلب

حتى يحب القموره

ـ3ـ

يا بهيه ويا لطيف

خلوا القصه مستوره

بحلف عمري كلو بعيف

كرامة عين التنوره

**

لطيف:

يا شربل همّي لا تزيد

وتحكي بحُبْ وامورّه

زرتك حَدْ وسبتْ وعيدْ

وما تلاقيت بتنوره

**

شربل:

التنوره مش رح بتشوف

ولو شكيت بقلبي سيوف

ما في شاعر أو فنان

بيعلن حبو ع المكشوف

**

لطيف:

باتي يا ست الستّات

شربل عن جَدْ بحبّو

انخبّى بعبّو الرمانات

اوّل ما ايدي بالذات

رَحْ تنمَد على عبّو

ـ2ـ

كَافي بحُبك تتنبّا

يا بن بعَيني يا مربّى

شو نفع الكنز البيضل

محجوب وعنّا مخبّا

**

شربل:

هالجمعه جمعة آلام

وانت بالحلوه مغروم

يا لطيف بهالايام

لازم تصلي وتصوم

2

ويا بهيه كلام الجد

رح قلك تا الصهر يرد

لطيف مخايل محبوب

متلو لا قبل ولا بعد

ـ3ـ

ويا ميرنا الموسيقيه

تنيناتن نزلوا فيي

لمن لطيف بيسكت

لازم تحكي بهيه

**

بهية:

نحنا منحكي كلمة حق

شربلنا احلى قديس

لكن لما بيحمى الدق

مخبى الرمانات بكيس

2

ويا لطيف بهالكلمات

فكري بَيْعد بمحلو

شربل رمانو دبقات

حتى الحلوين يغلو

**

لطيف:

يا شربل لازم نحمّي المكاوي

ونقلب لين منبرنا قساوي

الطراوي ماكدّي مش رح تفيدَك

للحلوين دشِّر هالطراوي

رسول المعرفه ساعي بريدك

وزايد عَ ابن سينا زكاوي

بسال ربّنا نعمه يزيدك

وعرمّاناتك يزيد الحلاوي

وحلوي تطّل عديارك تعيدك

لرغد العُمر وتعيش بنقاوي

القصيد المنبري بيجري بوريدك

وشعرك فلسفه وابداع حاوي

انا بشهَد على روعة قصيدك

وبهيّه شاهده والكل شهدوا

ونْلتْ تقدير من يحيى السماوي

**

شربل:

إذا بالهجر رح حمي المكاوي

أكيد بزيد ع المنبر قساوه

انت اللطف طالع من يمينك

لكن صرت عم شوف البلاوي

من فليتان رح بتعيف دينك

ومع علتان شو بدك تساوي

بدنية كذب مش معروف مينك

ع سبع الغاب عم بيصيح واوي

انقلت الشعر بتوطي جبينك

لأن الشعر بيزيد النقاوه

مرضى الشعر رح تدخل عرينك

وداوي انكنت رح تقدر تداوي

**

العالـم العربي

أغنية خاصة بجريدة "العالـم العربي"، غنتها مجموعة من فنّاني المهجر، ولحنها ووزع موسيقاها الفنان هاني المهندس.

ـ1ـ

مِينْ الْـ خَلاَّ الْغُرْبِه تْصِيرْ

خَضْرا، شْواطِيها جَنِّه؟

وْمِين الْـ خَلاَّ الْكِلْمِه تْطِيرْ

عُصْفُورَه عَمْ بِتْغَنِّي؟

ـ2ـ

مِينْ الْـ زَوْزَقْ عَتْم النَّاسْ

بْأَلْوان الصُّبْح الضَّاوِي؟

وْمِينْ الْـ جَمَّعْنا أَجْناسْ

بِحْرُوفُو الْجُرْح يْداوِي؟

ـ3ـ

مِينْ الْـ أَخْبارُو بِتْفُوحْ

بِالصّدقْ.. وْأَسْرَعْ مِنْ بَرْق؟

وْمِينْ الْـ خَلاَّ الْغَربْ يْسُوحْ

بِالشَّرقْ، وْيِحْلَم بِالشَّرقْ؟

ـ4ـ

كِلْمِتْها كِلْمِه مَسْمُوعَه

جَرِيدِه، وْأَكْبَرْ مِنْ هَيْكْ

عَ صَفْحاتَا الْكَون بْيُوعَى

تا تْخَبِّي الْكَون بْعِينَيْكْ

**

على دلعونا

غنتها إحدى راهبات العائلة المقدسة المارونيات يوم افتتاح مأوى العجزة التابع لهن.

