فنّان

صورة الغلاف: شربل بعيني في مشهد تمثيلي عام 1969 مع الراحلة لورانس كحيل

Charbel Baini

Fannan

Singer

**

مقدمة

   ما أن داست قدماي أرض أستراليا الغالية، حتى اصطحبني أحد الأصدقاء إلى حفلة خيرية، أول ما لفتني بها عريف الحفلة، فلقد كان يقدّم الفنانين والفنانات بطريقة سطحية بدائية مضجرة جلبت النعاس لعينيّ.

   وكان صديقي هذا يعلم مدى قدرتي على تقديم الحفلات، بعد أن حضر لي حفلة كنت قد أحييتها في بلدتي مجدليا عام 1970 لدعم مشروع بناء المقابر، وأدخلت اليها التقديم الشعري لأول مرة في لبنان. فما كان منه إلا أن أخبر رئيس الجمعية الخيرية بمواهبي الشعرية المتعددة، فطلب مني أن أقدّمه شخصياً بعد نصف ساعة، غير عابىء بتوسلاتي، خاصة وأن هناك عريفاً لحفلته لا يجب أن أتحداه في عقر داره.

   وما أن قدّمته بعدة أبياتٍ شعرية، حتى التهبت القاعة وتغيّر الجو بتاتاً، وراح يقبّلني على المسرح، بينما راح عريف حفلته ينقرني من على طاولته بحبوب الفستق دون أن أنبس ببنت شفة مخافة أن أسبب بخراب الحفلة.. وللتاريخ أذكر أن هذا العريف المسكين قد رماني بالفستق ومشتقّاته في حفلة أخرى بعد عشر سنوات تقريباً، واعذروني إذا لم أذكر اسمه احتراماً لشيبته الآن.

   وهكذا بدأت رحلتي مع التعريف في أستراليا، حتى لم يبق متعهد حفلات إلا وتعاقد معي قبل أشهر لتقديم حفلته، فلقد كانت دهشة الجمهور والفنانين والفنّانات عظيمة وهم يستمعون إلى شاعر شاب يقدّمهم بطريقة شعرية راقية ومختلفة تماماً عمّا ألفوه في السابق.

   وقد تتعجبون إذا أخبرتكم أنني لم أتقاضَ سنتاً واحداً عن أية حفلة قدّمتها، فلقد كنت أرفض بتاتاً، حتى الهدايا، مخافة أن أتهم ببيع موهبتي الشعرية.

   كما انني، وهذه حقيقة ساطعة، كنت أول من أدخل التقديم الشعري المدروس إلى برامج الحفلات، رغم كثرتها، إذ أنني قدمت المئات منها، دون أن أكرر أشعاري.. فلقد كنت أعطي لكل حفلة قصائد جديدة، تلهب الأكف وتدمع العيون.

   وكيف أكرر شعري، وقد كان المطربون والمطربات يحفظون الأبيات التي أقدمهم بها عن ظهر قلب.. فإذا قدّمتهم بواحدة قديمة، لاموني أشد اللوم، لا بل أن إحدى الفنانات اتهمتني بأنني قدّمت زميلتها بما قدّمتها به، ولم تقتنع إلا عندما أعطيتها الأبيات الشعرية مكتوبة على منشفة ورقية، كونها لم تكن ضمن البرنامج الذي أعطي لي من قبل، بل دخلته فجأة، وكان ما كان.

   المؤسف حقاً، أن قصائد كثيرة ضاعت مني، كوني لم أعرها اهتماماً أدبياً إلا بعد أن طالبني الأستاذ جوزيف بو ملحم بنشرها في زاوية (ستوب) التي كنت أكتبها أسبوعياً في جريدته (صدى لبنان)، وبعد أن سمعت بأذنيّ عريفاً آخر يقدم البرنامج الفني بأشعاري دون ذكر اسمي، فقررت أن لا أضيّع ما تبقى من هذه (التقديمات) الصادقة، التي تؤرّخ لفننا المهجري، وتطلع القارىء على أسماء فنية، قد لا يكون قد سمع بها، ولا في أية سنة حلّقت.. خاصة وأن هناك من اعتزل أو رحل.

   في الطبعات السابقة قسّمت (تقديماتي الفنية) إلى كتابين، كتاب أسميته (بلابلنا)، ويحتوي على قصائد قدمت بها فنانين مهجريين، والثاني (فنّان)، ويحتوي على ما تبقّى عندي من قصائد قدمت بها فنانين لبنانيين أمثال وديع الصافي، صباح، ملحم بركات، جوليا بطرس، بسكال صقر، وائل كفوري، طوني حنا، يوسف رحمة وغيرهم وغيرهم. وها أنا أرمي الكتابين في كتاب واحد بين أيديكم كي أخفف من عناء البحث. أرجو أن ينال إعجابكم.

شربل 

**

رسالة من الفنانة

وفاء صدقي

   ماذا أكتب إليك إيّها الانسان الحساس؟

   ماذا تكتب وفاء صدقي الملحنة التي تعصر أحاسيسها أنغاماً، لتصوّر الكلمة، وتعيش مع أحاسيس كاتبها؟

   ماذا أكتب أيها الشاعر الفنان؟

   ماذا أكتب لمن كتب:

جايي إنت جايي

يا مركب البدايه

من أحلام ولاد

خلقوا بقلب حكايه

ما بتعرف نهايه

تا يعيشوا ببلاد

مراجيحا بالعالي

ونجوما دوالي

وسنينا أعياد

   ماذا أكتب لمن ثار على الطغيان وتجار الأديان؟

   ماذا أكتب لشلال الشعر المتدفّق، والكلمة الحساسة والصوت الداوي؟

   ماذا أكتب، إن لم أكتب بكلماتك، يا من أتيت من بلد الحرائق، "بنور وعطر وزنابق"، فكانت كلماتك في بلاد الاغتراب سياطاً على أعناق المدعين والمتاجرين بالكلمة؟

   ماذا أكتب أيها الصديق لأشكرك على هديتك القيّمة، مجموعتك الشعرية، وعلى روحك الشفافة المحلقة أبداً في سماء أرض أحرقها الحقد، ودمرها الطغيان، تطفو على صفحات كتبك؟

   ولكن، أقول لك بكلماتك: أعدني يا شربل بعيني أن تبقى الصوت الداوي حتى يعود لبنان موحداً، ورايته تعلو وتخفق، وترفرف في سماء بلادنا الأم.

   وأسألك أن تتقبل مني كل المحبة والتقدير والاحترام لشخصك ولكلماتك. مع تمنياتي أن تبقى الشلال المتدفّق بالأحاسيس، والكلمات المصوّرة بصدق للألم والحب والواقع، بكل ما فيه من حزن وفرح متعالياً عن كل ماديات الكون.

   وفقك الله، وإن كانت بداية الغيث بيننا ثلاث قطرات هي:"تغرّبوا" و"هالقصّه" و"يا جدّي"، فلن يقف السيل عند هذا الحد، والقطرة الرابعة "جايي"، وسيكون فيها قطرات من روح وفاء، وقطرات من شفافية شربل بعيني.

   مع تقديري ومحبتي

البيرق، العدد 188، 13/3/1990

**  

وطن واقف على المسرح

 الفارق بين أديب وأديب، أو شاعر وشاعر، هو أن الأديب الحق، والشاعر الحق، يتخذ من المناسبة ـ أي مناسبة ـ فرصة ليقول ما يريد، شاحناً إياه بتلك المعاناة الوطنية والانسانية التي تزخر بها روحه، فتتحوّل كلماته الى أمثال أو أغانٍ ترددها الأجيال.

   أما ما اتفق على تسميته بأدب أو شعر مناسبات، فهو مجرد ألفاظ بغير روح، مجرد مدح أو هجاء أو تزلف أو حقد، ما أن يخرج من فم الأديب أو الشاعر حتى يتلاشى مع موجات الأثير.

   قدوم فيروز الى أوستراليا كان مناسبة معيّنة، لكن خيال الشاعر شربل بعيني، جعل منها مناسبة وطنية للدعوة الى وحدة لبنان الممزق المشلع، وأدرك انه لم يبقَ من وحدة هذا البلد سوى "فيروز" فقال رائعته "فيروز كوني أمنا":

فيروز..

يا فيروز كوني أمّنا

غدر الزمانُ بأمّهاتِ أمِّنا

وافترقنا في بداية حلمنا

نلعقُ الساعات

ننحر يومنا..

   وتأتي "باسكال صقر"، وهذه مناسبة محددة أيضاً، لكن خيال الشاعر شربل بعيني جعل منها "وطناً واقفاً على المسرح":

هيي اللي حملت إسم

ملوى الكون

هيي اللي خلّت شعبنا يفرح

رجعنا لوطنّا

بس غنِّتْ هونْ

صارتْ وطنْ واقف

على المسرح

   وأظن أن هذه العبارة ستذهب مضرب مثل يقال لكل فنان أو فنانة يعكسان آلام الوطن وعذابه ان بالصوت أو بالقول. وقد اصطاد الاستاذ جوزاف بو ملحم بحسّه الصحفي المرهف هذا البيت، وجعله عنوان تغطية تلك الأمسية.

   تباركت مثل هذه المناسبات التي تعطينا مثل هذا الأدب، وليخرس النابحون الذين يتلطون وراء عبارات "شعر المناسبات".

كامل المر

صدى لبنان، العدد 589، 92/3/1988

**

أوتار

لمّنْ صابيعو عَ الوْتار بْيِلْعَبُوا

قصّة رَحيل شْعوبْنا عَم يِكْتبوا

النّغمات تِسْألْ والقلوب تْعيدْها

لَوْلا الْغُرْبه جَرّبوا.. ما تْغَرَّبُوا

**

فنّان

ـ1ـ

الْفَنّْ.. تِخْلُطْ حُبّ بِشْوَيِّةْ عَذابْ

وِتْرِشّ فَوْقُنْ كِلّ ضِحْكَات الْهَوَا

وِتْقِصّ مِنْ دُونْ خَوْف مَشْنِقْة الْغِيابْ

وْتِعْزُمْ شَمْس عَ الأَرْض تَا يْعِيشُوا سَوَا

ـ2ـ

الْفَنّ.. إِنّو تْكُونْ أَكْبَرْ مِنْ خَيَالْ

مِنْ كمْ كِلْمِه بْيِنْعِجِقْ فِيها السُّؤَالْ

تَا تْصِيرْ إِيدَكْ سَيْف تِقْضِي عَ الْخَطَرْ

تَا يْصِيرْ صَوْتَكْ رِيحْ.. وِدْمُوعَكْ مَطَرْ

تا تْصِيرْ إِنْت الْـ كانْ وِالْبَدُّو يْكُونْ

تْرَبِّي صَفَاوِةْ بَالْ بِـ حضْن الْجُنُونْ

وْمِنَّكْ وْفِيكْ بْيِنْعَمُوا كلّ الْبَشَرْ

ـ3ـ

شْقَاعْ الْحَكِي مِدْماكْ.. حَكْيَكْ إِنْتِصَارْ

وْلَوْلا جْبِينَكْ ما انْوَجَدْ إِكْلِيلْ غَارْ

بْتِنْقُلْ وَطَنْ عَ مَسْرَحَكْ

وْبِتْضَلّ وَاقِفْ مَطْرَحَكْ

وِكْتَارْ هَللِّي بْيَعِرْفُوك كْتارْ

كِلِمْتَكْ إِنْذَارْ

شُهرتَكْ مِنْ نارْ

وْطَلّتَكْ.. بَاقِةْ وَردْ بِتْسَوْسِحَكْ

لَكنْ عَذَابَكْ.. لِلْكَمَال.. بْيِفْرِحَكْ

وْضِدّ هَجْمات الْغُرُورْ مْسَلّحَكْ

وَحْدُو غُرُورَكْ بَسّ.. قَادِرْ يِدْبَحَكْ.

ـ4ـ

فَنّانْ إِنْت.. الدَّمّ عَ شْفَافَكْ

وِالإِضْطِهاد مْخَزَّقْ لْحَافَكْ

بْبَيْتَكْ إِذَا بِتْنَامْ

بِتْقَلّقَكْ حُكَّامْ

رِكْبِت سْنِينْ الْعُمْر عَ كْتَافَكْ

إِتِّحادَكْ صَوْتْ

وِانْشِقَاقَكْ مَوْتْ

حِطّ إِيد بْإِيدْ

حَيِّكِلْنَا مْوَاعِيدْ

وْلا تْخَافْ مِنْ طاغُوت بِيخَافَكْ

وْمِنْشَانْ يُوعَى الْعَالَـم مْنِ جْدِيدْ

وِتْصِير أَنَّاتْ الْبِكِي زْغَارِيدْ

عَلِّقْ عَ صَدْر الْمَوْج مِقْدَافَكْ.

**

شفت الصّبية

أول تقديم شعري كتبته عام 1970، وقدّمت به الفنان المرحوم الياس المقدسي في بلدتي مجدليا.

شِفت الصَّبِيِّه نَايْمِه فَوْق الْحَرِيرْ

قَلْتِلّها: يا بِنْت أُوعَا تِنْعَسِي

مِنْ بِلاد الْفَنّ جَايِيكي أَمِيرْ

صَوْتُو حلُو وْنَقْراتْ عُودُو مْقَدّسِه

قَالِتْ: شُو إِسْمُو؟ وِاسْتَحِتْ، قِلْتِلّها:

لا تِسْتِحِي مْن الْياسْ حَنّا الْمِقْدِسِي

**

أوف.. من عنَّا

قدّمت بها الفنان طوني حنا في إحدى الحفلات التي أحياها في سيدني.

ـ1ـ

عَ وْتَارْ صَوْتُو تْمَرْجَحِتْ أَطْيَارْ

وْبِحْرُوفْ إِسْمُو حَرفْنَا تْكَنَّى

جَنِّةْ نَعِيم وْنِعْمِتُو قِنْطَارْ

تْنَعَّمْ بِفَنُّو كْتِيرْ مَوْطنَّا

ـ2ـ

خَلاَّ الْعَاصِي يْبَيْعِد الْمِشْوَارْ

وْيِنْبَعْ بِسَحْبِةْ أُوفْ مِنْ عِنَّا

وِبْعَلْبَكْ اللِّي تَاكْيِه عَ حْجَارْ

تِقْعُدْ مَع التَّارِيخْ تِسْتَنَّى

ـ3ـ

مَوَّالْ.. فَجَّرْ مَوْهَبِةْ شِعَّارْ

وْصَابِيعْ بِالنَّغْمَاتْ تِتْحَنَّى

وِجْبَيْل يَللِّي فَنّهَا زِنَّارْ

جَايِي يْزَنِّرْ هَـ الدِّنِي بْفَنَّا

ـ4ـ

وِضْيَاعْنَا الْـ فِيهَا الشَّوْق غْمَارْ

بِقْلُوبْ.. رَجْعِتْنَا بْتِتْمَنَّى

كِيفْ جَمَّعْ شَوقْهَا.. بْتِحْتَارْ

بْكِلْمَات لِمِّنْ صَاغْهَا تْأَنَّى؟!

ـ5ـ

جَايِبْ مَعُو مْنِ الشُّوفْ إِكْلِيلْ غَارْ

وْبِزْهُورْ زَحْلِه الْبِيضْ زَيَّنَّا

وْمِنْ أَرْز بَعْدُو مَنْبَت الأَحْرَارْ

حِمْل الْبُطُولِه لَحْن جَنَّنَّا

ـ6ـ

مْنِ طْرَابْلُسْ.. مِنْ إِهْدِن وْعِكَّارْ

عَ صَوْت دَقِّةْ قَلْب دَوْزَنَّا

وْدَوْزَنْ أَغَانِي جَمْعِتْ الأَشْعَارْ

مْنِ جْنُوب جَنَّى.. مِنْ جَبَلْ بَنَّى

ـ7ـ

وْمِنْ أَرْض عَمْ يِحْصُدْ شَبَابَا الْعَارْ

بْبَيْرُوتْهَا.. شِعْلِةْ أَدَبْ كِنَّا

جَايِي وْجَايِبْ سِلْم يِطْفِي النَّارْ

بْأَنْغَامْ فِيهَا الْهَجْر يِتْهَنَّى

ـ8ـ

وْلَوْلا شِي مَرَّه اللَّيْل صَفَّى نْهَارْ

لا تْقُولُوا: الشّمْس مَرْقِتْ بِالْغَلَطْ

قُولُوا: مَرَقْ طُونِي إِبِنْ حَنَّا

**

يا حْدَيْ

قدمت بها الفنان طوني حنّا

ـ1ـ

هَلّ الْقَمَرْ.. أَيَّا قَمَرْ بِيهِلّْ

وْمَا بْتِرْقُص الزَّهْرَاتْ بِالسَّلِّه؟!

عُشْب السَّوَاقِي بِالسَّوَاقِي غَلّْ

لِـمْ نَخِّت الأَنْوَارْ تَا تْمَلِّي

ـ2ـ

ضَوَّى الْجُردْ.. شَاف الْجُردْ مُحْتَلّْ

بْأَنْغَامْ.. حَدَّا بْتِفْرَح الْقِلِّه

وَدَّى الشّرُوقِي.. سَيْف عِزُّو سَلّْ

وْوَدَّى الْعَتَابَا تْحَرِّر التَّلِّه

ـ3ـ

إِبْن الأَرزْ.. وَزَّعْ فَرَح عَ الْكلّْ

جَايِي وْجَايِبْ أُوفْ بِتْصَلِّي

أَوْتَارْ صَوْتُو مْدَوْزَنِه بِتْضَلّْ

يَا نَغْمِتُو.. بِقْلُوبْنَا ضَلِّي

ـ4ـ

وْيَا "حْدَيْ".. دَخْلَكْ كِيفْ بَدّنَا نْمِلّْ

وْشِرْوَالْ جدُّو مْسَيْهَر الشِّلِّه؟

وْكل مَا خَطَرْ عَ بَالْنَا مِنْدِلّْ

صَوْب الْبَحْر.. يَا بْحُورْنَا قِلِّي

ـ5ـ

وْبِـ هَجِرْ.. خَلاَّ عْقُولْنَا تِنْشَلّْ

كِرْمَالْ عَيْنُو انْقَطْفِت الْفُلِّه

وْطَلُّوا الْحَبَايِبْ.. يَا قَمَرْنَا طِلّْ

انْطَرْنَا سْنِين سْنِينْ هَـ الطَّلِّه

**

مارد.. ع المسرح

نشرت عام 1993، إثر النجاح الذي حصدته مسرحية (كذّاب تحت الطلب) للفنان أنطوان كرباج. والجدير بالذكر أن الفنان كرباج كان قد اختار تلميذتي أنطوانيت خوري لتلعب دور ابنته في المسرحية.

ـ1ـ

دُورِي.. مِنْ دُورِيتْ الضَّيْعَه

جَايِي وْجَايِبْ صَوْتَك حُلْمْ

خَلِّينِي إِحْلَمْ عَ الْبَيْعَه

وْحَوِّشْ مِنْ "كِذْبَاتَكْ" سِلْمْ!

ـ2ـ

يَا كِرْبَاجْ.. بْلادِي بْعِيدِه

رَجِّعْلِي عِزِّي الْمَهْدُورْ

صَوّرْلِي بْضِحْكَاتَكْ عِيدِي

خَرْطِشْلِي أَيَّامْ جْدِيدِه

تْعَتِّقْ بِالطَّلاَّت نْبِيدِي

وِتْزَوْزِقْ عُمْرِي بِالنُّورْ!

ـ3ـ

حِبَّيْتَكْ.. مَارِدْ عَ الْمَسْرَحْ

إِنْت تْطِلّ.. وْنِحْنَا نِفْرَحْ

تِكْذُبْ.. وِبْكِذْبَاتَكْ نِسْرَحْ

يَا الأَصْدَقْ مِن كلّ الْـ حِكْيُوا

يَا دَمْعِةْ أَحْبَابِي الْـ بِكْيُوا

زِيدْ الْكِلْمَاتْ اللِّي بْتِجْرَحْ

بْدِرْهَا تَحْت جْرَيْن الْـ بِقْيُوا

تَا يِبْقَى لِلْغَايِبْ مَطْرَحْ!

ـ4ـ

عِنْدِي وْصِيِّه.. لا تِنْسِيهَا

أَنطْوَانِيتْ تْوَصَّى فِيهَا

فنَّانِه رِبْيِتْ بِالْمَهْجَرْ

يَا بَيّ الْـ كِبْرُوا.. رَبِّيهَا

إِنْت الأَصْل.. وْنِحْنَا مْنِفْخَرْ

بْطِفْلِه.. مَا نِسْيِتْ مَاضِيهَا

حلْوِه.. وْيَا سُبْحَان الْـ صَوَّرْ

كل شِي فِيهَا بِيحَلِّيهَا!

ـ5ـ

يَا إِسْتَاذ الْفَنّ الْبَاقِي

غِنِّيِّه.. عَ شْفَاف الْكلّْ

بَلِّغْ مَارِينَا أَشْوَاقِي

وْقِلاَّ: رَاسِمْهَا عَ وْرَاقِي

فُلِّه.. وْحَدَّا بَاقِةْ فُلّْ

ـ6ـ

وِالتَّقْلاَ.. اللِّي بْتِسْوَى تِقْلاَ

عِجْبِتْنِي.. شَطُّورَه كْتِيرْ

مْوَاسِمْهَا.. أَكْبَرْ مِنْ حَقْلاَ

طَوِّبْلاَ شِي حَقْل كْبِيرْ!

ـ7ـ

وْقِلِّي لأَمِيلْيَا بُو صَالِحْ:

نَطِّتْهَا.. خَلِّتْنَا نْنطّْ

بْقَلْبِي رَحْ وَسِّعْلاَ مْطَارِحْ

لا تِفْزَعْ.. قَلْبِي بِيمِطّْ

ـ8ـ

رْجَال الْفِرْقَه كلُّنْ كَانُوا

أَكْبَرْ مِنْ زَقْفَات النَّاسْ

فنَّانِينْ.. بْفَنُّنْ صَانُوا

أَرْضِي وْعَرْضِي بْدُون قْيَاسْ

إِسْمُنْ.. مَجْدُولِه خِيطَانُو

عِزُّنْ.. مَرْفُوعَه حِيطَانُو

وْفَنُّنْ.. مَا أَرْوَعْ بُنْيَانُو

أْسَاسَاتُو: حُبّ وْإِحْسَاسْ.

**

ودّي يا صوتي ودّي

قدّمت بها الفنانة عايدة أبو جودة في إحدى الحفلات التي أحيتها في سيدني عام 1990.

