مثلها عام 1988 أكثر من 300 تلميذ وتلميذة من الصفوف الابتدائية في معهد سيدة لبنان هاريس بارك سيدني استراليا، وقد حولناها الى عدة أشخاص.
**
الأشخاص:
بو يوسف
ام يوسف
غانم
زمرد "زوجة غانم"
سعدى "أخت غانم"
أسعد
المختار
أزلام المختار
ساعي البريد
سلمى
عباس
أسترالي
أسترالية
الأطفال بعمر 9 او 10 سنوات:
ريما "حفيدة بو يوسف"
منتورة، عصام، محسن
**
المشهد الأول
"ريما تغني"
ريما:
ـ1ـ
هالقصّه بتحكي عن ناس
لازك نحكي عنّن
هجروا بلادُن.. شربوا الكاس
ونحنا صرنا منّن
ـ2ـ
لا تقولوا بيهاجر شعب
الشعب بيبقى محلّو
لكن من ويلات الحرب
المراكب بيطلّوا
يا بلادي.. يا دم القلب
الفلّوا ليش تا فلّوا
وتركوا خيالاتُن ع الدرب
وبيحبّوكي كلّن
ـ3ـ
سيدني الأم الحلوه السمرا
الما مننساها نحنا
غمرتنا يا بلادي غمره
وبعد الحزن فرحنا
حبّيناها.. يطوّل عمرا
احتلّت جوارحنا
هيّي والأرزات الخضرا
يا بلادي منحبّن
"تدخل أم يوسف وهي تصرخ"
أم يوسف:
وين جدّك يا ريما؟ أكيد بتعرفي وعم بتخبّي عليي.. شو قلّك قبل ما يختفي قولي؟
ريما:
صار يبوّسني متل المجنون ويقللي: لازم عيّشِك عيشه أحسن من هالعيشه يا ريما..
ام يوسف:
إنتي بتحبّي جدّك أكتر منّي.. روحي من وجّي أحسن ما إضربك..
"تخرج ريما.. تتكلّم ام يوسف مع نفسها"
يا بو يوسف أكلتني لحم وشلحتني عضم.. حرام عليك..
"تدخل سعدى"
سعدى:
شو بكي يا جارتنا.. صوتك وصل لآخر الضيعه؟
ام يوسف:
شو بني؟ ولِك كيف إلِك عين تسأليني شو بني؟ زوجي تارك البيت صرلو جمعه..
سعدى:
جمعه؟!
ام يوسف:
إي جمعه.. لا تقوليلي ما معك خبر..
سعدى:
وحياتك يا جارتنا لو كنت عارفه كنت زرتك بالبيت، وسألت خاطرك..
ام يوسف:
ولِكْ يا سعدى شو بهُن دينيكي؟ ما كل عمرك تلزقيهن ع بواب الجيران..
سعدى:
أنا؟.. يا حسرتي عليي..
ام يوسف:
تفوه ع هالعمر.. حتى الجيران طرشوا..
سعدى:
دخلك ليش ما بتروحي لعند المختار.. مختارنا إنسان طيّب وع طول بيساعد الأرامل..
ام يوسف:
يا باطل.. أنا أرمله؟ ولي انقبري ظبطي كلامك.. بو يوسف فردة صرمايتو ما بيحملا طنبر..
سعدى:
بعد كل اللي عملو فيكي بعدك بتحبيه..
ام يوسف:
ليش أنا من هالنسوان البيغيّروا رجالُن متل ما بيغيّروا فساطينُن؟ أعوذ بالله..
سعدى:
لا تزعلي ما كان قصدي..
ام يوسف:
طيب.. بس فيكي تقوليلي شو بتضلّي تعملي عند المختار؟
سعدى:
أنا.. أنا..
ام يوسف:
إي إنتي؟
سعدى:
يقطع لسانات الناس.. كل شي زرتو مرتين..
ام يوسف:
بالسنه؟
سعدى:
لأ..
ام يوسف:
بالشهر؟
سعدى:
لأ..
ام يوسف:
بالجمعه؟
سعدى:
لأ..
أم يوسف:
باليوم؟
سعدى:
اسكتي احسن ما قصّ لسانك..
ام يوسف:
انتي بدك تقصّي لساني يا بنت بو فشطه؟
سعدى:
وبقرف رقبتك كمان..
ام يوسف:
يا باطل..
"تحلش شعر سعدى.. تهرب سعدى.. تلحق بها ام يوسف وهي تصرخ"
بدّك تقصّي لساني؟.. والله لأخرب بيتك..
