The Ghosts Village
مثلها عام 1990 أكثر من 300 تلميذ وتلميذة من الصفوف الابتدائية في معهد سيدة لبنان، هاريس بارك ـ سيدني، وقد حولناها الى مسرحية بعدة أشخاص.
**
أشخاص المسرحية
زمرد
سعدى
بدرية
مرّون
رزّوق
أم يوسف
بو يوسف
يوسف
عصّوم
الآغا
بائع البخور
عمر
سليمان
سعيد
الاطفال: مرشد، حاتم، جميلة ومنتورة
الاشباح
أزلام الآغا
**
المشهد الأول
"ساحة الضيعة"
صوت
كان يا ما كان
في غابر الازمان
ضيعه من لبنان
شامخه بالجرد
ومسيّجه بوديان
ومش قادر يحتلاّ
جيش بني عثمان
جرّب حتّى يذلاّ
زرعها بالجان
ومين هنّي الجان؟!
"دخان كثيف يتصاعد، يظهر الأشباح بلباس وقناع أبيض وهم يرقصون. يخرج الأشباح، تدخل زمرد وهي تصيح"
زمرد
يا ناس، يا هُو.. الأشباح هجمت ع الضيعه، يا دل اللي بيفتح شبّاكو، يا دلّ اللي بينسى باب بيتو مفتوح، طاقاتكن سكّروها، بيوتكن بخرّوها، الاشباح ما بترحم.
"تركض مرّون وخلفها رزّوق"
مرّون
شو بكي يا زمرّد.. صوتك واصل لآخر الدني.
زمرد
سمعتيني ولاّ ما سمعتيني؟
مرّون
سمعتك.. سمعتك.. ما إنتي، سمالله عليكي، صوتك أقوى من مدفع بو فتيله.
زمرد
الأشباح هجمت ع الضيعه.. يا دلّ أطفالك يا ضيعتنا.
مرّون
ومين شافن.. قوليلي.
زمرد
أنا.. أنا.. كنت عم حطّب ولملم نتفة حميضه، إلاّ وقفلي بالطريق، لونو أبيض متل التلج، وعنّتو مسموعه من هون لطريق الكرّوسه.
رزّوق
ما قلّك شو إسمو؟
زمرد
ولِك يا خيّي رزّوق.. ليش أنا ضل عندي عقل تا حاكيه.. لولا قدرة ألله، ما قدروا جريي يحملوني وإهرب تا وصلت لهون.
مرّون
الظاهر المسأله خطيره كتير، لازم نتصل بالكركون ونخبّر الشاويش
رزوق
لا تدخلّي الجيش العثماني بهالمسأله.
مرّون
ليش في غيرو بيقدر ع الأشباح.
رزّوق
مسألة ألأشباح أنا بحلاّ.. لا تخافوا
زمرد
أنا خايفه ما يكونوا الأشباح أزلام الاستعمار
رزّوق
يا إختي لا تخافي.. خيّك رزّوق بطل..
زمرد
روح ألله يحميك..
"يخرج رزوق"
خيّي رزّوق شيخ شباب الضيعه.. بوجودو ما لازم نخاف من الأشباح.
مرّون
والله يا زمرّد ما في حدا يخلّصنا من الأشباح إلا الجيش العثماني.
زمرد
انشالله الأشباح بتخلّصنا من الجيش العثماني.
مرون
أنا مش فرقانه معي.. المهم نقضي ع الأشباح
زمرد
وع الاستعمار..
مرون
رح تدوخيني بالاستعمار ونص البلاد معو. فيكي تقوليلي مين مع الأشباح؟
زمرد
هللي اخترعن!
مرون
ومي اخترعن؟
زمرد
الاستعمار!
مرون
وليش اخترعن الاستعمار يا فهيمة عصرك؟
زمرد
تا يهشلون من هون ويحتلّوا الضيعه. بدّن يسكنّوا ناس محلّنا.
مرون
ونحنا وين منروح؟
زمرد
ع سفر برلِك، ع أميركا، ع أستراليا
مرون
ولمين بدنا نترك هالآرض؟ والله والله مش رح إترك ضيعتنا ولو زرعوا بكل تلم فلاحه شبح.
زمرد
وعديني إنك ما بتحكي لحدا عن الأشباح
مرون
رح قطّب شفافي بخيط قنّب.. روحي ولا تخافي، أنا مرّون أنا، أخت الرجال، قولكن من هيك بعدي عزبه؟ يا ريت بيجيني عريس ولو كان شبح.
"يظهر أحد الأشباح"
شبح، شبح، دخيلك لا تصدّق، حلّ عنّي يا شيطان.. قلتلك تركني، بسم الآب والإبن والروح القدس.. ألله يبعّدك عني يا شيطان.. دخيلكن اركضوا.. تعربط فيي الشبح.
"تخرج مرون، يدخل عصّوم وسليمان"
عصّوم
مرّون عم تحكي مع الأشباح، لازم نكبسلا راسا.
سليمان
و شو بيعرّفك انت بكبس الراس؟!
عصّوم
ليش لأنّي مسلم؟! شو نسيت إنّو بيتي حد الكنيسه؟ عجّل تا ناخدها ع دير قزحيا..
سليمان
قولك اللي بيحكي مع الأشباح بيكون دخل فيه ألله يكسر قوتو؟
عصّوم
تا نغيّر هالحديث.. الآغا كان زعلان منّك..
سليمان
بزعّل مرتي ولا بزعّل الآغا
عصّوم
قال وعدتو تنتف دقن جمال باشا
سليمان
جمال باشا المتصرف؟
عصّوم
هيك هوّي قال..
سليمان
يا عصّوم.. الآغا غلطان.. أنا وعدتو أنتف دقن جمال إبن عمي ..
عصّوم
عم تتمرجل ع إبن عمّك؟
سليمان
وشو بدك ياني دقّ بالمتصرف؟
عصّوم
المتصرف صعب حدا يوصلّو.. الجندرما مسيجتو متل جنينة جدّك بو فرّاعه.
سليمان
لازم زور الآغا وإشرحلو القضيه
عصّوم
يا دلّك إذا غضب عليك الآغا..
سليمان
غضب الآغا من غضب الوالي، وغضب الوالي من غضب الباشا، وغضب الباشا من غضب السلطان، وغضب السلطان من غضب الشيطان، وألله يرحمك يا سليمان.
عصّوم
لا تخاف محسوبك حربوق، بلعبلك بالجيش العثماني بفرد إصبع..
سليمان
سكوت لَحدا يسمعك.. ويجيب آخرتك..
عصّوم
عاش الآغا.. عاش الوالي.. عاش الباشا..
سليمان
وعاش السلطان..
عصّوم
شُكريا أفندم.. شُكريا.. قدامي لعند الآغا..
**
المشهد الثاني
"بو يوسف وأم يوسف يحملان الحقائب.. يدخل عمر"
عمر
لوين رايحين يا جيران؟ وع مين تاركين الارض؟
ام يوسف
من يوم ما شافت زمرد الشبح ونحن خايفين نزرع أراضينا..
عمر
معقول زمرد غلطانه.. وكانت عم تتصور إشيا ما بيصدقها عقل..
