دموعي

الغلاف للفنانة رندى بعيني
**

Charbel Baini

Domouee

My tears

**

   قصائدي كلّها كتبتها بالحبر إلاّ قصائد هذه المجموعة، فلقد كتبتها بدموعي، لذلك أرجوكم أن تقرأوها بصمت، وتعاملوها برفق ومحبة واحترام، لأنها أصدق ما كتبت.

**

راحوا

متل الكذب راحوا

وتركوا الوجع بالقلب

ومن هالدني ارتاحوا

ونحنا ع نفس الدرب

**

علاء ابو فخر

بالغربه قاعد إبكيك

يا علاء.. ودمعي نهر

رح هنّي أرزتنا فيك

وهنّي الفخر.. بأبو فخر

**

ناطور قلعة..

مهداة لروح الشاعر ميشال طراد.

ـ1ـ

غابْ بَدْر جْدِيدْ مِنْ أَهْلِي

خِرْسِت الْوَادِي.. شَهْقِت السَّهْلِه

وْمِتْل اللِّي جَنِّتْ، مِنْ غَضَبْها، جْبَالْ

وْنَخِّتْ تا تِحْمِل إِبِنْها "مِيشَالْ"

شَقْلِتْ مَعُو، مِنْ دُونْ وَعِي، "زَحْلِه".

ـ2ـ

مِيشَالْ وَدَّعْ هَـ الدِّنِي وِارْتَاحْ

سَكَّر بْوَابُو.. وْسَلَّم الْمِفْتَاحْ

وْقَلاَّ يا "زَحْلِه" لا تْقُولي "لَيْشْ"

"جِلْنَارْ" مَا طَلِّتْ؟!.. ضَرَبْها الطَّيْشْ

وْعَمْ يِسْتِوِي عَ خْدُودْها التّفّاحْ!

ـ3ـ

وْقَلْعِة "بْعَلْبَكْ" نَاطْرَه النَّاطُورْ

الْـ عَطَّر دْرَاجَا بْرِيحْة الْبَخّورْ

بْبَاقَاتْ زَهْرُو.. بْغَفْوِتُو.. بِدْمُوعْ

أَشْعَارْ.. طَلِّتْ مِن فِكرْ مَوْجُوعْ

وْبَعْدَا لْهَلَّقْ عَم تْوَزِّعْ نُورْ

ـ4ـ

وْصَاح الأَرْز: شُو بُو تَرَكْنِي "طْرَادْ"

وْعَ رَقِبْتِي عَمْ يِكْبُس الْجَلاَّدْ؟!

وْمَهْدِي أَنَا مُحْتَلّ.. شُو لُبْنَانْ

غَيرْ هَـ الْقَصِيدِه الْـ دَوْزَنا فَنّانْ

تَا تْصِيرْ غِنِّيِّه عَ تِـمّ وْلادْ؟!

**

شهيد الحقّ

ألقيتها يوم استلامي جائزة جبران لعام 1989، نيابة عن شهيد الكلمة الأديب توفيق يوسف عوّاد.

ـ1ـ

غِصَّيْتْ لِمِّنْ غَابِتْ الضِّحْكِه

عَنْ تِمَّكْ الْـ نَوَّرْ لَيَالِينَا

وْمَا قْدِرْتْ مِنْ كِتْرِ الْوَجَعْ إِحْكِي

إِنْتَ الْوَطَنْ.. وِحْرُوفَك الْمِينَا

ـ2ـ

وْبَيْرُوتَكْ اللِّي طْعَمتْهَا "رْغِيفَكْ"

جْنُون الْغَدْرْ هَدَّمْ "طَوَاحِينَا"

جِينَا تَا نِسْأَلْهَا: إِنِتْ كِيفَكْ؟

فَتْحِتْ عَ صَدْرَا وْجَاوْبِتْنَا: مَاتْ

بَيّ "الْعَذَارَى" حَبّ يِفْدِينَا!

ـ3ـ

مِتّْ؟!.. مُشْ مَعْقُولْ إِنْت تْمُوتْ

وْكَحَّلْ عِينَيْنَا "غْبَارْ إِيَّامَكْ"

وِ"الصَّبِي الأَعْرَجْ" عَ دَرْب الْقُوتْ

يَا مَا شِبِعْ مِنْ بَرْكِةِ كْلاَمَكْ

قَتْلُوكْ.. قَالُوا: بْتِنْقِتِلْ بَيْرُوتْ

هَـ الْكلّ عُمْرَا تْعِيشْ بِمْنَامَكْ

مِشْيِتْ "قَوَافِلْ وِالزَّمَنْ" تَابُوتْ

وْ"فُرْسَانْ" تِسْرُجْ خَيْل قِدَّامَكْ

تَارِي وَقتْ مَا بْتِنْهِدِمْ الِبْيُوتْ

وِيْبُوسْ دَمَّكْ عَتْبِة بْوَابَكْ

بِتْصِيرْ تِخْفُقْ نَصرْ.. أَعْلاَمَكْ.

ـ4ـ

رَحْ مِدّْ إِيدِي.. وِالْفَرَحْ زِنَّارْ

تَا مَثّلَكْ.. يَا مْمَثَّل بْلادِي

يَا شَهِيدْ الْحَقّْ.. جَايِي نْهَارْ

يِحْكِي قِصَصْ.. وِيْفَهِّمْ وْلادِي

كِيف الْحَقِيقَه بْيِخْنِقَا أَشْرَارْ

عَ مْسَارِح التِّدْجِيلْ.. رِدَّادِي

وْلَوْ مَا يْكُون الْعَارْ.. مِتْلُنْ عَارْ

كَان اسْتَحَى وِتْلَطَّفْ زْيَادِه!

ـ5ـ

بِرْدَانْ.. حَيِّكْ لِلْوَطَنْ "قِمْصَانْ

مِنْ صُوفْ" عُمْرَكْ.. يَا إِبِنْ عُوَّادْ

وْضَوِّي "مَنَارَه" بْعَتْمِة الْهُجْرَانْ

رَحْ تِسْرُق الأَوْهَامْ نَاس بْعَادْ

وْضِمّ حَرْفَكْ عَ حَرفْ جُبْرَانْ

بْحَرْفَيْنْ.. فِيهُنْ يِنِشْلُوا الِبْلادْ

لا.. وْأَكْبَرْ "لا".. لْمِينْ مَا كَانْ

لا لِلْهَجرْ.. لِلْمَوْتْ.. لِلتِّقْسِيمْ

لُبْنَانْ بَاقِي بْهَالدِّنِي.. لُبْنَانْ

**

باقي انت باقي

في ذكرى توفيق يوسف عوّاد 1990

ـ1ـ

كِذْبُوا اللِّي قَالُوا: متّْ

الْـ مِتْلَكْ صَعِبْ تَا يْمُوتْ

لكِن.. لأَنَّكْ نِمْتْ

وْطُوَّلْتْ حَتَّى قمْتْ

مِنْ دُونْ وَعِي.. قَطْعُوا الأَمَلْ

وْزِعْلُوا.. وْيَا حَسْرَه عَ الزَّعَلْ

مِنْ كمْ خَشْبِةَ شُوحْ بَارَكْهَا الأَزَلْ

عِمْلُوا إِلَكْ تَابُوتْ!

ـ2ـ

بَاقِي إِنِتْ بَاقِي

يَا شَيْخْنَا الْجَبَّارْ

بِـ كِلّ نِقْطِةْ دَمّْ

انْسَكْبِتْ تَا تِمْحِي الْعَارْ

وِبْكِلّْ دَمْعِةْ أُمّْ

نَاطْرَه تْلاَقِي

هَاك الْوَحِيدْ اللِّي رَحَلْ

عَ الْحَرْبْ تَا يْخَرْطِشْ أَمَلْ

تْعَمَّدْ.. وْصَفَّى بَطَلْ

عَ حَفِّة السَّاقِي..

ـ3ـ

لَوْلاكْ ضَاع الْحُلْمْ

مْنِ عْيُونْ نِعْسَانِه

كانِتْ تْحَوِّشْ سِلْمْ

مْنِ كْرُومْ دِبْلانِه

إِلاَّ وْبِيطِلّ الْوَعْدْ

صَارِخْ كَأَنُّو الرَّعْدْ:

" تَا تْكُونْ لُبْنَانِي

لازِم تْطَال الْمَجْدْ

وِتْكّلِّلُو بِالْوَرْدْ

وْتِفْدِي بْدَمَّكْ أَرْضْ أَوْطَانِي

وِتْعَلِّمْ الْـ رَحْ يِخْلَقُوا مِنْ بَعْدْ

كِرْمَالْ تِبْقَى الأَرْضْ

يِسْتَشهدوا تَانِي"..

ـ4ـ

سْبَكْنَا الْحُرُوف مْنِ الدَّهَبْ

لْمَجْدَكْ.. تَا حَتّى يِنْكَتَبْ

يَا لْـ كِنْتْ عَالِي بْطَلتَكْ

وْهَيْبِةْ أُبُوِّه هَيْبتَكْ

بْلادي إِذَا شَافِتْ عَجَبْ

كانْ الْعَجَبْ بِـ غَيبتَكْ!

ـ5ـ

بْلادِي.. الْجِبَالْ الشَّامْخَه وِالسَّهْلْ

بْلادِي.. الضّياعْ الْحَالْمِه والأَهْلْ

يَللِّي "رْغِيفَكْ" نَامْ عَ دَيْهَا

وْزَهْر "الْعَذَارَى" تْكَوَّمْ عْلَيْهَا

بْلادِي.. يَا "بِنْ عُوَّادْ" رَحْ تِشْتَاقْ

لِعْيُونَكْ الْـ غِمَّضْتهُنْ بَكِّيرْ

عَ أَلْف فَجْرْ.. وْأَلْفْ حُلْم كْبِيرْ

مِنْشَانْ حَتَّى تِلْتِقِي بِرْفَاقْ

سَبْقُوكْ تَا يْنَامُوا بعِينَيْهَا..

**

رثاء النقيب جورج بو انطون

ـ1ـ

يا جورج بو انطون كيف بتموت    

بليلة ميلاد السيّد الفادي

وناطر تا عيّد عيلتك ببيوت    

انبنيت بكتبك ع شفق وادي

الظاهر عملت مغارتو تابوت   

ودموعنا جوقات ردادي

ولمّن ع جنة ربنا بتفوت     

بتشوف فيها جنة بلادي

ـ2ـ

كنت النقيب وسيّد الأشعار   

وكنت الصديق الما انغلق بابو

التاريخ بيضوّي ع ناس كبار    

غابوا.. وعن الأضواء ما غابوا

عطيوا الأدب.. عملوا القصيده مزار   

قدّامها.. شموع البشر دابوا

ما في شعر يرثيك شو ما صار    

جنّ الشعر يا جورج ليل نهار

ومحتار كيف بخفّف مصابو

ـ3ـ

كرّمتني.. هيك الكرم بيكون    

رغم البعد عم إحتمي بظلّك

شربل إلك طول العمر مديون    

فيك القلب والروح تتملّك

ع شطوط سيدني وزّعت الفنون   

وجوقة بلابل عم ترتلّك

بفن الزجل.. صرت الملك وعيون    

تفرح إذا غنّيت وتجلّك

بفنّ النقد عندك قلم مسنون    

خلاّ الدني توقف على مطلّك

بفن الغزل.. شيّدت اعلى حصون   

و"جانيت" قدرت بس تحتلّك

ضاعوا عيالك.. والعقل مجنون    

ع دروبُن الدمعات بتدلّك

وحومال قلبا بالحزن مطعون     

خسرت حبيبا جورج بو انطون

هنيّال ألله فيك.. رح قلّك

ـ4ـ

بعزّي ولادك وين ما كانوا    

بعزّي النقابه بشاعر زْمانو

بعزي "بهيّه" مع رفاقا هون    

شعّار شعرُن زاد ألوانو

بعزّي وطن.. شعبو انزرع بالكون    

ومهما ابتعد عايش بأوطانو

من فوق مدّلو يا جورج العون     

وقوّي إيمانو بالأرز ع طول

بيموت شعب ان مات إيمانو

**

مالك طوق

ألقيتها في ذكرى أربعين الشاعر مالك طوق، في قاعة كنيسة مار مارون سيدني ـ أستراليا، يوم الأحد الواقع في 27 آب 2000

ـ1ـ

الْقَامِه طَوِيلِه.. صَعبْ تَا نْطَالاَ

غَيْر الشِّعر مَا بْيُوقَف قْبَالاَ

مالِكْ قَصِيدِه مْتَلّتِه الأَبْيَاتْ

تِعْب الْوَحِي تَا بْكَرِكْتُو شَالاَ

ـ2ـ

نَقَّى الْجَبَلْ مِنْ شيِبْتُو تَلْجَاتْ

حَدّ السَّمَا مِتْشَاوْفِه بْحَالاَ

وفَرَّقْ عَ غَابِةْ أَرِزْنَا أَرْزَاتْ

تْجَلَّى الإِلَه بْفَيِّة خْيَالاَ

ـ3ـ

بْـ "كَوْمِةْ خَطِيِّه" وَقَّع بْنَيَّاتْ

قَال الشَّرَفْ، عَ السَّكْتْ: نِيَّالاَ

عِنْدُو الْخَطِيِّه شِعْر وِحْكَايَاتْ

وْضِحْكِةْ صَبِيِّه الطُّهْر رِسْمَالاَ

ـ4ـ

"عْنَاقِيدْ" حُبُّو صَارِت تْرَيَّاتْ

بْلَيْل الْبُغضْ مَا غَصّْ مِشْعَالاَ

لُبْنَانْ أَرْضُو.. كِلِمْتُو.. صَرْخَاتْ

انْطَبْعِتْ صَلاَ عَ شْفَافْ أَبْطَالاَ

ـ5ـ

لُبْنَانْ جُرْحُو.. وكِتْرِت جْرُوحَاتْ

جْنُون الْغَدرْ مَا شَافْ عَ شْكَالاَ

بْسِيدْنِي ما جينا نْقَلِّقْ الدَّمْعَاتْ

الْغُرْبِه، عَ طُول، بْتِنْدُب طْفَالاَ

ـ6ـ

جِينَا نْرَجِّعْ غَلِّة الْكِلْمَاتْ

لِلِّي عَطَى الْكِلْمَاتْ رِسْمَالاَ

هَـ الطَّوْق.. طَوْق الْعِزّ بِالْحَزَّاتْ

إِبْن الْقَدَاسِه الْـ وَسَّعْ مْجَالاَ

ـ7ـ

بْشَرِّي بْشِعْرُو بَاقِةْ صْلاوَاتْ

بْيِسْكَرْ إِذَا بْيِسْبَحْ بِمُوَّالاَ

جَارِةْ سَمَا.. مِتْعَمِشْقَه بْغَيْمَاتْ

مِنْ صُوفْهَا.. عَمْ يِنْغِزِلْ شَالاَ

ـ8ـ

رْفِيقِةْ قَادِيشَا.. صْخُورْهَا قَلْعَاتْ

أَللـه الْوَحِيدْ الْـ غَبَّر جْبَالاَ

بْشَرِّي مَا قَالِتْ: مَاتْ.. لِمِّنْ مَاتْ

مَالِكْ، مِتِلْ جُبْرَانْ، بَعْدُو حَيّْ

بْشَرِّي قَدِيرَه تْعَيِّش رْجَالاَ

**

بَيّ الصَّحافِه

ألقيتها في المهرجان التأبيني الذي أقيم لفقيد الصحافة والأدب المرحوم لويس الحاج، آذار 1995ـ سيدني.

ـ 1 ـ

رِشِّي الْوَفَا رِشِّي يا " قَيْتُولِه”

“لْوِيسِكْ " رَحَلْ.. شو بَدِّكْ تْقُولِي؟!

كانْ " النَّهار" الـْ ما انْطَفَى بِالشَّرْقْ

صار الْحُلم .. يا عْيُونْنَا جُولِي..

"مَخْزُون ذَاكِرْتُو" .. جْراس البَرْقْ

يا جْراس وَعِّي شْعُوبْ مَسْطُولِه

كلْ ما حْرُوفُو تِغْرَقْ بْشِي حِرْقْ

مْنِ الْحِرْق بِتْفَرِّخْ مَشاعِلْ نُورْ

بْإِيدَيْنْ ، مِتْل الصَّخْرْ ، مَحْمولِه!

ـ 2 ـ

بَيّ الصَّحَافِه.. الأَرْزْ غَنّالُو

غْنَانِي الْمَجْد.. تَا يْمَجِّد عْيَالو

تْمَانِيْن عُمْرو.. يا تْلُوج الدَّهْرْ

بِالشَّيْبْ، أُوعِي، تْحَيّكِي شَالُو

رْفِيق "التّوَيْنِي" الْمِتِّشِحْ بِالصَّبْرْ

وْقَاعِدْ لَـ حَالُو يْوَدِّع خْيَالُو

رْفِيق الْحَرْف.. مِنْ يَوْم فَاقْ الزَّهَرْ

عَ وَشْوَشَات الْمَرْجْ .. نِيَّالُو

رْفِيق الْحَقِيقَه الْـ مَا بْيَعْرِفْ غَدْرْ

تْعَمْلَقْ وَفِي، الإِخْلاصْ رِسْمَالُو

رَبَّى عَ إِيدُو قْلامْ زَرْعِتْ فَجْرْ

بِبْلادْ.. زَارِعْهَا بْأَفْضَالُو..

ـ 3 ـ

وَيْن الْحَكِي؟!.. كِل الْحَكِي مِنْصَانْ

بِقْلُوبْنَا .. لِلِّي عَبَدْ لُبْنَانْ

يَا مَا سِهِرْ.. تَا تْنَامْ عَيْن الأَرْزْ

وْيا مَا بِكِي.. تَا تِضْحَكْ الأَوْطَانْ

اسْتَمْلَكْ قَنَاعَه.. وْكَان طَيْر الْعِزّْ

مْرَافِقْ يَمِينُو مِنْ قَدِيم زْمَانْ

انْ هِزَّيْت بَيْتُو.. قَامْتُو بْتِهِزّْ

انْ هِزَّيْتْ شَعْبُو.. كِلِمْتُو بِتْصِيرْ

بُرْكانْ.. عَمْ يِلْعَبْ فِيَا بُرْكانْ!

**

إبن الشام..

الى روح الشاعر نزار قبّاني

ـ1ـ

لا إِنْتْ جِيتْ.. وْلا أَنا شِفْتَكْ

مِتْلِ الْكِذِبْ، مِنْ مَوْتَكْ، خْطَفْتَكْ

عِيشْ حَدِّي.. غُرِبْتِي تْقِيلِه

أَتْقَلْ مِنِ (الْغَصَّه) اللِّي كَتِّفْتَكْ

عَنْ إِنْبِطَاحْ النَّاسْ.. تِحْكِيلِي

عَنْ (زَحْفِةِ الذُّلّ) اللِّي قَرِّفْتَكْ

حُكَّامْ.. بَدُّنْ بَسّْ تِحْمِيلِه

تْعِبْنَا، وْمَا تِعْبُوا.. هَاتْ مَجْرِفْتَكْ!

وَحْدَا (الأَرِضْ) بِتْضَلّْ تُومِيلِي

هْنِيَّالْ (أَرْضْ) بْعِزّ خَلِّفْتَكْ

حِبَّيْتْها.. وِكْتَبِتْهَا مْتِيلِه

لأجْيَالْ.. عِطْشَانِه لْمَعْرِفْتَكْ

غِنَّيْتْهَا.. وْقِلْتِلّها: مِيلِي

صَرْخِتْ بِـوِجَّكْ: لأْ.. خَوِّفْتَكْ!

وِشْوَشْتْني: مَا رِبْحِتْ جْمِيلِه!!

رِبْحِتْلَكْ.. وْبِالشَّوْقْ لَفْلِفْتَكْ

قُومْ شُوفْهَا.. ما بْإِيدْهَا حِيلِه

قُومْ شُوفْهَا .. كِلّ الْمَحَارِمْ سُودْ،

نَشِّفْ دْمُوعا بْطُهِرْ مَنْشِفْتَكْ.

ـ2ـ

فِهْمُوكْ؟! ما فِهْمُوكْ!.. مُشْ مَعْقُول

يِبْقَى الشَّعِبْ طُولْ الْعُمرْ مَسْطُولْ!

بَدَّكْ الشَّعْبْ يْصِيرْ فَوْقْ الْكِلّْ

يْغَيِّرْ حُكمْ وِيْحَاكِم الْمَسْؤولْ

بَدَّكْ الشَّعْب يْهِدّ حَبْس الذّلّْ

وْسَاعِةْ مَا بَدُّو بِالْحَقِيقَه يْجُولْ

يِمْحِي الْجَهل وِالعَبْقَرِيِّه يْجِلّْ

وْيِسْهَرْ، مَا يِغْفَى، تَا يْرَبِّي عْقُولْ

وْيِلْغِي الحُقدْ والطَّائِفِيِّه يْشلّْ

وْيِبْنِي وَطَنْ.. يِبْقَى وَطَنْ عَ طُولْ

بَدَّكْ الشَّعْبْ يْحَارِبْ المُحْتَلّْ

وْطُفل الْحِجَارَه بِالْحُضنْ مَحْمُولْ

هَيْدَا طُفل لازِمْ بِـ بَيْتُو يْضَلّْ

نَامُوا الْعَناتِرْ وِالشَّنَبْ مَفْتُولْ!

بَكِّيرْ يَا نِزَارْ حَتَّى تْفِلّْ

خَايِفْ نْسِدّ بْوَازْنَا وِنْنَامْ

وْنِبْلَعْ، إِذَا مِنْقُولْ، شُو مِنْقُولْ!

ـ3ـ

لَنْدِنْ، بْتِشْهَدْ، جِيتْ تَا زُورَكْ

وْرَطِّبْ شْفَافِي بْبَوسِةْ الْيَنْبَوعْ

وَيْنْ كِنْتْ؟.. اخْتَفْيِتْ طْيُورَكْ

وْوَقْتِي قَلِيلْ.. وْجَنّ فِيِّي الْجُوعْ!

قِلْتْ بَدِّي فَاجِىءْ زْهُورَكْ

وْإِهْدِي عْيُونَك كَمِشْتَيْنْ دْمُوعْ

قِلْتْ بَدِّي شِمّْ بَخُّورَكْ

وْنِحْكِي سَوَا كِلّْ الْحَكِي الْمَمْنُوعْ..

إيدي تْدِقّْ.... وْيِرْتِفِعْ سُورَكْ

وِتْتَمْتِمْ لْحَالا: الرَّقِمْ مَقْطُوعْ

مَا كِنْتْ صَدِّقْ.. فَارْقَكْ نُورَكْ

مَا كِنْتْ صَدِّقْ يَا حَبِيبْ الْقَلْبْ

عند اللِّقَا.. يْكُونْ اللِّقَا.. مَوْجُوعْ!