ـ1ـ

وَدِّي يَا صَوْتِي وَدِّي

وْمَحِّي غُرْبِه مِسْوَدِّه

رَحْ يِخْلَصْ لَيْلِي الطَّوِيلْ

وْعَنْ رُوحِي تْرُوح الشِّدِّه

ـ2ـ

وْرَحْ خَلِّي الزَّهْرَات تْمِيلْ

جَايِي مْنِ بْلادِي "وَرْدِه"

رِيحِتْهَا بَخُّور تْقِيلْ

مْعَتَّقْ بِلْيَالِي جُرْدِي

ـ3ـ

أَلْوَانَا غَزْل قْنَادِيلْ

فِيهَا الدِّنْيِي بْتِسْتَهْدِي

وْبِتْطَيِّرْ حَوْلا زْغَالِيلْ

سِلْم وْخَيْر وْمَوَدِّه

ـ4ـ

انْ غَنِّتْ.. بِتْجِنّ مْوَاوِيلْ

وْرَدِّه بِتْسَابِقْ رَدِّه

وْمِنْ سَحْبِةْ "أُوفَا" مِنْشِيلْ

نْبِيدْ مْعَتَّقْ مَاوَرْدِي

ـ5ـ

بْتِرْقُصْ عَ شْفَافَا تْرَاتِيلْ

وْمَا بْتِتْعَبْ صَرْلاَ مُدِّه

"وْفَوْزِي" بَدُّو الْمُسْتَحِيلْ

وْهِيِّي تْقِلُّو: مَا بَدِّي

ـ6ـ

زَوْجِي مَحْبُوب وْزَنْكِيلْ

قِدَّامُو صَعْب تْهَدِّي

وْأَنَا مْنِ الشَّعْب الأَصِيلْ

الأَغْلَى مِنُّو مَا عِنْدِي

ـ7ـ

لُبْنَانِيِّه.. سْآلْ النِّيلْ

"أَحْلَى مْنِ الزَّنْبَقْ قَدِّي"

وْمَهْضُومِه.. وْخَدِّي جَمِيلْ

"أَنْعَمْ مِنْ قَمَر الْوَرْدِي"

ـ8ـ

فَنَّانِه.. انْ صَاحِتْ: يَا لِيلْ

عِدِّي يَا عْيُونِي عِدِّي

دْمُوع الْكَمَنْجَه بِتْسِيلْ

وِالدِّرْبَكِّه بِتْنَدِّي

ـ9ـ

بْرِنْسِيسَه.. زِيد التِّبْجِيلْ

وْلا تِسْأَلْ.. إِسْمَا مَشْهُورْ

وِبْيِعْبُدْ صَوْتَا الْجُمْهُورْ

هَيْدِي "عَايْدَه بُو جَوْدِه"..

**

ملحم.. بسّ

قدّمت بها الفنان ملحم بركات في بعض الحفلات التي أحياها في سيدني عام 1989

ـ1ـ

زَقّفُولُو.. وْكَبّرُوا الزَّقْفِه

السَّهْرَه اللَّيْلِه كْتِيرْ مُخْتِلْفِه

فَنَّانْ مِتْلُو مَا خَلَقْ أَللَّـه

انْ صَاحْ "أُوفْ".. الأُوفْ بِتْكَفِّي

ـ2ـ

بْتِطْرُبْ شَعبْ كَاس الْهَجرْ تَلاَّ

وْعَمْ يِشْرَبُو شَفِّه وَرَا شَفِّه

فَنَّانْ.. عَ وْتَارُو النَّغَمْ صَلاَّ

وْعَبَّى اللَّيَالِي نْجُومْ لِلشِّفِّه

ـ3ـ

غْنَانِيهْ عَ شْفَاف الدِّنِي كِلاَّ

وْبِالشَّرْق وَحْدُو دَايِر الدَّفِّه

خَلاَّ الْمُوسِيقَى تِرْقُص.. وْخَلاَّ

النَّار الْـ بِقَلْب قْلُوبْنَا تْطَفِّي

ـ4ـ

وْأَحْبَابْ عَ دْرُوب الْفَرَحْ دَلاَّ

وْلَوْلا حَنَانُو وَيْن بِتْصَفِّي

وْصَرْلاَ سْنَينْ.. الْحَرْب تِتْسَلَّى

بِبْلادْهَا.. وِشْعُوبْهَا تْصَفِّي؟!

ـ5ـ

يَا شِعرْ بِالْهُجْرَانْ شُو بْقِلاَّ

عَنْ فَنّ شَرْقِي مَا انْوَجَدْ صِدْفِه

كْرُومُو مْوَاسِمْ خَيْر عَ حِلاَّ

وِبْكِلّ لَحْظَه بْتِحْرُز الْقَطْفِه؟!

ـ6ـ

بْقِلاَّ: بْصَابِيعُو كَانْ يِغْزِلاَّ

نَغْمَاتْ عَ الآلاتْ مِصْطَفِّه

بْقِلاَّ: بْدُونُو الأَرْضْ يَا دِلاَّ

كِلاَّ وْكِبْرَا بْلاَ وَتَرْ.. نِتْفِه

ـ7ـ

بْقِلاَّ: عْرُوش الْفَنّ مِحْتَلاَّ

هُوِّي اللَّحنْ وِالصَّوْت وِالْكِلْمَاتْ

وِالْمِيجَانَا وِالأُوفْ وِالْهَيْهَاتْ

وِانْ قِلْتْ: مِلْحِمْ بَسّْ.. بِيكَفِّي

**

فرح الشرق

قدمت بها الفنان ملحم بركات، 1989

ـ1ـ

تْرَبَّى اللَّحنْ وِالصَّوْت عَ إِيدَيْهْ

وْشِرْبُوا الْقَصَايِدْ مِنْ دَمعْ عِينَيْهْ

وْصَارْ السَّهرْ.. عَ قَدّ مَا سِهْرُوا سَوَا

يْطَرْطِشْ نِدِي.. وْيِشْلَح نْجُوم عْلَيْهْ

ـ2ـ

وْفِرح الشَّرقْ لِمِّنْ خِلِقْ فَنَّانْ

بْيِمْحِي بْصَوْتُو غُرْبِة الإِنْسَانْ

وَدَّاهْ عَ سِيدْنِي سَفِير كْبِيرْ

حَامِلْ مَعُو.. بْدَال الْوَطَنْ.. أَوْطَانْ

ـ3ـ

مَارِدْ.. مَا بَدُّو الإِغْتِرَاب يْزِيدْ

وِيْعَشْعِش غْرَاب الضَّجَرْ بِبْلادْ

لِمِّنْ عِرِفْنَا نَاطْرِين الْعِيدْ

جَايِي تَا يِزْرَعْ هَجِرْنَا أَعْيَادْ

ـ4ـ

وْكِلّ مَا ضِعْنَا عَلَى دْرُوب الْحَيَاةْ

وْصَار الْحَكِي بَيْنَاتْنَا يْخَاطِرْ

بْتِحْكِي صَابِيعُو لِلْهَنَا حْكَايَاتْ

وْوَحْدُو عَ مَفْرَقْ حُبّنَا نَاطِرْ

ـ5ـ

تْفَيَّا الْمَجدْ بِـ فَيِّة كْفُوفُو

وَقْت اللِّي غَنَّى وِالْقَمَرْ عَ الْبَابْ

وْنِزْلِتْ سَمَا عَ الأَرْض تَا تْشُوفُو

بَرْكِي بِيرَجِّعْ بَدِرْهَا اللِّي غَابْ

ـ6ـ

طَقّ الْفَرَحْ.. لَوْلا فَرَحْ عِيدُو

وْضَاع النَّغَمْ.. لَوْلا أَنَاشِيدُو

وِالْعُودْ.. مَا دَوْزَنْ لَيَالِينَا

إِلاَّ بْرِيشِه حَامِلا بْإِيدُو

ـ7ـ

جُرْح الْقَلبْ.. مِينْ غَيْرَكْ بْيِلْحِمْ؟

مُشْ حَقّ تِتْرُك قَلِبْنَا يْفَحِّمْ

الإِيدَيْنْ رَحْ تِتْعَبْ مِنِ التِّلْوِيحْ

وِالشَّعْب.. كلّ الشَّعبْ.. عَمْ بِيصِيحْ:

وَيْنَكْ يَا مِلْحِمْ؟.. بَدّنَا مِلْحِمْ

**

ضيفنا الكبير

قدمت بها الفنان ملحم بركات، 1989

ـ1ـ

مْنِ الْقَلْبْ غَنَّى ضَيفْنَا الِكْبِيرْ

وْبَكَّى الشَّعبْ لِمِّنْ بِكِي هُوِّي

يَا دَمْعِة الإِخْلاصْ وِالتِّقْدِيرْ

طَمّنِي لُبْنَانْ.. مَهْمَا يْصِيرْ

رَاجْعِين نْعِيشْ بِالْقُوِّه

ـ2ـ

مْنِ الْقَلبْ غَنَّى.. وِالشّفَاف تْصِيحْ:

عِيدْهَا.. يَا سَيِّد الأَلْحَانْ

وْلِـمْ عَادْهَا.. فَكَّرْت إِنُّو الرِّيحْ

حِمْلِت بَشَرْ عَ شْفَافُن تْسَابِيحْ

تَا تْرَجِّعُنْ بِالدَّوْر عَ الأَوْطَانْ

ـ3ـ

وْلِكْ أُوفْ.. يَا بَا أُوفْ.. يَا بَا أُوفْ

وَقَّفْ بَشَرْ عَ الطَّاوْلات صْفُوفْ

هَيْدَا سَفِير الْفَنّ وِالأَمْجَادْ

حَامِلْ مَعُو مْنِ الشَّرْق صَوْت بْلادْ

زَقّفِيلُو.. زَقّفِي يَا كْفُوفْ

ـ4ـ

قَوُّوا الزَّقْفِه يَا حْبَاب الْقَلْبْ

مِنْشَانْ حَتَّى نْسَمّعُو هِيِّي

تَا يَعْرِف الْغِيَّابْ مِينْ بِتْحِبّْ

بِتْحِبّ بَعْد الرَّبّ.. أَرْز الرَّبّْ

وْفَنَّان حِمْل الأَرْزْ غِنِّيِّه

ـ5ـ

يَا كْفَرْشِيمَا.. شُو بَدِّي قُولْ

زْلاغِيطْ عَمْ تِسْتَقِبْلُو وِطْبُولْ

هَـ الْـ كَانْ إِبْنِكْ.. صَار إِبْن الْكلّْ

بْتِرْقُص قْلُوب النَّاس لِـمْ بِيطِلّْ

فَوْق صَرْخَات الْمَجِدْ مَحْمُولْ

ـ6ـ

طِلّْ دَخْلَكْ طِلّ حَاكِينَا

عِتْقُوا مْحَارِمْنَا عَلَى الْمِينَا

يَا حَبِيب النَّاسْ.. نِحْنَا نَاسْ

شْرِبْنَا الْغُرْبِه كَاسْ.. أَصْعَبْ كَاسْ

وْوَحْدَكْ يَا مِلْحِمْ فِيكْ تِحْيِينَا

**

راجع

إحدى حفلات الفنان ملحم بركات في سيدني.

راجع، لا تْخافُوا، راجِعْ

مِلْحِمْنَا، النّجْم السَّاطِعْ

مِنْ هَـ الْقَاعَه ما بْيِطْلَعْ

إِلاَّ وِالْفَجرْ طالِعْ

**

آخ.. يا بلادي

ألقيت عام 1989، عندما زارت الفنانة عايدة شلهوب سيدني ـ أستراليا.

ـ1ـ

لِمِّنْ بِـ شَمْس الْحَقّْ شَكُّوا غْرُوبْ

وِتْشَرّدُوا الأَحْبَابْ فَوْق دْرُوبْ

صَار الْفَرَحْ يِتْأَخَّر زْيَادِه

وِالْجُوعْ يِعْزُفْ عَ وْتَار شْعُوبْ

ـ2ـ

وْفَلاَّحْ حِمْلِ الْمَجْدْ زُوَّادِه

صَفَّى عَ خَشْبَات الْحِقدْ مَصْلُوبْ

وْإِمَّاتْ سَحْبِةْ عُمْر بِتْنَادِي

وْصَرْخَاتْهُنْ آهَاتْ عَمْ بِتْدُوبْ:

ـ3ـ

كِرْمَالْ مِينْ اسْتَشْهَدُوا وْلادِي

وِلْوَيْن بَدّْهَا تْجِرّنَا الِحْرُوبْ؟

زمْرِةْ نَهبْ.. لِلشَّرْ رِدَّادِه

شْيَاطِينْ.. مُشْ مُمْكِنْ يَا أَللَّـه تْتُوبْ

ـ4ـ

نِحْنَا اشْتَقْنَا لْجَامِع عْبَادِه

وِلْدَيْرْ.. يِحْمُوا طْفَالْنَا مْنِ ذْنُوبْ

حكَّامْ.. سَمِّتْ مَوتْنَا "شْهَادِه"!

وْنَظْمِتْ قَصَايِدْ مَا بْتِشْفِي قْلُوبْ

ـ5ـ

اشْتَقْنَا.. يَا أَللَّـه.. لْنَارْ وِقَّادِه

تحْرُقْ زَعَامِه عْقُولْهَا بِجْيُوبْ

اشتْقَنَا نْغَنِّي بَيْت قِرَّادِي

وْدَمْع الْكَرمْ بِـ كَاسْنَا مَسْكُوبْ

ـ6ـ

اشْتَقْنَا.. اشْتَقْنَا.. آخْ يَا بْلاَدِي

نِرْجَعْ تَا نِسْهَرْ وِالْمُوسِيقَى تْجِنّْ

إِنْتِي وْنِحْنَا.. وْعَايْدَه شَلْهُوبْ

**

بسمه حزينه

قدّمت بها الفنانة جوليا بطرس عام 1988.. في الحفلة التي أحيتها في السبورت سنتر ـ  سيدني.

ـ1ـ

يَا مَوْطنِي.. اللِّي مْقَدّسِه جْبَالَكْ

وْكِرْمَالْ عَيْنَكْ ضَحِّت رْجَالَكْ

مَهْمَا تْجَرِّحْ صَدْرَك الآلامْ

وْتِكْرُجْ عَ خَدَّكْ دَمْعِة طْفَالَكْ

ـ2ـ

وْمَهْمَا تْفَارِقْ لَيْلَكْ الأحْلامْ

وْتِتْشَرَّدْ بْهَالْكَايْنِه عْيَالَكْ

صَعْبِه خَيَالَكْ تِمْحَشُو الأَيَّامْ

وْهِيِّي الْـ غَنِّتْ عُمرْ "بِخْيَالَكْ"

ـ3ـ

وِجْنُوبَكْ اللِّي نَدْهِتُو بِكْلامْ

وْقَالِتْ: حَبِيبِي.. قِلْت: نِيَّالَكْ

تَا تْشِعّْ "شَمْس الْحَقّ" وِالإِلْهَامْ

حِمْلِتْ بِـ إِسْم الشَّعْب مِشْعَالَكْ

ـ4ـ

وْأَعْلامْ مِنْ كلّ الدِّنِي.. وْإِعْلامْ

وِقْفِتْ بِـ سِيدْنِي تْوَسِّعْ مْجَالَكْ

وْبَسْمِه حَزِينِه بْتِمّهَا بِتْنَامْ

يَا الْـ كِنْتْ ضِحْك وْكَيْفْ رِسْمَالَكْ

ـ5ـ

"بَسْمِه حَزِينِه" فَجّرِتْ أَنْغَامْ

وَقْت اللِّي صَرْخِتْ أُوفْ مُوَّالَكْ

صَارِتْ بِبَعْضَا تْكَبِّشْ الأَعْلامْ

يَا مَوْطنِي.. تَا يْحَيّكُوا شَالَكْ

ـ6ـ

صَرْخَه جْنُوبِيِّه بْوَجِهْ حُكَّامْ

بَعْدُنْ مَا عِرْفُوا يْرَيّحُوا بَالَكْ

صَرْخَه جْنُوبِيِّه بْوَجِهْ ظُلاَّمْ

مَنْعُوا صَلِيبَكْ يِغْمُر هْلالَكْ

ـ7ـ

صَرْخَه جْنُوبِيِّه لْشَعبْ مِنْضَامْ

وْرَغْم الظُّلمْ وِالْمَوْت غَنَّالَكْ

غْنَانِي انْسَرْقِتْ مِنْ هَدِيلْ حْمَامْ

مِنْ جُولْيَا بُطْرُسْ.. حَبِيبِتْنَا

الْـ ضَوِّتْ حَيَاتَا شْمُوعْ كِرْمَالَك

**

يا جنوب

قدّمت بها الفنانة جوليا بطرس، 1988

ـ1ـ

مْنِ جْنُوبْ قِدَّسْنَا تْرَابَاتُو

وْعَ جَبْهِتُو السَّمْرَا جْرُوح حْرُوبْ

دَابِت الشَّمْس بْلَوْنْ حَبَّاتُو

وْصَارِتْ مَحَبِّه تِفِرْشُو

تْبَلْسِم جْرُوحُو.. تْوَشِوْشُو:

يَا حَبِيب قْلُوبْنَا يَا جْنُوبْ

ـ2ـ

شَمْس قَالُوا.. وْفَجرْهَا آيِه

مْعَوَّدْ عَ صَرْخِةْ "أُوفْهَا" يِنْشَقّْ

بِنْت الْجَنُوبْ الْـ صَارِت حْكَايِه

بِتْجَسِّد صْمُود الشُّعُوبْ

وْبِتْقَطِّعَا بْعَتْم الدّرُوبْ

تَا صَار إِسْمَا الْيَوْم.. شَمْس الْحَقّْ

ـ3ـ

بَسْمِه حَزِينِه.. وْقَلبْهَا مَحْزُونْ

عَ كَوْنْ عَمْ بِتْجَرّحُو الْوَيْلاتْ

عَ بْلادْ.. كلْ مَا تْغَنِّيَا بِتْكُونْ

هِيِّي السَّعَادِه لْقَلبْهَا

وْهِيِّي الرُّجُوع لْدَربْهَا

وْهِيِّي اللَّحنْ والصَّوْت والْكِلْمَاتْ

ـ4ـ

مَثّلِتْنَا.. وْمَثّلِتْ أَوْطَانْ

مَهْمَا تْغِرَّبْنَا بْعِينَيْنَا

وْفَهّمِتْهُنْ: هَـ الْوَطَنْ لُبْنَانْ

بَاقِي كْبِير بْكلّ سكّانُو

بَاقِي الْبَيْت لْكِلّ أَدْيَانُو

تَا تْضَلّ عَين الْخَالِق عْلَيْنَا

ـ5ـ

تَا قَدِّمَا.. مُشْ حَقّ يَا إِخْوَانْ

وْهِيِّي الصّوْت لْكلّ أُمّتْنَا

هِيِّي اللِّي عِرْفِتْ مَجّدِتْ أَوْطَانْ

وْبِالْوَقْت ذَاتُو فَرّحِتْنَا كْتِيرْ

وْرَجّعِتْنَا عَ الْوَطَنْ بَكِّيرْ

جُولْيَا بطْرُس.. حَبِيبِتْنَا

**

كرامة شعب

قدّمت بها الفنانة باسكال صقر في بعض الحفلات التي أحيتها عام 1988 في سيدني

ـ1ـ

بْصَوتْهَا.. غَنِّتْ أَدَبْ جُبْرَانْ

هَـ الْـ كَانْ أَرْز الرَّبّ يُوحِيلُو

الْـ صَارِتْ حْرُوفُو خُبْز لِلْجُوعَانْ

وْكِل مَا تْدُوق الْخُبْز صَلِّيلُو

ـ2ـ

بْصَوتْهَا.. احْتَلِّتْ قَلبْ لُبْنَانْ

وِقْلُوبْنَا الْـ بِتْضَلّ تِشْكِيلُو

عَنْ لَوْعِة الْهُجْرَانْ وِالْحِرْمَانْ

عَنْ نَاسْ بَاعُوا الأَرْضْ بِالْكِيلُو

ـ3ـ

مْسَارِحْ جَرَشْ.. قرْطَاجْ.. وَينْ مَا كَانْ

شِهْدِتْ بِفَنَّا النَّادِر مْثِيلُو

يِمْكِنْ بَلابِلْ سَوْسَحِتْ أَكْوَانْ

أَوْ صَوْت نَايْ الرِّيحْ بِتْشِيلُو

ـ4ـ

آيِةْ جَمَالْ.. انْ شَافْهَا فَنَّانْ

بْيِكْسُرْ عَ إِجْرَيْهَا تْمَاثِيلُو

حَتَّى حَمَام الطُّهرْ وِالإِيمَانْ

مْنِ بْيَاضْهَا لَوَّنْ زَغَالِيلُو

ـ5ـ

وْوَرْد خَدَّا مْسَيَّج بْبُسْتَانْ

الْقَانُونْ عَمْ يِمْشِي مْقَابِيلُو

حَامِلْ عَدَالِه بْكَفِّة الْمِيزَانْ

وْهِيِّي بْكَفّ الْحَقّْ تُومِيلُو

ـ6ـ

وْقَلبْهَا الْمَجْرُوحْ عَ الأَوْطَانْ

حْكَايَاتْ أَجْمَلْ أَرْضْ تِحْكِيلُو

كِيفْ غَنَّاهَا النَّبِي سْلَيْمَانْ

وِاعْتَزّ فِيهَا صَوْت تِرْتِيلُو

ـ7ـ

وِالْجَائِزِه اللِّي تْعَلّقِتْ نِيِشَانْ

عَ صَدرْهَا.. شُو رِبْحِت جْمِيلُو

هَاكْ "الْكَمَالْ" الْـ سَارْقُو نيسَانْ

مِنْشَانْ يِضْوِي اللَّيْلْ قِنْدِيلُو

ـ8ـ

وِالْغَايِب الْمَحْرُوقْ بِالنِّيرَانْ

بْأُوفْ وِحْدِه النَّارْ تِطْفِيلُو

كْرَامِةْ الأَرْز الْـ حَارْسُو الدَّيَّانْ

كْرَامِةْ شَعْب مِشْتَاقْ حَتَّى يْعُودْ

بسْكَالْ.. يَا بَسْكَالْ غَنِّيلُو

**

احلى صوت

قدمت بها الفنانة باسكال صقر، 1988

ـ1ـ

بِقْيَامْتُو مْنِ الْمَوْت.. غِلْب الْمَوْتْ

انْشَاللَّـه بْلادِي تْقُومْ يَا أَحْبَابْ

بَرْكِي مْنِسْمَعْ صَوْتْ.. أَحْلَى صَوْتْ:

عُودُوا لْحُضْن الأَرْز يَا غِيَّابْ

ـ2ـ

وْمِنْشَانْ نِفْرَحْ بَعدْ مَوْتُو نْهَارْ

وَدَّى مَلاكْ مْنِ السَّمَا وْقَلُّو:

لُبْنَانْ بَاقِي.. رُوحْ طَفِّي النَّارْ

وْوَحِّدْ بِـ صَوتَكْ هَـ الشَّعب كلُّو

ـ3ـ

مْلاكْ.. أَيَّا مْلاكْ.. هَيْدِي إِنْسْ

صَرْخَه جْنُوبِيِّه بْوَطَنْ صَامِدْ

هَيْدِي اللِّي غَارِتْ مِنْ حَلاها الشَّمْسْ

وْشَافُوا الْقَمَرْ قِدَّامْهَا سَاجِدْ

ـ4ـ

صَارِت حْكَايِه نْخَبِّرَا بْسَهْرَاتْ

أَطْفَالْ.. مِشْتَاقِينْ لِحْكَايِه

نْقِلُّنْ: صَبِيِّه زَرْعِت الطُّرْقَاتْ

غْنَانِي فَرَحْ لِلْمَوْسم الْجَايِي

ـ5ـ

نْقِلُّنْ: بَعد مَا تْشَرّدُوا مَعْنَا

مْنِ ضْيَاعْ كَان الرَّبّ يِحْمِيهَا

غَنِّتْ وَطَنْ.. كَرْجِتْ مَدَامِعْنَا

شِفْنَا الْوَطَنْ.. كلّ الْوَطَنْ فِيهَا

ـ6ـ

مِتْلا مَا صَارْ.. وْلا بَعد بِيصِيرْ

عَ شْفَافْهَا الضِّحْكاتْ مَطْبُوعَه

مِتْل الشَّمسْ شَقّ الْفَجرْ بَكِيرْ

بْتِضْحَكْ.. تَا ضِحْكِةْ شَعبْهَا تُوعَى

ـ7ـ

صَرْلا شَهرْ بَيْنَاتْنَا.. مُشْ حَقّْ

تِرْجَع.. وْتِبْقَى الذّكْرَيَات بْبَالْ

يَا نَاس.. لَوْلا قْلُوبْنَا بْتِنْشَقْ

مَحْفُورْ فِيهَا كَمْ كِلْمِه زْغَارْ:

أَللَّـه.. الأَرْزِه.. وْحَدُّنْ بِسْكَالْ

**

كل ما تغني

قدمت بها الفنانة باسكال صقر، 1988

ـ1ـ

كِل مَا تْغَنِّي بْصَوتْهَا بِسْكَرْ

وْبِرْجَعْ مَعُو عَ بْلادْ.. أَحْلَى بْلادْ

يِمْكِنْ شِي قِطْعَه مْنِ السَّمَا وْأَكْتَرْ

يِمْكِنْ شِي أُمّ وْحَدّ مِنَّا وْلادْ!!

