بقايا جمر

شربل بعيني

Charbel Baini

بقايا جمر

Baqaya Jamr

Remnants of fire embers

الغلاف رندى بعيني

قصائد مختارة من كتب الشاعر

**

رسمك معي

ـ1ـ

رسمك معي.. وكل الدني نسوان

رخ فرجيُن كيف الحلا بيكون

شفافك ورود مزيّنه البستان

وعيونك اللي بتختصر العيون

ـ2ـ

فيها سبحت يا حلوتي من زْمان

ومن شعرك الفيه العتم مفتون

تعلمت نظم الشعر والأوزان

من سنين زادوا بمشيتك الفنون

ـ3ـ

ومن قدّك الممشوق حسنك بان

وجبينك لتلج الجبل مديون

وتحت القميص مفرّخ الرمان

بيكبر لحالو.. بيكسر القانون

ـ4ـ

وفستان من كتر الدفى عرقان

معرّق بلون الموز والليمون

ووجّك قمر تا إرسمو.. الألوان

فوق الخدود بتختصر أحزان

عاشت بـ قلب الشاعر المجنون

**

ذكريات

ـ1ـ

كل الْغِنِّيَّاتْ الْحلْوِه الْـ غِنَّيْتِيهَا

حِفْظُوهَا النَّاس

وْكَتْبُوهَا كِلاَّ بْإِسْمِكْ

ـ2ـ

كِل الطَّلاَّت الْمضْوِيِّه الْـ طلَّيْتِيهَا

مْنِتْذَكَّرْهَا طَلِّه وْطَلِّه

كِل ما لْمَحْنَا صدْفِه.. رَسْمِكْ

ـ3ـ

زَهْرَات الْغُرْبِه سْقِيتِيهَا

مِنْ يَنْبُوع الطّهر الْجَارِي

بْمَرْجِةْ جِسْمِكْ

ـ4ـ

إِيدَيْنْ النَّاسْ مْسِكْتِيهَا

وْوِصَّلْتِيهُنْ مِتل الْيَقْظَه

للأَرْضْ اللِّي عَمْ تِعْطِيهَا

إِسْمِكْ،

رَسْمِكْ،

جِسْمِكْ،

دَمِّك..

**

انتهى المشوار

ـ1ـ

أحباب كنّا وبالصداقه كبار

وغدرت فيي وصار هللي صار

ما كنت صدّق ع القساوه ربيت

ما كنت صدّق عشت باستهتار

ـ2ـ

عاملتك بإخلاص كيف نسيت

إنك بـ قلبي وصورتك بالدار؟

من دون سبب درت الضهر ومشيت

وتركت قلبي يحترق بالنار

ـ3ـ

قسيت عْلى حالك.. مش عليي قسيت

إسمك على شفافي انكتب: غدار

فكّرت حالي نص حالي لقيت

مش هيك لازم ينتهي المشوار

**

أول المشوار

ـ1ـ

رح خبّرك كيف التلاقي صار

وكيف انتهى من أولو المشوار

شفتك قمر عم يلمع قبالي

تاري القمر من طلتك بيغار

ـ2ـ

شفتك شمس بـ عتمة ليالي

من ضحكتك عم تشرق الأنوار

وصرتي حلم عم يمرق ببالي

شوفك بليلي وإرسمك بنهار

ـ3ـ

ملكتي القلب.. صار الإسم غالي

كل ما ذكرتو إحترق بالنار

بعرف أنا من خلقتي عالي

كيف ركعت تا إربحك محتار؟

ـ4ـ

طلعتي لئيمه صعب تا تبالي

بمحبتي.. بتزغرد الأشعار

إنّبت حالي.. تا ربحت حالي

وشلحت خلفي طبعك الغدّار

**

كيف انتهى المشوار؟

ـ1ـ

كيف انتهى المشوار قوليلي؟

لا تكذبي.. كذباتك تقيله

رحتي معو.. تركتي اللي حبّك عمر

شو صار قولي؟ عجّلي حكيلي

ـ2ـ

شايف ع خدك ألف دمعة قهر

دمعه ورا دمعه بتشكيلي

سنتين غبتي.. ملفلفه بالغدر

بدرس القساوه حافظه متيله

ـ3ـ

نسيتي الهدايا وألف باقة زهر

نسيتي الوفا يا ناكره جميلي

واليوم جايي تذكريني بشعر

قلتو إلك.. هالمنفقه شيلي

ـ4ـ

نسيتك أنا ومحيت أبشع ذكر

من دفتري خزّقت تشكيله

ومتلي قسي هالقلب جوّا الصدر

بفرح إذا بتبكي مقابيلي

**

حلم كذّاب

ـ1ـ

مجنون هلّلي بينغرم فيكي

شو جابرو حتّى يراضيكي

بيركص وراكي والحلم كذّاب

وبيحترق ع نار ماضيكي

ـ2ـ

بوجّو ع طول مسكره الأبواب

ومحتار كيف بدّو يلاقيكي

قلبك حجر.. عقلك متل دولاب

وهوّي بـ قلبو عم يخبيكي

ـ3ـ

ان كنتي ع طول بتحرقي الألباب

لا بد ما إنسان يشويكي

عم تظلمي وتفبركي الأسباب

استحيي بقى.. أللـه يخلّيكي

**

يُمَّا يُمَّا

ـ1ـ

يُمَّا يُمَّا يَا يُمَّا

الْوَرْدِه الْـ عَ خَدَّا شَمَّا

وْصَفَّى يِتْغَنْدَرْ فِرْحَانْ

وِالظَّاهِرْ مَنُّو فِهْمَانْ

إِنُّو الْوَرْدِه اللِّي شَمَّا

صَعْبِه يُوصَال لإِمَّا

ـ2ـ

شَهْر وْشَهْرَيْن وْأَكْتَرْ

فِكْرِي مِتْلَبَّكْ حَيْرَانْ

مِدْرِي مْنِ الدَّمْعَهْ بِسْكَرْ

مِدْرِي مْنِ السِّحْرِ الْفَتَّانْ

خوْتِتْنِي دَخِيل اللـه

قُولُوا شُو بِعْمِلْ وَاللـه

بْقِلْلاَّ حَاكِينِي وْهِيِّي

الْكِلْمِه بْتُوقَفْ عَ تِمَّا

ـ3ـ

بْغَارْ عْلَيْهَا وْيَا دِلِّي

الدَّمْ اللِّي بْقَلْبِـي بْيِغْلِي

بْقِلْلاَّ: حِبِّينِـي .. بِتْقُولْ:

لاَ تْعَبِّي الْمَيّ بْسَلِّه

السَّلِّه مَا بْتِجْمَعْلَك مَيّْ

ضْحِكْتِلاَّ وْقِلْتِلاَّ : خْطَيّْ

كِرْمَالِكْ كِلّ النّجْمَاتْ

بْوَقِّعْهَا .. وْبِرْجَعْ لِمَّا

**

نوَّر العيد

ـ1ـ

نَوَّر الْعِيدْ غَنُّولُو

نَوَّر الْعِيدْ

وْشَمْعَاتِ الْحُبّ ضَوُّولو

تَا الْفَرْحَه تْزِيدْ

ـ2ـ

نَوَّر الْعِيدْ يَا حَبِيبِـي

حَوِّشْلِي نُورْ

وْزَيِّنْ أَيَّامِي الْغَرِيبِه

بْبَاقَاتِ زْهُورْ

وْقِلْلاَّ : يَا شَمْس لا تْغِيبِـي

لِفِّي الْمَعْمُورْ

مْشَاوِير الْحُبّ قَرِيبِه

وِالْعُمْر بْعِيدْ

ـ3ـ

سَاعَات الْكَيْفْ سَاعَاتُو

وْنَغْمَات الْحُبّْ

غَنِيلِي شْوَيْ كِلْمَاتُو

وْفَرِّحْ هَـ الْقَلبْ

وْعَ رَمْلِ شْطُوطْ عَتْمَاتُو

صَوِّرْلِي دَرْبْ

تَا قَضِّي الْعِيد وْسَهْرَاتُو

وِالإِيدْ بِالإِيدْ

**

أفراح

ـ1ـ

لْيَالِينَا.. لْيَالِي الأَفْرَاحْ

مَرْحَى بْطَلِّتْكُنْ مَرْحَى

جِمَّعْنَا زْهُور التُّفّاحْ

وْحِيَّكْنَا أَجْمَلْ طَرْحَه

ـ2ـ

مِتل الْوَرْدِه بِالْبُسْتَانْ

مِحْمَرَّه خْدُودَا مْن زْمَانْ

حُسْنَا.. سُبْحَان الْخَالِقْ

مَارِقْ عَ وِجَّا مَارِقْ

فَصْل الصَّيْفِيِّه بْلُبْنَانْ

وْتَارِك عَ كْتَافَا طَرْحَه

ـ3ـ

قَاعِدْ حَدَّا عَ الشِّمَالْ

بَدْر مْنَوَّرْ بِالْجَمَالْ

حَفْلِه مَا صَارِتْ لِمْلُوكْ

هَنُّوهُنْ.. قُولُوا: مَبْرُوكْ

عِيشُوا هَـ الْعُمْر بْدَلالْ

وْطِيرِي يَا طْيُور الْفَرْحَه

ـ4ـ

دَبْكِه وْهَيْصَه وِغْنَانِي

وِقْلُوب النَّاسْ فِرْحَانِه

حُلْوِه يَا لْيَالِي الأَعْرَاسْ

بِشْرَبْ فِيكِي دْمُوع الْكَاسْ

وْيَا مَا عَ شْفَافِي قْنَانِي

انْجَرْحِتْ.. وْنِسْيِتْ جُرْحَا

**

خاتـم

ـ1ـ

لِمِّنْ حَبْسُونِي بْخَاتِـمْ

أَصْفَرْ وِزْغَيَّرْ نَاعِمْ

أُمِّي وْبَيِّي فِرْحُوا كْتِيرْ

وْحِسَّيْت بْحَالِي رَحْ طِيرْ

فَوْق جْنَاحْ النَّسَايِمْ

ـ2ـ

يَا مَا ويَا مَا حْلِمْنَا فِيكْ

يَا خَاتِـمْ.. حَتَّى نْلاقِيكْ

فَرْحَه بِعْيُون الْحِلْوِينْ

وْطَرْحَه بَيْضَا وِفْسَاتِينْ

وْزِينِة عِرْس وْعَزَايِمْ

ـ3ـ

إِنْت الْحَبْس الْـ بِيفَرِّحْنَا

إِنْت الدَّمْعَه الْـ مَا بْتِجْرَحْنَا

لَوْلاك زْهُور الْبُسْتَانْ

ما انْهَدْيِتْ مَرَّه لإِنْسَانْ

إِنْت الْمَحْبُوب الدَّايِمْ

ـ4ـ

حْبِسْنِي.. لا تِتْرِكْنِي ضِيعْ

وْيِمْرُق عْلَيِّي الرَّبِيعْ

مْرُوجِي مِشْتَاقَه للزَّهْر

يَا خَاتِـمْ.. شُو نَفْع الْعُمْر

لَوْ تِنْسَانِي يَا خَاتِـمْ

**

حكاية الفرقة

ـ1ـ

كْتَبْت عَ وَرْقَه

حْكَايِة الْفُرْقَه

لَمَّا هْجَرْتِينِي

لْوَحْدِي تْرَكْتِينِي

غُرْقَانْ بِالْحَرْقَه

ـ2ـ

وِشْكَلتْهَا قُونِه

بْصَدْرِي مَضْمُونِه

وْقِلْتِلّهَا: تْخَبِّي

يَا وَرِقْتِي بْعُبِّي

الْـ حَبُّونِي هَجْرُونِي

ـ3ـ

وْإِنْتِي الْوَحِيدِه

الْبَاقْيِه بْإِيدِي

حْكَايِه مَكْتُوبِي

عَنْ هَجرْ مَحْبُوبِي

عَنْ سِرّْ تِنْهِيدِه

ـ4ـ

يَا حْكَايْتِي الْمُرَّه

عَنْ لَوْعِةِ الْهُجْرَه

بْحَلّفِكْ ضَلِّي

بْهَالصَّدرْ صَلِّي

تَا تِرْجَعْ السَّمْرَا

**

رجعت من الغربة

عام 1969 لحّن الفنان المرحوم الياس المقدسي هذه الأغنيّة وغنّاها في لبنان، وبعد عشرين سنة نفض الفنان اللبناني الأميركي شربل صعب عنها الغبار وغنّاها بلحنها القديم في المهرجان الغنائي الذي أحياه في سيدني ـ أستراليا. وفي بداية تسعينات القرن الماضي لحّنها الدكتور المصري سامي نصير وغنّتها الفنانة المهجرية هند جبران.

ـ1ـ

رْجِعْت مْنِ الْغُرْبِه

زَلْغِطْ يَا قَلْبِي

بُكْرَا رَحْ إِرْجَعْ إِتْلاقَى

مَعْ حُبِّي.. وْقَدِّمْلُو بَاقَه

وْقِلّو: يَا حُبِّي

يِقْطَع الْغُرْبِه شُو صَعْبِه

يِقْطَعْ الْغُرْبِه

ـ2ـ

بِتْذَكَّرْ عَ دَرْب الْعَيْنْ

كِنَّا نِمْشِي تْنَيْن تْنَيْنْ

وْفِي حُلْوِه بْإِيدَا جَرَّه

وْعَ رَاسَا طَرْحَه حَمْرَا

صِرْتْ إِسْأَلْهَا: مِنْ وَيْنْ

جِبْتِي هَـ الرَّوْعَه مِنْ وَيْنْ

دِوَّبْتِي قَلْبِي؟

ـ3ـ

يَا مَحْلَى لْيَالِي السَّهْرِيِّه

نِدْبُكْ دَبْكِه بْعَلْبَكِيِّه

وْنِشْبُكْ إِيدْ.. وْيِتْكِي خَصْرْ

وْتِغْزُل مْحَارِمْنَا الْحُمْرْ

وِالضَّيْعَه اللِّي بَعْدَا هِيِّي

رَاجِعْ تَا حُوشَا بْعِينَيِّي

وْخَبِّيهَا بْقَلْبِي!

**

سألت الزهر

كتبتها بعمر 15 سنة

ـ1ـ

سْأَلْت الزَّهرْ عَنِّكْ

الْـ إِخْد السِّحرْ مِنِّكْ

قَلِّي الْوَردْ إِنِّكْ

لْغَيْرِي ضِحِكْ سِنِّكْ!

ـ2ـ

قْضِيتْ الْعُمرْ حَدِّكْ

شَمْشِمْ هَوَا خَدِّكْ

نْسِيت الْقَلبْ عِنْدِكْ

سَرْق الْقَلبْ بَدِّكْ

رَمْيِ الشَّبَكْ فَنِّكْ

ـ3ـ

تْعِلَّمْت مِنْكِ كْتَيرْ

وِعْرِفْت عَنْكِ كْتِيرْ

وْحِلَّيْت الِحْزَازِيرْ

الْـ حَلاَّ شَقَا وْتِعْتِيرْ

خَيَّبْتِلِكْ ظَنِّكْ

ـ4ـ

لا تِكْتِمِي أَسْرَارْ

ما عَادْ فِي أَسْرَارْ

وْلا تْدَرْدِشي أَخْبَارْ

وْلا تِنْظِمي أَشْعَارْ

غَابْ الْوَحِي عَنِّكْ

**

بقايا جمر

ـ1ـ

نْجُومْ السَّمَا غَطِّتْ عَ شُبَّاكِي

عْصَافِيرْ بَيْضَا حِمْلِت شْبَاكِي

وْهَاك الضَّبَاب الْـ كَانْ بِعْيُونِي

تْبَخَّرْ.. كَأَنِّي مَا كِنت بَاكِي

ـ2ـ

وْبَعد التَّعبْ.. شِفْت الْفَرَحْ جَايِي

غِسَّلْت وِجِّي وْضِحْكِت مْرَايِه

صَرْلاَ زَمَان بْتِنْطُر الْفَرْحَه

الْـ قَعْدِت عْلَيْهَا غَبْرِة حْكَايِه

ـ3ـ

شُو مْفَكّرَه.. رَحْ ضَلّ إِبْكِي الْعُمرْ

وْتِعْتَقْ عَلَى شْفَافِي الآهاتْ الْحُمرْ

مْنِ النَّارْ بِطْلَعْ مِتل طَيْر النَّارْ

حَامِلْ عَلَى جْنَاحِي بَقَايَا جَمرْ

**

صرتي الخوف

ـ1ـ

وَاقِعْ بَيْنِي وْبَيْنِكْ بُغْضْ

وْلَعْنَات مْتَعَّبْهَا سْكُوتْ

وْإِيدَيْن تْشَلِّعْ هَـ الأَرْضْ

وْمَا تْخَلِّي للصُّلح بْيُوتْ

ـ2ـ

وَاقِعْ بَيْنِي وْبَيْنِكْ لَيْلْ

عَمْ يِفْزَعْ مِنْ عَتْمَاتُو

مْسَافَاتُو بْتِقْطَعْهَا الْخَيْلْ

وِبْتِبْلَعْهَا مْسَافَاتُو

ـ3ـ

وْبِهْرُبْ مِنِّكْ مِتل الرِّيحْ

الْـ فِلْتِتْ مِنْ إِيد الْغُرْبِه

وْحقْدِي عَمْ يِتْحَوَّلْ زِيحْ

قَاعِدْ يِرْسِمْلِي دَرْبِي

ـ4ـ

وْبِشْلَحْ غَدْرِكْ عَ الرَّمْلاتْ

الْـ نِفْيِتْهَا بْطُون الأَمْوَاجْ

بْيِتْكَوَّمْ غَدْرِك تَلاَّتْ

وْكِذْبِكْ لِلتَّلاَّتْ سْيَاجْ

ـ5ـ

صرْتِي الْخَوْف الْـ عَمْ بِيجِرّْ

ظْنُون تْعَشْعِشْ بِظْنُونِي

وْكِل مَا مْسِكْت بْإِيدِي السِّرّْ

بْقِلِّكْ: رَيْتِكْ مَا تْكُونِي..

