Ya mar Charbel
O Saint Charbel
**
مثلها عام 2004 أكثر من 400 طالب وطالبة من معهد سيدة لبنان ـ هاريس بارك ـ سيدني ـ استراليا، وقد تم تحويلها الى مسرحية من عدة أشخاص.
**
أشخاص المسرحية
أبونا حنا
المختار
لبيبة (زوجة المختار ـ أم شربل)
شربل
فارس
سميرة (زوجة فارس)
أسعد
كوكب (زوجة أسعد)
نعمان
سعدى (زوجة نعمان)
نجيبة
أم يوسف
يوسف
سامي (شرطي السير)
سليمان
فادي
نجلا (زوجة فادي)
حوا
سالم
رستم
الوزير
المقدم عساف
مجموعة من الممثلين تتبادل أدوار: رجال المباحث، الصحفيين،أهالي تل النسورا، وغيرهم
**
المشهد الأول
(يدخل فارس وهو يحمل صورة القديس شربل وبصحبته أسعد ونعمان)
فارس:
صُورْة مارْ شَرْبِلْ عَم تِرْشَحْ زَيْتْ..
صُورْة قِدِّيسْ لُبْنانْ عَم تِرْشَحْ زَيْتْ..
نعمان:
عَجِيبِه يا ناسْ.. عَجِيبِه يا أهْل الضَّيْعَه.. الْحَاضِرْ يِعْلِمْ الْغَايِبْ: صُورِةْ مارْ شَرْبِل عَمْ تِرْشَحْ زَيْتْ..
أسعد:
يا نَاسْ.. يا هُو.. ضَيْعِةْ تَلّ النّسُورَا مارْ شَرْبِلْ حَبّ يْزُورَا
فارس :
تَعُوا شُوفُوا الْعَجايِبْ الرَّحْ تِشْفِي الْمَرْضَى وِتْرِدّ الْغَايِبْ
نجيبة:
(تركض نجيبة باتجاه الصورة)
السَّلامْ عَ إِسْمَكْ يا مارْ شَرْبِلْ.. قَدّ ما فِيكْ تْنَزِّلْ زَيْت نَزِّلْ..
بَرْكِي بْيِرْخَصْ الزَّيْت بْهَالْبَلَدْ..
أسعد:
عَمْ نْقِلِّكْ عَجِيبِه.. عَجِيبِه.. وْإِنْتِي بِتْقُولِيلُو: نَزِّلْ زَيْت نَزِّل..
شُو مْفَكِّرْتِيهْ مَعِصْرِةْ زَيْتُونْ؟
نجيبة:
هُوِّي بْيَعْرِفْ أَكْتَرْ مِنَّكْ شُو لازِمْلا بْلادْنا..
أسعد :
فِيكِي تْقُولِيلي شُو لازِمْلا بْلادْنا؟
نجيبة:
لازِمْلا تِزْيِيتْ.. رُؤَساءْنَا بَدُّنْ تِزْيِيتْ.. شَعِبْنا بَدُّو تِزْيِيتْ..
وْكِل شِي بْهَالْبَلَدْ بَدُّو تِزْيِيتْ..
نعمان:
وَاللَّه مَعِكْ حَقّ يا نَجِيبِهْ.. خِدِي مَثَلاً ضَيْعِتْنَا "تَلّ النّسُورَا"،
لا الطَّرِيقْ وِصْلِتْلا، وْلا الْكَهْرَبَا وِصْلِتْلا.. وْلا الْمَيّ وِصْلِتْلا..
فارس :
تِعْبِتْ إِيدَيْنَا مِنْ كِتْر الدَّقّ عَ بْوابْ الْمَسْؤولِينْ..
وْما حَدَا مِنُّنْ كانْ يْرِدّ عْلَيْنا.. كَأَنَّا عَايْشِينْ بِبَلَدْ مُشْ بَلَدْنا!
نجيبة :
بْتَعرفوا لَيْش؟ لأَنُّو ضَيْعِتْنا بَيْتَيْن وْتَنُّورْ.. ما فِيهَا مِنْتِخْبِينْ كْتَيرْ.
أسعد:
بَسّ فِيها ناسْ إِسْمُنْ لُبْنانِيِّي.. وْلِهُنْ حَقّ مِتِلْ ما غَيْرُنْ إِلُو حَقّ.
نجيبة:
حَكِي ما فِي أَحْلَى مِنّو.. بَسّ يا حَبِيبْ إِمَّكْ بَدَّكْ مِينْ يِسْمَعْ..
فارس:
هَالْعَجِيبِه رَحْ بِتْغَيِّرْ إِشْيَا كْتِيرِه.. وْضَيْعِتْنا رَحْ بِتْصِيرْ أَشْهَرْ ضَيْعَه بْلُبْنانْ.. وْكل الْمَسْؤولِينْ رَحْ يْبُوسُوا إِيدَيْنا..
نجيبة:
وْلِكْ زَقّفُولُو قَبلْ مَا يِشْرُطْ زَلْعُومُو.. يا مِسْكِينْ.. تَا يِجُوا الْمَسْؤُولينْ عَ "تَلّ النّسُورَا" لازِمْ تْقِيمُوا أَلِيعازَرْ مْنِ الْمَوْتْ.. بَرْكِي بْيِلْحَقُنْ طَرْطُوشِه.. بْخاطِرْكُنْ يا جَماعَه..
نعمان:
نجيبة مَعَا حَقّ.. لَيْك يا فَارِسْ.. هَالْفِكْرَه فِكِرْتَكْ.. إِنْتَ قِلْتِلِّنَا دْلقُوا زَيْت عَ الصُّورَه تا نِعْمِلْ عَجِيبِه وْنِشْهِرْ ضَيْعِتْنا..
فارس:
وْبَدّْنا نْضَلّ نِدْلُقْ زَيْتْ تَا تُوصَلْ الطَّرِيقْ عَ الضَّيْعَه، وِتْشَعْشِعْ بْيُوتْنا، وْيِشْرَبُوا أَطْفالْنا.. مِينْ إِلْنَا غَيْر مَارْ شَرْبِلْ تَا يْسَاعِدْنَا.. هُوِّي بْيَعْرِفْ قِدَّيْش مِنْحِبّو.. وْقِدَّيْش مْنُؤْمِنْ فِيهْ.. وْمُشْ مُمْكِنْ نْشَكِّكْ بِعْجايْبُو.. بَسّ وْصِلْنَا لْبَابْ مَسْدُودْ وْمَا إِلْنَا غَيْرُو.. ساعِدْنَا يا مارْ شَرْبِلْ.. سَاعِدْنا..
أسعد:
وْبَرْكِه ما نَجْحِتْ الْخِطَّه.. وْرِحْنَا عَ الْحَبْس..
فارس:
أَيَّا حَبْس أَيَّا بَلُّوطْ.. نِحْنَا التّلاتِه فارِسْ وْأَسْعَدْ وْنِعْمانْ ما مِنْقِرّ
عَ بَعِضْنَا.. وْبَعْدِينْ.. شُو ما عِنْدكُنْ إِيمانْ بْمارْ شَرْبِلْ؟..
نعمان:
يِتْمَجَّدْ إِسْمُو.. بَسّ تَلّ النّسُورَا ما حَدَا سَامِعْ فِيها..
أسعد:
مِينْ كانْ يِسْمَعْ بْضَيْعَه زْغِيرِه حَدّ الأَرْزْ إِسْمَا بْقاعْكَفْرَا
قَبِلْ ما يِجِي مارْ شَرْبِلْ..
مِتلْ ما شَهَرْ ضَيْعْتُو بَدُّو يِشْهِرْ ضَيْعِتْنا..
فارس :
سَاعِتَا بْيِجُوا النّاس مِنْ أَميركا وِفْرَنْسَا وأُسْتْرَالْيَا تَا يِتْبَارْكُوا بِالصُّورَه، وْرَحْ تِغِتْنِي تَلّ النّسُورَا وِنْصِيرْ نِلْعَبْ بِاليُورُو..
أسعد:
وْبِالدُّولارْ كَمانْ..
فارس:
فَإِذَنْ صَرِّخْ تا قِلَّكْ: صُورِةْ مارْ شَرْبِلْ عَمْ تِرْشَحْ زَيْتْ..
نعمان:
يَا أَهْالِي الضِّيَعْ الْقَرِيبِه وِالِبْعِيدِه، تَلّ النّسُورَا ناطْرِتْكُنْ:
صُورِةْ مارْ شَرْبِلْ عَمْ تِرْشَحْ زَيْتْ..
فارس:
عَلّقُوا الصُّورَه بِسَاحْة الضَّيْعَه، وكِلّ ما تْعَتِّمْ الدِّنِي مْنِجِي نِدْلِقْلا شْوِيِّةْ زَيّْتْ..
أسعد:
رُوحُوا تَا نِرْجَعْ عَ بْيُوتْنا، مارْ شَرْبِل دَخِيلْ إِسْمُو قَادِرْ عَ كلّ شِي.
نعمان:
حَتَّى لَوْ كانِتْ كِذْبِه؟
فارِس:
حَتَّى لَوْ كانِتْ كِذْبِه..
عَجّْلُوا تا نْرُوحْ مْنِ السَّاحَه قَبْل ما تِهْجُمْ الْيُونَايْتِدْ نَايْشِنْ عْلَيْنا..
**
المشهد الثاني
(تدخل نجيبة وهي تضيء شمعة وتغني)
نجيبة:
رَحْ مِنْضَوِّي شْمُوعْنَا
يا شَرْبِلْ مَخْلُوفْ
وْرَحْ نِسْكُب دْمُوعْنَا
تَا هَالزَّيْت يْطُوفْ
يا زَيْت الْقَدَاسِه
أَرْضَكْ مَنَّكْ نَاسِي
بَارِكْلِي حَوَاسِي
وِالْقَلْب الْمَلْهُوفْ
(يدخل أبونا حنا وخلفه المختار وبعض أهالي تل النسورا)
بونا حنا:
وَيْنْ الصُّورَه؟ خَلُّونِي شُوفْ الصُّورَه قَبْل مَا إِعْطِي رَأْيِي..
نجيبة:
تْفَضَّلْ يَا بُونَا الصُّورَه قِدَّامَكْ.. الزَّيْتْ نَازِلْ مِنْهَا مِتْل النَّهْرْ..
وْلازِمْ نْحِطّ جاطاتْ تَحْت مِنْهَا.. حَرَامْ يِنْزِلْ هَالزِّيْت عَ الأَرْض..
بونا حنا:
حِطُّوا شْوَيِّةْ قطنْ كْمان.. فِي كْتِيرْ ناسْ بِيحِبُّوا
يِمْسَحُوا رُوسُنْ بِالزَّيْت.. وْيِتْبَرّعُوا لِلِكْنِيسِه..
المختار:
ضَرُورِي كَمانْ نْحِطّ شْوَيِّة شَمْع.. وْنِكْتُبْ فَوْقُنْ: الشَّمْعَه بْدُولارْ..
وَقِفْنَا فَقِيرْ وْلازِمْلُو دَعْم..
سليمان:
شُو بِتْقُولُوا إِذَا مِنْغَطِّسْ قِطَعْ قْماشْ بِالزَّيْت وْمِنْبِيعُنْ لِلنَّاسْ..
نجيبة:
وْهَالْقِطَعْ الِقْماشْ الْـ عَمْ بِتْقُولْ عَنْهَا..
بَدّنا نْبِيعَا بِالْمِتِرْ أَمْ بِالدّرَاعْ؟!
سليمان:
بَدّنَا نْقَصْقِصَا قَدّ الإِضْفِرْ.. شِي إِنُّو تْبِيِّنْ.. هَيْدِي بَرْكِه..
دْخِيرِه مِنْ مارْ شَرْبِلْ..
نجيبة:
يا هَلْتَرَى بَدّنَا نْسَعِّرَا بِالدُّولارْ.. أَمّ بِاللِّيرَه اللُّبْنانِيِّه؟..
سليمان:
الدّخِيرِه ما إِلْهَا سِعْر.. قَدّ ما بْيِعْطُوا نِحْنا مْناخُدْ..
بونا حنا:
لازِمْ نِسِتْغِلْ هَالْعَجِيبِه قَدّ ما فِينَا، كْنِيسِتْنَا بَدَّا تِصْلِيحْ صَارِتْ عَمْ تِدْلُفْ.. وِمْقَابِرْنا مُشْ مَعْرُوفِه مْقَابِرْ..
لبيبة:
يا دِلّ دِلُّو الْـ بِيمُوتْ بْهَـ الضَّيْعَه يِمْكِنْ تَاكْلُوا الْوَاوِيِّي..
عْمِلُولْكُنْ شَغْلِه قَبْل ما مُوتْ.. إِجْرَيِّي بَلّشِتْ تِرْجِفْ..
سامي:
مْقَابِرْ أُسْتْرَالْيَا قَدّ مَنْها حِلْوِه بْتِفْتَحْ الْقَلْب.. بِيجِيبُوا "التُّورِيسْتْ" عْلَيْهَا مِنْ كِلّ دُول الْعَالَمْ تا يَاخْدُوا صُورْ تِذْكارِيِّه حَدّ الِمْقَابِرْ..
سليمان:
لازِمْ نِبْنِي مْقابِرْ جْدِيدِه.. نِزْرَعْ حْوَالَيْهَا زْهُور وْشَجَرْ..
تا يِفْتَحْ قَلْبُو الْـ بِيفُوتْ عْلَيْهَا..
سامي:
قَبِلْ ما يِفْتَحْ قَلْبُو.. بِيكُونُوا فَتَحُوا قَبْرُو..
شُو بَدُّو يْشُوفْ تا يْشُوفْ؟!
سليمان:
الطَّيِّبْ مِتْلِي هَيْدَا اللِّي بْيِفْتَحْ قَلْبُو..
بَسّ الْمَيِّتْ مِتْلَكْ مْأَكَّدْ رَحْ يِفْتَحُوا قَبْرُو..
سامي:
الْعَصَا اللِّي ضْرَبْتَكْ فِيهَا مِنْ سِنْتَيْن ما عَلّمِتْ بِجِلْدَكْ..
بَسّ هَـ الْمَرَّه مَعِي عَصَا بِتْشَلْفِطْ تْشِلْفُطْ.. رِدُّونِي عَنُّو إِذَا فِيكُنْ..
سليمان:
إِنْت يا إِبْن الْبَرْصَا بَدَّكْ تْرَبِّينِي..
إِي أَللَّـه ما يْخَلِّينِي إِذَا بْخَلِّيكْ طَيِّبْ..
نجيبة:
عَيْب.. قِلْتِلّكُنْ عَيْب.. إِذَا ما بْتِسْتِحْيُوا قِدَّام الْبُونا وِالْمِخْتارْ
اسْتِحْيُوا قِدَّام مارْ شَرْبِلْ..
سليمان:
هَـ الْمَرَّه رَحْ مَرِّقْلَكْ يَاهَا كِرْمالْ مارْ شَرْبِلْ..
بَسّ الْمَرَّه التَّانْيِه بَدَّكْ جَمِيعْ الْقِدِّيسينْ ما بِيرِدُّونِي عَنَّك..
المختار:
هَيْدِي مْصِيبِتْنَا نِحْنا اللِّبْنانِيِّي.. ما مْنِتْفَاهَمْ إِلاَّ بِالْعَصَا..
بونا حنا:
قَبْل ما تِتْوَتَّرْ الْحَالِه الأَمْنِيِّه بِالضَّيْعَه.. وْتِتْدَخَّلْ الدُّوَلْ بِحَلْ خْلافَاتْنَا.. قُولُولِي بْبَيْتْ مِينْ صَارِتْ هَـ الْعَجِيبِه؟
نجيبة:
بْبَيْت فَارِسْ إِبِنْ بُو فَارِسْ..
وِالصُّورَه لِمِّنْ رَشْحِتْ زَيْت كَانِتْ بْأُوضِةْ مَرْتُو سَمِيرَه..
لبيبة:
أَللَّـه يْسَامْحَكْ يَا مارْ شَرْبِلْ.. الْخُورِيِّه عِنْدَا صُورَه أَكْبَرْ وْأَجْدَدْ مِنْ صُورِةْ سَمِيرَه.. لَيْش ما بِيَّنْت عْجايْبَكْ بْبَيْت الْخُورِي.. كانِتْ الطَّرِيقْ أَسْهَلْ وِالْعَجِيبِه أَشْهَرْ؟..
بونا حنا:
ما بِيهِمّ إِذَا كَانِت الصُّورَهْ لِلْخُورِيِّه أَمْ لَسَمِيرَه.. الْمُهِمْ صَارِتْ الْعَجِيبِه بْضَيْعِتْنا..
لبيبة:
بَسّ الْخُورِيِّه خُورِيِّه.. فِيهَا بَرْكِه أَكْتَرْ..
أَللَّه يْطَوِّلْ عُمْرَكْ وْعُمْرَا يا بُونا بْجَاهْ مارْ شَرْبِلْ..
بونا حنا:
وِالْقَايْلِه انْشَاللَّـه.. هَلَّقْ تْرُكُونِي إِفْحَصْ الصُّورَه..
نجيبة:
انْشَاللَّـه خَيْر يَا بُونَا.. انْشَاللَّه خَيْرْ..
شُو ما بِتْقَرِّرْ نِحْنَا مْنِمْضِي عَ الْعِمْيَانِه..
لبيبة:
الْهِمِّه هِمّتَكْ يا بُونَا.. وِانْشَاللَّـه تْكُونْ إِيدَكْ خَضْرَا عْلَيْنا..
المختار:
يا بُونَا حَنَّا إِذَا كانِتْ الْعَجِيبِه عَجِيبِه..
كِلّنَا سَوَا مْنِقْبُرْ الْفِقِرْ.. مِتْر الأَرْض بِيصِيرْ حَقُّو مِيةْ دُولارْ
سليمان:
لَيْش نِحْنَا بْسِيدْنِي؟!.. خَبّرُونِي إِنُّو مِتْر الأَرْض بْسِيدْنِي
صَارْ حَقُّو أَلْف دُولارْ..
يوسف:
قَوْلَكْ قِدَّيْش حَقّ قِنّ الدّجَاجْ اللِّي عِنْدِي إِذَا نْقَلْتُو عَ سِيدْنِي؟!
سليمان:
بَدَّكْ تْبِيعُو مَع الدّجاجاتْ أَمْ مِنْ دُونُنْ..
يوسف:
مْفَكَّرْ بِيعْ الْقِنّ لَوَحْدُو.. الدّجاجاتْ مْناكِلُنْ نِحْنَا وْبِالطِّيَّارَه..
أَكْل الطِّيَّارَاتْ ما كْتِيرْ بْيِعْجِبْنِي..
المختار:
بَلا قِنّ بَلاَ بَلُّوطْ.. خَلُّونَا بِمْشَارِيعْ الضَّيْعَه وِالِكْنِيسِه..
خَيْرَاتْ مَارْ شَرْبِلْ بَدَّا تْفِيض عْلَيْنا بْإِذِنْ أَللَّـه..
نجيبة:
شِفْتُو هَـ الِكْنِيسِه الزّغِيرِه اللِّي عِنَّا بِالضَّيْعَه.. بْقُوِّةْ أَللَّـه وْمارْ شَرْبِلْ بَدَّا تْصِيرْ كَاتِدْرَائِيِّه.. وبَدُّو يِجِي سَيِّدْنا الْمُطْرَانْ مْنِ الِمْدِينِه تَا يْصَلِّي فِيهَا.. وْمَعْقُولْ يِجِي سَيِّدْنا الْبَطْرَكْ كَمانْ.. تْصَوَّرْ يَا بُونَا يُوصَلْ بَطْرَكْنا عَ الضَّيْعَه.. مْنِعْمِلّو قْواصْ النَّصْر.. وْمِنْخَلِّي النِّسْوانْ تْزَلْغِطْلُو.. وِالْمُخْتارْ يْقِلُّو قَصِيدِه..
هاتْ سَمِّعْنَا يا مُخْتارْ.. يَللِّي أَشْعارَكْ مِنْ أَحْلَى الأَشْعارْ..
