**
Charbel Baini
Ghannou ya atfal
SING, O CHILDREN
صورة الغلاف:
شربل بعيني يلقي أولى قصائده بعمر تسع سنوات
**
مقدّمة
بقلم د. علي بزّي
قبل أن تقرأوا هذه الأغنيات التاريخية الجميلة، عليكم أن تعرفوا أن آلاف الأطفال في معهد سيدة لبنان ـ هاريس بارك ـ سيدني ـ أستراليا قد غنّوها في احتفالات مدرسية مختلفة. وقد لا أذيع سراً اذا قلت أن الكثير من هذه الأغنيات قد ضاع لسبب مؤسف لا داعي لذكره.
كما عليكم أن تعرفوا أن هؤلاء الأطفال ولدوا في بلاد كل ما فيها ينطق بالانكليزية، فجاء شربل بعيني ليزرع على شفاههم لغتهم الأم بطريقة مبتكرة، إذ أن لا شيء مثل المسرح والأغنيات يعيد إليهم ما فقدوه من نطق بهذه اللغة.
قد يقول البعض ان لا قيمة ادبية لهذه الاغنيات، والحقيقة ان قيمتها الادبية لا حدود لها، إذ انها تكمن في قيمتها التربوية والمعنوية والانسانية والتاريخية، خاصة وانها تؤرخ لاكثر من ربع قرن من حياة المعهد، وتسلط الاضواء على شخصيات مهمة استقبلهم الاطفال، كما تبيّن مدى اخلاص ومحبة ووفاء هذا المعلم الكبير لراهبات العائلة المقدسة، ولمعهدهن الذي وهبه عصارة نبوغه الفكري، وأهداه اجمل سني حياته.
لقد مرّ شربل بعيني في معهد سيدة لبنان كمارد قطف ثمار شجرة المعرفة وأطعمها للصغار والكبار في آن واحد. فتارة يقدّم لهم ثمرة الشعر والغناء، وتارة أخرى ثمرة الكتب المدرسية والتعليم الحديث الراقي، وطوراً ثمرة المسرح الطفولي الذي أبدع به بشهادة كل من شهد للحق.
وعندما استقال شربل من مهنة التعليم في المعهد، حدث لغط شديد في أوساط الجالية، مفاده أن من كرّم جميع الراهبات وأهداهن أجمل الأغنيات لم ينل نصيبه من التكريم، فإذا به ينشر على غلاف الطبعة الثانية صورة تكريمه من قبل الرئيسة أيرين بو غصن، مع صور أخرى، ليدافع عن أعز الناس على قلبه: راهبات العائلة المقدسة.
لقد التقيت بكثير من المعلمين الذين مروا على صفحة الحياة دون أن يذكرهم أحد، ولكن شربل بعيني مرّ فخَلَّد وخُلِّد، وخير دليل على ذلك ما سوف تستمتع به أعينكم من قصائد.
سؤال لا بد من طرحه: هل سيمر في معهد سيدة لبنان شربل بعيني آخر؟ أتمنى ذلك.
**
غنّوا يا أطفال
غنّاها أطفال معهد سيّدة لبنان عام 1995
ـ1ـ
لْسَيّدِةْ لُبْنانْ
غَنّوا يا أطفالْ
لْسَيّدِةْ لُبْنانْ
الْـ عَمْ بِتْرَبِّي عْيالْ
وْخَلُّوا الصَّوْت يْعِيدْ
كلّ غْناني الْعِيدْ
اللِّي بَعْدا بِالْبَالْ
ـ2ـ
قْطَعْنا الْبَحرْ وْجِينَا
تَا نْحَقِّقْ أَمانينَا
وْصِرْنا حُلْم الْحَكي
عَ الْمَحَبِّه رْبينَا
بِـ حضْن أَهالينَا
نْلِم زْهُور الْبِكي
ـ3ـ
لَوْ مَهْما غنَّيْنا
وِالْعَتْمِه ضُوَّيْنا
هِنِّي الْـ مِحْيُوا الْغُرْبِه
رَاهْباتْنا بْعِينَيْنا
عَمْ يِسْهَرُوا عْلَيْنا
سَاعِدْهُنْ يَا رَبِّي
**
طل البطرك
غنّاها أطفال معهد سيّدة لبنان عام 1993، احتفاء بقدوم البطريرك مار نصراللـه بطرس صفير إلى أستراليا.
ـ1ـ
طَلّ الْبَطْرَكْ.. أَعْظَمْ بَطْرَكْ
مارْ نِصْراللّـه الْـ مِنْحِبُّو
يا مَعْهَدْنا جَمِّعْ زَهْرَكْ
تا نْرِشّ الزَّهْر بْدَرْبُو
عَ إِنْطاكْيَا وْكِل الْمَشْرِق رَاخِي ظِلُّو
وِمْخَبَّى الْكلّ بْقَلْبُو
ـ2ـ
أَهْلا بْبَطْرَكْنا أَهْلاَ
بِوْجُودَكْ نِحْنَا مْنِسْعَدْ
وْغُرْبِتْنا فِيك بْتِحْلَى
مْمَجَّدْ بِالشَّرْق مْمَجَّدْ
دَخِيلْ قَلْبَكْ، شُو مِنْحِبَّكْ، يا بَطْرَكْنا
دَمْعات الْعَيْن انْسَكْبُوا
ـ3ـ
نِحْنا زْغارْ وْإِنْتَ كْبِيرْ
خَلِّي إِيدَيْك يْفَيُّوا
عَ الطّفْل الْـ بِتْحِبُّو كْتِيرْ
مْحَبِّةْ أُمُّو مَعْ بَيُّو
يا ما نْطَرْنا، وِتْعَطَّرْنا بِـ غُرْبِتْنا
الْـ فِيها الْعِينَيْن انْصَلْبُوا
**
بطركنا الغالي
غنّاها أطفال معهد سيّدة لبنان عام 1993، احتفاء بقدوم البطريرك مار نصراللـه بطرس صفير إلى أستراليا.
ـ1ـ
أَهْلا وْسَهْلا بْبَطْرَكْنا
مارْ نِصْرَاللـه الْـ مِنْحِبُّو
بْيَمِينُو بِيبَارِكْنا
يا رَبّ نْضَلّ بْقَلْبُو
ـ2ـ
يا بَطْرَكْنا الْغالي كْتِيرْ
يا مارْ نِصْرَاللـه بُطْرُسْ
يا حامي الْمَوْطن الِكْبِيرْ
وْأَرْزِتْنا قَاعِدْ تِحْرُسْ
ـ3ـ
نِحْنا بْكِرْكِي مْنَعْرِفْها
مِنْ رَاهْباتْنا الْـ رَبُّونا
الرَّاهْبِه لَمَّا بْتُوصِفْها
بْتِكْرُجْ دَمْعات عْيُونَا
ـ4ـ
مَشْرِقْنا، بْدُونَكْ، عَتْماتْ
يا سَيِّدْ.. خَلِّصْ لُبْنانْ
وْخَلِّي بْإِنْطاكْيَه الْغَيْماتْ
تْشَتِّي عَ النَّاس الإِيمانْ
ـ5ـ
لوَّنْت الْغُرْبِه بِالنُّورْ
وِمْسَحْت الدَّمْعَه بْإِيدَكْ
يا سَيِّدْ.. وِقْطَعْت بْحُورْ
تا نْعِيش بْفَرْحِةْ عِيدَكْ
**
جايي لعنا
غنّاها أطفال معهد سيّدة لبنان عام 1993، احتفاء بقدوم البطريرك مار نصراللـه بطرس صفير إلى أستراليا.
ـ1ـ
يا أُخْتِي الْـ إِسْمِكْ نِسْرِينْ
وْجِيتِي عَ الْغُرْبِه مْنِ سْنِينْ
بَطْرَكْنا جَايِي لْعِنَّا
يْبَارِك كلّ الْمُغْتِرْبِينْ
ـ2ـ
مارْ نِصْرَاللـه.. ما غَيْرُو
اللِّي عِمْل بْكِرْكِي دَيْرُو
الْـ خَلَّى الشَّمْس بْعَتْم اللَّيْل
تِشْرُقْ.. وِيْكَفِّي سَيْرُو؟!
ـ3ـ
هَيْدَا هُوِّي.. وِحْياتِكْ
بْقَلْبُو خَبَّى أَرْزاتِكْ
حامِلْ شَمْعِةْ مارْ مارُونْ
حَتَّى يْضَوِّي عَتْماتِكْ
ـ4ـ
رَاهْباتْنا حِكْيُولِي كْتِيرْ
قَالُوا: مِتْلُو صَعْب يْصِيرْ
جايِي تا يْمَحِّي الْهُجْرانْ
يا قَلْبِي مْنِ الْفَرْحَه طِيرْ
ـ5ـ
يا سيدْنِي.. اهْتَزِّي اهْتَزِّي
بِرْبُوعِكْ إِبْن الأَرْزِه
مْحَبِّه وِقْداسِه وْإِيمانْ
يا قْلُوب النَّاس اعْتَزِّي
ـ6ـ
يا مار نِصْرَاللـه صَلِّي
الدِّنْيِي صَارِتْ مِعْتَلِّه
الشَّرّ تْغَلَّبْ عَ الإِنْسَانْ
بارِكْنا بْعَصْر الْقِلِّه
ـ7ـ
بْسَيّدِةْ لُبْنان فْرِحْنا
وْزِيَّنَّا مَطَارِحْنا
عَنْ دَرْبَكْ يا سَيِّدْنا
لا زِحْنا.. وْلا تْزِحْزَحْنا
ـ8ـ
بَطْرَكْ.. طَلِّةْ وِجَّكْ عِيدْ
وْغَيْمِه بِتْشَتِّي مْواعِيدْ
نَفِّضْ عَنَّا غُرْبِتْنا
وْرَجِّعْنا نْعِيش مْن جْدِيدْ
ـ9ـ
يا مَحْلَى وْجُودَكْ مَعْنا
مِنْحاكِيكْ.. بْتِسْمَعْنا
أَوَّلْ بَطْرَكْ زَارْنا هَوْنْ
وْتَحْت جْناحُو جَمَّعْنا
ـ10ـ
جِمَّعْنا الزَّهْر وْقِلْنا:
مِنْ دُون زَهْر بْتِقْبَلْنا
نِحْنا بْنَيَّاتْ الأَرْزاتْ
الطُّهْر مْضَوِّي مْشَاعِلْنا
ـ11ـ
نِحْنا رْجالَكْ.. بَطْرَكْنا
بْإِيدَكْ فِيك تْحَرِّكْنا
إِنْت السيِّد.. إِنْت الْبَيّ
يا سَيِّدْنا بارِكْنا
**
سيدني بلدي
غنّاها تلامذة سيّدة لبنان عام 1980
ـ1ـ
سيدْنِي.. سيدْنِي.. بَلَدي
بْحِبَّا بِمْحَبِّةْ لُبْنانْ
هِيِّي رُوحي وْجَسَدي
وْأَحْلَى مِنْ كلّ الْبُلْدانْ
ـ2ـ
مَرَّه رِحْنا عَ الْجِسرْ
وِالْجِسرْ فَوْق الْبَحرْ
وِالشّمسْ شَقّ الْفَجرْ
عَمْ بِتْغَنِّيلُو قِصْدانْ
ـ3ـ
سْهُولا.. جْبالا.. وِالْوادي
بِتْذَكّرْنِي بِبْلادي
الأَرْض الْـ مِنْها أَجْدادي
وَدُّوا مْراكِبْ وَيْن ما كانْ
**
وعد
ألقتها إحدى تلميذاتي عام 1980، في احتفال القربانة الأولى في معهد سيّدة لبنان.
ـ1ـ
يا مِيةْ هَلا بْمُطْرانْنا.. وِبْطَلِّتُو
عَبْدُو خَلِيفِه اللِّي وَهَبْنا بِرْكِتُو
يا مِيةْ هَلا بْرَاهْباتْنا الْـ عَمْ يِتْعَبُوا
تَا نِرْتِفِعْ.. وِالْكَوْن تِكْبَرْ ضِحْكِتُو
ـ2ـ
يا مِيةْ هَلاَ بْأُمَّاتْنا وْبَيَّاتْنا
بْجِيرانْنا اللّي زَيّنُوا ساحاتْنا
بِالْـ عَلّمونا الْحَرْف والتِّهْذِيبْ
وْنَوّرُو بْعَتْم الدِّنِي طُرْقاتْنا
ـ3ـ
قُرْبانة الأُولى اللي فيها مُحْتِفِينْ
مِنْقَدِّما لْلُبْنانْ.. لِتْرَابُو الثَّمِينْ
تا تِرْجَعْ الإِلْفِه تْخَيِّمْ عَ الْقُلوبْ
وْيِرْجَعْ وَطَنَّا يْشِعّ بَينْ الْعالَمِينْ
**
توب الملاك
ألقتها إحدى تلميذاتي عام 1981، باحتفال القربانة الأولى في معهد سيّدة لبنان.
ـ1ـ
تَوْب الْمَلاكْ، الْيَوْم، نِحْنا لابْسِينْ
تَوْب الطَّهارَه.. يا سعادِتْنا
وْكِرْمالْنا الأَحْبابْ مجْتِمْعِينْ
آباءْنا.. كَهْنِةْ رَعِيِّتْنا
الْـ قِدَّامْهُنْ، يا رَبّ، مِعْتِرْفِينْ
نِكْرمْ أَبانا.. نْطِيعْ مَيْمِتْنا
مِنْ إِيدُنْ الْقُرْبانْ مِنْتِظْرِينْ
الْحاضِنْ جَسَدْ مَعْ دَمّ فادينا
الْـ كَفَّرْ بِـ صَلْبُو عَنْ خَطِيّتْنا
ـ2ـ
وْراهْباتْنا الْـ بِالْهَجْر وَعُّونا
وْعَ طَرِيق الْخَيْر مَشُّونا
طَوِّل بِعُمْرُن يا إِلـهْ الْكَوْنْ
مَعْ أَهلْنا الْـ تِعْبُوا تَا رَبُّونا
وْطَوِّلْ بِعُمْر الْـ عَلّمُونا هَوْنْ
مْعَلّماتْنا الْـ بِالْفهْم جَبْلُونا
زْهُورْ نِحْنا بْأَلْف لَوْن وْلَوْنْ
هْنِيَّالْ قَلْب الْـ رَحْ يِقِطْفُونا
لا مالْ بَدّنا.. لا دَهَبْ رَنَّانْ
بَدّنا الْمَحَبِّه تْعُودْ عَ ألأَوْطانْ
وْمِنْ هَـ الْمَحَبِّه دَوْم تِعْطُونا
**
آه يا قربانتنا
غنّاها أطفال معهد سيّدة لبنان عام 1989، على لحن "آه يا أم حمادة".
