درب الحبايب

Charbel Baini

Darb Alhabayeb

The path of the beloved

قصائد مختارة من كتب الشاعر

Cover by Randa Baini

**

قصائد الكتاب

ـ درب الحبايب  ـ شيرين أبو عاقلة  ـ مصطفى الحلوة   ـ درب الحكي (مصطفى الحلوة)  ـ عصام حداد   ـ بدر جبيل (عصام حداد)  ـ إبن نيحا (وديع الصافي) ـ سعيد عقل وصباح  ـ يونس الابن  ـ ادوار حرب ـ الأم تيريزا   ـ جبران ـ سيد بكركي (البطريرك صفير)   ـ البيّاتي.. الحلم الراجع   ـ نزار قباني اسمك  ـ ابن الشام (نزار قباني)   ـ البطل يوسف كرم    ـ بي الصحافة (لويس الحاج)   ـ فرحة قلب (يوم محمد زهير الباشا)    ـ ماتت قصيدة (الراهبة ارنستين خوري)   ـ طلت النجمة ( الراهبة جيلبير فارس)   ـ هاشم الأيّوبي  ـ بيوت الشعر (محمد ياسر الأيوبي)  ـ مالك طوق ـ مدحة وجبران (الشاعر مدحة عكاشة)  ـ باقي انت باقي (توفيق يوسف عوّاد)  ـ شهيد الحق (توفيق يوسف عواد)  ـ ناطور قلعة (ميشال طراد)  ـ نسر من لبنان (يوسف روحانا)  ـ كبارنا انتو (انيس فغالي، جان رعد، واسعد سعيد)  ـ غطسني (المطران عبده خليفة)  ـ فليحيا الملك (المطران عبده خليفة)  ـ المطران والعدرا (المطران عبده خليفة)  ـ الفارس رحل (المطران عبده خليفة)  ـ بطرك تقي (البطريرك الياس الحويك)  ـ كونين (شوكت مسلماني)  ـ نسر كونين (شوكت مسلماني)  ـ المسلماني واحد بس (شوكت مسلماني)  ـ السانتور شوكت مسلماني  ـ زهر الكون (المونسنيور بولس الخوري)  ـ راعي جديد (المطران يوسف حتي)  ـ سيدنا (المطران يوسف حتي)  ـ شربل نعيمي  ـ راحوا (روميو عويس)  ـ روميو.. بعد سنة  ـ روميو  ـ جبرين وجبران (يوسف جبرين)  ـ بحيرة ضوك (نعيم خوري)  ـ كونستانس اختي (الراهبة كونستانس الباشا)  ـ كونستانس  ـ شطوط الألم (تراز واسكندر علم)  ـ الجائزة (جرجي ابي اسبر)  ـ ساعدني (لطيف ابو الحسن)  ـ بحبك.. ليش تا خبي (لطيف ابو الحسن)  ـ أغلى حبيب (لطيف ابو الحسن)  ـ بحبكن (لطيف ابو الحسن)  ـ انسان (لطيف ابو الحسن)  ـ زنبق زمانك (لطيف ابو الحسن)  ـ كاما.. كمالو نور (كامل المر)  ـ طائر الشوق (زين الحسن)  ـ كوكتيل مع الشاعر الغريب  ـ معلم انت (فؤاد نمور)  ـ عفيف (عفيف نقفور)  ـ سبعين سنة (الراهبة مادلين ابو رجيلي)  ـ لو مهما صار (ندوة حول مؤلفاتي)  ـ عيدك عيدي (عصمت الأيوبي)  ـ ابو زياد (بطرس عنداري)  ـ قاضي المدينة (انطوان الشدياق)  ـ لغة مضويه (طوني سعد)  ـ ابن زعيتر (سمعان زعيتر)  ـ المتروبوليت بولس صليبا  ـ يا سيدي المطران (المطران انطوان شربل طربيه)  ـ وعدي إلك (جان ألفا)  ـ سفير بلادنا (جان ألفا)  ـ النحات نايف علوان  ـ نايف ابن علوان  ـ تكريم القنصلية (بهية ابو حمد وجورج البيطار غانم)  ـ درع الثقافة (بهية ابو حمد وجورج البيطار غانم)  ـ بهية (بهية ابو حمد)  ـ كتابك (بهية ابو حمد)  ـ جورج وبهية (بهية ابو حمد وجورج البيطار غانم)  ـ يا مسافرة (بهية ابو حمد)  ـ انتي الأرزة (بهية ابو حمد)  ـ الأب جون جبور ـ غسان علم الدين  ـ رامز (رامز عبيد)  ـ قمر بنت جبيل (خليل مصطفى)  ـ خالد بشعرو (عصام ملكي)  ـ عصام ملكي  ـ رثاء الشاعر عصام ملكي  ـ ابن ملكي (عصام ملكي) ـ علي وطلال حمود  ـ رندى بعيني  ـ البطل اديب البعيني  ـ جورج ابو انطون، الياس خليل وانطون سعادة ـ ميرنا نعمة  ـ توفيق مراد  ـ جورج بطرس  ـ ايلي شعنين  ـ موتك صليب (كلارك بعيني)  ـ بطرس الكبير (بطرس بعيني)  ـ خي كبير (رفيق غنوم)  ـ ضيف كبير (المطران انطون جبير) ـ نايف علوان

**

 درب الحبايب كلّها أشواق

مشيتا.. وبعد عم إمشيا بالهجر

في ناس صرت لطلّتُن مشتاق

وفي ناس زرعوا بْروض عمري زهر

جْمَعْتُن سوا بكتاب فيهُن ضاق

وخبّيتُن بقلبي تا يحلا العمر

وعمّرت ضيعه ما بيوصلاّ فْراق

وسكّنتهُن حدّي.. بْبُيوت الشعر

شربل

**

كبارنا إنتو

قدّمت بها الشعراء أسعد سعيد، أنيس الفغالي، وجان رعد في الحفلة الزجلية التي أقاموها في سيدني عام 1989.

ـ1ـ

كْبَارْنَا إِنْتُو..

يَا رَيْتْ كِنْتُو أَلْفْ

وِالْكَوْنْ طَبْلِه وْدَفّْ

تَا كِيفْ مَا نْقَرْتُوا

وِ"الأُوفْ" طِيَّرْتُوا

الْكَاسْ يِغْمُرْ كَاسْ

وِتْحِبّْ بَعْضَا النَّاسْ

مِتِلْكُنْ إِنْتُو..

ـ2ـ

شُو صَايْبُو أَللَّـه

خِلق الدِّنِي كِلاَّ

وْقَلَّل الشِّعَّارْ؟!

الظَّاهِرْ.. بِـ "مَعْجِنْتُو"

جَرَّبْ تَا يِتْسَلَّى

كَاس الْعَرَقْ تَلاَّ

وْمَا حَسّ بِاللِّي صَارْ

إِلاَّ بْتَانِي نْهَارْ

مِنْ بَعدْ مَا كِنْتُو..

ـ3ـ

يَا ثَرْوِة بْلادِي

الْـ مَا بِتِنْحَصَى بِالإِيدْ

يَا طَيْرنَا الشَّادِي

بْمَلْيُونْ لَحْن جْدِيدْ

كِيفْ عِنْوَنْتُوا

هَـ الشِّعرْ أَسْطُورَه

عَ شْفَافْ مَعْمُورَه

دَاخِتْ بِـ دَوْزِنْتُو؟!

ـ4ـ

يَا صَرْخِة الْمَظْلُومْ

مِنْ فَوْق هَـ الْمنْبَرْ..

عَبُّوا السَّما بِغْيُومْ

تَا قَمحْنَا يِكْبَرْ

وِعْيَالْنَا تِكْتَرْ

وْكِلّ مَا خْزَنْتُوا

قَمْحْ.. وِعْجَنْتُوا

بْتِتْكَسَّرْ الأَصْنَامْ

بْيِتْكَنَّس الْمُنْكَرْ

عَنْ سِلُّم الأَيَّامْ

الْـ بَعْدَا بْتِتْأَخَّرْ

وْمِنْصُونْ مَوْطَنَّا

وْمَجْد الزَّجَلْ عِنَّا

مِتِلْ مَا صِنْتُوا

يَا كْبَارْنَا إِنْتُو..

ـ5ـ

وِالْـ كَانْ صَعْب يْصِيرْ

أَكْبَرْ جَرِيمِه صَارْ

بِالْحَرْب نَاس كْتِيرْ

افْتَكْرُوا الْمَجدْ.. دُولارْ

لَكِنْ كَرَامِةْ شَعْبْ

صَامِدْ بِـ وِجّ الْحَرْبْ

عِشْتُوا بْشَقَا وْتِعْتِيرْ

لا الشِّعِرْ هِنْتُوا

وْلا الأَرضْ خِنْتُوا

يَا كْبَارْنَا إِنْتُو..

ـ6ـ

يَا خَرْزِة الزَّرْقَا

ضَلِّي عَلَى صْدُورُنْ

لُبْنَانْ مَا بْيِبْقَى

لَوْ يِنْطِفِي نُورُنْ

.. إِنْتُو الْـ حِقَّقْتُوا

لْلُبْنَانْ آمَالُو

وْبِبْحُورْنَا غْرِقْتُوا

تَا تْرَجّعُوا عْيَالُو

شُو بْقُولْ لِلدَّيَّانْ؟!

بْقِللُّو: خِلِقْ لُبْنَانْ

وِالشِّعرْ والأَوْزَانْ

مِنْ يَوْمْ مَا خْلِقْتُوا

يَا كْبَارْنَا إِنْتُو..

ـ7ـ

عَيْب وَاللَّـه عَيْبْ

تِمِرْقُوا مَرْقَه

وْيِنْشُرْ ضَبَابُو الْغَيْبْ

وِيْطَيْشِرْ النِّسْيَانْ

وْمَا نِفْرَح بْمَلْقَى

أَسْعَدْ، أَنِيسْ وْجَانْ

وْإِنْتُو اللِّي شْقَعْتُوا

أَمْجَادْ.. وِزْرَعْتُوا

أَلْحَانْ وِغْنَانِي

بِقْلُوبْ حِزْنَانِه

عَ بْلادْ مِحْتِرْقَه

آلامْهَا لْجَمْتُوا

وْآمَالْهَا رْسَمْتُوا

وْيَا خَجْلِة الْغِيَّابْ

وِالأَهْل وِالأَحْبَابْ

لَوْ مَا تْكِرَّمْتُوا!

**

نسر من لبنان

ألقيتها سنة 1994، في حفل تكريم الشاعر السبعلي يوسف روحانا القادم من الولايات المتحدة الاميركيّة.

ـ1ـ

زْغِيرْ كِنْت.. وْكَانْ إِسْمُو كْبِيرْ

وْكَان الْحَرفْ يِلْطَى بْفَيَّاتُو

وْكَانْ الشِّعْر، عَ صَفِحْتُو، بَكِّيرْ

يْشِيل الْعَرَقْ بِكْرُومْ أَبْيَاتُو

وْسِبْعِل الْـ وِقْفُوا عْيُونْهَا نْوَاطِيرْ

تَا يِحِرْسُوا شْرَاقِيطْ حَكْيَاتُو

بْهُجْرَانْهَا.. قَطْفِتْ حَلاَ التّقْدِيرْ

وْوَدِّتْ الشَّوْق يْبُوسْ دَيَّاتُو

وْلِمِّنْ عَ سِيدْنِي طَلّ طَلِّةْ زِيرْ

غِيَّابْ سِبْعِلْ رَقّصُوا السَّاحَاتْ

وْزَادُوا وِلايِه عَ وِلايَاتُو!

ـ2ـ

يُوسفْ رُوحَانا.. نَسْر مِنْ لُبْنَانْ

شَاف الْبَحرْ.. صَوْب الْبَحرْ قَرَّبْ

حَيَّكْ مِنِ مْوَاج السَّفَرْ قِصْدَانْ

تْغَرَّب.. وْبِالْفِكْرْ مَا تْغَرَّبْ

حَبّ يِزْرَعْ حُلْم بِالْهُجْرَانْ

يِشْبَه الأَرْضْ.. الْـ حُبّهَا تْشَرَّبْ

غَنَّى الأَرْزِه.. سَوْسَحْ الأَزْمَانْ

غَنَّى الضَّيْعَه.. بْفَرِشْتُو تْقَلَّبْ

وْكِل مَا عَ بَالُو خَطْرِت الأَوْطَانْ

وْقِدَّيْش شَعْبُو بْمَرْقَدُو تْعَذَّبْ

قُولُوا الْوَجَعْ مِنْ أَنّتُو فِزْعَانْ

وْقُولُوا الدَّمعْ مِنْ دَمِعْتُو مْعَصَّبْ

وْقُولُوا النّسرْ بِالْمَحْبَسِه سِهْرَانْ

وْقُولُوا الشِّعر مِنْ صَرِخْتُو مْكَهْرَبْ.

ـ3ـ

يُوسفْ.. يَا يُوسفْ.. شِعْرَك بْيِحْكِي

حْكَايِةْ وَطَنْ مَقْهُورْ صَرْلُو سْنِينْ

مَمْنُوعْ يِشْكِي.. وْكِيفْ رَحْ يِشْكِي

وْقَصِّت لْسَانُو زمْرِة شْيَاطِينْ؟!

وْمِنْ بَعدْ عِيشِه كِلّهَا بَرْكِه

زَرْعُوا الْفِتْنِه بَيْن دِينْ وْدِينْ

لُبْنَانْ.. مَنُّو أَسْهُم بْشِرْكِه

وْلا مُنْتَزَهْ حُكَّامْ مِخْصِيِّينْ

لُبْنَان.. أَرْض الشِّعرْ وِالدَّبْكِه

وِالْمِيجَانَا.. وْرِعْيَان فِرْحَانِينْ

لُبْنَانْ.. شَهْقِةْ كَاسْ بِالْكَرْكِه

وِطْيُور بِالْكَرْمَاتْ سِكْرَانِينْ

لُبْنان.. ضِحْكِه مْكَعِنْشِه بْضِحْكِه

عَ شْفَافْ أَرْزِه مْعَتّقَه بْصَنِّينْ.

ـ4ـ

مَا جِيتْ إِبْكِي عَ الْوَطَنْ.. جَايِي

شَارِكْ بِفَرْحِةْ سِبْعِل بْمَلْقَاكْ

تْمَنَّيْت شُوفَكْ.. عِيشْ الِحْكَايِه

اللِّي عِشْتها يَا كْبِيرْنَا بْمَنْفَاكْ

وْمَزْمِزْ مَعَكْ أَشْعَارْ تِنْقَايِه

مَا بْتِنْسَكَبْ بِـ قَالِبَا لَوْلاكْ

بْهَنِّيكْ؟!.. مَا بِتْلِيقْ تِهْنَايِه

مِنْ طِفلْ.. كِتْرِتْ دَبْدَبَاتُو وَرَاكْ

وْتَا يْكُونْ شِعْرِي ما إِلُو نْهَايِه

انْشَاللَّـه يَا يُوسفْ نِلْتِقِي بْلُبْنَانْ

بِالضَّيْعِةْ اللِّي دَبْحِتْ عْيُونَا فَدَاكْ

**

ناطور قلعة..

مهداة لروح الشاعر ميشال طراد.

ـ1ـ

غابْ بَدْر جْدِيدْ مِنْ أَهْلِي

خِرْسِت الْوَادِي.. شَهْقِت السَّهْلِه

وْمِتْل اللِّي جَنِّتْ، مِنْ غَضَبْها، جْبَالْ

وْنَخِّتْ تا تِحْمِل إِبِنْها "مِيشَالْ"

شَقْلِتْ مَعُو، مِنْ دُونْ وَعِي، "زَحْلِه".

ـ2ـ

مِيشَالْ وَدَّعْ هَـ الدِّنِي وِارْتَاحْ

سَكَّر بْوَابُو.. وْسَلَّم الْمِفْتَاحْ

وْقَلاَّ يا "زَحْلِه" لا تْقُولي "لَيْشْ"

"جِلْنَارْ" مَا طَلِّتْ؟!.. ضَرَبْها الطَّيْشْ

وْعَمْ يِسْتِوِي عَ خْدُودْها التّفّاحْ!

ـ3ـ

وْقَلْعِة "بْعَلْبَكْ" نَاطْرَه النَّاطُورْ

الْـ عَطَّر دْرَاجَا بْرِيحْة الْبَخّورْ

بْبَاقَاتْ زَهْرُو.. بْغَفْوِتُو.. بِدْمُوعْ

أَشْعَارْ.. طَلِّتْ مِن فِكرْ مَوْجُوعْ

وْبَعْدَا لْهَلَّقْ عَم تْوَزِّعْ نُورْ

ـ4ـ

وْصَاح الأَرْز: شُو بُو تَرَكْنِي "طْرَادْ"

وْعَ رَقِبْتِي عَمْ يِكْبُس الْجَلاَّدْ؟!

وْمَهْدِي أَنَا مُحْتَلّ.. شُو لُبْنَانْ

غَيرْ هَـ الْقَصِيدِه الْـ دَوْزَنا فَنّانْ

تَا تْصِيرْ غِنِّيِّه عَ تِـمّ وْلادْ؟!

**

شهيد الحقّ

ألقيتها يوم استلامي جائزة جبران لعام 1989، نيابة عن شهيد الكلمة الأديب توفيق يوسف عوّاد.

ـ1ـ

غِصَّيْتْ لِمِّنْ غَابِتْ الضِّحْكِه

عَنْ تِمَّكْ الْـ نَوَّرْ لَيَالِينَا

وْمَا قْدِرْتْ مِنْ كِتْرِ الْوَجَعْ إِحْكِي

إِنْتَ الْوَطَنْ.. وِحْرُوفَك الْمِينَا

ـ2ـ

وْبَيْرُوتَكْ اللِّي طْعَمتْهَا "رْغِيفَكْ"

جْنُون الْغَدْرْ هَدَّمْ "طَوَاحِينَا"

جِينَا تَا نِسْأَلْهَا: إِنِتْ كِيفَكْ؟

فَتْحِتْ عَ صَدْرَا وْجَاوْبِتْنَا: مَاتْ

بَيّ "الْعَذَارَى" حَبّ يِفْدِينَا!

ـ3ـ

مِتّْ؟!.. مُشْ مَعْقُولْ إِنْت تْمُوتْ

وْكَحَّلْ عِينَيْنَا "غْبَارْ إِيَّامَكْ"

وِ"الصَّبِي الأَعْرَجْ" عَ دَرْب الْقُوتْ

يَا مَا شِبِعْ مِنْ بَرْكِةِ كْلاَمَكْ

قَتْلُوكْ.. قَالُوا: بْتِنْقِتِلْ بَيْرُوتْ

هَـ الْكلّ عُمْرَا تْعِيشْ بِمْنَامَكْ

مِشْيِتْ "قَوَافِلْ وِالزَّمَنْ" تَابُوتْ

وْ"فُرْسَانْ" تِسْرُجْ خَيْل قِدَّامَكْ

تَارِي وَقتْ مَا بْتِنْهِدِمْ الِبْيُوتْ

وِيْبُوسْ دَمَّكْ عَتْبِة بْوَابَكْ

بِتْصِيرْ تِخْفُقْ نَصرْ.. أَعْلاَمَكْ.

ـ4ـ

رَحْ مِدّْ إِيدِي.. وِالْفَرَحْ زِنَّارْ

تَا مَثّلَكْ.. يَا مْمَثَّل بْلادِي

يَا شَهِيدْ الْحَقّْ.. جَايِي نْهَارْ

يِحْكِي قِصَصْ.. وِيْفَهِّمْ وْلادِي

كِيف الْحَقِيقَه بْيِخْنِقَا أَشْرَارْ

عَ مْسَارِح التِّدْجِيلْ.. رِدَّادِي

وْلَوْ مَا يْكُون الْعَارْ.. مِتْلُنْ عَارْ

كَان اسْتَحَى وِتْلَطَّفْ زْيَادِه!

ـ5ـ

بِرْدَانْ.. حَيِّكْ لِلْوَطَنْ "قِمْصَانْ

مِنْ صُوفْ" عُمْرَكْ.. يَا إِبِنْ عُوَّادْ

وْضَوِّي "مَنَارَه" بْعَتْمِة الْهُجْرَانْ

رَحْ تِسْرُق الأَوْهَامْ نَاس بْعَادْ

وْضِمّ حَرْفَكْ عَ حَرفْ جُبْرَانْ

بْحَرْفَيْنْ.. فِيهُنْ يِنِشْلُوا الِبْلادْ

لا.. وْأَكْبَرْ "لا".. لْمِينْ مَا كَانْ

لا لِلْهَجرْ.. لِلْمَوْتْ.. لِلتِّقْسِيمْ

لُبْنَانْ بَاقِي بْهَالدِّنِي.. لُبْنَانْ

**

باقي انت باقي

في ذكرى توفيق يوسف عوّاد 1990

ـ1ـ

كِذْبُوا اللِّي قَالُوا: متّْ

الْـ مِتْلَكْ صَعِبْ تَا يْمُوتْ

لكِن.. لأَنَّكْ نِمْتْ

وْطُوَّلْتْ حَتَّى قمْتْ

مِنْ دُونْ وَعِي.. قَطْعُوا الأَمَلْ

وْزِعْلُوا.. وْيَا حَسْرَه عَ الزَّعَلْ

مِنْ كمْ خَشْبِةَ شُوحْ بَارَكْهَا الأَزَلْ

عِمْلُوا إِلَكْ تَابُوتْ!

ـ2ـ

بَاقِي إِنِتْ بَاقِي

يَا شَيْخْنَا الْجَبَّارْ

بِـ كِلّ نِقْطِةْ دَمّْ

انْسَكْبِتْ تَا تِمْحِي الْعَارْ

وِبْكِلّْ دَمْعِةْ أُمّْ

نَاطْرَه تْلاَقِي

هَاك الْوَحِيدْ اللِّي رَحَلْ

عَ الْحَرْبْ تَا يْخَرْطِشْ أَمَلْ

تْعَمَّدْ.. وْصَفَّى بَطَلْ

عَ حَفِّة السَّاقِي..

ـ3ـ

لَوْلاكْ ضَاع الْحُلْمْ

مْنِ عْيُونْ نِعْسَانِه

كانِتْ تْحَوِّشْ سِلْمْ

مْنِ كْرُومْ دِبْلانِه

إِلاَّ وْبِيطِلّ الْوَعْدْ

صَارِخْ كَأَنُّو الرَّعْدْ:

" تَا تْكُونْ لُبْنَانِي

لازِم تْطَال الْمَجْدْ

وِتْكّلِّلُو بِالْوَرْدْ

وْتِفْدِي بْدَمَّكْ أَرْضْ أَوْطَانِي

وِتْعَلِّمْ الْـ رَحْ يِخْلَقُوا مِنْ بَعْدْ

كِرْمَالْ تِبْقَى الأَرْضْ

يِسْتَشهدوا تَانِي"..

ـ4ـ

سْبَكْنَا الْحُرُوف مْنِ الدَّهَبْ

لْمَجْدَكْ.. تَا حَتّى يِنْكَتَبْ

يَا لْـ كِنْتْ عَالِي بْطَلتَكْ

وْهَيْبِةْ أُبُوِّه هَيْبتَكْ

بْلادي إِذَا شَافِتْ عَجَبْ

كانْ الْعَجَبْ بِـ غَيبتَكْ!

ـ5ـ

بْلادِي.. الْجِبَالْ الشَّامْخَه وِالسَّهْلْ

بْلادِي.. الضّياعْ الْحَالْمِه والأَهْلْ

يَللِّي "رْغِيفَكْ" نَامْ عَ دَيْهَا

وْزَهْر "الْعَذَارَى" تْكَوَّمْ عْلَيْهَا

بْلادِي.. يَا "بِنْ عُوَّادْ" رَحْ تِشْتَاقْ

لِعْيُونَكْ الْـ غِمَّضْتهُنْ بَكِّيرْ

عَ أَلْف فَجْرْ.. وْأَلْفْ حُلْم كْبِيرْ

مِنْشَانْ حَتَّى تِلْتِقِي بِرْفَاقْ

سَبْقُوكْ تَا يْنَامُوا بعِينَيْهَا..

**

عصام حَدّاد

بمناسبة تكريم الدكتور عصام حداد في لبنان، إثر فوزه بجائزة جبران العالميّة عام 1991.

ـ1ـ

حَقَّكْ .. مِين بْيِقْدر يُوفِي

بْكِلْمِةْ تِكْرِيم بْيِحْكِيها؟!

وْوِقْفِت قِدَّامَكْ مَلْهُوفِه

دِنْيِي .. كلّ شِي مْخَرْبَطْ فِيهَا

يَا رْفِيقِي .. الْـ نَظَّمْت صْفُوفِي

تا قْدِرْت لْوَحْدِي إِمْشِيهَا

غَسِّلْ بِالإِيمَانْ حْرُوفِي

حَابِبْ لِعْيُونَكْ إِهْدِيهَا

ـ2ـ

تَكْريمَكْ .. وَاجِب تَكْرِيمَكْ

يا عِصَام الْـ صِرْت حْكَايِه

شْبِعْنَا مِنْ بَرْكِةْ تِعْلِيمَك

غَمْرِتْنَا "عْيَاد" مْضُوَّايِه

"مْنِ جْرَاحِي" كِيفْ بَدِّي قِيمَكْ

وْنَاطِرْ تَا تْبَلْسِمْهَا كْفَايِه؟!

"جْدَاوِلْ فَيْرُوزْ" تْرَانِيمَكْ

غَنِّيلي لِلْمَجْد الْجَايِي

ـ3ـ

عَيْن كْفاع الـ خلِّتْ إِبْنا

يْوَزِّعْ خَيْراتُو عَ النّاس

خَفَّف بالشِّعْر مْصايِبْنا

حَلَّى بالكِلْمات الكاسْ

تِهْنا.. وبالكَوْن تْغِرَّبْنا

وْصِلْنا لْمَطْرَحْ ما بْيِنْداسْ

عصامْ حدّاد الْـ حَبَّبْنا

نرجَعْ.. وِنْرَجِّعْ "وَزْنِتْنا"

عَ أرْض تْرابا بْيِنْباسْ

**

مدحة وجبران

ألقيتها عام 1990، يوم استلامي جائزة جبران العالميّة نيابة عن الشاعر مدحة عكاش، صاحب جريدة الثقافة السوريّة.

ـ1ـ

عَاش بْشَرِقْ.. وِالشَّرْق مِتْخَلَّقْ

شَاعِرْ بِـ شِعْرُو الْكَوْن مِتْعَلَّقْ

الْغَيْمَاتْ عَبِّتْ مِنْ عُيُونُو دْمُوعْ

سِقْيِتْ دِنِي.. وْعَمْ تِسْقِيَا هَلَّقْ

لَوْلاَهْ نَتَّفْ بِالثَّقَافِه الْجُوعْ

وْمَا فِي جْنَاح بْهَجِرْنَا حَلَّقْ

مِدْحَةْ عُكَاش الْبَيّْ.. رَبَّى جْمُوعْ

زَرْعِتْ أَدَبْهَا بْكِلّ نَبْضِةْ قَلْبْ

يَا قَلْب نَاجِي الْعَايِش "بْجُلَّقْ”!

ـ2ـ

مِدْحَةْ.. صَابِيعُو مْسَيّجِه بِالنُّورْ

"يَا لَيْلْ" غِطّ وْلَوِّن نْجُومَكْ

وْمَرْمِغْ قَمَرْ عَ حْرُوفْ مِنْ بَخُّورْ

وْجَمِّعْ "ثَقَافِه" بْدَفْتَر غْيُومَكْ

يَا رَيْت فِيِّي بَيْت قِدْسُو زُورْ

وِيْصَاقِب قْدُومِي مَع قْدُومَكْ

بِكْتُبْ عَ بَابُو وِالْعُمرْ طَبْشُورْ:

بْهَالْبَيْت سَاكِنْ مِدْحَة وْجُبْرَانْ

فُوتْ يَا ابْنِي كَمِّل عْلُومَكْ

ـ3ـ

كِيفْ مَا الْتَفَتّ بْفَكّرُو حَدِّي

بْحَاكِيهْ عَنْ إِيَّامْ مِسْوَدِّه

عَنْ غُرْبتِي.. عَنْ دَمْعِة الْغِيَّابْ

الْـ حَفْرِتْ سَوَاقِيهَا عَلَى خَدِّي

عَنْ شَعْب حَايِمْ فَوْق أَرْضُو غْرَابْ

لَوْنُو بْلَوْن الْخَوْف وِالشِّدِّه

بْقِلُّو: يَا مِدْحَةْ، سَاكْنِين كْتَابْ

بْنِينَا بْيُوتُو.. وْطَالِت الْمُدِّه

جِيرَانْ نِحْنَا.. الْبَابْ حَدّ الْبَابْ

بْصَرْتَكْ بِـ نَوْمِي.. سْآلْ الِمْخَدِّه

عَمْ تِمْسَح بْعَطْفَكْ سَهَرْ وِعْذَابْ

عَنْ وِجّ طِفْل مْغَبَّر مْصَدِّي

وْعَمْ تِمْحَش بْحَرْفَكْ جُنُون غْيَابْ

لَوْ مَدّ إِيدُو وْطَالْ وِجّ الشَّرْقْ

بْيُوقَافْ أَللَّـه بِالشَّرقْ.. جُنْدِي!

**

البيّاتي.. الحلم الراجع

ألقيتها في ندوة رابطة إحياء التراث العربي ـ سيدني، 29 تموز 1988، حول مؤلفات الشاعر عبد الوهّاب البيّاتي.

ـ1ـ

عُمْر الدِّنِي عُمْرَكْ

وْعُمرْنَا أَيَّامْ

يَا شَاعِر.. بْعِطْرَكْ

عَطِّرْ الأَحْلاَمْ

وكْتُوبْ فَوْق الطِّينْ

أَشْعَارْ مَا بْتِفْنَى

بِتْخَوِّف شْيَاطِينْ

مْنِ عْمَايِلاَ قْرِفْنَا

ـ2ـ

وِالنَّارْ بِالْكِلْمَاتْ

سَارِقْ حِمِلْهَا وْفَلّْ

يَا عَبدْ.. نُورَكْ هَاتْ

انْطَفْيِتْ نِيرَان الْكلّْ!

صَار الأَدَبْ كذَّابْ

بِيبِيعْ أَرْض.. عْيَالْ

وَحْدَكْ عَبِدْ وَهَّابْ

وْكِتْرُوا عَبِيدْ الْمَالْ!

ـ3ـ

يَا ابْنِ الْعِرَاق الْبَارْ

الْـ بِالتِّمّْ غِنِّيِّه

زِرْتُو أَنَا بْمِشْوَارْ

وْحِوَّشْتْ حُرِّيِّه

يَا مْجَدِّد الأَشْعَارْ

بِحْرُوفْ مضْوِيِّه

كِلْ مَا يْطِلّ نْهَارْ

بْتِكْبَرْ بِـ عِينَيِّي.

ـ4ـ

الْـ إِخْدُوا الأَدَبْ دُكَّانْ

لْتِرْوِيجْ أَقْوَالُنْ

بِيطَالْبُوا بْأَوْزَانْ

وْمَا بْيُوزْنُوا حَالُنْ

بِيفَكّرُوا الإِنْسَانْ

مَرْبُوطْ بِخْيَالُنْ

بْيِنْجَرّ كِيفْ مَا كَانْ

تَا يْزَقِّف قْبَالُنْ!

ـ5ـ

شُو بْخَبّرَكْ عَنْ هَجْرْ

مِكْوِي بْأَوْجَاعُو

شُو بْخَبّرَكْ عَنْ عُمْرْ

فِيه الْبَشَرْ ضَاعُوا

وْكِتَّابْ أَرْدَأْ عَصْرْ

وِقْفُوا تَا يِنْبَاعُوا

بْسَاحَاتْ فِيهَا الْعُهْرْ

بِيبِيضْ أَتْبَاعُو؟!

ـ6ـ

الْكِلْمِه الْـ مَا بِتْمُوتْ

لَمَّا بْيِجِي دَوْرَا

بِتْصِيرْ تِبْنِي بْيُوتْ

لِلْحُبّ وِالثَّوْرَه

لْشَعْبْ.. خَنْقُو سْكُوتْ

عَمَّلْ بِزَلْعُومُو

خَايِفْ مِنِ التَّابُوتْ

وْمَقْبُورْ بِهْمُومُو!

ـ7ـ

يَا خَجْلِة الأَيَّامْ

مِنْ طِفلْ الِحْجَارَه

الْـ عِينَيْهْ مَا بِتْنَامْ

وِسْعِ الدِّنِي مْدَارَا

تَا تْقَلِّق الْحُكَّامْ

الْمِتْبَاهْيِه بْعَارَا

أَصْنَامْ.. شُو أَصْنَامْ

حجْرَانْ طِفْل زْغِيرْ

رَحْ تِقْطَع بْدَارَا!

ـ8ـ

سْيَاسَاتْ كِلاَّ كِذْبْ

الإِبنْ خَان الْبَيّْ

وِالْخَيّْ صَفَّى الْخَيّْ

وِالشَّعْبْ.. وَيْن الشَّعْبْ؟!

تْفَرْفَطْ كَأَنُّو حْرُوفْ..

أَرْقَامْ جَمْع وْضَرْبْ..

