Alkanz almas7our
The magical treasure
**
مثّلها عام 2005 أكثر من 400 طالب وطالبة من معهد سيدة لبنان ـ هاريس بارك ـ سيدني ـ أستراليا، وقمنا بتحويلها الى مسرحية من عدة أشخاص.
**
أشخاص المسرحية:
الناطور
كريمة (زوجة الناطور)
الجنيّة
الخوري
نجيب
زمرّد
بدور
سعدى
نجوى
أبو فارس
أبو حنا
راجي
عدنان
منصور
الساحر
أطفال صغار
رجال مخابرات
**
المشهد الأول
(أطفال صغار يغنون في ساحة القرية)
بنت:
ـ1ـ
أَهْلا وْسَهْلا فِيكُنْ
يا أَهْلي.. يا مْحِبِّينْ
مِنْحِب نْحَيِّيكُنْ
وْبِالأَهْلا نْلاقِيكُنْ
وِالضِّحْكِه نِهْدِيكُنْ
مَعْ زَهْر الْبَسَاتِينْ
ـ2ـ
هَالْقِصَّه الْمِحْكِيِّه
عَنْ ضَيْعَه مِنْسِيِّه
سَكْنِتْهَا جِنِّيِّه
ما مْنَعْرِفْها مِين!
ـ3ـ
حكايِتْنا الطَّوِيلِه
مَرْقِتْ فِيها حِيلِه
مَهْضُومِه وْجَمِيلِه
عَ النَّاسْ الطَّيبِينْ
صبي:
ـ1ـ
بَدّي إِرْقُصْ هَايْ هَايْ
بَدّي غَنِي هايْ هَايْ
بَدِّي إِرْقُصْ.. بَدِّي غَنِّي
بَدِّي اللَّيْلِه بَيِّنْ فَنِّي
هَايْ.. هَايْ.. هَايْ.. هَايْ
ـ2ـ
جايي إِمْزَحْ هايْ هايْ
جايي إِفْرَحْ هَايْ هايْ
جايي إِمْزَحْ.. جايي إِفْرَحْ
جايي زَيِّنْ أَرْض المَسْرَحْ
هَايْ هايْ هايْ هايْ
ـ3ـ
عْطُونا زَقْفِه هايْ هايْ
زَقْفِه كْبِيرِه.. هايْ هايْ
عْطُونا زَقْفِه.. زَقْفِه كْبِيرِه
بَرْكِي بْتِسْمَعْ كل الْجِيرِه
هايْ.. هايْ.. هايْ.. هايْ
بنت وصبي:
ـ1ـ
زِينْ زِينْ.. شُو ما قِلْنا
زِينْ زِينْ.. شُو ما عْمِلْنا
زِينْ زِينْ.. يا حَبايِبْ
طَلِّتْكُنْ بِالْقَلْب حْمِلْنا
ـ2ـ
جِينا اللَّيلِه تا نْمَسِّيكُنْ
نِفْرَحْ فِيكُنْ وِنْحَيّيكُنْ
بِأَهْلا وْسَهْلا نْلاقِيكُنْ
وْيا ما بِالْحُبّ تْإِهَّلْنا
ـ3ـ
بَدّنا ياكُنْ تِسْمَعُونا
بِالزَّقْفِه الْحِلْوِه تْلاقُونا
نِحْنا وْلادْكُنْ بِتْحِبُّونا
بْتِرْفَع الرَّاس عْمايِلْنا
(ناطور الضَّيْعَه يخيف الأطفال الصغار بصفارته)
الناطور:
حِلُّوا مِنْ هَوْن.. دِوَّخْتُونا.. ما عِنْدْكُنْ شَغْلِه غَيْر هَالشَّغْلِه.. زين زين هاي هاي.. رُوحُوا تْعَلّمُوا.. بَرْكِي بِتْصِيرُوا ناسْ مِتِلْ هَالنَّاسْ.. بَسّ مُش الْحَقّ عْلَيْكُنْ.. الْحَقّ عَ الْمَدْرَسِه.. لَوْ عِنَّا بْهَالضَّيْعَه مَدْرَسِه ما شِفتْ حَدا مِنْكُنْ أَبَداً..
بنت:
بَدّنا نرقُصْ.. بَدّنا نْغَنِّي.. في عِنَّا مَسْرَحِيِّه وْلازِمْ نِتْدَرَّب عْلَيْها..
الناطور:
قِلْتِلّكُنْ رُوحُوا عَ بْيُوتْكُنْ.. أَحْسَنْ ما آخِدْكُنْ عَ الْحَبْس..
(يهرب الأطفال)
أنا ناطور الضَّيْعَه.. حامي الْحِمَى.. إِذَا حَدا بْيِسْرُقْ بَدِّي إِحِبْسُو.. وْإِذَا ما بْيِسْرُق.. كَمانْ بَدِّي إِحِبْسُو.. بْتَعِرْفُو لَيْشْ؟.. لأَنّو بِيكُونْ عَمْ يِقْطَعْلِي رِزِقْتِي.. فْهِمْتُو؟
(يدخل نجيب كالمجنون)
نجيب:
يا أهالي الضَّيْعَه.. يا سَامْعِينْ الصَّوْت..
ارْكِضُوا عْلَيِّي..
الناطور:
شو باكْ يا نَجِيبْ فِزَّعِتْنِي.. صَوْتَكْ وَاصِلْ لآخِرْ الدِّنِي..
(يدخل بعض أهالي القرية)
نجيب:
جنِّيِّه.. شِفِتْ جِنِّيِّه.. شَعْرَا أَبْيَضْ مِتْل التَّلْجْ.. جِسْمَا مْغَطَّى بالزَّهْر.. وْوِجَّا ضَاوْي مِتْل الشَّمْس..
الناطور:
جججججججججججججنية.. شِ..شششششفْتَا بِالْمَنَامْ أَمْ بِالْيَقْظَه؟
نجيب:
بِالْيَقْظَه.. بِالْيَقْظَه.. وْقَالِتْلِي بْضَيْعِتْكُنْ فِي كَنْز كْبِيرْ الْبِيلاقِيهْ بْيَاخْدُو..
الناطور:
لا في جِنِّيِّه وْلا فِي بَلّوطْ يا نَجِيبْ.. الْعَرَقْ الِمْتَلَّتْ الْعَمْ تِكْرَعُوا بِيفَرْجِيكْ نْجُوم الضّهْر..
نجيب:
وْحَقَّ اَللَّه كِنْت عَ رِيقْ بَطْنِي.. لا شْرِبْت عَرَقْ وْلا دِقْت الْخِبزْ..
الناطور:
الْجِنِّيِّه اللِّي وْصَفْتَا بْتِشْبَه أُمّ حَنَّا.. لا تْقُوم شِفْت أُمّ حَنَّا يا زَلَمِي..
زمرد:
عَ عِلْمِي.. أُمّ حنّا شَعْرَا أَسْودْ مِتْل الْفَحْم..
أبو فارس:
إِذَا مُشْ صَابِغْتُو.. لَوْنُو أَبْيَضْ مِتِلْ حَلِيبْ عَنْزَاتِي..
زمرد:
شُو صابُنْ عَنْزَاتَكْ يا بُو فارِسْ؟.. فيكْ تْقِلّنا شُو صَابُنْ عَنْزاتَكْ؟
أبو فارس:
كِلْكُنْ بْتَعِرْفُو شُو صَابُنْ عَنْزَاتِي، صَارُوا يْمُوتُوا وِحْدِه وَرَا التَّانْيِه، قِمْت رْكَضْت لْعِنْد الْبُونَا وِحْكِيتِلُّو قِصّتِي، قَلِّي صَلِّي مَرَّه أَبانَا وْمَرَّه سَلامْ وْما تْخافْ.. وْصِرتْ كِل ما صَلِّي الأَبانا والسَّلام تْمُوت عَنْزِه، تا ما ضَلّ عِنْدِي إِلاَّ عَنْزِه وِحْدِه.. هَوْنِي يَوْم عَرِبْشِت عَ رَاسْ التَّلِه وْما عادِتْ تِنْزِلْ.. قِلْتِلاَّ: انْزِلِي يا بَرْصَه، وْما كانِتْ تِنْزِلْ.. قَامْ طِلِعْ خِلْقِي مِنْهَا وْقِلْتِلاَّ: يا بْتِنِزْلِي هَلَّقْ يَا بِفْقَعِكْ مَرَّه أَبانا وْمَرَّه سْلام وِبْلَحّقِك بِالْعَنْزَاتْ الْماتُوا..
زمرد:
وانشالله نِزْلِتْ.. قَبل ما تِفْقَعَا الأَبانا والسَّلامْ
أبو فارس:
نِزْلِتْ مِتْل التُّوتُو.. وْعيِنَيْهَا بِالأرْضْ.. وْما عادِتْ تْزَعِّلْنِي أَبَداً.. لَيْش ما شَافِتْ شُو صَابُو غَيْرَا؟
زمرد:
بَدِّي أَعْرِف لَيْشْ عَنْزَاتَكْ بَسّ كانُوا يِرْعُوا مَطْرَحْ ما بَدُّنْ، بَيْنَما عَنْزاتْنا مَمْنُوع يِفْشَخُوا بَرَّا.. أَوْ يِفْتَحُوا تِمُّنْ؟
أبو فارس:
أَنا خَيّ النَّاطُورْ.. وْعَنْزاتي عَنْزات الدَّوْلِه.. وِالدَّوْلِه مَسْمِحْلا تاكُلْ شُو ما بَدَّا.. وِالْمُشْ عاجْبُو يْدِقّ رَاسُو بِالْحَيْطْ..
(يهرب الناطور)
بدور:
يا إِخْتِي اسْكِتِي.. هَلَّقْ بْيِخْفُوكي.. قَلِيلْ ما خِفْيُوا ناسْ..
زمرد:
تا نِرْجَع لْحَدِيث الْجِنِّيِّه وْأُم حنَّا.. عَ فَيْقَه.. أُم حَنَّا مَا بِتْغَطِّي جِسْمَا بِالزَّهْرْ.. عِنْدَا فِسْتانْ مْوَرَّدْ.. مِنْ إِيَّامْ سَفَرْ بَرْلِكْ.. شِفْتَا لابِسْتُو أَكْتَرْ مِنْ سِتِّينْ أَلْف مَرَّه..
نجيب:
شَعْرَا أَبْيَضْ فِهِمْنَا.. فِسْتَانَا مْوَرَّدْ كَمَانْ فْهِمْنَا.. بَسّ وِجَّا بْيِضْوِي مِتْل الشَّمْس.. هَيْدِي مُشْ مُمْكِنْ إِبْلَعَا..
زمرد:
بْلَعَا.. بْلَعَا.. أُمّ حَنَّا بْشَبابَا رَكّعِتْ الْجَيْش التِّرْكِي.. إِي وْحَقّ أَللّه كان وِجَّا بْيِضْوِي مِتْل الشَّمْسْ..
(يدخل أبو حنا مسرعاً)
بو حنا:
دَخِيلْكُنْ رْكِضُوا عْلَيِّي.. حَدَا مِنْكُنْ يِنْدَه عَ الْبُونا..
بدور:
شُو باكْ يا بُو حنَّا؟ خَيْر انْشَالله..
بو حنا:
وْمِنْ وَيْن بَدُّو يْجِيني الْخَيْر؟.. أُمّ حَنَّا مَاتِتْ..
زمرد:
مَاتِتْ؟.. أُم حَنَّا ماتِتْ.. وْلِكْ كِيفْ ماتِتْ؟.. بِعِدْنا عَمْ نِذْكِرَا بِالْخَيْر؟
بو حنا:
ظَهْرِت عْلَيْهَا جِنِّيِّه، وْمِن كِتِرْ ما خَافِتْ عَضِّتْ عَ لْسَانا..
بدور:
كِل هَالْقَد لْسَانا طَويلْ تَا تْعَضّو.. ما عَ عِلْمِي أُم حَنَّا مْقَبّعَه سْنَانَا وْناطْرَه تْرَكِّبْ وَجْبِه..
زمرد:
أُم حَنَّا نِيرِتَا قَوِيِّه.. كانِتْ تْطْحَنْ بَلّوطْ وِتْفَقِّي بِزِرْ
بو حنا:
عَضِّتْ عَ لْسَانَا.. يِعْنِي ماتِتْ.. ماتِتْ..
بدور:
الْحَمْدِلله عَ سْلامْتِي.. مْبَارِح عِضَّيْت لْسَانِي، انْجَرَح نِتْفِه، بَسّ مَرْقِتْ عَ خَيْرْ..