أم يوسف
الاشباح كتروا بالضيعه.. صار لازم نسميها ضيعة الأشباح..
عمر
يا بو يوسف وام يوسف.. من يوم ما تزوجتو من غير دين صرتو رمز وحدتنا الوطنيه.. ارجعوا ع بيوتكن.. اسكنوها انتو أحسن ما يسكنها الغريب.
ام يوسف
الأشباح سكنتها.. نامت ع تخوتتنا وتغطت بلحفنا..
عمر
هيك هنّي بدّن، إنتو عم بتنفذوا المخطط المرسوم، يا جماعه فهموني، الاشباح كذبه وإنتو صدقتوها..
ابو يوسف
تركنا نروح بلاد ألله واسعه..
عمر
كلاّ وكبرا دور التك قدام وسع بلادنا..
ام يوسف
وإذا هجمت علينا الأشباح. مين بدّو يحمينا؟ إبني يوسف مش هون تا يحمينا..
عمر
إيمانكن ببلادكن بيحميكم
ابو يوسف
الاستعمار ركّعنا، الحكم العثماني جوّعنا، والشبح فزّعنا.. وما في إلنا إلا السفر..
عمر
دق المي مي.. قلتلكن رجعوا ع بيوتكن.. إذا إنتو الختياريه بدكن تسافروا كيف بدنا نوقّف سفر ابنكن يوسف وغيرو من شبابنا؟ عيب عليكن تكونوا أمثوله سيئة.
ابو يوسف
مين بيعرف.. يمكن إبني يوسف سافر قبلنا.. صرلنا شهور ناطرينو
عمر
آخر واحد ممكن يترك لبنان بيكون إبنكن يوسف.. رجعوا ع البيت تا بس يرجع يلاقي إمو طابختلو الأكله البيحبّا..
ابو يوسف
ألله يسمع منك يا جار
أم يوسف
وحياة إبنّا يوسف.. مش رح نسافر من هالضيعه.. بدنا نمسمر إجرينا ع عتبات بوابنا.. والشاطر يقبعنا..
"يخرج ابو يوسف وام يوسف"
عمر
الهجرة بتفزّع أكتر من الأشباح.. إذا كان الاستعمار إستعمار أراضي وبيوت، الهجره استعمار قلوب وعواطف وحنين، ومتل ما قالت أم يوسف لازم نمسمر إجرينا ع عتبات بوابنا والشاطر يقبعنا.
"يظهر يوسف فجأة وهو يحمل بندقيته"
يوسف.. شو عم تعمل هون؟.. انت مطلوب للإعدام رجاع مطرح ما كنت.. لا تحرق قلب إمك وبيّك.
يوسف
سمعت إنّن مسافرين جيت تا إمنعُن عن السفر.. قمت انت سبقتني ومنعتُن يسافروا
عمر
مش ممكن إترك حدا يهاجر من هالضيعه.. مش رح نستسلم لأشباح الدوله العثمانيه.
يوسف
الشباب ألأحرار بيسلموا عليك انت وسعيد.. وببشرك بشارة عظيمه رح تفرح فيها كتير
عمر
عجّل.. خبّرني.. شو باك ساكت؟
يوسف
دخّلنا شب قبضاي من ألأحرار بين الأشباح.. يعني خرقناهن.
عمر
شو عم بتقول.. يمكن ينكشف أمرو ويقتلوه..
يوسف
لا تخاف.. هيدا واحد حربوق وذكي.. إسمو لبناني وفكرو لبناني ودمّو لبناني
عمر
عجّل يا يوسف.. رجاع مطرح ما كنت قبل ما حدا يشوفك..
يوسف
سلملي ع إمي وبيي.. وقلّن إني بحبّن قد لبنان.. يمكن أقل شوي
"يخرج يوسف. تظهر بدرية وهي تغني. يستمع اليها عمر"
بدرية
ـ1ـ
هجمت عليي الأشباح
مبارح بجنينة جدّي
جبّيت شويّه ارتاح
وهدّي يا ركابي هدّي
ـ2ـ
واحد عيونو سود كبار
والتاني عم ينفخ نار
وحياة ألله عقلي طار
وما عدت أعرف شو بدّي
وهدّي يا ركابي هدّي
ـ3ـ
ولمن قللي: إسمك شو
دموعي ع الحارك نشّوا
وصفّيت بكذبي غشّوا
ويمّي كذبي لا تعدّي
وهدي يا ركابي هدي
ـ4ـ
في بإيدي سلّة تفّاح
ناولتو بالسلّه زاح
رجعت ناولتو بمفتاح
هرّوا سنانو ومصدّي
وهدّي يا ركابي هدي
ـ5ـ
قلتلو: بعّد شمروخ
فكّرني عم مسّح جوخ
برمني برمه تا دوخ
وقعوا عيوني ع خدّي
وهدي يا ركابي هدّي
ـ6ـ
شو لازم إعمل يا ناس
تا بعّد عن تمّي الكاس
لا تقولوا: القصّه وسواس
مبارح سرق المخدّه
وهدي يا ركابي هدي
ـ7ـ
بدّي سدّ مناخيرو
بدّي شفّ شفاتيرو
بدّي قصقص ضافيرو
بدّي.. بدّي وما بدّي
وهدي يا ركابي هدّي
"عمر يقترب من بدرية"
عمر
شو يا بدريّه.. إنتي كمان مرقت عليكي كذبة الاشباح؟
بدرية
لو كنت محلّي كنت عملتا تحتك..
"يدخل سعيد"
سعيد
مين كان عملا تحتو؟
عمر
خالتك بدريه عم بتخرفش حكي.. شو بدك فيها.. هات خبرنا شو صار مع الشباب الاحرار؟
سعيد
جمال باشا بدّو محاصيل الارض، عم يسرق الخيرات متل ما عم يسرق الناس، لازم نثور، لازم نرفع صوتنا ونحكي..
بدرية
يا ابن إختي سعيد، بترجاك تروق تا تروق الأحوال..
سعيد
لازم ننسّق مع الأحرار اللي عيون الباشا مراقبتهن: صالح حيدر، عبدالكريم الخليل، نور الدين القاضي.. وسميي سعيد فاضل عقل وسميّك عمر حمد.
عمر
يا سعيد لا بقى تذكر أسامي.. حتى الأشجار في إلها دينين.. وعيون جمال باشا أكتر من البرغش..
سعيد
يا عمر.. الشيخ أحمد طبّارة عم يتعرّض لضغوط كتيره، والجمعيات الدينيه والأدبيه عم بتزيد..
بدريّة
والجراد.. كيف بدنا نتخلص منّو.. عم ياكل الاخضر واليابس..
سعيد
يا خالتي، منتخلّص من الجراد لمن منتخلص من الحكم العثماني.
بدرية
دخيلكن انتبهوا.. جواسيس الباشا أكتر من الهم ع القلب.
عمر
نحنا كلنا لبنانيين وما في بيناتنا ولا عثماني
بدرية
نحنا لبنانيين بالتذكره، عثمانيين بالمنفعه..