وِصْفُوفْ حَدّ صْفُوفْ

انْوَقْدُوا بْنَار الْحَرْبْ

زْعَامَاتْ.. لَوْ بِتْشُوفْ

خُوَّانْ عَ الْمَكْشُوفْ

بَدُّنْ شَنِقْ أَوْ صَلْبْ..

ـ9ـ

تْرِكْنِي.. تْرِكْنِي قُولْ

رَحْ يِنْفِجِرْ رَاسِي

بْلاَقِي الشَّعبْ مَسْطُولْ

بِيأَلِّه كْرَاسِي

بْأَوْطَانْ مُشْ مَسْمُوحْ

تْرَبِّي بْحُضْنَا زْغَارْ

نَامِتْ.. عَ صَدْرَا جْرُوحْ

وْفَاقِتْ.. بِـ قَلْبَا نَارْ.

ـ10ـ

.. وْيَللِّي هْجَرْت الدَّارْ

مِتْلَكْ أَنَا بْغُرْبِه

بْسَافِرْ بِـ هَـالأَشْعَارْ

عَ جْوَانِح الْكِذْبِه

وْمَعْلَيْشْ لَوْلا كْذِبْتْ..

مَا نْسِيتْ كِيفْ هْرَبْتْ

وِالْخَوْفْ بِـ دَرْبِي

وِبْكمْ كِلْمِه كْتَبْتْ

قِللَّتْ مِنْ خَوْفِي

وْرِوَّضْتْ مَنْفَى.. تْعِبْتْ

وْبَعِدْنِي مِنْفِي!

ـ11ـ

تْغِرَّبْنَا.. وْغُرْبِتْنَا كْبِيرِه

أَكْبَرْ مِنْ حِقْد الإِنْسَانْ

مْنِ الْعَتْمِه بِعْيُون الْغِيرِه

مْنِ الظُّلْم الْحَاكِمْ أَوْطَانْ..

صَفَّى الْعَالَـمْ كِلُّو مَنْفَى

وِيْنْ مَا بْتِسْكُنْ.. مُشْ رَحْ تِغْفَى

وْصَفَّى الْخَوْفْ.. وْصَفَّى.. وْصَفَّى

لُعْبِه بْإِيدَيْن الشَّيْطَانْ!

ـ12ـ

رَجِّعْنِي بْحَرْفَيْن زْغَارْ

عَ الْبَيْت الْـ تَعِبّتُو النَّطْرَه

وْعَمْ يِتْسَلَّى بْكِلْمِةْ "بُكْرَا"

وْعَشْعَشْ تَحْت لْسَانُو غْبَارْ

يَا بَيَّاتِي الْحُلْم الرَّاجِعْ

لا تِتْركْنِي وَحْدِي هَوْنْ

حْمِلْنِي وَرْقَه بَيْنِ أْصَابِعْ

تَرْكِتْ بَصْمَاتَا بْهَالْكَوْنْ..

ـ13ـ

بَصْمَاتْ.. شُو بَصْمَاتْ!

وَهْج الْعُمرْ فِيهَا

وِخْطُوطْهَا آيَاتْ

مْنِرْكَعْ تَا نِقْرِيهَا

صَارِتْ فَرَحْ لِلنَّاسْ

زَهَّرْ عَلَى دْرُوبُنْ

وْحَتَّى الْفَرَحْ مَا يْبَاسْ

زَرْعُوكْ بِقْلُوبُنْ..

ـ14ـ

نِشَّفْتْ وِجِّي بْرِيحْ

إِسْبَانْيَا الْجَايِي

مِنْ أَعْتَق حْكَايِه

وِسْمِعْتْ صَوْتَكْ.. زِيحْ

يَا سْكُوتْ مِنْ دَرْبِي

مِشْتَاقْ لِتْلامِيحْ

وِجّْ انْشَوَى بْغُرْبِه

وْمَحْبُوسْ بِمْرَايِه

بِرْوَازْهَا آيِه

وْنَاطِر يْطلّ الْعِيدْ

وِالْعِيدْ مِتْأَخَّرْ

نَاطِرْ شِي فَجْر جْدِيدْ

بِالْحَقّْ يِتْنَوَّرْ..

سْمِعْتْ صَوْتَكْ.. زِيدْ

صَوْتَكْ طِلِعْ مِنِّي

بْيُوت وْسَمَا مَدْرِيدْ

مَا بْتِبِعْدَكْ عَنِّي.

ـ15ـ

وِبَغْدَادَكْ الْـ حِبَّيْتْ

يَللِّي كَرَمْهَا غْلالْ

وْغَزْلِتْ نَخِيلاَ شَالْ

حِبَّيْتْهَا مِتْلَكْ..

بِرْبُوعْهَا مِدَّيْتْ

إِيدَكْ إِلِي.. وْخِلَّيْتْ

هَـ الْقَلْبْ يِشْتَقْلَكْ.

سْكَبْتَكْ بِـ قَلْبِي دَمّْ

بِعَّدْتْ عَنِّي الْهَمّْ

وْلِـمْ صِرْتْ بِيّ وْأُمّْ

صِيَّرْتْنِي طِفْلَكْ.

ـ16ـ

وْهَاك الْـ نَطَرْتُو تَا يِجِي

الظَّاهِرْ إِجَا مِنْ هَوْنْ

مِنْ رَابْطَه مَا بْتِرْتِجِي

إِلاَّ الْعُطرْ الِبْنَفْسَجِي

يِغْمُرْ زَوَايَا الْكَوْنْ

يْرَطِّبْ حْرُوف.. يْزَيِّنَا

بْصَفْحَاتْ بَيْضَا يْلَوِّنَا

وْمَا يْضِيعْ فِيهَا اللَّوْنْ.

ـ17ـ

شْلَحْنِي قَصِيدِه بْصَفحتَكْ

نْفِخْنِي نَبَضْ بِمْحَبّتَكْ

يَا شَمْخِة الشَّعْب الأَبِي

الْـ وِقْف النّسِرْ عَ كِلمتَكْ

عَارِفْ أَنَا حَرْفَكْ رِبِي

مِنْشَانْ يِمْحِي غُربتَكْ

مَا بْشَبِّهَا بْصَرْخِةْ نَبِي

خِلْقِتْ وَحِيدِه.. صَرختَكْ!

**

سيّد بكركي

القصيدة التي أبكت غبطة البطريرك صفير

كنت أقف على بعد أربعة أمتار من المسرح الذي اعتلاه غبطة أبينا البطريرك مار نصراللـه بطرس صفير، مع مطارنتنا وكهنتنا وراهباتنا الفاضلات، أثناء زيارته لمدرسة سيدة لبنان ـ هاريس بارك. والحق أٌقول.. إنني كنت أراقب قسمات وجهه القدسية بتمعن فضولي، فإذا بي أفاجأ بالدموع تنهمر غزيرة من عينيه، وتتلألأ بكبرياء على وجنتيه الطاهرتين، وهو يستمع إلى قصيدة الإفتتاح التي ألقاها الشاعر شربل بعيني. والظاهر أن المفاجأة قد هزّت شربل لدرجة أجبرته معها على الإعتذار من غبطته والتوقّف عن الكلام بعد أن قال:

ـ نحنا بدّك نفرّحك يا سيّدنا ما بدّنا نبكّيك.

وهنا أومأ له غبطته لمتابعة القصيدة الرائعة.

مهى بشارة

جريدة البيرق ـ العدد 728، 11/11/1993، سيدني

ـ1ـ

طَلّتَكْ.. كَمْشِةْ فَرَحْ وِدْمُوعْ

غِيَّابْ، يَا مَا تْأَمّلُوا فِيهَا

إِيدَيْنْ.. تِحْصُدْ زَهْر، تِضْوِي شْمُوعْ

وِشْفَافْ.. تِتْمَرَّنْ عَ آوِيهَا

ـ2ـ

وْسِيدْنِي الْـ صَرْلاَ شَهْر تِمْشِي طْلُوعْ

تَا تْطَالْ "قَامِه" الرَّبّ حَامِيهَا

نَخِّتْ عَ إِيدَكْ نَخِّةْ الْمَوْجُوعْ

تِزْرَع الْبَوْسِه.. وْتِسْقِيهَا

ـ3ـ

يَا بَطْرَكْ الْمَشْرِقْ.. بِصَوْت جْمُوعْ

كِلْمِةْ "يَا أَهْلا" بْحِبّ غَنِّيهَا

نِحْنَا وْلادَكْ.. نَاطْرِينْ رْجُوعْ

هَاك الْكَنَايِسْ صَعْب نِنْسِيهَا

ـ4ـ

قَلْب الطّفلْ بِـ غِرْبِتُو مَشْلُوعْ

سْنِينُو، لأَيَّا أَرْضْ، يِهْدِيهَا؟!

لُبْنَان حُلْمُو.. وِالْحُلمْ مَفْجُوعْ

وْسِيدْنِي بْتِعْطِي.. وْحَقّ يِعْطِيهَا

ـ5ـ

صَلِّي تَا نِرْجَعْ.. مَطْلَبَكْ مَسْمُوعْ

رْجُوع الرَّعِيِّه هَمّْ رَاعِيهَا

بِصْدُورْنَا.. حُبّ الأَرزْ مَزْرُوعْ

وِبْلادْنَا.. بِالدَّمّ نِفْدِيهَا

ـ6ـ

حَامِلْ صَلِيبَكْ.. مِقْتِدِي بْيَسُوعْ

وْعَتْمَاتْنَا بِالطُّهْر تِضْوِيهَا

وْمَهْمَا شْبِعْنَا لْمَخْبَزَكْ مِنْجُوعْ

يَا سَيِّدْ بْكِرْكِي.. يَا رَاعِي الشَّرْقْ

وَزْنَاتْ حُبَّكْ.. عَارْ نِخْفِيهَا!

**

مالك طوق

ألقيتها في ذكرى أربعين الشاعر مالك طوق، في قاعة كنيسة مار مارون سيدني ـ أستراليا، يوم الأحد الواقع في 27 آب 2000

ـ1ـ

الْقَامِه طَوِيلِه.. صَعبْ تَا نْطَالاَ

غَيْر الشِّعر مَا بْيُوقَف قْبَالاَ

مالِكْ قَصِيدِه مْتَلّتِه الأَبْيَاتْ

تِعْب الْوَحِي تَا بْكَرِكْتُو شَالاَ

ـ2ـ

نَقَّى الْجَبَلْ مِنْ شيِبْتُو تَلْجَاتْ

حَدّ السَّمَا مِتْشَاوْفِه بْحَالاَ

وفَرَّقْ عَ غَابِةْ أَرِزْنَا أَرْزَاتْ

تْجَلَّى الإِلَه بْفَيِّة خْيَالاَ

ـ3ـ

بْـ "كَوْمِةْ خَطِيِّه" وَقَّع بْنَيَّاتْ

قَال الشَّرَفْ، عَ السَّكْتْ: نِيَّالاَ

عِنْدُو الْخَطِيِّه شِعْر وِحْكَايَاتْ

وْضِحْكِةْ صَبِيِّه الطُّهْر رِسْمَالاَ

ـ4ـ

"عْنَاقِيدْ" حُبُّو صَارِت تْرَيَّاتْ

بْلَيْل الْبُغضْ مَا غَصّْ مِشْعَالاَ

لُبْنَانْ أَرْضُو.. كِلِمْتُو.. صَرْخَاتْ

انْطَبْعِتْ صَلاَ عَ شْفَافْ أَبْطَالاَ

ـ5ـ

لُبْنَانْ جُرْحُو.. وكِتْرِت جْرُوحَاتْ

جْنُون الْغَدرْ مَا شَافْ عَ شْكَالاَ

بْسِيدْنِي ما جينا نْقَلِّقْ الدَّمْعَاتْ

الْغُرْبِه، عَ طُول، بْتِنْدُب طْفَالاَ

ـ6ـ

جِينَا نْرَجِّعْ غَلِّة الْكِلْمَاتْ

لِلِّي عَطَى الْكِلْمَاتْ رِسْمَالاَ

هَـ الطَّوْق.. طَوْق الْعِزّ بِالْحَزَّاتْ

إِبْن الْقَدَاسِه الْـ وَسَّعْ مْجَالاَ

ـ7ـ

بْشَرِّي بْشِعْرُو بَاقِةْ صْلاوَاتْ

بْيِسْكَرْ إِذَا بْيِسْبَحْ بِمُوَّالاَ

جَارِةْ سَمَا.. مِتْعَمِشْقَه بْغَيْمَاتْ

مِنْ صُوفْهَا.. عَمْ يِنْغِزِلْ شَالاَ

ـ8ـ

رْفِيقِةْ قَادِيشَا.. صْخُورْهَا قَلْعَاتْ

أَللـه الْوَحِيدْ الْـ غَبَّر جْبَالاَ

بْشَرِّي مَا قَالِتْ: مَاتْ.. لِمِّنْ مَاتْ

مَالِكْ، مِتِلْ جُبْرَانْ، بَعْدُو حَيّْ

بْشَرِّي قَدِيرَه تْعَيِّش رْجَالاَ

**

بَيّ الصَّحافِه

ألقيتها في المهرجان التأبيني الذي أقيم لفقيد الصحافة والأدب المرحوم لويس الحاج، آذار 1995ـ سيدني.

ـ 1 ـ

رِشِّي الْوَفَا رِشِّي يا " قَيْتُولِه”

“لْوِيسِكْ " رَحَلْ.. شو بَدِّكْ تْقُولِي؟!

كانْ " النَّهار" الـْ ما انْطَفَى بِالشَّرْقْ

صار الْحُلم .. يا عْيُونْنَا جُولِي..

"مَخْزُون ذَاكِرْتُو" .. جْراس البَرْقْ

يا جْراس وَعِّي شْعُوبْ مَسْطُولِه

كلْ ما حْرُوفُو تِغْرَقْ بْشِي حِرْقْ

مْنِ الْحِرْق بِتْفَرِّخْ مَشاعِلْ نُورْ

بْإِيدَيْنْ ، مِتْل الصَّخْرْ ، مَحْمولِه!

ـ 2 ـ

بَيّ الصَّحَافِه.. الأَرْزْ غَنّالُو

غْنَانِي الْمَجْد.. تَا يْمَجِّد عْيَالو

تْمَانِيْن عُمْرو.. يا تْلُوج الدَّهْرْ

بِالشَّيْبْ، أُوعِي، تْحَيّكِي شَالُو

رْفِيق "التّوَيْنِي" الْمِتِّشِحْ بِالصَّبْرْ

وْقَاعِدْ لَـ حَالُو يْوَدِّع خْيَالُو

رْفِيق الْحَرْف.. مِنْ يَوْم فَاقْ الزَّهَرْ

عَ وَشْوَشَات الْمَرْجْ .. نِيَّالُو

رْفِيق الْحَقِيقَه الْـ مَا بْيَعْرِفْ غَدْرْ

تْعَمْلَقْ وَفِي، الإِخْلاصْ رِسْمَالُو

رَبَّى عَ إِيدُو قْلامْ زَرْعِتْ فَجْرْ

بِبْلادْ.. زَارِعْهَا بْأَفْضَالُو..

ـ 3 ـ

وَيْن الْحَكِي؟!.. كِل الْحَكِي مِنْصَانْ

بِقْلُوبْنَا .. لِلِّي عَبَدْ لُبْنَانْ

يَا مَا سِهِرْ.. تَا تْنَامْ عَيْن الأَرْزْ

وْيا مَا بِكِي.. تَا تِضْحَكْ الأَوْطَانْ

اسْتَمْلَكْ قَنَاعَه.. وْكَان طَيْر الْعِزّْ

مْرَافِقْ يَمِينُو مِنْ قَدِيم زْمَانْ

انْ هِزَّيْت بَيْتُو.. قَامْتُو بْتِهِزّْ

انْ هِزَّيْتْ شَعْبُو.. كِلِمْتُو بِتْصِيرْ

بُرْكانْ.. عَمْ يِلْعَبْ فِيَا بُرْكانْ!

**

إبن الشام..

الى روح الشاعر نزار قبّاني

ـ1ـ

لا إِنْتْ جِيتْ.. وْلا أَنا شِفْتَكْ

مِتْلِ الْكِذِبْ، مِنْ مَوْتَكْ، خْطَفْتَكْ

عِيشْ حَدِّي.. غُرِبْتِي تْقِيلِه

أَتْقَلْ مِنِ (الْغَصَّه) اللِّي كَتِّفْتَكْ

عَنْ إِنْبِطَاحْ النَّاسْ.. تِحْكِيلِي

عَنْ (زَحْفِةِ الذُّلّ) اللِّي قَرِّفْتَكْ

حُكَّامْ.. بَدُّنْ بَسّْ تِحْمِيلِه

تْعِبْنَا، وْمَا تِعْبُوا.. هَاتْ مَجْرِفْتَكْ!

وَحْدَا (الأَرِضْ) بِتْضَلّْ تُومِيلِي

هْنِيَّالْ (أَرْضْ) بْعِزّ خَلِّفْتَكْ

حِبَّيْتْها.. وِكْتَبِتْهَا مْتِيلِه

لأجْيَالْ.. عِطْشَانِه لْمَعْرِفْتَكْ

غِنَّيْتْهَا.. وْقِلْتِلّها: مِيلِي

صَرْخِتْ بِـوِجَّكْ: لأْ.. خَوِّفْتَكْ!

وِشْوَشْتْني: مَا رِبْحِتْ جْمِيلِه!!

رِبْحِتْلَكْ.. وْبِالشَّوْقْ لَفْلِفْتَكْ

قُومْ شُوفْهَا.. ما بْإِيدْهَا حِيلِه

قُومْ شُوفْهَا .. كِلّ الْمَحَارِمْ سُودْ،

نَشِّفْ دْمُوعا بْطُهِرْ مَنْشِفْتَكْ.

ـ2ـ

فِهْمُوكْ؟! ما فِهْمُوكْ!.. مُشْ مَعْقُول

يِبْقَى الشَّعِبْ طُولْ الْعُمرْ مَسْطُولْ!

بَدَّكْ الشَّعْبْ يْصِيرْ فَوْقْ الْكِلّْ

يْغَيِّرْ حُكمْ وِيْحَاكِم الْمَسْؤولْ

بَدَّكْ الشَّعْب يْهِدّ حَبْس الذّلّْ

وْسَاعِةْ مَا بَدُّو بِالْحَقِيقَه يْجُولْ

يِمْحِي الْجَهل وِالعَبْقَرِيِّه يْجِلّْ

وْيِسْهَرْ، مَا يِغْفَى، تَا يْرَبِّي عْقُولْ

وْيِلْغِي الحُقدْ والطَّائِفِيِّه يْشلّْ

وْيِبْنِي وَطَنْ.. يِبْقَى وَطَنْ عَ طُولْ

بَدَّكْ الشَّعْبْ يْحَارِبْ المُحْتَلّْ

وْطُفل الْحِجَارَه بِالْحُضنْ مَحْمُولْ

هَيْدَا طُفل لازِمْ بِـ بَيْتُو يْضَلّْ

نَامُوا الْعَناتِرْ وِالشَّنَبْ مَفْتُولْ!

بَكِّيرْ يَا نِزَارْ حَتَّى تْفِلّْ

خَايِفْ نْسِدّ بْوَازْنَا وِنْنَامْ

وْنِبْلَعْ، إِذَا مِنْقُولْ، شُو مِنْقُولْ!

ـ3ـ

لَنْدِنْ، بْتِشْهَدْ، جِيتْ تَا زُورَكْ

وْرَطِّبْ شْفَافِي بْبَوسِةْ الْيَنْبَوعْ

وَيْنْ كِنْتْ؟.. اخْتَفْيِتْ طْيُورَكْ

وْوَقْتِي قَلِيلْ.. وْجَنّ فِيِّي الْجُوعْ!

قِلْتْ بَدِّي فَاجِىءْ زْهُورَكْ

وْإِهْدِي عْيُونَك كَمِشْتَيْنْ دْمُوعْ

قِلْتْ بَدِّي شِمّْ بَخُّورَكْ

وْنِحْكِي سَوَا كِلّْ الْحَكِي الْمَمْنُوعْ..

إيدي تْدِقّْ.... وْيِرْتِفِعْ سُورَكْ

وِتْتَمْتِمْ لْحَالا: الرَّقِمْ مَقْطُوعْ

مَا كِنْتْ صَدِّقْ.. فَارْقَكْ نُورَكْ

مَا كِنْتْ صَدِّقْ يَا حَبِيبْ الْقَلْبْ

عند اللِّقَا.. يْكُونْ اللِّقَا.. مَوْجُوعْ!

ـ4ـ

نَامُوا مْكَاتِيبَكْ عَ إِيدَيِّي

سِهْرُوا مَعِي.. تَا الصُّبُحْ صَبَّحْنَا

غِسَّلْتْهَا بِدْمُوعْ عِينَيِّي

وْغِفَّيْتْهَا.. وْبِالنَّوْمْ مَا ارْتَحْنَا

الْحُزِنْ.. دِنْيِةْ خَوْفْ مِطْفِيِّه

بْتِمْحِي أَسَامِينَا وْمَطَارِحْنَا

مِدّ إِيدَكْ.. آخْ لَوْ فِيِّي

صَيِّرْ كْفُوفَكْ مَسَارِحْنَا

تْهِبّ فَوْقَا رْيَاحْ حُرِيِّه

وْبِبْلادْ، إِسْمَا بْلاَدْ، تِشْلَحْنَا

نْعِيشْ فِيهَا.. نِبْنِيَا سْوِيِّه

تِعْزُفْ مُوسِيقِتْهَا جَوَانِحْنَا

وِيْصِيرْ إِسْمَكْ لَحِنْ غِنِيِّه

تِرْقُصْ عْلَيْهَا أَلْفْ حُورِيِّه

وْبَيْرُوتْ بِـ صَوْتَا.. تْسَوْسِحْنَا

ـ5ـ

شِعَّلْتْ يَا بْنِ الشَّامْ.. أَرْضِ الشَّامْ

بِرْجُوعَكْ اللِّي نَطْرِتُو الإِيَّامْ

كَانْ الرُّجُوعْ وْدَاعْ.. شُو اللِّي صَارْ؟

جَنّ الشَّعِبْ.. وِانْطَفْيِتْ الأَحْلامْ

وْجِثْمَانَكْ الْمَلْفُوفْ بِالأَزْهَارْ

انْحَنْيِتْ إِلُو مِنْ حِزِنْهَا الأَجْسَامْ

وِتْيَتَّمِتْ مِنْ بَعْدَكْ الأَشْعَارْ

وِتْكَسَّرِتْ مِنْ لَوْعِتَا الأَقْلاَمْ

وْدِمَشْقْ صَوْتَا يْهِبّ: يَا نِزَارْ

رْسَمْتَكْ عَ صَدْرِي شَارِعْ وأَعْلامْ

عُودْ يا بْنِي هَالزَّمَنْ غَدّارْ

عُودْ يَا بْنِي غُرْبِتَكْ أَوْهَامْ

الدّارْ إِنْتْ.. وْعَ مْطَلّ الدَّارْ

حِضِنْ إِمَّكْ نَاطْرَكْ تَا تْنَامْ

نَامْ.. يَا صَحْوِةْ عِينَيْنَا.. نَامْ

**

نزار قبّاني إسمك

غنّتها الفنانة ريما الياس بمناسبة يوبيل نزار قبّاني الذهبي 1994

ـ1ـ

أهلا وْسهلا بْخَمْسِينَكْ

الْـ مِتْل الدَّهَبْ بِتْضَوِّي

يَا نِزَارْ.. مَرْقُوا سْنِينَكْ

وْزادُونا حُبّ وْقُوِّه

ـ2ـ

كْتَبْت الشِّعْر.. كْتَبْت النَّثْرْ

حْكِيت الْكِلْمِه الْمَسْمُوعَه

وِالشَّرْق الْعايِشْ بِالْقَهْرْ

وِعَّيْتُو.. وْمُشْ عَمْ يُوعَى

ـ3ـ

الْحِلْوِه السَّمْرَا الْـ غِنَّيْتَا

وِتْغِزَّلْت بْعَينَيْهَا

صَفَّى بِكْتَابَكْ بَيْتَا

وْنَايِمْ بَيْتَا عَ دَيْهَا

ـ4ـ

نِزَارْ قِبَّاني إِسْمَكْ

حْرُوفُو ضَوِّت هَـ الْمَعْمُورْ

أَحْلَى مْنِ الْوَرْدِه رَسْمَكْ

مْسَيَّجْ بِجْنَيْنَات زْهُورْ

**

بيوت الشّعر

مهداة للعميد القيّم محمد ياسر الأيّوبي

ـ1ـ

بْيُوت الشّعرْ، لَوْلاهْ، ما صَارِتْ ضِيَعْ

وْلا ضِحْكِت الْعِينَيْن أَوْ زَلْغَطْ وَجَعْ

هَبِّت رِياح الْحُبّ

فِرْحُوا النَّاطْرينْ

عَ كلّ مَفْرَق دَربْ

تا يِرْجَعُوا مْن سْنينْ

عَ تْرابْ مِن كِحْل الصَّبايا بْيِنْجَمَعْ

فَوْق مِنُّو أَدَّنْ الْمَجْد وْرَكَعْ

ـ2ـ

عَوِّد عْيُونَكْ عَ السَّهَرْ

عَ شْمُوع الِقْرَايِه

عَ الزَّقْفِة الْـ فِيها انْسَحَرْ

أَبْطال الِحْكايِه

وْلَوْ شِفتْ نَغْمات الْوَتَرْ

انْغَرْمِت بِحلْوايِه

وِانْهَزِّتْ غْصُون الشَّجَرْ

قُول: اللِّي غَنَّانَا وْنَدَرْ

يْعَلِّقلْنا بْقَلْبُو صُوَرْ

مِنْ بَعْد ما سَرْقُو "السَّفَرْ"

عَ "نَخْلِتُو" جايِي

ـ3ـ

عِمْلاقْ.. سَجّلْ فكرْتُو

بِكْتابْ.. نَوَّرْ صَفحْتُو

هْنِيَّالْ نَسْماتْ الْهَوا

الْـ سِمْعِتْ مُوسِيقِة ضِحكْتُو

اللِّي مْطَعّمِه بْكَمْشِةْ غِوَى

الْـ شَبْشَب عْلَيْها شَيْبتُو

قِدِّيسْ.. كِلْماتُو دَوَا

وْصَرْخِة نُبُوِّه صَرخْتُو

مْحَمَّدْ.. إِذَا سْأَلْتُو الْقَلَمْ

عَنُّو.. بْيِحْكِي بِالْحِكَمْ

بِالْعَسْكَرِيِّه.. خِدِمْتُو

وْبِالشَّاعْرِيّه.. كِلمْتُو

كِرْمالْ يِحْمي أَرزْتُو

وْيِتْوَشَّح بْأَحَلَى عَلَمْ

**

طلّت النجمة

ألقيتها فِي 14/12/1992، يوم زارتنا الأم جيلبرت فارس، الرئيسة العامة لراهبات العائلة المقدسة المارونيات.

ـ1ـ

طَلِّت النّجْمِه.. هَجِرْنَا فَرْحَانْ

جَايِي الأُمُومِه تْرَوِّق عْصَابُو

أُمّ الْعَذَارَى الْـ بِنْيِت بْلُبْنَانْ

مْدَارِس كْتِيرِه تْعَلِّمْ شْبَابُو

بْبَيْت الْيَتَامَى مِحْيِت الأَحْزَانْ

وْحِمْيِت طْفَال مْنِ الظُّلِمْ شَابُوا

وْبِالطُّبّ يَا مَا عَيَّشِتْ إِنْسَانْ

مَا عَادْ يِقْدِرْ يِحْمِل مْصَابُو

عِبْرِينْ.. دَيْرَا.. بَاركُو الدَّيَّانْ

وْإِيد "الْحُوَيِّكْ" رَفْعِت عْتَابُو

جِلْبِرْت فَارِسْ.. شَرْقَط الإِيمَانْ

وِالْحُبّ جَمَّعْ كلّ أَحْبَابُو

وِالشِّعر نَقَّى أَعْظَمْ الأَوْزَانْ

وْنَفَّض حْرُوفُو.. وْقَرَّر مْنِ زْمَانْ

بْإِسْم الرَّئِيسِه يْعَنْوِن كْتَابُو!

ـ2ـ

طَلِّتْ النّجْمِه.. ضِحْكِت دْيُورَا

كِرْمَال عَيْن الأُمّ مَنْدُورَه

رَاهْبَاتْهَا.. الْـ صَرْلُنْ سْنِين بْعَادْ

تَرْكُوا عْيُونُنْ تِسْبَح بْنُورَا

هِنِّي الْـ رَبُّوا عَ الْفَضِيلِه وْلادْ

وْقِدْرُوا يْدَفُّوا بْيُوت مَسْتُورَه

وْخَلْقُوا بْغُرْبِتْنَا شَعبْ وِبْلادْ

وْنَشْرُوا الْحَضارَه بْأَرْضْ مَهْجُورَه

يَا أُمّ.. طِلَّيْتِي مَعْ الْمِيلادْ

أَحْلَى هْدِيِّه هْدِيِّتِكْ بِالْعِيدْ

زْرَعْتِي الْفَرَحْ بِقْلُوبْ مَسْتُورَه!

**

جبران

يوم منحي جائزة جبران العالميّة لعام 1987

ـ1ـ

جُبْرَانْ.. صَعْبِه نِجْمَعُو بِحْرُوفْ

كْتَابْ الدِّنِي مُشْ سَايِع حْرُوفُو

وِبْكلّ بُقْعَه مْنِ الأَرضْ مِنْشُوفْ

أَجْيَالْ عَمّ بِتْبَوِّس كْفُوفُو!

ـ2ـ

جُبْرَانْ.. يَا جُبْرَانْ حَاكِينِي

لُبْنَانَك الْـ حِبَّيْتْ رَحْ بِيضِيعْ

مْلايِينْ.. عَمْ بِتْخَافْ دَزِّينِه

مِتْل الْمَوَاشِي شَعِبْنَا بِتْبِيعْ!

ـ3ـ

قَالُوا: زَعَامِه.. بَخّرُولاَ شْوَيّْ

دُخَّانْ بَخُّورَا خَنَقْ أَطْفَالْ

عَاشُوا سَوَا عَمْ يِشْرَبُوا مِنْ مَيّْ

تَلْجَاتْ.. عِرْقِتْ فَوْق رُوسْ جْبَالْ.

ـ4ـ

شُو بَاكْ سَاكِتْ؟!.. خَبِّرُنْ.. قِلُّنْ:

لُبْنَانْ بَاقِي مَوْطن الأَدْيَانْ

وْلَوْ مَا بْيِقْدرْ يِحْضنُنْ كِلُّنْ

مَا كَانْ أَللَّـه كَوَّنُو "لُبْنَانْ"

ـ5ـ

وْهَـ الْجَائزِه.. اللِّي حَامْلِه إِسْمَكْ

مُشْ حَقّ إِنِّي إِحْمِلا وَحْدِي

سْمَحْلِي إِذَا بِتْقَاسْمُو لْرَسْمَكْ

مَعْ نَاسْ أَغْلَى مْنِ الدِّنِي عِنْدِي

ـ6ـ

أَقْلامْ جبَّارَه.. مَا أَشْرَفْهَا

بِوْجُودْهَا مَا فِي أَدَبْ عَايِزْ

لَوْ كِنْتْ يَا جُبْرَانْ تَعْرِفْهَا

بْتِحْتَارْ كِيفْ تْفَرِّق.. جْوَايِزْ!

**

فرحة قلب..

ألقيتها في اليوم الأدبي الشهير، 30/6/1989، الذي أحيته الجالية العربية في سيدني، تكريماً للأديب السوري محمد زهير الباشا على كتابه " شربل بعيني ملاّح يبحث عن اللـه.

ـ1ـ

فَرْحِةْ قَلبْ..

كِيفْ بَدَّكْ تُوصِفَا

بْكِلْمَاتْ

وَقْعِتْ عَ الدَّربْ؟

كِيفْ بَدَّكْ تِقْطِفَا

وِتْعَلِّقَا نِجْمَاتْ

وِقْمَار.. وْشَمسْ

بِتْفَرْفِط الْعَتْمَاتْ

عَ حْدُود الأَمسْ

وْتِخْلَقْ دِنِي

مْنِ الْوَلْدَنِي

إِنْسَانْهَا إِنْسَانْ

صَوْتُو بَرِقْ

بْيِحْرُقْ حَرِقْ

تَا يْنَضِّف الطُّغْيَانْ

عَنْ وِجّ الشّرِقْ؟

ـ2ـ

فَرْحِةْ قَلبْ..

إِنْت الْـ زَرَعْتَا يَا زُهَيْرْ

وْإِنْت الْـ قَطَفْتَا يَا زُهَيْرْ

مِنْ بَعدْ مَا كِنَّا غِربْ

نِمْشِي عَلَى دْرُوب الصَّلبْ

نِتْطَرْطَش بْوَحْل الْكفرْ

وْنِضْحَكْ إِذَا جَنّ الْعهرْ

وِتْطُولْ الِمْسَافَاتْ

وْمِنْ بَعْد مَا زَاد الْقَهرْ

وِالْحَقّ حَقُّو مَاتْ

نَدْهِتِلْنَا الْكِلْمَاتْ!