زمرد:
لازِمْ نْهَنِّي نَجِيبْ بِسْلامْتُو.. شَافْ الْجِنِّيِّه وْزَمَطْ بِجِلْدُو..
سعدى:
أَنا خَايْفِه تِظْهَرْ عْلَيِّي الْجِنِيِّه، وْعَضّ عَ لْسَانِي مِتِل أُم
حَنَّا.. يا عَمِّي أَنا عَزْبِي وْتَحتْ نَصِيبِي.. بَكِّير عْلَيِّي تا مُوتْ..
زمرد:
ما لازِمْ نِسْكُتْ أَبَداً.. لازِمْ نْبَخِّر الضَّيْعَه وْنِتْخَلَّصْ مِنْ هَالْجِنِّيِّه..
سعدى:
قُولُوا لِلْبُونا يْبَخِّر الضَّيْعَه.. وِيْرِشّ مَيّ مْصِلاّيِه.. قَبِلْ ما يِقْبِرْنا مِتِل أُمّ حَنَّا..
بدور:
لازِمْ نْجِيبْ سَاحِرْ يْفِكّ السِّحِرْ.. الْجِنِّيِّه بَنْت مَسْحُورَه.. وْمَعْقُولْ يْطُمَّا بْشِي جُورَه..
سعدى:
وَاللَّه أَنا شَايِفِه بَدَّا تْطُمْنا هِيِّي بْشِي جُورَه.. مِتِلْ ما طَمِّت أُم حَنَّا..
بدور:
أَنَا بَعْرِفْ سَاحِرْ بْيِقْصُفْ رَقْبِة الْجِنِّيِّه بِتْلاتْ كِلْمات بَسّ.
أبو فارس:
قَبِلْ ما تْبَخّرُوا وِتْجِيبُوا سَاحِرْ.. خَلُّونا نِحْضَى بِالْكَنْزْ.. حَدَا بْتُوصَل اللِّقْمِه عَ تِمُّو وِبْيِبْزِقَا.. هَيْدِي أَلّله ما قَالاَ..
سعدى:
لَبَيْنَمَا تِحْضَى بِالْكَنْز، بِتْكُونْ لِحَّقِتْنَا كِلّنَا بْأُم حَنَّا.. دَخِيلْكُنْ جِيبُوا الْخُورِي يْبَخِّر الضَّيْعَه، أَنا ما بَدِّي عَضّ عَ لْسَانِي.. أنا بَدِّي عِيشْ وْإِتْنَعَّمْ بِشَبابي..
أبو فارس:
لا تْخافُوا.. ناطورْ الضَّيْعَه بْيِحْمِيكُنْ.. لأَنُّو مَجْبُور يِحْمِيكُنْ.. بَسّ مِينْ بَدُّو يِحْمِي خيّي النَّاطُورْ.. هَوْن الِمْصِيبِه..
(يدخل راجي وعدنان ومنصور وهم يحملون المعادير.. يتحاورون في زاوية المسرح)
راجي:
إِذَا كانْ نَجِيبْ وْأُمّ حَنّا، أَلله يِرْحَمْ تْرَابا، شَافُوا الْجِنِّيِّه، يِعْنِي الْكَنْز مَوْجُودْ، وْبَدُّو مِينْ يِحْضَى فِيه..
منصور:
بَيْنِي وْبَيْنَكْ.. لَوْ ما فَطْسِتْ أُم حَنَّا ما صِدَّقِتْ نَجِيبْ.. كِل عُمْرِي بعِرْفُو كِذَّابْ إِبِنْ كِذَّابْ.. بَسّ هَالْمَرَّه ظَبْطِتْ مَعُو.. وْلازِمْ نِتْصَرَّفْ..
راجي:
لازِمْ نِحْضَى بِالْكَنْز.. قَبِلْ ما يِحْضَى فِيه غَيْرنَا..
عدنان:
إِذَا ظَهْرِتْ عْلَيْكُنْ الْجِنِّيِّه.. لا تْخَافُوا.. سْلَخُوها مَرَّه أَبَانَا وْمَرَّه سْلامْ.. وْلَحّقُوها بْعَنْزاتْ بُو فارِسْ.
راجي:
قَوِلْكُنْ.. تَحتْ أَيَّا صَخْرَه مْخَبَّى هَالْكَنْز؟.. بَدِّي إِحْفُر الأَرْض كِلاَّ تا لاقِيهْ.. مَعْدُورِي جْدِيدْ بْيِفْلَحْ فَلِحْ..
منصور:
مْنِيحْ اللِّي ذِكَّرتْنِي.. لازِمْ سِنّ شَفْرَاتْ مَعْدُورِي أَنَا، تا كِيفْ ما ضْرَبْتُو إِسْمَعْ أَنِينْ الأَرْض.. وِالْكَنْز يِنْدَهْلِي: تْعُو يا مَنْصُور عَبِّي جْيَابَكْ دهَبْ..
راجي:
عَجِّلْ يا مَنْصُور الدَّهَبْ ناطْرَكْ.. بَسّ كَبِّرْ جْيَابَكْ تا تْسَاعْ..
منصور:
أَخْ عَ كِمْ عَقِدْ إِلْمازْ.. وَاحِدْ لِلْبَيْعْ.. وْوَاحِدْ لِلإِيّام السَّوْدا.. وْواحِدْ لْمَرْتِي.. أُمّ عْيُون الزِّرْقْ..
راجي:
بِشَرَفَكْ.. ما ضِيعَانُو فِيهَا..
منصور:
ضيعانُو بْمَرْتِي؟!.. عَمْ بِتْثَرْثِرْ عَ مَرْتِي.. إِي وَاللَّه لَقِصّ لْسَانَكْ..
راجي:
إِنْتْ بَدَّكْ تْقِصّ لْسَانِي.. خُودْ هَالْعَصَا خُودْ..
عدنان:
عَيْب يا جَمَاعَه عَيْب.. هَلَّقْ بْتِضْحَكْ عْلَيْكُنْ الْجِنِّيِّه..
منصور:
بَدِّي لَحّقُو بْأُمّ حَنَّا.. زِيح مِنْ دَرْبِي تَا قِلّك..
عدنان:
حِطُّوهَا بْدَقْنِي هَالْمَرَّه.. وْرُوحوا تا نْشُوف شِغِلْنا.. بَرْكِي مْنِلْعَبْ بِالْمال لِعِبْ..
(يخرج عدنان ومنصور وراجي، تدخل نجوى)
زمرد:
شُو بِكِي عَمْ تِتْأَبْطِي هَيْكْ يا نَجْوَى؟.. سَلّمِيهَا لألّله وْلا تْخَافِي..
نجوى:
دَخْلِكْ.. نِحْنَا أَقْوَى وِلاَّ أُم حَنَّا؟
زمرد:
أَللّه يِرْحَمَا شُو كانِتْ قَوِيِّه.. كانِتْ تْرُوح بِاللَّيْل مِنْ ضَيْعَه لْضَيْعَه وْما تِفْزَعْ..
بدور:
سْمِعْت إِنُّو الْوَاوِيِه كَانِتْ تْخَافْ مِنْها.. صَحِيحْ هَالْحَكِي؟
زمرد:
مَرَّه قَتْلِتْ ضَبِعْ بْكَعْب سْكَرْبِينِتَا.. جَرّتُو عَ الضَّيْعَه مِنْ دَنْبُو.. شِفْنَا رَاسُو مْبَخْوَشْ مِتْل الْمِنْخُلْ
نجوى:
يا مَاما.. وْمَعْ هَيْدَا وْكِلُّو عَضِّتْ عَ لْسَانَا لِمِّنْ شَافِتْ الْجِنِّيِّه.. بَدِّي رُوح عَ زْغَرْتَا.. عَ بْشَرِّي.. عَ إِدِّه.. عَ تَنُّورِينْ.. عَ كْفِرِصْغَابْ.. عَ حَدْشِيتْ.. بَس خِدُونِي مِنْ هَوْن.. أَنا فِزْعانِه كْتِيرْ..
زمرد:
لَيْش ما فِي جِنِّيّاتْ إِلاَّ بْضَيْعِتْنَا؟.. وَيْن ما بِتْرُوحِي يِمْكِنْ تِطْلَعْلِكْ جِنِّيِّه..
بدور:
تَعُوا تا نْعَلِّقْ صِلْبانْ كْبِيرِه بكُلّ زْوَارِيبْ الضَّيْعَه.. بَرْكِي بِتْخافْ مِنِّنُ..
زمرد:
صَلُّوا يا جماعَه صَلُّوا.. الصَّلاَ بِتْبَعِّدْ الْبَلا..
سعدى:
يا يَسُوعْ الْمَصْلُوبْ رَافِقْنَا عَ الدّرُوبْ..
بدور:
يا سيّدِةْ لُبْنانْ بَعّْدِي عَنَّا الْجانْ
زمرد:
يا مَارْ يُوسِفْ.. خَفِّفْ عَنَّا خَفِّفْ
سعدى:
يَا قِدِّيسِه رَفْقَا.. بِشْفاعْتِكْ رَحْ نِبْقَى
بدور:
يا نْعِمْةَ اللَّه الْحَرْدِينِي عَ الْجِنِّيِّه قَوِّينِي..
زمرد:
يا سَيِّدْةِ الْوَرْدِيِّه خَلّصِينا مْنِ الْجِنِّيِّه..
نجوى:
آمين.. آمين.. آمين.. يا ربّ..
بدور:
خَبَّرْنِي جِدِّي إِنُّو الْجِنِّيِّه مَا بِتْحِب الِغْنَانِي..
نجوى:
فَإِذَنْ غَنِّي يا سعدى.. مِنْ هَلَّقْ تا نُوصَلْ عَ الْبَيْت..
سعدى:
سْمَعُوا تا قَشِّقْ صَوْتِي.. صَرْلِي جُمْعَه مْرَشّحَه..
-1-
الْـ بِيآمِنْ بِرَبُّو
ما بْيِفَزَعْ مِنْ شِي
بْيِمْشِي بْعَتْمِةْ دَرْبُو
وْعَ طُولْ بْيِمْشِي
مْلايِكْتُو بِقِرْبُو
وِالسَّمَا بِتْحِبُّو
مِتْل التّلَجْ قَلْبُو
وْمِنْ شُو بْيِخْتِشي؟
ـ2ـ
الْبيآمِنْ بِـ أَللّه
أَللَّه بِينَجِّيهْ
بْيِعْطِي الْقُوِّه كِلاَّ
وِالْحُبّ بْيِعْطِيهْ
لا الشّرّ بْيُوصَلُّو
ولا نَفْسُو بِتْذِلُّو
كلُّو مْحَبِّه كِلُّو
أَللَّه سَاكِنْ فِيهْ
**
المشهد الثاني
(دقّة حزن.. أهالي المرحومه أم حنّا، الناس يأخذون بالخاطر)
أبو فارس:
ألله يِرْحَمَا يا جَماعَه.. أُمّ حَنَّا كَانِتْ سِتّ السِتَّاتْ.. رَبِّتْ عَيْلِه كْبِيرِه بْتَقْوَى أَللَّه..
بدور:
شُو عَمْ بِيقُول هَيْدَا؟.. الظّاهِرْ مُشْ عارِفْ إِنُّو عِنْدَا وَلْدَيْن مَحْبُوسِينْ؟.. وجَابُوهُنْ دِغْرِي مْنِ الْحَبْس تا يِحْضَرُوا دَفِنِةْ إِمُّنْ..
زمرد:
يا رَبِّي لا تْجَرِّبْنَا.. وَاحِدْ حَرَامِي.. وِالتَّانِي مْهَرِّبْ حَشِيشِه..
بدور:
ما فِي عَيْلِه بْهَالضَّيْعَه وْما عِنْدا وَلَدْ بِالْحَبْس.. نِحْنَا ما عْرِفْنا نْرَبِّي.. أَللَّه عَطَانَا الْوَزْناتْ.. ما عْرِفْنا تَاجَرْنا فِيهَا.. الْتَهَيْنَا بْجَمْع الْمالْ.. بْحُب الذّاتْ.. بْلِعْب الْوَرَقْ.. بِالسَّهَرْ بَرَّاتْ الْبَيْت.. وِتْرَكْنا وْلادْنا..
زمرد:
كِلّ الضِّيَعْ فِيهَا مَدَارِسْ إِلاَّ ضَيْعِتْنَا.. وْلادْنا ما بْيَعِرْفُوا يْفِكُّوا الْحَرْف.. لازِمْ نَعَلِّمْ وْلادْنا تايِطْلَعُوا أَحْسَن مِنَّا.. وَإِلاَّ بَدُّنْ يِنْتِهْيُوا بِالْحَبْس..
