Charbel Baini
Attarboush
The hat
**
مثلها عام 1989 أكثر من 300 تلميذ وتلميذة من الصفوف الابتدائية في معهد سيدة لبنان ـ هاريس بارك سيدني أستراليا، وقد حولناها الى عدة أشخاص.
**
أشخاص المسرحية
الشاعر
بو يوسف
ام يوسف
سعدى
منتورة
عصام
ناجي
البوسطجي
قارىء البخت
البيك
ازلام البيك
**
المشهد الأول
"تدخل أم يوسف وهي تنظر الى طربوش أحمر معلّق على غصن شجرة الأرز، تغني وهي ترقص على لحن أغنية الفنان مارسيل خليفة"
ام يوسف:
ـ1ـ
علّيها علّي علّيها
هالشجره الطربوشنا فيها
طربوشنا وحدو بيجمعنا
والدنيي كلاّ بتسمعنا
علّيها علّي علّيها
أرزتنا البدنا نحميها
ـ2ـ
أرزتنا يا طربوشي بالتاريخ
مضوّايه بأعياد الناس بلا تواريخ
يا نجمه دخلك ضوّيها
زينتنا بدّا تحلّيها
علّيها علّي علّيها
ـ3ـ
ضلّك عالي بين الناس بدون قياس
لونك أحمر يا طربوش فوق الراس
ناس بتعطي.. ناس بتجني
وناس المال بيلعب فيها
علّيها علّي علّيها
"يدخل بو يوسف وعلى كتفه بندقيّة صيد"
بو يوسف:
أنا صيّاد شارد بالبراري
أصيد الطير ورفوف الضواري
أنا أصطاد وأم يوسف تسلّق
تا تطبخلي شي طبخه من عياري
أم يوسف:
تعا شوف يا بو يوسف.. طربوشك نعلّق بشجرة الأرز..
بو يوسف:
طربوشي أنا؟
ام يوسف:
لأ.. طربوش جدّك..
بو يوسف:
جدّي ألله يرحمو ما كان يلبس طربوش..
ام يوسف:
وشو كان يلبس يا تقبرني؟
بو يوسف:
لبّاده.. وكان حقّا ثروه بهيديكي الايام..
ام يوسف:
وليش هوّي، ألله يرحمو، ورّتنا غير اللباده؟
بو يوسف:
شو بدنا بالميتين هلّق.. تعي تا نشوف لمين هالطربوش..
ام يوسف:
لا تمد إيدك عليه.. يمكن يكون ملغوم..
بو يوسف:
هيدا طربوش مش سياره..
ام يوسف:
معقول يكون طربوش مفخّخ..
بو يوسف:
عقلي يا أم يوسف عقلي.. لازم نشوف لمين هالطربوش ونردّو لصاحبو..
ام يوسف:
وكيف بدّك تعرف مين صاحبو..
بو يوسف:
يمكن يكون كاتب اسمو عليه..
ام يوسف:
ووين بدّو يكون كاتبو.. ع الشرّابه؟
بو يوسف:
حمليني شوي تا طالو يا أم يوسف..
ام يوسف:
شو عم بتقول؟ أنا بدّي إحملك؟!
بو يوسف:
نتفه بس.. ألله يخليكي..
ام يوسف:
ولِكْ يا رجّال.. الظاهر ما بتشوف حالك ع المرايه.. نازلّي بأكل المجدره والهريسه والفتّوش وبدّك ياني إحملك..
بو يوسف:
طيّب.. إذا حملتك أنا بتعطيني الطربوش؟
ام يوسف:
يا باطل.. بو يوسف بدّو يحملني قدّام الناس..
بو يوسف:
حلّي عنّي لا بدّي إحملك ولا بدّي الطربوش..
"يخرج بو يوسف"
ام يوسف:
آخ منّك آخ يا طربوش
شرّابتك بالجو عم بتطوش
نزال نتفه نزال تا طعميك
محضرتلك طنجرة فتّوش
**
المشهد الثاني
"يدخل ناجي وعصام وسعدى"
ناجي:
شامم ريحة فتّوش ام يوسف.. قولكن مين هالمحظوظ البدّو ياكل طنجرة فتّوش؟
عصام:
له.. له.. يا ام يوسف، عم تعزمي الطربوش ع اكل الفتّوش؟
سعدى:
طربوش!.. أيّا طربوش؟
عصام:
هيدا اللي معلّق بالشجره..
سعدى:
ياي شو حلو هالطربوش، بيلبق لمخّ بيي أنا..
ناجي:
مخّ بيّك بدّو دست مش طربوش.. هيدا بيلبق لمخّي أنا.. زيحوا شوي تا هزّ الشجره.. ووقّع الطربوش..