**

حل عنّي

ـ1ـ

حِلّ عَنِّي حِلّ.. رَحْ إِزْهَقْ

وْيِدْبَلْ عَ خَدِّي الْوَرْدْ وِالزَّنْبَقْ

وْكِلّ السَّعَادِه الْـ شفتْهَا بْعِينَيْكْ

تُوقَعْ عَ دَرْبِي وَهْم.. تِتْخَزَّقْ!

ـ2ـ

شفْتَكْ هَنَايِي وْكِل أَيَّامِي

وِزْرَعتْ فِيك زْهُورْ أَحْلامِي

وْقِلتِلّها: يَا عْيُونْ لا تْنَامِي

مَرَّه الْعُمر بِالْعُمر رَح يِمْرَقْ

ـ3ـ

إِنْتَ الْـ شَلَحْت الْحُبّْ عَ دَرْبِي

وْإِنْتَ الْـ قَطَفْت الْحُبّ مِن قَلْبِي

وْلَمَّا افْتَرَقْنَا.. آهْ مِنْ غُرْبِه

خَلِّتْ مَرَاكِبْ حُبّنَا تِغْرَقْ

ـ4ـ

مْسَافَاتْ عِتْقِتْ بَيْنَكْ وْبَيْنِي

يَا الْـ كِنْت فِيك مْكَحّلِه عَيْنِي

وْعَلِّقْ سْنِينِي عُرْسْ بِجْنَيْنِه

صَار الْجَفَا عَ بْوَابْهَا مْعَلَّقْ!

**

فرحتها

ـ1ـ

فَرْحِتْهَا.. هِيِّي فَرْحِتْنَا

مِنْ يَوْم الْـ وِقْفِتْ غَنِّتْنَا

وْغَنِّتْ أَرْضْ

بْصَوْتَا الْـ عَمْ يِرْسُمْ ضحكِتْنَا

بْبَحِّة " أُوفَا " الْـ مَا تَرْكِتْنَا

بْلَيْل الْبُغْضْ

ـ2ـ

يَا حْمَامْ الأَبْيَضْ هَنِّيهَا

لَوْنَكْ مِنَّا.. لا تِنْسِيهَا

رِشَّا بْعِطرْ

وْغَنِّيلاَ كَمْشِةْ آوِيهَا

وْزَيِّنْ بِالطُّهر لْيَالِيهَا

هِيِّي الطُّهرْ

ـ3ـ

حِبَّيْنَاهَا.. وأَللـه بْيَعْرِفْ

مَا قْدِرْنَا الدَّمْعَاتْ نْنَشِّفْ

لِمِّنْ غَابْ

وِجَّا.. الْـ ضِحْكَاتُو بِتْشَرِّفْ

صَوْتَا الْـ عَنْ شَعْبَا بِيخَفِّفْ

أَقْوَى عْذَابْ

ـ4ـ

صَوْتَا.. مِتل جْبَالا عَالِي

بْسَحْبَاتُو بْتِنْمَدّ حْقَالِي

انْزَرْعِتْ قَمحْ

بْنَغْمَاتُو بْتِتْمَحَّى لْيَالِي

وِبْتِرْجَعْ ضِحْكِتْنَا تْلاَلِي

بْقَلْب الْجرْحْ..

**

جنوبيّة

ـ1ـ

قَالُوا عَنِّي جْنُوبِيِّه

صَرْخِتْهَا لُبْنَانِيِّه

صَفَّى قَلْبِي يْوَزِّعْ فَرَحُو

هْدَايَا لِلأَطْفَال الْـ نَزَحُوا

وْسَكْنُوا بْيُوت الْغِنِّيِّه

ـ2ـ

جْنُوبِيِّه.. مْنِ بْنَات الشَّعبْ

اللّي تْغَلَّبْ عَ جْنُون الْحَرْبْ

حِلَّفْتِكْ يَا شَمْس الْفُقَرَا

خَلِّي بْلادِي يْزَهِّرْ قَمَرَا:

حُبّ وْخَيْر وْحِنِّيِّه

ـ3ـ

عُمْرِي نَادِرْتُو لِبْلادْ

مشْتَاقَه يْطلُّوا الأَعْيَادْ

يَا زِينَات عْيَادِي وْأَمَلِي

ضَوِّي.. ضَوِّي لْيَالِي جَبَلِي

بَرْكِي بْتِحْلَى السَّهْرِيِّه

ـ4ـ

قَلْبِي زْغَيَّرْ مَا بِيسَاعْ

تَا خَبِّي مُدُنْ وِضْيَاعْ

مَزْرُوعَه بْجَنَّاتكْ.. بَلَدِي

وْمِنْصَانِه بِالْمَجْد الأَبَدِي

وْبِالْعِزِّه الإِلَهِيِّه

**

حقد وويل

ـ1ـ

كِلّ الْكِلْمات اللِّي حْكِيتَا

نْسِيتَا..

وْكِلّ الدَّمْعاتْ اللِّي بْكِيتَا

مْحِيتَا

بْإِيدَيْن مْيَبَّسْهَا الْبُغْضْ

ما تْرَكْتَا تِزْحَفْ عَ الأَرْضْ

وِتْنَضِّفْ طُرْقات مْشِيتَا!

ـ2ـ

فَجْرِكْ لِمِّنْ طَلّ خْيَالُو

انْشَالُوا

مْنِ عْيُونُو عِينَيْن طْفَالُو

وْقَالُوا:

فَجْرِكْ أَسْوَدْ مِتْل اللَّيْلْ

جَارِرْ خَلْفُو حقْد وْوَيْلْ

وْعَمْ بِيطَفِّي حَالُو بْحالُو!

ـ3ـ

وِالزَّهْر الْـ زَيَّنْ سَهْرَاتِكْ

مِنْ نَهْدَاتِكْ

غَيَّرْ لَوْنُو.. وْمِنْ حَكْيَاتِكْ

مِنْ كِذْبَاتِكْ

جَدَّلْ لِلسَّهْرات مْشَانِقْ

وْبَدُّو يْقَاتِلْ.. بَدُّو يْخَانِقْ

وِسْلاحُو كِذْب بْنَظْرَاتِكْ!

**

يأس

ـ1ـ

وْلِكْ آخْ مِنَّكْ آخْ يَا قَلْبِي

مَغْرُوم.. لكنْ حَالْتِي صَعْبِه

هَـ الْـ كِنت إِفْرِشْلاَ طَرِيقَا زْهُورْ

عَمْ تِفْرُش الآهَاتْ بِـ دَرْبِي

ـ2ـ

نِسْيِتْ عيُونِي الْحَارْقَه الْبَخُّورْ

قِدَّامْ صُورَه حْبَسْتْهَا بْعلْبِه

نِسْيِتْ بِأَنُّو عُمرهَا مَنْدُورْ

وِوْفِيتْ نِدْرُو شَوْق وِمْحَبِّه

ـ3ـ

وْصِفَّيْت إِكْرَه وِاللَّيَالِي تْدُورْ

وِالْكرْه.. نِقْطِةْ دَمّ عَ حَرْبِه

كْرِهْتْ إِسْمَعْ زَقْزَقِة عُصْفُورْ

تْأَنَّى وَقت مَا لَحَّنَا.. رَبِّي

ـ4ـ

كْرِهْت الصَّبَاحْ الْـ غَازْلُو بِالنُّورْ

وْمَعْ كلّ صُبْح بْيِبْتِدِي صَلْبِي

كْرِهْت النّجُومْ الْـ كَحّلِتْ دَيْجُورْ

كْرِهت "الرّجُوع" الْـ حَارْقُو شَعْبِي

ـ5ـ

وْبِزْنُودْ يِئْسَانِه حْمِلت مَعْدُورْ

وِافْتحتْ قَبْرِي بْأَرْض هَـ الْغُرْبِه..

**

رفيق

عَ قَدّْ مَا جُرْحِي غَمِيقْ

خَاف الْوَجَعْ يِتْسَبَّح بْجُرْحِي

قِضَّيْتْ عُمْرِي عَ الطَّرِيقْ

ما قْدِرْتْ لاقِيلِي رفِيقْ

لا بْيِشْلَح بْقَلْبِي الْحَرِيقْ

وْلا بْيِفْرَح بْدَبْحِي..

**

ألف حجّة

ـ1ـ

كِيفْ بَدُّو يِرْفَع عْيُونُو

وْيِتْطَلَّع بْوِجِّي

وْخَانْنِّي مِنْ دُونْ مَا خُونُو

وْوَسَّخْ ضَمِيرُو بْغَبْرِة جْنُونُو

وْضَاعْ خَلْف مْوَاقْفُو الْحِرْجِه؟!..

وْرَغِمْ شَكِّي وْصِدِقْ إِحْسَاسِي

قِرَّرْتْ إِمْحِي الْوَهِمْ مِنْ رَاسِي

وْبَرِّرْ حَبِيبِي الزَّايْدِه فْنُونُو

وْإِتْصَبَّرْ.. وْإِخْلَقْ أَلفْ حِجِّه!

ـ2ـ

كِيفْ بَدُّو يْسَلِّمْ عْلَيِّي

وْيِزْرَعْ إِيدَيْهِ السّمر بِدَيِّي

وِيْقُولْ: مِشْتَقْلِكْ

إِنْتِي بْسَمَايِي نْجُومْ مُضْوِيِّه

إِنْتِي السَّعَادِه النَّايْمِه فِيِّي

إِنْتِي حَيَاتِي وْنُورْ عِينَيِّي

وْمَا حَدَا مِتْلِكْ؟!..

ـ3ـ

مِنْ جِهّتِي.. مَا عِدّتْ سِئْلانِه

تْعِوَّدْتْ عَ الْكِذْب وْعَ الِخْيَانِه..

وْصِرْتْ أَعْرِفْ كِيفْ إِتْعَمْشَقْ

بْخَشْبِةْ خَلاَصِي قَبِلْ مَا إِغْرَقْ

وْزِيدْ بَعْدِ الْيَأس إِيمَانِي

وْإِنْقُل جْبَالِي عَ بَحِرْ أَزْرَقْ

مَا لَطَّخ جْبِينُو وَلا زَوْرَقْ

وْغِبّ الْعَذَاب بْنَشْوِة السّكْرَانْ

الْـ صَار يِشْرَبْ خَمِرْ كِيفْ مَا كَانْ

وِيْحَسّبُو مْنِ الْخَمر الِمْعَتَّقْ!

ـ4ـ

شُو هَمّنِي؟.. مَعْلَيْشْ

لَوْ خَانْنِّي نِتْفِه

وْعَ دْرُوبْ الطَّيْشْ

يِدْبَحِ الْعِفِّه

الِمْهِمّْ يِبْقَالِي

أَطْوَعْ مِنِ خْيَالِي

وِيْحِطّْ رَاسُو بْغِنْجْ عَ كِتْفِي

وْغَطِّيهْ بِـ شَالِي

وِيْقُولْ: مِتْلِكْ بِالدِّنِي مَا فِي

يَا مْرَيْحَه بَالِي..

وْرَغِمْ شَكِّي وْصِدقْ إِحْسَاسِي

قِرَّرْتْ إِمْحِي الْوَهم مِنْ رَاسِي

وْطَيّرُو عَ جْوَانِحِ الصِّدْفِه

وْإِضْحَكْ بْعِبِّي وْتَمْتِمِ لْكَاسِي:

وْجُودُو مَعِي بْيِكْفِي!

**

أُوعا تخاف..

ـ1ـ

الْوَحل اللِّي مْغَطَّى جْرَيِّي

عَمْ يِرْفَعْ صَوْتُو عْلَيِّي

هَدَّدْنِي بْإِشْيَا كْتِيرِه

وْقَلّلِي تَا إِدْفَع مِيرِه

يِمَّا بْيِعْمِي عِينَيِّي

ـ2ـ

لَوْنُو أَسْوَدْ مِتْل اللَّيْلْ

اللِّي مْلَطَّخْ بِجْنُونْ الْعَارْ

الْـ شَادِدْ عَ خَصْرُو زنَّارْ

مَغْزُول بْإِدَيْنْ الْوَيْلْ

ـ3ـ

.. وْكِلْمِنْ شَافُو عَ جْرَيِّي

مَا عَاد يْقَرِّبْ ليِّي

فِزْعُوا مِنِّي كلّ النَّاسْ

إِخْوَاتِي.. أُمِّي وْبَيِّي

افْتَكْرُوا فِي عِنْدِي وسْوَاسْ

بْـحبّ الإِشْيَا الْمِجْوِيِّه

ـ4ـ

وَحْدَا.. اللِّي بِقْيِتْ حَدِّي

أم عْيُون اللَّوْزِيِّه

الْـ كَانِتْ لِحْيَاتِي سَنْدِه

وِلْقَلْبِي أَحلَى هْدِيِّه

قَالِتْلِي: إِيَّاك تْخَافْ

عِنْدِي لْسَانْ وْعِنْدِي شْفَافْ

بْغَسِّلْ جِسْمَكْ بـرِيقِي

تَا يْصَفِّي لامِعْ شفَّافْ

وْأَنْقَى مِنْ طُهر النّفْنَافْ

وْيَا حُلْم اللَّيْل بْطُولُو

مِتل الْمَارِدْ حَدِّي وْقَافْ

وِيْقُولُوا شُو مَا يْقُولُوا

عَلِّي رَاسَكْ.. أُوعَا تْخَافْ

**

همومي

ـ1ـ

ما عادْ فِيِّي إِتْحَمَّلْ..

ما عادْ فِيِّي إِتْحَمَّلْ..

هْمُومِي، أَكْبَرْ مِنْ رَاسِي

وِالْيَأْس مْعَبَّى كاسِي:

قهر وْحُزن وْمَآسِي

تَا صَفَّى رِيقِي حَنْظَلْ..

ـ2ـ

لَمَّا الْـ حِبَّيْتُنْ هَجْرُونِي

زَرْعُولِي الوِحْدِه بِعْيُونِي

وْضِجِرْ مِنِّي تْرَابْ الأَرْضْ

وْصّفَّى يْمَغِّطْ طُولِي.. عُرْضْ

وِيْقِللّي: فِي بْقَلْبَكْ بُغْضْ

بِـيدَمِّرْ هَـ الْمَسْكُونِه!

ـ3ـ

ضَايِع.. قَالِتْلِي الأَيَّامْ

بْدِنْيِي مَا فِيهَا أَحْلامْ

وْجُودَكْ ما بْيِنْعَدّ وْجُودْ

غَايِبْ.. مَعْ إِنَّكْ مَوْجُودْ

بْيِكْفِي بَقَى.. حِطّ حْدُودْ

لْمَهْزِلْتَكْ، تَا فِيكْ تْنَامْ!

ـ4ـ

غِنِّيَّاتِي وِالأَشْعَارْ

اللِّي كْتَبْتُنْ عَ وْرَاقْ الْغَارْ

زِعْلُوا مِنِّي وْقَالوا: عِيشْ..

لا تْرَوِّحْ عُمْرَكْ بَخْشِيشْ

رَكِّبْ جْوانِحْ مِنْ رِيشْ

وْطِيرْ وْعَلِّي فَوْق النَّارْ

ـ5ـ

.. وْهِنِّي لَوْ حَسُّوا شْوَيِّه

بِاللِّي عَمْ يِغْلِي فِيِّي

كَانُوا سَكْتُوا بِالْمَرَّه

وْغِرْقُوا بِقْنَانِي الْخَمْرَه

الْخَمْرَه.. فِي عِنْدَا قِدْرَه

تْوَعِّي الإِشْيَا الْمِنْسِيِّه.

**

ليلة عرسي

ـ1ـ

بدّي من شفافك بوسه

تكون كبيره

تفقع.. تا بليلة عرسي

تفيق الجيره

ـ2ـ

وبدّي أنّات وبدّي

تدليع شويْ

وبدّي شعّل المخده

وطفّيها بمي

ناديكي وإنتي حدي

ما تردي عليْ

وتوعى ستي مع جدّي

وأهالي الحيْ

واحد يركض تا يهدي

ووحده يا خطيْ

بلحظه حكمتها الجمده

وبعدا زغيره

**

شو نفع الدنيي؟

ـ1ـ

هالدنيي من دون تبويس

ومن دون شم وعصر نهود

ما بتسوى لعنه من بليس

ولا بتسوى قشّه ولا عود

ـ2ـ

شو نفع الدنيي يا ناس

لو ما فيها حرمه وكاس

والشبّ الـ بعدو ما باس

شفاف الحرمه.. وأحلى خدود

موجود.. ومَنّو موجود

**

الشيبه

ـ1ـ

لا تفزعي لو قويت الشيبه

وغطى التلج راسي.. يا عينيي

بتبقي الصبيه الساكنه بقلبي

وعم تلعبي متل الهوا فيي

ـ2ـ

بترجعيني شب من غربه

غرزت ضافيرا السود بـ ديي

ولِكْ خلصيني.. تعبت من صلبي

الأشعار صارت تضحك عليي

**

نظرة

ـ1ـ

قالت: حبيبي ليش تا غضبان

وما في سبب تا اليوم تتخلّق

كل عمرك عاشق وولهان

كرمال بوسه شفافك بتسبق

ـ2ـ

قلتلّها: من نظرتي زعلان

شردت عيوني صوب المعرّق

لمّا الهوا طيّرلِك الفستان

من دون وعي نخّيت حتّى شوف

انكنّو الهوا بفستانك معلّق

**

راقصه

لو كان عندي بنتْ

سمّيتها بإسمِكْ

ولو كان عندي أختْ

زيّنتها بكسمِكْ

ويا ريت أصبا كنتْ

تا إغرق بْجِسْمِكْ

**

متكبره

ـ1ـ

متكبرّه!.. ملكتي الدني

وراسك ما عمرو بينحني

وحكايتك متل الزعل

ما بيلتقي بعيش الهني

ـ2ـ

حلوه.. ما شالله بتسطعي

متل الشمس عم تلمعي

لكن يا حسره.. مكبّره

رغم الحسن بتفزّعي

ـ3ـ

يا مكبّره لو تسمعي

كلامي أنا وتتواضعي

رح إكفلك إنّو بسنه

بتتزوجي.. من دون سعي

**

عانس

ـ1ـ

حرمه أنا.. ومش مذنبه

ان كان الجنس من مطلبي

ربي حرم جسمي الهنا

وعانس تركني.. معذبه

ـ2ـ

عطشان جسمي للجنس

لحظة جنس عندي عرس

بحس الدني متل الحبس

رح إختنق ومشوّبه

ـ3ـ

وين الإيدين البارده

تبرّد جسم هالشارده

وليش الشباب مبيعدي

عن جسم عانس بعدها

وع جسم غيري مقرّبه

**

مريولك

ـ1ـ

يا لابسه المريول

اللي بالشتي مبلول

وملتصق بالجسم

ما خلّى فينا عقول

ـ2ـ

مريولك مخيّط

ع قدّك الممشوق

الـ بيشوفك بيزحط

وبيلطم الـ بيسوق

واللي نبغ بالعلم

من طلتك مسطول

ـ3ـ

رح إسأل الفهمان

يا مزوّغه العيون

شو بيحكم الإنسان

تا بينقلب مسطول

بيحك راس الفهم

وإنتي السبب بيقول

ـ4ـ

كل شب أو ختيار

لو شافك بينهار

ويا حسرتي ع الجار

الـ بالعصفوريه صار

واللي بيقاتل زلم

من بوستك محلول

**

ليش؟

ـ1ـ

ليش رافقتي الخطيئه

ليش تا صرتي دنيئه

ليش انجرفتي بهالرياح

وليش ما طلبتي السماح

ليش ما كنتي جريئه؟

ـ2ـ

ليش ما رميتي السلام

وليش ما جيتي قوام

طلبتي من قلبي الأمان

وقلتي غدر فيي الزمان

ليش غيّرتي الكلام

تا تبيّني إنك بريئه؟

ـ3ـ

لا تلبسي تياب الألم

ولا تمسحي دموع الندم

ولا تغسلي وجّ الغدر

ولا تمحشي حكاية عمر

ولا تصرخي عيشي عدم

وسنيني بالغصه مليئه

**

يا معبودي

ـ1ـ

بوستك ما نسيتها

يا معبودي

من ساعة اللي رخيتها

على خدودي

ـ2ـ

ومتذكره يا مراهقي

كيف كان

تمّي بتمك يلتقي

وشعلان

وبين البقي والما بقي

قلبي بحبّك يا شقي

فرحان

**

شفافك

ـ1ـ

شفافك ورده

بشمّا.. وبدّي

تبقى حدّي

لوقت الشده

ـ2ـ

لوقت الحشره

بليله حمرا

مجّ الخمره

وبُوس الورده

ـ3ـ

وحسّ بحالي

بمطرح عالي

وإنتي قبالي

أحلى مخدّه

**

مجنونه

ـ1ـ

لا تفكّرني شي مجنونه

الحب بقلبي كبير؟!