ـ4ـ

نَامُوا مْكَاتِيبَكْ عَ إِيدَيِّي

سِهْرُوا مَعِي.. تَا الصُّبُحْ صَبَّحْنَا

غِسَّلْتْهَا بِدْمُوعْ عِينَيِّي

وْغِفَّيْتْهَا.. وْبِالنَّوْمْ مَا ارْتَحْنَا

الْحُزِنْ.. دِنْيِةْ خَوْفْ مِطْفِيِّه

بْتِمْحِي أَسَامِينَا وْمَطَارِحْنَا

مِدّ إِيدَكْ.. آخْ لَوْ فِيِّي

صَيِّرْ كْفُوفَكْ مَسَارِحْنَا

تْهِبّ فَوْقَا رْيَاحْ حُرِيِّه

وْبِبْلادْ، إِسْمَا بْلاَدْ، تِشْلَحْنَا

نْعِيشْ فِيهَا.. نِبْنِيَا سْوِيِّه

تِعْزُفْ مُوسِيقِتْهَا جَوَانِحْنَا

وِيْصِيرْ إِسْمَكْ لَحِنْ غِنِيِّه

تِرْقُصْ عْلَيْهَا أَلْفْ حُورِيِّه

وْبَيْرُوتْ بِـ صَوْتَا.. تْسَوْسِحْنَا

ـ5ـ

شِعَّلْتْ يَا بْنِ الشَّامْ.. أَرْضِ الشَّامْ

بِرْجُوعَكْ اللِّي نَطْرِتُو الإِيَّامْ

كَانْ الرُّجُوعْ وْدَاعْ.. شُو اللِّي صَارْ؟

جَنّ الشَّعِبْ.. وِانْطَفْيِتْ الأَحْلامْ

وْجِثْمَانَكْ الْمَلْفُوفْ بِالأَزْهَارْ

انْحَنْيِتْ إِلُو مِنْ حِزِنْهَا الأَجْسَامْ

وِتْيَتَّمِتْ مِنْ بَعْدَكْ الأَشْعَارْ

وِتْكَسَّرِتْ مِنْ لَوْعِتَا الأَقْلاَمْ

وْدِمَشْقْ صَوْتَا يْهِبّ: يَا نِزَارْ

رْسَمْتَكْ عَ صَدْرِي شَارِعْ وأَعْلامْ

عُودْ يا بْنِي هَالزَّمَنْ غَدّارْ

عُودْ يَا بْنِي غُرْبِتَكْ أَوْهَامْ

الدّارْ إِنْتْ.. وْعَ مْطَلّ الدَّارْ

حِضِنْ إِمَّكْ نَاطْرَكْ تَا تْنَامْ

نَامْ.. يَا صَحْوِةْ عِينَيْنَا.. نَامْ

**

الأم تيريزا

ـ1ـ

مشْتاقَه..

مْأَكَّد مشْتاقَه

لِلْفَادِي.. لْطُرْقات الْجَنِّه

لِمْلايِكْتَا الْـ عَمْ بِتْغَنِّي..

بَرْمِتْ وِجَّا بْكِلّ عْيَاقَه

وْرَفْعِتْ إِيدَا..

انْتَهْيِتْ عَ الأَرْض مْوَاعِيدَا

هِدْيُوها بْـ (كَالْكُوتَا) بَاقَه

زْهُورا مَقْطُوفِه مْنِ حْقُولُنْ..

هِدْيُوهَا الْوَهْجْ الْـ بِعقُولُنْ..

حَبُّوا يِحْيُوهَا وْمَا قِدْرُوا

ماتت..

ماتتْ!

تِيرِيزَا.. الأم الْقِدّيسِه!

ماتت..

ماتت!

كفّا دَيْرْ.. وْقَلْبَا كْنِيسِه!

ضَبُّوا قَامَاتُن وانْكَسْروا

وِانْفَجْرِت صَرْخات جْنُونُنْ

وْلِمِّن قَبْرُوها بِعْيُونُنْ

حَسّوا هِنِّي الْـ عَمْ يِنْقِبْروا!

ـ2ـ

وقْفُوا بالصَّف.. وْإِيدَيْهُنْ

عَمْ بِتْهَوِّي..

خْيَالاتْ.. وناقِصْها القُوِّه

اشْتَاقُوا لِلْبِتْحِنّ عْلَيْهُنْ

لِلْزَرْعِتْ أَللّـه بْعِينَيْهُنْ

لِلْحُلْم الْمَارِق.. للزَّهْرَه

لِلشَّمْعَه.. الْـ بَعْدَا بِتْضَوّي

أم الفُقْرَا..

ماتت..

ماتت!

بِنْت العَدْرا..

ماتت..

ماتت!

غَطُّوهَا بْشَرْشِفْ أَحْلامُنْ

وْمِحيُوا بالدَّمْعَه.. إِيَّامُنْ

ـ3ـ

إِغْنِيسْ .. نَقِّتْ عِيشِه صَعْبِه

تْعَجَّبْ مِنْهَا الْلاَمَعْقُولْ

تِعْبِتْ ، مِرْضِتْ ، حِمْلِتْ غِرْبِه

صَلِيبَا مَنُّو مَحْمُولْ..

الصَّوْت يْقِلاَّ : كَفِّي سَيْرِكْ

أَوْجَاعِكْ بِتْعَمِّرْ دَيْرِكْ !

مَاتتْ!.. مَاتتْ!

دَمْع الْفُقَرَا رَحْ بِيجِنّْ

مَاتت!.. ماتت!

أَصْواتُنْ تِشْهَقْ وِتْرِنّْ :

نِحْنَا إلبَانْيَا.. لاقِينَا

إِمِّكْ.. بَيِّكْ سَكْنُوا فِينَا

يا قِدّيسِه.. الْـ مَا مْنِنْسَاكِي

مَطْرَحْ ما بَدِّكْ وَدِّينَا

نِحْنَا .. شُو نِحْنَا لَوْلاَكِي؟!

مَرْضَى.. وْحُبِّكْ عَمْ يِشْفِينَا

وْمَا نَعْرِفْ كِيفْ بَدّنا نْصُونِكْ!

فُقَرَا.. لَكِنْ بِتْحِبِّينَا

خِبَّيْتِينَا بْدَيْر عْيُونِكْ

.. هَالدِّنْيِي الْمَا بْتَعْرِفْ دِينَا

رَحْ نِتْعَبْ فِيهَا مِنْ دُونِكْ؟!

**

ماتت قصيدة

إلى روح الراهبة الشاعرة إرنستين خوري.

ـ1ـ

غَيْم الْبِكِي.. لَبَّدْ سَمَا عِبْرِينْ

وْمَا عَادْ لاقَى الدَّيْر شَمْسِيِّه

هَبِّتْ صَلاَ عَ شْفَافْ قِدِّيسِينْ

تْرَهّبُوا.. نَكْرُوا الأَنَانِيِّه

وْصَوْت يِنْدَه: خَبّرُوا حَرْدِينْ

خِسْر الْوَطَنْ أَرْزِه سَمَاوِيِّه

خِسْر الْقَدَاسِه الْـ حِمْيِت مْسَاكِينْ

بْطَلْبَاتْ عَمْ بِتْرَدِّدَا شْبِيِّه

عِرْفِتْ يَسُوع وْخَطِبْتُو مْنِ سْنِينْ

وْقَدّمِتْلُو قَلِبْهَا هْدِيِّه

الْجُمْعَه الْعَظِيمِه قَرّبِتْ.. تِخْمِينْ

حَبِّتْ بَدَالُو تِنِصْلِبْ هِيِّي

مِينْ مَا بْيِزْعَلْ عَ إِرْنِسْتِينْ

عَ الرَّاهْبِه الْقدْوِه الشِّمَالِيِّه

عَ الشَّاعْرَه اللِّي زَرْعِت بْسَاتِينْ

بِبْيُوتْ مَهْجُورَه وْمِنْسِيِّه

خَيَّاتْهَا الْـ بِالدَّيْر مَنْدُورِينْ

سِمْعُوا كْلامَا قَبِلْ مَا تِرْتَاحْ

وِتْرَجِّع الْوَزْنِه الإِلَهِيِّه

ـ2ـ

فِرْحِت الْجَنِّه.. بْطَلِّة الإِيمَانْ

بْطَلِّة الْكِلْمِه الْوَاقْفِه عَ مْطَلّْ

بْطَلِّةْ قَصِيدِه وَعِّت الإِنْسَانْ

وْخَلِّت الْكُفْر بْعَتِمْتُو يِنْشَلّْ

مَشْلَحَا الأَبْيَضْ مِنْ تَلِجْ لُبْنَانْ

وْخَاتَم الْخُطْبِه فِضّتُو مْنِ الْفُلّْ

وْتَوْبَا الرّمَادِي اسْوَدّْ مِنْ دُخَّانْ

شَوَّه بْلادَا.. وْمِنْ غَدرْ مِحْتَلّْ

أَشْعَارْهَا الْـ بِتْشَرِّف الأَوْزَانْ

فَتْحِت بْيُوتَا.. تْأَهّلِتْ بِالْكِلّْ

وْصَارِت تْوَزِّعْ لِلْبَشَرْ صُلْبَانْ

وِتْعَلِّمُنْ كِيفْ الْحُزنْ بِيفِلّْ

يَا حُزن "شَرْبِل".. يَا بِكِي قِصْدَانْ

بَعْدِكْ يَا إِرْنِسْتِينْ رَحْ مِنْضِيعْ

وْمَا فِي فَرَح عَ بْوَابْنَا بِيطِلّْ!

**

ادوار

"كتبت هذه القصيدة يوم وصلني نبأ إزاحة الستار عن تمثال الشاعر المرحوم إدوار حرب في جامعة اللويزة، وبدلاً من أن أفرح حزنت لأن التكريم لم يأتِ من لبنان الوطن"14/11/2012 .

ـ1ـ

شفت الشعر متلي حزين

ما عرفت ليش الشعر عم يبكي

ما عرفت ليش مكسّر الضحكه

ومتل التلج عم يدبل بصنين

تمثال صفّى الشعر

من يوم.. يا إدوار

ودّعت أحلى عمر

ع صفحة الأشعار

وسنين تِطفي سنين

بِعْيون مسؤولينْ

لا كبيرُن بْيٍحكي

ولا زْغيرُن بْيٍحْكي

ومين رح يحكي

تا نكرّمك يا "شعر" مرفوع الجبين

يا "أرزة" العا صدرها أرزات تنّورين؟

ـ2ـ

خايف تا قلّك شعر

وانت الشعر كلّو

وبسّام سندة ضهر

الأبيات بتجلّو

سمحلي إذا بقلّك

تراب القبر مش لاك

لا تترك محلّك

بقلوبنا محلّك

بكمشة شعر.. لولاك

ما جنّ فيها مْلاك

حتّى ما يبقى بْلاك

عم يسرقك كلّك

ـ 3ـ

لولاك كلمة حرب

بتخوّف الإيام

لكن انت يا "حرب"

زرعت الإسم أحلام

وصار الإسم مشهور

معروف شرق وغرب

بكل الدني بينحبّْ

الحاء.. صارت حُور

والراء.. صارت ربّ

والباء.. تا البخّور

يعطّر سما إنسان

متعذّب ومنهان

بشعرك رسمت الدرب

تا القلب يغمر قلب

وندوق طعم الحبّ

بشعرك فضحت الزور

تا نعرف المستور

وتا تِعْمَر الأوطان

ونرجع ع حلم منحلمو من زْمان

إسم الحلم.. لبنان

**

يونس

إلى روح الشاعر يونس الابن

ـ1ـ

"أربع خمس كلمات"

وحْمَيْص لفّا سْكوت

قالوا: "يونسها" مات

وتلفلف بتابوت

روحوا اسألوا النجمات

انكنّو الشعر بيموت

روحوا اسألوا النسماتْ

مين الْـ بني البيوت

تا ترتفع.. بيروت

ـ2ـ

"لبنان يا قطعة سما"

مين قالها غيرو؟

راهب الشعر بينسمى

وبيت الشعر ديرو

ضوّى الوطن بسراج

ما بينطفي نورو

شاف البحر عجّاج

غرّق فوّاج فواج

شكّ القصيده سياج

تا نرجع نزورو

ـ3ـ

حمل "الشمال" بإيد

طيّر هوا شمالي

فرّق شموع العيد

وكان الشمع غالي

وصوت "الوديع" الـ صارْ

يرندح إلو أشعار

ربينا عليها زْغار

وفقنا ع شعر جديد

من طلّتو عالي

خلاّ المحبّه تزيد

وتنوّر ليالي

يونس.. إذا بتريد

وطّي الجبين شوّي

تا نبوّس جبينك

جبينك بعيد بعيد

بعد الشمس والفيّ

وتعبوا.. محبّينك

ـ4ـ

ما غبت.. تا ترجع

ونحسبلك زياره

نجمك عم بيلمع

بإيّام غدّاره

لا تقول عم تدمع

عينين محتاره

"سلمى" إذا بتسمع

إنو حبيبا غاب

بتهجر سما الكتاب

وبتسكن مغاره

بتلال مزياره

**

بدر جبيل

إلى روح أخي الدكتور عصام حداد

ـ1ـ

حاكيتني.. وكان الحكي كلمات

عدّيتهن.. ما بيطلعو سبعه

قلت: أوعا تخاف.. بو الهمات

وعكه بسيطه.. بيلبطا بْسرعه

نيّمتني ع فرشة منامات

بُكرا بْشوفَك.. والوقت وَلْعه

ولمن فقت قالوا عصامك مات

وما عدت أعرف إكمش الدمعه

ـ2ـ

قبالي الدني.. ومش شايف قبالي

موتك قتل فيّي الدني كلاّ

يا الـ كنت مجدي وكل رسمالي

يا مدبح الـ فوقو الشعر صلّى

مسمرت عين كفاع بِخيالي

لِمْ شفت بدر جبيل متدلّى

شو عملت فيي.. قول يا غالي

تا تركتني بالدمع إتسلّى

مدري أنا يئسان من حالي

مدري أنا زعلان من أللـه

ـ3ـ

ببغداد.. مين الـ شلحك بدربي

تا تصير غنيّة فرح بغداد

شفتَك ملك.. ومتوّج بشيبه

قلت: الجبل حامل تلج وبلاد

كيف الوطن.. عم إسأل.. وشعبي

جاوبتني بكلمات كانوا جداد:

لبنان.. حتّى بحالتو الصعبه

بيعطي الدني من بَيْدرو أمجاد

ما بتركو.. ما بربّح الغربه

خسارة بْلادي.. يهاجروا الأولاد

ومن يومتا.. خبّيتَك بقلبي

وبعدك بـ قلبي يا إبن حدّاد

ـ4ـ

شربل حزين كتير ع غيابك

ختيرت.. صعبه إحمل مصابَك

سلوى وسمير بيشهدوا عليي

وسامي وطوني وكل أصحابك

بحلف بـ أللـه.. الزارعك فيي

محبّه ووفا.. وكلمات بكتابك

بحلف بـ هالأرزه السماويه

الـ لُونتها بِـ زهرة شبابك

راجع على لبنان.. صيفيّه

قوم عجّل فتّح بوابك

إنت هيك طلبت يا خيي

راجع تا بُوس جْبينك العالي

مش حق إرجع بوّس ترابك

**

عقل وصباح

حفل تأبين الشاعر سعيد عقل والفنانة صباح 18/12/2014

ـ1ـ

غابت صباح.. وشِعرْنا جايي

يدلـُق بكي ع صفحة حكايه

هيي اللي كانت نجمة الأمجاد

تطيّر الضحكه.. تشعّ المرايه

بالحنجره حملتْ شعب وبلاد

ألله عطاها "الأوف" توصايه

غنـّت الأرزه.. فرّحت أجداد

كان الأرز لوجودهُنْ غايه

غنـّت الضيعه.. زيّنت العياد

بدادون صارت للنغم رايه

جابت "المجوز" رقّصت الولاد

"عبّود" زاد العزف تحلايه

ونحنا اللي عشنا عن وطنـّا بْعاد

زرعتْ وطن بقلوبنا آيه

مين قال إنّو اصطادها الصيّاد

شحرورة الوادي قمر لبنان

هيي البدايه الما لها نهايه

ـ2ـ

ولمن عرف بـ موتها إنسان

عمّر بشعرو للمحبّه بيوت

شافو الورد بجنينتو زعلان

متل القصيده الغارقه بسكوت

يبسِتْ دْموعو.. وشوش الديّان:

يا ربّ طفّي شمعة اللاهوت

انهز العرش.. وتطايرت تيجان

وقلّو: "المجد" ما بينزوي بتابوت

ابن زحله الكان فوق الكان

وفوق اللي بدّو يكون يا بيروت

سعيد عقل.. بينسمى لبنان

ولبنان، متل المجد، ما بيموت

ـ3ـ

زعلان منك يا سعيد كتير

كيف تركت لبنان للتعتير

كنت صوتو، فرحتو، عيدو

تـْوقـّف ع شطّو حروفك نواطير

توزّع جوائز.. مجدنا تزيدو

تتعملق.. ويتعملق التقدير

أجمل وطن بالكون بتريدو

يركض على حفافيه طفل زغير

لمن غبت.. شو طالع بإيدو

صفـّى ضحيّة حقد مع تكفير

بتمّ الهجر وقعت عَناقيدو

سياسات كذب ومنفقه وتزوير

جرّب إذا من فوق بتفيدو

ملاك السما عارف شو بدّو يصير

لبنان.. شعرك قادر يعيدو

ملعب شمس..غنيّة عصافير

وكل ما كبر لبنان.. انت كبير

**

ابن نيحا

إلى روح عملاق لبنان وديع الصافي

ـ1ـ

مات الوديع انتكست الأعلام

وشهقت الأقلام

وصار البكي أفلام

جنّت دني.. وتيتّمت أنغام

ـ2ـ

غنّى الأرز.. كان الأرز منضام

ناجى الإله.. تكسّرت أصنام

نادى المُهاجر.. ضحكت الايام

دوزن هرم.. صار الهرم أهرام

وعَ شفاف ناسيها ابْتسام

فتّح زْهور الغرام

وللكون صار يوزّع الأحلام

وخلّى الأنام

كل الأنام

يكرّموه باحترام

ـ3ـ

ولمن بنومو طوّل وما قام

انهزّ الوطن.. وتفرفطوا الحكّام

ريّس محي وجّو الظلام

وريّس شكي من الانقسام

وريّس قرف منّو المقام

وريّس غبي.. قولوا: حرام

يعني.. تا ما يطول الكلام

حكّام مش حكّام

أقزام..

مين بيحترم أقزام

يا إبن نيحا بقول.. ما بنلام

يا ريت رجّعت الوسام

ـ4ـ

الحق ع الشعب الغبي

المهما كبر.. بعدو صبي

شيلُن من شلوشن قوامْ

طهّر وطن من طلّتًنْ

من ملّتُنْ

من ريحة الأزلام

"لبنان يا قطعة السما"

ع طول هيك بينسمى

مش مزرعة أصنام

قلّن يا "صافي" كْمان:

لبنان شو لبنان

"جنّات ع مدّ النظر

ما بينشبع منها نظر"

ما بيحكما خصيان

ـ5ـ

رغم الحزن.. فرحانْ

إنّي بست إيدك

إنّي حضرت عيدك

يا بلبل الوديان

يا زارع الأوطان

ع شفاف كل إنسان

تا غارت البلدان

مش بسّ "صافي" بس

إنت الصفاوه كلّها

زوّغت عين الشمس

يا نغمة اللي بجلّها

ما بينذكر لبنان

من دون اسمك يا وديع

ما بيفرح الديّان

إلا بأوفَك يا وديع

ما مت.. بعدك هون

ما غبت مهما كان

باقي ع صدر الكون

نيشان شو نيشان

صوت.. ولحن فنّان

**

شربل نعيمي

الى روح صديق الشباب والدراسة الفنان شربل نعيمي

ـ1ـ

شربل بعيني وشربل نعيمي

رفاق كنا من زمان بعيد

من الأرض يمكن سرقتو الغيمه

حتى يشتّي ع الدني مواعيد

ـ2ـ

يا ما بشر نادوه بـ إسمي

ويا ما بإسمو شبّهوني كتير

هوّي ترك جسمو وأنا جسمي

صعبه تا يحمل هالإسم الكبير

ـ3ـ

بيشهد التلّ وساحة النجمه

بطرابلس.. ع أجمل مشاوير

نمشي سوا.. تضحك لنا الكلمه

ومنّو لحالو يبتدي التفكير

ـ4ـ

يا شربل الفنّان شو بقلّك

ما في شعر بالهجر يوصلّك

سآل الأرز عن مطرحك بيقول

بقلب العلم عم إحفر محلك

**

راحوا

إلى روح أخي الشاعر روميو عويس

ـ1ـ

كل ما العمر يمرق

بروزنامة الإيام

رح يدبل الزنبق

ورح تنتهي الأحلام

ـ2ـ

واللي بقي معنا

راح وما ودعنا

نندهلو تا يرجع

ما حب يسمعنا

ـ3ـ

ورشعين عم تدمع

ودمعاتها تنبع

من شعر كلو حب

من هالدني أوسع

ـ4ـ

وروميو الأحلى شب

رافق بشر راحوا

وتركوا الوجع بالقلب

ومن هالدني ارتاحوا

ونحنا ع نفس الدرب

ـ5ـ

رح إسألك يا رب:

ليش تا خلقنا

ما دام رح منموت

وليش تا مرقنا

ورح نرجع بتابوت

**

رثاء الشاعر عصام ملكي

ـ1ـ

كيف رح إرثيك يا ملكي

وقدّام شعرك ركعت الأوزان

سألت القصيده: ليش عم تبكي؟

قالت: بموتو تيتم الهجران

حبيت إشكي.. لمين رح إشكي؟

وماتوا، يا حسره، أشرف الخلان

تذكّرت هاك الصوت والضحكه

تذكرت كيف بتولد القصدان

كنت زورك.. آخد البركه

بركة شعر رح وزّعا بلبنان

وع أهل بشمزين وين ما كان

ـ2ـ

بنتك وقت ما دمعها قللي:

توفّى "عصام" صرخت: يا دلّي

حملت كتبك متل شي مجنون

وصرت إبكي.. وكتبك تصلّي

سألت ألله: ليش حتى نكون

وكل ما التقينا بتقرب الفلّه

يا شاعر الكرمات والزيتون

الغله عظيمه.. وتارك الغلّه

بعزّي "يولندا" وقلبها المحزون

بعزّي عيالك يا حبيب القلب

الأحزان علّه.. وكترت العلّه

**

روميو.. بعد سنه

الذكرى السنوية لوفاة الشاعر روميو عويس 7 ايلول 2022

ـ1ـ

مرقت سنه.. وبعدك ببالي دوم

قاعد لوحدي.. والدمع شلاّل

يا روميو.. عشقت الصلا والصوم

غيابك قتلني.. والبعد قتّال

لمت القدر.. ورميت كل اللوم

ع الكورونا.. وصار حقدي جبال

لا عدت أعرف كيف دوق النوم

ولا عدت قادر شيلك من البال

ـ2ـ

أيلول مش عارف بـ إيامو

مات اللي وسع الكون أحلامو

كان يكتب للصبايا شعر

وترقص بنات الشعر قدّامو

بكتاب خلف كتاب ضوّى الهجر

ليش الهجر تا يشلع خيامو

وحتى ما ينقص بالقلام الحبر

صارت دموعو حبر أقلامو

ولو تسألوا عنّو تراب القبر

بيقول: بو طوني اللي متلو قلال

رضيوا السما وعطيوا القصيده غلال

ببيتين شعر من القبر قاموا

**

شيرين

إلى روح الشهيدة شيرين ابو عاقله

ـ1ـ

بأيّا وقاحه وغدر قتلوكي

يا نجمة القدس.. وما عرفوكي

إنّك شيرين الحامله فلسطين

بقلبك.. بـ صوت مدوزن ملوكي

ـ2ـ

افتكروا إذا بتموت الحساسين

بيقضوا ع أشرف ناس سمعوكي

ولمّن عليكي قوّصوا مجانين

برصاص جوّا الرأس صابوكي

ـ3ـ

ركعتي تبوسي تراب بـ جنّين

غفيتي تحت شجره وما وعّوكي

جن الشعب.. وتجمهروا ملايين

متل العروس بحب رفعوكي

ـ4ـ

برموا المخيّم.. سكّروا دكاكين

وبالعطر.. بالأزهار رشّوكي

ركعوا وصلّوا ورددوا الآمين

ومتل الوشم ع الصدر طبعوكي

ـ5ـ

صرتي شهيده بين قديسين

ونار الجحيم لناس ظلموكي

بأسف على عربان ملهيين

خوّان.. كيف بدّن ينصروكي؟

ـ6ـ

باعوا القدس مع شعبها من سنين

وبتلاتعش أيار باعوكي

ووقت الجنازه تجمّعوا شياطين

منعوا العلم.. ضربوا اللي حملوكي

ـ7ـ

معقول حرمه تخوّف ملاعين

وإنتي بقلب تابوت خافوكي

لا تزعلي.. ما بيعرفوا مساكين

بدل العلم بالدمع لفّوكي

المتلك صعب تا يموت يا شيرين

والقدس أمك.. والشعب بوكي

**

روميو

دمعتي على الشاعر روميو عويس

ـ1ـ

مشتاق شوف تشرقط الضحكه

يا روميو.. يا شاعر الحلوين

كل الصبايا تجن تا تحكي

وتلبّسُن بالشعر الفساتين

بسيدني يا "بو طوني" تركت بركه

عيال متل الصخر متحدين

وما قلت مملكة الشعر ملكي

وشعرك وصل من هون ع صنين

واليوم جايي تقطع الشركه

بيناتنا.. تا تغيب عنّا سنين

ما عاد عندي دموع تا إبكي

عطيني دموعك يا نبع رشعين

ـ2ـ

أيلول، قالوا، بالشتي مبلول

تاري الشتي دمعات عينينا

تا تغيب عنّا هيك مش معقول

يا الكل عمرك تشفق علينا

إنت "بو طوني" البالشعر مصقول

قصايد دهب علقت بدينينا

إنت "بو طوني" السوسحت العقول

وإسمك ع وزن الأوف غنينا

شاعر عظيم بغربتك مسؤول

بنت "الخطيّه" بتعرفا "وينا"

و"بكاس" أحلى "نبيد" عم بتجول

وتزرع "عناقيدك" ع إيدينا

لولا "الكورونا" بتعرفك ع اصول

عن هالجريمه غمّضت عينا

لكن، يا حسره، تركتك مقتول

استشهدت يا "بن عويس" بالهجران

لبنان جنّ.. وهون جنّينا

**

إبن ملكي

الذكرى السنوية الاولى للشاعر عصام ملكي

ـ1ـ

اليوم بدّن يسمعوني الناس

يا إبن ملكي.. وعدّ ألطافك

وميزان شعرك للوزن مقياس

ما في حدا بالوزن ما خافك

وع قد ما وجودك حلو وحساس

صارت النكته ترافق شفافك

وما نسيت "ساره" شمعة القداس

بنتك حلم عايش بأطيافك

حبيت إنو تزورها وتنباس

بأعلى سما.. وتغل بلحافك

بعدو سْريرا بالفكر وسواس

يا ما حلفت برحمتا ومحزون

ووصيت بس تموت حدّا تكون

موت الطفوله كسّر كتافك

ـ2ـ

تارك "يولندا" رفيقة الأشعار

ليش حتّى قسيت ع حبّك؟

أجمل قصيده تركتها بالدار

أم البنات حفرتها بقلبك

من بلاد خلف البحر جنحا طار

سُهاد طلّت.. ليش تا ملبّك

قوم لاقيا.. دمعاتها قنطار

بناتك يا ملكي.. دربهن دربك

يا عصام الشعر.. شو ما صار

بتضل عايش موطنك كتبك

وبكروم بشمزين في أزهار

انزرعت إلك.. عم يسقيا ربّك

موتك ألم.. موتك أنين ونار

منكبر اذا منقول: منحبّك

شفت الدمع نازل بسيدني جرار

فكّرت إنو الشعب عم يبكيك

تاريك عم تبكي على شعبك

ـ3ـ

أيّا عرق رح تنتج الكركه

وتمرمر العنقود ع غيابك

ما سكرت مرّه.. سكرت الضحكه

ودوّبت كل الحب بشرابك

وأيّا قصيده قادره تحكي

وجنّت وقت ما تشلّع كتابك

جوقات زارت بيتك الملكي

وما تسكّر بوجّ البشر بابك

إسمك عصام.. وعيلتك ملكي

خالد إنتْ بعقول غيّابك

وعايش ع طول بقلب احبابك

**

رامز

الى روح الشاعر رامز عبيد 13/11/2015

ـ1ـ

قومي افتحيلو الباب.. محبوبك وصَلْ

يا جميله.. وحامل كتابو معو

عوّد عيونك ع المحبّه والغزل

وحياة عينك كلّنا رح نسمعو

جايب معو حساسين من هاك الجبل

تا يوشوكي كم كلمه.. ويرجعوا

بنتين عندو.. يا شعر نقّط عسل

ويا وحيد الدار.. قلّن يسطعوا

قلبو حنون كتير.. ما بيحمل زعل

كلما بكي.. بتولد قصيده بمدمعو

يا جورج هاشم كيف نجّحت العمل

وضويت بدر الشعر بليالي الأمل

حتى القصايد تنبنى من مقلعو

ـ2ـ

من جديد راجع شوفك من جديد

واسمع يا رامز صوتك من بعيد

جايي وحامل شعلة الديوان

والنور عم بيشعّ متل العيد

وخلفك قصايد.. تشبه الفرسان

انرسمت بإيدك.. لا توطّي الإيد

والناس متل القمح بالميدان

تهوبر إلك.. يا سيّد التجديد

يا شاعر اللي كنت وقت الكان

شعر المهاجر خابيه ونبيد

يا مكحّل التربه بأرض لبنان

وهالكم حبّه من التراب تعيد

الأحباب رفضوا يلفّك النسيان

روح الوفا فيهن.. ما بقدر زيد

جمعوا الشعر تا يزينوا الهجران

وشعرك حلو.. مش ناقصو تمجيد

شو بخبّرك عن رفقة الإخوان

عم ينقصوا الشعّار.. بالتحديد

فلان ختير.. عم يموت فلان

وفلان.. صدرو راكبو التنهيد

يا شعلة الكلاّ وفا وإيمان

مأكّد أنا.. بـ جنّة الرضوان

عم تسقف بيوت الشعر قرميد

ـ3ـ

سكوت القبر مش لاك.. محّي سكوت

عملاق.. ما بيساعك  التابوت

أنت مجد الحرف والأشعار

ع صفحتك عم تنبنى البيوت

ليش ساكت والبلد منهار

وفوق الزباله معرّم الطاغوت؟

براغيت عم تحكم وطن جبّار

ويا دلّ شعب بيحكمو برغوت

ما سكت مرّه.. كنت تطفي النار

وتحمي طفل.. عم يسرقولو القوت

لبنان سايب.. واللصوص كتار

شقّ القبر.. مش حقّ إنّو تموت

يا مركع التاريخ والأقدار

يا مسيج الأكوان بالياقوت

مسمرت قلبك فوق هاك الدار

تا تسكن بمتريت ليل نهار

وتا تشم ريحة أمنا بيروت

**

المتروبوليت

بولس صليبا

ـ1ـ

مطران.. صعبه يلفّك التابوت

وخدمت كل الناس بالغربه

بولس صليبا كيف رح بتموت

وبعدك لهلق ساكن بقلبي

ـ2ـ

ومتلي أنا.. عم تندهك بيروت

وتقول موتك يا قمر كذبه

القبور صارت للزهور بيوت

قبرك رفعها.. وغيّر اللعبه

ـ3ـ

رخيص الدهب.. رح إرسم بياقوت

صورة وجه قدّيس ع العلبه

بمتلك حدا.. ما تشرّف الكهنوت

إسمك "رسول" وعيلتك "مصلوب"