ـ2ـ

كل مَا تْغَنِّي.. بْتِسْرُق الإِحْسَاسْ

وْيَا فَرْحِة الْمَسْرُوقْ إِحْسَاسُو

بْيِمْشِي كَأَنُّو خْيَالْ بَيْن النَّاسْ

وْخَمْر السَّعَادِه طَافِح بْكَاسُو

ـ3ـ

كل مَا تْغَنِّي.. قْلُوبْنَا بِتْطِيرْ

بْأَجْوَاءْ.. مُشْ مَعْرُوفْ آخرْهَا

نَجمَاتْ.. يِمْكِنْ.. بِالسَّمَا مِنْصِيرْ

الأَرْزَاتْ مَزْرُوعَه عَ دَايِرْهَا

ـ4ـ

وْهَاك الدَّمَار الْـ شَوَّه بْلادِي

شَكِّتْ بِـ قَلْبُو الْوَرد وِالزَّنْبَقْ

وْمَعْ نَغْمِة الشِّلاَّلْ بِالْوَادِي

غَنِّتْ أَرضْ.. مِنْ هَـ الْعُمرْ أَعْتَقْ

ـ5ـ

هِيِّي اللِّي زَرْعِتْ "أُوفْهَا" بِبْلادْ

غِرْقِت بِـ بَحْر الدَّمّ وِالأَحْزَانْ

وْحِلْفِت بِـ صَوْتَا تْرَجِّع الأَعْيَادْ

وْهَيك الْوَعدْ بِيكُونْ يَا لُبْنَانْ

ـ6ـ

وْهِيِّي اللِّي حِمْلِت إِسْم مَلْوَى الْكَوْنْ

وْهِيِّي اللِّي خَلِّتْ شَعبْنَا يِفْرَحْ

رْجِعْنَا لْوَطَنَّا.. بَسّ غَنِّتْ هَوْنْ

صَارِتْ "وَطَنْ" وَاقِفْ عَلَى الْمَسْرَحْ

ـ7ـ

أَيَّا زَهرْ.. مَا تْشَوَّق عْلَيْهَا

هَـ الزَّنْبَقَه الْبَيْضَا الْمِسِتْحِيِّه

الْـ نُورْ الشَّمسْ مِنْ نُورْ عِينَيْهَا

مِنْ هَيْك شَمْس الْحَقّ مضْوِيِّه!

ـ8ـ

اشْتَقْنَالِكْ.. وْنِشْف الدَّمع بِالْعَيْنْ

طَلّي عْلَيْنَا طَلِّة الأَبْطَالْ

يَا مُطْرِبِةْ لُبْنَانْ.. وَيْنِكْ وَيْنْ

الشَّعْب جَايِي يِسْمَع.. بَسْكَالْ؟

**

وديع الصافي

عندما زارنا الصافي

قَلْبَكْ صَافِي.. وْصَوْتَكْ صَافِي

أَصْفَى مِنْ شَلاّل الْوادِي

وْمَلْيُون بُلْبُل فَوْق حْفافِي

عِمْلُولَك جَوْقِة رِدّادِي

لَوْ طَبْعِتْ رَسْمَكْ عَ الْعُمْلِه

قدَّامْ إِسْمَكْ بِكْتُبْ جُمْلِه:

حَقَّكْ.. مُشْ رَحْ تُوفِي بْلادي

**

زحلاوي

قدمت بها وائل كفوري، 1996

ـ1ـ

قَالِتْ: رِشَّيْت عْطُورِي

وْمِنْ وِجِّي شَعْشَعْ نُورِي

خُود النُّور وْخَلِّي الْعِطْر

يْعَطِّر رِيحِةْ بَخُّوري

ـ2ـ

جايِينا مِنْ خَلْف الْبَحْر

مُطْرب.. تا يْمَحِّي بْحُوري

زِحْلاوي.. مْن بْلاد الْفَجْر

الْـ نَوَّر غُرْبِة دَيْجُورِي

ـ3ـ

زِحْلاوِي.. مْن بْلاد النَّصْر

السّكْرانِه فِيها نْسُوري

لُبْنانِي أَصْبَا مْن الزَّهْرْ

إِسْمُو وائِل الِكْفُورِي

**

صوتا.. فرحه

قدّمت بها الفنّانة سيلفي شديد عام 1993، في إحدى الحفلات التي أحيتها في سيدني.

ـ1ـ

عَمْ إِسْمَعْ صَوْتَا مْنِ بْعِيدْ

حَامِلْ بِالنَّغْمَات الْعِيدْ

وْشَايِفْ نَاس وْمَرْج زْهُورْ

وْدَبْكَات وْهَيْصَه وْتِغْرِيدْ

ـ2ـ

الْبَتْرُون.. تْشَعِّلْ بَخُّورْ

وْإِدِّه.. تْحَيِّكْلاَ مْوَاعِيدْ

وْصَنِّين.. يْدَهِّبْلاَ سْطُورْ

فَرَّخْ عَ حْرُوفَا التِّجْدِيدْ

ـ3ـ

وِالأَرْزِه الْـ عَطْيِتْنَا نْسُورْ

تِعْطِيهَا شُو مَا بِتْرِيدْ

الأُوفْ.. مْنِ جْبَالاَ مَنْدُورْ

بْيِعْلاَ مَعْ رَفّ زْغَارِيدْ

ـ4ـ

وِالْمِيجَانَا.. شِغْل طْيُورْ

دَوَّخْهَا بِالْكَرْم نْبِيدْ

جَايِي عَ سِيدْنِي تَا تْزُورْ

الْغِيَّابْ.. وْبِالْقَلْب تْزِيدْ

ـ5ـ

حُبّ الرَّجْعَه لأَرْضْ النُّورْ

لِلأَرْز الْـ شَبْشَبْ عَ جْدِيدْ

يَا الْجَايِي مِنْ خَلْف بْحُورْ

وْعَنْ أَهْدَافَا مَا بِتْحِيدْ

ـ6ـ

بْهَـ الطَّلِّه شَعْبِكْ مَسْرُورْ

شِيلِي عَنْ صَدْرُو التِّنْهِيدْ

وْغَنِّيلُو يَا سِيلْفِي شْدِيدْ

**

فجر الفرح

إحدى حفلات الفنان المهجري شربل صعب، 1987

ـ1ـ

مْنِ بْلادْ عَطْيِت أَجْمَل حْسَاسِينْ

مِنْ صَوْتها سِكْر الشَّرق وِالْغَربْ

مْن الأَرْزِة اللِّي بْفَيِّتَا مْلايِينْ

كِبْرُوا.. تا صَارُوا وْلادْ أَرز الرَّبّ

ـ2ـ

مِنْ دَيْر بِلاَّ الْـ حَدّ تَنُّورينْ

مْن الضَّيْعِة اللِّي مْعَوّدِه عَ الْحُبّ

طَلّ فَجْر جْدِيدْ عَ التّكْوِينْ

فَجْر الْفَرَحْ.. فَجْر الطَّرَب وِالْفَنّ

الْـ جَمَّع شعاعُو بْصَوتْ شَرْبِل صَعْب

**

يا مال الشّام

قدّمت بها الفنان الأميركي، السوري الأصل، توما طعمة

ـ1ـ

كِنتْ هَوْن.. وْكانْ صَوْتَكْ جَوْهَرَه

نِسْهَرْ مَعُو وِنْسَهِّر لْيالي

وْعَ جْناحْ أُوف عْرفْت كِيف تْطَيِّرَا

ياما وْياما رْجِعْت عَ جْبالِي

ـ2ـ

لُبْنانْ أَرْضِي.. وْكِنتْ عَمّ بِتْصَوِّرَا

بْنَغْماتْ.. رَدِّتْ رُوحْ آمالي

وْصدْفِه انْطَفِتْ طَلاَّتْ كِنَّا نِنْطِرَا

لْوَيْن رِحْتْ؟.. وْلَيْش يا غَالي؟

ـ3ـ

السَّكْرَه بْنِصَّا.. صْبُورْ حَتَّى نِسْكَرَا

وِنْطُورْ حَتَّى يْطِيبْ مُوّالي

ما كانْ شِعْرِي بَعدْ بِالْغُرْبِه انْقَرَى

وْلا كانْ بالي ساكِن بْبالي

ـ4ـ

سْنِين غِبْت، وْلُوهْ، قِللِّي شُو جَرَى

تا الْعَمّ سَامْ يْخَرْبِط الْحالِه؟

هَيْدَا عَجُوز، وْعاشْ عُمْرُو زَعْبَرَه

لا تْبِيعْ تِبْر بْكَمْشِة نْخالِه

ـ5ـ

نْطَرْنا، نْطَرْنا، وِالْعُيُون مْصَبَّرَه

وْقِلْنا: نِسِي الْجَوّ الأُسُتْرالي

قِلْنا: نِسِي هَـ الْجالْيِه الْـ بِيقَدِّرَا

سْنِين الْهَجرْ لِلْحُبّ قتَّالِه

ـ6ـ

ليشْ زِرتْنا؟.. شِعْرانْ مَعْنا يا ترَى؟

هُمُوم وْتَعَبْ.. أَحْزانْ وِبْطالِه

وْضِحْكاتْنا فَوْق الشّفَاف مْزَوَّرَه

وِدْمُوعْنا عَ طُول شِغَّالِه

ـ7ـ

الْمِفْتاحْ صَوْتَكْ، وِالْقلُوب مْسَكَّرَه

هَتْلَكْ شِي أُوف تهِدّ أَغْلالِي

هَتْلَكْ شِي سَحْبِه مِن قدُود مْقَطَّرَه

بْأَوْتارْ مِتل الشَّمْس بِتْلالي

ـ8ـ

هَتْلَكْ شِي شَهْقَه مِنْ عتابا مْزَنَّرَه

بْمَلْيُون آه وْآهْ عَ الْعالِي

هَتْلَكْ مِيجانا عَ الصّخور مْكَسَّرَه

بِجْرُود صَارِت لِلسَّما سْقالِه

ـ9ـ

تا إِسْمَعَكْ.. تِعْبِت نْدُوري الْـ بِنْدِرَا

حَقِّق النّدْر وْحِنّ عَ حالي

عَ الْوَطنْ بَدِّي الْفُنون تْسَفِّرَا

وْدُوزَانْ عُودَكْ يِفْتَح مْجالي

ـ10ـ

يْحَضِّرْ بِدَقّاتُو اللِّي قادِرْ تِنْقِرَا

فَخْري صَبَاح وْناظِم غْزالي

يْحَضِّرْ وَدِيع الْـ صَار فَنُّو مسْطَرَه

بْيِنْقاسْ فِيها الْفَنّ طُوَّالِي

ـ11ـ

يا إِبِنْ طُعْمِه.. لِي وَصِيِّه زْغَيَّرَه

غَنِّي الأَرزْ تا يِسْكَر الْمُوَّالْ

وْرَدِّدْ نَغَمْ بِتْرَدّدُو الأَجْيالْ:

"يا مال الشَّامْ.. يَللاَّ يا مالي"

**

نجمة

قدّمت بها الفنان يوسف رحمة عام 1991

ـ1ـ

صَوْتُو كْتِير بْيِعْجِبْنا

وِبْنَغْماتُو بْيِطْرِبْنا

عَ بْيَادِرْنا خَلاَّ اللَّيْلْ

يْسَاهِرْنا وِيْعاتِبْنا

ـ2ـ

وْيِسْرُق مِنْ نجْمات سْهَيْلْ

نِجْمِه.. بْنُورَا يِكْتِبْنا

مَحَّى بْصَوْتُو جْنُون الْوَيْلْ

بْغُرْبِه عَمْ بِتْعَذِّبْنا

ـ3ـ

وْقَطَّعْنا مِنْ مَيْل لْمَيلْ

وْرَجَّعْنا عَ بْلاد الأَرْز

يُوسف رَحْمِه.. مُطْربْنا

**

ربوع الكلمه

قدّمت بها الفنان يوسف رحمة عام 1991

ـ1ـ

سَمِّعْني أَجْمَلْ هَيْهاتْ

حِمْلِتْها جْوانِحْ نَسْمِه

مِنْ عِيناتا.. مْن الأَرْزاتْ

مْن بْشَرِّي رْبُوع الْكِلْمِه

ـ2ـ

حابِبْ إِسْمَعْ غِنِّيَّاتْ

زَرْعِتْ أَمْجاد بْدَمِّي

وْوِعْيِت بِحْرُوفا صَيْحاتْ

بِتْوَعِّي شْعُوب الأُمِّه

ـ3ـ

مُطْرِبْ.. كِل ما تْقِلّو: هاتْ

بْيِعْطِي وْبِتْفِيض النِّعْمِه

بْتِكْرُجْ عَ شْفافُو سَحْباتْ

بْتِتْمَرْجَحْ فِيها النَّغْمِه

ـ4ـ

وْحَوْلُو بِتْجِنّ الدَّبْكاتْ

وْيا سَاحَه.. النَّاس اسْتِلْمِي

نِقَّيْت حْرُوف الْكِلْماتْ

تا تْلِيق بْيُوسِف رَحْمِه

**

ضحكة هدّارة

قدّمت بها الفنان وسيم طبّارَة.

ـ1ـ

مِتْلُو ما بْيِخْلَقْ فِنَّانْ

عِنْدُو خِفِّه وْشَطارَه

بْيِزْرَع نكْتِه وَيْن ما كانْ

بْيِقْطُفْ ضِحْكِه هدَّارَه

ـ2ـ

تا يْبَلْسِم قَلْب الإِنْسانْ

الْـ صَفَّى بْهَـ الْحَرْب تْجارَه

مِنْ حَدّ الأَرْزِه بْلُبْنانْ

مِنْ كِل تْرابات الأَرْضْ

جايِي وَسِيم طِبَّارَه

**

فيروز

عندما زارتنا سفيرتنا إلى النجوم

بِيجُوزْ إِحْلمْ بِالْهَنَا.. وْبِيجُوزْ

جَمِّعْ بِهَـ الْغُرْبِه كْنُوز كْنُوزْ

وْبِيجُوزْ إِنِّي إِرْسُم خْيالِي

وْعَلِّمْ الأَطْيَارْ مَوَّالِي

بَسّ.. ما بِيجُوزْ يا غَالِي

إِبْقَى بْجَرِّةْ إِغْتِرابِي كُوزْ

وْما رُوحْ إِتْسَمّعْ عَلَى فَيْرُوزْ

**

كوكتيل

ألقيتها في إحدى الحفلات ترحيباً بالفنانة داليدا رحمة والفنانين رفيق حبيقة ويوسف رحمة.

ـ1ـ

رَفِيقْ حْبَيْقَه الْفَنَّانْ

خَلاّنِي إِسْأَلْ حَيْرانْ

كِيف بْيِقْدرْ بِالنَّغْماتْ

يْفَبْرِكْ لَحْن وْغِنِّيَّاتْ

بِتْنَسِّينَا كِل شِي كانْ

وْبِتْرَجِّعْنا عَ الأَوْطانْ

ـ2ـ

قَالُوا: دَالِيدَا.. قلْت: وِحْيَاتَا

وِحْيَاةْ صَوْتا وْسِحْر غَمْزاتَا

وَقْت اللِّي بِرْجَعْ عَ الْوَطَنْ لُبْنانْ

رَحْ نِخّ بُوسْ تْرابْ عِيناتا

ـ3ـ

يُوسف رحمه.. لَوْلا صَارْ

نِصِّي بِالْقَبْر.. بْقِلَّكْ

مِتْلَكْ ما بْيِخْلَقْ جبَّارْ

صَوْتَكْ خَلَّى ناس كْتارْ

تْخَصِّصْ بِالْقَلْب مْحَلَّكْ

**

شلال فنون

قدّمت بها الفنان السوري نعيم نعمة

ـ1ـ

صَوْتُو مِنْ أَحْلَى ما يْكُونْ

بْتِشْهَدْ عَ كْلامي النَّغْمِه

مِنْ أُوفُو بْيِسْكَرْ حَسُّونْ

مْعَشْعَشْ بِحْرُوف الْكِلْمِه

ـ2ـ

جَايينا.. وِالْحَرْب جْنُونْ

وْماتِتْ بِالْقَلبْ الرَّحْمِه

تَا يِزْرَع غصْن الزَّيْتُونْ

وبِالْغُرْبِه تْشَرْقِط نجْمِه

ـ3ـ

حنْجِرْتُو شلاَّل فْنُونْ

بْتِشْرَبْ مَيَّاتُو النَّسْمِه

تَا تْبَوْرِد قَلبْ الْمَحْزُونْ

وِتْخَفِّفْ تِقْل الْعَتْمِه

ـ4ـ

لْسُورِيَّا.. الْمَهْجَرْ مَدْيُونْ

هِدْيِتْنا أَكْبَرْ فَنَّانْ

وْقَالِتْلُو: مَحِّي الهجْران

بْصَوْتَكْ يا نَعِيمْ نعْمِه

**

نعيم نعمة

كتبتها منذ ربع قرن وأكُر ليقدّم بها اللاستاذ ممدوح سكرية الفنان الزائر نعيم نعمه وقد ادخلت عليها اليوم بعض التعديلات. فألف شكر للصديق الرائع ممدوح الذي احتفظ بهذه القصيدة كل هذه المدة ليعيدها الى الحياة بعد أن كنت قد نسيتها تماماً:

ـ1ـ

برنّات صوتو زقزقة اطيار

وبالأوف صار اللحن يتكنّا

إسمو نعيم ونعمتو قنطار

حامل معو نسمات موطنّا

ـ2ـ

جايي لعنّا.. بَيْعَد المشوار

ويا مية هلا بفنّان من عنّا

من اللاذقيه جاب اكليل غار

وبورود أحلى حمص زيّنا

ـ3ـ

وتدمر القلعه.. معمّره بحجار

خلّت تاريخ المجد يتهنّى

والشام يللي فنّها زنّار

كل الدني متزنره بفنّا

ـ4ـ

وبـ "تلّتو" الفيها الشوق غمار

ودّع أمومه الإبن تستنى

كيف غنّى شوقها بتحتار

بألحان لمّن صاغها تأنّى

ـ5ـ

ومن السويدا منبت الأحرار

غنّى البطوله بصوت جنّنا

وطرطوس يللي ليلها أنوار

ع هدير الموج دوزنّا

ـ6ـ

ومن أرز عم يكسر غصونو العار

قبل الحرب.. نور الدني كنّا

يا نعيم بأوف طفّي النار

تا نقول كل ما الهجر نتفه جار:

نعيم نعمه بليلنا غنّى

**

هشام الحاج

قدّمت بها الفنان هشام الحاج عام 2012

ـ1ـ

جايي تا يْمَحّي الهجران

بأحلى نغمه وغنيّه

حامل بيرق من لبنان

بقلبو الأرزه الدهريّه

ـ2ـ

صوتو، من ألله، رنّان

وعندو أحلى شبوبيّه

هشام الحاج الفنّان

غنّى البنت الصبيّه

اللي أهلا لبنانيي

**

صوت الأرز

قدّمت بها الفنانة ماري بشارة عام 1990

ـ1ـ

الأُوف الْـ ما بْتِمْرُقْ حَدَّا

وْتِتْنَشَّقْ وَرْدِةْ خَدَّا

لا بْعِدَّا مْنِ الْفَنّ وْلاَ

مْنِ بْيُوت الشِّعْر بْعِدَّا

ـ2ـ

فِنّانِه وْصَوْتا تْتَدَلَّى

تا يْغَطِّي الدِّنْيِي كِلاَّ

ماري بْشَارَه صَوْت الأَرْزْ

الْـ دَوْزَنْ أَوْتارُو أَللَّـه

**

صباح

عندما زارتنا في سيدني

شُو بْيِعْملْ صَوْتا فِيِّي؟

بَعْدُو.. بَعْدُو بْدِينَيِّي

عَمْ بِيوَعِّي إِحْسَاسِي

وِيْحَلِّي الْمُرّ بْكاسِي

وْيِشفِي غُرْبِه مَجْرُوحَه

وِيْرِدَّا قْبالي.. هِيِّي

أُسْطُورَه لُبْنانيِّه

بْكِل شْمُوخا الْـ ما بْيِنْقَاسْ

إِلاَّ بِزْغارِيد النَّاسْ

وِبْطَلاَّتْ الصَّبُّوحَه

**

وديع

يوم زارنا الصافي

بَدِّي إِرْجَعْ..

