The school
**
(مثّلها طلاب وطالبات معهد سيّدة لبنان ـ هاريس بارك،
سيدني، أستراليا عام 1996)
**
شخصيات المسرحية:
سليمان
أنور
جميلة
وردة
سامي
هدى
بو سامي
لطيفة
راهبة
**
ـ المشهد الأول ـ
(سليمان وأنور يقيسان قطعة أرض)
سليمان:
شَايِف هَـ الأَرْضْ.. بَدّنَا نْقِيسَا مِنْ أَوَّلا لآخِرَا..
أنور:
وْكِيفْ بَدّنَا نْقِيسَا وْمَا في مَعْنَا ناضُورْ وْلا فِي مَعْنَا مِترْ..
سليمان:
فَشِّخْ يَا حَبِيبي فَشِّخْ.. بْهَـ الأَيَّامْ مَا فِي أَظْبَطْ مِنْ فَشِخْتَكْ..
أنور:
إِذَا كَانْ هَيْكْ.. خُودْ عَ تِفْشِيخْ
(يبدأ سليمان بالغناء، ويجيبه أنور بكلمة: فشّخ)
سليمان:
فَشِّخْ يَا حَبِيبي فَشِّخْ
فَشِّخْ بِالشَّرْقْ..
أنور:
فَشِّخْ
سليمان:
فَشِّخْ بِالْغَرْب ..
أنور:
فَشِّخْ
سليمان:
مَا تْخَلِّي دَرْبْ..
أنور:
فَشِّخْ
سليمان:
فَشِّخْ نْزُول ..
أنور:
فَشِّخْ
سليمان:
فَشِّخْ طْلُوعْ..
أنور:
فَشِّخْ
سليمان:
فشِّخْ عَ الْكُوعْ..
أنور:
فَشِّخْ.. فَشِّخْ.. فَشِّخْ
(تدخل جميلة ووردة)
جميلة:
ألله مَعْكُنْ يا جيران..
أنور:
أَهْلا بْوَرْده وِبْجَميلِه..
جميلة:
فيكُنْ تْقُولُولي لَيْش عَمْ بِتْفَشْخُوا طالِع نازِلْ؟
سليمان:
هَوْنْ.. بَدّن يْعَمّروا مَدْرَسِه..
جميلة:
مَدْرَسِه؟.. يِعْنِي مْعَلّمِينْ وِمْعَلّماتْ وِتْلاميذْ!
أنور:
وَمَلْعَبْ وِصْفُوفْ وْكَرَاسي وْطَاوْلات..
جميلة:
دَخِيلْكُنْ هَدُّونِي.. أَنَا مُشْ مْصَدّقَه إِنُّو وْلادِي رَحْ يِتْعَلّمُوا..
وردة:
بَسّ ضَيْعِتْنَا بْعِيدِه كْتِيرْ.. الطَّرِيقْ مَا وِصْلِتْلا..
كِيفْ بَدَّا تُوصَلاّ الْمَدْرَسِه؟
جميلة:
الِحْكُومِه نَاسْيِتْنَا.. لَيْشْ فَاقِتْ عْلَيْنَا هَلَّقْ؟
سليمان:
هَـ الْمَدْرَسِه مُشْ لِلْحُكُومِه.. هَيْدِي لِلرَّاهْبَاتْ
وردة:
الراهْبَاتْ.. أَيَّا رَاهْبَات؟!
سليمان:
رَاهْبَات الْعَيْلِه الِمْقَدّسِه..
وردة:
رَاهْبَاتْ الْبَطْرَكْ الِحْوَيِّكْ؟!
سليمان:
هَوْدِي هِنِّي.. زَهْرَاتْ الدِّنِي الْـ مَا بْتِدْبَلْ
جميلة:
لازِمْ نْسَاعِدْ الرَّاهْبَاتْ.. لاَزِمْ نِدْفَعْ أقساط الْمَدْرَسِه
وردة:
وْإِذَا وَاحِدْنَا فَقِيرْ.. مْنَيْنْ بَدُّو يِدْفَعْ؟
جميلة:
مَا فِي حَدَا فَقِيرْ.. الْـ مَا عِنْدُو مَصَارِي عِنْدُو زْنُودْ..
يْرُوحْ يسَاعِدْ بِالْمَدْرَسِه.
وردة:
وْكِيفْ بَدُّو يْسَاعِدْ.. وْمَا بْيَعْرِفْ يْفِكّْ الْحَرِفْ؟
جميلة:
مُشْ مُهِمّْ يِقْرَا.. الْمُهِمّْ يَعْرِفْ يْنَضِّف مَلْعَب الْمَدْرسِهْ..
يْظَبِّطْ جْنَيْنِةْ الدّيْر.. الْمَدَارِسْ لاَزِمْلا شِغْلْ كْتِيرْ..
سليمان:
وِالِمْصِيبِه إِنُّو إِذَا مَا دْفَعْنَا وْمَا سَاعَدْنَا.. بِتْسَكِّرْ الْمَدْرَسِه
جميلة:
لأْ.. دَخِيلْكُنْ.. الْمَدْرَسِه ما لازِمْ تِتْسَكَّر
وردة:
يَا دِلُّو وْيَا تِعْتِيرو الْـ بَدُّو يْسَكِّرْ الْمَدْرَسِه..
بُو يُوسِفْ زَوْجِي نَاطْرُو بِالسَّاحَه
أنور:
بَعِدْ مَا فِي مَدْرَسِه تا تِتْسَكَّرْ.. بِالأَوَّلْ انْطِرُوا تا تِتْعَمَّرْ
وردة:
إِي رَيْتَكْ تِقْبِرْنِي انْشَاللـه..