سعدى:
يا دل دلّو البيوقّع الطربوش..
ناجي:
فيكي تفهميني ليش؟
سعدى:
يمكن يكون هالطربوش طربوش البيك.. مين بيعرف؟
عصام:
دخيلكن هربوا.. خربت بيوتنا..
ناجي:
وإذا هبّت عاصفه وطيّرتو؟
عصام:
لا تخاف.. طربوش البيك ما بيطير إلا بواحد من هالتلاته: الانتخاب، الاغتيال، او الانقلاب..
ناجي:
بلا كترة حكي.. هيدا الطربوش طربوشي، والمش عاجبو يبلّط البحر..
عصام:
لا تمد إيدك ع الطربوش.. فهمت؟
ناجي:
ليك مين عم يحكي ليك.. كلمه تانيه وبخلي هالخيزرانه تعلّم ع جلدك..
عصام:
انت يا ابن منتوره الوقعت بالجوره بدك ترفع ايدك عليي؟
ناجي:
وبدّي خلّي الوجع ينام معك ليليه..
سعدى:
عيب عليكن يا شباب، كل ايامكن اصحاب، هيك بتخلوا الطربوش يفرّق بيناتكن..
ناجي:
وحياة هالطربوش.. بدّي هزلك عضامك..
عصام:
ناطرك ع العين.. لا تتأخّر..
"يخرج عصام"
سعدى:
شو قصتك يا هالطربوش.. أول دخولك خناقه طولك.. ولِكْ روح ألله يسعدك ويبعدك..
"تخرج سعدى"
ناجي:
"ينظر بحسرة الى الطربوش ويغني"
ـ1ـ
طربوش مشعشع نورو
قياسو ع قياسي
يوميّه بدّي زورو
تا يفرح راسي
ـ2ـ
حطّو ع راسي وإحكم
إحكم ببلادي
تا يصفّي فيها الحصرم
عنب لولادي
ومستقبل شعبي إرسم
وتزيد عيادي
وتا الشر بإيدي إلجم
بحرق الكراسي
**
المشهد الثالث
"يدخل قارىء البخت بذقن طويلة، وهو يحمل العديد من الأشياء السحرية الغريبة"
قارىء البخت:
مبصّر، مبرّج، بشوف البخت، بكتب حجابات، بفك الكتيبه، برجّع الغيّاب، بقرّب العرسان، بحاكي الموتى.. مبصّر، مبرّج..
منتورة:
وينك يا مبصّر؟ صرلي ساعه إركض وراك، وعيّطلك بأعلى صوتي، وانت نازل بهالنزله متل الجاموس المعقوص.. كنت خدت حنه الطرشا بطريقك..
قارىء البخت:
حيّ.. حيّ.. إيش فيني ساعدك يا بيّتي؟
منتورة:
بدي تجبلي عريس.. عم تفهم؟ بدي عريس..
قارىء البخت:
بدّك عريس؟ هيدي صعبه كتير..
منتورة:
ما بيهمني.. المهم يجيني عريس..
قارىء البخت:
هيدي قضيّه مكلفه كتير كتير..
منتورة:
عشر ورقات؟
قارىء البخت:
زيدي.. زيدي..
منتورة:
عشرين ورقه؟
قارىء البخت:
زيدي يا بنيّتي زيدي..
منتورة:
بح..
قارىء البخت:
إيش يعني بح؟
منتورة:
بح.. يعني بح..
قارىء البخت:
أني أجبلك عريس بعشرين ورقه.. أكيد إنتي مجنونه..
منتورة:
ألله يخليك.. ببوس إيدك.. جبلي عريس..
قارىء البخت:
يا بنيّتي الجن ما بيعرفوا بالعواطف.. بدّن دراهم.. دراهم..
منتورة:
وحياتك.. وحياة ملك الجن ما معي إلا عشرين ليره.. حسّكتن قرش قرش من بيع الكشك..
قارىء البخت:
اسمعي يا بنيّتي.. أني رح جبلك عريس قدر ما تدفعي..
منتورة:
عشرين ليره..
قارىء البخت:
يمكن يطلع ختيار..
منتورة:
بدك تجبلي عريس ختيار؟
قارىء البخت:
إيش بتريدي أجبلك عريس بالملفه وعم يرضع بعشرين ليره؟
منتورة:
بدّي ياه لابس طربوش أحمر متل اللي معلّق ع الشجره، وشواربو متر، وزندو بيفلح الصخر.. وجزمتو..