بَدِّي إِرْجَعْ..

عَ جْناحْ صَوْتَكْ طِفْل

عَ بْلادْ شَوَّهْ ضِحْكِتَا الْمَدْفَعْ

وْشَرَّدْ جَمِيعْ الأَهْلْ

وديع.. كل ما أُوفَكْ بْتِدْمَعْ

بْيِبْكِي الْجَبَلْ والسَّهْلْ

**

الصّرخه..

قدّمت بها مسرحيّة (الصرخة) التي ألّفتها وأنتجتها الفنانة نجوى عاصي، وأخرجها الفنان عبّاس مراد، وشارك بها العديد من كبار ممثلي وممثلات المهجر.

ـ1ـ

ضَلِّي اصْرُخِي عَ طُولْ

يَا فِرْقِة الْمَسْرَحْ

فَنِّكْ عُطْر مَحْمُولْ

أَبْعَدْ مِنِ الْمَطْرَحْ

وْصَوْتِكْ وَتَرْ مَجْدُولْ

وِالْكَوْنْ عَمْ يِفْرَحْ!

ـ2ـ

ضَلِّي اصْرُخِي بْهَالْمُغْتَرَبْ

صَرْخَاتْ مَسْمُوعَه

تِكْيِتْ خَجَلْ أَرْض الْعَرَبْ

وِتْبَخّرُوا دْمُوعَا

وْعَ زْنُودْهَا الشَّعْب انْصَلَبْ

وِالشَّعْب مَا بْيُوعَى

ـ3ـ

مْلايِينْ.. خَنْقِتْ حَالْهَا

وْنَهْدَاتْهَا قْنَاطِيرْ

مَاتِتْ.. تَا يِفْضَى بَالْهَا

ارْتَاحِتْ مِنِ التِّعْتِيرْ

حُكَّامْهَا أَرْذَالْهَا

وْقُوَّادْهَا صْرَاصِيرْ!

ـ4ـ

اسْتِسْلامْ بَدُّنْ.. مُشْ سِلِمْ

لا يْفَكّرُوا: مْجَانِينْ!

الْغِيَّابْ فِي عِنْدُنْ عِلِمْ

بِمْعَارِكْ التِّدْجِينْ

وْلَيْش مَشُّوا هَـ الْفِلِمْ

بِـ شَرِقْنَا الْمِسْكِينْ

ـ5ـ

وِالْجَالْيِه.. عَ مْصَابْهَا

مَا بْيِحْسِدَا إِنْسَانْ

شعْلِةْ وَفَا غِيَّابْهَا

لَوْ يِتْرِكَا "الشَّيْطَانْ"

بْيِحْقُنْ ضَيَاعْ شْبَابْهَا

بِـ إِبْرِة الأَحْزَانْ!

ـ6ـ

وْمِنْشَانْ تَا يْجَمِّعْ دَهَبْ

بْيِسْرُق عْمَار عْمَارْ

أَطْفَالْ أَحْلَى مْنِ اللُّعَبْ

بَعْدُنْ مَا شَافُوا نْهَارْ

بِيجِرُّنْ بْدَرْب الْغَضبْ

وْبِيبِيعُنْ بْدُولارْ!

ـ7ـ

وْنِحْنَا عَ طَاوِلْة الشَّرَفْ

مْنِقْعُد.. وْمِنْصِيرْ

نْقِلُّو: يَا بَيْك الْمُنْعَرَفْ

يَا كْبِيرْ إِبْن كْبِيرْ

حْكَايَاتْ بِتْخَلِّي الْقَرَفْ

يِقْضِي عَ نَاس كْتِيرْ!

ـ8ـ

نَجْوَى.. الأَدِيبِه اللاَّمْعَه

بِالدَّمّ كَتْبِتْهَا

قِصَّه حَزِينِه دَامْعَه

بْتِحْرُق نْهَايِتْهَا

ما فِي خَلِيقَه سَامْعَه

صَرْخَه عَ صَرْخِتْهَا!

ـ9ـ

عبّاسْ.. زَوْزَقْهَا بْأَلَـمْ

عَ شْفَافْ خَبْرِيِّه

وْخَلاَّ عَ خَشْبِتْهَا النَّدَمْ

يِصْرُخْ بِحِنِّيِّه

وْرِيمَا.. تْغَنِّيلُو نَغَمْ

وِتْجِنّ سَهْرِيِّه

ـ10ـ

وْرَئِيفْ.. يِرْسِمْلاَ صُوَرْ

وِيْمَثِّل الأَدْوَارْ

وْلُورَا.. تْقِلُّو لِلْقَمَرْ:

رَحْ خَبّرَكْ شُو صَارْ

قِصَّه حْرُوفَا مِنْ دُرَرْ

وِمْمَثّلِينَا كْبَارْ

ـ11ـ

فِيهَا مْحَمَّدْ مَعْ حَسَنْ

وْفِيهَا بَشِير كْمَانْ

وْصَادِقْ.. بِتِمْثِيلُو انْعَجَنْ

مَعْ نَايِفْ الإِنْسَانْ

طَلاَّتْ بِتْخَلِّي الزَّمَنْ

يِتْجَسَّد بْفَنَّانْ

ـ12ـ

وْدَانِي وْنَغَمْ.. مِينْ دَوْزَنُنْ

أَلْحَانْ عَمْ تِحْكِي

وْصَفَّى بْمَحَبِّه يُوزِنُنْ

مَعْ أُنْجِيلاَ حْرَيْكِه

وْخَلاَّ الْفِرْقَه تِحْضُنُنْ

وِتْشَرْقِط الضِّحْكِه؟!

ـ13ـ

ضَلِّي اصْرُخِي.. ما أَشْرَفِكْ

بِتْبَشّرِي بِالْخَيْرْ

دَرْبِكْ طَوِيلِه.. بَعِرْفِكْ

رْهَنْتِي الْعُمرْ لِلْغَيْرْ

نَجْوَى.. يَا نَجْوَى بْحَلّفِكْ

مَسْرَحِكْ خَشْبِةْ صَلاّ

إِنْتِي تْرِهَّبْتِي إِلاَ

لا تِتْرُكِي هَـ الدَّيْرْ

**

طفله زغيره

قدّمت بها الفنّانة ريما الياس عام 1990.

ـ1ـ

طفْلِه زْغِيرِه وْفَنّها ما لُو قْياسْ

انْغَرْمِتْ بِطَلّتْها قْلُوب النَّاسْ

انْ صَرْخِتْ الأوفْ.. الْكَوْن بِيغَنِّي

عَ قَدّ ما فِي بْصَوتْها إِحْساسْ

ـ2ـ

بْتِضْحَك الْكِلْمِه، بْتِرْقُص الرَّنِّه

عَ شْفَافْ.. مُشْ مَسْمِحِلْها تِنْباسْ!

وِحْمَامْ هَاك الدَّارْ مِسْتَنِّي

تْرِدُّو عَ أَرْضُو الْـ عِزّْها مِنْداسْ

ـ3ـ

الْـ لِعْبِتْ بِأَعْصابَا أَلفْ أَنِّه

الْـ دَعْسِتْ عَ رَقْبِتْها جْناس جْناسْ

وْلَوْ يِسْأَلُوها: شُو بْتِتْمِنِّي

وْعَمْ يِحْصُد بْشَعْبِكْ غَدرْ يُوضاسْ؟

ـ4ـ

بِتْقُولْ: شَعْبِي يْعِيشْ مِتْهَنِّي

يْطَفِّي الْحُزنْ وِيْنَوِّر الأَعْراسْ

بْيِكْفِي الْوَطَنْ عَنِّه وَرَا عَنِّه

لُبْنانْ مَعْهَد عِلْم.. مُشْ مِتْراسْ!

ـ5ـ

غَنِّتْ "يا جدِّي" سِمْعِت الْجَنِّه

وَحَبْسُوا مْلايِكْة السَّما الأَنْفاسْ

وَقالُوا: يا أَللَّـه.. قِلّْهَا: تَنِّي

إِنْت الْـ وَهَبْتَا حُنْجرةْ إِلْماسْ

ـ6ـ

شَهْقِتْ "يا أُمِّي" الْحاضْنِه فَنِّي

بِوْجُودِكْ زْهُوري صَعبْ تِيباسْ

ما بْرِيدْ إِنِّكْ تِبعدي عَنِّي

مِنْ دُونْ حَلاكِي مُرّ طَعْم الْكاسْ

ـ7ـ

إِنْتي وْبَيِّي وْجالْيِه.. مِنِّي

خْلِقْتُوا رَمْز لِلطّفلْ بِالْهُجْرانْ

تا تْمَثِّل الأَوْطانْ رِيما الْيَاسْ

**

عتمات الهجر

قدّمت بها الفنانة ريما الياس، وكان عمرها يومذاك تسع سنوات.

ـ1ـ

جايِي مِنْ عَتْمات الْهَجْرْ

تْمَحِّي الْغَصَّه بْعَتْمِتْنا

جايِي مِنْ نيرانْ الْقَهْرْ

تِطْفِي النَّار الْـ حَرْقِتْنا

ـ2ـ

مِشْيِتْ فَوْق جْنُون الْجَمْرْ

وْزَرْعِتْ أُوفْ بْأَنِّتْنا

وْغَزْلِتْ مِنْ خِيطانْ الْفَجْرْ

مَشْلَح نُور وْغَطِّتْنا

ـ3ـ

نَدْرِتْنا.. وْتا تُوفِي النّدْرْ

غْناني الْفَرْحَه غَنِّتْنَا

وْتا تْهَنِّينَا كلّ الْعُمْرْ

طْفُولِةْ عُمْرا هِدْيِتْنا

ـ4ـ

طَلِّتْها.. طَلاّت الْبَدْرْ

الْـ زَوْزَقْ صَفْحِةْ سَهْرِتْنا

وْضِحْكِتْها.. باقات الزَّهْرْ

الْـ فِرْحِتْ فِيها سَلِّتْنا

ـ5ـ

رَحْ حَوِّشْ مِنْ طُهْرَا طُهْرْ

وْضَوِّي الْفَنّ بْغُرْبِتْنا

بْيِكْبَرْ جِيلْ.. بْيِعْتَقْ دَهْرْ

وْفِيها بْتِحْلَى كِلْمِتْنا

ـ6ـ

وِبْتِغْلَى أَبْيات الشِّعْرْ

اللِّي انْكَتْبِتْ لِخْدُودا السِّمْرْ

رِيما الْحلْوِه.. طفْلِتْنا

**

رابِع شريط

قدّمت بها الطفلة ريما الياس يوم أصدرت شريطها الغنائي الرابع (الحُبّ جَنَّه).

ـ1ـ

كِيفْ بَدِّي كِيفْ حاكِيها

وِبْكمْ كِلْمِه قَدِّما لِلنَّاسْ؟

تِمّ الدِّني رَنْدَحْ أَغانيها

وْعَ وْتارْ صَوْتا تْمَرْجَحْ الإلْمَاسْ

ـ2ـ

كِيفْ بَدِّي كِيفْ إِهْدِيهَا

أَبْياتْ شِعْر مْدَوْزَنِه بْإِحْساسْ

وْكِلّ الْقَصِيدِه عايْشِ فِيهَا

وِالْمَوْهَبِه شَطْحاتْ ما لْها قْياسْ

ـ3ـ

جايِي بْهَـ السَّهْرَه تا هَنِّيها

صَارِتْ صَبِيِّه وِالشَّرَفْ نِبْراسْ

بَيَّا الْوَفِي زَوْزَقْ لَيالِيهَا

وِالأُمّ غَزْلِتْلا الْمَحَبِّه لْباسْ

ـ4ـ

عَ شْفافْ سِتَّا صَفّ آوِيها

وْعَ شْفافْنا نِحْنا رَنِين الْكاسْ

دَقَّاتْ قَلْبَا صَعْب تِخْفِيهَا

(الْحُبّ جَنّه) وِالْقُلُوب جْناسْ

ـ5ـ

رَابِع شَريطْ.. الرَّبّ يِحْمِيهَا

هِيِّي اللِّي رَدِّتْ عِزّ ماضِيهَا

وْهِيِّي اللِّي إِسْما بَسّ.. رِيما الْيَاسْ

**

صارت صبيّه

حفلة الفنانة ريما الياس، 1993

ـ1ـ

صَارِتْ صَبِيِّه.. طْلُوبْ وِتْمَنَّى

يا قَلبْ.. أَوْسَعْ مِنْ دِني فَنَّا

رِبْيِتْ عَ دَيِّي، فْرحْت فِيها كْتِيرْ

شِفتْ فِيها الْمَجدْ مِتْكَنَّى

ـ2ـ

سْمِعتْ مِنَّا الأُوفْ عَمّ بِتْطِيرْ

مْفَرّمِه.. كِلْ ما وَقَعْ سِنَّا

سْمِعْتا بْتِلْدُغْ مِتل الِعْصَافِيرْ

الضَّادْ حَرْف بْلَفظْها تْهَنَّا

ـ3ـ

كِرْمالْ عَيْنا نِفْرُش مْشَاوِيرْ

وْعَ دْرُوبْ صَوْتا.. الْفَنّ نِسْتَنَّى

غَنِّتْ (يا جدّي).. صَاحْ زَلْمِي كْبيرْ

يا تِسْلَمِيلِي.. وْبَسّ، ما تَنَّى

ـ4ـ

غَنِّتْ (يا أُمِّي).. رَسْمِتْ تْصَاويرْ

لِعْيُونْ بِالدَّمعاتْ تِتْحَنَّى

وْبِجْنُوبْنا الْمَجْبُول بِالتّعْتيرْ

تْبَنِّتْ قَضِيِّه، الْكَوْن ما تْبَنَّى

ـ5ـ

وِالْيَوْم، دَقِّةْ قَلبْها قْناطِيرْ

صَارِت تْحِبّ.. وْ(حُبّها جَنَّه)..

كِيف مِتْلا.. كِيفْ بَدُّو يْصِيرْ

لا هَوْن، لا بْلُبْنانْ، لا بِالشَّرْقْ

مِتلْ (ريما الْيَاسْ) ما عِنَّا

**

أطفال

قدمت بها الطفلة ريما الياس عام 1991

ـ1ـ

كل ما تْغَنِّيلُنْ موَّالْ

بْتِرْكَعْ.. بِتْصَلِّي لِلرَّبّ

حِلْفِتْ بِتْلِمِّلُّنْ مالْ

بْتِتْحَفَّى وِبْتِمْشِي الدَّربْ

ـ2ـ

قْلال كْتارْ.. كْتار قْلالْ

ما هَمَّا.. الْـ بِيهِمَّا الْحُبّ

بْسَهْرِتْها اجْتَمْعِت الِعْيالْ

وِقْفُوا الْغُرْب بْجَنْب الْقُرْبْ

ـ3ـ

قَاماتُنْ صَعْبِه تِنْطالْ

شُهْب وْعَمْ بِتْشَرْقِطْ شُهبْ

يا طفْلِه رَقْصِتْلا جْبالْ

وْمِتْل الأَرْزِه عَم بِتْشِبّ

ـ4ـ

يا حلْوِه سَكْنِتْ بِالْبالْ

يا شَمْس وْشرْقِت بِالْغَربْ

دَخْلِكْ غَنِّي لْهَـ الأَطْفالْ

مِينْ غَيْرِك يا ريما الْياسْ

قَادِرْ يِحْمِلْهُنْ بِالْقَلبْ

**

لورا..

قدّمت بها الفنانة لورا حاتـم في إحدى الحفلات.

ـ1ـ

سَابِحْ صَوْتِكْ فَوْق الْمَوْجْ

الْـ عَمْ بِيضِجّ بْبَحْر الْغُرْبِه

وْكِل ما الْغُرْبِه تْوَدِّي فَوْجْ

بْيَقْوَى الصَّوْت.. بْتِحْلَى اللِّعْبِه

وْبِتْصَفِّي الْمَوْجَات الْهُوْجْ

تِغْسِل هَـ الْغَبْرَه عَنْ قَلْبِي

ـ2ـ

غْنَانِيكِي.. طَلْبِه مَسْمُوعَه

رَفْعِتْ بِالتَّقْوَى أَعْلامِكْ

وْفَرْشِتْ نَغْمَاتِكْ عَ رْبُوعَا

وْزَرْعِتْ أَبْيَاتَا بْأَحْلامِكْ

يَا لُورَا.. الْغُرْبِه الْـ مَا بْتُوعَى

صَارِتْ عَمْ تِرْقُصْ قِدَّامِكْ

ـ3ـ

مْبَارَكْ هَـ الْمَوَّالْ الطَّالِعْ

مِتْل الْمَارِدْ مِنْ حُنْجِرْتِكْ

سَحْبَاتُو وِاللَّحْن الرَّائِعْ

خَلِّتْنَا نْشِيد بْمَقْدِرْتِكْ

انْقَصِّتْ كِلْمَاتُو مْنِ مْقَالِعْ

سَكْبِتْ بَخُّورَا بْمَبْخِرْتِكْ

ـ4ـ

خَلِّينَا نْعِيش وْنِتْمَتَّعْ

بِالأُوف الْـ غَامِرْتُو حْكَايِه

جْنُون الْفَرْحَه!.. لَمَّا مْنِسْمَعْ

صَوْتِكْ فَوْق النَّسْمِه جَايِي

يِصْرُخْ فِينَا: "بَدِّي إِرْجَعْ"

وِيْفَرْفِطْ غُرْبِه مْصِدَّايِه.

**

فيروز .. كوني أمَّنا

يوم زارتنا سفيرتنا الى النجوم

ـ1ـ

كَمْ نَحْنُ مُشْتاقُونْ

كَمْ نَحْنُ مُشْتاقونْ

لِرَفَّةِ الْعَبيرِ وَانْتِفاضِ اللَّيلِ في وَجْهِ السُّكونْ

للأُوفِ.. تَنْفَجِرُ ابْتِهالاً في الْعُيونْ

إنَّا كَرِهْنا الْمَوتْ

لا شيءَ غَيْر الْموتْ!

نَنتَظِرُ الرَّسائِلَ

نُفاجَأُ بِالْمَوتْ

ونَقْرَأُ الجَرائِدَ

فَتُنْبِىءُ بِالْمَوتْ

نُعَمِّدُ الخُدودَ ثُمَّ نَصْرُخُ:

"إنَّا إلى الـلهِ لَراجِعونْ".

ـ2ـ

تَتثاقَلُ السُّنونَ في مِشْيَتِها

وَنَحْنُ مَنْسيُّونْ

قُلوبُنا دِيسَتْ

وَنَحْنُ مَنْسِيُّونْ

تخَدَّرَتْ عُقولُنا

وَلَمْ نُعاقِرِ الخَمْرَةَ والأفْيُونْ

تَغَيَّرَتْ سَماؤنا

واخْتَنقَ هَواؤنا

وَضاعَ في خُبْثِ الدُّجَى ضِياؤنا

لكنَّنا مُنْتَظِرونْ..

سَفيرَةً..

تُنْقِذُنا مِنْ الجُنونْ

سَفيرَةً..

تَنْقُلُنا إلى النَّعيمْ

حَيْثُ الظِّلالُ والتِّلالُ الخُضرُ والزَّيْتونْ سَفيرَةً..

تَحْمُلُنا إلى النُّجُومْ

حَيْثُ الهَناءُ والصَّفاءُ والسُّكونْ

لِنَسْكُنَ التَّارِيخَ..

نَبْني قَلْبَهُ الحَنونْ

ـ3ـ

ما بِها تَأَخَّرَتْ طائِرَةُ الأَماني والأَمَلْ؟

ما بِها تَأَخَّرَتْ فَيْروزُ؟

إنّي في وَجَلْ.

لَقَدْ تَعَطَّرْتُ بِماءِ الوَرْدْ

وَلَبِسْتُ الْمشْلَحَ

المَغْزولَ في أقْصى أعالي الْجُردْ

وَنَفَضتُ الْحُزْنَ عَنْ وَجْهي

وَصَرْخاتِ الخَجَلْ..

يا كُلَّ هذا الإنْتِظارِ الْمُرِّ أَسْرِعْ..

فَإنَّني عَلَى عَجَلْ

ـ4ـ

فَيْروزُ..

يا فَيْروزُ كُوني أُمَّنا

غَدَرَ الزَّمانُ بأُمَّهاتِ أُمِّنا

وَافْتَرَقْنا في بِدايَةِ حُلْمِنا

نَلْعَقُ السَّاعاتِ

نَنْحَرُ يَوْمَنا

مَنْ غَيْرُكِ؟

يُرْجِعُنا إلى الوَراءْ

إلى طَرابُلْسَ

وَبَيْروتَ

وَبَعْلَبَّكِنا الشَّمَّاءْ

إلى الجَنوبِ

والشِّمالِ حَيْثُ الأَرْزَةُ الخَضْراءْ

إلى رُبُوعِ الوطَنِ

المَسْكوبِ في قَوالِبِ الْمَساءْ

مَنْ غَيْرُكِ؟

يَزْرَعُنا أَزْهارَ حُبٍّ وَوَفاءْ

في مُروجِ الخُلْدِ..

في أَزِّقَّةِ السَّماءْ

مَنْ غَيْرُكِ؟

يا نُقطَةَ الماءِ الوحيدَةَ في غَياهِبِ الصَّحْراءْ

يَشْفي غَليلَ الشَّعبِ أثْناءَ الرَّحيلِ..

والْفَناءْ

ـ5ـ

نُحبُّكِ..

مَحَبَّةَ الْجِبالِ والسُّهولْ

وَميجانا الفلاَّحِ..

يَزْرَعُها تُراثاً في الْحُقولْ

والأُوفِ.. مِنْ منجَيْرَةِ الرّاعي

تَئِنُّ بِاقْتِرابِ الشَّمْسِ لِلأُفُولْ

نُحِبُّكِ..

يا عُرْسَنا الْمَمْلُوءَ هَيْصاتٍ وَدَقَّاتِ طُبُولْ

يا كِتاباً..

حِبْرُهُ وَهْجُ الضِّياءْ

أَنْزَلوهُ..

رَغْمَ وَحْيِ الأَنْبِياءْ

لِيُنيرَ الْكَوْنَ أَحْلاماً..

وَيَحْيا في العُقولْ

ـ6ـ

هَتَفَتْ أَلْسُنُنا مِنْ كَثْرَةِ السُّرورْ:

عاشتِ الأسْماءُ يا فَيْروزُ

يا لُؤلُؤَةَ الْبُحورْ

يا مَنْ عَبَرْتِ الْحاجِزَ المُرْتَفِعَ كالسُّورْ

وَدُسْتِ،

رَغْمَ العُنْفِ،

أَنْفَ الْقاتِلِ الْمَغْرورْ

ها أَمْطَرَتْ أَنْفُسُنا أَنْجُمَ نورْ

وَسَقَتْ كُلَّ الدَّياجيرِ

وَأَبْوابَ العُبورْ

لِمْ سَمِعْنا أَنَّ في الأُفْقِ ضِياءْ

لِقُدومٍ يَبْعَثُ فينا الرَّجاءْ..