وكتار شكّوا بصدرك الحربه

**

قمر بنت جبيل

الى روح الدكتور خليل مصطفى في ذكراه العاشرة 2019

ـ1ـ

مين قال إنك مت.. ما بتموت

يا قمر بنت جبيل حاكيني

إنتْ الصداقه الـ زيّنت البيوت

إنتْ الخليل المصطفى هديني

الـ متلك صعب تا ينتهي بتابوت

يا كبير.. بعدك حي لاقيني

متل الحلم ع القلب فيك تفوتْ

ولِكْ فوتْ.. بركي فيك تحييني

ضايع بـ غربه.. كل عمري سْكوت

غيابك حرقني.. وغبّر جبيني

سنين عشره رفضت دوق القوت

جوعي إلك.. رح تنتهي سنيني

دكتور يا دكتور.. داويني

ـ2ـ

قبرك ببنت جبيل.. نيّالك

ترابك فرح بـ تربة تلالك

جمّعت شعري وقلت تا حاكيك

وهنّي بشموخك أرزة جبالك

دمّ الشهامه والرجوله فيك

من هيك رفعت راسنا عيالك

بذكرى غيابك جيت تا هنيك

وقلّك: ما أحلى الموت كرمالك

كبير عشت وبعدني بلاقيك

عالي.. وبـ عصري قلّت رجالك

بخجل أنا بالدمع تا إبكيك

دمعي رخيص وإنتْ غالي كتير

بوقف وبحني رقبتي قبالك

**

غسان علم الدين

بذكرى الأربعين لرحيله التي صادفت يوم عيد ميلاده 20 حزيران 2019

ـ1ـ

تذكّر إذا بتريد يا غسان

بمْدينة الفيحاء شو اللي كان

صعب إنسى الصار.. شو ما صار

كنت راجع ع الوطن لبنان

بأرضي أنا.. بشبه غريب الدار

ما كان يعرفني ولا إنسان

ع التل ماشي مضعضع ومحتار

متل الكذب طلّيت من دكّان

وصرخت: إنتَ هون.. عقلي طار

وصرت فيي مكيّف وفرحان

وما عدت إسمع غير: كيف الجار

المنيه ومجدليا أهل جيران

وحضنتني مع مية أهلا فيك

حسّيت إنّو طرابلس يا شريك

متل حضنك.. فاتحه الأحضان

ـ2ـ

بعيد ميلادك جيت تا هنّيك

غسان.. مش ممكن أنا إرثيك

والفن، انت الفن، انت الشعر

وكل القصايد كانت تناجيك

عودك بـ نغماتو محيلي الهجر

كنت الصديق الما قدرت أوفيك

يا كبير مارق ع طريق العمر

محيت العتم بـ شعلة قوافيك

عرفتك كريم وكف إيدك نهر

واليوم جايي بدمعتي إسقيك

ع غيبتك كل ما بيمرق شهر

منوقف ع مفرق عمرنا نحييك

ما بقول إنو كان موتك غدر

رح قول إنو الرب معجب فيك

وحابب بجنّات السما يلاقيك

ـ3ـ

فنان.. شاعر.. خسرت الغربه

وصارت "المنيه" غارقه بسكوت

وأرزة بلادك حالتا صعبه

بأقدس شهر حبّيت إنّو تموت

الموت حربه.. انغرزت الحربه

بصدور ع قلوبا كنت بتفوت

ما مت.. بعدك ساكن بقلبي

وعندك بسيدني للصداقه بيوت

موت العظيم بيشبه الكذبه

غسان.. ما بتلبق إلك تربه

الـ متلك صعب تا ينتهي بتابوت

**

صرخة وجع

إلى روح إبنة عمي يولا باخوس بعيني، زوجة شربل نسيم عيسى، تموز 1983

ـ1ـ

سْكَبْت الشِّعرْ دَمْعاتْ كِرْمالِكْ

يا أُمّ سَبْع طْفالْ.. يا عْيُونِي

يا بِنْت عَمِّي.. الشّامْخَه جْبالِكْ

وْمِتِلْ بَيِّكْ أَرزْها تْصُونِي

شُو غَيَّرِكْ؟.. شُو بَدَّل حْوَالِكْ

تا تِرْحَلِي، وَعَهْد الْوَفَا تْخُونِي؟

صَرْخِةْ وَجَعْ عَ شْفافْ أَطْفالِكْ

تِنْدَه: يا أُمّي حَدّنا كُونِي

وْشَرْبِلْ حَبِيبِكْ يِلْحَق خْيالِكْ

يِئْسانْ.. حامِلْ صُورْتِكْ قُونِه

وْإِخوتِك.. خَيَّاتِكْ.. عْيالِكْ

عْيُونُن عَ فقْد الأُخْت مَحْزُونِه

بْسِيدْني ومالْبُورْن حَيّكُوا شَالِكْ

بْنَهْداتْ مِتْل سْيَاخْ مَسْنُونِه

وْعَ مَيْمتِكْ.. لا تْطَمْنِي بالِكْ

مَوْتِكْ يا يُولاّ حَرْدَبَا لِلأَرْضْ

الْـ بِيشُوفْها بِيقُولْ: مَجْنُونِه

ـ2ـ

يا زْغِيرةْ الْخَيَّاتْ شُو صَابِكْ؟

مُشْ عارْفِه شُو بْيِعْمل مْصَابِكْ؟

مُشْ عارْفِه عِنْدِك طْفال زْغارْ

عَمْ يِرْضَعُوا مِنْ زَهْرِة شْبابِكْ؟

مُشْ عارْفِه إِنُّو فِضِي هَـ الدَّارْ

انْطَفْيِت شْمُوعُو ساعِة غْيابِكْ

وْبَيتْ عِيسى دَمْعِتُنْ قِنْطارْ

وْمِجدلَيَّا تْنُوحْ عَ بْوابِك؟

شُو صَايْبِكْ يا بِنتْ عَمِّي.. النَّارْ

حَرْقِتْ بِلَحْظَه قْلُوب غِيَّابِكْ؟

شُو صَايْبِكْ.. تا تْيَتْمِي الأَشْعارْ

وْأَجْمَلْ حَكي مَزْرُوعْ بِكْتابِكْ؟

يُولاّ، يا أُخْتي، الْـ صار ليشْ تا صَارْ؟

كانْ حُلْمي نِلْتِقِي مْنِ جْديدْ

مُشْ حَقّ إِرْجَعْ بَوِّس تْرابِكْ

ـ3ـ

باخُوس، يا عَمِّي، الْـ بِالْمَجدْ مَقْبُورْ

قَلبْ يُولاّ لْطَلّتَكْ مشْتاقْ

جَايِي لْعِنْدَكْ.. تَوِّجَا بِالنُّورْ

مِنْ يَوْم مَوْتَكْ قَلبْها مِنْضَاقْ

عَرِّفَا عَ كَرْلُوس الزَّغْرُورْ

عَ إِبِنْ أُخْتا اللِّي فْراقُو فْراقْ

وْقِللّو لْبَيِّي: اسْتَقْبِلا بِزْهُورْ

وَقْت انْحَرَمْت الأُخْت.. كانِت أُختْ

غْيَابا يا بُو أَنْطُونْ ما بْيِنْطاقْ

**

جرح جديد

إلى روح المرحوم أنطون توفيق ليشع، 1978

ـ1ـ

أنطون، يا أنطون، فَهِّمْنا

لَيْش غِبْت بْلا سَلامْ وْلا وداعْ؟

نِحْنا رْفاقَكْ، أَهْلَكْ، ارْحَمْنا

هَـ الْقَلْب جُرْح جْديدْ ما بْيسَاعْ

ـ2ـ

سِنْتَيْن صِلَّيْنا لإِلَـه الْكَوْنْ

يْوَقِّفْ حَرْب.. حَصْدِت شَباب كْتارْ

بَسّ الْقَدَرْ عاد الْتَفَتْ لَـ هَوْنْ

فَرَّقْ ما بَيْن الْبَيّ وِطْفالُو الزّغارْ

ـ3ـ

أَيَّا كَلامْ بْقُولْ عَنْ أُمّ الِعْيالْ؟

مِتّ وْبِـ بَطْنَا مْلاكْ أَزْغَر مِنْ جَنِينْ

قَلْبَا، يا حَسْرَه، صَارْ مَرْمَى لِلنِّبالْ

دَخْلَكْ، يا رَبِّي، بَلْسِم الْقَلْب الْحَزينْ

ـ4ـ

وْكِيفْ هَـ الأُمّ اللِّي فَصْلِتْها الْبُحُورْ

عَنْ إِبِنْ.. يَامَا نَطْرتُو لْيالي طْوالْ

كِيفْ رَحْ تِعْملْ.. إِذَا ناعِي الْقبُورْ

قَلْلاَّ: حَبِيبِكْ ماتْ.. شُو صَعْب السُّؤالْ؟

ـ5ـ

وْإِخوْتَكْ.. خَيَّاتَكْ.. الأَقْدارْ

فَتْحِتْ عَلَى خْدُودُنْ سَواقِي دَمّ

بِالْغَدْر خَيَّكْ ماتْ.. وِالغدَّارْ

فِي إِلُو أَللَّـه، الْيَتامَى، الأُمّْ

ـ6ـ

يا مِجِدْلاوي الْـ كِنْت جِسْر الْبَيْتْ

صْرِيخْ وْبِكِي هَـ الْبَيْت مِنْ دُونَكْ

وْهاكْ السّراجْ الْـ كانْ كِلّو زَيْتْ

نُورُو انْطَفَى.. وَقْت انْطَفُوا عْيُونَكْ

ـ7ـ

يا إِبِنْ لِيشَعْ.. يا حَبِيبْ الْقَلْبْ

حْرامْ عَنَّا تْغِيب بِـ لَمْحِةْ بَصَرْ

بِرْكَعْ بْصَلِّي وْبِطْلُب مْنِ الرَّبّ

ما بَقَى يِقْهر قْلُوب النَّاسْ

مِنْ كِتِر ما هَـ الْقَلبْ عَ طَنْسَا انْقَهَرْ

**

مش معقول

إلى روح المرحومة عدلى صهيون

ـ1ـ

شُو بْقُولْ؟.. دَخْل عْيُونْها شُو بْقُولْ؟

نارْ الْحُزنْ عَمْ تِحْرُق الْهُجْرانْ

جَايِي تْشُوف الأَهْل.. مُشْ مَعْقُولْ

تِرْجَعْ، يا أللـه، هَيْك عَ الأَوْطانْ

ـ2ـ

جَايِي وْبِـ عِينَيْها عَطفْ وِسْرُورْ

تا تْزُورْ أَهْلا.. وْتِحْضُن وْلادَا

وْكانْ قَصْدَا بَسّ إِنُّو تْزُورْ

وِتْعُودْ لِعْيالاَ اللِّي بِبْلادَا

ـ3ـ

يا رَبّ.. يا نَبْع الْمَحَبِّه وِالْحَنَانْ

مُشْ حَقّ هَـ الأُمّ الْحَنُونِه تِقْطِفَا

وِلْزَوجْها وْأَوْلادْها بْلُبْنانْ

جِتِّه بْتابُوت تْرِدّها.. وَيْن الْوَفَا؟

ـ4ـ

يا أُمّ فُؤادْ الْكَوْن عَمْ يِحْكي

إِنِّكْ مَحبِّه بْقَلبْنا انْزَرْعِتْ

رْكَعْنا نْصَلِّي لْرَبّنا، وْنِشْكِي

وْحَدّ مِنَّا عْيالْنا رَكْعِتْ

خْسِرْنا هَاكْ الطَّلِّه وْهاك الضِّحْكِه

وْإِدْن السَّمَا بِعْمايْلِكْ سِمْعِتْ

عَدْلَى.. إِذَا كْفَرْفُو عَم بْتِبْكي

صَدّقِيني الْكَوْن كِلّو سْوادْ

وْمِجدْلَيَّا عْيُونْها دمْعِتْ

ـ 5 ـ

يا أُمّ فُؤاد.. الْعُمْر كِلّو بْوابْ

وْباب الْقَهْر صَرْلُو زَمَنْ مَفْتُوحْ

جِيتي عَ غُرْبِه.. وْبَعدْ شَهْر غْيابْ

رْجِعْتِي وْتَرَكْتي هَـ الْقَلبْ مَجْرُوحْ

هْنِيَّالْ قَلْبِكْ رَاجْعَه لِتْرابْ

ماتْ مِنْشانُو شَباب كْتارْ

تا يْضَلّ بَيْرَق أَرْزنا بِيلُوحْ

**

نبع حنيّه

إلى روح الأم نوال نادر، أيار 1999

ـ1ـ

كيفْ بَدِّي وَدّعِكْ قُولي

وْبَعْدَا زْلاغِيطِك بِدَنِيِّي؟

تْرِشِّي بْعِرْسي الزَّهرْ، وِتْجُولي

وِالآوِيهَا تْصِير غِنِّيِّه

مجدْلَيَّا، الْيَومْ، مَسْطُولِه

مَوْتِكْ رَماها بْنارْ مِكْوِيِّه

كْنِتي بْقَلْبا دَوْم مَحْمُولِه

قْسِيتي عْلَيْها يا نَوال كْتِيرْ

عُودِي إِلاَ.. يا نَبعْ حِنِّيِّه

ـ2ـ

كيفْ بَدِّي وَدّعِك وِالنَّارْ

عَمْ تِحْرُق قْلُوب اللِّي حَبُّوكي؟

يُوسِف.. بعدْ ما صَدَّق اللِّي صَارْ

بْيِسْأَلْ لَـ حالُو: لَيْش سَرْقُوكي؟

رْفيقِةْ حَياتُو.. سِتّ هاك الدَّارْ

كان الْعُمر بِوْجُودِك مْلُوكي

وْجُورْج يِصْرخْ: رُوقْ يا كْلُوتارْ

جَنُّوا سَوَا سَاعِةْ ما خِسْرُوكي

ضَرْباتْ رُوسُنْ فَيّقِت الِحْجارْ

يا رَيْت بِالضَّرْباتْ وَعُّوكي

وْرانْيَا.. ما سَأْلِتْ عَنِ وْلاد زْغارْ

بْأَرْض الْوَطَنْ.. حُلْمُنْ يْشُوفُوكي

طارِتْ عَ جِنْح الرِّيحْ وِالأَفْكارْ

تْشَلِّع عْيُون كْتِيرْ بِكْيُوكي

وْماري.. يا حَسْرَه.. كلّ جِسْمَا انْهارْ

بْـ (وِسْت مِيدْ) سِعْفُوها وْما سِعْفُوكي

وْجاكي الْـ نَطَرْتي فَرْحِتا شِي نْهارْ

دْمُوعَا الْحُمر بِالنَّعْش لَفُّوكي

لا تِفْزَعِي عْلَيْها.. قَمَرْ نُوَّارْ

تْرَبِّتْ مِتِلْ ما الأَهْل رَبُّوكي

وْخَيِّكْ كَمِيلْ الْعَقْل مِنُّو طارْ

يِصْرُخ: يا أُخْتي، لْوَيْن إِخْدُوكي

بَيْتِكْ بِـ قَلْبِي كانْ أَحْلَى مْزارْ

يا رَيْت بِهَـ الْقَلْب قَبْروكي

متِّي بْشَهْر الْمَرْيَمِي.. بْأَيَّارْ

متِّي بْعِيد الأُمّ.. يا هَـ الأُمّ

كلّ الزَّهرْ بِالْعِيدْ هِدْيُوكي

**

يا قمر

إلى روح الوالد الياس (القَمَر) بعيني، 10/5/1977

ـ1ـ

يا "قَمَرْ".. لا تْغِيبْ.. دَخْلَكْ يا قَمَرْ

نُورَكْ مَحَبِّه.. نَوِّر لْيالي الْبَشَرْ

إِنْت الزَّهرْ.. إِنْتَ الربيع بْهَـ الدِّنِي

لبدر السما ما بْيلبَقْ تْراب وْحَجَرْ

ـ2ـ

كنت بَيّ وخيّ.. جِسْر الْبَيتْ

خِدْت السَّعادِه وِالْقَهرْ خِلَّيتْ

أَطْفالَكْ الما صدّقوا بِتْغيب

غَيرْ الشَّقا بِعْيُونْهُنْ ما لْقَيْتْ

ـ3ـ

وْبِنتْ عَمِّي.. زهرةْ بْساتينْ

بِيغارْ مِنْها الْوَرْد وِالنّسرِينْ

تاجْ راسَا انْهارْ.. وَيْن الْحَقّْ؟

شموعكْ.. بإيد الموت، مطفيينْ

ـ4ـ

يا رَبّ.. لا تِقْسَى عَ بَيّ وْأُمّ

وْتِسْرُق عَن زْنُودُنْ إِبِن رَبُّوهْ

مُشْ هَيْك يا رَبِّي بْيِسْقُوا السَّمّ

لغيّابْ.. كاس مْحَبّتَك سَكْبُوهْ

ـ5ـ

وْإِخْوتُو.. شْباب وْصَبايا.. سْآلْ

كِيفْ بِالرّضا عاشُوا سْنِين طْوالْ

انْقَهْرُوا يا أَللَّـه.. لَيْش شُو اللِّي صَارْ؟

حُلْمَك الْمُزْعِج ما خَطَر بِالْبالْ

ـ6ـ

الأَهلْ خِسْرُوا.. وْخِسْرِت الأَصْحابْ

الْياس الْقَمَرْ.. هَـ الْـ طَلّ نِتْفِه وْغابْ

وْصارُوا يِجُوا مِنْ كلّ حَيّ وْحَيّ

أحبابْ عم بتودّع الأحبابْ

ـ7ـ

يا رَبّ.. يا الْـ كِلَّكْ عَطَفْ وِحْنانْ

رْضِينَا الْمِنْجِلْ يِحْصُد بْلُبْنانْ

بَسّ يا رَبِّي.. حَرَامْ كْتِيرْ

تْشَتِّت عْيال تْشَتَّتُوا مْن زْمانْ

ـ8ـ

يا رَبّ.. بِبْلادِي شَباب كْتارْ

ماتُوا.. تا يِفْدُوا الأَرْض.. يِحْمُوا الدَّارْ

أَبْطالْ هِنِّي.. وْمِتِلْهُنْ أَبْطالْ

الْـ ماتُوا بغُرْبِة دْموعها من نارْ

**

برجسنا

إلى روح ابن السويداء القاضي برجس المغوّش، نيسان 1995

ـ1ـ

بَرْجِس الِمْغَوّشْ وَدَّعْنا

وْقَلْلاَّ لأُمّ عْيالُو: جايِي

اشْتَقْتِلِّكْ، فِضْيُوا مْدامِعْنا

عْلَيْكِي.. يا نجْمِه مْضُوايِه.

وْسِيدْني هَـ الْـ كانِتْ تِجْمَعْنا

وْتِفْرَح بِالطَّلِّه الِمْرايِه

زَرْعِتْ صَوْتُو بِمْسامِعْنا

وْرَسْمِتْ بِالْعِينَيْن حْكايِه

ـ2ـ

يا بَرْجِسْنا.. أإبنك حاني

لِلأَرْض.. وْجارِرْ هَـ الْغُرْبِه

النَّاس اصْطَفُّوا.. يْعَزُّوا.. لْساني

تا يُوصفْ هَـ الْمَشْهَدْ.. صَعْبِه

انْهَزّ الْمَهْجَرْ.. صَفَّى دْيانِه

وِحْدِه.. وِالْـ وَحَّدْها رَبِّي

حِبَّيْتَكْ.. حُبَّكْ خَلاَّنِي

إِضْوِي الْحَرْف بْعَتْمِةْ دَرْبِي

كِنْت الْبَيّ اللِّي وَصَّانِي

إِحْمل هَمّ النَّاس بْقَلْبي

ـ3ـ

سْوَيْدا الْعِزِّه.. تاكي راسَا

وْراسَا ما بْيِتْكِي لْمَخْلُوقْ

وْسُورِيَّا قَطْعِتْ أَنْفاسَا

شَعْبَا بِوْداعَكْ مَخْنُوقْ

وِالأَطْرَشْ.. شِعْلِةْ نبْراسَا

بْقَبْرُو مْنَرْفَزْ، صَعب يْرُوقْ

كِنْت رْفِيقُو، رِفْقَه قْياسَا

كَوْن بْسكَّانُو مَعْجُوقْ

بَرْجِسْ.. يا لَمْعِةْ إِلْماسَا

الأُمِّه الْـ إِخْدِتْ مِنَّكْ نُورا

شَلْحِتْ عَ الْجُثْمان زْهُورَا

وْطوْيِتْ أَمْجادَا بْصنْدُوقْ

**

أيّام سودا

إلى روح الشهيد موريس أبي خطّار

ـ1ـ

أَربْعَه وْعِشْرِينْ عُمْرَك يا مُورِيسْ

يا بَدْر شَعّ بْعَتْمِة بْلادِي

بِنْت الْمَلكْ.. مِنْ وَيْن مِنْجِبْلا عَرِيسْ

مِنْ بَعْد ما سَرْقُوك مِنَّا الظَّالْمِينْ

وْهِيِّي بْتِعْبُد إِسْمَك عْبادِه

ـ2ـ

وْهَـ (الْكَوْكَبْ) الْـ عَ طُولْ شَارِقْ بِالسَّما

مِنْشَانْ يِسْكُبْ نُور بِعْيُونَكْ

شَحّ زَيْتُو.. بَعْد ما تْرَكْت الْحِمَى

وْعَكَّزْ عَ (حَنَّا) وْصَار يِصْرُخ: يا مُوريسْ

الأَيَّامْ سَوْدا كْتِيرْ مِنْ دُونَكْ

ـ3ـ

وْخَيَّاتْ عَمْ يِبْكُوا دِما عَ غَيبتَكْ

عَ طُول فَوْق الرَّسْم عَمْ بِيوَلْوِلُوا

وِالأَهْل ما قِدْرُوا عَ حمْل مْصِيبْتَكْ

طَقّ الحَجَرْ مِنْ صَرْخِتُنْ.. فَتْحُوا الْجِرَاحْ

وْدَوّروا شْريط الْحُزن مِنْ أَوّلُو

ـ4ـ

بْحَلّفَكْ يا وِلْف وَصّلِي سَلامْ

لأَحْبابْ مِشْيُوا الْجلجلِه قَبْلَكْ

اغْتالُوكْ.. مُشْ مَعْقُول عِينَيْنَا تْنامْ

بِـ أَرْض غُرْبِه.. وْمِجدلَيَّا سَاهْرَه

تْبَلْسِمْ جُرحْ أَحْبابَك وْأَهْلَكْ

**

أجمل أمّ

إلى روح الأم سونيا حميد صهيون

ـ1ـ

مُشْ خَايْفِه مْنِ الْمَوْتْ يَا بُونَا

الْمَوْت أَقْرَبْ دَرْبْ لِلْجَنِّه

لْحُضنْ يَسُوعْ

قَالِتْ.. وْشَرْقَطْ حُبّ بِعْيُونَا

بِـ قَلْبهَا الْـ عَ طُولْ مِتْهَنِّي

وْخِفْيِتْ عَنِ الْعَيْلِه لَهِيب دْمُوعْ

ـ2ـ

حَمِيدْ حَدَّا.. وْلادْهَا.. الأَصْحَابْ

شُو فِرْقِتُنْ صَعْبِه؟!

آخِرْ وَدَاعْ.. بْتِنْقَفَلْ كِلّ الِبْوَابْ

أَخِّرْ وَدَاعَا شْوَيّ يَا رَبِّي

سُونْيَا.. أُمُومِه بْتِنْحِنِيلاَ رْقَابْ

رَبِّتْ عْيَالاَ بْخَوْف بِالْغُرْبِه

سِهْرِتْ عَ بَيْتَا كْتِيرْ.. شَمْعَا دَابْ

وْغَيْر الْوَفَا مَا كَانِت تْخَبِّي

سُونْيَا.. حَبِيبِةْ أَرْزْ أَللَّـه الْـ شَابْ

وِبْمَوْتْهَا.. شُو تِقْلِتْ الشَّيْبِه

كْفَرْفُو.. بْشَرِي.. دْمُوعْها مِزْرَابْ

وْسِيدْنِي، يَا حَسْرَه، اسْوَدِّتْ مْنِ الآخْ

وْصُبِّي دَمِعْ.. يَا عْيُونْنَا صُبِّي

ـ3ـ

لا تِتْرِكِي الأَطْفَالْ.. إِنْتِي أُمّ

وِالأمّ مَا بْتِقْسَى عَ أَطْفَالا

حَمِيدْ نَاطِرْ.. عَيْلْتُو تِلْتَمّْ

بْعِيدْ الْمِيلادْ.. وْمِنْشِرِحْ بَالاَ

وَيْن الأُمُومِه الْـ غَيْبِتَا بِتْسِمّْ

وَيْن الْحَنَان الْـ غَزْلِتُو بْشَالاَ

يَا زَهْرة الْـ فِيكِي النّحلْ مِهْتَمّْ

عْيَالِكْ نَحِلْ.. وِالْحُبّ رِسْمَالا

هْنِيَّالْ قَلْب الْقَبرْ رَح بِيضُمّ

أَجْمَل زْهُور الأَرْضْ.. أَجْمَلْ أُمّ

سُونْيَا اللِّي غَنَّى الرَّبّ.. مُوَّالاَ

**

عمر الزّهرة

إلى روح الطفل الْمَلاك إِيلي جون شعنين، 5/1/1995

ـ1ـ

عمرك عمر الزَّهْرَه .. وْصار

عمرك عمر القدِّيسين

برسا زَيِّنْتَكْ بِقْمَارْ

الورد .. وْبِزْهُور النّسرين

ـ2ـ

وعَ غْيَابَك كل الأطيار

بِكْيِتْ بِكْرُوم رِشْدِبّين

يا شبّ .. الْـ عقلك ختيار

يا ضحكه.. رَكْعِتْلا سْنِينْ

ـ3ـ

الأم الْمِكويِّه بالنّار

شْموع عْيُونا مطفيين

والْبَيّْ الْـ سَمَّاكْ  نْهَار

مين متلو بْهَـ الْوَقْعَه مين؟

ـ4ـ

تا نِبْكي وِنْفَضّي جْرارْ

الدَّمعَه بِتْصَفّي سِكِّينْ

حاملها الحزن الْغَدّارْ

تا يْفَزِّعْ فيها مْساكين

ـ5ـ

مُش رح نبكي .. كبارْ زْغار

إنت بعينَيْنا عَ طول

باقي يا "إِيلي شَعنينْ"

**

حبيب الكل

إلى روح الوالد حنّا لويس بعيني

ـ1ـ

يا حَبِيب الْكلّ شو بْقِلَّكْ؟

أيّوب ما داق الْوَجَعْ مِتْلَكْ

كانْ عِنْدَكْ قَلْب يِتْدَلَّع عْلَيْكْ

وْتِصْرُخْ: يا قَلْبِي فِيقْ مِنْ جِهْلَكْ

وْمَرْتَكْ الْـ رَكْعِتْ تَحتْ إِجْرَيْكْ

تِخدْمَكْ.. تَا تْصِحّ عَ مَهْلَكْ

ما صَدَّقِتْ وَقْت انْطَفُوا عِينَيْكْ

إِنَّكْ يا حَنَّا رَح بْتِقْسَى كْتِيرْ

عَ عَيلْتَكْ.. عَ صْحابَك وْأَهْلَكْ

ـ2ـ

لمِّنْ عِرِفْ جُوزافْ هَـ الإِبْن الْوَحيدْ

يَللِّي شِفي أَمْراضْ كانِتْ عَم تْزيدْ

عَافْ لِنْدُنْ.. قالْ: لِنْدُن مُشْ إِلِي

وْبَيِّي حَبيبي ماتْ مِنْ قَلْبُو الْعَنِيدْ

وْصَفَّى بْصَدْرو الْحُزْن عَمْ يِغْلِي غَلِي

وْيِتْطَلَّع بْمَدْلِينْ، وْيِقِلْلاّ: سْأَلِي

أَللَّـه عْلَيْنا لَيْش عَامِلْ مَرْجَلِه

وْكِنْتِي، يا أُخْتِي، ساعِة اللِّي ماتْ

بْعِيدِه.. مِتلْ ما كِنْت، يا حَسْرَه، بْعِيدْ

ـ3ـ

ومِجْدْلَيَّا الْـ كِلّ عُمْرا مَفْخَرَه

للنّاسْ.. هَـ الْـ عِنْدُنْ شَهامِه وْمَقْدَرَه

الدّمعاتْ غَطُّوا مْروجْ عِينَيْها

وِغْصُونْها بْريح الْحُزنْ مِتْكَسَّرَه

وْصَفَّى الْقَدَرْ يِتْمَرْجَل عْلَيْها

وْيِحْصُدْ شَبابا.. وْبَعدْها مِتْصَبَّرَه

يا عَمّ حَنّا.. بْفَيْها وِبْمَيّها

بْحَلّفَكْ.. وَصِّلْ سَلامي لِلْحَبيبْ

سَرْكيسْ بَيِّي.. جَارَك بْهَـ الْمَقْبَرَه

**

أفروديت الشّعر

إلى روح الوالدة فيكي نعيم الخوري

ـ1ـ

خَبُّوا الْقَوافي.. كَسّروا قْلامْ الْحَكِي

أَفْرودِيتْ الشِّعْر.. حان رْجُوعْها

الأَشْعارْ خَنْقِتْ فَارِسَا.. وِالْمَمْلَكِه

عَ شْطُوطْ حُزْنا غارْقَه بِدْمُوعْها

يا سَيِّد الْكِلْماتْ.. فهْمَكْ بَرْمَكِي

خَلِّي الْقَصِيدِه تِنْتِعِش بِرْبُوعْها

عارِفْ أَنا.. عَامودْ أَحْلامَكْ تِكِي

وْرِيشْتَكْ نَزّ الأَسَى مْن ضْلُوعْها

وْمِنْ دُونْها، دْروب الْحَيَاة مْشَرْبَكِه

وْعَتْمات "ماتْيُو" مْعَوّدِه عَ شْمُوعْها

وْأَحْبابْها، وِقْفِت جْمُوعُنْ تِشْتِكِي

رَفْعُوا الْمَحارِمْ.. رَبّعُوا جْراسْ الْبِكي

حَتّى الْقَصِيدِه تِفْتِخِرْ بِجْمُوعْها

ـ2ـ

خَبّوا الْقَوافي.. الْحَرْف شَرْقَطْ نارْ

وِاحْتَرْقِت الصَّفْحاتْ جُوَّا كْتابْها

"فيكي" الْقَصِيدِه تْمَنِّت الأَطْيَارْ

تِنْقُلْ صُوَرْها.. وْتِنْحِني عَ بْوابْها

خِلْقِتْ إِلُو.. طَعَّمْ جبِينَا بْغارْ

وْمِن جَنِّة "بْطُرَّامْ" لَـمّ تْرَابْها

وْوَقت اللِّي فِيها صَارْ يَللِّي صارْ

طَلَّقْ حَياتُو وِانْطَفَى عَ غْيَابْها

خْسارَه كْبِيرِه.. الْكَوْن كِلّو احْتارْ

وْلِبْسِتْ الأَيَامْ بَدْلاتْ الْحِدادْ

وْنَخّ "النَّعِيمْ" يْشِيلْ تِقْل مْصَابْها

**

مين زعّلَك؟

إلى روح الشاب هشام كامل المرّ

ـ1ـ

مُشّ حَقّ بِـ أَوّل رَبيعُو يْمُوتْ

طَيْر أَبْيَض طَيّرُوا جْناحُو

وِالدّمْع يِتْدَحْرَج عَ حَبْل سْكُوتْ

مَجْدُولْ بِجْرَاحُو

وِالْحُزن يِسْتَوْطِنْ قَراني بْيُوتْ

سُكَّانْها راحُوا

ارْتاح الْبِكي

عَ خْدُودُنْ الْـ عَمْ تِشْتِكِي

وْبَعْد ما ارْتاحُوا

بْدِنْيِةْ وَجَعْ سَاحُوا!

ـ2ـ

مِينْ زَعَّلَكْ

تَا تْغِيبْ، وِالسَّاحَه إِلَكْ؟

يا بَدْر هاك الدَّارْ

صَار الْحُزن زِنَّارْ

بِيلِفّ الْفَلَكْ

وْتاج الْمُلكْ مِنْهارْ

عَ غْيَاب الْمَلَكْ

يا مَلَكْ بَيْت الْمُرّ ما أَجْمَلَكْ!

ـ3ـ

وْأُمَّك الْـ صَرْلا سْنِينْ

تْرَبِّيك بِصْلاواتْها

وِتْدَلِّلَكْ

تِسْقِيكْ مِنْ دَمْعاتْها

وْتِهْتُفْ إِلَكْ:

"رَبّ السَّما يِحْمِيكْ

تِكْبَرْ.. وْإِفْرَحْ فِيكْ"

شُو بَدَّلَكْ؟

تا تِهْجُر الْحُضْن اللِّي صَفَّى مَنْزلَكْ

يا هِشَام الْمُرّ

صَعْب الْفراق ومُرّ

عَ أُمّ..لِـمْ بِتْطِلّ

بْتِفْرُش طَرِيقَك فُلّ

وْبِينِطّ قَلْبَا مْنِ الصَّدْر يِسْتَقْبِلَكْ

ـ4ـ

وْبَيَّك.. اللِّي بَاعْ عُمْرو وِاشْتَراكْ

تا يْعِيشْ باقِي الْعُمْر يِتْفَيَّا بْدَراكْ

عَ بُو هِشَام قْسِيتْ

هَـ الْـ تَحْت جِنْحُو رْبِيتْ

وْصِرت الْحُلم بِالْبالْ

شُو غَيَّر الأَحْوالْ؟

مِنْ دُونْ وِداعْ مْشِيت!

نَطْرَك ليالي طْوالْ

وْلِمِّنْ إِنتْ ما جِيتْ

وَدَّى فَرَحْ هَـ الْعُمْر تا يِمْشِي وَرَاكْ

وَدَّى سَهَرْ عِينَيْهْ تا يِسْهَرْ مَعَكْ

وْنَخّ صَوْب الأَرْض تا يْبَوِّس ثَراكْ

وْكِلْمِة (بْحِبَّكْ) يِزْرَعا بِـ مَسْمَعَكْ

ـ5ـ

طَلّ خالَكْ.. طِلّ قِلْلّو: مَرْحَبَا

غْبار السَّفَرْ بَعْدُو مْكَبَّش بِالْعَبَا

تارِكْ وَطَنْ تا يْشُوفْ وِجَّكْ يا هِشَامْ

كِلْمِةْ (يا أَهْلا).. قُولْها.. لا تِحْجِبَا

كِلّ عُمْرَكْ كِنْت تِتْحِفْنا بْكَلامْ

بْضِحْكاتْ، غُرْبِة قَهْرنا بِتْرَطِّبَا

أَحْلى خَطِيبِه هَوْنْ مَعْ غادَه وْوِسامْ

(ويسُو) وَحِيدْ.. وْوِحْدتُو ما أَصْعَبَا

وِعْمامَكْ حْوالَيْك بِيلِفُّنْ ظَلامْ

وْدَمْعاتْ كِلّ حْبايْبَكْ أَنَّاتْ

وْعَ شْفافُن الصَّرْخاتْ: ضيعانْ الصِّبَا

**

آدمي

إلى روح الفقيد رامز متري، أردة، لبنان، 2004

ـ1ـ

آدَمِي.. شُو آدَمِي

بْيِنْقَالْ عَنُّو بَسّ

إِسْمُو رَمْز

مِتْل الأَرْز

بَكَّى عْيُون الشَّمْس

لِمِّنْ تِكِي..

