**
زواج
قال لي أحد الأصدقاء: يا ليتني لم أتزوّج، فكتبت عن لسانه:
قالُولي: تْجَوَّزْ... يا رَيْت
ما عْمِلْت اللِّي بْفِكْرُنْ كانْ
وْأَعْزَبْ مِتْغَنَّجْ ضِلَّيْتْ
تا قَطِّعْ عُمْري فرْحانْ
بِتْفَكِّرْ حَالَكْ حِبَّيْتْ
وْحُبَّكْ لِلْفَرْحَه عنْوانْ
أَحْلامْ بْقَلْبَكْ خبَّيْت
وْعَ قَلْبَكْ حايِمْ دبَّانْ
الْجَازِه فِيها خْرابْ الْبَيْت
انْ ما ظَبْطِتْ.. بِتْصِيرْ عرْيانْ
بْتِلْبُط حَيْط.. بْتِنْطَحْ حَيْط
وْبِتْصَرِّخْ مِتْل الْخُوتانْ
تا تِبْنِي عَيْلِه.. اسْتِحْلَيْت
وْتا تْرَبِّي بْناتْ وْصِبْيانْ
بْتِضْوِي شَمْعَه.. بْتِنْدُرْ زَيْت
وْنَسْلَكْ مَقْطُوع مْنِ زْمانْ
وْقَعْت.. وْعَ وِجَّكْ طِبَّيْت
وْمِنْ عُمْرَكْ صَايِرْ تِعْبانْ
أَلّله بْيَعْرِفْ مَهْما عْطَيْت
مُش مُمْكِن تِرْضِي النِّسْوانْ
**
بو العيس 1
ثلاث رسائل فكاهيّة أرسلتها عام 1972 إلى الصديق الياس المقدسي (بو العيس)، وكان ، رحمه اللـه، يفرح بهذه الرسائل كثيراً.
ـ1ـ
مِشْتَقْلَكْ يا أَعْظَمْ خَيّ
وْمِشْتاق لْرَنِّةْ صَوْتَكْ
وْمِشْتاق لْمَجْرُورْ الْمَيّ
الْمارِقْ مِنْ قِدَّامْ بَيْتَكْ
ـ2ـ
بْغَمِّضْ عَيْني لَمّا بْنامْ
وِبْصَفِّي قِحّ وْشَنْخِرْ
وْإِحْلَم إِنَّكْ طَيْر حْمامْ
بْتِمُّو قَشِّه وْبِيزَمِّرْ
ـ3ـ
اللُّبْنانِيِّي.. يا بُو الْعِيسْ
نَزْعُوا الطَّبْخَه بِالْمَرَّه
هَوْن اللُّبْناني تلْبِيسْ
أَزْعَرْ.. عَقْلاتُو مْشِرَّه!
ـ4ـ
بْمَلْبُورنْ وِبْسِيدْني مَمْنُوعْ
يِدْخُل لُبْناني عَ الشّغْل
بْحَيْث اللّبْناني مَصْرُوعْ
بَاعْ الْقِيمِه بْرَبْطِةْ فِجْلْ
ـ5ـ
دَخْلَكْ سَلِّمْ عَ أَنْطُونْ
خِطَّار وْعَ ناياتُو
وْعَ خَيَّكْ طُوني الْمَلْعُونْ
اللِّي بْتِدْوِخْني دَقَّاتُو
ـ6ـ
وْسَلِّمْ عَ أُمّي وْبَيِّي
وْعَ سِتِّي وْجِدِّي طَنُّوسْ
وْقِلُّنْ: عِنْدِي حِنِّيِّه
بْتِقْتُلْ جَحْشَيْن وْجامُوسْ
ـ7ـ
وِغْنانِيكْ يا بُو الأَحْبابْ
حِفْظُوها نِصّ الإِنْكلِيزْ
عَ فَيْقَه كِيفْ الأَصْحابْ
بُو سامي وْجِرْس وْعَزيزْ
ـ8ـ
صَرْلي مُدِّه بْحُورْ وْدُورْ
وْباكُلْ خَسّ وباتِنْجانْ
وْصَدِّقْني إِنِّي مَسْرُورْ
لَكِنْ يا مَحْلَى لُبْنانْ
ـ9ـ
وْبِالآخرْ بِهْدِيكْ سْلامْ
قَدّ زْغَرْتا وِالْفُوَّارْ
وْأَيْطُو الْـ كِنَّا فِيها نْنامْ
وْمِجِدْلَيَّا مَعْ عكَّارْ
**
بو العيس 2
ـ1ـ
كِيفَكْ؟.. كِيف حْوالَكْ؟.. قُولْ
وْكِيفْ غُورُو مَعْ كَمُّولَه
يُوسِفْ وَهِيبْ شَامِطْ طُولْ
وْحِفْظ اللُّغَه عَ أْصُولا
ـ2ـ
وْكَمالْ سِتّ اللّطافِه
اشْتَقْنا لْحِلُو دَيَّاتَا
قَشْطَه وْبِرْما وِكْنافِه
وِزْنُود السِتّ بْذَاتَا
ـ3ـ
سِلْفَا وْزَوْجَا وِوْلادَا
مْناح كْتِير وْمَبْسُوطِينْ
انْشَاللّـه فِرْحِتْ بِبْلادَا
وِبْشَوْفِةْ سِتِّي خْرِسْتِينْ
ـ4ـ
غَمِّضْ عَيْن وْفَتِّحْ عَيْنْ
وْبِتْلاقِي الأَزْعَرْ سِمْعانْ
وِجُّو بْيِضْوي عَ الْمَيْلَيْنْ
وْمِشْتاقْ لأَرْزِةْ لُبْنانْ
ـ5ـ
شَهْر انْ كَتَّرْ رَحْ بِيطِيرْ
وِيْصِيرْ بْحُضْن الأَحْبابْ
حَضِّرْلُو شِي جِفْت كْبِيرْ
وْكَلْب يْكُون زِينِة الِكْلابْ
ـ6ـ
سَايْمُنْ.. شَيْخ الصِيّادِي
كِلّ ضَرْب بْيِرْمِي عَصْفُورْ
وْحَافِظْ نِتْفِةْ قِرَّادِي
بْتِكْسُر رَاسْ أَكْبَرْ شَحْرُورْ
ـ7ـ
خَبِّرْني انْ كَنَّكْ عَ الصَّيْفْ
رَحْ تِجْمَعْ فِرْقِةْ لُبْنانْ
وْتِعْمِلَّكْ شِي حَفْلِةْ كَيْفْ
نْكايِه بِالْـ إِسْمُو فْلَيْتانْ
ـ8ـ
وْبِالآخِرْ.. سَلِّمْلِي كْتِيرْ
عَ إِمَّكْ.. عَ إِخْوانَكْ
وْعَ أَهْلي الْـ رَبُّوني زْغِيرْ
عَ الْخُوري وْعَ جِيرانَكْ
ـ9ـ
وْدِمْت لْشَرْبِلْ يا بُو الْعِيسْ
وْعَ شِعْرِي أُوعا تْنَكِّتْ
رَاسي فاضِي مِتْل الْكِيسْ
وِالسَّاعَه بْإِدْنِي تَكِّتْ
**
بو العيس 3
ـ1ـ
يا لَلُّوسْ كِيفْ حْوالَكْ؟
أَللَّـه ما يِشْغُلْ بَالَكْ
صَدِّقْنِي يا أَعْظَمْ خَيّ
إِنْت الْوَفا رِسْمالَكْ
ـ2ـ
قِلِّي: عَمْ تِقْرَا الدَّبّورْ
يَمّا بِتْخافْ عَقْصاتُو؟!
