زغاريد الفرح

Charbel Baini

Zaghareed Alfarah

Cheers of joy

قصائد مختارة من كتب الشاعر

**

صورة الغلاف:

شربل بعيني في عرس ابنة أخيه مالني

**

مقدمة

   دُهشت، وأنا أراجع قصائد هذا الكتاب لأنشرها بطبعة جديدة، حين وجدت أن العديد من أعراس الجالية، التي ألقيت فيها قصائدي، قد تفرّق شمل أصحابها واشرأب الطلاق برأسه القذر بين العروسين.

   هنا، أصبحت أمام أمرين لا ثالث لهما، إما أن أحذف قصائد الطلاق وإما أن أنشرها.. فقررت أن أبقيها كي يبقى الفرح في أبيات قصائدي، بعد أن تلاشى في بيوت العائلات.

   ما ذنبي أنا، وما ذنب قصائدي كي ترمى في سلة المهملات، لأن من مدحتهم بها، لم يتمكنوا من الاستمرار معاً في رحلة العمر؟.

   ومن يقرأها سيجد أنني سخّرت المناسبة من أجل التنوير والتعليم والتثقيف والدعوة للتعايش الأخوي بين المغتربين على اختلاف طوائفهم وسياساتهم:

ألله خلقنا وقال يا ولادي

حبّوا بعض.. تا يفرح الفادي

إنتو ولادي وين ما كنتو

البلدان كلاّ بعدّها بلادي

المهم تبقوا متل ما إنتو 

للحب، للإخلاص زوّاده

   وفي عرس فتاة من عائلة "صوّان" قلت:

يا بنت عيله إسمها مشهور

لولا صمودا ما بقي لبنان

والارز يللي صار عمرو دهور

ما كان قدر يقاوم الطوفان

لو ما نبت ع صخر من صوّان

   وعن اشتياق الوطن لأبنائه قلت:

أخي أنطوان عم يكتب كتابو

ع بنت الجار.. يا شعري حكيلو:

أحلى تنين من يوم اللي غابوا

دمع الأرز ما بيوقف عويلو

   وبسبب الحرب اللبنانية اللعينة هاجر العديد من اللبنانيين الى جزيرة قبرص القريبة من لبنان، ومن بين هؤلاء كان أخي ميشال الذي تزوج عروسه هناك، لأن طائرتها لم تتمكن من الهبوط في مطار لبنان بسبب القصف:

يا قبرص.. ليش دمعاتي سخيّه

وليش القلب دقّاتو قويّه

بأرضك زيّني الساحات عنّي

يا جاره.. وبوّسي ميشال خيّي

   وفي عرس آخر، طالبت العروسين بالابتعاد عن التناحر لأسباب تافهة:

مننشل دني.. بكلمة عطف تنقال

منهدم دني.. تا نقوّم مسبّه

خلّوا المحبّه بعمركن رسمال

ربوع السما انبنيت ع المحبّه

   وعن التزاوج بين البلدان، قلت:

إنتو شعب للتضحيه مندور

بتشرّفوا البلدان وين ما كان

شمعة أثينا ضوّت المعمور

بالفلسفه، بالعلم، بالإيمان

وبيروت بنيت للمحبه سور

ومجدليا حبّت اليونان

   وكي لا ينسى العروسان أن المحبة هي الركيزة الأقوى لزواج دائم، وأن الصلاة ضرورية من أجل استمرار السلام العائلي، قلت:

انشالله بتتهنّوا العمر كلّو

وكيف ما مشيتو تنفتح البواب

وشهر العسل بفيّتو تضلّوا

والخير ينزل فوقكن مزراب

وبكمشة عصافير تتسلوا

ومنشان تا ما يبرم الدولاب

لازم تضووا شموع وتصلّوا

   وليس هذا فحسب، بل كنت أسخّر العرس، لبث الروح الوطنية في قلوب المهاجرين:

لبنان، يا عرسان، أرض الطهر

اللي بينسمى منّو.. هنيّالو

حِبّوه.. تا يبقى ع طول الدهر

صامد بِأرضو.. بوحدة عيالو

ياما وياما تكسّرت ع الصخر

جماجم الإعدى الشوشروا بالو

مهما انشوى بنيران أبشع غدر

باقي، بإذن أللـه، استقلالو

   وفي عرس آخر، وجهت كلامي الى العريس، كي يسمع الجميع:

بدّو الوطن شعلة حضاره ونور

بدّو بشعبو الكل يهتمّو

بيبكي إذا بيعرف حدا مقهور

وكل ما فكارو شوي يلتموا

بيقعد برمل البحر يبني سور

خلفو في ضيعه عطرها شمّوا

وخلفو في أرزه ع جبل عالي

تركع وتغفى تحت منّا دهور

   أي أن الدهور والازمان تغفو تحت الارزة اللبنانية المعتقة فوق جبالنا.

   وعن واجب تمسك المغترب بوطنه الأم، قلت:

إمك وبيّك رضّعوك العز

واللي بيرضع عز ما بيهلَك

خليك شامخ.. إنتْ ابن الأرز

وفتّح دينيك منيح ليل نهار

تا ترد كل ما الأرز يندهلك

   وعن البعد عن الوطن، والحنين الى تلك القرى الحبيبة، قلت:

بعاد نحنا عن وطنّا بعاد

وضياعنا حدّ الارز ببلاد

وجينا ع سيدني نزيّن الهجران

بعيال تركت بالهجر أمجاد

   أجل، لقد تركنا في غربتنا أمجاداً ستكبت بماء الذهب، إذ اعطينا البلاد التي حضنتنا اغلى ما نملك من عطاء، فلقد وهبناها فلذ أكبادنا.

   وكما يعلم الجميع، ففصول السنة تختلف بين لبنان وأستراليا، فإذا كان الربيع هنا، يكون الخريف هناك:

سيدني.. ربيعا اليوم بكوانين

بعرس اللي زوزق ليل غيّابو

قناني الويسكي باست فناجين

متل الشتي العرقان مزرابو

بشرّي الليله غنّت تلاحين

وجبران واعي بفرحة حبابو

   ومن منا ينسى الجنوب اللبناني البطل، فلقد قلت في أحد أعراسه:

إبن الجنوب كبير بالايمان

رمز البطوله، صامد وإنسان

صرلو عمر عم يسكن بقلبي

تمجّد بشعري من قديم زمان

   وفي أحد أعراس أبناء عكار قلت:

بقلوبنا رح تنبنى البيوت

مهما علينا يهبطوا حيطان

ويحاربوا الانسان بالانسان

لبنان باقي وصعب انو يموت

جيشك ابن عكار يا بيروت

    هذا غيض من فيض هذه القصائد، لذلك لم أتمكن من رميها في سلة المهملات كي لا أخون الفرحة والزغاريد والتصفيق وأنا ألقيها، مجاناً، في تلك الأعراس المهجرية الجميلة، رغم الإجحاف الذي حل بها.

   أترككم معها وعليكم أن تحكموا إما لي وإما علي.

                  شربل

**

زهرة بعينيّه

عرس غريغ خوري وخرستين بعيني، 23 آب 1998

ـ1ـ

خْرِسْتينْ.. يا زَهْرَه (بْعَيْنِيِّه)

وِمْطَعَّمِه بِزْهُور (بَحْرِيِّه)

طُهْرِك شَلَحْ عَ الْكايْنِه مَشْلَحْ

وْعَ الشَّمْس باقِةْ وَرْد جُورِيِّه

تْذَكّرِي.. ماضِي الْعُمر مَرْبَحْ

قِدَّيْش لِفْلَفْتِكْ بِـ عِينَيِّي

قِدَّيشْ كانِتْ ضِحكْتي تِسْرَحْ

بْضِحْكِة شْفافِكْ.. يا بِنتْ خَيِّي

جْديد كِنتْ.. وْدَمعْتي بْتِجْرَحْ

الْغُرْبِه وَجَعْ.. عَ الْهَجْر ما فِيِّي

وَحْدَا عْيُونِكْ ضَوِّت الْمَطْرَحْ

وَحْدَا عْيُونِكْ قالِتْ: خْطَيِّي

(أَنْكل) تْصِيحي.. زَلْغِط وْإِفْرَحْ

وْحِسّ إِنِّي سْمِعْت غِنِّيِّه

رَقّصِكْ.. وِ(بْرامِكْ) الْمَسْرَحْ

وْمَشْورِكْ.. تا تِتْعَب جْرَيّي

تِبْكي.. وْبرِمْشي دَمعْتِكْ إِمْسَحْ

إِبْكي مَعِكْ.. تِضَحَّكي عْلَيِّي

وْمِصَّاصْتِكْ تُوقَعْ بِـ إِيدَيِّي

ـ2ـ

يا (غْريغْ).. يا طالِعْ مِنِ حْكايِه

وْسَارِقْ صَبِيِّه بِالْحسِنْ آيِه

خْرِسْتِينْ.. شُو خْرِسْتِينْ.. سِتّ الْكِلّ

بِـ مِجدْلَيَّا وِجّها مْرايِه

لِمِّنْ عَلَى دِكَّانِتَا بِتْطِلّ

بْتِسْمَعْ: يا أَهْلاَ بْصِهرْنا الْجَايِي

جُورْج خَيِّي مْسَيَّجَا بِالْفلّ

اللِّي بْيِقْطِفَا بِيكُونْ تُوصايِه

تْأَنَّى عَ مَرْباها.. ما كان يْمِلّ

(الْعَبُّودْ) بَدُّو أَلفْ تِهْنايِه

وْأَنطْوانيتْ الأُمّ رَحْ بِتْضَلّ

بِنْتَا بِـ قَلْبَا غايِة الْغايِه

رْفِيقِة كْنيسِه، وِالشَّرَفْ بِيغِلّ

بِـ طَلِّتَا.. بْضِحْكِه مْضُوَّايِه

وْأَللَّـه عَطاها بِنْت تِنْقايِه

ـ3ـ

يا (بْرايْن).. يا (لُورينْ).. يا أَحْبابْ

يا آلْ خُوري الْـ زَيّنُوا الْهجْرانْ

اشْتاقِت الأُمّ الْـ إِسمْها كْفِرصْغابْ

لْطَلِّة الْغِيَّاب وِالْخلاَّنْ

بْوِجّكُنْ.. مِتْشَرَّعَه الأَبْوابْ

بْوِجّكُنْ.. بِيفَتِّحْ الرَّيحانْ

عْيالْكُنْ وِعْيالْنا أَصْحابْ

أَهلْ نِحْنا مِنْ قَدِيمْ زْمانْ

غْريغْ وِخْرِسْتِينْ خَلُّوا آب

بْعِرْس الْمَحَبِّه يْزَرِّكْ لْنيسَانْ

انْشَاللّـه حَيَاتُنْ بِالْهَنَا مِزْرابْ

وِمْزَيّنِه بِبْناتْ مَعْ صِبْيانْ

وْعَمْ يِفْتِخِر فِيهُن أَرز لُبْنانْ

**

بولس وأيلين

الذكرى الخمسون لزواج السيد والسيّدة بولس وأيلين البحري. 16/12/2000

ـ1ـ

كانْ يُوقَفْ مِتِلْ أَرْزِه عَ الْجَبَلْ

زْنُودُو تْشِيلْ الصَّخْر.. تِزْرَعْ مَطْرَحُو

وْكانْ قَلْبُو كْتِيرْ مِبْنِي عَ الأَمَلْ

مِنْ ضِحْكِتُو.. طْيُور الْوَطَنْ عَمْ يِفْرَحُوا

وْفَجْأَه.. بْيِتْرُكْ مَوْطَنُو.. حامِلْ زَعَلْ

نَشَّفْ بِجِسْمُو الدَّمّ.. لَوْلا بْتِجْرَحُو

(وِبْتُوُومْبَا) زَتّ حالُو وِانْشَغَلْ

عْيُونُو بْدَمْعات الْهَجَرْ عَمْ يِسْبَحُوا

الْغُرْبِه تْقِيلِه كْتِيرْ.. بيقُول الْمَتَلْ

وْبُولُس الْبَحْرِي صَيَّر الْغُرْبِه وَطَنْ

وِعْيَال حَدُّو بْيِسْرَحُوا وِبْيِمْرَحُوا

ـ2ـ

.. وْخِلْقِتْ وَقِت ما الْبَيّ وَدَّعْ هَـ الدِّنِي

(لِيثْغُو) بْتِذْكُرْ يَوْمها شُو صَارْ؟

انْهَدّ جِسْر الْبَيْت.. حالِه مِحْزِنِه

الأُمّ وَحْدَا.. وِالصِّيصَان زْغَارْ

صَارِتْ وَهِيبِه فَوْقْ بِنْتَا تِنْحِنِي

تِضْحَكْ إِلاَ.. وِهْمُومْهَا قِنْطَارْ

مِتْل الشَّمْس طَلِّتْ بِـ عُمْر الْوَلْدَنِي

وْبِقْيِتْ شَمِسْ.. تَا الْكَوْن فِيهَا احْتَار!

عَ كْفُوفْهَا.. قْصُور الطُّهرْ عَمْ تِنْبِنِي

وْعَ جْبِينْهَا إِكْلِيلْ وَرْد وْغَارْ

شُو بِنِي؟.. ما يَوْم سَأْلِتْ شُو بِنِي؟

بِمْحَبِّتَا.. عَ طُولْ تِطْفِي النَّارْ

بْتِكْبَرْ سِنِه.. بْتِفْرَحْ بِكَبْرِتْهَا السِّنِه

أَيْلِينْ أَعْظَمْ مَدْرَسِه رَبِّت وْلادْ

يَا رَيْت مِتْلُنْ يِنْوَجَدْ بِـ كِلّ دَارْ!

ـ3ـ

وْصُدْفِه الْتَقْيُوا وِالْقَلب فِرْحَانْ

حَبُّوا بَعْض.. تا ضَوِّت الْخَمْسِينْ

أَيَّا دَهَبْ بِيزَيِّن الْعِرْسَانْ؟

أَيَّا زَهِرْ مَرْشُوشْ بِبْسَاتِينْ!