المختار:
قِحْ.. قِحْ.. قِحْ.. قِحْ..
لبيبة:
هَيْئِتَكْ عَمْ تِسْعُلْ يا بو شربل.. ما قِلْتِلَّكْ إنّو السِّيكارَه بَدَّا تِقْصُفْ عُمْرَك قبل يِرْجَع إِبْنَك من السّفَر؟
المختار:
شْوَيِّةْ سَعْلِه وِبْتِمْرُقْ..لا تِعِتْلِي هَمّ أَبَداً..
لبيبة:
انْشَاللَّـه تِمْرُقْ قَبِلْ ما يِمْرُقْ بَطْرَكْنا..
أَحْسَنْ ما تِطْلَعْ بَلا قَصِيدِه..
المختار:
أَنَا إِطْلَعْ بَلا قَصِيدِه وْسَيِّدْنا بِالضَّيْعَه.. هَيِئْتِكْ خْرِفْتِي يَا مَرَا..
لبيبة:
قِلُّنْ شُو صَابَكْ لِمِّنْ إِجَا الْمُونْسنْيور عَ الضَّيْعَه.. وْكِيفْ صَارْ صَوْتَكْ يْزَمِّرْ مِتِلْ بِيَّاعْ الْكازْ.. يَوْمِتَا حِسَّيْت إِنُّو السِّيكارَه قَتِلْتَكْ..
المختار:
أُوفْ.. أُوفْ.. أُوفْ
مِينْ قَلِّكْ إِنُّو الْمُخْتارْ
أَقْوَى مِنُّو السِّيكَارَه
مَحْسُوبِكْ بَدُّو سِيكارْ
طِخْنُو طِخْن الطِّيَّارَه
يوسف:
(يصرخ بأذن المختار)
يعيش الْمُخْتار.. يعيش.. يعيش.. يعيش..
اسْمَعُوا يا شبابْ.. بَدّنا مْنِ الْمُخْتارْ رَدِّه لْسَيِّدْنا الْبَطْرَكْ..
المختار:
أُوفْ.. أُوفْ.. أُوفْ..
بَطْرَكْنَا، سَيِّدْ لُبْنانْ
صَوْتُو بِيوَعِّي الإِنْسَانْ
عَ ضَيْعِتْنا لِمِّنْ طَلّْ
رَقْصُولُو بْناتْ وْصِبْيَانْ
يوسف:
(يصرخ مرة ثانية بأذن المختار)
أَللَّــه.. أَللـه.. أَللّــه.. أَللَّــه.. أَللـه.. أَللّــه..
ما أحلاها.. هاتْ غَيْرَا هَاتْ..
سليمان:
هَالْمَرَّه دَوْرِي يا مُخْتارْ..
أُوفْ.. أُوفْ.. أُوفْ
غَنُّوا يا عْصَافِيرْ التَّلّْ
بَطْرَكْنا عَ الضَّيْعَه طَلّْ
رافِعْ بِـ إِيدُو الصَّلِيبْ
تَا يِتْبَارَكْ مِنُّو الْكِلْ
يوسف:
(يصرخ بأذن سليمان)
آهْ.. يا سْلَيْمانْ آه.. قِلَّكْ شِي رَدِّه لْسَيِّدْنا الْمُطْرانْ حَبِيبْ قْلُوبْنا..
سامي:
هَـ الرَّدِه إِلِي يا سْلَيْمانْ.. سَيِّدْنا الْمُطْرَانْ دَخِيلْ عَيْنُو..
أُوفْ.. أُوفْ.. أُوفْ
أَهْلا بْسَيِّدْنا الْمُطْرَانْ
نِبْع التَّقْوَى وِالإِيمانْ
بْطَلِّةْ وِجَّكْ فِرْح التَّلّّ
وْرَقْصِتْلَكْ أَرْزِةْ لُبْنانْ
يوسف:
(يصرخ بأذن سامي، وسامي يلوِّح له بالعصا)
يِسْلَمْ تِمَّكْ.. يِسْلَمْ.. يِسْلَمْ.. يِسْلَمْ
كمانْ وِحْدِه لِلْخُورِي.. بُونا حَنَّا بْيِسْتاهِلْ
نجيبة:
أَنَا بَدِّي قِلُّو لْبُونَا حَنَّا
يوسف:
(يصرخ بأذن نجيبة)
آه يا نجِيبِه آه.. كِلّنا سَمَعْ..
نجيبة:
أُوفْ.. أُوفْ.. أُوفْ
بُونَا حَنَّا بِالْقِدَّاسْ
شِعْلِةْ تَقْوَى مَعْ إِحْسَاسْ
عِمَّرْنالُو دَيْر زْغِيرْ
حِجْرَانُو مْنِ قْلُوبْ النَّاسْ
بونا حنا:
شُكْراً يا نجِيبِه.. لِمِّنْ بْيِحْصَلّنا شَرَفْ زْيَارِة سيّدنا الْمُطْرانْ
أَو أَبِينَا الْبَطْرَكْ مْأَكَّدْ رَح تْقُولُولُنْ شِعْر أَحْلَى مِنْ هَيْك..
المختار:
خِدَا مِنْ هَـ الشّوَارِبْ يا بُونا..
إِذَا هِنِّي قَصّرُوا الْمُخْتار بِيكُونْ عِنْد حِسِنْ ظَنَّكْ.
بونا حنا:
هَلَّقْ سْمَعُوا.. بَدِّي إِحْكِي كِلِمْتَيْن زْغارْ مَع مارْ شَرْبِلْ..
المختار:
اسْمَعُوا يا جَماعَه.. قِلْنَا "سِيلُونْسْ" يِعْنِي "سِيلُونْس"..
الأَبُونَا بَدُّو يِحْكِي مَعْ مارْ شَرْبِلْ.. تْفَضَّلْ يا بُونَا..
بونا حنا:
يا قِدِّيسْ لُبْنانْْ، يا شَفِيعْ بْلادِي.. ما بْعُمْرِي شِكَّكْتْ بِعْجَايْبَكْ..
بَسّ هَـ الْعَجِيبِه صَارِتْ بِرْعِيتِي وْلازِمْ إِتْصَرَّفْ.
لبيبة:
تْصَرَّفْ يَا بُونا تْصَرَّفْ.. بَسّ عَجِّلْ شْوَيّ قْلُوبْنا عَمْ تِخْفُقْ مِتلْ جِبَّالْة الْبَاطُونْ..
نجيبة:
شُو يا بُونَا.. قَمْحَه أَمْ زِوَانِه؟.. إِذَا زِوَانِه ما بَدِّي أَعْرِفْ..
وْإِذَا قَمْحَه سْمَحْلِي زَلْغِطْ.. لِي لِي لِي
بونا حنا:
تْرِكُونِي دُوقْ الزَّيْت عَ رَوَاقْ.. ما حَدَا يْحِطّ ضَغْط عْلَيِّي فْهِمْتُو؟
لبيبة:
خُودْ وَقْتَكْ يَا بُونَا.. العَجِيبِه عَجِيبِتْنا وِالزَّيْت زَيْتْنا..
بونا حنا:
مِنْ نَاحِيةْ الزَّيْتْ.. بَابْ أَوَّلْ..
صَدّقُوني أَطْيَب مِنْ زَيْتاتِي بْأَلْف مَرَّه..
نجيبة:
شُو.. بْكَفِّي الزَّلْغُوطَه يا بُونَا؟.. لي.. لي.. لِي..
بونا حنا:
عَ مَهْلِكْ شْوَيّ يا نجيبة.. قَبْل ما الْخُورِي يِعْطِي رَأْيُو لازِمْ يْخَبِّرْ الْمُطْرَانْ.. وِالْمُطْرَانْ يْخَبِّرْ الْبَطْرَكْ.. وِالْبَطْرَكْ يْخَبِّرْ بَابَا رُومْيِه.. وْرُومْيِه بِتْوَدِّي لِجْنِه بْتِفْحَصْ الزَّيْت وْبِتْقَرِّرْ..
نجيبة:
وْبَعْدِينْ يَا بُونَا.. بَعْدِينْ؟
بونا حنا:
وْبَعْدِينْ مْنَعْرِفْ إِذَا كَانِتْ قَمْحَه أَمْ زِوَانِه..
نجيبة:
رَاحِتْ عْلَيْكِي يا تَلّ النّسُورَا.. كِنَّا بَدّنا نْسَمِّيكِي تَلّ الْعَجَايِبْ..
بونا حنا:
شَعِّلِّي هَـ الْمَبِخْرَه يا يوسِفْ تَا نْبَخِّرْ الصُّورَه..
يا مارْ شَرْبِلْ
الأهالي:
صَلِّ لأَجْلِنَا
بونا حنا:
يا يُوسِفْ مَخْلُوفْ
الأهالي:
صَلِّ لأَجْلِنَا
بونا حنا:
يا إِبْنِ بْقَاعْكَفْرَا
الأهالي:
صَلِّ لأَجْلِنَا
بونا حنا:
يا مَحْبِسْة الْقَدَاسِه
الأهالي:
صَلِّي لأَجْلِنَا
بونا حنا:
يا سْرَاجْ الْعَجَائِبْ
الأهالي:
صَلِّ لأَجْلِنَا
بونا حنا:
يا نُور الرَّهْبَنِه
الأهالي:
صَلِّ لأَجْلِنَا
بونا حنا:
يا جارْ أرْزِتْنَا
الأهالي:
صَلِّ لأَجْلِنَا
بونا حنا:
يا قدّيس مْنِ بْلادِي
الأهالي:
صَلِّ لأَجْلِنَا
بونا حنا:
يا حَامِي ضَيْعِتْنا
الأهالي:
صَلِّ لأَجْلِنَا
بونا حنا:
بِسْم الآب وَالإبنْ والرُّوح الْقُدسْ.. أَلإِلَه الْوَاحِدْ آمين .
بِتْرَجَّاكُنْ ما حَدَا يِدْقَرْ الصُّورَه.. ضَلُّوا بْعادْ عَنْهَا قَدّ ما فِيكُنْ.. واللِّي بَدُّو يْقَدِّمْ نْدُورَاتْ لازِمْ يِعْطِيها
لَلِجْنِة الْوَقْف مُبَاشَرَةً.. سَامْعِينْ..
يوسف:
(يصرخ بأذن الخوري)
سامْعِينْ.. وَاللَّه سَامْعِينْ.. النُّدورَاتْ كِلاَّ لِلْوَقفْ..
بونا حنا:
أَللّه يِرْضَى عْلَيْكْ يا يوسفْ لا بَقَى تْصَرِّخْ رَحْ تِطْوِشْنا.. تا رُوحْ شُوفْ الْخُورِيِّه شُو بَدَّا.. بْخاطِرْكُنْ هَلَّقْ..
(يخرج الجميع ما عدا نجيبة)
نجيبة:
كِلُّنْ رَاحُوا يا مارْ شَرْبِلْ.. وْهَلَّقْ صَارْ فِينِي إِحْكِي.. بِتْرَجَّاكْ تِسْمَعْنِي مْنِيحْ.. ما بَعْرِفْ كِيفْ بَدِّي قِلَّكْ يَاهَا.. مِسْتْحِيِّه كْتِيرْ.. صَارْ عُمْرِي تْلاتِينْ سِنِه وْبَعْدِي عَزْبِه.. شَقْفِةْ رِجَّالْ ما تْقَدَّمْلِي.. إِذَا إِيدَكْ طَايْلِه.. وَدِّيلِي.. وَدِّيلِي عَرِيسْ..
**
المشهد الثالث
(يدخل فارس، يرش بعض الزيت على الصورة، يرتّل)
فارس:
حُبُّكَ يا شَرْبِلْ
أَحْيَا قَلْبَنَا
جِئْنَاكَ نُهَلِّلْ
إِحْمِ أَرْضَنَا
لُبْنانْ لُبْنانْ لَكَ يا شَرْبِلْ
ـ2ـ
دَيْرُكَ الْمُقَدَّسْ
فَرَّحَ الْفَادِي
وَزَيْتُكَ الأَقْدَسْ
ضَوَّى بِلادِي
لُبْنانْ لُبْنانْ لَكَ يا شَرْبِلْ
ـ3ـ
إِسْمُكَ الْمُمَجَّدْ
شَاعَ فِي الأَكْوانْ
والأَرْزُ تَعَبَّدْ
لِفَتَى لُبْنانْ
لُبْنانْ لُبْنانْ لَكَ يا شَرْبِلْ
"يخرج فارس، يدخل بعض الأهالي"
سعدى:
شُو هَـ الْخَبَرْ الْمِفْرِحْ اللِّي سْمِعْتُو، صُورِةْ مارْ شَرْبِلْ عَمْ تِرْشَحْ زَيْتْ.. وْلِكْ دَخِيلْ عَيْنَكْ يا مارْ شَرْبِلْ عْرِفْت تْنَقِّي وَيْن تِظْهِرْ عْجايْبَكْ.. نِحْنَا مِنْحِبَّكْ كْتِيرْ، وْنِصّ وْلادْنا بْيِحِمْلُوا إِسْمَكْ..
سميرة:
أَحْلَى سِنِه هَـ السِّنِه.. كانْ وِجَّا خَيْر عْلَيّي.. خَلّفِتْ بَقِرْتِي فِدَّانْ.. وِحْمارْتِي جابِتْ جَحِشْ.. وِدْجاجاتِي جَارِّينْ وَرَاهُنْ صِيصَانْ.. كَتِّرْ خَيْرَكْ يا مارْ شَرْبِلْ..
يوسف:
انْشَاللَّـه كِلّ ما تْخَلِّفْ بَقْرَه، أَوْ يْصِيحْ دِيكْ.. بَدّنَا نْسَمِّيهَا عَجِيبِه؟!
سعدى:
تُوما.. تُوما.. إِذَا شَكَّكَتْكَ عَيْنُكَ فَاقْلَعْهَا.. نِحْنَا بْدَرَا مارْ شَرْبِلْ عايْشِينْ وِالْـ مُشْ عاجْبُو يْبَلِّطْ الْبَحْرْ..
يوسف:
شُوفُوا شُو صَارْ مَعِي أَنا.. عِنْدِي بُورَه زْغِيرِه زْرَعْتَا قَلْبَيّْن حِمُّص أَخْضَرْ.. وْلَحِّقْ يا يوسف لَحِّقْ.. أَنا حِشّ وِالْحِمُّصْ يْطُوفْ.. إِكْلُوا أَهْل الضَّيْعَه.. وْبَعْدُو الْحِمُّصْ عَمْ بِيفَرِّخْ وْمُشْ عَارِفْ شُو بَدِّي إِعْمِلْ فِيهْ.. دَخِيلْ إِسْمَكْ يا مارْ شَرْبِلْ..
سميرة:
صَدّرُو عَ أُسْترَالْيَا.. هَوْنِيك ما فِي حِمُّصْ أَخْضَرْ..
سعدى:
يا عَمِّي هَـ الْبُورَه الْـ عِنْد يوسف ما بْتِطْلَعْ عَشْر مْتارْ مْرَبَّعْ.. مَعْقُولْ تْطَعْمِي أُسْترَالْيَا..
يوسف:
وْبِتْطَعْمِي نْيُوزِيلَنْدَا كَمانْ.. بَسّ انْشَاللَّـه يْكُونُوا مْعَوّدِينْ عَ الْحِمُّصْ الأَخْضَرْ..
هَيْدَا بْيِعْمِلْ رِيحْ.. وْمَا بَدّنَا مَشَاكِلْ مَعْ دُوَلْ الْعَالَمْ..
سميرة:
اسْمَعُوا مِنِّي اقْفِلُوا هَـ الْمَوْضُوعْ.. هَلَّقْ بْيِتِهْمُونَا بْصِنِعْ قَنابِلْ جَرْثُومِيِّه.. وْخَلّصُوا إِذَا فِيكُنْ تْخَلّصُوا..
سعدى:
تا نِرْجَعْ لْحَدِيثْنَا الأَسَاسِي.. بِجْنَيْنتِي حَدّ النَّهْرْ طِلِعْ قَلبْ بَطِّيخْ.. لا خِدْت وْلا عْطَيْت.. بَعْد كَمْ يَوْم طافْ النّهْرْ.. فِتَّشْت وْدُوَّرْت..
لْقَيْتِلّكُنْ رَاسْ بَطّيخْ طُولُو أَرْبَعْ مْتارْ مْسَكَّرْ النَّهْرْ..
سميرة:
وْكِيفْ شِلْتيه مِنْ الْمَيّ؟..
سعدى:
حْمارْ وَاحِدْ ما قِدِرْ جَرُّو.. لِزِمْلِي حْمارَيْنْ..
سميرة:
أَكْبَرْ حْمارْ الْـ بِيصَدِّقْ هَـ الْقِصَّه..
شُو عَمْ تِضْحَكْي عْلَيْنَا يا سعدى؟!
سعدى:
إِذَا كانْ الْحِمُّصْ عِنْد يوسف بِيطَعْمِي أُسْترَالْيَا..
بَطِّيخْتِي لازِمْ تْطَعْمِي الْيُونَايْتِدْ نَايْشِنْ..
سميرة:
هَيْئِكْ يا سعدى بِلَّشْتي تْزِيديها..
سعدى:
طَيِّبْ.. بِتْطَعْمِي جَامِعْة الدُّوَلْ الْعَرَبِيِّه..
سميرة:
كَمانْ زَدْتيها شْوَيْ..
سعدى:
الْبَطِّيخَه بَطِّيخْتِي وْأَنا حِرّه فِيها.. سَاعِةْ ما بَدِّي بِنْفِخَا
وْسَاعِةْ ما بَدِّي بْفِشَّا..
يوسف:
إِيْ كِرْمالْ مارْ شَرْبِلْ فِشّيها. تا نِقْدِرْ نْنَزِّلا عَن ضَهْر الطِّنْبُرْ..
سعدى:
(تصرخ بأذن يوسف)
يا خَيِّي فِشَّيْتَا.. فِشَّيْتَا.. فِشَّيْتَا.. مَبْسُوطِينْ هَلَّقْ..
سِتِّينْ عِمِرْكُنْ ما تاكْلُوا بَطِّيخْ..
(تدخل كوكب حافية القدمين)
كوكب:
دِلُّونِي، دِلُّونِي، دِلُّونِي وَيْن الصُّورَه؟
يوسف:
مْعَلَّقَه بِالسَّاحَه..
كوكب:
وَيْنْ السَّاحَه؟ دِلُّونِي عَ السَّاحَه..
سميرة:
شُو بِكِي يا كَوْكَبْ؟.. ضَيْعِتْنا ما فِيها إِلاَّ سَاحَه وِحْدِه..
كوكب:
رُوحُوا تا نْرُوحْ عَ السَّاحَه، عَجّلُوا، بَدِّي شُوفْ مارْ شَرْبِلْ..
سعدى:
فِيكِي تْقُولِيلْنا شُو بَدِّكْ مِنُّو؟..
كوكب:
عِنْدِي كَوْمِةْ مْطالِيبْ وْما فِي غَيْرُو بِينَفِّذَا..
يوسف:
تا نْقِلِّكْ وَيْن السَّاحَه لازِمْ تْقُولِيلْنَا شُو مْطَالِيبِك..
كوكب:
بَدِّي إِطْلُبْ مِنُّو يْقِمْلِي الْعَصَبِي، يشْفِي إِمِّي، يْصَحِّحْ بَيِّي،
وِيْقِصّ لْسَانْ حْماتِي..
سعدى:
كِلّ هَـ الْقَد بْتِكْرَهِي حْماتِكْ؟
كوكب:
لْسَانَا طَوِيلْ كْتِيرْ مِتْل مْجَزّ السّْكَافِي.. بْيِجْرَح بِالطَّالِعْ وْبِالنَّازِلْ..
سميرة:
وْمِينْ قَلِّكْ إِنُّو مارْ شَرْبِلْ بِيقِصّ لْسَاناتْ النَّاسْ؟
كوكب:
سْمِعْت حْماتِي عَمْ بِتْقِلُّو: يا مارْ شَرْبِل قِصّ لْسَانْ كِنّتِي كَوْكَبْ.. يِعْنِي لْسَانِي.. وْسِمْعْتَا بِتْقِلُّو رَحْ إِنْدِرْلَكْ نِصّ لِيرَه..