سعيد
لا تقولي نحنا.. سمّي الإشيا ع حقيقتها
بدرية
اسمحولي قول "نحنا"، لأن جواسيس الباشا منّا وفينا، فيكن تقولولي مين منّا جاسوس؟ مين منّا عميل؟ سمعوا منّي كل واحد يروح ع بيتو.
عمر
لازم نضحّي.. وإذا ما ضحّينا ما في حدا رح يلاقي بيتو.. مأكّد جمال باشا رح ينقلو من مطرحو. اللي صادر شبابنا، دوابنا، ترابنا، بيصادر بيوتنا كمان.
بدرية
بدّو بيوتنا ياخدها.. أنا مش طايقه العيشه فيها.. الاشباح سكنتها.. انشالله بتخنقو..
عمر
الاشباح ما بتخنق سيّدها، متل ما جمال باشا زرع عيونو ع مفارق الطرقات، زرع أشباحو بقراني بيوتنا..
سعيد
الاشباح وهم، والوهم سلاح قوي بإيد الاستعمار.. صدقوني، إذا شعبنا تخلّص من الأوهام بيلاقي النور، وبيعيش الاستقلال. يا إستقلال الأرزه الخضرا قرّب.. نحنا ناطرينك:
غَنُّوكْ تا نْبَحّ الْقَصَبْ غَنُّوكْ
وْصِرْت الْخَمْر وِالْكاسْ
وِحْمِلْت إِسْم النَّاسْ
هَـ الْـ كِتِرْ ما هَجُّوكْ
صَارَتْ "أَلافَكْ" سَيْفْ
يْرِدّ الأَذَى عَ طُولْ
وِ"السّينْ" سَكْرَه وْكَيْفْ
وِ"التَّا" تْجِرّ فْصُولْ
كِلاَّ مْوَاسِمْ خَيْرْ
تِفْرَحْ بِمَلْقَى حْقُولْ
وْتِصْحَا عَ صَوْت الطَّيْرْ
وِ"الْقَافْ" قَوْل الْحَقّْ
عَ طُولْ عِنَّا فَرْض:
شَعْبَكْ صَعْب يِنْشَقّْ
مْوَحَّدْ بِـ حُبّ الأَرْضْ
وْ"لامْ أَلافَكْ".. لا
لِلطَّامِع الْمَغْرُورْ
بَدّنَا الأَرْض كِلاَّ
تِتْحَرَّر وْيِرْجَعْ
عْلَيْهَا يْشِعّ النُّورْ
وِ"الْلاَّمْ".. يا اسْتِقْلالْ
آخِرْ حَرفْ مِنْصَانْ
كِل ما خَطَرْ بِالْبَالْ
عَمْ يِبْتِدي.. لُبْنانْ
**
المشهد الثالث
"رزّوق يجلس بالساحة وحوله أطفال بعمر 11 سنة يلعبون"
مرشد
نحنا جوعانين، بدنا ناكل، الجراد عم يسبقنا ع رزقتنا، والجيش العثماني عم بيصادر لقمتنا.
حاتم
يا حبيبي يا بابا، لمّن إخدوك ع السّخره، علّقت عيونك بالبيت.
مرشد
نص الراحوا ع سفرل برلِك، ماتوا من الجوع.
حاتم
أنا بيي ما بيموت.. معلّق ع صدرو أرزة لبنان.
جميلة
وين ما منروح منشوف المشانق معلّقه. الباشا العثماني علّق مشنقه بكل شارع تا يخوّف الناس.
منتورة
كل الشنقن أبريا، وصرمايتُن أشرف من راسو. تعوا تا نساعد الأبطال، ونربط للأشباح.
رزّوق
يا ولاد لا تخافوا رزّوق بيحميكن.. بس لا بقى تجيبوا سيرة الأشباح.. تا ما تبصروهن بنومكن.
"يبتعد الأطفال عن رزّوق"
مرشد
أنا بصرت بمنامي شبح عندو شوارب وبيحكي تركي.
حاتم
أنا بصرت بمنامي شبح فرنساوي
جميلة
آخ لو كنتو تشوفوا متل ما شفت أنا
منتورة
وشو شفتي إنتي؟
جميلة
شبح عربي بيحكي إنكليزي
منتورة
عربي.. بيحكي إنكليزي؟!
مرشد
إي.. وشو فيها يعني.. أنا بصرت بمنامي شبح تركي بيحكي لبناني
الاطفال
لبناني؟!!
مرشد
أيوه.. لبناني
حاتم
وما روبصت بالليل؟
مرشد
صليت شوي تا الله يهديه ورجعت نمت
جميلة
الخاين ما حدا يصليلو
منتورة
لا.. لازم نصليلو.. لأنن صارو أكتريه بهالبلد
جميلة
ليش عم بيصير هيك؟ ليش عم بيبيعوا حالن للشيطان؟
مرشد
فتّشي عن المال.. المال وحدو بيشتري الرجال
جميلة
بس فشر يشتري الاطفال.. يا أطفال العالم اتحدوا
ضدّ الأشباح
الاطفال
يويو
جميلة
ضد الأموال
الاطفال
يويو
جميلة
ضد المشانق
الاطفال
يويو
جميلة
والجو العابق
الاطفال
يويو
جميلة
لا تقولوا متنا
الاطفال
يويو
جميلة
وتحكوا حكايتنا
الاطفال
يويو
جميلة
رح نبقى ونكبر
الاطفال
يويو
جميلة
ونحمي أرزتنا
حاتم
الأشباح مش أقوى منّا.. نحنا ولاد فخرالدين
منتورة
أنا جدّي قدموس وستّي أوروبا
مرشد
إذا كان جدّك قدموس وستك أوروبا فيكي تقوليلي وين عملوا شهر العسل؟
منتورة
بمغارة جعيتا
جميله
إذا وصلتو ع التاريخ سمحولي قلكن إنو أنا عمتي قرطاجة
حاتم
قرطاجة إسم مدينه وزعّت حضاره ع الكون
جميلة
أنا عارفه.. بس عمتي وزوج عمتي هني العمروها
مرشد
ولوه.. شو بكن نازلين القربه بهالناس ونسيتوا أستراليا
حاتم
أستراليا أمنا كلنا
منتورة
هيدي السافروا عليها ولاد الفخري من بشري.. وكانوا مفكرين إنن رايحين ع أميركا؟
"رزوق يقترب من الأطفال ويصرخ"
رزوق
بعدكن هون؟ قلتلكن روحوا ع بيوتكن قبل ما تعتّم الدني
"تطل زمرد"
زمرد
تركن يا خيي يلعبوا شوي.. بعد بكير ع النومه
رزوق
الليله رح إربط للأشباح تا يعرفوا مين رزّوق
زمرد
ألله يحميك يا بطل..