خَمْسِينْ سِنِه.. أَغْلى مْنِ الْمِرْجَانْ

الإِلْمازْ نَخّ يْبُوسْ أَحْلَى سْنِينْ

هِدْيُوا الْخَلِيقَه بْناتْ مَعْ صِبْيَانْ

قُولُوا اسْماللـه.. نْجُوم مِضْوِيينْ

عْيَالْ.. فِيهَا بْيِفْتِخِرْ لُبْنانْ

خَلْف الْبَحرْ عَ طُول مِتِّفْقِينْ

بِنْيُوا الْهَجرْ.. تَا فَرْفَح الْعُمْرَانْ

وْبِقْيُوا عَ صَدْر الأَهْل مِتْكِيِّينْ

بَيّ شَرْبِلْ.. أُمّ شَرْبِلْ.. كَانْ

صَوْتُنْ رْفِيق وْلادْ مِرْضِيِّينْ

الْوَزْناتْ زَادُوا.. وْفَرّحُوا الدَّيَّانْ

أَللـه يْطَوِّلْ عُمْر أَغْلَى تْنَيْنْ

أَللـه يْهَنِّي بُولُس وْأَيْلِين

**

غابي وكارول

عرس غابي حتّي وكارول بعيني، 10/6/2000

ـ1ـ

قِدَّيْشْ.. بَدِّي إِشِكْرَكْ يَا رَبّْ

مِسَّحْت دَمْع الْعَيْن بِالْفَرْحَه

وْدَاوَيْت غَصَّه.. شَلّعِتْ هَـ الْقَلْبْ

صَرْلا سِنِه.. بْذِكْرَى السِّنِه جَايِي

إِمّ طُونِي.. تْبَارِكْ الطَّرْحَه

ـ2ـ

كَانِتْ.. يَا كُوكُو.. تِحْسُبْ الإِيَّامْ

تْطَرِّزْ عَلَى السّكَّيْتْ فِسْتَانَا

قَالْ.. بَدَّا تِلْبُس الأَحْلامْ

بْعِرْسِكْ.. يَا بِنْت رْفِيقْ هُجْرَانَا

خِدْتِي رِضَاهَا.. حَافْظِي عَ كْلاَمْ

مَقْطُوفْ مِنْ بُسْتَانْ إِيمَانَا

سِتِّكْ.. قَبِلْ مَا بْحُضْنْ أَللَّـه تْنَامْ

صَرْخِتْ يَا أَللَّـه: صُونْ كِلّ النَّاسْ

تَا يْصُونْ أَللَّـه عْيَالْ صِبْيَانَا

ـ3ـ

مِتْل الْكِذِبْ عَمْ يِكْبَروا الأطْفالْ

وْمِتْل الْكِذِبْ عَمْ يِرْحَلوا عَنَّا

عْيالْ كُنّا.. وْكَتّروا الِعْيالْ

النّجْماتْ صارِتْ تِنْحِسِدْ مِنَّا

عْيالْ الْقَداسِه.. ما بْتِتْعب بالْ

فيها الْقَلب.. عَ طُول مِتْهَنّا

يا بَيْت حَتّي.. حُبّكُن رِسْمالْ

لَوْلا كَرَمْكُنْ.. نِحِنْ مَا كِنَّا

خْرِسْتين حَتّي.. سِتّنا.. هْنِيَّالْ

بَطْن الْـ عَطَى أَبْطَالْ مَوطنّا

رِجْعِتِلْكُنْ.. يَا فَرْحِة الْمُوَّالْ

رِجْعِتِلْكُنْ.. كارول مِتْل السِّتّ

الإيدَيْن جَنَّى.. وِالْعَقلْ بنَّى

ـ4ـ

يَا بِنْت خَيّي.. يا قَمَر نُوّارْ

كِرْمال عَيْنِك شَعْشَعِت هَـ الدَّارْ

كنْتِي الْفَرْحَه لْبَيِّك وإمِّك

صِيري الْفَرَحْ لِلْغَمْرِك بْأَزْهارْ

أَنْطُوَانْ خَيّي.. ما حِمِلْ هَمّكْ

كنْتِي رَضِيّه.. وِالرّضا زُنّار

وْتَرازْ أُمّك.. كلْ ما تْضُمِّكْ

تْحِسّ قَلْبا مِنْ ضُلوعا طارْ

زَهْرَه.. بْهَنِّي الْـ قَطْفِكْ وْشَمِّكْ

غَبْرِيَال.. الْـ صَعَبْ مِتْلُو يْصِيرْ

طلِّة رجولِه.. وِالْعَقل قنطارْ

ـ5ـ

لا تْقُولْ يا بْنِ الْعِزّ.. وَيْن الْعِزّ؟

بِـ عَيْلتَك كلّ الدّنِي بْتِعْتَزّ

نَايِف.. تا تِضْحَكْ.. قَطّف الضِّحْكات

وِسْرِير حُبَّكْ بِـ يَمِينُو هَزّْ

وْيَللِّي بْقَبْرَا مْحَمّلِه صْلاواتْ

انْقِلْت آخْ مْنِ الْقَبْر بِتْفِزّ

أمّكْ عَفيفه.. زينة السّتَات

يِرْحَم تْرابا.. جَمّعِتْ الِوْرُودْ

وْصارِتْ عَ إبنا تْرِشّ وَرْد وْرِزّْ

ـ6ـ

عِيشُوا سَوَا.. وْخَلّوا الْمَحَبّه جْناحْ

مَا بْيِنْكِسِرْ.. مَهْما تجنّ رْيَاحْ

قْنَيْوِرْ.. جْرَاسَا رَقّصِتْ لُبْنَانْ

وْمِجْدْلَيَّا مْزنّرَه بْأَفْرَاحْ

عَ طُولْ خَلُّوا حَالْكُنْ عِرْسَانْ

عَمْ تِقِطْفُوا الرّمَان والتّفّاحْ

عَ طُول خَلّوا قَلِبْكُنْ فرحان

مِنْ دُون حُبّ الْقَلب ما بْيِرتاح

**

بات وجميل

عرس جميل وبات زعيتر عام 1994 في قاعة الويستيلا، لدكمب، سيدني

ـ1ـ

شايِف بْعَيني تْنَيْنْ .. أَحْلَى تْنَيْنْ

مَشْكوك حَولُنْ أَهل عَ الْمَيْلَيْنْ

وْسيدني طْبُولا تْرَقِّص السَّاحاتْ

وْمالبُورْن جايِي تِغْزُل الإيدَيْنْ

وْبان .. أَرض الحُبّ وِالكَرْماتْ

تْشيلْ الْعَرَقْ تا تْسَكِّرْ الْعِينَيْنْ

وْمِجِدلَيّا .. تْرَكِّع القَيْماتْ

دَيْنا كْبيرْ .. وصَعب نوفي الدَّيْن

يا بَتْرونَلَّه .. وَيْن بُو الْهِمَّاتْ

بَيِّي .. اللي سَرْقو مِن عِينَيْنا الْبَيْنْ

كانْ حِلْمو يْشُوفْ عِرْس بَّاتْ

أَوّل حَفيدِه بْعَيْلتو .. يا فَرْحِتو

مْأَكَّدْ بِقبرو ضِحكتو رَطْلَيْنْ

ـ2ـ

لِمِّنْ " جَميلِكْ " تَوّجِكْ بِالزَّهرْ

يا بنت خَيي .. جَنّْ فينا العُمرْ

إمُّو سَلِيمِه الْـ رِضْيِت الدَيَّانْ

وَقْتْ اللي رَبِّتْ عَيْلِتا بِالطُّهرْ

صارِت تْزَلْغِط .. قَلبها فِرْحانْ

وْبُطرس يْرَندِحْ عَ مَزاجو الشِّعرْ

وْأَنْطون بَيِّكْ .. مُنطفي مْنِ زْمانْ

غارِق بسكره .. خاف منها الخَمرْ

وإمّك الْـ هِدْيِتْ نِصّ عمرا لْبَانْ

رِجْعِتْ عَ بَيْتا مْكَلّلِه بالنَّصْرْ

يا بِنْتْ خَيّي .. وِانْتَشَى لبنان

أَرْض البُطولِه الرَّاكْعَه عَ الصَّخْرْ

شو ما عَطاكي .. بْناتْ أَو صِبيانْ

قُولِي : يا أَللـه بْقَدِّمُنْ لْلأرْزْ

أَرْزَكْ يا أَللـه مْنِعْبَدو بالهَجْرْ

ـ3ـ

بْحِبّكُنْ .. يا زَهْرِة الْغُربِه

يا تْنَيْن .. حافِر إسْمُنْ بْقَلْبي

بْحِبّكُن .. تا تْزَيّنوا الِعْيالْ

بِعْيالْ مِتْلُنْ ما خَلَقْ ربّي

مْننشُلْ دِني بْكِلْمِة عطف تِنْقالْ

مْنِهدُم دِني .. تا نْقَوِّمْ مْسَبِّه

خَلّوا الْمَحَبّه بْعِمِركُنْ رِسْمالْ

رْبُوعْ السَّما انْبَنْيِتْ عَ الِمْحَبِّه

**

إبن خيي

عرس دومنيك بعيني ولورين مرعب 4/7/2009

ـ1ـ

لُورَيْن مِرْعِبْ بَعْرِفا مْنِ زْمانْ

تِلْميذْتي.. بِـ سَيّدة لُبْنانْ

علّمِتْها.. وْكانْ الْحَرف مَمْنونْ

تِرْسُم الزَّهْرَه.. يِضْحَك الْبُسْتانْ

وْبَيّا آمِيل.. بْطُفْلِتُو مَفْتونْ

يْوَزّع رضا الْبَيّات بِالْهُجْرانْ

وْأَميلْيا.. الْـ حِمْلِتْ غُصْن زَيْتُونْ

وْضَوّت شْمُوعا بْمَدْبَح الدَّيّانْ

مْنِ دْمُوعْها صارْ الدَّمْع مَجْنونْ

نَسْلا رِجِعْ عَ ضَيْعِتا فَرْحانْ

مِجِدْلَيّا صاهْرِتْ حَصْرونْ

زَلْغِطْ وْكَتّر يا أَرز لُبْنانْ

ـ2ـ

يا دُومْ.. يا دَمْدَمْ.. يا عِينَيّي

يا الْمِتِل إبْنِي.. يا إبن خّيّي

شاعِرْ أنا.. وْمُحْتارْ شُو بْقِلَّكْ

رَقْصِت قْلامي بَيْن إيدَيّي

سْمِعِت أُمّك عَم تْرَتّلَّكْ

جْمَعْت الصَّلا أَبْياتْ شِعرِيِّه

وْشِفِتْ بَيَّك عَم بْيِغْزَلَّك

دمْعات عَيْنُو.. أجْمَل هْدِيِّه

كِلَّك مَحَبِّه وْعاطْفِه كِلَّكْ

جُوزافْ مَعْ فَرْنُوك ما رَبُّوك

جَايِي إنِتْ.. نِعْمِه إِلَهِيِّه

ـ3ـ

يا دُومْ.. يا لُورَيْن.. يا عرْسانْ

كُونُوا مِتِلْ ما أَهِلْكُن كانوا

كانوا الْفَخر للأرزْ بِالْهُجرانْ

وكانوا الْوَفا.. وِالْحُب عُنْوانُو

جيرانْ مِتْلُنْ ما انْوَجَدْ جيرانْ

وْبَيتْنا.. بْيِنْدَهْ عَ جيرانُو

بَيت بُو خُطّار هَللّي كانْ

بْمجِدْلَيَّا.. نْحِبّ سكّانُو

مْخاييلْ سَمّى سَمِكْتُو مْن زْمان

عَ إسم ستّي.. آخْ ع زْمانُو

بِالْحُب وَحْدو بْيِنْبَنَى الْبُنْيانْ

وْمَهْما اغْتَنَى الانْسانْ بِالاكْوانْ

مُشْ رَحْ بْياخُدْ غَيْر إيمانُو

**

كلارك خيّي

عرس كلارك وروزانا بعيني، 6/1/1984

ـ1ـ

فِرْحانْ قَلْبِي بْهَـ الْعِرسْ فِرْحانْ

كْلارْك خَيِّي فَرحْتُو اللَّيْلِه

وْفَرْحِة رُوزانا زَهْرِة الرّيحانْ

مَعْ بَيْت شَيْنا وْبَيْت الِبْعَيْنِي

عْيالْ مِجْتِمْعَه بْفَردْ عَيْلِه

ـ2ـ

يا بَيْت شَيْنا صَعْب كافِيكُنْ

طُول عُمْري.. وْفَضلْكُنْ أُوفِي

بْتِضْوِي الْقَداسِه بِـ لَيالِيكُنْ

رُهْبانْ عَ زْنُودَا الطّفلْ غافِي

رْسَمْتُوا الْفَضِيلِه بِـ أَيادِيكُنْ

وْصَعْبِه كَرَمْكُنْ تُوصْفُوا شْفافِي

إِنْتُو الْمَحَبِّه مْغَلْغَلِه فِيكُنْ

مَهْما بْرَمْنا صَعْب تا نْلاقِي

قَلْب.. مِتْل قْلُوبْكُنْ صَافِي

ـ3ـ

يا رُوزانا.. الشِّعْر غَنَّالِكْ

سِتّ الْحَرْف إِنْتِي.. هْنِيَّالِكْ

شِعْرِكْ بِيخَلِّي النَّاسْ فِرْحانِينْ

ضَلِّي اكْتُبِي.. لا تْرَيْحِي بالِكْ

دافْعِي عَنْ شَعبْنا الْمِسْكينْ

وْعَنْ أَرْزِكْ.. وْعَنْ عِزِّة جْبالِكْ

وْقُولي لْكِلّ النَّاسْ نِحْنا مِينْ

وْكِيفْ الشّرْق وِالْغَرْب بِكْيُوا دَمّ

وَقْت اللِّي شَافُوا دَمّ أَبْطالِكْ

ـ4ـ

وْيا عَريس الْـ كِلَّك مْحَبِّه

راحيلْ إِمَّكْ عِرْفِت تْرَبِّي

روزانا لَمَّا اخْتَرْت.. هِنَّيْتَكْ

رْفِيقِةْ عُمْر بِدْروبَك الصَّعْبِه

خَلِّي الْمَحَبِّه سَاطْعَه بْبَيْتَكْ

لَوْلا الْمَحَبِّه ما انْوَجَدْ رَبِّي

عْيُوني بْوَرَقْ لِفَّيْت وِهْدَيْتَكْ

وِانْ كانْ ما بْيِكْفِيكْ إِهْديك الْعُيُونْ

قِللِّي تا قِيمْ مْنِ الصّدْر قَلْبِي

ـ5ـ

آخِرْ وَصِيِّه.. حافْظُوا عَ الْحُبّ

وْما تِسْمَعُوا لِفْلانْ وِفْلَيْتانْ

وْقَبْل ما تِمْشُوا عَ أَيَّا دَرْبْ

تْزَوّدُوا بِـ بَرْكِة الدَّيَّانْ

وْخَلُّوا الطَّهارَه مْعَشعشِه بِالْقَلْبْ

وْخَلُّوا الْحَياةْ مْزَيّنِه بْإِيمانْ

حَتَّى الْمَسِيحْ اللِّي اخْتار الصَّلْبْ

يِرْزِقْكُن بْنَيَّاتْ مَعْ صِبْيَانْ

يْصَفُّوا مَنارَه مْشَعْشَعَه بِالْغَرْبْ

صِيتُنْ مِتلْ صِيتْ اللِّي رَبُّوكُنْ

الْـ رَفْعُوا بْأَعْمالُنْ إِسمْ لُبْنانْ

**

زهر الشهامة

عرس ريمون ولورا البحري، 31 كانون الثاني 1988

ـ1ـ

ناطِرْ أَنا تا تِفْرَحُوا ناطِرْ

وْمَعْ كِلّ رَدِّه تْزَلْغِط حْناجِرْ

وْأُوقَفْ عَ دَرْبُنْ رَشْرِش الأَحْلامْ

وْحَمِّلْ حَمَام بْلادْنا بْشايِرْ

وِبْفَرْحِتُنْ إِحْرُم عُيُوني تْنامْ

تا ضَلّ حَدُّنْ عَ الْوَفَا سَاهِرْ

أَحْبابْ.. قِدْرُوا يْزَيّنُوا الأَيَّامْ

وْكانْ إِسْمُنْ: مايْكِل وْخاطِرْ

ـ2ـ

كِرْمالْهُنْ جِينا سَوَا.. تِخْمِينْ

لَوْلا عْيُونُنْ ما انْقَطَفْ نِسْرِينْ

وْلا كانْ فَتَّحْ وَرْد عَ أُمُّو

وْلا غَلّ بِصْدُور الْحَلا يَاسْمِينْ

وْزَهْر الشَّهامِه ما حَدَا شَمُّو

لَوْ ما تْعَطِّرْ رِيحْتُو سِيدْنِي

وْمِجِدْلَيَّا ضَيْعتي.. وْصَغْبِينْ

ـ3ـ

يا عَرُوس الْـ كِلِّكْ مْحَبِّه

إِنْتِي الدّخِيرِه الْـ بارَكا رَبِّي

ماري وطوني الْـ وَدّعُوكي الْيَوْم

كِنْتِي لْعُمْرُنْ عُمْر بِالغُرْبِه

لُورا.. إِذا بْتِمْشِي عَ دَرْبُنْ دَوْمْ

ما يَوْم بِتْلاقِي الدَّرب صَعْبِه

بِنْت الأَصْل ما بْتِفْزَع مْنِ اللَّوْمْ

بْتِمْشي وْراسَا مرْتفِع لَـ فَوْقْ

وِالْكَوْن كِلُّو بْإيدْها لُعْبِه

ـ4ـ

وْيا "رَيْمُن" اللّي كِنْت إِضْحَكْلَكْ

وْبَعْدَك طِفْل تِكْرُج عَلى مَهْلَكْ

قِدَّيْش صِرْت بْقَامْتَكْ إِعْتَزّ

هَـ الْقَامِة الْـ شِبْعِتْ رِضَا أَهْلَكْ

أُمَّك وْبَيَّكْ رَضّعُوك الْعِزّ

وِاللِّي بْيِرْضَعْ عِزّ ما بْيِهْلَكْ

خَلِّيكْ شَامِخْ.. إِنْت إِبْن الأَرْزْ

وْفَتِّحْ دِينَيْك مْنِيح لَيْل نْهارْ

تا تْرِدّ كِلّ ما الأَرْز يِنْدَهْلَكْ

ـ5ـ

قُومُوا رْقِصُوا.. لا تْضَيّعُوا الأَوْقَاتْ

فَرْحِةْ حَبايِب قَلْبنا كْبِيرِه

صَرْلُن عُمر بِيعَتّقُوا نْبِيدَاتْ

حُبُّنْ.. يَا سَكْرِة عُمْرنا صِيرِي

يَلْلاَّ سَوَا تا نْطَفِّح الْكاسَاتْ

وْنِشْرَبْ نَخْب عِرْسانْنا.. وِنْرِدّ

عَنُّنْ عيُون الشَرّ وِالْغِيرِه

**

هيك وصى

عرس أنطوني بعيني وجوان سرحان في 24 نيسان 2004

ـ1ـ

لَوْلا حَنانُو.. هَـ الْعِرسْ ما صَارْ

هَيْك وَصَّى.. وْهَيْكْ بَدُّو يْصِيرْ

صَرْلُو شَهرْ غايِبْ حَبِيب الدَّارْ

الْـ خَلَّى الدَّمعْ يِتْفَجَّر قْناطِيرْ

جَمَّع الْعَيْلِه.. وَشْوَشُنْ أَسْرارْ

إِنْتُو مَحَلِّي سَاعِة التِّقْرِيرْ

بِنْتِي جَوانْ الْـ ضِحْكِتَا نُوَّارْ

ما بْرِيدْ عِرْسَا يْوَقّفُو التِّعْتِيرْ

قُولُوا لْلَبِيبِه تْكَمِّل الْمِشْوَارْ

الْعَيْلِه السَّعِيدِه بْتِرْفُض التِّغْيِيرْ

خَلُّوا الْعِرْس يِمْشِي عَلَى الأَزْهارْ

وْخَلُّوا الْمُوسيقَى تْرَقِّص عْصافِيرْ

وْخَلُّوا الْفَرَحْ يِطْفِي لَهِيب النَّارْ

زْلاغِيطْ بَدِّي فَوْق قَبْري تْطِيرْ

يِرْحَم تْرابُو.. نْهارْ خَلْف نْهارْ

بْراهِيمْ عاش كْبيرْ.. ماتْ كْبيرْ

ـ2ـ

مْن كْفِرْحَبُو.. مِنْ ضَيْعِة الأَبْطالْ

طَلُّوا الْحَبَايِبْ.. زَلِغْطِي عَنِّي

مَسْحُوا الدَّمْع.. لَفُّوا الْمَحَبِّه شَالْ

الْعِرْس عِرْسُنْ.. وِالشِّعْر مِنِّي

جَوَانْ أَغْلَى مْنِ الدّهَبْ وِالْمالْ

يا مِجِدْلَيَّا اسْتَقْبِلي الْكِنِّه

وْخَلِّي الْبَيَادِرْ تِكْتُب الْموَّالْ

وْجِنِّي، عَ كَيْفِكْ، بِالْفَرَحْ جِنِّي

هَيْدِي حَبِيبِةْ أَنْطُوني الرِّجَّالْ

الْـ خَلَّى الرُّجُولِه بْغُرْبِتُو تْغَنِّي

فَرْنُوكْ أُمُّو كَبّرِتْ الِعْيَالْ

مِتْل الدّهَبْ تا تِسْمَعِي الرَّنِه

وْجُوزَافْ بَيُّو الْـ فَوْق كِتْفُو حْمالْ

بِـ أَرْض غيلْفُورْد صَوّْرِك جَنِّه

يا جْبالْ عَلِّي رَقبْتِكْ.. يا جْبالْ

وْهَنِّي الْوَطَنْ بِحْبَايْبُو هَنِّي

ـ3ـ

فيكُنْ كْبِرْنا يَا بَنِي سِرْحانْ

وْفِيكُنْ كِبِرْ لُبْنان بِالْهُجْرَانْ

نِحْنَا تْوِحَّدْنا بْإِسْم الْحُبّ

لِمِّنْ تْوَحَّدْ أَنْطُونِي وْجَوانْ

تْنَيْنْ.. خَلُّو الْقَلْب يِغْمُرْ قَلْب

وِيْرَقِّصُو بِـ عَتْمِة الأَحْزَانْ

تْنَيْن.. مِشْيُوا بْدَرْب.. أَحْلَى دَرْبْ

بِتْشَرِّف الإِنْسَانْ وِالأَدْيانْ

وْكِرْمالْ عَيْنُنْ بَسّ.. أَرْز الرَّبّْ

رَغْم الْقَهْر.. غَنَّى بْجَبلْ لُبْنانْ

**

ألف بي وأم

عرس طوني وتراز البحري

ـ1ـ

نِحْنا مْنَعْرِفْ جَوّكُنْ مِنْسَمّْ

وْزِعْلانِين.. وْعايْشِين بْهَمّْ

وَقْت ما حْزِنْتُو.. حْزِنَّا كْتِيرْ

وْنَشّفِت فِينا عْرُوق الدَّمّ

لَكِنْ عِيشِتْنا عِيشْة حْزازِيرْ

وْكِلّ يَوْم عَمْ بِيمُوت خال وْعَمّْ

لازِمْ الأَعْراسْ دَوْم تْصِيرْ

وْلازِم الأَحْبابْ يِجْتِمْعُوا

مِنْشَان يِخْلَق أَلْف بَيّ وْأُمّْ

ـ2ـ

يا زَهِيِّه.. الْبِنْت مَرْباها حِلُو

وْبِنْتِكْ دَهَبْ هَـ الْكايْنِه بِتْقَابِلُو

بْهَنِّي صافِيتا.. بْأَرْضها مَعْ شَعبْها

بْحِلْوِه عَ دَعْسِتْها الزُّهُور تْمايَلُوا

وْرَغْم الْحُزن وِالْغُرْبِه وَتَعَبْها

وْرَغْم الْقَهْر وْمُرّ كاسُو وْحَنْظَلُو

وْرَغْم السّهَر وِالْوِحْدِه وْرُعبْها

قْدِرْتِي تْرَبِّي عْيالْ فِيها تْماتَلُوا

يا أُمّ طوني.. الْـ سَكّنِتْنا بْقَلبْها

الْـ بِيكُونْ مِتْلِكْ هَـ السَّما خِلْقِتْ إِلُو

ـ3ـ

يا تَراز.. الطَّيْر غَنَّالِكْ

وْرَنْدَح بعِرْسِك أَجْمَل الأَلْحانْ

عِيشِي بْقَناعَه وْرَيّحِي بالِكْ

لَوْلا الْقَناعَه ما شِبِعْ إِنْسَانْ

بِنْت الأَصْل إِنْتي.. هْنِيَّالِكْ

عِشْتِي بْمَحَبِّه وْتَضْحِيِّه وْإِيمانْ

بْكِلْمِةْ (نَعَمْ) غِيَّرْتِي بِعْيَالِكْ

صِرْنا نْنادِيكِي (مِسِزْ مايْكِلْ)

زَهْرَه سُورِيِّه انْزَرْعِت بْلُبْنانْ

**

قمر سهران

عرس الياس وفولمين بعيني

ـ1ـ

أَهْلا وْسَهلا بِالْجِيرانْ

يا وَرْد وْفُلّ وْياسْمِينْ

الْقَمَرْ، بِالْعالِي، سهْرانْ

وْإِنْتُو بْقَلْبِي سهْرانِينْ

وْهَـ السَّهْرَه مُشْ كِيفْ ما كانْ

في إِلْها مْعاني حِلْوِينْ

شَعِّتْ كِرْمال الْعِرْسانْ

الْـ حَبُّوا بَعْضُنْ مِنْ دُونْ غِش:

الْيَاس بْعَيْنِي وْفُولَمِينْ

ـ2ـ

يَا هْدِيِّةْ أَغْلَى مْحِبِّينْ

مشْتاقَه لأَهْلِكْ؟.. قُولِي

نِحْنا أَهْلِكْ.. نِحْنا مِينْ؟

أُوعَا تْكُونِي مَخْجُولِه

زَوْجِكْ هَـ الشَّبّ الرَّزِينْ

بْقَلْبُو إِنْتِي مَحْمُولِه

وْيِرْحَم تْرابُو سَاسِينْ

بَيِّكْ.. شَيْخ الرُّجُولِه

رْبِحْناكِي.. شُو مَبْسُوطينْ

ذِكَّرْتِينا بِالضَّيْعَه

وِبْأَيَّام الطُّفُولِه

ـ3ـ

بْضَيْعِتْنا زْرَعْنا مْحَبِّه

كِبْرِت الِمْحَبِّه يا ناسْ

حْمِلْناها.. مْحِينا الْغُرْبِه

وِالْغُرْبِه أَكْبَرْ وِسْواسْ

هَنِّي الْعِرْسانْ يا رَبِّي

تا فِيهُنْ يِتْعَلَّى الرَّاسْ

يْعِيشُوا بَرَّات الْكِذْبِه

وْما بْعِمْرُو يِتْمَرْمَرْ كاسْ

**

تينه رميليّه

عرس باخوس وجاكي بعيني، 11/1/1992

ـ1ـ

صَوْب (الرّمَيْلِه) رِحْت يا مَحْبُوبْ

وْنِقَّيْت زَهْرَه مْغَنّجِتْها طْيُوبْ

بِنْت هِند السِّتّ.. بِنْت الياسْ

الْـ سِهْرُوا عَ عَيْلِه.. كَرّمِتْها شْعُوبْ

شِفْتَكْ مَعَا عَمْ تِحْضَر الْقِدَّاسْ

قِلْتُو: نَعَمْ.. وِتْعَانْقِت الِقْلُوبْ

شَلْحِت الْعَدْرا مَشْلَحا عَ النَّاسْ

وْسِمْعِت صَلاَ قَلْبَيْن حَبُّوا بَعْضْ:

بَارْكِينا.. بْجاهْ هَـ الْمَصْلُوبْ

ـ2ـ

باخُوس بْعَيْنِي إِنتْ.. خَلِّي الْعَيْنْ

تْخَبّرَكْ عَنْ جِدَّكْ حْكايِه

لْعِنْدُو رْجِعْت ما دْعَسْت بِالسِّنْتَيْنْ

تا تْدُوقْ، عَ إِيدَيْه، تِرْبايِه

نَخّ حَتَّى يْشَمِشْمَكْ عَ الْمَيْلتَيْنْ

وْيِزْرَعَكْ بَوْساتْ تِنْقايِه

وِحْدِه عَ خَدَّكْ.. عَ الزّنُود تْنَيْنْ

سْآلْ سِتَّكْ.. كِلْمِتا رَايِه

بِتْخَبّرَكْ كِيف كانْ يِسْبَحْ بَيْنْ

طِفْلَيْن كانُوا لْبَعْضُن مْرايِه

بَوْسِه إِلَكْ.. بَوْسِه إِلُو.. صَحتَيْنْ

بَوْساتْ جِدَّكْ ما لِها نْهَايِه

جِدَّكْ بَطَلْ.. يا حَامِل الإِسْمَيْنْ

لِـمْ ماتْ.. عارِف فِيكْ بَدُّو يْعِيشْ

خَلِّي الإِسمْ عَ شْفافْنا آيِه

ـ3ـ

وْهَـ الْمَيْمِة اللِّي رَبّتَكْ بِدْمُوعْها

وْسِقْيِتَكْ مِنْ جِرحْها أَفْرَاحْ

بْتِضْحَكْ.. إِذا بِتْنامْ فَوْق ضْلُوعْها

بْتِزْعَلْ.. إِذا عَنْ صَدْرها بْتِنْزاحْ

لَوْلا وْجُود التَّوْم كانْ رْجُوعْها

مْنِ الْمَوْت غَبْرَه وْطَيّرِتها رْياحْ

وكانُوا، بعَتْم اللَّيْل، دَابُوا شمُوعْها

وْخَنْقِت سَعادِةْ عُمرْنا الأَتْراحْ

ما خَافِتْ يْطِفّوا عْلَيْها جْمُوعْها

وْبِكْرومْ عُمْرا يِدْبَل التُّفّاحْ

ما خَافِت الأَوْجاعْ تِغْزِي رْبُوعْها

وِبْكِلّ بُقْعَه يِبصُم الْجَرَّاحْ

حَبِّتْ تْعِيش وْيِحْفَظَا يِسُوعْها

كِرْمالْ تِفْرَح فِيكُن.. وْيِبْقى روبِيرْ

عايِشْ سَعِيد بْغُربتُو وْمِرْتاحْ

ـ4ـ

بَيَّكْ يا باخُوسْ بِالْقَلْب مَوْجُودْ

فْتاحْ مُطْلَقْ قَلْب بِتْلاقِيهْ

كِرْمالْ عَيْن النَّاس عَم بِيجُودْ

بْحُبّو، بمالًو، بْغَفْوِة لْيالِيهْ

كْبِيرْ جِيلي.. مْسَنْسَلْ مْنِ جْدُودْ

كِيفْما حِكي.كِيفْ ما مِشِي بِتْقُول:

خْصَايِل الْمَرْحُومْ كِلاّ فِيهْ

ـ5ـ

وْجاكي الْحَبيبِه حَضْنِتَا بْإِيمانْ

أُمَّا.. تا فَاحْ الْوَرْد وِالرِّيحانْ

كانِت تْقِلْلاَّ: غَمّسِي بِالنُّورْ

شَمْعِةْ صِباكي.. وْنَوّري الأَكْوانْ

بَيِّكْ عَطاكِي مِنْ رِياضُو زْهُورْ

وْقَلِّكْ: يا بِنْتِي شَكّلِي الأَزْمانْ

خَلِّي الطَّلِّه يِسْبِقَا الْبَخّورْ

وْخَلِّي الرَّجْعَه تْسَوْسِح الإِنْسانْ

وْكِلّ ما تْشُوفي "بَاخْسِكْ" مَقْهُورْ

بْضِحْكِة شْفَافِكْ غَسّلِي الأَحْزانْ

يا بِنْت عَيْلِه إِسْمها مَشْهُورْ

لَوْلا صُمُودا.. ما بِقِي لُبْنانْ

وِالأَرْز يَللِّي صَارْ عُمْرُو دْهُورْ

ما كانْ قِدْر يْقَاوِمْ الطُّوفانْ

لَوْ ما نَبَتْ عَ صَخْر مِنْ صُوَّانْ

ـ6ـ

جاكي بْعَيْنِي.. أُوفْ يا عَيْنِي

مْواسِم عْيادْ.. وْجاتْ عِيدِيِّه

بَيَّا وْإِمَّا عَ الْبِسِتْرَيْنِه

قَدّمُوها لْعَيْلتي هْدِيِّه

شَجْرِة فَرَحْ.. تا تْزَيِّن جْنَيْنِه

فِيها الْعِنَب والتُّوت والرّمانْ

وِبْيِنْقِصَا "تِينِه رْمَيْلِيِّه"

**

فروض الصّلا

عرس جوزاف فاخوري وبرناديت البحري، 1993

ـ1ـ

لِمِّنْ عَلَى بْعَبْدا قَمَرْها طَلّ

رَقْصِت حْجار الدَّارْ قِدَّاما

وْحَسّ قَلْبُو صَارْ بَدُّو يْغِلّ

بِـ قَلبْها.. وْيِغْفَى عَ أَنْغاما

شَافَا صَبِيِّه أَجْمَلْ مْنِ الْفُلّ

فْروض الصَّلا بِتْعَطِّرْ كْلاما

مِتلْ إِمَّا.. رَاكْعَه بِتْضَلّ

مِتْعَبّدِه.. ما بْتِكْسُر صْيامَا

(باني) الْعَروسْ الْواقْفِه عَ مْطلّ

بِتْشُوف مِنُّو كِلّ أَيَّاما

بِتْعَلِّق الصّلْبانْ فَوْق الْكِلّ

يا رَبّ حَقِّقْ كِلّ أَحْلامَا

ـ2ـ

عَمْشِي وْفاخُوري عَيلْتَيْن كْبارْ

فَلْشُوا جْناحُنْ عَ الدِّنِي كِلاَّ

بِمْرُوجْ حُبُّنْ رِبْيِت الأَزْهارْ

وْعَ صْخُور مَجْدُنْ.. مَجْدنا صَلاَّ

رَبُّوا جوزاف بْساعة الإعصارْ

بِبْلادْ.. بَعْدُو الْغِشّ مِحْتَلاَّ

وْوَقْت اللِّي غاب الْـ كانْ يِحْمي الدَّارْ

وْيِحْمي أُمُومِه الرَّبّ بِيجِلاَّ

عَبْدُو الْبَيّ الْمُخْلِص الْجَبَّارْ

الْـ بارَكْ عْيالُو قَبْل ما عَلاَّ

تْطَمَّنْ عَلى الْوَزْناتْ صَارُوا كْتارْ

بْوَزْناتْ عُمْرُو هَـ الدِّنِي تَلاَّ

تْنَهَّدْ جُوزاف وْقالْ: يَمِّي النَّارْ

وِصْلِتْ عَ قَلْبِي.. اشْتَقْت أُوصَلاَّ

رْبُوع الْحَبِيبِه، دَمعْتي قِنْطارْ

وْدَقَّاتْ قَلْبِي حُبّ عَ حِلاَّ

قُولي لْخالي بْيِحْرز الْمِشْوارْ

بِيشُوفْ سِتِّي، بْيِحْضَر الْفَرْحَه

سِتِّي رضَاها مِنْ رضَا أَللـه

ـ3ـ

يا بُولُس الْبَحْري وْيا أَيْلِينْ

كِرْمالْ عَيْن الْحُبّ مجْتِمْعِينْ

لُبْنانْ وَدَّى وَفْد مِن عُضْوَيْنْ

خالْ الْعَريس وْمَيْمتُو جاكلينْ

باني وجوزاف الْـ وَحّدُوا الْقَلبَيْنْ

بِـ طَلِّةْ الأَحْبابْ فِرْحانِينْ

قالُوا: نَعَمْ.. وِتْشابَكُوا الإِيدَيْنْ

وْغَطِّت زْهُور الزَّنْبَق بْساتينْ

وْطَلِّتْ حمامِه مْلَوّنِه بْلَوْنَيْنْ

وِمْلايْكِي عَ الرِّيح مَحْمُولينْ

مْلاكْ يِمْسَحْ دَمْعِة الْعِينَينْ

وِمْلاكْ عَلاَّ تْزِلْغُط مْحِبِّينْ

وقال الْملاك الْـ باسِطْ الْجِنْحَيْنْ:

هَـ الْعرْس مَنّو عِرسْ بِنْت وْشَبّ

هَـ الْعِرسْ عِرس تْنَينْ قِدِّيسينْ

**

شموخ رجال

عرس ميشال وأنطوانيت بعيني، 21/3/1981

ـ1ـ

شُو بْقُولْ دَخْل عْيُونْها شُو بْقُولْ؟

لِلِّي جَمالا بِالطُّهْر مَجْبُولْ

بْقِلّها: عْيُوني ما شَافِتْ عِرْس

مِتْل عِرْسِكْ يا سَما الْبَدْر الْخَجُولْ؟

بْقِلّها: أَهْلِكْ عَطُونِي دَرْسْ

مِتْلُو ما عَلَّمْ بَعْد بُولِسْنا الرَّسُولْ؟

إِنُّو الِعْراس تْكُونْ هَيْك وْبَسّ

أَحْبابْ مجْتِمْعِينْ عَ الْمَيْلَيْنْ

وْدِقِّي لْحَبَايِب قَلْبنا يا طْبُولْ

ـ2ـ

شُو هَالفهْم، شُو هَالذّكا، شُو هَالْجَمالْ؟

يا أَنطْوانيت الْكِلّ حَسْدُوكِي

رْبِيتِي بْعِزّ وْتَضْحِيِّه وْمَجْد وْدَلالْ

وْطايْعَه الأَهْل اللِّي رَبُّوكِي

يا بِنت عَمّي.. الْمالْ إِنْتي الْمالْ

وْإِنْتي جَواهِرْ تاجْ الِمْلُوكي

عِيشَي بْقَناعَه وِبْفَضَاوِةْ بالْ

مِتلْ عِيشِةْ اُمِّك وْبُوكي

وْما تْفَكّرِي إِلاَّ بْهَنا ميشَالْ

زَوْجِكْ حَبِيبِكْ.. يا بِنتْ عَمِّي

الْـ فَاتِح جْناحُو تا يْدَفّيكي

ـ3ـ

ميشالْ زَوْجِكْ بِالْعَطفْ مِلْيَانْ

ميشالْ.. هَـ الْـ كِلُّو وَفا وْإيمانْ

ميشالْ.. مِتْلُو ما انْوَجَدْ إِنْسانْ

لا بِالْكَرَمْ، لا بِالرُّجُولِه وِالْحَنانْ

خُبْز الرَّضَى مِنْ مَيْمِتُو شِبْعانْ

هَـ الْـ رَبّتُو.. مِنْ يَوْم شَاف النُّورْ

يْحِبّ الْبَشَرْ.. يِفْدِي الْوَطَنْ لُبْنانْ

ـ4ـ

لَوْلا شِي مَرَّه النَّاسْ سَألِتْ شِي سُؤالْ

عَنْ أُمّ عاشِتْ بِالنَّقَاوَه وِالْكَمالْ

آياتْ عَمْ تِكْرُج عَلَى تِمَّا

مِتْلا ما كَتْبِتْ أَنْبِيَا الأَجْيالْ

أَيْتامْ رَبِّتْ.. كانِتْ تْضِمَّا

بْعَطْف الأُمُومِه وِبْشُموخ رْجالْ

وَرْدِةْ رَبيعَا ما حَدَا شَمَّا

رَغْم الْمَصَايِب والتَّشَرّد وِالنّبالْ

مُشْ كُفْر لَوْ قِلْنا بْتِتْسَمَّى

عَدْرَا.. اللِّي حِمْلِت فَوْق قِدْرِتْها حْمالْ

أْمُور الدِّنِي ما كانِت تْهِمَّا

كِلّ الْـ بِيهِمَّا.. عَمّتي رَاحِيلْ

تْمُوتْ هِيِّي.. بَسّ تِبْقَى هَـ الِعْيالْ

**

قمر نيسان

عرس إيلي شعنين ولويز بعيني

ـ1ـ

يَا رَيْت كِنْت بْعِرسْكُنْ حاضِرْ

عِرْس الْمَحَبِّه اللِّي نَبَتْ بَغْتِه

بـخَبِّرْ الْماضِي وبعلم الْحاضِرْ

قِدَّيْش صَرْلي بْهَـ الْعُمْر ناطِرْ

إِفْرَح لْخَيِّي وْزَلْغِط لأُخْتِي

ـ2ـ

يا الياسْ.. يا الْـ كِلَّكْ وَفا وْإِحْساسْ

مَحْسُود مِنْ نُورَك قَمَرْ نِيسانْ

بِـ دَعْسِتَكْ.. لَوْلا التّراب انْداسْ

بتنبت زهور الفل وين ما كان

عَ وَراَقْهُنْ مَكْتُوب إِسْم الْيَاسْ

شَعْنِينْ.. هَـ الرَّافِعْ إِسم لُبْنانْ

ـ3ـ

وْيا لَوِيز الْـ كِلِّكْ مْحَبِّه

الْبُلبُل رَقَص بِـ عِرْسِك وْغَنَّى

يا عقل خالِق.. يا فِكرْ بَنَّى

مْحَبِّةْ عَرِيسِكْ بِالٌقلْب خَبِّي

بـْحيثْ أَغْلى مِنِّك وْمِنّو

وِحْياةْ أَللَّـه.. بَعْد ما عِنَّا

**

أهل عيمار

عرس مارون بو ملحم وكلوديت البحري

ـ1ـ

مَهْما بْجَمالا انْكَتْبِت حْكاياتْ

وْقالُوا: نَشِيطَه وْعاقْلِه وْحُرَّه وْفَهِيمِه

تاجْ الأَسَامِي إِسمْها: كْلُودِيتْ

وْفَخْر الأُمُومِه إِسمْ مَيْمِتها كَرِيمِه

ـ2ـ

مِنْ بَيْت حَدّ الأَرْز بِـ لُبْنانْ

أْساسُو مَحَبِّه وْتَضْحِيِّه حْجارُو

وْمِن أُمّ كِلاَّ عاطْفِه وْإِيمانْ

وْمِنْ بَيّ غَطَّى الْكَوْن بِبْدارُو

فِي شَبّ أَخْلاقُو رَفِيعَه كْتِيرْ

ما خانْ مَرَّه.. وْصَعْب إِنُّو يْخُونْ

مِنْ بَيْت بُو مِلْحِم.. وْإِسْمُو كْبِيرْ

عَ إِسمْ قِدِّس الْوَطَنْ: مارونْ

ـ3ـ

مارون وكْلُوديتْ حَبُّوا بَعْضْ

وْجِينا نْشَارِكْ فَرْحِة الإِكْليلْ

الْحَسُّونْ هَنَّا مَعْ زْهُورْ الأَرْض

وْغَنَّى وْرَنْدَح أَجْمَل مْواويلْ

ـ4ـ

كْبارْ نِحْنا يا جَماعَه كْبارْ

أَكْبَر مِن الشَّمْس.. وْمِن الأَقْمارْ

لا تِسْأَلُوني: كِيفْ صِرْنا هَيْك؟

نِحْنا كْبِرْنا بِـ أَهْل عِيمارْ

**

الفرح زنّار

عرس حنا بعيني ورندى عبد الأحد، عيد الغطاس 1991

ـ1ـ

زَهْر الْوَردْ فِرْحان وِعْطُور الْحَبَقْ

مَعْ كلّ طَلِّةْ فَجرْ عَمْ تِعْمِلْ سَبَقْ

وِاللَّيلْ يِقْطُفْ مِنِ كْرُومُو نجمْتَيْنْ

لِخْدُودْها الْـ أَللَّـه عَ شكْلُنْ ما خَلَقْ

بِنْت (الْمَلَكْ).. خَبِّي الدَّمعْ يا عَيْنْ

وْلِفّي الْفَرَحْ زنَّارْ عَ خَصر الشَّفَقْ

صَارِت (بْعَيْني) مْصَوّرَه عَ الْمَيلْتَيْنْ

شَافْ (حَنّا) صُورِتَا بْتِضْوِي.. شَهَقْ

وْقَلْلاَّ: يا أُمِّي زَلغْطِي زَلْغُوطْتَيْنْ

وْقُولي لْبَيِّي: الْيَوْم فَرْحِةْ هَـ الصَّبِي

سْحاب الْفَردْ يا (باخُوس) وْقَوّسْ طَلَقْ

ـ2ـ

وْ(باخُوسْ) بَطَلْ رَوَّى بْدَمُّو تْرَابْنَا

وْقِصِّةْ حَيَاتُو مْدَوّنِه بِكْتابْنا

بْمِجدْلَيَّا كانْ.. يا أَهْلي احْلِفُوا

مِينْ قَدُّو زادْ لَحْم رْقابْنا؟

جارْ (عَدْرَا) مِنْ زَمان بْتَعرفُو

رَمْز الْبُطُولِه وْمَدْرَسِه لِشْبابْنا

تْزَوَّجْ عَ إِسْما (سَيّدِه) تا يْخَلّفُوا

هَـ الْعَيْلِةْ الْـ صَارِتْ فَخر غِيَّابْنا

لَوْ كانْ بَعْدُو حَيّ.. كِنْ بْكَلّفُو

يِنْدَهْ عَ بَيِّي: قُومْ (بُو أَنْطُونْ)

نْرَحِّبْ سَوَا بِوْجُود أَغْلى حْبابْنا

ـ3ـ

(حَنّا) تْزَوَّجْ بِنْت مِنْ هاك الْعَرينْ

مِنْ زَحْلِة الأَمْجادْ.. ماضِيها انْعَرَفْ

مَحْفُورْ إِسْما فَوْق صَخْرِةْ (مارْدِينْ)

مَطْرَحْ ما أَللَّـه صنْعِة الْفَنّ احْتَرَفْ

لَوْحاتْها آياتْ بِيمَجِّدَا التّلْوينْ

وْبيغارْ نُور الشَّمْس لَوْ شَكِّتْ خَزَفْ

(رَنْدى).. وْإِذَا رَحْ تِسْأَلُوني مِينْ؟

هايْ بِنْت أَعْظمْ بَيّْ سَمُّوه الْمَلَكْ

هايْ بِنْت أَجْمل أُمّ.. بِتْنَقِّطْ شَرَفْ

ـ4ـ

تْزَوَّجْ بعيد غْطاسْ.. قُومُوا نْغَطّسُو

مَعْ (رَنْدِتُو) بْشِي نَهْر أَللَّـه مْقَدّسُو

تا كلّ ما تْبَلَّلْ جْبِينُنْ بِالْعطْرْ

تْنِخّ السّعادِه عَ الْجبين تْبَوِّسُو

وِتْزَيِّن دْرُوبُنْ بِباقَاتْ الزّهرْ

بِوْلادْ.. بِمْدارِس جْدُودُنْ يِدْرسُوا

هَوْدي حْبايِبْ قَلبْنا.. رْفاق الْعُمرْ

بِنْيُوا اللَّيْلِه بَيْت حجْرانُو قْلُوبْ

وما بْيِنْهدمْ بُنْيانْ أَللَّـه مْأَسَّسُو

**

ضحكت الخمسين

بمناسبة مرور خمسين سنة على زواج بطرس وكريمة البحري، حزيران 1997

ـ1ـ

بِطْرُسْ.. كَرِيمِه.. وْضِحْكِت الْخَمْسِينْ

وْصار الدَّهَبْ يِتْغَنْدَر وْفِرْحانْ

(وِيلْسُنْ أَفِينْيُو) كَتَّر التّلْوِينْ

كِرْمال عَيْن الْـ صَيّرُو بُسْتانْ

وْ(رِيجِنْس بَارْك) الْـ قَدّمُولا سْنينْ

أَحْلَى عُمرْ.. شُو رَشِّت الْمرْجانْ

وْبِجْنَيْنِتُنْ شُو رَقْصِت حْساسِينْ

وْشُو غَنِّتْ بْيُوبِيلْهُنْ أَلْحانْ

يا مِجدْلَيَّا كَتّرِي التّزْيِينْ

كْفِرصْغابْ جايِي إِبِنْها عَ حْصانْ

عَ جَزمتُو بْيِلْمَع (الْمِسْتِرْ شِينْ)

وِبْطَلّتُو.. بِيرَجِّف الْفُرْسانْ

ناطُور كانْ.. بْتِسْأَلي بْسَاتينْ

عَنْ رزْق مِحْمِي عانَق الأَغْصَانْ

جايِي تا يِخْطُفْ زَهْرِة الْحِلْوينْ

بِنت الْبعَيْني.. جَهّزي الْفستانْ

قَلبُو تَلجْ أَبْيَض شِغِل صنِّينْ

وْكَفّ السَّخَا كَفُّو.. إِبِن لُبْنانْ

وْلَوْ تِسْأَلي عَنّو الْمُغْتِرْبينْ

وْعَن عَيلْتُو بْنَيَّات مَعْ صِبْيانْ

غَير الرّضَا ما بْتِسْمَعي.. تِخْمينْ

صارِت كَريمِه ساكْنه الِعْيُونْ

وْبِقْلُوبْنا سَاكِنْ أَبُو سْلَيْمانْ

ـ2ـ

شَرْبُولْ.. كِنْت تْصِيح بِالْعالي

وْإِضْحَكْ أَنَا.. وْإِفْرَحْ بِكِلْماتَكْ

غنْجَكْ إِلِي.. بِيلَوِّن لْيالي

مشْتاقْ إِسْمَعْ بَسّ حَكْياتَكْ

دْعُوس الْمَرضْ.. تا تْزَلْغِط عْيالِي

أَقْوَى دَوَا.. بِتْكُون ضِحْكاتَكْ

يا (خالْتِي)..بِتْعِنّ عَ بالي

طَلاّتَكْ وْكِتْرِة زْياراتَكْ

بْضَحِّي بْرُوحي.. بْكل شِي غالي

تا تْضَلّ شَجْرَه مْخَيّمِه بِالدَّارْ

وْكلّ الْحَبايِبْ تَحْت فَيَّاتَكْ

**

شمعة مضوّاية

عرس جايكوب البحري وكارول ساسين، 1997

ـ1ـ

بْسَيّدِةْ لُبْنانْ.. كِنَّا وْكانْ

طَيرْ الْفَرَحْ بِـ طَلّتِكْ جَايِي

طفْلِه زْغِيرِه، رَسْمِكْ الدّيَّانْ

وْزَوَّدْ حَلاكي، وْصَيّرِكْ آيِه

كِنتْ شُوفِكْ زَهْرِة الْبُسْتانْ

بِالصَّفّ يِلْمَعْ وِجِّك مْرايِه

وْيِتْشَيطنُوا بْنَيَّاتْ مَعْ صِبْيانْ

يْزِتُّوا الْقَلَمْ.. يِخْفُوا الْمِحَّايِه

يِطْلَع جْنُونِي.. صِيرْ عَ الْحِيطَانْ

وَقِّفُنْ بِالصَّفّ تِنْقَايِه

وَحْدِكْ يا كارُولْ.. يا بِنتْ لُبْنانْ

يا حَدْشِيتِيِّه الْـ طُهْرِك حْكايِه

كلِّكْ عَقلْ.. بِتْسَوْسِحي الأَكْوانْ

وْفِهْمِكْ إِجَا مْن الرَّبّ تُوصايِه

يا كْبيرةْ الْبَيْت التَّقِي الْمنْصَانْ

يا بِنتْ أُمِّكْ.. يا مْرِبَّايِه

يا قَلبْ بَيِّكْ.. يا شَمسْ نيسانْ

أُسْتاذِك بْهَـ الْعِرْس شُو فرْحانْ

تِلْمِيذْتُو شَمْعَه مْضوَّايِه

ـ2ـ

جايْكُوب حَبيبِكْ رَبّتُو أُمُّو

بِدْمُوعْها.. وْمن زِغِرْتُو مَنْدُورْ

هَيْدا زْغِير الْكِلّ بِتْضِمُّو

عَ صَدرْها.. وِبْتِحْرُق الْبَخُّورْ

مْهَنْدِس كْبِيرْ كْتِيرْ.. بِيهِمُّو

الْكَونْ يِكْبَرْ، وِالسَّمَا ناطُورْ

مِتِل بَيُّو، التَّضْحِيِّه بْدَمُّو

بَحْرِي.. وْبِبَحْرُو رَقَّص الْبابُورْ

يا حَدْشِيتِيِّه.. خَفّفِي هَمُّو

بِنتْ الأَوادِمْ حُبّها مَشْهُورْ

لُبْنان هَمُّو.. الْحَربْ بِتْسِمُّو

بَدُّو الْوَطَنْ شِعْلِةْ حَضَارَه وْنُورْ

بَدُّو بْشَعْبُو الْكِلّ يِهْتَمُّو

بْيِبْكي إِذَا بْيَعْرِف حَدَا مَقْهُورْ

وْكل ما فْكارُو شْوَيّ يِلْتَمُّوا

بْيِقْعد بِرَمْل الْبَحرْ يِبْني سُورْ

خَلْفُو فِي ضَيْعَه.. عطرْها شَمُّوا

خَلْفُو فِي أَرْزِه عَ جَبَلْ عالي

تِرْكَع وْتِغْفَى تَحتْ مِنَّا دْهُورْ

**

بنت الخي

عرس فهيم لولش وماري ـ آن بعيني، آب 1996

ـ1ـ

غَمّضِي عْيُونِكْ يا بِنْت الْخَيّ

وْمَشِّي مَعِي عَ مْطارِح عْشِقْتِي

خْلِقْتي بْضَيْعَه.. شَمسْها وِالْفَيّ

فِرْحُوا بْإِسْمِكْ وَقْت ما خْلِقْتِي

وْلِمِّن شْرِبْتِي بْمِجدْلَيَّا مَيّ

كلّ الْقَداسِه مْن الدّني سْرَقْتي

سَرْكيسْ جدِّكْ يِغمرِكْ وِالْـ "خَيّ"