بين الحب وبين عيوني

في مجالات كتير

ـ2ـ

لا تفكّرني بعدي "نونه"

بتأثّر بكلام

بغمزات، بضحكه حنونه

وبرمية سلام

ـ3ـ

متل زهورك عندي مونه

حاجي تودي زهار

الأزهار الـ منّك بيجوني

برميهن بالنار

ـ4ـ

وبوساتك يللي خلوني

حس بنتفة روح

بالآخر قاموا جرحوني

بدل الجرح جروح

**

كذابه

ـ1ـ

بكذبِك أنا إلّفت أطروحه

والصدق صابو من الكذب إحباط

أبواب تمّك دوم مفتوحه

من هيك طول الوقت مبحوحه

بعد الكذب.. عم يبتدي العياط

ـ2ـ

صرتي ع درب الغدر مشلوحه

وكنتي دهب موزون بالقيراط

عشتي معي إيام بحبوحه

سبقنا الشهور وضحكت الأشواط

رجعتي انتهيتي متل شهر شباط

**

حب

بدّي حبَّك كل الحُبّ

الـ ما حدا حبّو

وبدّي زتَّك جُوا القلب

تا يزهِّر قلبو

**

معوّد

معوّد ع شرب نبيد أحلى خدود

معوّد أنا صيّف بأعلى جرود

فيها الكرز محمر

والعنب مشقرّ

ومنو لحالو بيستوي العنقود

**

لا ترقصي

ـ1ـ

لا ترقصي.. ولا تهزهزي بخصرك

عم ترجف جفوني

وتعبت جريكي.. وانكسر ضهرك

ووقعتي بعيوني

ـ2ـ

بكرا بيقولوا الناس مين أمركْ

تا بسهرتي تكوني

ومين الـ عصر ع فرشتو صدرك

بلحظات ملعونه

ـ3ـ

سحرك سحرني.. آخ من سحرك

طيّر جنوني

ومن دون وعي بوّستك بشعرك

بوسات سكروني

**

بنت جارتنا

ـ1ـ

ألله مَعِكْ.. يا بِنْت جارِتْنا

يا الْـ شعرْها بْنَكْزِةْ هَوا بيطيرْ

وْلَنُّو ارْحَمي بِالْحَيّْ كَبْرِتْنا

رْميلِكْ شي ضِحْكه صَوبْنا بَكِّيرْ

ـ2ـ

لا تِفْزَعِي مِنْ تَلْجْ شَيْبِتْنا

بَعْدُو الْجِسِمْ بِالتَّخْت دافي كْتِيرْ

وْبَعْدا الشّفافْ بْلَيْل لِذّتْنا

بْتِنْقُر شْفافِكْ متلْ العصافيرْ

ـ3ـ

بْتِنْسي الدّني بِجْنُون بَوْسِتْنا

وِبْتِشْهَقي: مِينْ قالْ إنت كْبيرْ؟

**

نقطه بيضا

ـ1ـ

ساعة ما بْبَوِّسْ حَلْماتِكْ

بِتْرِنّ بْإِدْني شَهْقاتِكْ

وِبْراكيني بْتِشْعل جُوّا

وِرْجُوليتي كْرامِةْ حَوَّا

بِتْضِيع بْفَرْحِةْ صَرْخاتِكْ

ـ2ـ

وْلِمِّنْ بِغْفَى فَوْق زْنُودِكْ

بتصفّي تْحَرْقِصني نْهُودِكْ

وِتْقِلِّي لا تْضَيِّعْ وَقْتَكْ

هيّي خِلْقِتْ بَسّ لْتَخْتَكْ

تا يْجِنّ وْيِشْعل بارُودِكْ

ـ3ـ

وْلِمِّنْ بِتْناديني شْفافِكْ

راسي بْيِتْكي فَوْق كْتافِكْ

وْبتصيرْ اللعْبِه الْمَجْنونِه

تِتْرُكْ جَمْراتا بِعْيُوني

ونقطه بَيْضا فَوْق لْحافِكْ

**

بوسه

ضِحْكِتْ وقالتْ: طلّتَك عِرْسي

مِنْ طَلّتَكْ عم يِنْمحى أَمْسي

قِلّتلّها: عِرْسي أنا يا هِنْد

لِمِّنْ عَ تِمّي بْتِزْرَعي الْبَوْسِه

**

منام

ـ1ـ

حَبِّتْ عَ صدْري تِغْزُل مْناماتْ

تاري المَنامْ بْيِسْرِقا مِنِّي

بيفَرْفِطا بْأعلى سَما شاماتْ

بيطَيِّرا عْصافير بِتْغَنّي

ـ2ـ

وْتا فَيِّقَا مْن الْحُلْم بِالْكِلْماتْ

بْقِلّلا: بْحِبِّكْ.. دِنْيِتِكْ جَنِّه

فَجْأَه.. بْتِتْذَكَّر أبُو الْهِمّاتْ

بِتْصِيحْ: أُوعا تِبْتِعِدْ عَنِّي

**

.. وهلّق

ـ1ـ

.. وهلّقْ، بعد ما كْبِرتْ، يا كْتابي

لْبِستْ الدّهَبْ بِسْنينَكْ الْخَمْسينْ

في ناسْ ما حَبُّوكْ.. نِصّابِه

بالسّر عَمْ تِزْنِي بْإسْم الدّينْ

ـ2ـ

قالوا حَكي.. ما بْيِنْحكى بْغابِه

قالوا: الجنس بيفَرّخ شْياطينْ

هَيْدا شُعوري بْزَهْرِة شْبابي

وْبَعْدُو شُعوري بْشَيْبِة الستّينْ

ـ3ـ

متْل الكذبْ دِقَّيْت عَ بْوابي

شِفْتَكْ طفلْ.. ما عرفتْ إنتَ مينْ

تْلاعَبتْ فيّي متل شي طابِه

وْقِلّقِتْني بِعْيُون نِعْسانين

ـ4ـ

أكْتُبْ شعرْ تا فَرّح حْبابي

بْخيطان شِعري حَيِّك فْساتين

ما في وْلا كلْمه فيكْ كذّابه

زِعّلْت حالي كْتيرْ تا إرضيكْ

وما رْضيتْ مَرَّه زَعِّل الْحلوين

**

شهوة جسـم

ـ1ـ

لَوْ كَانْ عِنْدِي لِلْخَطِيِّه مَيْلْ

كِنْتْ سْبَحِتْ بِبْحُورْ عِينَيْكِي

وْكِنْت وْصِلِتْ عَ شّطّ هَاك اللَّيْلْ

مَطْرَحْ مَا فِينِي إِحْصَل عْلَيْكِي!

ـ2ـ

كنت كْتَبتْ عَ وْرَاقْ وَرْدَاتِكْ

أَشْعَارْ صَعْب كْتِيرْ تِمْحِيهَا

تَا كِلّ مَا قْطَفْتِي بْدَيَّاتِكْ

وَرْدِه.. تْشِمِّيهَا وْتِقْرِيهَا

ـ3ـ

وْكِنتْ عَ بَابِكْ وْقِفت سْنِينْ

حامِلْ كَمَنْجَه وْبَاقِة رْيَاحِينْ

تَا كِيفْ مَا تْرُوحِي وْتِجِي عَ الدَّرْبْ

غَنِّي لْعُيُونِكْ أَجْمَل تْلاحِينْ

ـ4ـ

وْكنت بِالْغِيرِه زْرَعِتْ قَلْبِكْ

وْقَلْبِكْ طفلْ مَا دَاقْ طَعْم الْحُبّْ

تَا تْطَاوْعِينِي.. وْتشكرِي رَبِّكْ

عَ هَالْمَحَبِّه الْـ مُشْ سَايِعْهَا الْقَلبْ

ـ5ـ

لَوْ كانْ بَدِّي.. بَسّ مَا بَدِّي

وَسِّخْ ضَمِيرِي وْغَبِّرْ عْيُونِي

وْشَمْس الطَّهَارَه تْصِيرْ مِسْوَدِّه

كِرْمَالْ شَهْوِة جسم مَجْنُونِه

**

إيدك بإيدو

ـ1ـ

إِيدِك بْإِيدُو؟!.. عَيْبْ شُو صَابِكْ

مِتل الشّهُور بْيِمْرَقُوا حْبَابِكْ؟!

انْ كِنْتِي "السِّنِه" رُوزْنَامْتِكْ أَوْهَامْ

انْ كِنْتِي "الزَّهر" عُمر الزَّهر أَيَّامْ

وْنَاطِر خَرِيف وْبَرد عَ بْوَابِكْ؟!..

ـ2ـ

إِيدِك بْإِيدُو؟!.. وْضحكتِكْ قِنْطَارْ

وْشَعْرِكْ عَلَى كْتَافُو عِمِلْ مشْوَارْ

وْصَابِيعِك بْيِتْفَاخْرُوا بْبَصْمَاتْ

يَا أَلف عَيْب الشُّومْ.. كِلاَّ عَارْ

ـ3ـ

وِتْطِيرْ مِنْ كِتْرِ الْجهل آهاتْ

مِنْ نَارْهَا.. يَا دِلّ دِلّ النَّارْ

وْتِقْرَفْ طَرِيقْ الْحُبّ مِنْ دَعْسَاتْ

أَتْقَلْ مِنِ الْحِقْد بْقَلب غَدَّارْ

ـ4ـ

يَا بِنت.. مُشْ زِعْلانْ عَ سَهْرَاتْ

يَا مَا تْرِجَّيْتِي وْقِلْتِي سْهَارْ

زِعْلانْ مِنْ حَالِي.. وْمِنْ كِلْمَاتْ

قْعَدْت إِكْتِبْهَا بْقَلَمْ مَجْرُوحْ

رحْتِي.. وْيَا حَسْرَه.. بِقْيِت الأَشْعَارْ!

**

دقِّيلو جراسك

ـ1ـ

دِقِّيلُو.. دِقِّيلُو جْرَاسِكْ

بَرْكِي بْيِحْضَرْلِكْ قدَّاسِكْ

حْسَابَاتِكْ كِلاَّ حْسِبْنَاهَا

وِمْحِينَا دْرُوب مْشينَاها

وْهَاك الدَّمْعَه اللِّي سْكَبْنَاهَا

خَمْرَه.. وْعَم بِتْئِنّ بْكَاسِكْ

ـ2ـ

دِقِّيلُو.. وْقَوِّيلُو الدَّقَه

دَقَّاتِكْ وَحْدَا الْـ رَحْ تِبْقَى

نِحْنَا مْرَقْنَا.. وْهُوِّي بْيِمْرُقْ

أَيَّام.. وْشَمْسُو مَا بْتِشْرُقْ

وْمَهْمَا وَهْج عْيُونِكْ يِسْرُقْ

رَح يِدْبَلْ عَ حْدُود الْمَلْقَى

ـ3ـ

حُبِّكْ.. مُشْ مَعْرُوفِه أْصُولُو

غَيْمِه صَيْفِيِّه.. بِيقُولُوا

غَبْرَه.. وْمُشْ مَحْسُوب حْسَابَا

إِيدَيْن.. بْتِشْحَدْ أَحْبَابَا

وْبِتْعَذِّبْهُنْ عُمر بْطُولُو..

ـ4ـ

مَوْجُودِه.. وْمَنِّكْ مَوْجُودِه

تَلْجَاتِكْ دَابِتْ عَ جْرُودِي

لَوْ رِجْعِتْ أَيَّام الْمَاضِي

وْصَفَّى الْعَالَـمْ كِلُّو رَاضِي

وْقَلْبِي مْنِ عْذَابَاتِكْ فَاضِي

إِنْتِي مُشْ مَسْمُوح تْعُودِي..

**

كيف بدّي نام؟!

ـ1ـ

آخْ مِنَّكْ يَا أَلَمْ

نِشَّفتْ دَمْعَات الْقَلَمْ

وِتْرَكتني جَرْجِرْ خَيَالْ

مَصْلُوبْ عَ شْفَافُو سُؤالْ

وْمَكْتُوبْ عَ جْبِينُو النَّدَمْ

ـ2ـ

آخْ مِنَّكْ.. كِيفْ بَدِّي نَامْ

وْغَيْرِي مَعَا نَايِمْ

عَ زْهُورْهَا حَايِمْ

وْتَحتْ مِنُّو جِسِمْهَا مِنْضَامْ

وَحِدْهَا بْتِنْلاَمْ

وَحِدْهَا بْتِنْلاَمْ

وِانْ جِيتْ مَرَّه إِجْرَحَا

بْيُوسَعْ بِـ قَلْبِي مَطْرَحَا

وِالْكِلْمِةِ اللِّي بْتِقْهَرَا أَيَّامْ

بِلْغِيَا

أَوْ بِمْحِيَا

أَوْ خَلفْ ضَهْرِي بِشْلَحَا..

ـ3ـ

يَا رَيْتْ ما تْرَكْتُو يِجِي

وْيِلْعَبْ بِـ عَقْلاَ.. يْغَيِّرَا

يِغْرَقْ بِعُطر بْنَفْسَجِي

مْغَلْغَلْ بِطفْلِه زْغَيَّرَه

تَارِي الْمَحَبِّه زَعْبَرَه

وْمُطْلَقْ صَبِيِّه مْكَبَّرَه

بَدَّا حَدَا

أَيَّا حَدَا

يْكَحِّل عُيُون مْزَهَّرَه

يْفَرْفِحْ جِسِمْ وِسْع الْمَدَى

يْطَفِّي الشَّهْوِه.. يْجَمِّدَا

بْصَرْخَاتْ مَا إِلْهَا صَدَى..

**

متلك ما في

ـ1ـ

تا قِلّك متلِكْ ما في

بْأكّد هَيْدا مُش كافي

لكنْ رحْ بَوّس الأرض

الـ عَمْ تِمْشيها بشْفافي

ـ2ـ

وإسبحْ فيكي طولْ وعرضْ

وْشَعْرِك يِغْزِلِّي لْحافي

مَجْمِجْ صدرِك.. عَضِّكْ عَضّْ

وراسِكْ تاكي عَ كْتافي

ـ3ـ

غَمِّقْ.. إِنْزَلْ.. راحْ الْعَرْضْ

وْإنْتي مُشْ عَمْ بِتْخافي

**

عيونك

ـ1ـ

عْيُونَكْ شَمسْ.. يَا رَيْت بَعْرِفْ شُو فِيَا

مِنْ حُبّْ نَحْوِي وْمِنْ عَطفْ

تَا إِشكرَكْ عَ هَـ اللُّطْفْ

وِانْ كَانْ مَا فِيهَا حَنَان وْحُبّْ

بِرْكَع بْصَلِّي وْبِطْلُب مْنِ الرَّبّْ

يْوَدِّي صَوَاعِقْ عَ الْعُيُون وْيِفْقِيَا

ـ2ـ

صَرْلِي سِنِه بِتْطَلَّع بْعِينَيْكْ

وْما بْخَافْ إِنِّي إِحْتِرِقْ

وِبْخَبّرَكْ قَلْبِي غِرِقْ

بِبْحَيرتَكْ.. رَحْمِه انْشِلُو بْإِيدَيْكْ

ـ3ـ

لا تِظْلُم الْمَظْلُومْ أَكْتَرْ ما انْظَلَمْ

لَيْقُومْ أَللَّـه يِضِرْبَكْ

بِالآخْرَه.. وِيْعَذّبَكْ

وِتْصِيرْ تَعْرِفْ شُو الْمَحَبِّه.. وْشُو الأَلَـمْ؟

**

قاضي

ـ1ـ

شُو هَـ الْعَادِه.. شُو هَـ الْعَادِه؟

بَعِّدْ عَنِّي.. إِيدَكْ عَنِّي

مَا عَادْ فِيِّي إِعْطِي زْيَادِه

بِفْزَعْ إِنَّكْ تِقْرَفْ مِنِّي

ـ2ـ

بْحِبَّكْ قَدّْ الدِّنِي كِلاَّ

وْجَنِّةْ جِسْمِي مَا بْيِحْتَلاَّ

غَيْرَكْ.. لَكِنْ مَا بْتِفْهَمْنِي

مَطْلُوبَكْ تِهْجُمْ تَاكِلْنِي

كِلّ ما كِنْت شْوَيِّه فَاضِي

ـ3ـ

وَقِّفْ.. وَقِّفْ.. لا ما بْيِسْوَى

إِيدَكْ دَخْلَكْ عَمْ إِتْلَوَّى

بْجَمْرَاتَكْ حَاجِي تِحْرِقْنِي

بِهْرُبْ مِنَّكْ وِبْتِلْحَقْنِي

جَلاَّدْ.. وْبِتْقِلِّي: قَاضِي!