بِشَرَفْكُنْ شُو بْتِشِتْرِيلُو النّصّ لِيرَه بْهَـ الإِيَّامْ..
أَنَا بَدِّي إِبْطَحَا وْإِنْدِرْلُو خَمِسْ لِيرَاتْ..
سعدى:
وِالْخَمِسْ لِيرَاتْ ما بْيِشْتِرْيُوا شِي كَمانْ..
بَدِّكْ تْحِطِّي أَقَلْ شِي أَلْف لِيرَه..
كوكب:
أَلْف لِيرَه؟.. يَا حَسِرْتِي مْنَينْلِي!.. زَوْجِي بْيِْشْتِغِلْ كِلّ النّهَارْ تا يِعْطُوه أَلْف لِيرَه.. إِنْتُو دِلُّونِي وَيْن السَّاحَه
وِتْرِكُوا مارْ شَرْبِلْ عْلَيِّي..
سميرة:
ما نِحْنا وَاقْفِينْ بِالسَّاحَه.. هَيْدِي هِيِّي السَّاحَه..
فِيكي تْرُوقِي شْوَيْ؟
كوكب:
وَيْنُو.. وَيْنُو.. دَخِيلْ عَيْنُو.. مارْ شَرْبِلْ حَبِيبْ قَلْبِي..
يوسف:
الْتِفْتِي وَرَاكِي بِتْشُوفِيه..
كوكب:
يِتْمَجَّدْ إِسْمَكْ.. السَّلامْ عَ إِسْمَكْ.. يا حَبِيبْ قَلْبِي يا مارْ شَرْبِلْ..
قَوِلْكُنْ شُو نَوْع الزَّيْت الْـ عَمْ يِنْزِلْ مِنُّو؟
سعدى:
زَيْت زَيْتُونْ خَضِيرْ.. ما فِي أَطْيَبْ مِنُّو.. دُوقِي بْتَعِرْفِي..
كوكب:
مُشْ مَعْقُولْ يْكُونْ زَيْتْ زَيْتُونْ.. هَيْدَا زَيْت مَيْرُونْ مْقَدَّسْ.
سميرة:
أَكِيدِه الزَّيْت الْـ عَمْ يِرْشَحْ مْنِ الصُّورَه زَيْتْ مْقَدَّسْ..
كوكب:
يِقْطَعْ الشَّكّ انْشَاللَّـه.. وَاحِدْنا لازِمْ يْدُوقْ تَا يْصَدِّقْ..
يوسف:
هَلَّقْ بْيِزْعَلْ مارْ شَرْبِلْ وْبِيرُوحْ يْفَرْجِي عْجايْبُو بْضَيْعَه تَانْيِه..
وْنِحْنَا مْنِطْلَعْ بَحّ، عْرِفْتُو شُو يِعْنِي بَحْ؟
كوكب:
يا يُوسِفْ أَنْطُونْ مَخْلُوفْ، يا إِبِنْ بْقَاعْكَفْرَا،
السِّنْة اللِّي خْلِقْت فِيها كانِتْ سِنِةْ خَيْر عْلَيْنا وْعَ الْعَالَمْ أَجْمَعْ..
يوسف:
لَيْش أَيَّا سِنِه خِلِقْ؟
(يدخل أبونا حنا)
بونا حنا:
سِنْةْ 1828، سَاعِتَا حِكْيُوا أَرْزَاتْ الرَّبّ،
وْقَالُوا مِتِلْ ما قَالْ رَبّْنَا: هَذَا هُوَ إِبْنِي الْحَبِيبْ الَّذِي بِهِ سُرِرْتْ..
يوسف:
يا بونا أَنا مُشْ عَمْ إِفْهَمْ.. إِذَا كانْ مارْ شَرْبِلْ إِسْمُو يُوسِفْ،
لَيْش ما سَمُّوهْ مارْ يُوسِفْ.. كان طلعلي عيدَيْن؟
بونا حنا:
لِمِّنْ دَخَل الرَّهِبْنِه غَيَّرْ إِسْمُو، وِاخْتارْ إِسِمْ شَرْبِل،
شَهِيدْ كَنِيسِةْ إِنْطاكْيَا بِالْقَرْن التَّانِي مِيلادِي.
سميرة:
وْقِدَّيْش كانْ عُمْرُو لِمِّنْ دَخَل الرَّهِبْنِه؟
بونا حنا:
23 سِنِه، بْهَـ العُمْر هَيْدَا طَلْبُو المَسِيحْ لِلدَّيْر،
وْقَلُّو: يا إِبْنِي يا يُوسِفْ..
لُبْنانْ ما طَلَّعْ قِدِّيسِينْ.. بَدِّي ياكْ تْكُونْ أَوَّلْ قِدِّيسْ بْلُبْنانْ..
وسِنْة 1851 لَبَّى الدَّعْوِه وْدَخَلْ دَيْر سَيّدِةْ مَيْفُوقْ، وْبَعِدْ مِنْهَا انْتَقَلْ لَدَيْر مار مارُونْ عِنَّايَا، وْصَارْ أَشْهَرْ رَاهِبْ بِالرَّهِبْنِه اللُّبْنانِيِّه.
يوسف:
وْلِكْ يِعْمُرْ دِينَكْ يا سْمِيَّي.. وَاللَّه طْلِعِتْ قَبَضَايْ..
سعدى:
بَدَل ما تْقُولْ: طِلِعْ قَبَضَايْ..
قُول: طِلِع قِدِّيسْ
يوسف:
لَوْ ما كانْْ قَبَضايْ ما قِدِرْ يِعْمِلْ قِدِّيسْ..
سعدى:
شُو دَخَّلْ هَيْدِا بِهَيْدَا.. الْقَبَضَايْ وَاحِدْ قَوِي..
وِالْقِدِّيسْ وَاحِدْ آدَمِي.
بونا حنا:
سْمَعُوا تَا قِلّكُنْ: كِلّ وَاحِدْ مِنَّا قَادِرْ يِعْمِلْ آدَمِي، يِعْمِلْ خوري، يِعْمِلْ وَزِيرْ، يِعْمِلْ رَئِيسْ، قَادِرْ يِعْمِلْ شُو ما بَدُّو.. بَسّ ما بْيِقْدِرْ يِعْمِلْ قِدِّيسْ، الْقَدَاسِه بَدَّا وَاحِدْ قَبَضَايْ.
يوسف:
مَظْبُوط هَـ الْحَكِي يا جَمَاعَه.. الْقَدَاسِه بَدَّا قُوِّه وْجَلَدْ وْسَهَرْ وصَلا وْتَضْحِيِّه وْنُكْرَانْ ذَاتْ..
الْقَدَاسِه عَذَابْ ما بْيِتْحَمّلُو إلاَّ الْقَبَضَايَاتْ.
بونا حنا:
ـ مارْ شَرْبِل كَانْ وَاحِدْ قَبَضَايْ، ضَلّ 23 سِنِه حابِسْ حَالُو بْمَحِبْسِه زْغِيرِه، وكانْ ضَلّ أَكْتَرْ لَوْ ما أَللَّـه طَلَبْ الأَمانِه، وماتْ سِنِةْ 1898 بْلَيْلِةْ عِيد الْمِيلادْ..
سميرة:
مَوْتُو كانْ حَيَاةْ لِبْلادْنا.. لْشَعِبْنا وْلِكْنِيسِتْنا..
وْبَلَّشْ قَبْرُو يْضَوِّي، وْبَلّشِتْ عْجايْبُو تِكْتَرْ..
يوسف:
وبْتِسْعَه تِشْرِينْ الأَوَّلْ سِنْة 1977 شَعِّتْ قْدَاسْتُو عَ الْعالَمْ أَجْمَعْ..
بِشَرَفْكُنْ شُو بِيكُونْ: قَبَضَايْ أَمْ مُشْ قَبَضَايْ؟
بونا حنا:
قَبَضَايْ وْنِصّ.. يَا رَيْت أَللَّـه بْيِبْعَتِلْنَا عَشْرَه مِتْلُو.
يوسف:
عَشْرَه قْلالْ.. بَدّنَا عَ الْقَلِيلِه خَمْسِينْ قِدِّيسْ..
شَرْبِل وْرَفْقَه وِنْعِمْةَ اللَّه تْلاتِه.. بَعْد لازِمِلْنا 47 قِدِّيسْ..
سعدى:
عَ قْبَالْ الْبَطْرَكْ إسِطْفانْ الدّوَيْهِي انْشَاللَّـه.. بِيصِيرُوا أَرِبْعَه..
كوكب:
وِالْبَطْرَكْ الِحْوَيِّكْ مِنْ شُو بْيِشْكِي؟..
إِذَا ما عَطَانَا.. عَطَانَا اسْتِقْلالْ لُبْنانْ، وْرَاهْبَات الْعَيْلِه الِمْقَدّسِه..
سعدى:
وْبَطْرَكْنا الْحَالِي.. ما لازِمْ يِعِلْنُوه قِدِّيسْ؟
بونا حنا:
وَقّفي هَوْن لا تْكَفِّي..
هَـ الْبَطْرَكْ ما مْنِطْلَعْ عَنُّو..
لُبْنانْ بِحاجِه إِلُو..
وْنِحْنَا بِحاجِه إِلُو..
وِالسَّمَا فِيهَا تِنْطُرْ..
وَإِلاَّ تْشِرْشَحْنَا.. تْشِرْشَحْنَا.. تْشِرْشَحْنَا..
سعدى:
تْشِرْشَحْنَا.. تْشِرْشَحْنَا.. تْشِرْشَحْنَا..
وِهْجَرْنَا.. وِتْعِبْنَا.. وْما ارْتَحْنَا
هَالأَرْض الْعَطْيِتْنَا مارْ شَرْبِلْ
زِعْلانِهْ.. وْكِيفْ بَدَّا تْفَرِّحْنَا
ـ2ـ
تْشِرْشَحْنَا.. تْشِرْشَحْنَا.. تْشِرْشَحْنَا..
لُقْمِتْنَا.. هِرْبَانِه مِنْ صَحْنَا
مِنْهاجِرْ تا نْلاقِي السَّعادِه
يا رَيْتْ مْنِ بْلادِي ما رِحْنا
ـ3ـ
تْشِرْشَحْنَا.. تْشِرْشَحْنَا.. تْشِرْشَحْنَا..
وِنْسِينَا شُو نِحْنَا.. وْمِينْ نِحْنَا
تْيِبَّسْنَا مِنْ قِلِّةْ الِمْرُوِّه
وْيا دِلّ اللِّي بَدُّو يْزَحْزِحْنَا
**
المشهد الرابع
(يدخل فارس وأسعد ونعمان)
فارس:
هَيْهاتْ يَا بُو الزّلُفْ
عَيْنِي يا مُولَيَّا
زَيْتَاتَكْ يا مارْ شَرْبِلْ
نِعْمِه إِلَهِيَّه
(يدخل بغض الناس وكأنهم يركبون السيارة)
فادي:
يا مْعَلِّمْ.. يا خَوَاجَه.. فِيكْ تْدِلّنَا عَ طَرِيقْ تَل النّسُورَا
فارس:
تَلّ النّسُورَا ما إِلْهَا طَرِيقْ.. بَدّكُنْ تْوَقّفوا السِّيَّارة هَوْنْ
وْتِطْلَعوا مَشِي عَ جْرَيْكُنْ..
فادي:
شُو هَـ الْحَكِي يَا خَوَاجَه.. ضَيْعَه عَمْ تِكْتُبْ عَنْهَا الْجَرَايِدْ وعَمْ بِتْخَبِّرْ عَن هَـ الْعَجِيبِه الْـ صَارِتْ فِيهَا وْما إِلْهَا طَرِيقْ..
نعمان:
وْبَدّكُنْ تْطَلّعُوا مَعْكُنْ مَيَّاتْكُنْ وْكَمّ شَمْعَه..
لأَنُّو ما فِيها لا مَيّ وْلا كَهْرَبَا..
نجلا:
يا ماما.. أَنَا بَدِّي إِرْجَعْ عَ الْبَيْت ما بَدِّي كَمِّلْ أَبَداً أَبَداً أَبَداً.. الْعَمَى هَـ الضَّيْعَه بْلُبْنانْ أَمْ بِالأَمازُونْ..
فادي:
شُو بِكِي جْفِلْتِي هَيْك؟.. ما نِحْنَا كَمانْ بِالإِسْم عِنَّا مَيّ.. وِالْكَهْرَبَا بْتِجِي سَاعْتَيْن وِبْتِنِقْطِعْ عَشْرَهْ.. أَللَّـه وَكِيلْكُنْ صِرْنا مِتْل الِبْسَيْناتْ مِنْشُوفْ بِالْعَتِمْ..
حوا:
كِرْمالْ مارْ شَرْبِلْ وَقّف هَـ السِّيَّارَة هَوْن وْخَلِّينَا نِطْلَعْ نْزُورُو..
نجلا:
وِسْكَرْبِينْتِي الْعَالْيِه.. شُو بَدِّي إِعْمِلْ فِيها؟..
يِهْ عْلَيْكُنْ بْيِتْجَلّفُوا كْعابْ إِجْرَيِّي..
أسعد:
قْلَعِيهَا وِامْشِي حِفْيَانِه.. كِل عِمْرُنْ النِّسْوَانْ يِمْشُوا حِفْيانِينْ تا يُوصَلوا عَ الِكْنَايِسْ..
فادي:
مِنْ هَيْك كَانْت تْصِيرْ عَجايِبْ.. مُشْ مِتِلْ هَلَّقْ، الْوِحْدِه مِنُّنْ بِتْكَبِّشْ بِسْكَرْبِينِتَا أَكْتَرْ ما بِتْكَبِّشْ بِإِيمانَا..
الإِيمانْ بْهَـ الإِيّامْ صَارْ صِفِرْ عَ الشّمالْ..
نجلا:
حَضِرْتَكْ مُشْ شَاطِرْ إِلاَّ بِالتِّجْعِيدْ..
فِيكْ تْقِلِّلي قِدَّيْش صَرْلَكْ ما فِتّ عَ الِكْنِيسِه؟..
فادي:
كككككككككم شهر.. ما بْيِحِرْزُوا..
نجلا:
كِم شَهْر أَمْ كِم سِنِه؟
فادي:
مَا هِنِّي الشّهُورْ عَمْ يِرِكْضُوا رَكْض.. وِالسِّنِه خَلْف الْبَابْ.. ما بْتِلْحَق تْطِلّْ تَا يِرْجَعُوا يْقَوْصُولا فِقَّيْعْ.. بُمْ بِشْ بُمْ بِشْ تَعْ دِي
نجلا:
ما قِلْتِلَّكْ.. إِنْت مُشْ شَاطِرْ إِلاَّ بِالتِّجْعِيدْ..
يا عَمِّي هَـ الضَّيْعَه عَالْيِه كْتِيرْ.. طُرْقَاتَا وِعْرَه.. يِمْكِنْ إِفْكُشْ إِجْرِي وْأُوقَعْ فِكّ رَقِبْتِي..
دَخِيلْكُنْ بَلا هَـ الضَّيْعَه.. رُوحُوا تا نِطْلَعْ عَ عِنَّايَا.. هَوْنِيكْ وَسّعُوا الطَّرِيقْ لِمِّنْ إِجَا الْبَابَا.. وْهَيْك مْنِرْضِي مارْ شَرْبِلْ..
حوا:
لا تْزَغِزْغِي إِيمانِكْ يا نجلا.. لْحِقْنَا وْجِينَا.. خَلِّينَا نْشُوفْ الْعَجِيبِه..
نجلا:
فَإِذَنْ.. اتِّصْلُولْكُنْ بْشِي حْمارْ يْرَكِّبْنا عَ ضَهْرُو..
فادي:
يا مْعَلِّمْ.. مَعَكْ نِمْرِةْ تَلِفُونْ حَدَا بْتَلّ النّسُورَا؟
نجلا:
إِذَا ما فِي مَي وْلا كَهْرَبا كِيفْ بَدُّو يْكُونْ فِي تَلِفُونْ..
أسعد:
لا تْخَافُوا.. حَظّكُنْ بْيِفْلُقْ الصَّخْر.. وَاحِدْ بَسّ مَعُو تَلِفُونْ بْتَلّ النّسُورَا.. وْهَيْدِي نِمِرْتُو..
فادي:
وْلِكْ يِعْمُرْ دِينَكْ شُو وِجَّكْ أَبْيَضْ.. اعْطِينِي هَـ النِّمْرَه تَا قِلَّكْ..
اسعد:
قَبِل ما تْدِقّلُو.. عِدّ كمْ وَاحِدْ إِنْتُو.. وْقِلُّو يْوَدِّيلْكُنْ جَوْقِةْ حَمِيرْ يْرَكّبُوكُنْ قَشِّي لَفِّي..
حوا:
بِعِتْقِدْ هَيْدَا أَحْسَنْ حَلّ.. تْطَلَّعْ بِالتَّلِفُونْ إِذَا فِي إِرْسَالْ..
فارس:
كِيفْ ما تْطَلَّعْتوا بْلُبْنانْ ما بِتْشُوفوا إِلاَّ عْوَامِيدْ الإِرْسَالْ..
آخْدِينْ أَعْلَى التَّلاَّتْ تا ما يْفُوتُنْ قِرِشْ وَاحِدْ..
أسعد:
سْمِعْت إِنُّو بِالْمَرِّيخْ رَكّبُوا عَامُودَيْنْ..
وْناسَا عَمْ تِتْنَصَّتْ عَ أَهْل الْمَرِيخْ..
نعمان:
بَدَّكْ بِالأَوَّلْ يِفْهَمُوا لِغِّتُنْ.. قِبْل ما يِتْنَصّتُوا عْلَيْهُنْ..
فارس:
إِذَا نِحْنَا صِرْنا نِفْهَمْ تْشَايْنِيزِي.. خَايِفْ عَ أَمِيرْكا ما تِفْهَمْ مَرِّيخِي..
فادي:
لَقَطْ الْخَطّ.. سْمَعُوا.. أَلُو.. بِحْيَاتَكْ فِينِي إِحْكِي مَعْ شِي دُونْكِي.. أَيْوَه.. أَيْوَه.. دُونْكِي.. حَضِرْتَكْ دُونْكِي.. إِي تْشِرَّفْنَا.. فِيكْ تْوَدِّيلْنا نِصّ دَزِّينِةْ حَمِيرْ؟.. مَعْنَا كِمّ مَرَا سْكَرْبِينَاتُنْ عَالْيِه وْبَدُّنْ يِرْكَبُوا عْلَيْهُنْ.. شُو عَمْ بِتْقُولْ: مَا فِي إِلاَّ دُونْكِي وَاحِدْ بِالضَّيْعَه.. يا عَمِّي شُو هَـ ضَّيْعَه الْما فِيهَا إِلاَّ حْمارْ وَاحِدْ وْتَلِفُونْ وَاحِدْ..
أسعد
يا إِسْتَاذْ.. نْسِيتْ قِلَّكْ إِنُّو الزَّلْمِي الْـ عمْ تِحْكِي مَعُو إِسْمُو دُونْغِي.. إِمُّو وْبَيُّو كانُوا بْرُوسِيَّا قَبِلْ ما تِفْرُطْ..
فارس:
سْأَلُو كِمّ مَرَّه فِيه يِطْلَعْ وْيِنْزِلْ هَـ الحْمارْ..
بَرْكِي بْتِركْبُوا بِالتِّقْسِيطْ..
فادي:
أَلُو مِسْتِرْ دُونْغِي.. حْمارَكْ شَبّ أَمّ خِتْيَارْ؟.. قَصْدِي كِمّ مَرَّه فِيهْ يِطْلَعْ وْيِنْزِلْ؟.. عَشِرْ مَرَّاتْ؟.. عَظِيمْ.. عَظِيمْ.. انْحَلِّت الْمِشكْلِه.. حْمارْ وَاحِدْ بِيكَفِّي.. بْعَتُو أَلَّلـه يْوَفّقَكْ..