تِمْرُق عَ جِسْمِك مِتلْ ما مْرَقْتي

يْبُوسْ خَدِّكْ، رَقبْتِكْ، يا خْطَيّ

غْفِيتي عَ زنْدُو وْبَعدْ ما فِقْتي

يِرْحَم تْرابُو.. كان جدّ وْبَيّ

يِبْكِي إِذَا بِسْريرِك شْهَقْتي

وْيِصرُخْ بِصَوْت يْهِزّ كلّ الْحَيّ:

يا بَتْرونَلَّهْ.. بْأَيْشْ نِعْجَقْتِي؟

لَوْ كانْ أَللَّـه مَدّ عُمْرُو شْوَيّ

كانْ قَلِّكْ وِالدّمعْ بِالْعَيْنْ:

غِلِّي بْغُيوني.. دَمعْتي حْرَقْتي

ـ2ـ

فرنُوكْ أُمِّكْ متلْ أُمَّا، دَوْمْ

رَاكْعَه.. وِشْفافْها يْصَلُّوا

أُمّ الْعَرُوس.. الْيَوْمْ أَحْلَى يَوْمْ

بِـ عُمرْها.. يا دْمُوعْها طِلُّوا

يا بِنتْ خَيِّي.. رَبّتِكْ عَ الصَّوْمْ

وِالإِسْتِقامِه.. عَ الشَّرَفْ كِلُّو

مِتلْ أَهْلا.. ما بْتِرْضَى اللَّوْمْ

بِتْحِبّ كل شِي يْكُون بِمْحَلُّو

وْبَيِّكْ.. إِذَا شِي يَومْ سَرْقُو النَّوْمْ

حَدّ مِنُّو بْتِركْضُوا تْغِلُّوا

حِمْلِكْ عَ غُرْبِه.. وْدَمعْ عَيْنُو عَوْمْ

كَدّ وْتِعِبْ تا جْوانْحِكْ عَلُّوا

جُوزافْ خَيِّي بَيّ خَلَّى الْقَوْمْ

يِشْهَدُولُو.. يْقَدّسُوا عْيالُو

وْكيفْ ما مْشِيتُوا عْلَيْكُنْ يْدِلُّوا

ـ3ـ

حَدْشِيتْ ضَيْعَه زَوْزَقَا الدَّيَّانْ

نسْر الْفَلا بِجْرُودْها صَلَّى

جَنِّةْ طَبِيعَه.. عَ شَفَقْ وِدْيانْ

وَدَّى الزَّهرْ جَيْشُو تا يِحْتَلاَّ

رَايْحَه عْلَيْها يا مارِي ـ آنْ

بُوسِي حْجارَا.. بْتِعْشَقِكْ كِلاَّ

فَهِيمْ لَوْلَشْ إِبِنْها الإِنْسانْ

أُوعا بْقَلْبُو تاخْدي مْحَلاَّ

سَليمْ بَيُّو زَيَّن الْهجْرانْ

وْتَرازْ اُمُّو حُبّ عَ حِلاَّ

عاشُوا بْتَواضُعْ.. سَوْسَحُوا الأَكْوانْ

رَبُّوا عْيالُنْ تا السَّما تْجِلاَّ

عَ مَدْبَحُنْ عَمْ يِرْكَع الإيمانْ

وِبْضِحْكتُنْ بيضَلّ يِتْحَلَّى

وْلَوْ تِسْأَلي عَنْ عَيْلتُنْ لُبْنانْ

إِسْما مَع الأَرْزاتْ مِتْعَلَّى

يا لَوْلَشِيِّه.. هَـ الإِسمْ رنَّانْ

خَلِّي حْرُوفُو مْقَدّسِه عَ طُولْ

بْحَرْفَيْن مِنُّو بْيِبْتِدي.. أَللَّـه

**

وتر القلب

ألقيت في عرس جو البحري وشرلوت عسّاف

ـ1ـ

أهْلا وْسَهْلا.. صَعْب إِنِّي قُولْ

لأَغْلَى وْأَجْمَل ناسْ مَوْجُودِينْ

بْدارْكُنْ إِنْتُو.. وْمُشْ مَعْقُولْ

نْرَحِّبْ بِأَهْل الدَّارْ يا حِلْوِينْ

ـ2ـ

لَمَّا عَلَى هَـ الدَّارْ طِلَّيْتُو

بِشْعاعْ نُور الْعَتْم ضوَّيْتُو

وْمِجدْلَيَّا رَقْصِت وْغَنِّتْ

وِهْمُوم أَهْل قْناتْ نِسِّيْتُو

وْمَهْما موسِيقِةْ هَـ الْعِرِسْ جَنِّتْ

إِنْتُو بْوَتَرْ هَـ الْقَلْبْ دِقَّيْتُو

رْبُوع الْوَطَنْ لِرْجُوعْكُنْ حَنِّتْ

رْبُوع الأَرْز وِبْعَلبَك وْصنِّينْ

الْـ كِرْمالْهُنْ بِالدَّمّ ضِحَّيْتُو

ـ3ـ

صَحِيحْ إِنُّو الْيَوْم مَعْزومينْ

عَ عِرْس شَبّ وبِنْت.. يا عْيُوني

وْمِن كِلّ أَرْض وْأَرْض مِجْتِمْعِينْ

مِنْ شَعْب سِيدْنِي وْشَعْب مالْبُونِي

تِخْمِينْ ما عْرِفْتُو بَعد تِخْمِينْ

إِنّو بَني بَحْري وْبَنِي عِسَّافْ

عَلّقُوكُنْ عَ الصَّدْر قُونِه؟

ـ4ـ

شِعْرِي بْيِتْغَنَّى بْأَحْلى وَرْدْ

تْحَوَّشْ تا يِتْعَلَّقْ عَ شِبَّاكَا

شَرْلُوتْ.. يَللِّي مْتَوّجِه بِالْمَجْدْ

وْسَمكْ الشَّرَفْ مَلْقُوطْ بِشْباكَا

مْن قْناتْ هِيِّي.. وْما نْسِينا بَعْدْ

هَـ الضَّيْعِةْ اللِّي الْكَوْن حَيَّاها

مِنْ بَعْد ما تْكَلَّلْ بِأَشْوَاكَا

ـ5ـ

يا يُوسِف الْبَحْري.. يا أَحْلى شَبّ

يَللِّي بْصِفاتَكْ ما انْوَجَدْ إِنْسَانْ

مْهَذَّب وْمَهْضُوم وِبْتِنْحَبّ

بْحَيْثَك كَريمْ وْشَاطِر وْفِنَّانْ

قِدَّيْش إِمَّكْ رَاكْعَه لِلربّ

وْقِدَّيْش بَيَّكْ شَاغِل وْتِعْبانْ

تا تِكْبَر وْتِشْمَخْ بِهَـ الْغُرْبِه

مِتل ما بْيِشْمَخْ أَرزْ لُبْنانْ

ـ6ـ

وْمِنْشَانْ أَللّـه يْوَفِّق الْعِرْسانْ

بِرْكَع بْصَلِّي لْخالِق الأَكْوانْ

وِبْقُول: يا رَبّ السَّما والأَرْضْ

يَللِّي عَ شكْلَك رَاسِم الإِنْسانْ

نَقِّي دْرُوبُنْ مِن حْجار الْبُغْضْ

وْخَلِّي حَياتُنْ طافْحَه بْإِيمانْ

وِافْرُض عْلَيْهُنْ يا إِلَهِي فَرْضْ

مِتْل ما تْرَبُّوا عَ إِيدْ الأَهْل

يْرَبُّوا الْبَناتْ.. يْعَلّمُوا الصِّبْيانْ

**

سركيس إسمك

عرس سركيس بعيني وسامنتا سيلفر، عام 2003

ـ1ـ

بْحِبَّكْ.. بْحِبَّكْ يَا إِبنْ خَيِّي

سَرْكيسْ إِسْمَكْ عَ إِسم بَيِّي

لِمِّنْ سَامِنْتَا خْطَبْت.. غِنَّيْنا

حِلْوِه.. مِتلْ زَهْرَه تْشِيلِيِّه

ـ2ـ

يا وَحِيد الْبَيْت حِبَّيْنا

نْغَنِّي بْعِرْسَكْ أَلْف غِنِّيِّه

بَيَّكْ، حَبِيب الْقَلْب، هِنَّيْنا

مْعَيَّدْ.. مْشَبْرَأْ هَـ الشّبُوبِيِّه

ـ3ـ

بْفَرْحِةْ وَحِيدُو الْيَوْم ضُوَّيْنا

شْمُوع الْفَرَحْ تا تْلِيقْ عِيدِيِّه

وْتَرازْ أُمَّكْ رَشِّت عْلَيْنا

بْعرْس الْمَحَبِّه وْرُود جُورِيِّه

ـ4ـ

فِي خَطّ سِحْرِي بَيْنَكْ وْبَيْنَا

تَا صِرْت مِتْلا تْفِيضْ حِنِّيِّه

مِتْل إِسْمَكْ بَعْد ما لْقَيْنا

سَرْكِيس طَنْسِي.. عَرِّم شْوَيِّه

ـ5ـ

سِتَّكْ وَقْت ما ماتِتْ.. قْرَيْنا

بْخَطّ إِيدَا أَجْمَلْ وْصِيِّه

بْكِينَا.. تا نَشَّفْ دَمْع عِينَيْنا

قَدّمِتْلَكْ خَاتَما هْدِيِّه

ـ6ـ

صَوْب السَّما مِنْمِدّ إِيدَيْنا

وْحَدّ مِنَّا انْفَتْحِتْ شْبِيِّه

صَوْت الرَّضَا بَعْدُو بْدِينَيْنا

وْإِنْت مِرْضِي أَلْف بِالْمِيِّه

ـ7ـ

مِتْل ما نِقَّيْت.. نِقَّيْنا

صَارِتْ سَامِنْتا مَرْتِكْ وْصِرْنا

نِنْدَه: يا أَهْلا بِالِبْعَيْنِيِّه

**

أطهر شمس

عرس دايفيد وسالي بعيني

ـ1ـ

طالِعْ عَ بالي زَلْغِط لْحالِي

وْغَنِّي عَتابَا.. وْصِيحْ مُوّالي

وْكِلّ الدّني تِتْسَمَّع النَّغْماتْ

وْتِسْكَر مَعِي وْتِتْرَقْوَص قْبالي

وِلْبِنتْ عَمّي زَوْزِق الْكِلْماتْ

وْقِلْلاّ قَصِيدِه مْعَتّقَه بْبالي

رَبِّت وْلادَا.. وْزادِت الْهِمَّاتْ

وْكِرْمالْ عَيْنُنْ سِهْرِت لْيالِي

يا (أُم طُوني) تِسْلَم الإمّاتْ

الْـ مِتْلِكْ.. يا أَطْهَر شَمْس بِتْلالي

طالِع عَ بالِي إِضْرُب سْلاماتْ

لأَحْبابْ رَفْعُوا الرَّاس بِالْعالي

وْشَقْلِبْ حَيَاتِي.. وْحَقِّق مْناماتْ

فَتْحِتْ عِينَيِّي، وْسَكْنِت خْيالِي

الْفَرْحَه كْبِيرِه خَلِّت الدَّمَّاتْ

تِمْشِي بِجِسْم الْوالِد الْغالِي

الْياس الْقَمَرْ.. جايِي بَعد ما ماتْ

يْهَنِّي الْحَبَايِب بِالْعرسْ وِيْقُولْ:

رِجْعِتْ حَياتِي بِـ عِرسْ (سالِي)

ـ2ـ

يا مِجدليَّا رَبّعِي جْراسِكْ

مِنْ خَير أَللَّـه فَايْضِه عْراسِكْ

بِالْمُغْترَبْ كان الْبِكِي قْناطِيرْ

آهاتْنا تِلْعَبْ بِـ إِحْساسِكْ

وِالْيَومْ صِرْنا نِرْسُم تْصَاوِيرْ

عَ شْفاف بَدْر تْحَمَّس وْباسِكْ

(دايفيد بعيني) صَعبْ مِتْلُو يْصِيرْ

بْهَـ الْمِجدلاوِي بْتِرْفَعِي راسِكْ

إِبنْ عَيْلِه مْقَدّرينَا كْتِيرْ

أمُّو وْبَيُّو بْيِشْرَبُوا كاسِكْ

وْلَوْ ما جْدُودُو يِرْحَلُوا بَكِّيرْ

(بولُس وْجِرْجِي) رَجّعُوا الْوَزْناتْ

وْضَوُّوا الشّمُوع بْقَلْب قِدَّاسِكْ

ـ3ـ

(سالي) صَبِيِّه ضِحْكتَا رَطْلَيْنْ

الْيَوْم عِرْسَا.. يا شِعرْ لَبِّي

رْسِمْلا قَمَرْ سِهْرانْ عَ الْخَدَّيْنْ

احْبِسْلا الشّمسْ خاتِـمْ بِشي عِلْبِه

وْخَلِّي السَّعادِه تْكَحِّل الْعِينَيْنْ

وْتِمْحِي شَقا الأَيّام بِالْغُرْبِه

هِيِّي وْدايفِيدْ شَخْص مُشْ شَخْصَيْنْ

الْحُبّ وَحَّدْ بَيْن هَـ الْقَلبَيْنْ

بارِكْ حَياتُنْ دَوْم يا رَبِّي

**

شمس وقمر

عرس فينس البحري وريما عبيد في 15/10/2005

ـ1ـ

مُحْتارْ بِـ عُرْس الْحَلا.. شو بْقولْ

زْلاغيطْ عَمْ بِسْمَعْ عَ دَقّ طْبُولْ

شَمْس الْمَحَبّه.. وَقْعِت بْحُبّ الْقَمرْ

وِتْجَوّزوا، وْرَحْ يِلْتِقوا عَ طُولْ

ريما.. انْسَحْرِتْ بِالْقَمَر.. لِمِّنْ ظَهَرْ

فاتِتْ عَ قَلْبُو.. شافْتُو مَخْجولْ

وْفِينْس.. يا ما طَلّة الشّمْس انْتَظَرْ

سهْرانْ وَحْدو.. وِالْفكرْ مَشْغولْ

بَدّو الشّمسْ تِشْرُق.. تا يِقْوى عَ الضَّجَر

وْشَمْسو الْحَبيبه بْتِشْرُق بْشَحْتُولْ

ـ2ـ

شَحْتُول ضَيْعَه بـ جَبَلْ لُبْنانْ

بَيِّكْ يا ريما حَبّْها دْيانِه

بْنَخْوِةْ شَبابا اعْتَزِّتْ الأوْطانْ

شَعْبا عَظيم كْتيرْ إنْساني

تُوفيق إبْن عبَيْد وَين ما كانْ

مِنْ طَلّتو مَعْروف لُبْناني

وْأمِّك سَميره تْرَبّت بْبُسْتانْ

حَقْل الْعَزيمه فَخرْ أَوْطاني

النّسْوانْ.. فيها بْيِحلفوا النِّسْوان

كاسَا انْشَرَبْ.. تا فِضْيِت قْناني

كُوني يا ريما مِتِلْها مِنْشانْ

نْقُول الْمَتَل.. وِنْرَدِّدو تاني

الْبِنْت مِتْل الأم.. سِرّا بَانْ

وِقْلُوبْنا بْهالبِنْت فِرْحانه

ـ3ـ

وْيا فِينْس.. يا زِينِةْ شَباب الأَرْز

إسْمَك عَ إسْم الْـ قَدّس الْوادي

ساعَد الْفُقْرا.. عَيّشُنْ بِالْعِزّ

الْقِدّيس فِينْسن.. زَيّن عْيادي

بْعُرْسَك إذا رَشّت أَمَال الرِّز

دَقّات قَلْبا رَشّت زْيادِه

نْجُوم السَّما وِكْواكِبَا بْتِعْتَزّ

بْأمَّك يا فِينْس الْـ حَبّت الْفادي

وْشَرْبِل الْبَحْري الْـ مِتل خَيّي بْعِزّ

شِعْلِةْ مَحَبِّه.. رايِق وْهادي

عِنْدُو الْعَيْلِه كَنْز.. أَغْلى كَنْز

هِيّي السَّعادِه الْـ كلّها سْعادِه

وْلَوْلا شِي مَرّه شَعْر رَاسُو انْهَزّ

بْيِصْرُخ: يا ألله بارِك وْلادي

بارِك الأَرْض الْـ جُرحَها بِينِزّ

وْكلّ يَوْم فِيها بْيِقِتْلوا إِنْسان

كَمْشِة لُصوص تْقاسَمُو بْلادي

ـ4ـ

لُبْنان، يا عُرسان، أَرْض الطُّهر

اللّي بْيِنْسَمى مِنّو.. هْنِيّالو

حِبّوهْ.. تا يِبْقى عَ طول الدَّهْر

صامِدْ بِأَرْضو.. بْوِحْدِة عْيالُو

ياما وْياما تْكَسَّرِت عَ الصَّخْر

جْماجِمْ الإعْدَى.. الْـ شَوْشَرُوا بَالُو

مَهْما انْشَوَى بْنيرانْ أَبْشَعْ غَدْر

باقِي، بْإِذن أَلله، اسْتِقْلالو

**

أجمل شال

عرس داميان البحري وميشال فرح، 1/11/2003

ـ1ـ

مِتْل الْكِذبْ.. صَرْلُو سِنِه غَايِبْ

مْنِ الصَّعْب نِنْسَى طَلِّة الشَّايِبْ

بْأَعْرَاسْنا يا ما رَقَصْ بِالكاسْ

وْهَزّ خَصْرُو وْفَبْرَكْ عْجايِبْ

وَيْنَكْ يَا بُولُسْ تِحْبُس الأَنْفاسْ

وِتْكَحِّل الْعِينَيْن بِمْواهِبْ

وْكلّ ما تْحِطّ الْكاسْ فَوْق الرَّاسْ

دَبْكِة الْقسِّيس بِتْجاوِبْ

دَامْيِنْ حَبِيبَكْ حَبّ بِنْت الْياس

بِنْت الْفَرَحْ.. لا تْكَتِّر مْطالِبْ

رَقِّص السَّاحَه.. فَرِّح الأَعْراسْ

أَيْلينْ قَلْبَا مْن الْحزنْ دايِبْ

سْأَلْها تَا تِرْقُص مِتل كلّ النّاسْ

دَامْيِنْ إِبِنْ إِبْنَكْ صَبِي حِسّاسْ

وْوَاجِب تْزَيِّنْ فَرحتُو وَاجِبْ

ـ2ـ

دَامْيِنْ إبِنْ شَرْبِل.. إِبِنْ آمالْ

إِبِنْ عَيْلِه.. بْتِفْتِخر فيها عْيَالْ

أَوّل صَبِي بْيِتْكَلَّل بْتِشْرِينْ

عَ قْبال "بُولِي" الْمُخْلِص الرجّالْ

ولادْكُنْ زَهْرات بِبْسَاتِينْ

ما في شِعر عَنْ مَيْمِتُنْ يِنْقالْ

تْرَبُّوا عَ إِيدَا شْمُوع خَلُّوا الدّينْ

يِتْنَفَّذ بْهَـ الْكَوْن بِالأَعْمالْ

سْمِيِّي إِنِتْ.. يا فَخر مُغْتِرْبِينْ

يا شَرْبِل اللِّي مْلَطَّف الأَحْوالْ

عَيْلِة الْبَحْرِي.. بَيْت قِدِّيسين

بِنْيُوا حْجارُو بُولُس وْأَيْلينْ

وْتَرْكُوا الْمَحَبِّه بْعَيْلِتُنْ رِسْمالْ

ـ3ـ

وْعَيْلِة فَرَحْ.. قَارِي الْفَرَحْ كِتْبَا

تاريخْها أَمْجاد ما بْتِنْطالْ..

وْدَامْيِنْ لأَنُّو مْهَذَّبْ مْرَبَّى

وِالْحَظّ لَفّلُّو عَ عُنْقُو شَالْ

شَافْ زَهْرَه مْفَتَّحَه حَبَّا

قَلْلاَّ: شُو إِسْمِكْ؟.. جَاوْبِتْ: مِيشَالْ

مِنْ وَيْن إِنْتِي؟.. مِنْ أَرض كِسْبَا

ضَيْعَه عَظِيمِه حَارْسِتْها جبالْ

كلّ الْكَرَمْ مَوْجُودْ بِـ شَعْبَا

وْغَنّى الْوَطَنْ لِعْيُونْها مَوَّالْ

نجْمة الْكُورَه.. التَّضْحِيِه دَرْبَا

رْفَعُوا الْبُطُولِه بْسَاحِتَا تِمْثَالْ

الطُّهْر كلُّو بْزَهْرِتَا تْخَبَّى

مِتِل أُمَّا ما بْتِشْغِل بَالْ

مِتِل بَيَّا الْـ ضحْكتُو كَبَّا

بِقْلُوبْنا تَا تْزَهِّر الآمالْ

الْيَاس قُدْوِه.. وْسَامْيَا قَلْبَا

قَلْب الأُمُومِه الْحاضْنِه الأَطْفالْ

وْإِلاّ بْوُجُودُنْ ما بْيِفْضَى بالْ

ـ4ـ

يا دَامْيِنْ وْمِيشالْ.. يا عِرْسَانْ

انْشَاللّه سَوَا بِتْزَيّنُوا الْهِجْرانْ

وْأَحْلامْكُنْ تِضْوِي مِتل شِي شَمْس

وْتِهْدُوا الدِّنِي بْنَيَّات مَعْ صبْيانْ

سِيدْنِي إِذَا عَمْ تِرْقُص بْهَـ الْعِرْس

بْحَيْث الأَرزْ بِشْمالْنا غَنَّى

وْدارِت الدَّبْكِه بِـ جَبَلْ لُبْنانْ

**

شربل ورينا

عرس شربل حبقوق ورينا الياس، 3 تموز 2004

ـ1ـ

بْعِرْسِكْ يا رِينا فَتَّح النّسْرِينْ

وْحَيَّكْ الطَّرْحَه مِنْ تلجْ صِنِّينْ

وْطَوَّلْ الْبُونا وَعْظة الْقِدَّاسْ

تا يُوصْفِك يا زَهْرِة الْحِلْوِينْ

وْأُمِّكْ جَمِيلِه الْـ كلّها إِحْساسْ

زَرْعِت بِقَلْبِكْ حُبّ مُغْتِرْبِينْ

زَرْعِتْ بِقَلْبِك إِحْتِرام النَّاسْ

وْقَالِتْ: يا بِنْتي زَيّنِي بْسَاتِينْ

كُوني الأَرْزِه اللّي بْتِرْفَعْ رَاسْ

وْما يَوْم قِدْرُوا يْغَبّرُولا جْبِينْ

وْبَيِّك الْياسْ الْـ جِدّ جدُّو الْياسْ

مِينْ مِتْلُو بْأَرْض سِيدْني مِينْ؟

لُبْنانْ عِنْدُو.. مُشْ حكمْ يُوضاسْ

وْلا حزْبْ فاتِحْ كَمْشِة دْكاكِينْ

لُبْنانْ عِنْدُو.. لِلْوَفَا نِبْراسْ

رُوحي اسْأَلِي عَنُّو زْغَرْتَغْرينْ

ـ2ـ

وْيا شَربِل سْمِيّي.. إِبنْ حَبْقُوقْ

حْرُوف إِسْمَكْ فَجّرِتْ إِيمانْ

قِدّيس مِنْ عِنَّا.. عَطانَا حْقُوقْ

بِتْشَرِّفْ الإنْسانْ وِالْبُلْدانْ

قَلْب أُمّكْ بِالْعِرسْ مَعْجُوقْ

أوّل صَبِي.. يا فَرْحة الْهُجْرانْ

بْدَمْع الأُمُومِه.. صَوتْها مَخْنُوقْ

تْطَلّعْ بوِجَّا.. مْدَمَّع وْفِرْحانْ

أُمَّكْ مَرِي.. ما بْيِكْرَها مَخْلُوق

سِهْرِتْ عَ عَيْلِه.. بارَكا الديَّانْ

وْبَيّكْ.. بْقِلّو: روقْ.. ما بيروقْ

بِتْفَكّرُو سُكْران.. وْمُش سُكْرانْ

مْن مْحَبّتُو.. يا ما تَرَكْنِي دُوقْ

بْيِعْبُد بَعد أَللّه إِسْم لُبْنانْ

وْبانْ.. هَـ الضَّيْعَه اللِّي نُورَا بانْ

ـ3ـ

لْشَربِل وْرِينَا.. ضِحْكِت الأَزْهارْ

الْعِرْس عِرْسُنْ.. بارِكُنْ يا حُبّْ

وْزَيِّنْ حَيَاتُنْ بِعْصَافِير زْغارْ

مِتْل الأهْلْ يِمْشُوا بْأَحْلَى دَرْب

شَرْبِلْ وْرِينا تْكَلَّلُوا بِالْغارْ

وْبِالْحُبّ جَمْعُوا عَيلْتَيْن كْبارْ

بِيشَرّفُوا بِالْهَجرْ.. أَرْز الرَّبْ

**

قمر فرحان

عرس دجو البحري ومها طنوس 30/5/2009

ـ1ـ

دْجُو الْبَحْري.. شَبّ طَيِّب مَشْرَبُو

تْزَوَّجْ صَبِيّه.. بالطَّهارَة بْتِقْرَبُو

إِسْما مَهَى.. وْقَلْب الْمَهى جَنِّة نَعيمْ

كِرْمالْ هَالْعُرْسان.. بِالطَّبْل ضْربُوا

الْياسْ بَيّا.. كانْ بِالْغُرْبِه حَكيمْ

خَلاّ وْلادُو مْنِ التَّواضُع يِشْرَبُوا

فْيُوليت أمَّا.. زَرْعِت الْعَقْل السَّليمْ

بِعْيالْها.. مِينْ قال إنّو تْغَرُّبوا

رَبّتْ مَهى عَ العِزّ.. عَ الْكَفّ الْكريمْ

وْعَ التَّضْحِيّه وِالْخَير.. أطْفالا رِبُوا

جَنّ الشِّعرْ بِـ بَيْت طَنُّوس الْعَظيمْ

وْتا تَعْرْفوا هَالْبَيْت.. زُوروا كْفِرْحَبو

ـ2ـ

وْأَمالْ.. أمّ دْجُو.. لِمِّنْ رَفْعِتُو

عَ كْفُوفْها.. شافِتْ قَمَرْ فرْحانْ

صَرْخِتْ: يا إبْني.. وْباسْتُو بصَنْعِتُو

وْمِنْ يَومْها صار الْفَرَح.. إنْسانْ

دْجُو إِبْنا.. اليَوْم ضَوَّى شَمِعْتُو

وِالزَّهْر عَمْ يِنْزَتّ عَ الْعِرْسانْ

تَمْتَمِتْ.. والبَرق خَط بلَمِعْتُو

عَ قْبال إِبْني (بُّولْ).. يا دَيَّانْ

وْشَرْبِل الْبَحْري.. الْـ زانْ إِبْنُو بْدَمِعْتُو

وْما أَتْقَلْ الدَّمْعات بِالْهُجْران

كلّ هَمّو تْضَل بَيْضا سِمِعْتو

وْرافع بِهالغُرْبِه.. إِسِمْ لُبْنانْ

ـ3ـ

يا مَها.. يا دْجُو.. يا أحْبابْ

انْشَالله بْتِتْهنوا العُمر كلّو

وكِيف ما مْشيتوا تِنْفِتِح الِبْواب

وْشَهْر الْعَسَل.. بِفيّتو تْضَلّوا

وِالْخَيْر يِنْزِلْ فَوقْكُنْ مِزْرابْ

وِبْكَمْشِة عْصافيرْ تِتْسَلّوا

وْمِنْشانْ تا ما يِبْرُم الدُّولابْ

لازم تْضَوّوا شموع وتْصَلّوا

**

قلبي الفرحان

عرس جميل زعيتر وبات بعيني عام 1994

ـ1ـ

قَللِّي خَيِّي شْكار النَّاسْ

عَنِّي.. وْقَوِّيلُن الِعْيارْ

قِلُّنْ حَتَّى يْعَبُّوا الْكاسْ

تا نِشْرَب نَخْب الأحْرارْ

ـ2ـ

جَمِيل الصّهْر الْحسَّاسْ

وْأَهْلُو.. هَـ الأَهْل الأَخْيارْ

عِنْدِي وْحَيِّدْ ما بْيِنْقاسْ

هِدْيُوني إِبْنُنْ تِذْكارْ

ـ3ـ

شْكِرْلي عَمِّي أَبُو الْياسْ

كْبِير وْعَمْ بِيرَبِّي كْبارْ

أَهلْ مالبُورْن.. سَقْفُن باسْ

الْمَجْد.. وْقَدَّمْلُنْ أَزْهارْ

ـ4ـ

يا ضَيْعِتْنا.. لَوْلا ناصْ

قِنْدِيلي، زَيْتِك قِنْطارْ

بان وْإِنْتي صِرْتُو قْياسْ

بْقَلْبِي.. يا قَلْبِي الْفرْحانْ

شْكارْ.. وْبَعد الشُّكْر شْكارْ

**

شربل سميي

عرس شربل مرسال بعيني ورامونة غنوم

ـ1ـ

هَوْنيكْ.. مَعْ أَحْلَى جِيران رْبيتْ

بْمجْدلَيَّا ضَيْعتِي.. وْما نْسيتْ

أَهْلِكْ.. وَقتْ ما زَيّنُوا السَّاحاتْ

يا رَامونَه.. مِتِلْهُنْ ما لْقِيتْ

جُونْ بَيِّكْ كَتَّرْ الطَّلْباتْ

وْقدَّامْ طَلْباتُو شْمُوعِي ضْوِيتْ

وْأمِّك شْمُونِه.. تِسْلَمْ الأمّاتْ

مِتِل صِيتَا ما بْيِخْلَقْ صِيتْ

شْمُونِه بْعِرْسِكْ نَادْرَه نْدُوراتْ

مِنْ أَوَّلا لَـ آخِرا.. زْلاغيطْ

غَنُّومْ عَيْلِه بْتِرْفَعْ الرَّاياتْ

مَدْيُون إِلْها وْ بَعدْني ما وْفِيتْ

يا بِنْت ضَيْعَه.. رْجالْها حْكاياتْ

مجْد وْبُطولِه.. من حْرُوفا غْنِيتْ

كرْمال عَيْنُنْ تَلّتُوا الْعَرْقاتْ

وْمِن كاسْ حُبُّنْ.. كاسْ عُمْرِي مْلِيتْ

جِيرانْ وادِي مْقَدَّسْ وْأَرْزاتْ

بِالْقلْب إِنْتُو.. يا أَهلْ حَدْشِيتْ

ـ2ـ

يا عريس الْكلّ ما أحْلاكْ

بْشِرْبِل بْعَيْنِي فَرحْتِي مِيِّه

لَوْلاكْ شُو نَفْعِي أَنا لأَوْلاكْ

لَوْ متّ.. باقِي انتْ يا سْمِيِّي

مَرْسالْ بَيَّكْ ساعِة الْـ سَمّاكْ

عَ إِسمْ عَمَّكْ.. صحْت: يا خَيِّي

رْفَعْت رَاسِي.. وْصَعبْ تا إِنْسَاكْ

عِدّ الدَّقايِقْ.. فَضْلَكْ عْلَيِّي

يا أَبُو شَرْبِلْ يِرْحَم الْـ رَبَّاكْ

صفَّيْت بَيِّي.. آخْ عَ بَيِّي

وْأمَّكْ يا شُوشُو.. صِيتْها عَلاَّكْ

كُون مِتْلا.. وْفِيضْ حِنِّيِّه

أُمّ شَرْبِلْ.. هَمّها مَرْباكْ

تا صِرْت فَوْق التِّمّ غِنِّيِّه

تِفْتَحْ إِيدَيْها.. وْتِفْرَحْ بْمَلْقاكْ

وْتِسْتَقبلَكْ بِـ ضِحْكتا وتْقُولْ:

أَللـهْ يِرْضَى عْلَيكْ يا بْنَيِّي

ـ3ـ

مِن كلّ قَلْبِي بْقُول للعرْسانْ:

أَلله يْهَنِّيكُنْ بِـ هَالْغُرْبِه

وِيْبَحْبِحْ بَنَيَّاتْ مَعْ صِبْيانْ

يِمْشُوا سَوا عَ دْرُوب الِمْحَبِّه

بْمارْ شَرْبِلْ كَتّرُوا الإيمانْ

وِلْمارْ مانُوسْ رَتّلُوا طَلْبِه

وْعَلّمُوهُنْ يعبْدوا لُبْنانْ

وْأَرْزاتْ خَضْرا مْفَرّخَه بْقَلْبِي

**

جورج وآن

يوم وصلني الى لبنان خبر زواج أخي جورج من ابنة خالتنا آن البحري في مدينة سيدني 1969