بَدَّكْ يَاهُنْ يَعَمْرُوهَا.. تَا تِرْجَعُوا تْسَكّرُوهَا!
إذَا كانْ هَيْك.. الأَفْضَلْ تِتْسَكَّرْ قَبلْ مَا تِتْعَمَّرْ
جميلة:
مِتْنَا مِيةْ مَوْتِه وْما شِفْنَا هَـ الْمَدْرَسِه..
اللّي بْجَيْبِتُو قِرْشَيْنْ يِتْبَرَّعْ فِيهُنْ..
أَحْسَنْ مَا يْضَلُّوا وْلاَدْنَا يِرْعُوا مِعْزِي.
وردة:
واللـه.. بَسّ يِجُوا الرَّاهْبَاتْ بَدِّي شَبِّعُنْ حَلِيبْ مِعْزِي.
جميلة:
قَوْلِكْ بِيعَلّمُولْنَا وْلادْنَا بكِمْ دَزِّينِةْ بَيْضْ؟
وردة:
وْلَيْشْ مَا بِتْجِيبِيلُنْ جُوطْ كِشكْ فَرْد مَرَّه..
جميلة:
سامي.. وَيْنَكْ يا حَبيب إمَّكْ
(يدخل ابنها سامي وابنتها هدى)
تعا يا ماما..
بَدِّي ياكْ تْبَيِّضْ وِجِّي قِدَّامْ الْجِيرانْ، وِتْقِلُّنْ الأَلِف بَا..
(سامي يهز بكتفيه خجلاً)
تِقْبِرْ إِمَّكْ انْشَاللـه.. لا تِستْحي.. قِلُّنْ الأَلِفْ بَا..
سامي:
أَلِف .. با .. وْبُوبَايِه
بَدِّي آكُلْ مِحْشَايِه
أنور:
زَقّفُولو .. زَقْفُولو .. وْعَلّقُولُو شْهَادِه طُولُو
جميلة:
يِقْبِرْنِي الشّطُّورْ الذَّكِي الْـ ما حَدَا مِتْلُو..
إِي وَاللـه حَطّْ سَبعْ بَحْصَاتْ لْجُبْرَان خَلِيلْ جُبْرَانْ..
سليمان:
سُبْحَانَكْ يَا أَللـه طَالِع لإِمُّو.. وْبَدُّو خَرْزِه زَرْقَه..
جميلة:
بَعِدْ مَا شِفْتُو شِي.. إِخْتُو أَذْكَى مِنُّو بِكْتِيرْ بِكْتِيرْ..
تَعِي يَا مَامَا تَعِي.. عِدِّيلُنْ مْنِ الوَاحِدْ لِلْعَشْرَه.
هدى:
(تمغِّط بعلكتها)
وَاحِدْ.. تْنَيْنْ.. تْلاتِه.. أَرْبعَه..
خَمْسِه.. سِتَّه.. جِدِّي.. عَشْرَه
وردة:
سِتِّي.. جِدِّي.. عَشْرَه..
وْشُو دَخَّلْ جِدِّكْ هَوْنْ يَا حَبِيبِةْ إِمِّكْ؟
جميلة:
بِنْتِي بِتْحِبّْ جِدَّا كْتِيرْ..
مَا فِيها تْقُولْ سِتِّي مِنْ دُونْ مَا تْقُولْ جِدِّي.
وردة:
سَمُّوا عَ البِنْتْ.. وْعَ خُوهَا..
أنور:
وْرَحْ مِنْسَمِّي كَمَانْ عَ إِمَّا وْعَ بُوهَا..
سليمان:
أُفْ.. شُو بَدُّنْ يِشْتِغْلُوا هَـ الرَّاهْبَاتْ..
وردة:
يَا حَرَام عْلَيْهُنْ رَحْ يِتْعَبُوا كْتِيرْ مَعْ هَيْكْ عَالَـمْ..
سليمان:
لاَ تْخَافِي الْعِنَايِه مَعُنْ.. وْعَ طُولْ بِيقُولُوا: أَللـه بِيدَبِّرْ..
وردة:
السّنِه الْمَاضْيِه إِجَا خَيِّي مِنْ أُسْترَالْيَا..
وْجَايِبْ مَعُو إِبْنُو الزّغِيرْ..
مَشَاللـه بْيِحْكِي عَرَبِي أَحْسَنْ مِنْ عَمّتُو..
يِقْبِرْ عَمّتُو انْشَاللّـه..
وْخَبَّرْنِي عَنْ مَدْرَسِةْ سَيِّدِةْ لُبْنَانْ وْعَن الرَّاهْبَاتْ..
وْصَار يْغَنِّي هَـ الْغِنيِّه:
ـ1ـ
لْسَيّدِةْ لُبْنَانْ
غَنُّوا يَا أطْفَالْ
لْسَيّدِة لُبْنَانْ
الْـ عَمْ بِتْرَبِّي عْيَالْ
وْخَلُّوا الصَّوتْ يْعِيدْ
كِلّ غْنَانِي الْعِيدْ
اللِّي بَعْدَا بِالْبَالْ
ـ2ـ
قْطَعْنَا الْبَحْرِ وْجِينَا
تا نْحَقِّقْ أَمانِينَا
وْصِرْنَا حِلْمِ الْحَكِي
عَ الْمَحَبِّه رْبِينَا
بِـ حِضِنْ أَهَالِينَا
نْلِـمِ زْهُورْ الْبِكِي
ـ3ـ
لَوْ مَهْمَا غِنِّيْنَا
وِالْعَتْمِه ضُوَّيْنَا
هِنِّي الْـ مِحْيُوا الْغُرْبِه
رَاهْبَاتْنَا بْـ عينَيْنَا
عَمْ يِسْهَرُوا عْلَيْنَا
سَاعِدْهُنْ يَا رَبِّي
جميلة:
هَاتِي.. حْكيلي عَنْ مَدْرَسِةْ سَيّدِة لُبْنَانْ
وردة:
الْقِصَّه طَوِيلِه كْتِيرْ.. نِحْنَا وْرَاجْعِين عَ الْبَيْتْ بْخَبِّرْكُنْ يَاهَا..