قارىء البخت:
ع مهلك.. ع مهلك.. دوّختيني ودوّختي ملك الجن.. حيّ.. حيّ..
منتورة:
خيّ.. خيّ.. الظاهر انفرجت..
قارىء البخت:
معقده يا بنيّتي معقده.. حيّ.. حيّ..
منتورة:
ولِكْ حيّ.. بدّي فرجي أم يوسف كيف العرسان بيركعوا قدّامي..
قارىء البخت:
جاييكي عريس ما بيركع..
منتورة:
خليه واقف.. المهم يجي.. والله والله..
قارىء البخت:
لا تقولي والله.. بيهرب ملك الجن..
منتورة:
ويلي يا ويلي.. كرج لساني وانهد حيلي.. يا أم يوسف، نكايه فيكي وبإبنك يوسف.. جاييني عريس ما بيركع.. شواربو متر..
قارىء البخت:
آسف يا بنيّتي.. جاييكي عريس مالو شوارب..
منتورة:
حالق شواربو.. أنا هيك بحبّو.. وين صار؟
قارىء البخت:
إدفعي.. إدفعي..
منتورة:
وينو؟ وينو؟ دخل عينو.. فيني شوفو؟
قارىء البخت:
بالمنام.. بالمنام..
منتورة:
وشو بدّو ينفعني بالمنام؟
قارىء البخت:
لازم تنامي وتبصريه قبل ما تلاقيه..
منتورة:
صرلي عشرين سنه إبصر بنومي ومتل قلّتها..
قارىء البخت:
هيك قللي ملك الجن..
منتورة:
ليك لا تكون عم تضحك عليي وتسرق مصرياتي..
قارىء البخت:
إدفعي يا بنيّتي إدفعي..
منتورة:
هيدي عشر ورقات ع الحساب، وبس يجي العريس بكفيلك..
قارىء البخت:
حيّ.. حيّ.. ملك الجان زعلان وبالبراري هربان..
منتورة:
والعريس؟..
قارىء البخت:
إدفعي حسابك بتلاقي أحبابك..
منتورة:
لابس طربوش؟
قارىء البخت:
طربوش.. شروال.. كلّو بقلب بعضو..
منتورة:
ولِك روح ألله يوفقك.. أنا رايحه زرّك لأم يوسف اللي حرمتني من إبنا يوسف وزوجتو لحنّه الطرشا..
قارىء البخت:
مبصّر، مبرّج، مبصّر مبرّج..
"يخرج قارىء البخت"
منتورة:
ـ1ـ
لوْلا بْتَعْرِف إنتَ وَيْن
بْأَيَّا قلبْ.. بْأَيّا عَيْن
بْتِهْديني باقاتْ زْهُورْ
وْعَ جْرَيي بِتْرِشّ عْطُورْ
أَرْخَصْها "كِلْفين كْلايْن"؟
ـ2ـ
كنْت بْتِهْديني "الشّنالْ"
"نمره خمسه".. مَعْ موّالْ
وِتْقللي: بْحِبِّك كْتيرْ
أَغْلَى مِنِّكْ ما بيصيرْ
بْيِرْخَصْلِك دَمّي والمالْ
ـ3ـ
وحدَك إنْتَ الْساكنْ فيي
بدقّة قلبي.. وِبْعينيي
عم تِمْلِكْني طولْ وعرْض
بفزَع مَرّه يطلّ البغض
وتِتْركني حْكايِه مِنْسِيّه
"يدخل عصام"
عصام:
حلمي الوحيد بهالدني إنّك تحبيني.. وإهديكي "كلفين كلاين" وشانال" وأحلى عطور..
منتورة:
عصام.. وين كنت؟.. وكيف جيت؟ وشو عم تعمل هون؟
عصام:
وين ما بتكوني أنا بكون.. بلحقك متل خيالك..
منتورة:
إنت بتحبني؟
عصام:
بموت فيكي..
منتورة:
وليش ما بتقول.. شو بعدك ناطر؟.. من خمس دقايق روّحت عليي عشر ليرات..
عصام:
كنتي عم بتبرجي تا يجيكي عريس.. والعريس ناطرك من زمان..
منتورة:
معقول؟ لأ.. مش معقول.. قولك المبرّج مبصّر هوي اللي ودّاك لعندي.. العمى بعشر ليرات وصل العريس..
عصام:
بس نتخلّص من قصّة الطربوش بدّي إطلبك من أهلك..
منتورة:
إذا كان هيك.. راحوا العشر ليرات.. وراح العريس لأن قصّة الطربوش مش رح تخلص..
"تخرج منتورة غاضة"
عصام:
وين رايحه؟ ليش زعلتي؟.. أنا بحبّك..