ـ1ـ

جورج خَيِّي حَبّ.. صار الْحُبّ

يكْتُب إِسِمْ مَحْبُوبْتُو بالزَّهْرْ

آن بَحْرِي إِسِمْها.. يا رَبّْ

خَلِّي حَيَاتُنْ شَمْس طُول الْعُمْر

جُورج خَيِّي شَبّ.. أَحْلَى شَبّْ

وآن.. وَرْدِه فَايْحَه بِالْعطْرْ

صَفَّى عَ ضِحْكِتْها يْدِقّْ الْقَلْبْ

وْصَارِتْ حَيَاتُو كلّها بِالْهَجْرْ

ـ2ـ

يا رَبّ بَارِكْهُنْ بِسيدْنِي كْتِيرْ

وزينلن الطرقات بزهور وحرير

آن الأميره وجورج محبوبا أمير

فارس بطل ما بتشبهو الفرسان

حميهن سوا ع طول يا ديّان

كِرْمالْ عَيْنُنْ بَسّ هَالعِرْسَانْ

كْفِرْصغَاب رَقْصِتْ بِـ جَبَل لُبْنانْ

وْمِجِدْلَيَّا زَلْغَطِتْ قِصْدانْ

وْودّت هديه.. قَلِبْهَا الِكْبِيرْ

**

مرسال ولور

يوم وصلني من لبنان خبر زواج اخي الأصغر مرسال بعيني من ابنة رشدبين الحبيبة لور ديب 1976

ـ1ـ

زْغِير البيت مغروم بصبيّه

إسما "لور".. خلقتها رضيه

رشدبين ربّتها ع ديها

تا فاح العطر من ورده جوريه

ـ2ـ

وخيي كتير كان خايف عليها

فتحلا القلب متل المزهريّه

وقطفها من كرم ضوميط بَيْها

وقللو: لور رح بتصير ليي

ـ3ـ

ونقّى خواتم تزيّن إيديها

حبّن كان من ألله هديه

حلف مرسال ما يزعّل عينيها

وحطّ الايد ع جلدة شبيّه

ـ4ـ

وأنا من هون رح وشوش دينيها:

بمرت الخي فرحتنا كبيره

رغم العيش بـ أبعد جزيره

سكنتي القلب.. يا "أختي" الوفيّه

**

جوزاف وفيرونيكا

يوم وصلني من لبنان خبر زواج أخي جوزاف بعيني من ابنة سيدني فيرونيكا البحري 3/9/1972

ـ1ـ

جوزاف خيي عم يتزوج

مار يوسف فرحان كتير

بضيعتنا في دير مسيّج

بقلبو الفرحه عم بتصير

ـ2ـ

فرونيكا البحري يا ناس

بتشهدلا سيدني كلاّ

لمّن وقفت بالقداس

باركها بإيدو ألله

سركيس بيي علاّ الراس

وقللاّ لإمي بعرس الحب

زلغطي يا بترونلّه

ـ3ـ

جوزاف خيي رفيق الدرب

من يوم اللي كنّا زغار

تا يتهنّا.. سألت الربّ

والفرحه بقلبي قنطار

تمنيت حدّو أوقف شب

ونترافق هوّي وختيار

عريس كتير بينحب

يا ضيعتنا دقّي طبول

ويا سيدني رشّي الازهار

**

أنطوان وتريز

يوم وصلني الى لبنان خبر زواج أخي الاكبر أنطوان بعيني في مدينة ملبورن الأسترالية على جارتنا تريز أنيسة 1967

ـ1ـ

أنا بلبنان.. يا ملبورن قوليلو

صعبه الخي ننسالو جميلو

إبن سركيس يا فرحة شبابو

بعتم الهجر عم تضوي قناديلو

ـ2ـ

كبير البيت.. رح توقف ع بابو

شمس الكون، تا تشع مقابيلو

تريز بجيرتو رفعت عتابو

وبضحكة سنها بتطفي غليلو

ـ3ـ

حبّا كتير.. تا الايام شابوا

وهديها قلب ما بيخلق مثيلو

أخي أنطون عم يكتب كتابو

ع بنت الجار.. يا شعري حكيلو:

أحلى تنين من يوم اللي غابوا

دمع الأرز ما بيوقف عويلو

**

ميشال وتراز

يوم وصلني من من لبنان خبر زواج أخي ميشال من ابنة عمتي تراز اليموني في جزيرة قبرص 1976

ـ1ـ

يا قبرص ليش دمعاتي سخيّه

وليش القلب دقّاتو قويه

بأرضك.. زيّني الساحات عنّي

يا جاره.. وبوّسي ميشال خيي

ـ2ـ

كمان بحلفك "تروز" هنّي

ومن الازهار نقيلن هديه

وخلي الطير بـ عرسن يغنّي

بيّا جورج والعمه الهنيه

ـ3ـ

فرحانين.. يا أفراح جنّي

بفرحة بنت محبوبه ورضيه

وبيي قال للكنه : تمني

مرت الخال بتغطّي عليي

ـ4ـ

يا بترونله ع الشمس حنّي

من ارض برسا بتنسمى هيي

ويا بنت "مالبورن" مش رح بتني

إنتي وميشو بقلبنا سويه

ـ5ـ

وهالكم كلمه بتسمعي مني:

مش رح تكوني بنت أختي بس

بنتي أنا.. ومبروك يا كنّه

**

ابن مرسال

عرس جو بعيني وتريز الدريبي

ـ1ـ

الحب لمّا بيجمع القلبين

منقول: زهّر ورد بجنينه

واليوم عم نفرح بأحلى تنين

بنت الدريبي وإبن البعيني

ـ2ـ

يا دجو البعيني.. إبن مرسال

خيّي الزغير الـ بعبدو عباده

الشعره الـ بِراسو لو زمانو طال

بضحّي بحَياتي.. وأكتر زياده

متل النبي أيوب حمل حمال

من التضحيّه.. تا يفرّح الفادي

وهّالْـ لور إمّك.. لفّتك بِـ شال

كلّو صلا وطلبات وعباده

هاي أم شربل حاضنه العيال

خود منها الحب زوّاده

عيلة قداسه.. بتنحنيلا جبال

بدرس المحبّه بتنعطى شهاده

وإنت بيرق عز ما بينطال

بنصّ منّو.. أرزة بلادي

ـ3ـ

وهالعروس الزيّنت حدشيت

تلميذتي.. وبعرف خَصايلها

كانت تقلّي متل إمي ربيتْ

وشربت من نعمة فَضايلها

أنطوانيت الْـ متلها ما لقِيتْ

شهدت دني روعة عمايلها

وطوني الدريبي من حنانو جيتْ

ع هالدني البالحبّ جمّلها

بنتين عندو.. وحافظ التوقيت

أيّا بنت بدّو يدلّلها

مع إخوتي عَ فرد درب مشيتْ

عيلتي زغيره.. ما أجملها

لكن في غصّه بقلبها.. ما نسيت

لمّن إجا المطران كللها

سألت حالي.. ومن سؤالي بكيت:

وين خيّا بيار.. يحملها؟

ـ4ـ

بالحلم شفتو من السما جايي

متل الملاك.. بأجمل حكايه

سمعتو بيقللي: بوّس العرسان

وكتّر، إذا بتريد، تهنايه

تريز، متل الشمس، بالفستان

من ضحكتا بتغار المرايه

رفاق كنّا بعتمة الهجران

تقللي: يا خيي محبّتك آيه

لمّن غبت ما خفت ع أنطون

خفت إمي بقلبها المحزون

ترفض تكفّي عمرها بْلايي

ـ5ـ

يا تريز.. الشعر بيقللي

مار مانوس كتّر الغلّه

قديس حدشيتي بسمانا كبير

بعصر الكفر والموت والقلّه

متلك أنا رح شبّعو تبخير

وهالمسأله يلاقيلها حلّه

بعد الزواج بيحصل التغيير

تا الرب يحميلك جوزاف كتير

لمار يوسف لازم تصلّي

**

مالني

عرس مالَني ابنة أخي ميشال 6/10/2012

ـ1ـ

فرحان قلبي كتير يا بيي

ويا بترونلّه زلغطي شويّه

لأعلى سما رح وصّل الأخبار

اليوم عم تفرح بنت خيي

ـ2ـ

من بيتنا طلعت شمس نوّار

محيت عتم غلغل بِعينيّي

ضوّت البيت وشعّت الأنوارْ

ومتل العرس كانت الليليِّه

ـ3ـ

ميشال بيّا ضحكتو قنطار

كبيرة بناتو.. فرحتا بميّه

غفيت ع صدرو ليل يطوي نهار

ويسمّعا تا تنام غنيّه

ـ4ـ

وإمّا تراز الـ لفّتا بزنار

كلّو رضا وزخّات حنيّه

بدموعها سقيت تْلّتّ أزهار

وردات شو وردات جوريّه

ـ5ـ

تايرا.. بريسلاّ.. ومالَني.. محتار

كيف النجوم تجمّعوا سْوِيّه

يا مالَني.. يا بنت ناس كبار

يا تاركه أحلى مزهريّه

ـ6ـ

دجيمي عرف أيّا بنت يختار

تا يعيش عمرو بِـ صفا نيّه

ابن الأوادم.. لو زمانو دار

رح تحرسو عزّه إلهيّه

ـ7ـ

حبّيه طول العمر.. خلّي الدار

تتزيّن بضحكه سماويّه

كرمالكن عم بكتب الأشعار

وكرمالكن سيدني ومالبون هون

تا يفرحوا بزهره.. بعينيّه

**

بريسيلا

عرس لوك نيلون وابنة اخي بريسيلا

ـ1ـ

مجدليا وسيدني اليوم

حبّوا بعضُن بزياده

يا سيدني رح حبّك دوم

متل ما بحبّ بلادي

ـ2ـ

يا بْريسيلا.. ما أحلاكي

ألله بجمال وعقل ضوّاكي

إمّك تريز الـ زرعت الإيمان

بقلبك، تا صار القلب يهواكي

وأختين متلن ما عطى الديّان

كبرتوا سوا وفرحوا بملقاكي

وميشال خيي بفرحتك سكران

بعمرو ما داق الخمر لولاكي

قللي تا إشكر أهل بالهجران

وكل شخص بـ هالعرس هنّاكي

قللي تا إشكر زوجك الانسان

المن بين زهر الأرض نقاكي

قللي تا إشكر عيلتو.. وفزعان

إنسى حدا.. بالورد حيّاكي

هاي كلمتو.. عم قولها وفرحان

هنيال هالبيت اللي ربّاكي

ـ3ـ

ويا "لوك".. إنت لعيلتي هديّه

هديّه تمينه.. ما لها تاني

يا ريت "سُوزِن" جابتك ميّه

بينبض بصدرك قلب إنساني

وهالآدمي اللي بتندهو: بيي

"بروس" بيّك صانْ الأمانه

لمن تعلّقت ببنت خيي

صرت منّا.. وعندك حْصانه

صرت شبّ من البعينيّه

يللي بياكل كبّة النيّه

بينقال عنّو صار لبناني

ـ4ـ

من كل قلبي بقول للعرسان

عيشوا بمحبّه تفرّح الديّان

وبفرد قلب تجمّعوا القلبين

تا بإيد وحده تركّعوا الأزمان

كرمالكن انتو يا أحلى تنين

عم يدبك بسيدني أرز لبنان

**

آن ماري

عرس لوك سانيوتس وآن ماري بعيني

ملبورن ـ 28/12/2012

ـ1ـ

يا آن ماري.. يا لوك.. يا إخوان

يا حباب قلبي.. أهل هالعرسان

إنتو شعب للتضحيه مندورْ

بتشرّفوا البلدان وين ما كان

شمعة أثينا ضوّت المعمور

بالفلسفه.. بالعلم.. بالإيمان

وبيروت بنيت للمحبّه سور

ومجدليا حبّت اليونان

لوك سانيوتِس قمر مسحور

تا يفك سحرو بأرض هالهجران

تكلل ع أرزه من جبل لبنان

ـ2ـ

وانت يا للّوس.. يا ابن العم

ودّعت أوّل بنت لا تهتم

راحت مع اللي حبّها عباده

تا يعيّشا ع طول من دون همّ

وفولمينا الربّتا زياده

وكانت إخت لبناتها.. مش أم

زهراتها بتشرّف بلادي

زرعتلهن بعروقهن إخلاص

تا يلوّن الإخلاص أطهر دمّ

**

ماتيو ودولا

عرس ماتيو ودولاّ عمشي في 8/10/2011

ـ1ـ

بهالعرس، عرس الحب، زَهِّر يا سْكوتْ

وخلّي الحِمى ببلادنا تلاقي حِمى

لَمّا السّعاده ع القلب بِتْفُوتْ

بْتِتْوَحّد البُلدان بِـ سابع سَما

بْهالعرس.. عم بيزّيّنوا بَيْروت

وْتِرْقُص نْواعيرْ بِمْدِينِةْ حَما

ـ2ـ

بيوم الفرح.. ما في شمس بتغيب

الأنوار لازم تغمر الهجرانْ

وبي العروس الطيّب الـ إسمو حسيب

نوّر طريق بنيّتو بعطف وإيمان

ودولاّ بتعرف كيف تختار الحبيب

ماتيو عجبها.. وعاجب العيله كمان

دولاّ متل إمّا قلب بيفوح طيبْ

شبعت رضا من ميمتا وحب وحنان

وما دام ألله للأمومه بيستجيب

ترضي.. ترضي يا زهيّه كتير

يا أم بارك عَيْلِتا الديّان

ـ3ـ

ماتيو ركع بغرفتو وصلّى

وقلّلو: يا بيي بحبّها والله

وعبدو حنون كتير نزلت دمعتو

وقلّلو يا إبني يوفقك ألله

سمعت تراز وكبّشت بِـ كلمتو

وصار الدمع ع الخد يتدلّى

وماتيو بيحب كتير يرضي ميمتو

وتراز.. بتحبّا الدني كلاّ

قطفت البسمه وشلحتا ع بسمتو

وقالت: يا إبني مطرحك بالقلب

هنيّال قلبي فيك مع دولاّ

ـ4ـ

ماتيو ودولاّ.. وحّْدوا بلدان

بالحٌب.. حتّى يْفَرّحوا الديّان

جيران كانوا.. تصاهروا الجيران

ومحيوا حدود بتفصل الانسان

يا رب بارك فرحة العرسان

وقدّملُن بْنَيّات مع صبيان

تِفْتخِر فيهُن بلاد الشّام

وِيْفَرّحوا الأرزه بجبل لبنان

**

زهره هنديه

عرس أنطوني وأَليسْيا البحري، العروس هندية

ـ1ـ

ألله خلقنا وقال: يا ولادي

حِبّوا بعض.. تا يفرح الفادي

إنتو ولادي.. وين ما كنتو

البلدان كلاّ.. بْعِدّها بلادي

المهم تبقوا متل ما إنتو

للحب للإخلاص زُوّاده

بلبنان إنتو.. أرزتي صنتو

وبالهند.. صوت الحق بينادي

لبنان حبّ الهند دقّوا العود

وخلّوا الطبل بِـ كم دبكه يْجود

ويصدح بِصوتو البلبل الشادي

ـ 2ـ

وْأَليسْيا.. الزّهره الهنديّه

اللي مفتّحه ع شطوط منسيّه

بقلبا طهر بيفوح بالايمان

وبعيونها.. الشمعات مضويّه

هاي بنت (كان).. الطيّب الانسان

هاي بنت (ميلي).. نبع حنيِّه

أنطوني.. بـ حُبّها فرحان

صّمّم بِقلبُو تصير بَحريّه

صمّم بقلبو تصير من لبنان

تا تفرح الجنّه السماويّه

ـ3ـ

دايفيد البحري.. يا هْنِيّالو

متل السحر عم تكبر عيالو

قلّو: يا إبني.. ضل ماشي بْنور

الانسان عم بيفزّعو خْيالو

الايمان وحدو بيمحش الديجور

المؤمن صعب تا ينتعِب بالو

وإمّو عَ كَفّا حامله البخّور

وبتبّخرو.. تا يُوسَع مْجالو

كلوديت أم.. بْتِنْهَدالا زْهور

ربّت عريس.. الحب رِسْمالو

بيعبُد الأرزه الحاميِه جْبالو

ـ4ـ

أنطوني وأليسْيا قلبين

حبّوا بعض.. والحب كان كبير

كرمال عَينُن.. بِكيت العينين

والمباخر تَعَّبا التبخير

هودي يا ألله تنين.. أغلى تنين

منشان حتى تِفرِّح الشعبين

رزقهن يا أللـه.. كم طفل زغير

**

انهز الجبل

عرس أنطوني أبي خطار ومرين البحري

2/7/2011

ـ1ـ

مجدليا.. اليوم شعشع نورها

رغم الحزن.. رغم الوجع ومصيبتو

بدل الدّمع.. رشِّت قَناني عطورها

ودير مار الياس علّق زينتو

وكنيسة العدرا.. عبق بخّورها

ومار يوسف قَصّ ورد جنينتو

ولِعْيون هالعرسان حِمْل زهورها

تا يشلحُن بالعرس.. هنّي وبركتو

وهاك البيادر.. بالحلم عم زورها

عَزْمِت جبل لبنان هوّي وشيبتو

تا يِرْقُص الدبكه ع لحن طيورها

كْرامة أبي خطّار والبحري سوا

انهز الجبل.. منشان تحلى رقصتو

ـ2ـ

مَرْيِنْ وحيدة بيت حجرانو قلوب

إمّا أمال بطهر ربّتها

رسمتلها بين الضلوع دروب

تا ترقص ضلوعا ع مشيتها

بِـ عَيْلِتا تشاوف هجر وشعوب

وفرّحت ألله بأمومتها

وشربل البحري الوالد المحبوب

بنتو الوحيده اليوم فرحتها

قلبو حنون كتير.. رح بيدوب

وصّى الوحيده ترافق المصلوب

وبعد ألله تحب أرزتها

ـ3ـ

كلمه زغيره بحب إحكيها

يا أنطوني.. وتفهم معانيها

إدوار بيّك إبن عيله كبير

وإبن ضيعه الربّ حاميها

كون متلو.. ووزّع تباشير

الكلمه الحنونه.. قلوب تقريها

وإمّك عزيزه.. اللي بْعِزّا كتير

بـ فرحتك جايي تا هنيها

متلا ما صار ولا بعد بيصير

لْشُهْدا الضيعه كْتَبِتْ غنيّات

وكانت بصوتا تصيح: آويها

ـ4ـ

يا أنطوني ومَرْيِن فرحكُن صار

حكاية محبّه ردّدا الهجران

إنتو ولاد كبار.. ضلّوا كبار

كاسكُن.. تا تشربوا الأزمان

متل الأهل ربّوا عيال زغار

ع الحب.. ع التقوى وع الإيمان

تا يرفعوا إسم الوطن لبنان

**

الياس ونيكول

عرس الياس ونيكول بعيني

ـ1ـ

يا الياس جايي خبّرك شو كان

بيّك في حلوه كتير جنّنتو

شرّف ع سيدني ووجّ إمّك بان

ما عرفت وجّو كيف لوِّنْتو

ـ2ـ

ومحسوبك بيفهم حكي الخلاّن

عرسُن بإسم الربّ عنونتو

بيّك حبيب القلب.. شو إنسان

بغربه غريبه صانّي وصنتو

ـ3ـ

وإمّك بـ رسما جمّلت ألوان

ولولا جمالا ما تكوّنتو

بعيني إنت.. بالقلب إنتَ كْمان

صيتك بمعجنة السما عجنتو

ـ4ـ

جرّبت مجدك زين بالميزان

بإلماز وبأغلى دهب زنتو

بسمّيك إبن العزّ والإيمان

غمرت المحبّه والوفا حضنتو

ـ5ـ

جدّك بطل شرّف إسم لبنان

وجدّك ملَك.. والمملكه إنتو

نقّيت أجمل بنت بالهجران

بيّا تعب تا يفرح ببنتو

ـ6ـ

وإمّا بـ حبّا سوسحت أكوان

قلب الحجر بالعطف ليّنتو

نيكول سيميك.. إسمها رنّان

الخاتم بـ أجمل إيد زيّنتو

ـ7ـ

بهنّي الأهل بـ أجمل العرسان

بالعرس أحلى تنين بيّنتو

رح ذكّرك يا الياس بالأوطان

بـ مجدليا مزار مار الياس

عليك وعلى نيكول إمّنتو

**

سالينا

عرس جونسون وابنة ابنة أخي سالينا زعيتر

ـ1ـ

يا بنت بنت الخيّ.. شو بقلِّك؟

من زِغِرْتك بقلوبنا محلِّك

إسمك سالينا.. وشو حلو هالإسم

يا كبيرة الأحفاد منجلِّك

ـ2ـ

عمّك أنا.. وبـ هالعرس فرحان

عشنا وشفنا فرحة الأحفاد

وبمجدليا زلغطوا مع بان

وبلاد وقفت تا تهنّي بلاد

ـ3ـ

في شب حبّبتيه من لبنان

إسمو لمع من ساعة الميلاد

ساكن بـ قلب قلوبنا من زْمان

منبع لطافه وتضحيّه وأمجاد

ـ4ـ

تنيناتكُن.. بتزيّنوا الهجران

يا جونسون لولا الزمن ينعاد

خلقتوا لبعض تا تفرّحوا الديّان

عيشوا سوا.. وكل العمر أعياد

ـ5ـ

ويا أهل، يا أجداد، يا خلاّن

بدمعة فرح بتخلّفوا الأولاد

بدمعة فرح بتجوّزوا العرسان

من دموعكُن خلقت عيال جداد

ـ6ـ

ويا جونسون مهما تعيشوا بعاد

إنت وسالينا بتسكنوا الوجدان

بطلب تا ألله يبعّد الحسّاد

ويرزقكُن بنيّات مع صبيان

**

حبيب الناس

عرس طوني شينا ولينا يزبك، حزيران 1996

ـ1ـ

حَبِّكْ وْحِبَّيْتِيهْ.. نِيَّالِكْ

مْحِيتي الْغُرْبِه الْواقِفِه قْبالِكْ

طُوني إِبِنْ بَيُّو.. حَبيب النَّاسْ

وْغَنُّوجْ أُمُّو.. الْغنْج أَحْلالِكْ

عَمُّو حَبِيس.. بْيِفْرَح الْقِدَّاسْ

بِـ طَلّتُو.. وِبْيِرْكَع شْمالِكْ

عَيْلِةْ قَداسِه، طُهرْها نبْراسْ

وِحْياةْ أَللَّـه بْتِشْبَه عْيالِكْ

شَيْنَا وْيَزْبِكْ تاجْ فَوق الرَّاسْ

فِيكي يا لينا تِقْشَعِي حالِكْ

فَرْحِةْ عَزِيز الْخَيّ ما لْها قْياسْ

مَطْرَحْ أَبُوكي.. طَمّني بالِكْ

وِتْرازْيا.. شُو حُبّ.. شُو إِحْساسْ

مِتِل أُمِّك.. وَسّعي مْجالِكْ

تا كِل ما الإِنْجِيلْ تِمِّكْ باسْ

يْفُوح الْعطرْ وِيْشَرْقِط الْبَخُّورْ

وْكِرْمال عَيْنِك تِرْقُص جْبالِكْ

ـ2ـ

الْحُبّ شَمْعَه بْتِنْطِفي عَ طُولْ

ضَوُّوا الْمَحَبِّه بْدَمْعِة الْعِينَيْنْ

ضَوُّوا الْمَحَبِّه بِـ صَفَا الِعْقُولْ

بِالدَّمّ يَللِّي بْيِنْعُش الْقَلْبَيْنْ

وْخَبِّي يا طُوني (لِينْتَكْ) بِفْصُولْ

تْزَهِّرْ، إِذَا بْتِمْشِي، عَلَى الْمَيْلَيْنْ

وْخَلِّي حَياتَا سْيُولْ فَوْق سْيُولْ

مْنِ الإِحْتِرامْ.. وْضِحْكِة الْخَدَّيْنْ

تا كِلّ ما الزَّهْرَه، يا بَيِّي، تْقُولْ

تْنِخ السَّما وِتْبُوس أَطْهَر أَرْضْ

مِشْيُوا عْلَيْها تْنَيْن.. أَحْلَى تْنَيْنْ

**

حبّت قمر

عرس جورج بشارة ومهى عبد الأحد، 24/4/1993

ـ1ـ

مِتْلِك أختْ ما لقيتْ.. وِحْياتِكْ

عطْر الشَّرَفْ غَلْغَلْ بِوَرْداتِكْ

وْكل الْحروف الْـ كَتْبِتَا الإِيدَيْنْ

حَيَّكْ فَرَحْها وَهْج كِلْماتِكْ

يا مْتَوّجِه عَ مَمْلكِةْ عِينَيْنْ

ما تْعَوّدِتْ إِلاَّ عَ دَمْعاتِكْ

أُمِّكْ بَدرْ.. بَيِّكْ مَلَكْ.. مِنْ وَيْنْ

جِيتي، وْما سِمْعِ النّجمْ دَعْسَاتِكْ؟!

زَحْلِه اللَّيْلِه عِرسْها عِرْسَيْنْ

وِطْبُولْها دَقُّوا عَ نَغْماتِكْ

وْمِيشُو وْطُونِي.. زَلْغَطُوا الْخَيَّيْنْ

لِمِّنْ لْبِسْتِي مَشْلَح مْنِ الْفلّ

وْرَقْصِتْ بِعِرْس الْفلّ.. خَيَّاتِكْ

ـ2ـ

بْهَنِّي الْمَنْصُورَه بْمَهَى وِبْقُولْ:

عَنْ حَقّ هِيِّي الْيَوْم مَنْصُورَه

رِبْحِتْ عَرُوس مْسَوْسَحَه الِعْقُولْ

مِنْ أَلْف دَيْر وْدَيْر مَنْدُورَه

تْلامِيذْ عَ صَفْحاتْها بِتْجُولْ

تْبَوْدَرُوا بِغْبَارْ طَبْشُورَه

حَبِّتْ قَمَرْ.. تاري الْقَمَرْ مَشْغُولْ

عَمْ يِرْسُم لأَحْلامْها صُورَه

جُوزِيفْ بَيُّو بِالْكَرَمْ مَجْبُولْ

وْرِينِيهْ أُمُّو مْصَاحْبِه دْيُورَا

تِرْتِيلْهَا لْسَابِع سَما مَحْمُولْ

وْطَلْباتْها لِوْلادْها تْسَابِيحْ

رُوحُوا اسْأَلُوا دخَّانْ بَخُّورَا

ـ3ـ

بْشَارَه، يا جُورج، بْبَشْرَّكْ يَاها

وْعارِفْ أَنا رَحْ تِفْهَم الْمَقْصُودْ

مَجْد الشِّعْر بِـ مَجدْها تْباهَى

وَقْت اللِّي زَيَّنْ (زَحلْتُو) عنْقُودْ

أُمَّا بَدرْ.. سِهْرِتْ عَ مَرْباها

وْبَيَّا مَلَكْ.. وَقَّف عيُونُو جْنُودْ

وْعَبْد الأَحَدْ بِيقُولْ: لَوْلاها

لا مْسِكتْ مَسْبِحْتي، وْلا بَدِّي شْهُودْ

بِنْت الأَصلْ.. إِبْن الأَصَلْ جَاهَا

إِبِنْ ضَيْعَه نَصرْها مَشْهُودْ

إِبِنْ أَرْض.. الرُّوحْ تِهْواهَا

إِبِنْ زَرْع.. بْتِنحنِيلُو جْرُودْ

عِيشُوا سَوَا عِيشِه بْيِرْضَاها

أَللَّـه.. تا حَتَّى نْقُول: يا أَللَّـه

رْزِقْهُنْ شِي دَزِّينِه مْنِ الْمَوْجُودْ

**

شراع الفرح

عرس سيمون الياس ودجيني الخوري، شباط 1991

ـ1ـ

سْمِعتْ عُودَكْ جَدَّد وْتارُو

وْمِن دَقّتُو عْواد الْبَشَرْ غَارُوا

وْكلّ الأَغانِي الْـ مَرْقِت عْلَى الْعُودْ

باقاتْ زَهْر بْهَـ الْعِرِسْ صَارُوا

وْبَيَّك يْرَنْدِحْ.. نَغمْتُو عنْقُودْ

دَوَّقْ حْبُوبُو لْكِلّ زُوَّارُو

يْقِلَّكْ: يا إِبْنِي.. يا ضَنايِي جُودْ

كَفَّكْ بَيَادِرْ.. وَزِّع بْدارُو

دْمُوع أُمَّكْ عَطّرِتْ الِخْدُودْ

فرْحانْ قَلْبَا.. وِصْلِت خْبارُو

دْجِيني وْسَايْمنْ.. إِسِمْهُنْ مَرْصُودْ

عَ شْفافْها.. وْشْفافْها احْتارُوا

أَيَّا صَلاَ رَحْ يِقْبَل الْمَعْبُودْ

تا تْصَلِّيَا.. يَا فَرْحِة الأُمَّاتْ

بِزْغارْ لِمِّنْ رَيّشُوا.. طارُوا

ـ2ـ

بْلَوْزَا.. بْلَوْزا.. إِسمْ تِرْتِيلِه

بَيِّكْ وْأُمِّكْ رَتّلُوها سْنِينْ

قُولِي لأَيَّا قَلبْ: غَنِّيلِي

بِيغَنِّيَا.. يا زَهْرِة الْنّسْرِينْ

أَهْلا.. مْنِ الأَرْزاتْ تِشْكِيلِه

قُوِّة قْلُوبُنْ مِنْ صَخرْ صنِّينْ

وْلَوْلا سْمِعْتِي كِيفْ يِحْكِيلي

سَايْمُنْ، عَنْ دْجيني الْـ ما بَعْرِفْ مِينْ

قَلْلِّي: قَمَرْ.. وِبْعَقلْها تْقِيلِه

مَرْبَى سَمِيرَه الْـ سِقْيِتْ بْسَاتِينْ

بِدْمُوعْها.. يا دْمُوعْها سِيلِي

بْفَرْحِة دْجِينِي حلْوِة الْحِلْوينْ

بْفَرْحِة الشَّمْس الْـ قَلّها: مِيلي

بَدْر السَّما.. تا يْزِيدْها تلْوِينْ

مَرْبَى نْقُولا.. أَشْرَفْ سْلِيلِه

خْوَارْنِه.. وِخْوارْنِه عَنْ جَدّ

مَرْقُوا عَ سَطْح الأَرْض قِدِّيسِينْ

ـ3ـ

قُومي ارْقِصِي يا نُورْما بْهَـ الْعِرْسْ

إِبْنِك تْزَوَّجْ.. زَلغْطي وْقُولي:

حَدّ رِيما صَارْ عِنْدي شَمْسْ

كِنِّه.. يا كِنِّه بْهَـ الْقَلبْ جُولِي

وَيْن الْبَلابِلْ؟.. لَيْش قَطْعُوا نَفْسْ

يا وْلادْ.. صِيحي: الْيَوْم دِقُّولِي

وْكِرْمالْ عَيْنُو، رَقّصِيلي بَسّ

سِتُّو.. اللِّي مِتْلِك رَبّتُو فِنَّانْ

فَنّو شَرَفْ، أَخْلاق وِبْطُولِه

ـ4ـ

انْتِبْهُوا يا أَحْلى تْنَيْنْ.. لَمَّا الرِّيحْ

بِتْشَلِّعْ شْراعْ الْفَرَحْ كِلُّو

وْصَخْرِة الْحُبّ الصّامْدَه بِتْزِيحْ

وِالْقَلْب، مَهْما يْدِقّ، بِتْشِلُّو

غِلُّوا بِبَعْض.. وْرَتّلُوا تْسَابِيحْ

لْرَبّ السَّما، وْطِلُّوا عَلَى مْطَلُّو

وْتا تِفْرَحُوا بْأَطْفالْ عَمْ بِتْصِيحْ

هِنِّي الدِّني.. مُرّ الدِّني حَلُّوا

لْمارْ سابَا كَتّرُوا التّزْيِيحْ

وِلْمار شَرْبِلْ دَايْماً.. صَلُّوا

**

أرزة وقصيدة

عرس صلاح ومريم الأيّوبي، 8/10/2000 

ـ1ـ

الْحُبّ وَحْدُو بْيِسْعِد الإِنْسَانْ

مِنْ دُونْ مَحَبِّه الْعُمْر رَحْ يِتْعَبْ

بْتِمْرُق سَاعَاتُو عَقْرَبَا تِعْبَانْ

وْأَكْبَر مْصِيبِه يِتْعَب الْعَقْرَبْ

ـ2ـ

وْصَلاحْ بـ هالعرس شُو فِرْحانْ

نَقَّى الْحَبِيبِه الْـ قَلبهَا مْدَهَّبْ

مَرْيَم الْـ إِسْما سَوْسَح الأَكْوَانْ

مْنِ بْرِزْبِن الْـ بِالشَّمْس عَمْ تِلْعَبْ

ـ3ـ

هَـ الأَيُّوبِيِّه.. زَنْبَقَه بْنِيسَانْ

حَدَّا الْعُمرْ بِيهُون ما بْيِصْعَبْ

إِمَّا بَدِيعَه جَوْهَرَا رَنَّانْ

بَيْن الْمَعَادِنْ مَعْدَنَا أَصْلَبْ

ـ4ـ

وْإِمُّو فَرِيحَه.. حَبِّتْ الدَّيَّانْ

قَلْبَا رِضَا الرَّحْمَنْ مِتْشَرَّبْ

إِيمانْ.. عَمْ يِتْقَرَّب بْإِيمانْ

هْنِيَّالْ يَللِّي فِيهُنْ تْقَرَّبْ

ـ5ـ

النَّخْلِه.. الْفَيْحَا.. زَيّنُوا الْمِيدَانْ

وْوَدُّوا التَّهانِي بِالْبَحرْ مَرْكَبْ

فَرْحِة وْلادُنْ.. فَرْحِةْ الأَوْطانْ

وْحَرْقَه كْبِيرِه.. الإِبِنْ يِتْغَرَّبْ

ـ6ـ

مْحَمَّدْ وِصِلْ مَعْ زَهْرِة الْبُسْتَانْ

وَدَّعْ وَطَنْ بَعْدُو بْيِتْعَذَّبْ

خَال الْعَرُوس الْـ طَبَّب الأَسْنانْ

انْشَاللَّـه، عَ إِيدُو، الْهَجْر يِتْطَبَّبْ

ـ7ـ

صَلاحْ أَرْزِه بْيِعْبِدَا لُبْنَانْ

وْمَرْيَمْ قَصِيدِه.. مْنِ الشِّعرْ أَطْيَبْ

بِنْت عِصْمَتْ.. إِبِنْ عِصْمَتْ.. كانْ

جِدُّنْ عَ جَيْش الْغَرْب يِتْغَلَّبْ

ـ8ـ

وَعَّى الْعَرَبْ.. حَرَّرْ شَعِبْ يِئْسَانْ

وْخَلاَّ الْقِدِسْ بِالْحَقّْ تِتْعَرَّبْ

هَنِّي.. صَلاحْ الدِّينْ.. هَـ الْعِرْسَانْ

وْخَلِّي جْيُوشَكْ بِالْعِرِس تِصْطَفّْ

وْكِرْمالْ عَيْنُنْ رَقِّص الْمَلْعَبْ

**

عرس قانا

عرس نقولا خليل وماري نادر، 23/6/1996

ـ1ـ

عرْسِك حلُو .. يا زينْة الأعْراسْ

يا بِنْت عَيْلِه .. صيتْها مِهْرا

بَيِّك بِـ عِرْسِك دَاق أطْيَب كاسْ

مِنْ عِرْس قانا .. كانِتْ الْخَمْرَه

ـ2ـ

مْنْ جْنُوب .. صَفّى لِلْوَطَن مِتْراسْ

قَدَّمْ شَبَابُو لأَرزْتُو الْخَضْرَا

إبْن الْجنُوب .. بْطُولتو نبْراسْ

وِالْمِجِدْلاوي .. طَلّتُو بْعَشْرَه

ـ3ـ

وِجِّكْ ضِوِي شَمْعات بِالْقِدّاسْ

وْحَدِّك نْقُولا .. الْـ جَبْهتُو سَمْرا

مْزَنَّرْ بِأُمّ وْبَيّ .. شُو إحْساسْ

أَزْهارْ حلْوِه مْسَيّجِه زَهْرَه

ـ4ـ

عَيْلِةْ خَليلْ .. بْيِنْحنِيلا الرَّاسْ

عَيْلِه عَظِيمِه .. قَدّْسِي سِرّا

يا بِنْت نَادِر .. إِسْمِك بْيِنْباسْ

بِنْت الأوَادِمْ .. نادْرَه بْطُهْرَا

ـ5ـ

عْقُولْ البَشَرْ بِالْكايْنِه أَجْناسْ

إِنْتِي وْحَبيبِكْ وَحّْدُوا الْفِكْرَه

إِنْتِي وْحَبيبِكْ رَكّعُوا يوضاسْ

الْـ باعْ رَبُّو بْقِرْش .. يا حَسْرَه

ـ6ـ

وْبِالْحَقّ .. أُوعا تِقْطَعُوا الأنْفاسْ

بْعُمْرا الْحَقِيقَه .. ما انْطَفَى عُمْرَا

وْكلّ ما تْشُوفُوا الأرْض عَمْ تِنْدَاسْ

بْإِجْرَيْن قِرْفِتْ ريحِتَا الْغَبْرَه

ـ7ـ

شِكّوا الأَصابِعْ بِـ قَلْب أَرْجاسْ

أَكْبَرْ خَطِيِّه تِمِسْكُوا الْجَمْرَه

فَرْحِةْ الْخَيّاتْ ما لْها قْيَاسْ

وْفَرْحِةْ الإخْوِه وَعِّتْ السَّكْرَه

ـ8ـ

وْأُمّك تْزَلْغِطْ .. دقِّتْ الأجْراسْ

لِلطُّهْر .. لِلإخْلاصْ .. لِلْقِدْرَه

مِتْل الدَّهَب صَوْتا .. والإلْماسْ

مْبارِحْ .. رَنينُو رَقَّص السَّهْرَه

ـ9ـ

وْحَوْلِك وْجُوه النَّاسْ .. أَحْلى نَاسْ

حَبُّوا يْكُونُوا فِرْحانينْ الْيَوْم

مَعْ بِنْت .. نَقِّتْ إِسِمْها الْعَدْرَا

**

مقلع الصّوان

جوزيف يزبك وجانيت شينا، 19/6/2002

ـ1ـ

هَـ العِرْس.. أَجْمَلْ عِرْس بِالْهُجْرَانْ

عِرْس الْمَحَبِّه وِالْفَرَحْ كِلُّو

شُوفوا السَّعادِه مْتَوّجِه الْعِرْسَانْ

عْلَيْهُنْ.. عُيُونْ النَّاسْ بِيدِلُّوا

عِرْسَانْ.. مِتْل الزَّهْر بِالْبُسْتانْ

بِمْحَبِّتُنْ.. سِعْر الزَّهْر غَلُّوا

جُوزيفْ يَزْبِكْ مُؤْمِن وْإِنْسانْ

بَيُّو ابْرَاهِيمْ.. الْكَوْن بيجِلُّو

تْرَبَّى عَ إِيدُو.. تْزَوَّد بْإِيمانْ

آخِدْ رِضَى قَلْبَيْن بِيصَلُّوا

مْن كْفِرْحَبُو.. مِنْ مَقْلَع الصُّوَّانْ

مَطْرَحْ ما بَيْرَق أَرزْنا عَلُّوا

فُوتِينْ إِمُّو.. بارَكا الدَّيَّانْ

وْصَبَّا بْقَالِبْ عَطْف عَ حِلُّو

قَالِتْ: يا إِبْنِي.. مَوْطَنَكْ لُبْنانْ

أَكْبَرْ خَطِيِّه الْبُومْ يِحْتَلُّو

رْجاعْ يا بْنِي رْجاعْ عَ الأَوْطانْ

الْـ بِيغِيبْ عَنْ هَـ الأَرْض يا دِلُّو

خَلِّيكْ مِتْل الأَرْز.. مَهْما كانْ

مْنِ الصَّعْب إِنُّو يِتْرُك مْحَلُّو

ـ2ـ

وْجانِيتْ شَيْنا.. مْشَنْشَلِه بِالزَّهْرْ

الْكَوْن كِلُّو بْطَلِّتا رَحَّبْ

هَايْ بِنْت ضَيْعَه.. مْمَجّدِه بِالطُّهْرْ

لا تْفَكّرُوا مْن الْوَصْف رَحْ إِتْعَبْ

مِنْ عُطْر إِمَّا.. تْرَسْمَلِتْ بِالْعُطْر

وْسِمْعِت كْلاما.. كْلامْها مْدَهَّبْ

قُومِي يا خَوْلَه زَلِغْطي بِالْهَجْرْ

لُبْنان بَدُّو يْرَقِّص الْمَلْعَبْ

بْساحاتْ بِرْقَاشَا.. طْلُوع الْفَجْرْ

مارْ شَرْبِل صَوْبنا صَلَّبْ

هَايْ بِنْت بَيَّا.. الْـ غَنَّجَا بْهَـ الْعُمْرْ

زَهْرِة عْيَالُو.. فْرَاقْها أَصْعَبْ

كَرْجِتْ عَ خَدُّو دْمُوع مِتْل الْجَمْرْ

وْقَلُّو: يَا زُوزُو.. تْحَقَّق الْمَطْلَبْ

إِنْت إِبْنِي صِرْتْ.. مَنَّكْ صُهْرْ

هِذَّبْت بِنْتِي.. وْإِخْدِتْ مْهَذَّبْ

ـ3ـ

يَزْبِك وْشَيْنا تْوَحّدُوا عَ الدَّهْرْ

اللِّي مِتِلْهُنْ ما بْيِنْسَمَى تْغَرَّبْ

لُبْنانْ عِنْدُنْ إِتِّحاد وْنَصْرْ

وِبْلادْ عَ الأَعْداءْ تِتْغَلَّبْ

لُبْنانْ عِنْدُنْ إِبْتِكارْ وْفِكْرْ

مُشْ حَوَاجِزْ عَسْكَرَا مْعَصَّبْ

قَالُوا: اصْبِرُوا.. ما عادْ يِنْفَعْ صَبْرْ

قالُوا: اسْكِتُوا عَ الْجَوّ الِمْكَهْرَبْ

نِحْنا شَعْب رِضْعانْ عِزّ وْفَخْرْ

ما مْنِرْكَعْ لِلْكِذْب وِالْغَدْرْ

وْما مْنِخْلَقْ تِمّنا مْقَطَّبْ

**

إسمك علي

عرس علي خليل ولبنى حمقه، 1/3/2002

ـ1ـ

إِسْمَكْ عَلي.. هـَ الإِسْم نِيَّالُو

ما فِي زَمَنْ فَبْرَك عَ أَمْثالُو

بْنَهْج الْبَلاغَه.. بَلَّغ رْسالِه

عَ كِلّ سَطْر بْتِلْمَحْ خْيالُو

مِنْ عَبْقَريتو.. جْمَعْت رِسْمالي

وْلِفَّيْت شِعْرِي بْمَشْلَحُو وْشالُو

وْبِفْرَحْ إِذَا رَحْ قُولْ عَنْ حالي:

شَرْبِل بْعَيْنِي انْضَمّ لِرْجالُو

ـ2ـ

إِسْمَكْ عَلِي.. بِهْدِيكْ مُوَّالِي

يا ابْن الْجنُوب.. الْحاضِن عْيالُو

عِرْسَك حِلُو.. بِينَوِّر لْيالي

عِرْسَكْ زَهْر بِيغَارْ مِنْ حالُو

مِنْ بَرْعَشِيتْ.. الْـ ضَوِّت جْبالي

مِنْ جَبَلْ عامِلْ.. ما حَدَا طَالُو

سْآلْ أَحْمَدْ.. بَيَّكْ الْغالِي

سْآلْ إِمَّكْ عَنْ جَنَى غْلالُو

إِبْنُو نَسْر بِيطِيرْ بِالْعالي

وْأَرْضُو أَمانِه بْإِيدْ أَبْطالُو

ـ3ـ

وْإِنْتِي يا لُبْنَى.. يا جْبِيْلِيِّه

يا كْنُوز بِالأَخْلاقْ مِلْيانِه

لْبَيْت حَمْقَه جابِك هْدِيِّه

أَللَّـه.. وْكِنْتي بْطُهْر خِلْقَانِه

بَيِّكْ عَلِي.. نِعْمِه سَماوِيِّه

وْإِمِّكْ.. مَحَبِّه وْعَطْف رَبَّانِي

غِنَّيْت بِنْت جْبَيْل غِنِّيِّه

رَقْصِتْ إِلاَ بْهَـ الْمَهْجَر غْنانِي

قِلّتِلّها: يا نُورْ عِينَيِّي

يا تْرَابْ.. بارَكْ أَرْض أَوْطانِي

شَعْبِكْ صَدِيقي، مْأَكَّد، وْخَيِّي

شَعْبِكْ بَطَلْ جَبَّارْ.. إِنْسَانِي

يِمْكِن نْلاقِي الشَّمْس مِطْفِيِّه

وْيِمْكِن نْشُوف الأَرْض خِرْبانِه

وْتِتْخَرْبَط الإِشْيَا الطَّبِيعِيِّه

وْكِلّ كَوْكَبْ يِبْلَع التَّانِي

تْلاتِه بْيِبْقُوا.. يا جْنُوبِيِّه:

حْقُوقْنا بِالْقُدْس مِنْصانِه

وْكِلْمِةْ عَلي الْـ بِالْحَقّ مِضْوِيِّه

وْشَامِخْ عَ طُولْ الدَّهْر.. لُبْنانِي

**

قمر جهلان

عرس مايكل وننات عبد اللـه، 29/11/1986

ـ1ـ

أَهْلا وْسَهْلا فِيكُنْ بْهَـ الْعِرْسْ

وِاللَّيْل عَمْ بِيفَرِّح النّجْماتْ

فَرْحِةْ قَمَرْ جِهْلانْ جابْ الشَّمْسْ

مِنْ أَرْض بِرْقاشا لأَرْض قْناتْ

ـ2ـ

جايِي تا هَنِّي عَيلْتَيْن كْبارْ

بْعِرْس مِتْلُو بْهَـ الدِّنِي ما صَارْ

يا بَيْت عِبْداللـه جَمَعْكُنْ حُبّ

بْعَيْلِه عَظِيمِه لِلْقَداسِه شْعارْ

عارِفْ أَنا نَنَاتْ جُوَّا الْقَلْبْ

فْرَشْتُوا الْقَلْب كِرْمالْها وِالدَّارْ

وْمايْكِل حَبيب الْقَلْب أَحْلَى شَبّ

مَعْبُودْ صَفَّى بْعائِلةْ شِعَّارْ

أَللـه يِحْمِيكُنْ يا أَعْظَمْ شَعْب

لُبْنانْ فِيكُنْ شافْ حالُو كْتِيرْ

وْغَنَّى بْفَرَحْكُنْ أَرزْنا الْجَبَّارْ

ـ3ـ

نَنَاتْ.. مُشْ عارِفْ شُو بَدِّي قُولْ

وْحَوْلِي زْلاغِيطْ الْفَرَحْ عَ طُولْ

سِمْعانْ بَيِّكْ تا يْسَاعُوا الْكَوْنْ

بْيِمْشِي كَأَنُّو بِالْحُلمْ مَنْقُولْ

وِالْوالْدِه مارِي لِزِمْلا عَوْنْ

مِنْ فِرْحِتَا نِزْلِت دْمُوعا سْيُولْ

يا زَهْرِة الْـ غِرْقان فِيكي اللَّوْن

يَللِّي جَمالِكْ بِالطُّهرْ مَجْبُولْ

أَهْل بِرْقاشا.. بْبِلادِي وْهَوْنْ

مِنْ فَرْحِتُنْ.. مَعْ كِلّ هَـ الْجُمْهُورْ

بْعِرْسِكْ يا بِنْت الْعِزّ دَقُّوا طْبُولْ

ـ4ـ

مايْكِلْ.. أَنا رَحْ قِلَّكْ: اسْمَاللَّـه

وْهَنِّي أَليسْ وْجُورْج عِبْداللَّـه

إِمَّك وْبَيَّكْ.. مَعْ أَهالي قْناتْ

بْعِرْسَكْ، يا زِينِةْ هَـ الدِّنِي كِلاَّ

يا بَدْر.. شَمْسَكْ إِسمْها نَناتْ

إنتَ وْياها بْهَـ الْفَضَا تْعَلاَّ

وْشِعُّوا سَوا تا تْنَوّروا الْعَتْماتْ

وِالْكَوْن بِالْبَسْماتْ يِتْحَلاَّ

مايْكِلْ.. صَعْب تا تِخْلَق الإِمَّاتْ

مِتْلَكْ حَنُون، مْهَذَّب وْمَهْضُومْ

وْلُبْنانْ عِنْدَكْ مِنْ بَعْد أَللَّـه

ـ5ـ

قُولُوا مَعِي: أَللَّـه يْهَنِّيهُنْ

وْنُور الْفَرَحْ يِضْوِي ليَالِيهُنْ

تا كيفْ ما رَاحُوا يْفَرِّخْ زَهْرْ

وِالْخَيْر يِرْقُصْ عَ أْيادِيهُنْ

هَوْدي حْبايِبْنا عَ طُول الْعُمْرْ

ما فِي مَسافِه تْبَيْعِدُنْ عَنَّا

بِقْلُوبْنا انْحَفْرِتْ أَسَامِيهُن

**

زلغطي زيادة

عرس مارون ومارينا الخوري

ـ1ـ

فِرْحانْ، واللـه كْتِيرْ، يا غِيَّابْ

بِـ عِرْس أَغْلى ناسْ بِعْيُونِي

بْطَلِّة وجُوه الأَهْل وِالأَحْبابْ

الْـ حافِرْ صُوَرْهُنْ عَ الصّدْر قُونِه

ـ2ـ

يا ضَيْعِة الْـ كِلِّك قْدَاسِه، الْيَوْم

الْقِدِّيسْ قِزْحَيَّا سَكَبْ كاسُو

وْكِرْمالْ يِشْرَبْ نَخْب أَحْلى قَوْمْ

شَرْبا الْخَلِيقَه نْبِيدْ قِدَّاسُو

يا ضَيْعِةْ الْـ فِيكِي الصَّلا وِالصَّوْمْ

وْصَرْح الإِيمان مْعَمَّرْ أْسَاسُو

رْجالِكْ الأَبْطال دايِمْ دَوْمْ

مْنِ صْدُورْهُنْ قَصُّوا الصَّخْر.. مِنْشَانْ

يِهْدُوا وَطَنَّا صْخُورْ مِتْراسُو

ـ3ـ

يا بَيْت لِيشَعْ.. تِسْلَمْ الدَيَّاتْ

الْـ رَبِّتْ مارينا بِـ أَرْض غُرْبِه

كْرَامِة عْيُونا انْضَوْيِت الشَّمْعاتْ

وَقْت اللِّي مِشْيِتْ دَربْها الصَّعْبِه

هَـ الزَّهْرِة.. اللّي غَارِتْ الزَّهْراتْ

مِن حُسنْها اللِّي مْصَوّرُو رَبِّي

خِرْبَشْت عَ لَوْح الصّدر كِلْماتْ

رَحْ إِقْرِيا.. تا النَّاسْ تِسْمَعْها:

كِل الْـ بِيصَاهِرْ ضَيعتي.. بْقَلْبِي

ـ4ـ

وْيا مِجدْلَيَّا.. فَرحتي كْبِيرِه

فَرْحِة الْـ عاشُوا بِـ فَرد جِيرِه

نِحْنا رْبِينا الْبَيْت حَدّ الْبَيْتْ

جِيرانْ.. يا طْيُور الْفَرَحْ طِيرِي

مارون.. في شَغْلِه.. أَنا اسْتِحْلَيْت

نْجِيبْ الدّخِيرِه تِحْرُس دْخِيرِه

قَطْفَا الْحَبِيبِه.. سِتَّكْ.. وْيا رَيْت

بِتْطِلّ حَتَّى تْشُوف فَرْحِتْنا

وْتِصْرُخ: أَلفْ مَبْرُوك يا زْغِيرِي

ـ5ـ

عِرْسانْ.. أَللَّـه يْوَفِّقُن عَ طُولْ

خِلْقُوا لْبَعْضُنْ بَسّ.. يا بْلادِي

يا أَرْض عَمْ تِجْرُف تْرابا سْيُولْ

يا شْعُوبْ.. قَهْر وْظُلْم مِعْتادِه

انْشاللَّـه مْنِرْجَعْ عَ الوَطَنْ تا نْقُولْ:

نِحْنا رْجِعْنا.. زَلِغْطي زْيادِه

إنْتي الْـ عِشْتِي فْصُول خَلْف فْصُولْ

الدَّمْعَه بْعيُونِكْ وِالشّفاف تْصِيحْ:

اشْتَقتْ، واللَّـه اشْتَقْت، يا وْلادي

**

ليندا القصيدة

عرس علي وليندا وهبة

ـ1ـ

لِينْدا الْقَصيدِه.. تْزَوّجِتْ إِنْسَانْ

لَمْلَـم حْرُوفا، جَمَّعا بْدِيوانْ

وْوَزَّعْ حَنِينُو بَيْن أَبْيَاتَا

وْعَلَّقْ صُوَرْها عَ الصّدْر نِيشانْ

وْكِلّ ما قِرِي صَفْحَه مِن حْياتَا

يِقْلُبْ الصَّفْحَه.. تْطِلّ عِيناتا

وْيِضْحَكْ جْنُوبُو الصّامِد بْلُبْنانْ

ـ2ـ

لِينْدا الْقَصِيدِه.. حْكايِتا حْكايِه

زَهْرَه.. زَرَعْها بْهَـ الدِّنِي رَبِّي

ياما بْرَمْت عَنْ أخْت تُوصَايِه

ما لْقِيتْ مِتْلا تِسْكُن بْقَلْبِي

شِبْعِتْ، عَ إِيدْ الأَهْلْ، تِرْبايِه

وْما حِنْيِت جْبينا بِهَـ الْغُرْبِه

هَيْدِي حَبِيبِة قَلبْنا.. كْفايِه

مِحْيِت بضِحْكِه ظْرُوفنا الصَّعْبِه

نِقَّيْت شِعْرِي الْيَومْ تِنْقَايِه

وْجِمَّعْت كِلّ مْحَبّتِي بْعِلْبِه

تا قَدِّمُنْ لِلْطَلِّتا آيِه

وْقِلْلاَّ: يا لِينْدا بْفَرحْتِك فِرْحانْ

مَبْروكْ عِرْسِك يا بِنتْ وِهْبِه

ـ3ـ

هْنِيَّالْ قَلْبَكْ يا عَلِي فِيها

نُور الشَّرَفْ عَ طُولْ ضَاوِيها

هَـ الْـ حَوَّشِتْ مِنْ كَرْبَلا إِيمانْ

وِتْبَوْدَرِتْ بِتْرابْ فَادِيها

زِينْة الشُّبّانْ.. وَيْن ما كانْ

حْسَيْن.. صَفَّى دْمُوعْ نِبْكِيها

هْنِيَّالْ قَلْبَكْ.. قَلبْها سِهْرانْ

عَنْ حُبَّك يْخَبِّرْ لَيالِيها

إِسْمَكْ عَ إِسْم الْـ وَحَّد الأَدْيانْ

إِسْمَكْ عَلِي.. يا رَبّ هَنِّيها

لِينْدا الْقَصِيدِه انْكَتْبِت مْنِ زْمانْ

مِنْشَانْ إِنْت الْيَوْم تِقْرِيها

**

عروس الفجر

عرس أنطوني بركات وفرنسيس حنا الخوري، 2/2/1985

ـ1ـ

فرْحانْ قَلْبِي بْهَـ الْعِرْس فِرْحانْ

فَرْحِةْ طِفلْ بِتْغَنّجُو أُمُّو

فرْحانْ قَلْبِي بْشَوْفِة الإِخْوانْ

الْـ مِنْ كِترْ حُبُّنْ جَمَّعُوا حالُنْ

تا حَوْل هَـ الْعِرْسانْ يِلْتَمُّوا

ـ2ـ

يا عَرُوس الْفَجْر.. يا نَسْمِه رْقِيقَه

يا عَايْشِه بِالطُّهْر وِبْقَوْل الْحَقِيقَه

مَهْما الدِّني يِبْرُمْ دُولابَا عَكْسْ

وِتْصِير بِبْحُور الْعُهْر كِلاَّ غَرِيقَه

وْيِسْوَدّ وِجّ الْكَوْن وْيِعِمّ النّحْسْ

وْتِتْكَسَّرْ جَوانِحْنا الطَّليقَه

بْتِبْقِي شَمْس.. عَمْ تْضَوِّي شَمْسْ

وْبُرْعُم حَلاكِي يْرَطِّبْ غْصُون الْعَتِيقَه

بْحَلّفِكْ بِالرَّبّ.. وِبْأَحْلَى عِرْسْ

كُونِي لْشَفِيقَه بِنْتْ.. أَكْتَرْ مِن رْفِيقَه

تا النَّاسْ تِحْكِي لْبَعضْها وِتْقُولْ:

أَرْبَعْ شَبابْ وْبِنْت.. فِي عِنْدا شَفِيقَه

ـ3ـ

يا إبن بَرْكات الْوَفِي الْحُرّ الأَمِينْ

يا إِبنْ بَيّ وأُمّ عاشُوا مْكَرمِينْ

الْيَوْم عِرْسَكْ إِنْت وِفْرانْسِيسْ

الْـ فَتَّحْ عَ خَدَّا وَرْد جُوري وْياسْمِينْ

جُولْياتْ أُمَّا.. وْبَيّها قدِّيسْ

بْمِجدْلَيَّا كْتِيرْ هِنِّي مفِضْلِينْ

دِيرْ بالَكْ عَ الْعَرُوسَه يا عَرِيسْ

وْضَلُّوا بْمَحَبِّه وِبْسَعادِه عَايْشِينْ

تا الْكَوْن كِلُّو يِفْتِخِرْ بِـ إِسْم:

مِجْدلَيَّا وْعَرْجِس وْحَرْدِينْ

ـ4ـ

وْهَلَّقْ بِـ جاه الْخالِق الدَّيَّانْ

طْيُور السَّعادِه تْطِيرْ فَوْق الْكِلّ

وْنِسْهَر وْنِشْرَبْ مِنْ خَمرْ سِكْرانْ

مْنِ مْحَبِّة الْـ بِقْلُوبْنا بِتْهِلّ

نِحْنا اللِّي عَمْ نِرْفَع إِسْم لُبْنانْ

هَـ الْقِطْعة اللِّي مْن السَّما عَ الأَرْض

بْتِفْنَى الدِّنِي.. وْهَوْنِيكْ رَحْ بِتْضَلّ

**

شموع الشرف

عرس جورج خوري وماري آن شينا، 8/11/1981

ـ1ـ

مْعَوَّدْ يا بِرْقاشا تا غَنِّيلِكْ

وِحْكايْة الْـ بِالْقَلْب إِحْكِيلِكْ

وْعَنْ أَهْلِك الْـ كِلُّنْ لَطافِه وْذَوْقْ

فِشّ قَلْبي شْوَيّ.. إِشْكِيلِكْ

صارُوا بْفَضْلُنْ طَامْريني لْفَوْقْ

وْكِيفْ بَدِّي رَجِّع جْمِلِكْ؟

ـ2ـ

يا ضَيْعِة الْـ بِالْجرْد مَرْفُوعَه

وْإِلاَّ عَ صَوْت الطَّيْر ما بْتُوعَى

كِلْمِه زْغِيرِه بِحْكِيَا لْهَـ النَّاسْ

انْشَاللَّـه الْكِلْمِه تْكُونْ مَسْمُوعَه

بْسِيدْني بْناتِكْ رَافْعِين الرَّاسْ

وْعَ شْفافُن الضِّحْكاتْ مَطْبُوعَه

وْزَهْراتْ حُبُّنْ صَعْب تا تِيباسْ

وْكِلّ وحْدِه ضَاوْيِه شْمُوعَا

شْمُوع الشَّرَفْ والْفهْم وِالإِحْساسْ

الْـ ما بْتِنْضِوِي بْهَـ الْكَوْن إِلاَّ لأُمّ

طَاهْرَه.. وْبِالْحُضْن يَسُوعَا

ـ3ـ

وْنِحْنا إِذَا سْرَقْنا مْنِ بْناتِكْ

سْرَقْتِي صَبايا كْتِيرْ مِنْ دَيْنَا

نْسِيتِي وَقْت مِنْ أَرْضنا جَاتِكْ

مِنْ مِجدْلَيَّا.. أُمّ وِدَّيْنا

تْزِيدْ عَيْلِه فَوْق عَيْلاتِكْ

أَصْفَى مْن الدَّمْع الْـ بِيعِينَيْنا

يَللِّي إِذَا مِنْ بِيرْ مَيَّاتِكْ

شِرْبِتْ.. صَعْب تِرْمِي حَجَر بِالْبِيرْ

مْأَكَّد عْرِفْتِي تْرازْيا شَيْنا

ـ4ـ

وْيا عَرُوسِتْنا يا ماري ـ آنْ

يَللِّي القَمَرْ مِنْ فَوْق غَنَّالِكْ

وِجِّكْ بِـ لَوْن الْفُلّ وِالْمرْجانْ

وْصِيتِكْ ضَرَبْ بِالْكَوْن.. نِيَّالِكْ

رْبِيتِي بْمَحَبِّه وْتَضْحِيِّه وْإِيمانْ

وِالنَّاسْ كِلاَّ شَكْرِت خْصَالِكْ

وْما دَامْ بَيِّكْ بِالتّقَى مِلْيَانْ

وْعَمِّكْ مْطانُوس رَيِّس الرّهْبانْ

عَ الْكَوْن فِيكِي تِقْشَعِي حَالِكْ

ـ5ـ

يا جُورْج.. يا مْهَنْدَس بْيُوت الْكِلّ

وِمْزَيَّنا بِزْهُور وَرْد وْفلّ

الْكُوخْ صَفَّى قَصْر مِنْ قَلْمَكْ

مِتلْ أَرْزِه شَامْخَه عَ التَّلّ

غَيْر الْجَوَاهِرْ ما نَطَقْ تِمَّكْ

وْوِجَّك مِتلْ بَدْر الليالي هَلّ

إنْت الرّضا شِبْعان مِنْ أُمَّكْ

كِيفْ ما بِتْرُوح أَوْ بِتْطِلّ

وْرافِع إِسمْ لُبْنان بِـ عِلْمَكْ

هَـ الْجَنِّةْ اللِّي الرَّب سَاكِنْها

وْمِتْل الصَّلا عَ شْفافْنا بِتْضَلّ

ـ6ـ

وْصِيِّه بْوَصِّيكُنْ.. قَبْل ما رُوحْ

عِيشُوا بْسَعادِه هَـ الْعُمْر كِلُّو

وِانْ كانْ شِي مَرَّه الْقَلبْ مَجْرُوحْ

بْضِحْكِه زْغِيرِه الْمُرّ بِتْحَلُّوا

شُو صَابْنا لَوْلا سَفِينِة نُوحْ

ما تِنْبِني.. هَـ الْكَوْن يا دِلُّو

حَتَّى الأَمَل بابُو يْضَلّ مَفْتُوحْ

وْشَمْس الْمَحَبِّه تِشْرُق عْلَيْكُنْ

قَبْل مل تْنامُوا وْتِتْسَلُّوا

لمريم العدرا لازِم تْصَلُّوا

**

جنّة

عرس جو وماري الشعّار. العروس أستراليّة

ـ1ـ

عْلَوَّاهْ.. لَوْ مارِي بْتِفْهَمْنِي

هَـ الْوَرْدِة اللِّي مْعَطرَه سِيدْنِي

تا كِنْت قِلْلاَّ: يا سْعادِتْنا

أَحْلى لْيالِي الْعُمْر لَيْلِتْنا

بْحَيْث صِرْتي بْهَـ الْمَسَا كِنِّه

لْبَيْت مِنْجِلُّو بْعَيْلِتْنا

وْفَرحْتُو بْتِنْعَدّ فَرْحِتْنا

طُوني وْعَفِيفِه.. بَيتْهُنْ جَنِّه

ـ2ـ

يُو آرْ نَايْس.. إِنْد فاري نَايْسْ

غُود بْلِيسْ يُو وَتْ أَ فَايْسْ

مِتل التَّلْج الْـ عَ صنِّينْ

صنِّين الْـ بيحاكي الْمَجْد

يِعْني لَوْلا سْأَلْتِي مِينْ

وْشُو اللِّي مْحَبَّبْنا بْهَـ الْجرْد

يا جْنَيْنِةْ فلّ وْياسْمِينْ

يا مْشَاتِلْ.. زَنَّرْها الْوَرْد

مِنْقِلِّكْ نِحْنا مْجانينْ

بْهَـ الأَرْض الْـ ما مِتْلا أَرْضْ

أَرْضِكْ يا أَحْلَى الْحلْوينْ

بْحَيْثِكْ صِرْتِي مِنْ لُبْنانْ

بِرْقاشِيِّه بْطُول وْعرْض

ـ3ـ

غِنّجْتكُنْ يا دْجُو.. وْإِنْتُو زْغارْ

وِفْرِحْت فِيكُنْ وَقْت صِرْتُو كْبارْ

أَبْطالْ إِنْتُو.. رْجالْكُنْ مِن نارْ

يِعْنِي الرُّجُولِه عِنْدكُن قِنْطارْ

وِلْهَـ السَّبَبْ مَهْما زَمانِي جارْ

وِالْكَوْن كِلُّو يِكْتِسِي بِالْعارْ

بِيضَلّ عِنَّا تْنَيْن مَأْوَى لِلشَّرَفْ

مَرْيَم الْعَدْرَا.. وْعَائِلِةْ شِعَّارْ

ـ4ـ

وْمِنْشَانْ حَتَّى الْخَالِق الدَّيَّانْ

بْعَطْفُو وْحَنانُو يْرَافِقْ الْعِرْسانْ

وْمِنْشَان حَتَّى يِرْزِقُنْ أَوْلادْ

وْنِتْفِه زْغِيرِه يْبَحْبِح الصِّبْيَانْ

وْمِنْشانْ حَتَّى يْبَعِّد الْحسَّادْ

صَلِّيلْهُنْ يا رْبُوعْ سِيدْنِي شْوَيّ

وْبارِكْ خُطاهُنْ يا جَبَلْ لُبْنانْ

**

أصلك إيطالي

عرس جوزاف سينكوتا وبولينا أبي خطار

ـ1ـ

جايي أَنا الدَّمْعَه بْعِينَيِّي

جايِي تا هَنِّي بِنْت ضَيْعِتْنا

بْإِسْم أُمِّي.. وِبْإسْم بَيِّي

بْإِسمْ كلّ شْمُوع عَيْلِتْنا

جايِي تا قِلْلاّ: يا صَفَا النِّيِّه

يا زَنْبَقَه.. يا بْيَاضْ عِفِّتْنا

يا وَرْدِة الْحَمْرا الْمِسِتْحِيِّه

يا نِجْمِة اللِّي بْراسْ تَلِّتْنا

يا فلّ.. يا مَنْتُور.. يا رْياحينْ

يا تَلْج أَبْيَضْ عَ جَبَلْ صنِّينْ

يا بِنْت ضَيْعَه بْيَعِرْفُوها مِينْ

مَقْلَعْ رُجُولِه.. وْدَيْر قِدِّسِينْ

وْيا بِنْت عَيْلِه مْن الْجدُود مْأَصّلِه

إِنْتي يا سِتّ الْحسْن.. يا بّولينْ

ـ2ـ

يا عَروس الْفَجْر.. يا قَطْر النَّدَى

يَللِّي بْجَمالِكْ بَعْد.. ما وِجْدُوا حَدَا

هْنِيَّال قَلْب الْـ سَارْقِكْ مِنْ مَيْمتِكْ

يَللِّي عَ مَرْباها الْخَليقَه بْتِحْسِدا

كُونِي أَمِينِه.. وِالْوَفَا مِنْ عَيْلتِكْ

هَـ الْعَيْلِةْ اللِّي ما قِوِي عْلَيْها الرَّدَى

كُونِي شَرِيفِه.. وِالصّدق مِنْ شِيمْتِكْ

يَلِّي رْضِعْتِي الصّدْق لَـ آخِرْ مَدَى

وْلا تْدِيرِي لْكِلّ كِلْمِه دَيْنتِكْ

كِلّ كِلْمِه مِفْتِنِه شِغْل الْعِدَى

ـ3ـ

جَايِي بْعِرْسَكْ رَقِّص الأَشْعارْ

يا (دْجَوْزَفْ) الْـ مَرْسُوم عَ وِجَّكْ وَقارْ

إِسمْكُنْ مَشْهُور مِتل أَرْز الرَّبّ

وْمتل تَلِّه.. وْفِي عْلَيْها النَّارْ

مِنْ دُونْ دَوَاكُنْ شُو نَفعْ هَـ الطُّبّ؟

مِتل قِدِّيس وْما عِنْدُو مْزارْ!