**

تقيل

ـ1ـ

يِقْطَعَكْ شُو تْقِيلْ

شْرِبْت مَيَّاتِي

وِسْرَقْت خَيْرَاتِي

وْمَا بْتِعِتْرِفْ بِجْمِيلْ

ـ2ـ

رْبِينَا سَوَا رْبِينَا

الْبَيْت حَدّ الْبَيْتْ

وِالْحَيْط.. مَا فِي حَيْطْ

وْكَرْجِتْ لَيالينَا

زْغَارْ.. ما بِيهِمّْ

الدَّمّ بَعْدُو دَمّْ

وْمِتِل شِي بَيّْ وْمِتِلْ شِي أُم

لْعِبْنَا تَا شْقِينَا

وْمَا بْتِعِتْرِفْ بِجْمِيلْ؟

تْقِيلْ إِنْت تْقِيلْ..

**

بدّي بوسك

ـ1ـ

بَدِّي بُوسِكْ تَحْت الرَّقْبِه

بَدِّي طَفِّي النَّار بْقَلْبِي

بَدِّي مِصّ خْدُودِكْ.. تِمِّكْ

مَا بِيهِمّ انْ زِعْلِتْ أُمِّكْ

عَلِّي.. عَلِّي شْوَيِّه كِمِّكْ

وْشُو ما قَالِتْ أُوعَا يْهِمِّكْ

إِنْتِي الشَّمْس الْـ ضَوِّتْ دَرْبِي

إِنْتِي الْحُلم بْلَيْل الْغُرْبِه

بِغْيَابِي.. رَح يِنْشَفْ دَمِّكْ

وْبِوْجُودِي.. بْبَوْسَاتِي بْطمِّكْ

ـ2ـ

نِيرَانِي عَمْ تِقْوَى أَكْتَرْ

كِل مَا كْبِرْت.. بْشِيبْ وْبِزْغَرْ

وِعْيُونِي بْتِفْضَحْ أَسْرَارِي

وِبْتِغْرَق بِاللَّوْن الأَحْمَرْ

يَا نَارِي.. طَفِّيلِي نَارِي

وْخَلِّينِي مِنْ رِيقِكْ إِسْكَرْ

إِزْرَع بْوَادِيكِي بْدَارِي

وْإِحصُد قَمح الصّدر الأَصْفَرْ

وْآخُدْ مِنْ حَلْمَاتِكْ تَارِي

عَضُّنْ.. إِقْرِصْهُنْ.. إِفْرِكْهُنْ

إِجْلِيهُنْ.. وِيْطقّ الْمَرْمَرْ

ـ3ـ

مُشْ رَحْ قِلِّكْ طَار صْوَابِي

مُشْ رَحْ إِحْكِيلِكْ عَ عْذَابِي

مُشْ رَحْ خَلِّيكِي تِشْتِلْقِي

عَ الْجُوع الْـ هَدَّلِّي رْكَابِي

مُشْ رَحْ إِحْكِي بْيِنْشَفْ حَلْقِي

وِبْتِعْرَقْ كِلْمَات كْتَابِي

مُشْ رَحْ إِحْكِي بْيِطْلَعْ خلْقِي

وِبْتِدبلْ ضِحْكِه كِذَّابِه

خَلِّينِي.. لازِمْ تِنْطِلْقِي

وْعَ دْرُوبِي يِتْعَرَّفْ جِسْمِكْ

وِتْرِدِّينِي لْعِزّ شْبَابِي..

**

دنية حبق

تِيريزْ.. يَا دِنْيِةْ حَبَقْ

فِيكِي السِّحْر كِلُّو انْدَلَقْ

إِنْتِي الدِّنِي وْشَمْس الدِّنِي

يَا وَرْدِة الْعُمْر الْهَنِي

الْخَالِقْ.. عَ شَكْلِكْ مَا خَلَقْ.

**

غدّار

ـ1ـ

غَدَّارْ؟!..

مِينْ قَالْ عَنَّكْ هَيْكْ

وْإِنْت الْوَفَا بْعِينَيْكْ

وْإِنْت الْحَلاَ كِلُّو

وِعْلَيْك دَلُّوا عْلَيْكْ

نْجُومْ السَّمَا يَا جَارْ

وْبَعْدُنْ عَمِ يْدِلُّوا؟

ـ2ـ

غَدَّارْ!.. مُشْ مَعْقُولْ

عَنْ شَبّ مِتْلَكْ قُولْ

لَكِنْ يَا نُورْ الْعَيْنْ

عُزَّالْنَا مِنْ وَيْنْ

جَابُوا الْحَكِي الْمِسْوَدّْ

تَا فَرَّقُوا مَا بَيْنْ

قَلْبَيْنْ حَبُّوا بَعْضْ

وْمَا سَاعِتُنْ هَـ الأَرْضْ؟

ـ3ـ

غَدَّارْ!.. يَا دِلِّي

ما بْقُولْ هَـ الْكِلْمِه

وْلا بْفِيقْ مِنْ حُلْمِي

وْإِنْت الْحُلمْ يَللِّي

عَمْ بِحْلَمُو.. وْصَرْلِي

سِنْتَيْن نَاطِرْتُو

تْغَيَّرْ بِـ آخِرْتُو

وْضَاعْ مِنْ دَرْبِي

وْغَابْ عَنْ قَلْبِي

وْكِلّ اللِّي كَاتِبْتُو

عَنْ حُبَّكْ وْحُبِّي

رْمِيتُو بْقَلْب النَّارْ

وْصَارْ.. يِمْكِنْ صَارْ

دُخَّانْ أَوْ فَحْمِه!

**

شتي نازل

ـ1ـ

رِخْيِتْ شَعْرَا عَ كْتَافَا

مِتْل الشِّتِي النَّازِلْ

سَاعَه يْبَوِّسْلاَ شْفَافَا

وْسَاعَه بَدُّو يْقَاتِلْ!

ـ2ـ

عَمْ يِهْجُمْ عْلَيْهَا

تَا يْغَمِّضْ عِينَيْهَا

وْهِيِّي تْرِدُّو بْدَيْهَا

مَا بَدَّا مَشَاكِلْ.

**

زيح

ـ1ـ

إِيدَيِّي انْمَدِّتْ لِلرِّيحْ

لا تْخَبِّي دَيْكِي

رَحْ إِرْسُمْ إِيدَيِّي زِيحْ

يْوَصِّلْنِي عْلَيْكِي

ـ2ـ

عَ الصّدْر الْـ بَدُّو تِلْوِيحْ

عَ التِّمْ الْـ كِلُّو تْسَابِيحْ

عَ رْخَام إِجْرَيْكي..

**

جيرك

إسم رقصة عرفت بستينيات القرن الماضي

ـ1ـ

جِيرْكْ.. بَدِّكْ تِرِقْصِي؟!

تِكْرَم عْيُونِكْ..

لِلْجِيرْكْ فَاتِحْ مَدِرْسِه

نَاقْصَه بْدُونِكْ

وْرَقْصَاتْ فِيهَا مْكَدّسِه

تَأْلِيفْ مَجْنُونِكْ

وْرَحْ نِبْتِدِي يَا آنسِه

بَيّنِي فْنُونِكْ!

ـ2ـ

آهْ يَا مَشَاللّـه مْعَلّمِه

بْفَنّ الرَّقِصْ

وْجَايِي تَا تِتْعَلّمِي

عْطَيْتِي دَرِسْ!

رَيْتِكْ يَا حِلْوِه تِسْلَمِي

مِنْ كِلّ نَحِسْ

وْيَا هِنْد.. حَقِّكْ عَرّمِي

رْبِحْتِي "مَرِسْ"!

**

جسمي شعل

ـ1ـ

حْمِلْنِي.. عَ زِنْدَكْ حِطّنِي

وْعَ صَدرْ عَامِرْ شِدّنِي

وْخِدْنِي عَ دِنْيِي مْبَحْبَحَه

بِالْحُبّ.. أُوعَا تْرِدّنِي

ـ2ـ

خِدْنِي عَ أُوضَه مْعَتّمِه

عَ فْرَاشْهَا تَا نِرْتِمِي

جِسْمِي شِعِلْ.. دَمِّي حِمِي

عَجِّلْ بِمَيَّكْ رِشّنِي

ـ3ـ

خَدِّي لِهِبْ.. عُنْقِي احْتَرَقْ

قَلْبِي سَهمْ شَهْوِه اخْتَرَقْ

وعَ دَرْب جِسْمِي مَا مَرَقْ

غَيْرَكْ إِنِتْ.. لا تْصُدّنِي

**

حلمتك

ـ1ـ

هَـ الْحَلْمِة اللِّي مْشَوّبِه

يَا مَا قْلُوب مْدَوّبِه

وْمَكْتُوبْ حَدَّا عَ النَّهدْ

لا تِلمْسُونِي.. مْكَهِرْبِه!

ـ2ـ

حَلْمِتِكْ.. يَا زْغَيَّرَه

مِتْعَجِرْفِه.. وْمِتْكَبَّرَه

مِينْ خَبَّرَا.. هِيِّي الدِّنِي

يَا زْغِيرْتِي.. وِالآخِرَه؟!

ـ3ـ

ما أَطْيَبَا هَـ الْفُسْتَقَه

وْهَـ الْفُسْتَقَه يَا مْرَاهِقَه

عَمْ تِنْعَبَدْ بِهَـالدِّنِي

مِتْل الإِلَـه الْـ خَالِقَا!

**

حفلة رقص

ـ1ـ

جْنُون وْطَرَبْ وِزْقِيفْ وِغْنَانِي

وْصَالِةْ رَقصْ بِالنَّاسْ مِلْيَانِه

وْضَوّ خَافِتْ.. مِسْتِحِي وْمَحْمَرّْ

وْكِلّ شَبّْ حَدُّو بِنْتْ سِكْرَانِه!

ـ2ـ

وْكَاسَاتْ وِيسْكِي نَازْلِه دْمُوعَا

وْصَوْت مُطْرِبْ مَصْدَرُو آلِـه

وْعَ الْبَارْ قنِّينَاتْ مَجْرُوعَه

صْنَادِيقْ بِيرَه مُعْظَمَا خَالِي

ـ3ـ

وْخِيطَانْ زِينِه نِصّ مَقْطُوعَه

زِينِه قَدِيمِه خَيطْهَا بَالِي

وْعَ الأَرْضْ نِفَّيْخَاتْ مَفْقُوعَه

بْإِيدَيْنْ مَا بْتِرْحَمْ وَلا تْبَالِي

ـ4ـ

وْدِيسْكَاتْ بِالصّنْدُوقْ مَجْمُوعَه

عَ قَدّ مَا فِي نَاسْ بِالصَّالِه

وْضِحْكاتْ سِكْر وْطَيْش مَسْمُوعَه

وِالنَّاسْ مِتْل شْبَاحْ بِلْيَالِي

ـ5ـ

وْبَوْسَاتْ تِـمّ وْخَدّ مَطْبُوعَه

وْنَهْدَاتْ شَمّ وْضَمّ عَ الْعَالِي

وْبِيكْ ـ أبّ عَمْ بِيقَلِّد الْعُشَّاقْ

طُول الْوَقتْ حَاضِنْ إِسِطْوَانِه

**

بصران

ـ1ـ

بُصْرَانْ.. شُو بُصْرَان بِمْنَامِي؟

طَيْرَيْنْ بِيض زْغَارْ

وْمَوْقَدِه لِلنَّارْ

عَمْ تِنِشْوِي عَ جَمِرْهَا حْمَامِه!

ـ2ـ

بُصْرَانْ إِنِّي رَاكِب حْصَانِكْ

بْلَيْل مَا فِي نْجُومْ

وِمْسَيْرَحُو بِكْرومْ

فِيهَا الْعِنَبْ عَ كْتَافْ رُمَّانِكْ!

ـ3ـ

بُصْرَانْ حَالِي وِالشِّتِي عَايِمْ

عَمْ إِغْزُل مْلاحِفْ

عَمْ حَيِّك شْرَاشِفْ

وْمِتِّكِي عَ جَنْبِكِ.. وْنَايِمْ

**

يا دنيي

قلْتْ: يَا دِنْيِي ارْحَمِي شَبّ احْتَرَفْ

عَادِه وَخِيمِه مِجِرْمِه.. سَلْب الشَّرَفْ

شَرَّدْ بَنَات كْتَارْ عَ دْرُوب الأَمَلْ

بَعْد اللَّيَالِي الْحَالْمِه.. لْيَالِي التَّرَفْ!

**

خطي

ـ1ـ

ما بْتِذِكْرِي بِالْحَيّْ

بُوَّسْتِكْ وْفِزْعَانْ

لا تْخَيّبِي ظَنِّي

وْمَا تِنْطرِينِي شْوَيّْ

ـ2ـ

تا حَوِّش الرُّمَّانْ

الْـ دَاخِلْ الْجَنِّه

شُو قِصّتِكْ يَا مَيّْ

بِتْوَلّعِي النِّيرَانْ

ـ3ـ

وِبْتِهِرْبِي مِنِّي

عَمْ تِقِتْلِينِي.. خْطَيّْ

لا تِقِتْلِي إِنْسَانْ

لا تِبِعْدِي عَنِّي!

**

انتبهي..

ـ1ـ

مْعَلّمِه الْبَوْسَاتْ عَ خْدُودِكْ..

عَ شْفَافِك الْحَمْرَا.. وْعَ زْنُودِكْ

وْعَ مْطَارِح الْـ فِيهَا إِثَارَه كْتِيرْ

عَ أَتُون النَّارْ.. عَ نْهُودِكْ!

ـ2ـ

وِمْبَيّنِه آثَارْ شَبّ زْغَيرْ

انْتِبْهِي مَا أمِّكْ تِشتْلِقْ لَيْهَا

وْيَا دِلّ دِلِّكْ كِيفْ رَحْ بِيصِيرْ

بِحْوَالِكْ.. وْشَافِتْ بِعِينَيْهَا

بْقَايَا حَبِيب مْقَطَّف وْرُودِكْ!

ـ3ـ

انْتِبْهِي مَا بَيِّكْ تِشْرُد عْيُونُو

وِيْشُوفِك وْتِتْلَبَّك فْكَارُو

وْيَا خْطَيّتِكْ لَوْ صَدْقِت ظْنُونُو

رَحْ يِرِجْمِكْ بِـ أَكْبَر حْجَارُو

وْيِصْرُخْ بِوِجِّكْ: عَاهْرَه مُوتِي

أَحْسَنْ ما يِبْقَى الْعَارْ بِوْجُودِكْ!

**

هند

هِنْد.. لَوْلا كْلامِكْ هَـ الْحِلُو

لَكِنْت عِفْتِكْ مِنْ زَمَان بعِيدْ

فِي بَنَات كْتَارْ عَمَّا يِسْأَلُوا

عَنْ قَلْب فَارِغْ للإيجَارْ جْدِيدْ!

**

سكّير

ـ1ـ

سِكِّير.. وْمَا بْدُوق الْخَمْر

سِكِّير لآخِرْ دَرْجِه

بِسْكَرْ مِنْ نَهْدَيْكِ السّمْرْ

وْمِنْ أَحْلَى صنْدُوقْ فُرْجِه!

ـ2ـ

بِشْرَبْ مِنْ خَدَّيْكِ الْحُمْرْ

كَاسَيْن تْلاتِه وْأَكْتَرْ

تَخْت وْعَتْم وْمَوْقِدْ جَمْرْ

وْمَعْ أَطْيَبْ مَازَه بِسْكَرْ

ـ3ـ

وْبِعْصِرْلِكْ نَهْدَيْكِ عَصْرْ

وْتِنْهِيدِكْ مَلاَّ الأُوضَه

وْبِسْهَرْ حَتَّى طْلُوع الْفَجْرْ

وْبِسْكَرْ عَ آخِرْ مُوضَه!

**

التخت تكسّر

هذه القصيدة نقلتها عام 1967 بتصرّف من الفصحى الى العامية بعد أن قرأتها في إحدى الصحف اللبنانية دون ذكر اسم صاحبها. فإليه أينما كان أوجه تحيّتي.

ـ1ـ

صَدْرِكْ.. قَاسِي وِمْحَجَّرْ

جِسْمِكْ.. أَحْلَى مْنِ الْمَرْمَرْ

بِتْذَكَّرْ لَيْلِه بْتِشْرِينْ

شْرِبْنَا مْنِ اللّذِه أَكْتَرْ

تَلْج.. وْكِنَّا بِرْدَانِينْ

بْيِنْقِصْنَا الْجَمْر الأَحْمَرْ

ـ2ـ

تْنَاجَيْنَا.. وْكِتَّرْنَا نْبِيدْ

وْمِنْ أَوّلْ كاس مْنِسْكَرْ

عِبَّيْنَا الأُوضَه تِنْهِيدْ

مِسْكِين التَّخْت تْكَسَّرْ

وْكِل مَا شَهْوِتْنَا بِتْزِيدْ

بِتْصَفِّي اللّعْبِه أَخْطَرْ!