**
المشهد الثاني
"الأطفال ريما، منتورة، عصام، ومحسن يلعبون بالساحة"
ريما:
تعوا نلعب بالغمّيضة..
عصام:
لأ.. تعوا نلعب لعبة المختار ورجالو..
ريما:
شو بدنا بالمختار.. هيدا واحد بيفزّع..
محسن:
أنا بيي ما بيفزع منّو..
منتورة:
مبارح ضربوا بيّك..
محسن:
اللي ضربوا بيي أنا بعرفُن..
ريما:
مين.. مين.. قلنا مين؟
محسن:
وجّن أسود متل الليل
وبعيونُن بينام الويل
انمشيوا خوف
انحكيوا خوف
وبوجودن ما بيصهل خيل
منتورة:
يا ماما فزّعتني..
محسن:
نحنا زغار وهنّي كبار
عندن فرد.. وعنا حجار
منتورة:
وطار منخارك طار..
عصام:
بلا مزح هلّق.. تركوني فكّر شوي..
منتورة:
لا تطوّل بالتفكير بدنا نلعب..
ريما:
بدنا نلعب بالغمّيضه..
عصام:
خلّوني فكّر شوي..
محسن:
خلّوه يفكّر شوي..
عصام:
لازم نلعب بالغمّيضه.. ومنتوره بتغمّض..
منتورة:
أنا ما بحب نام..
ريما:
إنتي مش رح تنامي.. انتي بدك تغمّضي بس..
منتورة:
أنا بس غمّض بنام..
محسن:
شو بكي يا منتورة رح تنعّسينا؟
منتورة:
طيّب، روحوا تخبّوا.. واحد، تنين، تلاته.. عشره.. أنا رح فتّح عيوني.. سامعين.. أنا فتّحت عيوني.. وينكن؟ ليش مش عم بتردّوا.. أنا فزعانه كتير.. اكلني الضبع.. أكلني الضبع..
"يدخل أزلام المختار"
ريما:
إجا الضبع اهربوا..
زلمة 1:
رجعوا لهون يا ولاد.. مين الضبع نحنا؟
زلمة 2:
الظاهر فزعوا منّا..
زلمة 1:
العمى شو هالناس التعبانين.. حتى ولادن ما بيفهموا..
زلمة 2:
بس أنا شفت بنتك معُن..
زلمة 1:
إذا كانت بنتي معُن.. بدّي إدبحها..
زلمة 2:
ولو يا قبضاي.. بنتك زغيره وما بتفهم شي..
زلمة 1:
بتفهم.. بتفهم.. يخرب بيتا متل إمّا بتشم ع الطاير..
زلمة 2:
للحقيقه نحنا صرنا مكروهين كتير. مش عم نرحم حدا..
زلمة 1:
المهم سيّدنا المختار يكون مبسوط..
زلمة 2:
وبآخر الشهر نقبض..
زلمة 1:
روح تا نخبّر المختار شو صار..
زلمة 2:
عن مين؟
زلمة 1:
عن الضبع..
"يخرج الأزلام، تظهر ريما"
ريما:
راح الضبع وإجا الضبع
وكلُّن ضبع يا ماما
دبحوا الناس وإكلوا الناس
وعم بيبيعولا عضاما
**
المشهد الثالث
"يدخل غانم وهو يصيح برفقة اسعد"
غانم:
يا بو يوسف وينك وين
مرتك ضربتلي اختي
عم تسمعني؟ انت بسين
وأزغر من نمله انتي
اسعد:
شو هالحكي العم تحكيه
يا غانم ما بيلبقلك
غانم:
زيح من دربي تا فرجيه
بضربة كفّي رح يهلك
اسعد:
روح تشكّى للمختار
وع ام يوسف حكيلو
غانم:
والله بو يوسف لو طار
بدّي إبقى لاطيلو
"تدخل زمرد"
زمرد:
لاطي لمين يا غانم؟
غانم:
لواحد حقير اسمو بو يوسف..
زمرد:
وشو خصّو بو يوسف؟
غانم:
مرتو ضربت اختي..
زمرد:
ومن هيك زعلان؟
غانم:
والله لأشرب دمّو
زمرد:
روح شراب دم ام يوسف..
غانم:
ما بقلل عقلي ع النسوان..
زمرد:
ولِكْ خلّصني.. اختك لازملا قتله..
غانم:
اسكتي يا زمرد..
زمرد:
حاجي تقد وتهد وباعك هالطول؟؟
غانم:
ضبّي لسانك أحسن ما قصّو..
زمرد:
روح ضبّ اختك.. عاملي لسانا مكنسه وبتقشّ خبار بالطالع وبالنازل..