"يلحق بها"
**
المشهد الرابع
"بو يوسف يبيع الطرابيش قرب الشجرة"
بو يوسف:
أول ما أنا شفتو
ومن الشرّابه عرفتو
ولولا ام يوسف يا ناس
كنت من الشجره خطفتو
"تدخل أم يوسف"
ام يوسف:
شو بها ام يوسف يا بو يوسف؟ منعتك تلبس الطربوش.. إي لو منّي ما صرت بيّاع طرابيش..
بو يوسف:
طرابيش للبيع.. طرابيش للبيع.. الطربوش بعشره وام يوسف ببلاش..
ام يوسف:
بدّك ترتاح مني ما هيك؟ إي زيح تا قلّك.. طربوش بو يوسف للبيع.. اللي بيشتريه بيطلعلو شروالو ببلاش..
بو يوسف:
ما عتدي غير هالشروال.. بدّك تعطيه ببلاش؟
ام يوسف:
والله والله لبيعك انت كمان..
بو يوسف:
طرابيش للبيع.. طرابيش للبيع
"تدخل سعدى"
سعدى:
يا بو يوسف.. عندك طربوش نسواني؟
بو يوسف:
بأمر شواربِك..
سعدى:
أنا ما عندي شوارب.. لا تقوم مضيّع بيني وبين أم يوسف..
ام يوسف:
أنا عندي شوارب يا بنت الناطور.. فلّي من هون.. نحنا ما عنا طرابيش نسوانيه..
سعدى:
أنا عم إحكي مع بو يوسف.. مش معك..
ام يوسف:
أنا ميكرفون بو يوسف.. صوتو ما بيطلع إلا بأمري أنا.. يللا يللا حلّي من هون.. قال طربوش نسواني قال..
بو يوسف:
إذا ضليتي هون مش رح بيع ولا طربوش..
ام يوسف:
لعمرك ما تبيع.. عامل طرابيشك مصيده للنسوان وعم تفتح تمك كمان..
بو يوسف:
خليني استفتح.. بترجاكي رجعي ع البيت..
ام يوسف:
رح ارجع ع البيت.. بس رح اترك عيوني هون تا يراقبوك منيح.. بخاطرك..
"تخرج ام يوسف"
بو يوسف:
طرابيش للبيع.. طرابيش للبيع..
"يدخل البيك وأزلامه، طربوش البيك طوله نصف متر"
البيك:
العوافي يا بو يوسف.. خبّروني إنك عم بتبيع طرابيش حد الشجره.. قلت بجي إشتري طلابوش من عندك..
بو يوسف:
والله يا بيك ما عندي طربوش ع قياسك.. انت اسمالله عليك طربوشك بيدق بالسقف..
البيك:
بدّك تحط أربع خمس طرابيش فوق بعضن تا يطلعوا قد طربوشي..
بو يوسف:
لا تزعل مني يا بيك إذا قلتلك إنّو طربوشك عاملك متل شي مهرّج..
أحد الأزلام:
شو عم تحكي يا قليل الأدب.. زعيمنا مهرّج؟
بو يوسف:
فتّح دينيك منيح.. أنا ما قلت مهرّج.. أنا قلت متل المهرّج.. في فرق كبير ما هيك بيك؟
البيك:
انتبه ع حكيك يا بو يوسف.. أحسن ما إحرمك تبيع تحت الشجره..
بو يوسف:
هيدي الشجره ملك الدوله يا بيك.. مش ملك أبوك..
البيك:
شو نسيت إني أنا ابن الدوله؟
بو يوسف:
وأنا إبن مين.. ابن الجاره؟
البيك:
صادرولو طرابيشو وخدوهن ع المخفر بتهمة البيع بدون رخصه..
الازلام:
بأمرك سيدنا..
"يضربون بو يوسف ويحطمون طاولته ويصادرون طرابيشه، والبيك يغني على لحن أغنية على شط بحر الهوى"
البيك:
على شط بحر الحكم
رسيت طرابيشنا
من دون ثقافه وعلم
بالأبّهه عشنا
على شط بحر الحكم
رسيت طرابيشنا
"يدخل الشاعر وهو يحمل قنينة عرق، ويتكلم وكأنه سكران"
الشاعر:
صوتك حلو يا بيك.. بس مبحوح شوي ولازملو تزييت.. خدلك شفّة عرق بيصير أحلى..
البيك:
بعدك عايش يا هالشاعر.. فكّرتك مت من زمان..
الشاعر:
انا حالف اني ما موت تا تموت قبلي..
"يهجم عليه أزلام البيك"
احد الازلام:
إخرس يا كلب.. ألله يطول بعمر البيك..