بُكْرا بْتِقْرا شُو مَنْشُورْ
عَنْ بُو الْعِيسْ وْرَدَّاتُو
ـ3ـ
هَللّي كْتَبْتُو مِنْ يَوْمَيْن
رَجَّلَّكْ سِيدْني كِلاَّ
مِنُّنْ قَالُوا: يِخْزي الْعَيْن
وْمِنُّنْ قَالُولي: اسْماللـه
ـ4ـ
لِمِّنْ بِرْجَعْ نِصّ اللَّيْلْ
بِتْسَمَّعْ غِنِّياتَكْ
وِبْخَبِّرْ نجْمات سْهَيْلْ
عَنْ أَهْلي.. وْعَنْ سَهْراتَكْ
ـ5ـ
تْعِرَّفْت بْمُطْرِبْ مَشْهُورْ
بْسِيدْني.. قالْ بَدُّو غْنانيكْ
صَارْ يْدِقّ.. وْصار يْدُورْ
تارِي طِلْع دْماغُو سْمِيكْ
ـ6ـ
"رْجِعْت مْنِ الْغُرْبِه".. قَلِّي:
مِمْتازِه، بْتِعْملْ شُهْرَه
"وْحاكِيني" فِيها عِلِّه
إِنَّا زْغِيرِه وْمُخْتِصْرَه
ـ7ـ
أَمَّا عَنْ "يَوْم الأَفْراحْ"
بَعْدُو لْهَلَّقْ ما دَرْسُو
شَهْر.. تْنَيْن.. التَّالِتْ رَاحْ
وْبَعْدُو بْيِشْكِي مِنْ ضِرْسُو!
ـ8ـ
وْلَوْلايِي كانْ "نسْر الْجَوّ"
هَاجِمْلُو عَ مْناخِيرُو
زْرَبْتُو بْأُوضَه.. صْرَخْت: وْلَوْ
حَسْنِه عَنَّكْ حَاج تْدِقّ
يَمَّا وْحَقّ الْـ عِمْل الْحَقّ
رَحْ قِصَّلَّكْ عَ الزِّيرُو
* الكلمات الموجود بين "أقواس" أسماء أغنيات ألفتها أنا ولحنها الياس المقدسي
**
بو سامي
أرسلتها للصديق يوسف نصّور عام 1972
ـ1ـ
يا بُو سامي كِيفْ حالَكْ؟
مَحْسُوبَكْ مشْتاق كْتِيرْ
لْوِجَّكْ.. لِفْضَاوِةْ بالَكْ
وِلْشرْب الْقَهْوِه بَكِّيرْ
ـ2ـ
كْتَبْت الْمَكْتُوب بْعِشْرينْ
الشَّهْر الْجاري عَ التَّمامْ
تا إِحْكِيلَكْ عَ الْحِلْوينْ
الْـ خَلُّوني ما إقْدِر نامْ
ـ3ـ
السَّاعَه تْلاتِه.. بَدِّي رُوحْ
عَ الشّغْل وْها أَوَّلْ يَوْمْ
صَلِّي لْهَـ الْقَلبْ الْمَجْرُوحْ
بَرْكِي بْيِقْدرْ يِشْبَعْ نَوْمْ
ـ4ـ
يا مَحْلَى عِيشِةْ لُبْنانْ
وْيا مَحْلَى الزَّعْتَرْ بِالزَّيْتْ
بِالْقَلِيلِه كِيفْ ما كانْ
الْوَاحِدْ مِنَّا عِنْدُو بَيْتْ
ـ5ـ
وِالْفَبَارِكْ.. يا ستَّارْ
عَمْ تِشْرَبْ دَمّ الشَّغِّيلْ
تا تِعْطِي خَمْسِينْ دُولارْ
وْمِتْأَمَّل يِعْمِلْ زَنْكيلْ
ـ6ـ
صَدِّقْنِي إِنُّو الطَّمِّيعْ
مْحَلَّلْ دَبْحُو لْكِلّ النَّاسْ
بْيِتْرُكْ أَرْضُو مِتْل التِّيعْ
تا يْزِقُّوا عَ ضَهْرُو كْياسْ
ـ7ـ
وْقِلِّي لْهَـ الْخِتْيَارِيِّه
الْـ ما داقُوا كاس الْغُرْبِه
انْ شِرْبُوا مَصَّه يا خَيِّي
بْتِقْتِلْهُنْ أَوّل شرْبِه
ـ8ـ
وْدِمْت لشَرْبِل الْمشْتاقْ
لِلضَّيْعَه.. لِرْوابِيهَا
بْحَيْث الْغُرْبِه ما بْتِنْطاقْ
عَمْ سِبّ وْإِسْأَلْ حالي
شُو اللِّي مْحَبَّبْني فيها
**
عمي باخوس
أرسلتها إلى عمي باخوس بعيني عام 1972
ـ1ـ
عَمِّي وْمَرْتُو كِيفْ الْحالْ؟
فْرِحْت كْتِيرْ بْمَكْتُوبْكُنْ
بْسِيدْني طَلْبُوا شَيْخ رْجالْ
ما لَقْيُوا غيرْ مَحْسُوبْكُنْ
ـ2ـ
تا خَبِّرْكُنْ عَنْ رُوبيرْ
ناوِي يِرْجَعْ عَ الأَوْطانْ
وْهَوْنيك بْيِعْمِلْ شُوفيرْ
عَ دِبَّابِه أَوْ عَ تْرانْ!
ـ3ـ
خَيِّي أَنْطُون وْجِرْجِي
مَعْ نِسْوانُنْ وِطْفالُنْ
مِتِّفْقِينْ.. وْشُو فِرْجِه
نِعْمِةْ أَللـه رِسْمالُنْ
ـ4ـ
عَ عِيد الْمِيلادْ جانِي
مِنْ حَنَّا كَرْت بُوستالْ
بِالسَّلامِه هَنَّانِي
وِبْيِسْأَلْني كِيفْ الْحالْ؟
ـ5ـ
وْهَوْني قِلِّةْ ما فِي دْوابْ
وْما فِي مِعْزِي وِشْحاتِيلْ
يِعْنِي يا عَمِّي الْقِصَّابْ
الْـ مِتْلَكْ ما بْيِعْمِلْ زَنْكيلْ
ـ6ـ
سَلِّمْلي عَ عَمَّاتِي
وْعَ جدِّي وْبَيِّي وْأُمِّي
وْعَ سِتِّي اللِّي بِحْياتي
بِفْدِيها.. وْعَ وْلادْ عَمِّي
ـ7ـ
وْبِالآخِرْ بِهْدِيك سْلامْ
مِنْ قَلْبي وْروحي وْعَيْني
وِبْقِلَّكْ عِنْد الْخِتامْ
دمْت لْشَرْبِل الِبْعَيْنِي
**
ميشال شعنين
مثّل ميشال شعنين عام 1969 دور زعيم الهنود الحمر في إحدى مسرحيّاتي.
ـ1ـ
يا مِيشُو كيف حْوالَكْ؟
مِشْتَقْلَكْ مِنْ خَلف الْبَحرْ
وْمِشتاق لْصَوت رْجالَكْ
يا زَعيم هْنُود الْحُمرْ
ـ2ـ
كيفْ بْنَيَّات الضَّيْعَه
هَـ الْـ أَحْلَى مْن نْجُوم الصّبْح
ضَلُّوا انْبِسْطُوا.. وِالْبَيْعَه
لا تْبِيعُوها إِلاَّ بْربْح
ـ3ـ
خَبِّرْني عَنْ يُوسِفْ جِرْسْ
وْعن الْجَوْقَه الْمَفْرُوطَه
بْوَقت الْحَشْرَحَه تَرْكُوا الْعِرسْ
وْراحُوا أكلُوا مَخْلُوطَه!