ـ1ـ
آهْ.. يا قُرْبانِتْنا
كِبْرِتْ فِيكِي مْحَبِّتْنا
لْبِسْنالِكْ تَوْب الأَبْيَضْ
وْفِرْحِتْ فِيكِي كْنِيسِتْنا
ـ2ـ
وْراهْباتْنا اللِّي رَبُّونَا
مِنْ دَمْعاتُنْ سِقْيُونَا
وْمِنْ كِتِرْ ما حَبُّونَا
سِهْرُوا عَ مَدْرَسِتْنا
ـ3ـ
حِوَّشْنا باقات الزَّهْرْ
لِلأَهْل الْـ تِعْبُوا بِالْهَجْرْ
غَمْرُونَا عَ صْدُورُن غمْرْ
وْزَرْعُوا الْحُبّ بْعَيْلِتْنا
ـ4ـ
وِبْلادِي.. بْلاد الأَرْزاتْ
هَيْدي الْـ مِنْحِبَّا بِالذَّاتْ
يَا رَبِّي بْيِكْفِي هَزَّاتْ
حِمْلِتْ إِسْمَكْ أَرْزِتْنا
ـ5ـ
أَهْلا وْسَهْلا بْكلّ النَّاسْ
الْـ شِرْبُوا مَعْنا أَطْيَبْ كاسْ
وْشَارَكُونا بِالْقُدَّاسْ
كلّ الشُّكْر بِكِلْمِتْنا
**
طفل القربانة
غناها أطفال معهد سيّدة لبنان عام 1981، على لحن أغنية " بنتي عندا لعبه".
ـ1ـ
تْناوَلْنا الْقُرْبانِه
شُو حِلْوِه الْقُرْبانِه
قِضَّيْنا السِّنِه كلاَّ
نْصَلِيلاَ وِنْهَلِّلاَ
يا طِفل الْقُرْبانِه.. يا ربي
بارِكْ هَـ الْقُرْبانِه
ـ2ـ
بَيْضَا، حِلْوِه، زْغَيُّورَه
غَامِرْ هَـ الدِّنْيِي نُورَا
حامِلْها بْإِيدُو الْمُطْرانْ
وْراهْباتْنا حَدُّو كَمانْ
وْجايِي كلّ الْمَعْمُورَه
لْعِنْدِكْ يا قُرْبانِه
ـ3ـ
وْجُودِكْ هُوِّي وْجُودِي
مِنْ أَجْلِي مَوْجُودِه
مَهْما يِطْوَلْ عُمْرِي
رَحْ قَدِّمْلِكْ زَهْرِي
تا يِفْرَحْ مَعْبُودِي
فِيِّي يا قُرْبانِه
**
قربانتنا
غناها أطفال معهد سيّدة لبنان عام 1995
ـ1ـ
قُرْبانِتْنا حِلْوِه الْيَوْمْ
شَعْشَعْ نُورَا بِالْقِدَّاسْ
وِانْشَاللَّه بِتْضَوِّي دَوْمْ
بِقْلُوبْكُنْ يا كلّ النَّاسْ
ـ2ـ
سَيِّدْنا.. يا سِيد الْكلّ
سْمِعْنا الْكِلْمِه اللِّي قِلْتَا
وِالْقُرْبانِه الْـ مِتْل الْفلّ
جُوَّات الْقَلْب شْتَلْتَا
ـ3ـ
وْراهْباتْنا الْـ زَرْعُوا الضِّحْكِه
عَ شْفافْنا.. وْعَمْ يِسْقُوها
الشَّمْعات الْـ كلاَّ بَرْكِه
ضَوُّوها وْما طِفْيُوها
ـ4ـ
وِالأَهْل الْـ سِهْرُوا عْلَيْنا
وْصَلُّوا وْصَامُوا سْنِين سْنِينْ
مِنْقَدِّمْلُنْ عِينَيْنا
مَعْ باقِةْ وَرْد وْنسْرِينْ
**
زغار نحنا
غناها أطفال معهد سيدة لبنان عام 1983
ـ1ـ
أَهْلا وْسَهْلا فِيك سَيِّدْنا
عَبْدُو خَلِيفِه شِعْلِة الإِيمانْ
زْغار نِحْنا.. الْيَومْ عَيَّدْنا
لَمّا زْرَعِت بِقْلُوبْنا الْقُرْبانْ
ـ2ـ
وْأَهْلا وْسَهْلا بْكلّ كَهْنِتْنا
وْراهْباتْنا الْـ بِالْفهْم جَبْلُونَا
مْعَلّماتْنا.. وْأَفْرادْ عَيْلِتْنا
وْأَهْلنا الْـ تِعْبُوا تا رَبُّونا
ـ3ـ
زْغارْ نِحْنا كْتِيرْ يا رَبِّي
مِتل الزّهُور الْـ عَم بْتِسْقِيهَا
مْنُوعْدَكْ.. بِقْلُوبْنا نْخَبِّي
الْقُرْبانِةْ اللِّي تْجِسَّدِتْ فِيها
ـ4ـ
وِمْنُوعْدَكْ نِبْقَى عَ طُول الدَّهْرْ
أَحْرارْ مِتْل الضّو.. مِتْل العِطْرْ
تا كلّ ما عَتْم اللَّيالي جارْ
نْكُون نِحْنا لِلْخَليقَه فَجْرْ
ـ5ـ
ردّ عَنْ لُبْنان هَـ الضَّرْباتْ
وْخَلِّي الْعَلَمْ مَرْفُوع بِالْعالِي
وْبَلْسِمْ جْرُوح طْفال مَعْ إِمَّاتْ
رَكْعُوا وْصَلُّوا لإسْمَك لْيالي
**
يا سيّدي يسوع
غنّاها أطفال معهد سيّدة لبنان عام 1991، على لحن أغنية "حنا السكران" للسيّدة فيروز.
ـ1ـ
كانْ الزَّمان وْكانْ
قَلْبِي مِشْتاقْ كْتِيرْ
يِتْناوَلْ هَـ الْقُرْبانْ
وِبْأَعْلَى سَما يْطِيرْ
وْيِفْرَحْ فِيِّي الْمُطْرانْ
راهْباتْنا وِالإِخْوانْ
مَعْ أَهْلِي وْكل الْجِيرانْ
أُوعا تِنْسُوني
أُوعا تِنْسُوني
ضَلُّوا ازْرَعُوا بْقَلْبِي الْقُرْبانْ
ـ2ـ
مْنِتْذَكَّرَكْ لُبْنانْ
بْهَـ الْعِيد وْكلّ عِيدْ
يا مَوْطن الإِنْسانْ
رَحْ تِرْجَع مْن جْدِيدْ
نِحْنا بْأَرْض الْهُجْرانْ
مْنِسْأَلْ رَبّ الأَكْوانْ
حَتَّى يْرِدَّكْ عالي وْمِنْصَانْ
ـ3ـ
يا سَيِّدي يَسُوعْ
يا الْـ مِتْلي طفْل زْغِيرْ
دَاوِي الْقَلْب الْمَوْجُوعْ
لا تْخَلِّي الْحَرْب تْصِيرْ
عَمْ يِنْهار الزَّمانْ
وْيِتْعَذَّب الإِنْسانْ
دَخْلَكْ سَاعِدْ إِبْن الإِنْسانْ
**
يوسفنا المختار
غنّاها أطفال معهد سيّدة لبنان عام 1993
ـ1ـ
أَهْلا بْسَيِّدْنا الْمُطْرانْ
أَهْلا بْيُوسِفْنا الْمُخْتارْ
نَاوَلْنا بْإِيدُو الْقُرْبانْ
الْـ بارَكْ فِيها وْلاد زْغارْ
ـ2ـ
وْأَهْلا بْراهْبات الْعَيْلِه
زَنْبَق مارْ يُوسفْ بِالْهَجْرْ
مْعَلْماتْنا شَالُوا الشَّيْلِه
وْعَطْيُونا مْن عْلُومُنْ غُمْرْ
ـ3ـ
وْيا أَهْلا وْسَهْلا بِالأَهْل
الْـ رَبُّونَا عَ دَيَّاتُنْ
وِسْع الْبَحْر وْوِسْع السَّهْل
يَا رَبِّي زِيد حْياتُنْ
ـ4ـ
دَخْلَكْ يا يسُوعْ
تَحْت جْناحَكْ خَبِّينا
عَنَّكْ ما فِي رْجُوعْ
مَهْما بْعدْنا وِخْطِينا
مُشْ مُمْكن نْجُوعْ
بْخُبْزَكْ رَحْ بِتْغَذِينا
يَلاَّ نْضَوِّي شْمُوعْ
كِرْمال القُرْبانْ
وْأَرْزِتْنا بْلُبْنانْ
الْـ بَعْدَا بِتْفَكِّرْ فِينَا
**
راهبات الأرز
غنّاها أطفال مدرسة مار مارون عام 1996
ـ1ـ
هِلِّك وْمِسِتْهِلِّكْ
يَا قُرْبانِه اشْتَقْتِلِّكْ
ضَاوِي وِجِّكْ مِتْل الشَّمْسْ
مِنْ إِعْجابي رْكَعْتِلِّكْ
ـ2ـ
شِفْتِكْ بِـ إِيد الْمُطْرانْ
بِتْشِعِّي قْداسِه وْإِيمانْ
قِلتْ: ما بِرْضَى إِنْسَانْ
قَبْلي أَنا يُوصَلِّكْ
ـ3ـ
رَاهْباتِي.. رَاهْبات الأَرْزْ
خَلُّونِي فِيكِي إِعْتَزّ
بؤمِنْ فِيكِي وْما بِنْهَزّ
وْفَوْق الإيمان بْجِلِّكْ
ـ4ـ
أَهْلي اللِّي بْحِبُّن كْتِيرْ
عَ حُبِّكْ رَبُّونِي زْغِيرْ
عْطِيني جْناحِكْ حَتَّى طِيرْ
وْوَسِّعْ بِالْقَلبْ مْحَلِّكْ
**
فادينا
غناها أطفال معهد سيّدة لبنان عام 1983، على وزن ترتيلة "دقي وغنّي يا أجراس".
ـ1ـ
دِقِّي.. دِقِّي يَا أَجْراسْ
الْيَوْم قْبِلْنا فَادِينا
هَللّي خَلَّص كلّ النَّاسْ
وْجايِي تا يِسْكُنْ فِينَا
ـ2ـ
أَهْلا وْسَهْلا بِالْمُطْرانْ
عَبْدُو خَلِيفِه مَعْنا
وْبِالْكَهْنِه.. وْكل الرِّهْبانْ
وْبِالنَّاس الْـ عَمْ تِسْمَعْنا
ـ3ـ
رَاهْباتْنا الْـ عَمْ تِهْدِينَا
عَ الْخَيْر وْحُبّ الأَوْطانْ
هِنِّي اللِّي زَرْعُوا فِينَا
مْحَبِّةْ أُسْترالْيَا وْلُبْنانْ
ـ4ـ
مْنِطْلُبْ مِنَّكْ يَا يَسُوعْ
بْأَرْض الْغُرْبِه تِدْعَمْنا
ما عَادْ فِي بِالْعَيْن دْمُوعْ
وْمِينْ غَيْرَكْ رَحْ يِرْحَمْنَا
**
الأخت القديسة
غنّاها أطفال معهد سيّدة لبنان تكريماً للأخت أوديت مبارك.
ـ1ـ
هاتُوا زَقْفِه.. زَقْفِه كْبِيرِه
لأوديتْ الأُخت الْقدِّيسِه
الْـ صَارِتْ بَخُّورَه وِدْخِيرِه
وْشَمْعَه تْضَوِّي بْقَلْب كْنِيسِه
ـ2ـ
وْقُولُوا: أهْلا بِـ طَلِّتْها
جايِي تا تْمَثِّلْ عَيْلِتْها
بالدَّيْر.. الْـ خَلَّى غَلِّتْها
تْصِير حْقُول.. تْصِير بْيادِرْ
يِسْقِيها الشّلاَّل الْهادِرْ
إيمانْ.. بْإِيمانا يْفاخِرْ
يِزْرَعْ طُرْقاتا بْأَزْهارُو
يِكْتُب عَ صَفْحاتا خْبارُو
يْزَيِّنْها بْضِحْكات زْغارُو
أُوديت الأخت القدِّيسِه
**
مشيرتنا
غنّاها أطفال معهد سيّدة لبنان تكريماً للأخت أوديت مبارك.
ـ1ـ
لِمِّنْ شِفْتِكْ صار الْعِيدْ
عِيدَيْن.. وْفاض مْواعيدْ
مِنْ فَرْحِةْ قَلْبِي صِفَّيْتْ
صَلِّيلِكْ تَا الْعُمْر يْزِيدْ
ـ2ـ
طَلِّة وِجِّكْ حِلْوِه كْتِيرْ
وْضِحْكاتِكْ كلاَّ تْباشِيرْ
ضْحَكِيلي.. تا نِتْفِه طِيرْ
وْجِبْلِكْ بَدْر بْعِيد بْعِيدْ
ـ3ـ
يا أُوديت الْـ كِلِّكْ ذَوْقْ
بِغْيابِكْ جَرَّحْنا الشَّوْقْ
وْبِوْجُودِكْ صِفَّيْنا فَوْقْ
وْجُودِكْ عَيَّشْنا مْنِ جْدِيدْ
ـ4ـ
يا مُشِيرِتْنا الأَيَّامْ
ظَلْمِتْنا.. وْما عِدْنا نْنامْ
لُبْنان بْصَدْرُو الآلامْ
وْنِحْنا مْدَوَّبْنا التّنْهيدْ
ـ5ـ
راهباتْنا الْـ بِالسَّيْدِه هَوْنْ
أَللّـه عَمْ يِعْطِيهُنْ عَوْنْ
تا صَارُوا بْعِينَيْن الْكَوْنْ
نُورْ.. وْبِكْنِيسِتْنا نْبِيدْ
**
بدر منوّر
غنّاها أطفال معهد سيّدة لبنان تكريماً للأخت أوديت مبارك.