ـ1ـ

عَلَى دَلْعُونا.. عَلَى دَلْعُونا

عَ مَأْوَى الْعُجَّزْ بَاللَّـه دِلُّونا

ـ2ـ

شِفْتَكْ يا حُبِّي بِتْعِدّ لْيالِي

خَايِفْ لَـ تْخَتْيِرْ وِتْشِيب قْبالِي

عَ مَأْوَى الْعُجَّزْ يَلْلاَّ يا غَالِي

مَهْما خِتْيَرْنا بِيشَبْشِبُونَا

ـ3ـ

عَلَى دَلْعُونا.. عَلَى دَلْعُونا

الأُخْت بُو جَوْدِه ما بْتِغْفَى عْيُونا

ـ4ـ

مَأْوَى بْهَـ الْغُرْبِه سُبْحان الْخالِقْ

أَحْلَى مْن الضَّيْعَه الْـ ما فِيكْ تْفارِقْ

بِيعِيش بْقَلْبُو.. اللِّي بْقَلْبُو مارِقْ

خِدْمِه وْتَفانِي وْضِحْكِه حَنُونَه

ـ5ـ

عَلَى دَلْعُونا.. عَلَى دَلْعُونا

سَاعِدْ يا رَبِّي الْـ بِيسَاعِدُونَا

**

طل البطرك

غنّاها أطفال معهد سيّدة لبنان عام 1993، احتفاء بقدوم البطريرك مار نصراللـه بطرس صفير إلى أستراليا.

ـ1ـ

طَلّ الْبَطْرَكْ.. أَعْظَمْ بَطْرَكْ

مارْ نِصْراللّـه الْـ مِنْحِبُّو

يا مَعْهَدْنا جَمِّعْ زَهْرَكْ

تا نْرِشّ الزَّهْر بْدَرْبُو

عَ إِنْطاكْيَا وْكِل الْمَشْرِق رَاخِي ظِلُّو

وِمْخَبَّى الْكلّ بْقَلْبُو

ـ2ـ

أَهْلا بْبَطْرَكْنا أَهْلاَ

بِوْجُودَكْ نِحْنَا مْنِسْعَدْ

وْغُرْبِتْنا فِيك بْتِحْلَى

مْمَجَّدْ بِالشَّرْق مْمَجَّدْ

دَخِيلْ قَلْبَكْ، شُو مِنْحِبَّكْ، يا بَطْرَكْنا

دَمْعات الْعَيْن انْسَكْبُوا

ـ3ـ

نِحْنا زْغارْ وْإِنْتَ كْبِيرْ

خَلِّي إِيدَيْك يْفَيُّوا

عَ الطّفْل الْـ بِتْحِبُّو كْتِيرْ

مْحَبِّةْ أُمُّو مَعْ بَيُّو

يا ما نْطَرْنا، وِتْعَطَّرْنا بِـ غُرْبِتْنا

الْـ فِيها الْعِينَيْن انْصَلْبُوا

**

بطركنا الغالي

غنّاها أطفال معهد سيّدة لبنان عام 1993، احتفاء بقدوم البطريرك مار نصراللـه بطرس صفير إلى أستراليا.

ـ1ـ

أَهْلا وْسَهْلا بْبَطْرَكْنا

مارْ نِصْرَاللـه الْـ مِنْحِبُّو

بْيَمِينُو بِيبَارِكْنا

يا رَبّ نْضَلّ بْقَلْبُو

ـ2ـ

يا بَطْرَكْنا الْغالي كْتِيرْ

يا مارْ نِصْرَاللـه بُطْرُسْ

يا حامي الْمَوْطن الِكْبِيرْ

وْأَرْزِتْنا قَاعِدْ تِحْرُسْ

ـ3ـ

نِحْنا بْكِرْكِي مْنَعْرِفْها

مِنْ رَاهْباتْنا الْـ رَبُّونا

الرَّاهْبِه لَمَّا بْتُوصِفْها

بْتِكْرُجْ دَمْعات عْيُونَا

ـ4ـ

مَشْرِقْنا، بْدُونَكْ، عَتْماتْ

يا سَيِّدْ.. خَلِّصْ لُبْنانْ

وْخَلِّي بْإِنْطاكْيَه الْغَيْماتْ

تْشَتِّي عَ النَّاس الإِيمانْ

ـ5ـ

لوَّنْت الْغُرْبِه بِالنُّورْ

وِمْسَحْت الدَّمْعَه بْإِيدَكْ

يا سَيِّدْ.. وِقْطَعْت بْحُورْ

تا نْعِيش بْفَرْحِةْ عِيدَكْ

**

جايي لعنا

غنّاها أطفال معهد سيّدة لبنان عام 1993، احتفاء بقدوم البطريرك مار نصراللـه بطرس صفير إلى أستراليا.