ـ4ـ
زْعِلتْ.. وْما بْتَعْرِف قِدَّيْشْ
لِمِّنْ يِبْسِتْ تِينِتْنا
لازِمْ نِمْشي عَ البِقْبَيشْ
حَتَّى نِنْسَى مْصِيبِتْنا
ـ5ـ
وْخَيَّكْ جُوجُو وِفْرَنْسِيسْ
مْأَكَّدْ هَلَّقْ صَارُوا شْبابْ
قِلِّي الدِّغْري يا تلْبيسْ
مِشْتَقْلي يَمَّا كِذَابْ؟
ـ6ـ
وإِمَّك فَدْوى وْبُو يوسِفْ
كِيف حْوالُنْ يا خَيِّي
بَعْدُو بَيَّكْ ما بْيَعْرِفْ
إِنُّو مَرْتُو بْعَيْنِيِّه؟!
**
أهلي وأصحابي
أرسلتها عام 1972
ـ1ـ
كيفَكْ يا جدِّي طَنْسِي
أَللـه مِنْ عِنْدُو يْقَوِّيكْ
بَرْكي بْتِحْضَرْلِي عِرْسِي
تا إِتْنَقْوَزْ مِتل الدِّيكْ
ـ2ـ
وْكيفِكْ يا ستِّي خْرِسْتِينْ
وْكيف الْجَيْبِه وِالْعِلْكاتْ
قَوْلِك بَعْدُو حْرامي التِّينْ
عَمْ يِتْسَلَّطْ عَ التّيناتْ
ـ3ـ
عَمِّي.. يا أَعْظَمْ لحَّامْ
لَحْماتَكْ مُشْ مِنْسِيِّه
كِنّا نْقُول التِّلت عْضَامْ
وْتِلْتَيْنُنْ كِبِّه نَيِّه
ـ4ـ
وْيا أُمِّي.. يا أُمّ شْبابْ
طْيُورِكْ مِدْري وَينْ صَارُوا؟!
تْلاتِه غَطُّوا حَدّ الْبابْ
تْلاتِه مِنْ إِيدِكْ طارُوا!
ـ5ـ
انْشَاللّـه يا بيِّي مِنْعُودْ
لِلْحُضنْ الدَّافِي وِنْنامْ
بْجفْن مْغَمَّضْ مُشْ مَوْعُودْ
إِلاَّ بِشْوَيِّةْ أَحْلامْ
ـ6ـ
وْيا آميلْ رِزْقَ اللـه كِيفْ
تْزوّجْت وْنِحْنا بْقِينا؟!
رْبينا سْوِيِّه بْقَلْب نْضِيفْ
كْبِرْنا.. تْغِيَّرْنا.. نْسِينا!
ـ7ـ
أَللـه مِنْ عِنْدُو يْهَنِّيكْ
وْيِبْعَتْلَكْ جَوْقِةْ أَطْفالْ
وْمَعْ سَيّدِه اللِّي اخْتَرْتَا شْريكْ
أَللّـه ما يِشْغِلَّكْ بالْ
ـ8ـ
وْيا مْيشالْ الْياسْ شَعْنِينْ
يا زَعِيم هْنُود الْحُمْر
دْيانا مِنْ أَحْلَى الْحِلْوِينْ
وْبِنْت عْيال.. وْزَهْرِة طُهْر
ـ9ـ
هَنِّيلي أَهْلَكْ عَنِّي
وْهَنِّي حَنَّا وْنَجِيبِه
وْقِلِّي شُو بْتِطْلُبْ مِنِّي
تا إِبْعَتْ.. يا حَبِيبِي
**
يرحم موتاك
دعاني إلى تناول طعام الغداء معه، ولكنه راح يلهيني بأحاديث شتّى، ونحن ندور في الأسواق إلى أن أهلكني الجوع.
ـ1ـ
أَللّـه يِلْعَنْ هَـ الْمِشْوارْ
تْعِبْنا مِنْ كِتْر التّطْلِيعْ
وْفُوخَرْنا.. وِالْجِسْم انْهارْ
يا مِينْ يْعَبِّي هَـ النِّيعْ؟!
ـ2ـ
طَعْمينَا يِرْحَمْ مَوْتاكْ
حَاجِي تِمْشِي عَ مَهْلَكْ
ما كِنَّا جِعْنا لَوْلاكْ
غِلْطوا بهالنِّمره أهلَكْ
ـ3ـ
ريقك طاير من تمَّكْ
وْريقي نشّف بِـ تِمّي
عازمني.. يرحم إمَّك
لا تِلْهيني بالكلمه
ـ4ـ
قلّلي: تفضّل دوقْ الأكل
تا قلَّكْ: تِسْلم يا كْبيرْ
لكنْ عندكْ نتفِة بُخلْ
وْمَحْسُوبَك جوعان كتير
ـ5ـ
تاني مرّه بترجاكْ
لا تعزمني بالمرّه
لسّاني بالصّيني هَجّاكْ
خايف اكسُر هَـ الجرَّه
**
زعلت مني
خاصمني أحد الشعراء لأنني قلت عنه أنه يجيد فنّ الرثاء، واعتبر رثاء الآخرين مذلة له ولشعره.
زْعِلْت مِنّي.. لَيْش يا "داني"؟!
بْحَيْث الْحَقِيقَه دَوْم عَ لْسَانِي
لَوْ ما تْأَبِّنْ إِبنْ مَرْيَم كانْ
قرف الدِّني وْما عادْ مِنْ تاني
وْجِرْجِي وْبطْرُس تَخْتخُوا مْن زْمانْ
شْرُورُنْ ، إِذَا بْتِنْعَدّ، حِرْزانِه
بْمَوْتُو غَفَرْها إِبْن هَـ الإِنْسانْ
حَتَّى تْعِيش عْيالْ قِصْرانِه
وْشَرْبِل إِذَا بِتْعاشْرُوا فنّانْ
قَضَّى حَيَاتُو يْفَقِّع قْناني
بْيُوعَى تا حَتَّى يِسْنُد الإخْوانْ
هُوِّي عَلَى شْفَافُو بْيِغْفَى الْكاسْ
وْغِفْيِت عَ تِمَّكْ بَسّ "بِبْرانِي"!
ببراني: مصاصة
**
آويها
بمناسبة عيد ميلاد الصديق دجيرد البحري الحادي والعشرين.
ـ1ـ
دْمُوعِي سَارْحَه.. وِالرَّبّ رَاعيهَا
صَبِّه إِجِتْنِي وْما عْرِفتْ فِيها
يا دْجِيرِدْ بْهَـ الْواحِد الْعِشْرِينْ
مِنْ كلّ قَلْبِي بْقُولْ: آويهَا
ـ2ـ
شَبّ إِنْت مْنِ الْبَدْر أَحْلَى
عَقْلَك بْرَاسَك ما لْحقتْ جهْلَكْ
وْأُمَّك وْبَيَّك.. بِالدِّنِي كلاَّ
ما انْوَجَد مِتْلُنْ يا نُور الْعَيْنْ
دِيرْ بَالَكْ دَوْم عَ أَهْلَكْ
ـ3ـ
بْهَنِّيكْ مِنْ قَلْبِي يا عِينَيِّي
وِبْحَلّفَكْ لا تِعْتُب عْلَيِّي
الإنْسَانْ لَمَّا بْيِكْبَر شْوَيِّه
بِتْكُون آخِرْتُو هَوا بِالْبَطنْ
وْقَحَّاتْ مَعْ نَوْباتْ قَلْبِيِّه
**
ردة إجر
ألقيتها في حفلة ردّة رجل السيّدة روزانا زوجة إبن عمّتي كلارك بعيني.