ـ1ـ
نِحْنا مَهْما نِزْغَرْ
بِـ حُبِّكْ عَمْ نِكْبَرْ
يا أُوديتْ الأَكْبَرْ
مْنِ الْبَدْر الِمْنَوَّرْ
ـ2ـ
مِنْ نَبْعِكْ سْقِينا
مْحَبِّه تْزيد مْحَبِّه
وْقَداسِه تْخَلِّينا
نْشُوف بْعَتْم الْغُرْبِه
ـ3ـ
نِحْنا نْطَرْنا قْدُومِكْ
قْدُومِكْ كان الْفَرْحَه
تا نْحَوِّش نْجُومِكْ
وْنِغْزُل مِنَّا طَرْحَه
**
أحلى غنيّة
غنّاها أطفال معهد سيّدة لبنان تكريماً للأخت أوديت مبارك.
ـ1ـ
رَحْ غَنِّي أَحْلَى غِنِّيِّه
لِلتَّوْب الْـ كِلُّو إِيمانْ
جِيتِي مِن لُبْنان هْدِيِّه
ما أَحْلَى هْدِيِّةْ لُبْنانْ
ـ2ـ
رَحْ غَنِّي تَا الْفَرْحَه تِكْبَرْ
وِيْصَفِّي هَـ الدَّيْر مْنَوَّرْ
أرز الرَّبّ الْـ لَوْنُو أَخْضَرْ
زِدْتِي عَ أَلْوانُو لْوانْ:
ـ3ـ
اللَّوْن الأَوَّل لَوْن تْيَابِكْ
وِالتَّانِي صَفْحات كْتابِكْ
وِالتَّالِتْ شَمْعات شْبابِكْ
الْـ ضَوِّتْ عَتْمات الإِنْسَانْ
**
التوب الأزرق
غنّاها أطفال معهد سيّدة لبنان عام 1985.
ـ1ـ
بِهَـ الْكَوْن كِيفْ ما نْرُوحْ
التَّوْب الأَزْرَقْ عَمْ بِيلُوحْ
وْيِكْتُبْ إِسْمِك وَيْن ما كانْ
إِنْتِي يا "سيّدِة لُبْنانْ"..
ـ2ـ
أَحْلى الأَيام الْـ عِشْناها
بَيْن صْفُوفِكْ قِضَّيْناهَا
الْمحِبِّه.. رَاهْبات الْعَيْلِه
خَلُّونا نَعْرِف مَعْناها
ـ3ـ
حْمِلْنا مِشْعَلْنا وِمْشِينَا
بِـ قُوِّةْ يَسُوعْ فَادِينا
تْعِلَّمْنا حُبّ الأَوْطانْ
وْحُب الأَرْض الْـ فِيها رْبِينَا
**
راهبة منصانة
غنّاها أطفال معهد سيّدة لبنان تكريماً للأخت فيرونا زيادة عام 1987
ـ1ـ
مِنْقِلِّكْ: أَهْلا وْسَهْلا
يا راهْبِتْنا الْمِنْصَانِه
لا تْقُولُوا: النّجْمِه أَحْلَى
فِيرُونا بْتِسْوَى تْمانِي
ـ2ـ
مِنْقِلِّكْ: أَهْلا وْسَهْلا
بْمَدرسِتْنا الْعُمْرانِه
يَللِّي بْسِيدْنِي عَمْ تِعْلا
بْإِسْم الشَّعْب اللّبْناني
**
سكر زيادة
غنّاها أطفال معهد سيّدة لبنان تكريماً للأخت فيرونا زيادة عام 1987
ـ1ـ
فيرونا إِسْمِكْ
سِكَّر زْيادِه
رَحْ إِحْمُلْ رَسْمِكْ
بْقَلْبِي زُوَّادِه
ـ2ـ
وْقِلِّك حْمِينِي
مْنِ الشَّر حْمِينِي
يا أَحْلى زِينِه
بِعْيُون بْلادِي
**
يا مشيرة
غنّاها أطفال معهد سيّدة لبنان عام 1987، تكريماً للأخت فيرونا زيادة، على لحن أغنية "بكتب إسمك يا حبيبي" للسيّدة فيروز.
ـ1ـ
بِكْتُبْ إِسْمِكْ يا مُشِيرَه
بِـ كُلّ السَّاحاتْ
حابِبْ يِبْقَى يا مُشِيرَه
عِيد وْغِنِّيَّاتْ
حَتَّى بْلادِي تِقْشَعُو
وَرْدِه حَمْرَا مْفَتَّحَه
يْسَمِّعَا وِتْسَمِّعُو
قِصَّه تْفَرِّحَا
ـ2ـ
وِحْلِفْتِلِّكْ إِنِّي
ما نْسِيتَا بِغْيابِي
أَرْضِي هَـ الْمِنْصَابِه
وِمْصَابَا مْجَنَّنِّي
إِنْتِي يا مُشِيرَه
اللِّي بْيِنْسَى أَوْطانُو
بِتْزِيدِي إِيمانُو
بْإِيمانِكْ قَدِيرَه
ـ3ـ
بِحْيَاتِكْ عَمْ إِحْلِفْ
لا تْقُولي قِدَّيْش
بْحِبِّك وْما بَعْرِفْ
لَيْش دَخْلِكْ لَيْشْ؟
بِكْتُبْ إِسْمِكْ يا مُشِيرَه....
**
ضوّي
غنّاها أطفال معهد سيّدة لبنان تكريماً للأخت فيرونا زيادة عام 1987
ـ1ـ
شُو حِلْوِه هَـ الطَّيَّارَه
الْـ جِيتِينَا فِيها زْيارَه
وَطَنَّا اللِّي مِنْحِبُّو
وَدَّاكِي لْعِنَّا مْنارَه
ضَوِّي يا أَحْلَى شَمْعَه
بَرْكِي بِتْجِفّ الدَّمْعَه
وْبِتْمَحِّي اللَّيْل بْنارَا
ـ2ـ
يا أَهْلا بْطَلِّه حِلْوِه
قِدَّاما الْبَدْر بْيِضْوِي
فيرونا الأخت القُدْوِه
بْتِرْفَع الرَّاس خْبارَا
ـ3ـ
بِحْياتِكْ يا فِيرُونا
قُولِيلُنْ تا يْزُورُونا
ماري آميل.. عْيُونَا
رَحْ تِفْرَح بِأَزْهارَا
ـ4ـ
نِحْنا كْبِرْنا بِالْغُرْبِه
وْجُوَّات الْقَلب مْحَبِّه
لِبْلاد الأَرْز الْخصْبِه
الْـ نَقِّتْنا نْكُون بْدارَا
**
زيادة.. مبارك
غنّاها أطفال معهد سيّدة لبنان عام 2000، يوم زارتنا الأم الرئيسة فيرونا زيادة والأخت المشيرة آن ماري مبارك.
ـ1ـ
أَهْلا وْسَهْلا بْفِيرُونا
الأُم الْـ مِتْلا ما بِيصِيرْ
وْآنْ ماري دَخْل عْيُونَا
مُشِيرَه، وِالْفِعْل كْبِيرْ
ـ2ـ
زْيادِه.. مْبَارَكْ.. شُو حِلْوِينْ
فِرْحِت سِيدْني بْطَلِّتْهُنْ
وْنِحْنا فِيهُنْ فِرْحانِينْ
وِسْع الدِّنْيِي مْحَبِّتْهُنْ
ـ3ـ
إِجُوا لْعِنَّا أَحْلَى تْنَيْنْ
تَعُوا نْخَبِّيهُنْ يا زْغارْ
وِحْدِه بْعَيْن.. وْوِحْدِه بْعَيْنْ
وْما مِنْرِدُّنْ شُو ما صَارْ
**
فرحان قلبي
ألقتها إحدى تلميذاتي يوم زارتنا الأم الرئيسة فيرونا زيادة والأخت المشيرة آن ماري مبارك، عام 2002
ـ1ـ
فِرْحانْ قَلْبِي كْتِيرْ
بْطَلِّةْ فِيرُونا الأُمّ
هَـ الصَّعْب مِتْلا يْصِيرْ
بِتْشِيلْ عَنَّا الْهَمّْ
ـ2ـ
كْبِيرْ جِنْحَا كْبِيرْ
تَحْتُو الْبَشَرْ تِلْتَمّْ
وْآنْ ماري بِتْشِيرْ
لِلْخَيْر حَتَّى يْعِمّْ
وْبِتْوَزِّع تْباشِيرْ
وْلِمّ يَا قَلْبِي لِمّْ
**
فيرونا مع آن ماري
ألقتها إحدى تلميذات معهد سيّدة لبنان هاريس بارك عام 2002
ـ1ـ
وَصِّتْنَا الرّاهْبِه أَيْرِينْ:
خَلِّيكُنْ هَيْكِي حِلْوينْ
تَا رَيّسِتْنا الأُمّ تْشُوفْ
بْهَـ الْمَعْهَدْ زَهْر بْسَاتِينْ
ـ2ـ
لْبِسْنا جْدِيدْ.. وْقِفْنا صْفُوفْ
وْغِنَّيْنا أَحْلَى تْلاحِينْ
وْقِلْنَا كِلْمِه عَ الْمَكْشُوفْ:
فِيرُونا مَعْ آنْ ماري
مِينْ مِتْلُنْ يا أَللَّـه مِينْ؟
**
أحلى هديّة
غنّاها أطفال معهد سيّدة لبنان عام 2002
ـ1ـ
بَدّْنا نْغَنِّي غِنِّيِّه
للأُمّ اللِّي مِنْحِبَّا
فِيرُونا.. أَحْلَى هْدِيِّه
حَبِّتْنا وَحَبِّتْ رَبَّا
ـ2ـ
فْرِحْنَا كْتِير بْطَلِّتْها
فْرِحْنَا كْتِير بْضِحْكِتْها
وِسْع الدِّنْيِي عَيْلِتْها
وْخَبِّتْ عَيْلِتْها بْقَلْبَا
ـ3ـ
أَهْلاَ بْمُشِيرِتْنا كْمانْ
آنْ مارِي.. أَرْزِةْ لُبْنانْ
مْبَارَكْ إِسْمَا وَيْن ما كانْ
وْشَعْشَعْ بِالدِّنْيِي حُبَّا
**
فيرونا أغلى الغوالي
غنّاها أطفال معهد سيّدة لبنان هاريس بارك عام 2002
ـ1ـ
رْفَعْنا إِيدَيْنَا بِالْعَالِي
تَا نْحَيِّي الأُمّ الْمَهْيُوبِه
وتَا نْحَوِّش نِجْم اللَّيالِي
هْدِيِّه لْفِيرُونا الْمَحْبُوبِه
ـ2ـ
فيرونا أَغْلَى الْغَوالِي
رَايِه.. بْهَـ الدِّنْيِي مَنْصُوبِه
عَ طُول بْسِيدْنِي بِتْلالِي
وِبْتَضَوِّي عَتْمات دْرُوبي
ـ3ـ
نِحْنَا قِدَّامَا خِيَّالِه
نِحْنَا كِلْماتَا الْمَكْتُوبِه
وْهِيِّي الأَحْلامْ اللِّي بْبَالي
وْهِيِّي الأُمُومِه الْمَطْلُوبِه
**
إسمك فيرونا زيادة
غنّاها أطفال معهد سيّدة لبنان هاريس بارك عام 2002
ـ1ـ
هِسّ.. هِسّ.. عَ السِّكَّيْتْ
بَدِّي وَشْوِشْها كِلْمِه
بَدِّي قِلْلاَّ: شُو حِبَّيْتْ
إِنْدَهْ: فَلْتِحْيَا إِمِّي
ـ2ـ
إِنْتِي الأُمّ الْـ حِبَّيْتَا
وِبْعِينَيِّي خِبَّيْتَا
فْرَشْتِلاَّ قَلْبِي بَيْتا
يَا قَلْبِي عِيش بْنِعْمِه
ـ3ـ
إِسْمِكْ فِيرُونا زْيادِه
أَرْزِه خَضْرَا مْنِ بْلادِي
راهْبِه.. سِكَّرْها زْيادِه
طَعْمِتْها أَطْيَبْ طَعْمِه
**
حفلة زجل
أحياها أطفال معهد سيّدة لبنان هاريس بارك عام 2002 ترحيباً بالأم الرئيسة فيرونا زيادة
ـ1ـ
مِنْ عِبْرِينْ جَايِي لْعِنَّا
تْطَمِّنَّا عَنْ مَوْطَنَّا
فِيرُونا زْيادِه عَ طُولْ
بْطَلِّتْها بِتْجَنِّنَّا
ـ2ـ
بَدِّي إِتْحَدَّى الشَّبابْ
بْرَدِّه.. يِحِسْبُولا حْسَابْ
آنْ مارِي.. آيِه بِكْتَابْ
اللِّي بْيِقْرِيها بْيِتْهَنَّا
ـ3ـ
ما فِيكي تِتْحَدِّي شَبّْ
أَحْسَنْ ما بَارُودِي يْهِبّ
فيرونا غِنِّيِّةْ حُبّ
الدِّنْيِي فِيهَا بْتِتْغَنَّى
ـ4ـ
شُو بُو صَوْتَكْ مُشْ مَظْبُوطْ
وْعَمْ تِمْشِي مِتْل الْقَبُّوطْ
آنْ مَارِي ما بَدَّا شْرُوطْ
مُشِيرَه.. ما فِي مِنَّا
ـ5ـ
فِيرُونا مَعْ آنْ مارِي
هْدِيِّه مِنْ عِنْد الْبَارِي
لِمِّنْ حَلُّوا بِدْيَارِي
قَلْبِي مْنِ الْفَرْحَه غَنَّى
**
فرحانين
غنّاها أطفال معهد سيّدة لبنان عام 1987 بمناسبة تناولهم القربانة الأولى.
ـ1ـ
كلّ النَّاس فِرْحُوا مَرَّه
وْنِحْنا عَمْ نِفْرَح تْنَيْنْ
فِرْحانِين بْشَهْر الْعَدْرَا
وِبْقُرْبانِه تْناوَلْناها
بَيْضَا.. وْفِي إِلْها جْناحَيْنْ
ـ2ـ
طِيري، طِيرِي يا قُرْبانِه
فَوْق الْبَيتْ اللِّي رَبَّانِي
فَوْق الدَّيْر الْـ ما لُو تاني
يَللّي راهْباتُو حَبُّونِي
وْمَسْحُولي الدَّمْعَه مْن الْعَيْنْ
ـ3ـ
طِيري، طيري فَوْق كْنِيسِه
عَ إِسْم الأُم الْقِدِّيسِه
مْنِ مْحَبِّتْنا عَبِّي الْكِيسِه
وْرِشِّي فَوْق بْلادي حَتَّى
الْحُبّ يْفَرِّخ عَ الْمَيْلَيْنْ
ـ4ـ
يا يَسُوع الطّفل الْقاعِدْ
بِالْقُرْبانِه.. وْحَدَّكْ سَاجِدْ
إِيدي صَوْب الْمَذْبَحْ مادِدْ
وْفاتِحْلَك قَلْبي وْعَم قِلَّكْ:
أَهْلا وْسَهْلا وْمَرْحبْتَيْنْ
**
نطرناك
غنّاها أطفال معهد سيّدة لبنان عام 1987 بمناسبة تناولهم القربانة الأولى.