غانم:
يشهد عليي الرب بدي ادبحك..
اسعد:
عيب يا جماعه.. الكل عم يسمعوكن..
غانم:
تركني يا اسعد.. بدي اشرب دمّا
زمرد:
تركوا يا أسعد.. قبل ما يشرب دم يتعلّم كيف يشرب مي.. بعدو بيكبّ ع تيابو..
غانم:
هدّيني يا اسعد..
"تهجم زمرد على غانم وتضربه وهو يصيح"
هديني يا اسعد
أسعد:
حاجي تصرّخ لازم هديها هيي مش انت..
"يضع اسعد يده على زمرد كي يبعدها عن زوجها"
غانم:
إيدك عن مرتي يا اسعد..
اسعد:
إذا كان هيك كول قتل تا قلّك..
"تضرب زمرد زوجها"
زمرد:
حسابك بالبيت كبير.. بفرجيك..
"تخرج زمرد"
غانم:
والله يا اسعد لو مل تهديني كنت قتلت زمرد..
اسعد:
عيب عليكن.. بكرا بيطلع صيت ع ضيعتنا انو ما في رجّال متصالح مع مرتو..
غانم:
بلا عيب بلا بلوط.. المرا متل السجاده من مده لمده بتدها تنفيض..
اسعد:
إي روح كفّي تنفيض بالبيت.. مرتك ناطرتك..
"يخرج غانم"
بيقولولي تزوج.. دخلكن ع مين.. ع السجّاده.. قولوا: ألله.
**
المشهد الرابع
"يدخل المختار وحوله الازلام واهل القرية"
الأزلام:
أهلا وسهلا بالمختار
بالمختار أهلا وسهلا
المختار:
أهلا وسهلا فيكن يا فرح الضيعه الطالع من حقول الخير..
زلمة 1:
انت الفدّان ونحنا الدبّان
انعليت دنبك بتعيّشنا
انوطّيت دنبك بتفطّسنا
المختار:
بس بس خجلتوني..
ريما:
يا مختار.. جدي صرلو جمعه غايب.. وستّي طول الليل عم تبكي..
المختار:
رح حط جائزه حرزانه للي بيلاقي بو يوسف..
عباس:
أنا بلاقيلك ياه.. شو بتعطيني؟
المختار:
بعطيك الجائزه..
عباس:
وشو هيي الجائزه؟
المختار:
سطيلة لبن، وشوال برغل، ودجاجه وأربع صيصان..
زلمة 1:
ألله يديمك يا مختار..
سعدى:
يا مختار انت بتعرف انو زوجي مات وتركني ع الحصير..
المختار:
نومة الحصير منيحه لوجع الضهر
أسعد:
يا مختار.. صرلك سنه بتوعدني بالوظيفه وبعد ما شفت شي..
المختار:
رح تشوف.. رح تشوف.. وحياة العنزه الكحلى، وبقرة امي اللي ربيت ع حليبا مش ناسيك يا اسعد..
اسعد:
ولادي بدّن يا كلو ومرتي مش طايقه العيشه هيك.. وأنا رح موت من القهر..
المختار:
لا تخاف اذا بتموت بوظّف مرتك محلك..
زلمة 1:
ألله يديمك يا مختار..
المختار:
راجعت المراج، تا المراجع تراجع بقضيّة الطريق ع الضيعه..
عباس:
يا مختار صرلك سنين عم بتراجع المراجع وبعدنا منركب ع الحمار..
المختار:
يا عباس انت بتعجبني كتير
عباس:
وانا الكذب ما بيعجبني يا مختار
زلمة 1:
شو هالحكي يا عباس.. المختار كذّاب؟..
المختار:
باسم الديمقراطيه.. تركوه يحكي..
"يهمس في اذن احد ازلامه"
عملولو قتله حرزانه.. بخاطركن يا جماعه..
زلمة 1:
ألله معك ألله
يا بيّ الكلّ
مواسمنا بتدلّى
وقت البتطلّ
انت العم تحمينا
وانت البتطعمينا
ضلّ معنا ضلّ
عباس:
مساكين أهالي الضيعه.. شو ما قلّن بيصدقوه ونازلين تبويس بإيديه..
"يدخل بعض الرجال المقنعين"
زلمة 1:
سدّ بوزك ولاه.. صرصور قدّام عبلى ورجّال قدّام المختار..
"يضربون عباس"
عباس:
ليك شو كلاب ليك.. بدّن ياني اضرب حبيبتي عبلى تا صير رجّال.. وأنا شايفها ومش مصدق.. ألله ألله يا لبنان، اذا ضل فيك متل هيك مختار، مش رح يضل فيك حدا.. كلّن رح يهربوا متل بو يوسف.