"يعود الاطفال من جديد"
مرشد
يا أطفال في مشكله خطيره كتير ونحنا عم نتجاهلا.. الأشباح سرقت حقلنا، وجمال باشا نكّل بأهلنا، وكيف بدنا نعيش؟
حاتم
تعوا تا نغتال الباشا.. نحنا أطفال ما حدا بيشك فينا
مرشد
إذا قتلنا الباشا بيخلقلنا مليون باشا.. خلينا بواحد أحسن
"رزوق يطرد الأطفال من الساحة"
رزوق
قلتلكن روحوا ع بيوتكن قبل ما يوصلوا الأشباح.. عجلوا.. يللا يللا
"يخرج الأطفال مرعوبين"
**
المشهد الرابع
"تحضيرات لاستقبال الآغا"
سليمان
نضفّوا الساحة، رشوا الطرقات زهور، ارفعوا قواص النصر، جايي الآغا..
عصوم
البدو يقدّم هديّه للباشا لازم يبوس إيدو أولاً، ويقدم الهديه ثانياً.
بدرية
وثالثاً..
عصوم
إذا شكرو الآغا كان به.. وإذا ما شكرو بتكون هديتو مش حرزانه
بدرية
ليش الآغا بيشكر الناس حسب ما بيدفعوا
عصوم
شو.. بدّك الآغا يشكر ع بلاش
سليمان
يا جماعه.. كلمة الآغا بتهد جبال
مرّون
إذا كان هيك يطيرلنا هالأشباح من ضيعتنا
سليمان
صدقوني.. كل المسائل البتهم المواطن بتهم الآغا كمان.. ولهالسبب لمّن بيوصل خلّوا زلاغيطكن توصل ع الاستانه
مرّون
يا سليمان.. إنت إبن هالضيعه.. ساعدنا ألله يخليك
سليمان
من زمان كنت إبن الضيعه.. وهلّق صرت إبن السلطه
مرّون
ليش السلطه بتخلّف؟!
سليمان
بتخلّف ونص..
مرون
وكم شهر بتاخد تا تخلّف إبن متلك؟
سليمان
المسأله ما بدها شهور.. بتتعلّق بنتفة ورقه بيمضيها الآغا
مرون
فإذن.. إنت إبن الورقه
بدرية
إذا كان الآغا بيّو لازم تكون الورقه إمّو
سليمان
إبن ضيعتكن صار إبن السلطه.. إبن العظمه وإنتو عم تضحكوا عليه..
بدريه
إبن السلطه لازم يساعد المظلومين ويحرر بلادو
عصّوم
لمن بيوصل الآغا لازم تقصّوا لساناتكن أحسن ما يقصلكن ياها هوّي.. فهمتو
مرون
الشعب جاع.. الجراد أكل الأخضر واليابس، والجيش العثماني صادر شبابنا وما عاد عنّا دموع تا نبكي.. حتى الدموع نشفت..
سليمان
لازم تشكروا ألله.. ضيعتكن هيي الوحيده الما وصلا الجيش العثماني.. وبعدكن بتنقوا..
مرون
إذا كان إبن البلد عم يحكي هيك.. شو رح يقول الاستعمار؟
بدرية
هيدا مش إبن البلد.. هيدا ابن الواوي.. ولو ما يكون الواوي بيّو ما صار دنب للاستعمار
مرون
اسكتي يا بدرية هلّق بيسمعك..
بدرية
مش فرقانه معي.. ولادي ميتين من الجوع ولازم إحكي
مرون
انطري تا يوصل الواوي الكبير
بدرية
قصدك الآغا.. ريتو ما كان خلق.. لمّن عيّنو السلطان صار الشعب فرحان، ومن بعد سنة زمان تغيّر اللي كان..
مرون
حكاية هالحكام حكايه ما بيتقوّموا متل المقتايه
"موسيقى دخول الباشا"
سليمان
وصل الآغا.. سمّعوه زلاغيطكن.. وخلوا الزهور تفرشلو طريقو.
الأهالي
يا أهلا بالآغا.. يا أهلا بحامي الحمى.. وصوت الناس المظلومين
عصوم
زيّنت الدار.. وضهر الحمار.. تا تركب يا باشا.. بهالمشوار
الآغا
الحقيقه كنت مرتاح كتير بهالمشوار
عصوم
إذا كان الحمار مش مريحك منحملك ع كتافنا
زمرد
العمى شو هالوطنيّه المريحه!
الاغا
شو عم بتقولي يا زمرد؟
زمرد
عم قول يا سيدنا.. لو ما صادر جمال باشا حمار زوجي كنا ركبتك عليه
الآغا
جمال باشا أحق منّك ومنّي بالحمار
زمرد
بس نحنا جوعانين يا آغا
الآغا
جوعوا إنتو ولا يجوع الباشا
زمرد
في ناس كتير عم بيموتوا
الآغا
معليش اذا مات شوية ناس.. المهم تبقى دولتنا العليّه ويسلم الباشا
"عمر يهمس بأذن سعيد"
عمر
سمعت شو عم بيقول هالواوي؟ حابب إعملو كفّين ينسّوه حليب إمّو
سعيد
إياك تتصرّف غلط يا عمر.. بكرا بيجي دورو
الآغا
أنا جايي لهون تا إحكي عن الاشباح مش عن الباشا
زمرد
ما كلو متعلّق ببعضو
الآغا
شو قصة الأشباح بالضيعه؟
زمرد
الأشباح خربت بيوتنا.. المونه الما بيعرف فيها الباشا بتسرقها الأشباح
الآغا
مش معقول يكونوا الأشباح حراميه هالقد!
بدريه
وأكتر يا سيدنا.. كان عندي زوج مباريم دهب عيار 24 اختفيوا بليله ما فيها ضو قمر.
الآغا
وشو قصة تفّاحاتك يا بو يوسف؟
بو يوسف
من بعد ما حوّشت الأشباح تفاحاتي وعبّتهن بالصناديق، تركولي ورقه مكتوب عليها جمله باللغه التركيه ما قدرت إفهمها.
الآغا
وبعدك محتفظ بالورقه؟
ابو يوسف
تفضّل يا آغا.. هيدي الورقه
الآغا
أشباح أوادم.. كاتبينلك يا بو يوسف ألله يعوّض عليك.
بو يوسف
إذا كان هيك.. ألله ما يعوّض عليهم.
الآغا
لَهْ يا بو يوسف.. انتْ عم ترتكب خطيّه مميته هلق!
سعدى
قُولْ شو ما بدك يا بو يوسف.. أنا الأشباح سرقولي بقراتي..
الآغا
مين الحرمه؟!
سعدى
سعدى المعازيه يا سيدنا
"تقترب من الآغا يشم رائحتها"
الآغا
خليكي بعيده عني.. من كم سنه تحممتي يا سعدى؟
سعدى
لشو الانسان يتحمّم وضميرو موسّخ..
الآغا
شو.. مبيّن بلشتي تحكي فلسفه..
سعدى
الجوع خلانا نتفلسف.. ضيعتنا الما بيوصلا الجيش العثماني زرعوها بالأشباح.
الآغا
إذا بتضلوا تجيبوا سيرة الجيش العثماني رح يطلع عليكن..
سعدى
ألله يقطع سيرتو..
الآغا
قولوا ألله ينصرو..
سعدى
خلّصنا من ألأشباح يا آغا.. ألله يخلّصك من أعداءك..
الآغا
يا رجال..
رجال الآغا
أمرك سيدنا..
الآغا
خبروا أهل الضيعه قديش الآغا سهران ع راحتهن..