ـ1ـ
يا يَسُوع الْـ بِالْقُرْبانْ
تْجسَّدْت لْخَيْر الإِنْسانْ
إِنْت الْحُبّ الْـ ما لُو حْدُودْ
سَيِّدْ.. وِبْمِذوَدْ مَوْلُودْ
وْقدَّامَكْ رَكْعِت تِيجانْ
ـ2ـ
نْطَرْناكْ.. نْطَرْنا مْن زْمانْ
تِسْكُنْ هَـ الْقَلبْ الْفَرْحانْ
طْفال زْغار وْرَح مِنْطِيرْ
مْنِ الْفَرْحَه مِتْل عْصَافِيرْ
عِمْلِتْ مِنْ حُبَّكْ بسْتانْ
**
متل النجمة
غناها أطفال معهد سيّدة لبنان عام 1994 بمناسبة تناولهم القربانة الأولى.
ـ1ـ
هَـ الْقُرْبانِه الْمُضْوِيِّه
مِتْل النّجْمِه بِالْقدّاسْ
خِبَّيْتَا بْقَلْبِي هْدِيِّه
تَا إِهْدِيها لْكِل النَّاسْ
ـ2ـ
بِـ قَلْبِي فِي دَيْر زْغِيرْ
بِيضَوِّي.. وْفِي شَمْع كْتِيرْ
بْمَدْرِسْتِي.. وِبْرَاهْباتِي
بْيِكْبَرْ أَكْتَرْ مَنُّو كْبِيرْ
ـ3ـ
أُمِّي كْبِيرِه فَرْحِتْها
وْبَيِّي بِيوَزِّعْ بَسْماتْ
هَـ الْقُرْبانِه.. طَلِّتْها
خَلِّتْنِي عِيش الْحَيَاةْ
ـ4ـ
فِيها شُو بِقْشَعْ حالِي
لْبِسْتِلاَّ الأَبْيَض كَمانْ
هَنَّانِي عَمِّي وْخالي
وْسِتِّي وْجَدِّي وِالْجِيرانْ
**
أحلى زوّادة
غناها أطفال معهد سيّدة لبنان عام 1998 بمناسبة تناولهم القربانة الأولى
ـ1ـ
خِبَّيْت بْقَلْبِي الْقُرْبانْ
خِبَّيْتُو زْيادِه
حَمَّلْني إِبْن الإِنْسَانْ
أَحْلَى زُوَّادِه
ـ2ـ
الْمطْرانْ حامِلْهَا وِالنُّورْ
فِرْحان بْمَلْقَى الْبَخُّورْ
زَور بْلادي وْاَهْلِي زُورْ
بَاللَّه يا فادي
ـ3ـ
رَاهْباتِي.. رَاهْبات الطُّهْر
رَبُّونا بِبْلاد الْهَجْرْ
رَحْ جَمِّعْ باقات الزَّهْر
لْراهبات بْلادي
**
الكنغرو
غَنّاها أطفال معهد سيدة لبنان عام 1983
ـ1ـ
الْكَنْغَارُو عَمْ بِينِطّ
حامِلْ إِبْنُو بِـ بَطْنُو
وْيا هْنِيّالُو طَيْر الْبَطّْ
قَاعِدْ يْرَبِّي إِبْنُو
ـ2ـ
انْتِبْهُوا عْلَيْنا كْتِير كْتِيرْ
الْغُرْبِه مَصْدَر لِلتِّعْتِيرْ
الْـ عَمْ بِيرَبِّي حَظُّو كْبِيرْ
بِالْفَرْحَه مْعَبَّى صَحْنُو
ـ3ـ
الْحَبِّه الْـ عَمْ تِزْرَعُوها
بِالْغُرْبِه وِتْدارُوها
مْأَكّدْ رَحْ تِحِصْدُوها
وِالْقَمْح بْيِحْلَى طَحْنُو
ـ4ـ
يا رَبّي.. أُمِّي وْبَيِّي
هِنِّي رُوحي وْعِينَيِّي
رَحْ قَدِّمْلُنْ عِيدِيِّه
شِعْرِي اللِّي حَبُّوا لَحْنُو
**
أم
غناها تلامذة سيّدة لبنان عام 1995، يوم وداع الأخت كونستانس باشا.
ـ1ـ
مِنْ يَوْم اللِّي كِنَّا زْغارْ
وِعْيُونِكْ علَيْنا
سهْرانِه.. تا نْصَفِّي كْبارْ
وِالْفَرْحَه بْعِينَيْنا
ـ2ـ
يا رْفِيقِةْ يَسُوعْ
لَوْ مَهْما الْعِلْم نْلِمّ
لْطَلّتِكْ يا هَـ الأُمّ
رَحْ مِنْضَلّ نْجُوعْ
**
راهباتنا
غناها أطفال معهد سيّدة لبنان عام 1987
ـ1ـ
رَبِّي.. شُو ما صَارْ
خَلِّي دَيْرَكْ يِعْمَرْ
بِـ مَهْجَرْنا وْيِكْبَرْ
وِبْرَاهْباتُو يِفْخَرْ
رَبِّي.. شُو ما صَارْ
ـ2ـ
رَاهْباتْنا رَبُّونَا
عَيْلِه كْبِيرِه حِلْوِه
رَاهْباتْنا خَلُّونا
مِتل الشّمسْ نِضْوِي
ـ3ـ
نِحْنا بْدَيْرَكْ شَمْعَه
عَ خْدُودَا فِي دَمْعَه
شَتِّي عْلَيْها نُورْ
تا تْضَوِّي الدَّيْجُورْ
**
لغات
غنّاها أطفال معهد سيّدة لبنان عام 1983، احتفاء بيوم التعددية الثقافية في أستراليا.
ـ1ـ
بْمَدْرَسِتْنا طْفال زْغارْ
رَحْ يِحْكُوا بِالطِّلْيَانِي
فْتَحُوا دِينَيْكُنْ يا كْبارْ
بْهَـ السَّهْرَه اللُّغات كْتارْ
وْصَعْب نْتَرْجِمْ لُبْناني
ـ2ـ
وْهَلَّقْ بِالإسْبَنْيُولِي
رَحْ يِحْكِي الصَّفّ الأَوَّلْ
شُو صَايِبْكُنْ.. قُولُولِي
كلّ الإِشْيَا مَعْقُولِه
مْنِ زْمان الْماضِي تْحَوَّل؟!
ـ3ـ
إِجَا دَوْر الْمالْطِيزِي
الصَّفّ التَّانِي.. هْنِيَّالَكْ
لُبْنانِي وْإِنِكْلِيزِي
وْمالْطِيزِي يا عَزِيزِي
أَللّـه يْصَبِّرْ أَحْوالَكْ
ـ4ـ
الصَّفّ التَّالِتْ يا دِلِّي
رَحْ بِيغَنِّي كْرُووَايْشِنْ
قُولُوا: أَهْلا بْهَـ الطَّلِّه
هُوِّي الْمَوْسَم وِالْغَلِّه
وْبَدُّو نِتْفِةْ أَتِّنْشِنْ
ـ5ـ
فْرِنْسَاوِي؟.. قَالُوا: مْأَكَّدْ
الرَّابِعْ رَحْ بِيغَنِّي شْوَيّ
تا حَتَّى الْغَيْم الأَسْوَدْ
نِتْفِه وْنِتْفِه يِتْبَدَّدْ
وِتْطلّ الدَّبْكِه عَ الْحَيّ
ـ6ـ
وِالصّف الْخامِس مسْكِينْ
حافِظْ نِتْفِةْ يُوناني
وْحابِب يْقُولُنْ.. تخْمِينْ
مَخْجُول مِنْكُنْ يا حِلْوينْ
هَاتُوا زَقْفِه حِرْزَانِه
ـ7ـ
يا سادِسْ شُو عَ بالَكْ
الإنْكلِيزِي مَفْهُوم مْنِيحْ
عَ الْمَسْرَحْ نَفِّضْ حالَكْ
وْحَتَّى يْجِنُّوا بْأَقْوالَكْ
لازِم مِتْل الدِّيك تْصِيحْ
**
أيام الأسبوع
كتبت هذه الأغنية خصيصاً لتعليم الأطفال المغتربين أسماء أيام الأسبوع.
ـ1ـ
أَيَّام الأُسْبُوعْ سَبْعَه
نِشْكُرْ أَللَّـه مُشِ طْوالْ
رَوْعَه أْسَامِيهُنْ رَوْعَه
وِانْشَاللَّـه يْضَلُّوا بِالْبالْ:
ـ2ـ
يَوْم الأَحَدْ لِلْقدَّاسْ
وِلْمَدْرَسِتْنَا الإِثْنَيْنْ
وْيَوْم الثُّلاثاءْ يا ناسْ
مِتلْ خَيُّو الأَرْبِعاءْ
دَرْس وْشَقَا عَ الْمَيْلَيْنْ
ـ3ـ
وْبَعْد الْخَمِيسْ وِالْجُمْعَه
السَّبْت بْيِعْطِينَا الأَحْلامْ
مْنِرْتاحْ نِتْفِه وِبْسُرْعَه
بْتِرْجَعِ تْكِرّ الأَيَّامْ
**
طل العيد
غناها أطفال معهد سيّدة لبنان عام 1985، على لحن أغنية "الليله عيد".
ـ1ـ
طَلّ الْعِيدْ
طَلّ الْعِيدْ
مْغَارَه وْطفْل جْدِيدْ
قَلْبِي صَارْ
أَحْلَى مْزارْ
شْمُوعُو عَم بِتْزيدْ
ـ2ـ
جَايِي إِبْن الإِنْسانْ
جَايِبْ حُبّ وْحَنانْ
عَلِّقْ نِجْمِه بِالْبَيْتْ
وْعَبِّي قِنْدِيلَكْ زَيْتْ
وْقِلُّو: يا طفْل الْعِيدْ
خْلِقْنِي.. خْلِقْنِي مْن جْدِيدْ
تَا يِحْلا عُمْرِي وِيْزَهِّرْ بِـ عِيدَك مْوَاعِيدْ
**
كونستانس
ألقتها إحدى تلميذاتي يوم وداع الأخت كونستانس الباشا، عام 1995
ـ1ـ
آخْ مِنَّكْ يا دَهْرْ
فِرْفَطتْ باقاتْ الزَّهْرْ
هَـ الزَّهْرة الْـ صَارتْ حلْم
ضِيَّعِتْها.. وْضاع الْعُمرْ
ـ2ـ
كُونستانْس.. يا نُور الْعلْم
كُونْستانسْ.. يا أَغْلَى نِدرْ
وْجُودِكْ بِغُرْبِتْنا سِلمْ
غْيابِكْ قَهرْ.. وَاللَّـه قَهرْ
**
كوني
غناها أطفال معهد سيّدة لبنان عام 1995، يوم وداع الأخت كونستانس باشا، وهي على لحن أغنية "ودي يابحر ودّي".
ـ1ـ
وَدِّي يا بَحرْ وَدِّي
"كُونِي" رَحْ بِتْوَدِّعْنا
بِالْغُرْبِه انْزَرْعِتْ وَرْدِه
وِالْوَرْدِه كانِتْ مَعْنا
ـ2ـ
قِلْلاّ: رَحْ نِشْتاق كْتِيرْ
حْجار السَّيْدِه بْتِسْمَعْنا
حَبِّتْنا وِالْقَلْب كْبِيرْ
مِنْ دُونا وَاللَّـه ضِعْنا
**
زهرة
غناها أطفال معهد سيّدة لبنان عام 1995، يوم وداع الأخت كونستانس باشا.
ـ1ـ
عِنْدِي زَهْرَه رِبَّيْتَا
وْدَمْعات الْعَيْن سْقَيْتَا
بَدِّي قَدِّمْها هْدِيِّه
للأُخْت اللِّي حِبَّيْتَا
ـ2ـ
كُونْستانْس.. اللِّي هِدْيِتْنَا
أَحْلَى طَلِّه.. وْحَبِّتْنَا
يَا زَهْرَه غِلِّي بِالإِيدْ
إِيدَا يَاما نَشْلِتْنا
**
إسما وطن
ألقاها أحد الطلاب يوم وداع الأخت مادلين أبو رجيلي، عام 1995.
ـ1ـ
كانْ يا ما كانْ
كانْ في رَاهْبِه
عَمْ تِحْلَم بْلُبْنانْ
وْكانْ فِي غُرْبِه
بِتْعَذِّب الإِنْسانْ
ـ2ـ
وْصَار الْعَذَاب يْزِيدْ
وِالنَّاس يِنْسُوا الْعِيدْ
وَينْها الـ إِسْما وَطَنْ
تُوقَفْ بِـ غُرْبِتْنا
تِمْسَح بِـ إِيدَيْها الْمِحَنْ
وْتِبْنِي مَدِرْسِتْنا؟
ـ3ـ
الْعِينَيْنْ نَطْرِتْها
الِقْلُوب نَطْرِتْها
يا سَيّدِةْ لُبْنانْ
ما بْتِنَّسَى مادْلانْ
لا تْفَكّري الْبُنْيانْ
بِيطالْ قَامِتْها
**
مادلين القديسة
غناها أطفال معهد سيّدة لبنان عام 1995، يوم وداع الأخت مادلين أبو رجيلي.