(تخرج وردة وجميلة وهدى وسامي)
**
ـ المشهد الثاني ـ
(أنور يتطلّع يمنة ويسرة مخافة أن يراه أحد)
أنور:
حْمَالْ يَا خَيّي حْمَالْ.. حَجَرْ الْمَسَاحَه تْقِيلْ كْتِيرْ..
سليمان:
فِيكْ تْقِلِّي لْوَيْنْ بَدَّكْ تِنِقْلُو؟
أنور:
عَ آخِر الدِّنِي.. وْبَدَلْ مَا يْعَمّرُوا الْمَدْرَسِه هَوْنْ..
بِيعَمّرُوها حَدّ رِزْقَاتْنَا.. وْسَاعِتْهَا بْتِغْلا أَرْضْنَا..
ومِينْ بْيَعْرِفْ.. يِمْكِنْ يِشِتْرُوهَا الرَّاهْبَاتْ.
سليمان:
إِذَا كِبْرِتْ الْمَدْرَسِه.. لازِمْ نْقَدِّمْ أَرِضْنَا لِلرَّاهْبَاتْ
أنور:
كَبِّرْ عَقْلَكْ يَا خَيِّي.. الْـ مَا بِيحِطّْ قِرْشْ بْصَيْنِيِّةْ الِكْنِيسِه
كِيفْ بَدُّو يْرَوِّحْ أَرْضُو بْبَلاَشْ؟!..
حْمَالْ عَنْ خَيَّكْ شْوَيّ تَا قِلَّكْ..
سليمان:
بَسّْ .. رَاهْبَاتْ الْعَيْلِه بْيِسْتَاهْلُوا
أنور:
بْيِسْتَاهْلُوا أَرْضْنَا؟ وِرْتِةْ جِدّ جِدّنَا أَللـه يِرْحَمُو..
شُو باكْ الظاهِر خْرفتْ؟
سليمان:
ما بَعْرِفْ.. أَنَا بْحِبُّنْ.. وْبَسْ شُوفُنْ بْيِفْتَحْ قَلْبِي..
أنور:
فْتَاحْ قَلْبَكْ وْلا تِفْتَحْ جَيْبْتَكْ..
قَرِّبْ حْمَال عَنِّي شْوَيّْ رَحْ يُوقَعْ حَجَرْ الْمَسَاحَه..
سليمان:
إِذَا بَدُّنْ حِصّتِي.. بَدِّي هَاوِدُنْ بِالسِّعِرْ..
أنور:
صَرْلِي نِصّ سَاعَه حَامِلْ هَـ الْحَجَرْ تَا تِغْلَى أَرِضْنَا..
جَايِي حضْرِتَكْ تْرَوِّحْها بالدَّشَشْ..
سليمان:
الرَّاهْبَاتْ مِفِضْلِينْ عْلَيْنَا..
أنور:
(يأخذ منه حجر المساحة)
بْقِلّكْ شِي.. هَات هَـ الْحَجَرْ لْهَوْنْ بَدِّي رَجّعُو لْمَطْرَحو..
وِلْعِمْرَا مَا تِغْلا الأَرْضْ..
سليمان:
خَلِّيني إِحْمِلْ مَعَكْ .. هَلَّقْ بْتِكْسُرْ ضَهْرَكْ..
أنور:
ما بَدِّي مِنّيِّتَكْ .. إِنْت واحِدْ مَسْطُولْ..
(يقع الحجر على إحدى قدميه)
آخْ يَا إِجْرِي.. إِجْرِي انْكَسْرِتْ..
سَاعْدْنِي.. رَحْ مُوتْ مْنِ الْوَجَعْ
سليمان:
عَجِّلْ.. طْلُوبْ السّمَاحْ مْنِ الرَّاهْبَاتْ
أنور:
سَامْحُونِي يا رَاهْبَاتْ الْعَيْلِه.. نِصّْ أَرْضِي لِكُنْ..
سليمان:
نِصّْ أَرْضَكْ!! عَارِفْ حَالَكْ شُو عَمْ بِتْقُولْ؟
أنور:
هِنِّي يْصَلُّولِي تَا يْطِيرْ الْوَجَعْ.. وْأَنَا وْيَاهُنْ مَا بِخِتْلِفْ..
سليمان:
رَحْ رِدّ هَـ الْحَجَر لْمَطِرْحُو..
عَيْبْ الْوَاحِدْ مِنَّا يِلْعَبْ بِحْجَارْ الْمَسَاحَه..
**
ـ المشهد الثالث ـ
(رنين جرس خفيف)
وردة:
سامْعَه يَا جارَه.. عَمّ بِيدِقْ جَرَسْ الْمَدْرَسِه
جميلة:
شُو بِكِي يَا إِمّ يُوسِفْ؟.. كِلّْ يَوْمْ بْتِطْلَعِيلْنَا بْقِصَّه جْدِيدِه..