رجال الآغا
سيدنا الآغا أمرنا نحرس بيوتكن، نحمي ولادكن، ونحافظ ع شرفكن..
عمر
هودي كلّن مفقودين ما عدا الشرف
الآغا
نحنا ولاد الشرف..
عمر
نحنا يا آغا نحنا..
الآغا
يا عمر.. لا بقى تطوّل لسانك خايف تلحق بسميَّك عمر حمد
"يهمس سعيد بإذن عمر"
سعيد
قلتلك سكوت يا عمر.. هلّق بيودّيك ع المشنقه
عمر
أنا مش أحسن من اللي شنقن جمال باشا السفاح.. والله هالآغا محيّرني.. كيف بيّو لبناني وشكلو عثماني؟!
سعيد
أفضل شي نطلع من هون.. يللا يللا
"يخرج سعيد وعمر"
الآغا
لسانات كتيره لازم تنقص تا تسلم الدوله.. بنصحكن ما تسمعوا إلا كلام الآغا
رجال الآغا
سيدنا مش عم يشبع نوم.. بيضل يفكّر فيكن
الآغا
البدو يسهر ع الرعيّه.. لازم يرافق السهريه
رجال الآغا
ألله يطوّل بعمر الآغا
الآغا
نصيحتي إلكن ما تقرّبوا ع الأشباح، قريت بكتاب ألف ليله وليله إنّو الأشباح بتتعبّى بالناس.. انتبهوا منيح لَتتعبّى فيكن..
أم يوسف
مبارح تعبّى شبح بجارتنا زمرد
الآغا
متل ما قلتلكن لا تقرّبوا ع الأشباح ولا تقوّصوا عليهن
بدرية
يا آغا الأشباح ما بتموت ولو قوّصنا عليها
الآغا
أنا خايف ع ضرب الرصاص
أم يوسف
وكيف بدنا نتخلص منّن
الآغا
صلّوا يا ولادي صلّوا
أبو يوسف
قولك إذا رفعنا صليب بهالساحه بتخاف منّو الأشباح؟
الآغا
ارفعوا الصليب والهلال سوا، إذا كانوا الاشباح مسيحيين بيخافوا من الصليب، وإذا كانوا مسلمين بيخافوا من الهلال
أبو يوسف
وإذا كانوا يهود؟
الآغا
نجوم السما كتيره
أم يوسف
وإذا ما عندن رب؟
الآغا
ارفعوا صورة جمال باشا.. ولا تنسوا شو نبهتكن.. ما حدا يتعرّض للأشباح تا ما يتعبّوا فيه.. فهمتو؟
الأهالي
فهمنا يا آغا..
الآغا
أنا تحت أمركن.. ما في مشكله إلا ما بحلاّ، يا يكون الآغا هيك يا بلا..
رجال الآغا
عاش الآغا.. عاش الآغا.. عاش الآغا
الآغا
بخاطركن يا جماعه..
"موسيقى خروج الآغا"
مرّون
إجا الآغا.. وراح الآغا
وبعدا الأشباح بضيعتنا
جايي دورك يا هالآغا
لما مناخد حريّتنا
**
المشهد الخامس
"أبو يوسف يحمل الصليب وأم يوسف تحمل الهلال"
أم يوسف
حمال صليبك منيح يا بو يوسف
أبو يوسف
وإنتي انتبهي ع الهلال.. خلّي إيدك مرفوعه بالجو تا يضوّي ع الناس
أم يوسف
لازم نعلّق الصليب والهلال بساحة الضيعه
ابو يوسف
قبل ما نعلّقكن بالساحه لازم نعلّقن بقلوبنا
ام يوسف
الطائفيه قتلت من شعوب الآرض أكتر ما قتلت السياسه!
ابو يوسف
السياسه بتقوم ع مبدأ "فرّق تسد"
ام يوسف
ولبنان أفضل بلد لتنفيذ هالمبدأ
ابو يوسف
كل ما طلع كرّ زعامه بيشهنق بإسم الطائفيه
أم يوسف
والكل بيسمعولو.. وهات يا غدر، هات يا قتل وهات يا موت
ابو يوسف
لمّن تزوجتك من عشرين سنه سمّوني بطل
ام يوسف
ولمن تزوجتك من عشرين سنه سمّوني شهيده
ابو يوسف
ليش يا ام بوسف؟!
ام يوسف
لأن ما بيحق للبنت تتزوج شب من غير ديانتها
ابو يوسف
أنا قلت بدّن يدبحوني اهلي بهيديكي الايام
ام يوسف
وأنا قلت بدّن يدبحوني اهلي بهيديكي الايام
ابو يوسف
وبعدنا عايشين.. زلاغيط أهلِك بتوصل لضيعتنا لمن منروح نزورُن
ام يوسف
ألله يرحمك يا امي.. لمّن خيّرتا بينك وبين واحد من الجيش العثماني، قالتلي بالحرف الواحد: زوان بلادنا ولا القمح الصليبي
ابو يوسف
أنا زوان يا ام يوسف.. والله لو كنت عرفت انو قالت هيك ما كنت تزوجتك
ام يوسف
هيدا مَتَل يا بو يوسف.. متَل.. متَل .. متَل
ابو يوسف
إذا كان متَل رح إسكت
ام يوسف
ليش حضرتك نسيت شو قالت إمك لمن كنت عم لزّق الخميره؟
ابو يوسف
قالت اسمالله عليها كأنّا من ديانتنا
ام يوسف
ومع هيدا وكلّو ما فتحت تمي.. لزّقت الخميره ونزلت بست إيدها
ابو يوسف
رزق الله ع هيديكي الايام يا ام يوسف
ام يوسف
نحنا كنا ابطال حقيقيين يا بو يوسف.. لأنو جمعتنا الاديان بعيله وحده كانت ثمرتها ابنّا اللبناني البطل يوسف
ابو يوسف
إذا ما توحدنا هيك لا يتأملوا بوطن عايش
ام يوسف
وكل عشرين سنه بدّن يقدموا ولادن للموت
ابو يوسف
لأول مره حاسس انو الاستعمار العثماني وحّدنا
ام يوسف
تطلّع بالمشانق يا بو يوسف، بتشوف الوحده الوطنيّه ع حقيقتها.. محمد المحمصاني، وسعيد فاضل عقل ع فرد مشنقه
ابو يوسف
ألله يحميك يا ابني يوسف.. أنا خايف عليه كتير
ام يوسف
إبنك مش أحسن من غيرو.. كل الشنقن الباشا من خيرة شباب الوطن
ابو يوسف
إبنّا وحيد ما لنا بالديار غيرو
ام يوسف
ووطنّا وحيد ما لنا بالكون غيرو
ابو يوسف
إنتي اللي وديتيه مع الأحرار
أم يوسف
وأنا اللي خلّفتو تا يكون حر
ابو يوسف
صلّي يا ام يوسف صلي تا ما تدب الخيانه وتتفرفط المقاومه
ام يوسف
إذا كنت ابني يا إبني خلصنا من الاستعمار
ابو يوسف
واذا كنت ابني يا ابني خلّصنا من الأشباح
ام يوسف
لمن منتخلص من الاستعمار منتخلص من الأشباح
ابو يوسف
ضيعتنا حرّه متل هوا جبالنا، كيف وصلتلا الاشباح ما حدا بيعرف؟
ام يوسف
الاشباح منّا وفينا يا بو يوسف، الليرات العثمليّه عم تندفع بكتره بهالايام
ابو يوسف
الخي ما بيخون خيّو يا ام يوسف
ام يوسف
المال سبب كل عله
ابو يوسف
قولِك شاريين ناس من ضيعتنا
ام يوسف
هيك الهيئه.. لأن الضيعه الما بيوصلا الجيش العثماني، بيفضّوها من سكانا وبتصير مستعمره للأشباح
ابو يوسف
اذكري كلامي يا ام يوسف.. الدم ما بيصير مي
ام يوسف
الدم ما بيصير مي.. فيق يا رجّال فيق؟ الدم صار بنزين، صار بنايات، صار مراكز عاليه بالدوله..