ـ1ـ
قَطْفُوا الرَّاهْبِه اللِّي مِنْحِبَّا
وْزَرْعُوها بِقْلُوب جْدادْ
مادْلين اللِّي خَلِّتْ قَلْبَا
يِحْضِنَّا.. وِيْصَفِّي بْلادْ
ـ2ـ
قدِّيسِه.. حَبِّتْ دَيْرَا
وْكانِت لِلنَّاس مْنارَه
الْعَدْرَا رَسْمِتْلا سَيْرَا
وْسَاعَدْها طفْل مْغارَه
ـ3ـ
يا مَدْلِينْ الْمَنْدُورَه
لِلطّفْل اللِّي مِنْحِبُّو
عْيُونِكْ مِنْضَلّ نْزُورَا
كل ما يْخَبِّينا بْقَلْبُو
**
وين الزهر؟
غناها أطفال معهد سيّدة لبنان عام 1995، يوم وداع الأخت مادلين أبو رجيلي.
ـ1ـ
وَيْن الزَّهْر يْوَدِّعْ زَهْرْ
وْوَيْن الدَّمْع يْسَلِّينَا
مَدْلين الْـ ضَوِّتْ هَـ الْفَجْرْ
رَاحِت.. وْنِحْنا بْقِينَا؟
ـ2ـ
رَاحِتْ عَلى دَلْوِيشْهِيلْ
تِزْرَعْ زَهْرَه بَيْن زْهُورْ
يا قَلْبِي هَـ الْغَصَّه شِيلْ
الرَّاهْبِه جْناحاتا مِن نُورْ
ـ3ـ
سَاعَه هَوْن وْسَاعَه هَوْن
الْعَتْم بْيِضْوِي بْطَلِّتْها
مِينْ غَيْرَا بِيخَلِّي اللَّوْن
يِتْحَرَّقْ عَ جْنَيْنِتْهَا
**
حرقة
غناها أطفال معهد سيّدة لبنان عام 1995، يوم وداع الأخت مادلين أبو رجيلي.
ـ1ـ
في قدِّيسِه.. شُو قدِّيسِه
عْيُونَا شِي سَمَا زَرْقَا
حَبِّتْ دَيْرَا وِالِكْنِيسِه
وْمَعْنا ما قِدْرِتْ تِبْقَى
كانِتْ مَعْنا.. تا تْجَمِّعْنا.. شُو فِهْمانِه
فِرْقِتْها أَصْعَب فِرْقَه
ـ2ـ
عِشْرِين سِنِه وْفَوْقَا زِيدْ
سِنِه.. تا تْقِيس الرِّحْلِه
رِحْلِتْها بْرِفْقِتْنا عِيدْ
صَعْبِه عْلَيْنا هَـ النَّقْلِه
كانْت الزَّهْرَه.. الْـ نَدْرِتْ عُمْرَا.. لِرْسَالِتْها
حَرْقَه فِرْقِتْها حَرْقَه
**
أهلا بالراهبة إيرين
غناها أطفال معهد سيّدة لبنان عام 1995، يوم استقبال الأخت إيرين بو غصن، التي أصبحت رئيسة المعهد فيما بعد.
ـ1ـ
أَهْلا بِالرَّاهْبِه أَيْرِينْ
أَهْلا وْسَهْلا
إِسْمِكْ خَيْرات بْسَاتِينْ
وْرَسْمِكْ ما بَدُّو تلْوِينْ
مْنِ الْوَرْدِه أَحْلَى
ـ2ـ
مْنِهْدِيكِي بْأَرْض الْهجْرانْ
بَاقات قْداسِه وْإِيمانْ
يا أَرْزِه.. حَبِّكْ لُبْنانْ
يا رَاهْبِه.. خْطَبْتِي الدَّيَّانْ
أَهْلا وْسَهْلا
**
نشيد معهد سيدة لبنان
هذا النشيد يغنّيه جميع طلاّب المعهد صباح كل يوم، وفي الإحتفالات الرسميّة، وقد كتبته عام 1981 ليتماشى مع اللحن الإنكليزي للنشيد.
ـ1ـ
مِثْلَ بَدْرٍ فِي عُلاهْ
مِثْلَ نَجْمٍ إِسْطَعِي
فَبِكِ حُبُّ الإِلَه
وَمَناهِلُ الْوَعِي
فَطِيري
وَصِيري
آمالَ جِيلْ
إِسْمُكِ يَنْبُوعُ الإِيمانْ
إِسْمَ الْعَذْراءِ تَحْمِلينَ:
سيِّدَة لُبْنانْ.
ـ2ـ
كَمْ نُحِبُّكِ مَدْرَسَه
لِعائِلَه مُقَدَّسَه
لِشَعْبَيْنِ عَظِيمَيْن
فِي بِلادٍ مُؤْنِسَه
فَطِيري
وَصِيري
آمالَ جِيلْ
إِسْمُكِ يَنْبُوعُ الإِيمانْ
إِسْمَ الْعَذْراءِ تَحْمِلينَ:
سيِّدَة لُبْنانْ.
**
بدنـا نشــتاق
غناها أطفال معهد سيدة لبنان في حفلة وداع الرئيسة الأخت أيرين بو غصن في 6/12/2004
ـ1ـ
بَدْنا نِشْتاقْ لْطَلاَّتِكْ
بَدّنا نِشْتاقْ لْحَكْياتِكْ
بَدّنا نِشْتاقْ..
يا أَيْرِينْ.. بَدّنا نِشْتاقْ
ـ2ـ
كِلّ الإيّام الْجَمْعِتْنا
مُشْ مُمْكِن تِمْسَحْ دَمْعِتْنَا
كِلّكْ أَخْلاقْ..
يا أَيْرِينْ.. كِلِّكْ أَخْلاقْ
ـ3ـ
حْمِلْنَا الأَزْهارْ بْإِيدَيْنَا
حْفَظْنا الأَشْعار وْغِنَّيْنا
تا الْقَلبْ رَاقْ..
يا أَيْرِينْ.. تا الْقَلب رَاقْ
ـ4ـ
نِحْنا الأَطْفال الْـ مِنْحِبِّك
يَلِّلي حْمِلْتِينا بِـ قَلْبِكْ
ما بَدّنا فْراقْ..
إي وَاللَّه.. ما بَدّنا فْراقْ
**
يا عصافير الغربه
غناها أطفال معهد سيدة لبنان في حفلة وداع الرئيسة الأخت أيرين بو غصن في 6/12/2004
ـ1ـ
يا عْصَافِيرْ الْغُرْبِه
يا عْصَافير الْخَيْر
الرَّيْسِه الْـ سَكْنِتْ قَلْبِي
سَكْنِتْ تَانِي دَيْر
ـ2ـ
طِيرُوا لْعِنْدَا يَلْلاَّ
وْقُولُولا شُو بْحِبَّا
حَبِّتْ دَيْرَا وْأَللَّه
وْخَبِّتْنَا بِـ قَلْبَا
ـ3ـ
أَيْرِينْ الْمَحْبُوبِه
ما لازِمْ تِتْرِكْنَا
رَيّسِه.. شُو طَيُّوبِه
عَ طُول بِتْبَارِكْنَا
ـ4ـ
وْمُشْ رَح نِنْسَى مَرْتا
و ماري دي رُوزِيرْ
مَرْتا مِتِل إِخْتا
غَنِيلُنْ يا طِيرْ
ـ5ـ
يا أَللَّه شُو تْلاتِه
رَيّسِه وْرَاهِبْتَيْنْ
بِفْدِيهُنْ بِحْيَاتِي
وِبْدَمْعِ الْعِينَيْن
**
مش رح نسمح
غناها أطفال معهد سيدة لبنان في حفلة وداع الرئيسة الأخت أيرين بو غصن في 6/12/2004
ـ1ـ
لأْ.. لأْ مُشْ رَحْ نِسمَحْ
بَدّنا يَاكِي تْضَلِّي مَعْنَا
قَلْب كْبِيرْ وْعَم يِجْمَعْنا
وْعَنْ حُبِّكْ مُشْ رَحْ نِتْزَحْزَح
لأْ.. لأْ مُشْ رَحْ نِسمَحْ
ـ2ـ
لأْ.. لأْ مُشْ رَحْ نِسْمَحْ
إِنْتِي تْرُوحِي وْنِحْنَا نِبْقَى
عَمْ تِكْوِينا نارْ الْحَرْقَه
مِنْ دُونِكْ شُو نَفْع الْمَطْرَحْ
لأْ.. لأْ مُشْ رَح نِسْمَحْ
ـ3ـ
لأْ.. لأْ مُشْ رَحْ نِسْمَحْ
نِحْنَا خْسِرْنا خْسَارَه كْبِيرِه
خْسَارِةْ رَيّسِتْنا الْقَدِيرِه
أَيْرِينْ.. الْبِنْيِتْ هَالْمَسْرَحْ
لأْ.. لأْ مُشْ رَحْ نِسْمَحْ
**
هدوني
غناها الاطفال عام 2004
ـ1ـ
هَدُّونِي هَدُّونِي
مْنِ الكورَه لَجُونِي
أيْرِينْ الرَّيْسِه الْقِدِّيسِه
رَحْ حِطَّا بِعْيُونِي
ـ2ـ
نِحْنَا بِـ سَيّدِةْ لُبْنانْ
حِبَّيْنَا نْلاقِيهَا
بْأَحْلَى وَرْداتْ الْبُسْتانْ
وِمْحَبِّه نِهْدِيها
ـ3ـ
يا عْصَافِير الْبَسَاتِينْ
غَنُّولا أَحْلَى تْلاحِينْ
الرَّاهْبِه اللِّي حَبَّا صِنِّينْ
رَحْ عَلِّقْها قُونِه
**
أهلا وسهلا
ألقاها التلميذ أنطوني عزيز في مهرجان استقبال الأخت مرلين شديد 2005
ـ1ـ
جَايِي تا قِلِّكْ كِلْمِه
بِتْضَوِّي مِتْل النِّجْمِه
أَهْلا وْسَهْلا بِمَرْلانْ
الرَّيْسِه اللِي تَرْكِتْ لُبْنانْ
تَا تْرَبِّينَا بِالْهُجْرانْ
ـ2ـ
وْأَهْلا بْغِيتَّا وِبْمَدْلانْ
رَاهْبات بْسَيّدِةْ لُبْنانْ
بْهَالْيَوْم تْحَقَّقْ حِلْمِي
وْحَلِّت عْلَيِّي النِّعْمِه
**
أكبر زقفه
ـ1ـ
أَكْبَرْ زَقْفِه لْرَيّسِتْنا
كونستانس اللِّي حَبِّتْنا
وْزَقْفِه لْـ أَيْرينْ وْمَدْلانْ
الْطَلُّوا عَ مَدْرَسِتْنا
ـ2ـ
يا رَاهْبات الْقَدَاسِه
أَفْضَالْكُنْ مَنِّي نَاسِي
قَلْبِي وْعَقْلِي وْحَوَاسِي
مَرْهُونِه لْرَهْبَنِتْنَا
ـ3ـ
كونستانس الْما فِي مِنَّا
القداسه بِضِحْكِةْ سِنَّا
صَوْتَا الْحِلُو جَنَّنَا
مْنِهْدِيها غِنِّيِّتْنا
**
هيي اللي بحبّا
ـ1ـ
مُشْ عَارْفِه شُو بَدِّي قُولْ
مْنِ الْفَرْحَه عَقْلِي مَسْطُولْ
حَابِّي غَنِّي غِنِّيِّه
وْما عِنْدِي دَفّ وْلا طْبُولْ
ـ2ـ
هِيِّي اللِّي بْحِبَّا هِيِّي
أيْرِين الْـ سَحْرِت الِعْقُولْ
بْإِيدَا إِنْجِيلْ وِشْبِيِّه
وْصَلِيبْ.. عَ صَدْرَا مَحْمُولْ
**
راهبتنا
ـ1ـ
هِسّ هِسّ عَ السِّكَّيْت
أُوعَا تْخَبِّرْ مِينْ ما كانْ
أَحْلَى مْنِ الرَّاهْبِه ما لْقَيْتْ
خْصُوصِي الْجايي من لبنانْ
ـ2ـ
راهبتنا مِتْلا ما صَارْ
قَلْبَا دَافِي مِتْل النَّارْ
الْعَدْرَا بِشَهِرْ أيَّارْ
هِدْيِتْهَا شْبِيِّه وْصُلْبانْ
ـ3ـ
مِنْ أرضي.. مِنْ أَحْلَى أَرْضْ
حُبّ الْوَطَنْ عِنْدَا فَرْضْ
حِلْفُوا بْإِسْمَا طُول وْعَرْضْ
وْسَمُّوهَا أَرْزِة لُبْنانْ
**
راهبات الطهر
ـ1ـ
مَنِّي شَاعِرْ.. تا قُول شِعْر
وْمَنِّي مْغَنِّي تا غَنِّي
عَ شْفافِي فِي باقِةْ زَهْرْ
وْكِلْمِه.. ما بْتِطْلَعْ مِنِّي
ـ2ـ
الرَّاهْباتْ اللي مَحُّوا الْقَهْرْ
وْعِمْلُوا هَالدِّنْيِي جَنِّه
خَلُّونا بِبْلادْ الْهَجْرْ
نِعْمِلُّنْ طَنِّه وْرَنِّه
بْإخْواتي.. رَاهْباتْ الطُّهْر
جِنِّي، يا سيدْنِي، جِنِّي
**
ريستنا المحبوبه
ـ1ـ
يا رَيّسِتْنَا الْمَحْبُوبِه
يا رَاهْبِه.. يا طَيُّوبِه
بْحَق الْفادِي وِالْعَدْرَا
بَدِّي تْنَوّرِيلي دْرُوبِي
ـ2ـ
يا كونستانس الْقَدِّيسِه
صَوْتِكْ سَوْسَحْ الِكْنِيسِه
مِنْ حُبِّكْ.. مِنْ إِيمانِكْ
جَايِي تا عَبِّي كِيسِي
ـ3ـ
طَلِّه.. وْشُو حِلْوِه الطَّلِّه
ضِحْكِة سِنِّكْ بِتْصَلِّي
الدِّنْيِي زْغِيرِي ما بِتْسَاعْ
غِلِّي بِـ قَلْبِي غِلِّي
**
عمر يزيد
أغنية ترحيبية بالأخوات مرلين ومادلين وغيتا 2005
ـ1ـ
أَهْلا فِيكي يا رَيّسِتْنا
أَهْلا فِيكِي يا مرلان
جِينَا نْهَنِّي مَدْرَسِتْنا
وِنْزَيِّن سَيّدِةْ لُبْنانْ
ـ2ـ
أَهْلا وْسَهْلا يا حَنُونِه
انْشالله عُمْرِكْ.. عُمْر يْزِيدْ
خَبِّي دَمْعِكْ جُوَّا عْيُونِي
وْأَللَّه يِحْمِي بَيْت شْدِيدْ
ـ3ـ
يا مِيةْ أَهْلا بِـ مَدْلانْ
قَلْب كْبِيرْ وْعَقْل كْبِيرْ
كِنْتِي بِـ سَيّدِةْ لُبْنانْ
تْرَكْتِي فِيها خَيْر كْتِيرْ
ـ4ـ
أَهْلا وْسَهْلا بْغِيتَّا الْيَوْمْ
الْوِجّ الأَسْمَرْ ما بِيخِيبْ
نِعْمِه وْجِيتِينا بْهَالصَّوْمْ
شُكْراً يَسُوع الْحَبِيبْ
**
جينا نغني
غنى أطفال معهد سيّدة لبنان هذا المقطع، ضمن الأغنية الإنكليزيّة الشهيرة (أنا أسترالي)، في أحد الإحتفالات الشعبيّة الأسترالية عام 2003
ـ1ـ
جِينَا نْغَنِّي لْهَالدِّنِي
جِينَا تا نِزْرَعْ حُبّ
جِينَا بعُمْر الْوَلْدَنِي
نْرِشّ الزَّهرْ عَ الدَّرْب
ـ2ـ
أُسْتْرالْيَا اللّي بْتِعْتِنِي
بِـ شَعْب.. أَرْوَع شَعْب
عَيْشَا هَنِي.. وْطَقْسَا هَنِي
احْمِيها إِنِتْ يا رَبّ
**
فرقة كونستانس ومادلين
غَنّاها أطفال معهد سيّدة لبنان يوم وداع الأختين كونستانس الباشا ومادلين أبو رجيلي.