ـ1ـ
كْبِرْنا فِيكُنْ يا أَحْبابْ
وْحَقّ اللِّي قام مْن الْقَبرْ
وِلْبِسْناكُنْ مِتل تْيابْ
مْغَلْغَل فِيهُنْ طابِعْ صَبْرْ
دَمْعاتي صَارِت مِزْرَابْ
وِمْناخِيري سَرْحُوا نَهْرْ
لِمِّنْ شِفْت شَيْخ شْبابْ
الِبْعَيْنِيِّه.. حانِي الضَّهْرْ
ـ2ـ
حْكِيلَك كِلْمِه يَا حَنَّا
لْصِهْرَك.. حَتَّى تْطَمِّنَا
عَمْ بِيعَذِبْ هَـ الْمسْكِينْ
الْـ بَعْدُو أَوَّلْ ما تْهَنَّا
قِصَّه ما بْيِقْبَلْها دِينْ
قِصَّه ما قَالاَ أَللَّـه
زَلْمِي بْيِحْمِل كِيس طْحِينْ
بْإِجِرْ وِحْدِه بْيِتْسَلَّى؟!
قِلُّو يا حَنَّا قِلُّو
يَمّا بْياخِدْهَا "تْرايْدِينْ"
يَمَّا بْيِتْرِكْها كلاَّ!
ـ3ـ
نِحْنا.. نِحْنَا بْعَيْنِيِّه
شَبَاب الأَشْبَهِيِّه
مِنْ عَيْلِتْنا بَيت خِطَّارْ
وْكِل الْـ لِحْقُوا الْخُورِيِّه
وْلَوْلانا ما فِي شِعَّارْ
وْلا فِي عَيْلِه حَتِّيِّه
ـ4ـ
حِطُّوا كْبَاش وْشِدُّوا زْنُودْ
زَلْمِتْنا مِتْل الْبارُودْ
ما بِيخاف جْيُوش الأَرضْ
خْلِقْنا عَ هَـ الأَرْض أْسُودْ
لكِنْ قِرْطَيْلِه زْغِيرِه
خْصُوصِي اللِّي ضَهْرَا أَحْمَرْ
يا دِلِّي وْيا تعْتِيرِي
لَوْلا بْعَيْلِتْنا بْتِظْهَرْ
بِتْصَفِّي الأْسُود قْرُودْ
ـ5ـ
لقينَا حَلّ مِنْ حَلَّيْنْ
فِكَّرْنا فِيهُنْ يَوْمَيْنْ
تْرِكُوا إِجْرَا لْروزَانا
وِتْسَلُّوا بْإِجْرَيْن كْلارَكْ
تا نْغَنِّيلْكُنْ مِيجانا
وْنِنْزِلْ بِإِيدَيْكُنْ فَرْكْ
بَرْكِي بِيفَرّخْلُو جْرَيْنْ
أَطْوَلْ مِنُّنْ شِي شِبْرَيْنْ!
**
خوتان
قصيدة فكاهيّة بمناسبة أول قربانة إثنين من أبناء إخوتي: شربل وأنطوني.
ـ1ـ
أَوّل قُرْبانِه اسْمَاللَّـه
انْزَرْعِتْ بِقْلُوب الطِّفْلَيْنْ
وْصَفَّى بْعَيْلِتْنا أَللَّـه
فَاتِح عَ حْسَابُو دُكَّانْ
وْعَمْ يِتْغَنْدَرْ عَ الْمَيْلَيْنْ
ـ2ـ
كِيفْ بَدِّي صَدِّقْ أنْطُونْ
يَللِّي أُمُّو فْرُونِيكَا
وْبَيُّو جُوزَافْ الْمَجْنُونْ
يْفَوِّتْ أَللَّـه عَ هَـ الْبَيْتْ
دقُّوا.. دقُّوا مَزِّيكا؟
ـ3ـ
أَمَّا شَرْبِلْ شَرْبُولِي
الـ بَيُّو أكْبَرْ هَبُّولِي
صَوْتُو بْيِجْعُرْ مِدْرِي لْوَيْنْ
خَلَّى مَرْتُو مَسْطُولِه
انْ قَللاَّ: شْوِيلِي شِي قِرْصَيْنْ
بْتِرْكُضْ عَ الْمَطْبَخْ يا ناسْ
وْبِتْحَضّرْلُو تَبُّولِه!
ـ4ـ
أَمَّا سِتُّنْ، يِخْزِي الْعَيْنْ
بْتِمْشِي، بْتِحْدُل عَ الْمَيْلَيْنْ
حَرْقِت دِينِي وْمَسِّيني
وْتا خَبِّرْكُنْ ما لِي عَيْنْ
كْبِير الْعَيْلِه الْمسْكِينِه
أنْطُونْ الْـ مِنْخارُو تْنَيْنْ
مَرْتُو بَدَّا دَزِّينِه
هُوِّي وْياها نامُوا شْوَيّ
وْجابُوا عَيْلِتْهُنْ بِالدَّيْنْ
ـ5ـ
وْجَرْجُورَه التَّانِي الزَّغْرُورْ
الْواقِفْ بِالشَّمْس وْبِرْدانْ
هُوِّي بْيِفْلَحْ أَرْض الْبُورْ
وْعَ الرِّيقْ بْيِحْصُد بلاَّنْ
وْمَرْتُو بْتِخْبُز عَ التَّنُّورْ
تَا تْطَعْمِي فْلانِه وِفْلانْ
ـ6ـ
أَمَّا مْيِشال الطَّرْطُورْ
الْعايِش بْمَلْبُورنْ دِفْيَانْ
مَعْ تَرُّوزَا الْـ عَمْ بِتْزُورْ
كْنايِسْ.. وِتْفَبْرِكْ أَدْيانْ
يا مار يُوسِف هِد السّورْ
وْيا دَيْر قِزْحَيَّا وَيْنَكْ
بْعَيْلِتْنا كِتْرُوا الْخُوتانْ
ـ7ـ
وْبُولسْنا إِبْن سْلَيْمانْ
الْبَحْرِي.. الْـ مُشْ شَايِف بْحُورْ
مِنْ أَيَّا مَطْرَحْ هِرْبانْ
جنْزِيرُو الظَّاهِرْ مَكْسُورْ
وْأَيْلِينْ الْـ دَمَّا حِلْيَانْ
نَحْلِه.. وْغَطِّتْ فَوْق زْهُورْ
وْعَقْصِتْ بُولسْنا مْنِ زْمانْ
وْما انْتَبْهِتْ إِنُّو مَنْخُورْ
دَخْلَكْ.. دَخْلَكْ.. يَا دَيَّانْ
لا تِتْرُكْ شَرْبِلْ مَقْهُورْ
يا قَعِّدْنِي بِكِينس كْرُوسْ
يا رَجِّعْنِي عَ الأَوْطَانْ!
* كينس كروس منطقة في سيدني مشهورة بملاهيها المختلفة.