ابو يوسف
مهما صار.. شعبنا اصيل وعندو ضمير
ام يوسف
الخاين خاين ما عندو رب.. لا بقى تحكي يا بو يوسف، محيونا عن بكرة أبينا وبعدك متمسك بالأخلاق!
ابو يوسف
بكرا بتشوفي.. الدم ما بيصير مي
"يظهر أحد ألأشباح.. ويبقى وراء ابو يوسف كيفما تحرّك"
ام يوسف
دخليك.. لحقني يا بو يوسف
ابو يوسف
أنا حد منك لا تخافي
ام يوسف
شبح يا بو يوسف.. شبح
ابو يوسف
لا في شبح ولا في شي..
ام يوسف
وراك يا بو يوسف وراك
ابو يوسف
بعّد عنّي يا شيطان.. انا مش شايف شي
ام يوسف
فتح تمّو بدّو يبلعك
ابو يوسف
هـــــا.. سكّر تمّك
ام يوسف
سكّر تمّو
ابو يوسف
شو مفكرتيني قليل.. انا بو يوسف انا
"يبتعد الشبح قليلاً ثم يعود"
ام يوسف
رجع يا بو يوسف رجع.. رفاع الصليب بوجّو
ابو يوسف
إنتي شايفتيه.. ارفعي الهلال كمان
ام يوسف
شايفتو منيح.. بس مش عم بيخاف، الظاهر ما عندو دين
ابو يوسف
العمى بقلبو ما بيظهر إلاّ ع النسوان
ام يوسف
عجّل يا بو يوسف.. عم يفتح تمّو
ابو يوسف
قلتلك سكر تمّك
ام يوسف
بعدو عم يفتح تمّو.. بدو يبلعك
ابو يوسف
أح طز دي.. أح طز دي
"يهرب الشبح"
ام يوسف
هرب الشبح يا بو يوسف.. فيك تقلّي شو قلتلو؟
ابو يوسف
حاكيتو بلغه ما بيفهما الا الاشباح
ام يوسف
وشو قلتلو؟
ابو يوسف
أح طز دي..
ام يوسف
وشو يعني أح طز دي
ابو يوسف
أح طز دي معناتا إذا ما بتروح من هون بدّي زوجك مرتي
ام يوسف
شو؟
ابو يوسف
إي ألله وكيلك..
أم يوسف
هدّوني عنّو.. الليله آخرتو
"يهرب بو يوسف.. تلحق به ام يوسف"
**
المشهد السادس
"يظهر بائع البخور"
بائع البخور
ع البخّور.. ع البخّور، بخّوري ضد الأشباح، بخّر بيتك تا ترتاح. ع البخور.. ع البخور جرّب بخّوري يا عم، أشباحك كلاّ بتنطم.. ع البخور
"تظهر بدرية"
مرون
يا ريتك كنت هون لمن ظهر عليي الشبح..
بائع البخور
الشبح ما بيظر عليي.. أنا بيّاع البخّور.. وبخّوري مقدّس يا ست
مرون
طيّب.. بقديش كيلو البخور؟
بائع البخور
لكي أو للكنيسه؟
مرون
لأ.. ليي أنا
بائع البخور
حرام تشتريي كيلو.. ربع وقيّه بتكفيكي
مرون
ربع وقيّه بس؟!
بائع البخور
وبتطهرلك بيتك كلّو
مرون
هات كيلو هات.. ظهر عليي شبح قد الخزانه
بائع البخور
وشو لونو؟
مرون
متل البمبرختي كل يوم بلون
بائع البخور
يعني بيلبس تياب؟
مرون
وبيدنكز طربوشو لقدّام
بائع البخور
هيدا مش شبح.. هيدا زلمي
مرون
زلمي.. زلمي.. دخيلك قللي إذا بخّورك بيجبلي عريس
بائع البخور
بدك عريس.. يعني زلمي
مرون
يخرب ذوقك كيف عرفت؟
بائع البخور
من الأشاير
مرون
قولك كم لازملي كيلو بخور تا يجيني عريس
بائع البخور
يا ست.. أنا بخوري ضد الاشباح مش للعرسان
مرون
الأشباح رجال مش هيك؟
بائع البخور
رجال.. نسوان.. علمي علمِك..
مرون
انا متأكده إنو الاشباح رجال.. أف شو قلال الرجال بضيعتنا.. أنا بدي عريس
بائع البخور
إذا كان هيك بخاطرك.. ع البخور
مرون
لوين رايح.. ما جبتلي عريس
بائع البخور
يا ست.. لازم إرجع ع ضيعتي قبل ما تعتّم الدني.. بخاف الجيش العثماني يعمل كمين ويصادر بخّوري
مرون
ساعتها.. بتاكلنا الأشباح.. وبيطيروا العرسان
بائع البخور
قولي لهالفلاحين يبخروا بساتينن ويرجعولا
مرون
الفلاحين قاعدين ببيوتن.. سكك الفلاحه صدِّت قدام بوابُن
بائع البخور
البلاد الما بيزرعا الفلاج بتجوع وبتركع
مرون
دخلك بخر الارض اللي بتمرق فوقا
بائع البخور
أرضنا مبخّره من يوم ما تكونت الكلمه.. الاشباح ما بتسوطن فيها.. ارضنا مقدسه..
مرون
بحلفك بالارض علي صوتك.. خليهن يسمعوك.. بركي بيشلحوا عنّن تياب الفزع..
بائع البخور
لمّن عرفت بخوفُن قلت ببيعُن بخور تا قويلُن قلوبُن..
مرون
يعني انت مش بياع بخور؟!
بائع البخور
أنا صوت صارخ بالبريّه: لا تتركوا بلادكن.. بلادكن مقدسه.. ع البخور
"يخرج بائع البخور"
مرون
صوتك يا هالبيّاع هوّي العطر العم بيعطّر كل نسمة هوا منتنشقا.. يا ريت بيفهوا عليك..
"يظهر أحد ألأشباح.. تصرخ مرون من الخوف"
وينك يا بيّاع.. بخّر.. تعبّى فيي الشبح.. دخيلكن لحقوني..