نَدْهِتِلْنَا الْكِلْمَاتْ!

ـ3ـ

يَا مْحَمّد.. الْـ إِسْمَكْ زَهرْ

زِيَّنْتنِي.. وْفَاح الْعِطرْ

مْنِ حْرُوفَكْ الْـ خَلِّتْ هَجرْ

يِبْنِي وَطَنْ

بْإِيدَيْنْ.. شَلِّتْهَا الْمِحَنْ

وْتِكْيِتْ عَ عِكَّازِةْ صَبرْ

تِمْحِي دَهرْ

خَلاَّ الْبِكِي

يِخْنُقْ حَكِي

وْخَلاَّ الشّرقْ أَرْقَامْ

بِدْفَاتِر زْعَامِه

عَمْ تِعْلُف الأَزْلامْ

لَـ يَوْم الِقْيَامِه

ـ4ـ

الأَحْبَابْ.. حَبُّوا يْكَرّمُوكْ

وِكْتَارْ أَحْبَابَكْ

اللِّي بْجَنِّة قْلُوبُنْ رَمُوكْ

وِاسْتَوِطْنُوا غْيَابَكْ

مُشْ قَصْدهُنْ تَا يْعَظّمُوكْ

تْعِظَّمْتْ بِكْتَابَكْ..

ـ5ـ

أَحْبَابْ.. نَقْشِتْ إِسِمْهُنْ غَيْمَاتْ

يَا رَيْت بِتْشُوفُنْ

كْفُوفُنْ بَيَادِرْ.. وِالْقَمحْ كِلْمَاتْ

بِتْدَهِّب كْفُوفُنْ

وْعَتمْ الدِّنِي بِتْطَرّزُوا نِجْمَاتْ

وَقْعِتْ مِنِ حْرُوفُنْ

زَرْعُوا الْمَطَارِحْ حُبّْ

يَا مْحَمَّد تْهَنَّا

بْجَنِّةْ سَمَاهُنْ رَبّْ

ملاَّحْ مِنْ عِنَّا..

ـ6ـ

رَحْ تِسْمَعُنْ..

رَحْ تِسْمَعُنْ..

الْـ سِقْيُوا الدِّنِي مِنْ مَسْمَعُنْ

وْبِرْيُوا الْعَدلْ أَقْلامْ

تَا يْحَارْبُوا حُكَّامْ

عَتمْ الْخِيَانِه بْيِجْمَعُنْ..

ـ7ـ

رَحْ تِسْمَعُنْ.. رَحْ تِسْمَعُنْ..

كِلْمَاتْ عَاشُوهَا مَعَكْ

رَحْ يِسِكْبُوهَا بْمَسْمَعَكْ

هَوْدِي الْخَلِيقَه بْتِتْبَعُنْ

هَوْدِي الْحَقِيقَه مَرْجَعُنْ

هَوْدِي حَبَايِبْ أَوْفِيَا

بِتْفَكِّرُنْ شِي أَنْبِيَا

وْأَللَّـه مَعُنْ.. أَللَّـه مَعُنْ..

**

الأم تيريزا

ـ1ـ

مشْتاقَه..

مْأَكَّد مشْتاقَه

لِلْفَادِي.. لْطُرْقات الْجَنِّه

لِمْلايِكْتَا الْـ عَمْ بِتْغَنِّي..

بَرْمِتْ وِجَّا بْكِلّ عْيَاقَه

وْرَفْعِتْ إِيدَا..

انْتَهْيِتْ عَ الأَرْض مْوَاعِيدَا

هِدْيُوها بْـ (كَالْكُوتَا) بَاقَه

زْهُورا مَقْطُوفِه مْنِ حْقُولُنْ..

هِدْيُوهَا الْوَهْجْ الْـ بِعقُولُنْ..

حَبُّوا يِحْيُوهَا وْمَا قِدْرُوا

ماتت..

ماتتْ!

تِيرِيزَا.. الأم الْقِدّيسِه!

ماتت..

ماتت!

كفّا دَيْرْ.. وْقَلْبَا كْنِيسِه!

ضَبُّوا قَامَاتُن وانْكَسْروا

وِانْفَجْرِت صَرْخات جْنُونُنْ

وْلِمِّن قَبْرُوها بِعْيُونُنْ

حَسّوا هِنِّي الْـ عَمْ يِنْقِبْروا!

ـ2ـ

وقْفُوا بالصَّف.. وْإِيدَيْهُنْ

عَمْ بِتْهَوِّي..

خْيَالاتْ.. وناقِصْها القُوِّه

اشْتَاقُوا لِلْبِتْحِنّ عْلَيْهُنْ

لِلْزَرْعِتْ أَللّـه بْعِينَيْهُنْ

لِلْحُلْم الْمَارِق.. للزَّهْرَه

لِلشَّمْعَه.. الْـ بَعْدَا بِتْضَوّي

أم الفُقْرَا..

ماتت..

ماتت!

بِنْت العَدْرا..

ماتت..

ماتت!

غَطُّوهَا بْشَرْشِفْ أَحْلامُنْ

وْمِحيُوا بالدَّمْعَه.. إِيَّامُنْ

ـ3ـ

إِغْنِيسْ .. نَقِّتْ عِيشِه صَعْبِه

تْعَجَّبْ مِنْهَا الْلاَمَعْقُولْ

تِعْبِتْ ، مِرْضِتْ ، حِمْلِتْ غِرْبِه

صَلِيبَا مَنُّو مَحْمُولْ..

الصَّوْت يْقِلاَّ : كَفِّي سَيْرِكْ

أَوْجَاعِكْ بِتْعَمِّرْ دَيْرِكْ !

مَاتتْ!.. مَاتتْ!

دَمْع الْفُقَرَا رَحْ بِيجِنّْ

مَاتت!.. ماتت!

أَصْواتُنْ تِشْهَقْ وِتْرِنّْ :

نِحْنَا إلبَانْيَا.. لاقِينَا

إِمِّكْ.. بَيِّكْ سَكْنُوا فِينَا

يا قِدّيسِه.. الْـ مَا مْنِنْسَاكِي

مَطْرَحْ ما بَدِّكْ وَدِّينَا

نِحْنَا .. شُو نِحْنَا لَوْلاَكِي؟!

مَرْضَى.. وْحُبِّكْ عَمْ يِشْفِينَا

وْمَا نَعْرِفْ كِيفْ بَدّنا نْصُونِكْ!

فُقَرَا.. لَكِنْ بِتْحِبِّينَا

خِبَّيْتِينَا بْدَيْر عْيُونِكْ

.. هَالدِّنْيِي الْمَا بْتَعْرِفْ دِينَا

رَحْ نِتْعَبْ فِيهَا مِنْ دُونِكْ؟!

**

ماتت قصيدة

إلى روح الراهبة الشاعرة إرنستين خوري.

ـ1ـ

غَيْم الْبِكِي.. لَبَّدْ سَمَا عِبْرِينْ

وْمَا عَادْ لاقَى الدَّيْر شَمْسِيِّه

هَبِّتْ صَلاَ عَ شْفَافْ قِدِّيسِينْ

تْرَهّبُوا.. نَكْرُوا الأَنَانِيِّه

وْصَوْت يِنْدَه: خَبّرُوا حَرْدِينْ

خِسْر الْوَطَنْ أَرْزِه سَمَاوِيِّه

خِسْر الْقَدَاسِه الْـ حِمْيِت مْسَاكِينْ

بْطَلْبَاتْ عَمْ بِتْرَدِّدَا شْبِيِّه

عِرْفِتْ يَسُوع وْخَطِبْتُو مْنِ سْنِينْ

وْقَدّمِتْلُو قَلِبْهَا هْدِيِّه

الْجُمْعَه الْعَظِيمِه قَرّبِتْ.. تِخْمِينْ

حَبِّتْ بَدَالُو تِنِصْلِبْ هِيِّي

مِينْ مَا بْيِزْعَلْ عَ إِرْنِسْتِينْ

عَ الرَّاهْبِه الْقدْوِه الشِّمَالِيِّه

عَ الشَّاعْرَه اللِّي زَرْعِت بْسَاتِينْ

بِبْيُوتْ مَهْجُورَه وْمِنْسِيِّه

خَيَّاتْهَا الْـ بِالدَّيْر مَنْدُورِينْ

سِمْعُوا كْلامَا قَبِلْ مَا تِرْتَاحْ

وِتْرَجِّع الْوَزْنِه الإِلَهِيِّه

ـ2ـ

فِرْحِت الْجَنِّه.. بْطَلِّة الإِيمَانْ

بْطَلِّة الْكِلْمِه الْوَاقْفِه عَ مْطَلّْ

بْطَلِّةْ قَصِيدِه وَعِّت الإِنْسَانْ

وْخَلِّت الْكُفْر بْعَتِمْتُو يِنْشَلّْ

مَشْلَحَا الأَبْيَضْ مِنْ تَلِجْ لُبْنَانْ

وْخَاتَم الْخُطْبِه فِضّتُو مْنِ الْفُلّْ

وْتَوْبَا الرّمَادِي اسْوَدّْ مِنْ دُخَّانْ

شَوَّه بْلادَا.. وْمِنْ غَدرْ مِحْتَلّْ

أَشْعَارْهَا الْـ بِتْشَرِّف الأَوْزَانْ

فَتْحِت بْيُوتَا.. تْأَهّلِتْ بِالْكِلّْ

وْصَارِت تْوَزِّعْ لِلْبَشَرْ صُلْبَانْ

وِتْعَلِّمُنْ كِيفْ الْحُزنْ بِيفِلّْ

يَا حُزن "شَرْبِل".. يَا بِكِي قِصْدَانْ

بَعْدِكْ يَا إِرْنِسْتِينْ رَحْ مِنْضِيعْ

وْمَا فِي فَرَح عَ بْوَابْنَا بِيطِلّْ!

**

ادوار

"كتبت هذه القصيدة يوم وصلني نبأ إزاحة الستار عن تمثال الشاعر المرحوم إدوار حرب في جامعة اللويزة، وبدلاً من أن أفرح حزنت لأن التكريم لم يأتِ من لبنان الوطن"14/11/2012 .

ـ1ـ

شفت الشعر متلي حزين

ما عرفت ليش الشعر عم يبكي

ما عرفت ليش مكسّر الضحكه

ومتل التلج عم يدبل بصنين

تمثال صفّى الشعر

من يوم.. يا إدوار

ودّعت أحلى عمر

ع صفحة الأشعار

وسنين تِطفي سنين

بِعْيون مسؤولينْ

لا كبيرُن بْيٍحكي

ولا زْغيرُن بْيٍحْكي

ومين رح يحكي

تا نكرّمك يا "شعر" مرفوع الجبين

يا "أرزة" العا صدرها أرزات تنّورين؟

ـ2ـ

خايف تا قلّك شعر

وانت الشعر كلّو

وبسّام سندة ضهر

الأبيات بتجلّو

سمحلي إذا بقلّك

تراب القبر مش لاك

لا تترك محلّك

بقلوبنا محلّك

بكمشة شعر.. لولاك

ما جنّ فيها مْلاك

حتّى ما يبقى بْلاك

عم يسرقك كلّك

ـ 3ـ

لولاك كلمة حرب

بتخوّف الإيام

لكن انت يا "حرب"

زرعت الإسم أحلام

وصار الإسم مشهور

معروف شرق وغرب

بكل الدني بينحبّْ

الحاء.. صارت حُور

والراء.. صارت ربّ

والباء.. تا البخّور

يعطّر سما إنسان

متعذّب ومنهان

بشعرك رسمت الدرب

تا القلب يغمر قلب

وندوق طعم الحبّ

بشعرك فضحت الزور

تا نعرف المستور

وتا تِعْمَر الأوطان

ونرجع ع حلم منحلمو من زْمان

إسم الحلم.. لبنان

**

يونس

إلى روح الشاعر يونس الابن

ـ1ـ

"أربع خمس كلمات"

وحْمَيْص لفّا سْكوت

قالوا: "يونسها" مات

وتلفلف بتابوت

روحوا اسألوا النجمات

انكنّو الشعر بيموت

روحوا اسألوا النسماتْ

مين الْـ بني البيوت

تا ترتفع.. بيروت

ـ2ـ

"لبنان يا قطعة سما"

مين قالها غيرو؟

راهب الشعر بينسمى

وبيت الشعر ديرو

ضوّى الوطن بسراج

ما بينطفي نورو

شاف البحر عجّاج

غرّق فوّاج فواج

شكّ القصيده سياج

تا نرجع نزورو

ـ3ـ

حمل "الشمال" بإيد

طيّر هوا شمالي

فرّق شموع العيد

وكان الشمع غالي

وصوت "الوديع" الـ صارْ

يرندح إلو أشعار

ربينا عليها زْغار

وفقنا ع شعر جديد

من طلّتو عالي

خلاّ المحبّه تزيد

وتنوّر ليالي

يونس.. إذا بتريد

وطّي الجبين شوّي

تا نبوّس جبينك

جبينك بعيد بعيد

بعد الشمس والفيّ

وتعبوا.. محبّينك

ـ4ـ

ما غبت.. تا ترجع

ونحسبلك زياره

نجمك عم بيلمع

بإيّام غدّاره

لا تقول عم تدمع

عينين محتاره

"سلمى" إذا بتسمع

إنو حبيبا غاب

بتهجر سما الكتاب

وبتسكن مغاره

بتلال مزياره

**

بدر جبيل

إلى روح أخي الدكتور عصام حداد

ـ1ـ

حاكيتني.. وكان الحكي كلمات

عدّيتهن.. ما بيطلعو سبعه

قلت: أوعا تخاف.. بو الهمات

وعكه بسيطه.. بيلبطا بْسرعه

نيّمتني ع فرشة منامات

بُكرا بْشوفَك.. والوقت وَلْعه

ولمن فقت قالوا عصامك مات

وما عدت أعرف إكمش الدمعه

ـ2ـ

قبالي الدني.. ومش شايف قبالي

موتك قتل فيّي الدني كلاّ

يا الـ كنت مجدي وكل رسمالي

يا مدبح الـ فوقو الشعر صلّى

مسمرت عين كفاع بِخيالي

لِمْ شفت بدر جبيل متدلّى

شو عملت فيي.. قول يا غالي

تا تركتني بالدمع إتسلّى

مدري أنا يئسان من حالي

مدري أنا زعلان من أللـه

ـ3ـ

ببغداد.. مين الـ شلحك بدربي

تا تصير غنيّة فرح بغداد

شفتَك ملك.. ومتوّج بشيبه

قلت: الجبل حامل تلج وبلاد

كيف الوطن.. عم إسأل.. وشعبي

جاوبتني بكلمات كانوا جداد:

لبنان.. حتّى بحالتو الصعبه

بيعطي الدني من بَيْدرو أمجاد

ما بتركو.. ما بربّح الغربه

خسارة بْلادي.. يهاجروا الأولاد

ومن يومتا.. خبّيتَك بقلبي

وبعدك بـ قلبي يا إبن حدّاد

ـ4ـ

شربل حزين كتير ع غيابك

ختيرت.. صعبه إحمل مصابَك

سلوى وسمير بيشهدوا عليي

وسامي وطوني وكل أصحابك

بحلف بـ أللـه.. الزارعك فيي

محبّه ووفا.. وكلمات بكتابك

بحلف بـ هالأرزه السماويه

الـ لُونتها بِـ زهرة شبابك

راجع على لبنان.. صيفيّه

قوم عجّل فتّح بوابك

إنت هيك طلبت يا خيي

راجع تا بُوس جْبينك العالي

مش حق إرجع بوّس ترابك

**

عقل وصباح

حفل تكريم الشاعر سعيد عقل والفنانة صباح 18/12/2014

ـ1ـ

غابت صباح.. وشِعرْنا جايي

يدلـُق بكي ع صفحة حكايه

هيي اللي كانت نجمة الأمجاد

تطيّر الضحكه.. تشعّ المرايه

بالحنجره حملتْ شعب وبلاد

ألله عطاها "الأوف" توصايه

غنـّت الأرزه.. فرّحت أجداد

كان الأرز لوجودهُنْ غايه

غنـّت الضيعه.. زيّنت العياد

بدادون صارت للنغم رايه

جابت "المجوز" رقّصت الولاد

"عبّود" زاد العزف تحلايه

ونحنا اللي عشنا عن وطنـّا بْعاد

زرعتْ وطن بقلوبنا آيه

مين قال إنّو اصطادها الصيّاد

شحرورة الوادي قمر لبنان

هيي البدايه الما لها نهايه

ـ2ـ

ولمن عرف بـ موتها إنسان

عمّر بشعرو للمحبّه بيوت

شافو الورد بجنينتو زعلان

متل القصيده الغارقه بسكوت

يبسِتْ دْموعو.. وشوش الديّان:

يا ربّ طفّي شمعة اللاهوت

انهز العرش.. وتطايرت تيجان

وقلّو: "المجد" ما بينزوي بتابوت

ابن زحله الكان فوق الكان

وفوق اللي بدّو يكون يا بيروت

سعيد عقل.. بينسمى لبنان

ولبنان، متل المجد، ما بيموت

ـ3ـ

زعلان منك يا سعيد كتير

كيف تركت لبنان للتعتير

كنت صوتو، فرحتو، عيدو

تـْوقـّف ع شطّو حروفك نواطير

توزّع جوائز.. مجدنا تزيدو

تتعملق.. ويتعملق التقدير

أجمل وطن بالكون بتريدو

يركض على حفافيه طفل زغير

لمن غبت.. شو طالع بإيدو

صفـّى ضحيّة حقد مع تكفير

بتمّ الهجر وقعت عَناقيدو

سياسات كذب ومنفقه وتزوير

جرّب إذا من فوق بتفيدو

ملاك السما عارف شو بدّو يصير

لبنان.. شعرك قادر يعيدو

ملعب شمس..غنيّة عصافير

وكل ما كبر لبنان.. انت كبير

**

ابن نيحا

إلى روح عملاق لبنان وديع الصافي

ـ1ـ

مات الوديع انتكست الأعلام

وشهقت الأقلام

وصار البكي أفلام

جنّت دني.. وتيتّمت أنغام

ـ2ـ

غنّى الأرز.. كان الأرز منضام

ناجى الإله.. تكسّرت أصنام

نادى المُهاجر.. ضحكت الايام

دوزن هرم.. صار الهرم أهرام

وعَ شفاف ناسيها ابْتسام

فتّح زْهور الغرام

وللكون صار يوزّع الأحلام

وخلّى الأنام

كل الأنام

يكرّموه باحترام

ـ3ـ

ولمن بنومو طوّل وما قام

انهزّ الوطن.. وتفرفطوا الحكّام

ريّس محي وجّو الظلام

وريّس شكي من الانقسام

وريّس قرف منّو المقام

وريّس غبي.. قولوا: حرام

يعني.. تا ما يطول الكلام

حكّام مش حكّام

أقزام..

مين بيحترم أقزام

يا إبن نيحا بقول.. ما بنلام

يا ريت رجّعت الوسام

ـ4ـ

الحق ع الشعب الغبي

المهما كبر.. بعدو صبي

شيلُن من شلوشن قوامْ

طهّر وطن من طلّتًنْ

من ملّتُنْ

من ريحة الأزلام

"لبنان يا قطعة السما"

ع طول هيك بينسمى

مش مزرعة أصنام

قلّن يا "صافي" كْمان:

لبنان شو لبنان

"جنّات ع مدّ النظر

ما بينشبع منها نظر"

ما بيحكما خصيان

ـ5ـ

رغم الحزن.. فرحانْ

إنّي بست إيدك

إنّي حضرت عيدك

يا بلبل الوديان

يا زارع الأوطان

ع شفاف كل إنسان

تا غارت البلدان

مش بسّ "صافي" بس

إنت الصفاوه كلّها

زوّغت عين الشمس

يا نغمة اللي بجلّها

ما بينذكر لبنان

من دون اسمك يا وديع

ما بيفرح الديّان

إلا بأوفَك يا وديع

ما مت.. بعدك هون

ما غبت مهما كان

باقي ع صدر الكون

نيشان شو نيشان

صوت.. ولحن فنّان

**

بطرك تقي

احتفلت الجالية اللبنانيّة بافتتاح دير ومدرسة سيدة لبنان في هاريس بارك، نهار الأحد الواقع في 20 حزيران 1982، بحضور وزير التربية الأسترالي السناتور بيتر بوم والعديد من الشخصيّات الدينيّة والسياسيّة.

ـ1ـ

كانْ يا ما كانْ في بَطْرَكْ تَقِي

كانْ الْقَداسِه وِالْوَفا يْحَيِّكْ

ضَحَّى بْعُمْرُو.. وْكِل شِي بْعُمْرُو بِقِي

ذِكْرَى وْجَمْعِيِّه عَ مَدّ الْكَوْن

تْمَجّدَكْ.. يا بَطْرَك حْوَيِّكْ

ـ2ـ

إنْت الْوَحيدْ اللِّي عْرِفْت رِبَّيْتْ

عْرايِسْ عَذَارَى انْخَطْبِت لْيَسُوعْ

وْما ضَلّ بِـ لُبْنانْ مُطْلَقْ بَيْتْ

إلاَّ وْهِدِيك بْنَيّتُو بْتَقْوَى وْخُشُوعْ

وْقِنْدِيلَك الْـ ما شَحّ فِيهْ الزَّيْتْ

صَعْب إِنّو يْشِحّ طُول الْعُمْر

ما دَامْ بِالدِّنْيِي شَقَى وْقَهْر وْدُمُوعْ

ـ3ـ

وِالْيَوْم مجْتِمْعِينْ شَخْصِيَّاتْنا

عْقُولُنْ عَ حُبَّكْ إِنْت.. دَوْم مْسَيّسِه

وْرَحْ يِرْقِصُوا صِبْيَانَّا.. بْنَيَّاتْنا

وْقَلْب أَهْلُنْ بِالسَّعادِه مِكْتِسِي

وْأُسْترَالْيَا اللِّي غَيَّرِتْ بِحْيَاتْنا

وْعَ شَطّها.. بَابُورْنا الضَّايِعْ رِسِي

عِرْفِتْ قِيمِتْنا.. كَرّمِتْ رَاهْباتْنا

بْأَرْض سِيدْني عَمّرِت هَـ الْمَدْرَسِه

وْحَتَّى السَّما تِنْقادْ لِصْلاواتْنا

لازِم نْقِرّ وْنِعْترِق بِـ فَضْل

رَاهِبات الْعَائِلِه الِمْقَدَّسِه

ـ4ـ

وْتا نِفْتِتِحْ هَـ الْمَدْرَسِه وِالدَّيْر

رَاسْنا مْنِحْنِيه لِلدَّيَّانْ

الْـ لَوْلا حَنَانُو ما ارْتَفَعْ هَـ الطَّيْر

وْلا طَار بِـ جَوّ الثَّقَافِه وِالإِيمانْ

وِبْقُوّتُو الرَّهْباتْ جَدُّوا السَّيْرْ

الرَّيْسِه كُونْستانْس مَعْ مَادْلانْ

وْقَالُوا: إِنتْ يا دَيْر مَنْبَع خَيْرْ

ومَنْجَمْ عُلُوم بْتِرْشُد الإِنْسَانْ

وِلْهَيْك سِمَّيْناكْ يَا هَـ الدَّيْر

عَ إِسْم سَيِّدْة الْوَطَنْ لُبْنانْ

ـ5ـ

أُسْترالْيَا بِعْيُونَّا قَدّ الدِّنِي

بِالْكَوْن كِلُّو ما إِلاَ تانِي

مِتل أَرْز الرَّبّ صَعْبِه تِنْحِنِي

وْقَلْب أَهْلا كْتَيرْ إِنْسانِي

وْبُكْرا.. بَعدْ مَلْيُون سِنِه

بْتُوقَفْ دِنِي تْخَبِّرْ دِنِي

مِنْ هَوْن مارِقْ شَعْب لُبْنانِي

**

شربل نعيمي

الى روح صديق الشباب والدراسة الفنان شربل نعيمي

ـ1ـ

شربل بعيني وشربل نعيمي

رفاق كنا من زمان بعيد

من الأرض يمكن سرقتو الغيمه

حتى يشتّي ع الدني مواعيد

ـ2ـ

يا ما بشر نادوه بـ إسمي

ويا ما بإسمو شبّهوني كتير

هوّي ترك جسمو وأنا جسمي

صعبه تا يحمل هالإسم الكبير

ـ3ـ

بيشهد التلّ وساحة النجمه

بطرابلس.. ع أجمل مشاوير

نمشي سوا.. تضحك لنا الكلمه

ومنّو لحالو يبتدي التفكير

ـ4ـ

يا شربل الفنّان شو بقلّك

ما في شعر بالهجر يوصلّك

سآل الأرز عن مطرحك بيقول

بقلب العلم عم إحفر محلك

**

المسلماني واحد بس

ـ1ـ

عشر سنين وإسمك عز

بيشرّف سيدني والأرز

يا شوكت إنت جنوبي

وجنوبي فيك بيعتز

عندك طلّه مهيوبه

منستقبلها بورد ورز

متلك ما بتعطي شعوبي

المسلماني واحد بس

وجودو بـ هالغربه كنز

ـ2ـ

المرقوا قبلك كانوا كتار

ما تركوا اللي تركتو إنت

بإسمك بتكرّم الكبار

والتكريم بحبك صنت

ع راسك إكليل الغار

شعبك ما في مره هنت

سانتور.. وصوتك نار

ما بيرحم كذب التجار

فيك منكبر وين ما كنت

**

عصام ملكي

حفل توقيع كتاب الشاعر عصام ملكي: شربل بعيني زينة الشعّار

ـ1ـ

"جمعيّة الإنماء" جمعتنا

وعصام ملكي شبرأ شْبابو

الإيام عم تفرح بصحبتنا

متل الزهر فرحان بترابو

بالوزن عم بيزيد وزنتنا

وبحر الشعر بيروّض عبابو

شاعر رفع بالهجر كلمتنا

وقللي تا عيش العمر بكتابو

ـ2ـ

يا ست بهيه يا منارتنا

كتابك ضوي يا فرحة صحابو

عشتي وعيّشتي بـ غربتنا

شعّار لولا محبتك غابوا

الأشعار سمّوكي رئيستنا

والقلب شرّع للشمس بابو

ـ3ـ

من الولدني لتلوج شيبتنا

كتبنا تا زاد الحرف آدابو

رفضنا تا نلطى خلف كذبتنا

ونلغي أدب ونزيح أربابو

شعّار متل غصون أرزتنا

شاب الدهر.. بالشعر ما شابوا

شعّار ضوّوا حروف صفحتنا

بركي الوطن بيرد غيّابو

مركب مجد والبحر ساحتنا

والمجد عارف مين ركّابو

ـ4ـ

أحباب رح يحكوا بسهرتنا

صرح الأدب عم يرفعوا عتابو

أسماء متل الشمس ضوّتنا

تا إشكرن.. هيدا قليل كتير

الكبير ما بدّو شكر الكبير

بيعطي وبيضلّ العز بجيابو

**

كونين

بمناسبة تكريم ابنها السانتور شوكت مسلماني

ـ1ـ

بكَوْنين عندي رفاق صاروا أهل

مأكّد عرفتو مين رفقاتي

شوكت مسلماني اللي داس الجهل

وإسمو بيضوي بين أبياتي

وخيي علي حمود كفّو سهل

بمحبتو بتدوب كلماتي

وشوقي إذا بيقول عنّي كهل

بفرح لأني كبرت حدّو هون

رفاقي التلاته زيّنوا هالكون

بترخص إلُنْ ع طول.. دمّاتي

ـ2ـ

كوْنين.. هيي الأم عندا جناح

بتحضن ولادا وين ما كانوا

واليوم عم بتسلّم المفتاح

لأعظم إبن تا تزيد إيمانو

قالت: يا شوكت باب قلبي فتاح

قلبي انسرق مقطوع شريانو

زعران نهبوا الأرض.. حقّي راح

وما في حدا بيحرِّك لسانو

وشوكت حبيبا صعب تا يرتاح

إلا إذا ضمّا بأحضانو

هيك الأمومه تكون يا فتّاح

بتحبّ إبنا يعيش بالأفراح

بتبكي إذا بيعيش أحزانو

ـ3ـ

كوْنين.. هيي ضيعتك.. شعبك

بيت أهلك.. إرث أجدادك

الإقطاع أوعا يوقف بدربك

يا مسلماني صون أمجادك

لا تفتكر رح تنتهي حربك

هون أو هونيك ببلادك

كَوْنين.. لازم تحملا بقلبك

وتورِّتا يا كبير لولادك

ـ4ـ

إنتي بجنوب الأرض يا كوْنين

وجايي أنا من شمالها هنّي

شوكت حبيب القلب متلو مين

فرحان يسرق هالقلب منّي

إبنك إذا بتكرمي.. حساسين

بترقص على الأغصان بتغني

شوكت سياسي آدمي.. تخمين

فيكي تقولي شو بتتمنّي

هابيل، قالوا، بيقتلو قايين

لكن "هابيلك" غيّر الرنّه

خلاّ الشجاعه تغلب شياطين

وما بين سيدني وضيعتو كَوْنين

عايش بجنّه.. وبالقلب جنّه

**

راحوا

إلى روح أخي الشاعر روميو عويس

ـ1ـ

كل ما العمر يمرق

بروزنامة الإيام

رح يدبل الزنبق

ورح تنتهي الأحلام

ـ2ـ

واللي بقي معنا

راح وما ودعنا

نندهلو تا يرجع

ما حب يسمعنا

ـ3ـ

ورشعين عم تدمع

ودمعاتها تنبع

من شعر كلو حب

من هالدني أوسع

ـ4ـ

وروميو الأحلى شب

رافق بشر راحوا

وتركوا الوجع بالقلب

ومن هالدني ارتاحوا

ونحنا ع نفس الدرب

ـ5ـ

رح إسألك يا رب:

ليش تا خلقنا

ما دام رح منموت

وليش تا مرقنا

ورح نرجع بتابوت

**

رثاء الشاعر عصام ملكي

ـ1ـ

كيف رح إرثيك يا ملكي

وقدّام شعرك ركعت الأوزان

سألت القصيده: ليش عم تبكي؟

قالت: بموتو تيتم الهجران

حبيت إشكي.. لمين رح إشكي؟

وماتوا، يا حسره، أشرف الخلان

تذكّرت هاك الصوت والضحكه

تذكرت كيف بتولد القصدان

كنت زورك.. آخد البركه

بركة شعر رح وزّعا بلبنان

وع أهل بشمزين وين ما كان

ـ2ـ

بنتك وقت ما دمعها قللي:

توفّى "عصام" صرخت: يا دلّي

حملت كتبك متل شي مجنون

وصرت إبكي.. وكتبك تصلّي

سألت ألله: ليش حتى نكون

وكل ما التقينا بتقرب الفلّه

يا شاعر الكرمات والزيتون

الغله عظيمه.. وتارك الغلّه

بعزّي "يولندا" وقلبها المحزون

بعزّي عيالك يا حبيب القلب

الأحزان علّه.. وكترت العلّه

**

روميو.. بعد سنه

الذكرى السنوية لوفاة الشاعر روميو عويس 7 ايلول 2022

ـ1ـ

مرقت سنه.. وبعدك ببالي دوم

قاعد لوحدي.. والدمع شلاّل

يا روميو.. عشقت الصلا والصوم

غيابك قتلني.. والبعد قتّال

لمت القدر.. ورميت كل اللوم

ع الكورونا.. وصار حقدي جبال

لا عدت أعرف كيف دوق النوم

ولا عدت قادر شيلك من البال

ـ2ـ

أيلول مش عارف بـ إيامو

مات اللي وسع الكون أحلامو

كان يكتب للصبايا شعر

وترقص بنات الشعر قدّامو

بكتاب خلف كتاب ضوّى الهجر

ليش الهجر تا يشلع خيامو

وحتى ما ينقص بالقلام الحبر

صارت دموعو حبر أقلامو

ولو تسألوا عنّو تراب القبر

بيقول: بو طوني اللي متلو قلال

رضيوا السما وعطيوا القصيده غلال

ببيتين شعر من القبر قاموا

**

نسر كونين

يوم تكريم السانتور شوكت مسلماني

ـ1ـ

تا فشّ خلقي جيت يا إخوان

والشعر متلي مكهرب وزعلان

من كم شهر تطاولوا الحسّاد

ع السانتور المخلص الإنسان

"البقّ والبرغش" جمعهن إتحاد

تا يحاربوا اللي شرّف الهجران

طلعوا بفشلهن بالسياسه ولاد

ونسيوا "نسر كَوْنين" من لبنان

بيعلا تا يكسر رقبة الصياد

بيحمل سلام وحب للأكوان

والبرلمان الكان أيقونة بلاد

تشّوه وقت ما غاب عنّو النسر

وبرجعتو.. فرحت حجار البرلمان

ـ2ـ

مهما انحكى بيضل إسمك منعرَف

إنتْ شوكت إنتْ.. مش إبن الصّدف

قلال اللي متلك هون يا إبن الجنوب

عم يبتدي وما بينتهي فيك الشرف

غاروا لأنك شمس ما بتعرف غروب

قصر السياسه بنيت.. كتّرت الغرف

شوف الأعادي مطيشره فوق الدروب

محيتُن.. قبل ما يوصلوا لساعة ترف

بدنا القانون يحاسب بإسم الشعوب

هللي عليك تطاولوا جرحوا القلوب

ع هيك إعدى بقول: ممنوع الأسف

ـ3ـ

إنت المحبّه.. وحبّك زياده

وحقّ النبي.. ويسوعنا الفادي

يا مسلماني القلب عم بيدق

من فرحتو.. وما غيّر العاده

عودّتنا نفرح بكلمة حقّ

السرقوا حقوق الناس بتعادي

عندك بشر ما بيتعبوا من النقّ

تسلم يا بلبل غربتي الشادي

لعبوا وما عرفوا كيف خسروا الدق

والظلم كل الظلم ع البادي

المارد صعب يركع بعقصة بق

المارد جبل ما بتحضنو وادي

ما بخاف لولا الأرض رح تنشق

بقول الحقيقه وبعترف إنّك

شرّفت سيدني.. وأرزة بلادي

**

شيرين

إلى روح الشهيدة شيرين ابو عاقله

بأيّا وقاحه وغدر قتلوكي

يا نجمة القدس.. وما عرفوكي

إنّك شيرين الحامله فلسطين

بقلبك.. بـ صوت مدوزن ملوكي

افتكروا إذا بتموت الحساسين

بيقضوا ع أشرف ناس سمعوكي

ولمّن عليكي قوّصوا مجانين

برصاص جوّا الرأس صابوكي

ركعتي تبوسي تراب بـ جنّين

غفيتي تحت شجره وما وعّوكي

جن الشعب.. وتجمهروا ملايين

متل العروس بحب رفعوكي

برموا المخيّم.. سكّروا دكاكين

وبالعطر.. بالأزهار رشّوكي

ركعوا وصلّوا ورددوا الآمين

ومتل الوشم ع الصدر طبعوكي

صرتي شهيده بين قديسين

ونار الجحيم لناس ظلموكي

بأسف على عربان ملهيين

خوّان.. كيف بدّن ينصروكي؟

باعوا القدس مع شعبها من سنين

وبتلاتعش أيار باعوكي

ووقت الجنازه تجمّعوا شياطين

منعوا العلم.. ضربوا اللي حملوكي

معقول حرمه تخوّف ملاعين

وإنتي بقلب تابوت خافوكي

لا تزعلي.. ما بيعرفوا مساكين

بدل العلم بالدمع لفّوكي

المتلك صعب تا يموت يا شيرين

والقدس أمك.. والشعب بوكي

**

جبرين وجبران

حفل توقيع كتاب "كرم ع درب" للشاعر يوسف جبرين

ـ1ـ

جِبرين إنتْ بْهالمسا جبران

في فرق حرف زغير ما بعدّو

جبران متلّك جمّل الأوزان

وخلّد إسم.. كان الظلم ضدّو

وجبران متلك حارب الزعران

الخانوا الوطن وبيوتنا هدّوا

وجبران متلك قاوم الشيطان

وبئر الخطيّه بكلمتو سَدّو

وجبران عاش بغربتو يئسان

ومتلك.. وطنّا ما قدر ردّو

الشعّار صرخة حق ع الطغيان

داقوا الفقر والإيد ما مدّوا

ـ2ـ

يا إبن كرم المهر.. يا إنسان

عم ترقص بنات الوحي حَدّو

كرمك ع درب المعرفه سهران

وعنقود شعرك مستوي خدّو

وع تلال ضيعه مزينه الأوطان

وقفوا البلابل خلفك يردّوا

ولمّن ع إيدك خلقت القصدان

سمعت الشعب بيقول: مين قدّو

عرفتك صديق كبير بالهجران

المتلك يا يوسف.. خي منعدّو

بإبن الكَرِمْ عم يفتخر لبنان

إخدْ الكَرَم عادات من جِدّو

وإخدْ الشّعر من فوق أحلى لسان

لسان الأمومه.. الما انعرف حِدّو

نزّل سمّا ع الأرض بتحدّو

ـ3ـ

"مْواقد الموج" الفيك حبّبني

مرّه خلف مرّه.. أنا قريتو

والموج، متل الحلم قرّبني

تا صرت حدّك.. دربك مشيتو

وهلّق "كرم ع الدرب" عاجبني

الليله يا يوسف حان توقيتو

وقّع إلي الكتاب.. واكتبني

شي بيت شعر.. بإسمك مضيتو

بالشعر.. فيك تقول: يا إبني

إبنك أنا.. والفضل ما نسيتو

بأوف وحده فيك تطربني

بيت العتابا بصخرك بنيتو

ع الحب.. ع الإخلاص، درّبني

البيكون متلك يا ابن جبرين

طول العمر.. ما بينتهي صيتو

**

يوسف كرم

ليش حتّى ترفعوا التمثال

ع الأرض.. والتمثال بـ قلبي

حاسس بصدري دعسة الخيّال

بدل الباروده حامل الطلبه

يوسف كرم ذكرو إذا ما انقال

بيبكي المجد.. وبيستحي ربي

لفّوا القصايد حول عنقو شال

عيون البطل عم يحرسو دربي

ومهما انحكى.. أجمل شعر بالبال

ناطر تا حتى تكتبو الغربه

**

روميو

دمعتي على الشاعر روميو عويس

ـ1ـ

مشتاق شوف تشرقط الضحكه

يا روميو.. يا شاعر الحلوين

كل الصبايا تجن تا تحكي

وتلبّسُن بالشعر الفساتين

بسيدني يا "بو طوني" تركت بركه

عيال متل الصخر متحدين

وما قلت مملكة الشعر ملكي

وشعرك وصل من هون ع صنين

واليوم جايي تقطع الشركه

بيناتنا.. تا تغيب عنّا سنين

ما عاد عندي دموع تا إبكي

عطيني دموعك يا نبع رشعين

ـ2ـ

أيلول، قالوا، بالشتي مبلول

تاري الشتي دمعات عينينا

تا تغيب عنّا هيك مش معقول

يا الكل عمرك تشفق علينا

إنت "بو طوني" البالشعر مصقول

قصايد دهب علقت بدينينا

إنت "بو طوني" السوسحت العقول

وإسمك ع وزن الأوف غنينا

شاعر عظيم بغربتك مسؤول

بنت "الخطيّه" بتعرفا "وينا"

و"بكاس" أحلى "نبيد" عم بتجول

وتزرع "عناقيدك" ع إيدينا

لولا "الكورونا" بتعرفك ع اصول

عن هالجريمه غمّضت عينا

لكن، يا حسره، تركتك مقتول

استشهدت يا "بن عويس" بالهجران

لبنان جنّ.. وهون جنّينا

**

إبن ملكي

الذكرى السنوية الاولى للشاعر عصام ملكي

ـ1ـ

اليوم بدّن يسمعوني الناس

يا إبن ملكي.. وعدّ ألطافك

وميزان شعرك للوزن مقياس

ما في حدا بالوزن ما خافك

وع قد ما وجودك حلو وحساس

صارت النكته ترافق شفافك

وما نسيت "ساره" شمعة القداس

بنتك حلم عايش بأطيافك

حبيت إنو تزورها وتنباس

بأعلى سما.. وتغل بلحافك

بعدو سْريرا بالفكر وسواس

يا ما حلفت برحمتا ومحزون

ووصيت بس تموت حدّا تكون

موت الطفوله كسّر كتافك

ـ2ـ

تارك "يولندا" رفيقة الأشعار

ليش حتّى قسيت ع حبّك؟

أجمل قصيده تركتها بالدار

أم البنات حفرتها بقلبك

من بلاد خلف البحر جنحا طار

سُهاد طلّت.. ليش تا ملبّك

قوم لاقيا.. دمعاتها قنطار

بناتك يا ملكي.. دربهن دربك

يا عصام الشعر.. شو ما صار

بتضل عايش موطنك كتبك

وبكروم بشمزين في أزهار

انزرعت إلك.. عم يسقيا ربّك

موتك ألم.. موتك أنين ونار

منكبر اذا منقول: منحبّك

شفت الدمع نازل بسيدني جرار

فكّرت إنو الشعب عم يبكيك

تاريك عم تبكي على شعبك

ـ3ـ

أيّا عرق رح تنتج الكركه

وتمرمر العنقود ع غيابك

ما سكرت مرّه.. سكرت الضحكه

ودوّبت كل الحب بشرابك

وأيّا قصيده قادره تحكي

وجنّت وقت ما تشلّع كتابك

جوقات زارت بيتك الملكي

وما تسكّر بوجّ البشر بابك

إسمك عصام.. وعيلتك ملكي

خالد إنتْ بعقول غيّابك

وعايش ع طول بقلب احبابك

**

بحيرة ضوّك

بمناسبة صدور ديوان (بحيرة الضوء ـ 1991) للشاعر نعيم خوري.

ـ1ـ

بْحَيْرِةْ ضَوَّكْ.. صَارِتْ بَحْرْ

عَمْ بِتْغَسِّلْنَا مْوَاجُو

وْلَوْ مِنَّكْ مَا كَان الْفَجْرْ

نَقَّانَا بْزَحْمِةْ هَـ الْعُمْرْ

تَا يْضَوِّي فِينَا سْرَاجُو

ـ2ـ

بْحَيْرِةْ ضَوَّكْ.. وِسْعِ الْكَوْنْ

شْطُوطَا بِتْلَوِّنْهَا شَمْسْ

بْتِشْرُقْ مِنْ عِنَّا.. مِنْ هَوْنْ

مِنْ مَطْرَحْ مَا صَفَّى اللَّوْنْ

يْزَوْزِقْ بُكْرَا بْوَهْج الأَمْسْ

ـ3ـ

حْرُوفَكْ.. قَالُوا عَنْهَا: نْجُومْ

بِنْيِتْ فَوْق الْوَرْقَه بْيُوتْ

مَفْرُوشِه كِلاَّ بِعْلُومْ

مِنْ دُونَا مَا فِينَا نْقُومْ

مْنِمْشِي.. وْعَ الْحَارِكْ مِنْمُوتْ!!

ـ4ـ

يَا خُورِي.. الْـ صيَّرْت الشِّعْرْ

حْكَايِه.. وِالْغُرْبِه أَوْطَانْ

وْصِرْت تْكَحِّلْ عَيْن الدَّهْرْ

بْحِبْرَكْ.. مَا أَشْرَفْ هَـ الْحِبْرْ

اللِّي تْعَمَّدْ فِيهْ الإِنْسَانْ!

**

شطوط الألـم

ألقيتها سنة 1995، يوم افتتاح مأوى تراز واسكندر علـم التابع لراهبات العائلة المقدّسة المارونيّات ـ دلويشهيل..

تَرَاز وِاسْكَنْدَر عَلَمْ

صَارُوا بْهَـ الدِّنيِي نَغَمْ

زَرْعُوا خُلُودُنْ عَ الْوَرَقْ

آياتْ .. أَقْوَى مْنِ الْعَدَمْ

وْراهْباتْ .. زَهْرات الْحَبَقْ

عَ كْفُوفُن بْتِكْرُجْ نِعَمْ

نَدْرُوا السَّهَرْ .. حَصْدُوا الأَرَقْ

صَارُوا الأَرْزِه الْـ بِالعَلَمْ

صارُوا الْخَيْر الْـ ما انْدَلَقْ

إِلاّ بِـ كاسَات الكَرَمْ

بَيْن السَّما وبَيْنُنْ نَفَقْ

وْرَكْعَات ما بْتَعْرِف سَأَمْ

تا كلّْ ما دِبْلِ الشَّفَقْ

وِتْفَرْفَطُوا حْرُوف الـ "نَعَم"

تا كلّْ ما النُّور احْتَرَقْ

بِعْيُونْ شَرَّدْها النَّدَمْ

في بَيْت بِالنِّعْمِه عَبَقْ

كَسَّر بِـ إِيـمَانُو الصَّنَمْ

إسْمُو عَ سِكَّانُو انْطَبَقْ

عِجَّازْ .. عَ شْطُوط الأَلَـمْ

عِجَّازْ .. وِحْدِتْهُنْ غَرَقْ

بَدُّنْ عِنَايِةْ رَاهْبِه

اخْتَارَا يَسُوع مْنِ الأُمَمْ

**

كونستانس أختي

ألقيتها عام 1995، يوم تكريم الأخت كونستانس الباشا في السفارة اللبنانية كانبرا، من قِبَل سعادة السفير لطيف أبو الحسن وزوجته السيّدة سميرة أبو الحسن.

ـ1ـ

تا يْكَرّمِكْ لُبْنانْ .. نِيَّالِكْ

يا أُمّ .. كِتْرُوا بْهَـ الدِّنِي عْيَالِكْ

حِمْلُوا الْمَشَاعِلْ، نَوّرُوا الأَزْمانْ

وْشَمْس الزَّمَنْ نِقْطَه بْمِشْعَالِكْ

زْرَعْتِي الْمَدَارِسْ.. فَرَّخْ الإِنْسَانْ

بْغُرْبِه.. ما قِدْرِتْ تِحْصُر مْجَالِكْ

كونسْتَانْس أُخْتِي.. بْقُولْهَا فَرْحَانْ

وْزِعْلانْ قَلْبِي يْوَدِّع خْيَالِكْ

شُو بْقُول.. لِلزَّهْراتْ.. لِلْبُنْيَانْ

لْشِي أَلْف شَمْعَه ضَوِّت قْبَالِكْ؟!

شُو بْقُولْ.. قُولي.. طَمّنِي اليَئْسَانْ

بْعُمْرِكْ ما كِنْتِي تِمِلْكِي حَالِكْ؟!

شُوفِي "اللَّطِيف" الْـ وَكّلُو لُبْنانْ

وْشُوفِي سَمِيَره أَرْزِة جْبَالِكْ

تا يْكَرّمُوكِي.. يا رِضَا الدَّيَّانْ

عَزْمُوا الْحَبايِبْ.. رَوّضُوا الْهُجْرانْ

وْضَوُّوا السَّفارَه الْيَوْم.. كِرْمَالِكْ.

ـ2ـ

مْشِيتْ حَدِّكْ.. وِالْعُمرْ دُولابْ

قِلْتِي: يا خَيِّي.. جْنُونْ عُمْرِي طَابْ

شِفْت الْقَدَاسِه مْشَعْشَعَه بِعْيُونْ

وِسْع السَّمَا.. كِبْر الْحَرفْ بِكْتابْ

رْسَمْتِي الْمَحَبِّه نَبْع مِنْ مَيْرُونْ

بْنَبْع الْمَحَبِّه تْعَمّدُوا الْغِيّابْ

مِتْلِكْ حَدَا تا يْكُونْ.. صَعْب يْكُونْ

قِمِّةْ تَوَاضُعْ ما وِصِلاّ تْرَابْ

شَعْبِكْ إِلِكْ مَدْيُونْ.. شُو مَدْيُونْ

لا الدَّمْع ، لا الدَّمَّاتْ ، لا الْكِلْماتْ

فِيهُنْ، يا أُخْتِي، يْسَدّدُوا الِحْسَابْ!

**

الجائزة

ألقيتها في 10 كانون الأول 1994 ، يوم منحي جائزة التقدير الأولى للأدب المهجري بحضور وزير المواصلات الفدرالي السيد بيتر بادوين .. ومئويَّة المربّي المرحوم جرجي أبي إسبر.

ـ 1 ـ

جِرْجِي بُو إِسْبِرْ.. خَرْطَش مْزَامِيرْ

عَ وْرَاقْ دَهَّبْها بْمَزَامِيرُو

وْخَلَّى الْقَصِيدِه تْوَزِّع مْسَامِيرْ

عَ شْعُوبْ.. مِنْ هَبِّةْ هَوَا يْطِيرُوا

وِالشَّرْق يَللِّي بْدَايْتُو حْزَازِيرْ

وِنْهَايْتُو.. بْدَايَاتْ تِعْتِيرُو

فَسَّرْ حُرُوفُو الْـ لازِمَا تِفْسِيرْ

وْبَعِدْنا مْنِمْشِي عَ تفْسِيرُو

وْإِبْنُو دَاوُود اللِّي تْرَبَّى كْبِيرْ

عَ كْفُوفْ بَيُّو الْـ هَزِّت سْرِيرُو

بْفَيِّةْ حَنانو حَيَّكْ مْشَاوِيرْ

ضَوَّى الْمَدارِسْ وَهجْ تفْكِيرُو

وْكِلْ مَا بْصُفُوفُو غَطّ طِفْل زْغِيرْ

قُولُوا: الْغَرِبْ قَرَّبْ شُرُوقُو شْوَيّ

وْقولوا: الشَّرِقْ.. إجْرَامْ تِأْخِيرُو!

ـ 2 ـ

كل الْجَوائِزْ مُضْحِكِه يا نَاسْ

لَوْ مَا الْمَحَبِّه تِخْتِمَا بْإيدَا

وْلَوْ مَا الْعُيُون تْعَلِّقا نِبْرَاسْ

عَ شْطُوطْ عَمْ تِغْرَقْ بِتِنْهِيدَا!

مِتْل البَشَرْ.. أشْعَارْنا أجْنَاسْ

بْتُولَدْ.. تا نِسْتَمْتِعْ بِتِغْرِيدَا

وْحَتّى تْوَعِّي مُجْتَمَعْ حَسَّاسْ

نَاقُوقْ.. لكِنْ هَوْن بِيزِيدَا

نِحْنَا بْمَهْجَرْ.. ضِحِكْتُو بِتْبَاسْ

عَ شْفَافْنَا.. وْمَمْنُوعْ تِرْدِيدَا

رْجُوعْنَا مَرْسُومْ جُوَّا الْكَاسْ

عَ جْنَاحْ سَكْرَه مْحَمَّض نْبِيدَا

رْجُوعْنَا.. أَحْلامْ عَمْ تِنْدَاسْ

رْجُوعْنا.. كِذْبِه.. مَا مِنْرِيدَا

عَ بْلادْ بَعْدَا بْتِحْمل الْكِرَّاسْ

وْفَوْقْ رَاسَا مْعَلِّمَا يُوضَاسْ

وِمْتِيـلِتَا.. كلّْ يَوْم بِتْـعِيدَا

ـ 3 ـ

وَيْنَكْ يا جِرْجِي.. يا كْفِرْحَاتِي

فَيِّق بْلادِي.. وْغَيِّر حْيَاتِي

مِيِّةْ سِنِه.. ما بْتِطْمُرْ الأَمْجادْ

شَايِفْ بِـ سِيدْنِي مَجْدَكْ الآتِي

سَامِع زْلاغيط أَهَل وْلادْ

وْزَقْفات بِتْنَمِّرْ عَ زَقْفَاتِي

وْسَامِعْ قَصَايِدْ، مِنْ أَدَبْنا ، جْدادْ

غَنِّتْ بِـ إِسْمَكْ.. إِسْم أَرْزاتي

كَمْشِة ترابَكْ شامْخَه بِبْلادْ

بْصَلِّي تا تِرْجَعْلا تْراباتي

إِنْت اللِّي بَاقِي حَيّ.. نِحْنا رْمادْ

هاجِرْ.. تا تَعْرِفْ سرّ حَكْيَاتِي

أَرْوَاحْنَا بْلُبْنانْ.. وِالأَجْسَادْ

كِذْبِه كْبِيرِه.. سْتُورْ كِذْبَاتِي

بْعَادْ نِحْنَا، عَنْ وَطَنَّا، بْعادْ

بْجَرِّبْ تا إِرْجَع، وِالدّمُوع بْحُورْ

وِبْخافْ إسبَحْ فَوْقْ دَمْعَاتِي!

**

كامل.. كمالو نور

ألقيتها في ندوة رابطة إحياة التراث العربي ـ سيدني، 2/12/1988، حول كتاب (مشوار مع شربل بعيني) لمؤلّفه الاستاذ كامل المر.

ـ1ـ

مِشْوَارْ..

دَخْلَكْ كِيفْ هَـ الْمِشْوَارْ

قْدِرْتْ إِنَّكْ تِقْطَعُو

وْبِاللَّيْلْ وَحْدَكْ تِرْجَعُو

وْيَا مَا بَشَرْ عَمْ يِفْزَعُوا

تَا يِفْشَخُوا بِنْهَارْ؟!

ـ2ـ

مِشْوَارْ..

مَا رْضِيتْ إِنُّو يِختفِي

وْيِتْسَتَّرْ بْقُبْع الْخَفِي

طِرْطَشْت دَمَّكْ عَ الْوَرَقْ

وِنْصَبْتْ حَرْفَكْ عَ الشَّفَقْ

تَا كِلّ مَا الصُّبْح انْدَلَقْ

يُوقَعْ بِجرْن الْمَعْرِفِه.

ـ3ـ

قَبْلَكْ.. مَا كَانْ الْـ كَانْ

وْلاَ الْحَرْفْ حَسّْ بْقِيمْتُو

غِسَّلْتْ وِجُّو.. بَانْ

كلُّو وَفَا وْإِيمَانْ

وْعَ شْفَافْنَا تِرْنِيمْتُو

ـ4ـ

شِفْت الْوَطَنْ مَرْسُومْ

وِمْخَزّقَه الصُّورَه

نَزّ الْجَبِين هْمُومْ

بِالْقَلْبْ مَحْصُورَه

حْمِلْت صَوْت الرِّيحْ

وْقِلْتِلّنَا: قُومُوا

نِرْسُمْ فَرَحْنَا زِيحْ

بْعَصرْ كِيفْ مَا نْزِيحْ

عَمْ يِنْفُخ سْمُومُو

ـ5ـ

يَا رْفِيقْ دَرْبِي.. لَيْشْ

بَعْدُنْ مَا فِهْمُوا عْلَيْكْ

بْيِمْشُوا عَلَى الطِّمَّيْشْ

وْمَا بْيِمِسْكُوا بْإِيدَيْكْ؟!

بَدَّكْ أَدَبْ إِنْسَانْ

يِخْلَقْ شَعبْ فَنَّانْ

يْلَوِّنْ سَمَا أَوْطَانْ

عَمْ تِحْمِيَا بْعِينَيْكْ.

ـ6ـ

يَا مَا سْأَلْت الْقَلْبْ

عَنْ شَخْصَكْ الْغَالِي

الْـ ضَوَّى شْمُوع الْحُبّْ

بِـ عَتْمِة لْيَالِي

خَلِّت شْعُوب تْضِيعْ

عَ مْفَارِق الأَيَّامْ

لِلْحقْد إِبْنَا تْبِيعْ

وْتِتْيَزَّرْ بْآلامْ

قَللِّي الْقَلبْ: لا تْخَافْ

كَامِلْ.. كَمَالُو نُورْ

لْوَحْدُو إِذَا بْيُوقَافْ

بِيحَارِب الدَّيْجُورْ

ـ7ـ

وْصَارُوا اللَّيَالِي يِغْرَقُوا

بْنُور الْفَجرْ

وَقْت اللِّي حَرْفَكْ زَوْزَقُو

وْجَنّ الْقَهرْ

وْحِمْلِ الْحَسَدْ عِكَّازْتُو

وِالإِحْتِيَالْ

شَافْ بْعُيُونُو جْنَازْتُو

وِارْتَاحْ بَالْ

خَلِّيكْ نجْمِةْ حُلْمْ

بْلَيْلْ قِيلْ وْقَالْ

تِفْرُش زْهُور السِّلْمْ

وِتْفَرِّح الأَطْفَالْ

وْتِهْدِي بْنُورَا عْيَالْ.

ـ7ـ

شُو بْقُولْ.. نِشْف الصَّوْتْ

بْغُرْبِه.. ضِحِكْهَا سِلّْ؟!

شُو بْقُولْ.. وْطَيْف الْمَوْتْ

مْنِ عْرَاسْنَا بِيطِلّْ

وِبْلادْنَا بْتُوقَعْ

بِـ بِيرْ مَاضِينَا

بْتِنْدَهِلْنَا نِرْجَعْ

وْبِتْسَكِّرْ الْمِينَا

وِالْقَلْب.. مَا بِيهِمّْ

لَوْ دَابْ مِنْ قَهْرُو

الِمْهِمّْ يِدْفَعْ دَمّْ

لِلْحَاكِمْ بْأَمْرُو!!

ـ8ـ

جُوعْ الْجَسَدْ مُشْ جُوعْ

جُوع الْفِكرْ أَعْظِمْ

كلُّو أَسَى وِدْمُوعْ

وِعْقُولْ تِتْأَلَّمْ

وْعَ طُولْ عَمْ شُوفَكْ

كَامِلْ بِـ مَعْرُوفَكْ

وْمَعْ كلّ طَالِبْ عِلْمْ

بْتِتْقَاسَمْ حْرُوفَكْ.

ـ9ـ

وِالرَّابْطَه اللِّي عْطَيْتْهَا قَلْبَكْ

دَقّْ رَاسَا بِالسَّمَا

وْضَوِّتْ قَمَرْ شَعْبَكْ

بْإِيدَيْنْ..

إِيدْ الْمَجدْ قَعْدِتْ تِرْسِمَا

بْعِينَيْنْ..

صِرْنَا بَلاهَا نْضِيعْ

وِنْغِصّ بِالْكِلْمَاتْ

نِشْبَعْ مِنِ التِّجْوِيعْ

وْنِبْرُدْ مِنِ الآهَاتْ.

ـ10ـ

بْحَرْفَكْ غَنِي..

وْلَوْ تِفْتَحُنْ إِيدَيْكْ

بْتُوقَعْ دِنِي

عَ مْطلّ.. حَنّ عْلَيْكْ

بْوَادِي كْفِرْحِلْدَا

عَ تْلاَلْ.. فَرْشِةْ طِيبْ

حَاك الزَّهِرْ جِلْدَا

وْيَا رَيْتْ فِيِّي جِيبْ

مِنْ ضَيْعتَكْ شِي غُمْرْ

رِشُّوا بْدَرْبِي.. وْغِيبْ

بْلَحْظَاتْ أَحْلَى عُمْرْ

وْيِدْنَقْ بِـ قَلْبِي الْجَمْرْ!

ـ11ـ

مِينْ قَالْ إِنُّو الْمَوْتْ

رَحْ يِقْدرْ عْلَيِّي

وْقَلْمَكْ شَلَحْنِي صَوْتْ

عَ شْفَافْ غِنِّيِّه؟

وِالصَّوْتْ مَا بِيمُوتْ

وْلاَ بْيِنْقِبِرْ بِسْكُوتْ

بْيِصْرُخْ بِـ إِدْن النَّاسْ:

لا تْأَمّنُوا لْطَاغُوتْ

عَرْشُو خَشَبْ تَابُوتْ

مْطَعَّم بْيَاقُوتْ

وِمْزَيَّنْ بْإِلْمَاسْ

مِنِ عْضَامْ النَّاسْ!

**

أغلى حبيب

مهداة للسفير لطيف أبو الحسن، 1988

ـ1ـ

يا سَفِير بْلادْنا الْحُرّ الأَمينْ

يا لَطِيف الْمَعْشَر وْبَيّ الْحُسنْ

إِنْت الطّبيب لْشَعبْ مِتْشَرَّدْ حَزينْ

كِتْرُوا قْبُورُو.. وْقَلّ بِبْلادُو الأَمنْ

ـ2ـ

كْبِيرْ إِنت كْبِيرْ.. مُش بِالْعُمرْ

بْأَعْمالْ.. فَرَّخْ عَ كْعابَا الزَّهْرْ

يا لَطِيف الْحِسنْ جُوَّا الْقَلبْ

بَيْتَك تْعَمَّرْ مِن ضلُوع الصَّدرْ

ـ3ـ

كْبيرْ إِنت كْبيرْ.. بِمْحَبِّه

أَنْقَى مْنِ التَّلْج الْـ عَلَى صنِّينْ

زْرَعت الْفَضِيلِه بْأَرْض هَـ الْغُرْبِه

بْدَرْت السَّعادِه بْدَربْ مُغْتِرْبِينْ

ـ4ـ

يا رَمْز وِحْدةْ شَعْب.. حُكَّامُو

مَصُّوا بْدَمُّو سْنِينْ خَلْف سْنِينْ

قِللِّي لْشَعْبِي يْوَقِّفْ صْيامُو

وْيِفْطَرْ عَ دَمّ الْـ تاجْرُوا بِالدِّينْ

ـ5ـ

كِرَّمِتْنِي.. مَشْكُورْ يا إِبنْ الْكَرَمْ

مَعْرُوفْ.. مَعْرُوفِه خْصَالَكْ لِلْجَمِيعْ

رْهَنْت عُمْرَكْ.. بَسّ تا يْخِفّ الأَلَـمْ

وْلا رْضِيتْ حَبِّه مْن التّرَاب تْضِيعْ

ـ6ـ

بْإِسمْ هَـ الأَحْبابْ.. يا أَغْلَى حَبِيبْ

وِبْإِسمْ شَاعِرْ بِالْهَجرْ مِنْضَامْ

مْنِشْكُر الْـ وَدَّاكْ بِالظَّرف الْعَصِيبْ

تَا نِفْرَح.. وْتا تِضْحَك الأَيَّامْ

**

بحبَّك.. ليش تا خبّي؟

مهداة للسفير اللبناني لطيف أبو الحسن

ـ1ـ

بْحِبَّكْ.. بْحِبَّكْ.. لَيْشْ تَا خَبِّي؟

لَوْلاكْ قَصِّتْ جَانْحِي الْغُرْبِه

إِسْمَكْ بِـ قَلْبِي كْبِيرْ

يَا "بُو الْحسِنْ" رَحْ طِيرْ

حَامِلْ جَبَلْ لُبْنَانْ بِـ قَلْبِي

ـ2ـ

وِالْجَالْيِه اللِّي حْمِيتْهَا بْعِينَيْكْ

زَرْعِتْ إِيمَانَا فِيكْ

فَرَّخْ إِيمَانَا حُبّْ عَ إِيدَيْكْ

رَبّ السَّمَا يْقَوِّيكْ

صِرْت الأَمَلْ وِالنُّورْ

صِرْت الْفَرَحْ كلُّو

لا بْيِنْحِرِقْ بَخُّورْ

وْلا النَّاسْ بِيصَلُّوا

إِلاَّ تَا تِبْقَى إِنْتْ

سَيِّدْ.. مِتِلْ مَا كِنْتْ

مْمَثِّلْ شَعبْ مَا فِي حَدَا ذَلُّو

ـ3ـ

بَاعُوا الْوَطَنْ بِالدَّيْنْ

شُو ذَنْبِنَا نِحْنَا

نِشْفِ الدَّمْع بِالْعَيْنْ

وْعَنْ جَنّتُو نْزَحْنَا؟!

وْصَار الشَّعبْ.. شَعْبَيْنْ

وْصَار الْحُكمْ.. حُكْمَيْنْ

وْصَفَّى غْرَاب الْبَيْنْ

يْشَقْلِبْ مَطَارِحْنَا

وْوَحْدَكْ يَا شِلْح الأَرْزْ

عِيَّشْتْنَا بِالْعِزّْ

وْهَمَّك تْفَرِّحْنَا.

ـ4ـ

رْسَمْت "الأَمَانِه" حْدُودْ

مْسَيّجِه بْأَقْلاَمْ..

وْصَرْخِةْ وَفَا.. وِزْنُودْ

بْحُضْن الرّجُولِه تْنَامْ

وْصِرْتْ تِبْدُرْ حُلْمْ

بِعْيُونْ عَمْ تِبْكِي

تْطَيِّر حْمَامْ السِّلْمْ

وِتْشَرْقِط الضِّحْكِه.

ـ5ـ

بْحِبَّكْ.. بْحِبَّكْ.. وِالشَّعْبْ مِتْلِي

بْيِحْلُفْ بِـ إِسْمَكْ عُمْرْ

بْيِزْرَعْ طَرِيقَكْ زَهْرْ

تَا تْصِيرْ دَرْبَكْ لِلْمَجدْ سَهْلِه

وْتِمْشِي عَلَى زْغَارِيدْ

أَطْفَالْ.. شَافُوا الْعِيدْ

جَايِي مَعَكْ.. وِابْتَدْيِتْ الرِّحْلِه.

**

ساعدني

مهداة للسفير لطيف أبو الحسن

ـ1ـ

مِدِّلِّي إِيدَكْ.. سَاعِدْنِي

الْغُرْبِه تِلْتَيْنَا أَوْهَامْ

وْإِلاَّ بْلادِي مَا بْتِسْعِدْنِي

رَجِّعْنِي.. تَا بْحُضْنَا نَامْ

ـ2ـ

إِنْت مْمَثِّلْ أَرْضِي وْشَعْبِي

إِنْت الْبَيّْ الْـ عَمْ تِحْمِينَا

يَا سَفِيرْ بْلادِي.. الْغُرْبِه

لَوْلاك بْتِمْحِي أْسَامِينَا

ـ3ـ

يَا لَطِيفْ الْـ لُطْفَكْ نَهْرْ

وْحُسْنَك زِينِه للأَوْطَانْ

زْرَعْت مْحَبِّه خَلْف الْبَحْرْ

كِبْرِتْ.. وِاسْتَوْرَدْ لُبْنَانْ.

**

بحبكن

ألقيتها يوم تكريمي في السفارة اللبنانية ـ كانبرا، إثر رجوعي من المربد الشعري في العراق.. وقد حضر التكريم عدد كبير من السفراء العرب والأدباء والشعراء والأخوات الراهبات. 22/12/1987.