بدور:
خَيِّي.. وَدَّى إِبْنُو عَ باريسْ تا يِعْمِلْ حَكِيمْ.. وْلِمِّنْ رِجِعْ عَ الضَّيْعَه ماتْ جارنا بو سامي.. قامْ إِخْدُو مَعُو تا يْعَزِّي.. وْقَبْل ما يُوصَلُوا عَ الْبَابْ كَبَّش بْبَيُّو وْقَلُّو: بَيِّي.. بَيِّي.. شُو بَدِّي قُولْ؟ قَلُّو: تِقْبُرْ قَلْبِي رَيْتَكْ.. حَكِيمْ قَدّ الدِّنِي وما بْتَعْرِفْ تْقُولْ: أَللَّه يِرْحَمُو..
زمرد:
إِبِنْ خَيِّكْ تْعَلَّمْ يْزِينْ الضَّغِطْ وْيِضْرُبْ إِبِرْ.. بَسّ ما تْعَلَّمْ يِحْكِي بَيْن النَّاسْ.. وْكِلّ ما إِمْرَضْ وْرُوح لْعِندْ إِبِنْ خَيِّكْ.. بْيِسْأَلْنِي قَبْل ما يِفْحَصْنِي: شُو مْعَبَّايِه بْبَطْنِكْ الْيَومْ؟.. وْبِيكُونْ صَارْ لي يَوْمَيْن بْلا أَكِلْ.. يا عَمِّي الْمَتَل ما قَالْ شِي كِذِبْ: اللِّي بْيَاكُلْ عَ ضِرْسُو بْيِنْفَعْ نَفْسُو..
بدور:
أَنا بْفَضِّلْ يِبْقُوا ولادِي حَمِيرْ.. لا بْيِقْرُوا وْلا بْيِكِتْبُوا.. أَحْسَنْ ما يَعرْفُونِي جَحْشِه.. ما بَعْرِف الأَلف مْن الْعصَا..
زمرد:
بَعْرِف مَرَا ما بْتَعْرِف تِكْتُبْ إِسْما.. كَانِت تِسْهَرْ مَعْ وْلادَا تَا يِكِتْبُوا فْرُوضِتُنْ، وْكانُوا يْفَكّرُوها آخْدِي أَعْلَى شْهادِه.. وْما قَالِتْلُنْ الْحَقِيقَه تا تْخَرّجُوا كِلُّنْ مْنِ الْجامْعَه..
بدور:
وْلادْنا.. إِلُنْ أَللَّه يا جَماعَه.. إِلُنْ أَللَّه.. كَمَانْ نِحْنَا بَدّنَا نْعِيشْ..
زمرد:
لَيْش أَللَّه مُشْ فَاضِي إِلاَّ يْرَبِّي وْلادْنا.. حِلّي عَنْ ضَهْرُو بَقَى.. صَارْ قِرْفانْ مِنْ هَالْبَشَرِيِّه.. كِلّ وَاحِدْ عِنْدُو وْلادْ.. لازِمْ يْعِيشْ لِوْلادُو.. وَإِلاَّ ما يِتْجَوَّزْ..
الناطور:
أنشّاللَّه بِتْكُونْ فِدَا عَنْكُنْ يا جَمَاعَه.. وْرُوحَا بِالسَّمَا..
سعدى:
قَالْ رُوحا بِالسَّمَا قَالْ.. إِذَا كَانِتْ السَّمَا بَدّا تِسْتَقْبِلْ هَيْك ناسْ لازِمْ يْسَكّرُوها بِالشَّمْع الأَحْمَرْ..
نجوى:
مَرَّه طِلِعْ واحِدْ بَخِيلْ عَ السَّمَا، قَامْ أَللَّه قَدّمْلُو قَصِرْ مَفْروشْ وْقَلُّو: هَالْقَصِرْ إِلَكْ.. فِيكْ تِعْمِل فِيهْ مِتِلْ ما بَدَّكْ.. تانِي يَوْم حِمِلْ شَنِطْتُو وْتَرَكْ الْقَصْر، قَلُّو: لْوَيْن رَايِحْ يا إِبْنِي، قَلُّو: إِجَّرْت الْقَصِرْ وْرَايِحْ إِسْكِنْلِي سِنْتَيْن مَعْ خَيِّي بِجْهَنَّمْ..
(تضحك سعدى)
لا تِضْحَكي بْصَوْت عالِي.. هَلَّقْ بْتِسْمَعِكْ أُم حَنَّا..
سعدى:
أَللَّه يِرْحَمَا شُو كانِتْ تِسْمَعْ مْنِيحْ.. خَبَّرْنِي جِدِّي إِنُّو سِمْعِتْ جَحِشْ عَمْ بِيشَهْنِقْ بْقِبْرُصْ.. قالِتْلُو: سَكِّتْ هَالجَّحشْ يا بُو الياسْ، بَدُّو يْنامْ إِبْنِي حَنَّا..
نجوى:
وِانْشَاللَّه سَكَتْ الْجَحِشْ؟
سعدى:
سَكَتْ جِدِّي بُو الْياسْ.. وْصَارْ يْهِزّ بْراسُو.. إِي وَاللَّه.. كانِتْ تْلَزِّقْ دِينَيْهَا عَ حِيطَانْ الِبْيُوت.. وِالشَّاطِرْ يِفْتَحْ تِمُّو..
نجوى:
يِعْنِي كَانِتْ أَشْطَرْ مْنِ الْمُخَابَرَاتْ؟
سعدى:
إِذَا الْمُخَابَرَاتْ أَجْنَبِيِّه.. أُمّ حَنَّا أَشْطَرْ بِكْتِيرْ.. بَسّ إِذَا كَانِت عَرَبِيِّه.. رَاحِتْ عْلَيْنَا..
رجل مخابرات:
فيكي تِتْفَضّلي مَعْنَا إِذَا بِتْرِيدي..
سعدى:
لَيْشْ شُو عْمِلْت؟
رجل مخابرات:
عَمّ بِتْطَوّلي لْسَانِكْ عَ المُخابَرات الْعَرَبِيِّه..
سعدى:
ما عَ الِحْسَابْ ارْتَحْنا..
رجل مخابرات:
إِمْشِي مِن دُونْ ما تِفْتَحي تِمِّكْ.. ما بَدّنا شَوْشَرَه بِجْنازِةْ الْمَرْحُومِه..
(تخرج سعدى مع رجل المخابرات)
أبو فارس:
سْمَعُوا يا إِخْوانْ.. خَيّي النّاطور بَدُّو يْأَبِّنْ الْمَرْحُومِه..
أبو حنا:
يا إخْوان.. مِنْ فَضِلْكُن سْمَعُوا.. ناطورْنا.. حامي الْحِمى.. بَدُّو يْقُولْ قَصِيدِه لَرْفِيقِة دَرْبي..
زمرد:
كِلّنا سَمَعْ يَا ناطورنا.. كِلّنا سَمَعْ..
الناطور:
إِنَّ الطُّيُورُ
عَلَى الْقُبُورُ
تُغَنِّي وْتَقُولُ:
رَحْمَةَ اللَّهِ عَلَيْكِ يَا أُمَّ حَنَّا الشَّمْخَرُورُو
أبو حنا:
أُم حَنَّا.. أُمّ حنَّا.. أُمّ حنَّا..
الناطور:
قَلْبُ الْجُمُوعُ
ذَرَفَ الدُّمُوعُ
عَلَيْكِ يا أُمَّ حَنَّا
الَّتي قَلْبُ زَوْجِها مِثْلَ كَعْبِ الصِّرْمايَةِ مَشْلُوعُ
أبو حنا:
أُم حَنَّا.. أُمّ حنَّا.. أُمّ حنَّا.. إِي وَاللّه قَلْبي مِتْل كَعْب الصِّرْمايِه مَشْلُوعْ.. يا حَبِيبِةْ قَلْبِي يا أُم حنا.. عَ مِينْ تْرَكْتِي بُو حَنَّا؟
الناطور:
قَرْعُ الطُّبُولُ
بَكَّى السُّهُولُ
حِينْ أَطَلَّ التَّابُوتُ
الذي بِهِ جُثْمانُكِ يا أُمَّ حَنَّا مَحْمُولُ..
أبو حنا:
أُم حَنَّا.. أُمّ حنَّا.. أُمّ حنَّا.. يا رْفِيقِةْ حَيَاتي.. يا شْرِيكِةْ عُمْري.. يا مِسْتَوْدَعْ أَسْرَاري.. يا ضِيعانِكْ يا زَهْرِة الضَّيْعَه..
(إبنا أم حنا يغمى عليهما)
راجي:
أَحْسَنْ شِي يْرِدُّوهُنْ عَ الْحَبْس.. حَاجِي يْفَنّصُوا عْلَيْنا.. وْيِعِمْلُوا حَالُنْ زِعْلانِينْ عَ إِمُّنْ وْهِنِّي الْقَتْلُوها..
عدنان:
عَمْ بِيقُولُوا الْجِنِّيِّه قَتْلِتَا..
راجي:
هِنِّي الْقَتْلُوها لِمِّنْ فَاتُوا عَ الْحَبْس قَبِلْ ما تِقْتِلا الْجِنِّيِّه.. تْنَيْن زِعْرَانْ ما تَرْكُوا عَيْن إِلاَّ ما بَكُّوها..
عدنان:
سَرْقُوا بَيْتِي أَكْتَرْ مِنْ عِشْرِينْ مَرَّه.. وْما قْدِرْت إِكْمِشُنْ.. آخ لَوْ وَقْعُوا بَيْنْ دَيِّي آخْ.. كِنْت شِلْتْ لَحْمُنْ عَنْ عَضْمُنْ وِشْلَحْتُو لِلْواوِيِّه..
راجي:
قَوْلكْ وَيْنْ مَنصُور هَلَّقْ؟ كانْ لازِمْ يِحْضَرْ دَفْنِةْ عَمّتُو؟
عدنان:
أَنا وْجايِي عَ الِكْنِيسِه شِفْتُو عَمْ بِيحِط زِبِلْ عَ كْعاب الزَّيْتُونْ..
راجي:
لَيْش هُوِّي صَدَّقْ إِنَّا ماتِتْ.. الْعَتْرَه عَ الْبِيرُوحْ يا جَماعَه.. الْعَتْرَه عَ الْبِيرُوحْ..
عدنان:
فِي وَاحِدْ هُوِّي وْعَمْ تِطْلَعْ رُوحُو قَلُّنْ لِوْلادُو: لا تِنْسُوا تْزَبّلُوا الزَّيْتُوناتْ.. قالُولوا ولادُو: إِنْت مُوتْ وْلا تِعْتِل هَمّ بُكْرَا مِنْبِيعُنْ..
راجي:
فِي وَاحِدْ ماتِتْ مَرْتُو.. قَلُّو الخُورِي: عَيْبْ تِتْجَوَّزْ قَبِلْ ما يْنَشِّفْ الْبَاطُونْ عَ قَبِرْ مَرْتَكْ.. رَاحْ اشْتَرَى سِتّ مْرَاوِحْ.. دَارُنْ عَ الْقَبْرْ.. وْقَلُّوا نَشِّفْ يا بَاطُونْ.. الْعَرُوسْ ناطْرِتْنِي..
(يضحك عدنان)
لا بَقَى تِضْحَك بْصَوْت عالِي.. هَلَّقْ بِتْجَرّصْنا..
عدنان:
رُوح تا نرُوحْ عَ الْمَقِبْرَه.. حَرَامْ تِنْزِل أُمّ حَنَّا بِالْقَبِرْ وما غَنِّيلا شْوَيْ..
راجي:
هات.. سَمّعْني..
عدنان:
ـ1ـ
دَخْلَكْ يا طَيْر الْوِرْوَارْ
قِلِّي بْأُمّ حَنَّا شُو صَارْ
تَرْكِتْنَا وْرَاحِتْ لَبْعِيدْ
وِالدَّمْعَه بْعَيْنِي قِنْطارْ
ـ2ـ
كِيفْ بَدّنا نْوَدِّعْ جَارِتْنا
وْكِلّ لَيْلِه مَعْها نِسْهَرْ
ضِحْكِتْها كانِتْ ضِحْكِتْنا
لَكِنْ قَامِتْها أَكْبَرْ
سامِحْها كْتِيرْ
وِارْحَمْها كْتِيرْ
يا إِلَهِي..