ـ1ـ

يا أُخْتِي الْـ إِسْمِكْ نِسْرِينْ

وْجِيتِي عَ الْغُرْبِه مْنِ سْنِينْ

بَطْرَكْنا جَايِي لْعِنَّا

يْبَارِك كلّ الْمُغْتِرْبِينْ

ـ2ـ

مارْ نِصْرَاللـه.. ما غَيْرُو

اللِّي عِمْل بْكِرْكِي دَيْرُو

الْـ خَلَّى الشَّمْس بْعَتْم اللَّيْل

تِشْرُقْ.. وِيْكَفِّي سَيْرُو؟!

ـ3ـ

هَيْدَا هُوِّي.. وِحْياتِكْ

بْقَلْبُو خَبَّى أَرْزاتِكْ

حامِلْ شَمْعِةْ مارْ مارُونْ

حَتَّى يْضَوِّي عَتْماتِكْ

ـ4ـ

رَاهْباتْنا حِكْيُولِي كْتِيرْ

قَالُوا: مِتْلُو صَعْب يْصِيرْ

جايِي تا يْمَحِّي الْهُجْرانْ

يا قَلْبِي مْنِ الْفَرْحَه طِيرْ

ـ5ـ

يا سيدْنِي.. اهْتَزِّي اهْتَزِّي

بِرْبُوعِكْ إِبْن الأَرْزِه

مْحَبِّه وِقْداسِه وْإِيمانْ

يا قْلُوب النَّاس اعْتَزِّي

ـ6ـ

يا مار نِصْرَاللـه صَلِّي

الدِّنْيِي صَارِتْ مِعْتَلِّه

الشَّرّ تْغَلَّبْ عَ الإِنْسَانْ

بارِكْنا بْعَصْر الْقِلِّه

ـ7ـ

بْسَيّدِةْ لُبْنان فْرِحْنا

وْزِيَّنَّا مَطَارِحْنا

عَنْ دَرْبَكْ يا سَيِّدْنا

لا زِحْنا.. وْلا تْزِحْزَحْنا

ـ8ـ

بَطْرَكْ.. طَلِّةْ وِجَّكْ عِيدْ

وْغَيْمِه بِتْشَتِّي مْواعِيدْ

نَفِّضْ عَنَّا غُرْبِتْنا

وْرَجِّعْنا نْعِيش مْن جْدِيدْ

ـ9ـ

يا مَحْلَى وْجُودَكْ مَعْنا

مِنْحاكِيكْ.. بْتِسْمَعْنا

أَوَّلْ بَطْرَكْ زَارْنا هَوْنْ

وْتَحْت جْناحُو جَمَّعْنا

ـ10ـ

جِمَّعْنا الزَّهْر وْقِلْنا:

مِنْ دُون زَهْر بْتِقْبَلْنا

نِحْنا بْنَيَّاتْ الأَرْزاتْ

الطُّهْر مْضَوِّي مْشَاعِلْنا

ـ11ـ

نِحْنا رْجالَكْ.. بَطْرَكْنا

بْإِيدَكْ فِيك تْحَرِّكْنا

إِنْت السيِّد.. إِنْت الْبَيّ

يا سَيِّدْنا بارِكْنا

**

هيهات يا بو الزلف

غنّاها الأب جون جبّور في حفل اليوبيل الفضي لجائزة شربل بعيني في قصر الأونيسكو ببيروت

ـ1ـ

هيهات يا بو الزلف

عيني يا موليا

لبنان انت القلب

وجبيل عينيّا

ـ2ـ

عصام إسمك وعي

كافي البعد كافي

يا كبير يا ألمعي

صرلك زمن غافي

يا جبيل هلّق تعي

وهاتي الدوا الشافي

وقدام مجدو اركعي

يا حروف مضويه

ـ3ـ

يا مجدليا اسمعي

إسمك على شفافي

ع طول انتي معي

بالقلب لا تخافي

شربان من مدمعي

كاسك على الصافي

بالهجر جفنك وعي

وراسك ع إيديّا

**

إنتو الأهل

أثناء حملة تبرعات لمستشفى الأطفال في سيدني.