"تقع مرون أرضا وهي ترتجف.. يهرب الشبح.. يدخل بعض الاهالي"
زمرد
عجّلوا تا نحملا ع البيت.. مرون ظهر عليها الشبح مرة تانية
بدرية
حالتها بالويل.. شو لازم نعمل..
زمرد
يا إختي شو بيعرّفني.. صارت البنت نص مجنونه.. ولسانا مربوط
بدرية
جيبوا جارنا الشيخ يرقيلا
زمرد
مش رح ينفع معها لا شيخ ولا خوري.. مصيبتها كبيره
بدرية
ما في شي عم ينفع مع هالاشباح الهاجمه ع ضيعتنا
مرون
شـ شـ شـ شبح
زمرد
روقي شوي يا مرون
مرون
شـ شـ شـ شبح
زمرد
عجّل يا رزّوق بنقطة مي بارده
رزوق
أحسن لو منقعدها ع الكرسي ونهوّيلا شوي
مرون
شـ شـ شـ شبح
رزوق
عرفنا شبح بس ما عرفنا شو بدّو.. شو مطلوبو.. وليش بيظهر ع النسوان بس
مرون
شـ شـ شـ شبح
رزوق
ضربوها كف وخلصونا
زمرد
ما حدا يمد إيدو ع مرون..
رزوق
الكف بيوعيها
زمرد
بيّا كلّو وكبرو مش ضاربها كفّ..
مرون
ب ب ب بيي..
زمرد
عجّل يا خيي رزوق جيب بيّا لهون قبل ما يوصل البونا..
مرون
بو بو بو بونا
رزوق
الحمدالله كوعّت عن بيا ووصلت للبونا
زمرد
ساعدني يا خيي تا نحملها ع البيت قبل ما يجي الشبح
رزوق
قلتلكن مية مرة.. لا تخافوا من الأشباح رزوق بيحميكن ومش عم تصدقوني
زمرد
ألله يحميك يا بطل.. بخّري يا بدرية بخّري
بدرية
الجمرات مطفيين.. قدحلي يا رزوق
رزوق
قداحتي بالبيت.. مش حاملها معي
زمرد
مش عم توعى البنت.. يمكن غط ع قلبا.. لحقوني بنقطة مي
"مرون تغيب عن الوعي"
بدرية
جارتنا مرون ماتت.. جارتنا مرون ماتت
"تعود مرون الى وعيها"
مرون
شــ شـ شـ شبح
بدرية
جارتنا مرون قامت.. جارتنا مرون قامت
زمرد
قرّبوا يا نسوان تا نحملها ع البيت
مرون
شــ شـ شـ شبح
بدرية
راحت عليكي يا مرون.. بدل ما تنطري العريس قام طلعلك الشبح.. قولكن من وين جايي هالشبح ولوين رايح؟ مارق مرقة طريق أم حابب يتبلّد.. والله إذا طلع بوجّي.. لفجّلو راسو بهالكرسي..
"يحملون مرون ويخرجون"
**
المشهد السابع
"أثناء الليل يعودالاطفال الى ساحة القرية وهم يحملون حبلاً طويلاً"
مرشد
مدّوا هالحبل من أول الساحة لآخر الساحه.. وما لازم نترك شبح يمرق من هون إلا ما نلقطو
جميلة
يا ماما أنا خايفه
مرشد
الخايف يرجع ع بيتو.. ما ع الحساب نحنا ولاد فخرالدين.. وستنا قرطاجه..
منتورة
وشو بدّك يانا نعمل تا ما يشوفونا الأشباح؟
مرشد
لازم تتخبّوا منيح.. حاتم وجميله من ميل.. وأنا ومنتوره من ميل تاني.. وبس يوقع شبح بالفخ منلف الحبل عليه ومننده أهل الضيعه.. مفهوم
حاتم
مفهوم.. بس أول شبح ليي أنا
مرشد
شو بدّك تشويه ع النار؟
حاتم
لا.. بدّي إزربو بقنينه
منتورة
عوايد ستّك حوّا..
مرشد
عجّوا.. عجلوا تخبّوا.. عم إسمع دعسه
"تدخل سعدى وهي خائفة.. ترتطم بالحبل المشدود"
سعدى
يا ناس يا هو.. الاشباح بالضيعه
حاتم
لفّوا عليها الحبل منيح.. لا تخلوها تفلت
سعدى
دخيلكن اتركوني.. أنا سعدى المعازيه
مرشد
ولوين رايحه بهالليل؟
سعدى
رايحه إتفقد عنزاتي.. خايفه يسرقوهن الأشباح
مرشد
لا تقولي لحدا شو عم نعمل.. مفهوم
سعدى
مفهوم.. وألله يوفقكن بشي شبح تركي
مرشد
عجلي روحي قبل ما يجوا الاشباح.. هالمره انتبهوا منيح.. ما لازم نغلط أبداً
منتورة
سامعه دعسه عم بتقرّب.. شدوا الحبل
"تدخل زمرد"
حاتم
لقطنا لقطه حرزانه.. لقطنا لقطه حرزانه
زمرد
لا بقى تصرّخ.. أنا امّك زمرد
حاتم
امي!.. لوين رايحه بهالليل؟
زمرد
عم فتّش عليك يا حبيب امك.. يللا قدّامي ع البيت
جميلة
كرمالي يا خالتي.. اتركيه معنا شوي.. وبعدين كلنا منروح ع بيوتنا
زمرد
نص ساعه بس مش أكتر.. وبتروحوا ع بيوتكن
جميله
بتؤمري يا ست الكل
مرشد
يا عمي شو عم بيصير.. قلتلكن ما لازم نغلط.. انتبهوا منيح
"يدخل سعيد وهو مسرع.. يرتطم بالحبل.. يلفه الاطفال به"
حاتم
لقطنا شبح.. لقطنا شبح
سعيد
بدي إلقط لساناتكن..
حاتم
استاذ المدرسه؟!
سعيد
أيوه.. أنا سعيد استاذ المدرسه.. وانتو ليش بعدكن سهرانين؟
حاتم
أ أ أ أ أنا فكرتك شبح
سعيد
وهلق شو؟
حاتم
انت استاذي.. معلمي.. ببوس إيدك سامحنا
سعيد
بكرا كلكن سوا بتجيبولي ورقه مكتوب عليها ميتين مره كلمة شبح.. وهلّق ع بيوتكن ما بدي شوفكن هون مره تانيه.. فهمتوا؟
"يبتعد الاطفال وهم يتهامسون.. سعيد يبقى في الساحه"
جميله
قولكن لوين رايح بهالليل.. هوي ناطور أو استاذ؟
منتورة
الحق علينا اللي سمعنا منكن.. ليك مللا صبيان ليك..
مرشد
حدا بيجيب بنات تربط للأشباح.. لفوا الحبل وروحوا ناموا.. أحسن ما يفكروكن سارقينو عن شي مشنقه..
"سعيد يطرد الأطفال من الساحة، يظهر عمر ويوسف وبيد كل واحد منهما بندقية"
عمر
الآغا واحد كذّاب.. بازاونك كبير.. اخترع الأشباح تا يفزّع أهل الضيعه ويسرقلن محاصيل الأرض..