البيك:
اتركوه.. هيدا واحد مجنون..
"يخرج البيك وأزلامه، يرفع الشاعر قنينته عالياً"
الشاعر:
كاس موتك يا هالطربوش
أوف أوف أوف
هلّق بلّشنا يا جار
نفزع من كلب السلطه
الطربوش ع غصنو محتار
لازم قدّملو بلطه
"يجلس الشاعر قبالة الطربوش"
**
المشهد الخامس
"تدخل منتورة وهي تغني"
منتورة:
ع اللوما اللوما اللوما
ع اللوما اللوما اللوما
الطربوش العم بيلالي
خلاّ الدنيي مهمومه
يا لبناني بقروشك
لا تتلهى.. وبكروشك
كبّر نتفه طربوشك
تا تصفّي إبن حكومه
"تتطلع بالطربوش العالق بالشجرة وتصرخ"
يا أهالي الضيعه.. يا أهالي الضيعه.. شفت الطربوش عم ينهز..
"يدخل ناجي"
ناجي:
خير انشالله يا منتوره؟
منتورة:
شفت الطربوش عم ينهز..
ناجي:
شو عم يتقولي؟ ولِكْ إذا انهز الطربوش.. انهزّت البلد..
منتورة:
أول شي انهزّت الشجره..
ناجي:
إيه..
منتورة:
تاني شي انهز الطربوش
"يتدخل الشاعر الجالس بالقرب من الشجرة"
الشاعر:
صرلي ساعه قاعد هون وعم اتطلع بالطربوش وما شفتو انهز..
ناجي:
كيف بدّك تشوفو انهز وانت سكران..
منتورة:
أكيد في حدا بدّو يسرق الطربوش
ناجي:
إذا انسرق الطربوش.. يا دلّنا من زلم البيك..
"يدخل أزلام البيك"
أزلام البيك:
شبّيك لبّيك.. أزلام البيك بين إيديك..
الشاعر:
العمى.. شو مركبين للطربوش جرس إنذار تا رأساً وصلتو؟
أحد الأزلام:
مين هزّ الطربوش؟
منتورة:
لمّن شفت الطربوش عم ينهز ندهت بالعالي..
احد الازلام:
انتو هون عم تعملوا مؤامره ع الطربوش..
ناجي:
يا جماعه نحنا خايفين أكتر منكن ع الطربوش..
احد الازلام:
الظاهر ما سمعتوا الأوامر..
منتورة:
سمعناها، وحفظناها وعلمناها لولادنا كمان..
احد الازلام:
إذا كان هيك.. فيكن تقولولي شو عم تعملوا حد الطربوش؟
منتورة:
جينا نقدّملو محبتنا..
احد الازلام:
انتو جماعه أشرار.. وعم تلعبوا بالنار..
الشاعر:
يا خواجه فيني إسألك سؤال؟
احد الازلام:
سآل وعجّل..
الشاعر:
إنتو شو علاقتكن بالطربوش؟
احد الازلام:
نحنا زلمو..
الشاعر:
ونحنا شعبو..
احد الازلام:
الطربوش ما عندو شعب، عندو دوله، ونحنا زلم الدوله..
الشاعر:
ويا تعتير هالدوله..
"يضربون الشاعر ويرمونه أرضاً.. يخرج ناجي ومنتورة"
احد الازلام:
شو عم بتقول؟ شو عم بتقول؟ عامل مؤامره ع الطربوش.. وعم تحكي كمان.. امشي قدامنا.. يللا.. يللا..
الشاعر:
مش رح إنهز من أرضي.. ولو قتلتوني..
احد الأزلام:
هيدا شاعر مجنون.. البيك ما قلل عقلو عليه.. تركوه وروحوا تا نخبّر البيك..
"يخرج الأزلام يرفع الشاعر قنينته"
الشاعر:
كاسك يا شعبي المسكين
أوف أوف أوف
هالطربوش البالغابه
جنّن أهلي وأصحابي
تا ريّح شعبي المسكين
لازم قصّ الشرّابه
**
المشهد السادس
"بو يوسف وام يوسف"
بو يوسف:
شو رأيك يا ام يوسف افتح دكانه للطربوش؟
ام يوسف:
مبارح كسرولك الطاوله وصادروا الطرابيش وطعموك كفّين وبعدك عم بتفكّر تفتح دكانه..
بو يوسف:
نكايه بالبيك وزلمو.. بدّي افتح دكانه برخصه قانونيه..
ام يوسف:
وشو بدّك تبيع بهالدكانه غير الطرابيش؟
بو يوسف:
بدي بيع وطنيّه..