**
فتحة وضمة
يوم عمادة إبن أخي جوزاف مرسال بعيني
ـ1ـ
إِذَا ما بْقِلَّكْ كِلْمِه
رَحْ تِزْعَلْ مِنِّي أُمِّي
وْتِقْرُطْ كَشِّه أُمَّكْ لُورْ
وْبَيَّكْ هَـ الْـ عِنْدُو مِنْخُورْ
مِتْل الْفَتْحَه وِالضَّمِّه
ـ2ـ
طْلُوع لْعَمَّكْ يا جُوزافْ
هَللِّي مْنِ الإِعْدَى ما خَافْ
شَرْبِل.. لَوْ تِسْأَلْ عَنُّو
بِيقُولُوا ما فِي مِنُّو
عَ طُول مْغَطَّى بِلْحافْ
ـ3ـ
تْوَقَّى.. تْوَقَّى يا بْنِ الْخَيّْ
مْنِ الشَّمْس.. وْضَلَّكْ بِالْفَيّْ
عَمَّكْ لِمِّنْ شَاف الشَّمْس
دِبْلُوا خْدُودْ مِتل الْخَسّ
وِالْتَمُّوا أَهالِي الْحَيّ
ـ4ـ
وْهَيْدا الْـ رَحْ تِحْمِل إِسْمُو
إِيَّاكْ تِطْلَع عَ كَسْمُو
عَامِلْ حالُو إِمْبِيلُونْس
وْطالِع لْخالُو لُورانْسْ
مِدْرِي أَللَّـه كِيفْ رَسْمُو
ـ5ـ
شُو بْقِلَّكْ يا تِقْبِرْنِي
عَنْ عَيْلِه رَحْ تِفْزِرْنِي؟
عَمَّكْ مِيشُو بِيصَرِّخْ
وْحَرَكاتُو بِتْدَوِّخْ
وْلَوْ تَعْرِفْ شُو بْيِقْهِرْنِي
ـ6ـ
وْعَمَّك جُورج الْـ بِيحِبَّكْ
بِيضَلّ بْحالُو مْلَبَّكْ
بِالصَّيْف بْيِلْبُسْ كَنْزِه
أَسْمَكْ مِن جِلْد الْعَنْزِه
تَاعِبْنِي.. وْتاعِبْ رَبَّكْ
ـ7ـ
وْمَعْنا جِرْس الْيَمُّونِي
وْعَمّتَكْ كَرْمَه يا عْيُونِي
جِرِسْ.. نِحْنا مِنْحِبُّو
ما فِي أَطْيَبْ مِنْ قَلْبُو
لَكِنْ عَمّتَكْ مَجْنُونِه
ـ8ـ
أَللَّـه يْبَارِك الِعْمادِه
وِيْحِنّ عْلَيِّي زْيادِه
تا إِهْرُب مِنْ إِخْواتِي
الْـ عَيْنُنْ عَ مِصْرِيَّاتِي
وْإِرْجَع وَحْدِي عَ بْلادِي
ـ9ـ
هَوْنِيك.. بْعَفِّرْ زَيْتُونْ
وِالزَّعْتَرْ أَطْيَبْ ما يْكُونْ
وْلا قَضِّي عُمْرِي مَعْ جَانْ
صَوْتُنْ وَاصِل عَ لُبْنانْ
وْخْصُوصِي عَمَّكْ أَنْطُونْ
ـ10ـ
لا تْصَدّقْنِي يا جُوزافْ
عَيْلِتْنا بْطُهْر النّفْنافْ
قَدْ ما مْنِفْزَعْ مِنْ اَللَّـه
الْـ نَوَّرْ هَـ الدِّنْيِي كلاَّ
عَ جْرَيْنا ما فِينا نْقَافْ
**
سميحة
ـ1ـ
Yes, yes I love you
يَا حِلْوِه.. يَا سَمِيحَه
كل ما بْقِلِّكْ: How are you
قُولِيلِي: كْتِير مْنِيحَه
ـ2ـ
خِدْتِكْ عَ حفْلِه وِالنَّاسْ
اجْتَمْعُوا فِيها جْناس جْناسْ
فِيها خالِدْ.. فِيها الْياسْ
وْفِيها الْـ سِكْرُوا عَ الرِّيحَه
ـ3ـ
خِدّتِكْ عَ سِيدْنِي مشْوارْ
وْبِرَّمْتِكْ دَايِرْ مِنْدارْ
وْرِجّعْتِكْ بِـ تانِي نْهارْ
وْطِلْعِتْ صَفْقَه رَبِّيحَه
ـ4ـ
وْلِمِّنْ شِفْتِينِي بْكامْسِي
ناطِرْ عَ مَوْقَفْ تَاكْسِي
قِلْتِيلِي: بْلَيْلِةْ عرْسِي
لازِمْ تِدْبَح دْبِيحَه
ـ5ـ
وْقِلْتِيلي: غَنِّي عَ طُولْ
لِعْيُونِي.. لْشَعْرِي الْمَجْدُولْ
شَعْرِي نِشْكُر أَللَّـه بْقُولْ
ما بْيِلْزَمْلُو تِسْرِيحَه
**
شهيدة
ـ1ـ
شَهِيدِه.. يَا شَهِيدِه
حِطِّي إِيدِكْ بِـ إِيدِي
عَمْ قُولْ: نْهارِكْ سَعِيدْ
لَنُّو رِدِّي السَّعِيدِه
ـ2ـ
قِلْتِيلِي: حاكِي بَيِّي
وْأُمِّي الْـ بِتْمُون عْلَيِّي
وْوَقْت اللِّي قِبْلُوا فِيِّي
صِرْتِي إِنْتِي الْعَنِيدِه
ـ3ـ
دُوَّخْتِينِي.. وِحْيَاتِكْ
مُشْ عَمْ إِفْهَمْ مَشْيَاتِكْ
كل ما بْنَفِّذْ حَكْياتِكْ
بِتْحِطِّي عِقْدِه جْدِيدِه
ـ4ـ
خِلِقْنا لْبَعْض.. وْكِرْمالِكْ
رَحْ جَرِّبْ إِغْزُل شَالِكْ
مْنِ الْغَيْم، وْرَيِّحْ بَالِكْ
لَوْ مِنْ حُبِّكْ أَكِيدِه
ـ5ـ
لَوْلا بْتِرْضِي عْلَيِّي بْكُونْ
مَمْنُونِكْ أَنا مَمْنُونْ
وْخايِف مِنْ شِي زَوْج عْيُونْ
مِعْتادِه عَ الْحَسِيدِه
**
زنكي
عندما سألوه: لماذا لـم تنشر مؤلفاتك الكثيرة كما تدّعي، أجاب زنكي: لقد جمعت أشعاري في كيسٍ رماه أحدهم في النار اعتقاداً منه أنه يحتوي على بعض النفايات.
ـ1ـ
مَحْسُود مِنِّي؟.. عَيْب يا زِنْكِي
انْ كِنْت شاعِرْ.. لَيْش عَمْ تِشْكِي
مِنْ ناسْ صَفَّى شِعْرُن حْكايِه
وْما يَوْم قَالُوا: الْقَافْيِه مِلْكِي؟!