وردة:
وْحَقّ مَارْ مَانُوسْ حَدْشِيتْ سْمِعْت الْجَرَسْ عَمْ بِيدِقّْ..
تْلاتْ دَقَّاتْ بِالْعَدِيِّه: تْرِنْ.. تْرِنْ.. تْرِنْ..
جميلة:
يَا بَاطِلْ.. هَيْدِي دَقِّةْ حِزنْ.. لَيْقُومْ حَدَا مَاتْ؟
وردة:
لاَ تْخَافِي.. مَا حَدَا فَاضي يْمُوتْ.. كِلُّنْ نَاطْرِينْ الْمَدْرَسِه..
جميلة:
أَنَا سْمِعِتْ إِنُّو إِمّْ نَجِيبْ صِحِّتَا تِلْفَانِه..
وردة:
الْيَوْمْ شِفْتَا بِالْحرشْ.. حَامْلِه إِبِنْ إِبْنَا عَ ضَهْرَا..
جميلة:
مُشْ مَعْقُول.. مْبَارِحْ مَشَحْهَا الْخُورِي..
وْكِلّ مَا يِمْشَحْهَا عَمْ تِرْجَعْ تْفَرِّخْ مْنِ جْدِيدْ
وردة:
يا حْرَامْ عَ هَـ الْخُورِي.. إِذَا كِلّْ زْبُونَاتُو مِتِلْ إِمْ نَجِيبْ..
مْأَكَّدْ رَح يْمُوتْ مْنِ الْجُوعْ
جميلة:
قَوْلِكْ صَحِيحْ.. صَارِتْ مْفَرّمِه خَمِسْ مَرَّاتْ؟
وردة:
شُو بَدّكْ بْهَـ الْحَكِي..
كِلْ سِنِه بِيودِّيلاَ إِبْنَا زَوْج حْنَاكْ مِنْ أُسْترالْيَا..
جميلة:
تَارِي مِنْ هَيْكْ بِتْقَرْقِطْ حُمُّص..
وردة:
عَيْب نِحْكِي عَ النَّاسْ.. اسْمَعِي.. اسْمَعِي مْنِيحْ..
الْجَرْسَه عَمْ بِتْدِقّ..
(رنين جرس)
جميلة:
أَنَا كَمَانْ عَمْ إِسْمَعْ الْجَرْسَه..
لَيْكُوا الِوْلادْ وِقْفُوا بِالصَّفّْ..
الرَّاهْبَاتْ عَمْ بِيصَلُّولُنْ.. بَلّشُوا يْفُوتُوا عَ صْفُوفُنْ..
وردة:
ـ1ـ
دَقِّتْ جَرْسَه أَحْلَى جَرْسَه
وَعِّتْ صِبْيَانْ وْبَنَاتْ
وْبِنْتِي، اسْماللـه، حِفْظِتْ دَرْسَا
وْفِرْحُوا بْطَلِّتْهَا الرَّاهْبَاتْ
مَدِرْسِتْنَا.. هَيْ زِينِتْنَا.. يَا فَرْحِتْنَا
أَحْلَى مِنْ كِلّ الزِّينَاتْ
ـ2ـ
وِقْفُوا بالصَّفِّ وْضِحْكُوا
ضِحْكِتْهُنْ وِسْعِ السَّاحَهْ
فِكَّرْنَاهُنْ رَحْ يِبْكُوا
وْيِهِرْبُوا.. بِـ صَرَاحَه
بَسّْ عْيَالْنَا.. يا هْنِيَّالْنَا.. شُو عَ بَالْنَا
حَبُّوا مَدْرِسْةِ الرَّاهْبَاتْ
ـ3ـ
صِرْنَا نْفَيِّقْهُنْ بَكِّيْرْ
وِنْحَمِّلْهُنْ زُوَّادِه
نْمَشّطْلُنْ شَعْرُنْ وِنْصِيرْ
نْقِلُّنْ : أُوعَا يَا وْلاَدِي
تْعَذّبُوا الرّاهْبِه.. تْهِينُوا الرَّاهْبِه.. الرَّاهْبِه الرَّاهبِه
كِلّنَا مِنْحِبّْ الرَّاهْبَاتْ
**
ـ المشهد الرابع ـ
(دكانة بو سامي.. طاولة وكرسيان)
أنور:
لَيْكْ يَا بُو سامي.. الْحَالِه مَا عَادِتْ تِنْطَاقْ..
قُولْ لإِبْنَكْ يْبَعِّدْ عَنْ إِبْنِي..
بو سامي:
إِبْنِي سامي صَبِي عَاقِلْ مَا بْيِفْتَحْ تِمُّو
أنور:
إِيْ رُوحْ شُوفْ سْنَانُو مَعَلّمِه عَ خَدّْ إِبْنِي..
بو سامي:
إِبْنِي سامي مُشْ مَعْقُول يِعْمِل هَيْكْ..
أنور:
أَنَا شِفْتُو عَمْ بِيعَضُّو.. بَرَمْ تِمُّو مِتِلْ تِـمّ الْوَاوِي وَكَدْشُو..
بو سامي:
شُو عَمْ بِتْقُول؟.. إِبْنِي الْفَارَه بْتَاكُلْ أَكْلاَتُو
أنور:
وْبَسّ تْدِيرْ ضَهْرَكْ.. حَيِّه وْفِلْتِتْ بَيْنْ الإِجْرَيْنْ..
بو سامي:
الْحَقّْ عَ إِمُّو مْغَنِّجْتُو كْتِيرْ..