ام يوسف:
ليش بقي عنّا وطنيّه تا تبيعها؟
بو يوسف:
يا ام يوسف.. سوق الوطنيّه ماشي بهالايام.. بالراديو بيبيعوا وطنيه، وبالتلفزيون وطنيه.. وبالجرايد وطنيّه.. حتى بالحفلات الخيريه عم بيبيعوا وطنيّه..
ام يوسف:
طيّب حسبني زبونه وبدّي إشتري منك.. بفديش سندويش الوطنيه؟
بو يوسف:
سندويش الوطنيه المطربش بدولارين بس..
ام يوسف:
شو يعني مطربش؟
بو يوسف:
نسبةً الى الطربوش..
ام يوسف:
روح شفلك شي شغله نستفاد منها.. قال سندويش مطربش قال..
بو يوسف:
حلّي عنّي يا ام يوسف.. أنا وقت اللي اشتريتك طلعت خسران..
ام يوسف:
شو عم بتقول؟
بو يوسف:
راحت عليك يا بو يوسف..
"يهرب"
ام يوسف:
والله والله مش رح خليه ينام ليله جوا البيت.. أنا ام يو يوسف أنا.. يا طربوش النحس، يا بو الشرّابه الأطول من دنب الكرّ.. حل عنّا بقى.. قطعتنا ألله يقطعك.. لو منّي مرا كنت عربشت ع الشجره وريّحت الناس منّك.. يا ناس يا هُو.. وينكن من شو خايفين؟ الاحتجاج بيبلش بصوت.. حدا منكن يحتج.. حدا منكن يفتح تمّو.. بتقبروا ولادكن وبتضحكوا ع قبورن.. يا ولاد أكبر مهزله بالتاريخ.. فيقوا. يا شعب أكبر هجره بالعالم.. علّي صوتك. يا مقهورين اتحدوا. الطربوش طربوش ليش خايفين منّو وانتو عملتوه؟ إنزل إنزل يا طربوش.. ما بدنا هالشعب يطوش.
"الشاعر الجالس بالقرب من الشجره يرفع قنينته عالياً"
الشاعر:
كاسك يا أم يوسف..
أوف أوف أوف
يا أم يوسف كلماتك
صحّوني من هالسكره
شعبك.. بحلف بحياتك
مش رح يتحرّك بكرا
**
المشهد السابع
"يدخل البوسطجي وهو يحمل بيده رسالة"
البوسطجي:
مكتوب للطربوش.. مكتوب للطربوش
"تدخل منتورة"
منتورة:
ليش الطربوش بيقرا تا يودولوا مكاتيب؟
البوسطجي:
يا ست.. عملي معروف دليني وين الطربوش..
منتورة:
تطلّع فوق راسك بتشوفو
البوسطجي:
يا ست.. ما عندي وقت، دليني وين الطربوش؟
منتورة:
قلتلّك الطربوش فوق راسك..
البوسطجي:
أنا بوسطجي.. والبوسطجي ما بيلبس طربوش..
"يقترب منه الشاعر"
الشاعر:
يا بوسطجي يا بوسطجي
الطربوش مش ممكن يجي
معلّق بـ شجره عاليه
والزلم حدّو مدججه
البوسطجي:
زلم؟.. أيّا زلم؟.. مش عم إفهم شي.. يا ست.. دليني ع الطربوش إذا بتريدي..
منتورة:
علّي علّي علّي راسك
الطربوش بيطلع ع قياسك
البوسطجي:
شفتو.. هلق شفتو..
منتورة:
وكيف بدّك تسلمو المكتوب؟
البوسطجي:
قالولي تا إقرا المكتوب قدام الطربوش..
منتورة:
ومن مين هالمكتوب؟
البوسطجي:
من هيئة الأمم المتحده..
الشاعر:
وات.. وات.. وات؟ يو سبيك إنكليش..
البوسطجي:
نو أي سبيك لبناني، يا جماعه اسمعوني.. هيئة الامم المتحده حبّت تتدخّل وتحل مشكلة الطربوش..
منتورة:
خلّيها تحل عنّا ونحنا حرّين بطربوشنا..
البوسطجي:
مش ممكن أبداً، الطربوش صار قضيّه عالميه عم يحكوا فيها بواشنطن، بموسكو، بباريس، بلندن.. وكل دول العالم..
الشاعر:
انسرقت دول وما حدا فتح تمّو.. الظاهر طربوشنا محظوظ كتير
البوسطجي:
سمعوا منيح إذا بتريدوا.. يا حضرة الطربوش..