ـ1ـ
يا غْزَيِّلْ يا بُو الْهِبَا
يا هَاوِي يا مْعَذِّبَا
فِرْقِةْ كُونْستانْس وْمادْلِينْ
مِتْل النّار الْلاهِبَه
ـ2ـ
يا غْزَيِّل قِلُّنْ قِلُّنْ
جُوَّات الصّدْر مْحَلُّنْ
نِحْنا تْلامِيذُنْ كلُّنْ
غَصِّتْنا ما أَصْعَبَا
ـ3ـ
يَا غْزَيِّلْ بِغُرْبِتْنا
بِنْيُوها لْمَدْرَسِتْنا
وْكانُوا بْقَلْب كْنِيسِتْنا
مِتِلْ زَهْرات الرُّبَى
ـ4ـ
يا غْزَيِّلْ مُشْ مِنْسِيِّه
كِيفْ عِمْلُوا الثّانَوِيِّه
وْجَالْيِتْنا اللُّبْنانِيِّه
رَدُّوها لْعَهْد الصِّبَا
**
أحلى هدية
غَنّاها أطفال معهد سيّدة لبنان يوم وداع الأختين كونستانس الباشا ومادلين أبو رجيلي.
ـ1ـ
يا كُونْستَانْس وْيا مَدْلانْ
يا أَحْلَى هْدِيِّه مْنِ الرَّبّ
الطّفْل الْـ عَمْ يِهْجُر لُبْنانْ
لَوْلاكُنْ ما داق الْحُبّ
ـ2ـ
كِيفْ بَدَّا تِنْسَى الْعَدْرَا
وْيِنْسَى الشَّعْب الْـ حَوَالَيْها
بْنات الْبَطْرَك وِالْقِدْرَه
الْـ زَرْعُوا الْحُبّ بْعِينَيْهَا
وْضَحُّوا الدَّمّات الْـ بِالْقَلْبْ
ـ3ـ
وْكِيف بَدّنا نِنْسَى نِحْنا
الطُّلاّب بْسَيّدِة لُبْنانْ
كِيفْ عَ الدِّنْيِي تْفِتَّحْنا
بْهِمِّةْ كُونْستانْس وْمَدْلان
الْـ مَشُّونا عَ أَجْمل دَرْبْ
**
وردة وسوسنة
غَنّاها أطفال معهد سيّدة لبنان يوم وداع الأختين كونستانس الباشا ومادلين أبو رجيلي، ورموا عند أرجلهما ألف زهرة وزهرة.
ـ1ـ
مِنْحِبّكُنْ.. مِنْحِبّكُنْ يا وَرْدِه وْسَوْسَنِه
يا نُور الْخَلِيقَه يا حُلْم الْوَلْدَنِي
كُونْستانْس الْعَظِيمِه
وْمَدلِينْ الْكَرِيمِه
رَحْ تِبقُوا بِقْلُوبْنا تَا تِخْلَص الدِّنِي
ـ2ـ
يا زْهُور السَّعادِه
يا شْمُوع الْعِبادِه
لَوْلاكُنْ ما دِقْنا هَـ الْعَيْش الْهَنِي
يا كْفُوف الْـ بِتْعَمِّرْ
يا مْرُوج الْـ بِتْزَهِّرْ
مْنِ الصّعْب تْفَرِّقْنا أَيَّامْ السِّنِه
**
لبنان.. بَسّ
ألقاها أحد تلاميذي عام 1989
ـ1ـ
لُبْنانْ بَسّ.. الْـ طَلَّعْ جْنُونِي
وْخَلاَّ لْيَالِي الْهَجْر تِنْدُبْ شَمْسْ
كِيفْ لِعْبِتْ حَرْب مَلْعُونِه
بِـ شَعبْ.. جَمَّعْ بَيْن بُكْرَا وْأَمسْ
ـ2ـ
بِـ شَعْب.. وَحْدُو صَارْ مَسْكُونِه
لَمَّا بْيِحْكِي.. الْكَوْن قَاطِع نَفسْ
لَيْش حَتَّى تِنْحِرِقْ قُونِه
مَكْتُوبْ فَوْقَا بْدَمْعِةْ عْيُوني:
لُبْنَانْ بَسّْ.. وْأَلْف بَسّ وْبَسّْ
**
سنة جديدة
القاها أحد تلاميذي عام 1989
ـ1ـ
انْشَاللّه السِّنِه الْـ جَايِي
بْتِفْرُشْ طَرِيقِكْ سلْمْ
وْبِتْقِلِّكْ حْكَايِه
يِبْسِتْ عَ تِمّ الْحلْمْ
ـ2ـ
يَا بْلادْ تِعْبَانِه
مِنْ عَتْمِةْ قْبُورِكْ
هْدِينِي السِّنِه غْنَانِي
مشْتَاقْ تَا زُورِكْ
ـ3ـ
هْدِينِي فَرَحْ أَطْفَالْ
كَسْرُوا اللُّعَبْ بَكِّيرْ
قِرْفُوا الْحَكِي اللِّي انْقَالْ
ضَاعُوا بِالِحْزَازِيرْ
ـ4ـ
هْدِينِي السِّنِه دَبْكَاتْ
بِتْقَلِّقْ لْيَالِي
وْرِشِّي السَّهر ضِحْكَاتْ
وْنَهْفَاتْ قُوَّالِي
ـ5ـ
ما بْتِبْتِدِي الأَيَّامْ
وْلا بْتِكْرُج الأَعْوَامْ
تَا تْزَيِّن الأَحْلامْ
أَرْزَات بِجْبَالِي!
**
أغلى بيّ
ألقتها إحدى تلميذاتي عام 1991
ـ1ـ
طَلّْ عَام جْدِيدْ.. قِلْنَا: خَيّْ
زَتّ الْفَرَحْ شَالُو عَ كِلْمِتْنَا
وْصِرْنَا بْعَيْن الشَّمْسْ نِغْزُلْ فَيّْ
وِبْلادْنَا تِحْلَمْ بِـ طَلِّتْنَا
ـ2ـ
مِنْشَانْ تَحْت الأَرْز نِغْفَى شْوَيّْ
وِالأُوفْ تِسْكَرْ عَ سْكَمْلِتْنَا
لُبْنَانْ بَاقِي بَيّْ.. أَغْلَى بَيّْ
إِلاَّ بْحِضْنُو مَا بْيِحْلا الْعَيْشْ
حَتَّى وَلاَ بْتِرْتَاحْ عَيْلِتْنَا
**
حكي تشرين
قصائد عن استقلال لبنان 2004، ألقاها أطفال معهد سيد لبنان ـ هاريس بارك.
ـ1ـ
فِي مَرَّه حِكِي تِشْرِينْ
التَّانِي.. وْقَلُّنْ : يا حِلْوِينْ
فِيِّي بِيعَيِّدْ لُبْنَانْ
عِيد اسْتِقْلالُو الْحِرْزَانْ
بْيَومْ التَّانِي وِالْعِشْرِينْ
ـ2ـ
تِشْرِينْ بْيَعْرِفْ حَالُو
شَهْر مْدَلَّلْ.. نِيَّالُو
لُبْنانْ كِلُّو بِيحِبُّو
بْحَيْث مْخَبَّى بِـ قَلْبُو
يَوْم الْـ إِخْد اسْتِقْلالُو
ـ3ـ
نِحْنَا بِـ سَيّدِةْ لُبْنانْ
عَمِّ نْعَيِّدْ فِرْحَانِينْ
وْنِزْرَع بِـ شَهْر تِشْرِينْ
بْيَوْم التَّانِي وِالْعِشْرِينْ
غْنَانِي بْنَيَّاتْ وْصِبْيَانْ
مَكْتُوبْ عْلَيْنَا الْهِجْرَانْ
وْبِالْقَلْب مْصَوَّرْ لُبْنانْ
وْأَرْزَاتْ الرَّبّ وْصِنِّينْ
ـ4ـ
يَلْلاّ يَلْلاَّ يَا أَطْفَالْ
نْعَيِّدْ عِيد الإِسْتِقْلالْ
يَلْلاّ نْغَنِّيلُو غْنَانِي
وْنِكْتُبْ تَارِيخُو بِالْبَالْ
وَاللَّه الشَّعْب اللُّبْنَانِي
أَبْطَالْ
بْتِخْلَقْ أَبْطَالْ
ـ5ـ
لُبْنانْ ما بِيمُوتْ
لُبْنانْ رَحْ بِيضَلّ
شَعْب وْشَجَرْ وِبْيُوتْ
وْبَحْر وْسَهْل مَعْ تَلّ
الْعَاصْمِه بَيْرُوتْ
والأَرْض أَرْض الْكِلّ
ـ6ـ
مُشْ رَحْ نِرْضَى إِلاَّ
ما يْوَفِّقْنا أَللَّـه
وْتِتْحَرَّر بْلادِي
كِلاَّ كِلاَّ كِلاَّ
ـ7ـ
مِينْ بِتْحِبّ..
سَأْلُونِي كِلّ الإِخْوانْ
شِقُّوا الْقَلْب
بِتْلاقُوا أَللَّه الدَّيَّانْ
وْأَرْز الرَّبّ
حَامِينَا.. وْحَامِي لُبْنَانْ
ـ8ـ
عَمْ نِدْرُسْ حَرَكاتَكْ
وِمْنَعْرِف تِخْطيطاتَكْ
لُبْنانْ ما بْيِنْبَاعْ
خَبِّي مِصْرِيَاتَكْ
صْدُورْ شَعْبُو قْلاعْ
ما بْتِنْفَعْ تِفْجِيراتَكْ
وِفْزَاعْ مِنَّا فْزَاعْ
مَا مْنِرْضَى إِلاَّ حْيَاتَكْ
**
استقلالك يا لبنان
غنّاها أطفال معهد سيّدة لبنان هاريس بارك عام 2001، بمناسبة عيد استقلال لبنان.
ـ1ـ
إسْتِقْلالَكْ يَا لُبْنانْ
زَهَّرْ بِـ كلّ الْبُلْدانْ
انْشَاللَّـه بِتْصُونُو عَ طُولْ
تا بْعِيدَكْ نْدقّ طْبُولْ
بْسِيدْني.. وِبْكل الْهُجْرانْ
ـ2ـ
لُبْنان.. أَرْض جْدودْنا
وْمَهْد الْبُطُولِه جْرُودْنا
اسْتِقْلالْنا وِسْع الدِّنِي
مْنِحْمِيه عَ طُول السِّنِه
بِصْدُورْنا.. وْبِزْنُودْنا
**
يلاّ نغنّي يا أطفال
غنّاها أطفال معهد سيّدة لبنان هاريس بارك عام 2002، بمناسبة عيد استقلال لبنان.