فَتَعالَيْ مِثْلَ حُلْمٍ

لا يَخافُ وِحْشَةَ الدَّيْجورْ

نَحْنُ شَعْبٌ واحِدٌ

مَهْما سَمِعْنا

قَدْ شَرِبْنا القَهْرَ

والحُبَّ رَضِعْنا

وابْتَلَعْنا هَجْرَنا حَتَّى شَبِعْنا

وَتَواعَدْنا بِأَنَّا سَنثُورْ..

يا دِرْعَنا الَّتي بِها نَصُدُّ ضَرْباتِ الدُّهورْ

يا جِسْرَنا الباقي إلى اتِّحادِنا

وقَدْ تَهَدَّمَتْ كُلُّ الجُسورْ

ـ7ـ

صَوْتُكِ الآتي إلَيْنا

مِنْ سَماءِ الحُزْنِ

مِنْ لُبْنانْ

يا ميناءَ الحُبِّ،

يا مَنارَةَ السَّلامِ

والأمانْ

يا سَفيرَةً إلى نُجومِ العِشْقِ

والحَنانْ

يا بَحَّةَ الرِّياحِ في تَعَرُّجِ الجبالِ

والوِدْيانْ

صَوْتُكِ الآتي سَيَنْشُلُنا "كَجِرْجِسَ"

مِن بَراثِنِ التِّنِّينِ

والنِّسْيانْ

بَعْدَما ضِعْنا

كَفَرْنا

وَحَقَنَّا الكِذْبَ في الشِّرْيانْ

وَنَسَيْنا أنَّنا ضُعَفاءُ

لا نَقْوَى عَلَى الْهَذَيانْ

صَوْتُكِ الآتي سَيُنْهي العَيْبَ فينا

وَيَدْفَعُنا لِكَيْ نَبْتَدِىءَ

الآنْ..

**

أللـه يحميها

قدمت بها الفنانة ريما الياس عام 1990

طفْلِه زْغِيرِه.. يِخْزِي الْعَيْنْ

فَنَّا حْكايِه مْنِحْكِيهَا

هِدْيِتْ مَهْجَرْنا شْرِيطَيْنْ

وِالتَّالِتْ عَ دْوالِيهَا

مْبَارِحْ وِقْفُوا عَ الْمَيْلَيْنْ

النَّاس وْسِمْعُوا غْنانِيهَا

زِيدُوا فَوْق الْخَمْسِه تْنَيْنْ

وْقُولُوا: أَللَّـه يِحْمِيهَا

خَلِّتْنا نْعِيش الْعُمْرَيْنْ

وَحْدَا الطّفْلِه رِيما الْيَاسْ

بْتِشْرُقْ شَمْس لْياليها

**

مازة وكاس

قدمت بها الطفلة ريما الياس 1989

لا تْخَلُّوا يِفْضَى هَـ الْكاسْ

وِالْمازَه تِنقَصْ يا ناسْ

رَحْ بِتْغَنِّي طفْلِه زْغِيرِه

مَجْبُولِه بْرِقَّه وْإِحْسَاسْ

عُمْرا خَمْسِه.. بَسّ كْبِيرِه

بِالْفَنّ.. الصَّعْبِه يِنْقاسْ

يا عْصَافير السَّهْرَه طِيرِي

وْيا عُشَّاق الْفَن تْهَيُّوا

رَحْ بِتْغَنِّي ريما الْياسْ

**

بلسم

قدمت بها الطفلة ريما الياس 1992

مَهْما شْرِبْتُو مرّ الْكاسْ

وِالدَّمْعَه كَرْجِتْ عَ الْخَدّ

في بَلْسَمْ بِقْلُوب النَّاسْ

وَاسِعْ.. ما بِيحِدُّو حَدّ

وْفي طفْلِه مَرْبَى الإِحْساسْ

حَبِّتْكُنْ.. وِالْحُبّ اشْتَدّ

بْحُنْجِرْتا تْمَرَّى الإِلْماسْ

وِالآخ.. بْنَغْماتَا ارْتَدّ

طفْلِه إِسْما رِيما الْياسْ

مِتْلا.. لا قَبْل وْلا بَعْدْ

**

صرخة أوف

قدّمت بها الفنانة ليلى الحلو عام 1984

صَرْخِةْ أُوف مْنِ جْرُودي

وِصْلِتْ عَ الْغُرْبِه مْنِ زْمانْ

مِحْيِتْها، وْقالِتْ: عُودي

يا شْعُوبي.. بْيِكْفي هُجْرانْ

فِينَا الأَرْزِه مَوْعُودِه

وِالأَهْل وْكلّ الْخُلاّنْ

يا لَيْلى.. غَنِّي وْجُودِي

صَوْتِكْ حِلُو مِتل الإِسْمْ

وْمِتل الأَرْزَات بْلُبْنانْ

**

غياب إنتو

قدّمت بها الفنان حنا داود عام 1981

يِسْعِدْ مَسَاكُنْ.. تا شْفَافِي يِتْعَبُوا

وْإِتْعَبْ أَنا.. وْدَمْعِةْ عُيُوني تِشْرَبُوا

غِيّاب إِنْتُو.. وِالْهَجْر حُزْن وْأَنينْ

وِشْعُوبْ عَ شْطُوط التَّعاسِه نَاطْرِينْ

يْطِلّ حَنَّا.. يِمْسَح غْبار السّنينْ

وْسَطْر الْهَجْر مِنْ كِلّ دَفْتَرْ يِشْطِبُو

**

صوت

قدّمت بها الفنان الياس إسحق عام 1979

إِسْمُو نَبْع مْنِ الإِحْسَاسْ

بْيِسْكَرْ مِنْ نَغْماتُو الْكاسْ

هُوِّي الصَّوْت الْـ خَلاَّ الْفَنّْ

بْمَهْجَرْنا يْصَفِّي نِبْراسْ

بْسَحْبِةْ أُوفُو عَمّ نْجِنّْ

وْسُورِيَّا تْزَيِّنْ أَعْراسْ

وْتِشْتاق لإبْنا وِتْحِنّْ

وِتْقِلُّو: يا الْيَاسْ اسْحَاقْ

غَنِّي وْرَقِّصْ كِلّ النَّاسْ

**

مطربنا

قدمت بها الفنان بديع مظلوم 1987

وَحْدُو وَحْدُو مُطْرِبْنا

الْـ بِيغَنِّي وِبْيِعْجِبْنا

صَرْخِةْ أُوفُو يا إِخْوان

بِتْنَسِّينا مْصَايِبْنا

بَدِيعْ مَظْلُومْ الْفَنَّانْ

الْـ دَوَّخْ مَلْبُورْن مَعْ لُبْنانْ

جَايِي اللَّيْلِه يِطْرِبْنا

**

تعريف

قدمت بها الفنان رامز ناصيف عام 1991

جايينا مْنِ سْتِدْيُو الْفَنّْ

مُطْرِبْ ما بَدُّو تعْريفْ

بِتْرَقِّصْ نَغْماتُو الْجِنّْ

وْإِيدَيْنا بْتِشْبَعْ تِزْقِيفْ

وِالْقَلبْ اللّي كانْ يْعِنّْ

وْعَنَّاتُو بَدَّا تِخْفِيفْ

كِلْ ما صَوْتُو بْإِدْنُو يْرِنّْ

بْتُوقَفْ عَنَّاتُو وْبِيقُولْ:

غَنِّي يا رامِزْ ناصِيفْ

**

مطرب جبل

قدمت بها الفنان بطرس فرح عام 1985

مْنِ زْمانْ صَرْلِي بَعرْفُو مْنِ زْمانْ

مُطْرِبْ جَبَلْ.. لِمِّنْ جَبَلْنا كانْ

بِتْفِيقْ وادِي انْ ضَجِّتْ الْهَيْهَاتْ

بِـ حُنْجَرَه ما بْيِمْلِكا فَنَّانْ

وْمَلْيُون تَلِّه بْتِفْرُش الآهاتْ

قِدَّامْ مُطْرِبْ فَرَّحْ الإِنْسانْ

بُطْرُسْ فَرَحْ.. مُطْرِبْ جَبَلْ لُبْنانْ

**

إبن زغرتا

قدمت بها الفنان أسعد نعوم عام 1988

السَّهْرَه ابْتَدْيِتْ.. أُوعَا تْقُومْ

سَهْرِتْنا بِتْمَحِّي هْمُومْ

فِيها الشِّعْر.. وْفِيها الْكَيْفْ

وْفِيها كْواكِبْ.. فِيها نْجُومْ

إِبْن زْغَرْتا عِنْدُو الضَّيْفْ

أَغْلَى مْن الْحُلْم الْمَرْسُومْ

بِيقَدِّمْلُو كْرُوم الصَّيْفْ

وْسَهْراتُو ما بْيِرْضَى تْكُونْ

إِلاَّ مَعْ أَسْعَدْ نَعُّومْ

**

شروقي

قدمت بها السيّدة يولندا عصام الملكي 1986

بَدَّا تْغَنِّي.. قِلْنا: مْنِيحْ

هَلَّقْ بِتْجِنّ الدَّبْكِه

تاري شْرُوقِي رَحْ بِتْصِيحْ

وِتْخَلِّي النَّغْمِه تِحْكِي

بْيِنْطُرْ صَوْتا هْبُوبْ الرِّيحْ

بْسَحْباتُو فَاتِحْ شِرْكِه

مْعَلَّقْ عَ بْوابَا مْراجِيحْ

حْبالاَ مَجْدُولِه مِنْ صَوْت

يُولَنْدا سَام الْمِلْكِي

**

نيشان

قدّمت بها فرقة أرز لبنان للدبكة عام 1989

إِيلي عاقُورِي فَنَّانْ

دَرَّبْ صَبايا وْشُبَّانْ

عَ دَبْكِه انْغَرْمِتْ بِجْرَيْنَا

وِنْقَلْناها عَ الْهجْرانْ

بْتِسْبَقْنا كِل ما غنَّيْنَا

وْبِتْصِير تْرَنْدِحْ قِصْدانْ

مَعْ فِرْقَه سَكْنِتْ عِينَيْنَا

وْعلَّقْنا الزَّقْفِه نْيِشَانْ

عَ صَدْرَا.. وْصَارُوا إِيدَيْنا

قَبْل الصَّوْت يْحَيُّوا الْفَنّ

اللِّي بْفرْقِةْ أَرْز لُبْنانْ

**

موسم خير

قدمت بها الفنان سايد خضير عام 1988

ضَوَّى الْفَنّ.. الْمَوْسَمْ خَيْرْ

الْغُرْبِه فِرْحانِه وِالطَّيْرْ

عَمْ بِيغَنِّي غْناني الْحُبّْ

وْصَوْب بْلادُو يْجِدّ السَّيْرْ

تا يْخَبِّرْها قِصِّةْ قَلْبْ

خَبَّرْ قِصِّتْها لِلْغَيْرْ

وْرَغْم جْنُون سْنِينْ الْحَرْبْ

مشْتاقَه غْصُون الأَرْزاتْ

لْصَوْت الْمُطْرِب سَايْد خْضَيْرْ

**

غصون الأرزة

قدّمت بها الفنان فؤاد خليفة 1983

صَوْتُو بِيمَحِّي الْهُجْرانْ

فِزِّي عَ الدَّبْكِه فِزِّي

مِنْ مَلْبُورن جَايِي إنْسَانْ

بْصَوْتُو مَلْبُورنْ مُعْتَزِّه

غَنَّى بْهَـ الْغُرْبِه لُبْنانْ

وْأُوفُو بِيرَجِّعْ عِزِّي

فُؤادْ خَليفِه الْفَنَّانْ

عَ شْفَافُو تْمَرْجَحْ مَوَّالْ

وْعَ صَدْرُو غْصُون الأَرْزِه

**

عصافير

قدمت بها الفنان أديب رميا عام 1981

صَوْتُو مِنْ أَحْلَى الأَصْواتْ

وْدَقَّاتُو أَحْلَى بِكْتِيرْ

لِمِّنْ بِيغَنِّي الْهَيْهاتْ

بْتِسْكَرْ مِنْ صَوْتُو عْصَافِيرْ

بْأَرْض الْغُرْبِه بْقِلُّو: هاتْ

كْبِير بْفَنَّكْ إِنْت كْبِيرْ

دَوْزِن بِالعُود الدَّقَّاتْ

اشْتَقْنا لْصَوْتَكْ يا أَدِيبْ

سَمِّعْنا تَا اللَّيْل يْطِيرْ

**

آويها

قدمت بها الفنان جورج مخول 1999

عَنْ فَنُّو شُو بَدِّي قُول؟

عِمْلاقْ بْفَنُّو عَ طُولْ

بْصَوْتُو فَرْحِتْنا كْبِيرِه

دِقَّيْنَا بْهَـ الْفَرْحَه طْبُولْ

وْرِشَّيْنا زْهُور كْتِيرِه

وِالآوِيها عَمْ بِتْجُولْ

وْحَتَّى ما تْطُول السِّيرِه

طِيرِي يا زَقْفِه طِيرِي

رَحْ بِيغَنِّي جُورجْ مَخُّولْ

**

سحر

قدمت بها الساحر بريندان عام 1981

السِّحرْ مَنُّو كِيفْ ما كانْ

وْتَا تْصَفِّي سَاحِرْ فَنَّانْ

لازِمْ تِخْفِي التّفَّاحاتْ

وِالْكَلْب يْصَفِّي سِعْدانْ

وْلازِمْ تِبْلَعْ سِكِّيناتْ

صَعْبِه يِكْسِرْها سِنْدانْ

وِالْحلْوِه سِتّ الْحلْواتْ

تْقِصَّا.. وْقَلْبَكْ مِنْ صوَّانْ

لا تْقُولوا: فَرْجِينا هاتْ

لَوْ بَعْرِفْ إِسْحر يا ناسْ

ما جِبْت الْـ إِسْمُو بْرِينْدانْ

**

ما بتسأل عني

قدمت بها الفنان أحمد ياسين عام 1974

وَقْت الْـ بِلْمَحْ عِينَيْها

بْفَكِّرْ حالِي بِالْجَنِّه

عَمْ إِتْسَلَّقْ عَ دَيْهَا

وْإِعْمِلاَّ هَيْصَه وْرَنِّه

الْحِلْوِه الْـ مِتْشَوّقْ لَيْها

خِلَّيْتَا تِسْأَلْ عَنِّي

سِمَّعْتَا أَحْلَى تْلاحِينْ

وْقِلْت: يا أَحْمَدْ ياسِينْ

غَنِّي.. كِرْمالي غَنِّي

**

زهر بساتين

قدمت بها الفنان سمير بدر عام 1977

بْيِفْرَح قَلْبِي كِل ما تْقُولْ:

أَهْلا وْسَهْلا بِمْحِبِّينْ

اشْتاقُوا لْطَلاَّتَكْ عَ طُولْ

لْسَحْبات الصَّوْت الْحِلْوِينْ

نَغْماتَكْ دَوْخِت الِعْقُولْ

وْحنْجِرْتَكْ فِيها حْسَاسِينْ

وْأُوفَكْ عَ النَّغْمِه مَحْمُولْ

وْمَوَّالَكْ زَهْر بْسَاتِينْ

يا سَمِير بْفَنَّكْ جُولْ

إِنْت بْتِعْطِي بْدُون حْسَابْ

وْنِحْنا لْفَنَّكْ مِشْتاقِينْ

**

باقة زهر

قدمت بها فرقة أرز لبنان الفلكلورية عام 1983

إِسْمِكْ صَفَّى وَيْن ما كانْ

يا حُلْم بْنات وْصِبْيَانْ

زَرْعُوا الدَّبْكِه بْغُرْبِة قَهْرْ

حَتَّى ما نِنْسَى الأَوْطانْ

يا فِرْقَه روَّضْتِي الْهَجْرْ

وِعْمِلْتِي مِنُّو فَنَّانْ

ما مْنِنْسَاكِي طُول العُمْرْ

يا الْـ دَبْكاتِكْ مِنْ صوَّانْ

مْنِهْدِيكِي بَاقاتْ الزَّهْرْ

وْمِنْلاقِيكِي بِالزِّيناتْ

يا فِرْقِةْ أَرزْ لُبْنانْ

**

الإسم كبير

قدّمت بها الفنان أنطوان عيسى عام 1978

مِنْ مَقْلَعْ صَخْر الصّوَّانْ

مِنْ شلاَّلات الْوِدْيانْ

مْنِ هْبُوب النَّسْمِه بَكِّيرْ

جَمَّعْ صَوْتُو هَـ الْفَنَّانْ

مِجِدْلاوِي.. الإِسْم كْبِيرْ

وْفَنُّو أَكْبَرْ بِالْهُجْرانْ

يا أنطُونْ.. نْطَرْنا كْتِيرْ

طلّ وْغَنِّيلَكْ موَّالْ

كْرَامِةْ أَرْزِتْنا بْلُبنانْ

**

شباب العيلة

قدمت بها أعضاء فرقة البلابل الموسيقيّة سيمون وأنطوني وداني الياس عام 1991

تْلاتِه.. وْشُو تْلاتِه اسْمَاللَّـه

لْطَلِّتْهُنْ مشْتاقَه عْيُونْ

شْباب الْعَيْلِه الْـ مِنْجِلاَّ

الْـ رَبِّتْهُنْ.. تا تْرَبِّي فْنُونْ

تْسَوْسِحْ هَـ الدِّنْيِي كِلاَّ

وِتْقُول: بْسِيدْنِي يا ناسْ

فِي تْلاتِه بْفَنُّنْ إِحْسَاسْ

سِيمُون وْداني وأَنْطُونْ

**

ريما الياس

مهرجان يوم محمد زهير الباشا عام 1989

غَنِّتْلي "جدِّي" وِبْكِيتْ

وْعِبَّيْت دْمُوعي بِالْكاسْ

سْنِينَا بِالدَّمْعاتْ سْقِيتْ

شِرْبَيْتُنْ رِقَّه وْإِحْسَاسْ

قَالِتْلِي: كِرْمالَكْ جِيتْ

وْكِرْمال "الْباشا" الْحَسَّاسْ

وْكِرْمال الشَّعْب الْـ ما نْسِيتْ

تِشْجِيعُو الْـ مِنْ دُون قْيَاسْ

قِرَّبْت عْلَيْها وِحْكيتْ:

بْإِسْمي بْإِسْم الْمَوْجُودينْ

مِنْحِبِّكْ يا ريما الْياسْ

**

ابن هيفا

مهرجان يوم محمد زهير الباشا عام 1989

إِسْمُو بِالنُّور كْتَبْنا

وْبِصحّةْ صَوْتُو شْرِبْنا

كاسْ.. وْصِرْنا نْقِلُّو: صِيحْ

أُوفَكْ وَاللَّـه بْتِطْرِبْنا

وِبْرَنِّةْ عُودَكْ تسْبيحْ

عَ شْفاف الْكَوْن سْكَبْنا

وْخِرْطَشْنا عَ جْناح الرِّيح

جُمْلِه.. كْتِير بْتِعْجِبْنا

حْفِظْناها، حْفظْناها مْنِيحْ:

فِرْقِتْنا مِنْ أَرْز الرَّبّ

وْمِيشَالْ هَيْفَا مُطْرِبْنا

**

نجوى ورئيف

مهرجان يوم محمد زهير الباشا عام 1989

ما بَدِّي إِحْكِي عَنَّا

وْحَضِّرْ كِلْماتِي عَنُّو

التّمْثِيلْ بْيِخْلَقْ مِنَّا

وِالْفَن بْيِخْلَق مِنُّو

بْنَهْفَاتا بِتْجَنِّنَّا

وْعَمْ بِيجَنِّنَّا بْفَنُّو

رَئِيف الْبَابا تْأَنَّى

وْنَجْوَى عاصي بْتِسْتَنَّى

وْجُنُّوا مْن الضّحكْ جُنُّوا

**

فرقة مدينة الشمس

مهرجان يوم محمد زهير الباشا عام 1989

الدَّبْكِه.. دَبْكِتْنا مْنِ زْمانْ

رَقْصُوها بْنات وْشُبَّانْ

وِبْسيدْنِي عِنَّا فِرْقَه

عَمْ بِتْدَرِّبْها دايَانْ

هِنْدي.. الْـ أَحْلَى مْن الْحَبْقَه

وْمِن كل وْرُود الْبُسْتانْ

نِحْنا وْهِيِّي رَحْ نِبْقَى

نِزْرَعْ غُرْبِتْنا إِيمانْ

وِنْقِلْلاَّ: بُكْرَا الْمَلْقَى

بِبْعَلْبَك وِبْبَيْت الدِّينْ

وْتَحْت الأَرْزات بْلُبْنان

**

جاد ساسين

مهرجان يوم محمد زهير الباشا عام 1989

مِنْ كَرم سَدِّه جَايِي

عَ سِيدنِي أَشْهَر فَنَّانْ

بْيِحْكِي لِلْحُبّ حْكايِه

تَا يْفَرِّحْ قَلبْ الإِنْسَانْ

نَغْمِةْ صَوْتُو مْنِقَّايِه

نَقَّاها بْإِيدُو الدَّيَّانْ

وْرَغْم الْحَرْب الْـ صَرْلا سْنينْ

كل ما يْغَنِّي جادْ سَاسِينْ

بِتْزَقِّفْ أَرْزِة لُبْنانْ

**

ألبير اسطفان

مهرجان يوم محمد زهير الباشا عام 1989

عَ شْفَافُو تْمَرْجَحْ مَوَّالْ

الْبُلْبُل ما قِدْر يْتَنِّي

وْأُوفُو مَحْصُودِه مْن جْبالْ

صَوَّرْها الْخالِقْ جَنِّه

مِنْ "بانْ" الْـ عَطْيِتْنا عْيالْ

فِيهُنْ لُبْنانْ بْهَنِّي

وِبْهَنِّيها بْشَيْخ الْفَنّ

الْـ بِيخَلِّي الْمُوسيقَى تْجِنّ

يا أَلبير.. دَخْلَكْ غَنِّي

**

البير

قدمت بها الفنان ألبير إسطفان عام 1973

كِل ما سْمِعْتُو بِيغَنِّي

وْيِصْدَحْ بِالصَّوْت الرّنانْ

بْيِحْمِلْني لأَحْلَى جَنِّه

وْبِيرَجِّعْنِي عَ لُبْنانْ

عَ بْلادي الْـ غَصْبِنْ عَنِّي

تْرَكْتا وْفِضَّلْت الْهجْرانْ

بْحنْجرْتُو أَحْلى رَنِّه

مْنِ بْلابِلْ هاك الْوِدْيانْ

وْكل ما حِسَّيْت بْأَنِّه

بْداوي الأَنِّه بْشَهْقِةْ أُوفْ

مُطْربْنا أَلْبير إِسْطفان

**

أرض النّور

قدمت بها الفنانة صونيا جوري عام 1990

بِنْت بْلادِي الْمنْصَانِه

بِالْغُرْبِه ما لْها تانِي

حَبِّتْ لُبْنان الْمَشْهُورْ

وْغَنِّتْلُو أَحْلَى غْنانِيِ

وْقالِتْ لِلشَّعْب الْمَقْهُورْ

حُزْنَك وَاللَّـه بَكّانِي

رَدِّتْ نُورَا لأَرْض النُّورْ

صُونْيا جُوري الْفَنَّانِه

**

حقلاني

قدّمت بها الفنان جوزاف حقلاني عان 2002

جوزاف حِقْلانِي فَنَّانْ

مِتْلُو ما شَاف الْهجْرانْ

بِـ قَلْبُو زَارِعْ أَللَّـه

وْعَ شْفافُو أَرْزِةْ لُبْنانْ

**

جنة قلبي

قدمت بها الفنان جوزاف حقلاني عام 1983

يا حُبِّي لا تِنْسَانِي

وِتْضَيِّعْنِي بْأَحْزانِي

قِلْتِلَّكْ بَدِّي إِعْطِيكْ

جَنِّةْ قَلْبِي الْعمْرَانِه

وْكِرْمال عْيُونَكْ يا شْريكْ

بَدِّي إِهْدِيكْ غْنانِي

وْلَوْ ما بْحِبَّكْ ما بِهْديكْ

غْنانِي مَسْرُوقَه مِنْ صَوْت

الْمُطْرِب جُوزاف حِقلانِي

**

بيوت الخلان

قدمت بها الفنان واكيم نجيم عام 1977

لِمِّنْ بِسْمَعْ صَوْتُو بْصِيرْ

بَدِّي إِرْجَعْ عَ الأَوْطانْ

عَ الضَّيْعَه الْـ رَبِّتْنِي زْغِيرْ

عَ بْيُوت بْتِحْضُنْ خِلاَّنْ

بْصَوْتُو مَغْرُومِه عْصَافِيرْ

مِعْتادِه تْرَنْدِحْ قِصْدانْ

للأَرْض الْمِنْهانِه كْتِيرْ

لِلشَّعْب النّاطِرْ تا يْطِلّ

وَاكيم نْجَيْم الْفَنَّانْ

**

قلب محروق

قدمت بها الفنان واكيم نجيم عام 1982

شُو بَدِّي إِحْكِي يا ناسْ

قَلْبِي مِنْ صَدْرِي مَسْرُوقْ

شْرِبْت الْخَمْرَه جْناس جْناسْ

وْكل عُمْرِي الْخَمْرَه ما بْدُوقْ

بَدِّي صَوْت يْكُون حَسّاسْ

تا حَتَّى الأَعْصَاب تْرُوقْ

نَصْحُونِي أَحْمدْ وِالْيَاسْ

قَالُولي: وَاكِيم نْجَيْمْ

بِيداوي الْقَلْب الْمَحْرُوقْ

**

سهرة مهضومة

قدّمت بها الفنان واكيم نجَيْم عام 1978

قَالِتْ: لَوْ إِنَّكْ إِنْسَانْ

بْتِفْهَمْ بِـ طَبْع النِّسْوانْ

كِنْت بِتْقِلِّلي: قُومِي

نِعْزُمْ عَ السَّهْرَه الإِخْوانْ

نْضَوِّيها بْنُور نْجُومِي

بْضِحْكِه لَوَّنْها الْمرْجانْ

وْتا تْكُونْ سَهْرَه مَهْضُومِه

مْنِدْبُكْ عَ ترْنِيمِةْ صَوْتْ

وَاكِيمْ نْجَيْم الْفَنَّانْ

**

الفجر الزاهي

قدمت بها الفنانة أنطوانيت الدويهي عام 1987

سْأَلْتَا: بْمِين بْتِتْبَاهِي

قَالِتْ: بِالْفَجْر الزَّاهِي

بِالتَّلْج الأَبْيَضْ.. بِالأَرْزْ

بِالْبِرْدَوْنِي.. بِمْلاهِي

خَلِّتْ أَرْضِي تْعِيش بْعِزّ

وِبْمَجْدَا الْمَجْد تْضَاهِي

بْإِهْدِن وِبْبِنْتَا بِعْتَزّ

أَنطْوَنيتْ الْـ عَمْ بِتْهِزّ

الْغُرْبِه.. تَا يِكْبَرْ جَاهِي

**

بحّة صوتك

قدّمت بها الفنّانة أنطوانيت الدويهي عام 1982

مِتْل النّجْمِه.. خَلِّي النُّورْ

يرَدِّدْ لَحنْ غْنانِينَا

مِنْ إِهْدِنْ إسْمِكْ مَنْدُورْ

مْن الأَرْض الْـ فِيها رْبِينا

بْبَحِّةْ صَوْتِك صَوْت طْيُورْ

خَلِّي الأُوف تْلاقِينا

صَوْتِكْ بِيحِبُّو الْجُمْهُورْ

يا دْوَيْهِيِّه.. غَنِّينَا

**

من إهدن

قدمت بها الفنانة أنطوانيت الدويهي عام 1986

مِنْ إِهْدِنْ.. مِنْ حَدّ الأَرْزْ

مِنْ أَرْض انْجَبْلِت بِالعِزّ

طَلِّتْ.. طَلِّتْها حْكايِه

بْغُرْبِه.. جْرُوحاتا بِتْنِزّ

وِالْفَن الْـ كان بْدايِه

صَفَّى بْمُوَّالا يِعْتَزّ

يا دْوَيْهِيِّه اللِّي جايِي

مِنْ بْلادِي.. مِنْ أَحْلَى بْلادْ

نِحْنا بْصَوْتِكْ عَم نِعْتَزّ

**

كنا قلال

قدّمت بها الفنانة أنطوانيت الدويهي عام 1989

زَرْعِتْ فَنّ بْمَهْجَرْنا

مِنْ سِنْة الْواحْد وْسَبْعِينْ

وْأَكْتَرْ.. لَوْلا تْذِكَّرْنا

مِينْ عَمَّرْ مَسْرَحْنا مِينْ؟!

كِنَّا قْلال.. بْيِغْمُرْنا

صَوْتا.. الْـ سَوْسَحْ مُغْتِرْبينْ

وْمِنْ دُونْ خَمْرَه سَكَّرْنا

وْمَحَّى مِنْ غُرْبِتْنا سْنينْ

دْوَيْهِيِّه فِيها كْبِرْنا

وْبِزْغَرْتا زَلْغَطْ صنّينْ

**

بيت عتابا

قدمت بها الفنانة أنطوانيت الدويهي عام 1975

عَ طُول بْمَهْجَرْنا كانْ

الْوَرْد يْفَتِّحْ عَ بْوابَا

نِجْمِه بْيِشْتَقْلاَ لُبْنانْ

وْدَمْعُو عَ الْخَدّ سْكابَا

جَايِي تَا تْرِشّ الأَلْحانْ

بْغُرْبِةْ أَهْلا وْأَحْبابَا

تْغَنِيلُنْ بَاقِةْ قِصْدانْ

تْعَمِّرْلُنْ بَيْت عْتابَا

يا دْوَيْهِيِّه الْـ بِالْهُجْرانْ

رِدِّي بْصَوْتِكْ عَ الأَوْطانْ

ناسْ انْحَبْسِتْ بِغْيَابَا

**

مين قال؟

قدمت بها الفنانة نوال قزي عام 1989

مِينْ قَالْ بَدُّو يِنْطِفِي عِزِّي

وْتِتْقَسَّمْ الأَوْطان.. وِالأَرْزِه

تِدْبَلْ.. وْيِبْكي أَرزتُو لُبْنانْ

هَـ الأَرْزة الْـ بِالْقَلْب مِنْغِرْزِه؟

رَحْ قِلّهُنْ: ما بْتِنْبَكَى أَوْطانْ

صَارِتْ عَ تِمّ الْكَوْن غِنِّيِّه

وْعَ شْفاف زَهْرَه سَحْرت الْجِيِّه

الْجِيِّه اللّي فِيها كْتِيرْ مِعْتَزِّه

وْتَا تَعرْفُو يا ناسْ مِينْ هِيِّي

إِسْما نَوال.. وْعَيْلِتا قَزِّي

**

إنتي وين؟

حفلة الفنانة نوال قزّي، أيلول 1986

نَوال قَزِّي، الْيَوْم، ما فِيِّي

عَدِّد مَواهِبْها الإلَهِيِّه

بِالصَّوْت.. عِنْدا وْتارْ عَمْ بِتْرِنّ

وْبِالحسْن.. أَحْلى وْرودْ جُورِيِّه

وْلَوْلا وجُودا ما انْوَجَدْ لِلْفَنّ

خَاماتْ.. فِينا نْقُول: فَنِّيِّه

بْيِكْفِي الْخَليقَه بْصَوتْها بِتْجِنّ

وْزَرْعِتْ إِسمْ لُبْنانْ غِنِّيِّه

عَ شْفافْ كل ما لأَرْضها بِتْحِنّ

بْتِصْرُخْ بِأَعْلَى صَوْت: إنْتي وَيْن؟

غَنِّي يَا أَجْمَلْ بِنْت بِالْجِيِّه..

**

فراشة

قدمت بها الفنانة نوال قزي عام 1987

مِتْل فْراشِه بِـ نُوَّارْ

بْتِتْنَقَّلْ بَيْن الأَزْهارْ

تا داخ السّاحِل وِالْجرْدْ

مْن الصَّوْت الْـ مِتْلُو ما صَارْ

فَوْق شْفافَا بْيِدْفَى الْبَردْ

وِالتَّلْج بْيِتْحَوَّل نارْ

بْقِدَّيْش الضَّمِّه يا وَردْ

تا وَزِّع للنَّاس زْرارْ

وْقِلْلاَّ: غَنِّي، غَنِّي بَعدْ

بْصَرْخِة أُوفِكْ يا نَوالْ

بِيصَفِّي هَـ اللَّيْل نْهارْ

**

يا عود

قدمت بها الفنانة كريستين وهبة عام 1990

الأَرْزِه الْـ عَمْ تِحْضُنْ شَعْبِي

حْفَرْتِلاَّ إِسْما بْقَلْبِي

وْقِلْتِلاَّ: شِعْرِي مَدْيُونْ

لإسْمِكْ.. يا أَرْزِةْ رَبِّي

أَحْبَابِكْ.. شَجر الزّيْتُونْ

حِمْلُوا غْصُونُو بْهَـ الْغُرْبِه

كِرْمالُنْ غَنّى الْحَسُّونْ

وْمَحَّى الأَيَّام الصَّعْبِه

وِبْسِيدْني الْـ أَحْلَى ما تْكُونْ

نَغِّمْ.. نَغِّمْ يَا هَـ الْعُودْ

وْغَنِّي يا كْرِيسْتِين وِهْبِه

**

دلوعة

قدمت بها الفنانة كريستين وهبة عام 1991

حلْوِه.. مْضُوَّايِه شْمُوعَا

وْعَ شْفَافَا النَّغْمِه بْتُوعَى

بِتْغَنِّي غْنانِي الأَحْبابْ

بْبَحِّةْ صَوْتا الْمَسْمُوعَه

انْغَرْمُوا بْطَلِّتْها الْغِيَّابْ

وْحِسْبُولا بِالْفَنّ حْسَابْ

كْرِيسْتِينْ وِهْبِه الدَّلُّوعَه

**

كذبة

قدمت بها الفنان طوني وهبة عام 1990

غُرْبِتْنا، وَاللَّـه، كِذْبِه

ما مْنِرْتاح بْهَـ الْغُرْبِه

إِلاَّ ما نْسَاعِد لُبْنانْ

وِنْبَعِّدْ عَنُّو الضَّرْبِه

وْإِلاَّ ما نِسْمَعْ فَنَّانْ

شَعْبِي.. وِبْفَنُّو شَعْبِي

قَلْبُو كْبِيرْ.. وْشُو إِنْسَانْ

طِلّ انْدَهْلُو يا قَلْبِي

وْقِلُّو: تَا يِحْلا الْهُجْرانْ

غَنِّي يا طُوني وِهْبِه

**

جنة

قدمت بها الفنان طوني وهبة عام 1986

تَا تْصَفِّي هَـ الْغُرْبِه جَنِّه

تِفْرَح بْأَشْعارِي وْفَنِّي

لازِمْ إِزْرَعْها بِمْحَبِّه

وْخَلِّي النُّورْ يْشَرْقِطْ مِنِّي

وْقِلُّو: تا تِكْبَرْ يا شَعْبِي

وِتْعِيش بْلا أَنِّه وْعَنِّه

سْمَعْلَكْ أُوف بْأَرْض الْغُرْبِه

مِنْ مُطْرِبْنا طُوني وهْبِه

اللِّي بْيِسْكِرْنا بَسّ يْغَنِّي

**

دموع الغربة

قدّمت بها الفنان عدنان السمروط عام 1973

صَوْتُو بِيوَصِّلْ لِبْعِيدْ

تَا يِزْرَعْ بِالدِّنْيِي عِيدْ

وْيِمْسَحْ بْلَيْلات الْهَمّْ

دْمُوع الْغُرْبِه والتّنْهِيدْ

وْعَ سَحْبِةْ أُوفُو بْتِلْتَمّْ

شْعُوب وْبِتْجِنّ زْغارِيدْ

وِتْقِلُّو: يا إِبْن الْعَمّ

بْلَيْل الْغُرْبِه صُبّ نْبِيدْ

وْغَنِّي يا عَدْنانْ وْزِيدْ

**

بي الفن

قدمت بها الفنان عدنان السمروط  عام 1981

شِفْت الْحِلْوِه زِعْلانِه

مِتْل الْوَرْدِه الدّبْلانِه

ضْحِكْتِلاَّ.. بِكْيِتْ الِعْيُونْ

رْجِعْت ضْحِكْتِلاَّ تاني

وْقِلْتِلاَّ: شَرْبِلْ مَجْنُونْ

بِعْيُونِكْ يا مرْجانِه

قَالِتْ: حَتَّى حُبِّي تْصُونْ

وْتا ما تْخُون الأَمانِه

بَدِّي غْناني.. بَدِّي فْنُونْ

مِنْ إِبْن السَّمْروطْ.. عدْنانْ

بَيّ الْفَنّ اللُّبْناني

**

شطوط النيل

قدمت بها الفنان جان خليل عام 1991

سْتِدْيُو الْفَنّ بْيِشْهَدْلُو

مْنِ بْلَوْزا لِشْطُوط النِّيلْ

قْلال كْتِيرْ الْـ عَ شَكْلُو

ما بْعُمْرُو حَبّ التِّبْجِيلْ

فَنَّانْ.. وْما فِي مِتْلُو

عَ صَوْتُو الْغُرْبِه بِتْمِيلْ

وْمِنَّا لْحالا بْتِنْدَهْلُو:

يَا مُطْرِب هَاك الأَرْزاتْ

غَنِّيلي يا جان خَليلْ

**

عزّك دايم

قدّمت بها الفنان جان خليل، 1991

غَنِّيلُنْ بِالْغُرْبِه كْتِيرْ

وْرَقِّصْلُنْ هَـ النَّسَايِمْ

غَنِّيلُنْ تا الْقَلْب يْطِيرْ

عَ جْناحْ الصَّوْت الْحالِـمْ

عَ النَّغْمِه الْـ كِلاَّ تْباشِيرْ

عَ الأُوفْ الْـ بَعْدُو صَايِمْ

غَنِّي وْخَلِّي النَّاس تْصِيرْ

تِشْهَدْلَكْ يا جانْ خَليلْ

وِتْقِلَّكْ: عِزَّكْ دايِـمْ

**

حكاية

قدّمت بها الفنانة لورا حاتم عام 1983

عَنْ صَوْتا شُو بَدِّي قُولْ

حْسَاسِينْ بْصَوْتَا بِتْغِلّ

وْبِيلاقُوها بْدَقّ طْبُولْ

وْبِيرِشُّوا قِدَّامَا الْفلّ

حْكايِه صَارِتْ.. مُشْ مَعْقُولْ

بِنْت الْجِيِّه لِمْ بِتْطِلّ

بْتِسْحر بِـ طَلِّتْها عْقُولْ

وِقْلُوب النَّاس بْتِحْتَلّ

يَا لُورَا حَاتِمْ عَ طُولْ

رَحْ تِبْقِي غِنِّيِّةْ حُبّْ

مَزْرُوعَه عَ شْفاف الْكلّ

**

غنج

قدمت بها الفنانة لورا حاتم عام 1983

فَيْروزْ قالُوا.. بَشّرُوا اللِّي قَالْ

ضِحْكِةْ سَما الْجِيِّه بْعِينَيْهَا

وْعَ جْبَالْ صَوْتا رَنْدَح الْمُوَّالْ

نَغْماتْ عَمْ تِرْقُصْ حَوالَيْها

وْحَيَّك زْقِيفْ النَّاسْ أَحْلى شالْ

شَبَّعْ غُنجْ لِبْناتْ دِينَيْهَا

لُورا.. الْـ زَرْعِتْ هَجْرنا آمالْ

وْغَنِّتْ بِصَوْتا أَرْزنا الْغالي

تا صَارْ أَللَّـه يْبارِك عْلَيْها

**

سهرية

قدمت بها الفنانة لورا حاتـم عام 1987

أَحْلَى حِلْوات الْجِيِّه

وِالأَرْض اللُّبْنانيِّه

عَ صَوْتَا بْيُوعَى الْحَسُّونْ

وْبُلْبُلْ رَنْدَحْ غِنِّيِّه

لَوْلاها ضَاعِت الفْنُونْ

وْخِسْرِتْ قِيمِتْها شْوَيِّه

بْنَغْمِتْها أَللَّـه مَفْتُونْ

السّاكِنْ أَرْزِه دَهْرِيِّه

صَوْتا مِنْ اَحْلَى ما يْكُونْ

لُورا حاتِم وَحْدا بَسّ

بْتِقدرْ تِخْلَقْ سَهْرِيِّه

**

نغمة بلبل

قدمت بها الفنانة لورا حاتم عام 1987

طَلِّةْ أَرْزِه طَلِّتْها

سِحْرَا ما فِيك تْقَاوِمْ

نَغْمِةْ بُلْبُلْ نَغْمِتْها

حَبُّوبِه وْقَلْبَا مْسَالِمْ

زْهُور الدِّنْيِي الْـ حَبِّتْها

انْجَمْعِتْ كلاَّ بْباقِةْ حُبّ

انْهَدْيِتْ لَـ لُورا حَاتِمْ

**

صايم

قدمت بها الفنانة لورا حاتم عام 1990

بُكْرَا لَمَّا بْيِجِي الصَّوْمْ

عَنْ صَوْتَا مَنِّي صَايِمْ

صَوْتَا بِيخَلِّينِي دَوْمْ

بْأَرْزات بْلادِي حَالِمْ

بِنْت الْجِيِّه الْـ غَنِّتْ قَوْمْ

عِزُّنْ بِالْغُرْبِه دَايِمْ

تا يِسْمَعْها.. شِفْت النَّوْمْ

لابِس تْيَابُو وْقَايِمْ

الَيْوم وْبُكْرَا وْكلّ يَوْمْ

غَنِّي يا لُورا حاتِمْ

**

بلبل

قدمت بها الفنان ميشال هيفا عام 1977

فَنَّان مْن الْمِنْيِه صَارْ

حْكايِه.. لازِمْ نِحْكيها

رَقَّصْ بِالْعُود الأَوْتارْ

وْطَيَّرْ كلْمِةْ آوِيهَا

بْموَّالُو بْتِفْرَحْ أَطْيَارْ

وْكِلْماتُو الْـ بِيغَنِّيها

زَرْعِتْ خَلْف اللَّيْل نْهارْ

وْخَلِّتْنا نِفْرَح فِيها

مِيشَال هَيْفَا بُلْبُل طارْ

تَا هَـ الْغُرْبِه يِمْحِيهَا

**

هموم الغربة

قدّمت بها الفنان ميشال هيفا عام 1983

سْمِعْتُو بِيقِلُّنْ: عُودُوا

لِلسَّهْل.. لأَعْلَى جْرُودُو

تا تْغَنِّي حْقُول التّفَّاحْ

وْتِرْجَعْ تِحْمَرّ خْدُودُو

وْبِالْجرْد العالي يِرْتاحْ

الْكَرمْ الْـ نَشَّفْ عنْقُودُو

وْكِل ما يْرَنْدِحْ عَمْ تِنْزاحْ

هْمُوم الْغُربِه.. وِجْهُودُو

خَلِّتْنا نْقَاوِمْ أَرْياحْ

وْمَوْطَنَّا نِحْمي حْدُودُو

بْحِبُّو كل ما بْأُوفُو صاحْ

وْبِفْتَحْ قَلْبِي طُول الْعُمْر

لْميشَالْ هَيْفَا مَعْ عُودُو

**

دمع العنقود

قدّمت بها الفنان لحود الحدشيتي عام 1987

عَ جْوانِحْ نَغْماتُو بْعُودْ

عَ بْلادِي.. عَ أَعْلَى جْرُودْ

عَ كْرُومْ بْتِعْزِمْنا دَوْمْ

تَا نِشْرَبْ دَمْع الْعنْقُودْ

وْصَوْتُو يْوَعِّينا مْن النَّوْمْ

وِالْمَوَّال يْوَدِّي وْفُودْ

عَ الْغُرْبِه.. تا تْهَنِّي الْقَوْمْ

بْمُطْرِبْ ما فِي مِتْلُو الْيَومْ

إِبْن الْحَدْشِيتِي لَحُّودْ

**

مشتاقة

قدمت بها الفنان لحود الحدشيتي عام 1990

قِلْتِيلِي: مِشْتاقَه كْتِيرْ

لأُمِّي.. وْما قْدِرْتِي حْكِيتِي

قِلْت بْقَلْبِي: قَلْبَا كْبِيرْ

الْحُزْن اللِّي جُوَّاتُو تْقِيلْ

لازِمْ سَمِّعْها مْواويلْ

مِنْ لَحُّود الْحَدْشِيتِي

**

زهر الكون

قدمت بها الفنان لحود الحدشيتي عام 1988

لِمِّنْ عَ الْغُرْبِه جِيتِي

تْحِمَّلْتِيهَا وْما شْكِيتِي

رَحْ قَدِّمْلِكْ زَهْر الْكَوْنْ

مْحَوَّشْ مِنْ هَوْنِيك وْهَوْنْ

وْهاك الأُوف الْـ ما نْسِيتِي

مِنْ لَحُّود الْحَدْشِيتِي

**

حدشيتي

قدمت بها الفنان لحود الحدشيتي عام 1990

يا حَدْشِيتِي غَنِّي وْجُودْ

وْرَقِّصْ دَقَّات السَّاعَه

وْوَدِّي مَوَّالَكْ عَ جْرُودْ

بْلادي.. وْخَفِّفْ أَوْجاعَا

الأَرْز الْـ بِالْعالي مَوْعُودْ

يِزْرَعْ صَوْتَكْ بِضْيَاعَا

وِاللِّي بِالْقَاعَه مَوْجُودْ

حَابِبْ يِسْمَعْ يا لَحُّودْ

مَوَّال يْهِزّ الْقَاعَه

**

شطوطي

قدمت بها الفنانة تراز طربيّه عام 1987

بْهَـ الْحَفْلِه الْـ ما لْها تانِي

حابِبْ قَدِّمْ فنَّانِه

صَوْتا عَمْ بِيشَتِّي نْجُومْ

مِنْ نَغْمِتْها سكْرانِه

خَلَّى الْغُرْبِه تْمَحِّي هْمُومْ

وْتِكْتُبْ مَجْدي الإِنْسانِي

وْعَ شْطُوطي تِنْزَتّ غْيُومْ

صَرْلا مُدِّه عطْشَانِه

فَنّانِه إِسْما مَعْلُومْ

تَرازْ طَرَبَيْه يا ناسْ

عَاجِزْ يُوصِفْها لْسَانِي

**

عصافير الجرد

قدمت بها الفنانة سمارة عام 1984

غْنانِيها باقات الْوَرْدْ

وِمْواوِيلاَ مخْتارَه

غَنِّتْها عْصَافِير الْجرْدْ

الْـ عِمْلِت لِلْغُرْبِه زْيارَه

كل ما تْغَنِّي.. غَنِّي بَعْدْ

بْتصْرخ هَـ الْغُرْبِه وْبِتْقُولْ:

اشْتَقْتِلِّكْ يا سَمارَه

**

طيارة

قدمت بها الفنانة سمارة عام 1985

بَدِّي إِرْكُب طَيَّارَه

وْإِرْجَعْ عَ بْلادي زْيارَه

بَرْكِي بِقْدرْ طَفِّي الْحَربْ

وْصُون الأَرْزِه الْجَبَّارَه

وْإِسْقِي فَوْق رْبُوعَا حُبّ

يابِسْ مِنْ لُهْبِةْ نارَا

وْقِلُّو: تا تِفْرَحْ يا قَلْبْ

بْدِنْيِي صَارِت غَدَّارَه

رَحْ إِكْتُب عَنْ أَرْز الرَّبّ

غِنِّيِّه يْلَحِّنْها الطَّيْر

وِتْغَنِّيها سَمارَه

**

عيون الحلوين

قدمت بها الفنانة سمارة عام 1980

بِفْرَحْ طِلّ مْقابِيلَكْ

يَا جُمْهُوري وْإِحْكِيلَكْ

عَنْ أَصْوات الْفَنّانينْ

الْـ عَمْ بِتْغَنِّي مْواويلَكْ

وِحْياة عْيُون الْحلْوينْ

عَ الدَّبْكِه بَدِّي شِيلَكْ

عَ نَغْمِةْ مُوسِيقِيِّينْ

صَابِيعُنْ بِتْنَقِّطْ فَنّ

وْسَمارَه بِتْغَنِّيلَكْ

**

ضيعتنا

قدمت بها الفنانة سمارة عام 1987

ضَيْعِتْنا حارَه وْحارَه

حابِبْ إِعْمِلاَّ زْيارَه

وْإِرْسُمْ عَ دْرُوبَا مْشَاويرْ

وْإِمْحِي غُرْبِه قِهَّارَه

وِبْيُوتَا الْـ حِبَّيْتا كْتِيرْ

نِخّ وْبَوِّسْلاَ حْجارَا

وْتا حَتَّى زِيد التّقْدِيرْ

بِهْدِيها غنيَّة حُبّ

بْصَوْت النّجْمِه سَمارَه

**

مهرجان

قدمت بها الفنان آميل يواكيم عام 1980

بْمَهْرَجان الْغِنِّيِّه

الْـ كِلُّو تحْضِير وْتنْظِيمْ

صَرْخِتْ وِحْدِه صَبِيِّه

مِنْ دُونْ لا سِين وْلا جِيمْ

حَتَّى تِحْلَى السَّهْرِيِّه

لازِم يْغَنِّي لِلصُّبْح

الْمُطْرِب آميلْ يُواكِيمْ

**

أوتار العود

قدّمت بها الفنان حميد مارون، 1991

كلّ دْقِيقَه غَنِّي وْجُودْ

الأُوف بْصَوْتَكْ ما لُو حْدُودْ

اشْتَقْنا لِرْبُوع الأَمْجادْ

مَطْرَح ما صَلَّى الْمَعْبُودْ

بْصَوْتَكْ رَجِّعْنا عَ بْلادْ

عَ الْوادي.. عَ أَعْلَى جْرُودْ

نِحْنا بِهَـ الْغُرْبِه بْعادْ

وْإِنتْ بْهَـ الْغُرْبِه مَوْجُودْ

سَمِّعْنا أَلْحان جْدادْ

صَوْتَكْ يا حَميدْ مارُونْ

بِيرَقِّصْ أَوْتار الْعُودْ

**

فنّانة

قدمت بها الفنانة يولا البستاني، 1991

بْهَـ الْعِيد الْـ ما لُو تاني

حابِبْ قَدِّمْ فِنَّانِه

صَوْتا عَمْ بِيشَتِّي نْجُومْ

مِنْ نَغْمِتْها سِكْرانِه

خَلاِّ الْجِيِّه تْمَحِّي هْمُومْ

وْتِكْتُب مَجْدا الإِنْساني

وْعَ شْطُوطا تِنْزَتّ غْيُومْ

صَرْلا مدِّه عطْشانِه

فِنَّانِه.. زِينِتْها عْلُومْ

عَاجِزْ يُوصِفْها لْسَانِي

إِسْما يُولاَّ الْبسْتاني

**

إكليل الغار

قدّمت بها الفنانة يولا البستاني عام 1990

كْرَامِةْ أَرْزِه مِنْصَانِه

عَ جْبِينَا إِكْليل الْغارْ

كْرامِةْ شَعْبِي اللُّبْناني

الْـ ما بْيِرْكَعْ قِدّام النَّارْ

رَحْ بِتْغَنِّي فِنَّانِه

طَلِّه وْهَيْبِه وِغْناني

إِسْما يُولاَّ الْبِسْتاني

وْمِتْلا بْهَـ الْغُرْبِه ما صَارْ

**

سهرتنا

قدمت بها الفنانة يولا البستاني عام 1989

سَهْرِتْنا.. ما لْها تانِي

انْدَبْحِتْ فِيهَا الِقْنانِي

وِرْقَصْنا عَ صَوْت الْعُودْ

سْكِرْنا مِنْ أَحْلَى غْنانِي

وْفِرْقَه بِالنَّغْمات تْجُودْ

عَ هَـ النَّاس السِّهْرانِه

تِهْدِيهُنْ مَوَّال جْرُودْ

وِتْسَمِّعْهُن فَنَّانِه

صَوْتا بِالْغُرْبِه مَعْبُودْ

وْإِسْمَا يُولاَّ الْبِسْتانِي

**

هدية

قدمت بها الفنان حنا فرنسيس عام 1990

شَيْخ شْباب الْغِنِّيِّه

بْصَوْتُو بْتِحْلى السَّهْرِيِّه

أَوْتارُو لَوْ بَدّنا نْقِيسْ

مْنِرْبَح فِرْقَه فَنِّيِّه

مُطْرِبْنا حَنَّا فْرَنْسِيسْ

صَوْتُو مِنْ أَللَّـه هْدِيِّه

**

صوتو عيد

قدمت بها الفنان روبير عبيد عام 1980

خَالِقْلُو صَوْتُو الديَّانْ

تَا يْفَرِّحْ قَلبْ الإِنْسانْ

حِبَّيْتُو مْنِ زْمان بْعيدْ

وِحْمِلْتُو بْقَلْبِي قُرْبانْ

وْكل ما الْقَهر بْصَدْري يْزِيد

وِيْزَمْجِرْ فِيِّي الْبُرْكانْ

بِسْمَعْ صَوْتُو.. صَوْتُو عِيدْ

وْأَعْراس تْزَيِّنْها أُوفْ

رُوبير عْبَيْد الْفَنَّانْ

**

ضحكة سنو

قدمت بها الفنان روبير عبيد عام 1979

صَوْتُو بِالرِّقَه مَجْبُولْ

وْضِحْكِةْ سِنُّو دِبَّاحَه

صَرْخِةْ أُوفُو مُشْ مَعْقُولْ

حِمْلِتْنا فَوْق جْناحَا

إِنْسانْ بْفَنُّو مَجْبُولْ

ما بْيَعْرِف طَعْم الرَّاحَه

وِلْهَـ السَّبَبْ بَدِّي قُولْ:

رُوبير عْبَيْد الْفَنَّانْ

وَحْدُو بِيعَبِّي السَّاحَه

**

صورة لبنان

قدمت بها الفنانة هند جبران عام 1975

صَوْتَا مسْتَوْرَدْ مِنْ جُرْدْ

عَمْ يِتْدَفَّى بْحِضْن الْبَرْدْ

غَنِّتْ بِالْغُرْبِه أَلْحانْ

لَفِّتْ غُرْبِتْنا بِالْمَجْدْ

بِعْيُونَا صُورِةْ لُبْنانْ

وْشَعْبُو الْـ عَمْ بِيهاجِرْ طَرْدْ

وْأَطْفَالُو الْـ جَرُّوا الأَحْزانْ

وْعَ شْفَافُنْ أَنَّات الْوَرْد

دَخْلِكْ يا سْمِيِّةْ جُبْرانْ

يَا هِنْد الصَّوْت الْفِرْحانْ

غَنِّيلُنْ.. غَنِّيلُنْ بَعْدْ

**

زعلت مني

قدمت بها الفنانة هند جبران عام 1989

زِعْلِتْ مِنِّي كْتِير كْتِيرْ

وْقَالِتْ: أُوعا تْحاكِينِي

لا بَدِّي رُوح مْشَاوِيرْ

وْلا بْأَشْعارَكْ تِغْرِينِي

قَلْبِي كْبِير وْعَقْلِي كْبِيرْ

وْبَدِّي مِتْلَكْ دَزّيِنِه

نازِلْ بِعْيُونِي تِسْهِيرْ

وْما فِي سَهْرَه بْتِرْضِينِي

قِلْتِلاَّ: بْيِكْفِي تِنْمِيرْ

وْلَنُّو مَرَّه اسْمَعِينِي

اللَّيْلِه.. لِلصّبحْ بَكِّيرْ

رَحْ بِتْغَنِّي هِندْ جبْرانْ

قَالِتْ: حَضِّرْ قنِّينِه

**

موجوع

قدمت بها الفنانة هند جبران في حفلة عاد ريعها للأطفال المرضى.

غَنِّي الْيَوْم.. وْكلّ يَوْم

كْرامِةْ هَـ الطّفْل الْحِزْنانْ

مَوْجُوع.. وْما داق النَّوْمْ

ناطِرْ رَحْمِه مْن الدَّيَّانْ

بَحِّةْ صَوْتِكْ حَبَّا دَوْمْ

وْحَبّ النَّغْمِه وِالأَلْحانْ

لِعْيُونُو.. وْلِعْيُون الْقَوْمْ

غَنِّي يا هند جُبْرانْ

**

نعم

قدمت بها الفنان يوسف كرم عام 1975

نادَيْتها.. قَالِتْ: نَعَمْ

وِالسّحْر عَ وِجَّا ارْتَسَمْ

قِلْتِلّها: تا تِضْحَكِي

بِمْحِي أُمَمْ.. بِزْرَعْ أُمَمْ

جاوبِتْ وِمْلَبَّكِي:

تا تْزِيحْ عَنْ صَدْري الأَلَمْ

ويْغِيب عَنْ عَيْنِي الْبِكِي

هْدِينِي نَغَمْ.. أَحْلَى نَغَمْ

وْقِلُّو.. تا ما نْكَتِّر حَكِي:

جُودْ يا يُوسِف كَرَمْ

**

سهرات جداد

قدّمت بها الفنان عبد الله محمد عام 1987

مَهْما بِالْغُرْبِه تْعِذَّبْنا

وِدْمُوع الْعِينَيْن سْكَبْنا

رَحْ نِغْزُلْ سَهْرات جْدادْ

نْطَيِّرْ ضِحْكِتْها بْمَلْعَبْنا

وْنَخْلقْ مِنْ هَـ الْغُرْبِه بْلادْ

إِسْمَا بِالدَّمَّات كْتَبْنا

نْزَيِّنْها بْفَن.. بْأَعْيادْ

وْفِرْقِةْ مُوسيقَى تِطْرِبْنا

وْعبْدالله مْحَمَّد مُطْرِبْنا

**

وقت الحزه

قدمت بها الفنان رامي الحوزي عام 1989

كِرْمال عْيُون مْحِبِّينْ

بِقْلُوبُنْ خَبُّوا الأَرْزِه

وْزَرْعُوا بِالْعِزّ بْسَاتِينْ

حِمْيِتْنا بْوَقْت الْحَزِّه

كِرْمال عْيُون الْحِلْوِينْ

الزِّرْق.. الْـ ما بَدُّنْ خَرْزِه

خَلِّي غْصُون الْبَان تْلِينْ

وْرَقِّصْنا لِطْلُوع الضَّوّ

دَخْلَكْ يا رَامِي الْحَوْزِي

**

بلاد الأرزة

قدمت بها الفنان جورج قزي عام 1989

جايِي مْن بْلاد الأَرْزِه

تا تْغَنِّي الأَرْزِه عَ طُولْ

صَوْتَكْ رَجَّعْلِي عِزِّي

وْرَقَّصْنِي عَ دَقّ طْبُولْ

وَحْدَكْ.. يا جورج الْقَزِّي

سْرَقْت قَلُوب.. سْحَرْت عْقُولْ

**

مين غيرو؟

قدّمت بها الفنان روبير عبيد عام 1980

بْحِبّ صَوْتُو.. صَرْلِي زْمانْ

مُطْرِبْ مَعْرُوف وْإِنْسَانْ

الضِّحْكِه بْتِرْقُصْ عَ تِمُّو

لِمِّنْ بِيشُوفَكْ فرْحانْ

وْهَمَّكْ.. بِيصَفِّي هَمُّو

وْحُزْنَكْ لِعْيُونُو أَحْزانْ

فَنَّانْ.. الْفَنّ بْدَمُّو

وِالشَّعْب بْسِيدْنِي ضَمُّو

مِينْ غَيْرُو؟.. مِينْ غَيْرُو مِينْ؟!

رُوبير عْبَيْد الْفَنَّانْ

**

أحلى جنّة

قدمت بها الفنان أديب رميا عام 1977

غِنَّجْتَا.. زِعْلِتْ مِنِّي

وْما عادِتْ تِسْأَلْ عَنِّي

قِلتْ: لازِمْ رَاضِيها

بْكِلْماتي، بْشِعْري، بْفَنِّي

قَالِتْ: فِيها وْما فِيها

قِصَّه وْبَدِّي إِحْكِيها

تَا تْرَاضِينِي يا مسْكينْ

رَجِّعْنِي عَ بَيْت الدِّينْ

عَ بْلادي الْـ أَحْلَى جَنِّه

أُوقَفْ عَ تْلالا الْحِلْوينْ

وْأُصْرخْ مِن تِمّ السّكّينْ:

يا أَدِيبْ رَمْيَا غَنِّي

**

هند

حفلة مجلة ليلى 1997

قالُوا: مَجْبُولِه بْحَنانْ

وْشِعْلِةْ مَحَبِّه وْإِيمانْ

هِدْيِتْ غُرْبِتْها أَلْحانْ

عَمْ بِيرَدِّدْها الزَّمانْ

بَحِّةْ صَوْتا مِنْ لُبْنانْ

دَوْزَنْها أَللَّـه الْفَنَّانْ

بْحَفْلِةْ لَيْلَى مَحِّي اللَّيْلْ

دَخْلِكْ يا هِندْ جُبْرانْ

**

منال

حفلة مجلة ليلى 1997

قَلْبِي بِيقِلِّلي طَارِتْ

بِـ فَنَّا.. وْغَمْرِتْ هَـ الْكَوْنْ

غَنِّتْ.. كِبْرِتْ.. وْصارِتْ

أَكْبَرْ مِنْ غُرْبِتْنا هَوْنْ

عَبِّتْ هَـ الدِّنْيِي غْنانِي

إِنكْلِيزِيِّه وْعَرَبِيِّه

مَنالْ حاجْ الْفَنَّانِه

طَلِّتْها عَالَمِيِّه

**

ميشال

حفلة مجلة ليلى 1997

الْفَنّ بْيِمْشِي عَ دَرْبُو

وْبِيلَحِّنْ دَقِّةْ قَلْبُو

عُودُو.. أَوْتارُو شْرايِينْ

بْيِبْكُوا لِمِّنْ يِنْضِرْبُوا

وْصَوْتُو بْلابِل وِحْساسِينْ

مِنْ نَبْع الصَّفَا شِرْبُوا

مِيشال هَيْفا مِتْلُو مِينْ؟

النَّاس بْصَوْتُو بْيِنْعِجْبُوا

**

ريما

حفلة مجلة ليلى 1997

سِيمُون أَسْمَرْ نَقَّاها

لِمِّنْ عَ غُرْبِتْنا طَلّ

الأَرْزِه حَبِّتْ مَلْقاها

وْلُبْنان حَضَّر زَهْر الْفُلّ

فَنّانِه.. وِالْفَنّ جْناسْ

وْهِيِّي فَنَّا عَمْ يِنْقاسْ

بِيحِبُّوها كلّ النَّاسْ

زَقْفِه كْبيرِه لْريما الْياسْ

**

نبراس

قدمت بها الفنانة أنطوانيت الدويهي عام 1975

لِمِّنْ بِتْغَنِّي بْإِحْسَاسْ

بْيِسْكَرْ مِنْ نَغْمِتْها الْكاسْ

هِيِّي الصَّوْت الْـ خَلَّى الْفَنّ

بْمَهْجَرْنا يْصَفِّي نِبْراسْ

يا دْوَيْهِيِّه.. حَتَّى نْجِنّ

خَلِّي الصَّوْت لْنِصّ الليْلْ

يْرَنْدِحْ وِيْرَقِّصْ هَـ النَّاسْ

**

قلب الجمهور

قدمت بها الفنان حنا الحلو عام 1983

رَجَّعْنا لأَيَّام زْمانْ

أَيَّامْ الْعِزّ بْلُبْنانْ

تا يْفَرِّحْ قَلْب الْجُمْهُور

الْجايِي تا يْمَحِّي الْهجْرانْ

صَعْبِه الْخَمْرَه بْراسِي تْدُورْ

إِلاَّ ما يْغَنِّي فَنَّانْ

صَوْتُو بِالْغُرْبِه مَنْدُورْ

إِسْمُو حَنَّا.. وْحِلُو كْمانْ

وْعَ شْفَافُو رَقْصِتْ قِصْدانْ

**

وحدة صفي

قدمت بها الفنانة بولا اسحق عام 1981

اسْأَلُوا الشَّعْب اللُّبْنانِي

لَيْش بْيِعْشَقْ الِغْنانِي؟

بِيجاوِبْ: فِي عِنَّا بِنْت

بْسيدْنِي.. لْفَنَّا خِلْقانِه

ياما وْياما بْصَوْتا كِنْت

فَرِّحْ أَرْضِي الْمِنْهانِه

بْوِحْدِة صَفِّي الأَرْزِه صنْت

وْهِيِّي مِحْيِتْلِي الأَحْزانْ

بُولا اسْحَقْ الْفِنَّانِه

**

حميد

حفلة مجلة ليلى عام 1996

لَيْلى.. اللّي حِبَّيْتَا كْتِيرْ

قَصِيدِه.. وْطِلْعِتْ مِنِّي

وْصَارِتْ بِهَـ الْغُرْبِه تْطِيرْ

تْحَوِّلْها أَحْلَى جَنِّه

وْتِفْرَحْ بِالنَّغْمِه وِتْصِيرْ

تِرْقُصْ عَ ذَوْقَا وِتْقُولْ:

يا حَمِيد مارون غَنِّي

**

فرقة أرز لبنان

حفلة مجلة ليلى عام 1996

لَيْلَى.. بْعِيدَا عِيَّدْنا

وْهَنُّونا كلّ الإِخْوانْ

غِنَّيْنا كْتِير.. سْعِدْنا

لَمَّا رَقَّصْنا الأَلْحانْ

وْبِالدَّبْكِه الْحِلْوِه عُدْنا

عَ بْلاد الأَرْز المنْصَانْ

مَعْ فِرْقِةْ أَرزْ لُبْنانْ

**

ريما والعصفور

حفلة مجلة ليلى عام 1996

بْعِيدِكْ، يا لَيْلَى، الْعُصْفُور

غَنَّى وْفَرَّحْ قَلب النَّاسْ

وْصَفَّى اللَّيْل يْوَزِّعْ نُورْ

وِالْكاس يْبَوِّس بِالْكاسْ

وْنِسْمَعْ آهات الْجُمْهُورْ

كل ما تْغَنِّي رِيما الْياسْ

**

منال حاج

حفلة مجلة ليلى عام 1996

حِلْوِه كْتِير وْبِنْت عْيالْ

وْبِنْت القدْس الْمنْصَانِه

حَبِّتْ شَهْقات الْمُوَّالْ

تَرْجِمْتُو لْعالَم تانِي

بِالإنْكليزي يا مَنالْ

عَبِّي هَـ الْكَوْن غْنانِي

**

عدنان السمروط

حفلة مجلة ليلى عام 1996

طَلِّتْ ما إِلْها غَايِه

إِلاَّ تْقِلُّنْ: نِحْنا كْبارْ

وْكِلْمِتْنا مْن الْبِدايِه

انْكَتْبِتْ عَ جْبِينْ الأَحْرارْ

وْعدْنان السَّمْرُوطْ جايي

يْغَنِّي بْعِيدَا غِنّيتَيْنْ

وْيِزْرَعْ بِهَـ الليْل نْهارْ

**

هند جبران

حفلة مجلة ليلى عام 1996

مِنْ سِيدْنِي.. مِنْ مَلْبُورْن طَلّْ

جُمْهُورِكْ يا "لَيْلِتْنا"