الشاعر:
جاوبو يا حضرة الطربوش شو باك ساكت؟
البوسطجي:
من هيئة الأمم المتحدة لجناب ولدنا الفاضل الطربوش.. علمنا بمزيد الأسف واللوعة، ما أصابكم من إساءات متتالية من جهات لا تعرف الرحمة، ولا سمعت باسم الضمير الانساني، لذلك جئنا نحل مشكلتكم بالتي هي أحسن، إنزل عن الشجرة وارجع الى مكانك، تاجاً على رأس صاحبك كائناً من كان، ونعدك بأن نزود شعبك بالاعاشات الانسانية الى أبد الآبدين..
منتورة والشاعر:
آمين..
البوسطجي:
سلمت الأمانه.. بخاطركن..
"يخرج البوسطجي. الشاعر يرفع قنينته"
الشاعر:
كاس الأمم المتحده..
أوف أوف أوف
خافت كل المعموره
ع الطربوش اللبناني
ونص الدنيي مقهوره
ضايع حقّا الانساني
**
المشهد الثامن
"يدخل أزلام البيك"
أحد الأزلام:
أوامر أوامر.. ممنوع حدا يدقر الطربوش.. ممنزع حدا يمرق حد الطربوش، ممنوع حدا يتطلّع بالطربوش.. سامعين؟
"تدخل سعدى"
سعدى:
كيفك يا طربوش؟
أحد الأزلام:
وممنوع حدا يسلّم ع الطربوش..
الشاعر:
أوف أوف أوف
ألله يديمك يا طربوش
رمز الحكم العثماني
قدّامك بيزتّوا قروش
وجيبة شعبك طفرانه
أحد الأزلام:
وممنوع حدا يغنّي للطربوش
الشاعر:
شو بكن يا جماعه.. بدكن تمنعونا نتنفس؟
أحد الازلام:
بعد مكتوب هيئة الأمم المتحدة للطربوش.. ممنوع تلهتوا حد الطربوش..
الشاعر:
فيكن تفهّمونا إنتو مين؟
أحد الازلام:
نحنا الحراس..
الشاعر:
حرّاس شو؟
أحد الازلام:
حرّاس الطربوش..
منتورة:
ومين عم يدفعلكن تا تحرسوه..
أحد الازلام:
جناب البيك..
منتورة:
أيّا واحد منّن.. ما هنّي أكتر من الشعب..
أحد الازلام:
مش مسموح نحكي..
ناجي:
إذا كان هالطربوش طربوش البيك، اعملوا معروف نزلّوه عن هالشجره وخودولو ياه..
منتورة:
وهيك بتكونوا ريحتونا من المشاكل..
أحد الازلام:
حلو.. حلو.. حلو.. الظاهر ناويين تقطعوا رزقتنا.. ما نحنا عايشين ع حساب الطربوش..
منتورة:
يعني ما في حل؟
أحد الازلام:
الحل انو تنفذوا الأوامر..
الازلام:
"بصوت واحد"
ممنوع حدا يدقر الطربوش
ممنوع حدا يمرق حد الطربوش
ممنوع حدا يتطلّع بالطربوش
ممنوع حدا يسلّم ع الطربوش
ممنوع حدا يغنّي للطربوش
ممنوع حدا يطعمي الطربوش
أحد الأزلام:
الأكل مش ممنوع.. انتو جيبولو أكل ونحنا مناكلو.. يا حراس احرسوا الطربوش..
"يتوزع الازلام على المسرح"
**
المشهد التاسع
"يقترب الشاعر من الطربوش"
الشاعر:
انتْ وحدك انتْ
خوّفت ضيعتنا
وما ضل ابن وبنتْ
راضي بعيلتنا
نزال عم قلّك
مش خرجك محلك
وسّخت أرزتنا
نزال بالوادي
نزال حتى تطوش
وتتخلّص بلادي
منّك يا هالطربوش
"يهجم عليه الأزلام"
أحد الأزلام:
نعم.. نعم.. نعم.. عم تدعي للثوره!
الشاعر:
الحاله ما عادت تنطاق.. الطربوش خرب البلد، وما عاد فينا نسكت..
احد الأزلام:
وانت شو خصّك؟
الشاعر:
أنا صوت الشعب.. وهالبلاد بلادي..
احد الازلام:
وكمان نحنا هالبلاد بلادنا، والشعب شعبنا، والطربوش طربوشنا، انت خليك سكران وما تتدخّل أحسنلك..
الشاعر:
ومن اليوم ورايح طارت السكره وإجت الفكره.. لازم ينزل هالطربوش..