يا بِنْت عَمِّي شُو بِكِي

شِرْبِتْ دْمُوعِكْ مَحْرَمِه

وْمَقْطُوعْ فِيكي الْحِسّ؟

ـ2ـ

رُوحُوا اسْأَلُوا غَيْرِي

عَنْ رَامِز الْمِتْرِي

رُوحُوا اسْأَلُوا أَرْدِه

وْحَرفْها الزَّهْرِي

بِيخَبّرُوا أَخْبَارْ

بِتْفَرِّح الْوَرْدِه

وْبِتْسَوْسِح الأَطْيارْ

رَبَّى وْلادُو عَ الصّلا

تا الْبَيْت بِالْعِطْر انْتَلا

وْكلّ ما يْقِلِّي: يا هَلا

إِتْحَمَّمْ بْعِطْري

وْصِيرْ.. وِالْمَوْسِمْ غَلا

يِرْخَصْ إِلُو عُمْرِي

ـ3ـ

يا ما حِكِي الْهُجْرانْ

وْفِنْزْوِيلاَّ.. كِيفْ

شَكّ الْهَجرْ أَوْطانْ

مُشْ لازِمَا تِعْريفْ

وْكِل ما الْتَقَى بْجُوعانْ

يِعْجُنْ حَنانُو رْغِيفْ

يا رَامزْ الإِنْسانْ

يِرْحَم تْرَابَكْ

بْإِسْمَكْ حلفْ لُبْنانْ

وْغَصّ عَ غْيابَكْ

**

إبن الأرز

مهداة لروح إبن خالتي المرحوم بولس سليمان البحري

ـ1ـ

دْقِيقَه، قبِلْ ما تْمُوتْ، حاكَيْتَكْ

حِسَّيتْ صَوْتَكْ فَرْفَح خْيالي

عَ فْرَاشْ مَوْتَكْ.. شامِخْ لْقَيْتَكْ

مِتِلْ أَرْزِه مْزَّيْنِه جْبالِي

الِعْيالْ حَوْلَكْ.. عَمّرُوا بَيْتَكْ

"بْوِيسْتميدْ" حِلْفُوا يِسْهَرُوا لْيَالِي

وْأَيْلِينْ.. دَمْعا يْقُولْ: حِبَّيْتَكْ

غَالي عَ قَلْبِي كْتِيرْ.. يا غَالي

تْطِلَّعتْ فِيها.. بْكِيتْ حِسَّيْتَكْ

وْوِشْوَشتْها: لا تْوَلِوْلي قْبالي

كِلْ ما صْرَخْتي.. بْتِصْرُخْ عْيالي.

ـ2ـ

يا رْفِيقْ دَرْبِي.. بْلَيلْ هَـ الْغُرْبِه

يا قْرَايْبِي.. يا ساكِن بْقَلْبي

بِهْدِيكْ كَمْشِةْ عُمرْ مِنْ عُمْرِي

ولا تْغِيبْ عَنَّا.. فُرْقتَكْ صَعْبِه

بِهْدِيكْ بَاقِةْ شِعْر مِنْ شِعْرِي

بِهْدِيكْ قَلْبِي مْلَفْلَفْ بْعُلْبِه

بِهْدِيكْ زَهْرِي.. آخْ مِنْ زَهْرِي

تاكي حُزنْ عَ بُولس الْبَحْري

عَ الشَّايِب.. اللِّي شَبْشَب الشَّيْبِه

ـ3ـ

وْلادَكْ.. بْناتَكْ.. جَمّعُوا الأَحْفادْ

تَا يْوَدّعُوا جِدُّنْ.. يا بَيّ الْكِلّْ

لِبْسُوا تْيابْ مْغَطّسَه بِسْوادْ

وْمَحْمُول فَوق الْعَتمْ زَهْر الْفُلّ

دْمُوعُنْ بْتِحْكي حْكايْتَكْ بِبْلادْ

بِتْجِلّ شَعْبا.. مِتلْ ما بْتِنْجَلّْ

بْعادْ نِحْنا عَنْ وَطَنَّا بْعادْ

عَنْ أَرْض فِيها بْيِلْعَب الْمُحْتَلّْ

كِنْت فِيها تِزْرَعْ الأَعْيَادْ

وْمَلْيُون ضِحْكِه بِالشّفافْ تْغلّ

كِنْت فِيها تْحارِب الْجَلاَّدْ

يا بُولس الْبَحْرِي يا إِبْن الأَرْزْ

إِسْمَكْ بِـ قَلبْ الأَرْز رَحْ بِتْضَلّ

**

ملاك زغير

غنتها الأخت مارلين شديد في جنازة الطفل الملاك جفري أحد تلامذة معهد سيّدة لبنان.

ـ1ـ

جِفْري.. جِفْرِي مْلاكْ زْغِيرْ

طَيَّرْ عَ السَّما الزَّرْقَا

وْنِحْنَا اللِّي مِنْحِبُّو كْتِيرْ

وَلَّعْ بِقْلُوبْنا الْحَرْقَه

ـ 2ـ

ناطِرْ تا يْقَابِلْ يَسُوعْ

لأَوَّلْ مَرَّه بِالْقُرْبانْ

تْيابُو الْبَيْضَا وْضَوّ شْمُوعْ

رَحْ يِبْقُوا بْسَيّدِةْ لُبْنانْ

يِحْكُوا عَنْ ظُلْم الْفِرْقَه

ـ3ـ

أُمُّو وبَيُّو زِعْلانِينْ

لا تِتْرُكْ قَلْبُنْ مَقْهُورْ

وْأَهْل الدَّامُور حِزْنانِينْ

خَلِّي عَيْنَكْ عَ الدَّامُورْ

وْأَرْض بْلادي الْمحْتِرْقَه

**

تاني بي

إلى روح العم حنا الخوري

ـ1ـ

بْكيتَكْ مِتلْ ما بْكِيت عَ بَيّي

حِسَّيْت حَالي خْسِرْت تانِي بَيّ

يا نَبْع.. عَمْ بِتْفيض حِنِّيّه

لِلْما عِنْدو خَيّ.. كِنْت الْخَيَّ

ـ2ـ

مِن مِجِدْليا.. قْطَفْت وَرْدِتْها

جُولْيات.. لَوْ بِتْشوف دَمْعِتْها

رْفيق الْعُمر.. ما عادْ كَفّى السّيرْ

حَدّ النّعش تِعْبِت بِمَشْيِتْها

وْتا تْضَلّ إيدَكْ خَيّْره عَ الدير

رَدِّت وْرُودَكْ.. عَ كْنِيسِتْها

ـ3ـ

يا كْبير.. عِشْت كْبير.. مِتّ كْبير

حِمْلُوكْ.. جَوْقَه مِتل الِعْصافير

أَحْفاد.. رَيتًنْ أَلْف زَرْع وْفَرْع

مِتْلُن ما صار.. وْلا بَعْد بيصير

تاجَرْت بِالْوَزْنات.. زِدْت الزَّرْع

أَلله فِرِح.. لَمّا رْبِحْت كْتيرْ

الإيمان دِرْع.. وْكنْت إِنْت الدِّرْع

ناطورْ جَنّه.. ناقِصا نْواطيرْ

ـ4ـ

أَلله مَعَك يا جارْ.. كنْت الدَّارْ

وْما بْتِنْسَكَنْ هَـ الدَّار بَعْد الجْارْ

مْنِشْتاق؟.. رَحْ نِشْتاقْ طُول الْعمْر

لِلِّي سَقَانا مْنِ الْمَحَبّه جْرارْ

حَنّا.. يا حَنّا.. هَـ الورود الْحُمْر

كِيفْ صاروا حْجارْ فَوْق حْجارْ

هَيْدي عَجيبِه مِنْ إيدَيْك السّمْر

كْنيسْة الضَّيْعَه.. بَلّْشِت الِعْمارْ

**

متل النبي أيوب

إلى روح الغالية عفيفة حرب

يا عَفيفِه.. الطُّهْر قدّامِك رَكَعْ

إِنْتِي الطّهاره والمحبِّه والْحَنانْ

كِنْتِي كَريمِه كْتيرْ.. حتّى عَ الوَجَعْ

مِتْل النَبِي أَيّوب جيتيِ بْهَـ الزَّمانْ

سُعاد أخْتِك قَلبْها الطاهر دَمَعْ

انْقَصّوا جْناحا الْيَوْم.. وِانْهَزّ الكيانْ

طَلْبِتْ بِأَعلى صَوْت طَلْبِه بْتِنْسَمَعْ

صَلّوا لْعَفِيفِه.. وْغَصّ من صَوْتا المكانْ

إسْمِك.. مِتِل بَيْرَق بِغُرْبِتْنا ارْتَفَعْ

أَرْزِة وطن.. إسم الوطن لُبْنان

**

خي كبير

إلى روح صديقي المهندس رفيق غنّوم 2008

ـ1ـ

بْميلادْ يَسُوع الْمَسيح

وَدَّعتْ دِنْيِتْنا

انْسَمْعِتْ بِغُرْبِتْنا تْسابيح

انْدَمْجِتْ بِصَرْخِتْنا

وْصَفّى الطّفْل اللي مْنِعْبَدُو

يِمْشي وْيِتْرُك مِذْوَدُو

تا يْوَصِّلَكْ.. ما أَسْعَدُو

عَ رْبُوع جَنِّتْنا

ـ2ـ

إِيفَانْكا.. عَمْ تِبْكيكْ

بِدْمُوعْها الْحَمْرا

بْتِتْذَكّْرَكْ يا شْريكْ

أيّامْها الْخَضْرا

وِبْتِقْعدْ تْناجيك

يا الْـ هِدْيِتَكْ عُمْرا

كِيفْ بَدّها تْلاقِيك

وِحْرَقتْها بْجَمْره

وْبَلْغارْيا تْناديك

وْسُورِيّا.. منْتِظْرَه

هاك الرُّجُوله الْـ فِيكْ

يا مْهَندس الأمْجاد

لا تْطَوِّل النَّطْرَه

وْعَنْ إِدْلِبْ الأجْدادْ

لا تْبَعّد الْهِجْرَه

ـ3ـ

وْجورْج.. كِيفْ قُوَّيْت

الدَّمْعات عَ عْيُونو؟

هَيْدا وَحيد الْبَيْت

كُلّ عُمْرَك تْصُونو

تاكي.. وْعَ السِّكَّيْت

رَحْ يِعْلُن جْنُونو

ـ4ـ

وْشو بْقُول لِلأحْفاد

الْـ كانوا عَ صَدْرَك دَوْم

يِبْنُوا ضِيَع وِبْلادْ

وْيِغْرَقوا بِالنَّوْم

رَحْ قلّهُن: إِنّك

إِلْهُن ضِحِك سِنَّك

إِمُّن تْغنيلُن

وِتْخَبّرن عَنّكْ

ـ5ـ

شُو بْقول: يا رَفيقْ

شو بْقُول: يا عَيْنِي

ما بْتِنْتِهي الطَّريق

اللَّي بَيْنَك وْبَيْنِي

إِنْت مُشْ صَدِيقْ

إنتْ خَيّ كْبيرْ

لْشَرْبِل بْعَيْنِي

**

بترونله.. امي

ـ1ـ

الغصّه عَم تقْوى يا أمّي

هرمت جسمي وحرقت دمّي

موتِك خلاّني إتعذّبْ

إقعُد إتْسلّى بِـ هَمّي

من دونِك.. هالقلب مكهربْ

والضحكه يبست عَ تمّي

تغرّبت وراجع إتغرَّبْ

حضنك كان بلادي.. وصرت

إحلم تا تضُمّيني ضمّه

ـ2ـ

موتك يَمّي.. بيحرق حَرْق

أقوى من طعنات البرق

تا قلّك شو عملتي فيّي

حكيي مش رح يعمل فرق

تركتيني صفحه منسيّه

بكتاب مشلّع بالشرق

بفيق.. الدمعات بْعينيي

وبغفى وراسِك تاكي عليي

والدمّ منشَّف بالعرق

ـ3ـ

شو بدّي قلِّك يا عيُوني

إنتي بقلبي وين ما تكوني

كنتي الإلهام بأشعاري

الْـ دوّخ أرجاء المسكونه

كنتي الفرحه الـ غمرت داري

الريشه العم ترسملي فنوني

غيابِك قطّعلي أوتاري

ختيَرني.. خلاني ضايِعْ

بْغُربِه.. قهّاره ومجنونه

ـ4ـ

بترونلّه.. الإسم كبيرْ

أرزه.. هَالْـ بترونلَّه

ع جْريْها نخّ التقدير

وشهدتلا الدنيي كلاّ

أُم.. ومتلا ما بيصير

بالقداسه بتتحلّى

زرعت عينيها نواطير

وتا تحرس عيلتها كتير

هديت عيلتها لألله

**

آخ يا خيي

الى روح أخي الحبيب مرسال سركيس بعيني "أبو شربل"

ـ1ـ

لمّن بيكون الْقَلْب عَمْ يِبْكي

بْيُوقَف الْعَقْل.. بْتِنْطفي الضّحْكِه

وِبْصيرْ ضايِع بين آخ وآخ

وْكيفْ بدّي بْهَالوَجَع إِحْكي؟

ـ2ـ

وْلِمّن بيكون الْقَلْب لَيْلِيّه

بِتْقَطّعو سْكاكينْ وَحْشِيّه

بيصرخ: يا ألله.. ما حدا بيردّ

بْتُوقَفْ عَ تِمّو: آخْ يا خَيّي

ـ3ـ

وْخَيّي بْدني غَيْر الدّني يا ناسْ

متل شَمْعَه انْطَفْيِت بْقدّاسْ

متل حرْق مْعَلّم بْهالْقلبْ

وْكيفْ بدّي دُوق مُرّ الْكاسْ؟

ـ4ـ

ما كنتْ صَدّقْ إِنّك الأظلَمْ

وْإنتْ الْمُحبّ الصادِقْ الأكْرَمْ

إنت الْحنونْ المفضلْ عْلينا

لَيْش تْرَكتْ هـ القلبْ يتألَّمْ؟

ـ5ـ

ليشْ قللّي ليشْ يا مَرْسالْ

عْمِلْت الْما كانْ بْيِخْطُرْ بْهالبالْ

شفتَك قَمر عم ينطفي عَ السّكتْ

وِدّعتْنا.. وما رْحَمتْ أَحْلى عْيالْ

ـ6ـ

و"لور" وصَّلْ للسّما جْنُونا

بُرْكانْ شاعِلْ صارتْ عْيُونا

هالأم يللي زْرعتها بالبيت

متل شجرَه.. تْكَسّروا غْصُونا

ـ7ـ

وْشَربل الْـ إِسْمُو عَلى إِسْمِي

لِمْ باس إجْرَكْ.. بِكْيِت النَّسْمِه

من كِتِر ما بْقَلْبو لهيب ونارْ

صارِتْ الْبَوْسِه خَتمْ.. مِرْتِسْمِه

ـ8ـ

وْجُوزافْ جاري.. ساكِنْ دْياري

راسو انحنَى عَ البَيّ إِجْباري

كل ما مرَق عَم شُوف خَيّي فيه

وكل ما بِكي.. بِبْكي أنا وْجاري

ـ9ـ

ونتالي.. وِكلير.. هَـ الْبِنْتَيْنْ

رْجاعْ شُوفُنْ.. عَيْن تِمْسَحْ عَيْنْ

وْلِك يِقْبروني.. خايِف عْليْهُنْ

صرخِةْ: يا بَيّي.. شلّعتْ قَلْبَيْن

ـ10ـ

وإخْوِه.. ما قِدْرُوا تْحَمّلوا الصدّمه

إنت الزّغير.. وكبرتْ النّقْمه

صاحوا: يا عدرا تْطَلّعي فينا

صارتْ حَجَر بِتْمامُنْ الْكِلْمِه

ـ11ـ

يا "أبو شربل" رَحيلَك كانْ

صَرْخِةْ وَجَعْ عَ شْفاف هـ الْخِلاّنْ

بملبُون وسيدني سكّروا الِبْوابْ

وْبِكْيِت مِجِدْلَيّا وحِزِنْ لُبْنانْ

ـ12ـ

يا صِهْر رشدبين بالكُورَه

الْكُورَه عَ صَدْرا مْعَلّقَه صُورَه

هايْ صُورتك يا أجمل الأحبابْ

ومْبرْوَزِتْها بْكَمْشِة نْدُورا

ـ13ـ

وْلِكْ كيفْ بَدّي كيفْ إتْسَلّى

وإنْساك.. يا لْكنتْ الدِّني كِلاّ

ياما وياما طلبت قدّيسينْ

وْساعِةْ ما مِتّ.. زْعِلْت مِنْ أَلله

ـ14ـ

وْأَلله.. بْيَعْرِف لَيْش تا زِعْلانْ

مَوْتَك صعبْ يِتْحمّلو إنْسانْ

يا لْكنتْ تِشْبَهني متل شي تَوْم

كرمال أللـه.. رجّع اللي كانْ

ـ15ـ

كيف بدّي ودّعك قللّي

وإنتْ مرّ الكاس بِتْحَلّي

رَح سَكّر عْيُوني عَ ضحكة خَيّ

كل ما خَطَرْ بِالبالْ.. رَحْ صلّي

**

قديس

ـ1ـ

واقِفْ عَ قَبْر الْبَيّ.. صَلّيلُو

مَرسال الِبْعَيْني.. إبِنْ سَرْكيسْ

بْيِزْعَلْ إذا بْتِبْكي مْقابيلُو

قِدّيس عاشْ.. وْبِالسَّما قِدّيسْ

ـ2ـ

كنّا زْغار كْتير كْتير

وكنت الشَّمعه المضويّه

نركُض.. نلعب.. سوا نْطير

وإيديْك تْغلّ بْدَيّي

وهلّق لمّن صرتْ كْبيرْ

ليش خسرتَك يا خيّي

ـ3ـ

أوعا تفكّر إنك غبتْ

وجّك.. شمسي الما بتغيب

مرسالينو.. الإسم كتبت

وسميتك أغلى حبيب

**

خوالي

بريعان الشباب ابتلع البحر خالي يوسف، وبكهولة مقدسة ودّعنا خالي الأديب والمترجم لورنس مارون.

ـ1ـ

خالي يوسف ما عرفتو

يمكن بمنامي شفتو

عم يسبح ومواج الغدر

عم تطفي شمعات العمر

وتبلع ضحكه متل الزهر

والـ بقيوا ع شط البحر:

شبيّه زغيره.. ومنشفتو

ـ2ـ

كانوا يحكولي عنّو

شبابيك البيت بْـ "برسا"

و"برسا" ما فرحت منّو

بعدا عم تنطر عرسا

بتتذكّر ضحكة سنّو

اللي فيها عيونا جنّوا

ومن بعدا صارت خرسا

ـ3ـ

وخالي لورنس الفهمان

إسمو بيشرّف لبنان

قالولي انت مخوّل

غارق متلو بالقصدان

بالقصه.. طلع الأول

مترجم رائع.. مبدع كان

جرس عبّود بذاتو

متربّى ع خبزاتو

خالي وجدي والايمان

تالوت مقدس منصان

اكتملت فيي ميزاتو

هنّي بـ جنّة رضوان

وانا ع غيابُن زعلان

عمري شبّهتو بفنجان

تدحرج من ايد النسيان

تا إمشي ع قزازاتو

**

بطرس الكبير

الى روح عمّي الأكبر بطرس يوسف الخوري البعيني، شقيق جدّي، الذي آمن بي شاعراً وتبرّع بطبع أول دواويني الشعرية "مراهقة" عام 1968

ـ1ـ

يا عمّي بطرس الكبير

الطيف الغالي.. شو بقلّو

من يوم اللي كنت زغير

علّمني جدّي تا صير

قدّس هالإسم وجلّو

ـ2ـ

خيّ الجد.. وعم البيّ

يا فرحة قلبي بهالعم

أرزه.. وعم بتوزّع فيّ

عيالك كلاّ.. قالت: خيّ

تحت غصونك عم تلتمّ

ـ3ـ

لمّن حسّيت الأشعار

دقّت بالسهره ع الباب

ركّعت قبالي الدولار

جمّعت الشعر المختار

طبعتلي أوّل كتاب

ـ4ـ

يا عمّي بطرس ممنون

عطفك.. مهما العمر يطول

إسمك بحروفي رح صون

بْعيني.. وعم تسكن العيون

وتا تغيب عنّي.. مش معقول!

**

جدودي

إلى روح المرحومين جدي جرجس عبّود مارون، الذي لم أعرفه إلا من خلال كتبه الكنسية السريانية، وجدي طنسا يوسف الخوري بعيني الذي بقي قندلفت كنيسة سيدة مجدليا حتى يوم وفاته.