نِحْنَا بْإِنْتِظَارُو حَدّ جُمّ الْبِلاّنْ..
نجلا:
لَبَيْنَمَا يِجِي الِحْمارْ.. أَنا بَدِّي آكُلْ.. قَلْبِي لَخّ مِنْ كِتْر الْجُوعْ..
حوا:
مْنِيحْ اللِّي جِبْنَا زُوَّادِتْنَا مَعْنَا..
كِنَّا وْقَعْنَا عَنْ ضَهْر الِحْمارْ وِتْدِرْكَبْنَا بْشِي وَادِي.
نجلا:
يا عَمِّي أَنا بْحَيَاتِي مُشْ رَاكْبِي عَ حْمارْ..
أَللَّه يْخَلِّيكُنْ حَدَا يْعَلِّمْنِي كِيفْ بْيِرْكَبُوا عَ الْحَمِيرْ..
أسعد:
أَوِّلْ شِي بَدِّكْ دَفْتَرْ سْوَاقَه.. مَعِكْ دَفْتَرْ سْوَاقَه؟
نجلا:
أَكِيدْ مَعِي دَفْتَرْ.. هاتْ ناوِلْنِي هَـ الدَّفْتَرْ مْنِ السِّيارَه..
أسعد:
شُو هَيْدَا؟!.. دَفْتَرْ كَتِيبِي؟!
نجلا:
خَطّ خَطِّينْ.. بَعْدُو جْدِيدْ.. مْبارِحْ اشْتَرَيْتُو لإِبْنِي..
يِقْبِرْنِي شُو خَطُّو حِلُو..
أسعد:
بَدِّكْ "لايْسِنْ" سْوَاقَه.. مُشْ دَفْتَرْ خَطّ خَطَّيْنْ..
أَنا مِتْأَسَّفْ ما فِيكِي تْسُوقِي الِحْمارْ..
نجلا:
كِنْت عَمْ إِمْزَحْ مَعَكْ يا زَلْمِي.. مَعِي تْلاتِه.. وَاحِدْ عَ إِسْمِي.. وْواحِدْ عَ إِسِمْ إِمِّي.. وْواحِدْ عَ إِسِمْ سِتِّي..
أَللَّـه يِرْحَمْ تْرَابَا شُو كانِتْ تِشْبَهْنِي..
أسعد:
تْلاتِه دَفْعَه وِحْدِه.. شُو بَدِّكْ فِيهُنْ كِلُّنْ؟
نجلا:
مِتِلْ ما زَوْجِي بْيَعْرِفْ.. أَنَا بْسُوقْ دَحِشْ وْطَحِشْ.. وْكِلّ ما إِخْسَرْ "لايْسِنْ" بْسُوقْ بِالتَّانِي.. ما فِي يَوْم تْعِطَّلْت..
(يتدخّل زوجها فادي)
فادي:
إِذَا بْتِخْسَرِي "الْلايْسِنْ" إِنْتِي وْعَمْ بِتْسُوقِي الِحْمارْ..
بِيرُوحُوا التّلاتِه دَفْعَه وِحْدِه..
نجلا:
لَيْش بَقَى يَا إبنْ إمّكْ؟
فادي:
لأَنُّو بِيسَمُّوهَا حَمْرَنِه.. وِالْحَمْرَنِه مَمْنُوعَه بْهَـ الْبَلَدْ.. فْهِمْتِي
نجلا:
خَلِّيهُنْ يْعَلّمُونِي كِيفْ بْيِرْكَبُوا عَ الِحْمارْ وإِنْتَ ما عْلَيْك..
أسعد:
بَسّ تِطْلَعِي عَ ضَهْرُو كَبّشِي بْرَقِبْتُو
وْلا تِفِلْتِيهَا تَا يْقِلِّكْ حَــــــــــا..
نجلا:
ـ وْبَرْكِي ما قَلِّلي حَــــــــا؟!
أسعد:
أَنَا بْشَهْنِقْ عَنُّو لا تْخافِي.. حا حا حا
نجلا:
تَعَا تا نِتْمَرَّنْ شْوَيّ أَللَّـه يْخَلِّيكْ.. حْسِبْنِي هَلَّقْ عَ ضَهِرْ الِحْمارْ.. يا ماما شُو عالي هَـ الِحْمارْ.. تَعَا دِي.. هَاشْ..
شُو بَاكْ مُشْ عَمْ بِتْقُول: حَــــــا؟
أسعد:
الطَّرِيقْ بَعْدَا طَوِيلِه.. مَا تِنِزْلِي تا أَنَا قِلِّكْ..
نجلا:
يِرْحَمْ مَوْتاكْ قُول: حَـــــا.. رَحْ يِرْمِينِي الِحْمارْ بِالْوَادِي..
أسعد:
مِنْ كِلّ عَقْلِكْ عَمْ تِحْكِي..
نجلا:
إِي مَنَّكْ شَايْفُو مْشَوَّحْ عَ فَرْد مَيْل.. أَللَّـه يْخَلِّيكْ قُولْ: حَـــا.. أَنا فِزْعانِه..
أسعد:
هَلَّقْ إِنْتِي صِدَّقْتِي إِنِّكْ رَاكْبِه عَ حْمارْ..
نجلا:
إِذَا ما بِتْقُولْ: حَــــــا بَدِّي نِطّ عَنْ ضَهْرُو..
أسعد:
إِذَا بْقُولْ: حَــــــا بْيِسْرَعْ أَكْتَرْ.. لازِمْ قِلُّو: هَاشْ.. إِي هاش هاش هاش.. مَبْسُوطَه هَلَّقْ؟
نجلا:
يا مَامَا شُو رِكِبْتُو صَعْبِه.. إِي وَاللَّـه لَوْ ما تْقُولْ هاشْ..
كِنْت صِرْت مِيةْ شَقْفِه..
فادي:
إِي نْطِرِي تَا يُوصَل الِحْمارْ الْحَقِيقِي.. تا شُوف شُو بَدِّك تِعِمْلِي؟
نجلا:
إِذَا كانْ مِتلْ هَيْدَا.. ما تِحِسْبُوا حْسَابِي.. بِطْلَعْ مَشِي..
وْيِقْطَعْ الْحَمِيرْ انْشَاللَّـه..
(يدخل بعض الرجال وهم يحملون رجلاً مريضاً)
سالم:
حْمِلْنَا الْمَرِيضْ وْجِينَا
بْقُوِّةْ يَسُوعْ فَادِينَا
يا مارْ شَرْبِلْ خَلِّي الزَّيْتْ
يِشْفِي النَّاسْ وْيِشْفِينَا
أَللَّه مَعْكُنْ يا جَماعَه.. فِيكُنْ تْدِلُّونَا عَ تَلّ النّسُورَا..
نجلا:
بْتِسْمَعْ مِنِّي.. قْعُودْ نْطُورْ تا يُوصَل الِحْمارْ..
سالم:
ما فِينَا نِنْطُرْ أَبَداً.. مِتِلْ ما شَايْفِينْ مَعْنَا شَخْص مَرِيضْ كْتِيرْ ما بْيِقْدِرْ يِمْشِي.. وْبَدّنا نْبَوّسُو صُورِةْ مارْ شَرْبِلْ.. بَرْكِي بْيِعْمِلْ مَعُو عَجِيبِه..
نجلا:
يَا عَمِّي شُو حَظّْنَا مَنْحُوسْ.. قَبْل ما نْشُوفْ الِغْبَارْ طَارْ الِحْمارْ.. هَلَّقْ بِيرَكّبُو هَـ الرجَّالْ الْمَرِيضْ عْلَيْه وْنِحْنَا مْنِطْلَعْ مَشِي..
حوا:
إَنَا مِسِتْعِدِّه إِتْنازَلُّو عَنْ دَوْرِي.. هَيْئْتُو مَرِيضْ كْتِيرْ..
فادي:
يا عَمِّي هَـ الزَّلْمِي لازِمْلُو آمْبِيلُونْسْ تِحِمْلُو مُشْ حْمارْ..
سالم:
كِنَّا جِبْناهْ بِالآمْبِيلُونْسْ.. بَسّ قَالُولْنا إِنُّو ما بْتُوصَلْْ عَ تَلّ النّسُورَا
نجلا:
أَفْضَلْ شِي تِنِطْرُوا الِحْمارْ مِتِلْ ما نِحْنا ناطْرِينْ
سالم:
مُشْ رَحْ نِنْطُرْ لا حْمارْ وْلا كْدِيشْ.. مِسِتْعِدِّينْ نِحِمْلُو عَ كْتافْنَا تَا نْوَصّلُو لْعِنْد الصُّورَه.. قُولُوا يا رَبّ..
فادي:
هَـ الْجَماعَه إِيمانُنْ قَوِي.. مُشْ مِتِلْنَا نِحْنَا.. هَيْدِي سْكَرْبِينِتْهَا عَالْيِه.. هَيْدِي ما بْتَعْرِف تِرْكُبْ عَ الِحْمارْ.. وْهَيْدِي بْيِتْجَلّفُوا كْعابْ إِجْرَيْها.. أُفْ مِلاَّ آخْرَه..
(يدخل رجل معه بقرة مصنوعة من الكرتون ومرقطة باللونين الأبيض والأسود)
رستم:
يا مارْ شَرْبِل جِبْنالَكْ
قْلُوبْ بْتِطْفَحْ بِالإِيمانْ
وْأَجْمَلْ وَرْد قْطَفْنالَكْ
تا تِحْمِي أَرْزِةْ لُبْنانْ
حَضْرِتْكُنْ مِنْ تَلّ النّسُورَا؟
حوا:
لأْ.. نِحْنَا مِنْ بَيْرُوتْ.. قْرِينَا بِالْجَرِيدِه إِنُّو صَارِتْ عَجِيبِه هَوْنْ وْجايِينْ تَا نْشُوفَا..
نجلا:
(تدور حول البقرة متعجّبة)
يا مَامَا شُو عَالِي هَـ الِحْمارْ.. فِينِي إِرْكُبْ عْلَيْه..
رستم:
هَيْدَا مُشْ حْمارْ يا مَدامْ.. هَيْدِي بَقْرَه..
وَلَوْ.. ما بْتَعِرْفِي تْمَيّزِي بَينْ الِحْمارْ وِالْبَقْرَه؟!
نجلا:
عَن بْعِيدْ شِفْتَا حْمارْ..
رستم:
وْعَنْ قَرِيبْ؟!
نجلا:
كَمانْ شِفْتَا حْمارْ..
رستم:
إِنْتِي شَايْفِه حْمارْ شِي مَرَّه؟
نجلا:
لأْ.. بَسّ بَعْرِفْ عِنْدُو دِينَيْن طْوالْ.. لأَنّ الْماما كانِتْ تْقُول لِلْبَابَا: دِينَيْكْ طْوالْ مِتِلْ دِينَيْن الِحْمارْ..
رستم:
إِذَا مُشْ شَايْفِه حْمارْ مْأَكَّدْ شَايْفِه بَقْرَه..
نجلا:
لِمِّنْ بْرُوحْ عَ السُّوبّر مارْكِتْ بْشُوف عَ عِلْبِةْ الْجِبْنِه بَقْرَه غَاشْيِه مْن الضِّحِك.. إِسْما الْبَقَرَه الضَّاحِكَه..
رستم:
وْمَعْ هَيْدَا وْكِلُّو شِفْتِي الْبَقْرَه.. قِمْتِي فِكَّرْتِيها حْمارْ
نجلا:
لازِمْ الْبَقْرَه تِضْحَكْ تا شُوفَا بَقْرَه.. وَإِلاَّ بْشُوفَا حْمارْ..
حوا:
بِتْرَكّبنا عَ ضَهْر الْبَقْرَه تا نِطْلَعْ عَ تَلّ النّسُورَا..
وْخود قَدّ ما بَدّك مَصَارِي..
رستم:
خْلِصْت مِنْ مَرَا خَوْتا وْقَعت بْوِحْدِه أَخْوَتْ مِنْهَا..
حَدَا بْيِرْكُبْ عَ ضَهْر الْبَقْرَه إِلاَّ الأَخْوِتْ..
نجلا:
لا السيَّارَاتْ بْتِطْلَعْ عَ الضَّيْعَه.. وْلا الِحْمارْ بْيِنْزِلْ منِ الضَّيْعَه.. وْلا الْبَقْرَه بِتْرَكِّبْنَا عَ ضَهْرَا.. حَدَا يْقِلِّي شُو الْحَلّ؟
فادي:
الْحَلّ إِنُّو نِطْلَعْ ماشْيِينْ مِتِلْ ما عَمْ يِطْلَعُوا هَـ النَّاسْ..
نِحْنَا مُشْ أَحْسَنْ مِنْ غَيرْنَا..
أَنَا طَالِعْ مَشِي وِالْبَدُّو يِلْحَقْنِي يِتْفَضَّلّ..
يا مارْ شَرْبِلْ سَاعِدْنَا
وْعَنْ حُبَّكْ لا تْبَعِّدْنا
نِحْنَا مْنُؤْمِن فِيكْ كْتِيرْ
جَمِّعْنَا وْلا تْشَرِّدْنا
**
المشهد الخامس
(تدخل نجيبة وهي تبكي وتتكي على عكازتها)
لبيبة:
قَبْل الْعَجِيبِه حِبَّيْتَكْ
وْبَعْد الْعَجِيبِه حِبَّيْتَكْ
ما بَدِّي مِنَّكْ عَجايِبْ
بِـ قَلْبِي رَحْ عَمِّرْ بَيْتَكْ
يا مارْ شَرْبِلْ قَلْبِي دَايِبْ
شَمْعات الإِيمانْ هْدَيْتَكْ
رَجِّعْلِي وَحِيدِي الْغَايِبْ
ضَهْرِي انْحَنَى وْشَعْرِي شَايِبْ
عْطِينِي إِبْنِي.. عُمْرِي عْطَيْتَكْ
نجيبة:
شُو بِكِي يَا إِمّ شَرْبِلْْ.. مْبَيّنْ عَمْ تِبْكِي.. قُولِيلِي إِذَا حَدَا مْزَعّلِكْ؟
لبيبة:
مارْ شَرْبِلْ مْزَعَّلْنِي كْتِيرْ.. صَرْلُو إِبْنِي عِشْرِينْ سِنِه غَايِبْ وْما كانْ يَعْرِفْ يْرِدِّلِي ياهْ..
نجيبة:
يِمْكِنْ مُشْ عَمْ بِتْصَلِّي مْنِيحْ.. مَسِيحْنا قَالْ: إِقْرَعُوا يُفْتَحْ لَكُمْ..
لبيبة:
بِرْيُوا ضْلُوعْ صِدْرِي مِنْ كِتْر الدَّقْ..
مارْ شَرْبِلْ مُشْ نَاوِي يِفْرِجْنِي بْآخِرْتِي..
نجيبة:
مَعْقُولْْ تِظْبُط مَعِكْ هَالْمَرَّه.. مارْ شَرْبِلْ عِمِلْ عَجِيبِه بْضَيْعِتْنَا..
وْمِينْ بْيَعْرِفْ.. يِمْكِنْ يْصِيرُوا تْنَيْنْ؟!..
لبيبة:
بْحَقّ سْرَاجَكْ الِمْقَدَّسْ رَجِّعْلِي سْمِيَّكْ يا مارْ شَرْبِلْ.. هَيْدِي آخِرْ مَرَّه بِحْكِي مَعَكْ.. بَدِّي شُوفْ إِبْنِي قَبِلْ ما مُوتْ..
سِمَّيْتُو عَ إِسْمَكْ تا تِتْشَفَّعْ فِينَا..
(ما أن تكمل عبارتها حتى يدخل ابنها شربل)
نجيبة:
عَجِيبِه يا ناسْ.. مارْ شَرْبِلْ رَجَّعْ شَرْبِلْ..
شُوفِي يا إِمّ شَرْبِلْ.. شُو وَدَّالِكْ مارْ شَرْبِلْ..
شربل:
إِمِّي.. إِمِّي.. أَنا إِبْنِكْ شَرْبِلْْ..
لبيبة:
(تتطلع بابنها وكأنها تحلم)
يَا رَيْتْ الْحُلْم بِيصِيرْ حَقِيقَه يا مارْ شَرْبِلْ..
شربل:
هَيْدَا مُشْ حُلْم يا إِمِّي.. فِيقِي.. أَنا شَرْبِلْْ، مارْ شَرْبِل رَجَّعْنِي عَ بْلادِي تا عِيشْ الْعُمْر حَدِّكْ..
لبيبة:
إِبْنِي شَرْبِلْْ.. حَبِيبِي شَرْبِلْْ.. رُوحِي شَرْبِلْْ.. أَيْمَتَى جِيتْ يا مَامَا؟!
شربل:
صَرْلِي نِصّ سَاعَه مُشْ أَكْتَرْ.. مْرَقْت عَ الْبَيْت..
قَللي بَيّي المختار إِنِّكْ بِالسَّاحَه..
لبيبة:
تِقْبِرْنِي رَيْتَكْ.. هَلَّقْ بِتْكُونْ جُوعانْ مِنْ كِتْر السَّفَرْ..
عَامْلِي صَحْن مْجَدّرَه بَدَّكْ تاكُلْ صَابِيعَكْ وَرَاهْ..
شربل:
كِلّ عُمْرِكْ أَكْلاتِكْ طَيّبِينْ.. أَنَا سَابْقِكْ عَ الْبَيْت لا تِتْأَخّرِي..
لبيبة:
خَلِّيكْ حَدِّي تا عَكِّزْ عْلَيْكْ.. مْنِ الْيَوْم وْرَايِحْ رَحْ بِتْصِيرْ عِكَّازْتِي..
شربل:
بْإِذِنْ أَللَّـه يا إِمِي بْإِذِنْ أَللَّـه..
نجيبة:
(تتطلّع نحو السماء وتهمس)
يا مار شربل.. عملَّكْ عَجِيبِه معي.. خَلِّي شَرْبِل يِتْجَوَّزْني..
لبيبة:
عْمِلْتَا مَعِي يا مارْ شَرْبِلْ.. هَيْئْتَكْ ما بِتْحِبّ الْمَزِحْ.. مَعْقُولْ أَنا إِزْعَلْ مِنَّكْ.. ما أَنا عِنْدِي شَرِبْلَيْنْ بْشُوفُنْ قَدّ الدِّنِي: شَرْبِل الْقَدِّيسْ وْشَرْبِلْ إِبْنِي.. بِشِكْرَكْ يا مارْ شَرْبِلْ..
وْهَيْدِي تانِي عَجِيبِه بِتْصِير بْضَيْعِتْنا..
شربل:
وْكِرْمال هَالْعَجِيبِه الْجَمْعِتْنا يا إِمِّي، رَح إِتْبَرَّعْ بِمَدّ الْكَهْرَبَا عَ الضَّيْعَه.. أَللَّـه عَطَانِي كْتِيرْ.. وْلازِمْ إِعْطِي تَلّ النّسُورَا..
لبيبة:
رْجِعْت غَنِي يا تِقْبِرْنِي.. بَيَّك مُختارْ وما معو قرش..
شربل:
غَنِي كْبِيرْ يَا إِمِّي.. رْبِحْت مَلْيُون دُولارْ بْاللُّوتُو..
نجيبة:
(تتطلع نحو السماء مرة ثانية وتهمس)
سْمِعِتْني شُو عَمْ قِلَّكْ؟ إِيَّاكْ تِتِرْكُو يْرُوحْ لْغَيْرِي أَنا شِفْتُو بالأَوِّلْ..
لبيبة:
شُو هَيْدَا اللُّوتُو يا إِمِّي.. مُشْ عَمْ إِفْهَمْ عْلَيْكْ..
شربل:
هَيْدَا إِسِمْ يَانَصِيبْ بِأُسْترَالْيَا.. جِرَّبِتْ حَظِّي فِيهْ وِرْبِحْت..
وْلَوْ ما إِرْبَحْ ما شِفْتِي وِجِّي أَبَداً..