**
المشهد الخامس
"صوت باخرة، يصل بو يوسف الى استراليا"
بو يوسف:
يخزي العين شو كبيره أمريكا.. تلات شهور تا وصلنا، ولو ما كون جايب معي مسابح للصلا كانت غرقت فينا الباخره..
استرالي:
Good morning
بو يوسف:
يا خواجه انت مغلّط.. انا اسمي بو يوسف
استرالي:
What are you doing tomorrow?
بو يوسف:
يا عمي حكيلك شي كلمه إفهمها..
استرالي:
Are you looking for work?
بو يوسف:
مش عم افهم يا خواجه.. بعدني دايخ من ركب الباخره..
أسترالي:
Work.. money.. pound.. dollar
بو يوسف:
دولار؟.. هات تا شوف..
استرالي:
No.. work first..
بو يوسف:
طيب.. متل ما بدك..
استرالي:
Tomorrow, wait for me here..
بو يوسف:
تنّوره.. هيدي ما حزرتا.. انا ما ببدل شروالي بمال الدني كلا..
استرالي:
Good man, he learns very easy
بو يوسف:
يا خواجه هون أمريكا؟
استرالي:
No.. Sydney, Australia
بو يوسف:
أستراليا.. غود.. سمحلي عرّفك بحالي: انا بو يوسف اللبناني..
استرالي:
Lebanese
بو يوسف:
نو.. لبناني
استرالي:
Yes.. Lebanese
بو يوسف:
يس.. انا بو يوسف الليبانيز.. والله هالشعب ما في منّو.. ألله يحميكي يا استراليا..
هيهات يا بو الزلف
سيدني يا عينيّا
حظّي رماني بوطن
جنّه سماويَّه
أف شو هالشوب.. بعلمي نحنا بكوانين والدني بتتلج، بس هون شوب كتير.. شو القصّه؟.. الظاهر الدني ماشيه بالمقلوب، تا روح إتشلقح تحت هالشجره. مدري شو عم بتقولي عنّي يا ام يوسف، بس لو كنت قلّك انا مسافر كنتي نتفتي شواربي.
" يسحب العلم اللبناني من حقيبته"
يا علم بلادي، ما حبّيت سافر من دونك، انت رفيقي وين ما بروح، رح اتغطّى فيك يا علمي تا تحميني بهالليل..
"ينام تحت الشجرة، يبصر بنومه حفيدته ريما، تظهر ريما وهي تغني"
ريما:
ـ1ـ
اشتقتلك يا جدي
يا جدي كتير
لازم تبقى حدّي
تا جنحي يطير
انت اللي ربيتنب
وانت اللي خليتني
حبّك يا جدي.. يا جدي كتير
ـ2ـ
وهالدمعه البعيوني
ع فراقك يا عيوني
خلتني مجنونه
والعمر حزازير
عم ببرد بغيابك
غطيني بتيابك
تيابك يا جدي بتدفّي كتير
ـ3ـ
يا نبع الحنيّه
انت وامي وبيّي
كبرتوا بعينيي
وبقلبي الزغير
مين بدّو يغمرني
وقصص يخبّرني
حكاياتك يا جدي بتسلّي كتير
"يستيقظ بو يوسف من نومه وهو يصرخ"
بو يوسف:
ريما.. ريما.. وينك يا جدّي وينك.. انا اشتقتلك كمان.. مسّح دموعي يا علم بلادي، الظاهر ما خلقت إلا لتمسيح الدموع..
"تقترب منه إحدى النساء"
يا مدام.. لوك.. نايس.. مسابح صلا
أسترالية:
Oh very nice.. how much are they?
بو يوسف:
وان دولار
استرالية:
One pound.. very nice man..
"يقبّل بو يوسف الليرة الاسترلينية ويضعها على رأسه"
بو يوسف:
ع العميّم ع العمَيْم
أم يوسف يا نور العين
بلشنا بالشغل اليوم
رح ودّيلك شي قرشين
ألله يحميكي يا استراليا، بلشت الرزقه، طلبت من الحرمه دولار عطيتني ليره استرلينيه اغلى من الدولار.. والله والله ما بتقيم معي الا التجاره، رح اكتب يودولي شوية مسابح صلا، ورح احمل كشّه وابرم من ضيعه لضيعه.. وألله ما يخليني اذا ما بخليكي يا ام يوسف تمشي ع سجاد أحمر.. ايه ما احلى النوم بعد التعب.. تصبحوا على خير يا عصافير البريّه..