مْفَكّرَه إِنُّو أَللــه مَا خَلقْ غَيْرُو
أنور:
مْبَارِحْ بْدِكَّانِةْ أُمّ سَعْدَى.. كَسَّرْ الدِّنِي..
تا صَارِتْ الدِّكَّانِه فُوقَانِي تِحْتَانِي..
قَامِتْ إِم سَعْدَى قَالِتْ لَجَنَابْ حِرمِتْكُنْ:
بِتْرَجَّاكِي يَا إِمّْ سامي تَاخْدِي سامي عَ بَيْتِي.. بَرْكِي بِيهِدّو..
أَحْسَنْ مَا جِيبْ جِرَّافِه.
بو سامي:
وْلَيْش تا يْرُوحُوا عَ دكَّانِةْ أُمّ سَعْدَى..
دكَّانتي ما بِتْشَبِّعُنْ..
أنور:
دكّانْتَكْ أَكْبَرْ دكَّانِه بِالضَّيْعَه،
بَسّ أُمّ سَعْدى بِتْبِيعْ مْناقِيشْ بِتْشَهِّي..
وْإِبْنَكْ سَامِي مِتْل ما بِيعَضّ الِمْناقِيشْ بِيعَضّ وْلاد النَّاسْ..
بو سامي:
لاَ تْوَاخِذْنِي يَا جارْ.. بُكْرَا بْوَدِّيهْ عَ الْمَدْرَسِه..
وِبْيِتْرَبَّى عَ إِيدْ الرَّاهْبَاتْ.
أنور:
مِنْ هَلَّقْ تَا يِجُوا الرَّاهْبَاتْ.. قُولْ لإِبْنَكْ يْكِفّ شَرُّو عَنَّا..
بو سامي:
سامي.. وَيْنَكْ يَا سامي.. تَعَا لْهَوْنْ
(يدخل سامي وهو يلهث)
سامي:
أَنَا جِيتْ يَا بَيِّي.. كِيفَكْ يَا بَيِّي.. بْأَمْرَكْ يَا بَيِّي..
بو سامي:
إِنْتْ عِضَّيْتْ الصَّبِي بْخَدُّو..
سامي:
كِذَّابِينْ يَا بَيِّي ..
أَنَا كِنْتْ بِالْمَدْرَسِه عَمْ إِتْعَلَّمْ الأَلِفْ با وْبُوبايِه..
بو سامي:
أَيَّا مَدْرَسِه؟..
سامي:
مَدْرِسْةِ الرَّاهْبَاتْ..
بو سامي:
بَعِدْ مَا عِنَّا مَدْرَسِه لِلرَّاهْبَاتْ..
سامي:
وِحْيَاتَكْ يَا بَيّي.. كِنْتْ عَمْ إِتْدَرَّبْ مَعْ أُخْتِي هُدَى
تا نْكُون أَشْطَرْ تْنَيْن بِالْمَدْرَسِه..
بو سامي:
وْمِينْ كَسَّر دِكَّانِةْ إِمْ سَعْدَى؟
سامي:
مَا أنَا.. مَا أَنَا.. لا تْخَلِّيهُنْ يِدخْلُوا بَيْنِي وْبَيْنَكْ يَا بَيِّي..
أَنَا عَاقِلْ كْتِيرْ..
بو سامي:
شِفْت يَا أَنْوَرْ.. إِبْنِي عَاقِل كْتِيرْ..
أنور:
يَا بُو سامي.. إِبْنَكْ كِذَّابْ وْعَمْ يِضْحَكْ عْلَيْكْ..
بو سامي:
أَنَا مَا عِنْدِي وْلادْ كِذَّابِينْ..
فُوتْ يا صَبِي عَ الْبَيْت قَبْل ما إِشْمُطْ إِدْنَكْ..
أنور:
يَا بُو سامي.. يَا بُو سامي
الصِّدْق كِلُّو جُوَّا كْلامِي:
صَدِّقْ أُخْتَكْ..
صَدِّقْ مَرْتَكْ
لَكِنْ.. أُوعَا تْصَدِّق سامي
**
ـ المشهد الخامس ـ
(الأهالي ينظفون طرقات القرية، وأبو سامي يزين دكانه)
وردة:
كَنّسِي يَا جميلة كَنّسِي.. مِكْنِسْتِكْ مُشْ عَمِ تْقَحِّطْ مْنِيحْ..
لطيفة:
لَيْكْ مِينْ عَمْ بِيقِيمْ شْكَالِي لَيْكْ..
مِكْنِسْتِكْ يَا جَارَه مَشْ شَايْفِينْ غْبَارَا..
بِتْبَوِّسْ الأَرْضْ تِبْوِيسْ.
وردة:
شُوفِي النَّضَافِه هَوْنْ.. وْشُوفِي الْوَسَاخَه عِنْدِكْ.
لطيفة:
حِلِّي عَنِّي مَا بَقَى بَدِّي كَنِّسْ.. أَنَا رَايْحَه عَ الْكَرْمْ.
بو سامي:
شُو بِكِي زِعَّلْتِيهَا؟.. هَلَّقْ بْيُوصَلُوا الرَّاهْبَاتْ وْطُرْقَاتْنَا مْغَبّرَه.
جميلة:
أَنَا بْنَضِّفْ لْوَحْدِي .. بَرْكِي بْيِطْلَعْلِي أَجِرْ عِنْدْ أَللـه
وردة:
لازِمْ الْكِلّْ يِشْتِغْلُوا.. مِنْ دُونْ مَا يْشِيلُوا شْكَالْ بَعْضُنْ.