لبيبة:
لْهَالدَّرْجِه قَلْبَكْ قَاسِي عْلَيِّي..
شربل:
وَاحِدْنا يا إِمِّي ما بيصَدِّقْ يِتْرُكْ بْلادُو.. وْبَسّ يِتْرِكَا بِيلاقِي الْغِرْبِه كِذْبِه كْبِيرِه.. ما بِيعُودْ يَعْرِفْ كِيفْ بَدُّو يِتْخَلَّصْ مِنْهَا..
لبيبة:
وْإِنْت يا تِقْبِرْنِي تْخِلَّصْت مِنْ هَالْكِذْبِه؟
شربل:
إِجانِي مار شَرْبِل بِالْمَنامْ وْقَلِّي خُودْ وَرْقِةْ لُوتُو وِرْجاعْ لْعِنْد إِمَّكْ.. وْوَشْوَشْنِي سِتّ أَرْقَامْ بِالْعَدِيِّه.. رَبّحُونِي مَلْيُون دُولار..
لبيبة:
إذا عرِفْ بَيَّك بْهَالْمِصْرِيَّاتْ ما بِيعُود يِرْضَى بِالْمَخِتْرِيِّه
بيصير بَدُّو النّيابِه
شربل:
مصْرِيَّاتِي لِلْخَيْر مُشْ لِلْوَجاهَه
لبيبة:
أَللَّـه يِرْضَى عْلَيْك لا تِنْسَى الِكْنِيسِه وِالنَّاس الْفُقَرَا..
شربل:
مِنْ بُكْرَا بْجِيبْ عُمَّالْ يْمِدُّوا الْكَهْرَبَا عَ الضَّيْعَه.. مُشْ رَحْ خَلِّي بَيْت مْعَتَّمْ.. وْرَحْ إِعْطِي لَكِلّ عَيْلِه أَلفْ دُولار..
مَبْسُوطَه يا إِمّ شَرْبِلْ؟
لبيبة:
هاتْ إِيدَكْ هاتْ يا إِبْنِي.. مْنِ الْيَوْم وْرَايِحْ رَحْ زِتّْْ هَالْعِكَّازِه..
(تركض نجيبة لمساعدتها أيضاً)
بِشِكْرَكْ يا مارْ شَرْبِلْ.. بِشِكْرَكْ يا مارْ شَرْبِلْ..
بِشِكْرَكْ يا مارْ شَرْبِلْ..
(يدخل يوسف وأمه)
يوسف:
شو.. شربل رِجِعْ.. يا أهلا.. يا أهلا..
شربل:
يا أهلا فيك يا إبن خالتي.. كيفك يا خالتي أم يوسف؟
أم يوسف:
أنا منيحة.. بَسّ تكون أختي لبيبة منيحة.. هاتْ عْطِيني بَوسِه..
يوسف:
مارْ شَرْبِلْ عِمِلْ عَجِيبِه بَدَّا تْهِزّ الْكَوْن.. رِجَّالْ مَرِيضْ وِصِلْ عَ ضَيْعِتْنا، باسْ الصُّورَه وْقَامْ يِرْكُضْ مِتْل السَّبْع..
شَوْكِه وِانْقَلْعِتْ مِنُّو..
نجيبة:
الرِّجَّالْ الْعَمْ تِحْكِي عَنُّو طِلِعْ غَنِي كْبِيرْ.. تْبَرَّعْ يْمِدّ مَيّ عَ الضَّيْعَه مْنِ الْعَيْن التِّحْتانِيِّه..
لبيبة:
بَسّ هَيْدَا مَشْرُوعْ بِيكَلِّفْ كْتِيرْ.. الدَّوْلِه ما قِدْرِتْ تْقُومْ فِيهْ..
أم يوسف:
كِيفْ بَدّا تْقُومْ فِيهْ.. وْهِيِّي مُشْ عَمْ تِقْدِرْ تْقُومْ..
دَوْلِتْنا نَايْمِه مِتْل الْفِدَّان اللِّي مْتَقَّلْ شْعِيرْ..
وْبِالْعَلامِه.. تْشِنْخَرَا وَاصِل لْهَوْن..
يوسف:
لا تِتْأَمّلُوا كْتِيرْ بْهَيْك مْشَارِيعْ خَيْرِيِّه.. وَاحِدْنا بَسّ يِشْفَى مِنْ مَرَضُو بْيِنْسَى شُو حِكِي هُوِّي وْمَرِيضْ..
نجيبة:
أَللَّـه يْسَامْحَكْ.. مِنْ رِبْع سَاعَه كِنْت عَ الْعَيْن التّحْتانِيِّه.. وْشِفْت خَمِسْ شَغِّيلِه عَمْ يِحِفْرُوا قَنَايِه وِيْمِدُّوا قْسَاطِلْ..
يوسف:
الظَّاهِرْ أَخُونَا ما بْيِمْزَحْ.. نَدَرْ نِدِرْ وْبَدُّو يْنَفّذُو عَ الْحَارِكْ..
أم يوسف:
عِدُّوا سَبِعْتِيَّامْ عَ الِكْتِيرْ وْبِتْشُوفُوا الْمَيّ بْسَاحْة الضَّيْعَه..
لبيبة:
مُشْ بَسّ الْمَيّ.. الْكَهْرَبا كَمانْ يا أختي.. شَرْبِل إِبِنْي، رَيْتُو يِقْبرْني، رِجِعْ غَنِي كْبِيرْ وِتْبَرَّعْ يْمِدّ الْكَهْرَبَا عَ الضَّيْعَه..
مَعْ أَلْف دُولار لْكِلّ عَيْلِه..
مارْ شَرْبِلْ عِمِلْ مَعُو عَجِيبِه ما بْتِتْصَدَّقْ.. شَلَحْلُو بْجَيْبْتُو مَلْيُونْ دُولارْ وْقَلُّو رْجاعْ لْعِنْد إِمَّكْ..
أم يوسف:
الْخالِه لازمْ يِطْلَعْلا أَكْتَر مِنْ أَلْفْ دولار.. ما هَيْك يا أختي؟
لبيبة:
أكيد.. أكيد.. وحبّة مسك كمان..
أم يوسف:
كَتِّرْ خَيْرَكْ يَا مارْ شَرْبِل.. بَلّشِتْ عْجَايْبَكْ تْزَهِّرْ بِضَيْعِتْنَا..
وتِسْقِي عْيَالْنَا.. وِتْنَوِّرْ بْيُوتْنا..
يوسف:
أَلْيَوْمَ ماءٌ وَغَداً كَهْرَباءٌ.. وْعَقْبال الطَّرِيقْ انْشَاللَّـه..
نجيبة:
الطَّرِيقْ شَغْلِه صَعْبِه.. بَدَّا حْكُومِه.. مُشْ كَمْ عَامُودْ وْقَسْطَلْ مَيّ..
شربل:
شُو بِهُنْ هَالِمْصَوّرِينْ.. نَازْلِينْ التّصْوِيرْ فِينَا.. مْأَكَّدْ لَقْيُونَا فِرْجِه؟
يوسف:
أَكْتَرْ مِنْ عِشْرِينْ وَكالِه إِعْلامِيِّه وِصْلِتْ عَ الضَّيْعَه..
وْما عِدْنا نَعْرِفْ بْأَيَّا لُغَّه بَدّنا نِحْكِي..
كَمانْ وَصْلِتْ لِجْنِه مْنِ رُوما تا تِفْحَصْ الزَّيْتْ..
انْشَاللَّه خَيْر يا جَماعَه..
أم يوسف:
أَكِيدْ انْشَاللَّـه خَيْرْ.. وَإِلاَّ تْسَوَّدْ وِجّْنَا وْما عادْ إِلْنَا قَايْمِه تْقُومْ..
يوسف:
مْبَارِح.. إِجَانِي صُحُفِي بْيِحْكِي صِينِي..
شربل:
قَصْدَكْ تْشَايْنِيزِي..
يوسف:
عَمْ قِلَّكْ صِينِي.. بِتْقِلِّي تْشَايْنِيزِي..
شربل:
يا ذَكِِي عَصْرَكْ.. كِلْمِةْ صِينِي بِالإِنْكلِيزِي مِعْناتَا تْشَايْنِيزِي..
يوسف:
يا خَيِّي ما بَدِّي أَعْرِفْ شُو مِعْناتَا بِالإِنْكلِيزِي.. إِلَكْ مَعِي شِي.. بَدّكْ مِنِّي شِي.. خَلِّينِي كَفِّي حَدِيثِي..
لبيبة:
بعدك بِتْحِل بارِدْ يا إبْنِي؟ تْرِكُو يْكَفِّي حَدِيثُو..
هاتْ خَبِّرْنا شُو قَلَّكْ هَالصِّينِي..
يوسف:
قَلِّي بْلّغْتُو طَبْعاً: شِيكا تُوما هَنَا تُوما.. شِيكا تُوما هَنَا تُوما.. شِيكا تُوما هَنَا تُوما.. وْقَدّ مَنِّي ذَكِي رَاجَعِتْ هَالجُّمْلِه عَ الْهَدَا : شِيكا.... تُوما.... هَنَا.... تُوما.. وِصْرَخْت: هَيْدَا إِبِنْ عمتي.. تُوما حَنَّا تُوما إِبِنْ عمتي.. وْلَوْ ما يْكُونُوا عْيُونُو شَقّ كِنْت عْرِفْتُو مْنِ خْدُودُو.. مْرَفّخِينْ مِتْل خْدُود ستّي..
نجيبة:
لَيْش عمتك تْزَوّجِتْ وَاحِدْ صِينِي؟..
يوسف:
قِصَّه طَوِيلِه كْتِيرْ.. الْماما بْتَعْرِفَا أَكْتَرْ مِنِّي..
نجيبة:
هَاتِي.. حْكِيلْنا يَا أُم يوسف..
أم يوسف:
خَولَه الْمِسْكِينِه
نِزْلِتْ عَ الِمْدِينِه
شَافَا وَاحِدْ صِينِي..
قَلْلاَّ: بْتاخْدِينِي
قَالِتْ: لا تْحاكِينِي
حَكْيَكْ مَنُّو حَكْيِي
وْدينَكْ مَنُّو دِينِي
ـ2ـ
وْتا حَتَّى يْرَاضِيهَا
قَدّ ما انْغَرَمْ فِيها
صَارْ يِحْكِي لُغِّتْها
وِالدَّهَبْ يِهْدِيهَا
وْخَوْلَه مِنْ طِيبِتْهَا
غَنِّتْلُو: آوِيهَا
لبيبة:
(تغمر ابنها شربل)
آوِيها الإبِنْ بِالضَّيْعَه مَحَلُّو
تا يِنْسَى الأَرْض وِالأَرْزِه ما حَلُّو
وْإِذَا الْغِيَّابْ بِبْيُوتُنْ ما حَلُّوا
بْيِسْكُنْ أَرِضْنا طَيْر الْغُرَابْ
نجيبة:
أَنا وْمَارْقَه بْسَاحْة الضَّيْعَه مِشِي حَدِّي صُحُفِي إِلْمانِي.. وْصَارْ يِسْأَلْنِي.. وْأَنا هِزِّلُو بْرَاسِي.. تا وِصَّلْتُو لْعِنْد الصُّورَه..
يوسف:
مَظْبُوطْ.. مَظْبُوطْ.. أَنَا شِفْتِكْ مَاشْيِه مَعُو.. رَاسُو قَدّ الْبَطِّيخَه وِشْوَارْبُو مِتْل شْوَارِب هِتْلِرْ..
نجيبة:
هَوْنِيكْ عِنْد الصُّورَه.. تْطِلَّعْت بْمارْ شَرْبِلْ تِطْلَيعَه غَيْر شِكِلْ وِغْمَزْتُو عْلَيْه..
يوسف:
انْشَاللَّـه يْكُونْ مارْ شَرْبِلْ فِهِمْ عَ شُو غْمَزْتِيهْ؟
نجيبة:
وِحْيَاتكْ.. إِخِدْهَا عَ الطَّايِرْ.. ما لْقَيْتُو إِلاَّ بَرَمْلِي رَاسْ هَالإِلْمانِي صَوْبِي.. وْما عادْ يْقِيمْ عْيُونُو مِنِّي..
أم يوسف:
وْبَعْدِينْ شُو عادْ صَارْ؟.. عَجّلِي حْكِي..
نجيبة:
تْطَلَّعْ فِيِّي وْقَلِّي: إِخْ لِي بِي دِيخْ..
شربل:
شُو قَلِّكْ.. إِخْ لِي بِي دِيخْ؟..
نجيبة:
إِيْ.. إِيْ.. هَيْك قَلِّي.. بْتَعْرِفْ شُو مِعْناتَا؟
شربل:
عَمْ بِيقِلِّكْ بِالإِلْمانِي: أَنا بْحِبِّكْ..
نجيبة:
ما حَرامْ وِحْدِه حلْوِه مِتْلِي تْرُوح عَ إِلْمانْيَا يا شربِلْ؟
شربل:
الدِّنِي قِسْمِه وْنَصِيبْ
نجيبة:
يا مَجْدُوبِه يا نجيبه.. تا رُوحْ فَتِّشْ عْلَيْه قِبِلْ ما تِلِطْشُو وِحْدِه غَيْرِي.. إِخْ لِي بِي دِيخْ رُودُولفْ.. رُورُو.. رُورُو.. وَيْنَكْ.. أَنا كَمانْ إِخْ لِي بِي دِيخْ..
لبيبة:
إِذَا بِيضَلُّوا يْقُولُوا: إِخْ لِي بِي دِيخْ وْآيْ لافْ يُو وجِي تامْ..
مُشْ رَحْ تْضَلّ بِنْت بْضَيْعِتْنا..
أم يوسف:
عَ قْبَالْ بْناتِي انْشَاللَّـه..
عِنْدِي أَرْبَعْ بْناتْ مْشَلّشِينْ بِالضَّيْعَه مِتِلْ شَجَرْ السّنْدِِيانْ،
إِيْ أَللَّـه وَكِيلْكُنْ شَمْشُومْ وْطَنْتِنْتُو ما فِيهْ يِقْبَعُنْ..
شربل:
بَدِّكْ يا خالتي تْنَيْنْ إِخْ لِي بِي دِيخْ، وِتْنَيْن ْآيْ لافْ يُو..
بِيشيلُوهُنْ مِنْ كَعْبُنْ..
أم يوسف:
إِذَا كانْ هَيْكْ.. هَنُّونِي.. طَارُوا بْناتِي..
إِتْغَنّدَرِي يا حِلْوَه يا زِينَه، يا وَرْدَه حِلْوَه فِي جْنِينَه..
نجيبة:
(تدخل مسرعة)
وَيْنَكْ يا رُورُو.. إِخْ لِي بي دِيخْ
صحفي:
do you speak English?
نجيبة:
شُو عَمْ بِيقُولْ هَيْدَا؟!
شربل:
عَمْ يِسْأَلِكْ إِذَا بْتِحْكِي إِنْكلِيزِي..
نجيبة:
Ya..ya.. me Najibi.. you know Najibi.. best girl Najibi.. go ask bouna hanna
شربل:
لَيْش عَمْ بِتْوَدِّيهْ لْعِنْد بُونا حَنَّا؟.. صُحُفِي وْعَمْ يِسْأَلِكْ كِمْ سُؤَالْ.. قَدّ ما بْتَعِرْفِي جَاوْبِي..
نجيبة:
الْخُورِي حَنَّا بْيَعْرِف عَنِّي كِلْ شِي.. أَنا بِعِتْرِفْلُو كِل يَوْم سَبِتْ..
صحفي:
Nice meeting you Najibi.. can you tell us something about this miracle please?
نجيبة:
هَلَّقْ بِطَّلْت إِفْهَمْ.. عَجِّلْ تَرْجِمْلِي.. هَيْئْتُو أُسْتْرَالِي.. وْمَعُو فِيزَا..
صحفي:
What is your opinion about this miracle?
شربل:
عَمْ بِيقِلِّكْ: حْكِيلِي شْوَيّ عَنْ هَالْعَجِيبِه الْصَارِتْ بِالضَّيْعَه،
وْقُولِيلي شُو رَأْيِكْ فِيهَا..
نجيبة:
Miracle good..very good..sent me two men..husband for me.. me said no..no.. no..me love Australian..like you..
صحفي:
Thank you very much Najibi..
نجيبة:
Me.. good wife.. go..go..go ask bouna hanna.. me no mistake.. best girl.. chicken eat my food..
صحفي:
Now.. tell me about the miracle please..
نجيبة:
ـ Me love Australia.. Australia good.. you good too.. you no problem.. me no problem.. go ask bouna hanna
صحفي:
What about the miracle Najibi?
نجيبة:
You know my name.. good.. come meet mother.. mother cook kebbi.. falafil.. homous..
صحفي:
ـ فَرِحْتِكْ انْشَاللَّـه..
نجيبة:
What.. you speak libnani?
صحفي:
ما أَنا لُبْنانِي مِتْلِكْ.. بَسّ بِشْتِغِلْ بْجَرِيدِه إِنْكلِيزِيِّه..
نجيبة:
طَارِ الْعَرِيسْ وْطارِتْ الْفِيزَا..
صحفي:
خَيْرَا بْغَيْرَا.. لا تْخافِي أَللَّه بِيعَوِّضْ..
نجيبة:
وْلِكْ كِيفْ بَدُّو يْعَوِّضْ.. وْنِصّ بَناتْ الضَّيْعَه مْعَنّسِينْ..
صحفي:
لَيْش ما فِي شَبَابْ بْهَالضَّيْعَه؟
نجيبة:
بَسّ الْوَاحِدْ مِنُّنْ يْصِيرْ عِمْرُو تْمِنْتَعْشَرْ سِنِه بْيِحْمِلْ شَنِطْتُو وْبِيسَافِرْ.. وْبَعْد كِمْ شَهْر مْنِسْمَعْ إِنُّو تْجَوَّزْ بِنْت أَجْنَبِيِّه
تا يَاخُدْ فِيزَا..
صحفي:
الْمَسْؤُولِينْ بِبْلادْنا بِيشُوفُوا بْفَرْدْ عَيْنْ.. بْيِعِمْلُوا الْمُسْتَحِيلْ تا تْخِفّ خْسَارِتْنا الْمادّيِّه، وْما بْيِعِمْلُوا شِي أَبَداً تا تْخِفّْْ خْسَارِتْنَا الْبَشَرِيِّه..
نجيبة:
بَطْرَكْنَا عَ طُولْ بِيقُولْ: لُبْنانْ رَحْ يِفْضَى مِنْ سِكَّانُو..
صحفي:
وْبَسّ يِفْضَى مِنْ سِكَّانُو.. رَحْ بِيصِيرُوا حُكَّامْنَا أَصْنامْ مُشْ حُكَّامْ..
نجيبة:
لَيْك.. إنْت مْجَوَّزْ؟
صحفي:
وْعِنْدي وَلْدَيْن.. عَ قْبالِكْ
نجيبة:
فإذَنْ.. ما إِلِي إِلاَّ إِخْ لِي بِي دِيخْ.. وَيْنَك يا رُورُو؟
**
المشهد السادس
(بونا حنا ـ المختار، أهالي القرية، بعض المغتربين)
مغتربة:
إِلَيْكَ الْوَرْدُ يَا شَرْبِلْ
يُهْدَى مِنْ أَيادِينَا
فَحَوِّلْ ماءَنَا حَوِّلْ
زُيُوتاً.. كَيْ تُدَاوِينَا
مغترب:
إِلَيْكَ الْوَرْدُ يا يُوسِفْ
يُهْدَى مِنْ أَيادِينَا
فَخَفِّفْ قَهْرَنا خَفِّفْ
تَعِبْنَا مِنْ مَآسِينَا
مغتربة:
يا مارْ شَرْبِلْ.. يَا بَيّ الْعَيْلِه.. يا خَيّ الْعَيْلِه.. يا صَدِيقْ الْعَيْلِه.. أَنَا مِنْ أُسْترَالْيَا.. عِنْدِي تْلاتْ وْلادْ.. صِيصانْ زْغارْ.. زَوْجِي تَرَكْنِي وْما لِي غَيْرَكْ.. حَنِّنْ قَلْبُو عَ وْلادُو.. وْرِدُّو عَ بَيْتُو يا قِدِّيسْ الْكِلّ يا مارْ شَرْبِلْ..