ـ2ـ
مَغْرُور؟.. قِللِّي لَيْش تا تِنْغَرّ
بْلادَك احْتَرْقِتْ.. شُو عْمِلتْ يا كِرّ؟
الْـ بِتْقُولْ عَنُّو: حْمارْ.. حُزْن النَّاسْ
حَمَّلْ عَ ضَهْرُو.. وْكِنْت عَمْ تِجْتَرّ
ـ3ـ
حَاجْتَكْ.. كِرْمال هَـ الشَّيْبِه
تْإِخَّرْت حَتَّى تْدَيِّر اللعْبِه
بْلادَكْ ما بَدَّا وَزْن وِمْعَنَّى
بَدَّا شِعْر مَسْؤولْ بِالْغُرْبِه
ـ4ـ
رَبِّي وْلادَكْ عَ الصّدقْ يا صَاحْ
الْعُمْر مَنُّو بَهْوَرَه وِنْبَاحْ
وْأَحْقَادْ عَ اللِّي حارَب الأَحْقَادْ
وْزَيَّنْ حَيَاتُو بْحُبّ تا يِرْتاحْ
ـ5ـ
وْيَللِّي بْيِحْرُقْ شِعْر بِكْيَاسُو
مْأَكَّدْ خِداع وْكذْب نبْراسُو
الشّاعِرْ إِذا عَ الشِّعْر ما بْيِسْأَلْ
التَّارِيخ بَدُّو يِقْطَع نْفَاسُو
ـ6ـ
بَدَّكْ الشّهْرَه؟.. فِيكْ تاخِدْها
الدّرْب الْـ ماشِيها بْشِعْر عَبِّدْها
وْخَرْطِشْ قَصِيدِه حْرُوفْها مِنْ نارْ
حَتَّى الْخَلِيقَه تْضَلّ تِنْشِدْها
ـ7ـ
بَدَّك الشّهْرَه؟.. مدّ إِيدَكْ مدّ
وِافْتاحْ قَلبَكْ لِلْبَشَرْ عَنْ جَدّ
الإنسانْ ما لُو قِيمِة الإِنْسَانْ
إِلاَّ ما تِمُّو وِالدِّينَيْن يْسِدّ
ـ8ـ
مَخْجُولْ إِنِّي حَقّرَك يا "مِيرْ"
الْـ فَنّ الزَّجَلْ حامِل بِإِسْمَكْ نِيرْ
يَللِّي الرِّئاسِه فِيكْ رَحْ بِتْضِيعْ
ضَهْرَك زْغَيَّرْ وِالجلالْ كْبِيرْ
ـ9ـ
إِيَّاكْ إِنُّو تْفَكِّر الأَشْعارْ
إِعْلانْ.. مِنُّو بْتِسْرُق الدُّولارْ
يَللِّي بِيمِد الإِيدْ عَ الْكِلْماتْ
انْ ما كانْ قَدَّا بْيِحْتِرِقْ بِالنَّارْ
ـ10ـ
لَيْش الْقَلَم بِـ جَيْبتَكْ مَكْسُورْ
وْمَبْحُوحْ صَوْتَكْ لَيْش.. يا صَرْصُورْ
النّمْلِه النَّشِيطَه عَم تْجَمِّعْ حَبّ
وْإِنْتْ حَدَّا بْقامْتَكْ مَغْرُورْ؟!
ـ11ـ
تْرِكْنِي لْحالِي.. هَيْك بَدِّي عِيشْ
شَاعِرْ فَقِيرْ، مْعَتَّر، وْدَرْوِيشْ
النَّاسْ قِرْفِتْ مِنْ زَعِيم كْبِيرْ
وْمِنْ زُمْرِة الْـ فَرَّخْ عَ دَنْبَا رِيشْ!
ـ12ـ
كْتَبْت الشِّعْر.. ما يَوْم هِنْت النَّاسْ
الْـ سَكْنُوا بْقَلْبِي جْناسْ حَدّ جْناسْ
لَكِنْ إِنتْ، مِنْ بَعْد خبْرِةْ عُمْرْ،
مِنْ طَلّتَكْ قلْتْ: الْولَدْ نِسْناسْ
ـ13ـ
أُوعَا شِي مَرَّه تِكْسُر الْمِزْرابْ
تَا تِشْتِهرْ.. وِتْصِيرْ شَيْخ شْبابْ
مِنْخارَك الْـ تَحْتُو شَنَبْ مَسْنُونْ
بْيِشْهَد عَ إِنَّكْ مِلْبِكْ وْكِذَّابْ
ـ14ـ
حَاجِي بَقَى عَ النَّاسْ تِتْهَجَّمْ
نِحْنا بْحاجِه لْبَعضْنا.. تْعَلَّمْ
الْكِلْمِه الْعَظِيمِه صَعْب يِمْحِيهَا
إِلاَّ الْـ بِيكُون بْكِلْمتُو أَعْظَمْ
ـ15ـ
مِنَّكْ مَنِي زِعْلانْ وِحْيَاتَكْ
زِعْلانْ مِنْ قَرْقُورْ فَيَّاتَكْ
مْنِ اللِّي حْمِلْت هْمُوم كِرْمالُو
وْخان الصَّدَاقَه بْنَشْر كِلْماتَكْ
ـ16ـ
زِعْلانْ مِنْ إِنْسَانْ عَقْلُو زْغِيرْ
وِطْواطْ.. طُول اللّيْل عَمْ بِيطِيرْ
لِمِّنْ غِرِقْ.. كَبَّشْ بِإِيدي وْصَارْ
يْتَمْتِمْ بِـ قَلْبُو: بَدّها تِكْسِيرْ
ـ17ـ
أَكْتَرْ ما بَدِّي قُولْ.. عَمْ تِفْهَمْ
بِكْرَهْ أَنَا عَ النَّاس إِتْهَجَّمْ
كِلْمِه زْغِيرِه بْوَدّعَكْ فِيها:
مِنْ دُونْ تَوْبِه الرَّبّ ما بْيِرْحَمْ
**
كلير
يوم عمادة كلير ابنة أخي مرسال 1993
ـ1ـ
شُو جابِكْ يا بْنَيِّتْنَا
عَ هَـ الْعَيْلِه الْمَسْطُولِه
فِيكِي كِبْرِتْ فَرْحِتْنَا
وْفِينا.. شُو فِيكِي تْقُولي؟
قُولي إِنُّو عَيْلِتْنَا
رْجَالا عَ شَكْل طْبُولِي
وْنِسْوانُنْ.. يَا جِرْصِتْنَا
دِيرِيهُنْ عَ التَّبُّولِه
صَعْبِه نْغَيِّرْ حَالِتْنَا
حَالِتْنَا مُشْ مَعْقُولِه
شُو بَدِّكْ مِنْ شَوْفِتْنَا
شُو بَدِّكْ يا مَبْهُولِه
أَبْشَعْ خِلْقَه خِلْقِتْنا
مِنِّي وْمِنِّكْ بِرْجَعْ فُوتْ
وْخَلْفِي بْكَتِّرْ الِقْفُولِه
ـ2ـ
خَيِّكْ شَرْبِلْ شَبّ مْنِيحْ
وْناتالي شُو قَمُّورَه
وْزُوزُو رَايِحْ شيحْ بْرِيحْ
خَرْجُو يِلْبسْ تَنُّورَه
وْبَيَّكْ.. صَوْتُو مِتْل الرِّيحْ
قُولِي هَدّ الْمَعْمُورَه
مْسَلَّمْ إِمِّكْ الِمْفَاتِيحْ
وْكلّ بْوابُنْ مَكْسُورَه
بْقِلُّو: رَيِّحْ واستْريحْ
كِرْمالْ عَيْلِه مَسْتُورَه
يا كْلِير بْعَيْنِي.. التِّسْبِيحْ
رَاسِمْ فَوْق عْيُونِكْ زِيحْ
إِنْتِي أَحْلَى مْنِ الصُّورَه
ـ3ـ
خَالْتِكْ لُودي الْعُرَّابِه
أَحْسَنْ مِنْهَا ما بيصيرْ
لَكِنْ يا فَقْر جْيَابِي
عُرَّابِكْ نِسْناس كْبِيرْ
ما بْيِمْشِي غير جِنَّابِي