دَخْلَكْ يا طَيْر الْوِرْوَارْ
قِلِّي بْأُمّ حَنَّا شُو صَارْ
تَرْكِتْنَا وْرَاحِتْ لَبْعِيدْ
وِالدَّمْعَه بْعَيْنِي قِنْطارْ
**
المشهد الثالث
(أهالي القرية)
سعدى:
يا جَماعَه اسْمَعُوا.. ظَهْرِت عْلَيِّي الْجِنِّيِّه، وقالِتْلِي إذا بَدّكُنْ تْلاقُوا الْكَنْز، لازِمْ تْمِدُّوا مَيّ عَ الضَّيْعَه.. وَإِلاَّ ما فِي كَنْز..
نجوى:
كِيفْ ظَهْرِت عْلَيْكِي الْجِنِّيِّه وبَعْدِكْ طَيّبِه؟.. ما طِلْعِتْ الْفَلِّه إِلاَّ بْرَاسْ أُمّ حَنَّا.. ما عَ الِحْسابْ قَفْشُوكِي الْمُخابَراتْ
سعدى:
شُو قَصْدكْ أَنَا كِذَّابِه.. هَيْك الْجِنِّيِّه قَالِتْلِي، وْإِنْتُو حِرِّينْ تْجِيبُوا مَيّ عَ الضَّيْعَه أوْ تْضَلُّوا عِطْشَانِينْ.. أَنا مُشْ فِرْقانِه مَعِي..
زمرد:
فِينِي أَعْرِفْ كِيفْ عايْشِين بْلا مَيّ.. وْلِكْ زيمْبَابْوِي جابُولا مَيّ.. أَفْغَانِسْتانْ جَابُولا مَي، وْنِحْنا بِبْلادْ الْيَنابِيعْ وِالنّهُورا والتَّلْج ما عِنَّا مَيّ.. قُولُوا مَعِي بْصَوْت وَاحِدْ: تْفُوه عْلَيْنا..
أبو فارس:
تْفُوه عْلَيْنا..
زمرد:
كَمانْ مَرَّه.. كِرْمالْ هَالنَّاسْ الطَّيْبِينْ مِتِلْنا..
أبو فارس:
تْفُوه عْلَيْنا..
زمرد:
إِذَا بِتْرِيدْ لَحِّنَا شْوَيّ مِتِلْ وَديع الصَّافِي تا نِلْتَذّ فِيها..
أبو فارس:
أُوفْ أُوفْ أُوفْ.. يا لَيْل يا لَيْل يا ما فِيكْ غِنَّيْنا.. وْلِكْ تْفُوهْ تْفُوهْ تْفُوهْ عْلَيْنا.. يا لَيْل..
بدور:
يِخْرُبْ بَيْتَكْ شُو صَوْتَكْ جْعَارِي..
أبو فارس:
أَنا صَوْتِي جْعارِي.. تْفُوهْ تْفُوهْ تْفُوه عْلَيْكي..
سعدى:
أَنا رَحْ سَمِّعْكُنْ ياها عَ لَحنْ آه يا أُمّ حَمادَه
ـ1ـ
آه يا أُمّ حَمادَه
تْفُوه تْفُوه تْفُوه عْلَيْنا
عْمِيلِيلِي قَهْوِه سَادَه
تْفُوه تْفُوه تْفُوه عْلَيْنا
مَيِّتْنا عَمْ نِهْدِرْها
تْفُوه تْفُوه تْفُوه عْلَيْنا
لازْم نْغَيِّرْ هَالْعادَه
تْفُوه تْفُوه تْفُوه عْلَيْنا
(يدخل منصور)
منصور:
بَلا تْفُوهْ.. بَلا بَلُّوطْ.. أَنَا الْجِنِّيِّه قَالِتْلِي: تا يِظْهَرْ عْلَيْكُنْ الْكَنْزْ لازِمْ تِضْوِي الضَّيْعَه..
بدور:
هَيْدِي بَسِيطَه.. قْنادِيل الضَّيْعَه بِتْضَلّ مْشَعِشْعَه.. لازِمْ يِظْهَر عْلَيْنا الْكَنْزْ..
منصور:
بَدَّا كَهْرَبا.. بَدَّا عْوَامِيدْ.. بَدَّا لَمْبات تْضَوِّي الشَّوارِعْ.. ما بَدَّا قْنادِيلْ زَيْت..
بدور:
قْنادِيلْ الزَّيْت نِحْنا الْمِنْضَوِّيهَا وْنِحْنا اللِّي مْنِطْفِيها.. بَسّ الْكَهْرَبا مُشْ مَعْرُوف لا مِينْ بْيِطْفِيها وْلا مِينْ بِيضَوِّيها..
زمرد:
الْقِنْدِيلْ مِتْل الْكَهْرَبا.. هُوِّي بْيِمْشِي عَ الزَّيْت.. وْهِيِّي بْتِمْشِي عَ الْمازوتْ.. بَسّ الْفَرْق بَيْناتُنْ هُوِّي بْيِضْوِي وْهِيِّي بِتْضَلّ مِطْفِيِّه..
أبو فارس:
الْكَهْرَبا بِبْلادْنا ما فِي شِي بِيمَشِّيها.. مَشِّتْ كَذَا رَئِيسْ وْكَذَا وَزِيرْ وْبَعْدَا وَاقْفِه..
بدور:
قَوِلْكُنْ هَالْجِنِّيِّه مِنْ أَيَّا بْلادْ جَايِي.. لَوْ كانِتْ لُبْنانِيِّه ما كانِتْ قَالِتِلْنا تا نْمِدّ كَهْرَبَا.. أَكِيدْ جَايِي مِنْ أُسْتْرَالْيا.. وْمِنْ سِيدْنِي بِالذَّاتْ.. هَوْنِيكْ ما بْتِنْقِطِع الْكَهْرَبَا..
زمرد:
بْتِنْقِطِعْ.. بْتِنْقِطِعْ.. مْبارِح تِلْفَنْت لْبِنْتِي.. قَالِتْلِي إِنُّنْ قَاعْدِينْ عَ الْعَتْمْ.. وْقَالِتْلِي إِنُّو مْوَلّداتْ الْكَهْرَبا صَارِتْ عَتِيقَه وْبَدُّنْ يْغَيّرُوها..
بدور:
هَوْنِيكْ بِيغَيّرُوها.. بَسّ هَوْن بْيِشِفْطُوها.. وْقُومْ يا لُبْنانْ إِذَا فِيكْ تْقُومْ..
أبو فارس:
أَنا بْقُول إِنُّو ما فِي داعِي لِلْكَهْرَبا ببْلادْ ما فِيها كَهْرَبا..
منصور:
إِذَا الْجِنِّيِّه قَالِتْ لازِمْ نْمِدّ كَهْرَبا.. لازِمْ نْمِدّ كَهْرَبَا.. وَإِلاَّ خْسِرْنا الْكَنْزْ..
راجي:
قَبلْ ما تْمِدُّوا كَهْرَبا لازِمْ تْمِدُّوا مْجاريرْ عَ الضَّيْعَه.. قَطِيعَه كِلّ ماشِي والتَّانِي بَدّنا نْرُوحْ عَ الْبَرِّيِّه.. ما عِدْنا نَعْرِف أَيَّا شَجْرَه بَدّنا نْزَبِّلْ..
بدور:
إِذَا الْجِنِّيِّه ما قَالِتْ مِدُّوا مْجارِيرْ عَ الضَّيْعَه.. مُشْ رَحْ نْمِدّ..
راجي:
أَنا قَالِتْلِي: مِدُّوا (سُورِجْ).. ما قَالِتْلِي: مِدُّوا مْجارِيرْ..
زمرد:
شُو يِعْنِي سُورِجْ؟.. هَالْكِلْمِه مُشْ مارْقَه عَ لْسَاني.. حَدَا مَرْقِتْ عَ لْسَانُو كِلْمِةْ سُورِجْ؟
بدور:
أَنا مَرْقِتْ عَ لْسَانِي كِلْمِةْ (سُوسِجْ).. يِمْكِنْ تْكُونْ بِنْت عَمَّا..
سعدى:
سُوسِجْ يِعْنِي مْقَانِقْ وْسُورِجْ يِعْنِي مْجارِيرْ.. فْهِمْتُو هَلَّقْ..
بدور:
ما قِلْتِلّكُنْ قْرَايْبِينْ.. تْنَيْناتُنْ بَدُّنْ تِعْبايِه..
راجي:
فَإِذَنْ لازِمْ نْمِدّ مْجارِيرْ عَ الضَّيْعَه.. وَإِلاَّ طـــــــار الْكَنْز..
(تدخل نجوى مثل المجنونة)
نجوى:
دَخِيلْكُنْ انْدَهُوا الْخُورِي تَا يِمْشَحْنِي قَبلْ ما مُوتْ.. أَنا شِفْت الْجِنِّيِّه وْيِمْكِنْ عَضّ عَ لْسَانِي.. اللِّي بَدُّو شِي مِنْ أُمّ حَنَّا يْقِلِّي هَلَّقْ.. غْفُرولي يا جَماعَه..
بدور:
مُشْ رَحْ تْعَضِّي عَ لْسَانِكْ.. لا تْخافي.. كْتارْ شَافُوا الْجِنِّيِّه وِلْسَاناتُنْ مُشْ عَمْ تْوَقِّفْ حَكِي..
نجوى:
إِذَا كانْ هَيْك سْمَعُوا شُو قالِتْلِي الْجِنِّيِّه.. قَال لازِمْ نْعَمِّر مَدِرْسِه بِالضَّيْعَه.. وَإِلاَّ رَحْ تِنْقُل الْكَنْز عَ ضَيْعَه تَانْيِه..
أبو فارس:
وَاللَّه هَالْجِنِّيِّه رَحْ تْجَنِّنَّا.. سَاعَه مَيّ.. سَاعَه كَهْرَبا.. ساعَه مْجاريرْ.. وْسَاعَه مَدْرَسِه.. إِي وَاللَّه بَدّنا وِزارَه بِتْلاتِينْ وَزِيرْ ما فِيها تْنَفِّذ هَالِمْشَارِيع..
منصور:
ما في أَهْوَن مِنْ تِنْفِيذْ هَالْمَشارِيع.. أَوَّلاً مِنْمِدّ كَهْرَبا عَ الضَّيْعَه مِنْ أَقْرَبْ ضَيْعَه عْلَيْنا.. مَبْسُوطِينْ؟
الجميع:
مَبْسُوطِينْ..
راجي:
أَنا عِنْدِي عَشْر لَفَّاتْ شِرْطانْ كَهْرَبا.. وْمُشْ عارِف شُو بَدِّي إِعْمِلْ فِيها..
سعدى:
ألْف مبْرُوكْ وِصْلِت الْكَهْرَبا عَ الضَّيْعَه..
منصور:
تانِياً، مِنْرَكِّب مُوتارْ عَ الْعَيْن التِّحْتانِيِّه بْيِسْحَبِلْنا مَيّ قد ما بَدّنا.. مَبْسُوطِينْ؟
الجميع:
مَبْسُوطِينْ..
أبو فارس:
أَنا عِنْدِي مُوتار جْديدْ.. بْقَدّمُوا هْدِيِّه لِلضَّيْعَه..
منصور:
تالِتاً، في بْيُوت كْتِيرْ فاضْيِه بالضَّيْعَه، أَصْحابَا فَلُّوا عَ أُسْتْرالْيا.. نَقُّوا الْبَيْت الْمُناسِبْ وِفْتَحُوه مَدْرَسِه.. مَبْسُوطِينْ..
الجميع:
مَبْسُوطِينْ.. مَبْسُوطِينْ..
مُشْ رَحْ نِعْطَشْ.. مَبْسُوطِينْ
وْرَحْ مِنْضَوِّي.. مَبْسُوطِينْ
وْرَحْ نِتْعَلَّمْ.. مَبْسُوطِينْ
مَبْسُوطِينْ.. مَبْسُوطِينْ..
منصور:
بَعِدْ باقِي السُّورِجْ.. هَيْدَا بَدُّو دَوْلِه تا يِنْمَدّ..
راجي:
عْمِلُوا مِتِلْ ما قَال أَخْوِتْ شَنايْ..
بدور:
وْشُو قَالْ أَخْوِتْ شَنايْ يا ذَكِي عَصْرَكْ؟
راجي:
كِلّ وَاحِدْ يِفْتَحْ قَبْرُو بْإِيدُو.. بْتُوصَل الِمْجاريرْ عَ الضَّيْعَه.. وْإِذا بَدّكُنْ فيكُنْ تْمَرّقُوا الِمْجارِيرْ بْزَيْتُوناتِي.. الْمُهِمّ يِظْهَر علينا الْكَنْزْ..