ـ1ـ

بْحِبّكُنْ.. لا تِسْأَلُوا: عَنْ جِدّْ

بَعْدَا دْمُوعِي بْتِشْهَد عْلَيِّي

كِيفْ كَرْجِتْ عَارْيِه عَ الْخَدّْ

تَا حْمِلتْكُنْ إِنْتُو بْعِينَيِّي

ـ2ـ

كِلّ اللِّي قِلْتُو.. بْإِسِمْكُنْ قِلْتُو

إِنْتُو الْـ زَرَعْتُوا الْحَرْفْ عَ شْفَافِي

وْلَوْلا شِي مَرَّه مْنِ الدَّربْ مِلْتُوا

بْفَتِّشْ عْلَيْكُنْ عَ الدَّربْ.. حَافِي

ـ3ـ

خْصُوصِي السَّفِير.. الْـ رَاسِم الأَوْطَانْ

بْقَلْبُو سَمَا.. النّجْمَاتْ تِضْوِيهَا

وْلا تِفْزَعُوا لَوْ زَمْجَر الْبُرْكَانْ

قَادِر بِلَوْح الصّدْر يِحْمِيهَا

ـ4ـ

إِسْمُو لَطِيفْ.. وْبُو الْحسِنْ عَيْلِه

التَّارِيخْ شَكْشَكْلا الصَّدْر إِلْمَاسْ

الْمَيْلِه اللِّي فِيهَا.. بْتِرْجَح الْمَيْلِه

عَ كِتِرْ مَا بْتِلْتَمّ حَوْلُو النَّاسْ

ـ5ـ

بْيِشْهَد عْلَيِّي الرَّبّ.. حِبَّيْتُو

مِنْ يَوْمْ مَا دَقّ الْهَوَا عَ الْبَابْ

وْوَقْت اللِّي صَفَّى بَيتْنَا بَيْتُو

مْنِزْعَلْ إِذَا بْيِنْقَلّنَا.. غِيَّابْ!

ـ6ـ

وِالسِّت سَمِيرَه بْضِحْكِتَا آيَاتْ

الضَّيْف فِيهَا بْيِرْتِفِعْ لَـ فَوْقْ

لَـ مَطْرَحْ الْـ بِتْوَزِّع النّجْمَاتْ

أَنْوَارْ.. كِلاَّ عَاطْفِه مَعْ ذَوْقْ

ـ7ـ

وِالسُّفَرَا.. الْـ بِيمَثّلُوا أَوْطَانْ

إِسْمَا عَ تِمّ الْكَوْن غِنِّيِّه

لَوْ مَا بْقَلْبُو يْخَبِّيُنْ لُبْنَانْ

كَانُوا بْقَلْبِي تْجَمَّعُوا سْوِيِّه

ـ8ـ

وْرَاهْبَاتْ.. لَوْلا مْحَبِّتُنْ مَا كْبِرْتْ

وْلا كَانِت الأَيَّامْ غَمْرِتْنِي

وْلَوْلا جْنَاحُنْ.. لِلسَّمَا مَا طِرْتْ

وْلا عْيُونْ جُوَّا كْتَابْ قِرْيِتْنِي

ـ9ـ

وِالرَّابْطَه.. اللِّي كَرّمِتْنِي كْتِيرْ

كِيفْ بَدِّي إِشْكِرَا.. قُولُوا

بْحُضْنَا إِذَا بِينَامْ حَرْف زْغِيرْ

بِيفِيقْ عَمْ يِتْشَاوَفْ بْطُولُو

ـ10ـ

وْيَا رَيْت حُلْم الْمِرْبِد بْيِنْعَادْ

تَا شُوفْ وِجّ الْـ حَبّهُنْ قَلْبِي

هَـ النَّاسْ يَللِّي حَوّلُوا بَغْدَادْ

جَنِّةْ ضِيَافِه وْعِزّ وِمْحَبِّه

ـ11ـ

انْ قِلْتْ شُو مَا قِلْتْ.. مُشْ مَعْقُولْ

رِدّ الْجَمِيلْ وْجَدِّدْ الآمَالْ

الشَّعْب الْعِرَاقِي بِالْوَفَا مَجْبُولْ

وْبِضْيَافْتُو.. عَمْ تِنْضَرَبْ أَمْثَالْ

**

إنسان

ألْقيتها في 16 - 10 - 1994 ، يَـوم زارني سفير لبنـان الدكتور لطيف أبو الحسن والسيّدة عقيلته.

ـ1ـ

سُبْحان أَللَّه الْـ صَوَّرَكْ إِنْسَانْ

كِلَّكْ مَحَبِّه وْتَضْحِيِه وْإِيمانْ

وْقَلَّكْ: يَا إِبْنِي، كِيفْ مَا بِتْرُوحْ

ضَحِّي بْدَمَّكْ، بِالْقَلَبْ، بِالرُّوحْ

مِنْشَانْ يِبْقَى مَوْطَنَكْ لُبْنَانْ

ـ2ـ

إِنْت اللَّطِيفْ.. وْمِينْ عِنْدُو لُطْفْ

قَدَّكْ.. يَا مِشْعَال الْعلم وِالْحرْفْ

شِفْت الْبَشَرْ بِالصَّف عَمْ تِصْطَفّْ

حُلْمُنْ، يا بَيّ الْكلّْ، لَمْس الْكَفّ

الْـ رَفْعِتْ إِسِمْ لُبْنَانْ.. بِالْبُلْدَانْ

ـ3ـ

بْإِسْمِي، بْإِسِمْ أمّي الْحَنُونِه بْقُولْ :

أَهْلا بْسَمِيرَه الْـ سَوْسَحِتْ الِعْقُولْ

إِنْتِي الأُخت وِالأُمْ.. مُشْ مَعْقُولْ

حْمِلْتِي الْوطَنْ، وِبْتِحِمْلي عَ طُولْ

هْمُومْ شَعب مْهَجَّرْ وْتعْبانْ

ـ4ـ

وْأَهْلا وْسَهْلا بْكلّ الِمْحِبّينْ

رَاهْباتْ حَبُّوا الرَّبّْ.. صَانُوا الدِّينْ

مِينْ مِتْلُنْ يا سَمِيرَه.. مِينْ

عِنْدُو قَلبْ.. فَوْقُو تَلجْ صَنِّينْ

وْما فَرَّح الأَدْيانْ وِالدَّيَّانْ؟

ـ5ـ

اللَّيلِه الأَحِبَّه، يا سَفيْر، كْتَارْ

رْموز الأَدَبْ، مَعْ زِينة الشِّعَّارْ

بْحِبُّنْ أَنا.. كِيفْ مَا دُولابي دَارْ

حَدّي، عَ طُول، بْيِخِتْمُوا الْمِشْوارْ

وْجُودُنْ فَرَحْ.. وِلْهالسَّبَبْ فرْحانْ

**

كوكتيل مع الشاعر الغريب

ألقيتها في ندوة أقامتها رابطة إحياء التراث العربي عام 1987 لتكريم الشاعر زين الحسن الملقّب بالشاعر الغريب. وتجدر الاشارة ان الأبيات المنشورة بين "هلالات" هي للشاعر المكرّم.

ـ1ـ

مِحْتَارْ شُو رَحْ قَولْ يَا شَعْبِي الْكَرِيمْ

تَ الرّابْطَه إِشْكُرْ عَ هَـ الْفِكْر الْعَظِيمْ

شْبِعْنَا حَسَدْ مِنْ بَعضْنَا وْكِتْرِة حَكِي

وْرَدَّاتْ فَوْق حْرُوفْهَا الطَّبْع اللَّئِيمْ

وِكْبَارْنَا الْـ بِنْيُوا مَجِدْ هَـ الْمَمْلَكِه

عَمْ يِنْتِهُوا.. لاَ مِينْ قِشِعْ لاَ مِينْ دِرِي

لاَ.. لاَ.. يَا شَعْبِي.. بَلَّش التّكْرِيمْ

ـ2ـ

التّكْرِيمْ وَاجِبْ.. وِالْحَبَايِبْ كَرّمُوكْ

يَا زَيْنْ.. كلّ النَّاسْ صَارُوا يَعْرفُوكْ

شِعْرَكْ قَرِيب كْتِيرْ عَ قْلُوب الْبَشَرْ

وْإِسْمَكْ غَرِيبْ.. وْلَيْشْ حَتَّى يِنْعَتُوكْ؟!

لا الشّمْسْ بَدَّا نَعْت.. حَتَّى وْلا الْقَمَرْ

وِالْكَوَاكِبْ صَعْبْ تِقْنِيهَا الْمُلُوكْ

شَاعِرْ إنِتْ.. وِالشِّعِرْ زِيَّنْتُو بْصُوَرْ

بِأْسَفْ إِذَا بِالشِّعِرْ بَدُّنْ يِمْدَحُوكْ

شَاعِرْ إِنِتْ.. خِلْقَانْ عَ فَرْشِةْ كِبَرْ

غَيْرَكْ إِذَا بْأَلْقَابْ عَمّ بِيفَنّصُوا

زَيْن الْحَسَنْ.. يَا زَيْن.. وِرْتِه مِنْ أَبُوكْ

ـ3ـ

عَ طُولْ.. يَا زَيْن الْحَسَنْ.. عَ طُولْ

بِقْعُدْ لَحَالِي بْصِيرْ إِتْذَكَّرْ

كِيفْ جِيتْ مَاشِي وِالطَّبِيعَه سْيُولْ

تْبِلَّلْتْ حَتَّى صَاحْبَكْ يِكْبَرْ

لا تْخَافْ.. عَارِفْ لِلصَّدَاقَه أْصُولْ

مَا مْنِمْلِكَا تَ الإِيدْ تِتْمَسْمَرْ

عَارِفْ بِأَنَّكْ بِالْوَفَا مَجْبُولْ

وْبَعْدَكْ شَبَابْ.. وِيْسْأَلُوا التَّارِيخْ

انْ شَفْلُنْ شِي مَرَّه شَاعِر مْخَتْيَرْ؟

ـ4ـ

دِنْيِةْ مَصَالِحْ.. مَا مْنَعْرِفْ مِينْهَا

عَمْ تِلْعَب بْإِنْسَانْهَا شْيَاطِينْهَا

بْتِبْرُمْ.. بْتِبْرُمْ.. تَا تْلاَقِي صَاحْبَكْ

تَارِي الصّحْبِه الْيَوْمْ نَكْرِتْ دِينْهَا

وِبْدَالْ مَا تِرْتَاحْ حَدُّو.. بْيِتْعِبَكْ

وْبِتْصِيرْ تِكْفُرْ بِالدِّنِي وْتِكْوِينْهَا

خَيَّك رْفِيقَكْ.. مَا ضْرُورِي يِقْرَبَكْ

يَا زَيْنْ.. وَعِّي هَـ الْخَلِيقَه وْقِلّهَا:

الإِخْوِه صَدَاقَه.. مْشَبْشَبِه بِسْنِينْهَا

ـ5ـ

عَيْبْ نِبْقَى هَيْكْ بِالْعَتْمِه

وِالنُّورْ عَمْ بِيئِنّْ بِالْقِنْدِيلْ

أَعْدَاءْنَا: الإِنْسَانْ وِالْكِلْمِه!

وِصْحَابْنَا: التِّزْوِيرْ وِالتِّدْجِيلْ!

وِبْإِيدْنَا.. عَمْ نِخْنُقْ النَّسْمِه

وِبْقَلِبْنَا.. مِنْشَجِّعْ التِّقْتِيلْ

عَيْب تِبْقَى الْحَرْبْ مِرْتِسْمِه

عَ وْجُوهْنَا.. وِالدَّمّْ عَمْ بِيسِيلْ

عَيْبْ نِطْفِي تْشِرْقُطْ النِّجْمِه

وْعَيْب نِتْرُكْ هَـ الْوَطَنْ طَابِه

بْمَلْعَب سْيَاسَاتْ قَالْ وْقِيلْ!

ـ6ـ

يَا شَاعِر الْوَاقِفْ عَ بَاب الْغَدّْ

وْمَا كِنْتْ عَنْ خِدْمِةْ وَطَنْ تِرْتَدّْ

مِتْلَكْ أَنَا "نَاطِرْ أَمَلْ مَدْفُونْ"

الْحَرْب اللَّعِينِه يِنْوِضِعْلاَ حَدّْ

مِتْلَكْ أَنَا "نَاطِرْ شَعبْ مَرْهُونْ"

يْفِكّ الرِّهَان.. وْيِبْتِدِي عَنْ جَدّْ

"نَاطِر رْجَال الْعَدلْ وِالْقَانُونْ

مَا يْضَيّعُونَا بَيْن جَزْر وْمَدّْ

نَاطِرْ تَا يِرْجَعْ أَحْمِدْ وْمَارُونْ

وْفَاطْمِه وْجُورْجِيتْ يِتْآخُوا

قَبلْ مَا صَرْح الْوَطَنْ يِنْهَدّْ"

ـ7ـ

إِذَا لُبْنَانْ مَا دَاوَى عَلِيلُو

وْفِئَات الشَّعْبْ غَنِّتْلُو عَ لَيْلُو

وْإِذَا مَا الْبَدْر رَحْ يِرْجَعْ عَ لَيْلُو

صَعْب يَا زَيْنْ يِتْرِكْنَا الضَّبَابْ

ـ8ـ

إِنْت الْـ قِلْت وِالْكِلْمَاتْ صَفُّوا

مَتَلْ مَضْرُوبْ.. كِلّ مَا الشِّعِرْ صَفُّوا

يَا دِلّ الشَّاعِر الْمَقْفُولْ صَفُّو

عَ لَوْحِةْ صَنِعْتُو بْيِبْكِي الْكِتَابْ

ـ9ـ

وْوَقَتْ مَا جَفِنْ شِعْرَكْ عَازْ مِيلُو

مِنِ الْغَبْرَه اللِّي بِقْيِتْ عَ زْمِيلُو

صَرَخْتْ: اللِّي بْيِشْمَخْ عَ زَمِيلُو

جَرِيمِه يْرَافِق رْجَال الأَدَبْ

ـ10ـ

افْتَكْرُوا الشِّعِرْ هَـ الْـ كِمّ وَزْن وْقَافِيِه

وِبْحُورْ.. عَ شْطُوطَا الْمَرَاكِبْ رَاسْيِه

الأَشْعَارْ.. لَوْ مَا جَدَّدِتْ بُنْيَانْهَا

وْدَمْجِتْ بُحُورَا الْـ عَ الشَّفَقْ مِتْرَامْيِه

كَانِتْ بْيُوتْ الشِّعِرْ مِنْ أَوْزَانْهَا

قِرْفِتْ.. وْصَاحِتْ وَيِنْهُنْ شِعَّارْنَا

الشِّعِرْ وَاقِفْ.. وِالْخَلِيقَه مَاشْيِه؟!

ـ11ـ

إِنْت الشِّعِرْ.. خَلِّيكْ يَا شَاعِرْ عَنِيدْ

عَارِفْ أَنَا بْهَـالْحَرْبْ جَفْنَكْ مَا غِفِي

وِصَّيْتْ إِبْنَكْ مِنْ كَلامَكْ يِسْتِفِيدْ

وْمَا خِفْتْ تِتْقَلَّبْ عَ جَمْر الْعَاطِفِه

"قِلِتْلُو: يَا ابْنِي أَنَا فِكْرِي شَرِيدْ

خَلِّصْ بِلادَكْ بِالظُّرُوف الْمُجْحِفِه

مَا دَامْ فِيِّي دَمّ يِمْشِي بِالْوَرِيدْ

لا بِسْكُتْ.. وْلا بِلْجُم بْكَفِّي الْيَرَاعْ

وْلا بِعْتِرفْ يَا ابْنِي بْأُخُوِّه مْزَيِّفِه"

ـ12ـ

كلّ النَّاسْ شِعْرَكْ حَافْظِينُو

تَا صَفَّى الْقَلْبْ يِشْكِي مِنْ أَنِينُو

يَا زَيْنْ.. الْغَايِب الْـ مَا بَانْ سِنُّو

عَ حِمْل مْصِيبْتُو أَللَّـه يْعِينُو

إِنْت الْـ قِلْتْ وِالْغِيَّابْ جَنُّوا:

"يَا إِخْوَانِي الْـ وَطَنْكُنْ تَارْكِينُو

أَوَّلْ شَرْعْ لِلإِنْسَانْ سَنُّو

بِأَحْرُفْ نُورْ صَوَّرْهَا بْيَمِينُو

مَعِي جَايِبِلْكُنْ تِذْكَارْ مِنُّو

هَدِيِّه مِنْ غْصُون الأَرْز فِيهَا

عَطِفْ لُبْنَان وِشْعُورُو وْحَنِينُو"

ـ13ـ

يَا زَيْنْ.. الشَّعبْ قِللِّي شُو حَصَلُّو

تَا بَاعْ الأَرْضْ وِتْسَوَّدْ سِجِلُّو

وْبِشِعْرَكْ قِلْتْ: يَا بْلادِي.. تْصَدَّعْ

كيَانِكْ.. وِالسِّلمْ ضَيَّعْ مَحَلُّو

وْبِشِعْرَكْ قِلْت: أَرْزِي مَا بْيِرْكَعْ

وْنُسُور الْجَوّ رَكْعِتْ عَ مْطَلُّو

"وْبِلادِي الْـ حَوَّلُوكِي لْبُوزْ مَدْفَعْ

وْعَلَيْكِي تْآمَرُوا حَتَّى يْذِلُّوا

الأَرْز اللِّي عَلَى جْبَالِكْ تْرَبَّعْ

قَبِلْ آدَمْ مَا كَوْكَبْنَا وِصِلُّو"

ـ14ـ

بِغُرْبِتْنَا.. الْقَصَايِدْ عَاجْنِينَا

بِدَمْعِةْ أمّْ خَافِتْ عَ جَنِينَا

تَا صَارْ الشِّعِرْ فَايِتْ عَ جُنَيْنَه

صُوَرْهَا زَهْر.. وِحْرُوفَا ترَابْ

ـ15ـ

وَطَنَّا انْهَدّْ.. كِيفْ بَدّنَا نْرِدُّو

وْتُرَاب الْحِقدْ عَ الْخَايِن نْرِدُّو

نْدَهْلَكْ صَوْتْ لِوْلادَكْ.. انْ رَدُّوا

بِيكُونْ الشَّعْب صَالِي لِلدّيَابْ

ـ16ـ

وَطَنَّا ضَاعْ بِشْمَالُو وْيَمِينُو

يَا مِين يْرِدّ أَمْجَادُو يَا مِينُو

مَا دَام الْحَاكِم بْيِحْلُفْ يَمِينُو

بِـ عَهْدُو الدَّمّ يُوصَلْ لِلرِّكَبْ

ـ17ـ

كْتَبْت الشِّعِرْ.. يَا زَيْنْ.. يِرْحَمْ مَيْمِتَكْ

يَللِّي عَ حُبّ النَّاسْ عِرْفِتْ رَبِّتَكْ

اللِّي بْيِطْعَنُوا بِالضَّهْر.. مَا بْعِدُّنْ بَشَرْ

وْإِنْت الْخَلِيقَه عَ الشَّهَامِه حَسْدِتَكْ

وْنِشْفُوا دْمُوعَكْ يَوْم مَا شِفْت الْخَطَرْ

حَايِمْ عَ أَرْض الْـ مِنْ حَنَانَا سِقْيِتَكْ

مَهْمَا انْكَتَبْ أَشْعَارْ وِانْرَسْمِتْ صُوَرْ

بِتْضَلّْ أَشْعَارَكْ فَرِيدِه بْرِيشتَكْ

مَا دَمْعِت الْعِينَيْن.. أَوْ حَنّ الْحَجَرْ

إِلاَّ بْكِلْمِه صَادْقَه وْفِعْلاَ عَظِيمْ

وْصَادِقْ يَا زَيْن كْتِيرْ إِنْت بْكِلْمِتَكْ.

**

معلّم إنت

ألقيتها عام 1988 في الندوة التكريمية التي أقامتها رابطة إحياء التراث العربي في سيدني للمربي فؤاد نمّور.

ـ1ـ

مْعَلِّمْ إِنِتْ.. لا تْخَافْ.. إِيدَكْ مِدّهَا

بْتِسْنُدْ سَمَا.. صَعْب النُّجُوم تْحِدّهَا

وْمَهْمَا الْجَهَالِه تِزْحَف بْعَتْم الدِّنِي

بْكَمْشِة حْرُوف زْغَارْ فِيك تْرِدّهَا

مْعَلِّمْ إِنِتْ.. مُشْ عَيْب لَوْلا مْنِنْحِنِي

قِدَّامْ كِلْمِه.. شْمُوخْنَا مُشْ قَدّهَا

وْأَطْفَالْنَا الْـ عِلَّمِتْهَا بْخَمْسِينْ سِنِه

وْمِشَّيْتهَا عَ دْرُوبْ خَضْرَا مْزَيَّنِه

أَكْتَرْ مِنِ الأَيَامْ.. لَوْ مِنْعِدّهَا

ـ2ـ

مْعَلِّمْ إِنِتْ.. شُو صَايْبَكْ زِعْلانْ

وِهْمُومْ كِلّ النَّاسْ عَ كْتَافَكْ

يَللِّي زْرَعِتْ بِقْلُوبْنَا الإيمَانْ

لازِم يْزَهِّرْ وَرْدْ عَ شْفَافَكْ

يَا حَاضِن الإِنْجِيلْ وِالْقُرْآنْ

بِالْحُبّ بَدّنَا نْزَوْزِق غْلافَكْ

مِنْشَانْ حَتَّى يِهْتِدِي إِنْسَانْ

مِتْعَصِّب.. بْقَلْبُو الْحِقِدْ بُرْكَانْ

تَا يْشُوفْ حَالُو.. كِلْ مَا شَافَكْ.

ـ3ـ

فْكَارَكْ.. عَ طُول بْتِفْتَح مْجَالاتْ

أَوْسَعْ مِنِ الآمَالْ سَاحِتْهَا

وْكِلْ مَا شْفَافَكْ تِدْلُق حْكَايَاتْ

بْتِشْرَب زْهُور الأَرْضْ مَيِّتْهَا

وِحْرُوفَكْ الْـ عَمْ تِزْرَعَا جْنَيْنَاتْ

شِبْعِتْ دِنِي مِنْ خَيْر غَلِّتْهَا

مَهْمَا حْكِينَا.. بْتِستحِي الْكِلْمَاتْ

مْنِ الْكِلْمِة اللِّي مْبَارَكَا الدَّيَّانْ

وْطَلِّةْ فَجرْ عَ الْكَوْنْ طَلِّتْهَا.

ـ4ـ

فُؤَادْ.. يَا فُؤَادْ.. جَرْفِتْنَا الْمِحَنْ

وْمَا عَادْ حَنّ الْبَيّْ عَ عْيَالُو

وْبِالْعَكْسْ عَمْ بِيدُورْ دُولاب الزَّمَنْ

وْيِتْرُكْ فَسَاد بْفَسْحِة مْجَالُو

وْأَرْضَكْ اللِّي جْبَلْتهَا بْوِحْدِةْ وَطَنْ

صَارِتْ وَطَنْ قِرْفَانْ مِنْ حَالُو

بِيفِيقْ.. كِلْ مَا يْفِيقْ.. عَ نَارْ وْفِتَنْ

وْبِينَامْ.. كِلْ مَا يْنَامْ.. يَا نَمُّورْ

مَشْغُولْ بَالُو كْتِيرْ عَ طْفَالُو..

ـ5ـ

كْبِرْتْ؟!.. إنْتَ كْبِيرْ.. وِبْعِينَيْكْ

قَعْدِتْ دِنِي.. بِتْضَلّْ عَيْنَا عْلَيْكْ

مَجْنُونْ هَللِّي بْيِنِكْرَكْ يَا نُورْ

مِتْلَكْ شَمسْ مَا يَوْمْ شَعِّتْ هَيْكْ!

لَوْلاكْ عِشْنَا الْعُمْر بِالدَّيْجُورْ

وْعَ رْقَابْنَا انْطَبْعِتْ صَابِيع الْبَيْكْ

التَّارِيخْ بَدُّو يِذِكْرَكْ.. نَمُّورْ

مْعَلِّمْ.. أَدِيب.. مْتَرْجِمْ وْنَاقِدْ

وْبُورْ سَعِيدْ تْعَمَّر بْإِيدَيْكْ.

ـ6ـ

كِيفْ بَدِّي خَبّرَكْ عَنْ حَالْتِي

يَا مْعَلّمِي.. وِالْمَيّ مَلْوَى التِّمّْ

بَعْدَا الزَّعَامِه رَاكْبِه عَ أُمّتِي

هَـ الأُمِّةْ الْـ مَا يَوْمْ شَالِتْ هَمّْ

كِلْ شِي حْكِيتَا.. هَدرْ رَاحِتْ كِلِمْتِي

وْبَعْدَا عَ نَعْش الْقَاتِل بْتِلْتَمّْ!

رَحْ إِكْرَهَا.. مْنِ مْحَبّتِي.. يَا حَسِرْتِي

عَ شَعْبْ صَفَّى بْيِنْشَرَى بْدُولارْ

وْبَعْدُو مَا شَرْبَا الْـ بَايْعِينُو سَمّْ!

ـ7ـ

وِالْجَالْيِه.. بْهَالْجَالْيِه مِحْتَارْ

وْقُوْيِتْ بِـ صَدْرِي يَا فُؤَاد النَّارْ

صِرْت شُوفْ النَّاسْ مِلْهِيِّينْ

بِالْغِشّ.. بِالتِّلْفِيقْ.. بِالأَخْبَارْ

وِالرَّابْطَه.. الْـ أَعْمَالْهَا مْنِ سْنِينْ

أَكْبَرْ فَخرْ.. رَشُّوا بْعُيُونَا غْبَارْ

بَدّنَا أَدَبْ رَائِدْ قَوِي.. مِسْكِينْ

هَللِّي بِيِطْفِي بْغَدرْ شَمْس نْهَارْ

نِحْنَا عَ دَرْب الْمَعْرِفِه مَاشْيِينْ

الْـ بِيقُولْ عَنْ حَالُو: صِرتْ عِمْلاقْ

بْيِطْلَعْ.. إِذَا بْيِنْقَاسْ.. خَمْس شْبَارْ!

ـ8ـ

خَلِّي صَابِيعَكْ تِرْسُم الأَيَّامْ

عَ ذَوقْهَا.. تَا يْصِيرْ فِينَا نْنَامْ

إِنْتَ الْعِلمْ وِالفَهمْ وِالأَخْلاقْ

إِنتَ الْحَقِيقَه الْقَاتْلِه الأَوْهَامْ

إِنْتَ الْفَرَجْ لَمَّا الصَّدرْ يِنْضَاقْ

إِنْتَ الأُبُوِّه الْحَاضْنِه الأَحْلامْ

بْتِفْرَحْ.. إِذَا بِتْسَهِّرَكْ أَوْرَاقْ

وْمِنْ نُورْ عَيْنَكْ تَاكُل الْكِلْمَاتْ

وْمِنْ دَمّ قَلْبَكْ تِشْرَبْ الأَقْلامْ.

**

هاشم

يوم اختير الدكتور هاشم الأيوبي عميداً في الجامعة اللبنانية.

ـ1ـ

عِرْفُوا اخْتارُوا.. لَمَّا اخْتارُوا

مْنِ النَّخْلِه إِبْن أْوَادِمْ

وَعَّى الْكِلْمِه

بِـ أَشْعارُو

وْنَوَّرْ عَتْمِه

بِـ أَفْكارُو

وْطَلَّعْ لِلشَّمْس سْلالِمْ

مْنِ الْبُطُولِه شَال بْدارُو

وْلِلْمَحَبِّه شَرَّعْ دَارُو

إِبْن الأَيُّوبي هَاشِمْ

**

سبعين سنه

سبعون الأخت مادلين بو رجيلي 15/5/2004

ـ1ـ

سَبْعِينْ سِنِه؟!

هْنِيَّالْهَا السَّبْعِينْ

بِـ رَاهبِه

تَرْكِتْ دِنِي

شَعْبَا دَنِي

تَا تِلْتِحِقْ بِالدِّينْ

بِحْرُوفْ دَيْر مْدَهّبِه

ضَوِّتْ سَمَا عِبْرِينْ

ـ2ـ

سَبْعِينْ سِنِه؟!

هْنِيَّالْهَا بْمَدْلانْ

لا الْوَرْد مِتْلاَ

لا عْيُون السَّوْسَنِه

أَللّـه ضِحِكْلاَ

وِانْبَسَطْ لُبْنانْ

بِبْنَيّتُو

يا خَطَّيْتُو

صَرْلُو عُمْر زِعْلانْ

وْتَا يْعَيِّدَا لْمَدْلانْ

جَمَّعْ فَرَحْ الِمْلُوكْ

وْقَلْلاَّ: أَلِفْ مَبْرُوكْ

بْعِيدِكْ أَنَا فِرْحانْ

**

زنبق زمانك

حفلة وداع السفير لطيف أبو الحسن، تموز 1997

ـ1ـ

كْبيرْ كِنتْ.. وْهَيْك رَحْ تِبْقَى

زَنْبَقْ زَمانَكْ حَدَّك الْحَبْقَه

لَوْ ما تْكُون الأَرْض هِيِّي الْـ نَدْهِتَكْ

لَوْ ما يْكُون الأَرْز بَدُّو خِبْرِتَكْ

لا تِفْتِكِرْ الِقْلُوبْ يَللِّي حَبّتَكْ

فِيها تْضَلّ بْنارْ مِحْتِرْقَه

ـ2ـ

يا سَفِير الْـ كِنتْ أَعْظَمْ خَيّ

هْنِيَّالْ ضَيْعَه إِسِمْها بْتِخْنَيّْه

صارِت تْفِيقْ وْتِلْمَحَكْ جايِي

مارِدْ.. عَ إِسْمُو انْكَتْبِت حْكايِه

حْبِسْنا مَعَكْ جُوَّات الِمْرايِه

تا نْضَلّ حَدَّكْ، يا لَطيف، خْطَيّْ

ـ3ـ

وْيا سَمِيرَه.. الْـ ضِحكْتِكْ شلاَّلْ

رَنِّةْ هَدِيرُو دَوْزَنتْها جْبالْ

مْرَقْتي مَعُو.. حْصَدْتي الْفَرَح كِلُّو

أَجْمل حُلمْ بِالْبالْ بِتْضَلُّوا

اللِّي قَالْ هَاكْ الْقَوْل، شُو بْجِلُّو:

الرِّجَّالْ خَلْفُو فِي مَرَا الرِّجالْ

ـ4ـ

بَيْتِي زْغير كْتِيرْ ما بْيسَاعْ

وْأَحْبابَك بْسِيدْني ضْياع ضْياعْ

قِصَّرْت، عارِفْ، يا حَبيب الرُّوحْ

لا تْلُومْني، قلبي أَنا مَجْرُوحْ

وْحَقّ أَللَّـه.. كيفْ ما بِتْرُوحْ

إِسْمَكْ لَحنْ عَ شْفافْنا بْيِنْذَاعْ

ـ5ـ

راجِعْ عَ أَرْضِي.. بْحَمّلَكْ حُبِّي

وْبَوْسِه لْضَيْعَه حْفَرتْها بْقَلْبِي

تْنَعْشَر سِنِه، هْدِيت الْوَطَنْ إِلْنا

وْمِتِل بِنْتَيْنَكْ تْدَلِّلْنا

عَ الأَرْز، عَ صنِّين تِحْمِلْنا

وِاللَّه رجُوعَكْ رَبَّح الْغُرْبِه

ـ6ـ

مِنْوَدِّعَكْ وِالرِّيحْ عَمْ تِبْكي

وْتِمْحي عَن شْفاف الْهَجرْ ضِحْكِه

يا بُو الْحسنْ.. لُبْنان حَظُّو كْبِيرْ

مِتْلَك إِبِن لِلأَرْض صَعْب يْصِيرْ

مْنِهْدِيكْ إِلْها.. مْنِقْبَل التِّعْتيرْ

وْمِنْضَلّ طُول الْعُمرْ عَمْ نِشْكي

**

وعدي إلك

ألقيتها في القنصليّة اللبنانية عام 1985، يوم منحي جائزة الأرز الأدبيّة من قبل سعادة السفير اللبناني جان ألفا.

ـ1ـ

الأَرْزِه الْـ حِمْلِتْ مَجْد عَ كِتْفَا

وْصَارِتْ عَ أَنْغَامْ الأَزَلْ تِغْفَى

لَوْ كانْ بَدّنا نْزَيِّنَا بْشِي إِسْم

كِلُّو شَهَامِه وْتَضْحِيِّه مَعْ عِلْم

مْنِحْفُرْ عَ كَعْبَا بِالدَّهَبْ.. أَلْفَا

ـ2ـ

إِنْسَانْ.. مِتْلُو ما انْوَجَدْ إِنْسَانْ

شِعْلِةْ مَحَبِّه وْعَاطْفِه وْإِيمانْ

رَغْم الْحَربْ وِالْحُقْد وِالطُّغْيَانْ

ضَوَّى الْفَرَحْ نِجْمِه بْسَما لُبْنانْ

وْجَمَّعْ أَحَبّ النَّاسْ وِالْخلاَّنْ

وْقَلُّنْ: وَطَنَّا بْيِفْرُضْ عْلَيْنَا

نْكَرِّمْ أَدِيب وْشَاعِر وْفَنَّانْ.