**
المشهد السادس
"ساعي البريد يصيح بأعلى صوته"
ساعي البريد:
مكتوب من أستراليا..
سلمى:
مكتوب من استراليا؟!
عباس:
مش عم اسمع منيح.. منين هالمكتوب؟
ساعي البريد:
من استراليا..
سلمى:
وين بتحكم استراليا؟
ساعي البريد:
بلاد بعيده خلف البحر..
عباس:
ولمين هالمكتوب؟
ساعي البريد:
لأم يوسف..
سلمى:
أم يوسف!.. ام يوسف ما غيرا؟
ساعي البريد:
ندهولي عليها تا تبصم وسلمها المكتوب..
سلمى:
عطيني ياه.. أم يوسف عم بتحشّ مش فاضيه تستلم مكاتيب..
ساعي البريد:
المكتوب مسوكر من بو يوسف بسيدني، ولازم تستلمو شخصياً فهمتو؟
سلمى:
من شوي قلت بأستراليا، ورجعت قلت بسيدني.. شو باك عم تلعب بالحكي؟
ساعي البريد:
سيدني مدينه كبيره بأستراليا.. فهمت؟
سلمى:
اله يخرب ذوقك يا بو يوسف، وصلت مواصيلك ع سيدني..
ساعي البريد:
بترجاكن تقولولا تنزل ع مركز البريد وتستلم المكتوب، واذا بدها تحكي مع بو يوسف بالتلفون معي الرقم..
عباس:
معقول تحكي بالتلفون ع استراليا ونحنا ما فينا نحكي ع بيروت؟
ساعي البريد:
الاقمار الصناعيه بتنقل الحكي..
سلمى:
وشو ضربان قلبو هالقمر ما بيفتح تمّو ببلادنا؟
ساعي البريد:
ولا تنسوا تقولوا لام يوسف انو المكتوب محشي..
سلمى:
محشي كوسى؟
ساعي البريد:
لأ.. محشي فلوس..
سلمى:
فلوس؟!
ساعي البريد:
أيوه.. فلوس..
عباس:
فلوس فلوس فلوس
مكتوبو محشي فلوس
رح سافر.. أشرفلي
ولا ايد البيك بوس
**
المشهد السابع:
"ام يوسف تحكي على الهاتف مع بو يوسف"
ام يوسف:
ألو أستراليا..
. Give me Bou Yousef Please.
مينو بو يوسف؟
My Husband. Yes My Husband
ألو بو يوسف.. كيفك يا رجّال؟ كيف صحتك؟، شو عم بتقول؟.. مش عم اسمعك منيح، علّي صوتك شوي.. حالة بلادنا زفت، إي زفت، زفت أسود. المختار فالت رجالو بهالضيعه وعم يتمرجلو علينا، ما في بقره وما سرقوها، وما في تينه وما أكلوها، حراميه بالجمله.. تقبرني يا رجّال، دير بالك ع صحتك. بكرا بوديلك مع نخله بو شاهين كم قرص شنكليش، وشوية كشك، وكاسات حجابه. شو؟ ما بيتحجبوا بأستراليا.. وشو بيعملوا إذا اخدوا برد؟ ليك يا بو يوسف، المال صار فوقي وتحتي، وصرت عم إطعم الدجاجات قمح بدال الشعير.. آخ لو فيني وديلك كم بيضه من بيضلتُن.. بضيعتنا بيسمّوك بي المغتربين.. دير بالك ع ولاد ضيعتنا، وبدي خبّرك إنّو جارتنا سعدى محسوده مني يا بو يوسف.. ورح تطق من الحسد.. كل ما إشتري صرمايه بتروح تشتري متلا.. دير بالك ع صحتك ولا تنام كشف.. سامع.. ألو.. ألو.. انقطع الخط..
"تدخل سعدى"
سعدى:
سعدى محسوده مني يا بو يوسف.. ولي سعدى ما بتنحسد من حدا.. أنا صرمايتي أحلى صرمايه، من سوق الكندرجيه منقايه، بتفوت بإجريي مرتاحه، متل المقوره بالكوسايه.
ام يوسف:
عم تتجسسي عليي يا سعدى؟
سعدى:
منيح اللي سمعتك تا أعرف نفسيتك الوسخه..
ام يوسف:
أنا وسخه؟
سعدى:
نفسيتك الوسخه..
ام يوسف:
وشو في فرق بيني وبين نفسيتي يا بنت بو فشخه؟
سعدى:
أنا بنت بو فشخه؟ والله لأخرب بيتك..
ام يوسف:
روحي بلطي البحر.. انا بمصرياتي بهز الضيعه..