وْمَرْتُو حَدُّو رَحْ بِتْطِيرْ
بَعْدُو بْيِلْعَبْ بِالطَّابِه
مَعْ إِخْوِه عَقْلُنْ زْغِيرْ
ميشُو قَدّ الدِّبَّابِه
وْطُونِي عامِلْ حالُو زِيرْ
وْجُوزاف.. يا دِلّ شْبَابِي
خِرْج وْبَدُّو شِرَّابِه
وْجِرْجِي.. تِعْتِير بْتِعْتِيرْ
ـ4ـ
ارْفَعِي رَاسِكْ يَا بْنَيِّه
بْعَمِّكْ شَرْبِل وَيْن ما كانْ
أَللـه مْتَمَّمْهَا فِيِّي
مُشْ عَمْ تِحْكِمْنِي النِّسْوانْ
لا باكُلْ كِبِّه نَيِّه
وْلا بِشْرَبْ وِيسْكِي وْدُخَّانْ
سِتِّكْ بِتْنِقّ شْوَيِّه
لَكِنْ بِسِتِّكْ فِرْحانْ
أَخْلاقِي شُو هَنِيِّه
مْصَاحَبْ رَاهْبَات وْرُهْبَانْ
كلّ كِلْمِه بْتِسْوَى مِيِّه
بُوزِنْ حَكْيِي بِالْمِيزَانْ
يا كْلِيرْ اللِّي بْعِينَيِّي
افْرَحِي.. خْلِقْتِي بْعَيْنِيِّه
أَشْرَفْ عَيْلِه مِنْ لُبْنانْ
**
أبو الحن
ـ1ـ
جايي لْعنْدي أبُو الْحِنّ
بْتِمُّو قشّه.. وعَمْ بيعِنّ
قلتلّو: دخلَكْ شو باكْ
فاتِحْ بِـ تِمَّكْ شبّاكْ
قلّلي: هلّق قابِعْ سِنّ
ـ2ـ
مْورَّم خَدّو ع الْمَيْليْن
سألتُو: هالصّحه من ويْن
تْطلَّعْ فيّي وْصار يِبْكي
وْبَدّو يِحْكي.. وما بْيِحْكي
خايِف لَـ صيبو بالعيْن
ـ3ـ
وأبو الْحِن الْـ مُشْ نقّارْ
مَنْتوف، مْوَسَّخ، ثرثارْ
بِتْطَعْميهْ بْيِحْكي عْلَيْك
بِالوِج بْيصرُخ: يا بَيْك
وْبِالْقَفا أكبَرْ غَدَّارْ
ـ4ـ
كلّ النّاس اشْتَلْقوا عْليهْ
بُرْكان الشَّرّ بْعينَيْه
ووجّو عَم بينَقّط سَمّ
ما بْيِخْجل.. ما عنْدو دمّ
الْمَيّ بْتِسْرح عَ إجريْه
ـ5ـ
بَعِّدْ عَنُّو.. رْسِمْلُو حدّ
لا تاخُدْ كلماتو جَدّ
الْشّر بْيِطْلَعْ منْ تِمُّو
يَوم الْـ خَلّفتُو امّو
من دون لا بيّ ولا جِدّ
**
خبرة
ـ1ـ
أم وبْنِتا بْعتم الليل
حبّوا يروحوا كزدوره
وفجأه بدربُن طلّ الويلْ
رجّالَيْن.. صدورُن خيْل
صرخوا: علّوا التنّوره
ـ2ـ
البنت علّتْ.. قبل الأم
وْصَفّى يْبَوّسْها بالتّم
انبسطت بالسرّ وقالت:
مأكّد هالوحش الْفالتْ
عندو خبرَه.. وخفّة دم
ـ3ـ
صرخت أمّا: يا ربّي
اغفرلُنْ ذَنْبُن مع ذَنْبي
ما عرفوا شو عملوا اليوم
أكبرْ خَطيّه بالصَّوم
طلعت وِسْخَه هَاللعبه
ـ4ـ
وبنتا متل السكرانه
قالت لإمّا.. وفرحانه
اللي فوقي بيعرف كتير
خبير بشغلو وقدير
عطيتو اسمي وعنواني
ـ6ـ
يُخْرب بَيْتِك شو عملتي
حدِّك أنا وما سألتي؟
اغْتَصْبِكْ وَحشْ سْنانُو سُودْ
قالت يا أمّي: الْمَقْصُود
بَلَّلْني.. وِتْبِلَّلْتي
ـ7ـ
ولْمّن هَرْبُوا الْمُفْتِرْسِينْ
وِقْفوا تْنَيْنُنْ فِزْعانينْ
وقالتْ الأم بإنكسارْ:
لا تِحْكي لْبَيِّكْ شُو صارْ
بِفْزَع إِنّو يْسِب الدينْ
ـ8ـ
يا بنتي بتوقَع قتْلى
سدّي بوزِكْ.. قالتلا:
بسّ اللي فوْق لْساني
رحْ قُولو ومشْ فزْعانه
عندو إشْيا حرْزانِه
بَيّك ما عندو مِتْلا
**
لبيبه
ـ1ـ
لبيبه بَدّا عَريسْ
يْكُون مْفَصَّلْ ع قْياسا
صارتْ هالنسوان تقيسْ
من كْعاب جْرَيْها لْراسا
حِضْيُولا بْواحد تَعيسْ
بْيِسْكَر وبْيِشْرَب كاسا
تْزوجها.. صار العريسْ
وْما صَدَّق إِنّو باسا
ـ2ـ
وْلَبيبه بْتُوزن قنطارْ
وْعريسا شي قنطارَيْن
عَ تَخْتُنْ وَصّوا السّمسارْ:
بدّنا تَخْت يْساع تْنيْن
لمّنْ قاسُنْ فكرو احْتارْ
وقالْ بْسرّو: يِخْزي العينْ
بَقْره وْعم يِرْكبْها حْمارْ
قصّه ما شافِتْها عَيْن
ـ3ـ
وبعد جمعه جاب سْريرْ
مش معروف عرْضو مْن الطّولْ
قَلُّنْ: تَخْتي بْيحمل زيرْ
قالولو: من شو معمول؟
قلّن: خشَبْ.. فرحوا كْتير
وْنطّوا فوقو ومش معقول
ما سمعوا غير التكسير
وغولي عم بِتْدَحْرِج غولْ
ـ4ـ
قالولو: تَخْتك مغشوش
تْكسّر من أوّل نطّه
ما بْيِسْتاهل خمس قروش
مُشْ ممكن يحمل بَطّه
قلّن: انتو تْنَيْن وْحوشْ
زيجِتْكُن أَكْبَر غلطَه
بهالبيت المليان كْروشْ
الْجازِه لعبةْ قِطّه وفارْ
وْكيف بَدّو يْلاقي القِطَّه
**
قللا وقالتلو
ـ1ـ
قالِتْلو وْشَعرا نازلْ
عَ كْتافا: أوعا تْقاتِلْ
عِنْدي عْيُون بْتِدْبَح دَبْح
وِجْفُوني شَفْرات الرُّمحْ
وْضافيري أَقْوى مْناجِلْ
ـ2ـ
قلّلا: يا تِسْلَميلي
بَدِّي متلِك قَبيلِه
بوساتي نيران الْجمرْ
وْبَين جْرَيّي سَيْف النّصْر
انْ بِيَّنْتُو.. بْتِرْكَعيلي
ـ3ـ
قالتلو: روح لإمّكْ
بَرْكي بْتِشْكيلا هَمَّكْ
أنا حرْمه مَهْضُومه
لِمّن بِقْلع هْدُومي
الشَّهْقَه بْتُوقف عَ تِمَّكْ
ـ4ـ
قللا: اسْمالله وْيِخْزي الْعَيْن
وَيْن بِتْلاقي مِتْلي وينْ