جميلة:
إِذَا كَانْ هَيْكْ.. لَيْشْ حَضِرْتِكْ عَمّ بِتْشِيلِي شْكَالْنا؟
وردة:
لأَنّكُنْ ما بْتَعرْفُوا تْنَضّفُوا..
مْكانِسْكُنْ مُشْ عَمْ بِتْطَلِّعْ غْبارْ مِتل مِكْنِسْتِي أَنا..
جميلة:
بْقِلْكُنْ شِي.. تَا نِقْدِرْ نِشْتِغِلْ لازِمْ تِزِرْبُوا هَـ الْمَرَا بْبِيْتَا..
لْسَانَا مِتْلْ الْحَنِشْ بْيِعْقُصْ عَ الْمَيْلْتَيْنْ..
وردة:
وْلِكْ هَدُّونِي عَنْها.. بَدِّي إِحْلِشَا بْشَعْرَا..
جميلة:
تْرِكُوهَا.. تْرِكُوهَا.. لاَ بِفْزَعْ مِنْها وَلا مِنْ أَبُوهَا
بو سامي:
عَيْبْ يَا نِسْوَانْ.. الرَّاهْبَاتْ قَرّبُوا يُوصَلُوا..
شُو.. بَدّكُنْ تِسْتَقِبْلُوهُنْ بِخْنَاقَه؟
جميلة:
قِلْلاَّ تْضِبّ لْسَانَا.. هَشّلِتْ أَوِّلْ مَرَا..
مَا فِيهَا تْهَشِّلْ التَّانْيِه..
بو سامي:
زْرَعُوهَا بْدَقْنِي هَـ الْمَرَّه.. وْخَلُّونَا نَعْرِف نِشْتِغِلْ
الرَّاهْبَاتْ قِمِيتْهُنْ كْبِيرِه.. ولاَزِمْ نْزَيِّنْ الضَّيْعَه
جميلة:
أَنَا خَايْفِه لَيْكُونوا الرَّاهْبَاتْ مُشْ جَايِينْ عَ الضَّيْعَه..
انْكَسَرْ ضَهْرِي أَنَا وْكَنِّسْ..
بو سامي:
الرَّاهْبَاتْ جَايِينْ .. شَافُنْ نَجِيبْ عَمْ يِركبُوا بِالسِّيَّارَه..
جميلة:
أَيَّا سِيَّارَه.. نِحْنَا مَا عِنَّا طَرِيقْ عَ الضَّيْعَه؟
وردة:
كانْ لازِمْ يِسْأَلُنْ لْوَيْنْ رَايْحِينْ..
أَحْسَنْ مَا نِتْعَذَّبْ بِالتِّكْنِيسْ وْمَا يِطْلَعِلْنَا شِي..
بو سامي:
قَالْ اسْتَحَى يِسْأَلُنْ.. بَسْ سِمِعُنْ عَمْ بِيقُولُوا للشُّوفِيرْ:
بِحْيَاتَكْ وَصِّلْنَا عَ الضَّيْعَه..
وردة:
أَكِيدْ.. هَيْدِي هِيِّي الضَّيْعَه.. لَيْشْ فِي غَيْرَا بْهَـ الإِيَّامْ؟
بو سامي:
مَعِكْ حَقّْ يا وردة.. ضَيْعِتْنَا صَارِتْ مَشْهُورَه..
رَحْ تِتْعَمَّرْ فِيهَا مَدْرَسِه..
جميلة:
يَا عَيْبِ الشُّومْ عْلَيْنَا.. نْسِينَا نْأَلِّفْ لِجْنِةْ إِسْتِقْبَالْ..
بو سامي:
كِلْ شِي وْلاَ هَيْكْ..
لأَنْ كِلْ مَا تِتْأَلَّفْ لِجْنِه بْيِخْرَبْ الْمَشْرُوعْ..
لِجْنِةْ الطَّرِيقْ قَطْعِتْ الطَّرِيقْ..
وْلِجْنِةْ الْمَقَابِرْ هَشّلِتْ الْمَوْتِى..
وْلِجْنِةْ الْوَقْف سَرْقِتْ الِكْنِيسِه..
وردة:
دَخِيلْكُنْ .. مَا بَدّنَا لِجْنِةْ رَاهْبَاتْ ..
خَلُّونَا عَ بَرْكِةْ أَللـه ..
جميلة:
عَجّلُوا نَضّفُوا.. رَحْ يُوصَلُوا الرَّاهْبَات..
وردة:
كِرْمَالْ وْلاَدْنَا طِلُّوا
وْكِرْمَالْ النَّاسْ
بْلاَكُنْ هَـ الْكَوْنْ يَا دِلُّو
مَتْعُوب الرَّاسْ
غِلُّوا بِقْلُوبْنَا غِلُّوا
بْعِطْرِ الأَنْفَاسْ
إِسْمِ الرَّاهْبَاتْ مِنْجِلُّو
مِنْ دُونِ قْيَاسْ
**
ـ المشهد السادس ـ
(يدخل أنور وسليمان والغضب يجتاح قسمات وجهيهما)
أنور:
يَا أَهَالِي الضَّيْعَه.. يَا أَهَالِي الضَّيْعَه..
جميلة:
خَيْرِ انْشَاللـه.. شُو فِي؟.. هَيْئِتْكُنْ زِعْلانِينْ؟
سليمان:
فِي خَبْرِيِّه بِتْسِمّ الْبَدَنْ..
وردة:
هَاتُوا خَبّرونَا.. حَدَا مَاتْ..
أنور:
خَبْرِيِّه عَ أَصْعَبْ بِكْتِيرْ.. بِكْتِيرْ
جميلة:
أَكِيدْ حَدَا تْزَوَّجْ..