سعدى:
قصدك بمصريات زوجط؟
ام يوسف:
ما في فرق أبداً.. هوي زوجي وأنا مرتو.. وعين الحسود تبلى بالعمى..
سعدى:
في فرق.. في فرق.. زوجك بأستراليا وانتي هون..
ام يوسف:
ما فهمت.. فهميني أكتر..
سعدى:
هونيك في بنات شقر كتير
ام يوسف:
ولا يهمّك.. بلحظه بصبغ شعري وبصير شقرا.. وبلحظه سمرا.. وبلحظه بيضا.. وبلحظه حنطيّه..
سعدى:
ولي عليي.. شو انتي حربايه؟
ام يوسف:
أنا حربايه؟.. شعرك بدي قصو.. تمّك بدّي سدّو.. وسنانك بدّي هرّا..
سعدى:
لحقوني يا ناس.. هجمت عليي ام يوسف
"تهرب سعدى، تلحق بها ام يوسف"
**
المشهد الثامن
"وصول باخرة تحمل بعض الركاب اللبنانيين"
بو يوسف:
يا أهلا.. يا أهلا بأولاد ضيعتنا
عباس:
اشتقنالك يا بو يوسف.. يا بيّ المغتربين؟
بو يوسف:
بعض الناس ما طلعوا أوادم.. صاروا يزوربوا هيك وهيك.. وأنا بزعل كتير إذا الواحد منكن ما بيرفع راس بلادو..
عباس:
ع سلامتك يا بو يوسف.. الواحد منّا بيترك أهلو ووطنو تا يبني مستقبل مش تا يجرص حالو..
بو يوسف:
وخصوصاً انو هالبلاد أحسن بلاد بالعالم.. شعبا آدمي وبيحبّنا..
سلمى:
ونحنا لازم نحبّو..
بو يوسف:
أهلا بسلمى.. تركتك زغيره كتير.. بس وجّك متل وجّ إمك.. مخلق منطق..
سلمى:
بيي وامي بيسلموا عليك كتير وبيقولولك شكراً لأنك جبتني ع أستراليا..
بو يوسف:
يا أهلا فيكي يا بنتي.. وهلّق بدّي إعزم البنات يناموا عندي.. والشباب فيهن يناموا بجنينة "ردفرن".. هونيك في لبنانيين بيتسلوا معُن..
عباس:
مستعدين ننام وين ما كان.. نحنا ولاد الجرد والساحل.. نحنا جيوش البرد منقاتل..
بو يوسف:
شو أخبار لبنان؟
سلمى:
فتن واظطهاد وزعامات راكبه ع كتاف الشعب..
عباس:
الاقطاعيّه خربت بلادنا.. شحّدتنا القوت.. وجبرت الفلاح يترك أرضو ويسافر..
سلمى:
والحكّام.. ريتُن ما كانوا.. مش شاطرين إلا بكترة الحكي..
بو يوسف:
بدّي إسألكن عن ريما.. شو أخبارا.. يمكن موت بالغربه وما شوفها..
سلمى:
ريما الأولي بالمدرسه.. ومودايتلك معي شال حرير شغل ايديها..
بو يوسف:
يا حبيبة قلبي يا ريما.. بعدني عم إبصرها بنومي، ولهالسبب بنصحكن كل ما تشتاقوا لأهلكن بصروهن بنومكن.. الغايب بيعيش نص عمرو بصر منامات..
عباس:
إيه يا عبلى.. وحياة عيونك مش رح طوّل.. بكرا بس جمّع كم ليرة سترلينيه برجع..
بو يوسف:
لغيوا الليرة السترلينيه من كم شهر.. وجابوا محلاّ الدولار الأسترالي..
عباس:
ما بيهم.. المهم إرجع لعند عبلى..
بو يوسف:
ميّة البحر مالحه.. بكرا بتنساها..
عباس:
بنسى إتنفّس ولا بنسى عبلى..
"يدخل رجل استرالي"
بو يوسف:
اسكتوا يا شباب.. إجت الرزقه
استرالي:
Are you looking for work?
بو يوسف:
Yes.. Yes
استرالي:
All of you?
بو يوسف:
Yes.. Yes..
استرالي:
Come with me..
بو يوسف:
ع الشغل يا شباب.. من أوّل وصولكن قالتلكن أستراليا أهلا وسهلا فيكن..