ـ1ـ
يَلاَّ نْغَنِّي يا أَطْفالْ
يَلاَّ نْبَيِّنْ فَرْحِتْنَا
الْيَوْم بْعِيد الإِسْتِقْلالْ
بْتِفْرَحْ فِينَا أَرْزِتْنا
ـ2ـ
أَرْزِتْنا.. الْحِلْوِه الْخَضْرَا
أَرْزِةْ شَرْبِلْ وِالْعَدْرَا
رَفْقَا هِدْيِتْها عُمْرَا
وصَانِتْها.. تا صَانِتْنا
ـ3ـ
مَهْما بْعِدْنا يا لُبْنانْ
إِسْمَكْ بِقْلُوبْنا مِنْصَانْ
نِحْنا بِبْلاد الْهجْرانْ
عَمْ نِهْدِيك مْحَبِّتْنا
**
أرض القداسة
غنتها جوقة كنيسة سيدة لبنان 1983
ـ1ـ
عَلَى دَلْعُونا.. وْعَلَى دَلْعُونا
بْتِسْوِي يا بْلادِي كلّ الْمَسْكُونَه
ـ2ـ
صدْفِه الْتَقَيْنا بِبْلاد بْعِيدِه
غَمْرِتْنا الْفَرْحَه بْلَيْلِه سَعِيدِه
وِالْجَوْقَه تْرَتِّلْ تِرْتِيلِه جْدِيدِه
تِطْرِبْنا بْقَفْلِةْ: عَلَى دَلْعُونا
ـ3ـ
قَاسِي، يا أَرْضِي، هَـ الدَّهْر قاسِي
أَرْزِكْ، أَمْجادِكْ.. وَاللّـه مُشْ ناسِي
رَحْ تِبْقِي بْعَيْنِي أَرْض الْقَداسِه
شَرْبِلْ مَعْ رَفْقَه وْقَبْلُنْ مارُونَا
ـ4ـ
عَ الزَّيْنُو الزَّيْنُو الزَّيْنُو
مَوْطَنَّا دَخِيلْ عَيْنُو
تِسْلَمْلِي الأَرْزِه الْخَضْرَا
الْـ جَمْعِتْ ما بَيْنِي وْبَيْنُو
ـ5ـ
مْضَيّع بِالْغُرْبِه سْنِينِي
وْعَمْ بِيدَوّبْنِي حَنِينِي
يا بْلادِي ضَلِّي اذْكُرِينِي
وْقُولي: هَـ الْغايِبْ وَيْنُو؟
ـ6ـ
عَ الِعْمَيِّمْ عَ الِعْمامْ
بْعِيد السَّيْدِه أُوعا تْنامْ
نِحْنا بْسِيدْنِي سِهْرانِين
خَبِّرْ يا طَيْر الْحَمامْ
ـ7ـ
نِحْنا بْسِيدْنِي سِهْرانِين
مِعْ حِلْوات وْمَع حِلْوِينْ
لْهاك الأَرْزِه مِشْتاقِينْ
وَصِّل.. وْرِدّ السّلامْ
**
عيد الإستقلال
غنّاها أطفال معهد سيّدة لبنان عام 2003
ـ1ـ
طَلّ عِيد الإِسْتِقْلالْ
يا بْلادِي بْهَنِّيكِي
بِالْغُرْبِه نِحْنا أَطْفالْ
عَمْ نِتْغَنَّى فِيكي
ـ2ـ
بِقْلُوبْنا خِبَّيْنا جْبالْ
وْبِعْيُونَّا سْواقِيكي
وِغْزَلْنا مْنِ الْفَرْحَه شَالْ
تا بْعِيدِكْ نِهْدِيكِي
ـ3ـ
مَهْما تِشْتَدّ الأَحْوالْ
وْيِتْغَبَّرْ ماضِيكِي
بِالْحَزِّه نِحْنا أَبْطالْ
بِالدَّم مْنِفْدِيكِي
**
سيدني ولبنان
غناها أطفال معهد سيدة لبنان 2008
ـ1ـ
لو بْرَمْنا الدِّنْيِّي كِلاَّ
مُشْ رَحْ مِنْلاَقِي وَاللَّه
أَحْلَى مِنْ سِيدْنِي وْلُبْنان
وْأَرْزِه حَامِيها أَللَّه
ـ2ـ
يَا سِيدْنِي نِحْنَا جِينَا
مْنِ بْلادْ قَلُّو مْحِبينَا
مِتْل الإمّ حِبَّيْتِينَا
مْحَبِّه مَا بْيِخْلَقْ مِتْلا
ـ3ـ
لُبْنَان.. القَلْب الْمَوْجُوعْ
مِنْصَلِّي تَا يْشِدّ طْلُوعْ
حْفَرْنَا إِسْمُو فَوْق ضْلُوعْ
عَنُّو مُشْ رَحْ تِتْخَلَّى
ـ4ـ
يا أَرْزِي الْبِـ العَلالِي
غَالِي عَ شَعْبَكْ غَالِي
مْنِ جْنُوبِي لأَعْلَى شْمَالِي
كِرْمَال عْيُونَك صَلَّى
**
أنا لبناني
غناها طلاب معهد سيدة لبنان عام 2007
ـ1ـ
أنا لُبْنَانِي مِنْ لُبْنَانْ
تْرِبَّيْتْ بْأَرْض الْهجْرانْ
قَلْبِي كْبِيرْ وْعَقْلِي كْبِيرْ
وْرَافِعْ رَاسِي وَين ما كانْ
ـ2ـ
أنا لُبْناني.. وْشُو ما صَارْ
إِسْتِقْلالِي مَا بْيِنْهَارْ
بْصدْرِي قَادِر رِدّ النَّارْ
الْـ طِمْعانِه بْأَرْزِة لُبْنان
ـ3ـ
أنا لبناني.. سْمَعُوا مْنِيحْ
عَنْ إِيمانِي مُشْ رَحْ زِيحْ
بِركُبْ فَوْق بْسَاط الرِّيحْ
وْبِتْنَقَّل بَيْن الْبُلْدان
**
أرزتنا
غنّاها الطالب دومينيك خوري عام 2007
ـ1ـ
الْيَوْم عيد الإسْتِقْلالْ
الْفَرْحَه بِعْيُون الأَطْفالْ
يا بْلادِي رِدِّي الِغِيَّابْ
تَا يْغَنّوا أَحْلَى موَّالْ
ـ2ـ
أَرْزِتْنا.. أَرْزِةْ أَمْجَادْ
رِبْيُوا بِـ فَيِّتْها وْلادْ
بِتْرَفِرِفْ وِبْتِحْمِي بْلادْ
وِبْتِزَرَع فِينا الآمالْ
**
أحلى البلدان
غناها طلاب معهد سيدة لبنان عام 2007
ـ1ـ
يا أَرْض الْهجْرَانْ
حْكِيلْنا عَنْ لُبْنانْ
عَنْ سَهْلُو وِجْبَالُو
عَن عِيدْ اسْتِقْلالُو
عَنْ أَحْلَى البُلدانْ
_2_
كْبِرْنا بِـ غُرْبِتْنا
وْمَا شِفْنَا أَرْزِتْنَا
حْكِيلْنَا يَا مَيْمِتْنَا
عَنْ أَرْزِة لُبْنانْ
ـ3ـ
قُولِيلُو: مِنْحِبُو
تَا يْخِبِّينَا بْقَلْبُو
نِحْنا خِيرِة شَعْبُو
عَ طُول الأزْمانْ
**
وطني الغالي
غنّاها أطفال معهد سيدة لبنان عام 1985 بمناسبة عيد استقلال لبنان.
ـ1ـ
يِحْيَا يِحْيَا وَطَنِي الْغَالي
يَللِّي دَوْماً شَاغِلْ بَالِي
يِحْيَا أَرْز الرَّبّ الْعالي
حامي عَلَمِي وِاسْتِقْلالي
ـ2ـ
نِحْنا طْفال زْغارْ زْغارْ
مَوْطَنَّا بَدّنا نْحَيِّي
وِنْحَيِّي الْجَيْش الْجَبَّارْ
وْرَئيس الْجُمْهُورِيِّه
ـ3ـ
مِنْ سِيدْنِي.. مِنْ غُرْبِتْنا
جِينَا نِرْفَع رَايِتْنا
وْنِصْرُخ بِالصَّوْت الْعالي
عاشِت.. عاشِتْ أَرْزِتْنا
**
وطن الإنسان
غناها أطفال معهد سيدة لبنان عام 2005
ـ1ـ
كل سِنِه يا لُبْنانْ
مِنْعَيِّد إِسْتِقلالَكْ
يا وَطَنِ الإِنْسَانْ
لا تِفْزَعْ.. نِحْنا رْجالَكْ
ـ2ـ
مِنْحِبَّكْ.. كِيفْ ما كانْ
مْنِ الْبَحْر لْرُوس جْبَالَكْ
بِسيدْني.. بِالهجْرانْ
عَمْ بِيغَنُّوا أَطْفَالَكْ
ـ3ـ
وْعَمْ يِدْعُوا لِلدَّيَّانْ
تا يِحْمِي كِل عْيَالَكْ
يا خالِق الأَكْوانْ
خَلِّي وَطَنَّا بْبَالَكْ
**
عيد استقلال الأوطان
غناها أطفال معهد سيدة لبنان عام 2005
ـ1ـ
لْوَطَنَّا اللِّي بْعِيدْ بْعِيدْ
مِنْقَدِّم حُبّ بْهَالْعِيدْ
عِيدْ اسْتِقْلالْ الأَوْطانْ
يا رَبّ الأَعْياد تْزِيدْ
ـ2ـ
زَارُونا بْأَرْض الْهُجْرانْ
شَربِلْ رَفْقَا نْعِمْةَ اللَّه
قِلْنالُنْ يِحْمُوا لُبْنانْ
وْيِحْمُوا هَالدِّنْيِي كِلاَّ
ـ3ـ
لُبْنان الْـ مِنْحِبُّو كْتِيرْ
عَ الْعُمر مَنِّي نَاسِي
هُوِّي كْبِيرْ.. وْشَعْبُو كْبِيرْ
يا أرضِي زِيدِي قْدَاسِه
**
يا أطفال
غناها أطفال معهد سيدة لبنان عام 2005
ـ1ـ
يا أَطْفالْ.. يا أَطْفالْ
غَنُّوا لْعِيدْ الإِسْتِقلالْ
لُبْنان الْـ مِنْحِبُّو كْتِيرْ
أَرْزِه مَزْرُوعَه بِالْبَالْ
ـ2ـ
لُبْنانْ الْـ مِنْحِبُّو كْتِيرْ
أَحْلَى مِنُّو ما بِيصِيرْ
حَجْمُو زْغِيرْ.. وْقَلْبُو كْبِيرْ
بَيْرَقْ عِزُّو ما بْيِنْطالْ
**
خلوا العيد
غناها أطفال معهد سيدة لبنان عام 2005
ـ1ـ
خَلُّوا الْعِيدْ
يْضَوِّي بْعِيدْ
تا تْزَهِّرْ غُرْبِتْنا
بْعِيدْ جْدِيدْ
غَنِّي وْزِيدْ
تا تِفْرَحْ أَرْزِتْنا
ـ2ـ
عيد اسْتِقْلالْ الأَوْطانْ
يا أَحْلَى أَعْيادِي
فِيكْ بْيِتْزَيَّنْ لُبْنانْ
مِنْ سَهْلُو لِلْوَادِي
**
عيد المحبّة
غناها أطفال المعهد عام 2006
ـ1ـ
يا عيدْ اسْتِقْلالِي
يا عيدْ الْمَحَبِّه
خَلّي الْوَطَنْ الْغالِي
يْرَيِّحْ فِكْرِي وْبالِي
تا يْفَرِّحْلِي قَلْبِي
-2-
خَلِّي رْبُوعُو تْغَنِّي
وِتْضَوّي لْيالِيهْ
بْشُوفو بْعَيْنِي جَنِّه
وْأَرْزِه بْعيدِه عَنِّي
وْعَم بِحْلَم لاقِيهْ
-3-
مَهْما كِتْروا عْلَيْنا
نِحْنَا فِيكْ كْتَارْ
الْمَحَبّه بْعِينَيْنا
وِالشَّمْعَه بْإيدَيْنا
وْبِالإيمان كْبَارْ
**
زهّر يا لبنان
غناها أطفال المعهد عام 2006
ـ1ـ
بِـ عِيدْ اسْتِقْلالَكْ
زَهِّرْ يا لُبْنانْ
بْسيدْنِي اجْتَمْعُوا طْفالَكْ
تَا يْغَنّوا مُوّالَكْ
بِأَرْض الْهجْرانْ
ـ2ـ
مِنْحِبِّك يا بْلادِي
مِنْحِبِّكْ كْتيرْ
بِجْبالِكْ.. وِالْوادِي
والفَلاّح الغادِي
بِـ سَهْلِكْ بَكِّيرْ
**
مد إيدك مد
غناها أطفال معهد سيدة لبنان عام 2007
ـ1ـ
مِدّ إيدَكْ مِدّ
حَتّى نُوقَفْ سَدّ
بْوِجّ الطَّامِعْ فِينَا
وْعَمْ يِمْحِي غْنَانِينا
وِالِبُنْيَان يْهِدّ
ـ2ـ
إِيدَكْ حِطَّا بْإِيدِي
شَهِيدَكْ.. شَهِيدِي
تا تْخِفّ التِّنْهِيدِه
وْعَنْ وَطَنَّا نْرِدّ
ـ3ـ
وَطَنَّا الْـ مِنْحِبُّو
خَبَّانَا بِـ قَلْبُو
لازِمْ نْضَوِّي دَرْبُو
وْنِرْضِي بَيّ وْجِدّْ
**
لبنان
نشرتها في مجلة الأدب الشعبي ـ بيروت 1969
وألقتها إحدى تلميذاتي عام 2003
ـ1ـ
لُبنان.. نجْمِه ضَاوْيِه بِالشَّرْقْ
بَيْنَا وْبَين النّجْم ما فِي فَرْقْ
لُبْنَانْ.. عنْوان الْوَفَا والصّدْقْ
لبنان.. سَعْدٌو لِلسَّعَادِه عِرْقْ
لبنان.. تَوْب الْمَجْدْ مَا فِي خِرْقْ
لبنان.. شَتْوِه هَادْيِه بْلا بَرْقْ
ـ2ـ
لبنان.. لَوْحَه مْلَوّنِه بْمِيةْ لَوْنْ
لبنان.. لِلْمحْتاجْ مَدّ الْعَوْنْ
لبنان.. صَرْخِة طفل متْشّرَّدْ
سَكْرُوا بْوِجُّو بْوَاب الْكَوْنْ
ـ3ـ
لبنان.. نَسْمِه هَايْمِه بِجْبَالْ
لبنان.. حُرِّيِّه وْفَضَاوِة بَالْ
لبنان.. كِلْمِه خَرْطَشَا الأَبْطَال
لبنان.. شَهْقِة أُوفْ مِنْ مُوَّالْ
لبنان.. زَوْرَق والْبَحرْ آمالْ
لبنان.. شاعِر حُبّ مَرَّه قَالْ:
"زْرَعْت الأَرزْ أَمْجَادْ فَوْق تْلالْ
وْعِنْدِي الْوَفَا وِالتَّضْحِيِّه رِسْمَالْ
عِنْدي النِّسَا حَدّ الرّحال رْجَالْ
بِيحَمّلوا الإِعْدَى الْعَذَاب حْمَالْ
كلُّن جْنُودِي.. جْنُودْ إِسْتِقْلالْ"
ـ4ـ
لبنان.. رايِه مْلَوّنِه بْأَحْمَرْ
لَوَّنَا بْدَمُّو بَطَلْ أَسْمَرْ
لبنان.. فِيهْ الطَّيْرْ عَمْ يِسْكَرْ
وْيِشْرَبْ خَمر عِرْزَالْنَا الأَخْضَرْ
لبنان.. بِرْبٌوعُو الْهَنَا مْسَمَّرْ
لبنان.. أرْزِه مْنِ الْعُمرْ أَكْبَرْ
لبنان.. بِسْرَاجُو الْعلمْ نَوَّرْ
تْحَضَّر وْشَعْب الدِّنِي حَضَّرْ
وْلُبْنَانْ مُشْ بَسّ الْـ مَرَقْ لُبْنَانْ
لبنان فَضْلُو الْيَوْم عَمْ يِكْبَرْ
ـ5ـ
لبنان يَا نَفْحِة شَذَا رْيَاحِينْ
مِينْ بِـ هَـ الْكَونْ مِتْلُو مِينْ
تِخْمِينْ عَ صَخْرُو الأَزَلْ تِخْمِينْ
قَصْرُو بَنَى وِحْجَارْتُو مْنِ سْنِينْ
وْلُبْنَانْ مِنْ قُوِّة جَبَلْ صنِّينْ
عَمَّرْ مْتَارِيسْ قُوِّه وْلِينْ
وْمِنْ خَشَبْ أَرْزَاتْنَا الْحلْوِينْ
مَشَّى مرَاكِبْ نُور لِلتّكْوِينْ
ـ6ـ
لبنان.. غنْوِة بُلْبُل الشَّادِي
لبنان.. ضحْكِةْ حُبّ وِسْعَادِه
لبنان.. صَوت جْرَاسْ بِالْوَادِي
لبنان.. دَيْر وْجَامِع عْبَادِه
لبنان.. دَمّ الْقَلْبْ رُوح الرُّوحْ
وْبَيْتْ بَابُو عَ الدِّنِي مَفْتُوحْ
لبنان.. بِـ مَسْحِةْ شِفَا مَمْسُوحْ
يِعْنِي الْمَرِيضْ لَوْلا بْجِبالُو يْسُوحْ
بْيِشْفَى وْبِيعِيشْ الْعُمْرْ بِزْيَادِه
أَللَّـه الْحَكِيمْ.. وْأَرْضنا عْيَادِه!