**

فرفورتي

ـ1ـ

فَرْفُورْتِي الْجَمِيلِه

يَا زْغَيَّرَه.. وْطَوِيلِه

وْيَا بِنْت سِتَّعْشَرْ سِنِه

أَوّلْ مَا قَلْبِي مْجَنِّنِه

وْمَا فِي بْيَدِّي حِيلِه!

ـ2ـ

فَرْفُورْتِي الْحَبِيبِه

أَعْمَالِك الْغَرِيبِه

أَعْمَالْ سِنّ الْوَلْدَنِه

وْأَمْرَارْ عَمْ تِتْشَيْطَنِي

بِظْرُوفِي هَـ الْعَصِيبِه!

ـ3ـ

فَرْفُورْتِي الصَّبِيِّه..

يَا مْرَاهْقَه.. وْغَبِيِّه

بِالْغَدْر عِمَّرْتِي دِنِي

وْبَعْدِكْ مِتِلْ شِي سَوْسَنِه

بْتِدَلَّعِي بْحِنِّيِّه!

ـ4ـ

يَا قَاسْيِه وْحَنُونِه

يَا مْطَيَّرَه جُنُونِي

بِالطَّيْش لا تِتْزَيَّنِي

وْبِالْحُبّ لا تِتْفَنَّنِي

الْحُبّ جُوَّا عْيُونِي!

ـ5ـ

فَرْفُورْتِي الْخَجُولِه

شُو صَايبِكْ؟.. قُولِي

تَا بْزِينْتِكْ عَمْ تِعْتِنِي

وْمِنْ دُونْ زِينِه مْجَنِّنِه

فَصِيلْة الرُّجُولِه!

**

صدرك

ـ1ـ

صَدْرِكْ جَبَلْ عَالِي

وْأَنَا التَّلْجَاتْ

عَـمْ دُوبْ بِلْيَالِي

هَنَا وْآهَاتْ

حِنِّي عَلَى حَالِي

ـ2ـ

صَدْرِكْ صَخرْ مَرْمَرْ

وْفِي تَلْتَيْن بْرُوحْ

تْرَابُنْ جِلدْ أَسْمَرْ

عْلَيْهُنْ تِجِي وِتْرُوحْ

نَسْمِةْ هَوَا شْمَالِي

ـ3ـ

صَدْرِكْ هَـ الِمْكَبَّرْ

وْمِرْتِفِعْ رَاسُو

عْيُونِي عَمْ تِسْكَرْ

بِـ رَعْشِة حْوَاسُو

اللِّي خَمرْهَا غَالِي

ـ4ـ

ما أَلْطَفُو صَدْرِكْ

هَـ الدَّافِي بِكْوَانِينْ

وْلَوِّينِي عَ جَمْرِكْ

يَا أَجْمَل الْحِلْوِينْ

مَا عِدْتْ رَحْ بَالِي.

**

نهودك

ـ1ـ

شُو هَـ النُّهُود الْعَالْيِه

عْيُون الْخَلِيقَه مَالْيِه

وْمَهْمَا شِفِتْ عِنْد النِّسَا

بْتِبْقَى نْهُودِكْ غَالْيِه

تِحْيَا النُّهُود الْعَالْيِه!

ـ2ـ

صْدُور الصَّبَايا مْكَبَّسَا

وِمْرَوَّضَا.. وِمْدَرَّسَا

نْهُود النِّسَا اللِّي مْبَوَّسَا

صَارِتْ يَا رُوحِي بَالْيِه

وْبَعْدَا نْهُودِكْ عَالْيِه!

ـ3ـ

نْهُودِكْ يَا أَحْلَى مْنِ الدِّنِي

بِرْكَعْلِك قْبَالُنْ سِنِه

مِتْكَبَّر.. وْصَايِرْ دَنِي

كِرْمَالْ خَمْر الدَّالْيِه

وْعَيْن النُّهُود الْعَالْيِه!

**

فن الغمز

ـ1ـ

مَبْرُوكْ هَـ الْفُسْتَانْ يَا جَارَه

الْمَقْصُوصْ شِبْر وْنُصّْ

وِالْـ بَيَّن عْوَامِيدْ مُحْتَارَه

عْوَامِيدْ حُلْوِه بُرْصْ

ـ2ـ

شُو قِصِّة الشُّبَّانْ بِالْحَارَه

الْمسْكِينْ صَايِرْ لِصّْ؟!

وْخِتْيَارْ عَمْ بِتْشَلوطُو حْرَارَه

وْعَ مَيْلْ قَلْبُو يْعُصّْ

ـ3ـ

وِيْقُولْ: هَـ الْفُسْتَانْ يَا خْسَارَه

لَوْ كَانْ بَعْد انْقَصّْ!

**

ريق ونهد

ـ1ـ

لِلْحَقِيقَه.. لِلْحَقِيقَه

سْكِرْتْ لَمَّا شْرِبِتْ رِيقَا

تِهِتْ وِنْسِيت الْخَلِيقَه!

ـ2ـ

وْصِرْت إِتْمَايَلْ يَمِينْ

وْمُجّ مَجِّه مِنِ جْبِينْ

الشَّمْسْ.. مِنْ أَحْلَى رْفِيقَه

ـ3ـ

وْتَخْت مَفْرُوش بْحَرِيرْ

بْزَنْبَق.. بْوَرْد.. بْعَبِيرْ

وْشَبّ عَمْ يِنْشُلْ غَرِيقَه

ـ4ـ

وْكِيفْ مَا تْحِرَّكِتْ كِيفْ

اللَّيْلْ وَاقِفْلِي عَرِيفْ

بْيِحْسُب عْلَيِّي الدّقِيقَه

ـ5ـ

بِنْطُرْ السَّاعَه الْعَزِيزِه

بِشْبَع.. بْطَفِّي الْغَرِيزِه

بْخَمْرِة النَّهْد الْعَتِيقَه

ـ6ـ

بْلَيْلِة الْحُبّ الطَّوِيلِه

بْفَيِّة الْحَلْمِه الْجَمِيلِه

بِرْتِفِعْ فَوْق الْخَلِيقَه!

**

يا جارة

ـ1ـ

مِنْ إِيدِكْ زِتِّي السِّيكَارَه

السِّيكَارَه مْضُرَّه يَا جَارَه

وْأَمْرَاض الْـ فِيهَا غِدَّارَه

ـ2ـ

مَشْحُونِه بْسِلّ وْسَرَطَانْ

وْيَا جَارَه عْلَيْكِي فِزْعَانْ

بْرَبِّكْ لا تْدُوقِي الدّخَّانْ

ـ3ـ

الدَّخْنِه اللِّي بْصَدْرِكْ بِتْصِيرْ

بْتِهْرِي الصّدْر كْتِير كْتِيرْ

وْبِتْقَصِّرْ عُمْرِك بَكِّيرْ

ـ4ـ

بْخَاف عْلَيْكِي مْنِ التّدْخِينْ

بْخَاف يْصِيرُوا دبْلانِينْ

خْدُود اللِّي نَاطِرْهَا سْنِينْ!

**

يوبيل ذهبي

ألقيتها بدعوة من "لقاء الأربعاء" بتاريخ 25 تموز 2018، في حفل يوبيل "مراهقة" الذهبي، أول كتاب صدر لي عام 1968

ـ1ـ

يا "مراهقه" قلبك عم يقللي:

ليش الدّهب سمّوه عثملّي؟

وكل المناجم فتّحوها رفاق

ما يوم عرفوا البخل والقلّه

إلماز حبُّن صار بالأسواق

وتا إشتري الإلماز يا دلّي

لكن رفاقي كلّهُن أخلاق

قالوا: اللي بدّك خود.. ما تخلّي

وع قد ما قلبي إلُن مشتاق

تركت النجوم عليهن تدلّي

"شوكت" علم بالجاليه خفّاق

أشرف سياسي.. برفقتو ضلّي

و شوقي بـ قلبي غاص للأعماق

الغربه الطويله.. قاعد يحلّي

وكلمات قاسم بالمحبه عتاق

بمعبد إيمانو بتركعي تصلي

و"رامز" رمز للحب والأذواق

خلّى الجواهر.. تغمر السلّه

وخيي "علي حمّود" شو سبّاق

بالتضحيّه.. تا راسنا يعلّي

و"روميو" بشعرو مبدع وخلاّق

عندو نبع للشعر تا نملّي

ولطيف إبن اللطف والأشواق

متل العلم واقف على التلّه

يا "مراهقه" لو يوم صدرِك ضاق

طلّة "بهيه" بتطرد العلّه

خلت أدبنا يسوسح الآفاق

الفله ع طول بتقطف الفلّه

يا "مراهقه".. بهاليوم مجدك فاق

وعم يفرحوا الأحباب بالغلّه

رشّي الفرح.. صار الإسم عملاق

وغلّي الدهب يا "مراهقه" غلّي

ـ2ـ

تعبوا وإجوا من كافة الأقطار

أحباب حبّوا يوسّعوا مجالي

طلّي شوفيهن ضحكتن قنطار

هودي رفاقي، فرحتي ومالي

هودي بشر أكبر من الدولار

منروح.. وبيبقى الإسم عالي

يا "مراهقه" وقت اللي كنّا زغار

تنامي ع صدري ولفّك بشالي

لا تقوليلي صرت ختيار

بشِعري أنا وقّفتك قبالي

رسمتك قمر.. أجمل من الأقمار

تا توشوشيني: إنتْ رجّالي

وما رضيت مرّه إكشف الأسرار

وشو شفت مع هبّة هوا شمالي

وكيف كنّا بآخر المشوار

يتوحَّد خيالِك مع خيالي

بتتذكري بهاك المسا شو صار

عيب إحكي.. السَّكت أحلالي

هيدا أنا اللي قطّع الأزرار

ببلوزتك.. تا صدرك يلالي

ولِكْ بعدني عايش على التذكار

عم غار من حالي على حالي

يا "مراهقه" الشاعر إذا بيغار

بيطفي النجوم بعتمة ليالي

خمسين سنه عم إحترق بالنار

ولنّو شي مرّه ريّحي بالي

خسرت عمري.. غرقت بالأشعار

وما رضيت إخسر حبّك الغالي

**

بعد 50 سنه

أوّل قصيده

بكتبا بإيدي

بدمع اليتيم

بألف تنهيده

عمري مرق

فوق الورق

صرت القديم

وبعدِك جديده

**

عمر

ـ1ـ

بَيْني وْبَيْنَكْ، يا كْتابي، عُمرْ

وْغُرْبِة سْنين وْقَهْرْ

وِبْناتْ مِتل الزَّهْر

دِبْلِتْ عَلَى بْوابِي

تا تْفَرْفِحْ شْبابي

ـ2ـ

بَيْني وْبَيْنَكْ كِذْب مَا لُو حْدُود

بيطيرْ يَوْمِيِّه

مِنْ تِمّ مُشْ مَوْجُودْ

إِلاَّ بْخَبْرِيِّه

بْتُوقَعْ عَلَى الْمَاشِي

وِبْتِحْمِلا فْرَاشِه

عَ شْفَافْ زَهْرِيِّه

وْمِتْل الْحُلمْ بِتْضِيعْ بِغْبَاشِه!

ـ3ـ

بَيْنِي وْبَيْنَكْ سَالْفَيْن زْغَارْ

قَعْدِت عْلَيْهُنْ غَبْرِةْ الأيَّامْ

شَابُوا.. وْأَنَا مِنْ شَيْبِتُنْ مِنْضَامْ

وْمُحْتَارْ كِيف بْدَارِيُنْ مُحْتَارْ

تَا ضَلّْ شَبّْ زْغِيرْ

بِعْيُونْ فَرْفُورَه

بْتِكْرَهْ التَّنُّورَه

الْـ مُشْ لاحِقَا تِقْصِيرْ!

ـ4ـ

خَمْسينْ سِنِه يَا مْرَاهْقَه

مَرْقِتْ كَأَنَّا حُلْمْ

شَتِّتْ حُرُوب وْسِلْمْ

وِقْلُوبْ سَوْدَا مْنَافْقَه

وِقْلُوبْ مِتْل التَّلْجْ

خِلْقِتْ زْهُور بْمَرْجْ

وِقْمَارْ تِرْهُجْ رَهَجْ

وِبْحُورْ زَرْقَا رَايْقَه!

ـ5ـ

لا تِضْحَك عْلَيِّي

يَا بِكِرْ أَوْلادِي

يا حْرُوفْ بَعْدَا مْعَلّقَه فِيِّي

وْمِنْ نُورْ عِينَيِّي

عَمْ تَاكُل زْيَادِه

الْحُكَّامْ.. ظَلْمِتْنِي

وْبِالْهَجْر رِمْيِتْنِي

وْمِنْ أَرْض خَضْرَا بِعْبِدَا عْبَادِه

جَنِّت وْطَرْدِتْنِي

تَ الْجَوّْ يِصْفَالاَ

وْيِتْوَسَّع مْجَالاَ

وْكِل مَا بْيِحْلالاَ

تِتْزَعْرَن.. وْتِتْوَسَّخ بْلادِي!

**

كذبه العمر

كِذْبِه الْعُمرْ.. مِينْ قَالْ مَا كْذِبْنَا

وْعُبّ الْفَرَحْ خَبَّى مَصَايِبْنَا؟!

نِحْنَا إِذَا مْنِتْعَبْ عَ دَرْب الْعُمْرْ

مُشْ قَدّ مَا الْمَحْبُوبْ يِتْعِبْنَا.

**

ختيار

ـ1ـ

خِتْيَارْ.. يَا شَرْبِلْ صِرِتْ خِتْيَارْ

وْبَعْدَكْ بلا شَمْس وْبلا أَقْمَارْ

قِصْرَانْ؟.. أَمْ إِنَّكْ يَا شَاعِرْنَا

عِشْت الْعُمرْ كِلُّو بْإِسْتِهْتَارْ؟!

ـ2ـ

مْنَعْرِفْ بِـ شِعْرَكْ رَاسِم تْكَاوِينْ

مْنَعْرِفْ بِـ شِعْرَكْ عَامِل تْلاَحِينْ

مْنَعْرِفْ بِـ شِعْرَكْ جَنِّت الْحِلْوِينْ

لَكِنْ، يَا حَسْرَه، مِسْتِحِي وْمَخْجُولْ

تْنَقِّي شِي حِلْوِه.. تْخَزِّق الْمَرْيُولْ

وِتْلَبِّسَا فِسْتَانْ وَرْد وْغَارْ!

ـ3ـ

وْسَاعِتَا.. بْتْطَلِّقْ الدَّفْتَرْ

وْبِتْصِيرْ بَدَّكْ تِشْرَب وْتِسْكَرْ

وْخَلْف مِنَّكْ بَابَك مْسَكَّرْ

مِنْ رِيقْ أَنْقَى مِنْ نَبعْ كَوْثَرْ

مْنِ نْهُودْ أَغْلَى مْنِ الدِّنِي كِلاَّ

بْتِحْرُقْ صَابِيعْ اللِّي بْيُوصَلاَّ

وْكِلْ مَا انْحَرَقْت بْتِرْكَعْ لأَللَّـه

وْبِتْقُولْ بَدِّي إِنْحِرِقْ أَكْتَرْ

وْمِتْل الْفَرَاشِه إِنْتِحِرْ بِالنَّارْ

خِتْيَارْ يَا شَرْبِلْ صِرِتْ خِتْيَارْ!

**

يا مراهقة

ـ1ـ

وْلِكْ.. قَصّرِي الْفُسْتَانْ

يَا مْرَاهْقَه أَكْتَرْ

تَا تْكَزْكِز الأَسْنَانْ

وِالْقَلْبْ يِتْحَسَّرْ

وْلا تْغِرِّكْ الشُّبَّانْ

وِخْصُوصاً الأَسْمَرْ

الْـ مِنْ حُسْنِك الْفَتَّانْ

عِينَيْهْ عَمْ تِسْكَرْ!

ـ2ـ

يَا مْدَهّبِه الشَّعْرَاتْ

وْلابْسِه الأَحْمَرْ

لا تْغَنْدرِي الْمَشْيَاتْ

بْتِسِحْرِي الأَشْقَرْ

وْيَا حُلْوِة الْحُلْوَاتْ

لَيْلِيِّه عَمْ إِسْهَرْ

تَا إِكْتُب حْكَايَاتْ

حُبِّك بْدَفْتَرْ!