يا إبنْ سِينْكُوتا.. يا أَحْلى شَبّ

رُوما الْقَدَاسِه مْزَيّنِه دايِرْ مَدارْ

هْنِيَّالْ قَلْبَكْ كِيفْ ما بْتِنْحَبّ

وْأَصْلَكْ إِيطالِي.. مِن عِند بطْرُسْ

قِدّيسْنا.. الْـ رَافِعْ بِـ روما شْعارْ

ـ4ـ

جايِي تا هَنِّي كِلّ الِمْحِبِّينْ

جايِي تا هَنّي آلْ سِينْكُوتا

وْبَيْت بُو خطَّارْ مجْتِمْعِينْ

هَـ الْعَيْلِة اللِّي حْلِفْت بِحْياتا

ـ5ـ

وْبُكْرا إذا بْيِتْدَوَّن التَّارِيخْ

رَح بْتِقْرُوا بْصَفْحِة النِّسْوانْ

بْناتْنا وصْلُوا عَلَى الْمَرِّيخْ

وْعَطْيُوا دْرُوسْ تْعَلِّمْ الإِنْسَانْ

وْصارُوا سَفارِة أَرْز ما بِتْشِيخْ

حَتَّى وَلَوْ بِتْخَتْيِرْ الأَزْمانْ

وْرَبُّوا وْلادُنْ بِـ حِمَى حْبَابُنْ

مِنْ هَيْك كِيفْ ما بْرَمتْ بِالْبُلْدانْ

بْتِقْرا سَطْر عَ عَتْبِةْ بْوابُنْ:

بْهَـ الْبَيْت أَرْزِه مِنْ جَبَل لُبْنانْ

ـ6ـ

شُو فْرحْت لِمِّنْ شِفْتِك فْرِحْتِي

وْإِبنْ أَعْظَمْ ناسْ نِقَّيْتِي

انْشاللَّـه السّعادِه وِالهَنا وِالْخَيْرْ

يْضَلُّوا بْطَرِيقِكْ كِيفْ ما رِحْتِي

بَيِّي نَدَرْ مِنْ أَلْف دَيْر وْدَيْر

تْجِينَا أخْت تا تْزَيِّن السِّتِّه

بَسّ وِحْياة الْـ خَلَقْ هَـ الطَّيْر

وِالسَّما والأَرْض وِالنِّجْماتْ

حاسِسْ كَأَنِّي بِـ عِرسْ أُخْتي

**

حليب الطهر

عرس جوزاف توما وماري حنا الخوري، 13/9/1981

ـ1ـ

لِعْيُونْ مارِي.. بْتِنْضِوِي الشَّمْعاتْ

وِلإِسمْها بْتِتْقَطَّفْ الْوَرْداتْ

يَللِّي الشَّمسْ مِنْ نُورْها بِتْغَارْ

حَتَّى الْقَمَرْ وِالْغَيْم وِالنّجْماتْ

مِتلْ زَهْرَه مْفَتّحَه بْنُوَّارْ

هَـ الْعَرُوس الْـ مِتلْها ما في بَناتْ

بِنْت حَنَّا.. كْبَارْ أَهْلاَ كْبارْ

رضْعتْ حَلِيبْ الطُّهْر مِن أُمَّا

الأُمّ الْحَنُونِه الْـ إِسمْها: جُولْيَاتْ

ـ2ـ

أَيَّامْ شَهْر الصَّوْم رَحْ صُومَا

وْإِتْعَبَّد لْمارْ بِطْرُس بْرُومَا

بَرْكِي شَبَابْ الْيَوْم بِيصِيرُوا

يْكافْحُوا مِنْ هَـ الدِّنِي سْمُومَا

وْمِتل الْحَمامْ الأَبْيَضْ يْطِيروا

بْأَعْلَى سَمَا.. وِيْشَعشْعُوا نْجُوما

وْهَـ الْكَوْن.. تا يْحِلُّوا حْزَازِيرُو

وْغُرْبِتُنْ يِتْحَمّلُوا هْمُوما

لازِمْ عَ دَرْب التَّضْحِيِه يْسِيرُوا

الدَّرْب الْـ مِشِيهَا قَبْل مِنُّنْ شَبّ

إِسْمُو جُوزَاف وْعَيلْتُو تُومَا

ـ3ـ

بَعْد كلّ اللِّي انْحَكَى وِالْـ كانْ

فَرْد مَطْلَبْ بِسْأَلَك يا رَبّ

خَلِّي السَّعادِه تْرافِق الْعِرْسانْ

وْكِلّ عُمْرُنْ عايْشِينْ بْحُبّ

وْدَخْلَكْ.. دَخلْ إِجْرَيْك يا دَيَّانْ

زَيِّنْ حَياتُنْ بِالِولاد كْتِيرْ

بسّ نِتْفِه بَحْبِحْ الصّبْيانْ

**

رحلة هنا

عرس جورج طنسا الخوري وسعدى أمين بو ملحم، 27/6/1993

ـ1ـ

غَسِّل عْيُونَكْ بِالنِّدي يا وَرْد

كِبْر الْفَرَحْ.. ما في قَلبْ ساعُو

عيمارْ غَنِّتْ صَوْت خَلاَّ الْجُرْد

يِرْقُص طَرَبْ.. وِيْرَقِّص ضْياعُو

وْمِجدلَيَّا تْقُولْ: غَنِّي بَعدْ

تا يِسْمَع اللِّي سَدّ أَسْماعُو

سَعْدى وْجُورج تْزَوّجُوا.. يا مَجْد

قَلْبَيْن بِـ رِحْلِةْ هَنَا ضَاعُوا

وَيْنُو (أمين) الْبَيّ يِسْحَبْ فَرْد

وِيْطَلّقُو.. وْمَرْتُو تْقِلْلُّو: زِيدْ

مْنِ الْمِشْط باقِي تْلَتّ أَرْباعُو

ـ2ـ

يا جُورجْ.. أُمَّكْ دَمْعِتَا قِنْطارْ

إِبْنا الْوَحِيدْ، الْيَوْم، صَفَّى تَوْم

زَلْغُوطِتَا وِصْلِتْ عَلى عيمارْ

وْمجدلَيَّا فَاقِت مْن النَّوْم

مَهْما يْكُون الْبَيّ مُشْ خِتْيَارْ

بَدُّو عَصَا يْعَكِّز عْلَيْها دَوْم

يا عَصَا بَيَّكْ.. يا وَحيد الدَّارْ

تْزِوّجتْ سَعْدَى بِنْت أَشْرَفْ قَوْم

خَيَّا.. رْفِيق الدَّرْب.. لا تِحْتارْ

أَعْظَمْ صَدِيقْ مْصَاحْبُو لِلْيَوْم

لا تْخافْ لَوْلا الْهَجْر فَرَّخْ نارْ

لا تْخافْ لَوْلا الشَّرّ قَلَّقْ لَوْم

حُبَّك وْحُبَّا.. وْكمْ طِفْل زْغارْ

بْيِطْفُوا النّيران الْـ شَعَّلا الدُّولارْ

عَ شَرْط ما تِتْزَفّروا بِالصَّوْم!

**

طلّت صبيّه

عرس أنطوني نهرا وجوزفين نعيم، 13/7/1992

ـ1ـ

طَلِّتْ صَبِيِّه.. طَلِّتَا كْبِيرِه

ضَوِّت الْعَتْمِه وْفِرْحِت الدِّيرِه

عَ دْرُوب طِرْزَا غَزْلِت مْشَاوِيرْ

يا طْيُورْ طِرْزَا فَوْقها طِيرِي

هَيْدي وَحِيدةْ بَيّ قَلْبُو كْبِيرْ

مِيشَالْ قَلْلاَّ: يا بِنتْ سِيرِي

عَ دْرُوبْ أَطْهَر أُمّ، صَعْب يْصِيرْ

مِتْلاَ.. يا زُوزُو مِتِلْها صِيري

عِشْنا الْعُمر بَرَّات الِحْزازيرْ

صَوِّر حُلمْ.. تِفْرَح بِتصْويرِي

نِتْصَارَحْ.. وْنِضْحَكْ سَوا وِنْطيرْ

فَوْق الْوَجَع.. أَيَّا وَجَع بِيضَلّ

وْبَعْدا الْمَحَبِّه بْقَلبْنا دْخِيرِه

ـ2ـ

وْأَنْطُوني نُهْرا اللِّي خَلَّى اللَّيْلْ

يْرَشْرِش نْجُومُو حَوالَيْكِي

حَبِّك بْقُوِّه.. سْأَلتْ نجْم سْهَيْلْ

قَللِّي الْقلبْ سَابِح بِـ عينَيْكي

مِنْ مَيلْ فايِضْ عاطْفِه، وْمِنْ مَيْل

خَبَّى الْعُمر خَاتِـم بِـ إِيدَيْكي

إبنْ الْوَفا، رَقْصِت بِعِرْسُو الْخَيْلْ

وْغَلّ طُهْرُو بْطُهر خَدَّيْكي

وْمَهْما بْغُرْبِتْنا يْجِنّ الْوَيلْ

وِيْطَرْطِش الْغَبْرَه عَ إِجْرَيْكي

وْيِرْخِي دْمُوعُو سَيْل يِجْرُفْ سَيْلْ

بِوْجُود مارْ نُهْرا شَفِيع الْكلّ

ما في ضَرَرْ رَحْ يُوصَل عْلَيْكي

**

شويّة حب

عرس وليد وليليان حصني، 28 آب 1990

ـ1ـ

جايِي وْجايِبْ فَرحْتي هْدِيِّه

لِفَّيتْها بِرْمُوشْ عِينَيِّي

وْزِيَّنتْها بالْوَردْ والرِّيحانْ

وْطِعّمتْها بْأَبْياتْ شِعْرِيِّه

كْرامِةْ وَليد وحِلْوتُو لِيلْيانْ

اللِّي بْقَلبْهُنْ بَحْر وْسَما الْجِيِّه

وْنَسْماتْ مِنْيَارَه الْـ صَرْلا زْمانْ

تِسْتَوْرِدَا الْجَنِّه الإِلَهِيِّه

هْدِيتِي شْوَيِّةْ حُبّ منْ لُبْنانْ

فِيها الْحَنِين الْـ عَم بْيِحْرُق قَلبْ

أُمَّاتْ تِنْدَهْ: عُودْ يا بْنَيِّي

ـ2ـ

الصّدْفِه بْتِلْعَبْ دَورْها الصّدْفِه

بْتِجْمَعْ بَشَرْ بِعْقُول مُخْتِلْفِه

وْلِمِّنْ بِـ إِيدُو تْشَرّفِتْ إِيدِي

رَقْصِتْ سَنابِلْ قَمْح عَ كِتْفِي

حِسَّيْت إِنُّو مْحَبّتُو جْدِيدِه

وْعَ ضحكْتُو الأَصْحابْ مِلْتَفِّه

صَاحِبْ وَفَا.. يا فَرحْتي زِيدي

وْعَ نارْ حُبُّو غُربْتِكْ دَفِّي

إِبِنْ ضَيْعَه.. إِسمْها عِيدِي

وْقُوليلْها: هُجْرانْ بِيكَفِّي

وْغَنِّي بْعِرْسُو وْزَلغْطي وْسِيدي

هَيْدا وَليدْ الْـ حَصَّنْ حْصُوني

يا أرزْتي بْأَعْلى بُرج رِفِّي

ـ3ـ

مِنْ يَوْم ما التَقْيُوا سَوا

شِفْت الْفَرَحْ جايِي

عَ جْوانِح حْكايِه

تْمَرْجَح عَ صَفْحاتا الْهَوى

وْمِنْ يَوْم ما لِبْسُوا الدَّهَبْ

وْرَقْصُوا الْخَواتِـمْ بِالْعِلَبْ

صَار السَّهَرْ

يِغْزُلْ قَمَرْ

تا يْعَلّقُوا بْعِرسْ الأَدَبْ

ـ4ـ

حِلْوِه.. الْتَقاها وْحَبّها

تْرَبِّتْ عَ إِيدَين الْحَنانْ

بْحضْن اللِّي خافِتْ رَبّها

مَعْ بَيّ شِعلِةْ عُنْفُوانْ

زَرْعُوا مَحَبِّه بْقَلبْها

لِبْلادْ ناسيها الزَّمانْ

لْجِيِّه.. تْشَرَّد شَعبْها

مِن بَعدْ ما ماتْ الأَمانْ

جَمّع بْيُوتا.. وْضَبّها

بْقَلْبُو.. وْوَشْوَشها بْإيمانْ:

يا كَوْن زَيِّنْ دَربْها

رَاجِعْ أَنا عَ شْطُوطْها

غَسِّلْ حُزنْ لُبْنانْ

ـ5ـ

غَطَّى الْبردْ عِينَيْنْ مِلْتِهْبِه

بِالشَّوْق.. بِلْيالي الْحَنينْ

بْدَمعاتْ عَمْ بِتْخَزِّق بْقَلْبي

شَلْحِتْ بِنَبْضاتُو الأَنينْ

مِشْتاقْ عُودْ.. وْإِمْحَش الْغُرْبِه

لأَرضْ مِنْيارَه وْجَبَل صنِّينْ

لْجِيِّه بْحِبَّا.. وْحالِتا صَعْبِه

لِبْلادْ عَمْ تِتْعَذَب مْن سْنينْ

صَرْخِتْ بِأَعْلَى صَوْت: يا شَعْبِي

قْرِفْنا الْبِكي.. جَمِّعْ فَرَحْ حُبِّي

تا تِزْرَعُو عَ شْفافْ مُغْتِربينْ

**

جوقة حساسين

عرس عدنان وتلميذتي مرام جبرايل، 10/4/1994

ـ1ـ

بْعِرْسِكْ يا (ميمُو) رَقْصِت بْسَاتِينْ

مَسْحُور فِيها الْوَردْ وِالرِّيحانْ

كانْ عُمْرِكْ كَمْشِة تْلاحِينْ

بْكِلْمِةْ (نَعَمْ).. صَار الْعُمرْ (عِدْنانْ)

ـ2ـ

وْمِنْ فَرْحِتَا شْبابيكْ تَنُّورينْ

رَشِّت زْلاغِيطْ عَ الْوِدْيانْ

وْعِكَّار.. هَـ الْعِكَّارْ.. مِتْلا مِينْ؟

آيِةْ جَمال مْسَوْسَحَه الْبُلْدانْ

ـ3ـ

بْفَرْحِةْ حَبِيبَا، جَوْقِة حْساسينْ

غَنِّتْ تا شِبْعِتْ وِالْجَبَلْ سِكْرانْ

عِلَّمتْ (مِيمُو) وْكانْ عُمْرَا سْنِينْ

شِفتْ فِيها الْخَيرْ والإِيمانْ

ـ4ـ

بِكْتابْ أُمَّا قارْيِه تِخْمِينْ

إِنُّو الشَّرفْ أَغْلى مْن الإِنْسانْ

وْبِكْتابْ بَيَّا شَافِت تْلاوِينْ

مِنْ كِبِرْ عَقْلاَ فِهْمِت الأَلْوانْ

ـ5ـ

لَوْن بِيقِلْلاَّ: الْغَدرْ قايِينْ

وْلَونْ بِيقِلْلاَّ: الْوَفَا عِنْوانْ

وْلَونْ حامِلْ باقِة رْياحينْ

تا يْقَدِّمَا لْعِرْسانْ.. شُو عِرْسانْ

عِنْدُن بعدْ أَللَّـه أَرزْ لُبْنانْ

**

جيراني

عرس أنطوني سعادة وريتا خوري، تشرين أول 1990

ـ1ـ

جدِّك الْمُخْتارْ وَصَّانِي

قِلِّكْ قَصِيدِه ما إِلاَ تاني

وْسِتِّكْ يا رِيتّا كاتْبِتْلي كْلامْ

شْهُورْ خَلْف شْهُور بَكَّاني

بَيْنِي وْبَيْنُنْ جَمْعِت الأَيَّامْ

بْضَيْعَه سَكَنْها شَعْب إِنْسانِي

مَرْقُوا عْلَيِّي مِتِلْ بَصْر مْنامْ

فَرْشُوا طَرِيقي شِعْر وِغْناني

انْ خِبَّيْتُهُنْ بِالْقَلبْ ما بِنْلامْ

عطْر الطُّهر بِيفُوحْ لَمَّا بْقُولْ:

الْيَاس وِفْروسِينْ جِيراني

ـ2ـ

وْلَوْ تِسْأَلي خالِكْ عَ مَرْبانا

كِيفْ كِنَّا.. وْكانْ مَسْرانَا

لا عْيُونْ نِرْفَعْ.. لا الإِيدَيْن نْمدّ

رَبّ السَّما عَ الْخَيرْ مَشَّانَا

وْكِل ما الْجَرَسْ يِنْدَقّ يَوْم الْحَدّ

(السَّيدِه) تِفْرَحْ بِمَلْقانا

وْخُوري الضَّيْعَه يُوعَظْ وْيِحْتَدّ

عَنْ هَـ الْعَجِيبِه اللِّي بْعِرسْ قانا

وْصَوت جِدِّكْ يِنْسِمِعْ بِالْجُرْدْ

تِرْتِيلْ حَنَّا كْتِيرْ بَكَّانَا

وْجُولْياتْ سِتِّكْ غَارْقَه بِالْمَجْدْ

زَرْعِتْ فَرَح بِقْلُوبْ جِيرانَا

وْقَطْفَه الْحَنُونِه تْطلّ تِجْمَعْ وَرْدْ

رَوْض الصَّلاَ مْزَهّرْ عَلَى لْسانَا

وْسِتِّي تْقِلْلاَّ: بَعْد جِيبِي بَعْدْ

الْعَدْرَا بْتِقْبَلْ زَهرْنا وْبِتْصِيرْ

تِهْدي الْعَيْلِه بْنُورْ إِيمانا

ـ3ـ

وِالْيَومْ.. إِبْن الْعِزّ.. إِبْن الْجاهْ

اخْتارِك رْفِيقَه.. تَا الْعُمرْ يِطْوَلْ

كِلّ الدِّني بْتِشْهَدْ عَلَى مَرْباهْ

راضِعْ حَليبْ مْقَدَّس مْأَصَّلْ

بَيُّو وْاُمّو.. شُو الْعُمرْ لَولاهْ

نَدْرُوا الْعُمْر تا فَرْحِتُو تِكْمَلْ

شَبّ متل الْبَدْر ما أَحْلاهْ

إِبِنْ ضَيْعَه كْرُومها أَشْعارْ

عْناقِيدْها بِتْحِبّ تِتْدَلَّلْ

ـ4ـ

تْنَيْن أَحْلَى تْنَيْن: رِيتَّا وْأَنْطُونِي

بْعُمْر الرَّبِيعْ الْـ زَوْزَق فْصُول السِّنِه

بْعُمْر الْفَجرْ.. وِالنُّور عَمْ يِشْلَح نْهارْ

وْيِغْمُز بِعِينَيهْ الدِّنِي.. وْتُوعَى الدِّنِي

يا رَبّ زَيِّنْ دَرْبُنْ وْزِيد الزّغارْ

بْيُوت الْـ ما فِيها زْغارْ صَفْرَا مِنْتِنِه

وْخَلِّي السَّعادِه غْمارْ فَوق غْمارْ

هَوْدي وْلاد الْعِزّ يا جَبَّارْ

قْلُوب أَهْلُنْ بِالْخُشُوع مْزَيّنِه

**

مال الدني

عرس جوزاف جبرائيل وروندا علـم، 17/1/1982

ـ1ـ

ما يَوْم يا أَحْبابْ خانِتْني الْهِمّمْ

وْمِحْيِتْ خَيالي كلّ ما بِمْسِكْ قَلَمْ

شاعِرْ أَنا.. وْشِعْرِي نَبْع جاري

مَيّتُو مِنْ فَوْق.. مِنْ أَعْلى قِمَمْ

ياما بَشَرْ جَنِّتْ بِأَشْعاري

وْقَالُوا: عَظِيمْ كْتِيرْ.. عَمْ تِنْظُمْ حِكَمْ

لَكِنْ بِـ سِرِّي ما حَدَا دَارِي

ما كِنْت لاقِي كْلامْ حَتَّى يْلِيقْ

بْأَهْلِكْ يا دَارَيَّا.. وْبِـ بِنْتَكْ يا "عَلَمْ"

ـ2ـ

شُو هَـ الْعَرُوسْ الْـ عَمِ تْحاكِي شَمْسْ

وْأَحْلَى قَمَرْ مِتْكَعْنَش بْزِنْدا

تا أُوصِفَا.. رَحْ قُول كِلْمِه بَسّ

كْنُوز الْمَحَبِّه والشَّرَفْ عِنْدَا

أُمَّا "جَمِيلِه" عَلّمِتْها دَرْسْ

تْكُون شَمْعَه تْنَوِّر الْـ حَدَّا

وْغَير لْعُيُونَا ما انْعَمَلْ هَـ الْعِرْسْ

شَامِلْ تِعِبْ تا النَّاسْ تِتْذَكَّرْ

قِدَّيْش عِنْدُو غالْيِه رُونْدا

ـ3ـ

جوزاف عِرْف اخْتارْ .. نِيَّالُو

بِنتْ الأَصلْ تا يْكَوِّن عْيالُو

مِن مِجدلَيَّا بَعرْفُو إِنْسانْ

الإِخْلاصْ هَمُّو.. التَّضْحِيِّه مالُو

بِـ غرْبِتُو.. عاش بْوَفَا وْإِيمانْ

وِبْهَـ الدِّنِي.. ما انْغَرّ بِـ حالُو

عِنْدُو، بَعدْ أَللَّـه، بْيِجِي لُبْنانْ

بْلاد الأَرْز وِبْعَلبَكْ وصنِّينْ

الْـ كِلّنا مِنْمُوتْ كِرْمالُو

ـ4ـ

يا أُمّ مُوسى.. الْيَوْم فَرْحِتْنا

وْوِسْع الدِّنِي، يا الْياسْ، ضِحْكِتْنا

مِنْحِبّكُنْ مِنْ يَوْم ما رْبِينا

بْفَرْد جِيرِه.. بْأَرْض ضَيْعِتْنا

وِحْياةْ أَللَّـه، الْحُبّ ما نْسِينا

مَهْما تْفِرَّقْنا بْغُرْبِتْنا

وْمَهْما جْمَعْنا مالْ وِشْقِينا

مالْ الدِّنِي هِنِّي أَهالينا

لْبَعْضنا يا رَبّ خَلِّينا

وْغَيْر الْعُمْر.. ما بْرِيدْ تِعْطِينا

تا نْعِيشْ فَرْحَه تانْيِه، يا ربّ

فَرْحِةْ مِيلادْ.. بْجاهْ فادِينا

**

وشاح التّلج

عرس ألبير أبي خطّار وماري جعجع،10/4/1983

ـ1ـ

نِحْنا أَحَبّ النَّاسْ وِالْخِلاَّنْ

وِرْفاقْ كِنَّا مِنْ قَدِيم زْمانْ

نِحْنا الْوَفا مِنْشَرِّع بْوابُو

وْحُبّنا بْيِنْبَع مِن الإِيمانْ

وِلْهَـ السَّبَبْ، مِنَّا الْعِدَى شَابُوا

وْقالُوا: بْقَلْبُنْ بَرْكِةْ الرِّحْمانْ

أَلْبيرْ.. كاسَكْ طَيِّبْ شْرابُو

رَافِعْ بِـ أَعْمالَكْ إِسْم لُبْنانْ

وْحَقّ أَرْز الرَّبّ وِتْرابُو

فِرْحانْ قَلْبِي بْفَرْحِةْ حْبابُو

مِنْ دُونْ عَرَقْ.. مِنْ دُونْ وَتَرْ رَنَّانْ

ـ2ـ

مارِي.. بَياضِكْ خَجَّلْ الزَّنْبَقْ

نِيَّالْ هَـ الأَهْل اللِّي رَبُّوكِي

رْضِعْتِي حَنان مْن الْخَمْر أَعْتَقَ

وْكاسْ الطَّهَارَه بْعِزّ شَرْبُوكِي

كْبِرْتِي.. وْبَعْد ما الْبُرْعُم تْفَتَّقْ

قاموا بْوِشَاحْ التَّلْج لَفُّوكِي

وْلِلأُمّ يَللِّي لابْسِه الأَزْرَقْ

رَكْعُوا وْصَلُّوا لْبَعْد نِصّ اللَّيْلْ

تا الْبَيْت تانِي، الْيَوْم، هِدْيُوكِي

ـ3ـ

وْهَلَّقْ أَنا رَحْ خَاطِبْ الْعِرْسانْ

الْـ كِرْمالْهُنْ جِينا عَ هَـ الْعِرْس الْجَمِيلْ

لازِم تْعِيشُوا عَ هَوا لُبْنانْ

مُشْ لَـ إِلْنا كِلّ هَـ الطَّرْز الدَّخِيلْ

هَيْدي عادات بْيِكْرَها الديّانْ

وْنِحْنا جَماعَه مْنِتْبَع الإِنْجِيلْ

وْشَهْر الْعَسَل.. مُشْ بَسّ شَهْر زْمانْ

لازِمْ يْرافِق كلّ هَـ الْعُمْر الطَّوِيلْ

**

خبّروا الأَرْزة

عرس جو الشدياق وليليان قزّي، 7 نيسان 2002

ـ1ـ

حضّروا طْبُول الْفَرَحْ يا ناسْ

سُعاد بَدَّا تْصِيح آوِيها

حِلْفِت تْصَفِّي الْكاسْ.. كِلّ الْكاسْ

صَعْبِه الْعَرَقْ بِالْعُرْس يِطْفِيها

عِرْس إِبْنا.. الآدَمِي الْحِسَّاسْ

الْـ خَلاَّ الرُّجُولِه تْعِيدْ ماضِيها

لَوْلا الْحِلُو بِضِحْكِتَا بْيِنْقاسْ

كِنَّا شْبِعْنا مِنْ حِلُو سُعادْ

وْسِيدْنِي انْتَفْخِت مَعْ ضَواحِيها

ـ2ـ

دْجُو خَيِّي.. بَعِرْفُو مْنِ زْمانْ

إِنْسانْ.. مِتْلُو ما انْوَجَدْ إِنْسانْ

تْعَلَّمْ.. ما خانِتْ حَرْف كِلْماتُو

تْغَرَّبْ ما حَسّ بْدَعِسْتُو الْهُجْرانْ

إِبِنْ بَيُّو.. وْشِغْل دَيَّاتُو

مِيشال رَبَّى وِالْقَلبْ فِرْحانْ

بِالْفُرْن.. خَابِزْ كلّ خِبْزاتُو

وْشِبَّاكْ فِرْنُو سَوْسَح الأَوْطانْ

بَيْروتْ اَرْضُو.. عَيلتُو.. ذَاتُو

بَيْروت حُلْمُو الْـ كانْ.. لِمِّنْ كانْ

رُوحوا اسْأَلُوها: وَيْن دَعْساتُو؟

وَيْن أَهْلُو.. وْضحْكِة الْجِيرانْ؟

رُوحُوا اسْأَلُوها عَنْ بَشَرْ ماتُوا

وْبَعْدُو الْوَطَنْ فِلْتانْ.. شُو فِلْتانْ!