عباس:
فلاّحين يا وطنّا
نحنا والله فلاّحين
سلمى:
مشتاقين يا وطنّا
نحنا والله مشتاقين
**
المشهد التاسع
"إحدى حفلات الجالية اللبنانية في سيدني"
أسعد:
سيداتي آنساتي سادتي.. بحب عرّفكن بحالي: أنا عريف سهرة الليله.. اسمي أسعد، مغترب لبناني جديد بهالبلد، من كل قلبي بحب رحّب فيكن بهالسهره اللبنانيّه الحلوه، العم يحييها ألمع نجوم الفن والطرب في أستراليا.. والآن أترككم مع كلمة رئيس الجمعيّه الخيريّه السيد غانم..
غانم:
أيها الحفل الكريم.. باسمي وباسم زوجتي العزيزة زمرد، يسعدني أن أرحب بكم فرداً فرداً.. وأن أرسل التحيّة إلى وطني الحبيب لبنان، من هنا.. من سيدني.. من قاعة كنيسة سيدة لبنان في منطقة هاريس بارك.. راجياً المولى تعالى أن تكون سهرتكم "فاري نايس".. عشتم وعاشت أستراليا وعاش لبنان..
أسعد:
والآن، أترككم مع المطرب المهجري المعروف عباس، وأغنيته الجديدة "عاشق أَنا"
عباس:
مسا الخير.. قبل ما رحّب فيكن، سمحولي رحب ببي المغتربين، حبيب قلوبنا "بو يوسف" وبرفيقة حياتو الست "ام يوسف"، وعقبال لمّن بتوصل حفيدتُن البنت الحلوه ريما.. وأهلا وسهلا فيكن..
ـ1ـ
عَاشِقْ أَنَا
لاَ تْزِيدِي النَّارْ
خَلِّي الْهَنَا
يْهَنِّينِـي نْهَارْ
لَيْلِي طَوِيلْ
قَلْبِي عَلِيلْ
الْجفْنِ الْكَحِيلْ
خَلاَّنِي غَارْ
ـ2ـ
نَظْرِةْ عُيُونِكْ
فِيهَا دَلالْ
سَحْبِةْ جُفُونِكْ
سِحْرِ وْجَمَالْ
وْوَحْدِي الْمَتْعُوبْ
عَ دْرُوب دْرُوبْ
وْمُشْ قَادِرْ تُوبْ
أَنَا حَالِي حَالْ
ـ3ـ
كِيفْ بَدِّي عِيشْ
مِنْ دُونِكْ يَوْمْ
وْمِتْل الدَّرَاوِيشْ
مَا بْدُوقْ النَّوْمْ
ما فِي غَرَامْ
مِنْ دُونْ كَلاَمْ
وِعْيُون تْنَامْ
عَلَى صَدْرِي دَوْمْ
أسعد:
سيداتي آنساتي سادتي حان الوقت لأقدم لكم قنبلة السهرة، فنانتنا الكبيرة سلمى..
سلمى:
أهلا وسهلا فيكن.. الليله رح غنّي غنيّة الفنانه بسكال صقر "اشتقنالك يا بيروت"
اشتقنالك يا بيروت
واشتقنا للسهر
اشتقنالك يا بيروت
واشتقنا للقمر
يرجع على ليلاتك
ينزل على سهراتك
يا بيروت يا بيروت
"يهجم غانم على الميكرفون ويصرخ وهو سكران"
غانم:
اشتقتلك يا بيروت.. يا حبيبة قلبي، ألله يخرب بيت اللي خربوكي.. حسابُن قرّب يا بيروت..
سلمى:
انكان انتي نسيتينا
نحنا مش ممكن ننسى
وان بدّك تقسينا
نحنا مش ممكن نقسى
وعزّك الما بينحني
حامل كرامة وطني
صرتي انتي الحلم يا بيروت
"مرة ثانية يهجم غانم على الميكرفونً"
غانم:
كيف بدّنا ننساكي يا بيروت؟ كيف بدّنا ننسى سهراتك؟ اشتقنالك والله اشتقنالك..
زمرد:
هدّوا غانم.. غانم سكران.. رح يجرّصنا..
سلمى:
أهلك اللي اشتاقوا
على سهرات العمر
وأحبّه يتلاقوا
كأنّو عيد العمر
نغنّي بلياليكي
ونفرح بغنانيكي
صرتي هوا الناس يا بيروت
"يحاول غانم أن يهجم على الميكرفون، تمنعه زمرد"
زمرد:
خلص بقى.. رح تنزع حفلتك.. أكيد السنة الجايي مش رح بينتخبوك رئيس..