**

غباشه

ـ1ـ

قلبي إذا بيدق

بيدق كرمالِكْ

والصدر لو ينشق

رح يظهر خيالِكْ

بدونك أنا غباشه

ماشي.. ومش ماشي

لعندك طويله الدرب

والنار عم بتهبّ

تا تحرق فراشه

ـ2ـ

يا ريت فيي بوح

بحبك.. يا احلى شمس

ويا ريت فيي سوح

بعبِّك.. شي ليله بس

تا إزرع البوسات

ع تلال مخفيّه

وتا آخد قياسات

جسمك.. بـ عينيي

ـ3ـ

لا تظلمي المظلوم

بيكفيني منك ظلم

عارف أنا رح قوم

بس ينتهي هالفيلم

وعارف إذا رح طل

رح تندهي تا غلّ

بـ حضنك الدافي

والحضن.. بير كبير

وكل ما غرقت بالبير

صوتك بيقللي: ضل

عنتر ع راس التل

وسيفك دهب.. منسلّ

وحصانك شفافي

**

سعدان

ـ1ـ

ليش صرتي بتشبهي السعدان

وكنتي قمر ضوّى بسما لبنان

وكان الجبل يحلم بنفنافك

وكان الزهر يفرشلك البستان

ـ2ـ

ليش حتّى تنفخي شفافك

اللي كتبت فوقُن أجمل القصدان

لا تزعلي لولا الطفل خافك

خدودك عجيبه.. مش خرج نسوان

ـ3ـ

ونهود زادت تقل ع كتافك

هالـ كنت فيهن دايب وسكران

وأكبر من الفوتبول أردافك

ما عاد يلبقلك ولا فستان

ـ4ـ

الدكتور خربط كل أوصافك

بعدو غشيم كتير.. مش فنان

تغزلت فيكي.. بحسن ألطافك

وهلق يا حسره ع الغزل ندمان

ـ5ـ

لولا بقيتي متل ما شافك

قلبي.. وجمالك راسمو الديّان

كنت بصابيعي بغزل لحافك

وبنيمك ع الصدر ليل نهار

وبوصف جمالك تا النجوم تغار

وتمي ع تمّك.. والجسم دفيان

**

سراقه

ـ1ـ

إلّفتْ شعر كتير

وسرقتي منّي الشعر

وصار الفرح تعتير

ويبّس أنيني الزهر

ـ2ـ

فكّرت حبّي كبير

تاري المحبه غدر

متل الحلم بتطير

وما بيبقى غير القهر

**

فرحان

ـ1ـ

ختيار بعمر التسعين

عم بيبصّر بالفنجان

أعزب.. ما تجوز تخمين

مأضرب عن جنس النسوان

ـ2ـ

وبعدو بيحلم بالحلوين

بالخدود وبالسيقان

قللي: تطلّع ع اليمين

دربي مسهّل ع الأوطان

ـ3ـ

وضحكة حلوه بالعشرين

شفّاف كتير الفستان

أبيض بلون الياسْمين

وشفافا زهر الرمان

ـ4ـ

بعدي ناطر.. ألله يعين

يرزقني بنات وصبيان

يعبّيلي البيت تلاحين

ومليون صوره ع الحيطان

ـ5ـ

ختيار.. مركعتو سنين

وبالفرحه عمرو مليان

وأنا اللي بعمر الستين

وجي من حالو فزعان

ـ6ـ

قلت لحالي: يا مسكين

هالختيار البالتسعين

ماشي للموت وفرحان

**

سميحة

ـ1ـ

Yes, yes I love you

يَا حِلْوِه.. يَا سَمِيحَه

كل ما بْقِلِّكْ: How are you

قُولِيلِي: كْتِير مْنِيحَه

ـ2ـ

خِدْتِكْ عَ حفْلِه وِالنَّاسْ

اجْتَمْعُوا فِيها جْناس جْناسْ

فِيها خالِدْ.. فِيها الْياسْ

وْفِيها الْـ سِكْرُوا عَ الرِّيحَه

ـ3ـ

خِدّتِكْ عَ سِيدْنِي مشْوارْ

وْبِرَّمْتِكْ دَايِرْ مِنْدارْ

وْرِجّعْتِكْ بِـ تانِي نْهارْ

وْطِلْعِتْ صَفْقَه رَبِّيحَه

ـ4ـ

وْلِمِّنْ شِفْتِينِي بْكامْسِي

ناطِرْ عَ مَوْقَفْ تَاكْسِي

قِلْتِيلِي: بْلَيْلِةْ عرْسِي

لازِمْ تِدْبَح دْبِيحَه

ـ5ـ

وْقِلْتِيلي: غَنِّي عَ طُولْ

لِعْيُونِي.. لْشَعْرِي الْمَجْدُولْ

شَعْرِي نِشْكُر أَللَّـه بْقُولْ

ما بْيِلْزَمْلُو تِسْرِيحَه

**

شهيدة

ـ1ـ

شَهِيدِه.. يَا شَهِيدِه

حِطِّي إِيدِكْ بِـ إِيدِي

عَمْ قُولْ: نْهارِكْ سَعِيدْ

لَنُّو رِدِّي السَّعِيدِه

ـ2ـ

قِلْتِيلِي: حاكِي بَيِّي

وْأُمِّي الْـ بِتْمُون عْلَيِّي

وْوَقْت اللِّي قِبْلُوا فِيِّي

صِرْتِي إِنْتِي الْعَنِيدِه

ـ3ـ

دُوَّخْتِينِي.. وِحْيَاتِكْ

مُشْ عَمْ إِفْهَمْ مَشْيَاتِكْ

كل ما بْنَفِّذْ حَكْياتِكْ

بِتْحِطِّي عِقْدِه جْدِيدِه

ـ4ـ

خِلِقْنا لْبَعْض.. وْكِرْمالِكْ

رَحْ جَرِّبْ إِغْزُل شَالِكْ

مْنِ الْغَيْم، وْرَيِّحْ بَالِكْ

لَوْ مِنْ حُبِّكْ أَكِيدِه

ـ5ـ

لَوْلا بْتِرْضِي عْلَيِّي بْكُونْ

مَمْنُونِكْ أَنا مَمْنُونْ

وْخايِف مِنْ شِي زَوْج عْيُونْ

مِعْتادِه عَ الْحَسِيدِه

**

زواج

ـ1ـ

قالُولي: تْجَوَّزْ... يا رَيْت

ما عْمِلْت اللِّي بْفِكْرُنْ كانْ

وْأَعْزَبْ مِتْغَنَّجْ ضِلَّيْتْ

تا قَطِّعْ عُمْري فرْحانْ

ـ2ـ

بِتْفَكِّرْ حَالَكْ حِبَّيْتْ

وْحُبَّكْ لِلْفَرْحَه عنْوانْ

أَحْلامْ بْقَلْبَكْ خبَّيْت

وْعَ قَلْبَكْ حايِمْ دبَّانْ

ـ3ـ

الْجَازِه فِيها خْرابْ الْبَيْت

انْ ما ظَبْطِتْ.. بِتْصِيرْ عرْيانْ

بْتِلْبُط حَيْط.. بْتِنْطَحْ حَيْط

وْبِتْصَرِّخْ مِتْل الْخُوتانْ

ـ4ـ

تا تِبْنِي عَيْلِه.. اسْتِحْلَيْت

وْتا تْرَبِّي بْناتْ وْصِبْيانْ

بْتِضْوِي شَمْعَه.. بْتِنْدُرْ زَيْت

وْنَسْلَكْ مَقْطُوع مْنِ زْمانْ

ـ5ـ

وْقَعْت.. وْعَ وِجَّكْ طِبَّيْت

وْمِنْ عُمْرَكْ صَايِرْ تِعْبانْ

أَلّله بْيَعْرِفْ مَهْما عْطَيْت

مُش مُمْكِن تِرْضِي النِّسْوانْ

**

خبرة

ـ1ـ

أم وبْنِتا بْعتم الليل

حبّوا يروحوا كزدوره

وفجأه بدربُن طلّ الويلْ

رجّالَيْن.. صدورُن خيْل

صرخوا: علّوا التنّوره

ـ2ـ

البنت علّتْ.. قبل الأم

وْصَفّى يْبَوّسْها بالتّم

انبسطت بالسرّ وقالت:

مأكّد هالوحش الْفالتْ

عندو خبرَه.. وخفّة دم

ـ3ـ

صرخت أمّا: يا ربّي

اغفرلُنْ ذَنْبُن مع ذَنْبي

ما عرفوا شو عملوا اليوم

أكبرْ خَطيّه بالصَّوم

طلعت وِسْخَه هَاللعبه

ـ4ـ

وبنتا مثل السكرانه

قالت لإمّا.. وفرحانه

اللي فوقي بيعرف كتير

خبير بشغلو وقدير

عطيتو اسمي وعنواني

ـ6ـ

يُخْرب بَيْتِك شو عملتي

حدِّك أنا وما سألتي؟

اغْتَصْبِكْ وَحشْ سْنانُو سُودْ

قالت يا أمّي: الْمَقْصُود

بَلَّلْني.. وِتْبِلَّلْتي

ـ7ـ

ولْمّن هَرْبُوا الْمُفْتِرْسِينْ

وِقْفوا تْنَيْنُنْ فِزْعانينْ

وقالتْ الأم بإنكسارْ:

لا تِحْكي لْبَيِّكْ شُو صارْ

بِفْزَع إِنّو يْسِب الدينْ

ـ8ـ

يا بنتي بتوقَع قتْلى

سدّي بوزِكْ.. قالتلا:

بسّ اللي فوْق لْساني

رحْ قُولو ومشْ فزْعانه

عندو إشْيا حرْزانِه

بَيّك ما عندو مِتْلا

**

لبيبه

ـ1ـ

لبيبه بَدّا عَريسْ

يْكُون مْفَصَّلْ ع قْياسا

صارتْ هالنسوان تقيسْ

من كْعاب جْرَيْها لْراسا

حِضْيُولا بْواحد تَعيسْ

بْيِسْكَر وبْيِشْرَب كاسا

تْزوجها.. صار العريسْ

وْما صَدَّق إِنّو باسا

ـ2ـ

وْلَبيبه بْتُوزن قنطارْ

وْعريسا شي قنطارَيْن

عَ تَخْتُنْ وَصّوا السّمسارْ:

بدّنا تَخْت يْساع تْنيْن

لمّنْ قاسُنْ فكرو احْتارْ

وقالْ بْسرّو: يِخْزي العينْ

بَقْره وتزوّجها حْمارْ

قصّه ما شافِتْها عَيْن

ـ3ـ

وبعد جمعه جاب سْريرْ

مش معروف عرْضو مْن الطّولْ

قَلُّنْ: تَخْتي بْيحمل زيرْ

قالولو: من شو معمول؟

قلّن: خشَبْ.. فرحوا كْتير

وْنطّوا فوقو ومش معقول

ما سمعوا غير التكسير

وغولي عم بِتْدَحْرِج غولْ

ـ4ـ

قالولو: تَخْتك مغشوش

تْكسّر من أوّل نطّه

ما بْيِسْتاهل خمس قروش

مُشْ ممكن يحمل بَطّه

قلّن: انتو تْنَيْن وْحوشْ

زيجِتْكُن أَكْبَر غلطَه

بهالبيت المليان كْروشْ

الْجازِه لعبةْ قِطّه وفارْ

وْكيف بَدّو يْلاقي القِطَّه

**

قللا وقالتلو

ـ1ـ

قالِتْلو وْشَعرا نازلْ

عَ كْتافا: أوعا تْقاتِلْ

عِنْدي عْيُون بْتِدْبَح دَبْح

وِجْفُوني شَفْرات الرُّمحْ

وْضافيري أَقْوى مْناجِلْ

ـ2ـ

قلّلا: يا تِسْلَميلي

بَدِّي متلِك قَبيلِه

بوساتي نيران الْجمرْ

وْبَين جْرَيّي سَيْف النّصْر

انْ بِيَّنْتُو.. بْتِرْكَعيلي

ـ3ـ

قالتلو: روح لإمّكْ

بَرْكي بْتِشْكيلا هَمَّكْ

أنا حرْمه مَهْضُومه

لِمّن بِقْلع هْدُومي

الشَّهْقَه بْتُوقف عَ تِمَّكْ

ـ4ـ

قللا: اسْمالله وْيِخْزي الْعَيْن

وَيْن بِتْلاقي مِتْلي وينْ

صَدري ملعبْ لِلْفُوتْبُولْ

كل ما فَوِّت فيكي غول

بْدال الْبَوسه بَدّي تْنَيْن

ـ5ـ

قالتلو: مغْشوش كْتيرْ

ركَّعْت بايّامي الزّيرْ

وكل الْمتلَك حَبّوني

مِنْ أوّل ما داقوني

غرْقُوا وما طلعوا من البير

ـ6ـ

قللا: بِيرِكْ.. بركة نارْ

الما بْيِسْبَح بيكون حمار

خَلّيني جَرِّب حَظّي

وفزّي عَ صدري فزّي

ساعتها منعرف شو صار

**

بنت الناس

ـ1ـ

حابِبْ يِتْغَزّل فيها

بْكلْمه حلوه يْناجيها

قلّلا: يا تقبريني

نظره وحده بْتِكْفيني

تا غنّيلك آويها

ـ2ـ

وصار لاحقها صوب البيت

يِمْشي خَلْفا ع السكَّيْتْ

يْبَسْبِسْلا.. ما تْردّ عْليْه

يْسَمِّعْها دَعْسِة إِجْرَيْه

وْمليُون يا ريت ويا ريتْ

ـ3ـ

وفجأة التفتِتْ صَوبُو شْوَيّْ

وْعَ شْفافا كلمةْ "يا خْطيّْ"

قلّلا: حاكيني رح مُوتْ

وْخلّيني عَ بَيْتِك فُوتْ

بَرْكي بِشْرَب نقطة مَيّ

ـ4ـ

قالتلو: أهلا وسهلا

أمّي جوّا بِنْدهْلا

وْفَجْأه تْحَوَّل حُبّو بُغض

وْشَمَّع خَيْطو.. وْقام الرّكضْ

لِمْ وِقْفوا حَدّا أهْلا

ـ5ـ

وصرْخت بالصّوت العالي:

بالي بْأخلاقَك بالي

الْبَدّو يْوقِّع بِنْت النّاس

وما عندو شوّية إحْساسْ

ما بِدْفَع حَقّو نْخاله

**

نسوان

ـ1ـ

بساحة الكنيسه النسْوانْ

لساناتُن متل السّكينْ

بْيِحْكوا عَ فلانه وفلانْ

عن حنّا اللاحِقْ فُوتين

جابْ منّا بْنات وصبيانْ

أَزْغَرْهُن عمرو عِشْرينْ

عن سامي الْمتل الشّيْطانْ

عنْ اخْتُو ستّ الحلوين

بدّو يْزَوّجها وْطمعانْ

بدوطه بْتِحْرُز وِبْساتينْ

بْزَنْكيل مْعَبّى وْحِرْزان

يْكُون عمْرو فوق السبعينْ

نسوان لسانُن فلتانْ

وتا حتّى يرضوا الدّيّان

ما بْيِنْسوا يْقُولوا: آمين

ـ2ـ

سمع الخوري بالقصّه

قال لازم إحْكي كلمه

بدّي وقّف هَـ الْجِرْصَه

الْعَمى شو صابا الحِرْمِه؟

قالْ الكلمِه من نصّا

شاف الضّحْكه مرتِسْمِه

السّمرا تْبوسو والبرْصَه

تقلّو: باركلي كَسْمي

وللشقرا إجِت الفرصه

عَلّت فستانا وقالت:

أوعا تلْبُط هَـ النّعْمه

ـ3ـ

والخوري اللي داق الْقَهر

وِتْرَمَّل.. صرلو شهرين

لعبتْ عَيْنو.. الْمَوسِم زهر

وكل زهره.. بِتْساوي تْنَيْنْ

تِقِبْروني.. انْعصرت عصرْ

بينْ شفافو.. ويخزي العين

وقلُّن: قالوا أعزب دهر

أهون من أرمل يومين

الخوريّه جوات القبرْ

رح تفرح لمّن بِتْشُوفْ

الصبايا بتوقفلي صفوف

وآخرتي بين الإجْرَيْنْ

**

سقيني

خلّي عيونِك يرحموني.. خطيْ

حابب تا غطّس فيهن عيوني

ومن ريقِك المعسول نقطة ميْ

سقيني.. تا رطّب هالشفاف شويْ

صحرا الدني.. من دونِك ودوني

**

قالت

شربل بعيني.. كل شعرك بعرفو

إنّو إلي.. وغيري أنا ما عشقتْ

بحلف بحبّك.. كل شي بتألفو

بحروف إسمي بس عم بتغلّفو

وجوّات قلبك صورتي علّقتْ

**

خيّال

ضلّي اضحكي.. تا يبيّن اللولو

سنانك بلون الفلّ.. والتلجات

وخيّال واقف حدّك بْطولو

كرمال عينِك رقّص خيولو

وإنتي لَغيرو بتشلحي الضحكاتْ

**

صايمه

غمّضي عيونِك.. تا شوفك نايمه

وعم تحلمي وتمتمي: روحي فداكْ

تا يحفظك أللـه، يا شربل، صايمه

ومحبتك بالقلب فرحه دايمه

الدنيا شو فيها قول لو كانت بَلاك

**

صايم

فستانك الأحمر.. قصير كتير

لا تلبسيه اليوم قدّامي

صايم أنا.. وخايف صيامي يطير

وإخطى خطيّه ما لها تكفير

ويضيع عقلي وضيّع صيامي

**

ليرات عثملي

شعرِك إذا بيطير يا دلّي

قلبي بيوقف.. والعقل بيطير

شعرِك.. متل ليرات عثملّي

بلون الدهب.. بسّ الدهب قلّي:

بكتير أغلى هالشّعر بكتير

**

قهاره

جرّبتْ بوسِك.. بس ما رضيتي

قلبي بيقللي: البنت غنّوجي

كذّبت حالي وقت ما مشيتي

ومن دون ما تطّلعي قفيتي

متل السراب بليلتي تموجي

**

بعد

ليش حتّى تهربي منّي

وشوفِك بـ عيني بنت غدّاره

تركتي القلب والصدر والجنّه

وكلّ همّك تبعدي عنّي

بتشهد عليكي الدرب وغبارا

**

شتويه

وقت اللي نمتي بالمسا حدّي

وصدرك ع صدري وراسك عليي

حسِّتْ بـ تقل تنين المخدّه

وشوشتني: اليوم مين قدّي

الآهات محيت برد شتويّه

**

بغار

بغار، أيوه بغار، عم قلِّكْ

من ضحكتِك.. من رنّة الموبايْل

من مشيّة اللي بيلحقا ظلِّكْ

من قماش عم بـ بوّسك كلِّك

وواقف أنا قبالك ما عندي حيلْ

**

عوينات

عارضتْ إنّك تلبسي عويناتْ

كرمال إتغزَّل بـ عينيكي

عيب الجمال يغيب بالعتمات

رح سمّعك هـ الخمس ست كلمات

لون الفحم ما بيلبق عليكي

**

حظ

لا تتركيني ضايع ومهموم

حبّك قتلني وطيَّر صْوابي

كنت شوفِك شمس فوق غيوم

ملكة جمال متوجه بنجوم

صرت شوفِك بنت كذّابه

**

بحيره

كوني متل ما بدّك تكوني

ع شرط تبقي واقفه حدّي

عم إمرق بإيّام مجنونه

بهدي البحيره دمعة عيوني

بلاقي البحيره لازما سدّه

**

بيتك

بيتك أنا رح عمّرو بأزهار

تا تغار منّك كل حيطانو

يا وردة اللي مفتّحه بالدار

قصّي الضلوع وحوليها حجار

يمكن ضلوعي تزيد بنيانو

**

يا ريت

يا ريت فيني أوصل لعندِك

وإشلح ع بابِك كومة سنيني

تنامي ع زندي وتفرشي زندك

وبكم بوسه يركعوا جندِك

بس البحر غدّار.. ما فيني

**

مرجله

ما في حدا يتمرجل عليي

ساعة ما بدّي شوفِك بشوفِكْ

بالشعر صرتي لحن غنيّه

وبالحب إنتي دموع عينيّي

وغير هيك صعبه تنقرا حروفك

**

رسمك

قدّيش ألله تفنّنْ برسمِكْ

ومن كل نجمه نور يعطيكي

صار القمر يتغزّل بكسمِكْ

والزهر يرمي العطر ع جسمِكْ

تا يحبّبوني كلّهُنْ فيكي

**

ضلي اضحكي

من ضحكتِك.. عم يضحك المنتورْ

ضلّي اضحكي تا تزيد إيّامي

بيكفي القلب بـ شوفتك مسرور

وعم يفرش الطرقات أحلى زهور

تا تسرّبي.. وبفرشتي تنامي

**

خزّون

بلون السّما سيارتِك "خزّون"