إِبِنْ أُمُّو.. الْـ غَزْلِت حْياتُو

عَ ذَوْقها.. تا يِفْرَح الدَّيَّانْ

زَرْعِتْ وَصَاياها بْحَكْياتُو

كِتْرُوا الْوَصَايا.. وْزَهَّرْ الْبُسْتانْ

أَوِّل وَصِيِّه يْحِبّ أَرْزاتُو

وْتانِي وَصِيِّه.. يْقَدِّسَا لْلِيلْيانْ

وْتالِتْ وَصِيِّه.. يْصُونْ دَمَّاتُو

تا يْقَدِّما هْدِيِّه لْجَبَلْ لُبْنانْ

ـ3ـ

لِيلْيانْ.. مِنْ ضَيْعَه سَماوِيِّه

عَ شَطّ أَحْلَى بَحْر مِرْمِيِّه

بِتْزَنِّرَا بْساتينْ خَضْرا كْتِيرْ

وْبِتْدَهِّبَا رَمْلاتْ سِحْرِيِّه

ذْكَارْ الْبُطُولِه.. إِسمْها بِيصِيرْ

قِصِّةْ بُطُولِه تْخَبِّرَا هِيِّي

اسْتَشْهَدْ عَ أَرْضَا شَعْب فِعْلُو كْبيرْ

عَلَّم وْلادُو يِعْبَدُوا أَللَّـه

وْمِن بَعْد أَللَّـه.. يِعْبَدُوا الْجِيِّه

ـ4ـ

لِيلْيانْ أَرْزِه.. خَبّروا الأَرْزِه

عَنْ بِنْت عِمْلِتْ بِالْهَجرْ هَزِّه

جِرْيِسْ سَقاها تا تْزَهِّرْ هَوْنْ

وِتْزيدْ عِزُّو بْساعِة الْحَزِّه

مِنْ طُهرْ أُمَّا.. صَار أَحْلى لَوْنْ

يْحِيِّكْ إِلاَ، بِغُرْبِتَا، كَنْزِه

وْمِنْ عَطفْ أُمَّا.. تْرَسْمَلِتْ بِالْعَوْنْ

أُمَّا سَمِيرَه.. يا دِنِي اعْتَزِّي

دْجُو حَبَّا.. ارْتاحْ كِلّ الْكَوْنْ

كِرْمالْ عَيْنُو انْقَلْبِتْ لْشِدْياقْ

وْمَحْفُور عَ لَوْح الصَّدْر: قَزِّي

**

حلم أَزرق

الذكرى الخمسون لزواج عيسى وريتا شحّود

ـ1ـ

مِنْ قِبلْ ما إِخْلَقْ

أَوْ يِخْلَق الزَّنْبَقْ

فِي حْمامْتَيْن تْنَيْنْ

مِشْيُوا وَرَا قَلْبَيْنْ

وْغِرْقُوا بْحُلمْ أَزْرَقْ

ـ2ـ

عِيسَى وَقتْ ما حَبّ

رِيتَّا.. وْمِشي عَ دَربْ

حُبَّا.. السَّما فِرْحِتْ

وِبْوابْها انْفَتْحِتْ

وْصَار أَللَّـه يِغْمرُنْ

بِعْطُورْ خَيْر يْعَطِّرُنْ

وْيِزْرَعْ حَنايَا الْقَلبْ

بِمْحَبّتُو.. وِيْكَبِّرُنْ

بِوْلادْ.. كِل ما نِذْكِرُنْ

بْتِدْمَع عيُون الرَّبّ

ـ3ـ

مايْكِلْ.. ماري تَرَازْ

باتْرِيشْيَا.. وِعْيالْ

انْجَمْعُوا بْعَقدْ إِلْمازْ

ما بْيِنْشَرَى بِالْمالْ

مِنْصَاغْ بِمْحَبِّه

بْإِيدَيْن مُشْ إِيدَيْنْ

شَكْلُنْ شَكلْ قَلْبَينْ

عَمْ يِرْسِمُنْ رَبِّي

بِـ أَرْض هَـ الْغُرْبِه

ـ4ـ

مَرْقِتْ سِنِه بْضَهْر السِّنِه

وْزَوْجَيْن شُو حِلْوِينْ

بْلَيْلِةْ فَرَحْ.. رَدُّوا دِنِي

شَمْعاتْها خَمْسِينْ

وْرِجْع الْعِرسْ أَحْلَى

وْعِرْسَانْنَا أَغْلَى

قِدَّامْهُنْ عَمْ يِنْحِنِي

مَجْد الدِّنِي كِلاَّ

وْلَوْ تِسْأَلُونِي شُو بِنِي

وْلَيْش الْحَرفْ صَلَّى؟

رَحْ قِلّكُنْ: شَحُّودْ

عَيْلِه اشْتَرَاها الْجُودْ

وِالْحُبّ والإِيمانْ

كْبِيرْها إِنْسانْ

وِزْغِيرْها إِنْسانْ

وْعَمْ يِحْرِسَا أَللَّـه

**

ناطر أنا

عرس جوزاف جرجس ودولاّ نادر، 16/6/1991

ـ1ـ

ناطِرْ أَنا تا تِفْرَحي ناطِرْ

يا بِنتْ ضَيْعَه مَجدْها عامِرْ

بِـ مجدْلَيَّا دارِت الأَفْراحْ

ضَوُّوا الكنِيسِه وْزَيّنُوا بْيادِرْ

وْشِرْبُوا نَخبْ بَيِّكْ وَجيه الْـ رَاحْ

عَ أَرْض سِيدْني يْوَزِّع جْواهِرْ

يا جَوْهَرَه.. أُمِّكْ ضَمِيرَا ارْتاحْ

سِهْرتْ.. وْبَعْدُو جفنْها سَاهِرْ

رَبِّت عْيالْ بْتِنْعُش الأَرْواحْ

بْتِتْحَرَّق لْبَخُّورُن مْباخِرْ

وْكل ما بْضَيْعِتْنا يْرِف جْناحْ

كِنَّا بْرَفِّةْ جِنْحُن نْفاخِرْ

أُمِّك وْبَيِّكْ مِن زْهُورُنْ فاحْ

عطرْ قَدَّسْ بَيْتُنْ الطَّاهِرْ

وْمُشْ عَجِيبِه لَوْ لِساني صَاحْ:

شَرْبِل بْعَيْني مْصَوَّر بْعَيْنُو

كِلْمِن بْيِمْضِي عَ الْوَرَقْ.. نادِرْ

ـ2ـ

وْهَـ الْعَريسْ الْـ رَبِّتُو رَشْعِينْ

وْسِقْيِتُو مِنْ مَيِّتَا إِحْسَاسْ

أُمُّو وْبَيُّو ناسْ مِحْتِرْمِينْ

زْمُرّد وْبَدْوي رافْعِين الرَّاسْ

وْجوزافْ مِتْلُنْ جَمَّع مْحِبِّينْ

وْكِنْتي الْحَبِيبِه الْـ حَبِّك بْلا قْياسْ

حَبْسِك بخاتِـمْ مِنْ زَهرْ نِسْرينْ

وْبِشْمُوع حِسْنِكْ نَوَّر الْقِدَّاسْ

حَقَّق حُلمْ غَنَّجْ عْيُونُو سْنينْ

وْلَبّسُو، بعد السَّهَرْ، إِلْماسْ

بْهَـ الصِّهْر نِحْنا كْتِيرْ مِعْتَزِّينْ

كِرْمالْ عَيْنُو الْكاسْ باس الْكاسْ

كْبِرْنا بْحَبايِبْ قَلبْ مَعْزومينْ

عَ عِرْس.. صَفَّى زينة الأَعْراسْ

كْبِرْنا بْعَمُّو وْمَرْت عَمُّو.. مِينْ

ما بْيَعْرِفُنْ؟.. وِانْزَرْعِت بْساتينْ

عَ كْفُوفُنْ.. وْصَارُوا فَخر لِلنَّاسْ

ـ3ـ

مِنْ كِل قَلْبِي بْقُولْ: يا دُولاَّ

سِر الزَّواج بْإِسْمِك تْحَلَّى

بْكِلْمِةْ (نَعَمْ) صارِت حْروف تْطِيرْ

وْعَ إِسْم تانِي إِسْمِك تْصَلَّى

دُولاَّ جِرِيسْ.. هَـ الإِسمْ عالي كْتيرْ

بْيِلْبَق لْنجْمِه نُورْها تْدَلَّى

إِنْتي وْجُوزَاف الْيَوْم حُبّ كْبِيرْ

خَلُّوهْ يِغْمُر هَـ الدِّنِي كِلاَّ

مِنْ دُون مَحَبِّه ما انْهَزّ سْرِيرْ

وْلا نُور قِدْر بْعَتمتُو تْجَلَّى

هَيْدَا عَصرْ غِرْقانْ بِالتِّعْتِيرْ

تَا تِغْلِبُوا هَـ الْعَصرْ يا عِرْسانْ

رَبُّوا عْيال تْخافْ مِنْ أَللَّـه

**

عبير الزهر

عرس حميد عبّود وماري ضاهر

ـ1ـ

ناطِرْ أَنا ناطِرْ

عِينَيْنْ تِضْحَكْلِي

شْفافْ تِنْدَهْلي

تا إِرْفَع قْناطِرْ

وْزَيِّن السَّهْلِه

بْأَفْراحْكُنْ أَهْلِي:

عَبُّود مَعْ ضَاهِرْ

ـ2ـ

يا كْفِرصْغاب الْمَجْدْ

بِالْمُغْتَرَبْ وِالْجرْدْ

وِشْوَشْتِك بْحِبِّكْ

بَعْد.. قِلْتِي: بَعْدْ

بْفَرْحِةْ حَمِيد الْيَوْم

ما دِقْت طَعْم النَّوْمْ

قَعْدتْ إِكْتُب شِعْرْ

وْإِجْمَعْ عَبيرْ الزَّهْرْ

تا قَدِّمُنْ لِعْيُونْ

ماري.. عَرْوس الْفَجْرْ

ـ3ـ

ماري، يا ماري تْخَرْسَن لْسانِي

الْفَرْحَه قَوِيِّه ما لِها تانِي

لِمِّنْ إِبِن عَبُّود نَقَّاكِي

رَقْصِتْ بِـ تُولا زْهُور فِرْحانِه

يا أَرْزة الْـ بِالْهَجْر مَحْلاكي

كِرْمال عَيْنِك فِضْيِت قْناني

وِالشّعْب يَللِّي بْغُرْبِتُو باكي

انْشَاللّـه بْيِفْرَح مِتل ما فْرِحْتي

وْيِرْجَع لْعِزُّو شَعْب لُبْناني

ـ4ـ

مِدُّوا إِيدَيْكُنْ حَيّكُوا الطَّرْحَه

قِدَّامْ عَيْني عْيُون مِنْشِرْحَه

قْلُوبْنا انْجَرْحِت عَ مَوْطَنَّا

وْفِزْعِت شْعُوب الْكَوْن مِن جُرْحَا

حاسِس اللَّيْلِه قَلبْنا تْهَنَّا

انْشِاللّـه عَ طُول الْعُمْر هَـ الْفَرْحَه

**

طلة المنتور

عرس تلميذتي ليان فوّاز الحدشيتي

ـ1ـ

عِلَّمْتِكْ.. وْكِنْتِي الْفِهِمْ كِلُّو

وْكِنْتِي الْبَرَاءَه بْسَيّدِة لُبْنَانْ

وْكِنْتْ شُوف الْكِلّ بِيدِلُّوا

عَ الشّاطْرَه اللِّي إِسْمِهَا لِيَانْ

ـ2ـ

وْهَلَّقْ كْبِرْتِي.. أُوفْ شُو بْجِلُّو

الْبَيْتْ اللِّي رَبَّاكِي بِـ هَالْهِجْرَانْ

إِمِّكْ.. حَنَانَا نبعْ.. بِيمَلُّوا

مِنْ مَيِّتُو تَا يِشْرَب الْعطْشَانْ

ـ3ـ

وْفُوَّازْ .. هَالْفُوَّازْ شُو بْقِلُّو

وْهُوِّي الْـ زَرَعْ بِـ دَرْبِك الإِيمانْ

إِمِّكْ وْبَيِّكْ قَلِبْنَا احْتَلُّوا

وِبْإِحْتِلاَلُنْ قَلِبْنَا فِرْحَانْ

ـ4ـ

وْفِي تْنَيْنْ بِـ حَدْشِيتْ بِيصَلُّوا

مِنْشَانْ أَللـه يوَفِّقْ العِرْسَانْ

حَنَّا وْسَلِيمِه صَوْتْهُنْ عَلُّوا

وْرَقْصِتْ عَلَى زْلاغِيطُنْ الوِدْيَانْ

ـ5ـ

وْمَالِكْ عُيُونُو بْطَلّتِكْ غَلُّوا

يا طَلِّةْ الْمَنْتُورْ وِالرِّيحَانْ

مَالِكْ بَطَلْ .. زِنْدِ الْعَدُو شَلُّو

قَضَّى الْعُمِرْ عَ أَرِزْتُو سِهْرَانْ

ـ6ـ

الْـ بِيمِدّ إِيدُو بَسّ.. يَا دِلّو

دَمُّو عَ مَدْبَحْ أَرزتُو قربَانْ

بْيِرفُضْ الإِعْدَى بْأَرْضْنَا يْضَلُّوا

بْيِرْفِضْ يْعِيشْ وْمَوْطنُو يِئْسَانْ

عِنْدُو بَعِدْ أَللـه جَبَلْ لُبْنَانْ

**

أعظم حكيم

يوم زواج الدكتور جوزاف لويس البعيني..

ـ1ـ

تْزَوَّجْ حَبِيب الْقَلبْ يا حَنَّا

وْدَمْعِة رَابِيكَا سِقْيِت الْخَدَّيْنْ

بْجَاه السَّما وِالأَرْض يِتْهَنَّى

أَعْظَمْ حَكِيم.. وْيحرسُو مْن الْعَيْن

ـ2ـ

هَيْدا جُوزَاف لْوِيس مِنْ عِنَّا

مِن مِجِدْلَيَّا الْـ ضِحْكِتَا رَطْلَيْنْ

قَلْبُو كْبِير لْحِلْوِتُو غَنَّى

هُوِّي وْياها تْنَيْن.. أَحْلَى تْنَيْن

**

عين الشمس

كتبتها ليلقيها السيّد حنّا بعيني من بلدة كرم سدّة بعرس ابنته لورا.

ـ1ـ

كِنْتِي (لُورَا بْعَيْني) كِيفْ

يا بَابَا بِتْطِير طْيُورْ

رِبَّيْتِك.. وِالْكَفّ نْضِيفْ

عِلَّمْتِكْ وِنْدَرت نْدُورْ

وْأُمِّكْ كِل ما تْقِصّ رْغِيفْ

مْنِتْنَشَّقْ رِيحِةْ بِخُّورْ

كُوني مِتْلا.. بْلا تِصْنِيفْ

حِبِّي بَيْت حْماكي كْتِيرْ

صَارْ إِسْمِكْ (لُورا مَنْصُورْ).

ـ2ـ

يا جُورج الْـ بِالتَّقْوَى رْبِيتْ

بْحِضْن الأُمّ.. بْعَطْف الْبَيّ

أَطْيَبْ مِنْ قَلْبَكْ ما لْقِيتْ

بْعَين الشَّمسْ بْتِتْرُكْ فَيّ

هْدِيتَكْ عُمْري لَمَّا هْدِيتْ

بِنْتي لْصِهرْ بْعِدُّو خَيّ

الْغُرْبِه غدَّارَه، ما نْسِيتْ

كِل ما دِبْلِتْ زَهْرِةْ حُبّ

سْقُوها مِنْ عِينَيِّي مَيّْ

ـ3ـ

أَهْلا وْسَهْلا بْكِلّ النَّاسْ

الْـ حَبُّونَا مِنْ دُون قْياسْ

انْشَاللَّـه مِنْرِدّ الأَفْراحْ

وِهْمُوم بْلادِي بْتِنْزاحْ

تا يِصْفَى وِيْطِيب الْكاسْ

**

جيران الرّضا

عرس مارك أبي خطّار

ـ1ـ

وِصْلِتْ عَلَى بْلَوْزا زْلاغِيط الْفَرَحْ

يا مجدلَيَّا فَرْحتِكْ عِيدي

فَرْحَه كْبِيرِه كْتيرْ.. قِدَّاما انْشَلَحْ

مَلْيُون وَرْدِه انْقَطْفِت بْإِيدي

كِرْمال كِنِّه.. شَاعْرِكْ لَوْلا شَرَحْ

عَنْ فِهمْها.. بْيِتْعَتَّق نْبيدي

آيِةْ جَمال الْوَرْد عَ خْدُودَا انْجَرَحْ

وْمِن ضِحْكِتَا بْتِخْلَقْ دِني جْديدِه

كِرْمالْ شَبّ.. الْكَوْن مِتْلُو ما لَمَحْ

مِنْ بَيتْ بُو خطَّارْ.. جِيران الرّضَا

يا مِجدليَّا زَلغْطِي وْزيدي

ـ2ـ

صدَّقتْ هَلَّقْ.. بَعدْ كلّ اللِّي انْحَكَى

عَنْ هَـ الشَّلِيفِه الْـ صَار أَللَّـه مْبارَكَا

يا مَارك.. إِنْت وْهَـ الْعَرُوس الزَّنْبَقَه

فِيك الدِّنِي، بْنِتْفِةْ مَحَبِّه، تِمْلِكَا

حِبَّيتْها وْخِبَّيتْ يَوم الْمُلْتَقَى

وْصِرت السَّعادِه بْفَرد إِيد تْحَرِّكَا

يا إِبِنْ عَيْلِه عايْشِه عِيشِةْ تقَى

بِالسِّرْ عِرسَكْ كانْ.. خِفْت تْلَبِّكَا

لَكِن كَمالْ الأُمّ يَللِّي مْعَلّقَه

سْنينَا عَ فَرْحِةْ ماركْ.. مُشْ رَحْ تِتْرِكَا

قالِتْ: يا حَنَّا قُومْ شَمْسِي شَارْقَه

قِللُّو لْيُوسِفْ رِنّ جَمِّعْ أَهِلْنا

دَبْكِة زْغِير الْبَيتْ لازِمْ نِدْبِكَا

ـ3ـ

انْشَاللَّـه بْتِتْهَنُّوا عَلَى طُول الْمَدَى

وْضِحْكاتْكُنْ بِالْعُمرْ يِطْلَعْلا صَدَى

إِنْتُو تْنَينْ.. وْحُلمْكُنْ تِبْنُوا عْيالْ

لا تِتْركُوا هَـ الْحُلمْ يِطْويهْ الرَّدَى

عِيشُوا بْسَعادِه وِبْفَضَاوِةْ بالْ

مِنْ دُونْ سَعادِه هَـ الْعُمر رَايِحْ سُدَى

وْلا تِسْمَعُوا مْن النَّاسْ قِيل وْقالْ

الْقِيلْ.. يا ما هَدَّم بْيُوت البَشَرْ

وِالْقالْ.. ما خَلاَّ حَدَا يْصَاحِبْ حَدَا

**

ماري الزّغيره

عرس جورج وماري غنّوم، 3/7/1992

ـ1ـ

ماري الزّغِيرِه كِبْرِت وْصَارِتْ

زَهْرَه.. تْوَزِّع عِطرْها عَ النَّاسْ

بْبِنتْ كَوْكَبْ ضَيْعتي احْتارِتْ

مِتلْ شَمْعَه.. ضَوِّت الْقِدَّاسْ

فِرْحت الأُمّ الْـ رَبِّتَا وْطارِتْ

صَوْب السَّما تا تِطْرُد الْوِسْواسْ

تْقِللُّو: يا أَللّـه ليشْ تا جارِتْ

سْنِينِي عْلَيِّي وْقَطْعِت الأَنْفاسْ

مُوريس خِدْتُو.. دَمعْتي فارِتْ

حُزْنِي قَتَلْنِي.. الْحُزن ما لُو قْياسْ

وِكْلُود.. لَيْش كْلُود؟.. وِانْهارِتْ

صَعْبِه، يا أَللَّـه، يِنْشربْ هَـ الْكاسْ

بارِك الْبِنْت الْـ عِرْفِت اخْتارِتْ

شَبّ لابِس للرّجُولِه لْباسْ

بارِك عْيالِي كِيفْ ما دَارِتْ

إيد الْعِنايِه.. وْزَيِّنَا بْإِلْماسْ

وْلَوْلا الْغُرْبِه مْنِ الْفَرَحْ غارِتْ

وْغَطَّى الْبرْد عَتْماتْها ياربّ

تْروكْ حنّا يْدَفِيَّا بْإِحْسَاسْ

ـ2ـ

حَدْشيتْ، يا حَدْشِيتْ، بِهْدِيكِي

أَحْلى قَصِيدِه كْتَبتْها بِالْعُمْرْ

وْمُوَّالْ حُبِّي بْحِبّ غَنِّيكي

وْكَوِّمْ عَ إِجْرَيْكي تْلال الزَّهْرْ

زْرَعْنا صَبايا عُمرْنا فيكي

فْرِحْتي، فْرِحْنا، وْطار فينا الدَّهْرْ

وِالْيَوْم بِـ ماري بْهَنِّيكِي

سَمْرا.. وْغاروا مِنْ حَلاهَا السّمْر

وْجُورج مِن خِيرِةْ أَهاليكي

وِمْجدليَّا اعْتَزِّت بْهَـ الصِّهْرْ

ـ3ـ

ماري وْجورج تْنَيْن.. أَحْلى تْنَيْن

انْشَاللَّـه السَّعادِه تْلِفّ إِيَّامُنْ

مْنِ مْحَبِّتُنْ.. سَكْنُوا الْقَلبْ وِالْعَيْنْ

وْحَلُّوا الدِّنِي بِحْلاوِة كْلامُنْ

يا ربّ.. لا تْخَلِّي غْراب الْبَيْنْ

بِالْبَيْن.. يِطْفِي وَهْج أَحْلامُنْ

كِرْمال عَيْنُن بِفْرُش الْكَفَّيْنْ

سِجَّادْ.. يِمْشُوا فَوْق مِنُّو سْنِينْ

وْبِضْوِي شْمُوع الْعُمْر قِدَّامُنْ

**

وصلت قبل منّي

عرس عزيز يزبك وجوليانا شينا، 1990

ـ1ـ

مْوَدَّى قَصِيدِه عَ الْوَطَنْ

يا أَرزْتي قْرِيها

غُرْبِة عُمر فِيها

وْطَفّي بْدَمْعاتِي فِتَنْ

صَلْبِتْ أَهالينا

عَ صَخْرِة الْمِينا

ـ2ـ

مْوَدَّى قَصِيدِه خَبِّيَا بْقَلْبِكْ

تا تْخَبّرِكْ قِدَّيْشنِي بْحِبِّكْ

وِبْحِبّ إِرْجَعْلِكْ

إِمْشِي الْعُمرْ حِفْيَانْ عَ دَرْبِكْ

وِنْدُورْ إِجْمَعْلِكْ

ـ3ـ

مْوَدَّى قَصِيدِه كْرامِةْ الْعِرْسانْ

كْرامِةْ إبْن يَزْبِكْ

الْحامِلْ إسم لُبنانْ

بِعْيُونْ ما بْتِدْمَعْ

بِزْنُودْ رايِةْ مَجدْنا بْتِرْفَعْ

وْعَلَّقْ جْنُوبُو عَ الصَّدْر نيشَانْ

وِتْقَوَّى بِبْعَلْبَكْ

بْضَيْعَه شْمالِيِّه

بِكْفِرْحَبُو

بِجْبالْ.. بِالْجَنِّه السَّماوِيِّه

عَمْ يِلْعَبُوا

ـ4ـ

مْوَدَّى قَصِيدِه كْرامْتِكْ جُولْيانْ

يا بِنتْ شَيْنا

يا وَرْدِة الْـ بِالطُّهرْ لَفُّوكي

وْدَمْعاتْ أُمّ وْبَيّ سِقْيُوكي

شُو غَالْيِه عْلَيْنا

يا رَيْت فِيِّي إِمْحَش الْهُجْرانْ

وْرَجِّع الأَزْمانْ

وْإِنْقُل الإِنْسانْ

عَ بْلاد أَهْلا كْتِيرْ حَبُّوكي

تا نْكُون أَوّل ناسْ هَنُّوكي

ـ5ـ

مْوَدَّى قَصِيدِه يا هْنِيَّالا

رِجْعِتْ قَبلْ مِنِّي

تْلاقِي شَعْب ما رَاحْ مِنْ بالا

وْتِتْنَعَّم بْجَنِّه

يَاما وْياما رْكَعْت بِجْبالا

وِكْبِرْت عَ سَحْباتْ مُوَّالا

تا بْإِسمْها غَنِّي

وِحْبايْبِي هَنِّي

**

حبيب القلب

عرس شوقي مسلماني وحنان الفنج، 1990

ـ1ـ

تْزَوَّجْ حَبِيب الْقَلْب.. يا قَلْبِي

وْمِحْتارْ شُو بِهْدِيهْ

شَوْقِي.. الْـ فَرَشْلِي زْهُورْ بِـ دَرْبِي

وْمتْل الْحُلمْ لاقِيهْ

بْكِلْمِه زْغِيرِه يِمْحَش الْغُرْبِه

وْيِرْسُمْ وَطَنْ عَ صَفْحتِي الصَّعْبِه

مِنْشانْ إِسْكُنْ فِيهْ

رَبّ السَّما يْقَوِّيهْ

ـ2ـ

تْزَوَّجْ حَبِيب الْقَلبْ مِنْ حِلْوِه

بْتِتْماتَل بْزَيْنَبْ

عَ بْوابْ بَيْتا الطُّهْر بِيضَوِّي

وْمِنْ مَيِّتَا بْيِشْرَبْ

تْرَبِّتْ عَ إِيد الْخَيْر وِالنَّخْوِه

بْتِعْطِيكْ ما بْتِتْعَبْ

قَلْبَا كْبِيرْ.. وْطِيبِتَا قُوِّه

وْأَهْلها أَطْيَبْ

نَوِّرْ طَرِيقُنْ يَا نَبِي

يا مْنَوّر الأَكْوانْ

بْآيات بَيْضَا مْدَهَّبِه

بِتْشِعّ بِالْقُرْآنْ

وْخَلِّي عْيَالُنْ مَشْتَلِه

يْزِيدُوا الْفَرَحْ وِالتَّرْغَلِه

بِجْنُوبْ عَمْ يِغْلِي غَلِي

وِيْوَحّدُوا لُبْنانْ

**

صخرة متريت

عرس أنطوني ساسين وأنطوانيت بو فيصل

ـ1ـ

بْعُمْرِي ما شِفْت تْنَينْ مِتِّحْدِينْ

بِالْحُبّ، بِالإسْمَيْنْ، بِالْعَقْل الرَّزِينْ

إِسْمُنْ.. إِسمْ واحِدْ جَمَعْ قَلْبَيْنْ

أَبْيَض مِنِ التَّلجْ الْـ عَلَى صنِّينْ

يا الْيَاسْ بِنْتَكْ مُشْ شَمسْ شَمْسَيْنْ

سِهْرِتْ عَ مَرْباهَا الأُمّ.. سْنِينْ

رِبْحِت الْمَرْبَى، مَدِّت الإِيدَيْنْ

حَصْدِتْ طَهارَه مْتَلّتِه.. تِخْمِينْ

يا بَيْت بُو فَيْصَلْ.. تارِيخَكْ وَيْنْ

بَدِّي بْتارِيخَكْ عَطِّر النِّسْرِينْ

وْرِدَّكْ عَلَى لُبْنانْ شِي يَوْمَيْنْ

هَوْنِيكْ فِي صَخْرَه بْحِرْش مَتْرِيتْ

عْلَيها انْحَفَرْ: بُو فَيْصَل وْسَاسِينْ

ـ2ـ

وْيا جُورْج، يا ماري.. الْفَرَح زِنَّارْ

بْعِرْس اللِّي جاب مْن الْوَطَنْ خَالُو

لُبْنانْ كِلّو بْيَعْرِف الْمُخْتارْ

وِبْتِحْلف الأَرْزاتْ بِعْيالُو

فْرِحنا سَوَا، وِالْتَمِّتْ الأَزْهارْ

حَوْل اللِّي حَيَّكْ بِالْفهمْ شَالُو

هَيْدا عَريس الدَّارْ.. خَلُّوا الدَّارْ

تِضْوِي عَ طُول وْتِرْقُص قْبالُو

هَيْدا حَبِيب الأَرْز مهما صارْ

لُبنانْ قَلْبُو.. مْعَلّقُو بِالصّدْرْ

وْكِبْرِتْ بِصَدْرُو قِيمِة شْمالُو

**

كلمه زغيره

عرس طوني أنيسة وجانيت الشدياق

ـ1ـ

كِلْمِه زْغِيرِه بْوَشْوِش الْعِرْسانْ

بْلُغَّه.. حْمِيناها بْغُرْبِتْنا

رَحْ خَبِّرُنْ عَنْ مَوْطَنُنْ لُبْنانْ

الْـ عَمْ تِحِرْقُوا زْعاماتْ.. حَرْقِتْنا

عَنْ كمْ ضَيّعَه مْصَوَّرَا الدَّيَّانْ

شَاماتْ فَوْق خْدُودْ تَلِّتنا

بْدَمْعِة عْيُونُو بْيِخْلُط الأَلْوانْ

وِبْيُكْتُب تْوارِيخْ أمِّتنا

عَنْ كمْ عَيْلِه بْتِطْعم الْجُوعانْ

(الشّدياق) أَوّلْها عَ صَفْحِتْنا

عَيْلِه عَظِيمِه خَلِّت الْبُلْدانْ

تِشْرَب نَخبْ تِهْذِيبْ عَيْلِتْنا

(جانيتْ) مِنْها.. خَبّرُوا الرّيحانْ

انْتَقْلِت عَ ضَيْعِتْنا عَرُوسِتْنا

سُعاد أُمَّا.. قَلبْنا فِرْحانْ

وْميشالْ بَيَّا.. يا سعادِتْنا

بِنْت الأَصلْ مِتْأَصّلِه مْنِ زْمانْ

بِـ عاَصْمِه اشْتاقِتْ لَـ طَلِّتْنا

وْعِنَّا يا (طوني) بْمِجدليَّا كْمانْ

عَيْلِةْ (أَنِسِه) الأُنْس عَطْيِتْنا

رْجالْها بِتْقَدِّر النِّسْوانْ

وِبْتِحْتِرِمْ أَحْبابْ.. حَبِّتْنا

(موسي أَنيسِه) الْوالِد الإنْسانْ

الْـ رَبَّاكْ مَعْ أَطْفالْ حارِتْنا

وْ(ماري) الْحَنُونِه مْحَبِّتَا مِيزانْ

وْبِتْحِب تِرْجَحْ دَوْم كَفِّتْنا

رْبِينا بْضَيْعَه مْقَدّسِه جِيرانْ

وْما بْتِنْمَحَى لِلْمَوْت جِيرِتْنا

الِبْيُوتْ غَمْرِت بَعضْها بْإيمانْ

وِالْفلّ يِضْحَكْ عَ سْطَيْحِتْنا

بْتِذْكُر يا (طوني) بَيْتَك اللِّي كانْ

يِضْوِي بْنُورُو عَتمْ سَاحِتْنا

وْسِتَّك وْجِدَّكْ يِقِصْدُوا الدّكّانْ

تا يْنَفّعُوا سِتِّي اللِّي رَبِّتْنا

تْذِكَّرْت بِـ عِرْسَكْ شْكال لْوانْ

انْشاللَّـه يا (طوني) بْتِرْجَع الأَيَّامْ

وِبْتِفْرَح الضَّيْعَه بْرَجْعِتْنا

ـ2ـ

بَيَّكْ كَتَبْلِي كِلِمْتَيْن وْقالْ:

تْشَكَّرْ حَبَايِبْ قَلبْنا عَنِّي

أَهْل الْعَرُوس الْـ صُورتُنْ بِالْبالْ

وِالزَّنْبَقَه الْـ صَارِتْ إِلِي كِنِّه

وِبْمِجِدْلَيَّا جْمَعتْ حُبّي تْلالْ

تا وَزّعُو عَ النَّاسْ مِسْتَنِّي

لِفَّيْت فَضْلُنْ حَولْ عُنْقِي شَالْ

وِكْتَبْت كِلْمِه وْكِنْت مِتْأَنِّي:

لَوْلا عْلَيِّي جَارِتْ الأَحْوالْ

وْما قْدِرتْ رِدّ الْفَضلْ لِلأَحْبابْ

رِدُّوهْ يا وْلادِي بَعدْ مِنِّي

**

مين قال؟

عرس جان الشعّار، 1986

ـ1ـ

كِيفْ بَدِّي كِيفْ حاكِي الْحَاضْرِينْ

وِالْعَقلْ ضَايِعْ، وِالشّفَاف مْقَطّبِينْ؟

كِيفْ بَدِّي قُولْ: يا مِيِّةْ هَلاَ

ومَلْيُونْ أَهْلاَ ما بْتِكْفِي السَّامْعِينْ؟

مِنِ الإِنْجِيلْ رَحْ إِسْرُقْ صَلاّ

وْصَلِّي بْطَهارَه وِبْإِيمانْ الْخاشْعِينْ

تا الرَّبّ يا دايان.. يا سِتّ الْحَلاَ

يْوَفّقِكْ مَعْ جَانْ هَـ الشَّبّ الرَّزينْ

وِالنَّاسْ يِحْكُوا كلّ ما الصّبْح انْجَلَى

إِنُّو بْعِرْس شِعَّارْ مَعْ نِعْمِه

فَرَّخْ عَ كَعْب الْوَردْ زَهْر الْيَاسَمِينْ

ـ2ـ

وْهَـ الْعَيْلِة الْـ فِيهَا الْوَفَا قِنْطارْ

اللِّي إِسِمْها بْكِلّ الْبَسِيطَه شْعارْ

عَ الْفَضِيلِه وِالتّقَى رَبُّوا الزّغارْ

وْسِهْرُوا تا كِبْروا لَيْل يِطْوِي نْهارْ

كْبارْ هِنِّي وْخِلْقانين كْبارْ

وِبْدارْهُنْ بِالْكَونْ مِنْ أَحْسَن بْدارْ

ما بْيِنْحِنُوا.. مَهْما جَرَى أَوْ صارْ

إِسْمُنْ قَصِيدِه وْعَيْلِتُنْ "شِعَّارْ"