ـ1ـ
زَيْتُوني ناطِرْ ناطِرْ
طَلِّةْ هَالنَّاسْ
زَيْتُونِي أَخْضَرْ ما بِيباسْ
ـ2ـ
خَلُّوا الشَّجْرَه مُخْضَرَّه
تا تِعْطِي فَيّ
أَرْزِتْنا خَضْرَا وْحُرَّه
مِنْقِلاَّ: خَيّْ
زَيْتُوني ناطِرْ ناطِرْ
طَلِّةْ هَالنَّاسْ
زَيْتُونِي أَخْضَرْ ما بِيباسْ
ـ3ـ
زَيْت الزَّيْتُون الصَّافِي
بْيِشْفِي الْمَعْلُولْ
يا زَيْت بْلادِي الشَّافِي
شُو بَدِّي قُولْ؟
زَيْتُوني ناطِرْ ناطِرْ
طَلِّةْ هَالنَّاسْ
زَيْتُونِي أَخْضَرْ ما بِيباسْ
**
المشهد الرابع
(الناطور يحمل بارودته، زوجته كريمة تختبىء في زاوية المسرح)
الناطور:
بَدِّي أَعْرِف إِذَا الْجِنِّيِّه كِذْبِه أَمْ حَقِيقَه.. أَنا ناطُورْ الضَّيْعَه.. يِعْنِي أَنا الدَّوْلِه.. وْلازِمْ ما يْفُوتْنِي شِي.. حتى الجْنِيِّه لازِمْ تاخُدْ إِذِنْ مِنِّي قَبِلْ ما تْفُوت عَ الضَّيْعَه.. وَإِلاَّ فَرْطِتْ لدَّوْلِه..
كريمة:
يا ناطورْ.. حاكِينِي يا ناطُورْ..
الناطور:
مِينْ عَمْ يِنْدَهِلِي؟
كريمة:
أَنا الْجِنِيِّه... أَنا جِنِّيِّةْ الضَّيْعَه..
الناطور:
يا يا يا يا يا يا ياي.. عْمِلْتا تَحْتي..
كريمة:
لَيْك مِلاّ ناطُور لَيْك.. بارودْتُو أَطْوَلْ مِنّو وْعِمِلا تَحْتُو..
الناطور:
شُو اللِّي جَابِكْ لَهَوْن.. أَنا ما قِلْتِلِّك ما تِطْلَعِي بَرَّاتْ الْبَيْتْ قَبِلْ ما قَوِّص الْجِنِّيِّه..
كريمة:
كِيفْ بَدَّكْ تْقَوِّصَا وْما فِيكْ تُوقَفْ عَ جْرَيْك..
الناطور:
إِذَا بِتْخَبّْرِي أَهْل الضَّيْعَه إِنِّي فِزْعانْ بِيحِطُّوا ناطُورْ غَيْرِي.. ساعِتا مِنْ وَيْن بَدِّي جِبْلِكْ فْسَاتِينْ تِلِبْسِيها.. وِسْكَرْبِيناتْ تِتْغَنْدَري فِيها..
كريمة:
أَللَّه يِحْمِيكْ يا بَطَلْ.. ضَيْعِتْنا لَوْلاكْ كانِتْ سَايْبِه..
الناطور:
رُوحِي تا نِرْجَعْ عَ الْبَيْت.. قَبلْ ما تِظْهَرْ عْلَيْنا الْجِنِّيِّه وِتْرَوِّحْنا مِتِل أُمّ حَنَّا..
كريمة:
يا ناسْ يا هُو.. جَوْزِي قَوَّصْ عَ الْجِنِّيِّه..
بَسّ ما صَابَا..
الناطور:
صِبْتَا.. صِبْتَا.. وْصَارِتْ تِعْرُجْ..
كريمة:
صَابَا.. صَابا.. جِيبُولا أَمْبِيلُونْسْ..
الناطور:
عجّلي تا نِهْرُبْ.. هَلَّقْ بْتُوصَلْ أَمْبِيلُونسْ الْجانْ.. وْبِتْحَمِّلْنا نِحْنا..
(يخرجان.. أهالي القرية يفتّشون عن الكنز)
سعدى:
ـ1ـ
وَيْنِكْ يَا جِنِّيِّه وَيْنِكْ
وَيْن الدَّهَبْ وِالإِلْماس
طِلِّي عْلَيْنَا.. دَخِيلْ عَيْنِك
بِتْلاقِينَا أَحْلَى ناسْ
وَيْنِكْ.. وَيْنِكْ
طِلِّي عْلَيْنَا
طِلِّي عْلَيْنَا
دَخِيلْ عَيْنِكْ
ـ2ـ
مِحَّيْنَا بِالنُّورْ الْعَتْمِه
تا نْشُوفِكْ يا جِنِّيِّه
مِنْحِبِّكْ.. هَايْ أَحْلَى كِلْمِه
إِنْتِي الشَّمْس الْمِضْوِيِّه
وَيْنِكْ.. وَيْنِكْ
طِلِّي عْلَيْنَا
طِلِّي عْلَيْنَا
دَخِيلْ عَيْنِكْ
ـ3ـ
قِلْتِيلْنا: بِالضَّيْعَه كَنْزْ
وْما قِلْتِي وَيْن مْخَبَّى
فُقْرَا.. وْعَمْ نِحْلَمْ بِالْعِزّ
الْعِيشِه الْحِلْوِه مِنْحِبَّا
وَيْنِكْ.. وَيْنِكْ
طِلِّي عْلَيْنَا
طِلِّي عْلَيْنَا
دَخِيلْ عَيْنِكْ
ـ4ـ
رَحْ نِفْرُشْ طُرْقاتِكْ زَهْرْ
وْرَحْ نِهْدِيكِي مْوَاسِمْنَا
كَنْزِكْ رَحْ بِيمَحِّي الْفَقْرْ
ياما بِالْمالْ حْلِمْنَا
وَيْنِكْ.. وَيْنِكْ
طِلِّي عْلَيْنَا
طلِّي عْلَيْنَا
دَخِيلْ عَيْنِكْ
راجي:
ـ1ـ
مَرْحَبَا يَا جِنِّيِّه
يا جِنِّيِّه مَرْحَبَا
لَوْلاكِي يا جِنِّيِّه
ما إِجِتْنا الْكَهْرَبا
ـ2ـ
نِحْنا فِيكِي فِرْحانِينْ
طِلِّي عْلَيْنا مِشْتاقِينْ
مْنِهْدِيكِي وَرْد وْياسمِينْ
وْكِلْمِه حِلْوِه طَيِّبَه
ـ3ـ
وْعَدْتِينَا بِالضَّيْعَه كْنُوزْ
وِحْلِمْنا بِالْكَنْز نْفُوزْ
نِبْقَى فُقْرَا ما بِيجُوزْ
بَدّنا بَدْلِه مْدَهِّبَه
بدور:
ـ1ـ
طِلِّي طِلِّي.. بَدّنا تْطِلِّي
بَرْكِي مْنِرْبَحْ كلّ الْغَلِّه
الْكَنْز مْخَبِّى.. وَيْن الْكَنْز
تا يْمَحّيلْنا عَصْر الْقِلِّه
ـ2ـ
نِحْنا فُقَرا وِمْسَاكِينْ
عِنَّا وْلاد زْغَيّرينْ
مِنْطَعْمِيهُنْ خُبْز وْتِينْ
وْمِنّيِمْهُنْ بِالسَّلِّه
ـ3ـ
طِلِّي عْلَيْنا يا جِنِّيِّه
تا نْغَنِّيلِك هَالغِنِّيِّه
إِنْتِي الْوَرْداتْ الْجُورِيِّه
وْإِنْتِي الدَّهَب الْعِسْمَلِّي
عدنان:
انْكِشُوا الأَرْض.. ما تْخَلُّوا حَجَرْ فَوْق حَجَرْ.. لازِمْ نْلاقِي الْكَنْزْ..
منصور:
صَرْلِي عَمْ إِنْكُشْ مْنِ مْبارِحْ وْما عَمْ لاقِي إِلاَّ كْياسْ الزّبَالِه..
راجي:
زْبالِه.. زْبالِه.. وَيْن ما كانْ فِي زْبالِه.. زْبالِه مَطْمُورَه.. زْبالِه مَكْشُوفِه.. أَللَّه وَكِيلْكُنْ شِي بِيقَرِّفْ..
عدنان:
زْبالِه.. زْبالِه.. زْبالِه
حَالِه مَنَّا حَالِه
وِسَّخْنا شْوارِعْنا
وْشُوَّهْنا الِحْقَالِه
نجيب:
زْبالِه.. زْبالِه.. زْبالِه
رِيحِتْها قِتَّالِه
تا نْكُبّ زْبالِتْنا
ضِحَّيْنا بِالْغَالِي
أبو فارس:
زْبالِه.. زْبالِه.. زْبالِه..
مِنْ مالَكْ وْمالِي
لا دَوْلِتْنا بْتِسْأَلْ
وْلا نِحْنا مِنْبالي
منصور:
لازِمْ نِحْتَجْ وْنِمْشِي بْمُظَاهَرَه ضِدّ الزّبالِه.. تْفُوه مِلاّ حالِه..
راجي:
عَ شُو بَدّنا نِحْتَجّ.. ما نِحْنا الْعَم نِكُبّ الزّبالِه.. وْأَوَّلْ وَاحِدْ إِنْت..
منصور:
وَيْن بَدَّكْ يانِي رُوح بِزْبالتِي.. لا الْبَلَدِيَّاتْ بِتْلِمَّا.. وْلا الدَّوْلِه سِئْلانِه..
نجيب:
بْلادْ الْجَمالْ.. بْلادْ الْمَناخْ الْحِلُو.. بْلادْ أَللَّه عَ الأَرْض.. صَارِتْ بْلادْ الزَّبَالِه..
أبو فارس:
كانِتْ بْلادْنا أَنْضَفْ بْلادْ بِالْعالَمْ.. صَارِتْ أَوْسَخْ بْلادْ.. كْياسْ الِبْلاسْتِيكْ السَّوْدا سَوّدِتْ حْقُولْنا وِشْوارِعْنا.. سَوّدِتْ وْجُوهْنا.. لازِمْ الدَّولِه تِسْتَبْدِلا بِكْيَاسْ وَرَقْ تا تِحْمِي الْبِيئَه.. وَإِلاَّ رَاحِتْ عْلَيْنا..
عدنان:
سْمِعِتْ إِنُّو الْواوِيِّي بْيَاكْلُو زْبالِه.. أَحْسَن شِي نِسْتَوْرِدْ كَمْ واوي.. بَرْكِي بْيِقْضُوا عَ زْبالِتْنا..
نجيب:
وْمِنْ وَيْن بَدّنا نِسْتَوْرِدْ هَالْواوِيّي يا خَوَاجَه عِدْنانْ؟
عدنان:
ما زَالْ نِحْنَا عَرَبْ لازِمْ نِسْتَوْرِدْ واوِيّي عَرَبْ.. وْأَنا مِتْأَكَّدْ إِنُّو جامِعْة الدُّوَل الْعَرَبِيِّه بِتْأَمِّنُنْ لِنا عَ أَهْوَنْ سَبِيلْ..
راجي:
وْمِينْ قَلّكْ نِحْنا عَرَبْ؟ إِذَا بَدّكُنْ تْجِيبُوا واويي جِيبُوهُنْ مْنِ فْرَنْسَا.. فْرَنْسَا أُمّنا وْمُشْ رَحْ تِبْلِفْنا..
عدنان:
O lala بَدَّكْ يانِي إِحْكِي مَع الْواوي فْرِنْسَاوِي.. إِي هَيْدِي أَللَّه ما قَالاَ.. تانياً أنا ما بِرْضَى.. يا بِيكُونُوا الْواوِيّي عَرَبْ.. يا بَلاهُنْ بِالْمَرَّه..
أبو فارس:
لا تْخَلُّوا الْعَصَبِيِّه تِعْمِي قْلُوبْكُنْ.. فَكّرُوا مْنِيحْ قَبْل ما تِنْدَمُوا.. الزّبالِه رَحْ تاكِلْنا..
عدنان:
الْواويي الْعَرَبْ مِنَّا وْفِينَا.. زْبالِتُنْ مِتْل زْبالِتْنا.. وْلِغُّتُنْ مِتِلْ لُغِّتْنا..
نجيب:
هَلَّقْ الواوي صَارْ يِحْكِي عَرَبِي.. خَافُوا أَللَّه يا جَماعَه خافُوا أَللَّه..
راجي:
الْعَرَبْ إِذَا فَاتُوا عَ بْلادْنا ما بِيعُودُوا يِطْلَعُوا.. أَكْل وْمَرْعَى وْقِلِّة صَنْعَه.. خَلُّونا نْجِيبْ واويي إِنْكلِيزْ..