ـ3ـ

يا رَيْت فِيِّي إِشِكْرَكْ يَا رَيْتْ

وْبَيِّن شْعُورِي الْـ بِالصّدْر خبَّيْتْ

ضَاع الْحَكِي.. وِتْبَلْكَم لْسَانِي

وْما قْدِرْت قِلَّكْ كِلْ شِي تْمنَّيْتْ

لَكِنْ يَا أَطْيَبْ قَلْب لُبْنَانِي

بُوعْدَكْ.. وِبْيِشْهَدْ التَّارِيخْ

رَحْ خَلّدَكْ بِالشِّعْر بَيْت وْبَيتْ.

ـ4ـ

وْمِنْشَانْ ما نِنْسَى الْمَتَلْ شُو قَالْ:

فَتِّشْ عَنِ الْحُرْمِه الْـ وَرَا الرّجَّالْ

لازِمْ نْحَوِّشْ أَلْف سَلِّةْ زَهْرْ

مْنِ زْهُور صَعْبِه تِنْشَرَى بِالْمَالْ

وْنِشْلَحُنْ عَ جْرَيْن سِتّ الطُّهْرْ

سَامْيَا.. وْمِينْ غَيْرها بِالْبَالْ؟!

رَغْم التَّنَقُّلْ بِيْن بَرّ وْبَحْرْ

خَدْمِتْ قَضِيِّةْ شَعِبْهَا بْعِزّ وْفَخْرْ

وْبِالْوَقْت ذَاتُو رَبِّتْ الأَطْفَالْ.

ـ5ـ

وَعْدِي إِلَكْ.. وَعْد السَّوَاقِي لِلْغَدِيرْ

إِخْدُم بْلادِي وْمَصِلْحِتْهَا عَنْ ضَمِيرْ

وْبَلْسِم جْرُوح الطّفِل هَـ الْـ بَعْدُو زْغِيرْ

وْشَرّدُوه.. وْنامْ بَرَّات السّرِيرْ

وْإِحْتِرِمْ أَدْيَانْ خَالِقْنَا الْقَدِيرْ

وْما يَوْم فَرِّقْ بَيْن يُوحَنَّا وْسَمِيرْ

وْبِالْمُخْتَصَرْ.. تا تْلِيقْ فِيِّي الْجَائِزِه

بِمْشِي بْطَرِيقَك إِنْت يا أَعْظَمْ سَفِيرْ

ـ6ـ

هَـ الْيَوْمْ بَدِّي تَوِرْخُو بْمَيّ الدَّهَبْ

وْإِكْتُبْ عَ ذِكْرُو سْطُورْ لازِمْ تِنْكَتَبْ

جان أَلْفَا.. الْـ ناطْرِينُو مِنِ سْنِينْ

رَجَّع مَجْد لُبْنانْ عَنْ حَقّ وْيَقِينْ

وْرَقَّصْ الأَرْزَاتْ مِنْ كِتْر الطَّرَبْ

لِمِّنْ بِسيدْني كَرَّم رْجَالْ الأَدَبْ.

**

سفير بلادنا

وداع السفير جان ألفا

ـ1ـ

مُشْ حَقّ إِنُّو تْرُوحْ يا أَلْفَا

يا سَفِير بْلادْنا الأَوْفَى

الْحَامِلْ مَحَبِّةْ شَعْب لُبْنَانِي

النَّابِضْ بِصَدْرَكْ قَلْب إِنْسَانِي

وْيَللِّي الشَّهَامِه الْـ ما إِلا تَاني

بِتْفِيقْ عَ إِيدَيْك وِبْتِغْفَى.

ـ2ـ

مُشْ حَقّ إِنُّو تْرُوحْ وِتْخَلِّي

قْلُوب اللِّي حَبِّتْ شَخْصَكْ تْصَلِّي

مِنْشَانْ أَللَّـه يِرْزِقَا إِنْسَانْ

مِتْلَكْ وَفِي.. يا شِعْلِة الإِيمَانْ

يَللِّي بْقَلْبُو زَارْعَكْ لُبْنانْ

أَرْزِه.. تا حَتَّى لِلسَّما تْعَلِّي

ـ3ـ

مُشْ حَقّ تِتْرِكْنا بْدُون جْناحْ

نِحْنا اللِّي نَتْفِتْ رِيشْنا الأَرْيَاحْ

وْطِلَّيْت مِتْل الْمارِدْ الْجَبَّارْ

شَاهِرْ بِإِيدَكْ سَيْف نُور وْنارْ

وْمِن عَتْمِة الأيَّامْ حِكْت نْهَارْ

وْخِلَّيْت كِلّ الْجَالْيِه تِرْتاحْ

ـ4ـ

أَللَّـه مَعَكْ.. يا زَنْبَق الْوَادِي

يَللِّي بْبَياضَكْ فِرْحِت بْلادِي

تا نْقُولْ: حِبَّيْناكْ.. حِبَّيْناكْ

تا نْقُولْ: آخَيْناكْ.. آخَيْناكْ

لَكِنْ يا ألفَا جَالْيِتْنا بْلاكْ

خَايِفْ يَا حَسْرَه.. وْفِهْمَكْ زْيَادِه!

**

لو مهما صار..

ألقيتها في الندوة التي أقامتها رابطة إحياء التراث العربي حول مؤلّفاتي، وشارك بها: الدكتورة سمر العطّار، الاستاذ فؤاد نمّور، الأستاذ بطرس عنداري، الشاعر شوقي المسلماني الاستاذ إيلي ناصيف، الشاعر الغريب زين الحسن، ورئيس رابطة إحياء التراث العربي في أستراليا الأستاذ كامل المر.

ـ1ـ

هَـ السّتّ الْـ مِتْلا مَا صَارْ

الْـ عَ خْدُودَا مْفَتَّحْ نُوَّارْ

زْهُور تْحِبّ.. زْهُور تْغَارْ

زْهُور تْخَلِّي اللَّيْل نْهَارْ

زِرْتَا مَرَّه وْحِبَّيْتَا

وِنْسِيت الْقَلْب بْبَيْتَا

وْمُشْ عَيْب يْحِبُّوا الشِّعَّارْ

دكْتُورَه حْرُوفَا مِنْ نَارْ

بْتِحْرُقْ ذُلّ.. بْتِمْحِي عَارْ

وْبِتْوَحِّدْ شَعْبَا مْنِ جْدِيدْ

الشَّعْب النَّاطِرْ  فَجْر الْعِيدْ

الْعِيد الْـ رَحْ يِخْلَقْ عَ إِيدْ

الدّكْتُورَه سَمَر الْعَطَّارْ

ـ2ـ

وْمَهْمَا الشَّاعِرْ عَلاَّ وْطَارْ

وْدَوَّخْ بِالشِّعْر الْمَعْمُورْ

مَا بْيِكْبَرْ لَوْ مَهْمَا صَارْ

وْلا بْيِبْنِي لِلشِّعْر قْصُورْ

إِلاَّ مَا يِتْرَبَّى نْهَارْ

عَ إِيدْ السيِّدْ نَمُّورْ

ـ3ـ

وْبُطرُس عِنْدارِي خْسَارَه

يِخْلَقْ مِنُّو واحِدْ بَسّْ

كاتِبْ فِي عِنْدُو شْطَارَه

ما تْوَقَّفْ عَ حْدُود الأَمْسْ

جايِي لْهَالدِّنْيِي زْيَارَه

خَلاَّها تِتْحَوَّل عِرْسْ

وْصَفَّى لِلْحَرْف مْنَارَه

زَاغِتْ مِنْها عْيُونْ الشَّمْسْ

ـ4ـ

وِالْمِسِلْمَانِي.. الأَيَّامْ

رَحْ بِتْرَدِّدْ أَقْوَالُو

ما بْيِرْضَى الْعِينَيْن تْنَامْ

وْشَعْبُو عَمْ يِتْقَاتَلْ هَيْكْ

وْيَاكُلْ مِنْ لَحْم طْفَالُو

ـ5ـ

وْإِيلِي نَاصِيفْ الْمَحْبُوبْ

يَامَا وْيَامَا رَافَقْنَاهْ

مَشَّانَا عَ دْرُوب دْرُوبْ

هُوِّي احْتَلّ قْلُوب الْكلّ

وْقَلْبُو.. نِحْنَا احْتِلَّيْنَاهْ

ـ6ـ

وْيا زَيْن الْـ كِلَّكْ إِحْسَاسْ

شِعْرَكْ ما بَدُّو شْهادِه

قَلْبَكْ طِعْمَيْتُو لِلنَّاسْ

وْعَ كَعْب الأَرْزاتْ الْيَوْم

حَفْرُوا إِسْمَكْ بِبْلادِي

ـ7ـ

وْيا كامِلْ تا بْفِكْرَك جُولْ

وْإِحْكِي عَنَّكْ مُشْ مَعْقُولْ

صَرْلَك مُدِّه بْتَعْرِفْنِي

مِنْ لَحْظ عْيُونَكْ مَقْتُولْ

وْمَوْجَكْ كِل ما بْيِقْدِفْنِي

عَمْ فَكِّرْ حالي أُسْطُولْ

بْرَابِطْتَكْ بِتْشَرِّفْنِي

وِتْرَاثَكْ ماشي عَ أْصُولْ

وْلَوْلا الْجُمْهُور كَلّفْني

إِشْكرْكُنْ بِـ إِسْم الْكِلّ

مُشْ عارِفْ شُوبَدِّي قُولْ!

**

عيدك.. عيدي

مهداة للشاعر عصمت الأيّوبي بمناسبة صدور كتابه (على ضفاف الكارثة ـ1992).

ـ1ـ

مِدّ إِيدَكْ مِدّْ مِنْ إِيدِي

يَا نَسْر.. غَطَّى الْجَوّ بِجْنَاحُو

عِيدَكْ.. مَا كَان بْيِنْقِلِبْ عِيدِي

لَوْ مَا تْلَوِّنْ دَفْتَرِي بِالنُّورْ

وْتِسْكُبْ بِإِيدَكْ زَيْت مِصْبَاحُو!

ـ2ـ

شَاعِر كْبِيرْ.. وْلَيْش تَا تِحْتَارْ

يَا مَجْد.. مَجْدَكْ غَلّ بِحْرُوفُو؟!

عِشْنَا بْزَمَنْ فَبْرَك قْلُوب حْجَارْ

وْمِن كِتِرْ حبُّو وْلَهِفْتُو عَ النَّاسْ

بَيْن الدّمُوع دْمُوعْ بِتْشُوفُو

ـ3ـ

جُبْرَانْ؟!.. مِتْلُو.. وِالْهَجرْ مَسْؤولْ

رَصَّع جْبِين الْحَرْف بِكْتَابُو

غَيَّرْ صُوَرْ.. طَفَّى صَهِيل عْقُولْ

وْمِنْشَان يِبْقَى الشَّرْق شَرْق الْعِزّْ

شَكْشَك نْجُوم الْعِزّ بِتْرَابُو!

ـ4ـ

عِصْمَت.. يَا عِصْمَتْ.. خَبِّر الْكُورَه

عَنْ شَبّ ضَوَّى اللَّيْل قِنْدِيلُو

زْهُورُو.. عَ مَدّ الْكَوْن مَشْرُورَه

مَحَّى "ضِفَاف الْكَارْثِه" وِارْتَاحْ

بِقْلُوبْنَا.. وْما فِي حَدَا يْشِيلُو!

**

قاضي المدينه

ألقيتها يوم زارني قاضي المدينة الاستاذ أنطوان الشدياق في منزلي عام 1986، بحضور نخبة من الأدباء والمثقفين المهجريين.

ـ1ـ

قَاضِي الْمَدِينِه.. طَلّْ مِنْ لُبْنَانْ

حَامِلْ بِـ قَلْبُو أَرْزِة بْلادي

وْآيَاتْ.. شُو آياتْ عَنْ جُبْرَانْ

تْوَعِّي الْخَلِيقَه وْتِجْبُر الإِنْسَانْ

يَاخُدْ فِكِرْ جُبْرَانْ زُوَّادِه!

ـ2ـ

قَاضِي الْمَدِينِه.. زَلْغِطِي يَا قْلُوبْ

خَلاَّ الْعَدَالِه حُلْم يِتْحَقَّقْ

تَا صَارْ شَعْبِي التَّايِه.. الْمَصْلُوبْ

يِنْفُض غْبَار الْحُقْد.. يِمْحِي حْرُوبْ

وِيْحْرُق الشَّوْك وْيِزْرَعْ الزَّنْبَقْ..

ـ3ـ

وْهَـ الشِّلِّةْ اللِّي بْحِبّهَا عْبَادِه

أَصْحَابْ.. شُو أَصْحَابْ.. هَنِّينِي

عِنْدُنْ قَلَمْ مَا بْتِلْزَمُو شْهَادِه

تَا سَمِّيُنْ.. مُشْ حَقّ يَا قَاضِي

وْكِلّ وَاحدْ قَدّْ دَزِّينِه!

**

خالد بشعرو

ألقيتها في حفلة إصدار ثلاثة دواوين شعرية: دمع ودم، ألـم وشقفة حجر للشاعر عصام ملكي، رئيس عصبة الزجل في أستراليا.

ـ1ـ

كْتَابْ خَلْف كْتَابْ كَانُوا يِنْتِجُوا

وْمِنْ هَـ الطَّرِيقَه مَا حَدَا فَلَّتْ

إِلاَّ عِصَامْ الشِّعْر.. قُومُوا تْفَرّجُوا

شَايِلْ كُتبْ.. عِنْوَانْهَا مْتَلَّتْ

ـ2ـ

أَشْعَارْ كَاتِبْهَا بْـ "دَمْع وْدَمّْ”

قِصِّةْ حَيَاتُو الْـ كِلّهَا مْحَبِّه

مْوَاوِيلْ تَحْت جْوَانْحُو بْتِلْتَمّْ

تَا يْدَفِّيَا بْعَتْماتْ هَـ الْغُرْبِه

تْرَأَّسْ عَ عصْبِه.. كانْ إِلْهَا أُمّْ

يْفَرِّقْ وَعِي وِبْكِلْمِتُو يْرَبِّي

نَوَّرْ طَرِيقَا وْشَالْ عَنَّا الْهَمّْ

وْصَارِتْ لَـ حَالاَ تِكْبَرْ الْعُصْبِه

ـ3ـ

عِنْدُو قَلَمْ جَبَّارْ.. لكِنْ وَيْنْ

خَبَّى "الأَلَـمْ".. هَـ الْـ ضِحْكِتُو رَطْلَيْنْ؟

بْقَلْبُو؟.. صَعبْ.. حَتَّى وَلاَ بْصَدْرُو

بْقَلْبُو وْصَدْرُو سَاكْنِين تْنَيْنْ:

أَحْبَابْ.. عَ حْسَابُنْ رَهَنْ عُمْرُو

وِبْلادْ.. غَنَّاهَا بْدَمْع الْعَيْنْ

هَيْدَا عِصَامْ الْخَالِد بْشِعْرُو

هَيْدَا اللِّي دَيَّنَّا وْمَحَّى الدَّيْنْ

هَيْدَا الْكَرِيمْ.. مْوَاسْمُو انْتِظْرُوا

زَارِعْ عَ كَفُّو بْحُور وِبْسَاتِينْ

وْيَا مِينْ يِجْمَعْ غَلِّة الإِيدَيْنْ؟

ـ4ـ

“شَقْفِةْ حَجَرْ".. مِينْ قَلِّكْ تْكُونِي

وْإِنْتِي الْـ سَكَنْتِي سْنِينْ بِعْيُونِي؟

كِنْت شُوفِكْ كِل مَا خَرْطَشْ قَمَرْ

وْعَلَّقْ قَصِيدِه، عَ الشَّمسْ، قُونِه

نْطَرْتِكْ مَعُو بْفَيَّاتْ نَاسِيهَا الشَّجَرْ

بِبْيُوتْ بِالآيَاتْ مَسْكُونِه

وْلَوْ كَان مِنِّكْ يُوصَل لْعِنْدُو خَبَرْ

لا جَنّ هُوِّي وْلا ابْتَدَا جْنُونِي

عِصَامْ مِلْكِي صَوّرِكْ "شَقْفِةْ حَجَرْ”

تَا إِنْحَتِكْ بِـ هَالْمَسَا تِمْثَالْ

يِرْقُصْ عَ زَقْفِةْ نَاسْ حَبُّونِي.

**

المطران والعدرا

عام 1985، أهداني المطران عبده خليفة كتابه (مريم العذراء وقضايا العصر) فاستوحيت منه هذه القصيدة:

ـ1ـ

"الْعَدْرَا وْقَضَايَا الْعَصْرْ"

لِسْيَادْة الْمُطْرَانْ

عَبْدُو خَلِيفِه مْنارْة الإِيمانْ

الْـ جَمَّعْ بِهَـ الأَلْوَانْ

مِنْ عَقْل خَلاَّ الْفِكْرْ

يْمَجِّدْ "مِثَال الطُّهْرْ"

وْيِأْمُر خْيُوط الْفَجْرْ

تْنَوِّرْ فَضا إِنْسَانْ

ضَايِعْ بِـ عَتْم الْعُهْرْ!

ـ2ـ

عَبْدُو خَلِيفِه وْأُمّنا مَرْيَمْ

تْوَحّدُوا بِالْحُبّْ

وْخَلُّوا السَّما تْشَتِّي نِعَمْ

عَ كِلّ نَفْس وْقَلْبْ

وْمَسْحُوا الْحَيَاة مْن الأَلَـمْ

وْزَرْعُوا كلامْ الرَّبّْ

اللِّي تْجَسَّد بْبَاقِةْ حِكَمْ

مْن الصَّعْب يِكْتِبْها قَلَمْ

إِلاَّ ما يِمْشِي الْجُلْجُلِه

وِيْدُوقْ طَعْم الصَّلْبْ!

ـ3ـ

وْكِل قَصْدُو يْقُولْ

عَنْ مَرْيَم الْعَدْرَا

هَـ الإِسْم يَللِّي بِالسَّما مَحْمُولْ

عَ جْوَانِح الْقِدْرَه:

شَكْلاَ عَ شَكْل الزَّنْبَقَه

اللِّي ناطْرَه مِينْ يِسْرِقَا

مْنِ حْقُول خَلْف حْقُولْ

وْمِتْل الدّخِيرِه يْعَلِّقَا

عَ صَدْر ضَاق مْنِ الشَّقَا

وِيْصَبِّحَا وِيْمَسِّيَا

وْمِنْشَانْ تا يِشْبَعْ تُقَى

لازِمْ يْعِيف الْمَنْفَقَه

وْيِصِيرْ يِتْمَاتَلْ فِيَا

هِيِّي النُّجُوم الشَّارقَه

الْـ بِالْمَجْد أَللَّـه مْضَوِيَّا

أُمّنا الْعَدْرَا الْبَتُولْ.

ـ4ـ

كْتابْ خَلاَّ الْفَلْسَفِه

تْمَجِّدْ إِلَـه الْكَوْنْ

وْتِزْرَعْ بُذُور الْمَعْرِفِه

بْمَلْيُونْ لَوْن وْلَوْنْ

بِمْرُوجْ دِنْيِي مْكَتّفِه

قِدَّامْ شَهْوَات الْجَسَدْ

قِدِّيسْهَا عَمْ يِخْتِفِي

وْيِطِلّ شَيْطَان الْحَسَدْ

الْجَايِي كَأَنُّو الْعَاصفِه

حَامِل شْرُور مْلَفْلَفِه

بِـ مَشْلَحَا الأَسْوَدْ!

وْمِنْشَانْ نِفْهَمْ كِلْمِتُو

وِالْفَلْسَفِه اللِّي مْغَلَّفِه

بِـ حِكْمِتُو..

لازِمْ نْعِيش بْدِنْيِتُو

وْنِعْتَادْ عَ قُدْسِيِّتُو

أَوْ نِتِّحِدْ بِالسَّيِّد الأَوْحَدْ!

ـ5ـ

حَتَّى النَّبِي جُبْرانْ

الْـ مِنْ حِكْمِتُو شَابُوا

النّقَّاد..  بِالأَكْوانْ

رَحْ يِفْرَحْ تْرَابُو

لَوْ يَعْرِف الْمُطْرَانْ

شُو قَالْ بِكْتابُو.

**

الفارس رحل

ألقيتها في حفلة وداع المطران عبده خليفة في 7 شباط 1991

ـ1ـ

وَسّعُوا مْجَال الْحَكِي

الْفَارِس رَحَلْ

عَ دْرُوبْ.. لَوْلا بْتِشْتِكي

بِتْجِنّ مَوْجَات الْبِكِي

وْبِتْئِنّ مِنْ كِتْر الزَّعَلْ

عَبْدُه.. الْـ بِنِي هَـ الْمَمْلَكِه

وْشَكْشَك عَلَى حْدُودَا أَمَلْ

وْخَلاَّ الْمَدَارِسْ تِتِّكِي

عَ كْنَايْسُو.. وْيِخْلَقْ جَبَلْ

مِنْ مَعْرِفِه

يْقُولْ: يَا شْعُوب اغْرُفِي

مْنِ عْلُومْ رَيِّس طَائِفِه

زَوْزَق سْنِينُو بِالْعَمَلْ

بْأَمْجَادْ بَعْدَا بْتِنْبِنِي

تِفْرَحْ بِـ طَلِّتْهَا الدِّنِي

وْتِرْقُصْ نَيَاشِين الدُّوَلْ.

ـ2ـ

وَسّعُوا مْجَال الْحَكِي

صَار الْحَكِي إِنْسَانْ

تَايِهْ بِـ غُرْبِه مْشَرْبَكِه

وِمْلَفْلَفِه بْأَحْزَانْ

عَشْعَشْ بِـ عِينَيْه الْيَأسْ

وِانْطَفْيِت بْوِجُّو الشَّمْسْ

وْعَاش الْعُمْر حَيْرَانْ

يِغْفَى.. وْعَ إِيدَيْن الأَسَى

يْشُوف الأَمَلْ مِطْرَانْ

وْيَا فَرْحِة الْـ مَا بْتِنَّسَى

حَيَّكْ صَلاتُو.. وِاكْتِسَى

بِمْشَالِح الإِيمَانْ

وْغَمَّضْ عْيُونُو وْفَتَّحَا

وْعَ شْطُوطْ نَظْرَه مْجَرَّحَه

عَبْدُه خَلِيفِه كَانْ

هْدِيِّةْ جَبَلْ لُبْنَانْ

ـ3ـ

وَسّعُوا مْجَالْ الْحَكِي

تَا نِسْمَعُو.. وِنْسَمّعُو

هَـ الْـ آخِد الضِّحْكِه مَعُو

يَا شْفَافْ أُوعا تِضْحَكِي

نِخِّي عَ إِيدُو وِاشْبَعِي

بَرْكِه وْصَلا

وِتْمَوّنِي بَوْسَاتْ

وْقِدَّام أَمْجَادُو ارْكَعِي

وْقُولِي: مْبَلَى

مَدْبَح كَنَايِسْنَا اعْتَلَى

وِالْقَلْب مِنْ صَوْتُو انْتَلَى

تَا صَارْ بِالْكَاسَاتْ

قِرْبَانْ

وْكِيفْ بَدّنَا نْوَدّعُو

هَـ الْـ آخِد الضِّحْكِه مَعُو

وِمْسَيَّرْ الأَزْمَانْ

انْشَاللَّـه اللِّي جَايِي مَوْضَعُو

مِتْل الْخَلِيفِه نِتْبَعُو

وْنِمْحِي سَوَا الْهجْرَانْ.

**

فليحيا الملك

يوم زارني المثلث الرحمات المطران عبده خليفة في 1/9/1985

ـ1ـ

كِلّ الْخَلِيقَه الْيَوْم عَمْ تِرْكَعْ إِلَكْ

يا سْيَادة الْمُطْرانْ.. يا نجْم الْفَلَكْ

شاعِرْ أَنا.. شْرِبْت الأَدَبْ مِنْ مَنْهَلَكْ

يا فِكْرِة الْـ أَللَّـه بْكِتابُو سَجَّلَكْ

قْبِلْني عَبدْ بِـ قَصْرَكْ الْـ كِلُّو صَلا

تا إِصْرخ بْهَـ الْكَونْ: فَلْيِحْيَا الْمَلَكْ

ـ2ـ

قْبِلْني عَبدْ.. تا إِخِدْمَكْ كلّ الْعُمرْ

وْكَرِّم الرَّاهْباتْ.. شلاّل الطُّهرْ

وِرْفاقْ.. شَطْبُوا مْن الْقامُوس الْغَدرْ

مْن الصَّعبْ إِنْسَى كِيفْ بِلْيالي الْقَهرْ

سَاعَدْتني وْمِشّيْتني دْرُوب الصَّبرْ

وِلْهَـ السَّبَبْ جمَّعتْ باقات الزَّهرْ

وْرِيشْتِي غِطَّيتْ بِـ دَمّ الْقُلُوبْ

تا إِرسْمَكْ عَ طُول جُوّات الصَّدرْ

ـ3ـ

أَهْلا وْسَهْلا فِيكْ بِهَـ الْبَيتْ

النّاطِر قْدُومَكْ مِنْ زَمان بْعِيدْ

بَيّ الْجَمِيعْ.. مْحَبّتَكْ ضُوَّيْتْ

مِتلْ الشّمسْ.. تا تْشَرْقِط بْهَـ الْعِيدْ

بْشَال الأُبُوِّه رْقَابْنا لِفَّيْتْ

مِنْشَانْ هَـ الْـ مِتْلي ما عِنْدُو بَيّ

يْغلّ فِيك وْيِفْرَح مْن جْدِيدْ

**

لغه مضويه

أهديتها للمذيع طوني سعد إثر تخلّيه عن عمله الإذاعي عام 1992.

ـ1ـ

يا أَكْبَرْ مِنْ أَكْبَرْ كِلْمِه

يَا "سَعْد" الْـ هَمَّكْ تِسْعِدْنَا

صِرْت الْغِنِّيِّه عَ تِمِّي

هَـ الأَيَّامْ الْـ بِعْدِتْ عَنَّكْ

عَنَّكْ مُشْ مُمْكِنْ تِبْعِدْنَا

ـ2ـ

كْرَامِةْ شَعْبَكْ عِشْت اللَّيْلْ

تْحَيِّكْ أَحْلام وْتِهْدِينَا

تْبَعِّدْ عَنْ غُرْبِتْنَا الْوَيْلْ

تِزْرَعْنَا فَرْحَه عَ شْطُوطَكْ

وِتْبَشِّرْ بِالرَّجْعَه الْمِينَا..

ـ3ـ

طونِي.. يا لُغَّه مُضْوِيِّه

يا صَوْت.. عْشِقْنَا نَبْرَاتُو

رَحْ تِبْقَى الضَّوّْ بْعِينَيِّي

الْحُلْم، الْيَقْظَه، الْحَرْف، الْكِلْمِه،

الْحَقْل.. الْـ عَمْ إِحْصُدْ خَيْرَاتُو..

**

إبن زعيتر

مهداة للشاعر سمعان زعيتر، 1983

ـ1ـ

شِعْرَكْ، يا خَيِّي، عَطْف وِمْحَبِّه

نِعْمِه عَظيمِه فَرْفَحِتْ قَلْبِي

وْخَلِّت لْسَاني يْقِرّ يا سِمْعانْ

إِنَّكْ حَبِيب القلبْ.. بِالْغُرْبِه

ـ2ـ

شِعْرَكْ، يا إِبْن زْعَيْتِر، تْصَاوِيرْ

كِل ما قْرِيتُو بْعِيش بِالْجَنِّه

وْحَوْلي جْنايِنْ وَردْ وِعْصَافِيرْ

وْمَلْيُون حُورِيِّه عَمِ تْغَنِّي

ـ3ـ

الشَّاعِر الْـ مِتْلَكْ لازْمُو تِكْرِيمْ

وْتِقْدِيرْ ناس مْضَيّعِين حْقُوقْ

لَوْلاكْ ضَاع الْحَقّ مِنْ إِيد الْيَتِيمْ

وْلَوْلاكْ صَرْح الْجالْيِه مَشْقُوقْ

ـ4ـ

لا تْقُولْ شَرْبِلْ زَادْها وْكَتَّرْ

كْبِير إِنْت مْنِ الْحُلم أَكْبَرْ

إِنْت الْحَرفْ بِتْعَمّرُو أَبْيَاتْ

قِدَّامْها حَجْم الدِّنِي بْيِزْغَرْ

**

غَطِّسْنِي

ألقيتها يوم زارني المثلّث الرحمات المطران عبده خليفة بمناسبة عيد الغطاس.

ـ1ـ

يا سَيِّدْنا بْعِيد الِغْطاسْ

غَطِّسْنِي بْمَيَّكْ تَا صِيرْ

إِتْشَاوَفْ عَ كِلّ النَّاسْ

الْـ ما عِرْفِتْ تِشْرَبْ مِنْ بِيرْ

حُبَّكْ.. يا أَعْظَمْ نِبْراسْ

يا كْبِيرْ الْـ عَمْ تِبْقَى كْبِيرْ

غَيِّرْني.. غَيِّر الِقْياسْ

حَابِبْ حَقِّقْ حُلْمي الْيَومْ

وْغِلّ بْحًضْنَك طفْل زْغِيرْ

ـ2ـ

وْرَاهْباتْنا اللِّي جَدُّوا السَّيْرْ

وْقَلْبُن بِالْجَنِّه مَوْعُودْ

بْسَاعْة الْقِلِّه هِنِّي الْخَيْرْ

وْهِنِّي الْكَرْمِه وِالْعنْقُودْ

يَا سَيِّدْنا جِدّ السَّيْرْ

أَعْمالَكْ مَنْبَع لِلْجُودْ

بِالْجَوّ بْيِشْهَدْلَكْ طَيْرْ

وْبِالبَحْر السَّمْكات كْتارْ

وْنِحْنا عَ هَـ الأَرْض شْهُودْ

**

رندح يا وجع

ألقيتها في حفل إطلاق ديوان "رندح يا وجع" للشاعر فؤاد نعمان الخوري، عام 1989ـ سيدني.

يَا قَلْبْ.. قِلُّو شُو مْخَبَّالُو

مِنْ شِعرْ.. قَبْلَكْ مَا حَدَا قَالُو

تَارِكْ حَنِينُو يْسَاهِرْ ضْيُوفُو

وْجَايِي عَ سَهْرَه مْعَتّقَه بْبَالُو

جَايِي يْقِلُّنْ: يَا بَشَرْ شُوفُوا

بْيُوت الْمَحَبِّه بْضَيْعِة خْيَالُو

مَطْرَح مَا كَانْ يْفَيْلِتْ رْفُوفُو

عُصْفُور بِحْوَيْتِي.. الْهَوَا شَالُو

وْحِمْلُو عَ غُرْبِه.. وْزَادْ مَعْرُوفُو

وْصَفَّى غَنِي.. الأَحْبَابْ رِسْمَالُو

جُبْرَانْ.. زَارُو وْبَارَك حْرُوفُو

بِـ جَائِزِه انْغَزْلِتْ عَ مِغْزَالُو

وْإِخْدُو بْإِيدُو وْبَلّشُوا يْطُوفُوا

بْعَالَـمْ خَيَالِي.. مَا حَدَا طَالُو

إِلاَّ فُؤادْ.. الْـ زَارِعْ "بْأُوفُو"

إِخْلاصْ.. أَبْعَدْ مِنْ حَكِي مْجَالُو

بْتِشْبَعْ دِنِي مْنِ مْوَاسِم كْفُوفُو

بْتِفْرَحْ سَمَا بْسَحْبَاتْ مُوَّالُو

بْتِشْرُقْ شَمسْ مِنْ لَمْعِة سْيُوفُو

كلّ مَا الْعَتمْ يِهْجُمْ عَلَى جْبَالُو

تْعَلَّمْ وَجَعْنَا الْحَرْفْ بِصْفُوفُو

تَا صَارْ يِحْكِي وْيِشْتِكِي لْحَالُو

وْلِمِّنْ عِرِفْ مِتْحَسّنِه ظْرُوفُو

قَلُّو بُو طُونِي: يَا وَجَعْ رَنْدِحْ

صَار الْوَجَعْ يِتْمَايَل قْبَالُو.

**

قصايد شعر

ألقيتها في حفل إطلاق ديوان "رندح يا وجع" للشاعر فؤاد نعمان الخوري، عام 1989ـ سيدني.