سليمان:
مَا فِي مَدْرَسِه.. فِهِمْتُو؟
وردة:
روقُوا شْوَيْ.. الْيَوْمْ عِيدْ مَارْ مَارُونْ.. مَا فِي مَدَارِسْ..
سليمان:
وْلِكْ شُو دَخَّلْ مَارْ مَارُون..
قِصِّة الْمَدْرَسِه مِنْ أَوَّلا لآخِرَا كِذْبِه
سامي:
يِعْنِي.. مُشْ رَحْ روح ع الْمَدْرَسِه؟
أنور:
لأْ يا سامي.. مُش رَحْ تْرُوح عَ الْمَدْرَسِه..
بَدَّكْ تْرُوحْ عَ الْحَبسْ إِذَا بِتْعَضّ إِبْنِي مَرَّه تَانْيِه.. فْهِمتْ
سامي:
خي.. صَارْ فِينِي عَضّ مْناقِيشْ أَكْتَرْ..
(يخرج)
لطيفة:
مُشْ مَعْقُول تِطْلَعْ الْخَبْرِيِّه كِذْبْ..
نِحْنَا مَوْعُودِينْ بِالْمَدْرَسِه، وْلازِمْ نْشُوفَا بْعِينَيْنَا..
أنور:
مُشْ رَحْ تْشُوفُوهَا بْعمرْكُنْ..
جميلة:
مُشْ مَظْبُوطْ هَـ الْحَكِي..
أَنَا شِفْتَكْ بْعَيْني عَمْ بِتْقيس الأَرْضْ.
سليمان:
أَنْوَرْ قَلّكُنْ كِذْبِه.. يِعْنِي كِذْبِه..
وْنِحْنا كِنَّا أَوّلْ مِينْ صَدَّق هَـ الْكِذْبِه
لطيفة:
وَهَـ النّدُورَاتْ اللي نْدَرْتُنْ لْمَارْ شَرْبِلْ
تَا يْصِيرْ عِنَّا مَدْرَسِه.. رَاحوا نِزْعَانْ؟
بو سامي:
مَا عَ الِحْسَابْ مَا مَعِكْ مَصَارِي..
قَبلْ ما تِنْدرِي وِتْرَوّحِي مِصْرِيَّاتِكْ
دْفَعِيلِي حْسَابْ الدِّكَّانْ.
لطيفة:
مَارْ شَرْبِلْ مُشْ مِتْلَكْ بِيحِبّْ الْمَصَارِي
بو سامي:
وْشُو عَمْ تِنْدْرِيلُو.. حُمُّصْ وْلُوبْيِه؟
لطيفة:
لأْ.. شْوَيِّةْ زَيْتْ وْشَمَعْ عَسْلِي.. مَبْسُوطْ هَلَّقْ؟
وردة:
يَا ضِيعَانْ مَا جْرَشْتِي كِشِكْ يَا ورْدِه..
نِزْلُوا كْتَافِكْ وْمَا داقُوا الرَّاهبات كِشْكَاتِكْ..
جميلة:
رُوحُوا تَا نْرُوح عَ عِبْرِينْ..
أنور:
نِحْنَا كِنَّا بْعِبْرِينْ.. هَوْنِيكْ عْرِفْنَا إِنُّو مَا فِي مَدْرَسِه..
سليمان:
كِنَّا كِلّ مَا نْشُوفْ رَاهْبِه نِشْكِرْهَا عَ مَشْرُوعْ الْمَدْرَسِه..
وْلا رَاهْبِه طِلع مَعَا خَبَرْ..
أنور:
رْجِعْنَا رِحْنَا لْعِنْدْ سَيِّدْنَا الْبَطْرَكْ.. كَمَان مَا مَعُو خَبَرْ..
نِحْنَا وْرَاجْعِينْ عَ الضَّيْعَه..
سْمِعْنَا مَنِ النَّاسْ الرّاكْبِينْ مَعْنا بِالْبُوسْطَه
إِنُّو في شَبابْ مَارْقينْ بالْمَنْطْقَه،
حَبُّوا يِمْزَحُوا مَعْنَا..
لطيفة:
حَبّوا يِمْزَحُوا مَعْنَا؟..
خِرْبُوا بْيُوتْنَا وْحِرْمُونَا مْنِ الْمَدْرَسِه..
هدى:
يِعْنِي مَا فِي مَدْرَسِه؟.. بَحّْ..
جميلة:
بَحّْ وْسِتِّينْ بَحّْ.. لاَزِمْ نِتْحَرَّكْ.. لاَزِمْ نِعْمِلْ مْظَاهْرَه..
بو سامي:
لازِمْ نِخْرُبْ الدِّنِي.. لاَزِمْ مَا نِسْكُتْ إِلاَّ مَا تِجِي الْمَدْرَسِه..
أنور:
شُو قَوْلْكُنْ نِحْرُقْ الْحِرِشْ.. وْتُوصَلْ دَخِنْتُو عَ عِبْرِينْ..
لطيفة:
إِذَا حْرَقْتُوا الْحِرْشْ مْنِحِتْرِق مَعُو..
مِينْ بَدُّو يْخَلِّفْ وْلاَدْ لِلْمَدْرَسِه؟
(يدخل سامي وهو يصيح)
سامي:
بَيِّي.. بَيِّي.. وِصْلِت الْمَدرَسِه عَ الضَّيْعَه..