عدنان:
O, my God, do you want me to speak English with a fox, what's the matter with you.. Are you mad?
زْبالِتْنا زْبالِه عَرَبِيِّه وْبَدّكْ الإِنْكليزْ ياكْلُوها.. وَيْن الْوَطَنَيِّه؟.. وَيْن الْعُرُوبِه؟..
راجي:
يا عَمِيلْ الإِنْكِليزْ.. الْمَوْت لْلَنْدُن وِلْباريزْ
منصور:
أَحْسَنْ شِي نْجِيبْ واوِيي أَمِيرْكانْ.. هَوْدِي بْيَاكْلُوا كِلّ أَنْواعْ الزّبالِه..
عدنان:
خايِفْ يْجِيبُوهُنْ بِالأُسْطُول السَّادِسْ.. وِيْنَزّلُوهُنْ بِالزَّوارِقْ البَرْمائِيِّه.. وِيْفَكّرُونا أَفْغانِسْتانْ..
راجي:
ما أَحْسَنْ ما يْجِيبُوهُنْ عَ ضَهْر الْجَمَلْ.. لابْسِينْ غْنابيزْ وْشِرْحَيْطاتْ.. الْعَصْر عَصْر سُرْعَه.. إِذَا ما بْتِمْشِي مَعُو بْيِتِرْكَكْ وَاقِف لَحالَكْ..
عدنان:
يا عَمِيل الأَمِيرْكانْ.. أُتْرُكْ مَوْطَنَّا لُبْنانْ..
نجيب:
ما حَدَا مِنْكُنْ فَكَّرْ بِالْمُعَسْكَرْ الشَّرْقِي.. شُو بْيِمْنَعْ نِسْتَوْرِدْ مِنُّو كَمْ واوي؟
أبو فارس:
لَيْش بَعْد في مُعَسْكَرْ شَرْقِي؟.. ما كِلُّنْ بَلْعِتُنْ أُوروبا.. وْكل ما يِغْلا الْيُورو بْيِتْنَفّسُوا.. وْكِل ما يِرْخَصْ بِينَفّسُوا.. أنا بِعْتقدْ إِنُّو رُوسِيَّا عِنْدَا أَفْضَلْ واويي بِالْكَوْن.. إِذَا مِنْجِيبُنْ ما فِينا نْلَحِّقْلُنْ زْبالِه..
منصور:
الشُّيُوعِيِّه ماتِتْ بْرُوسيّا تا تْعِيشْ بْلُبنان.. عَلّقُوا صُورْ ماوْ تِسي تُونْغْ وِسْتالِينْ.. شُو ناطْرِينْ..
عدنان:
عَرَبْ عَرَبْ عَرَبْ.. نِحْنا مَعِ الْعَرَبْ
راجي:
جَرَبْ جَرَبْ جَرَبْ.. كِلّ الْعَرَبْ جَرَبْ
نجيب:
عِلْقِتْ عَ كَوْمِة زْبالِه.. هَلَّقْ بِيرَكّبُوا الْمَدَافَعْ وِبْتِفْلِتْ الْمُخابَراتْ.. وِبْتِتْدخَّل الدُّوَلْ الشَّقِيقَه.. وِالدُّوَلْ الصَّدِيقَه.. تا آخِدْلِي مَزِّة عَرَق مْتَلَّتْ وِاهرِبُوا يا واويّي..
أبو فارس:
حَتَّى الزّبَالِه صَار إِلا قَوْمِيِّه وْصِرْنا نِخِتْلِفْ عْلَيْها.. ما تِتْعَجّبُوا إِذَا بُكْرا قالُوا: هْنِيَّالْ مِينْ لُو كَوْمِةْ زْبالِه بجَبَلْ لُبْنانْ..
(تدخل بعض النسوة كميّات من البصل)
كريمة:
شُو بِهُنْ عِلْقَانِينْ مَع بَعْضُن.. انْشَالله حِضْيُوا بِالْكَنْزْ وِعِلْقُوا عْلَيْه؟
نجوى:
حِضْيُوا بِالزّبالِه.. وْعِلْقانِين عَ الْواوِيي.. ناسْ بَدُّنْ ياهُنْ عَرَبْ وْناسْ بَدُّنْ ياهُنْ أَجانِبْ..
كريمة:
قِلِّةْ واويي بِبْلادْنا.. دَخِيل أَللَّه.. مُشْ عارْفِينْ كِيفْ بَدّنا نِتْخَلَّصْ مِنُّنْ.. قالْ بَدُّنْ يِسْتَورْدُوا واويي قالْ؟.. اسْمَعُوا يا نِسْوانْ.. إِذَا زَوْجِي النّاطور لاقَى الْكَنْز.. بَدِّي إِلْبُسْ حَريرْ.. وْإِرْكُبْ سَيَّارَه كَشِفْ.. وْحِطّ عْوَيْناتْ سُودْ.. وِاللِّي بَدَّا تْغارْ مِنِّي تْدِقْ رَاسَا بِالْحَيْطْ..
زمرد:
ما إِنْتِي مِنْ دُونْ عْوَيْناتْ سُودْ ما فِيكِي تْشُوفِي.. رُوحِي افْحَصِي عْيُونِكْ قَبلْ ما تِعْمِي..
كريمة:
بِلَّشْتِي تْغارِي مِنِّي.. بَلَّشْ السَّمّ يْنَقِّطْ مِنْ وِجِّكْ.. وْحَقّ جَمِيع الْقِدِّيسينْ مُشْ رَحْ وَقِّفْ سِيّارْتي إِلاَّ قِدَّامْ بَيْتِكْ..
زمرد:
بَسّ تْوَقّفِيها قِدَّامْ بَيْتِي بَدِّي بَخِّشْلا دْواليبَا..
كريمة:
بَدِّي بَخِّشْلِكْ دِينَيْكِي.. بُكْرَا بِتْشُوفِي..
زمرد:
بَدِّي قِصِّلِكْ لْسَانِكْ.. يا أُم نِصّ لْسَانْ..
نجوى:
لا إِنْتي وْلا هِيِّي رَحْ تْلاقُوا الْكَنْز.. الْكَنْز مِنْ نَصِيبِي أَنا.. وْعَيْن الْحَسُود تِبْلَى بِالْعَمَى.. كأنّو ما فِي غَيْركُنْ بِالضَّيْعَه؟ جَوْزِي مُشْ عَمْ بِينامْ اللَّيْل تا يْلاقِي الْكَنْز.. وَمَنْ طَلَبَ الْكَنْز سَهِرَ اللَّيالي.. بَسّ حاكِيكُنْ مِن الأوبّرَا هَاوْس بِيسدني بِتْكُونْ رَاحِتْ عَلَيْكُنْ..
كريمة:
إِي وَاللَّه إِذَا حِضِي فِيكِي جُون هَاوِرْد بَدُّو يْشَلّحِكْ ياهُنْ.. وْتِرْجَعِي لْهَوْن إِيدي مِنْ وَرَا وْإِيدْ مِنْ قِدَّامْ..
زمرد:
سْمَعِي مِنِّي لا تْرُوحِي عَ أُسْتْرالْيا بْيِعْمُوا قَلْبِك مِنْ كِتْر الضَّرَايِبْ.. ضَرايِبْ مِنْ فَوْق.. ضَرايِبْ مِنْ تَحْت.. وْضَرايِبْ عَ الدَّقَّه وْنِص كَمانْ..
عَ الدَّقَّه وْنِصّ
رَقِّصْنِي يا "هَاوِرَد"
عَ الدَّقَّه وْنِصّ
رَقِّصْ كِلّ الْبَلَدْ
نجوى:
إِنْتِي عَم بِتْزَرْكِيلِي.. إِي أَلّله ما يْخَلِّينِي إِذَا ما حْلَشْتِكْ بِشَعْرِكْ
كريمة:
عَيْب يا نِسْوانْ عَيْب.. لا الْكَنْزْ لْقَيْناه.. وْلا السِّيَّارَه اشْتَرَيناها.. وْلا سِيدْنِي زِرْناها.. فيني أَعْرِف عَ شُو عِلْقانِينْ؟
زمرد:
ِعلْقَانِينْ لأَنُّو مِنْحِبّ نِعْلَقْ.. كِلّ ما بَدّنا نِتْسَلَّى مْنِعْلَق بْبَعِضْنا.. وِبْتِدَخَّل الأُمَمْ الْمُتِّحِدِه عَ شِي ما فِي شِي..
كريمة:
رُوحُوا تا نْرُوح عَ بْيُوتْنا.. هَلَّقْ بْيِرْجَعُوا وْلادْنا مْنِ الْمَدَارِسْ جُوعانِينْ.. وْإِذَا ما لَقْيُوا شِي تا ياكْلُوهْ يِمْكِنْ ياكْلُونا..
نجوى:
أفضّل شِي نْقَشِّرْ بَصَلْ.. نِحْنا خْلِقْنا بَسّ لْتقْشِير الْبَصَلْ..
ـ1ـ
بَصَلْ بَصَلْ بَصَلْ
شُوفُوا شُو اللّي حَصَلْ
عَمْ تِدْمَعْ عِينَيْنا
مِنْ تِقْشِيرْ الْبَصَلْ
ـ2ـ
الْبَصَل مَع الْكِبِّه
بِيغَذِيلي قَلْبِي
شُو طَيِّب يا رَبِّي
الْحُمُّص مَع الْبَصَلْ
ـ3ـ
كْسِرْلَكْ شِي كَمْ بَصْلِه
مَعِ الْبَيْض الْمِقْلِي
وِاللّبْنِه بْتِنْدَهِلي
حَتّى قَشِّرْ بَصَلْ
كريمة:
طِلْعِتْ رِيحِتي بَصَلْ.. صَدّقُونِي مُشْ عَمْ إِقْدِرْ شُوفْ بِعْيُونِي.. لازِمْ حِطّ عْوَيْناتْ بَغِلْ قَبلْ ما قَشِّرْ بَصَلْ.. قَوِلْكُنْ الْجِنِّيِّه بِتْحِب الْبَصَلْ؟..
زمرد:
مِينْ ما بِيحِبّ الْبَصَلْ؟ قْرِيتْ بِالْجَرِيدِه إِنُّو ما في طَبْخَه بِالْعالَم ما فِيها بَصَلْ.. كلّ شُعُوب الْعالَم بِتْحِب الْبَصَلْ.. حَتَّى الْجِنِّيَّاتْ..
كريمة:
عَ سِيرْة الْجِنِّيِّه.. جَايِي الْبُونا يْبَخِّرْ الضَّيْعَه وِيْرِش مَيّ
مْصِلاّيِه.. بَرْكِي بْتِهْرُب وْبِتْحِلّ عَنَّا..
زمرد:
لَشُو بَعْدا مْلَزّقَه فِينا.. الظَّاهِرْ طَبْلا الْمَناخْ.. ما حَدا بِيفُوت عَ ضَيْعِتْنا وْبِيعُودْ يَعْرِفْ يِطْلَعْ..
كريمة:
تْأَخَّرْ الْبُونا.. وَيْنَكْ يا بُونا وَيْنَكْ؟.. هَلَّقْ بِيكُونْ مِلتْهِي مَع الْخُورِيِّه.. وَاللَّه هَالْخُورِيِّه مُشْ عَم بِتْخَلِّيه يِتْنَفَّسْ.. بَدَلْ ما يْبارِكْنا بِيبارِكا.. وْبَدَلْ ما يْرِش عْلَيْنا مَيّ مْصِلايِه، بِيغَطِّسَا تِغْطِيسْ بِالْمَيّ.. إِي هَيْدِي أَللَّه ما قَالا..
زمرد:
لَيْش هُوِّي خُوري الرّعِيِّه أَمْ خُوري الْخُورِيِّه؟..
نجوى:
هُوِّي التَّنَيْن سَوا.. وْبيبَيِّضْ الْوِجّ كَمانْ.. انْكان مَع الرّعِيِّه أَمْ مَع الْخُورِيِّه..
زمرد:
اقْطَعُوا نَفسْ.. وِصْل الأَبُونا.. عْمِلُوا حَالْكُنْ عَمْ بِتْصَلُّوا..
إِلَيْكِ الْوَرْدُ يا مَرْيَمْ.. يُهْدَى مِنْ أَيادِينا..
(يدخل الخوري وبصحبته بعض الأطفال.. الأطفال يلعبون)
الخوري:
لا تْواخْذُوني تْإِخَّرْت عْلَيْكُن.. لِهْيِتْنِي الْخُورِيِّه.. قالْ مِعْدِتَا عَمْ تِلْعِي شْوَيّ..