ـ1ـ

رَنْدِحْ يَا وَجَعْ

كِبْر الْجُرحْ فِينَا

وِجْنُون الطَّمَعْ

هَجَّرْ أَهالينَا

وْصِرْنا عَ شَطّ الْبَحرْ

نُوقَعْ قَصَايِدْ شِعْرْ

وِالْمَوْج يِمْحِينَا

ـ2ـ

يَا مِيةَ أَهْلا وْمَرْحَبَا

بْطَلاَّت مِضْوِيِّه

بِقْلُوب كِلّ ما تْصَاحِبَا

بِتْفِيضْ حِنِّيِّه

إِنْتُو الْقَصِيدِه الْـ بِكْتِبَا

بِرْمُوشْ عِينَيِّي

إِنْتُو النَّغْمِه الْـ بِسْكِبَا

عَ شْفافْ غِنِّيِّه

ـ3ـ

رَنْدِحْ يا وَجَعْ

تَا يِسْكَر الْمِينَا

وِطْيُور الضِّيَعْ

تِحْفَظْ أَسَامِينَا

وِيْطِلّ فَجْر جْدِيدْ

حَامِلْ بِـ إِيدُو الْعِيدْ

تَا الْعِيدْ يِهْدِينَا

ـ4ـ

مَحْفُورْ عَ جْدايِلْ دَهَبْ

عَ تْرابْ بِحْوَيْتا الأَبِي

فُؤادْ عَمْ يِنْبُضْ أَدَبْ

تَا يْعِيشْ جُبْران النَّبِي

بِبْيُوت سَكْنِتْها اللّعَبْ

وِانْهَدْيِتْ لأَغْلَى صَبِي

ـ5ـ

رَنْدِحْ يَا وَجَعْ

فُؤادْ فَيَّقْنا

وْعَ وْتار السَّمَعْ

أَنْغامْ عَلَّقْنا

وْصَارِتْ ضِيَعْنا حْرُوفْ

تُوقَعْ بِعِبّ الأُوفْ

تَا الأُوفْ تِسْرِقْنا..

ـ6ـ

كْتابْ كِبْرِت كِلمتُو

بِوْجُودْ غِيَّابُو

وْشَاعِر بْيِنْزُف نَغمتُو

تَا يْفَرِّح حْبابُو

إِيد الْمَحَبِّه الْـ رَسمتُو

عَ جَبْهِة تْرَابُو

بَيْن الْقَصَايِدْ قَسمْتُو

وِتْوَزَّع كْتابُو.

**

شويّة فرح

مهداة للشاعر فؤاد نعمان الخوري بمناسبة صدور ديوانه (رندح يا وجع) 1989.

ـ1ـ

بِيعْنِي شْوَيِّةْ فَرَحْ

يِقْضِي عَ أَحْزانِي

الْخَوْف عَ خْدُودِي انْشَلَحْ

وِالْهَجْر بَكَّانِي

وْقِدَّامْ عِينَيِّي انْدَبَحْ

شَعْبي اللُّبْناني

ـ2ـ

بِيعْني..بِدْفَعْ سَلَفْ

آهاتْ مِحْمَرَّه

وِسْنِينْ آكِلْها التَّلَفْ

لِفَّيْتها بْصِرَّه

وْخِبَّيْتها بْعِبّ الْخَرَفْ

وِنْسِيتْها بَرَّا

ـ3ـ

بِيعْني مِنَّكْ نَغَمْ

يا إِبن خُورِينَا

يْمَحِّي بْنَبْراتُو الأَلَـمْ

وِالأُوفْ تِحْيِينَا

عْلَيْنا بْهَـ الْغُرْبِه انْحَكَمْ

.. وِحْرُوفَك الْمِينَا

**

تكريم القنصلية

يوم كرّمني والدكتورة بهية ابو حمد سعادة قنصل لبنان العام في سيدني الاستاذ جورج البيطار غانم 25/11/2015، بمناسبة إطلاق مكتبة الأدب المهجري الأولى من نوعها في عالم الانتشار اللبناني.

ـ1ـ

لُبْنان.. حتّى يْكَرّم الشّعارْ

وْتِشْلَح الأرزه غْصُونْها عْلينا

رْفَضْنا الكُتُب يِغْفى عْلَيْها غْبار

وْتِتْحَرْوَق.. وما يِنْعِرِفْ وَيْنا

عنّا أدَبْ بالمُغترَبْ جَبّار

بِالقُنصْلِيّه.. تَحْت عينَيْنا

قْلال كنّا.. الْيَوْم صرْنا كْتارْ

رْجال الأدبْ وِقْفوا حَوالَيْنا

يا إبنْ غانِمْ.. يا جورج بيطار

كرْمالْ عينَك بَسّ.. لَيْل نْهارْ

بْتِرقُصْ قَصايِدْ فَوْق إيدَيْنا

ـ2ـ

وْما تْحَقَّق المَشْروع لَوْلاكي

يا بَهِيّه.. بْقُولها وِبْزيدْ

حْمِلْتي الفِكْرَه.. الأرْز ناداكي

وِالْيَوْم عَمّ نْعيش أحْلى عيد

يِرْحَم تْرابو كِيف رَبّاكي

بْتِعْطي وْما يَوْم بْتِنْغَلَقْ هَـ الإيد

قُنْصُل وَطَنّا بفخرْ هَنّاكي

بْإسْم الوَطَنْ.. وِانْسَمْعِتْ زْغاريدْ

مِنْ أم.. وَرْد خْدُودها باكي

رَكْعِت تْصَلّي وْراسْها تاكي

وْتِحْلم تْشوف عْيُونك مْنِ جْديد

ـ3ـ

وَهَـ الْمَكْتَبه.. النّعمه الإلهيّه

"باسيل" قَدَّمْها لنا هْديّه

كلْمِة شُكر ما بْتِلْبَق لـ "جُبران"

حَتّى الْقَصايِد ناقْصَه شْوَيّه

كانت حُلم صار الحُلم إيمان

واقِعْ.. مِتِل شي شَمْس مُضْويّه

وِجْبَيْل، أم الْحَرْف، بِالأوطان

فِرْحت كْتير وْفَرْحِتا بْمِيّه

كُتْب اللي غابوا انْجَمْعِت بْبُسْتان

مِنْروح نِحْنا وباقيه هيّي

ـ4ـ

مِنْروح نِحْنا.. والكُتُب رَحْ تِنْذَكَر

مَعْ ناس عَطْيونا بكِبَر فَوْق الكبرْ

في قْلام عَنْ هَـ الْكَون شَلّعها القَدَر

وفي قْلام بَعْدا هَوْن ناطِرْها السَّفَر

تا نِفْتِرِضْ شي يَوْم هاجَمْنا الخَطَر

وْعَتْمات، مِتْل المَوْت، عَمْ تخْطُف بَشَر

رَحْ حَلّفَكْ بالأرز.. بِتْراب الوَطَن

ضَوّي عْلَيْنا يا "قَمَر" دَيْر الْقَمَر

**

جورج وبهية

الى العروسين الحبيبين قنصل لبنان العام في سيدني الاستاذ جورج البيطار غانم والدكتورة بهية ابو حمد

ـ1ـ

معقولْ إِنُّو القَمَرْ

الْساكِن بِدَيْر القمرْ

يْجيب الشَّمْس عَ الْبَيْتْ؟!

وْمَعْقُول إِنُّو الشّمسْ

تْقِلّو بـ قَلْب العرسْ:

وَحْدَكْ إِنِتْ حِبَّيتْ؟!

يا جُورْج غانِمْ قِرّ

كانِتْ بَهِيّه السّرّْ

وِالسِّرّ ما بْيِحْكِي

يا شِعْر قِلّو مينْ

ضَوّى شَمس صَغْبِينْ

تا تْشَرْقِط الضّحكه

ـ2ـ

شِفتْ الْعرْس بالْحلمْ

وْشِفْت "الْحَليمْ" الْبَيّْ

ماسِكْ بِإيدْ الأمّ

وْشِفْت الأختْ والْخَيّْ

زْغاريدْ فَوق التّمْ

و"فانيسا" تِحْكي شْوَيّْ

وِمْلايْكِه تِلْتَمّ:

يا "باهو" عنْدِكْ قلبْ

كِلّو حَنان وحُبّ

نِتْفِه سَمَحْلي الرّبّ

هَنّيكي بِالْفَرْحَه

نِقّيْتِي أَجْمَلْ شَبّ

متل البدر بيهِلّْ

أرْزِه عَ راسْ التَّلْ

بِالْعِرْسْ مِنْشِرْحَه

يا خالتي رَحْ قُولْ

لوْ كانْ عُمْري يْطُولْ

مِتْلِكْ يا سِتّ الْكلّ

بْتِلْبَقْ إِلِي الطَّرْحَه

ـ3ـ

وْرِحْت صوبْ الشُّوف

سْمِعتْ الْجَرَسْ رِنَّانْ

والنّاسْ وِقْفُوا صْفُوفْ

وْمِنْ بَيْن هَالنِّسْوانْ

طَلِّتْ أُمُومِتْها

وْجُورْج بَسْمِتْها

أُمّ الْعَريسْ الْيَومْ

بِتْقُولْ كِلْمتْها:

يا بنِي برضَايي عْلَيْك

غَنِّجْ بَهِيّه دَوْمْ

خَبِيها بِـ عِينَيْكْ

وْشَبّع عُيُونا النَّومْ

وْفِتَّحْتْ عِينَيّي

وْشِفْت الْوَطَنْ فِرْحانْ

وْأَرْزاتْ دَهْرِيِّه

وِطْيُورْ عَ الأَغْصَانْ

عِلَّيْت صَوتي كْتِيرْ

عَ قَدّ ما فِيّي:

بِإسْم الشَّعب الِكْبيرْ

بْعِرْسَانْ.. شُو عْرْسَانْ

بْهَنِّي الْوَطَنْ لُبْنانْ

**

كونستانس

الى الاخت الراهبة كونستانس باشا

ـ1ـ

يا كُونْستانْس العَظيمِه

عنْدَك بـ قَلْبي قِيمه

عَمْ تِكْبَر مِن يَوْم لْيَومْ

صارِتْ أَجْمَلْ تَرْنِيمه

ـ2ـ

يا راهْبه انْخَطْبِتْ لِلرَّبْ

وقلّلا: كُوني قدّيسِه

الدّيْر سْكَنْتِي.. زْرَعْتِي الْحُبّ

تا صارْ الْحُب كْنِيسِه

ـ3ـ

عِشْنا إِخْوِه سْنين طْوالْ

عِلَّمْتِيني الْمَحَبِّه

رْسَمْتِلِّكْ صُورَه بِالْبالْ

بَرْوَزْها بْإيدُو رَبّي

**

عفيف

الى الصديق العزيزي عفيف نقفور ـ أراكس

ـ1ـ

عفيف نقفور مْنِ زْمان

عْرِفتُو إنسان وفنّان

أصحابو هنّي أهلو

وأهلو نعمه من الديّانْ

بأخلاقو.. ما في متلو

متواضع.. كلّو إيمانْ

خلّى الغربه تشهدلو

وتفرحلو أرزة لبنان

ـ2ـ

يا عَفيف.. الْمَحَبّه

زارعها إنت بْقلبي

سنين الـ مرقِتْ خِلّيْتا

تزيّن عتمات الغربه

مليون صوره خبّيتا

بآلة تصوير.. وعلبه

وعندي صوره حبّيتا

صورة وجّك يا عفيف

حتى يباركها ربّي

ـ3ـ

بقدّم شكري بإسم الكلّ

للفلّ.. الْـ جمّع هالفلّ

وبطلب من ربّي يعطيكْ

سنين زْياده.. حتّى تضلّ

العفيف.. بْعين محبّيك

أراكس الْـ إسمو مِنْجلّ

بأبيات شعري عم حييك

وبكل مْحبّه بْسَمّيكْ:

بيرق شامخ فوق التلّ

**

بيّ الكلّ

ألقيتها في 9/6/1996 يوم تكريم السيد جوزاف بولس بعيني رئيس المجلس الإقليمي للجامعة الثقافيّة اللبنانيّة في أستراليا .

ـ1ـ

غَالِي عَ قَلْبِي كْتِيْر، وَاللَّـه ، يا جُوزَافْ

يا أَرْزِة الْـ بَيَّكْ زَرَعْها بْهَـ الدِّنِي

يِرْحَم تْرَابُو .. كانْ عَ الأَرْزِه يْخَافْ

عَ بْلادْ .. بَعْدَا بِالنُّجُوم بْتِنْبنِي

يا إِبِنْ ضَيْعَه .. مَجْدها الْمَعْمُورْ شافْ

يا حُلْم أَقْوَى مِنْ لَيَالِي مْسَوْدَنِه

رِدّ الزَّمَنْ .. خَلِّي الزَّمَنْ يُوقَافْ

تا كَحِّل عْيُونَك بِأَحْلَى وَلْدَنِه:

اشْتَاقِتْ بَيَادِر مِجِدْلَيَّا لِلِكْتَافْ

لِزْنُودْ تِبْقَى بِالْبَيَادِرْ تِعْتِنِي

وْدِكَّانْة خْرِسْتِيْن.. تِنْدَهْلَك غْرَافْ

مِنْ خَيْر فَايِضْ كِلّ إِيّام السِّنِه

وْإمَّك تْغَطّيكْ .. وِرْمُوشَا اللّحَافْ

وْقَلْبا السّرِير .. وْإِنْتْ بِالْقَلْب الْهَنِي

مَلْيُونْ (يِرْضَى عْلَيْك) سَكْبِتْ عَ الشّفَافْ

تا كلّ ما انْهَزُّوا شْفَافَا بِالْحَكِي

يْرِشّوا الرّضَا حْوَالَيْك: فُلّ وْسَوْسَنِه

ـ2ـ

مْتَوَّج بِحُبّ النَّاسْ .. كلّ النَّاسْ

وْمِجِدْلَيّا الْمَمْلكِه الْـ عَمْ تِنْطِرَكْ

مَجْدَكْ .. إذا بِتْقِيسْ .. ما بْيِنْقَاسْ

ما في وْلا مَنْصَبْ عَ الأَرضْ رَحْ يِبْهِرَكْ

جْبِينَكْ ، وَقتْ بِتْنِخّْ ، رَحْ يِنْبَاسْ

خَلِّيكْ ناخِخْ تَ الدُّمُوع تْعَطِّرَكْ

خَلِّيكْ بِالْغُرْبِه إِسِمْ .. نِبْرَاسْ

تَ النَّاس بِزْنُودَا الْقَوِيِّه تْزَنِّرَكْ

يا نِدِرْ مِرْمِي بْدَيْرْ مار الْيَاسْ

يا جَارْ هَاك السَّيّدِه .. الْـ عَمْ تِنْصِرَكْ

هَوْنِيكْ .. عِنْدَكْ أَرْض عَمْ تِنْدَاسْ

بْتِبْكِي .. إِذَا قِصِّةْ عَذَابَا بْخبِّرَكْ

بْيِلْعَبْ بِـ شَعْبَا الْهَمّْ وِالْوِسْوَاسْ

فَيْلِت جْنُونَكْ .. تَ الْجُنُون يْحَرِّرَكْ

دَاقِت بْلادَكْ مُرّ ألْعَنْ كاسْ

زِيحْ عَنْ صَدْرَا قَهِرْ .. عَمْ يِقْهِرَكْ

لا الإِسْمْ .. لا الْمَرْكَز وَلا الإِلْمَاسْ

لا الْمَالْ .. لا التّزْقِيفْ بَدُّو يْكَبِّرَكْ

ما دَامْ بِبْلادَكْ أَلفْ يُوضَاسْ

وْجَوْقِةْ وَاوِيِّه صَالْيِه عَ بَيْدَرَكْ

هَوْنِيكْ .. سَامِعْ صَوْتْ بِالْقِدّاسْ

بُولُس بْعَيْنِي طَلّ حَتَّى يْبَخِّرَكْ

وْهَوْن عِنْدَكْ أُمّ .. شُو إِحْساسْ؟!

رَفْعِتْ إِيدَيْها لِلسَّمَا تا تِغِمْرَكْ

نِحْنَا كْبِرْنا فِيكْ.. عَلِّي الرَّاسْ

غَطِّت بَيَادِرْ ضَيْعِتَكْ أَعْراسْ

حَبِّتْ بِغَبْرِةْ إِنْتِصَار ..تْبَوْدِرَكْ

ـ3ـ

يا جُوزَاف .. الْـ صِرْت بَيّ الْكِلّْ

وْمَارِي الْحَبِيبِه ..صَارِت حْكايِه

وَزْناتَك .. الْـ بِيغَارْ مِنْها الْفُلّْ

سَرْقِتْ صُوَرْهَا عْيُونْ الِمْرَايِه

وْأَصْحَابَك الْـ بِقْلُوبْهُنْ بِتْضَلّْ

تْجَمَّعُوا بْهَـ الْيَوْم .. تُوصَايِه

وْصِيِّه وَحِيدِه .. مَاضْيِينا الْكِلّْ

مِجِدْلَيّا .. الْـ نَطْرِتَك تا تْطِلّ

بْسِطْها، شِي مَرَّه، وْقِلّهَا : جَايِي

**

بهية

حفل تكريم الدكتوره بهية ابو حمد 30 ايار 2015

ـ1ـ

يا سيّدنا اسمحلي اليوم

هنّي بالشعر الحلوين

متلك ما بيتلاقى دوم

سيّد.. رافع اسم الدين

بولس صليبا.. يا قوم

كفّو أخضر متل المرج

وع شفافو كلمة: آمين

وقلبو أبيض متل التلج

اسألوا الأرزه العا صنين

ـ2ــ

ع طول.. بشوفا.. ع طول

حبقه.. وشو حلوه الحبقه

بتمشي.. بتسوسح العقول

علم.. مزيّن بالخلقه

إسما بهيه.. ومعقول

الحبقه.. تحمل دكتوره

وما تعلّق خرزه زرقا؟

ـ3ـ

بَقدملِـك باقات زهور

وشمعه مضويه بقداس

يا دكتوره بركي النور

بيضوّي بْعتمات الناس

بهيه واسمك مذكور

بِقْصايد كلا إحساس

بهنيكي.. وقلبي مقهور

وين البي الربى البنت

يغنجها ويْبُوس الراس

ـ4ـ

وينو بيّك.. هالـ حليم

يشوف البنت البهيه

مشيت ع الدرب السليم

أستاذه.. ومحاميه

ودكتوره.. وألله كريم

تحمل وسام الأرزات

وتزلغط أحلى الإمات

للبنت الصغبينيه

ـ5ـ

مش رح ناديكي بإسمك

وإسمك صفّى غنيّه

بنقّي إسمك ع كسمك

بسميكي يا بهيّه:

أرزتنا اللبنانيه

**

أبو زياد

الذكرى السنوية الثالثة لوفاة الاعلامي بطرس عنداري..

9  حزيران 2015

ـ1ـ

اشتقنا يا بطرس.. والقلب زعلان

كيف انتهينا هيك بالهجران؟

"روكوود" عم بتبلع أسامي كتير

حفرتْ على جْبينا اسم لبنان

ـ2ـ

مش بس نحنا لفّنا التعتير

بالشرق نكرت حالْها البلدان

صارت إماره والأمير زْغير

خوتان عم بيقاتلوا خوتان؟

ـ3ـ

يا "بو زياد" الحرف.. عشت كبير

حملت القضيه مجد.. وين ما كان

دافعت عنها.. رسمتها تصاوير

تا صار إسما زهرة البستان

ـ4ـ

لكن بعد موتك.. شو عم بيصير؟

هـ الكون بلّش يحكمو الشيطان

نص البشر عم يحصدا التهجير

واللي بقي.. حطبات للنيران

ـ5ـ

شوف البحر عم يبلع قناطير

بطهر الجتت يا حسرتي مليان

بالمذهبيّه بلّشوا التدمير

البارود صفّى مستحي وقرفان

ـ6ـ

ما في حدا ما أعلن التكفير

تا بْإسم ألله يدْبَحوا الانسان

صارت التقوى لعبة حْزازير

من الصعب إنو يحلّها الديان

ـ7ـ

ما في شريعة رب خلقت نير

بتظلم بنت.. أو شيخ.. أو صبيان

استعبد مرا.. بتصير انت الزّير

حرّر مرا.. عدموك ع الحيطان

ـ8ـ

صواريخ ع المريخ عم بتطير

والشرق بعدو معطّل وخربان

فَشْكل دِني.. غرقان بالتخدير

وبيحط كل الحق ع الطليان

ـ9ـ

أيّا سجن عم تحكمو صْراصير

وما دشّنو شاعر ذكي فهمان

بالجمجمه.. ما بيمرق التفكير

وحش الجهل بعقولهُن فلتان

ـ10ـ

كتروا اللي نكروا الحب والتقدير

ورفعوا شعار الغدر والعدوان

بدال الزهر عم يزرعوا التفجير

وعم يضربوا الجيران بالجيران

ـ11ـ

بكل الدول عم يرقص التعمير

وببلادنا عم يهدموا البنيان

عنا الايمان بيلحقو التزوير

ما في جريمه إسمها إيمان

ـ12ـ

لازم يا بطرس يبدأ التغيير

ونقرّب الأديان ع الأديان

لازم نوعّي.. نكتّر التفسير

برسالة الانجيل والقرآن

ـ13ـ

شبعنا شبعنا بهدله وتحقير

إبن العروبه مفزّع الأكوان

ما في وطن ما أعلن التحذير

مسلم مسيحي انكان يا إخوان

ـ14ـ

الأشكال وحده.. ساعة التصوير

والإسم واحد.. إسمنا عربان

رجاع دخلك جدّد التنوير

قلّو الحبايب.. كترت الأكفان

الطوفان ما بيرحم حدا الطوفان

1ـ مقبرة روكوود الشهيرة في سيدني

**

أنا وبيّي

مهرجان دعم عائلات شهداء الجيش اللبناني 19/9/2014

ـ1ـ

بصرتك بنومي حامل شبيّه

وراكع تصلّي.. وعينك عليي

وبصوت يائس، منطفي ومبحوح

سألتك: شو بدّك.. قول يا بيي؟

وشوشتني: ليش الوطن مجروح

ومنكسّه أرزات دهريّه؟

وليش البطل عم ينتهي مدبوح؟

جيش الوطن نعمه إلهيه

خايف يا ابني ع البلاد تروح

وتضيع خلف غبار وهميّه

كتبلي قصيده تهد أعلى صروح

انبنيت كذب ع شطوط رمليه

لبنان بيتي.. مش سفينة نوح

تجمّع بشر.. تا يغدروا فيي

قلّن: ما بدّي أم وحده تنوح

ع وْلادها.. بلعبه سياسيه

ع طول عم شوف القبر مفتوح

أبطالْ عم يفدوا الوطنْ بالروح

تا يْرجّعوا الضحكه السماويه

ـ2ـ

وقّف يا بيي.. مطلبك بركان

وابنك غريب بعتمة الهجران

وْلِكْ كيف بدّي نفـّذو.. والعمر

رح ينتهي.. أو منتهي من زْمان

كتبت الشعر.. ما كان ينفع شعر

ما في ولا كلمه غلبت الشيطان

عنّا زعامه ملفلفه بالعهر

وعنّا شعب بمحبّتُن سكرانْ

عايش سنينو بالبكي والقهر

ورغم العذاب.. بعيشتو فرحان

من دون رئيس.. وطق يا هالقصر

والبرلمان متختخ.. وْخِربانْ

وجنودنا عم ينحروهن نحر

وما رفّ جفن فلان وفليتان

صارت دِما الأبطال ما لها سعر

والروس عم تنباع بالدكان

خنقوا وطن.. بدّو يماشي العصر

لا كهربا.. ولا ميّ للعطشان

والطائفيّه ناخرتهن نخر

نسيوا شو معنى الدين والايمان

بيت العباده عم يوزّع كفر

وعم يقتل الانسان بالانسان

ونحنا، يا بيي، هون صرنا الفخر

وتتلمذت بصفوفنا الأكوان

حكمنا الدني.. رشّوا علينا الزهر

وببلادنا بيتقاتلوا الجيران

رح قولها ع السطح.. تهدر هدر

لبنان بدّو رجال.. مش خصيان

أطخنْ شَنبْ.. ما عاد عندو شَعرْ

يا ريت مرّه.. بتحكم النسوان

ما قدرت إعلن ع الزعامه النصر

عايش وحيد.. بغربتي يئسان

متلي ومتلك.. شعبنا بالهجر

واللي بقي.. مظلوم أو طفران

بـ"روكوود"، يا بيي، حدّ منك قبر

تمنيّت لولا كان بالأوطان

قبري أنا.. يا مجدليا الصبر

سيدني حياتي.. وجنّة البلدان

ما بخونها.. ولا بطعنا بالضهر

بترخص لها الدمّات بالشريان

بيتين شعر حفرتهن بالصدر:

انْ ما كان عنّا جيش يحمي الأرض

وخلفو الشعب.. بالطول أو بالعرض

رح ضل إبكي ع الوطن لبنان

**

رامز

الى روح الشاعر رامز عبيد 13/11/2015

ـ1ـ

قومي افتحيلو الباب.. محبوبك وصَلْ

يا جميله.. وحامل كتابو معو

عوّد عيونك ع المحبّه والغزل

وحياة عينك كلّنا رح نسمعو

جايب معو حساسين من هاك الجبل

تا يوشوكي كم كلمه.. ويرجعوا

بنتين عندو.. يا شعر نقّط عسل

ويا وحيد الدار.. قلّن يسطعوا

قلبو حنون كتير.. ما بيحمل زعل

كلما بكي.. بتولد قصيده بمدمعو

يا جورج هاشم كيف نجّحت العمل

وضويت بدر الشعر بليالي الأمل

حتى القصايد تنبنى من مقلعو

ـ2ـ

من جديد راجع شوفك من جديد

واسمع يا رامز صوتك من بعيد

جايي وحامل شعلة الديوان

والنور عم بيشعّ متل العيد

وخلفك قصايد.. تشبه الفرسان

انرسمت بإيدك.. لا توطّي الإيد

والناس متل القمح بالميدان

تهوبر إلك.. يا سيّد التجديد

يا شاعر اللي كنت وقت الكان

شعر المهاجر خابيه ونبيد

يا مكحّل التربه بأرض لبنان

وهالكم حبّه من التراب تعيد

الأحباب رفضوا يلفّك النسيان

روح الوفا فيهن.. ما بقدر زيد

جمعوا الشعر تا يزينوا الهجران

وشعرك حلو.. مش ناقصو تمجيد

شو بخبّرك عن رفقة الإخوان

عم ينقصوا الشعّار.. بالتحديد

فلان ختير.. عم يموت فلان

وفلان.. صدرو راكبو التنهيد

يا شعلة الكلاّ وفا وإيمان

مأكّد أنا.. بـ جنّة الرضوان

عم تسقف بيوت الشعر قرميد

ـ3ـ

سكوت القبر مش لاك.. محّي سكوت

عملاق.. ما بيساعك  التابوت

أنت مجد الحرف والأشعار

ع صفحتك عم تنبنى البيوت

ليش ساكت والبلد منهار

وفوق الزباله معرّم الطاغوت؟

براغيت عم تحكم وطن جبّار

ويا دلّ شعب بيحكمو برغوت

ما سكت مرّه.. كنت تطفي النار

وتحمي طفل.. عم يسرقولو القوت

لبنان سايب.. واللصوص كتار

شقّ القبر.. مش حقّ إنّو تموت

يا مركع التاريخ والأقدار

يا مسيج الأكوان بالياقوت

مسمرت قلبك فوق هاك الدار

تا تسكن بمتريت ليل نهار

وتا تشم ريحة أمنا بيروت

**

درع الثقافة

ألقيتها يوم استلامي درع وزارة الثقافة اللبنانية في صالون الدكتورة بهية ابو حمد من سعادة قنصل لبنان العام في سيدني الاستاذ جورج البيطار غانم، بقرار من وزير الثقافة السابق المحامي روني عريجي،  وبأمر من وزير الثقافة الحالي الدكتور غطاس خوري 22/4/2017

ـ1ـ

إنتْ قُنصل حرف، مش قنصل وطن

لبنان مهد الحرفْ عَ طول الزَّمنْ

إبْن الْقَمرْ لَو نَخّ بيطالْ القَمَرْ

يا جورج جيبْ الشَّمس تا نْرَكِّعْ قَدَرْ

بالنور فينا نخفّف جنون الفتنْ

بْيِكفي الوطنْ ويلات وحروب ومحَنْ

ـ2ـ

والشّمس.. مين الشمس؟ انتْ بْتَعْرِفا

ست البهاء الطاهره.. الْما أَشْرَفا

صالونْها انْ ما ساع.. قلبا بْتِفْتَحو

لأشعار فَوق شْفافنا عَم يِسْرَحوا

لْشِعّارْ عِرْفوا قيمتا.. وصانوا الوفا

ولولا حنانا الهجر ما داق الدفا

ـ3ـ

درع الثقافه صار ضاوي بمكتبي

اليوْم استلمتو يا دْموعي حَوْربي

شكراً يا "روني" يا وزير شْمالنا

إبنْ "العريجي" فخرنا ومشعالنا

شكراً يا "جورج" ويا "بهيَّه بو حمد"

منْ بعد نطرة عمر.. فكَّرْتا أبدْ

جانا القرار بْعزّ من "غطّاس

خوري".. الوزير الْمفضل الحسّاس

ولهالسبب رح قول كلمه مدهّبه:

عن حفلة التسليم يا حروف اكتبي

**

المتروبوليت

بولس صليبا

ـ1ـ

مطران.. صعبه يلفّك التابوت

وخدمت كل الناس بالغربه

بولس صليبا كيف رح بتموت

وبعدك لهلق ساكن بقلبي

ـ2ـ

ومتلي أنا.. عم تندهك بيروت

وتقول موتك يا قمر كذبه

القبور صارت للزهور بيوت

قبرك رفعها.. وغيّر اللعبه

ـ3ـ

رخيص الدهب.. رح إرسم بياقوت

صورة وجه قدّيس ع العلبه

بمتلك حدا.. ما تشرّف الكهنوت

إسمك "رسول" وعيلتك "مصلوب"

وكتار شكّوا بصدرك الحربه

**

يا سيدي المطران

تحية الى سيادة المطران انطوان شربل طربيه

ـ1ـ

بس قللي بس مين مزعّلك؟

وعيوننا وقلوبنا كلاّ إلك

يا سيدي المطران لا تخاف الحكي

خلفك شعب قادر يصون المملكه

ويهتف ع طول العمر: فليحيا الملك

ـ2ـ

أنطوان شربل.. بس بيكفّي

إسمك بـ كفّه والدني  بكفه

حامل إسم قديّس نيّالك

ترهبنت عندو.. شعّ مشعالك

من زغرتك عم تندر العفّه

ـ3ـ

شعبك بيحبّك.. هيك بدّي قول

المش عاجبو في ألف حيط وحيط

خيط السما بيناتنا ع طول

بإيماننا.. بصلواتنا موصول

وبدمنا ودمعاتنا مجبول

وشو ما انحكى ما بينقطع هالخيط

**

النحات

نايف علوان

سمعت الحجر بالسر عم يبكي

الإزميل عم بيوجّعو.. قللّي

قربت صوبو وقلت: لا تشكي

إنسان رح بيصيّرك.. صلّي

وحدو القادر ينحت الضحكه

ع شفافك.. وبِـ طولك يعلّي

ومنك بشر رح تاخد البركه

لمّا بتوقف شامخ وفرحان

حامل إسم قديس ع التله

ـ2ـ

هنيال قلبك لو إبن "علوان"

حملك بـ إيدو ومسّح الغبره

متل السحر بيحولّك إنسان

بتنسى الأصل وبتنكر الصخره

يا ما بـ "أيطو" تشاوفوا الحجران

وحدو الـ قدر يحكي مع الحجره

روما بتشهدلو وجبل لبنان

وسيدني عطاها وكتّر السفره

تماثيل بيوزّع على البلدان

ومتل السنابل منحني ومليان

قدّام إسمو بتركع الشهره

**

السانتور

شوكت مسلماني

كرم شربل بعيني عدة مرات

ـ1ـ

أسترالي.. الأصل لبناني

"شوكت" سياسي كتير إنساني

يرحم الأم الـ ربّـتو ع الخير

يا جنوب زلغط "للمسلماني"

حد المسيحي عم بيرسم دير

وللمسلمين جوامعو باني

تغرّب طفل.. عندو جوانح طير

ما توقّف.. ولا طار خلفاني

تعلّم.. تعب.. حتى يجد السير

متلو صعب تا ينوجد تاني

ـ2ـ

يا سانتور الكل.. إنت الكل

بتخدم وطن.. ما يوم عم بتملّ

عم تحمل فلسطين ع كتافك

بتنده بإسما.. بترعب المحتل

ما خفت مرّه ورجفت شفافك

كنت البطل.. هيك البطل بيضلّ

من بعيد قلب جنوبنا شافك

و"كَوْنين" رشّت فوق رسمك فل

الدنيي اسودت رشّ نفنافك

بقلبك بياض.. بطلتك فرحه

وإسمك علم مرفوع فوق التلّ

**

قمر بنت جبيل

الى روح الدكتور خليل مصطفى في ذكراه العاشرة 2019

ـ1ـ

مين قال إنك مت.. ما بتموت

يا قمر بنت جبيل حاكيني

إنتْ الصداقه الـ زيّنت البيوت

إنتْ الخليل المصطفى هديني

الـ متلك صعب تا ينتهي بتابوت

يا كبير.. بعدك حي لاقيني

متل الحلم ع القلب فيك تفوتْ

ولِكْ فوتْ.. بركي فيك تحييني

ضايع بـ غربه.. كل عمري سْكوت

غيابك حرقني.. وغبّر جبيني

سنين عشره رفضت دوق القوت

جوعي إلك.. رح تنتهي سنيني

دكتور يا دكتور.. داويني

ـ2ـ

قبرك ببنت جبيل.. نيّالك

ترابك فرح بـ تربة تلالك

جمّعت شعري وقلت تا حاكيك

وهنّي بشموخك أرزة جبالك

دمّ الشهامه والرجوله فيك

من هيك رفعت راسنا عيالك

بذكرى غيابك جيت تا هنيك

وقلّك: ما أحلى الموت كرمالك

كبير عشت وبعدني بلاقيك

عالي.. وبـ عصري قلّت رجالك

بخجل أنا بالدمع تا إبكيك

دمعي رخيص وإنتْ غالي كتير

بوقف وبحني رقبتي قبالك

**

الاب جون جبور

غنى بعض قصائد شربل بعيني

ـ1ـ

من فنّو بيشع النور

وبالريشه خلا البلّور

يصفي تحفه فنيّه

وكل ما يغني غنيّه

بيفرح بـ صوتو العصفور

ومن هالنغمه السحريه

مأكد منشمّ البخور

من عودك يا جون جبّور

ـ2ـ

بالأونيسكو كنت كبير

غنيتلي من قلبك

وديتلك شكر كتير

من سيدني تا الشكر يصير

يا بونا يليق بتوبك

ـ3ـ

وبهيتنا الدكتوره

حطّتني بقلب الصوره

حكيتلي عنّك أخبار

بتشرّف هالمعموره

إنك قادر تبني مزار

لا بالطين ولا بحجار

بريشه ولون وبلّوره

**

توفيق مراد

نحت بإزميله المبدع ميدالية جائزة شربل بعيني

ـ1ـ

خلّي الخشب يحكي يا إبن مراد

وخلّي النبوغ يسنّ إزميلك

تماثيلك بأرواح وبأجساد

متل البشر تمشي مقابيلك

ـ2ـ

بتنحت الخشبه.. بيبتدي الميلاد

ميلاد لوحه بشوق توميلك

بالنحت إسمك "سيّد الأسياد"