ـ1ـ

قالولي: بالشِّعر جُودْ

وْوَعِّي الرَّدِّه بِالرَّدِّه

وارِتْ عَنْ جِرِسْ عَبُّودْ

جِدَّكْ.. يا حْرُوفي هَدِّي

حْرُوفو مَقْطُوفِه مْن جْرُود

بْتِلْمَعْ.. مِنْ دُونْ مِسْوَدِّه

عَ قَبْرَكْ رَحْ زِتّ وْرُودْ

وْقِلَّكْ: بِلْيالي الشِّدِّه

مِتّ.. وْبَعْدِي مُشْ مَوْلُودْ

يا جِدِّي الْـ فِيِّي مَوْجُودْ

لا تِتْرِكني يا جدِّي

ـ2ـ

وجدي طنسا بْطَرْبُوشو

شيخ مشايخ ضيعتنا

وزّع ع الناس قروشو

وترسمل بمحبتنا

زندو ما فيك تحوشو

بتنبع منّو رجولتنا

وصلت للجنّه شلوشو

اللي ربيت بكنيستنا

ـ3ـ

جرجي وطنسا أجدادي

غابوا.. وبعدن بعيوني

ترابُن قونه ببلادي

تحت الأرزه مدفونه

تنينتهن خدموا الفادي

وحملوا الصلا زوّاده

يا عدرا بقلبُن.. كوني

**

خالاتي

ـ1ـ

خالتي كلارا

كان شْعارا:

حب الناس جناس جناس

عندا بسمه

متل النجمه

ومتل الشمعه بالقداس

ـ2ـ

وخالتي حنّه

بتجنّني

حنونه من دون قياس

عندا طلّه

متل الفلّه

بِذْكِرْها.. وِبْعَلّي الراس

ـ3ـ

وخالتي "تاري"

النبع الجاري

الـ ميّاتو رقّه وإحساس

تراز هيي

متل شبيّه

حروفا أغلى من الالماس

ـ4ـ

 وغابت أمي

الـ حملت همّي

وغزلتلي من الحب لْباس

اشتقت عليها

لصلبان دَيْها

الـ حميتني من عيون الناس

ـ5ـ

وبقيت خاله

وحده.. قبالي

إسما أم يوسف زخّور

"عاقله" غابت

قلبي صابتْ

وخلّتني عايش مقهور

ـ6ـ

ماتوا كلّن

بس محلّن

عاشت زهره صعب تْباس

مش رح إرضى

عمري يفضى

من أحبابي.. متل الكاس

**

جرجورة

إلى روح الفقيد جرجورة اليمّوني

ـ1ـ

أَيَّا شِعْر بِيوَدِّعَكْ.. قِللِّي؟

أَيَّا كَلام بْيِعْجِبَكْ؟

تَا إِمْدَحَكْ.. مُشْ مُمْكِنْ تْخَلِّي

شَاعِرْ بِشِعْرُو يْعَذِّبَكْ

يَا مْلاكْ بَيْن النَّاسْ مِتْجَلِّي

رَبّ السَّمَا عَمْ يِطْلِبَك

رَحْ شَهِّد بْبَرْسَا أَلِفْ مِلِّه

وْخَلِّي الْخَلِيقَه تْطَوِّبَكْ

ـ2ـ

حْبَال الْمَسَافِه الْـ بَيْنَك وْبَيْنِي

رَحْ تِشْنُق ضْلُوعِي

لا تْقُولْ سَاكِتْ شَرْبِل بْعَيْنِي

الصَّرْخَاتْ بِدْمُوعِي

يَا كْفُوفْ زَرْعِتْ أَجْمَل جْنَيْنِه

مَعْ بِنْت عَمِّتْنَا

شْبَابْ وْصَبِيِّه.. يَا مَلاَ عَيْنِي

زِينِه بْغُرْبِتْنَا

ـ3ـ

يَا الْـ كِنْت خَايِفْ عَ الْوَطَنْ

وِمْسَيّجُو بْحُبَّكْ

جَيْشَكْ بِلَيْلات الْمِحَنْ

حَامِي حِمَى شَعْبَكْ

تَا يْرِدّ غَدْرَات الزَّمَنْ

عَنْ أَرْض حَرْقِتْهَا الْفِتَنْ

وِفْدِيتْهَا بْقَلْبَكْ

ـ4ـ

جِمَّعْت بَاقَاتْ الزَّهْرْ

تَا حَيِّك أْكالِيلْ

تْلَوِّن سْوَاد الْقَبْرْ

تْحَوِّل تْرَابُو تِبْرْ

تَا يْلِيقْ بِالْوِجّ الْجَمِيلْ

بِعْيُونْ جَرْجُورَه

بْدَعْسِةْ جْرَيْن الْبَطَلْ

وْغَسِّل بْدَمْعِي زَعَلْ

بَرْسَا.. الْـ بِالْكُورَه

**

ماري

إلى روح ابنة عمتي ماري بعيني

ـ1ـ

لا تزعلوا.. لو فارق الدنيي مَلاك

مْلاك السّما بيروح وبيرجع

المؤمن بـ ربّو.. صعب يطويه الهلاك

بتضل روحو بالسّما تلمَع

ـ2ـ

من بعيد جايي.. ودمعتي قنطار

تا ودّع اللي حارقَه قلبي

زهره.. إذا بتخبّر الأزهار

انوجدت لَ عرسا بس.. يا ربّي

ـ3ـ

هيك العرس بيكون!؟ مش معقول

نطرنا الفرح.. مين حوّلو لْمأتم

ماري بعيني الـ سوسحت العقول

صفّى المسيح بطلّتا يحلم

ـ4ـ

ع اسم مريم.. سمّتا الام الحنون

راحيل عم تبكي عروستها

وطلّت العدرا.. الدمع جُوّات العيون

ع سميّتا.. ونخّت تا باستها

ـ5ـ

بِكْيِت عْليها أرزة بْلادي

وبِكْيِت الجاره.. ودقّت جراسا

هاك الْكنيسه الـ شبعتْ عباده

بِـ مجدليا.. منحني راسا

ـ6ـ

عشنا سوا متل الأخت والخي

ومحروم صوت الأخت يا دلّي

مهما انطفى من العمر صيتا حي

وكرمال عينا عْيال بتصلّي

ـ7ـ

هنيّال قلبا الكل حبّوها

وما في قلب ما استقبلا بقلبو

ضبّت شنطها وراحت لبُوها

ترجّت يسوع يعيّشا بْقربو

ـ8ـ

من بعد موتِك.. يا عروس زغيّرَه

صارت حياة عيالنا متغيَّرَه

القبر اللي إنتي فيه رح يبقى مزار

مهما برمنا بهالدني.. عيالك كْتار

ودروبنا رح تنتهي بهالمقبرَه

**

بولس

إلى روح عمّي بولس بعيني

ـ1ـ

خسرناك يا بو الياس.. يا عمّي

خسرناك يا نبع المحبّه والحنان

يا بولس بعيني.. النار بِـ دمّي

والدمع من كتر الدمع يئسان

هَمّي كبير.. وزدت ع هَمّي

مات آخر عَمّ... بالهجران

سلّم عَ بيّي وقلّها لإمّي

أيتام صرنا.. مات بي الكل

وبكيت الأرزه بِـ جبل لبنان

ـ2ـ

قالوا: كِبِر.. وإنت بْعينَيْنا كْبير

ناطور كنت.. بْتِحْرُس نْواطير

تِسْعين شو تِسْعين يا بو الياس

عَ مْحَبّتَك.. والله قليله كْتير

وْلاد عمّي تاكيين الراس

وعيلة بعيني لفّها التعتير

محبوب كنت.. سآل كل الناس

عم يحلُف بْإسمك كْبير زْغير

يا شمعة الْـ ما بتنطفي بقدّاس

يا صورة الـ مُش لازما تِبْخير

يا سْراج مِضوي بْدَير مار الياس

يا جار عدرا اشْتاقت التنوير

بمجدليا اليوم دقّوا جْراس

وصار الحزن ع بيادرا قْناطير

ـ3ـ

أيا شِعر بيفرّحَك.. قللّي

كِنّا بْدينَيْنا صوتَك نَملِّي

الـ عَمّ اللي متلك صعب إنّو يْموت

تارك حَنانو بْقلبنا غَلِّه

هِنيّال قلبو فيك هالتابوتْ

هوّي الـ ربِح ونحنا اللي خْسرناك

وْلازم نعيش العمر عَ ذكراك

وكل ما ذَكرنا إسمَك.. نْصَلّي

**

جورجيت

إلى روح عمتي جورجيت بعيني

ـ1ـ

يا عمتي جورجيت شو بقلّك

مهما بعدتي.. بقلبنا محلّك

سركيس، باخوس، بولس وبطرس

إخوه.. اشتاقوا كتير لمطلّك

خرستين ستّي عيلتا بتحرس

ودّت أبوكي ع السما يدلّك

ومادلين حُبّا زهور عم تغرس

وكرمه الحنونه بتعشقك كلّك

وبطرس، رفيق الدرب، عم يدرس

كيف بدّو يزيّنك بالحُبّ

وإنتي حنان وحبّ ع حلّك

ـ2ـ

قلوبنا بتبكي على غيابك

بْ "ملبورن وسيدني" كتار أحبابك

العمه.. ع طول منعتبرها أم

نحنا ولادك.. وسّعي بوابك

خوسيهْ.. يللي سنين فيكي اهتمّ

للعيد شفتو محضّر تْيابك

العمّه.. ع طول عيالها بتلم

لمّت عيالك دمعة مصابك

الدم البعيني هون.. أشرف دم

لوّن بحبّو كمشة ترابك

ـ3ـ

يا عمتي جورجيت باقي هون

عمّه وحيده منعبدا عباده

راحيل.. قوليلو لإله الكون

يطوّل بـ عمرا شوي بزياده

قلبا احترق ع البنت من شهرين

واليوم.. موتك نار بالعينين

بيكفي حزن.. بـ جاه هالعيدين

خصوصي ميلاد السيّد الفادي

**

مرت عمّي

الى روح امرأة عمي البطل سيدة باخوس بعيني

ـ1ـ

ألله عَطاكي العُمْر تا نْحبِّكْ

كْبِرْتي.. تا نِحْنا نكبَر بْقَلْبِكْ

يا مَرْت عَمِّي سيّده.. بلبنان

بَعْدو البطل ناطر عَلَى دربِكْ

باخوس إسم بيزَيّن الأوطان

عْيُونو عَ طول موجّهه صوبِكْ

بيتِك ضُوي بِبْناتْ معْ صِبيانْ

ربْيُو بْطهاره.. مَخْزَنِكْ عبِّكْ

بيت الْقَداسِه والْبُطولِه كانْ

بْيِشهدْ عَ حَكْيي، بِالسَّما، ربِّكْ

ـ2ـ

يا مَرْت عَمّي.. هَالزَّمَنْ غَدّارْ

بْيِسْرُق منِ الْعَيْلِه أَسامي كْبارْ

يُولا.. قبلْ ما تْوَدِّع الأطفالْ

صرْخِتْ: يا بَيّي.. وْحَيْط بيْتا انْهارْ

راحِتْ ما شِفناها متل شي خْيالْ

وبعدو الْزّعَل بِقْلُوبْنا قِنْطارْ

وْعَمّي الْبَطلْ.. هالْـ باخوس الرجّال

اسْتَشْهَدْ كَرامِة أرْزنا الْجَبَّارْ

وجوزاف صهرك من عْيالو انْشالْ

متل حلم.. وما انعرف شو صار

وكرلوس حفيدِك ضحكتو مُوّال

وردة طفوله.. انْقطفتْ بنُوّارْ

ومرسال خيّي.. آخ مِنْ مرسال

شعّل بِقلبي نار تاكُل نارْ

لا تِزْعَلي.. رح تلتقي بِعيالْ

كانوا لِنا.. وِتْحَوَّلُوا تِذْكارْ

عشنا سوا.. والبالْ فاضي الْبالْ

وكنتي تحبّينا كْبارْ زْغارْ

يا مرتْ عَمّي مْحَبتِك رِسْمالْ

يِرْحَمْ تْرابِكْ.. كل شَمْس نْهارْ

ما بقول: متّي.. بْقُول عُمْرك طالْ

برفُض يا أطهر أم مَوْت الأم

رَحْ قُول راحِتْ عَ السَّما مشْوارْ

**

خرستين

الى روح جدتي خرستين حتي بعيني

ـ1ـ

ستّي.. يا ستّي.. بالسما صلّي

من دموع شاعر بحر بتملّي

سمعنا يسوع بينده خرستين

عرفنا السّما رح تربح الغلِّه

ـ2ـ

يسوع حبّك.. غيّر التكوين

صرتي الشمس.. يا شمسنا طلّي

عمرك ع وج الارض ضوّا سنين

علينا العمر ما لازم تغلّي

ـ3ـ

ترابك هديّه لأرض رشدبين

يا مجدليّا رجّعي الفلّه

نحنا بغربه.. كتير مشتاقين

مهما بعدنا ومرقت الإيام

حلفنا بقلب قلوبنا تضلّي

**

دجيمي

الى روح صهرنا الحبيب دجيم غولدبرغ

ـ1ـ

يا حبيب الكل.. شو بقلّك؟

عارف إنت بصدورنا محلّك

وهالطفلة اللي حملتها بإيديك

وخبيتها، يا دجيم، بـ عينيك

حبّك بقلبا صار متملّك

ـ2ـ

وبنت خيي الـ حبّتك بجنون

متل إمّك دمعتا حمرا

متل بيّك.. قلبها محزون

وأختين حرقت قلبن الجمره

ـ3ـ

ليش حتّى تودّع عيالك

وبعدك عريس مشعشعه الضحكه

يا بي.. وقفت "أودري" قبالك

تا تودّعك.. هيي وعم تبكي

عمرا شهر.. مش قادره تحكي

ـ4ـ

وعيلة بعيني الـ حبّتك يا دجيم

لا تفتكر بالعمر رح تنساك

هنيّال قلبا فيك جنّات النعيم

طيور السما عم تفرح بملقاك

ـ5ـ

حابب تا قلّك.. يا بنت خيي

كلمه زغيره.. خطرت ببالي:

من "دجيم" إجتك "أودري" هديه

تا يعيش فيها.. بهالدني ع طول

وكل ما ندهتي اسمها بيقول:

بعدي أنا عايش مع عيالي

**

كرمه

الى روح عمتي الحبيبة كرمه

ـ1ـ

عمتي "كرمه" كرم عَ الدرب

وقلبها مشرّع لأحبابو

كانت رمز للتضحيّه والحب

ويا ما بشر بمحبّتا دابو

ألله عطاها بنات حدّنْ شبّ

فرحت سما الهجرانْ بشْبابو

واليوم ركعوا يطلبوا من الربّ

يرحم أمومه رفعتْ عتابو

وقدّام صوره مقدّسه بالقلب

حرقت شموع كتير عَ بْوابو

يا أرز خلّي دمعتك تنصبّ

لبنان صعبه يحمل مْصابو

ـ2ـ

عمتي "كرمه" حنونه كتير

ما في قبر رح يسرقا منّا

رسمنالها بقلوبنا تصاوير

غابت وبقيت ضحكتا عنّا

تا يصير متلا.. صعب إنو يصير

الإيدين جنّى.. وقلبها بنّى

هجرت وطنّا وكنت بعدي زْغير

وتركت الغصّه بقلب موطنّا

ـ3ـ

ليش البكي؟ ما زال ما بينفع بكي

وليش الحكي؟ وكنتي فرحنا بالحكي

ملبورن إذا شي يوم بدّا تشتكي

بتكون عم تشتاق، يا كرمه، لكي

ومجدليا، اليوم، شفتا ملبّكه

بتمشي شويّه، وبعد نتفه بتتكي

ما صدّقت بتموت سيّدة الكرَمْ

وبتنهدم من بعد منها المملكه

**

إيفا

الى روح المرحومة إيفا اليموني

ـ1ـ

من يوم كنت زْغيرْ

حبّيتْ صوتا كتيرْ

كانت تغنّيلي:

"يمّا القمر ع البابْ"

وتضحك مقابيلي

ويزهّر العنّاب

وحسّ بدّي طيرْ

متل العصافيرْ

ـ2ـ

كنت شوفا أختْ

وما كانْ عندي أختْ

وفي يوم.. لفّو غيابْ

غمّضت عيني ونمتْ

وصرخت لمّن قمتْ:

وين إيفا وين؟

وين اللي كانت عيدْ

ملوى القلب والعين؟

ـ سافرت لبعيدْ

عَ بلاد خلف البحرْ

حسّيت إنّي دختْ

وغرقت بالتنهيدْ

لمّن بليلة قهرْ

ودّع سمانا البدرْ.

ـ3ـ

وسافرتْ بعد سنينْ

وشفت إيفا أم

حدّا ولاد زْغار

متل الزهر حلوين

وجرجوره ربّ الدارْ

بيمشي بعُروقو دمّ

طاهر.. نقي.. جبّارْ

فرّح جبل صنين

ـ4ـ

وإيفا الـ حنانا جبالْ

بالحب غمرتني

قالت: يا ابن الخالْ

جوعان: طعمتني

وصرت أتذكّرْ

هاك الصبيّه الـ خدّها مرمر

وضحكتا سكّر

بعدا متل ما كانتْ وأكترْ

بتشرّف الهجران

وبرسا ورشدبين

وأرزه بجبل لبنانْ

ـ5ـ

يا هجر قللي مين

ما جنّ وتحسّر

ع أم قديسه

ركعت بالكنيسه

إسمْها إيفا..

إيفا اليموني

ربّ السما شافا

الطلبات ع شفافا

بإيام شهر الصومْ

قللا: يا بنتي اليوم

حدّي أنا.. كوني

**

مرتا

الى روح جدتي المرحومة مرتا مارون

ـ1ـ

ستّي مرتا.. صرلي زمان

بدّي إشكيلك همّي

حبّك، يا أغلى النسوان

حاسس عم يمشي بدمّي

ذكرك باقي بالهجران

متّي.. وبعدك بتلمّي

عيالك.. يا أرزه بلبنان

يا أحلى غنيّة حب

زهّر إسمك ع تمّي

ـ2ـ

بتذكّر هاك الايام

وهاك الطلّه المضويه

وبعدي بشوفك بالاحلام

قدّيسه برساويّه

بغمّض عيني كل ما بنام

بتغفى ع صدري شبيّه

يا ستّي.. مرقت أعوام

غبتي.. وسكنتي فيي

بالجنّه رسمك رسّام

صوره من أحلى ما يكون

ألوانا من عينيّي

**

مادلين

الى روح عمتي الحبيبة مادلين شعنين

ـ1ـ

لمّن كنت إتعلّم

بطرابلس.. إركض زورا

بيتا بْـ "بو سمرا" معرّم

عند النزله.. المشهوره

عمّه.. وهالعمّه تسلم

معلقلا بقلبي صوره

ـ2ـ

شو ما عندا تْطَعْميني

ودمعة عينا تسقيني

"إبن خيي بحبّو كتير"

بهاك الجمله تلاقيني

حنونه.. وشو قلبا كبير

شمس.. وضحكتها زينه

ـ3ـ

سافرت.. وبعدو ببالي

حلم زغيّر يا محبين

أوفي ندوري برشدبين

عن نيّة مادلين شعنين

الربتني ع الحب سنين

ومحبتها.. رسمالي

ـ4ـ

مش رح قلّك عم إبكي

علمتيني إفرحلك

وإزرع ع شفافي الضحكه

يا عمّه الما في متلك

هنيّالك.. حدّك أهلك

بجنّة ألله مجتمعين

ونحنا الصرنا مغتربين

طول العمر منشتقلك

**

يوسف الحسن

إلى روح المرحوم جوزاف اليموني

ـ1ـ

يوسف الحسن.. مش حق إنّو يروح

وزيّن بأعمالو سْنين الهجر

موتو متل شي سيف شكّ جْروح

بْهالعيلة الـ بيغار منها الزهر

ـ2ـ

غاب اللي بيتو للكرَم مفتوح

ومحبّتو للكل متل النهر

ضحكة شفافو.. لوْ شي مره تبوح

بتخبّر الاجيال قصّة بدر

ـ3ـ

ضوّى بعتم الهجر أعلى صروح

انبنيت ع كفـّو بالصلا والصبر

وبنت عمّي الْـ قلبها مدبوح

ودمعة عيونا يابسه من القهر

ـ4ـ

ما كان يتركها وْلا مره تنوح

جوزاف يموني رفيق العمر

روحو.. بـ جنّة ربّنا بتسوح

يا ابن برسا.. يا حبيب الكل

بقلوبنا بتعيش.. مش بالقبر

**

بطّوره

الى روح عمي الحبيب بطرس طنسا بعيني

ـ1ـ

ستي تقلّو: "بطّوره"

أزغر إبن بعيلتها

سافر.. خبّتلو صوره

بعبّا.. وعاشت مقهوره

عم بتناجي صورتها

ـ2ـ

وعمّي بطرس شيخ شْباب

طلّه وقامه حرزانه

شهدولو كل الغيّاب

بوجّو ما بيتسكّر باب

إسمو بيرق لبناني

ـ3ـ

بملبورن عاش سْنين نضاف

وقدّملا تـْلتّ صْبيّان

روميو وطوني مع جوزاف

ما صدّق عمرو بيوقاف

من دون ما يودّع لبنان

ـ4ـ

حابب يرجع ع بلادو

يعلّق بالضيعه زينات

يفرّح فيها أجدادو

يا حسره الموت اصطادو

وبكيت ع غيابو الأرزات

ـ5ـ

يا عمّي بطرس ممنوع

إبكيك.. وبعدك حدّي

بتعيش.. وصوتك مسموع

سامحني لو شفت دموع

حرقت، ع غيابك، خدّي

**

عيد الأمومه طل

زرت قبر أمي بترونله بيوم عيد الأم، وكان المطر يهطل بغزارة، فكتبت:

ـ1ـ

سنين صرلك غايبه.. وبعدك قمر

يا ميمتي.. وبعدو رضاكي بمسمعي

دعسة جريكي بعد في إلها أثر

عم إسمعا.. طمعان إنك ترجعي

ـ2ـ

عيد الأمومه طل جايي من السفر

ما عاد عندي عيد، صرت بلا وعي

زرت قبرك تحت زخات المطر

حبيت إخفي دموع حرقت مدمعي

ـ3ـ

تركتي وجع ما كان حاسبلو القدر

بفزع تا قلك شوبني وتتوجعي

من كتر ما خبطت راسي ع الحجر

صار الحجر، يا ميمتي، يبكي معي

**

أمي

إلى روح أمي الطاهرة بترونلّه مارون بعيني.

ـ1ـ

مِشْتَاقْ لِعْيُونِكْ أَنَا

مِشْتَاقْ لِلضِّحْكِه

لِشْفَافْ عَمْ تقْطُر هَنَا

مِنْ دُونْ مَا تِحْكِي

يا نَظْرِة الْـ كِلاَّ أَمَلْ

مَحْرُوقْ قَلْبِي مْنِ الزَّعَلْ

وْفِزْعَانْ تَا إِشْكي!

عَمْ يِلْعَب بْعُمْرِي الْقَدَرْ

وْصَوْتِكْ بِـ دِينَيِّي هَدَرْ:

لا تْصَرِّخْ وْتِبْكِي!

ـ2ـ

يِرْضَى عْلَيْكُنْ.. وِالرَّضَا

قَبْل الْمَمَات بْيِنْسَمَعْ

قلْتِي لإبْنِكْ.. وِالْفَضَا

قَلْبُو مِتِلْ قَلْبِي انْشَلَعْ:

دكْتُور.. سَاعِدْ مَيِمْتِي

دكْتُور.. دَاوِي مَيِمْتِي

دكْتُور.. مَاتِتْ مَيِمْتِي

يَا لَحْظِة الْـ كِلاَّ وَجَعْ

أَنْطُونْ عَ "النِّقْطَه" رَكَعْ

وْجُورْجْ.. دَنَّقْ وِانْسَبَعْ

وْجُوزَاف يِصْرُخْ: شُو بِكِي

وْمَرْسَالْ عَ صدْرِكْ تِكِي

وْمِيشَالْ.. جَايِي عَ الطَّرِيقْ

مَقْهُورْ.. بِدْمُوعُو غَرِيقْ

وِكْنَايْنِكْ.. حزْنُنْ لَمَعْ

خِسْرُوا الْحَنَانْ الْبَرْمَكِي

خِسْرُوا الأُمُومِه وِالدَّلَعْ..

عْيَالِكْ مِتِل شِي مَمْلَكِه

نَكّسِتْ.. رَاسَا.. لِكِي!

ـ3ـ

بْكِيتْ..

وَاللَّـه بْكِيتْ..

وَاللَّـه بْكِيتْ..

سَامْحِينِي.. وْسَامْحِي دْمُوعِي

لا تْفَكّرِي هَاكْ الْوَصِيِّه نْسِيتْ

كْلامِكْ شِعِرْ مَحْفُورْ عَ ضْلُوعِي

لَكِنْ، يَا مَامَا، قِصّتِي

خْسِرْت الْهَنَا

خْسِرْت الْمُنَى

وْإِنْتِي اللِّي كِنْتِي حِصّتِي

خْسِرْتِكْ أَنَا

خْسِرْتِكْ أَنَا

وْمِتِلْ جَمْر النَّارْ صَارِتْ غَصّتِي

وْطَفِّي الْجَمْر بِدْمُوعْ

وْضَوِّي عْيُونِي شْمُوعْ

عَ قَبْرِكْ.. وْيِبْكِي يَسُوعْ!