انتبهي عليها.. ولا تسوقيها

يا ريتني دولاب فيها كون

تا إحملِك، تا إحرسِك، تا صونْ

أجمل صبيّه.. منغرم فيها

**

قولي

كتير صرلي ناطرِكْ.. قولي

شو مأخَّرِك؟ رح إحلف بأللـه

نْ كنتي بحب جديد مشغوله

بطيّر جنوني.. بفجّر سيولي

تا إجرفِكْ من هـ الدني كلاّ

**

مجبور

ما عاد بدّي حبّ يا قلبي

تعّبتني كتير "منتوره"

بتشك فيي وبصدق حبّي

رح إتركا.. مجبور يا ربّي

ما بحب شوفا يوم مقهوره

**

صوره

بهالصورة اللي خدتها حدّك

بعدو خيالك ضارب عليي

يا ريت فيي من السفر ردّك

وقلّك: قوليلي بس شو بدّك

تا جدّد الصوره المنسيّه

**

فضيحه

الموبايْل مش عم يشتغل عندي

وعم تزعلي منّي على الريحه

كل عمري لطلتك جندي

كوني لعذابي، يا بنتْ، سنده

ولا تعملي بهالجاليه فضيحه

**

آدم

آدم إذا بتفّاحتو فرحان

وكرمال حوّا طلّق الجنّه

شو كان صابو لو دخل بستان

فيه الكرز ع نهود من رمّان

مأكّد، يا روحي، بيسرقك منّي

**

انتي هون

لو خيّروني بين مال الكون

وغفوه زغيره بحضنك الدافي

المال رح بيروح.. إنتي هون

حدّك بشوف السما بلا لون

كل ما شفافك تاكل شفافي

**

جنس

الحبّ منّو بهوره وخناق

تا تقاتليني كل ما ضمِّكْ

الحب بوسه، ودغدغه، وعناق

ولو ما أبوكي للجنس مشتاق

كنتي بقيتي بـ بطن إمّك

**

قاسيه

لا تكوني قاسيه عليي

عم تحرميني شوفة النسوان

بحلف إذا بتطلّع شويّه

بفستان مارق حد عينيي

بخفي المرا.. وببيّن الفستان

**

لا تستحي

بتتذكري بالليل شو عملنا؟

لا تستحي.. كل البشر عملوا

ع التخت سجّلنا عمايلنا

وتعبت الفرشه من تمايلنا

وجسمي ع جسمك ما قدر حملو

**

غضب

ليش إمّك غاضبه هالقد؟

ومن كل قلبي إمّك بجلاّ

مش عارفه حبّي أنا عن جدّ

قوليلها عنّك ما رح إرتد

فيها تبلّط هـ الدني كلاّ

**

شو بتقول؟

بحبّك تضلّي هيك قدّامي

متل الطفل عم تشتكي ع طول

تتغنجي.. تا بفرشتي تنامي

جيب المخدّه.. حضّر حرامي

وتمتم: إذا قرّبت شو بتقول؟

**

سابين

عرفت إسمك ع الورق "سابين"

وبالكون إسمك شمس مضويّه

انتبهي.. القمر ساكن "برشدبين"

ومغروم فيكي يا بنت "شعنين"

حطّي حرس ع البيت ليليّه

**

طبشور أزرق

قولك أنا مسحور بعيونِكْ؟

وواقف قبالُن صافن ومسطول

كتار اللي قالوا صرت مجنونِكْ

وع الأرض قاعد إرسم جفونكْ

بطبشور أزرق بالوفا مجبول

**

مراجيح

خلّي الشّعر يجدلّك مراجيح

ويكتب ع ذوقو كل أشعاري

ما أجملو بيطير فوق الريح

وواقف أنا عامود صعب يزيح

بركي الشعر بـ بُوس منخاري

**

طبخ

كل الطبخ، يا حلوتي، بحبّو

المجدّره، الفاصوليا، اليخنه

وريقك اذا ع سفرتي بصبّو

متل العرق رح إكرعو وعبّو

ع شرط تبقى حرارتو سخنه

**

رقم

قولي شو رقمي بين المحبّين

وقولي إذا غيري سرق قلبك

مش حاسس بحبّك أنا.. تخمين

عم تكذبي عليي شي خمس سنين

حابب تا رجّع كلمة "بحبّك"

**

جريمه

تغزّلت فيكي كتير.. ما سألتي

شلحت الزهر كومات قدّامك

أكبر جريمه بالهوى عملتي

حرقتي الشعر والزهر دبّلتي

وما تعبت من الغدر إيامك

**

مين إنتي؟

مين إنتي مين؟ قوليلي

تا صرت بالبوساتْ غطّيكي

صرتي بحياتي أجمل متيله

عم إقريا للناس.. صليلي

تا ضلّ إقرا.. وإنغرم فيكي

**

موال

بعدو أبوكي بيلبس الشروال

وبعدو بيتفاخر بطربوشو

رح حلّفك يا بنت أحلى عيال

بطربوش بيّك.. تصدحي بموّال

شرايين قلبي بنغمتو يطوشو

**

عطر

ليش الورد دبلان ع إمّو

وكل عمري شمشمو وضمّو

من يوم سافرتي ع آخر كون

مات العطر بالزهر.. ضاع اللون

وما ضل عندي ورد تا شمّو

**

عيديه

شو بدّك بهـ العيد عيديّه؟

محتار شو رح جبلك هديّه

كل شي بيرخص.. بس تا تكوني

فوق الصدر، حد القلب، قونه

وقدّملك، بهـ العيد، عينيي

**

فايس بوك

"الفايس بوك" بلّش يسرقك منّي

هيدي حقيقه رح تجنّني

بتراسلي الأصحاب وين ما كان

بألمانيا، بلبنان، باليونان

وحدّك أنا.. وما بتسألي عنّي

**

واتس آب

مشتاق إقعد حدّك وإفرح

"الوتس آب" بلّش يسرق المطرح

ع طول بتودّي حكي وأفلام

وكيف مع نتفة صور رح نام

وإنتي الحقيقه.. وجسمك المسرح

**

عيد الفطر

رح عيّدك "بالفطر" يا جاره

يا مسلمه.. يا مزيّنه الحاره

وجودك بـ جيرتنا حنان وحب

ما أروعك.. ما أوسعو هالقلب

الـ جمّل حياة كتير غدّاره

**

بيكيني

هيدي "البيكيني" لا تلبسيها

كل الخطايا مجسده فيها

الختيار لولا شافك بيندم

ع عمر مارق دونك معتّم

وشيبة سنينو صعب تمحيها

**

ضحكتك

كل يوم لازم شوفك قبالي

وكحّل عيوني بطلتك ع طول

ضحكة شفافك بس.. رسمالي

ضلّي اضحكي تا تزهّر ليالي

وقضّي حياتي بضحكتك مشغول

**

نحله

النحله إذا بتكرّم الدبّور

بيحرس ع طول الوقت غلاّتك

يا نحلتي.. قلبي أنا مقهور

واقف على جرار العسل ناطور

ومحروم إني دوق عسلاتك

**

يوم القيامه

فستانك اللي طار قدّامي

طيّر صوابي.. وشتت صيامي

لا تنزلي الفستان تا تصوني

أجمل كنوز بتقشعا عيوني

وما هم إخسر يوم القيامه

**

بدي القلب

كيف بدي كيف إرضيكي

وكل السعاده معلقه فيكي

بقدملك العينين.. بتقولي:

بدي القلب.. جوّا القلب جولي

وهللي بقي من العمر إعطيكي

**

جهلة الستين

ما أبشعك يا جهلة الستين

ما عاد فيي إنفع الحلوين

بجرّب تا رجّع من شبابي شويْ

بسمع: المسكين كبر خطيْ

بصبغ الشيبه.. وببلع السكين

**

تنوره

من بعد ما زعّلتْ "منتوره"

ما عاد بدّي شوف تنّوره

حامل صورتها.. مسكّر بوابي

وعم خزّق الأشعار بكتابي

وتنزل دموعي تبوّس الصوره

**

فستان بني

هالبنت، والله، رح تجنّني

بتتغندر بفستانها البنّي

والعقد لولو والشعر أشقر

بكبر أنا.. والبنت عم تزغر

وشو عاد بدّك يا قلب منّي؟

**

فلانه

حكيك إذيني كتير يا فلانه

يللي كتبت لعيونك غناني

قلتي بأني شاعر ومشعور

وشعري ع طول مفشكل ومكسور

وبعدي لهلّق رابط لساني

**

راقصة

نزلت تا ترقص.. دوّخت هـ الناس

وع شفافها حبّة كرز أحمر

صفّيت قيسا.. مش لازملا قياس

الصدر عالي وقدّها ميّاس

وسحّاب فستانا مش مسكّر

**

ليش ما رضيتي؟

بديوان شعري لمّن قريتي

فرحتي.. وع صدري بالمسا غفيتي

قومي ع تختي.. ريّحي بالك

رح نام برّا.. وإحرس غلالك

ولليوم بسأل: ليش ما رضيتي؟

**

حبيب القلب

لو تعرفي قدّيش مشتقلك

جيتي ع حضني من حضن أهلك

وقلتي: السعاده كلّها حدَّك

يا حبيب القلب مين قدَّك؟

وبتغرقي فيّي على مهلك

**

جنينه

لو كان فيني إرسمك ع الموج

بخلّي البحر يتحوّل جنينه

والطير.. فوج يغط، يرحل فوج

وإسقي زهورك بـ دمع عيني

بركي بتظبط بينك وبيني

**

لا تسرعي

لا تسرعي.. ما بريد تنغمشي

وتطير شعره.. ويطلع خواتي

ع سرعة الطرقات رح تمشي

لا تجنيني.. ما غمض رمشي

بدونك حياتي بتكره حياتي

**

يا قاسيه

يا قاسيه.. لو كان عندك قلب

كان القلب دلّك ع أحبابك

من شبّ بتنطّي لَ تاني شبّ

لا تفكّري بتوصّلك هـ الدرب

ما بتوصلي.. ولا بينفتح بابك

**

جرّه

الجرّه إذا بتنطبّ ع تمّا

مأكد البنت بتطلع لإمّا

هيدا المتل ما انقال عن إمِّك

بضمّك ع صدري.. ببوسك بتمّك

وما ببوسها مرّه ولا بضمّا

**

جبل

عم تطولي.. وعم إقصر قبالِك

بمشي كأني جارر خيالِك

لكن وقت ما بسمع: بحبَّك

بصفّي جبل بـ قامتو ملبَّك

وخلف الجبل عم يلعبوا طفالِك

**

موبايل

الموبايل آخد كل أوقاتِك

دمّر حياتي.. وشوّه حياتِك

كنا سوا نتساير ونفرح

ومطرح ما نقعد يفرح المطرح

صفّيت إدفع حق حكياتِك

**

خوات

لا تزعلي لو قلت حبّك مات

بيني وبينك عتقت مسافات

ومتل الكذب ضاعت مشاويري

وما عدت عنك إفتح السيره

تأكدت إنو الحب نصّو خوات

**

خدود

خلقت خدودِك بس تا تنشمّ

وتنباس.. تا تصفّي بلون الدمّ

كنتي تقولي: شباع يا عنتر

شو اللي جرى تا الجسم متوتر

متل العا راسك ألف هم وهم

**

خطيه

قالوا: الخطيّه أصلها حيّه

حبّيت حيّات الدني كلاّ

لما إيديكي لفّت عليي

وصرتي ع مهلك تغرقي فيي

حلوه الخطيّه كتير يا ألله

**

خوف

وقفتي معي قدّام باب البيت

وما عزمتيني ع نقطة مي

خفتي الحكي.. من حكيك انسميت

ومن خوفك الْـ من دون سبب جنيت

رح إقطع لسانات أهل الحي

**

ألله معك

جنّن سمايي خطّك المشغول

عطيني وقت تا إتصل فيكي

جرّبت حظّي من رقم مجهول

الموبايل جاوبني أنا مقفول

ألله معك.. ما عدت حاكيكي

**

لاقيني

لاقيني اليوم ع الساحه عشيّه

في عندي كتير لخدودك شهيّه

ع صدرك صار لازملي استراحه

قالتلي: بس رح قول بصراحه

ما بدّي تكون هالشغله خطيّه

**

سلامات

رغم البعد ع حبنا بقينا

هجرنا الوطن.. والشوق ما نسينا

ودت إلي من قلبها سلامات

خلدتها بأربع خمس كلمات

وصار الوفا يكتب أسامينا

**

حبيب الروح

ما أجملك.. ما أروعك

لمّا العطر بيفوح

بتمشي.. وأنا بمشي معك

بتوشوشيني.. بسمعك:

إنتَ حبيب الروح

**

محظوظ

يسعد صباحك يا شمس بيتي

ليش القمر بالقلب خبيتي

قولي: أنا بحبّو، أنا بريدو

عمر وسعاده ربنا يزيدو

محظوظ هالشب اللي حبيتي

**

فصل الربيع

آخد سوادو الليل من شعرك

والتلج قاعد ينتف بشعري

وفصل الربيع مزهر بعمرك

وتشرين عم يهجم على عمري

لا تفزعي.. بيسند جبل ضهري

**

يوضاس

إلا بكتابك يا شمس ما قريت

وإلا ع دربك بالعمر ما مشيت

لازم تقيمي الشك والوسواس

أكبر جريمه تخلقي يوضاس

مني.. وأنا شمعة رضاكي ضويت

**

مصلوب

البنت الجميله ما بتكوي قلوب

بتعطي القلب للفارس المحبوب

وإنتي ع طول النار بتزيدي

وبتفرحي بآهات تنهيدي

وبتتركيني ع الدرب مصلوب

**

الحق ع الطليان

لا تصرخي.. رح يسمعوا الجيران

صوتك قوي ما بتمنعو الحيطان

عم تكذبي كذبات حجما كبير

بعرف أنا بس إكشف التزوير

بدّك تقولي: الحق ع الطليان

**

أحلام

لا تفكّري حبي إلك كذبه

بيشهد ع حبي، بالسّما، ربّي

إنتي وأنا منحقق الأحلام

ساعة ما راسك فوق صدري ينام

وتبوّسيني.. وتسكني بقلبي

**

يا بحر

هنيّال قلبك يا بحر فيها

نزلت تا تسبح.. موجك هديها

ان بوّست جسما بوّسو عني

لبست "بيكيني" رح تجنني

حابب عن العينين إخفيها

**

غريزه

بـ ربّك قول: شو يعني غريزه؟

وليش الجسم عم يعرق وفرحان؟

إذا بتبُوس تمّي يا عزيزي

متل الكذب بتولّع النيران

ومنّو لَ حالو بيوقع الفستان

**

إمك

بدّك ياني إنّي حبّك

وإني عيش العمر بقربك

لازم شوف الضحكه بتمّك

وترضى وتسكت عنّي إمّك

إمّك عم توقف بـ دربك

**

كحله

لا تقرّبي الكحله ع عينيكي

ألله دخيلو راسم الكحله

وجفن "التاتو" ما بيلبق عليكي

روحي اسألي الناس الـ حواليكي

شهد العسل ما بتنزعو النحله

**

كذبه

دوّختني بوسة الرَّقبه

من هيك عم بتدق يا قلبي

شو صابني من بوستا سكران؟

وكل عمري بوّس النسوان

الظاهر أنا.. عم عيش بالكذبه

**

لا تحلفي

ليش المسا ع السوق ما جيتي

نطرتك بـ قهوه صاحبا صيني

حلفتي بحياتي: الموعد نسيتي

لا تحلفيلي.. ولا تحبيني

صرتي بكذبك عم تبكيني

**

غرق

عم إسبح.. وعم تسبحي قبالي

وكان غرّقني الـ "مايو" الأزرق

شريطين غطّوا كنزك الغالي

وموج البحر بيشد بالعالي

وألله بيعرف وين تا إغرق

**

زكزكه

قديش حابب ضمّك برمشي

وزكزك خصر جهلان.. تا تغشي

تصيحي: اتركني.. من الضحك رح موت

قلّك أنا: قلبي إلك تابوت

من دونك الدقّات ما بتمشي

**

مرسه

حدّ منّك حطّت الكرسي

وقعدت.. ما أتقل دمّها ودمّك

مَنّك طفل تا تطوّل المرسه

ع طول حدّك قاعده إمّك

وكيف بدّي شمّك وضمّك؟

**

بوسه

جرّبت إنّي إسرق البوسه

من شفاف أجمل من ورد أحمر

رفضتي، صرختي، وحفظت درسي

عرسك، يا حسره، ما طلع عرسي

مأكّد وصلتْ كتير متأخّر

**

مجنون

مجنون هلّلي بينغرم فيكي

متل الصخر بدّو يلاقيكي

ما في حراره تحرّك الإحساس

وكيف يرضيكي إبن هـ الناس

وألله دخيلو صعب يرضيكي

**

فاشل

شفتك أنا عم تغمزي الشبّان

وتغنجيهن.. والغنج بركان

ولِكْ كيف بدي ردهن عنّك

وعمري كبير.. وسنهن سنّك

ع طول عم إفشل مع النسوان

**

احساس

رح خبّرك شو بحسّ بس شوفك:

قلبي بيركض صوبك بلهفه

وبنخ بوس الفل ع كفوفك

وبنطر تا حتى تودعي ضيوفك

تا آكلك شقفه ورا شقفه

**

مجال

عليي أنا عم تقشعي حالك

وكل عمرك تحلمي فيي

إشيا كتيره بتخطر ببالك

لا تنفذيها.. بيزغر مجالك

مجالك أنا.. يا نور عينيي

**

بركه

صدقيني من الضحك رح موت

لمّن وقعتي ببركة الميي

فزّيت خلفك.. قلت بدي فوت

بالمي.. بركي منقلع سويّه

وإشرح إلك معنى الرجوليّه

**

قيامه

عندك عريس جديد.. إمك حبّتو

وْلِكْ هيك خيّك قال قدامي

وقال إنّو نفضتلو قبّتو

رح جنّ.. جايي علّقو من رقبتو

من بعد مني تقوم القيامه

**

مجروحه

شو هالحكي الـ عم ينحكى عنك

إسمك ع تمّ الناس مرجوحه

كنتي معو.. قالوا: وضحك سنّك

من بعد ما يقطف عسل منّك

رح يتركك بالقلب مجروحه

**

عذاب

بفيق الصبح تا أكتب الأشعار

بشوفك يا روحي شمس مضويّه

وبصير من حالي ع حالي غار

وبدل السعاده.. بحترق بالنار

أجمل عذاب بعيش يوميّه

**

مخجوله

منّي أنا، يا بنت، مخجوله

وعم ترجفي وتلفلفي حالك

مين غنّجك؟ مين بوّسك؟ قولي

ومين بالأنوثه وسّع مجالك؟

لا تهربي من الحب أحلالك

**

بوسات

معلّمه البوسات ع الرقبه

أكبر علامة حب.. يا قلبي

يمكن لساني ضيّع البصمات

ويمكن شفافي بوّسوا النجمات

تا صار فيكي تعلني حبّي

**

طفران

ليش الصبي ع البنت منحبّو

ومنفلتو.. وما منقدر نضبّو

بيناتكن لو خيّروني بقول:

عندك كنوز مطيّره العقول

وهوّي خلق طفران من ربّو

**

خلق

لو تعرفي بشو موكلك أللـه

وليش الخلق من بطنك تجلّى

لازم جناحك ع الخليقه يرف

وتحمي النسل.. لولا النسل بيجف

رح ينتهي وجود الدني كلاّ

**

متعوب

فكري، ع طول، بغيبتك متعوب

وع الشوك بمشي دروب خلف دروب

مدري أنا مجنون تا شوفك

مدري أنا تلميذ بصفوفك

مدري أنا ع ضحكتك مصلوب

**

إلماز

كتبت الشعر لعيون مخجوله

تا صار شعري يستحي منك

رح إسرق الضحكه.. شو بتقولي؟

وعلّقا ع الشمس جدّوله

وإستخرج الإلماز من سنّك

**

صباح الخير

كل ما تقوليلي: صباح الخير

عم حسّ كل الخير قدّامي

وبيصير يرقص فوق منّي الطير

وأقطف شمس تا علّقا شامه

ع خدود حلوه.. دفت حرامي

**

زلط

قالت يا شربل: صار شعرك "زلط"

قلتلها: يا ريت ما وصفتي

إنتي الحقيقه بتاخديها خلط

بأطفال سته الكون شرّفتي

ولو ما تزلطتي ما خلّفتي

**

جوخ

من بوسة عيونك أنا رح دوخ

كيف لولا هجمت ع شفافك

بالحب.. عمري ما بمسّح جوخ

ولا بعرّم وبطلع على كتافك

وغير بالرضا ما بغل بلحافك

**

غزل

شعر الغزل ما عاد يرضيكي

بدّك حكي ما انقال بالأشعار

صرت لملم عن شواطيكي

موج البحر.. تا الموج يهديكي

نهدات قلبو.. وتكتوي بالنار

**

خماسيه

بهدي لعيونك هـ الخماسيّه

تا تسبّحيني ببحر عينيكي

وإتشمس عْلى شطوط إيديكي

بحبّك أنا.. علوّاه لو فيي

كل العمر إتفرّج عليكي

**

لا تمثلي

ليش بين الناس حكيك همس

وبتخجلي.. وبتهربي من اللمس؟

بالسر إيدي حاضنه خصرك

لا تمثلي.. رح ينفضح أمرك

كذبه زغيره ما بتحجب شمس

**

نطره

تا إلمحك عم ضيّع نهاري

ناطر ع دربك متل طفل زغير

خايف ع بعدك تنطفي ناري

وتدبل مع الإيام أزهاري

وتتمرجح الغبره ع حب كبير

**

بيروت

لمّن على بيروت فلّيتي

سيدني انطفتْ.. وتعتمت البيوت

وهالصورة البالدار خلّيتي

انقهرت عليي.. فكّرت رح موت

بالعين إنتي.. وبالقلب بيروت

**

شو تاعبك؟

حالك بيحكي عن وجع حالك

شو تاعبك؟ شو صايبك؟ قولي

بتمشي كأنو منشغل بالك

وجسمك، يا حسره، جارر خيالك

مأكّد بـ غيري اليوم مشغوله

**

مجدليا

مجدليا.. كيف رح قللاّ

إني انغرمت ببنت مجنونه

سكنت بـ قلبي وسرقت عيوني

هاي ضيعتي، يا بنت، شو بجلاّ

إنتي وهيي نور من أللـه

**

أهلك

مش حقّ هيك يشدّدوا أهلك

ويمنعوكي تلتقي فيي

واقف متل مجنون إندهلك

وشباكك مسكّر بـ عينيي

ولنّو شي مرّه يشفقوا عليي

**

مريضه

عرفتك مريضه.. وبابكن مغلوق

قلبي شعل.. ما قدرت إني روق

فوق عمرك بشلح سنيني

عيدي شو نفعو انغابت الزينه

يا زينتي.. صار القلب محروق

**

مسرح

صدري إلك رح إعملو مسرح

تا ترقصي، وتزيني المطرح

ورح شعّل شفافك ع طول العمر

ومعليش لولا بحترق بالجمر

حدّك أنا وعم مُوت.. رح إفرح

**

مقهوره

من بعيد بدي آخد قياسك

تا خيّط لهالجسم تنوره

بالتم بعرف ما حدا باسك

ولا لفتك ع الخصر ماسوره

من هيك عشتي العمر مقهوره

**

أنا ماشي

متل الهوا بتطيّري معاشي

وبتشتري فساتين بالجمله

وبتهدديني بتهجري فراشي

فراشي بقي.. لكن أنا ماشي

حبّك إلي.. مربوط بالعمله

**

آخر حكي

آخر حكي مكتوب ع الورقه

تارك بـ قلبي النار والحرقه

عشنا سوا.. دقنا الحلو والمر

شعري انتهى.. مجبور إني قرّ

يا ريت أحلى تنين رح نبقى

**

الوداع

بخطّ إيدي قلت بدّي ودّعك

تا تعرفي قدّيش رح إشتاق

لتمّك.. لعينك.. للخدود.. لمسمعك

لإيدين صاروا مع إيديي رفاق

وْلكْ صدقيني البعد ما بينطاق

**

كورونا

كانوا.. وبعدن عم يحسدونا

ليش بعد منلتقي سويّه

وعم ينتشر بالكون "كورونا"

عنك تا إبعد.. لأ ما فيي

إنتي الدوا يا نور عينيي

**

توبة

وطّيت راسي.. وقلت لازم توب

يمكن خطيّه إعشق المحبوب!

وسمعت صوتِكْ قال: يا عيوني

الدنيي خراب بدونَك ودوني

قمّة إيمانَك فوق صدري تدوب

**

إشارة

كيف بدّي إلمحِك قولي

وشباكك مسكّر يا مسطوله؟

روحي افتحي الشبّاك واستنّي

تجيكي إشاره تخبّرك إنّي

واقف تحت شبّاكك بطولي

**

كوني قويّه

لا تقوليلي: إجتْ أمي

عم تشعل النيران بـ دمّي

مشتاق تا شوفِك أنا مشتاق

كوني قويّه.. وبيّني الأشواق

حان الوقت تا زهرتي تشمّي

**

ريقك خمر

ضوّي اللّمْبَه لا تخافي الناس

ع الضو تمّك حابّو ينباس

إنتي إلي.. ويصير شو ما يصير

ريقك خمر.. لا ترحمي السكّير

صبّي، تا يسكر، ألف كاس وكاس

**

خايفه

خايفه!.. من شو؟.. لا تخافي

"فَيْروس كورونا" البالدني كلاّ

ممنوع إنّو يغطّ ع شفافي

وريقك يا عينيي دوا شافي

بوسي شفافي.. وآمنه بألله

**

البوليس ناطر

بحبِّك.. بقولا عن بعد مترين

ممنوع إني قرّب عليكي

البوليس ناطر.. في إلو عينين

ظبطو بيحرز: ألف أو ألفين

وأكتر.. إذا بوّست إيديكي

**

كيف الحبيب؟

صرلي شهر ما لمحتِك قبالي

ولا سمعت صوتِك عم يناديني:

كيف الحبيب الأسمر الغالي؟

خايف، ع كتر البعد، تنسيني

بعصر "الكورونا".. وما تحبيني

**

ممنوع لاقيكي

فضيوا الشوارع بالدني كلاّ

وممنوع لاقيكي تا نتسلّى

ليش صار الكون كلّو موت

يا روح روحي.. وما انسمع هالصوت

اللي قال: لازم تعبدوا ألله

**

فزعان

ع قد ما بحبِّك صرت فزعان

يحبّك "كورونا" الما حدا حبّو

قالوا: بيغلّ كتير بالنسوان

وقالوا: متل قلب البشر قلبو

رح جنّ.. جايي أوقف بدربو

**

عطر الدني

بيني وبينِك بحر مع قطعة سما

وإنتي وأنا من بعيد نحكي بالْوَما

بودّي الغيوم.. بحمّلا عطر الدني

وتا صير شب.. بخربط شهور السنه

وتا قرّبِك.. هالأرض برجع إرسما

**

بلّشت جن

معقول نحنا هيك رح نبقى

من دون لقا.. وبقلوبنا الحرقه؟

كتبت الشعر.. ما نفعت الأشعار

كسرت القلم.. صفّى القلم بالنار

وبلّشت جن وإحرق الورقه

**

لا تبكي

بحلّفِك بالربّ.. لا تبكي

"فَيْروس كورونا" بيمرُق بسرعه

وبرجَع بشوف بوجّك الضحكه

متل الشمس في عندها لمعه

وبينتهي هـ السَّيّء السمعه

**

كمامة

كمّامْتِكْ.. ما عاد تعجبني

غطّت خدودِك.. ضحكتِك.. تمّك

"فَيْروس كورونا" صار يتعبني

والخوف متل الوحش يغلبني

ما عدت إقدر ضمّك وشمّك

**

ضايع أنا

الفايسبوك والواتساب رحموني

عم يرقصوا ع شاشتي حروفِك

زيدي عليي شوي معروفِك

طلّي قبالي.. خفّفي ظنوني

ضايع أنا من دون ما شوفِك

**

مشنقة

جرّبت إنّي بوسِك بخدّك

قلتي: اسْتحي، هـ الغنج مش وقتو

طيّب.. قوليلي بس شو بدّك

مهما بعدت.. رح إرجع لحدّك

تا تعلّقي للقلب مشنقتو

**

فيروز

حابب تا إسرقلِك شي غنيّه

بتغنيا.. بترندحا فيروز

تا جنّنك.. تا حبّبك فيي

وتا علّقِك نجمه سماويّه

وعارف أنا هـ الأمر ما بيجوز

**

عصر الكورونا

بعصر "الكورونا" الحب مش ممنوع

يمكن بيشفي من المرض كلّو

نمت عْلى صدرِك.. صرت شد طلوع

حسّيت لشفافِك في عندي جوع

قلتي: الـ بيبوس اليوم يا دلّو

**

اعتراف

يا ريت بقدر حيّك شهور السنه

تا إفرشا سجّاد ع دروبا

وتا زيّنا بزهور فلّ وسوسنه

تا تعترف وتقول بعد الخرسنه

وحدي أنا بهالكون محبوبا

**

مزروب

مزروب صرلي شهر جوّا البيت

حبّيت إنّي إلمحِك.. طليّتْ

شفت بيتِك منزوي ومهجور

لا ناس يمشوا.. لا حكي.. ولا نور

صارت دموعي تكر ع السكَّيْت

**

نعيم الحب

عشنا بزمن متعوب من حالو

يا حلوتي.. وعم يقتلوا طفالو

حكام ما عندن ضمير وقلب

لو متلنا عاشوا بنعيم الحب

لا أجرموا.. ولا شردوا عيالو

**

هدية

بهديكي أرز الرب.. قلتي: شو

هيدا الأرز مش ملكك توقّى

هيدا ل ألله.. قلوب بتحوشو

وكلنا بهالكاينه جيوشو

بقبل هديّه مندفع حقّا

**

غنيّة

حابب تا غنّي.. بس ما فيي

صوتي انسرق.. لا تضحكي عليي

لمّن قبالي نور وجّك طلّ

ما قدرت قلّك: يا صباح الفل

ولا قدرت رندحلك شي غنيّه

**

أسرار

مخجول إني بوح بالأسرار:

من كتر ما هالناس حبّوكي

وقالوا: أميره، وتاجك ملوكي

كرهت الدني.. شفت البشر أشرار

وبلّشت من حالي ع حالي غار

**

الجمعه العظيمه

دموعِك، قوليلي، شو رح تقللي:

اليوم انصلب يسوع يا دلّي

وصار البكي بيناتنا شلال

الجمعه العظيمه جرج جوّا البال

وحتى نداوي الجرح منصلّي

**

سبت النور

تعي نصلّي سوا بسبت المحبّه

بـ "سبت النور" بدّو يقوم ربّي

تعي نركع مع الأشجار كلاّ

تا يحمي حبنا من الشر أللـه

قيامة ربّنا بقلبك وقلبي

**

قام المسيح

قام المسيح!.. سمعتْ زلغوطه

قلت: خَيّ اليوم جوّك راق

دبكنا سوا.. وعم تغزل الفوطه

حسّيت إنّو الكون كلّو فاق

عَ قدّ ما قلبي إلك مشتاق

**

متيله

لا تعشقي ختيار!.. قلتيلي:

بتضل تحكيلي هـ المتيله؟!

بحبّك أنا.. والعمر دقّة قلب

ضحكات حلوه مع قصيدة حب

وْلِكْ حبّني.. ولا تربّح جْميله

**

عيلتي

رح خبّرِك عن عيلتي قصّه

تا تتركيلا بالقلب حصّه

عيله كريمه بالمحبّه مزيّنه

لا بتفتري، لا بتنزوي، لا بتحني

إلا ل ألله.. ولو وقع نصّا

**

لغات الارض

زعلتي.. وما بعرف كيف هدّيكي

بأيّا لغات الأرض إحكيكي

بالعربي ما بتفهمي عليي

وبالإنكليزي بعرف شويّه

صفّيت بالبوسات راضيكي

**

خشبة المسرح

ريحتِك أجمل من المنتور

وْلِكْ قرّبي تا شمِّك وإفرح

ووقّف عيوني ع الصدر ناطور

وركّز شفافي ع شفافِك سور

وإبني بجسمِك خشبة المسرح

**

لا تسافري

لا تسافري.. جرّبت قبلِك هالسفر

بلادِك أُمومه.. وغربتك موت وضجر

ياما وياما بكيت.. دمعي جفّ

وع المقبره.. واقف أنا بالصفّ

رح مُوتْ.. لو قلبِك متل قلبي انقهر

**

انسان تاني

مأكّد أنا محنون تا حبِّك

وتا إفرش الأشعار عَ دربِك

بركض وراكي.. بترفضيني دَوْم

رح إنتحر لولا عرفتْ شي يوم

إنسان تاني ساكن بقلبِك

**

عتمه

ما عاد بدّي هـ الشمس تشرُق

ولا عاد بدّي هـ القمر يمرُق

ما دام نورِك شعّ بالغربه

ومحّى العتمه الخانقه قلبي

وإيام عمري، ع السكتْ، تسرُق

**

مين أحلى؟

مين أحلى؟ الشمس أم إنتي

عم تسأليني وضحكتِك رطلين

ونورِك سطع لمّن تكوّنتي

وحيث الدني ما بتحتمل شمسين

طفيِتْ شمس.. ساعة ما بيّنتي

**

عيب استحي

لوْ تعرفي قدّيش عقلي طار

لمّن لمحتِك واقفه قبالي

متل الكذب شعلتْ بجسمي النار

وصفّيتْ دردش هيك لَ حالي:

عيب استحي من البنت يا ختيار

**

زهرة

لا تفكّري رح تنتهي الأشعار

وما عود إتغزّل بـ عينيكي

بتبقي معي.. كيف ما خيالي دار

ورح إرسمِك زهره ع باب الدار

كل ما مرقتْ.. إتفرَّج عليكي

**

**

When I reach my goal

-1-

When I reach my goal

You will see me standing tall

And all the stars above

For your eyes my love

I’m sure they will fall

-2-

My days wouldn’t pass

If you’re not with me

I dream to be us

Please let it be

-3-

The sky will be bright

The sun will shin for you

And I will sing at night:

You know, yes, you know

That I love you

**

Where are you?

-1-

When I’m in love, the flowers bloom

My heart tells me stories

That you’ll be back soon

Where are you my love?

Where are you my moon?

-2-

I waited so long for you to arrive.. Soon

I miss your touch, your beautiful smile

I’m thirsty for you, don’t let me strive

When you’re close to me

That means I am alive

-3-

I beg you my darling

Come back to my heart

Our days are running.. Faster

I know you are smart

I am a part of you

Don’t destroy this part

**

Just to see you

-1-

Stop looking at me

Stop following me

Whatever you do

Where ever you go

You are seen

In my dream

-2-

O, my darling,

My heart is beating

My hands are shaking

My eyes are begging

Just to see you!

And to feel you

-2-

Since we met, you’ve changed my life,

You made me feel that I‘m alive

You are my love, my happiness

Whatever you want, I will say yes

-3-

Take my hand to the future

Draw my face as a picture

O, my darling I do love you,

All ever I want is you

**

Little corn

I saw you in my dream

As a corn of ice cream

I tried to eat you alone

You start to jump and scream

Believe me my little corn

I will fulfil my dream

**