التمثال واقف عم يصليلك

ـ3ـ

توفيق فيك بتفتخر البلاد

وقاماتها الأشجار تحنيلك

ما دام إنت بتنحتْ الأمجاد

حيّك من الأمجاد منديلك

**

جورج بطرس

بمناسبة زيارة رئيس حركة حق وعدالة الاستاذ جورج بطرس الى أستراليا وتكريمه العديد من أبناء الجالية 2019

ـ1ـ

يا جورج بطرس جيت من لبنان

تا تكرّم الإنسان بالهجران

بجمعيتك بتساعد المظلوم

وبتفرّح الزعلان واليئسان

ـ2ـ

بتتعب.. بتسهر.. تا البلاد تقوم

وما يضل بالعتمه طفل جوعان

حق وعداله.. بمجتمع مسموم

شلت السموم بشعلة الإيمان

ـ3ـ

ضْوِيت الشمس وملبّده الغيوم

شقعت الصخر تا توقّف الطوفان

وبعد الغرق صفّى وطنّا يعوم

وتتشاوف الأرزه على البلدان

ـ4ـ

بعلّق ع صدرك بالمحبه نجوم

وبفرشلك الأشعار والأوزان

بتوزّع نياشين.. شي معلوم

لكن يا إبن التضحيه والجود

إسمك إنت أكبر من النيشان

**

غسان علم الدين

بذكرى الأربعين لرحيله التي صادفت يوم عيد ميلاده 20 حزيران 2019

ـ1ـ

تذكّر إذا بتريد يا غسان

بمْدينة الفيحاء شو اللي كان

صعب إنسى الصار.. شو ما صار

كنت راجع ع الوطن لبنان

بأرضي أنا.. بشبه غريب الدار

ما كان يعرفني ولا إنسان

ع التل ماشي مضعضع ومحتار

متل الكذب طلّيت من دكّان

وصرخت: إنتَ هون.. عقلي طار

وصرت فيي مكيّف وفرحان

وما عدت إسمع غير: كيف الجار

المنيه ومجدليا أهل جيران

وحضنتني مع مية أهلا فيك

حسّيت إنّو طرابلس يا شريك

متل حضنك.. فاتحه الأحضان

ـ2ـ

بعيد ميلادك جيت تا هنّيك

غسان.. مش ممكن أنا إرثيك

والفن، انت الفن، انت الشعر

وكل القصايد كانت تناجيك

عودك بـ نغماتو محيلي الهجر

كنت الصديق الما قدرت أوفيك

يا كبير مارق ع طريق العمر

محيت العتم بـ شعلة قوافيك

عرفتك كريم وكف إيدك نهر

واليوم جايي بدمعتي إسقيك

ع غيبتك كل ما بيمرق شهر

منوقف ع مفرق عمرنا نحييك

ما بقول إنو كان موتك غدر

رح قول إنو الرب معجب فيك

وحابب بجنّات السما يلاقيك

ـ3ـ

فنان.. شاعر.. خسرت الغربه

وصارت "المنيه" غارقه بسكوت

وأرزة بلادك حالتا صعبه

بأقدس شهر حبّيت إنّو تموت

الموت حربه.. انغرزت الحربه

بصدور ع قلوبا كنت بتفوت

ما مت.. بعدك ساكن بقلبي

وعندك بسيدني للصداقه بيوت

موت العظيم بيشبه الكذبه

غسان.. ما بتلبق إلك تربه

الـ متلك صعب تا ينتهي بتابوت

**

مصطفى الحلوة

أهداني الدكتور مصطفى الحلوة مجموعة رائعة من كتبه أوحت لي بهذه القصيدة:

ـ1ـ

"مصطفى الحلوة" سرقني كتير

من ناس حبّيتُن بـ هالغربه

وقللي: بكتبي شغّل التفكير

في فلسفه.. تا تفهما صعبه

ـ2ـ

بعد الكبر صفّيت طفل زغير

حاضن الكلمه.. مقعّدا جنبي

وبالصف في أستاذ إسمو كبير

دكتور.. زتّ النور بـ دربي

ـ3ـ

حملت السعاده وقلت بدّي طير

صوب الوطن تا إسرقو لصوبي

وتا يضلّ حدّي وإفهم التفسير

فتحت الصدر تا يسكن بقلبي

ـ4ـ

يا "مصطفى" الأيام جمعتنا

رغم البعد.. قويت محبتنا

حروفك دهب ومطعمه بياقوت

زرعتْ وطن بجنون غربتنا

ـ5ـ

وع أرض سيدني وصّلتْ "بيروت"

و"طرابلس".. أهلا بحبيبتنا

بكتبك ما في صفحات.. شفت بيوت

ومشعشعه بنورك ثقافتنا

ـ6ـ

كلماتنا للناس أطيب قوت

عم ينطروا من الجوع خبزتنا

يا "مصطفى".. نحنا إذا منموت

ع طول رح بتعيش كلمتنا

**

درب الحكي

قصيدة شربل بعيني في حفل توقيع كتاب الدكتور مصطفى الحلوة: شربل بعيني بين الفصحى والعامية في مسقط رأس الشاعر: بلدة مجدليا.

ـ1ـ

يسعد مساكن من أرض سيدني

من خلف سبع بحور يا أحباب

عنكن الغربه صعب تبعدني

وديت دمعي ينوب عني اليوم

دمعي وصل.. قوموا افتحولوا الباب

ـ2ـ

بشباط إمي خلّفتني.. وصار

أقصر شهر مكتوب بـ إسمي

وبآخرو في كبار زرعوا نهار

تا بغربتي تتفرفط العتمه

تا إشكرن.. ما بتنفع الأشعار

أكبر من الأشعار والكلمه

ـ3ـ

يا مصطفى الحلوه شو بدّي قول

ما عاد عندي شعر تا إهديك

ختيار صرت.. بغربتي مقتول

ومجبور من دمعة فرح إسقيك

بقلبي إنتْ.. يا مصطفى محمول

مفضل ع شعري.. ربّنا يقوّيك

حبّ أهلي بمجدليا.. وجول

بشوارعا تا شوارعا تحييك

وفي بيت ناطر طلتي ع طول

تصوّر معو.. ع شرط ما يبكّيك

بنت المجد تا تكرمك معقول

ومن مجدها حب ووفا تعطيك

بس اللي مش معقول.. مش معقول

بعصر الكورونا صعب تا لاقيك

ـ4ـ

ويمين محسن.. كلمتو إبداع

هنيّال يللي بكلمتو انتفعوا

عندو أدب متل الدهب لمّاع

ما بينشرى مهما البشر دفعوا

إسمو علم خفّاق.. صيتو شاع

وبمجدليا هالعلم رفعوا

ـ5ـ

مخاييل بيّك يرحم ترابو

كان "الفرح" بيزيّن شْبابو

وكان الشعر عندو: صداقه وحب

يا وليد مشيت ذات الدرب

حتّى الشعر ما يغيب بغيابو

ـ6ـ

وسوزان البعيني ع كلمتها

وقف النسر.. قال الجبل عالي

الأجيال عم تمشي ع حكمتها

إنّو الوطن مهما افتقر.. غالي

زارت الغربه.. سرقت بسمتها

وبعدا البسمه عايشه ببالي

ـ7ـ

وجوزيت بنت المقدسي الفنان

بعدو لهلق عايش بفنّو

ع العود لمن دوزن الألحان

الأوتار صاروا بنغمتو يجنّوا

وطلت البنت بصوتها الرنان

مع جوقتا.. تا يعيش فن البيّ

نبشوا تراثو.. وبلشوا يغنّوا

ـ8ـ

درب الحكي.. رح تنتهي هالدرب

ومعقول بكرا تنمحى مشاوير

بيبقى شخص إنسان جوّا القلب

حامي الأدب.. بيحب شعري كتير

عبّود جبرايل.. يا أجمل أب

مهما انحكى أكبر من التقدير

كاهن رعيّه مبارك من الرب

رمز الطهاره والوفا والحب

هيدا أبونا.. البالقداسه كبير

ـ9ـ

ويا مجدليا الرافعه راسي

ومتل الحلم عشتي بإحساسي

ضلّي اذكريني وصورتي ضمّي

يمكن بـ هجري ينتهي كاسي

ابنك أنا.. من ميّتك دمّي

وكمشة تراب بغربتي ناسي

آخر وصيّه.. خففي همّي

وان متّ هون.. بحلّفك يمّي

بكنيستك.. بيكون قدّاسي

**

كتابك

بمناسبة صدور كتاب الدكتورة بهية ابو حمد: شربل بعيني منارة الحرف

ـ1ـ

كتابِك جبرني رجّع الايام

وفيّق شعر نايم ع صفحاتي

بكل كلمه فْرِحْت.. هيدا كْلام

رش الدهب ع حروف كلماتي

تا إشكرك بالشعر رح إنلام

صار الوحي غايب بليلاتي

النجمات بهديكي ع لوح رخام

ونور الشكر ضاوي بنجماتي

ـ2ـ

يمكن أنا عم عيش بصر منام

لولا سطورك ما عرفت ذاتي

رجعت إقرا بشيبة الأعوام

وفلفش بشعري.. وْقِيسْ حَكياتي

متلِك حدا ما وزّع الأحلام

إسمك بهيه بو حمد.. "باتي"

إسمك علم بيشرّف الأعلام

إسمك وطن.. ساكن بأبياتي

ـ3ـ

عندك قلم.. من أبدع الأقلام

وهاتي نبوغ ومعرفه هاتي

وعندك وفا.. لمّا الوفا بينضام

بتمسِّحي بالهجر دمعاتي

مهما حكي عن مجدك الإعلام

مجدك شمس ضوّت بعتماتي

وصغبين صاحت: كتري الأنعام

إنتي البهيه.. زينة بناتي

ـ4

خبزت الشعر.. صار الشعر أكوام

وصفّى الوطن يفرح بخبزاتي

وعّي البشر.. إمنع عيوني تنام

تا خسرت عمري وضاعت حْياتي

خمسين سنه عم حارب الأصنام

شوفي الصلب ع كْفوف ديّاتي

صاح الوطن من كترة الإجرام

وْلِكْ خلّصوني من زَعاماتي

ـ5ـ

أزلام عم بتزقّف لأزلام

والشعب أعمى وكسّر عْصاتي

كتابِك جبرني فكّر لقدّام

وعلّق مشانق فوق ساحاتي

هللي بيخون الأرز للإعدام

وهللي بيحبّ الأرز رح قلّو:

لازم بقلبك تزرع محلّو

قبلك إلهي حبّ أرزاتي

**

نايف إبن علوان

يوم أهداه البروفسور مصطفى الحلوة مجموعة من كتبي

كتبي أمانه بحطّها ببيتك

يا حبيب القلب خبّيها

سنين عمري بغربتي عطيتك

انشالله بأجمل عمر تقريها

نايف إبن علوان.. يا ريتك

بتنحت دموعي الكنت إبكيها

عرفتك عظيم كتير.. حبّيتك

ورح ضلّ حبّك تا يصير العمر

كمشة تراب وإنتْ تحييها

**

أديب البعيني

أديب البعيني أحد أبطال استقلال لبنان

يا هالسنه.. خلّي الوطن يرتاح

وللشعب وحدو سلّمي المفتاح

لبنان لازم ينتفض ويقوم

بيكفي بكي.. بيكفي هجر.. وجْراح

بيت "البعيني" ع الارز مهموم

بدّو الارز يفلش ع شعبو جناح

"اديب البعيني" كتب مرسوم

بدمّو البطل.. تا تكتر الافراح

استقلالنا.. طول العمر بيدوم

ما دام عنا رجال تفدي الارض

وبإيد جيشو بس.. يبقى سلاح

**

رندى بعيني

أهدتني الفنانة العالمية رندى عبد الأحد بعيني صورة شخصية لي كانت أكثر من رائعة، وزينت معظم كتبي برسومها المدهشة.

ـ1ـ

رندى البعيني.. نورا

لوَّن كلّ المعْمورَه

ريشتها خَلّتْني عيش

مْخَلَّد.. جُوّات الصوره

ـ2ـ

ما في كتاب وما تلّون

بألوانا البتحلّي الشعر

إسما بالمجد مدوّن

وفرحت فيها سنين العمر

ـ2ـ

يا رندى البْعَيْنيّه

حابب إهديكي هْديّه

ما بْتِلْبَقْلِك بِـ هالعيد

إلا الوردِه الْجوريِّه

**

ميرنا نعمة

لحنت وأنشدت المرنمة ميرنا نعمة العديد من أغنياتي، كما ترجمت ديواني "الغربة الطويلة" الى الانكليزية.

ـ1ـ

ميرنا نعمه!.. شو رح قول

تا إشكرها، وشكري يطُول

الغربه المزروعه أشواك

محيتها.. وضحكت الحقول

غنّت شعري.. قلت: ملاك

وبالترجمه.. مش معقول

فتحت بالعتمه شبّاك

نورو بيسوسح العقول

ـ2ـ

يا ميرنا عدّي الإيام

الـ ترجمتي فيها الأشعار

بتتجمّع كل الأحلام

الـ بتخلّينا نصير كبار

يمكن عينينا ما تنام

ويمكن نقلق ليل نهار

لكن بدموع الأقلام

منرسم دنيي من الأزهار

بتتشاوف فيها الأعلام

ومنسكنها كبار زغار

**

يا مسافره

يوم سفر الدكتورة بهية ابو حمد الى ماليزيا

يا مسافره.. لا تودعي الأصحاب

إنتي القصيده.. والدني دولاب

إسمك "بهيه".. ساعدي المظلوم

شمسك قويه.. والعمر ع غياب

بوجودك الآداب عم بتقوم

متل البذور الـ فوق منها تراب

وتا تعلّقي ع كل كتف نجوم

"صالونك" بنيتيه بالآداب

بتكرّمي الإبداع.. شي معلوم

كفّك نبع.. والتضحيه مزراب

ع طول فكرك ع الأدب مهموم

بعيد الأمومه بعيّدك وبقول:

للحرف إنتي الأم.. مش معقول

كيف الأمومه بيحتضنها كتاب

**

شو منعمل؟

الى الشعراء انطوان سعاده والياس خليل وبسام حرب

لمّن عَ الغربه طلّيتو

زرعتو الفرحه بدون حساب

شو منعمل؟.. لولا فلّيتو:

منسكّر كل الأبواب

وكاس الأوف اللي ملّيتو

نشرب.. وتدوخ الأنخاب

وبيوت الشعر الـ علّيتو

نحبسها جوّات كتاب

تا نصلّي الشعر الـ صلّيتو

وهيك منعرف يا أحباب

فلّيتو.. لكن ضلّيتو

أنطون الياس وبسّام

فرحه بقلوب الغيّاب

**

انتي الارزه

الى الدكتورة بهية ابو حمد بعيد ميلادها

ـ1ـ

يا بهيه عيدك صار

عم بتغنيه الأطيار

إسمك.. رسمك وين ما كان

متوّج بـ أحلى الأشعار

إنتي الأرزه من لبنان

وإنتي الورده بالأزهار

وحتى يحميكي الديان

عم صليلك ليل نهار

ـ2ـ

يا بهية.. علّي الراس

الفرحه فيكي ما بتنقاس

بميلادك يا ست الكل

بدّي إشرب أكبر كاس

**

علي وطلال

القيتها بحفل على شرف ضيف الجالية الدكتور طلال حمود

ـ1ـ

لمن علي حمود ناداني

وقللي: تعا تا نكرّم الأحباب

طيور الفرح غنّت ببستاني

بهاليوم لازم ينوفى الحساب

مفضل عليي.. كتير انساني

قيمه وكرامه وتضحيه وآداب

بيلبق إلو.. لو قلت: لبناني

كَوْنين لمن غاب قلبا داب

ـ2ـ

يا بْنِ الكرم.. انت الكرم كلّو

دكتور طلال حمّود شو بقلّو

كرمال عينو بركّع الأشعار

وجوات قلبي بحفر محلّو

يا علي حمود شو ما صار

العيله العظيمه مجدها علّوا

إسمك إنت بيشع بالأنوار

إسمك "علي" هالإسم شو بجلّو

أحباب إنتو.. بالمحبه كبار

بضحكات حلوه غربتي حلّوا

دكتور طلال الـ فرحتو قنطار

من وجوهكن عم يشتري الفرحه

غلّوا السعر يا حبايبي غلّوا

**

طائر الشّوق

توقيع كتاب (طائر الشّوق) للشاعر الغريب زين الحسن، 20/10/1987

ـ1ـ

يا طائر الشّوق اللِّي رَحْ بِتْطِيرْ

عَ بْلادَكْ.. اللِّي وْهَبتْها عُمْرَكْ

عَ بَيتْ حلْوِه رْسَمتْها تْصَاوِيرْ

وْلِوَّنتْ مَرْج خْدُودْها بْشِعْرَكْ

شَاعِر غَريبْ.. وْغِربِتُو مْشَاويرْ

عَ دْرُوب بَيَّنْ فَوقْها قَهْرَكْ

لِمِّنْ قْريتَكْ.. عَذَبِتْني كْتِيرْ

آلامْ شَعبْ مْشَرَّد وْجُوعانْ

وْحامِلْ صَليبُو إِنتْ عَ ضَهْرَكْ

ـ2ـ

يا بْتُوراتِيجْ الْواقْفِه بْوِج الزَّمَنْ

وَقْفِةْ بَطَلْ جَبَّارْ ساعات الْمِحَنْ

عْطَيْتي الْخَلِيقَه عِزّ وِمْحَبِّه وْجَمالْ

زْرَعْتي الْبُطُولِه بْكِلّ شِبْر مْنِ الْوَطَنْ

وْما هَمّ لَوْلا تْفاخْرُوا بْكِتر الرِّجالْ

بْيِكْفِي خْلِقْتي بْهَـ الدِّنِي شاعِر غَريبْ

مَحْفُور إِسْمُو بْقَلبْنا:  زَينْ الْحَسَنْ

**

تلاته كبار

الى الشعراء جورج ابو انطون والياس خليل وانطوان سعادة

ـ1ـ

لمّا الشعر بيطلّ ع الغربه

بْيِرْقُص لَوَحْدو بالصّدر قلبي

وبتصير دقّاتو

تِحْكي حْكاياتو

وتمحي وجع متكدّس بدربي

لولا الزَّجلْ ما بِقْيِت الأرزه

بالميجانا والأوف معتزه

هوّي اللي وحّد بالفرح شعبي

ــ2ـ

ولمّا النقابه بتفرُش جْناحا

ع الشّعر.. ع الشعّار.. ع الكلمه

بتغمر دني.. بْتزيد أرباحا

بْتِلْغي العتم تا تْشرقط النجمه

ويا جورج بو انطون.. مفتاحا

بيفتح بواب قصور

انبنيت ع شط بحور

بإيدين شعلة نور

تركت وطنها وفضيت الساحه

ـ3ـ

انت الأمل.. خلّي الأمل فرحان

يحكي حْكاية شعب بالهجران

نحنا رفاقك.. يا نقيب الشعر

خلّي النقابه توحّد الأوطان

الشعّار، وين ما كان، باقة زهر

بتموت زهره قلبها عطشان

جنح الوطن لو ضمّ جنح الهجر

بْجِنْحَيْن فيكُن تِرْفعوا لُبنان

ـ4ـ

ويا الياس خليل لْطَلتك رح قول

متل الكذب.. شفت الشعر ماشي

حامل جسم إنسان مش معقول

ع ورد خدّو غطّت فراشه

وأنت يا انطون.. يا سعاده

يا الْمسرحك بيزين بلادي

الياس لمن رافقك فهمان

انك وفي ما بتغدر بإنسان

بلبنان.. هالباقي بعد لبنان

دْخَلْت السياسه.. زِدْت أمجادي

زِنْتْ الرئاسه.. تكسّر الميزان

وصارتْ الكرسي بيت قرّادي

ـ5ـ

ويا بَهيّه الشعر لمّن طلّ

شاف الشمس.. قال: الشمس حِرْمِه

بتفتح ايديها تا تْحُوش الكل

بترْجَع ايديها حاضنه الكلمه

وتا فسِّر الكلمه اللي بْجِلاَّ

الكلمه لْ حضنتي إسمها.. أللـه

**

ايلي شعنين

ترجم العديد من قصائدي الى الانكليزية

ـ1ـ

بقلّك يا ايلي شعنين

مهما تمر عليك سنين

أشرف انسان عرفتو

جايينا من رشدبين

2

متواضع.. متلك ما في

متعلم.. علمك كافي

حنون وقلبك دافي

وبيحبّوك المغتربين

3

انشالله بعيدك كل الناس

بتغنّي وبْيِصْفى الراس

بعيدك عيّد مار الياس

ومار شربل والقديسين

**

خي كبير

إلى روح صديقي المهندس رفيق غنّوم، مؤلف كتاب "أجمل ما قيل بأدب شربل بعيني، 2008

ـ1ـ

بْميلادْ يَسُوع الْمَسيح

وَدَّعتْ دِنْيِتْنا

انْسَمْعِتْ بِغُرْبِتْنا تْسابيح

انْدَمْجِتْ بِصَرْخِتْنا

وْصَفّى الطّفْل اللي مْنِعْبَدُو

يِمْشي وْيِتْرُك مِذْوَدُو

تا يْوَصِّلَكْ.. ما أَسْعَدُو

عَ رْبُوع جَنِّتْنا

ـ2ـ

إِيفَانْكا.. عَمْ تِبْكيكْ

بِدْمُوعْها الْحَمْرا

بْتِتْذَكّْرَكْ يا شْريكْ

أيّامْها الْخَضْرا

وِبْتِقْعدْ تْناجيك

يا الْـ هِدْيِتَكْ عُمْرا

كِيفْ بَدّها تْلاقِيك

وِحْرَقتْها بْجَمْره

وْبَلْغارْيا تْناديك

وْسُورِيّا.. منْتِظْرَه

هاك الرُّجُوله الْـ فِيكْ

يا مْهَندس الأمْجاد

لا تْطَوِّل النَّطْرَه

وْعَنْ إِدْلِبْ الأجْدادْ

لا تْبَعّد الْهِجْرَه

ـ3ـ

وْجورْج.. كِيفْ قُوَّيْت

الدَّمْعات عَ عْيُونو؟

هَيْدا وَحيد الْبَيْت

كُلّ عُمْرَك تْصُونو

تاكي.. وْعَ السِّكَّيْت

رَحْ يِعْلُن جْنُونو

ـ4ـ

وْشو بْقُول لِلأحْفاد

الْـ كانوا عَ صَدْرَك دَوْم

يِبْنُوا ضِيَع وِبْلادْ

وْيِغْرَقوا بِالنَّوْم

رَحْ قلّهُن: إِنّك

إِلْهُن ضِحِك سِنَّك

إِمُّن تْغنيلُن

وِتْخَبّرن عَنّكْ

ـ5ـ

شُو بْقول: يا رَفيقْ

شو بْقُول: يا عَيْنِي

ما بْتِنْتِهي الطَّريق

اللَّي بَيْنَك وْبَيْنِي

إِنْت مُشْ صَدِيقْ

إنتْ خَيّ كْبيرْ

لْشَرْبِل بْعَيْنِي

**

بطرس الكبير

الى روح عمّي الأكبر بطرس يوسف الخوري البعيني، شقيق جدّي، الذي آمن بي شاعراً وتبرّع بطبع أول دواويني الشعرية "مراهقة" عام 1968

ـ1ـ

يا عمّي بطرس الكبير

الطيف الغالي.. شو بقلّو

من يوم اللي كنت زغير

علّمني جدّي تا صير

قدّس هالإسم وجلّو

ـ2ـ

خيّ الجد.. وعم البيّ

يا فرحة قلبي بهالعم

أرزه.. وعم بتوزّع فيّ

عيالك كلاّ.. قالت: خيّ

تحت غصونك عم تلتمّ

ـ3ـ

لمّن حسّيت الأشعار

دقّت بالسهره ع الباب

ركّعت قبالي الدولار

جمّعت الشعر المختار

طبعتلي أوّل كتاب

ـ4ـ

يا عمّي بطرس ممنون

عطفك.. مهما العمر يطول

إسمك بحروفي رح صون

بْعيني.. وعم تسكن العيون

وتا تغيب عنّي.. مش معقول!

**

موتك صليب

الى روح ابن عمتي الحبيب كلارك بعيني صاحب موسوعة شربل بعيني بأقلامهم المؤلفة من 3500

ـ1ـ

يا كلارك قللي كيف رح خفّف نحيب

وموتك صليب تقيل.. وحياة الصليب

وراحيل يللي ضحكتا وسع الدني

ماتت الضحكه.. والدمع أحمر كئيب

ـ2ـ

ع الأخت قبلك كان ضهرا منحني

واليوم إنت.. وآخ شو موتك رهيب

قاسي ع أمّك هالدهر صاير دَني

قبّر ولادا.. والعمر صوب المَغيب

ـ3ـ

يا روزانا.. اليوم مدري شو بني

مات الحبيب.. الما انوجد متلو حبيب

مات الـ بعقلو كان أكتر من غني

مات اللي خلّدني بكتب.. مات الأديب

ـ4ـ

يا كلارك عمرك مش رح بقيسو بسنه

بقيسو بـ عيله تركتها.. بتفوح طيب

عشنا سوا.. تذكّر زمان الولدني

تاكل اللقمه.. وكنت تتركلي نصيب

ـ5ـ

ما في حدا متلك بـ مهجرنا بني

والد حنون كتير.. والأحلى نسيب

وهايْ مجدليا.. حالتا شو محزنه

من فوق منّا نكّسو ضهر القضيب

ـ6ـ

وقالت العدرا الـ بالورود مزيّنه:

هيدا حليبو كان من أشرف حليب

زعلت ع جار كنيستا.. الجار الهَني

مهما بعدت ما يوم بتعدّك: غريب

ـ7ـ

قدّيس عشت.. تركت عيله مؤمنه

خفّف عذابا شوي بالظرف العصيب

ما هم يفنى الجسم.. صيتك ما فني

رسمك بقلبي حفرت.. تا تضلك قريب

**

زهر الكون

أهديتها للمونسنيور بولس الخوري يوم يوبيله الكهنوتي الخمسين، وكان رحمه الله من أكثر المعجبين بشعري.

ـ1ـ

خْدَمت الشَّعْب وِالدِّينْ

رَبّنا يْقَوِّيكْ

بْيُوبيلَكْ الْخَمْسِينْ

مِحْتارْ شُو بِهْدِيكْ

ـ2ـ

يا بُولُس الْخُوري

انْ حِوَّشْت زَهْر الْكَوْنْ

ما بْتِنْفَع زْهُورِي

إنْت الْعُطْر وِاللَّوْنْ

ـ3ـ

يا الْـ صِرْت بَيّ وْأُمّ

وِسْكَنْت قَلْب النَّاسْ

بِتْعِيشْ حامِلْ هَمّْ

وْبِتْمُوت بِالْقِدَّاسْ

**

راعي جديد

حفلة عيد سيّدة لبنان، آب 1991، بحضور سيادة المطران يوسف حتي

ـ1ـ

كلّ الدِّنِي عَمْ تِحْتِفِي بْعِيدِكْ

يا سيّدِةْ لُبْنانْ.. يا أُمِّي

بْسِيدْني.. الْحَبايِبْ عَتّقُوا نْبيدِكْ

مَعْ يُوسف الْحتِّي الْـ مِحِي هَمِّي

ـ2ـ

راعي جْديدْ.. وْيِسْلَم جْدِيدِكْ

الْـ زارِعْ جَنايِنْ وَردْ عَ تِمِّي

إِبِنْ أيطو.. انْبَنْيِتْ بْإِيدِكْ

وحْرُوف إِسْمُو انْكَتْبِت بْدَمِّي

**

سيّدنا

قدّمت بها المطران يوسف حتّي، آب 1991

ـ1ـ

بْعِيدِكْ يا سيّدِةْ لُبْنانْ

بَدُّو يْبَارِكْنا الْمُطْرانْ

سَيِّدْنا يُوسف حتِّي

الـ محّى بالكلمه الهجران

ـ2ـ

بِوْجُودُو فْرِحْتي إِنْتِي

وعَتْمِةْ دَرْبُو زِيَّنْتِي

وْجُوَّاتْ حُرُوفو سْكنْتِي

تا يفيض بحرفو الإِيمانْ

ويْرَجِّعْنا عَ الأَوْطانْ

**

ضيف كبير

يوم زارنا المطران أنطون جبير، آب 1991

ـ1ـ

طَلّ عْلَيْنا ضَيْف كْبِيرْ

عَ وِجُّو بِيفِيض الْخَيْر

حامِلْ لِلنَّاس تْباشِيرْ

بِتْفَرِّحْ نَغْماتْ الطَّيْر

ـ2ـ

رَاعي.. وِعْيُونُو نْواطيرْ

وْوَعْظاتُو تْراتيل الدَّيْر

نِحْنا بْسِيدْني فْرِحْنا كْتِيرْ

بِوْجُودُو.. بْضِحْكِةْ سِنُّو

سَيِّدْنا أَنْطُون جْبَيْر

**

قاضي الشعر

حفل تسليم جائزة شربل بعيني للدكتور مروان كسّاب 2023

ـ1ـ

اليوم بدّي كرّمك يا كبير

ولفّك بـ شال الحب والتقدير

مروان.. إسمك للأدب نبراس

ببيوت شعرك سكنت عصافير

القامه جبل.. صعب الجبل ينقاس

حابب ع دربك إعمل مشاوير

في ناس خلقت تا تكرّم ناس

وفي ناس بعدا عايشه بتعتير

جبينك بنور الحرف عم ينباس

يا نسر تنّورين صوبي طير

حارب معي.. صار الكذب أجناس

عم يخلق بسيدني ألف يوضاس

شبعنا تفاهه وحقد مع تزوير

ـ2ـ

شامخ إنتْ.. متل الجبل عالي

ومتل الشمس بتنوّر ليالي

يا مكحّل بأرزات تنّورين

خلّي الكحله تقدّس مجالي

فكرك نقي.. وقلبك تلج صنّين

يا ريت تغزل بالتلج شالي

مروان.. مهما تمر فوقي سنين

ببقى بشعرك شبّ.. نيّالي

حاربت متلي جوقة مجانين

عبّوا بروسُن كومة نخاله

نحنا بْدني عم تحكما شياطين

وإنتْ قاضي الشعر يا مروان

بإيدك قلم.. وبكفّك الميزان

لا ترحم الأشرار يا غالي

ـ3ـ

ما في جوائز ترفع مقامك

يا كبير نخّ المجد قدّامك

كرّمتني بأشعار.. شو أشعار

رقصتْ على دقّات أنغامك

الكبار متلك رح يضلّوا كبار

بتغمر دني بأطياف أحلامك

بالقلب باقي ويغدر الغدّار

الغدّار صعبه يطال أقدامك

زغار البشر.. عاشوا وماتوا زغار

وإنتْ رح بتعيش يا مروان

بيرق وطن.. إسم الوطن لبنان

والمجد عم يكبر بإيّامك

**

نايف علوان

ـ1ـ

ياما بشر عاشوا بأعمالو

تا صار حب الناس رسمالو

وصار الصخر يحكي حكاية حب

ويلطى المجد بـ فيّة خيالو

ـ2ـ

إزميل نايف موهبه من الرب

خلّد بشر ما خطرت ببالو

وخلاّ الصخر يمشي معو ع الدرب

تا غطّت الأكوان أفضالو

ـ3ـ

عندي سؤال بينبع من القلب

وكتار متلي بهالدني قالوا

تا ينوجد متلو حدا شي صعب

نايف عظيم النحت نيّالو

تا نرد فضلو قول يا هالشعب

مين رح ينحت بتمثالو

**