ـ1ـ

بَكُّونِي لِمِّنْ شِفْتُنْ

بِالْمسْتَشْفَى وْلاد زْغارْ

مِنْ أَوّلْ آخ عْرِفْتُنْ

مَوْجُوعِينْ بْقَلْبُنْ نارْ

ـ2ـ

ريشَات جْناحِي نْتَفْتُنْ

بَرْكي بْرِيشِي جِنْحُنْ طارْ

قْلَعْت تْيابِي وْلِفْلَفْتُنْ

تا يِدْفُوا وِيْصَفُّوا كْبارْ

ـ3ـ

وْهَـ الْكِلْمات الْـ إِلَّفْتُنْ

تا إِشْكِرْكُنْ عَ اللِّي صَارْ

مِنْ تِمّ الصَّرْخَه قْطَفْتُنْ

وِلْبِسْت الصَّرْخَه زنَّارْ

ـ4ـ

إِنْتُو الأَهْل اللِّي كْشَفْتُنْ

وِفْلَشْت كْفُوفُنْ بِالشَّمْس

تا يْفَرِّخْ عَ الْكَفّ نْهارْ

**

جوعان

ألقيتها عام 1988 عبر أثير إذاعة إس بي إس الحكوميّة، أثناء جمع التبرعات للصليب الأحمر.

ـ1ـ

جُوعانْ.. سَامِعْ صَرخْتُو مْنِ بْعِيدْ

بَعْدُو طفْل ما كَمَّل السّنْتَيْنْ

عْضَام صَدْرُو نافْرَه تْجاعيدْ

وْعَ خْدُودْ صَفْرَا وَقْعِت الْعِنَيْنْ

ـ2ـ

جُوعان.. كل النَّاسْ سِمْعُوا الصَّوتْ

وْدَبِّت النَّخْوِه بِالدِّنِي كلاَّ

إِبنْ أَللَّـه بْيِنْشُل مْنِ الْمَوْت

ما فِي بَخِيل بْيَعْرفُو أَللَّـه

**

الحرف ما بيموت

أرسلت هذه الأبيات للدكتورة بهية ابو حمد مرفقة بموسوعة شربل بعيني بأقلامهم، 10 أجزاء، 3500 صفحة.

يا بهيّه.. الحرف ما بيموت

ولو متّ.. صعبه انتهي بتابوت

ميّات كتبوا عن شعر إنسان

خلاّ الغربه تفرح بلبنان

وقلّو المجد: ع نصّ قلبي فوت

**

ميراي

الى الشاعرة والمهندسة ميراي شحادة

الدكتور مصطفى قللي

إنّو الكلمه بتحلّي

يا ميراي وجودك صار

للثقافه أحلى مزار

ورح ضوّي شموع وصلّي

**

محسن

الى الاديب محسن ادمون يمين

يا محسن إيّامك فخر

ومن حرفك بيشعّ الفجر

مش رح قدّملك نسرين

ومش رح قلّك عيش سنين

المتلك باقي طول الدهر

**

ضوّي

غنّاها أطفال معهد سيّدة لبنان تكريماً للأخت فيرونا زيادة عام 1987

ـ1ـ

شُو حِلْوِه هَـ الطَّيَّارَه

الْـ جِيتِينَا فِيها زْيارَه

وَطَنَّا اللِّي مِنْحِبُّو

وَدَّاكِي لْعِنَّا مْنارَه

ضَوِّي يا أَحْلَى شَمْعَه

بَرْكِي بِتْجِفّ الدَّمْعَه

وْبِتْمَحِّي اللَّيْل بْنارَا

ـ2ـ

يا أَهْلا بْطَلِّه حِلْوِه

قِدَّاما الْبَدْر بْيِضْوِي

فيرونا الأخت القُدْوِه

بْتِرْفَع الرَّاس خْبارَا

ـ3ـ

بِحْياتِكْ يا فِيرُونا

قُولِيلُنْ تا يْزُورُونا

ماري آميل.. عْيُونَا

رَحْ تِفْرَح بِأَزْهارَا

ـ4ـ

نِحْنا كْبِرْنا بِالْغُرْبِه

وْجُوَّات الْقَلب مْحَبِّه

لِبْلاد الأَرْز الْخصْبِه

الْـ نَقِّتْنا نْكُون بْدارَا

**

حفلة زجل

أحياها أطفال معهد سيّدة لبنان هاريس بارك عام 2002 ترحيباً بالأم الرئيسة فيرونا زيادة