**
جبل لبنان
كتبتها عام 1969
وألقاها أحد طلابي عام 2001
ـ1ـ
يا جَبَل لُبْنانْ
يَا خَيّ الأَبَدْ
بِرْبُوعَكْ الإِنْسَانْ
أَوّل ما انْوَجَدْ
ـ2ـ
لَوْلاكْ.. لَوْلا
تْلالَك الْخَضْرَا
بِالأَرضْ كِلاَّ
ما نَبَتْ شَجْرَه
ـ3ـ
صِنِّينْ إِسْمَكْ
هَـ الأَجْمَلْ كِلْمِه
وْأَللَّـه شِي رَسْمَكْ
خَزَّق الرَّسْمِه
ـ4ـ
وِبْقُوِّةْ صَخْرَكْ
الأَزَلْ مَمْزُوجْ
وْحامِلْ عَ ضَهْرَكْ
قْنَاطِير تْلُوجْ
ـ5ـ
وْبِحْرَاجْ الأَرْزْ
الْـ زَادِت شْمُوخَكْ
عاشُوا بِالْعِزّْ
طْفَالَكْ وِشْيُوخَكْ
ـ6ـ
وْأَوّل ما بَاسْ
الْقَمَر صْخُورَكْ
مِتل الإِلْمَاسْ
شَعْشَعْلَكْ نُورَكْ
ـ7ـ
وِالشَّمسْ رَكْعِتْ
عَ راس التَّلِّه
وْلِلسَّمَا رَفْعِتْ
إِيدَيْهَا تْصَلِّي
ـ8ـ
تْصَلِّي مِنْشَانَكْ
تَـ الرَّبّ يْخَلِّيكْ
عَالِي بْلُبْنَانَكْ
مْنِ الإِعْدى يِحْمِيكْ
ـ9ـ
وْبِطلُبْ مِنْ رَبِّي
يَا جَبَلْ تِبْقَى
بِـ إِيدِي حَرْبِه
وْبِقْلُوبُنْ حَرْقَه
ـ10ـ
بِقْلُوب أَعْدَاءَكْ
هَـ الْحَرْبِه تِغْرَقْ
وْيِبْقَى بْسَمَاءَكْ
مْرَفْرَف الْبَيْرَقْ
ـ11ـ
.. يَا بَيْرَق المِسْلِمْ
الْمَسِيحِي وِالدِّرْزِي
لْهَالْجَبَلْ تِسْلَمْ
تَا تِسْلَم الأَرْزِه
**
ربّوني أهلي
غناها أطفال معهد سيدة لبنان عام 1982
ـ1ـ
رَبُّونِي أَهْلِي
بِـ أَرِضْ غُرْبِه
لُبْنَانْ بْقَلْبِي
وْأَرْزَاتْ الرَّبّْ
يَا رَبِّي خَلِّي
بْلادِي بِالْقَلْبْ
قَلْبِي مَا تْعَوَّدْ
إِلاَّ عَ الْحُبّْ
ـ2ـ
دَخْلَكْ يَا رَبِّي
رِدّ الْمَحَبِّه
بْلادِي الْحَنُونِه
كَرْم عْلَى دَرْبْ
هِيِّي بِعْيُونِي
أَمْجَاد وْشَعْبْ
بْيِكْفِي يَا رَبِّي
بْيِكْفِيهَا صَلْبْ!
ـ3ـ
أَللـّه عَ الْجَانِي
اللِّي مَا خَلاَّنِي
بَوِّسْ أَوْطَانِي
مِنْ كِتْر الضَّرْبْ
دَخْلَكْ يَا رَبِّي
يَا أَعْظَمْ رَبّْ
خَلِّصْلِي حُبِّي
مِنْ نَار الْحَرْبْ.
**
أرزة
غناها أطفال معهد سيدة لبنان 1984
ـ1ـ
طِيرِي وْعَلِّي فَوْق النَّاسْ
وْرِفِّي بِغْصُونِكْ رِفِّي
يَا أَرْزِه.. تَا مُرّ الْكَاسْ
يِحْلا.. وِالْعُمْر نْكَفِّي
ـ2ـ
أَرْض بْلادِي صَرْلا سْنِينْ
عَمْ بِتْعَانِي مْنِ الأَوْجَاعْ
يَا أَرْزِه.. مِينْ غَيْرِكْ مِينْ
رَحْ يِنْدَهْ لِلسِّلْم: رْجَاعْ
ـ3ـ
لَوْنِكْ أَخْضَرْ.. بَسّ التَّلْجْ
غَطَّاكِي.. وْغَطَّى جْبَالِي
وْلَنُّو دْقِيقَه فَوْق الْمَرْجْ
طِلِّي.. تَا الزَّهْر يْلالِي
ـ4ـ
لا تْقُولِي.. تْرَكْنَا لُبْنَانْ
وْتِهْنَا عَ شْطُوطْ الْغُرْبِه
إِسْمِكْ.. رَسْمِكْ.. وَيْن مَا كَانْ
صُورَه مْصَوَّرْهَا بْقَلْبِي
**
نحنا هون
كتبتها يوم كان عمري 14 سنة
وغنتها إحدى تلميذاتي عام 2002
ـ1ـ
بْرَاس الْجُرْد
زْرَعْنَا الْمَجدْ
حَدّ الأَرْز اللُّبْنَانِي
وْصَار الْوَرْد
بْمَرْج السَّعْد
يْغَنِّي لِلْحُبّ غْنَانِي
ـ2ـ
عِنَّا جْبِينْ
أَعْلَى جْبِينْ
بْفَضلْ رَايِتْنَا الْحُلْوِه
نْحَامِي سْنِينْ
عَنْ صِنِّينْ
وِنْرِدّ الْقُوِّه بْقُوِّه
ـ3ـ
وَادِي.. جْبَالْ
سْهُولْ.. تْلالْ
مَصْدَرْ كلّ سْلال الْخَيْرْ
رَاحِة بَالْ
الشَّاعِرْ قَالْ
انْ كَانْ بِالجَّامِعْ أَو بِالدَّيْرْ
ـ4ـ
كلّ الشَّعْبْ
بْوَقْت الْحَرْبْ
سْلاحُو الإِيمانْ بِالأَرْزِه
بْيِمْشِي الدَّرْبْ
بْوِحْدِةْ قَلْبْ
مِسْلِمْ.. مَسِيحِي.. دِرْزِي
ـ5ـ
نِحْنَا هَوْنْ
مَلْوَى الْكَوْنْ
نِتْفَيَّا بْظِلّ رَايِتْنَا
نْمِدّ الْعَوْنْ
بْمِيِّةْ لَوْنْ
لْكِلْ مِينْ رَادْ حْمَايِتْنَا
**
جندي
كتبتها يوم كان عمري 14 سنة
وألقاها أحد طلابي عام 2003
ـ1ـ
جُنْدِي.. أَنَا جُنْدِي
الإِيمَانْ مِنْ عِنْدِي
سَهْرَانْ عَ حِدِّي
عَ إِرثْ جَدِّي
سَهْرَانْ.. مُشْ نَعْسَانْ
حَدِّي الْعَلَمْ حَدِّي
ـ2ـ
كِلْمِةْ فِدَى الأَوْطَانْ
انْزَرْعِتْ عَلَى حْدُودِي
نَبْتِتْ وَفَا وْإِيمَانْ
عَطْيِتْ غِذَا خْلُودِي
وْرَفْعِت إِسمْ لُبْنَانْ
بِالسِّلْم وِالشِّدِّه
ـ3ـ
جُنْدِي.. وْكِلنَا جْنُودْ
عِنْد الْوَقِيعَه أْسُودْ
بِالدَّمّ مِنْفَادِي
تْرَابِه مْنِ بْلادِي
وِمْنِسْبَق الْبَارُودْ
عِنَّا الْوَفَا سَنْدِه
ـ4ـ
جُنْدِي.. وْشُو بَدِّي
غَيْر الْوَفَا لأَرْضِي
هَـ الْـ عِشْت بِجْبَالاَ
رَحْ مُوتْ كِرْمَالاَ
وْغَيْر هَيْك مَا بَدِّي
مِتْلِي مِتِلْ جَدِّي
**
أبواب
ألقتها احدى طالباتي عام 1989
ـ1ـ
سَكَّرُوا الأَبْوَابْ
عَتَّمُوا السَّاحَاتْ
هَجَّرُوا الأَحْبَابْ
بِالأَرْبَعْ جِهّاتْ
يَا وَطَن الْمَحَبِّه
رَحْ إِزْرَعَكْ بِـ قَلْبِي
صَلاَ وْغِنِّيَّاتْ
ـ2ـ
نِسْيِتْنِي اللَّيَالِي
عَ بَابَكْ غِنِّيِّه
دَخْلَكْ طِلّ قْبَالِي
مَارِدْ مِنْ خَبْرِيِّه
مِنْ دِنِي مِنْسِيِّه
تَا تِرْجَع الْحُرِّيِّه
وِالسَّهَرْ وِالنَّجْمَاتْ
ـ3ـ
افْتَكْرُوا إِنُّنْ مِحْيُوا
إِسْمَكْ وِالأَمْجَادْ
وِالنَّاسْ اللِّي بِقْيُوا
صَارُوا كْتِير بْعَادْ
نِحْنَا مَهْمَا بْعِدْنَا
حُبَّكْ بِيوَحِّدْنَا
وِبْيِخْلقْ مُعْجِزَاتْ!
**
أرض الحِكَم
غناها احد طلابي عام 1987
ـ1ـ
حامِلْ بِـ إِيدِي الْعَلَمْ
يا فَرْحتِي زِيدِي
نِحْنَا لْعَلَمْنا خَدَمْ
وِاسْتِقْلالُو عِيدِي
ـ2ـ
بْلادِي.. يا أَرْض الْحِكَمْ
يا صَخْرَه عَنِيدِه
ما بْيِقْوَى عْلَيْكِي الْعَدَمْ
أَمْجادِكِ بْإِيدِي
ـ3ـ
شُو تْغَنَّى فِيكِي الْقَلَمْ
شُو رَسْمِكِ جْدِيدِه!
مِنْ قَلْبِكْ شِلْت الأَلَمْ
تَا تْسِيدي وِتْمِيدِي
**
بحبّك
ألقتها إحدى تلميذاتي عام 1996
ـ1ـ
بْحِبَّكْ يَا لُبْنَانْ
كِيفْ مَا كِنْت تْكُونْ
مْكَيَّف وْفرْحَانْ
أَوْ دَامِعْ الِعْيُونْ
ـ2ـ
بْحِبَّكْ بِرَبِيعَكْ
بْحِبَّكْ بِخَرِيفَك الْـ فَجَّرْ يَنَابِيعَكْ
بْحِبَّكْ بِشَتْوِيتَكْ
بْحِبَّكْ بِصَيْفِيتَكْ
بْحِبَّكْ مِنْ كَانُونْ
وِلْغَايِةْ كَانُونْ
ـ3ـ
بْحِبَّكْ يَا حَبِيبِي
لأَنَّكْ حَبِيبِي
كِيفْ مَا كِنْت تْكُونْ!
**
استقلال
ألقاها احد طلابي عام 1999
ـ1ـ
غَنُّوكْ تا نْبَحّ الْقَصَبْ غَنُّوكْ
وْصِرْت الْخَمْر وِالْكاسْ
وِحْمِلْت إِسْم النَّاسْ
هَـ الْـ كِتِرْ ما هَجُّوكْ
صَارَتْ "أَلافَكْ" سَيْفْ
يْرِدّ الأَذَى عَ طُولْ
وِ"السّينْ" سَكْرَه وْكَيْفْ
وِ"التَّا" تْجِرّ فْصُولْ
كِلاَّ مْوَاسِمْ خَيْرْ
تِفْرَحْ بِمَلْقَى حْقُولْ
وْتِصْحَا عَ صَوْت الطَّيْرْ
ـ2ـ
وِ"الْقَافْ" قَوْل الْحَقّْ
عَ طُولْ عِنَّا فَرْض:
شَعْبَكْ صَعْب يِنْشَقّْ
مْوَحَّدْ بِـ حُبّ الأَرْضْ
ـ3ـ
وْ"لامْ أَلافَكْ".. لا
لِلطَّامِع الْمَغْرُورْ
بَدّنَا الأَرْض كِلاَّ
تِتْحَرَّر وْيِرْجَعْ
عْلَيْهَا يْشِعّ النُّورْ
ـ4ـ
وِ"الْلاَّمْ".. يا اسْتِقْلالْ
آخِرْ حَرفْ مِنْصَانْ
كِل ما خَطَرْ بِالْبَالْ
عَمْ يِبْتِدي.. لُبْنانْ
**
فخر
من كتاب "مجانين" 1976
ألقاها أحد طلابي عام 1989
كِنْتُو فَخْرْ
كِنْتُو فَخْرْ
شُو اللِّي حَصَلْ حَتَّى انْقَلَبْتُوا عَارْ
مِنْ بَعْدْ مَا عِشْتُوا دَهْرْ
تِمْشُوا وْتَحْتْ إِجْرَيْكُنْ يْفَرِّخْ زَهْرْ
وْعَ رُوسْكُنْ مَرْفُوع تاجْ الْغَارْ؟!
**