مغترب:
قِصّتِي مِتِلْ قِصِّتَا يا مارْ شَرْبِلْ.. خِلَّصْت عَيْلْتِي مْنِ الْحَرْب وِهْرَبِتْ فِيهَا عَ كَنَدا.. هَوْنِيكْ غِرْقِتْ مَرْتِي بِالْحُرِّيِّه وْخِرْبِتْ بَيْتِي.. تَرْكِتْلِي أَرْبَعْ وْلادْ الْغِرْبَالْ ما بْيِنْشَالْ عَنُّنْ.. سَاعِدْنِي يا مارْ شَرْبِلْ سَاعِدْنِي..
مغترب آخر:
أَنَا يا مارْ شَرْبِلْ حَالْتِي حالِه.. سَافَرْت عَ أَمِيرْكَا.. هَوْنِيكْ تْعِلَّمْت الِقْمارْ.. وْصِرْت ما إِطْلَعْ مْنِ الْكازِينُو.. كِل مِصْرِياتِي عَمْ بِيرُوحُوا عَ الرُّولِيتْ وِالبُوكار ماشِينْ وِالإِحِصْنِه.. غَضَبْ وْنازِلْ عْلَيِّي.. سَاعِدْنِي يا قِدِّيسْ لُبْنانْ بْجاهْ هَالزَّيْت الْفَايِضْ مِنَّكْ..
فارس:
سَامْعِينْ هَالْمُغْتِرْبِينْ شُو عَمْ يِطِلْبُوا مِنْ مارْ شَرْبِلْ؟.. تَرْكُوا بْلادُنْ تا يْعِيشُوا بِبْلادْ بَرَّا.. قَامِتْ وَقْعِتْ عَ رُوسُنْ الْمَصَايِبْ لِمِّنْ مِشْيُوا بَطَرِيقْ الْغَلَطْ..
نعمان:
بِبْلادْنا عَمْ بِيصِيرْ أَكْتَر مْنِ بْلادْ بَرَّا.. رُوحُوا قْرُوا الْجَرَايِدْ.. شِي بِيقَرِّفْ.. شِي بِيقَرِّف..
أسعد:
لَيْش تَا نِقْرَا الْجَرَايِدْ.. رِيحِتْنَا طَالْعَه.. وْما بِيخَلِّصْنَا إِلاَّ الصَّلا.. صَلُّوا قَدْ ما فِيكُنْ.. أَللَّـه ما بْيِتْرُكْ مْحِبِّينُو..
(يدخل أبونا حنا)
بونا حنا:
بَدِّي بَشِّرْكُنْ بْشَارَه حِلْوِه كْتِيرْ.. مَعالِي الْوَزِيرْ بَدُّو يْزُورْ تَلّ النّسُورَا.. تا يْشُوفْ الْعَجِيبِه وْيِتْبَارَكْ بِالصُّورَه..
فارس:
إِيْ بَدُّو يْقَرِّقْ هُوِّي وْطالِعْ بِالطَّلْعَه.. خَرْجُو.. ياما بِسْنَا إِيدُو
تا يِفْتَحْ طَرِيقْ عَ الضَّيْعَه..
كوكب:
بَدّنَا حْمارْ.. حَضّرُوا حْمارْ لِلْوَزِيرْ.. مَعالِي الْوَزِيرْ حَبّ يْزُورْنَا وْيِتْبَارَكْ بِالْعَجِيبِه..
سميرة:
قَبِلْ ما تْحَضّرُوا الِحْمارْ.. حَضّرُوا جْلالْ جْدِيدْ إِلُو كِمْ جَرْسَه تَا يْلِيقْ بِمَعَالِي الْوَزِيرْ.. الْوَزِيرْ بِيحِبّ يْطَنْطِنْ شْوَيّ..
بونا حنا:
هَيْدِي أَوَّلْ مَرَّه بِيزُورْنَا مَسْؤُولْ كْبِيرْ.. انْتِبْهُوا لَيِجْفِلْ الِحْمارْ وْيِدَرِكْبُو بِالْوَادِي..
فارس:
انْشَاللَّـه بْيِجْفِلْ وْبِيوَقّعُو بْأَغْمَقْ وَادِي.. بَرْكِي بْيِِفْتَحِلْنَا طَرِيقْ عَ الضَّيْعَه..
نعمان:
شُو بِتْقُولُوا إِذَا مْنِنْكُزْ الِحْمارْ بْشِي إِبْرِه تْطَيِّرْلُو صْوَابُو..
وِتْخَلِّي معالي الْوَزِيرْ يِعْلاَ خَمْس مْتارْ عَنْ ضَهْرُو..
بونا حنا:
عَيْب يا جَماعَه تِحْكُوا هَالْحَكِي.. مَعَالِي الْوَزِيرْ ضَيفْنا..
وْلازِمْ نِسْهَرْ عَ رَاحْتُو..
فارس:
مْنِسْهَرْ عَ رَاحْتُو لِمِّنْ بْيِسْهَرْ عَ رَاحِتْنَا..
كَمَا تَرَانِي يَا وَزِيرُ أَرَاكَ..
الْعَمَى شُو كانْ يْسِمِّلِي بَدَنِي لِمِّنْ يِكْتُبْ مْطالِيبْنَا عَ عِلْبِةْ الدّخّانْ.. وْلِمِّنْ تِخْلَصْ الْعِلْبِه يْكِبَّا بِالزّبالِه هِيِّي وِمْطالِيبْنَا..
أسعد:
بَسّ يُوصَلْ الْوَزِيرْ لازِمْ نِعْمِلْ مْظَاهْرَه.. وْلازِمْ نِحْمِلْ لافْتاتْ مَكْتُوبْ عْلَيْهَا: يا مَعالِي الوَزِيرْ.. تا ما تِرْكُبْ عَ الْحَمِيرْ.. شِقّ الطَّرِيقْ عَ الضَّيْعَه..
(يدخل يوسف)
يوسف:
اقْطَعُوا نَفَسْ.. وْما حَدَا يِفْتَحْ تِمُّو.. أَرْبَعْ دِبَّابَاتْ وْسِتَّعْشَرْ كَمْيُونْ جَيْشْ مْحاوْطِينْ الضَّيْعَه..
سميرة:
إِنْتَ.. إِنْتَ.. إِنْتَ شِفْتُنْ بِعَيْنَكْ..
يوسف:
إِيْ أنَا.. أَنا.. أَنا شِفْتُنْ بِعْيَنِي.. وْقَفُوا عَ الشّوَارْ بِتْشُوفُوهُنْ..
كوكب:
يا ماما.. لَيْكُو هَالدِّبَّابِه كِيفْ دَايْرِه مَدْفَعَا عْلَيْنَا..
سميرة:
يَا دِلُّو اللِّي بْيِفْتَحْ تِمُّو.. أَرِبْعِينْ كِلِّةْ مَدْفَعْ بِتْطَيِّرْلُو جِمْجِمْتُو..
يوسف:
لا تِفْزَعُوا يا جَماعَه هَيْدِي حِمايِه ِلْصُّورِةْ مارْ شَرْبِلْ..
بونا حنا:
صُورِةْ مارْ شَرْبِلْ ما بَدَّا حِمايِه.. هَيْدِي حِمايِه لِلْوَزِيرْ..
سميرة:
فَإِذَنْ قَرَّبْ الْوَزِيرْ يُوصَلْ.. وَيْنْ الِحْمارْ؟..
مُشْ مُمْكِنْ نِتْرُكْ الْوَزِيرْ يِطْلَعْ مَشِي..
بونا حنا:
الْمُخْتارْ رَفَضْ إِنُّو يِتْقَدَّمْ حْمارْ عَ حْمارُو..
نَزَّلْ حْمارُو وْنِزِلْ تا يِسْتَقْبِلْ الْوَزِيرْ..
(يدخل الوزير راكباً على حمار)
نجيبة:
وِصِلْ الْوَزِيرْ.. زِيحُوا مِنْ طَرِيقْ الِحْمارْ.. زَقْفِه كْبِيرِه لِلْوَزِيرْ..
المختار:
يا ضَيْفَنَا.. وَوَزِيرَنَا.. لَوْ زُرْتَنَا.. لَوَجَدْتَنَا.. نَحْنُ الضُّيُوفُ وَأَنْتَ رَبُّ الْمَنْزِلِ..
يوسف:
(يصرخ بأذن الوزير)
يَعِيشْ الْوَزِيرْ يَعِيشْ يَعِيشْ يَعِيشْ
المختار:
شَرَّفْتَنَا أَيُّهَا الْوَزِيرُ الْعَظِيمُ صَاحِبُ الْمَشَارِيعِ الَّتِي لا تَنْتِهِي، إِنَّ تَلَّ النُّسُورَا فَخُورَةٌ بِمَجِيئِكَ إِلَيْهَا.. فَنَزَلْتَ أَهْلاً وَوَطِئْتَ سَهْلاً.. وَأَهْلاً وَسَهْلاً.. وَسَهْلاً وَأَهْلاً..
يوسف:
(يصرخ بأذن الوزير)
يَعِيشْ الْوَزِيرْ يَعِيشْ يَعِيشْ يَعِيشْ
المختار:
يا مَعَالِي الْوَزِيرْ.. يا رَفِيعَ الشَّانْ.. يا رَافِعْ إِسِمْ لُبْنانْ.. إِنْتَ الْفِدَّانْ.. وْنِحْنَا الدِّبَّانْ.. انْ عِلَّيْتْ دَنْبَكْ بِتْرَيِّحْنَا.. وِانْ وِطَّيْتْ دَنْبَكْ بِتْفَطِّسْنَا..
يوسف:
(يصرخ بأذن الوزير)
يَعِيشْ الْوَزِيرْ يَعِيشْ يَعِيشْ يَعِيشْ
صحفي:
مَعَالِي الْوَزِيرْ.. تِلْفِزْيُونْ الأَلْ بِي سِي مَعَكْ..
مِنْحِب نِسْأَلَكْ: شُو إِنْطِبَاعَكْ عَنْ هَالرِّحْلِه؟
الوزير:
لِلْحَقِيقَه هَالِحْمارْ حْمارْ.. كانْ وَقَّعْنِي شِي مِيةْ مَرَّه..
يوسف:
(يصرخ بأذن الوزير)
يَعِيشْ الْوَزِيرْ يَعِيشْ يَعِيشْ يَعِيشْ
الوزير:
(متضايقاً)
لا بَقَى تْصَرِّخْ.. هَلَّق بْيِجفلْ الحمار..
صحفي آخر:
نِحْنَا مِنْ تِلْفِزْيُونْ الْمُسْتَقْبِلْ مَعالِي الْوَزِيرْ..
وْمِنْحِبّ نَعْرِفْ شُو سَبَبْ هَالزِّيَارَه؟
الوزير:
لَوْ كِنْت عارِفْ بَدِّي إِرْكُبْ عَ الِحْمارْ.. كِنْتْ إِجَّلْت الْمِشْوَارْ.. أَللَّـه سَتَرْ وْما دَهْوَرْنِي بْشِي مِهْوَارْ..
سامي:
سْلامِةْ قَلْبَكْ يا مَعالِي الْوَزِيرْ.. لَوْ قِلْتِلّْنَا كِنَّا حْمِلْنَاكْ عَ ضْهُورْنَا..
الوزير:
لَوِ حْمِلْتُونِي كانْ أَحْسَنْ.. ما كانْ تْحَكَّمْ فِيِّي هَالِحْمارْ..
وْقَطَعْلِي قَلْبِي..
بونا حنا:
سَاعْدُوا مَعَالِي الْوَزِيرْ تَا يِنْزِلْ عَنْ الِحْمارْ..
سليمان:
تْفَضَّلْ يا مَعالِي الْوَزِيرْ.. مِنَّزّلَكْ عَ ضْهُورْنَا..
الوزير:
تْرِكُونِي رَاكِبْ عَ الِحْمارْ.. بَدِّي تَعّبُو مِتِلْ ما تَعَبّنِي بِالطَّلْعَه..
سامي:
وْلِكْ حَدَا مِنْكُنْ يِفْتَحْ تِمُّو وِيْقِلُّو عَنِ الطَّرِيقْ..
المختار:
هَلَّقْ مُشْ وَقْتَا.. الْوَزِيرْ بَعْدُو تِعْبَانْ وْيِمْكِنْ يِتْكَهْرَبْ مِنَّا..
نجيبة:
تْرُكُوهْ عْلَيِّي لا تْخافُوا.. لا تْوَاخِذْنَا يا مَعَالِي الْوَزِيرْ.. الْحَقّ عْلَيْنَا مُشْ عَ الِحْمارْ.. لَوْ كانْ عِنَّا طَرِيقْ كِنْت وْصِلْت بْسِيَّارِةْ مَرْسِيدِسْ مْصَفّْحَه، وْقِدَّامَكْ أَرْبَعْ مُوتْسِيكْلِيتْ دَرَكْ..
الوزير:
إِنْتُو بْأَيَّا بْلادْ عايْشِينْ.. حَدَا بْلُبْنانْ ما عِنْدُو طَرِيقْ عَ ضَيْعِتُو..
المختار:
نِحْنَا بَسّ يا مَعَالِي الْوَزِيرْ.. وِانْشَاللَّه بِتْكُونْ طَلّتَكْ طَلِّةْ خَيْر عْلَيْنَا.. وِمْنِسْتَقِبْلَكْ تَانِي مَرَّه بِالزّمامِيرْ..
الوزير:
لأْ.. لأْ.. هَيْدِي حَالِه ما بْتِنْطاقْ.. لازِمْ تِعِمْلُوا شِي وَإِلاَّ ما بَقَى زُورْكُنْ أَبَداً.. أَنَا إِرْكُبْ عَ الِحْمارْ.. الْعَمَى شُو صَارْ؟
المختار:
مِسِتْعِدِّينْ نْقَدِّمْ الأَرْض لِلدَّوْلِه.. وْمِسِتْعِدِّينْ نْقَدِّمْ الِفْعَالِه..
وْنِسْتَأْجِرْ الْجِرَّافَاتْ..
الوزير:
إِذَا إِنْتُو قِدَّمْتُو كِلّ هَالإِشْيَا.. نِحْنَا شُو لازِمْ نْقَدِّمْ؟
المختار:
أَرْبَعْ نَقْلاتْ زِفِتْ.. لا أَكْتَرْ وْلا أَقَلْ..
الوزير:
إِذَا كانْ هَيْكْ.. وِصْلِت الطَّرِيقْ عَ تَلّ النّسُورَا..
مِنْ بُكْرَا وْطالِعْ بِتْقُولُوا لِلْجِرَّافَاتْ تِجْرُفْ..
يوسف:
(يصرخ بأذن الوزير)
يَعِيشْ الْوَزِيرْ يَعِيشْ يَعِيشْ يَعِيشْ
(الوزير يرفع يده متأففاً)
سميرة:
هَيْدِي عَجِيبِه جْدِيدِه مِنْ عَجايِبْ مارْ شَرْبِلْ..
كَهْرَبَا وْمَيّ وْطَرِيقْ.. مِينْ كانْ يِحْلَمْ يْشُوفْ بَيْتُو ضَاوِي.. وِجَرّتُو مِلْيَانِه.. وْسِيَّارْتُو قِدَّامْ الْبَابْ.. يِتْمَجَّدْ إِسْمَكْ يا مارْ شَرْبِلْ شُو إِنَّكْ كَرِيمْ عْلَيْنَا..
بونا حنا:
الظَّاهِر نْسِيتْ يا مَعالِي الْوَزِيرْ إِنَّكْ جَايِي تْزُورْ الصُّورَه؟
الوزير:
أَنَا إِنْسَى صُورِةْ مارْ شَرْبِلْ.. وِحْيَاةْ عْيُونْكُنْ بِالْمِشْوَارْ الْجايِي لِمِّنْ بِفْتِتِحْ الطَّرِيقْ عَ تَلّ النّسُورَا.. رَحْ زُورْ الصُّورَه.. بْخاطِرْكُنْ هَلَّقْ.. عِنْدِي إِجْتِماعْ مْهِمّ وْما فِينِي إِتْأَخَّرْ..
(يخرج الوزير، يودعه أبونا حنا والمختار)
سميرة:
آوِيهَا.. أَللَّـه مَعَكْ أَللَّـه
آوِيهَا.. وْشَعْب الدِّنِي كِلاَّ
آوِيهَا.. لِمِّنْ حْمارَكْ طَلّْ
آوِيهَا.. غَلَّى التِّبِنْ غَلَّى
لي لي لي لي
فارس:
بَدَلْ ما تْقُولِي يا مَرا: غَلَّى التِّبِنْ غَلَّى..
لازِمْ تْقُولِي: غَلَّى الزِّفِتْ غَلَّى
كوكب:
ضُبُّوا لْسَانَاتْكُنْ.. زِلْمُو بَعْدُنْ بِالضَّيْعَه.. وِالدِّبَّابَاتْ مْدَافِعَا عْلَيْنَا..
سميرة:
مِنْ كِلّ عَقْلُو رَاحْ مِنْ دُونْ ما يْزُورْ الصُّورَه وْيِتْبَارَكْ بِالزَّيْت؟
كوكب:
لَيْش ما شِفْتِيهْ رِكِبْ عَ الِحْمارْ وْنِزِلْ بِالنَّزْلِه..
سميرة:
يا مارْ شَرْبِلْ.. مَرِّقْلَكْ شِي حَيِّه قِدَّامْ الِحْمارْ وْجَفّلُو..
تا ما نْعُودْ نْشُوفْ وِجُّو..
فارس:
شُو بَدّنَا بِسِيرْتُو.. مِتِلْ كَأَنُّو لا إِجَا وْلا رَاحْ..
تا نِرْجَعْ نْصَلِّي لْمارْ شَرْبِلْ..
إِلَيْكَ الْوَرْدُ يَا شَرْبِلْ
يُهْدَى مِنْ أَيادِينَا
فَحَوِّلْ ماءَنَاَ حَوِّلْ
زُيُوتاً.. كَيْ تُدَاوِينَا
**
المشهد السابع
(أهالي تل النسورا)
سعدى:
شِدُّو الْهِمِّه يَا شَبَابْ
يا شَبَابْ شِدُّوا الْهِمِّه
الطَّرِيقْ رَحْ تُوصَلْ عَ الْبَابْ
وْتِرْكُبْ بِالْبُوسْطَه إِمِّي
بِيب بِيبْ بِيبْ
بِيب بِيبْ بِيبْ
وْتِرْكُبْ بِالْبُوسْطَه إِمِّي
ـ2ـ
يَا جِرَّافِه خَلِّي الصّخْرْ
يِتْكَسَّرْ رَاسُو شْوَيِّي
لَوْن الزِّفْت بْلَوْن الزَّهْرْ
هْدِيِّه الطَّرِيقْ هْدِيِّه
بِيب بِيبْ بِيبْ
بِيب بِيبْ بِيبْ
هْدِيِّه الطَّرِيقْ هْدِيِّه
ـ3ـ
مَمْنُوعْ تُوقَفْ بِالسَّاحَه
وْمَمْنُوعْ تْزَمِّرْ بِالْحَيّْ
وْإِمّ عْيُونْ الدِّبَّاحَه
رَحْ تاكُلْ ظَبِطْ يا خْطَيّْ
بِيب بِيبْ بِيبْ
بِيب بِيبْ بِيبْ
رَحْ تاكُلْ ظَبِطْ يا خْطَيّْ
وِصْلِتْ الطَّرِيقْ عَ الضَّيْعَه.. تَلّ النّسُورَا صَارْ عِنْدَا طَرِيقْ..
نجيبة:
شَايْفِينْ شُو وَاسْعَه هَالطَّرِيقْ.. وْشُو سَوْدَا مِتْل الْفَحِمْ..