ـ1ـ

مِنْ عِبْرِينْ جَايِي لْعِنَّا

تْطَمِّنَّا عَنْ مَوْطَنَّا

فِيرُونا زْيادِه عَ طُولْ

بْطَلِّتْها بِتْجَنِّنَّا

ـ2ـ

بَدِّي إِتْحَدَّى الشَّبابْ

بْرَدِّه.. يِحِسْبُولا حْسَابْ

آنْ مارِي.. آيِه بِكْتَابْ

اللِّي بْيِقْرِيها بْيِتْهَنَّا

ـ3ـ

ما فِيكي تِتْحَدِّي شَبّْ

أَحْسَنْ ما بَارُودِي يْهِبّ

فيرونا غِنِّيِّةْ حُبّ

الدِّنْيِي فِيهَا بْتِتْغَنَّى

ـ4ـ

شُو بُو صَوْتَكْ مُشْ مَظْبُوطْ

وْعَمْ تِمْشِي مِتْل الْقَبُّوطْ

آنْ مَارِي ما بَدَّا شْرُوطْ

مُشِيرَه.. ما فِي مِنَّا

ـ5ـ

فِيرُونا مَعْ آنْ مارِي

هْدِيِّه مِنْ عِنْد الْبَارِي

لِمِّنْ حَلُّوا بِدْيَارِي

قَلْبِي مْنِ الْفَرْحَه غَنَّى

**

مروان

الى الدكتور الشاعر مروان كسّاب

جايي لعندك فاتح كتابي

بكمشة شعر تا سدّد حسابي

كرّمتني بأشعار صعبه تنوجد

متل الجواهر.. ردّت شبابي

مروان.. فضلك إنت باقي للأبد

مجبور إني قول.. ويطق الحسد:

تفضّل ع قلبي.. مشرّع بْوابي

**

يا بهية

الى الدكتورة بهية ابو حمد

ـ1ـ

لمّن كتابك صوب شعري طل

يا بهيه.. تغيّر حسابي

صرت احسب كيف بدري هلّ

بغربه.. عذابا شلّع بوابي

ـ2ـ

زرعتي الفرح بحروف مجدا غلّ

بجمعيتِك.. تا يألّف كتابي

إنتي الزرعتي الشعر ورد وفلّ

ومليون أرزه مزيّنه الغابه

ـ3ـ

فضلك علينا للأبد بيضل

يا شمس نورا بدّد غيابي

وصالونك.. البلقلب عندو محلّ

وزّع جوايز فخر لصحابي

ـ4ـ

يا أرزة الفرحان فيها التل

إنتي الصدق.. لما الصدق ينقال

وغيرك بعينو دموع كذابه

**

ماري ميسي

وسام الملكة اليزبيت الثانية

ماري.. يا ماري الأوسمه كلاّ

بتلبق إلك.. وبقول: ما شالله

عرفتك صديقه مزيّنه بأخلاق

الملكه بلندن عرفت تجلّا

التاج الملوكي دوم كان مشتاق

ينقّي مرا من بلاد أرز الرب

معروف اسما بالشرق والغرب

وتا يكرموكي.. استأذنو ألله

**

ريتا

الى السيدة ريتا فنيانوس 

ضحكة ريتا بتسبقها

باوتيل زخيا ع الميدان

ضحكه القلب بيعشقها

شمس منورها الديان

بشعري حابب زوزقها

واهديها زهر البستان

كيف تانى خالقها

كيف زينها بالالوان

باهدن رفعت بيرقها

وبقلبو أرزة لبنان

**

طوني زخيا

الى السيد طوني زخيا

طوني زخيا بالميدان

اسمو بيشرف لبنان

قاعد خلف المكتب نسر

شكلو ع شكل الإنسان

جناحو عم بتوزيع فخر

باهدن.. مملكة الفرسان

باوتيل زخيا بيحلا الشعر

كرامة طوني يا اخوان

بهيبة وجو بخلي الهجر

يرجع شربل ع الاوطان

**

ميشال الراهب

الى صهر مجدليا الحبيب ميشال الراهب

ميشال الراهب يا ناس

صفى ميشال البابا

اعلى رتبه بالقداس

بأخلاقو الحلوه جابا

كرامة عينو بشرب كاس

الحب مدوب بشرابا

صهر الضيعه بدون قياس

بيشرفنا جناس جناس

الضيعه كبيره باحبابا

**

إيليا

الى روح الشيخ ايليا بعيني.