بو سامي:
ما فيك تْبَطِّل كذْب يا صَبِي؟
سامي:
وْرَحْمِةْ جِدِّي أَنا شِفْتَا.. حَامْلِه شَنْطَه بْإيدا..
بو سامي:
مدرسِه حامْلِه شَنْطَه؟!.. قَرِّب لْهَوْن تا إِشْمِطْلَكْ دِينَيْك..
قِلْتِلَّكْ: قَرِّب لْهَوْن..
جميلة:
سامي مَعُو حَقّ يا جماعَه.. أنا شَايْفِه رَاهْبِه جايي صَوبْنا..
وردة:
دَخِيلْ أَللـه.. هَيِئْتِكْ مِتلْ إِبْنِكْ سامي..
فِيكِي تْقُولِيلْنَا وَيْنْ الرَّاهْبِه؟
جميلة:
تْطَلّعِي قِدَّامِكْ بِتْشُوفِيهَا..
لطيفة:
شِفْتَا.. شِفْتَا.. وْبِالْعَلامِه وِصْلِت عْلَيْنا..
(تدخل إحدى الراهبات)
الجميع:
يا أَهْلا بِأختْنا الرَّاهْبِه..
الراهبة:
أَللَّه مَعْكُنْ يا أهالي الضَّيْعَه.. شَايْفِه بِوْجُوهْكُنْ حَكي..
سليمان:
حَكِي كْتير.. مِنْ هَوْن لْعِبْرِينْ..
الراهبة:
خَيْر انْشَالله شُو فِي؟
جميلة:
يَا رَاهْبِتْنَا.. مْنِتْرَجَّاكِي تْقُولِيلْنَا..
رَحْ تِتْعَمَّرْ مَدْرَسِه بْضَيْعِتْنَا أَمْ لأْ؟
الراهبة:
مِتل ما إِنْتُو بَدّكُنْ..
أنور:
(يشعل قدَّاحته)
شُو قَالِتْ؟.. بَدّي أَعْرِفْ شُو قَالِتْ..
قَبِلْ مَا إِحْرُقْ الْحِرْشْ..
الراهبة:
مُشْ سامْعِينْ الشَّاعِرْ شُو قالْ:
إذَا الشَّعْبُ يَوْماً أَرَادَ الْحَياةَ
فَلا بُدَّ أَنْ يَسْتَجِيبَ الْقَدَرْ
أنور:
مُشْ عَمْ نِفْهَمْ عْلَيْكِي يا راهْبِتْنا،
حَكْيِكْ صَعْب كْتِيرْ وْنِحْنَا فِهمْنا عَ قَدّنا..
أنا طالِعْ إِحْرُق الْحرْش..
الراهبة:
إِذَا ما فْهِمْتُوا شُو قال الشّاعِرْ،
لازِمْ تِفْهَمُوا شُو قالْ الْمَسِيحْ
جميلة:
وْشُو قالْ الْمَسِيحْ.. عَجّلِي قُولِي قبْل ما يِحْرُق الْحرْش؟
الراهبة:
قَال سَيّدْنا يَسُوع الْمَسِيحْ: إِقْرَعُوا يُفْتَحْ لَكُمْ
أنور:
(يشعل قداحته مرة ثانية)
مُشْ عَمْ إِفْهَمْ عْلَيْكِي أَبَداً..
لازِمْ إِحْرق الْحِرْش..
الراهبة:
إِذَا كانْ حَرْق الْحِرْش بْيِعْمِلّكُنْ مَدْرَسِه
أَنا طَالْعَه إِحْرقُو مَعْكُنْ..
جميلة:
ساعْدينا يا أختْنا الرَّاهْبِه..
وْلادْنا ما بْيَعْرفُوا يْفِكُّوا الْحَرْف..
الراهبة:
بالقَديم كانُوا يْعَلّمُوا تَحْت السّنْديانِه..
بْهَـ الأَيَّامْ لازِملْكُنْ أُوضَه..
حَدَا مِنْكُنْ عِنْدُو أُوضَه فاضْيِه وْلَوْح أَسْوَدْ؟
بو سامي:
أَنا بِتْبَرَّعْ بْدِكَّانْتِي..
دِكَّانْتِي عِنْدا مَوْقَع اسْتراتيجي بْنِصّ الضَّيْعَه،
وْبِتْسَاعْ أَرْبْعِينْ بِنْت وْصَبِي قَاعْدِينْ عَ كْراسِيهُنْ.
الراهبة:
عَظِيمْ.. بعْد ناقِصْنا جَرْس المدرسِه
أنور:
فِدَّانِي عِنْدُو جَرْسَه بَعْدَا جْدِيدِه.. مِسْتعِد يِتْنازَلْ عَنْها..
الراهبة:
فَإِذَنْ.. مِنْ بُكْرَا وْرَايِحْ..
فِيكُنْ تْجِيبُوا وْلادْكُن عَ الْمَدْرَسِه
جميلة:
أيَّا مَدْرَسِه؟..
الراهبة:
مدرسة سَيّدِة لُبْنانْ.. وْرَحْ كُونْ أَنا رَئيسْة الْمدرسِه
سليمان:
عَمْ تِحْكِي جَدّ..
الراهبة:
مبارِحْ عَيّنُونِي بْضَيْعِتْكُنْ..
وْطَلْبُوا مِنِّي أَسِّس أَوّل مَدْرسِه لْراهْبات الْعَيْلِه الِمْقَدّسِه..
جميلة:
زَلِغْطوا يا نِسْوان.. وارْقِصُوا يا رْجالْ..
زَمَّرْ بْنَيِّكْ يا ضَيْعِتْنا.
(موسيقى راقصة)
**