وْحَقّ أَللَّـه فِينِي كَحِّلْ عْيُونِي بْهَالزِّفِتْ..
(تمد يدها نحو الأرض)
يِهْ بَعْدُو حامِي مِتْل الزَّيْت.. يِمْكِنْ حْرَقِتْ إِصِبْعِي.. حَدَا مِنْكُنْ يْنَفِّخْلِي عَ إِصِبْعِي..
سعدى:
عِنْدِكْ تِمّ وْعِنْدِكْ مَنْفَخْ.. نَفّخَي تا تِشْبَعِي..
قَلِيلِه.. بَدَّا مِينْ يْنَفِّخْلا عَ إِصْبَعَا!
أم يوسف:
قْعَدُوا تا نِقْعَدْ عَ الزِّفِتْ.. لازِمْ نِتْنَعَّمْ شْوَيّ بْخَيْرَات الدَّوْلِه..
لبيبة:
عَمْ بِتْقُولْ بَعْدُو حامِي.. انْتِبْهُوا لَتِحْرْقُوا حَالْكُنْ..
وِتْوَسّخُوا تْيابْكُنْ..
أم يوسف:
لازِمْ الزِّفْت يْكُونْ حامِي تا نِقْعُدْ عْلَيْه.. هَيْك مْنَعْرِفْ قِيمْتُو..
لبيبة:
يا عَمِّي عِنْدِي سِجَّادِه عَجَمِيِّه.. صَدّقُونِي مُشْ أَنْعَمْ مِنْ هَالزِّفِتْ..
قَوِلْكُنْ أَيَّا أَقْوَى الْبَاطُونْ أَمْ الزِّفْتْ؟
أم يوسف:
ما فِي شِي أَقْوَى مْنِ الزِّفْتْ.. الزِّفْتْ اَقْوَى مْنِ الدَّولِه..
مِنْ هَيْك بِتْضَلّ الأَوْضَاعْ زِفْتْ..
نجيبة:
لِمِّنْ كِنْتُو تْقُولُولِي وِجّك أَسْوِدْ مِتْل الزِّفِتْ كِنْت إِزْعَلْ وْإِتْكَهْرَبْ.. كِرْمالْ أَللَّـه قُولُوهَا مَرَّه.. حابِّه إِتْغَنَّجْ شْوَيّْ..
(سعدى تغني ونجيبة تتغندر)
سعدى:
ـ1ـ
وِجّكْ.. وِجّكْ.. وْجّكْ
أَسْوِدْ مِتْل الزِّفْتْ
وِجّكْ.. وِجّكْ.. وْجّكْ
مِنْ لَوْنُو ما خِفْتْ
ـ2ـ
وِجّكْ.. وِجّكْ.. وْجّكْ
ما بَدُّو تِزْفِيتْ
وِجّكْ.. وِجّكْ.. وْجّكْ
لازِمْلُو تِبْلِيطْ
ـ3ـ
وِجّكْ.. وِجّكْ.. وْجّكْ
سِبْحانْ الْخَالِقْ
وِجّكْ.. وِجّكْ.. وْجّكْ
مِنْخَارُو دَالِقْ
(يدخل يوسف مسرعاً)
يوسف:
لا تِفْرَحُوا كْتِيرْ يا جَماعَه.. وِصْلِتْ الطَّرِيقْ عَ الضَّيْعَه
وْوِصْلِتْ نَتِيجِةْ فَحْص الزَّيْت مِنْ رُوما..
لبيبة:
لا تْقِلِّي طِلْعِتْ زِوَانِه؟.. ما بْعُودْ حاكِيكْ كِلّ عُمْرِي..
يوسف:
زِوَانِه وْنِصّ.. وْأَللَّـه يِسْتِرْنَا مْنِ الأَعْظَمْ..
رْجَالْ الْمُخَابَرَاتْ مْعِبَّايِينْ الضَّيْعَه.. وْعابْسِينْ عَبْسِه بْتِقْطَع الرِّزِقْ..
سعدى:
يا رَيْت بَعْرِفْ مِينْ دَلَقْ زَيْت عَ الصُّورَه تا قِرّ عْلَيْه..
نجيبة:
إِذَا بِتْقِرِّي عْلَيْه.. بِتْكُونِي خِنْتِي الضَّيْعَه
وْسِوَّدْتِي وِجِّكْ مَعْ مارْ شَرْبِلْ..
وْمَعْقُولْ نِتِّفِقْ عْلَيْكِي وْنِلِزْقِكْ التِّهْمِه.. وِنْقُلُّنْ: هَالْعَجِيبِه شِغْل سعدى.. هِيِّي اللِّي دَلْقِتْ زَيْت عَ الصُّورَه..
سعدى:
وِحْياةْ مارْ شَرْبِل مُشْ رَحْ إِفْتَحْ تِمِّي.. بَسّ ما تِتِّفْقُوا عْلَيِّي..
نجيبة:
هَلَّقْ بِلَّشْتِي تِفْهَمِي.. يا مِنْمُوتْ كِلّنَا.. يا مِنْعِيشْ كِلّنَا.. مَفْهُومْ
لبيبة:
شايفه رْجَالْ حَاطِّينْ عْوَيْناتْ سُودْ وْعَمْ يِتْطَلْعُوا فِينَا بِالْوَرِبْ..
(يقترب رجال المباحث من أهل تل النسورا)
هَوْدِي هِنِّي.. انْتِبْهُوا لَيْزَلّقُوكُنْ بِشِي كِلْمِه وِتْرُوحْ عْلَيْنَا..
أم يوسف:
الصُّورَه صُورِتْنَا.. وِالزَّيْت زَيْتْنَا.. وْمارْ شَرْبِلْ إِبْن بْلادْنا..
فِيكُنْ تْقُولُولِي شُو بَدُّنْ مِنَّا؟
يوسف:
بَدُّنْ حَقّ الزِّفْت.. يِعْنِي بِالْعَرَبِي الِمْشَبْرَحْ سْرَقْنَا الدَّوْلِه..
أم يوسف:
وْكِيفْ بَدّْنَا نِسْرُقْ الدَّوْلِه يا إبني.. وِالدَّوْلِه عَمْ تِسْرِقْنَا؟
يوسف:
دْلَقْنَا زَيْت زَيْتُونْ عَ صُورِةْ مارْ شَرْبِلْ.. وْقِلْنَا عِمِلْ عَجِيبِه..
أم يوسف:
وْشُو دَخَّلْ هَيْدَا بْهَيْدَا؟
نِحْنَا حِرِّينْ نِدْلُقْ زَيْت فِستُقْ كَمانْ.. شُو بَدُّنْ فِينَا؟
لبيبة:
إبْنِك يُوسِف عَمْ بِيجَرِّبْ يْقِلِّكْ إِنُّو لَوْلا الْعَجِيبِه
ما تْبَرْع الْوَزِيرْ بْأَرْبَعْ نَقْلاتْ زِفِتْ..
أم يوسف:
حَدَا يِتِّصِلْ فِيهْ وِيْقِلُّو شُو عَمْ بِيصِيرْ بِالضَّيْعَه..
بَرْكِي بِيوَقِّفُنْ عِنْد حَدُّنْ..
يوسف:
ما هُوِّي اللِّي مْوَدَّاهُنْ.. ضِيعانْ ما رِكَّبْنَاهْ عَ الِحْمارْ..
وْقِلْنالُو خْطاباتْ..
نجيبة:
قَليلْ ما صْرَخْت بْدَينْتُو: يعيش الوزير..
يوسف:
(يخاطب لبيبة)
إِذَا سَأْلُوكِي يا خَالْتِي: مِينْ دَلَقْ زَيْت عَ الصُّورَه؟ شُو بِتْقُولِي؟
لبيبة:
عَنْ أَيَّا صُورَه عَمْ تِحْكِي يا خَوَاجَه؟
يوسف:
عَنْ صُورِةْ مارْ شَرْبِلْ.. لَيْش فِي غَيْرَا؟
لبيبة:
فِكَّرْت عَمْ تِسْأَلْنِي عَنْ صُورْة الْمُختارْ زَوْجِي..
حَامْلِتَا بْعِبِّي بِتْحِبّ تْشُوفَا؟
يوسف:
يا خالْتِي.. أَنَا مُشْ مُخَابَرَاتْ.. أَنَا إِبِنْ إِخْتِكْ أم يوسف..
لبيبة:
لَيْش إِخْتِي أم يوسف عِنْدَا وْلادْ؟..
يوسف:
شُو بِكِي يا خَالْتِي.. هَيْئْتِكْ خْرِفْتِي؟..
لبيبة:
رُوحْ تْسَلَّى مَعْ غَيْرِي يا خَوَاجَه.. إِخْتِي أم يوسف ما عِنْدَا وْلادْ..
يوسف:
كيف ما عِنْدا وْلاد وإِسْما أم يُوسِف؟ يعني أمّي أنا..
لبيبة:
كنّا نْعَيِّطْلا أم يوسِف.. بَسّ ما عِنْدا يُوسِف..
يوسف:
الظَّاهِرْ نْسِيتِي إِنِّكْ عِرَّابْتِي.. وْإِنِّكْ فِرَّقْتِي زْبِيبْ لِمِّنْ خْلِقْتْ..
لبيبة:
لا تْعَلِّي صَوْتَكْ عْلَيِّي يا خَوَاجَه.. أَنَا مِنْ جَيْل إِمَّكْ..
يوسف:
بْبُوسْ إِيدِكْ يا خَالْتِي.. قُولِي إِنِّكْ خَالْتِي..
لبيبة:
إِذَا بِتْمُوتْ مُشْ رَحْ قُولْ إِنِّي خَالْتَكْ.. تا يِخْلَصْ التِّحْقِيقْ..
يوسف:
إِذَا كَانْ هَيْك أَنَا رَاضِي..
لبيبة:
قْطَعُوا لْسَانَاتْكُنْ.. وْإِذَا جَبْرُوكُنْ تِحْكُوا عْمِلُوا حَالْكُنْ مْجانِينْ..
لا تِعْطُوهُنْ لا حَقّ وْلا بَاطِلْ..
أم يوسف:
وَاللَّـه يا أخْتي لازِمْ يِعْطُوكِي أُوسْكارْ بالتمثيل.. فِكَّرْتِك نْسِيتِيني بِالْمَرَّه.. وِنْسِيتي إِبْن أُخْتِكْ يُوسِفْ..
لبيبة:
يِقْبِرْنِي انْشَاللَّـه.. ما أَنَا مْعَمّدْتُو.. بَسّ حِبَّيْتْ إِعْطِيكُنْ دَرْس بِالتِّمْثِيلْ تا ما يْوَقّعُوكُنْ اَبَداً.. روحوا تا نروح قبل ما يعبّشوا فينا.
(يخرج الجميع)
**
المشهد الثامن
(سامي يلبس بذلة شرطي السير، زمور سيارة، شرطي السير يلاحقها ويوقفها)
سامي:
(يصفّر)
فُوررررررررر... شُو ما بْتَعْرِفِي تِقْرِي شُو مَكْتُوبْ بِالسَّاحَه؟
نجلا:
وْشُو مَكْتُوبْ بِالسَّاحَه دَخْلَكْ؟
سامي:
مَمْنُوعْ التِّزْمِيرْ..
نجلا:
فِيكْ تْدَلِّينِي وَيْنْ مَكْتُوبْ مَمْنُوعْ التِّزْمِيرْ؟
سامي:
تْطَلّعِي مْنِيحْ شُو مَكْتُوبْ عَ ضَهْرِي..
نجلا:
مَمْنُوعْ التِّزْمِيرْ..
سامي:
عْطِينِي دَفْتَرْ السّوَاقَه تا شُوفْ.. ظَبْط التِّزْمِيرْ بْخَمْسِينْ أَلْف لِيرَه..
نجلا:
قَبْل ما تِعْمِلْ فِيِّي ظَبِطْ..
رُوحْ قِيمْ هَالْوَرْقَه عَنْ ضَهْرَكْ وْعَلِّقَا بِالسَّاحَه..
سامي:
مَا أَنَا وَاقِفْ بِالسَّاحَه..
نجلا:
لازِمْ تَعَلِّقَا عَ شِي عَامُودْ تا نْشُوفَا..
سامي:
لَيْش الْعَامُودْ أَحْسَنْ مِنِّي؟!..
ما أَنَا شرطي السير.. الْكِلّ بِيشُوفُونِي..
سامي:
لا تْوَاخِذْنِي.. أَنَا ما شِفْتَكْ.. الْمَرَّه التَّانْيِه بْفَتِّحْ عْيُونِي مْنِيحْ..
يا محلَى الْحمار.. وِالْيَومْ اللّي رْكِبْت فِيهْ عَ الِحْمار..
(زمور سيارة)
صَوْفِرْلُو يا أَفَنْدِي.. مُشْ سَامْعُو عَمْ بِيزَمِّرْ؟
سامي:
سَامْعُو.. سَامْعُو.. بَسّ نِمِرْتُو مُشْ لُبْنانِيِّه..
نجلا:
إِذَا نِمِرْتُو مُشْ لُبْنانِيِّه.. لازِمْ يِحِتْرِمْ قَانُونْنا أَكْتَرْ.. مِتِلْ ما نِحْنَا مْنِحِتْرِمْ قَانُونْ بْلادُو وِبْلادْ غَيْرُو..
سامي:
شُو إِنْتِي بَدِّكْ تِخِرْبِي بَيْتِي؟.. وِتْعَلّقِينِي عَلّْقَا أَنا مُشْ قَدَّا..
نجلا:
وْلَيْش إِنْت بَدَّكْ تْعَلِّقْنِي بْظَبِطْ خَمْسِينْ أَلْفْ لِيرَه؟
سامي:
لأَنِّكْ لُبْنَانِيِّه.. وْلازِمْ تِمْشِي عَ الْقانُونْ..
نجلا:
وْمِينْ قَلَّكْ أَنَا لُبْنانِيِّه؟
سامي:
لَيْش مِنِّيْنْ حَضِرْتِكْ؟
نجلا:
مِنِ بْلادْ بْيِنْتِهِي إِسْمَا بِحَرْف الْيَـــــــا.
سامي:
بْيِنْتِهِي إِسْمَا بْحَرْف الْيَا؟.. بْحَرْف الْيَا.. لا بَقَى تْكَفِّي.. رَاحِتْ عْلَيِّي.. فُوررررررررررررررررررررررر
نجلا:
شُو بُو بَلَعْ الصُّوفَيْرَه.. يا عَمِّي أَنَا مِنْ ..... أُسْتْرالْيَـــــــا
(يدخل رجال المباحث ومعهم أم يوسف ولبيبة)
المقدم عساف:
مُشْ رَحْ نِتْرُكْ هَالضَّيْعَه.. تا نَعْرِفْ مِينْ ضِحِكْ عَ مارْ شَرْبِلْ
وْعَ النَّاسْ وْعَ الْحُكُومِه.. وْصَارْ يْكِبّ زَيْت عَ الصُّورَه..
الدَّوْلِه اللِّبْنَانِيِّه خِسْرِتْ كْتِيرْ مِنْ هَالِكْذْبِه.. شَقِّتْ طَرِيقْ عَ الضَّيْعَه كِلْفِتْهَا أَرْبَعْ مْلايِينْ دُولارْ..
أم يوسف
لَيْش تا أَرْبَعْ مْلايِينْ دُولارْ.. ما نِحْنَا قِدَّمْنَا الأَرْض.. وْقِدّمْنَا الِفْعَالِه.. وِاسْتِأْجَرْنَا الْجَرَّافَاتْ.. وْدَوْلِتْنا ما قَدّمِتْ
إِلاَّ أَرْبَعْ نَقْلاتْ زِفِتْ..
المقدم عساف:
إِذَا ما بِتْقِصيّ لْسَانِكْ.. رَحْ إِتِهْمِكْ بِالتَّآمُرْ عَ الدَّوْلِه اللُّبْنانِيِّه..
لبيبة:
إِمّ يوسف ما حِكِيتْ إِلاَّ الْحَقِيقَه.. بِشُو بَدَّكْ تِتِّهْمَا؟..
المقدم عساف:
عَمْ بِتْقُولْ إِنُّو الدَّوْلِه ما قَدّمِتْ إِلاَّ أَرْبَعْ نَقْلاتْ زَفِتْ..
شُو بْتِفْهَمي مِنْ هَالْحَكِي؟
لبيبة:
بِفْهَمْ إِنُّو نَقْلِة الزّفِتْ كَلّْفِتْ مَلْيُونْ دُولارْ..
المقدم عساف:
فَسِّريلِي شُو بْيِعْنِي هَالْحَكِي؟
لبيبة:
بْيِعْنِي إِنُّنْ سَرَقُوا الْمِصْرِيَّاتْ..
المقدم عساف:
لَهْ.. لَهْ.. لَهْ.. يا أَعْداءْ الدَّوْلِه لَهْ..
حَوِّلُنْ عَ التِّحْقِيقْ بِتِهْمِةْ الإِسَاءَه لَمَعالِي الْوَزِيرْ..
رجل مباحث:
رَحْ إِتِّصِلْ بِالْوَزِيرْ وْخَبّرُو.. أَلُو.. مَعالِي الْوَزِيرْ.. لْقَطْنَا تْنَيْنْ زِعْرَانْ عَمْ يِتِّهْمُوكْ بِالسِّرْقَه.. إِيْ إِيْ.. بْسِرْقِة الزِّفِتْ.. عَمْ بِيقُولُوا إِنُّو دْفَعِتْ حَقّ نَقِلِةْ الزِّفِتْ مَلْيُون دولارْ.. وَيْنْ؟.. بْتَلّ النّسُورَا.. بَدَّكْ يانَا نِفْلِتُنْ حالاً حالاً..
المقدم عساف:
عْطِينِي ياه تا شُوفْ.. مَعَكْ الِمْقَدِّمْ عِسَّافْ سِيدْنا.. سْمِعْتَكْ عَمْ بِتْقِلُّو تا نِفْلِتُنْ حالاً حالاً.. فِينِي أَعْرِفْ لَيْشْ؟.. هَوْدِي نِسْوانْ زِعْرَانْ عَمْ يِحْكُوا الْحَقِيقَه.. قَصْدِي عَمْ بِيشَوّهُوا الْحَقِيقَه.. إِي بْأَمْرَك سِيدْنا.. ما بِيصِيرْ إِلاَّ عَ خاطْرَكْ.. فْلِتُوهُنْ.. وْخَلُّوهُنْ يْرُوحُوا عَ بْيُوتُنْ.. مَعالِي الْوَزِيرْ ما بَدُّو سِينْ وْجِيمْ بْمَوْضُوعْ الزِّفْت.. فْهِمْتُو..
رجل مباحث:
إِذَا ما لْقَطْنا حَدَا شُو مِنْكُونْ عْمِلْنَا؟.. حَضْرِتُنْ مُشْ عَمّ بِيقِرُّوا عَ بَعْضُنْ.. لازِمْ نْشَدِّدْ التِّحْقِيقْ أَكْتَرْ..
المقدم عساف:
سْحَبُولِي أَهَالِي الضَيْعَه مْنِ بْيُوتُنْ.. ما بَدِّي حَدَا يِفْلِتْ.. لْسَاناتُنْ بَدِّي إِسْحَبَا إِذَا ما بِيقِرُّوا مِينْ دَلَقْ الزَّيْت عَ الصُّورَه..
(يدخل رجل مباحث ومعه سعدى)
رجل مباحث:
هَيْدِي الْمَرَا كَانِتْ عَمْ تِرْعَى الْعَنْزَاتْ..
مَعْقُول تْكُونْ تَعْرِفْ شِي؟..
المقدم عساف:
ِمينْ دَلَقْ زَيْت عَ الصُّورَه؟.. إِذَا بِتْقُولِيلِي الْحَقِيقَه بِتْرَيّحِي رَاسِكْ وْرَاسِي.. وْرَاسْ الْعَنْزَاتْ..
سعدى:
فِتّ وْكُولْ..
المقدم عساف:
شُو عَمْ بِتْقُولِي يا حِرْمِه؟
سعدى:
فِتّ وْكُولْ..