بْعِرسْ إِبْنُنْ جانْ كِبْر الْقَلْب

وِالْكَوْن غَنَّى وْرَقْصِت الأطْيارْ

ـ3ـ

وِبْتِسْمَحُولِي قُولْ كِلْمِه عَ الْهَدَا

وْرَحِّبْ بِـ جِيرانِي هَـ الِمْحِبِّينْ

بْمُخْتارْ ضَيْعَه الْكَونْ كِلُّو بْيِعْبدَا

الْيَاسْ.. هَـ الإِسْمُو انْكَتَبْ عَ جْبينْ

وِبْسِتّ.. أَللَّـه ما خلقْ مِتْلا حَدَا

يِعْني حَبيبِةْ قَلبْنا فْروسِينْ

**

اسطنبول والأرزة

عرس كفاح الأيوبي، 11/2/1994ـ العروس من أصل تركي

ـ1ـ

حِبَّيْت إِحْكِي.. وْكِيفْ رَحْ إِحْكِي

وْأَهْل الْعَرُوس بْيِفْهَمُوا تِرْكِي

لَوْ كانْ عِصْمَتْ، بَسّ، يِهْدِيني

قاموسْ تِرْكِي، بْتِنْتِهي اللَّبْكِه

وْكِنْت بِصْرخْ: يا مْحِبِّينِي

(هُوبّو) إيْ (هُوبّو) شْوَيّ عَ الدَّبْكِه

وْبِنْدَه صَلاحْ الدِّينْ يِعْطِيني

سَيْفُو.. تا إِرْقُصْ وِالتّرس يِشْكِي

وْبِنْدَهْ النَّخْلِه تْعَلِّق الزِّينِه

اسْطَنْبُولْ هِدْيِت أَرزْنا.. مَلْكِه

وَيْنِك يا أُمّ الْكِلّ حاكيني

كِفاحْ عِرْسُو الْيَوْم.. لا تِبْكِي

دْمُوع الْفَرَحْ عَ الْخَدّ دَزِّينِه

طَفِّي الدّموع وْنَوّري الضِّحْكِه

وْقُولي لْلَيْلَى: رَقّصِي سْنِينِي

عُمْري يا بِنْتِي، الْيَومْ، مُشْ مُلْكِي

الْبِنْت الْوَحِيدِه بْعَيْلِتَا رْهِينِه

كْرامِة كِفاح الْخَيّ، جِنِّي شْوَيّ

وْخَلِّي الْخَصرْ، يا بْنَيّتِي، يِتْكِي

ـ2ـ

نِيلْدَا، يا نِيلْدَا، الْحُبّ رِسْمالِكْ

بِالطُّهْر أُمِّكْ حَيّكِتْ شَالِكْ

وْبَيِّكْ عَطاكِي بِالْهَجرْ إِيمانْ

ما بْيِنْوَجَدْ إِلاَّ بْأَمْثالِكْ

حسْنِك التِّرْكِي سَوْسَح الأَزْمانْ

يا شَمْس.. بِالأَخْلاقْ نِيَّالِكْ

جْدُودِكْ سْلاطِينْ.. وِالسّلْطانْ

هَللِّي بْيِلْطَى بْفَيِّة خْيالِكْ

لَوْلا الْكِفاح بْيِنْتهِي الإِنْسانْ

خَلِّي الْكِفاح يْشَرْقِط بْبالِكْ

هَيْدا إِبِنْ عِصْمَت صَدِيقِي الْـ كانْ

يْسَهِّل دْرُوبي وِالْقلبْ مالِكْ

هَيْدا إِبنْ أَرْزِه بْجَبَل لُبْنانْ

بْلادِكْ، يا نيلْدا، اللِّي اخْتَرْتِيها

عَ شْطُوطْ حُبَّا وَقّفِي طْفالِكْ

**

أحلى صبيّة

عرس لوريت شينا في 29 حزيران 1996

ـ1ـ

لُورِيتْ شَيْنا.. تْكَلَّلِتْ عَ الْوَرْد

يا وَرْد فَتِّحْ بَيْن إِيدَيْها

أَحْلى صَبِيّه طَلِّت مْنِ الْجُرْد

مِنْ جُرْد بِرْقاشا الْـ بِعينَيْها

أُمّها.. رضْعِتْ حَليب الْمَجْد

تا الْمَجْد يِتْغَنْدَر حَوَالَيْها

تْرَازْيا.. اللِّي عْرِفتْها عَنْ جَدّ

بْيِنْبَعْ شَرَف مِنْ تَحْت إِجْرَيْها

وْعَمّها.. قدّيسْ خَلَّى الْبَرْد

يِدْفَى.. وْعَ شَكْلو بْيِنْحسب بَيْهَا

قدِّيسْ ناسِكْ.. شو بْيِحْلا السَّرْد

عَنْ مَحْبَسِه.. أَهْدَى الْعُمرْ لَيْهَا

غَنِّيلْها يا طْيُورْ.. حَتّى نْرِدّ

هَيْدِي عَرُوس الأَرْز.. غَنِّي بَعْد

لُبْنانْ.. قَلْبُو مْحَرَّق عْلَيْها

ـ2ـ

عَ بَيْت ثابِتْ رايْحَه عَ طُولْ

يا إبن ثابِتْ غَنِّجَا أَكْتَرْ

إبْن الأَصَالِه بْيِحْمِلا عَ خْيُولْ

خَلّي الْخُيُول بْقامِتا تِفْخَرْ

أُمّك وْبَيّك زَيّنوا الِعْقولْ

وْخَلّوا الْفَضيلِه بْطَلِّتُنْ تِكْبَرْ

قْلُوبُن اللَّيْلِه عَمِ تْدُقّ طْبُولْ

وِعْيُونُن بْدَمْعاتْها تِسْـكَرْ

نَطْروا تا تِفْرَح.. وِالتَّهانِي سْيُولْ

وْشِي أَلْف (يِرْضَى عْلَيْك) تِتْفَجَّرْ

غايِبْ عَن عْيُونُنْ قَمَرْ أَيْلُولْ

تا بْأَرْض سِيدْنِي الْيَوْم يِتْمَخْطَرْ

بَيْرُوتْ.. قِصِّةْ مَجْد، مَهْما نْقُولْ

مَقْلَعْ بُطُولِه.. حْجَارْتُو جَوْهَرْ

تْرَابْهَا.. بْدَمّاتْنا مَجْبُولْ

مِنْقَدّسَكْ يا تْرابْها الأَسْمَرْ

بَيْرُوتْ.. نُقْطِةْ دَمّ عَمْ بِتْجُولْ

بِقْلوبْنا.. يا قْلوبْنا صُونِي

أَرْزاتْ.. أَللَّـه مْلَوَّنا بْأَخْضَرْ

**

قمر بيتي

كتبتها ليلقيها السيّد حنا إيليا من بلدة حدشيت في عرس ابنه ريمون،2001

ـ1ـ

الْبَيّ الْحَنُون بْيَعْرِف الأَطْفالْ

كِيفْ رِبْيُوا وْكِيفْ صَارُوا رْجالْ

وْفِي طفْل عِنْدي كنْت حِبُّو كْتِيرْ

رِيمُونْ إِسْمُو.. عاشْ فاضِي الْبالْ

يَاخُدْ رضَا أَهْلُو بِالِقْناطِيرْ

صْلاوَاتْ أُمُّو بْتِنْغَزلُّو شَالْ

وْصُلْبانْها مِنْ فَوْق رَاسُو تْطِيرْ

وْدَعْواتْها.. عَ شْفافْها مَوَّالْ

يِرْضى عْلَيْك الرَّبّ صِرْت كْبِيرْ

يا قَمَرْ بَيْتِي.. يا بِكرْ الِعْيالْ

وْمَهْما كِبِرْ رِيمُون.. بَعْدُو زْغِيرْ

بِعْيُون بَيُّو.. الْـ عَيّشُو بِدْلالْ

بْقِلُّو: يا إِبْنِي، صِيرْ نَسْر وْطِيرْ

إِنْت إِبْن جْبالْ ما بْتِنْطالْ

إِبن أَرْز الرَّبّ.. إِبْن الشِّيرْ

إِبنْ وادِي.. قْداستَا رِسْمالْ

إِبْن الْبُطُولِه.. الْـ عَطْيِت التّحْرِيرْ

لا تْعِيش يا بْنِي بْذُلّ مَهْما يْصِيرْ

حَدْشِيتْ زَرْعِتْ أَرضْنَا أَبْطالْ

ـ2ـ

وْطَلِّتْ سَامِنْتَا.. قِلْت: إِبْنِي حَبّ

وْحِسَّيْت أُمُّو بِكْيِت شْوَيِّه

وْقَالِتْ: يا حَنَّا صَارْ إِبْنَكْ شَبّ

وْمَرْتِي أَنا بِتْدُوبْ حِنِّيِّه

عَرُوس إِبْنِي خَايْفِه مْن الرَّبّ

بِنْت عَيْلِه أُسُتْرَالِيِّه

وَرْدِه جُورِيِّه مْفَتّحَه بِالْغَربْ

تا أُوصفَا، يا ناسْ، ما فِيِّي

يا سَامِنْتا السَّاكْنِه بِالْقَلْب

مْنِ الْيَوْم صِرْتي بِنْتنا، وْصَفَّى

إِسْمِكْ سَامِنْتَا الْحَدْشِيتِيِّه

**

جار السيّدة

عرس سيمون ومنال إيليا في 26 تموز 2003

ـ1ـ

حَابِبْ اللَّيْلِه ذُكْرَياتُو عِيدْ

وْكِرْمالْ عَيْنُو فَقِّع قْناني النّبيدْ

كانْ طفْل زْغِيرْ يِضْحَكْ لِلْهَوَا

كِيفْ ما مِشِي بِتْزَهِّر مْواعيدْ

جِيرانْ عِشْنا.. الْعُمْر قِضَّيْنا سَوَا

وْبِحْلفْ ما مَرَّه طَلّ مِيلادُو الْمَجِيدْ

إِلاَّ ما سَايْمُنْ كانْ لِلْجِيرِه دَوَا

وْفِي كَرْت مِنُّو بْقَلْب صَنْدُوق الْبَرِيدْ

ـ2ـ

سَايْمُنْ إِيلِيَّا، الْيَوْم، صَفَّى شَبّ

زَارْ سِتُّو.. بِنْت خالُو حَبّْ

يا أُمّ يُوسِفْ زَيّنِي حَدْشِيتْ

وْرِشِّي الزَّهْر عَ أَلْف دَرْب وْدَرْب

حَدْشِيتْ جارِةْ أَرْزنا الْـ ما لْقِيتْ

مِتْل شَعْبَا، بْهَـ الْخَلِيقَه، شَعْبْ

نسْر الْبُطُولِه.. تَحْت جِنْحُو رْبِيتْ

وْلَوْلا سَلامُو رَكّعِتْنا الْحَربْ

تا سَمّعِكْ، يا أُمّ يُوسِفْ، جِيتْ

وْجايِبْ قَصِيدِه مْلَفْلَفِه بِالْحُبّ

رَحْ إِلْقِيَا عَ رَنِّةْ زْلاغِيطْ

وْحَقّ مارْ مانُوس شَفِيع الْقَلْبْ

سَامِعْ زْلاغِيطْ أَرْز الرَّبّ

ـ3ـ

مَنالْ زَهْرَه مْفَتّحَه بْبُسْتانْ

كلُّو مَحَبِّه وْعاطْفِه وْإِيمانْ

أُمَّا وْبَيَّا رَضّعُوها الْمَجْدْ

وْزَرْعُوا بْقَلْبَا أَرْزِة الأَوْطانْ

بِالْجُرْد مِتْلا ما الْتَقَى بِالْجُرْد

التُّفّاحْ تارِكْ عَ خْدُودَا لْوانْ

أُسْتاذْ بَيَّا.. كلمْتُو بِتْهِدّ

حَبْس الْجهْل تا تْعَمِّر الْبُلْدانْ

يا أُم جليل.. الْوَرْد مَنُّو وَرْد

لَوْ ما انْشَلَحْ قدَّامْ هَـ الْعرْسَانْ

سَايْمُنْ.. مَنالْ.. تْنَيْنْ حَبُّوا بَعْضْ

وْرَفْعُوا إِسمْ لُبْنانْ بِالْهُجْرانْ

تا يِفْرَح بْإِسْمُنْ جَبَل لُبْنانْ

ـ4ـ

جِيرانْ نِحْنا.. يا رِيمُون وْسَيِّدِه

جِيرِة مَحَبِّه كلّ عُمْرَا مْعَيّدِه

لَوْ قِلْت عَنَّكْ خَيّ.. بِـ حُبَّك دِخْتْ

وْلَوْ قِلْت عَنِّكْ أُخْت.. لازِمْلِي أُخْتْ

بْيِكْفِي عِشتْ هَـ الْعُمْر جَار السَّيْدِه

**

بنتي الوحيده

كتبتها ليلقيها السيد حنا إيليا في عرس ابنته ديانا وجورج زخيا، نيسان 2008

ـ1ـ

بِنْتِي الْوَحِيدِه.. بِيفَرَحْهَا جِيتْ

ضَوِّي اللَّيَالِي وْدَمْعتِي الْكبْرِيتْ

شِفْت إِمَّا فَرْحِتَا قِنْطَارْ

مارِي الْحَنُونِه.. الْعَا طَرِيقَا مْشِيتْ

سِهْرِتْ تَا رَبِّتْ.. والِوْلادْ زْغَارْ

وِالْيَوْم كِبْرُوا.. وِالسَّهْر ما نْسِيتْ

مِنْ كِتِرْ حُبِّي قِلْت: مَرَّه سْهارْ

وِعْيِتْ الأُم.. وْبَعِدْنِي مَا وْعِيتْ

ـ2ـ

وْشَايِفْ زْغَرْتا رَقْصِتَا مِنْ نارْ

مَع كِلّ دَبْكِه تْشَرْقِطْ زْلاغِيطْ

يِرْحَمْ تْرَابُو.. رَبّ هَاك الدَّار

بُولُسْ.. ما قِدْرِت تِحِجْبُو تْوابيتْ

بَيَّكْ تَقِي.. يَا جُورج زَخْيَا.. فْخَارْ

إِبْن الأَرْز مُشْ لازْمُو تِحْنِيطْ

وْحَوَّا الأُمُومِه.. الْصَارْ بَيْتَا مْزارْ

حِبَيْتْ أُوفِيهَا.. وْما فِينِي وْفِيتْ

تْرَشْرِشْ رَضَاهَا عْلَيْك لَيْل نْهارْ

وَحْدُو الرَّضَا.. مُشْ لازْمُو تِوْقِيتْ

ـ3ـ

دْيَانَا.. يَا بِنْتِي.. بْحَلّفِكْ بِ مارْ

مَانُوسْ شَفِيعِي الْحَدّ دَيْرُو رْبِيتْ

بِالْبَيْت كُونِي زَهْرِة الأَزْهارْ

كِيفْ ما مْشِيتِي تِعِمْلِيلِي صِيتْ

زَوْجِكْ حَبِيبِكْ.. مِتِلْ إِبْنِي صَارْ

بْكِلْمِةْ يا عَمِّي.. تْرِسْمَلِتْ وِغْنِيتْ

وْحِطِّي بْرَاسِكْ جُمِلْتَيْن كْبَارْ:

بَعدْ أَللَّه.. وِالْوَطَنْ لُبْنانْ

حُبِّي زْغَرْتا وْإِهْدنْ وْحَدْشِيتْ

**

عيد الحب

عرس ساسين ومروى النبوت ـ 14/2/2009

ـ1ـ

كيفْ الْمَحبّه بْتِخْلَق مْنِ بْعيدْ

وْكيفْ عيد الْحُبّ جَمّعْنا؟

الْيَوْم الْتَقَيْنا.. فِرْحِت مْواعيدْ

وِالْعيدْ صَفّى يِحْتِفِلْ مَعْنا

ـ2ـ

بْباريسْ كانْ.. وكِنْت إشْتَقْلُو

يْوَدّي رِساله.. بْشَوْق إكْتِبْلُو

متْل الْكِذبْ.. صِرْنا مِتلْ خَيَّيْن

ساسينْ.. صَعْبِه يِنْوَجَدْ مِتْلو

ـ3ـ

دكْتُور.. شاعِرْ.. عَبْقَري.. رَسَّامْ

وْقِمّةْ تَواضُع.. متل قَمْحاتو

لا تْفَكّروا رَحْ تِضْحَك الإيّام

إلاّ ما تِسْمَع صَوْت ضِحْكاتو

ـ4ـ

تْطَلّعوا بْوجّو.. بْتِلْمَحُو ميشالْ

بَيُّو.. الْـ نِسِي بِـ ضَيْعِتو خْيالو

شارِبْ حَنانْ.. جْبالْ فَوْق جْبال

إمُّو حَنان.. وْيا هْنِيّالو

ـ5ـ

عِدْبِل بِقَلْبُو.. دْمُوع بَيّ وْأم

وْكَمْشِةْ رضَى.. وعْيُون تِضْحَكْلو

عِدْبِلْ بِقَلْبو.. شْلُوش تِنْزُف دَمّ

كلّ ما إِجَا مَكْتُوب مِنْ أهْلو

ـ6ـ

حَبّ الْقَمْر.. شاف الْقَمَر مَرْوى

هَالحْاكُورِيِّه.. الْـ فِهِمْها قِنْطارْ

كلّ الْخَليقَه طَلّتا بْتِهْوى

هَيْدي وَحيدِةْ بَيْت مِنْ عَكَّار

ـ7ـ

هَيْدي رْفيقِةْ إمّها.. وْأَكْتَرْ

شِبْعِتْ رضَى.. تِمّ الرّضَى خَبّر

ماري ومَرْوى.. بْيِبْتِدوا بِالْميمْ

مَرْيَم الْعَدْرا مْنِ الطُّهْر أَطْهَرْ

غَنّوجْة الْبابا.. سْأَلوا ابْراهيمْ

عَنْ طفْلِتُو.. الْما حَبّها تِكْبَرْ

ـ8ـ

يا بِنْت مَلْبُورْن.. يا عَرُوسِتْنا

يا مْزَيّنه الغُرْبِه بْأَحْلَى زْهُورْ

خَبّي الْعُطر لِبْلادْ حَبّتْنا

اشْتاقِت لْعُطْرِك عِدْبِلْ وْحاكورْ

ـ9ـ

لُبْنان حُصْنِي.. وْأَرْزتي النَّبُّوتْ

وْبِقْلوبْنا.. رَح تِنْبَنى الِبْيُوتْ

مَهْما عْلَيْنا يْهَبّطوا حيطانْ

وِيْحارْبوا الإِنْسان بِالإِنْسانْ

لُبْنانْ باقي.. وْصَعْب إِنُّو يْموتْ

جَيشِك إبن عَكَّار.. يا بَيْروتْ

**

تلميذتي

كتبت هذه القصيدة ليلقيها السيد ناجي نخل في عرس ابنته (تلميذتي) الدكتورة سارة

ـ1ـ

فرحان قلبي كتير يا بنتي

ولا تواخذيني ان كرجت دموعي

كان الفرح من يوم ما كنتي

يا ضلع.. عم بيودّع ضلوعي

متل إمّك.. طهرنا صنتي

وبالطبّ صرتي تنوري شموعي

غنّى الأرز.. لمّا تكوَّنتي

بُكرا بولندا بتغمرك بالحب

كل ما تنامي وكل ما توعي

ـ2ـ

إمك يا ساره.. دمعتا قنطار

وقلب الأمومه كتار طلباتو

ركعت تصلي وقلبها ع نار

وأللـه بيسمع كل صَلْواتو

كنتي رفيقة دربها.. ومحتار

كيف إخوتك رح يقطعوا المشوار

وقلبي أنا ترتاح دقّاتو

ـ3ـ

ويا صهر.. أهلا فيك بِعيالي

متل إبني صرت.. نيّالي

إنتَ وساره.. "نخلتين" كبار

بِـ بيت "نخل" العايش بْبالي

تحيا بولندا وشعبها الجبّار

ويحيا الأرز بِـ قمّة جبالي

**

بنت بقرقاشا

عرس دايفيد ماندفي وأوليفيا شينا 28/4/2012

ـ1ـ

زغيرة ولادو.. فرحتو كبيره

يرحم ترابو الكان شيخ الدار

بتتذكرو.. وما بتقطع السيره

ترازيا.. اللي محبتا قنطار

خبّت ولادا بقلبها.. دخيره

وقالت: يا راي.. الـ فرقتك من نار

أوليفيا.. ما عادت زغيره

صارت عروس مزيّنه بْأزهار

وع قد ما وزناتها كتيره

دايفيد.. خطفها من إيديي وطار

ـ2ـ

أوليفيا ودايفيد.. بـ عينينا

كرمال عينُن شمع ضوّينا

نحنا عليهُن نشلح الوردات

وهنّي الفرح عم يشلحوا علينا

عرسان.. فوقن رقصت النجمات

وجنّ الطبل بالعرس.. جنّينا

وحدّ  العروس اصطفّت القامات

كاسُن شربنا.. وصلبت دَيْنا

إخوه كبار كتير مع خيّات

هَايْ ثروتِك.. يا ترازيا شينا

ـ3ـ

يا صهرنا.. رح خبرك عنّا

نحنا عيال معوّده ع الحبّ

منّا القداسه الطاهره.. ومنّا

كلمة يا أهلا.. الطالعه من القلب

تزوجت بنت الأصل.. تتهنّى

هاي بنت بقرقاشا اللي حدّ الأرز

الأرز اللي إسمو اليوم: أرز الربّ

**

أيهم وجاسيكا

عرس أيهم شكر وجاسيكا ابي خطار، 23 حزيران 2018

ـ1ـ

اليوم عرسَك يا قمر نوّار

زيّن الساحه وكتّر الأزهار

"أيهم" وقت ما حبّها ع طول

شاف الخليقه "بجاسيكا خطّار"

القانون فوق كتافها محمول

هيدي محامية شعب جبّار

قلّا بعرسي اليوم دقّي طبول

يا جاليه.. وخلّي الموسيقى تغار

بنت الأوادم سوسحت العقول

بيّا وأمّا بمجدليا كبار

يا "أيهم" المحبوب مش معقول

كرمال عينك رقصت الأشعار

"باسم" أبوك من السما بيقول:

"ندوى يا ندوى" زلغطي بهالعرس

إبني حبيبي جاب أحلى الشمس

رزقهن يا أللـه.. كم طفل زغار

ـ2ـ

البنت الوحيده اليوم طلعتها

متل الشمس والبدر طلتها

"روزيت" مع "للوس" فرحانين

وخيين غزلو بحب طرحتها

يا "دجاسيكا" يا زهرة الياسمين

آخد حلاكي لون بشرتها

و"مجدليا" الـ كلها بساتين

توزّع على الغياب بركتها

عند "البيادر" زادت التلوين

ورسمك بيضوي ع كنيستها

ولو يسألوها مين هيي مين؟

من بيت "بو خطار" عيلتها

هيي لعيونا غنّت حساسين

هيي الوحيده بين إخوتها

واليوم جايي "شربل" المسكين

هالفزعا بـ عمر خمس سنين

يرش القصايد يوم فرحتها

**

داني ورينيه

9 حزيران 2019

ـ1ـ

بعاد نحنا عن وطنّا بعاد

وضياعنا حد الأرز ببلاد

وجينا ع سيدني نزيّن الهجران

بعيال تركت بالهجر أمجاد

ـ2ـ

"شدياق وستيفن" نبع إيمان

أسياد عاشوا وخلّفوا أسياد

"داني" عرفتو طيّب وانسان

مع إخوتو من يوم كانوا ولاد

ـ3ـ

هالشب بيشرف أرز لبنان

"بيروت" أمو.. بورقة الميلاد

وهلّق بتاسع يوم يا حزيران

الفرحه الليله فرحة الأعياد

ـ4ـ

"داني ورينيه" عرسان شو عرسان

سنينن يا أللـه بالفرح تنزاد

"رينيه" بعلما سوسحت أزمان

هاي بنت "تولا" ضيعة الأجداد

ـ5ـ

بيّا قبل ما يموت يا ديّان

تارك وصيّه بحبّها تنعاد

وصّى عفاف الأم وين ما كان

تعطي العيله من المحبه زاد

ـ6ـ

ومع هـ الموسيقى وهيصة الالحان

من فوق من أعلى سما طلّي

وزلغطي بهالعرس يا أغلى "سعاد"

**

باميلا

كتبتها لتلقيها تلميذتي باميلا خوري في عرسها 2015

ـ1ـ

رِبَّيْتني عَ الحبّ يا بيّي

وعطيتْنِي مْنِ مْحَبِّتَك مَخْزون

البنت الوحيدِه إِجْتَك هْدِيِّه

وعِرْفتْ كيف هديّتَك بِتْصون

عَ طولْ شُوفَكْ خايِفْ عْليّي

مجنون كنت بطفِلْتَك مجنون

يا نعمة الربّ السماويّه

طول العمر قلبي إلَكْ مديُون

وإنتي يا إمّي العايشِه فيّي

طبق الأصل عنّك أنا رح كون

إنتي القداسه بصفحة شبيّه

يا ساكنه جوّات عينيّي

من الصعب إنّك تتركي العيونْ

ـ2ـ

مْنِ بقاعكفرا.. من جبل لبنان

زارع بِـ قلبي زهور المحبّه

تسلم يا بيي الطيّب الانسان

تسلم يا أرزة مجد بالغربه

لمّن بصلّي بسأل الديّان

يِضْويكْ شعلة نور بِـ دربي

وإنتي يا امي.. يا قمر نيسان

يا طلبة الما بتسبقا طلبه

البنت الوحيده مزيّنه بإيمان

من قلب طاهر باركو ربّي

إنتي وبيي كنز بالهجران

رح تسكنوا عَ طول بِـ قلبي

ـ3ـ

يا دْجايمس دحدح يا حبيب القلب

ركعنا نصلّي المسبحه سويّه

والمسبحه تفرشلنا هـ الدرب

أحلام مع وردات جوريّه

يا زغرتاوي.. يا أحلى شبّ

ريتّا القداسه.. راضيه عليي

وإنتو يا أغلى ناس.. رمز الحب

بشكركن من القلب ليل نهار

بـ إسم إمّي.. وبْإسم بيي

**

حسن والفت

خطوبة حسن صباغ والفت علي كرنيب ـ أول نيسان 2016

ـ1ـ

أُلفت علي كرنيب حَبّت شبّ

ساكن بصدري سْنين.. جُوّا القلب

إسمو حسن صبّاغ شَيْخ شْبابْ

راضي الأهل.. وعليه راضي الربّ

بـ "الأنتْرِس" عشنا سوا أصحاب

وبعدا الصحبه ماشيه ع الدرب

طاهر، أمين الكفّ، مش كذّابْ

شاطر.. ذكي.. إنسان.. وبينحبّ

ـ2ـ

وبَيّك يا أُلفتْ زيّن الغربه

إسمو علي كرنيب بيكفّي

صاحب وفي عم يسكن بقلبي

ووين ما سَكَنْ بيرجّح الكفّه

بْعرس بِنْتو طلبت من ربي

يْعَبّي حَياتا حُبّ للشِّفّه

ومع حسن صبّاغ بمحبّه

ترسم طريقا.. بزهرة العفّه

واليوم لمّا بتنتهي الخطبِه

بتحضن مارون الراس بنت جبيل

وبأرض سيدني بْتعْمَر الزفّه

ـ3ـ

"الحسّون" عم يفرح بطلّة أم

زلاغيطها رقصت ع أشرف تمّ

جايي وبقلبا حامله الأوطان

ودمعة شعب كل يوم عم ينسمّ

جايي تهنّي بضحكتا العرسان

بإسم الأمومه تشيل عنّن همّ

حملت معا ترابات من لبنان

وقالت: يا أُلفت.. علّمي الأطفال

تراب الجنوب بْيِنْفَدى بالدمّ

ـ4ـ

حِبّ أُلْفَتْ.. غَنّجا عَ طولْ

أَحْلَى عروسْ مْسَوسَحَه الِعقُولْ

بالعلم.. بالاخلاق.. بالايمان

وإسمَك حَسَن.. هالإسم مُشْ معقول

افتكروا العرس كذبة شهر نيسان

تاري حقيقه.. صعب إنّو تزولْ

ربّوا بْتَقْوى بْناتْ مَعْ صِبْيانْ

يوزّعوا الرحمه بِـ هالأكوانْ

ساعتا مِنْقُول: دقّي يا طْبُولْ

**

عرس الجنوب

عرس حسن صباغ والفت كرنيب، تموز 2016

ـ1ـ

عرس الجنوب اليوم.. يا جنوبي

بإسمك آيات الحب مكتوبه

أُلفت أبوها من مارون الراس

أحلى عروس كتير طيّوبه

إسمو علي كرنيب.. شو حسّاس

بْورد الصداقه زيّن دروبي

"ألفت".. "حسن".. عم يلتقوا يا ناس

بعرس المحبّه زينة الأعراس

ودوبي يا دقّات القلب دوبي

ـ2ـ

من أرض بنت جبيل طل الشبّ

الإسمو "حسن".. هالاسم شو بينحب

شاف الجمال بْ "ألفت" حكايه

صارت عيونو تنطرا ع الدرب

قللا يا أمي: حسنها آيه

رفعت إيديها وتمتمت: يا رب

ولمّا البدايه.. صارت نهايه

قللاّ يا "ألفت" مطرحك بالقلب

ـ3ـ

إبن الجنوب كبير بالايمان

رمز البطوله، صامد وإنسان

صرلو عمر عم يسكن بقلبي

تمجّد بـ شعري من قديم زمان

صفحة "حسن صبّاغ" منكتبه

بطلبات "أم حسين" للديّان

ودمعة عروس الزهر منسكبه

من "أم أحمد" زينة النسوان

خلّي السّعاده تعمّ يا ربّي

هْديهن بنات زغار مع صبيان

يربوا برضاك.. يزيّنوا الغربه

تا يفتخر فيهن أرز لبنان

ـ4ـ

شايِفْ حسن بِـ هالعرس مسرورْ

وْحَدّو عروس مشعشه بالنور

ومايك خيّو، الدّم من دمّو

كرمال عرسو شَقّ سبع بحور

بدّي علي كرنيب من تمّو

يقول السبب ويفهّم الجمهور

قللي: حسن فرحان بـ إمّو

يا ريت مَعْها شَرّف الدكتور

**

شربل وساندرا

عرس شربل ضوميط وساندرا كلتوم

ـ1ـ

سيدني.. ربيعا اليوم بكوانين

بعرس اللي زوزق ليل غيّابو

قناني الويسكي باست فناجين

متل الشتي العرقان مزرابو

بشرّي الليله غنّت تلاحين

جبران واعي بفرحة حبابو

والأرز حيّك طرحتو من سنين

صارت عتيقه كتير بعبابو

كل الزهور بيعرفوها مين

كتاب الأدب زادت ع آدابو

بتلميذتي الأشعار فرحانين

وشموعنا ع مدبحا دابو

هالساندرا اللي بيعشقا التلوين

القانون عم تسكن بمحرابو

بكلتوم رحمه بتفرح الآمين

جمّع قداسه وحبّ بحسابو

إيلي.. الْ سيّج كرم ببساتين

ومنى اللي زرعت طهر بترابو

وكل ما ع زندا تمرمغت تخمين

البنت الوحيده بين الحساسين

قولوا القمر بيأخّر غيابو

ـ2ـ

يا الياس، يا نورما ويا محبين

شربل ضوميط مهندس شْبابو

حامل إسم قديس قنّوبين

مليون طلبه مشرّعه بْوابو

بيّو زرع بالصدر حبّ ولين

وإمّو برضاها رفعت عْتابو

حرش الأرز بجرود تنّورين

رْجال البطوله حميت كْعابو

ما أجملن طيرين مغرومين

تابوا.. وعن الاخلاص ما تابوا

حبّها.. حبّ التقي للدين

الـ بيوحّد الانسان بكتابو

حبّها حبي أنا لصنين

لتلجات يوم وداعنا شابوا

لأرز.. متلو مين ضحّى مين

ضحّى بشبابو تا بقي لبنان

وبعدو بيضحّي بخيرة شبابو

ـ3ـ

لشربل ضوميط اليوم شو بقلّو

وْعارف بقلب قلوبنا محلّو

يا ساندرا اللي متل زهر الفلّ

قلبك حنان وحب ع حلّو

علّمتك زغيره.. العلم بيضل

يِكْبَر معك.. صرتي العلم كلّو

انشالله الفرح متل الشمس بيطلّ

وبكم طفل وبنت تتسلّوا

وحتّى السّعاده ترف فوق الكل

لمار شربل لازم تصلّوا

**

جورج وويندي

عرس جورج انطوان دريبي وويندي جوخدار 16/9/2017

ـ1ـ

جورج وويندي هالعرسان

بقدّملُن أحلى القصدان

وبرجع هنّي الجوخدار

بأحلى زهرات البستان

يا مايكل.. يا آنا.. الصار

بهالعرس الكلّو إيمان

عنّو منحكي ليل نهار

ومنهنّي أرزة لبنان

ـ2ـ

ويا طوني ويا أنطوانات

بهنيكن بتلات بنات

دابي وتاري مع ويندي

عيله زينتها الستّات

كبيره قيمتكن عندي

بخبّر بالأربع جهّات

إنتو لعيوني سندي

وإنتو الأهل اللي بحبُّنْ

يرحم هاك الشب المات

**

جايسون ونيكول

كتبتها ليلقيها الصديق جون ايليا بعرس ابنه جايسون

ـ1ـ

إبني الزغير.. اليوم إكليلو

يا طيور قلبي بهالعرس طيري

كان طفل.. وكنت صليلو

ومن مار مانوس علّق دخيري

وأمّو تزينو.. يرجّح الكيلو

تقيسو بشبرا.. تخبّر الجيري

يا مريات اليوم غنيلو

نيكول حدّو شمس عم تضوي

وقلبي أنا.. شو فرحتو كبيري

ـ2ـ

يا بيت رزق الإسمكن عنوان

للتضحيه.. للخير.. للإيمان

نيكول بنتي بقولها وبعيد

بالقلب هيي ساكنه من زْمان

فاتت ع بيتي وكان عندي عيد

زادت الفرحه ومحيت الهجران

يا جورج.. يا دولي.. إذا بيريد

رب السما.. بيكتّر الصبيان

وبنات حتى يشّع فجر جديد

ونصير عيله مباركا الديّان

سيدني إذا عم تسمع زغاريد

حدشيت عم تدبك من الفرحه

وغابة الأرز الشامخه بلبنان

ـ3ـ

ما في شكر.. تا إشكر محبين

من فرحتن بالعرس سكرانين

قلبي إذا بيقول كلمه بس

بتبكي عيوني سنين خلف سنين

كنتو بعتم الهجر أحلى شمس

نجمات بالإخلاص مضويين

انتو السعاده الزينت هالعرس

انشالله العمر بيمر بالأفراح

آمين يا رب السما.. آمين

**

باتريك

عرس باتريك الياس اسحق

ـ1ـ

جاب العروس اليوم من إيران

باتريك اسحاق مكيّف وفرحان

وعرس خيّو "سعد" قبل بشهر

يا عزير، والله، رقّص الهجران

ـ2ـ

ولاد خيي الياس.. رفقة دهر

شاعر ع طول مرافق الفنان

هيدا "بو داني" الما نسي بالهجر

إسمك يا ضيعه مزينه ألأوطان

ـ3ـ

ويا باتريك الحبيت شمس الفجر

بتشرق تا يضوي قلبك الولهان

تزوجتها تا الشمس تغمر بدر

تزوجتها تا تفرّح الديّان

ـ4ـ

انشالله السعاده تفيض متل النهر

وتسقي عيال مقدسه من زمان

وتبني البيت الما بيعرف قهر

وتزيّنو بنيّات مع صبيان

ـ5ـ

يرحم تراب الأم جوّا القبر

ربّت ولادا بحب وبتحنان

والياس قدّملا سنين العمر

كفّى الرساله بصدق وبإيمان

ـ6ـ

يا عزير هاتي من زهورك غمر

وطلبات حابب تسمعا البلدان

وقدّم مع زهورك بيوت الشعر

هديّة محبه.. تفرّح العرسان

**

سعد

عرس سعد الياس اسحق

ـ1ـ

يا عْزير.. جايي اليوم هنّيكي

ومن غربتي حَيّي أهاليكي

اليوم عرسك.. عرس سعد البار

خلّي الزهر يفرش روابيكي

الياس بيّو محبتو قنطار

شارب النخوه من سواقيكي

ويرحم الأم الربتو تا صار

يوزّع محبّه وفخر يعطيكي

عندي حلم.. مهما دولابي دار

مع الياس اسحاق لاقيكي

ندوزن العود.. يسلطن المزمار

بصوتو الحلو حتى يغنيكي

نرفع الكاس.. ندوّخ الخمّار

ونشرب نخب أحبابنا فيكي

ـ2ـ

يا حاضنه المعمور وين ما كان

منِ كْرُوايْشا البنت لاقيها

هيدي "أنيتا" مزينه الأكوان

سعد البقلبو صار يحميها

بتلغي المحبه حدود هالبلدان

بتدمج لغات شعوب تحكيها

يا عْزير.. نحنا ولاد هالديان

كل الخليقه الرب راعيها

بسر الزواج توحّدوا العرسان

رح نوب عنّك.. عن سوريا وقول:

أهلا بعروستنا وأهاليها

**