أسعد
وهلّق رح أترككم مع مفاجأة السهرة.. حوار بين بو يوسف وأم يوسف عن إنجازات المغتربين في أستراليا، ومتل ما بتعرفوا كان بو يوسف وحدو هون، وهلّق صرنا مليون بو يوسف، زرعتنا بلادنا وحصدتنا الغربه.. وكترت المحلات التجاريه، واغتنيوا اللبنانيين وصاروا جاليه كبيره بتفتخر فيها استراليا.. والآن اترككم مع بو يوسف وام يوسف ونشاطات اللبنانيين في أستراليا..
بو يوسف:
حلويات شرقيه
حلويات غربيه
حلوياتي آر ذا بيست
تعا تفرّج يا خيي
ام يوسف:
تبوله وكبّه نيّه
وكفته هلّق مشويّه
يا سيدني أكلاتي بس
بتنفق قبل الضهريه
بو يوسف:
جرايد اسبوعيه
عم تنقلنا الخبريه
بللي بيصير بلبنان
بيوصلنا بالصبحيه
ام يوسف:
في عندي صيدليه
"بيلاكمبا" مضويه
بتوزّع صبغه ببلاش
خصوصي للختياريّه
بو يوسف:
البدّو شقّه مفروشه
ما في متلا ع الروشه
شققنا بسيدني كلاّ
متينه ومش مغشوشه
ام يوسف:
وقت البنت بتتجهّز
ومتل الماما بتتجوّز
مصوّر فيديو قد الكون
بأحدث آلات مجهّز
بو يوسف:
بالناكسي بيركب راكب
صاحب أو منّو صاحب
"الميتر" بتقلّو قديش
بالآخر بدّو يحاسب
ام يوسف:
ع البيت انفات حرامي
رح يلزملك محاني
أحسن محامي موجود
هيدا الواقف قدّامي
بو يوسف:
ع الكوسى وع الباتنجان
وصابيع الببّو كمان
البدو خضرا شغل اليوم
بيلاقيها بهالدكان
ام يوسف:
كوافير وما في منّي
طلعت الأول بيسيدني
بحلقلك دقنك يا شب
والصبايا بتعرفني
بو يوسف:
ع المكتب بقعد وبصير
ابرم بالكرسي تا طير
سكرتيره.. تلات لغات
وبدوّخ أكبر مدير
ام يوسف:
بالمصنع نايم قايم
وعرقي ع جبيني دايم
"الويجس" بيطير بيومين
ومقضّى العمر صايم
بو يوسف وام يوسف:
يا سيدني مين متلك مين
يا باقة ورد ونسرين
عاطفتك نسّتنا اليوم
إنّو نحنا مغتربين
اسعد:
سيداتي آنساتي سادتي.. بعد الانتهاء من الحوار الغنائي الرائع بين بو يوسف وأم يوسف، يسعدني باسمكم جميعاً أن أقدّم لهما أجمل هدية يمكن أن تهدى لجدّين.. أرجوكم أن ترحبوا بحفيدة بو يوسف الآنسة ريما
بو يوسف:
"يغمر ريما"
ريما.. اشتقتلك يا جدي.. اشتقتلك كتير.. هيدي أحلى هديّه ناطرا من زمان..
ريما:
وأنا اشتقتلك يا جدي.. واشتقت لستّي كمان..
ام يوسف:
بدي إسألك يا ريما عن جارتنا سعدى، بعدو لسانا طويل؟
ريما:
أكتر وحده زعلت عليكي يا ستي كانت سعدى.. ولو بتشوفي قديش مودايتلك هدايا معي..
ام يوسف:
فكّرت جيبا ع أستراليا بس هون ما في جيران متل لبنان.. كل واحد عايش ع كيفو
ريما:
هيي ما بتحب تسافر أبداً.. قال بدّا تحرس بيوت الضيعه الفاضيه من الناس..
بو يوسف:
بتصدقي يا ريما.. كنت ابصرك بنومي عم بتغني.. وكان صوتك حلو كتير..
ريما:
وبعدو حلو كتير يا جدي.. وإذا بيسمح الوقت بحب غني غنيّه بهالحفله..
أسعد:
أيها السيدات والسادة ننهي حفلتنا بالصوت القادم من لبنان على أجنحة الأثير.. إليكم فنانة المستقبل.. ريما
ريما:
ـ1ـ
تغرّبوا رجال بلادي
يا بلادي ليش تغرّبوا
وأرضك أرض المبادي
ومن نبع فنونك يشربوا
ـ2ـ
تغرّبوا وراحوا لبعيد
تا حتى يلاقوا فجر جديد
يا بلادي.. طوّل العيد
الناس دموع بيسكبوا
ـ3ـ
يا عصافير البريّه
يا نغمة حب وحريّه
من يوم السافر بيّي
المكتوب بدمعي بكتبو
**