ـ1ـ

ايليا الشيخ المحبوب

بعيني.. وبعيني مصور

بالطله شكلو مهيوب

كبير.. وصعبه يتكبر

ع محلو اخدتني دروب

بوجي مش رح تتسكر

يقللي اهلا.. قلبي يدوب

ويعطف ع شب زغير

عن حبو مش ممكن توب

اسمو ترتيله بدفتر

بالغربه سرقتني دروب

وبعدي وجو بتذكر

ـ2ـ

صفى محلو بيت جديد

بفرصة ضهر المدارس

روح لعندو.. يزت العيد

بوج التلميذ العابس

من خيراتو تعطي الايد

ويخضر الغصن اليابس

يودعني.. والنظره تزيد

حنيه بقلبو حابس

بقولا وقلتا وبرجع عيد

ايليا.. ملاكي الحارس

ـ3ـ

سمعتو باقة اشعار

جاوبني ب ضحكاتو

انت شاعر.. قللي.. وصار

يشجعني ب حكياتو

عقلي من كلماتو طار

شفت الحب بكلماتو

دولاب عمري كيف ما دار

بدي احلف بحياتو

وبدي صلي ليل نهار

واترحم ع دياتو

وشربل هالصفى ختيار

راجع ع الضيعه مشوار

حتى يبوس تراباتو

**

نانسي عكر

نانسي بنت بعيلتنا

متل الورده الجوريه

لمن شفتا بضيعتنا

سرقت مني عينيي

نانسي عكر خلتنا

نعرف معنى الحنيه

بضحكه حلوه سحرتنا

انشالله بتكمل فرحتنا

ومنزوج هالحوريه

**

ليلى

الى ابنة مجدليا السيدة ليلى نادر الراهب.

ليلى الراهب اكلاتا

مجبولين بضحكاتا

عزمتني بْإهدن حسّيت

ما ساعتني ساحاتا

بنت الضيعه.. ست البيت

زوجا بيحلف بحياتا

اخت طوني وشو تمنيت

آخيها هيي بذاتا

اما نديمه.. ويا ريت

بيا عايش حتى يشوف

شو ربتلو دياتا

**

منصور الخوري

الى الشيخ منصور الخوري ابن حدشيت البار:

ـ1ـ

منصور الخوري المحبوب

شيخ.. ومشيختو قلبي

مشاني ع دروب دروب

مزروعه بالمحبه

ـ2ـ

يا منصور الشيخ.. كتير

عندك طله مهيوبه

إبنِك متلِك اسمو كبير

يا حدشيت المحبوبه

تعرفت عليه وحبَّيت

عمرلو بـ قلبي بيت

ولمّن ودعتو حسيت

ضاعت بالكون دروبي

**

غسان الحسامي

مهداة الى رئيس رابطة الجامعيين في الشمال الاستاذ غسان عبدالرحمن الحسامي:

ـ1ـ

شو بدّي قلّك محتار

يا غسّان الحسامي

فكري عندك ليل نهار

وعم تسكن بـ أحلامي

ـ2ـ

جائزتك من نور ونار

النور بيضوي إيامي

والنار بتخلق أشعار

تخلصني من ظلاّمي

ـ3ـ

صدّقني.. لو مهما صار

تارك ع جبيني علامه

حَمامه بيضا.. وأزهار

وقلبي القفص يا غسّان

حتى تعيش الحَمامه

**

جُمانه بعيني

جُمانه بعيني الإحساس

زنرها بزهراتو

عيلتها من أشرف ناس

وبيتا فاضت خيراتو

بصحتها عم اشرب كاس

وشعري زين ابياتو

قنديل عمري لولا ناس

بضحكه زغيره منك بس

بيرجع يضوي شمعاتو

**

يوسف ايليا بعيني

يوسف ايليا بعيني

تعرفت عليه من جديد

الحب اللي بينو وبيني

معتق متل قناني نبيد

امو زهره بجنينه

الله يرحمها ويزيد

وبيو مفضل.. يا عيني

فضلو عليي بالتأكيد

صعبه اوفيهن ديني

محبتهن بتجيب العيد

**