سعيد
ما فينا نتهم الآغا من دون ما نتحقّق
عمر
مبارح نطرت كل الليل، شفت الأشباح مارقين وع ضهورن شوالات القمح
يوسف
تحيّرت ليش بيي كان عم بيصرّخ: سرقولي القمحات..
عمر
وشفت الآغا عم يدفعلن مصاري.. ولو ما هدّي أعصابي كنت ناوي خلّص عليه..
سعيد
لازم نفكّر بطريقه نتخلّص فيها من أشباح الآغا
يوسف
إذا مسكنا شبح واحد بس.. منفضح العمليه ومنوصلها للأحرار
عمر
إذا بقي أحرار.. جمال باشا السفّاح ناوي ع الإسلام وع المسيحيه.. ويا تعتير اللي بيفتح تمّو.. المشانق بالجمله..
سعيد
غليت حبال المشانق ع إيام جمال باشا
عمر
خبّرتنا يا يوسف إنو الأحرار زرعوا واحد منّن بين الأشباح.. حدا عرف عنّو شي؟
يوسف
وصلتلنا منّو إخباريّه إنو الأشباح رح تسرق الليله عنزات سعدى المعازيه
سعيد
إنت متأكّد من هالشي؟
يوسف
ميّه بالميّه.. الليله ليلتنا.. لازم نكمش الأشباح
سعيد
من تمّك لباب السما.. اللعبه قربت تنتهي.. وصلت نهايتك يا آغا الزفت..
يوسف
لازم نتوزع كل واحد بجهه.. وهيك منطوقهن.. وما حدا بيقدر يهرب
عمر
مرّون وصلت.. تحبّوا منيح.. شو جايي تعمل يهالليل؟.. "يختبىء سعيد وعمر ويوسف. تدخل مرّون وهي تغني"
مرّون
ـ1ـ
لِمِّنْ حَبْسُونِي بْخَاتِـمْ
أَصْفَرْ وِزْغَيَّرْ نَاعِمْ
أُمِّي وْبَيِّي فِرْحُوا كْتِيرْ
وْحِسَّيْت بْحَالِي رَحْ طِيرْ
فَوْق جْنَاحْ النَّسَايِمْ
ـ2ـ
يَا مَا ويَا مَا حْلِمْنَا فِيكْ
يَا خَاتِـمْ.. حَتَّى نْلاقِيكْ
فَرْحَه بِعْيُون الْحِلْوِينْ
وْطَرْحَه بَيْضَا وِفْسَاتِينْ
وْزِينِة عِرْس وْعَزَايِمْ
ـ3ـ
إِنْت الْحَبْس الْـ بِيفَرِّحْنَا
إِنْت الدَّمْعَه الْـ مَا بْتِجْرَحْنَا
لَوْلاك زْهُور الْبُسْتَانْ
ما انْهَدْيِتْ مَرَّه لإِنْسَانْ
إِنْت الْمَحْبُوب الدَّايِمْ
ـ4ـ
حْبِسْنِي.. لا تِتْرِكْنِي ضِيعْ
وْيِمْرُق عْلَيِّي الرَّبِيعْ
مْرُوجِي مِشْتَاقَه للزَّهْر
يَا خَاتِـمْ.. شُو نَفْع الْعُمْر
لَوْ تِنْسَانِي يَا خَاتِـمْ
"تتكام مع نفسها"
لا في خاتم ولا في بلّوط.. لازم يجي العريس تا يجي الخاتم
"تدخل زمرد وأم يوسف"
ام يوسف
مرّون عم تحكي مع حالا.. شو يا مرّون بعدك سهرانه؟
مرّون
حبّيت إتمشى شوي.. انتو لوين رايحين؟
ام يوسف
ما عاد عنّا شي بهالضيعه تا ينسرق إلا عنزات سعدى.. لازم نروح ننطر معها
زمرد
إذا شافونا ألأشباح كتار.. يمكن يهربوا
مرّون
أنا خايفه موت وبعدني عزبه.. العمى شو قلال العرسان بالضيعه.. كلّن هربوا من وجّ الجيش العثماني
زمرد
اذا تقدملك شب حلو من الجيش العثماني. بتاخديه؟
مرّون
بفضّل ضل عزبه كل عمري.. ولا شوف خلقتو
أم يوسف
خلص رح حلّ المشكله.. واخطبك لإبني يوسف.. شو رأيك؟
مرّون
ما في بنت بتستاهل إبنك يوسف.. لأنّو بطل والبطل بيتزوج بلادو بس..
ام يوسف
انتي قولي انك موافقه.. واتركي الباقي عليي.. اتفقنا
"تحني مرّون رأسها خجلاً. تزغرد زمرد"
زمرد
لي لي لي لي
"يظهر أربعة أشباح بثياب وقناع اسود"
شبح
شو عم نسمع زلاغيط.. الظاهر في عرس وما عزمتونا؟!
ام يوسف
مين إنتو؟
شبح
نحنا الأشباح
مرّون
أنا شفت الأشباح.. لونن أبيض وانتو لونكن أسود متل الليل
شبح
بالليل سود وبالنهار بيض.. وهلّق يا بتموتوا يا بتقولولنا وين خبّت سعدى المعازيه عنزاتها؟
زمرد
منفضّل نموت ولا نحرم ولادنا شرب الحليب.. روحوا سرقوا بضيعه تانيه
شبح
إنتي سكتي.. وارجعي ع بيتك
"زمرد تهمس بإذن أم يوسف"
زمرد
هيدا صوت خيي رزّوق..
"زمرد تهجم على الشبح وتخلع قناعه.. يظهر وجه رزوق"
رزّوق.. كل عمري فكّرك بطل قمت طلعت خاين!
الأشباح
قتلها يا رزوق.. لازم تقتل اختك تا ما ينكشف أمرنا.. اقتلها.. اقتلها.. اقتلها
رزوق
بدكن ياني اقتل اختي
الاشباح
إذا ما قتلتها رح ينكشف أمرنا.. انت قتلها ونحنا منقتل الباقيين
"رزوق يصوب سلاحه صوب زمرد، ويصرخ بأعلى صوته"
رزوق
يا شباب..
"يخرج يوسف وعمر وسعيد وهم يصوبون أسلحتهم نحو الاشباح"
عمر
ارموا سلاحكم وارفعوا ايديكم.. وما حدا يجرّب يهرب..
"رزوق يقترب من أخته زمرد ويغمرها"
يوسف
يا مية أهلا وسهلا بالبطل رزوق
رزّوق
يا اختي.. خيّك رزّوق بطل.. بس الشباب الأحرار طلبوا مني ادخل باللعبه تا إكشف اللعبه..
زمرد
تقبر اختك انشالله..
يوسف
لازم نخفي الاشباح بمطرح ما حدا بيوصلّو.. بركي بيقرّوا ع غيرُن ومنحرر ضيعتنا
أم يوسف
قبل ما تروح يا إبني يوسف.. سلّم ع مرون
يوسف
"يصرخ وهو يخرج"
مرّون.. انطريني أنا راجع
"يغمى على مرون من شدة الفرح"
"انتهت"
**