ـ4ـ

قَالُوا الدِّنِي رَحْ تِنْتِهِي بْتَمُّوزْ

تَارِي الدِّنِي رَحْ تِنْتِهِي بْمَوْتِكْ

مَوْت الأُمُومِه صَعْب مَا بِيجُوزْ

بْيِطْفِي قْلُوب بْتِنْبُض بْصَوْتِكْ

تَمّوزْ رَاحْ.. وْبِقْيِتْ الْجَمْرَه

بِعْيُونْ.. صَارِتْ دَمْعِتُنْ حَمْرَا

لَيْش حَتَّى تِتِرْكِينا لَيْشْ

بْسِرْعَه قَوِيِّه.. صَعْب إِنّو نْقِيسْ؟!

الظَّاهِرْ نَدَهْلِكْ..

اشْتَقْتِيلُو وِاشْتَقْلِكْ

رُوحِي إِلُو.. مَعْلَيْش

صارْ لازِمْ تِلْتِقِي بْسَرْكِيس

حَدُّو بْيِحْلا الْعَيْش

مْلاكْ نَايِـمْ عَ صَدْر قِدِّيس

**

**

زهرة حياتي

مهداة لروح الوالد الغالي سركيس بعيني 1915ـ 1982.

ـ1ـ

كِيفْ بَدِّي وَدِّعْ حْبَابِي

وْإِنْتَ حَبِيب الْقَلْب يا بَيِّي؟

وْكِيفْ بَدِّي بَيِّنْ عْذَابِي؟

عْذَابِي إِذَا رَحْ بَيّنُو لِلنَّاسْ

بِيكُونْ ضَرْبِه قَاضْيِه عْلَيِّي

ـ2ـ

شُوفْ الْحُزن عَ وِجّ مَيْمِتْنَا

خْنَادِقْ حَفَرْ.. وِوْجُوهْ إِخْوَاتِي

سَكّرُوا بْوَابُنْ عُمُومِتْنَا

وْمِنْ أَرْض مَلْبُورنْ طَلِّتْ الأَحْبَابْ

تْوَدّعَكْ يَا زَهْرِة حْيَاتِي

ـ3ـ

سَلِّمْ عَ سِتِّي وْبُوسْ جدِّي شْوَيّْ

سَلِّمْ عَ هاكْ النَّمْر حَامي الْحَيّْ

خَيَّكْ.. حَبِيبَكْ.. بَاخُوس الْمِغْوَارْ

عِنْدُو يا بَيِّي بْقَلبْنا تِذْكَارْ

هَـ الْـ كانْ يِسْقِي لْكِل عَابِرْ مَيّْ

ـ4ـ

صَعْب نِنْسَى فَضلْ كِلّ النَّاسْ

الْـ شَارْكُونا الْيَوْم مُرّ الْكاسْ

بِكْنِيسْة الضَّيْعَه خْدَمْت سْنِينْ

صَفِّتْ شمُوع.. بْحُبّ مِضْوِيِّينْ

وْصِفَّيْتْ إنْتَ الْكاسْ وِالْقدَّاسْ

ـ5ـ

غَدَّارْ يَا بَيِّي الدَّهرْ غَدَّارْ

متلْ الكذب.. عم يسرقَك مِنِّي

ما كْفرتْ.. لكن قصَّرْ الْمِشْوَارْ

كلّ قَصْدِي يا حَبِيب الْقَلبْ

خَلِّيكْ حَدِّي.. عَايِش بْجَنِّه!

ـ6ـ

مُشْ حَقّ يا بَيِّي تْفَارِقْنا

شُو نْسِيتْ نِحْنا بِـ أَرضْ غُرْبِه؟!

بْلادْنا احْتَرْقِتْ..لا تِحْرِقْنا!

لَكِنْ عَزَانَا مْنَعِرْفَكْ قِدِّيسْ

وْإِنَّكْ، يا بَيِّي، بِـ حضنْ رَبِّي.

**

**

شعلة نار

إلى روح الشهيد داني فريد الترس

ـ1ـ

عُمْرَكْ قِدَّمْتُو هْدِيِّه

لأَرْزِةْ لُبْنانْ

رِحْتْ.. وْرَحْ تِبْقَى هِيِّي

تْحاكي الأَزْمانْ

وِتْخَبِّرْهُنْ خَبْرِيِّه

عَنْ دانِي الْـ كانْ

شِعْلِةْ نار وْحِنِّيِّه

وْمَنبَعْ إيمانْ

ـ2ـ

حْلِفْت بْتُرْبِةْ أَجْدادَكْ

بِتْرِدّ النَّحْسْ

عَنْ شَعْبَكْ بِاسْتِشْهادَكْ

يا داني التِّرْسْ

نْطَرْنا يْشَعْشِعْ فُؤادَكْ

نِعْمِلَّكْ عِرْسْ

قِمْت تْزِوَّجْت بْلادَكْ

عِنْد الدَّيَّانْ

ـ3ـ

يا شهيد الرُّجُولِه

يا أَحْلى شَبّ

خْسِرْناكْ.. وْمُشْ مَعْقُولِه

نِخْسَرْ هَـ الْحَرْبْ

قِرَّرْت مْنِ الطُّفُولِه

تِمْشِي هَـ الدَّرْبْ

وْتِشْرَحْ مَعْنَى الْبُطُولِه

لْمُطْلَقْ إِنْسانْ

ـ4ـ

مُشْ رَحْ نِزْعَلْ لِغْيَابَكْ

أَوْ نِسْكُبْ دَمْعْ

وْإِنْت الفَخْر لأَحْبَابَكْ

وِلْباقي الْجَمْعْ

الْمَجْد زْرَعْتُو عَ بابَكْ

فِجَّرْت اللَّمْعْ

لِمِّنْ قِدَّمْت شْبَابَكْ

كِرْمالْ لُبنانْ

ـ5ـ

أَوَّلْ جَيْشِي بْضَيْعِتْنا

ضَحَّى بِالدَّمْ

هَايْ عُرْبُون مْحَبِّتْنا

لَـ أَحْلَى أُمّ

وْتا نِدْعَسْ عَ مْصِيبِتْنا

وِالدَّمْع نْلِمّ

مْنِتْذَكَّرْ شَبيبِتْنا

الْـ فِدْيِتْ لُبْنانْ

ـ6ـ

وْمِجِدْلَيَّا الْمِنْصَانِه

مْنِ عْيُون الشَّرّ

ضَحِّتْ بإِبْنا داني

الْـ أَغْلى مْن الدّرّ

يا مِسْتَوْطِي حِيطاني

أُوعى تِنْغَرّ

عِنّا الْجَيْش اللُّبْناني

أَقْوَى مْن الْجانْ

**

حروف المجد

استشهد الشاب جوزاف فهد في 17 نيسان 1975. وقد لحن هذه الأغنية وغنّاها الفنان سمير بدر.

ـ1ـ

جُوزاف فَهْد اسْتِشْهادُو

دَمّ.. وْعَمْ يِفْدِي بْلادُو

صِيتُو طار.. وْصَفَّى الْجارْ

يِحْكي عَنُّو لِوْلادُو

ـ2ـ

جُوزاف فَهْد.. حْروف الْمَجْدْ

كَتْبِتْ عَنُّو بْمَيّ الْوَرْدْ

وْيِمْكنْ عَنُّو تِكْتُب بَعْدْ

وْتُوصفْ عَزْمُو وِجْهادُو

ـ3ـ

جُوزاف فَهْد الْـ بِالْعِشْرينْ

قُولُولي مِينْ مِتْلُو مِينْ

انْغَرْمُوا بِعْيُونُو الْحِلْوِينْ

وْهُوِّي انْغَرَمْ بِبْلادُو

ـ4ـ

مِجْدليَّا نِيَّالِكْ

هَـ الشَّبِيبِه كِرْمالِكْ

ماتوا.. وْصَارُوا أَبْطالِكْ

وْفَلْيِحْيا الْوَطَنْ نادُوا

**

أحلى عريس

استشهد الشاب ميشال حنا المقدسي في 22 آذار 1976. وقد لحن هذه الأغنية وغنّاها الفنان سمير بدر.

ـ1ـ

مِيشالْ حَنَّا الْمِقْدِسي

يا أَلفْ كِلْمِه مْقَدّسِه

لَمَّا تاريخُو بْيِنْكَتَبْ

يا بِنْت تَوَّجْها الأَدَبْ:

طَرْحِةْ الْمَجْد الْبِسِي

ـ2ـ

أَحْلى عَريس بْهَـ الدِّنِي

عْيُونُو.. الصَّبايا مْجَنّنِه

بْتِمْرُق سِنِه وْخَلْفَا سِنِه

وْقَلْبُو وَلا مَرَّه قِسِي

ـ3ـ

خَبَّى بْقَلْبُو ضَيعتُو

وْوَزَّع عْلَيْنا مْحَبّتُو

وْبَعْدا بْدِينَيْنا كلمتُو:

يَمِّي.. الدَّمْعات احْبِسِي

ـ4ـ

اسْتَشْهَدْ.. تا يِفْدِي مَوْطنُو

وْضَيعْتُو الْـ عَمْ تِحْضِنُو

أَبْطالْنا هِنِّي الْـ بَنُوا

لِلْمَجْد أَكْبَر مَدْرَسِه

**

بطل من لبنان

استشهد الشاب أنطوان الياس سليمان في 12 تموز 1976. وقد لحن هذه الأغنية وغنّاها الفنان سمير بدر.

ـ1ـ

حَدّ الأَرْزِه الْمُخْضَرَّه

رَكْعِتْ هَـ الْبِنْت السَّمْرَا

وْقالِتْ: دَخْلَكْ يا رَبِّي

هَـ الشَّبّ الْـ بَعْدُو بْقَلْبِي

رَحْ يِخْوِتْنِي بِالْمَرَّه

ـ2ـ

هُوِّي إِسْمُو وَيْن ما كانْ

بْحَيْثُو بَطَلْ مِنْ لُبْنانْ

قَلْلاَّ: شُو إِسْمُو؟.. قالِتْ:

أَنْطُون الْياس سْلَيْمانْ

وْنِتْفِه نِتْفِه مِتل الْكِذْب

صَارُوا خْدُودَا مِحْمَرَّه

ـ3ـ

عُمْرُو؟.. شُو الْوَرْد.. وْشُو الْفُلّ!

اسْتَشْهَدْ حَتَّى وَطَنُو يْضَلّ

وْصَفَّى شَمْس يْضَوِّي الْكِلّ

وْذِكْرَى مِنْ أَحْلى ذِكْرَى

وْنِتْفِه نِتْفِه مِتل الْكِذْب

صَارُوا خْدُودَا مِحْمَرَّه

**

باخوس بطل

استشهد عمي البطل باخوس بعيني في الحرب الأهلية اللبنانية بعد أن أنقذ أهلي وأهل قريتي مجدليا من الموت.

ـ1ـ

قالُوا: الْبَطَلْ نايِمْ

بِالسَّاحَه، وْمُشْ غافِي

وْبَيْرَقْ عِزُّو دَايِمْ

وْإِسْمُو عَلَى شْفافِي

ـ2ـ

يا باخُوس الِبْعَيْنِي

رَحْ حِطَّكْ بِـ عَيْنِي

وْعَمِّرْلَك جْنَيْنِه

عَ بَابَا صفْصَافِه

ـ3ـ

نِحْنا يا بُو الْهِمِّه

حْفِظْناها هَـ الْكِلْمِه

قِلْتِلاَّ: يا أُمِّي

جايِيكي.. لا تْخافِي

ـ4ـ

كنت بالتسعه وخمسين

لمّن ودّعت محبين

بكي طنسا وخرستين

الأهل الـ كلّن لطافه

ـ5ـ

الأبطال الـ متلك يا عم

فديوا أرزتنا بالدم

إسمك غنيّه بالتمّ

وذكرك وسع المسافه

ـ6ـ

اشتقت لهاك الشاميه

العا خدّك يا عينيي

كنت بمعزّة بيي

ورح تبقى الحضن الدافي

**

**

سيف القهر

إلى روح المرحوم الياس بولس عيسى

ـ1ـ

يا ناس.. يا أَهْلِي.. وْيَا مْحِبِّينْ

لَيْش قُولُوا لَيْش زِعْلانينْ؟

الْحُزنْ غَطَّى وْجُوهْكُنْ بِالْهَجرْ

وْيَبَّس دْمُوع.. مْيَبّسِه مْن سْنِينْ

ـ2ـ

وْمجدلَيَّا ضَيعْتي الْـ كِلاَّ جَمالْ

هَـ الْـ عاشْ شَعْبا بِالْمَحَبِّه والدَّلالْ

ماتُوا الشَّباب بْأَرضْها تا يِحرْسُوا

تْراباتْ أَغْلَى مْن الدِّني وِالْمالْ

ـ2ـ

ماتْ باخُوس.. ماتْ مِنْ قَبْلُو جُوزَافْ

ماتْ مِيشُو.. ماتْ طُونِي الْـ ما بِيخافْ

خْرِسْتينْ ماتِتْ حَدّ طَنْسَا مْشَتّتينْ

يا حَسْرتي، عَ ذِكِرْهُنْ، رِجْفُوا الشّفافْ

ـ4ـ

وْهَلَّقْ، يا رَبِّي، عْيُونْنا عَمْ يِدْمَعُوا

عَ غْيَابْ بَيّ وْخَيّ يا ما أَرْوَعُو

الْيَاس عِيسَى الْجارْ.. يَللِّي كْتارْ

تْرَبُّوا عَ إِيدُو وِارْتَووا مِنْ مَنْبَعُو

ـ5ـ

الياسْ عيسَى ماتْ.. خَلُّوا الزَّهرْ

يِتْجَمَّع أْكالِيلْ بِبْساتينْ

يِمْسَحْ الدَّمْعَه.. يْزِيحْ سَيْف الْقَهْرْ

عَنْ رَقْبِة الْـ بِالْحُزنْ غِرْقانينْ

**

موتك يا بو خطّار

إلى روح الفقيد مخائيل أبي خطّار

ـ1ـ

كْبِيرِه.. وْبِـ عَيْنِي كْتِيرْ إِنْتِي زْغَيَّرَه

يَا كَايْنِه.. يَا خَايْنِه.. يَا مْعَتَّرَه

يَا فَانْيِه.. يَا مْشَنْطَلِه أَصْحَابْنَا

يَا سَارْقَه بَهْجِةْ قُلُوب مْزَهَّرَه

ـ2ـ

بْيِكْفِي الْوَطَنْ حَارِقْ سَمَا أَعْصَابْنَا

بْيِكْفِي الْعُيُون مْشَرّدِه وِمْطَيْشَرَه

بْيِكْفِي الزَّعَامِه دَاعْسِه عَ رْقَابْنَا

وْبِبْلادْنَا مَرْفُوعْ سَيْف الْمَجْزَرَه

ـ3ـ

لَيْش حَتَّى تْعَذّبِي غِيَّابْنَا

وْيِنْهَدّ بَعْد الْعِزّ حَيْط الْقَنْطَرَه؟

مُشْ عَارْفِه.. بُوابُنْ عَ كِتْف بْوَابْنَا

وْنِسْيُوا الْجُدُود يْرَكّبُولُنْ سِكَّرَه؟

ـ4ـ

مُشْ عَارْفِه.. مْصَابُنْ عَ طُول مْصَابْنَا

وْدَمْعِةْ عُيُونُنْ بِالْقُلُوب مْقَطَّرَه؟

هَوْدِي جِيرَان الْعُمْر.. هَوْدِي حْبَابْنَا

وِبْمِجِدْلَيَّا دَوْم كَانُوا مَفْخَرَه

ـ5ـ

كْبِيرُن مْخَايِيلْ.. شَيْخ شْبَابْنَا

هَـ الأَرْزِة الْـ صَرْلاَ زَمَان مْهَجَّرَه

بْمَوْتُو.. مَا بَعْرِفْ بَسّ شُو اللِّي صَابْنَا

انْكَسْرِتْ جَوَانِحْ عَ الرِّيَاحْ مْكَبَّرَه

ـ6ـ

بْمَوْتُو.. اسْوَدّ الْحَرْف جُوَّا كْتَابْنَا

وْصِرْنَا نْعَبِّي بِالدُّمُوع الْمَحْبَرَه

مَوْتَكْ يَا بُو خِطَّارْ.. زَاد عْذَابْنَا

وْمِتْل الرِّيَاح، بْلا وَعِي، صِرْنَا سَوَا

نْحَوِّلْ طَرِيقْ الْبَيْتْ صَوْب الْمَقْبَرَه

**

حبيبة قلبنا

إلى روح الأم سوسان أبي خطّار كرم

ـ1ـ

يا حَبِيبِة قَلْبنا.. شُو صَابْنَا

حَتَّى السَّوادْ نْعَلّقُو عَ بْوابْنا؟

وْإِيَّامْنا تْعَبِّي ظُلمْ.. تِرْخِي ظُلمْ

وْمِتل الْحَرامِي تِسْرُق مْن صْحابْنا

نِحْنا الْمُمَثِّلْ.. وِالْعُمْر قِصِّةْ فِلمْ

وْكِلْمِةْ نِهايِه مْدَوّنِه بِكْتابْنا

سُوسانْ.. يِمْكِنْ بَعْد ما عِنْدِك عِلمْ

بْصَرْخِةْ رُومانُوسْ: وَدّعُولِي حْبابْنا

بْصَرْخِة طْفال زْغارْ.. شافُوكي حُلمْ

نِحْنا بْغُرْبِه.. لا تْزِيدِي عْذَابْنا

ـ2ـ

يا أُمّ.. سِقْيِتْ مِنْ دُموع عْيُونْها

أَطْفالْ.. رِبْيُوا عَ الشَّهامِه وِالشَّمَمْ

الأَرْزِه.. إِذَا بِتْبَاسْ نِحْنا بْدُونْهَا

مِنْصِيرْ ما عِنَّا شِعار وْلا عَلَمْ

يا أَرْزِة الْـ مِن مِجْدَلَيَّا غْصُونْها

مُشْ حَقّ بِـ هَـ الأَرْض يِطْوِيكِي الْعَدَمْ

وْمُشْ حَقّ هَـ الْعَيْلِه يْجِنّ جْنُونْها

وْيِنْحِنِي لِلأَرْض رُومانُوسْ كَرَمْ

ـ3ـ

وَدّعُوها.. وَدّعُوا هَـ السَّوْسَنِه

أُمّ الْعِيال الْـ بِالطَّهارَه مْزَيّنِه

هَـ الْـ كانِت الضِّحْكِه عَلَى شْفافا قَمَرْ

هَـ الْـ زَيَّنِتْ بِمْحَبِّتا الْعَيْش الْهَنِي

وْلَوْلا الدَّمعْ بِيرِدّ أَمْواتْ الْبَشَرْ

كِنْت عْمِلتْ طُوفانْ بِدْمُوع الْعُيُونْ

تا رَجّعِكْ إِنْتِي وْبَيِّي لْـ هَـ الدِّنِي

**

سمعان

الى روح الصديق سمعان الياس الحتي

ـ1ـ

سمعان حتّي الكان قلبو كبير

وورد الصداقه دوم يهديني

قللي إذا رح موت شو بيصير

بسيدني ما عندي عيال تبكيني

عايش وحيد بغربة التعتير

الحيطان وحدا عم تلاقيني

عندي إخت عنّي بعيده كتير

وعندي صهر إسمو على جبيني

وع مجدليا.. دمعتي قناطير

يا ريت فيها رجّع سنيني

وهاك الكنيسه نوّرا تنوير

وقللا: يا عدرا حضري المشلح

ومتل الطفل يسوع غطيني

ـ2ـ

وسافر ع ملبورن هيك بزياره

صرلا زمان تعنّ ع بالو

تاري سنين العمر غدّاره

ما بترحم اللي الحب رسمالو

وسيدني المدينه قالت: خساره

يموت اللي غنّى البسط موّالو

ما عاش وحدو.. عيلتو حاره

وولاد إختو وسّعوا مجالو

ان صاحوا: يا خالي.. بتدمع الجاره

وبتخبّر الإيام شو قالوا

وهالضحكة اللي انقطعت خبارا

سايمن الحتي لفّها بشالو

وبحضن إختو مات.. نيّالو

**

ام طوني

الى روح الأم الحبيبة نديمة نادر

ـ1ـ

يا أم طوني تذكري اللي كان

بـ مجدليا وصحبة الخلاّن

خرستين ستّي بصوتها الهادر

تصرخ يا أهلا وتفرح الدكّان

ـ2ـ

عشنا بمحبه.. ما حدا يكابر

بعيال بتشرّف بني الإنسان

وكنت مع طوني ع البيادر

نلعب سوا إخوان شو إخوان

ـ3ـ

نشبع رضا من تمّك الطاهر

وكل ما قفينا تكتّري الصلبان

كبرنا سوا وصار العمر آخر

وما فرقّت بيناتنا الأزمان

ـ4ـ

شربل يا إبني تصرخي.. الظاهر

عندك عطف بيزيّن الأكوان

إمي نديمه قلت.. وبجاهر

إنك عظيمه.. وبالكرم بستان

ـ5ـ

خسرت أمي.. اليوم مش قادر

إخسر حنانك.. عيش بالأحزان

يرحم ترابك معدنك نادر

متلك مرا ما بتخلق النسوان

ـ6ـ

لتاج الأمومه بتركع جواهر

وبتضل رغم الموت بالوجدان

مسّح دموعك يا إبن نادر

بنت القداسه طالبا الديّان

ـ7ـ

بعزّي عيالك.. بجبر الخاطر

بعرف أنا إنو القلب زعلان

بعزّي قبر بـ ضيعتي ناطر

قبر الحبيب الغايب بلبنان

ـ8ـ

مخاييل زوجك.. ما بقى صابر

قلّك تعي.. يا ام طوني لهون

نكفّي العمر بـ جنّة الرضوان

**

سيمون

إلى روح الوالد الشاب سيمون يونس

ـ1ـ

أمّك قالتلي: كتير زعلانه

ما ودّعت سيمون.. شو بقلّك؟

وخيي اللي متلك مات بكّاني

فكّرت خيي مات من تاني

وعارف إنت أهلي متل أهلك

ـ2ـ

أمك على التابوت مصلوبه

ودمعة ولادك دم مسكوبه

ومرتك إذا بتجنّ ما بتنلام

قالت: سيمون شوي حبّ ينام

هوّي الحبيب الـ زيّن دروبي

ـ3ـ

وبيّك بدر عتّم بـ هالغربه

تا تموت قبلو.. المسأله صعبه

لما الأهل بيودّعوا الأولاد

رح يغرقوا بسواد خلف سواد

وبيصرخوا: ما عدلت يا ربي

ـ4ـ

ويا مجدليا ودّعي هـ الشبّ

سيمون شيخ شباب وبينحبّ

خلّي الكنيسه تصمُد القربان

وخلي الأرز يبكي بجبل لبنان

هـ الشب يا ما حبّ أرز الرب

**

كمال

إلى روح الأم كمال ابي خطار

ـ1ـ

كان الجمال يغار من أم العيال

صار الجمال يئن ع فقد الجمال

لمن ع سيدني جيت كانت سفرتي

قهر وبكي.. وهموم أتقل من جبال

إلا وصوتك طل.. وسَّع ضحكتي:

ألبير خيّك رافقو.. وزيد الدلال

أيا دلال.. اليوم كرجت دمعتي

لمن بكي ألبير.. صابتني النبال

عرفتي اشتقت للأم.. صرتي ميمتي

عندك عطف أوسع من حدود المجال

يا أم أشرف خي شفتو بغربتي

خسرت امي الـ خلفتني بهالدني

مش حق تاني أم إخسر.. يا كمال

ـ2ـ

كفرفو ومجدليا ع فقدك ولولوا

غابت كمال الست والوج الحلو

يوسف تكي بلبنان أرض المرسلين

رسمك بـ دمع العين عم بيغسّلو

وصهيون.. هالإخوه الأحبه المؤمنين

من الصعب موتك، يا أخت، يتحمّلوا

هنيال قلبك ما التقالك مبغضين

عيالك بأخلاق الشهامه ترسملوا

مارك وغابي زائد إريكّا مع بولين

ما يوم ردتي هالرقاب يدندلوا

راسن وصل للأرض.. قلبُن شو حزين

حملوا صليب الجلجله.. الما أتقلو

وأحفاد.. خسروا ستّن الحضن الأمين

تابوتك على الكتف بدّن يحملوا

وحنا الحبيب الـ غاب من عدّة سنين

ناطر يشوفك بالسما..  ما أجملو

متل الملاك.. جناح بيضا مرفرين

وإنتي ملاك جديد عم يستقبلو

**

مرموره

كتبتها ليرثي بها ابن خالتي جوزيف زخور عمته وعرابته في كندا

ـ1ـ

يا عمتي وعرابتي زعلان

إخسر حنان الأم مرموره

بيتك حضنّا بعتمة الهجران

غبتي وبـ قلبي راسمك صوره

يا أرزة الـ مشتقلها لبنان

يا أم ندرت أقدس ندورا

صعبه اللي متلك يغمرو النسيان

مهما بعدنا بهالدني منضل

بلاطة القبر.. منرجع نزورا

ـ2ـ

ريمون مع سيمون مع جوزاف

إخوه إلي.. وبيار مع جانين

هالعيلة اللي إسمها منشاف

متل الزهور اليوم دبلانين

مين قال إنو اليوم رح أوقاف

وإرثي اللي غمرتني سنين سنين

يرحم ترابو زوجك المضياف

بُوسي عيونو بالسما.. وقولي

كل الأحبه اليوم زعلانين

**

طوني

الى روح ابن عمتي الحبيب انطوان جورج يموني

ـ1ـ

ليش الوجع عم يكتر علينا

وليش الدمع عشعش بـ عينينا

راحوا اللي كانوا زينة الهجران

انمحيت أسامي كتير حبينا

ماتت مَري وكلارك خيّا كْمان

ومرسال صوتو بقلب دينينا

واليوم طوني هالوحيد الـ كان

متل الفرح يركض حَوالينا

كتروا المصايب.. رجحوا الميزان

ولولا حنان الرب جنينا

وينك يا كرمه تحضني إنسان

زت الكرم ع كفوف إيدينا

ابنك وحيدك.. زهرة البستان

رايح لعندك.. خبّري الديان

بو الياس.. جوا القلب خبينا

ـ2ـ

مات الغيتار.. تقطعوا وتارو

وصوتك يا طوني انقطعت خبارو

كان الحكي يفرح بكلماتك

عصافير ع آخر سما طاروا

ابنك وحيدك حاضن بناتك

روسن انحنيت.. للأرض صاروا

ولينا الأمومه.. وهج ضحكاتك

داقت وجع ما بتعرف سْرارو

الدمع انقهر من دمع خيّاتك

متل الحريق بتشتعل نارو

بحلف يا طوني اليوم بحياتك

رسمك بقلب قلوبنا بيضل

ع قد ما سنين العمر داروا

**

موتك صليب

الى روح ابن عمتي الحبيب كلارك بعيني مؤلف موسوعة شربل بعيني بأقلامهم

ـ1ـ

يا كلارك قللي كيف رح خفّف نحيب

وموتك صليب تقيل.. وحياة الصليب

وراحيل يللي ضحكتا وسع الدني

ماتت الضحكه.. والدمع أحمر كئيب

ـ2ـ

ع الأخت قبلك كان ضهرا منحني

واليوم إنت.. وآخ شو موتك رهيب

قاسي ع أمّك هالدهر صاير دَني

قبّر ولادا.. والعمر صوب المَغيب

ـ3ـ

يا روزانا.. اليوم مدري شو بني

مات الحبيب.. الما انوجد متلو حبيب

مات الـ بعقلو كان أكتر من غني

مات اللي خلّدني بكتب.. مات الأديب

ـ4ـ

يا كلارك عمرك مش رح بقيسو بسنه

بقيسو بـ عيله تركتها.. بتفوح طيب

عشنا سوا.. تذكّر زمان الولدني

تاكل اللقمه.. وكنت تتركلي نصيب

ـ5ـ

ما في حدا متلك بـ مهجرنا بني

والد حنون كتير.. والأحلى نسيب

وهايْ مجدليا.. حالتا شو محزنه

من فوق منّا نكّسو ضهر القضيب

ـ6ـ

وقالت العدرا الـ بالورود مزيّنه:

هيدا حليبو كان من أشرف حليب

زعلت ع جار كنيستا.. الجار الهَني

مهما بعدت ما يوم بتعدّك: غريب

ـ7ـ

قدّيس عشت.. تركت عيله مؤمنه

خفّف عذابا شوي بالظرف العصيب

ما هم يفنى الجسم.. صيتك ما فني

رسمك بقلبي حفرت.. تا تضلك قريب

**

جميلة

رثاء الأم جميلة وجيه نادر 

ـ1ـ

جميله إسمها.. وكانت جميله

بحنان الأم عطيتنا متيله

خلفا عيال بتشرّف وطنّا

بأرض الهجر ربحولا جْميله

يا أم الكل قلبك شو تمنّى

حصلتي عليه.. والوزنه تقيله

لمّن غاب "بو ميلاد" عَنّا

كنتي مطرحو الأم الجليله

عندك كف جنّى وكف بنّى

سمحيلي كون ابنك بس مرّه

تا بكّي الشعر ع أمي جميله

ـ2ـ

إذا جوزاف إبنك غاب عنّي

بحس الوقت عم يغتال حالو

متل خيي.. قريب كتير منّي

خيالي دوم عم يمشي بخيالو

ومجدليا اليوم عنّه بضهر عنّه

الحزن بـ قلبها وسّع مجالو

ع أشرف ست.. يا ضيعان كنّه

الشرف بيعيش لو وقفت قبالو

مريم العدرا فتحت الجنّه

ومار الياس لفلفها بـ شالو

ـ3ـ

تا عزّي الأهل.. رح بلّش بـ حالي

يا أم الكل حبّك رأس مالي

تَرَكتي نسل ما بعمرو تفرّق

ببيت "النادر" الـ بيضلّ عالي

تَرَكتي حلم.. أكبر كنز حقّق

بـ هالوزنات عم تفرح جبالي

بعزّي عيال قلبُن شو تحرّق

أنا عيالك بـ هالغربه عيالي

يا أم ميلاد يا طهر المعتّق

ما في تابوت رح يقوى عليكي

ما في أم جسما صار بالي

**

جورج عون

الى روح ابن خالتي الحبيب جورج عون

ـ1ـ

بِكْيت عيالَك دَم ع حِلّو

وسوزان ركعت حدُّن يْصَلُّوا

ميشال بيَّك طلّ مع حنِّه

إِمَّكْ.. وفَتْحت بابْها الْجَنِّه

يا جورج.. خَلّي جْناحَك يْعَلُّوا

ـ2ـ

أَيُّوب كنتْ بْهالدني وما شْكيتْ

صار الوجعْ يِحكي.. وانتْ ما حْكيتْ

يا جسر أحلى بيت بِـ هالكون

يا جورج عون.. اليوم بدّي عونْ

موتَك رماني بالحزن.. تا بْكيتْ

ـ3ـ

جنْدي كنتْ.. وبْتِشْهد بلادي

إِنَّكْ بَطَلْ.. أوْ أَكْتَرْ زْياده

حْميتْ الشّعب، صنْت الوطنْ لُبْنانْ

حْملتْ الصليبْ.. غْرقتْ بالإيمانْ

تْنَعَّم يا جُورج بْجَنِّة الفادي

**

خالتي عاقلة

الى روح خالتي عاقلة زخور

ـ1ـ

آخر حبّات العنقود

يا بنت "جرس عبّود"

يا "خاله" حبيتا كتير

الدنيي متلا صعب تجود

يا "عاقله" لو فيي طير

من سيدني.. وع بلادي عود

تا بوس جبينك الكبير

وإزرع دمعاتي ع خدود

سهروا عليي طفل زغير

وعطيوني الحب بلا حدود

ببكيكي بعصر التعتير

بعصر "الكورونا" المرصود

مش رح صدّق هيك يصير

مفقود بيبكي مفقود

ـ2ـ

اشتقتي لبو يوسف زخّور

دخل عيونو أبو الميش

رحتي لعندو.. شع النور

من دونك ما فيه يعيش

موتك رح يحيي القبور

ملاك بلا جوانح أو ريش

حالف إني بيتك زور

صفّى بيتك قبر مزار

رح بيزورو هالختيار

ويوقف ع بابو درويش

**

طوني دريبي

ـ1ـ

مات طوني اليوم يا ربي

مليون حربه شكت بقلبي

كنت عدّو خي.. أحلى خي

إمشي معو وما ينتهي دربي

وصرنا سوا نقوى على الغربه

ـ2ـ

ما في شعر تا قول يا طوني

صفّى الشعر دمعات بعيوني

مات الحكي.. صار الحكي أحزان

وصرخات عم بتقلّق ظنوني

ب شوفتك كان القلب فرحان

أشرف صديق بعلّقو قونه

وحدشيت هالضيعه بجبل لبنان

زعلت وقت ما غبت عنها كتير

ولِكْ قوم شوفا اليوم مجنونه

ـ3ـ

وأنطوانيت الأم حزنا صار

تقل الجبل.. شعلِتْ ب قلبا النار

رفيق عمرا غاب متل البرق

متل الكذب صفّى العمر تذكار

بي العيال المات تارك حرق

ع جبين عيله مكلله بالغار

أولاد مع أحفاد ما في فرق

جنون الحزن ركّع كبار زغار

وبيار هالشمس البأعلى الشرق

رايح لعندو.. اشتقت تا تشوفو

ومن هيك إنت مسرّع المشوار

ـ4ـ

يا الكنت بيدر خير.. منبع للكرم

يا دريبي بتشهد عليك الهمم

مار مانوس لفّك بمشلح امان

المتلك صعب يتطاول عليه العدم

محفور ع بواب الكنايس: أنطوان

إسمك لمع بين المداين والأمم

كنت الصديق الكان أقوى من الزمان

لبنان رح يبكيك يا شيخ الوفا

ويمسّح دموع البكي بأشرف علم

**

عفيفة

الى روح الأم الحنونة عفيفة الشعار

ـ1ـ

محتار كيف بودّعك محتار

وإسمك "عفيفه".. وكنيتك "شعّار"

يا بنت "رومانوس كرم" ع طول

كنتي الكرم.. ومحبتك قنطار

ـ2ـ

"أنطوان" دمعو ع الخدود سيول

ضهرو انكسر.. ما في حدا بالدار

عيالك.. مشالله.. سوسحوا العقول

كبيرن.. زغيرن.. فوق راسو الغار

ـ3ـ

و"إيفا" الوحيده قلبها مجبول

بالحزن.. بالآهات.. دمعا نار

حزن البنت ع الأم مش معقول

خسرت أحن الناس.. عقلا طار

ـ4ـ

ولولا شي مره بدفترك منجول

منقرا قصص بتشرّف الأخبار

وبيضل ذكرك أجمل التذكار

**

يوسف ابي خطّار

إلى روح جاري وصديقي المرحوم يوسف أبي خطّار

ـ1ـ

جار كنت وهون بعدك جار

أصلك دهب مهما دولابك دار

سيدني ومجدليا إنتْ حبّيت

عطيتُن قلب بالتضحيّه جبّار

ـ2ـ

بعرف أنا شو عملت.. شو ضحّيت

تقعد معي وتفلفش الأسرار

حبّيتني.. وكل البشر حبّيت

خلفك أهل.. لا تخاف شو ما صار

ـ3ـ

ألبير.. هالشب الـ إنت ربّيت

خايف عليك كتير.. دمّو نار

لمّا اتصل فيّي.. أنا جنّيت

عمي مريض كتير.. عقلو طار

ـ4ـ

بعصر الكورونا والقهر حسّيت

رح إنفجر.. محبوس جوّا الدّار

وحدو البونا عبّود ع السكيت

يوديلنا التطمين بالأخبار

ـ5ـ

لأمنا العدر ركعت صليّت

والدمع ع الخدين عبّى جرار

بموتك يا يوسف ع البعد عزّيت

ألبير لازم بوّسو قنطار

ـ6ـ

يرحم ترابك ع الدني طليت

متل الشمس.. هيك بيجوا الكبار

متلك أنا بهالكاينه ما لقيت

بيكفي الإسم: يوسف أبي خطّار

**

مختارنا

إلى روح المختار الياس أبي خطار

ـ1ـ

بموتك أنا الخسران يا مختار

كنت متل البي تحميني

بوس إيدك.. حس ليلي نهار

تا أوصف الإحساس ما فيني

ـ2ـ

وتا نقول شي مرّه زماني جار

بضحكة أبوّه كنت تحييني

يا كبير.. يا تارك وراك كبار

من هالمحبه كنت تعطيني

ـ3ـ

فروسين قلقت.. طوّل المشوار

وقلبك ينادي: يا فروسيني

سآل البيادر.. ع الزعل شو صار

وليش الكنيسه مخزقه الزينه

ـ4ـ

وقبال بيتك عم بيبكي مزار

ويصرخ يا بو ناصيف ضوّيني

الناس اللي زعلوا بمجدليا كتار

ومتلن أنا زعلان واسيني

ـ5ـ

دموعي ع خدي نار تكوي نار

بصدري خناجر حزن داويني

عيالك عيالي.. الدار حد الدار

كبرنا سوا.. مش حق تنسيني

ـ6ـ

ميّة سنه.. حوّشت يا هالجار

وحدّك الميّه صعب تكفيني

موتك قتلني.. الموت شو غدّار

تا تعيش كنت بقدّم سنيني

ـ7ـ

بموتك أنا يا الياس بو خطّار

ما جيت إرثي وألف الأشعار

بدي حدا بهاليوم يرثيني

**

جوزفين

الى روح الأم جوزفين نادر يونس

ـ1ـ

مين قال قلب الأم رح بيموت

ولو ماتت وصار الحزن قنطار

جوزفين الـ زيّنت البيوت

وربّت عيالا.. والعمر مشوار

ـ2ـ

سيمون لمّن مات لفّا سكوت

وصار القلب ينده يا إبني انطار

جايي أنا من عتمة التابوت

تا بوسّك.. تا رجّع الأقدار

ـ3ـ

ومجدليا ضيعتي.. وبيروت

رح حلّفن بالأرز.. شو ما صار

يتذكروا اللي إسمها منحوت

بسيدني ع قبرا.. والحرف من نار

ـ4ـ

سيمون إبني من حجر ياقوت

مات شبّ زغير.. يا جبّار

اسمحلي، يا ربي، ع السما تا فوت

اسمحلي تا بوس الإبن ليل نهار

وتا ينام رح غني بيوت بيوت

عليي وع إبني باكيه الأشعار

**

أبو وليد

إلى روح الوالد طوني ساسين الكحيل

ـ1ـ

طوني يا طوني شفتك من جديد

لمّن زرت سيدني وغمرني العيد

فرحت فيك كتير يا بْن العم

بهالضحكة الْـ بتوزّع مْواعيد

ـ2ـ

مهموم كنت وشلت عنّي الهمّ

ولمّن سافرت غرقت بالتنهيد

ومرقت سنين وكنت فيها شمّ

أخبارك الحلوه وعنّي بعيد

ـ3ـ

واليوم جاني الموت متل السمّ

موتك قتلني.. بس مش رح زيد

يا دل إختك هون.. عم بتلمّ

دمعات حمرا.. لازما تبريد

ـ4ـ

ويا دل يوسف.. قلب أطيب عمّ

عم يحترق.. شو بيطلع بهالإيد

نيويورك سرقت ابن أشرف ام

لطوني الكحيل بيلبق التمجيد

ـ5ـ

مش حق عيله ع النعش تلتم

يا ما بوجودو غنّت زْغاريد

صار الدمع بالعين متل الدم

ببيتين شعر وكم صرخة آخ

يا بو وليد بودّعك يا بو وليد

**

راحيل

الى روح عمتي الحبيبة راحيل بعيني

ـ1ـ

يا عمتي وعرابتي خسرنا

حضن الأمومه الـ كان يغمرنا

متلك صعب تا تنوجد إمّات

أرزه عظيمه بفيّتا كبرنا

راحيل.. إسمك زيّن الكلمات

الإنجيل ذكرو.. وفضلك ذكرنا

ع غياب بنتِك نشفت الدمّات

لمّن تعترتي.. تعتّرنا

ـ2ـ

وع كلارك يقبرني أبو الهمات

بكيتي.. تمرمرتي.. تمرمرنا

يا آخر الحبّات بالكرمات

العنقود فرفط ع بيادرنا

من بولس لباخوس أبو الشامات

وجورجيت مع كرما بـ مهجرنا

وبطرس الخي الْـ في إلو علامات

تا يطل بالضحكه ياما نطرنا

وطوني اليموني وسحر نغمات

ع رنّة الغيتار سهّرنا

وهلّق بموتك غابت النجمات

ومتل اليتامى بهالدني صرنا

ـ3ـ

لأمي وبيي ببعت سلامات

لمرسال هللي مات أزغرنا

قوليلهن عم تنحني القامات

ومن لوعة الأحزان ختيرنا

يا عمتي.. يا زينة العمّات

رح إحسد عليكي مقابرنا

شحدنا الدمع من أبعد الغيمات

لو تسألي عيون الأهل بتقول:

الدمعه الأخيره بموتك عصرنا

**

راهبة

إلى روح كل راهبة خسرتها الجالية

ـ1ـ

يا جاليتنا.. اليوم شو صابك؟

نخّ الجبل من قوّة مصابك

هالراهبه اللي عمّرت الحجار

إسما انحفر ع عتبة بْوابك

بنت المحبه.. بنت هاك الدار

الخلاّ القداسه تبوّس ترابك

بصفوف حبّا علّمت الزغار

وتخرّجوا من صفوفها شبابك

ـ2ـ

مين البني هالصرح بالهجران

وخلاّ الطفل يعبد اسم لبنان

هديتا العمر.. صار العمر فرحان

وقلبي بينبض نبضة الرهبان

كيف ما حكت.. تزرع صلا وايمان

كيف ما مشت.. يمشي معا البنيان

تآخيت معها من قديم زمان

ومحروم صوت الاخت يا اخوان

ولهالسبب وحدي أنا الخسران

**

راحت سليمة بعيني 1987

ـ1ـ

يا مجدليا الدمع ع خدودك رسم

صورة عذابك بعد ما الحق انظلم

من كم يوم الأم نويت ع الرحيل

راحت "سليمه" وضل بالصدر الألم

ـ2ـ

يا عيلة الوقفت بوج المستحيل

وقفة بطل جبّار مرفوع القيَم

مهما قلت بالشعر رح يبقى قليل

يا بيت "يوسف الياس" بجاه الإله

بتضل تفقر حصرمه بعين العدم

**

جوزيف فاخوري

ـ1ـ

يا مار يوسف وسّع الأحضان

جوزيف فاخوري رحل عنّا

من الصعب يخلق متل هالإنسان

ضمّو ع صدرك فوق بالجنَّه

ـ2ـ

جوزيف قلبو نبع للإيمان

وبمحبتو ع طول نتهنّى

كيف رح عزّي الوطن لبنان

وبغربتو بالأرز يتغنّى

ـ3ـ

بعزّي العيله الشبّعا تحنان

وإلاّ بإسمو ما بتتكنّى

جوزيف فاخوري صعب تا يموت

قديس صعبه ينتهي بتابوت

ربوع السما "زوزو" بتستنّى

**

امرأة خالي

يا مرت خالي الحزن بكّاني

ع خيّ صعبه ينوجد تاني

وهلق خسرتك يا حنونه وصرت

اندب لحالي بعتم هجراني

ع مين إبكي، يا أليس، احترت

راحوا الأحبه ومرمر زْماني

كنتي الأمومه البالشعر عطّرت

واليوم بكيت دم قصداني

قولي لخالي بالقلب مسمرت

إسمو.. تا يبقى الاسم إنساني

يا مرت خالي بالهجر ختيرت

وبعدك بـ عيني ملاك ربّاني

مع ولادك والبنات كبرت

عيلة قداسه بحب منصانه

عليكي وع خيي من القهر هسترت

بيوم واحد هالخبر جاني

بركان دمعي بالهجر فجّرت

كترت عليي كتير أحزاني

**

الى روح الجار ريمون ايليا

ريمون يا ريمون ممنونك

شفت المحبه بنظرة عيونك

يرحم ترابك كنت أعظم جار

من الصعب إقدر رجّع ديونك

خمسين سنه مرقت كأنّا نهار

عمدتها بشلال ميرونك

و"سيده" الحنونه قلبها محتار

صعب تمشي العمر من دونك

موتك قهرها صب فوقا النار

وحدشيت عم تبكي عليك جرار

جوات قلبا حلفت تصونك

**

ميشال عيسى

إلى روح الصديق الغالي المرحوم ميشال الياس عيسى

 ـ1ـ

ميشال عيسى كان أحلى رفيق

عشنا العمر خيين متحدين

ليالي فرح حوّل ليالي الضيق

وضحكة شفافو زهر البساتين

ـ2ـ

مات بعمر يسوع

ونشفت ع خدي دموع

مش حق إبكي ملاك

بس القلب موجوع

ـ3ـ

بعزّي لوسيا الربتو والياس

بيّو.. عطانا الحب زوّاده

ولمّا ع سيدني وصلت.. مر الكاس

شربتو أنا ع فرقة بلادي

بخزانتي مكاتيب ما بتنقاس

الشوق فيها بيوت قرّادي

صار الشعر بيناتنا نبراس

نبكي سوا ونتضحّك زياده

ـ4ـ

وميشال عيسى صار

حلم.. أو تذكار

مات وبقي بالقلب

وشعلت بقلبي النار

**