وْجُودِكْ فَرَّحْ قَلْب الْكلّ

اشْتَرْكُوا الْكلّ بْعَيْلِتْنا

جِينا نْرِشّ عْلَيْكي الْفُلّ

وْنِسْهَر وِالْمُوسِيقَى تْجِنّ

وْهِنْد تْرَقِّصْ حَفْلِتْنا

**

ميشو

ميشال هيفا، حفلة مجلة ليلى عام 1996

عَ الْحَفْلِه لِمِّنْ جيتِي

ضُوِّيْتِينا وِضْوِيتِي

إِسْمِك "لَيْلى" بِنْت الْعِزّ

أَجْمَل آيات قْرِيتِي

هْدِيتِينا طَرْحات الْقَزّ

وْأَحْلَى الرَّقْصات هْدِيتِي

وْمَعْ "مِيشُو" حَسُّون الأَرْزْ

فَوْق النَّغْمات عْلِيتِي

**

شعبك أرز

قدمت بها الفنان حميد مارون عام 1980

شَعْبَكْ أَرْز مْوَدّعْ أَرْزْ

وْإِسْمَكْ مِنْ أَحْلَى ما يْكُونْ

رَحْ بِيغَنِّي إِبْن الْعِزّ

لْمَجْدَكْ.. تَا الأَمْجاد تْصُونْ

تْرَابَكْ كَنْز.. وْحُبَّكْ كَنْز

كْنُوز بْيَعْرِفْها الْحَسُّون

شُوف الْغُرْبِهْ كِيفْ بِتْفِزّ

عَ الدَّبْكِه.. وِبْتِصرخْ: أُوفْ

غَنِّي يا حَميد مارونْ

**

نهر

قدمت به الفنان ميشال هيفا عام 1977

بْرَنِّةْ عُودُو سِكْرُوا النَّاسْ

وِالنَّاس بْتِسْكَر بِالْحُبّ

صَوْتُو فَايِض بِالإِحْساسْ

نَهْر.. وْشُو بْيِحْلالِي الشّرْب

لِمِّنْ ضِعْنا وْضَاع الرَّاسْ

صَوْتُو وَعَّانا بْهَـ الْغَرْب

بِالْغُرْبِه مِنْ دُون قْياسْ

مِنْحِبّ الْمُوسيقَى كْتِيرْ

وْمِيشَال هَيْفَا.. وْأَرْز الرَّبّ

**

بحة صوتا

قدمت بها الفنانة يولا بستاني عام 1982

جايِي تْخَلِّي الأَرْض تْمِيلْ

بْناس بْتِدْبُكْ فِرْحانِه

وِهْمُوم الْغِيَّاب تْشِيلْ

بْبَحِّةْ صَوْتا اللُّبْناني

جَايِي تْسَمِّعْنا مْواوِيلْ

وْتِهْدِي لِلنَّاس غْنانِي

لا صَار مِتْلا وْلا بِيصِيرْ

إِسْما يُولاَّ الْبِسْتانِي

**

فرقة صنين

قدمت بها فرقة صنين للدبكة عام 1985

دَبْكِتْها.. صَخْر الصُّوَّانْ

وْشَهْقِةْ زَهْرات بْسَاتِينْ

دَبْكِتْها.. قُوِّةْ إِيمانْ

بْشَعْب الأَرْز الْـ ما بِيلينْ

يا فِرْقَه.. زَرْعِتْ لُبْنانْ

غِنِّيِّه بْتِمّ حْساسِينْ

كِرْمال عْيُون الإِنْسَانْ

الضَّايِع بِالْغُرْبِه مْن سْنِينْ

طِلِّي يا فِرْقِة صنِّينْ

**

غنية لبنان

قدمت بها الفنان رمزي كنعان عام 1981

بْصَوْتُو.. بْتِتْجَمَّعْ أَلْحانْ

بِتْفَرِّحْ قَلْب الإِنْسانْ

زَار بْلادُو وْخَلَّى الأُوفْ

تْرَنْدِح غِنِّيِّةْ لُبْنانْ

نَغْماتُو انْطَبْعِتْ عَ شْفافْ

أَطْفال رْجال وْنِسْوانْ

بِهَـ الْغُرْبِه أُوعا تْخافْ

خَلِّي الْغُرْبِه تْهِزّ كْتافْ

وْتِدْبُكْ يا رَمْزِي كِنْعانْ

**

كل يوم

قدمت بها الفنان عاطف دنّون عام 1989

الْيَوْم وْبُكْرَا وْكلّ يَوْم

رَحْ نِسْمَعْ صَوْت الْحَسُّونْ

إِبْن الْعاصِي الْـ خَلَّى النَّوْم

يِرْقُصْ عَ وْتار الْقَانُونْ

حَفْلِتْنا زَيَّنْها قَوْم

بِوْجُودُنْ قَلْبِي مَمْنُونْ

كْرَامِة عَيْن الْـ بِيحِبُّوكْ

وْجُوات قْلُوبُنْ خَبُّوكْ

غَنِّي يا عاطِفْ دَنُّونْ

**

شو ع بالا

قدمت بها الفنان جاد شلالا عام 1991

عَمْ تِرْقُصْ شُو عَ بالا

الشّمْس بْتِلْطَى بِخْيالا

بْتِنْطُرْ صَوْتُو حَتَّى يْطلّ

وْبِتْصَفِّي تِقْشَعْ حالا

كِرْمال الْوَرْدِه والفُلّ

غَنِّي يا جادْ شْلالا

**

ويلي بريص

1972

وِيلِي.. كان أَوَّلْ فَنَّانْ

قِدَّمْتُو بْأَرْض الْهُجْرَانْ

لكِنْ.. مِنْ سُوء التّدْبِيرْ

ضَاعِتْ أَشْعارُو مْنِ زْمانْ

زْعِلْت كْتِيرْ.. كْتِير.. كْتِيرْ

وْكَرْجِتْ دَمْعات الْقصْدانْ

وِيلِي بْرَيْص.. الْـ قَلْبُو كْبِيرْ

حَامِلْ بِـ قَلْبُو لُبْنانْ

**

فن جديد

قدمت بها الفنانة فيكي مارون

صَوْتا مِنْ أَحْلَى ما يْكُونْ

سَارِقْ نَغْماتُو الْحَسّونْ

الأُوفْ بْتِنْقِلْنا لبْعيدْ

وْبِتْطَفّي بِالْغُرْبِه جْنُونْ

وْبِتْحَوِّلْ سَهْرِتْنا عِيدْ

عَم بِيضَوِّي فْنُونْ فْنُونْ

لَوْنَا جْدِيدْ.. وْفَنَّا جْدِيدْ

الْفَنَّانِه فِيكِي مارونْ

**

وفاء صدقي

قدمت بها الفنانة وفاء صدقي 1989

صوتا بيسَوْسِح العقول

هيك النغمه قالتلي

شِعْري بْنبراتو محمول

مين بْهالدنْيي مِتْلي؟

رقصتلي دقّاتْ طْبول

بْريشة عودا دَقّتْلي

بيكفيني بْهالغربه قولْ:

وفاء صدقي غنّتْلي

**

فرقة ارز لبنان

ألقيتها بمناسبة مرور أربعين سنة على تأسيس فرقة ارز لبنان الفلكلورية 16/12/2017

ـ1ـ

أربعين سنه.. ولكْ كيف مرقت قولْ

يا بْنِ العاقوري الـ بالوفا مجبول

سنين تعبت من شقا الهجران

وبعدك قوي.. انشالله العمر بيطول

ـ2ـ

صرلي زمن عم جمّع الأوزان

تا إمدحك.. والشعر ما بيزول

بتطل متل الحلم ع الوجدان

وبتصادق، وصدقك حَكي معسول

ـ3ـ

فرقة أرز لبنان وين ما كان

بيرق محبه، بالدهب مشغول

قدّام إسمك في إسم أوطان

همّك، إيمانك، تنتصر ع طول

ـ4ـ

وْحَدّك شباب، بنات، مع نسوان

رقصوا الدبكه وطيروا العقول

كل اللي فلّوا من قديم زمان

اجتمعوا الليله بحب مش معقول

ـ5ـ

زرعوا الفرحه بقلبك الزعلان

عرفوا في غصّه والدموع سيول

بميلاد رب الناس والأكوان

لازم الضحكه ع الشفاف تجول

ـ6ـ

درّبتهن بالعز والتحنان

تا صار إسمن بالعَلَم مجدول

قامات متل جبال من صوان

ودبكات صوتا بالمجد مغزول

ـ7ـ

أرزات خضرا جامعا بستان

وقلبك وطن.. صار الوطن مسؤول

لفرقة أرز لبنان.. يا لبنان

حضّر وسام الأرز.. دقّ طبول

ـ8ـ

إيلي عاقوري مبدع وفنان

لمن ع صدرو بيرقص النيشان

بيصير ع أشرف صدر محمول

**

اسماعيل

الى الفنان العراقي اسماعيل فاضل

ـ1ـ

غنّالي مصر وبيروت

وبغداد اللي بحبّا كتير

أشعاري دخلت البيوت

بصوتو.. الْـ متلو ما بيصير

ـ2ـ

دهب.. والجوهر ياقوت

والنغمه صوت عصافير

اسماعيل فاضل عم بيفوت

ع قلبي.. ويشبع تقدير

**

ميرنا

الى الفنانة المرنمة ميرنا نعمة 

ـ1ـ

لميرنا نعمه.. شو رح قول

تا إشكرها، وشكري يطُول

الغربه المزروعه أشواك

محيتها.. وضحكت الحقول

غنّت شعري.. قلت: ملاك

وبالترجمه.. مش معقول

فتحت بالعتمه شبّاك

نورو بيسوسح العقول

ـ2ـ

يا ميرنا عدّي الإيام

الـ ترجمتي فيها الأشعار

بتتجمّع كل الأحلام

الـ بتخلّينا نصير كبار

يمكن عينينا ما تنام

ويمكن نقلق ليل نهار

لكن بدموع الأقلام

منرسم دنيي من الأزهار

بتتشاوف فيها الأعلام

ومنسكنها كبار زغار

**

الياس اسحق

قدمت بها الفنان الياس اسحق عام 1989

يا الياس اسحق الفنان

إسمك لامع بالهجران

صوتك من أجمل ما يكون

صوت البلبل والحسون

الـ وحّد سوريا ولبنان

**

ابتسام

قدمت بها الفنانة ابتسام الصغيرة عام 1985

صوتا وقّعني بحيرَه

بالغنيّه أميرَه

لمن بتغني بتصير

ترميني ببحر الحيرَه

بصوتا جوقات عصافير

بحلف متلا ما بيصير

إبتسام الصغيرَه

**

وفاء

قدمت بها السيدة وفاء صدقي عام 1988

غنتلي غناني كتيره

وألحانا كانت أكتر

كبيره بالفن كبيره

ونقرات العود بتسحر

يا وفاء صدقي صيري

حلم الشعب اللي مهجّر

وع جناح النغمه طيري

كل ما تغني عم نكبر

**

قحطان

قدمت بها الفنان قحطان حدارة عام 1991

غمزتني وقالت: معقول

تنطرني السهره كلاّ

تا إسمع صوتو المجبول

بالأوف العم تتحلّى

قلّو يغني.. وخلّي طبول

تدقلّو.. الفرحه حلاّ

قحطان حدارة الفنان

طارت من عودو الرنان

نغمه.. باركها أللـه

**

جهاد

قدمت بها عازف الكمان جهاد العريضي عام 1982

الكمان الصفّى إنسان

خلّيتو يحكي ويزيد

وكلما بتعزف ع الكمان

منعيش بهالغربه عيد

يا جهاد الإسمك كان

يفرش للفن مواعيد

من عزفك صفّى الهجران

من دون آهات وتنهيد

يا بْن العريضي الفنان

بمعزوفاتك في تجديد

**

متل الصافي

قدمت بها الفنان اصديق جورج مارون عام 2018

متل "الصافي" صوتو صار

يرش الفن حوالينا

سحبة أوفو ع الأوتار

ما بتفارق دينينا

شمالي النبره.. جدودو كبار

زرعوا الخير بإيدينا

كل ما يغني شمس نهار

بتشرق جوّات عينينا

يا جورج مارون الجبّار

بالفن.. وصوتك من نار

سمّعنا.. وحنّ علينا

**

فرانسوا

قدمت بها الفنان فرانسوا عازار عام 2019

حابب إمشي ع دربو

وإتمنى عيش بقربو

عرفتو بهالغربه إنسان

عم يرفع قيمة شعبو

بوجودو صفّى الهجران

أرزه.. وحاميها ربّو

فرانسوا عازار الفنان

بحبّو من قلبي بحبّو

**

مجدي الحسيني

حفل تكريم الفنان مجدي الحسيني في برلمان ولاية نيو ساوث ويلز من قبل الدكتورة بهية ابو حمد 2018

ـ1ـ

جاءَ "الْحُسيني" حاملاً وترا

كنّا، وكان الهجرُ منتظرا

سيدني.. وأطيارٌ مُلونةٌ

باحتْ بسرٍ كان مُستترا

ـ2ـ

مَنْ رافقَ الأمجادَ باتَ هُنا

يا مصرُ صارَ العقلُ مُنبهرا

عبدُ الحليم اليومَ في فرحٍ

مَن قالَ إنّ "العبدَ" قد قُبرا

ـ3ـ

ما من عظيمٍ فوقَه حجرٌ

إلاّ أزحنا بالوفا الحجرا

هذي "البهيَّة" كفُّها كَرَمٌ

فيها القوافي صاغتِ الدررا

ـ4ـ

والبرلمانُ.. الحُكْمُ في بلدٍ

منْ أجلِها بالوردِ قد نُثِرا

يا سيدَ الأنغامِ هذا أنا

لستُ أمام العزف مُقتدرا

ـ5ـ

الشّعرُ كالعُنقودِ خمرتُهُ

إعصرْ لنا.. فالكأسُ قد أمرا

مَنْ لا يداوي جرحَهُ نغمٌ

مثلَ الذي بالماءِ قد سَكِرا

ـ6ـ

أنتَ الذي إن شئتَ تُفرحُنا

هلاّ أزلتَ الغمَّ والكدرا

وقعُ الغناءِ الفجِّ يُزعجنا

فيهِ نشازُ الطبلِ إنْ كُسِرا

ـ7ـ

فالضجّةُ الحمقاءُ تقتلُنا

والسمعُ من إيقاعِها انفجرا

أهلاً بفنٍ خالدٍ أبداً

قلبي وقلبَ الناسِ قد أسَرا

ـ8ـ

مجدي.. إذا الأهرامُ شامخةٌ

كنتمْ لها الألوانَ والصورا

والنيلُ يدري أين منبعُه

لا لنْ أغالي.. فيكَ قد كَبُرا

ـ9ـ

واللحنُ.. مِنْكَ اللحنُ مندهشٌ

أودعتَه الأكوانَ فانتشرا

والأورغُ.. أنتَ الأورغُ.. يا ملكاً

أحييتَ فينا السمعَ والبصرا

خبّرْ متى عدتَ الديارَ بأنْ

فنَّ "العروبَة" ها هُنا انتصرا

**

مجدي بولس

حفل تكريم الفنان مجدي بولس في برلمان ولاية نيو ساوث ويلز من قبل الدكتورة بهية ابو حمد

ـ1ـ

مجدي، عظيمُ الْفَنِّ، وافَرحي

يا مِصْرُ غَنِّي الْيَومَ وانْشَرِحي

أعْطَى كِبارَ الصَّوْتِ فانْطَرَبُوا

يا أَعْيُنَ الْحُسّادِ إِنْدَبِحي

ـ2ـ

"كُلثُومُ" جاءَتْهُ كأُغْنِيَةٍ

تلْحينُها خَمْرٌ بِلا قَدحِ

والْماسُ يَجْري فَوْقَ أُنْمُلَةٍ

أَفْنَتْ بِعَزْفٍ دَمْعَةَ التَّرَحِ

ـ3ـ

فالْجُرْحُ فِي أنغامهِ أملٌ

يا روعةَ الأنغامِ إنْجرحي

والنّيلُ، نَهْرُ الْخَيْرِ يَعْشَقُهُ

والرأسُ يعلو قامةَ البلحِ

ـ4ـ

يا "مجْدَنا" الآتي بِغُرْبَتِنا

لَوِّنْ لَنا قَوْساً مِنَ الْقُزَحِ

سدِّدْ خُطى الفنّانِ في سَفَرٍ

إِجْعَلْهُ نَجْماً غيرَ مُتَّشِحِ

ـ5ـ

ستُّ البَهاءِ نوتَةٌ صَدَحَتْ

قُلْ: يا "بَهِيَّهْ" الْفَنَّ إِكْتَسِحي

الإسْمُ كَنْزٌ وَالْهَوَى وَتَرٌ

فيا كنوزَ الْكَوْنِ إنْفَتِحي

ـ6ـ

أَبُولسٌ.. تَحْيا لأُمَّتِنا

والشّعبُ يَبْكي سَطْوَةَ الشّبَحِ

أَوتارُكَ الْغَنّاءُ تُنْعِشُهُ

أسْكُبْ عَلْيهِ غَيْمَةَ الْمَرَحِ

ـ7ـ

تَكْريمُكَ الغالي يُكَرِّمُنا

أيا نياشينَ العُلى انْبَطحي

فالصّدرُ كالأهرامِ منبتُهُ

على رُخامِ الصدر إنطرحي

مَجْدي.. وَهَلْ لِلْمَجْدِ مِنْ وَطَنٍ

يا ربَّةَ الأشْعارِ.. إمْتَدِحي

**

مارسيل خليفة

مهرجان تكريم الفنان مارسيل خليفة في برلمان ولاية نيو ساوث ويلز من قبل السانتور شوكت مسلماني 2019

ـ1ـ

مَرْسيلُ أنتَ الفنُّ والشعرُ أنا

خذْ من بيوتِ الشعرِ وابنِ الموطِنا

أنتَ العظيمُ الفذُّ.. أنتَ المُبتدا

إنْ سِرْتَ سارتْ خلفَ منكَ الأزمنه

ـ2ـ

فالعودُ لولا عزفُك الحلوُ الشجيْ

أضحى ديكوراً في زوايا الأمكنه

إعزفْ بِهجرٍ.. رقِّصِ الأوتارَ.. مَنْ

مثل "الخليفَه" قدْ يُداوي جُرْحَنا

ـ3ـ

كلُّ الأناشيدِ التي غنّيتَها

عاشتْ بنا.. حتى امتلكنا حلمَنا

لو جارتِ الأيّامُ فنُّكَ ملجأٌ

لو ضاع منّا الصوتُ تبقى صوتَنا

ـ4ـ

إنّي أَحنُّ لخبزِ أمي دائماً

لكنّه الطاغوتُ يسبي قمحَنا

لا، لا تخف، أنشدْ، فأنت المرتجى

من أمّهاتِ اللحنِ يأتي خبزُنا

ـ5ـ

أمشي ولكنْ قامتي لمْ تنتصبْ

فالجسمُ بعد الهجرِ أحناهُ الضنى

لولاكَ ضيَّعنا طريقاً للحمى

فالدربُ يا "مرسيلُ" محّاها الفنا

ـ6ـ

إنّا هجرنا الأرضَ مثلَ سفينةٍ

أنظرْ إلينا قد ملأنا بحرَنا

عمشيتُ يا عمشيتُ كوني نوتةً

كي تفرحَ النوتاتُ منذُ المِيْجَنا

ـ7ـ

أهديتِنا إبناً حبيباً رائداً

غنّى لنبقى.. حتى يبقى أرزُنا

لُبْنانُ.. ما لُبنانُ إلا جنّةٌ

إنْ نرمِها بالنارِ.. يغضَبْ ربُّنا

ـ8ـ

القدسُ ضاعتْ.. لا تسلْ عن "قِبلةٍ"

ما من زعيمٍ أرّقتْه قدسُنا

غنّيتَها.. أوّاهُ لو أخفيتَها

باللحنِ بالأنغام كي تبقى لنا

ـ9ـ

يا ليتَهم أضنوا عدوّي مرةً

حتّى أبوسَ الرأسَ من أعرابِنا

لكنّهم بالكذب قد غطّوا المدى

والكذبُ ملحٌ.. آهِ من أملاحِنا

ـ10ـ

إفرحْ.. بعيدِ الحب أنتَ مكرّمٌ

فالحبُّ بالهجرانِ من عاداتِنا

هذا "السِّناتورُ" الأشمُّ الألمعيْ

في برلمانِ الحقِّ أضحى فخرَنا

ـ11ـ

شوكتْ يضحّي.. مَن يضحّي مثلَهُ؟

إبنُ الجنوبِ "المُسْلِماني" إبنُنا

أهديكَ يا "مرسيلُ" دنيا منْ شَذاً

أدخلْ.. فما أبهاكَ لو تبقى هنا

جئتُم إلينا كي تُزيلوا غربةً

شكراً لكم.. ها قد سكنتم قلبَنا

**

أسمهان

مهرجان إحياء ذكرى الفنانة أسمهان في صالون الدكتورة بهية ابو حمد 2019

ـ1ـ

يا "أسمهانُ".. الصّوتُ قد أحياكِ

أنتِ الأميرةُ والشّذا دنياكِ

"آمالُ فهدٍ" من جبال العُرْبِ هلْ

بالإسم قلبُ الشرقِ قد ناداكِ

ـ2ـ

فالإسمُ فخرٌ للدنى يا نجمةً

شعّتْ هنا.. شكراً لمنْ أسماكِ

فقتِ الخلائقَ نغمةً سحريّةً

كانتْ كشدو الطير في الأفلاكِ

ـ3ـ

ما "الأطرشُ" المحبوبُ إلاّ كُنيةٌ

لمعتْ.. كلمعِ الضوءِ في الأسلاكِ

هذا "فريدٌ أطرشيٌّ" فخرُه

من روعة الألحان قد سوّاكِ

ـ4ـ

فيينا.. وهل للأنسِ فيها ليلةٌ

لو لم تمنِّ العمرَ في لقياكِ

حتّى الطيورُ تهامستْ في جنّةٍ

قالت لربّ الكونِ ما أحلاكِ

ـ5ـ

كلُّ القلوبِ تبدّلتْ أهواؤها

لمّا أمرتِ القلبَ أن يهواكِ

ها مصرُ قد أعطتْكِ مهداً دافئاً

والنّيلُ بالأمجادِ قد غطّاكِ

ـ6ـ

لا لم تموتي في حنايا تُرعةٍ

فالماءُ بالأحضانِ قد لاقاكِ

واللهِ قد عشنا الأسى في غربةٍ

أفراحُنا.. لا لمْ تكن لولاكِ

ـ7ـ

لم ننسَ نوتاتِ الأغاني.. خوفُنا

في زحمةِ الأعمال أن ننساكِ

والصوتُ يشدو رغم بعدِ مسافة

إنّا بسيدني قد رفعنا لواكِ

كم من شعوبٍ قد زوت في لحدها

تفنى.. ويبقى خالداً ذكراكِ

**