زمرد:
ياي ياي ياي.. مِعْدِتا عَمْ تِلْعِي؟.. إِي أَلفْ مَبْرُوك يا بُونا.. إِجانا خُوري زْغِير..
كريمة:
بَلا قَطْش وْشَلِحْ يا زمرد.. بِتْكُون آكْلِه غَمِّه وْنايْمِه كَشفْ.. سْلامِةْ قَلْبَا يا بُونا..
نجوى:
دَخْلَكْ يا بُونا.. رِشّ مَيّ مْصِلاّيِه قَدّ ما فيكْ.. أَنا فِزْعانِه كْتِيرْ..
الخوري:
بِسْم الآب وَالإِبْن وَالرُّوح الْقُدُسْ.. أَلإلَه الْوَاحِد.. آمين..
قُولُولي وَيْن ظَهْرِت الْجِنِّيِّه عَ نَجِيبْ.. أَقَل بْمِتِرْ.. أَبْعَدْ بْمِتِرْ ما بِيهِمّ.. أَلْمُهِمّ نِتْخَلَّصْ مِن الأَرْواحْ الشِّرِّيرَه..
نجوى:
دَخْلِكْ يا عَدْرَا.. خَلّصِينا مْنِ الأَرْواح الشِّرِّيرَه.. قَوِّي صْلاوَاتَكْ يا بُونا.. الْجِنِّيِّه مْمَتِرْسِه مْنِيحْ بِالضَّيْعَه..
الخوري:
رَحْ إِعْمِل قِدِرْتِي يا وْلادي.. بَسّ كلّو بْإِيدْ أَللَّه.. ما سْمِعْتُوا الإِنْجِيلْ شُو قَالْ: صَلُّوا وَلا تَمُلُّوا.. هَلَّقْ زِيحُوا مِنْ دَرْبِي تا رِشّ مَيّ مْصِلاَّيِه..
كريمة:
رِشّ وْكَتِّر يا بُونا.. وْكِلّ ما يِخْلَصُوا الْمَيَّاتْ بْرُوحْ بْعَبِّيلَكْ جَرَّه مْنِ الْعَيْن بْتِعْجُبْ خاطْرَكْ..
الخوري:
لَشُو تِتْعَذّبِي عَ الْعَيْن.. صَارْ عِنَّا مَيّ بِالضَّيْعَه.. عَبِّي جْرَارْ قَد ما بَدِّكْ..
زمرد:
بِتْرَجَّاكْ يا بُونا رِشّ أَرْضَاتِي كمانْ.. أَنا خَايْفِه لَتْكُونْ مْعَشِعْشِه بِالتِّينِه..
الخوري:
لا تْقُولِيلِي زَارْتِكْ الْجِنِّيِّه؟!.. إِذَا كانْ هَيْكْ لازِمْ رِشِّكْ إِنْتِي قَبْل ما رِشّ أَرْضاتِكْ..
زمرد:
تالِتْ مَرَّه شَافُوا الْجِنِّيِّه كانِتْ قَاعْدِه بْأَرْضَاتِي.. وْتَحْت التِّينِه بِالذّاتْ..
الخوري:
شُو كانِتْ عَمْ تِعْمِلْ تَحْت التِّينِه؟ انْشَالله عَمْ تاكُلْ تِينْ؟
زمرد:
ما بَعْرِف يا بونا.. أَنا شْكِيتَا لِلنَّاطُورْ.. وْهُوِّي رَحْ يِفْحَص التِّينِه..
نجوى:
ها ها ها.. أَنا قِلْت مِن وَيْن هَالتِّينْ الْكانْ عَمْ ياكْلُوا النَّاطُورْ.. سَلِّه مِلْيَانِه جَابَا عَ بَيْتُو.. ما هَيْك يا كَريمِه؟
كريمة:
أَفْضَلْ ياكُل النَّاطُورْ وْلا تاكُل الْجِنِّيِّه..
زمرد:
ـ هَيْدِي سِرْقَه يا سِتّ كَريمه.. مُشْ هَيْك يا بُونَا؟.. كانْ لازِمْ يْجِيبْ سَلِّة التِّينْ عَ بَيْتي مُشْ عَ بَيْتُو.. نِحْنَا عَمْ نِدْفَعْلُو تا يِحْمِينَا.. مُشْ تا يَاكُلْ تِينَاتْنا.. العَمَى، إِذَا ما فِيكْ تْأَمِّنْ النَّاطُورْ عَ تِينْتَكْ.. كِيفْ بَدَّكْ تْأَمّنُو عَ بْلادَكْ؟
كريمة:
إي وَالله.. لَوْ ما يْكُون الأَبُونا حاضِرْ لَعْمِلْت فِيكِي مْحاضِرْ
(تَخْرُج النسوة)
الخوري:
أَللَّه يْسَامْحُو هَالنَّاطُورْ.. مُشْ عَمْ يِعِتْرِف عِنْدِي بِالْمَرَّه.. تَعُوا تا شُوفْ يا وْلادْ.. مِينْ مِنْكُنْ يا وْلادي حافِظْ الْوَصَايا الْعَشْر؟
صبي:
أَنا يا بُونا أَنا.. أَوَّلاً: لا تَلْعَبْ.. ثَانِياً: لا تَصْرُخْ.. ثَالِثاً: لا تْوَسِّخْ تْيابَكْ.. رابِعاً: خَلِّي عَيْنَكْ عَ بَيَّكْ..
الخوري:
شُو عَمْ بِتْقُول يا صَبِي.. هَوْدِي وَصَايا أَللَّه؟
صبي:
لأْ.. هَوْدِي وَصَايا الْماما.. مْعَلّقِتُنْ عَ الْبِرَّادْ.. وْإِذَا بِلْعَبْ أَوْ بِصْرُخْ أُو بْوَسِّخ تْيابي بَدَّا تْوَدِّيني عَ جْهَنِّمْ..
صبي آخر:
قُول لإِمَّكْ تْحِلّ عَنْ ضَهْرَكْ.. بْهالإِيَّامْ عَمْ يِقِتْلُوا قِتْلا وْيْفَجّرُوا سِيَّارات وْما عَمْ بِيفُوتوا عَ الْحَبْس كِيفْ عَ جْهَنِّمْ..
بنت:
إِذَا بِلَّشْتُوا بْوَصَايا الْماما.. رَحْ سِمِّعْكُنْ شُو بِتْوَصِّي بَيِّي: أَوَّلاً: هاتْ اعْطِيني مَصاري.. تَانِياً: لا تِتْطَلَّعْ بِعْيُونَكْ.. تَالِتاً: لا تِسْمَعْ كِلْمِةْ إِمَّكْ.. رابِعاً: قُومْ جَلِّي الصّحُونْ..
صبي:
إِذَا كانْ هَيْك سْمَعُوا وَصَايا إِمِّي أنا، كل لَيْلِه بِتْقِلِّي: غَسِّلْ وِجَّكْ، فَرْشِي سْنانَكْ، وْفَنْتِرْ قَبِلْ ما تْنامْ..
بنت:
شو يِعْنِي فَنْتِرْ؟..
الخوري:
وْلِكْ بَسّ.. رَحْ تْجَرّصُونا..
(تدخل بدور وسعدى)
بدور:
عَجِّلْ يا بُونا مْشَحا قَبْل ما تِلْحَق بْأُمّ حَنَّا..
الخوري:
شُو بها؟.. شو صَابا؟.. باسْم الآب والإبْن..
بدور:
شافِتْ الْجِنِّيِّه..
الخوري:
شافْت الْجِنِّيِّه.. والرُّوح الْقدْس.. آمين
الأطفال:
(يصرخون ويهربون)
يا ماما.. راحِتْ عْلَيْنا
الخوري:
خَلُّوني حاكيها كِلْمِه..
يا سَعْدَى تْطَلّعي فِيِّي مْنِيح..
سعدى:
جنيّه.. جنِّيِّه.. جنِّيِّه..
الخوري:
أَنا مُشْ جِنِّيِّه يا بِنْت.. أَنا خوري الضّيْعَه..
سعدى:
جنيّه.. جنِّيِّه.. جنِّيِّه..
بدور:
صَلِّبْ عَ راسَا يا بُونا.. بَرْكِي بْتُوعَى مِنْ هَالْجَفْلِه..
الخوري:
لْحَقِيني فيها عَ الِكْنِيسِه.. هَوْنِيكْ بِكْبُسْ رَاسَا..
وِبْرِدِّلاَّ صْوابا..
بدور:
ما في حَدَا بِالضَّيْعَه مَنُّو خَايِفْ.. حَتَّى الْخُورِي خايِفْ.. وِالنَّاطُورْ خَايِفْ.. وْأَنا خَايْفِه كَمانْ.. لازِم نْجِيبْ سَاحِرْ عَ الضَّيْعَه.. بَرْكِي بْيِسْحُرْ هَالْجِنِّيِّه وْبِيخَلِّصْنا مِنْها.
(تخرج ونجوى متكية عليها)
**
المشهد الخامس
(يدخل الساحر وهو يقوم بحركات غريبة، يلحقه أهالي القرية شبه مدهوشين)
الساحر:
مَهْما صِلَّيْتُوا وْمَهْما رِشَّيْتُوا مَيّ مْصِلاَّيِه مُشْ رَحْ تِظْهَرْ الْجِنِّيِّه.. تْرِكُوني إِسْحَبَا مِنْ سَابِع أَرْض.. شَمْرُوخْ نْهايْتَكْ الْيَوْمْ.. الْجِنِّيِّه لازِمْ تِظْهَرْ.. بُخْ طُخْ.. بُخْ طُخْ.. شَمْرُوخْ.. شَمْرُوخْ.. هات الْجِنِّيِّه يا شَمْرُوخْ..
نجوى:
يا ماما أنا فِزْعانِه.. يِمْكِنْ يِتْصَارَعْ هُوِّي وْشَمْرُوخْ..
زمرد:
أنا مُشْ فِزْعانِه أَبَداً.. اللِّي بَدُّو يْصِيرْ يْصِيرْ.. مَوْتِه وْبَدِّي مُوتَا.. لازِمْ شُوف الْجِنِّيِّه..
راجي:
بْرَمْت الدِّنِي كِلاَّ تا حْضِيتْ بْهَالسَّاحِرْ.. خَلُّوه يْكَفِّي شِغْلُو..
نجوى:
جايْبُو بْبَلاشْ أَوْ عَمْ تِدْفَعْلُو مَصَاري..
راجي:
ما بْيِقْبَضْ إِلاَّ أَمِيرْكانِي.. إِخِدْ مِنِّي مِيتَيْنْ دُولارْ.. آكلْ شارِبْ نايِمْ..
زمرد:
وِانْشَالله بَدُّو أَرْباحْ مْنِ الْكَنْزْ..
راجي:
تْنَيْن بِالْمِيِّه بَسّ.. وِتْمانْيه وْتِسْعيِنْ بِالْمِيِّه لأَهل الضَّيْعَه..
الساحر:
زِيحْ يا شَمْرُوخ.. لا تْعَتْرِسْ مَعِي.. هَيْدا أَمرْ مِنْ مَلِكِ الْمُلُوكْ.. اخْضَعْلُو يا صَعْلُوكْ.. وْخَلِّي الْجِنِّيِّه تِظْهَرْ.. حِيقْ زِيقْ.. بُخْ طُخْ
نجوى:
شُو هَيْدَا بُخْ طُخْ.. أَنا مُشْ عَمْ إِفْهَمْ شِي..
عدنان:
بُخْ طُخْ.. يِعْنِي بَطِّيخْ بْلُغِّةْ الْجانْ.. مَبْسُوطَه هَلَّقْ يا ستّ نجوى..
نجوى:
بَطِّيخْ مِتِل رَاسكْ.. بَسّ لِلأَسَفْ بَعْدُو فَجّ..
راجي:
تْرِكُوا هَالسَّاحِرْ يِسْحُرْ حاجِي تْقاطْعُوهْ.. الْعَمَى شُو بْتِحْكُوا..
الساحر:
طِلِّي.. قِلْتِلِّكْ طِلِّي..
صارْ وَقْتِك تْطِلِّي..
ـ1ـ
حِيقْ زِيقْ.. زِيقْ حِيقْ
الْجِنِّيِّه مُشْ عَمْ بِتْفِيقْ
بَدِّي مِنَّكْ يا شَمْرُوخْ
تْوَعِّيها بْنُصّ الطَّريقْ
ـ2ـ
بُخْ طُخْ.. طُخْ بُخْ
لِلْجِنِّيِّه ناصِبْ فِخّ
لَوْلا بْتِظْهَرْ يا شَمْرُوخْ
قِدَّاما بِرْكَعْ وِبْنُخّْ
نجوى:
طَلِّتْ الْجِنِّيِّه.. عَمْ شُوفْ الْجِنِّيِّه.. دَخِيلْكُنْ أَنا فِزْعانِه..