"يهجم الازلام على الشاعر، يقف بوجههم ناجي وعصام ومنتورة وسعدى"
احد الازلام:
شو.. بلشتوا تتكاتفوا ضدنا.. مش رح تقدروا انتو شعب تابع للبيك..
منتورة:
فشرت.. نحنا شعب تابع للوطن وبس..
سعدى:
إذا كان الطربوش طربوشكن تفضلوا خدوه وفلّوا عنا..
الازلام:
ناطرين تا يحكي البيك..
عصام:
ليش البيك بعد ما نطق؟
الازلام:
لأ.. بعدو ساكت
ناجي:
البلاد خربت وبعدو ساكت.. قولولو يتبنى هالطربوش ويخلّصنا..
احد الازلام:
هيدا شي ما بيخصّك.. فهمت؟
ناجي:
ما بعمركن رح تصيروا بشر..
احد الازلام:
لازملك تربايه تا ما تعيد الحكايه..
الشاعر:
وعم بتقول شعر كمان.. تروك الشعر لأصحابو..
وتروك البيك لأذنابو..
احد الأزلام:
نحنا أذناب يا كرّ؟.. حسابك عنا..
الشاعر:
ما بعمرا الكلمه خافت من أذناب البيك..
احد الازلام:
قلتلّك سكون.. سكوت.. سكوت..
"يقف الشاعر ويصرخ"
الشاعر:
وْلِكْ.. ليش يا شعبي
ما بتكشف اللعبه
وتفضح الباعوك
بكمشتين قروش
وتحارب القتلوك
كرمال هالطربوش
**
المشهد العاشر
"ناجي وعصام ومنتورة وسعدى يبدأون بالصراخ"
ناجي:
إنزل إنزل يا طربوش
ما بدنا هالشعب يطوش
منتورة:
نحنا ما بدنا طرابيش
بدنا بيهالأرض نعيش
عصام:
باعوا الأرض بشرّابه
تا كتروا وحوش الغابه
سعدى:
الطربوش اللي بلون الدم
ببلادي بينقط سم
"هنا يبدأ الأزلام بالصراخ"
الازلام:
الطربوش وحدو حامينا
وجودو عم بيقوّينا
طربوشنا ألله يحميه
نحنا بالدم منفديه
اعتزي اعتزي امتنا
عم تطول شرّابتنا
يا طربوش البالعالي
لالي ع شعبك لالي
"يتصاعد صراخ ام يوسف وبو يوسف والبوسطجي، وقارىء البخت وهم يحملون اليافطات ضد الطربوش وينضمون للمحتجين"
الشعب:
إنزل إنزل يا طربوش
ما بدنا هالشعب يطوش
زلغط زلغط يا شعبي
الطربوش بإيدك لعبه
ما بدنا الطربوش يسيد
ولا بدنا نصفي عبيد
طربوش الحكم من زمان
ما خرجوا إلا النيران
ثور ثور يا شعبي
صعبه هالحاله صعبه
الشاعر:
بلّش شعبي يوعى..
منتورة:
خي.. صار فيني إتزوج.. وينك يا عصام؟
"يدخل البيك مسرعاً ويخاطب الثوار"
البيك:
أيّها الثوار.. أيها الأحرار.. أيها الزاحفون الى الحق.. آن الأوان كي نسحق الطربوش.. ونتخلّص من الذل والاستعباد.. فليسقط الطربوش..
الشعب والازلام:
فليسقط الطربوش.. فليسقط الطربوش..
الشاعر:
العمى بقلبو شو محتال.. ركب ع الثوره.. وعرف كيف يضحك ع الناس..
البيك:
أيها الشعب المناضل، يا من تكافح من أجل لقمة العيش، إنني أدعوك لسحق الطربوش بأقدام ثابتة.. الموت للطربوش..
الشعب والازلام:
الموت للطربوش.. الموت للطربوش..
الشاعر:
بلّش شعبي يموت..
"يحمل الازلام البيك على الاكتاف يرمي الشعب اليافطات أرضاً، يخرج الجميع، يتسلق الشاعر الشجرة"
الشاعر:
خلقولك الطربوش يا شعبي
معلّق ع غصن زغير
هوّي بيبقى يكمّل اللعبه
ووحدك البتطير
حامل ولادك ع أرض غربه
تِجْمع شقا وتعتير
ضربلك الطربوش شي ضربه
تا تزقزق عصافير
"يحمل الطربوش بيده، ينزل عن الشجرة، يرمي الطربوش أرضاً، يدوسه برجليه، ويصرخ"
إنتْ مش أقوى منّا.. رح نكمّل..
"يجمع اليافطات"
آخ منك آخ يا شعبي
"ينام فوق اليافطات"
**