المقدم عساف:
رُوحُوا جِيبُولِي فِتّ وْكُولْ هَلَّقْ.. هَلَّقْ.. هَلَّقْ
رجل مباحث:
ما فِي حَدَا بْهَالضَّيْعَه إِسْمُو فِتّ وْكُولْ.. اسْتَفْهِمْ مِنَّا أَكْتَرْ..
المقدم عساف:
مِينُو هَيْدَا فِتّ وْكُولْ؟.. عْطِينِي الإِسْم الْكامِلْ مِنْ فَضْلِكْ..
سعدى:
ِفتّ وْكُولْ.. فِتّ وْكُولْ.. فِتّ وْكُولْ..
المقدم عساف:
خِدُوهَا مِنْ وِجِّي.. هَيْدِي مَرَا مَجْنُونِه.. رُوحُوا جِيبُولِي غَيْرَا..
(يدخل رجل المباحث ومعه سميرة وكوكب، ينظر إليهما المقدم عسّاف ويصرخ)
وْلِكْ شُو باكْ مُشْ عم تِجْبْلي غَير نِسْوانْ.. قلِّة رْجالْ بالضَّيْعَه؟
رجل المباحث:
(يهمس بأذن المقدم)
النّسْوان لْسَانُنْ طَويلْ.. بْيِحْكُوا
(يلتفت الى كوكب وسميرة)
حَضْرِة الِمْقَدِّمْ خِلْقُو طَالِعْ.. لا تْخَلُّوه يْجَرِّبْ الْعَصَا فِيكُنْ..
المقدم عساف:
مِينْ دَلَقْ زَيْت عَ الصُّورَه؟
كوكب:
بِتْقُولْ لْحَدَا شِي؟
المقدم عساف:
أَكِيدْ لأْ..
كوكب:
شِفِتْ مارْ شَرْبِلْ عَمْ يِدْلُقْ عَ حالُو زَيْتْ..
المقدم عساف:
إِنْتِي شِفْتِيهْ بَعَيْنِكْ..
كوكب:
يِنْقِلْعُوا انْشَاللَّـه إِذَا بْكُونْ عَمْ كَذِّبْ..
سميرة:
لا تْصَدِّقْهَا يا حَضْرِةْ الِمْفَتِّشْ.. هِيِّي ما شَافِتْ شِي..
أَنا اللِّي شِفْتُو عَمْ يِدْلُقْ زَيْتْ..
المقدم عساف:
لا إِنْتِي شِفْتِيهْ وْلا هِيِّي شَافْتُو.. تْنَيْناتْكُنْ أَكْذَبْ مِنْ بَعِضْكُنْ..
سميرة:
وْلَيْش عَمْ بِتْحَقّقُوا مَعْنَا إِذَا كِنَّا كِذَّابِينْ؟
المقدم عساف:
بَرْكِي مْنِلْتِقِي بْشِي وَاحِدْ صَادِقْ وْبِيقِلّنَا الْحَقِيقَه..
كوكب:
قِلْنالْكُنْ الْحَقِيقَه ما صِدَّقْتُونَا..
المقدم عساف:
بَدِّكْ يَانِي صَدِّقْ إِنُّو مارْ شَرْبِلْ عَمْ يِدْلُقْ عَ حالُو زَيْت!!..
كوكب:
هَلَّقْ بِلَّشْتْ تِفْهَمْ..
المقدم عساف:
قُومُوا مِنْ وِجِّي.. روحوا وْقَفُوا هَوْنِيكْ.. إي هَوْنِيكْ..
وما تِتْحَرّكُوا تا أنا قِلّكُنْ..
(يقترب منهما مجددا وهو يهز بعصاه)
اسْمَعُوا.. إِذَا ما بِتْقُولولي مين دَلّق زَيْت عَ الصّوره بَدُّو يْصِيبْكُنْ
مِتِلْ ما صَابْ غَيْركُنْ..
كوكب:
وْشُو صَابْ غَيْرْنا يا أَفَنْدِي؟.. أَنَا فِزْعانِه كْتِيرْ..
أللَّـه يْخَلِّيكْ لا تِحْرِمْنِي شُوفْ وْلادِي..
المقدم عساف:
قُولِي الْحَقِيقَه وْما تِفْزَعِي.. مِينْ دَلَقْ زَيْت عَ الصُّورَه؟
كوكب:
أَيَّا صُورَه؟
المقدم عساف:
صُورِة الْقِدِيس شَرْبِل..
كوكب:
يِبْعَتْلُو كَسِرْ إِيدُو اللِّي عِمِلْ بِالصُّورَه هَيْكْ..
أَيْمَتَى صَارِتْ هَالْحادْثِه؟
المقدم عساف:
عامْلِه حالِكْ ما مَعِكْ خَبَرْ.. وْزِوَّجْتِي أَرْبَعْ بْناتْ بِسَبَبْ هَالْعَجِيبِه..
سميرة:
إِنْت غِلْطانْ يا خَوَاجَه.. بْناتَا تْزَوّجُوا عَ الإِنْتِرْنِتْ..
المقدم عساف:
أَنَا مُشْ عَمْ إِحْكِي مَعِكْ.. ضِبِّي لْسَانِكْ وِسْكِتِي..
سميرة:
لَوْ ما كِنْت مِخْلِقْ.. كِنْت عْطَيْتَكْ بِنْتِي..
بِنْتِي حِلْوِه كْتِيرْ.. بْتِعِجْبَكْ..
المقدم عساف:
بِشَرَفِكْ عَمْ تِحْكِي جَدّْ..
سميرة:
أَنَا ما خِلَّفْتْ بِنْتِي تا إِنْقَعَا بِالْبَيْت يا أَفَنْدِي.. بَيْتْنَا حَدّ الِكْنِيسِه.. سْآل عَنْ إِمّ سَلْوَى.. كِل عِمْرِي إِحْلَمْ صِيرْ حْماةْ الدَّوْلِه..
كوكب:
وْلَيْش عَنْ إِمّ سَلْوَى يا خَيْتِي.. رُوح يا حَبِيبْ قَلْبِي سْآلْ عَنْ إِمّ نَجْوَى.. بِنْتِي نَجْوَى الِبْسِيْن بْياكِلاَّ أَكْلاتَا..
سميرة:
صَدِّقْنِي يا أَفَنْدِي بِنْتِي أَنا وْبَسّ.. وِالْبَاقِي كِلُّو خَسّ..
كوكب:
بنْتي أنا خَسّ؟.. وَاللَّه لَـ إفِرْمِكْ سْلاطَه..
المقدم عساف:
خِدُوهُنْ مِنْ هَوْن.. أَنَا تا جِيبْ عَ بَيْتِي هَيْك حَمَوَاتْ..
مْنِيحْ اللِّي عِلْقُوا بْبَعْضُنْ قَبْل ما إِعْلَقْ بْشِي بِنْت مْنِ بْناتُنْ..
(يدخل رجل المباحث ومعه نجيبة)
رجل المباحث:
فُوتِي قِدَّامِي فُوتِي.. بَدِّي أَعْرِف لَيْش هِرْبانِه مِنِّي..
قْطَعْتِيلِّي حَيْلِي..
المقدم عساف:
فِيكِي تْقوليلي مِينْ دَلَقْ زَيْت عَ الصُّورَه؟
نجيبة:
زَوْجِي يا أَفَنْدِي زَوْجِي.. عْلِقِتْ أَنَا وْياه قَام دَلَقْ زَيْت عَ الصُّورَه..
المقدم عساف:
عَظِيمْ.. عَظِيمْ.. هَلَّقْ بِلَّشْنَا نُوصَلْ لَنَتِيجِه..
نجيبة:
حَضِرْتُو مَغْضُوب كْتِيرْ.. رَاسُو فِجّ مِتِلْ رَاسْ إِمُّو.. قِلْتِلُّو بَطّل هَالْخَصْلاتْ ما كانْ يْبَطِّلْ.. قِلِّي شُو فِينِي إِعْمِلْ؟..
المقدم عساف:
وْشُو إِسْمُو زَوْجِكْ؟
نجيبة:
وَائِلْ..
المقدم عساف:
وَائِلْ شُو..
نجيبة:
وائِلْ الِكْفُورِي..
المقدم عساف:
إِذَا كانْ زَوْجِكْ وَائِلْ الِكْفُورِي لازِمْ تْكُونِي نَجْوَى كَرَمْ..
نجيبة:
مَظْبُوطْ.. وْبَعْدْ ما دَلَقْ زَيْت عَ الصُّورَه.. رِحْت سْحَبِتْ وِحْدِه مِتْلاَ تَماماً.. وْعِلَّقْتَا بِالصَّالُونْ..
المقدم عساف:
قَصْدِكْ بْسَاحِةْ الضَّيْعَه؟
نجيبة:
لأْ يا أَفَنْدِِي.. بِالصَّالُونْ..
المقدم عساف:
فِينِي أَعْرِفْ عَنْ أَيَّا صُورَه عَمْ تِحْكِي؟
نجيبة:
عَنْ صُورِةْ زَوَاجْنَا..
(تتكلّم مع نفسها)
يا مار شَرْبِل وَدّيلِي عريس
المقدم عساف:
ـ شُو هَالْعَلْقَه اللِّي عْلِقْنَا فِيهَا.. أَللَّـه وَقَّعْنَا بْإِيدْ مْجانِينْ..
مُشْ رَحْ ناخُدْ مِنُّنْ لا حَقّ وْلا باطِلْ..
(يصرخ بأعلى صوته)
يا أهالي تل النسورا طْلَعُوا مْن بْيُوتكُن أحسَنْ ما إِشْحَطْكُن لَهَوْن..
(يتجمّع الأهالي)
لا بَقَى تْضَيّعُوا وَقِتي.. قُولُولي مِينْ دَلَقْ زَيْت عَ الصُّورَه؟
بونا حنا:
سْآل الصُّورَه بِتْقِلّك..
المقدم عساف:
لَيْش الصُّورَه بْتِحْكِي؟
المختار:
بْهَالإِيَّامْ كِل شِي بْيِحْكِي..
المقدم عساف:
ما فِي إِلاَّ الْعَصَا بِتْخَلِّيكُنْ تِحْكُوا.. مِينْ دَلّقْ زَيْت عَ الصُّورَه؟
فارس:
أَنَا اللِّي دْلَقْتْ زَيْت عَ الصُّورَه..
سميرة:
لا تْصَدّقُو يا أَفَنْدِي.. فَارِسْ ما كانْ بِالضَّيْعَه..
المقدم عساف:
إِذَا كَانِتْ الصُّورَه إِلِكْ.. لازِمْ يْكُونْ هُوِّي اللِّي خَرْبَطْ الْبَلَدْ، وْخَسَّرْ الدَّوْلِه أَرْبَعْ مْلايينْ دُولارْ.. خِدُوه عَ الْحَبْس..
سميرة:
أَنَا بَعْرِفْ زَوْجِي أَكْتَرْ مِنَّكْ.. إِذَا بَدَّكْ تاخْدُو عَ الْحَبْس..
خِدْنِي مَعُو.. إِجْرِي إِجْرُو..
فَما جَمَعَهُ اللَّـهُ لا يُفَرِّقُهُ إِنْسَانٌ، وْلَوْ كانْ إِبِنْ دَوْلِه..
نعمان:
فارِسْ بَريءْ يا أَفَنْدِي.. أَنا اللِّي دْلَقْت زَيْت عَ الصُّورَه..
سعدى:
كِذَّابْ يَا أَفَنْدِي.. نِعْمانْ كانْ بْبَيْرُوتْ وِمْبارِحْ وِصِلْ..
أسعد:
أَنَا اللِّي دْلَقْت زَيْت عَ الصُّورَه..
كوكب:
سْكُوتْ يا أَسْعَدْ سْكُوتْ.. بَدَّكْ تْبَهْدِلْنِي بْهَالآخْرَه.. عِنْدَكْ تْنَعْشَرْ بِنْت بَدَّكْ تْعَيِّشُنْ.. إِذَا رِحْت عَ الْحَبِسْ رَاحِتْ عْلَيْنَا..
المقدم عساف:
وْلَيْش جِبْتُوا تْنَعْشَرْ بِنْت مِنْ غَيْر شَرّ..
كوكب:
ما ظَبْطِتْ مَعْنَا إِلاَّْ هَيْك..
انْطَرْنَا عِشْرِينْ سِنِه تا يْطِلّ الصَّبِي وْما كانْ يْطِلّ..
المقدم عساف:
وِانْشَاللَّه سِتِّينْ عِمْرُو ما يْطِلّْ.. فَارِسْ وْنِعْمانْ وْأَسْعَدْ اعْتَرْفُوا بِالْجَرِيمِه.. وْلازِمْ يِدْفَعُوا الثَّمَنْ..
المختار:
وْلَيْش بَدُّنْ يِدْفَعُوا الثَّمَنْ.. لأَنُّنْ عِمْلُوا عَجِيبِه..
المقدم عساف:
اللِّي بْيِدْلُقْ زَيْت زَيْتُون عَ صُورِة مار شَرْبِل.. بِيكُونْ عِمِلْ عَجِيبِه؟.. إِي وَاللَّـه لَيْتَخِتْخُوا بِالْحَبِسْ..
بونا حنا:
هَالزَّلْمِي الْمَرِيضْ اللِّي باسْ الصُّورَه وْقامْ يِمْشِي مِتْل السَّبِعْ.. هَيْدِي مُشْ عَجِيبِه؟
المختار:
شَرْبِل إبْنِي اللِّي رِجْع مْنِ السَّفَرْ بِشَفَاعِةْ الْقِدِّيسْ شَرْبِل..
هَيْدِي مُشْ عَجِيبِه؟
بونا حنا:
الْمَيّ اللِّي وِصْلِتْ عَ الضَّيْعَه تا تِسْقِي وْلادْنا.. هَيْدِي مُشْ عَجِيبِه؟
المختار:
الْكَهْرَبا الْعَمْ بِتْنَوِّرْ بْيُوتْنا بَعِدْ ما كِنَّا عَايْشِينْ بِالْعَتْمِه..
هَيْدِي مُشْ عَجِيبِه؟
بونا حنا:
الطَّرِيقْ الِمْزَفّتِه اللِّي وِصْلِتْ عَ ضَيْعِتْنا تا نِقْدِرْ نْوَدِّي وْلادْنا عَ الْمَدارِسْ، وِالْمَرْضَى عَ الْمُسْتَشْفَيَاتْ.. هَيْدِي مشْ عَجِيبِه؟
المختار:
لَوْلا هَالزَّيْتاتْ اللِّي دَلْقُوهُنْ عَ صُّورَةْ مارْ شَرْبِلْ كِنَّا بَعِدْنا عايْشِينْ بَرَّاتْ بْلادْنا.. لا طَرِيقْ عِنَّا، لا كَهْرَبَا عِنَّا،
وْلا مَيّ نِشْرَبْ وِنْشَرْبِي وْلادْنا..
بونا حنا:
مارْ شَرْبِلْ عِمِلْ بِضَيْعِتْنَا أَعْظَمْ وْأَجْمَلْ وْأَكْبَرْ عَجِيبِه مِمْكِنْ يِعْمِلاَ قِدِّيسْ بِيحِبّ بْلادُو وْشَعْبُو قَدّ مارْ شَرْبِلْ..
المقدم عساف:
شْبِعْنَا وَعْظْ وْكِتْرِةْ حَكِي.. فَارِسْ وْنِعْمانْ وْأَسْعَدْ جَرّصُوا ضَيْعِتْكُنْ وْخَلُّوا النَّاسْ تِضْحَكْ عْلَيْكُنْ.. لازِمْ إِنْتُو تْقُولُولْنَا احْبِسُوهُنْ..
بونا حنا:
فَارِسْ وْنِعْمانْ وْأَسْعَدْ فَبْرَكُوا هَالْعَجِيبِه تا يْقِيمُوا ضَيْعِتْنَا مْنِ الْمَوْت.. وْمِتِلْ مِنّكُنْ شَايْفِينْ قَامِتْ الضَّيْعَه مْنِ الْمَوْتْ..
وْعَمْ بِيزُورَا آلافْ النَّاسْ كِلّ يَوْمْ..
المقدم عساف:
النَّاسْ عِرْفُوا إِنُّو الْعَجِيبِه كِذِبْ..
وْما بَقَى رَحْ تْشُوفُوا حَدَا.. فِهِمْتُوا..
المختار:
إِنْت غِلْطَانْ يا أَفَنْدِي..
النَّاسْ بِيحِبُّوا مارْ شَرْبِلْ بْعَجِيبِه أَوْ بِدُونْ عَجِيبِه..
بونا حنا:
لَوْ كانْ مارْ شَرْبِلْ زِعْلانْ مِنْ فَارِسْ وْأَسْعَدْ وْنِعْمانْ ما كانْ شِفِي الْمَرِيضْ وْبَيَّنْ عْجايْبُو بْتَلّ النّسُورَا..
المختار:
النَّاسْ رَحْ بِتْضَلّ تْزُورْ الصُّورَه.. بْزَيْتْ أَوْ مِنْ دُونْ زَيْت.. وْرَحْ تِسْمَعْ تْرَاتِيلُنْ مِنْ آخِرْ الدِّنِي..
المقدم عساف:
مُشْ رَحْ يِجِي حَدَا عَ ضَيْعِتْكُنْ.. صِرْتُو مَضْحِكْةِ النَّاسْ.. فِيكُنْ تْقُولُولِي وَيْن النَّاسْ.. قَهْ قَهْ قَهْ قَه.. خِدُوهُنْ عَ الْحَبْسْ..
بونا حنا:
آلافْ النَّاسْ رَحْ تِجِي تْصَلِّي لْمارْ شَرْبِلْ..
ما شَرْبِلْ ما بْيِتْرُكْ أَحْبَابُو..
المقدم عساف:
إِنْتُو عَمْ تِحْلَمُوا.. صَرْلِي جُمْعَه بِالضَّيْعَه وْما شِفْت حَدَا..
إِذَا بْشُوفْ عَشِرْ أَشْخاصْ بَسّ.. مِسِتْعِدّ سَكِّرْ هَالْمَلَفّ وْإِتْرُكْ حْسَابْكُنْ بْإِيدْ مارْ شَرْبِلْ.. قَه قَهْ قَهْ قَهْ..
بونا حنا:
وَيْنَكْ يَا مارْ شَرْبِلْ وَيْنَكْ.. عَجِيبِه زْغِيرِه دَخِيلْ عَيْنَكْ..
(يَظْهَر الْعَدِيد مِن الناس وَهُمْ يَحْملون الشّمُوع وصور القديس شربل وينشدون(:
ـ1ـ
جايِينْ لْعِنْدَكْ تا نْزُورْ
صُورَه.. مْشَعْشَعْ فِيهَا النُّورْ
قِدَّامَكْ نِحْرُقْ بَخُّورْ
وِبْأَمْجادَكْ نِتْغَنَّى
يا شَرْبِلْ صَلِّي عَنَّا
ـ2ـ
حْمِلْنَا الشَّمْعات وْجِينَا
حَتَّى بْنُورَكْ تِضْوِينَا
مِنْ زَيْتَكْ نِقْطَه عْطِينَا
نِحْنَا فِيكْ مْنِتْهَنَّا
يا شَرْبِلْ صَلِّي عَنَّا
ـ3ـ
يا رَاهِبْ خَلِّصْ لُبْنانْ
أَرْزُو.. صْخُورُو وِالإِنْسَانْ
مِينْ قَدَّكْ حَبّ الدَّيَّانْ
بَرْكاتَكْ شُو مْنِتْمَنَّى
يا شَرْبِلْ صَلِّي عَنَّا
ـ4ـ
شَرْبِلْ، رَفْقَه، نْعِمْةَ اللَّه
إِخْدُوا النِّعْمِه مِنْ أَللَّـه
وْضَوُّوا هَالدِّنْيِي كِلاَّ
أَحْلَى تْلاتِه مِنْ عِنَّا
يا شَرْبِلْ صَلِّي عَنَّا
**