الأهالي:
دِلِّينا وَيْن الْجِنِّيِّه.. مُشْ عَمِ نْشُوفْ شِي..
نجوى:
جايِي صَوْبْنا.. يا أَهْلا بِالْجِنِّيِّه..
الأهالي:
يا أَهْلا بِالْجِنِّيِّه.. يا أَهْلا بِالْجِنِّيِّه.. يا أَهْلا بِالْجِنِّيِّه..
(تظهر الجنيّة من بين الدخان وهي ترتدي ثوباً أبيض، وحول رقبتها شال من الأزهار)
الجنيّة:
مسا الخير يا أهالي الضَّيْعَه..
نجوى:
مَسَا الْخَيْر مِينِكْ إِنْتِي؟
الجنيّة:
أنا الْجِنِّيِّه الناطْرِينَا..
نجوى:
إنْتِي الْجِنِّيِّه الْجِنِّيِّه..
الجنيّة:
أَنا الْجِنِّيِّه الْجِنِّيِّه..
(يدخل الخوري مسرعاً تلحقه بدور وسعدى)
الخوري:
وِبْتِحْكِي عَرَبِي كَمانْ!
الجنيّة:
أُمِّي وْبَيِّي عَلّمُوني لُغَاتْ كْتِيرِه.. وْقالُولي: كل لُغَه بِتْسَاوِي إِنْسَانْ.
الخوري:
نِحْنا كَمَانْ صارْ عِنَّا مَدْرَسِه.. وْعَم نْعَلِّمْ وْلادْنا لْغّات كْتِيرِه..
وِالْفَضْل كِلُّو إِلِكْ..
الجنيّة:
الشَّعْب اللّبْناني شَعْب حَضارِي.. بِيسَافِرْ كْتِيرْ.. بَسّ عَ طُول بْيِنْسَى قَلْبُو بْلُبْنانْ..
الخوري:
بَيْن لُبْنان وْشَعْبُو فِي خَيْط سِحْرِي.. ما قِدْرِت السنينْ أَو الِحْرُوبْ أَو الْمَسَافاتْ تِقْطَعُوا..
الجنيّة:
اللبناني بيضَلّ لُبْناني.. مَهْما غَيّر إِسْمُو أَوْ لَوَقْ لْسَانُو..
الخوري:
عارْفِه إِنُّو أَكْتَرْ مِنْ عِشْرِينْ مَلْيُون لُبْناني تارْكِينْ أَرْضُنْ تا يْعِيشُوا بِبْلادْ بَرَّا.. وْإِذَا كِلّ وَاحِدْ مِنُّنْ تْبَرَّعْ بْمِيةْ دُولارْ لِبْلادُو.. بيصِير لُبْنانْ أَغْنَى دَوْلِه بِالْعالَمْ..
الجنيّة:
عارْفِه.. عارْفِه.. وِلْهَالسَّبَبْ جَايِي سَاعِدْكُنْ..
بو حنا:
ِيخْرُبْ ذَوْقِكْ شُو حِلْوِه.. ما فِيكِي شِي بِيفَزِّعْ.. مِنْ شُو ماتِتْ أُمّ حَنَّا؟
الجنيّة:
أُمّ حنَّا ماتِتْ.. الْعَمَى شُو قَوِيِّه.. كانِتْ خَنْقِتْنِي.. وْلَوْ كِنْت بْمُوتْ كانِتْ مَوّتِتْنِي.. إِنْتُو مِتْأَكّدينْ إِنَّا ماتِتْ..
بو حنا:
أنا زَوْجا بُو حنّا.. اسألي الخُوري هُوِّي الْجَنَّزَا
الخوري:
أَللَّه يِرْحَما.. صَلُّوا مَرَّه أَبانا وْمَرَّه سْلامْ عَنْ نَفْس الْمَرْحُومِه أُمّ حَنَّا..
الجنيّة:
بَسّ تْصَلّوا أَنا بْرُوحْ.. وْإِذَا رِحِتْ مُشْ رَح إِرْجَعْ..
راجي:
بِتْرَجَّاكُن ما حَدَا يْصَلِّي.. بَدِّي إِسْأَلا سُؤالْ مْهِمّ: هَالسَّاحِرْ الْوَاقِفْ قِدَّامِكْ إِخِدْ مِنِّي مِيتَيْنْ دُولارْ تا يْظَهّرِكْ.. ظَهّرِك أَوْ ما ظَهّرِكْ بَدِّي أَعْرِفْ..
الجنيّة:
صَحْتَيْن عَ قَلْبُو شَلّحَكْ مِيتَيْن دُولار..
راجي:
يِعْنِي ما ظَهّرِكْ..
الجنيّة:
حَدا بِيظَهِّر جِنِّيِّه بْحِيقْ زِيقْ بُخْ طُخْ.. أَكيدْ مَجْنُونْ
راجي:
لَيْك مِلاّ سَاحِرْ لَيْك.. جايِي تِضْحَكْ عْلَيْنا وِتْشَلّحْنا مِصْرِياتْنا.. إِنْت وَاحِدْ كِذّابْ ما بْيِطْلَعْ مِنَّكْ غِيرْ حِيقْ زِيقْ..
كريمة:
يا ساحِرْ.. يا مُحْتالْ.. تْعَا لْهَوْن تا قِلَّكْ.. حابِّه إِضِرْبَكْ سَحْسُوحْ يْرَكّعَكْ لِلأَرْضْ..
الساحر:
بُخْ طُخْ.. حِيقْ زِيقْ..
راجي:
إِي وَاللّه لَطُخِّلَّكْ رَاسَكْ.. رِدُّونِي عَنُّو إِذَا فِيكُنْ.. يا بِقِتْلُو يا ِيرَجّعْلِي مِصْرِيَّاتِي..
الساحر:
شَمْرُوخ حْمِينِي مِنُّو يا شَمْرُوخْ.. بُخْ طُخْ.. حِيقْ زِيقْ..
راجي:
ما فِي حَدا يِحْمِيكْ غِيرْ أَللَّه.. رْكاعْ وْصَلِّي..
الخوري:
أُوعا تْصَلِّي.. بِتْرُوح الْجِنِّيِّه.. وْما مِنْعُودْ نَعْرِف وَيْن الْكَنْزْ..
الأهالي:
ـ وَينْ الْكَنْز.. وَيْن الْكَنْز.. بَدّنا نَعْرِفْ وَيْن الْكَنْز؟
الجنيّة:
أَيَّا كَنْز؟
الأهالي:
الْكَنْز اللِّي وْعَدّتِينَا فِيهْ..
الجنيّة:
صَفَّى مَعْكُنْ..
الأهالي:
صَفَّى مَعْنَا؟
الجنيّة:
أَيْوَه مَعْكُنْ..
الأهالي:
وَيْنُو وَيْنُو.. دَخِيلْ عَيْنُو.. يِحْيَا الْكَنْز.. يِحْيَا الْكَنْز..
الجنيّة:
الْتِفْتُوا صَوْب الضَّيْعَه.. بِتْشُوفوا الْكَنْزْ..
سعدى:
ضَيْعِتْنا مِضْوِيِّه
وْعَمْ تِرْقُص الأَنْوارْ
وْعَمْ تِكْرُج الْمَيِّي
تا تِسْقِي وْلاد زْغارْ
وِالْمَدْرَسِه جَايِي
جَايِي مِتْل حْكايِه
كَتِيبِه وِقْرايِه
هَيْدا الْكَنْز الْصَارْ
الأهالي:
وِالْمَدْرَسِه جَايِي
جَايِي مِتْل حْكايِه
كَتِيبِه وِقْرايِه
هَيْدا الْكَنْز الْصَارْ
هَيْدَا الْكَنْز الْصَارْ
هَيْدا الْكَنْز الْصَارْ
نجيب:
(يتكلم وهو سكران)
يِعْنِي ما فِي كَنْز.. ما في دَهَبْ.. ما فِي إِلْمازْ..؟
الجنيّة:
إِنْتُو الْكَنْزْ.. وْلادْكُنْ هِنِّي الْكَنْز.. ضَيْعِتْكُنْ هِيِّي الْكَنْزْ.. شُوفُوا كِيفْ كِنْتُو وْكِيفْ صِرْتُو..
الخوري:
صارْ عِنَّا مَيّ وِمْجارِير وْكَهْرَبا.. صارْ عِنَّا مْشَارِيعْ وْمَدَنِيِّه..
زمرد:
صارْ عِنّا مَدْرَسِه.. وْصَارُوا وْلادْنا يِقْرُوا وْيِكِتْبُوا.. خَيّ ما أَحْلَى بِنْتِي هِيِّي وْلابْسِه مَرْيُولا وْحامْلِه شَنْطِتْها بْإِيدَا..
الخوري:
لِلْحَقِيقَه يا جِنِّيِّه.. صِرْنا ناسْ مِتِل النَّاسْ.. وْسِكّرْنا أَوّلْ حَبْس بِالضَّيْعَه..
الجنيّة:
هَيْدا هُوِّي الْكَنْز.. بْخاطِرْكُنْ.. لازِمْ رُوحْ عَ ضَيْعَه تانْيِه.. شَعْبا غافِي مِتل ما كِنْتُو غافْيِينْ..
الأهالي:
ـ1ـ
خَلِّيكِي مَعْنا خَلِّيكِي
ضَيْعِتْنا.. شُو عِمْرِت فِيكِي
عِلَّمْنا وْلادْ
ضُوَّيْنا بْلادْ
وِشْرِبْنا.. وْلازِمْ نِسْقِيكِي
خَلّيكي مَعْنا خَلِّيكي
ـ2ـ
ما بْيِسْوَى تْرُوحي ما بْيِسْوَى
خَلِّيكي مَعْنا تا نِقْوَى
بَدّنا مْشَارِيعْ
مِتْل الرَّبيعْ
نِفْرَحْ فِيها وِنْحَيِّيكي
خَلِّيكي مَعْنا خَلِّيكي
الجنيّة:
تا ما تْخَبّروا حدا إِنُّو زَارِتْكُنْ جِنيِّه.. لازم نَسّيكُن شُو صارْ.. ناموا.. ناموا.. ناموا..
(ينام الجميع، يدخل الناطور)
الناطور:
أَنا ناطُور الضَّيْعَه.. شُو بِكُنْ نايْمِينْ؟..
حَدا يْقِلِّي وَيْن الْجِنِّيِّه..
الجنيّة:
أنا الْجِنِّيِّه.. فِينِي أَعْرِفْ شُو بِتْرِيدْ؟
الناطور:
إِنْتِي الْجِنِّيِّه الْجِنِّيِّه..
الجنيّة:
أَيْوَه.. أَنا الْجِنِّيِّه الْجِنِّيِّه..
الناطور:
ياي ياي ياي ياي ياي.. عْمِلْتَا تَحْتِي..
الجنيّة:
نامْ.. نامْ.. وْلِكْ نامْ..
الناطور:
النَّاطُورْ ما بينامْ إِذَا فِي إِجِرْ غَرِيبِه بِالضَّيْعَه؟..
الجنيّة:
كِلّ إِيَّامَكْ نَاطُورْ حَرامِي وْجَبانْ.. نامْ
الناطور:
صَحِيحْ إِنِّي حَرَامِي.. وْصَحِيحْ إِنِّي جَبَانْ.. بَسّ مُشْ خايِنْ..
الجنيّة:
هَلَّقْ جَايِي تِعْمِلْ بَطَلْ؟.. قِلّتِلّكْ نامْ..
الناطور:
كِيفْ بَدِّي نامْ وْشَعْبِي نايِمْ..
الظَّاهِرْ نْسِيتِي إِنِّكْ غَريبِه بِالضَّيْعَه؟
الجنيّة:
كِلُّنْ نامُوا.. نامْ مِتْلُنْ وِارْتاحْ..
الناطور:
إِذَا بَدِّكْ يانِي نامْ لازِمْ تِتِرْكِي الضَّيْعَه.. أَو تْنامِي.. نامي.. قلتلّك: نامي..
(تنام الجنية)
وَاللَّه طْلِعِتْ ناطُورْ يا هَالنَّاطُورْ.. وَيْن مَرْتِي تْشُوفْنِي..
تِصْبَحُوا عَ خَيْرْ يا جَماعَه..
(ينام الناطور)
**