صَدري ملعبْ لِلْفُوتْبُولْ
كل ما فَوِّت فيكي غول
بْدال الْبَوسه بَدّي تْنَيْن
ـ5ـ
قالتلو: مغْشوش كْتيرْ
ركَّعْت بايّامي الزّيرْ
وكل الْمتلَك حَبّوني
مِنْ أوّل ما داقوني
غرْقُوا وما طلعوا من البير
ـ6ـ
قللا: بِيرِكْ.. بركة نارْ
الما بْيِسْبَح بيكون حمار
خَلّيني جَرِّب حَظّي
وفزّي عَ صدري فزّي
ساعتها منعرف شو صار
**
بنت الناس
ـ1ـ
حابِبْ يِتْغَزّل فيها
بْكلْمه حلوه يْناجيها
قلّلا: يا تقبريني
نظره وحده بْتِكْفيني
تا غنّيلك آويها
ـ2ـ
وصار لاحقها صوب البيت
يِمْشي خَلْفا ع السكَّيْتْ
يْبَسْبِسْلا.. ما تْردّ عْليْه
يْسَمِّعْها دَعْسِة إِجْرَيْه
وْمليُون يا ريت ويا ريتْ
ـ3ـ
وفجأة التفتِتْ صَوبُو شْوَيّْ
وْعَ شْفافا كلمةْ "يا خْطيّْ"
قلّلا: حاكيني رح مُوتْ
وْخلّيني عَ بَيْتِك فُوتْ
بَرْكي بِشْرَب نقطة مَيّ
ـ4ـ
قالتلو: أهلا وسهلا
أمّي جوّا بِنْدهْلا
وْفَجْأه تْحَوَّل حُبّو بُغض
وْشَمَّع خَيْطو.. وْقام الرّكضْ
لِمْ وِقْفوا حَدّا أهْلا
ـ5ـ
وصرْخت بالصّوت العالي:
بالي بْأخلاقَك بالي
الْبَدّو يْوقِّع بِنْت النّاس
وما عندو شوّية إحْساسْ
ما بِدْفَع حَقّو نْخاله
**
عدنان
قصّة حقيقية عن مغترب لبناني ضيّع عمره سدى
ـ1ـ
إجا عَ سيدني عدنانْ
تا يِحْكي إِنِكْليزي
مرقِتْ سنه.. وصار فهْمان
إِنّو هاللّغَّه "إيزي"
ـ2ـ
السيّاره بيقِلّلا: Car
والإبْريقْ بيقِلّلو: Jar
لكنْ أوّل ما تْعَلَّم:
Let’s go to the bar
ـ3ـ
وبَلَّش يِشْرَب وِيْتَقِّلْ
والويسْكي تْهزّ لْسانو
وْصَفّى يِحْكي وما يْكَمِّلْ
عرفوا تْخَرْبَط ميزانو
ـ4ـ
صار البنت يْقِللا شبّ
والشبّ يْقِلّلو: يا سِتّ
عِمِلْ مشْكل.. بَيّو انْسَبّ
يا حَسْرَه مِن كعب الدِّسْت
ـ5ـ
وْلمِّن وعي من السّكْرَه
وْشاف مِنْخارو قَدّ التَّلّ
قلُّنْ: رح إرجع بُكْرا
بِـ هالبلد مُشْ رَحْ ضلّْ
ـ6ـ
قلّلو جارو: يا عدنان
خلّي بِـ قلبك إيمان
ليش ما بْتِحكي عَرَبي
وْبِتْفَرّح أرْزِة لُبْنانْ
ـ7ـ
ومتل ما قللو جارو
صار يِحكي باللبناني
وتا يِشْرَب.. يا شِحّارو
ما عاد يْعدّ قْناني
ـ8ـ
وْصَفّى بالشارع مشهورْ
بَنْطَلُونو بْيِرْشَح مَيّ
وِلْسانو بْيِحكي بالزّورْ
لُغّه ما بْيِفْهَمها حَيّ
ـ9ـ
ليش تْغَرّب؟ سَأْلوا النّاس
بلادو كانت أسْتَرْلُو
باع الدّني بْمَزِّة كاسْ
وْضَيّع هالعُمر كلّو
**
يا ستّار
قصة حقيقية عن إنسان غَيّره حبّه لامرأة، رغم عشّاقها الكثر، كانت من أوفى وأشرف النساء لزوجها، لا بل جعلت منه رجل أعمال ناجح، ورب عائلة رفض أن يتزوج من غيرها، بعد وفاتها بمرض السرطان.
ـ1ـ
جايي عَ الغربِه مَهْموم
بدّو يْغَيِّرْ كلّ الْكَوْن
قلّلي: سيدني كلاّ سْمومْ
ألله مُشْ رَحْ يِنْزلْ هَوْنْ
ـ2ـ
وْتا يْنَزّل أَلله عَ الأرضْ
لازمْ يِزْرعها بالبُغض
ولازم يِغْزي بيوت النّاس
وما يِرْحم بنت ولا عَرْض
ـ3ـ
هَيْك بِفْكْرو ألله صارْ
قاتلْ، سرّاق، وغدّارْ
وما بْيِطْلَع عَ جنّاتو
إلا الْمُجْرِم.. يا ستّار
ـ4ـ
خفت يِعْمِلّو قِصّه
وِيْوَقِّعنا بالْجرْصَه
شْكيتو لْكل رجال الدين
قالوا: ما إلْنا خِصّه
ـ5ـ
وبالْحارَه عنّا شَقْرا
أَذْكى منها ما بيصير
بِالْفَرْشه قضّت عُمْرا
ونامِتْ مَعْ عشّاق كْتيرْ
ـ6ـ
خِبّرتا قِصّة هالشّب
اللي بْحِبّو متل وْلادي
قامِت وِقْفِتلو عَ الدّرب
تا يْشُوفا نِتْفِه زْياده
ـ7ـ
وْلِمِّنْ شافا قِدّامو
صار يْنَفِّض هِنْدامو
وصار يْمَشّط شَعْراتو
متل العايش بِمْنامو
ـ8ـ
منْ أوّل مَرَّه يا خَيّ
بيلاقيها بكلمة "هايْ"
وبْيِعْزمها عَ القَهْوه
وبيشَرْبيها شْوَيْ شْوَي
ـ9ـ
ضحكه هَوْن.. وْبَوْسه هَوْن
مِحْيِتْ أَفْكارُو كِلاّ
صارتْ هِيّي بْعَيْنو الكونْ
وِبْقَلْبا ساكِنْ أَلله
ـ10ـ
وصار يِشْرب بيرَه وويسْكي
وكلّ الـ بيكَفِّر إِنْسان
بيعِدّو أكبر شَيْطانْ
ومَن سيدني ما عاد يشْكي
ـ11ـ
ومن بعد سنْتَين زْمانْ
شِفْتُو مَع إبْنو "عدنان"
قلتلّو: مجْد الأُمِّه
قلّلي: قْرفت مْن الْعِرْبانْ
ـ12ـ
وْبَلّش يِحكيلي بالْحُبّ
وما سمعْتو ولا مرّه سبّ
شاف ألله بْإبنو "عدنان"
وسَكَّر ع الباقي.. وانْضَبّْ
**
حرامي
ـ1ـ
الشّعب انْتَخْبو.. وقلّلو: كُونْ
مْمثلنا بْمَجْلس هَـ الشّعبْ
تاري هَـ النايِبْ مَلْعونْ
مْعَوَّد عَ السّرقه وْعَ الكذبْ
ـ2ـ
وْبَلّشْ يِسْرُق كيفْ ما كانْ
وْيِفْتَح عَ حْسابو دكّان
وِحْقُوق الشّعب الْمِسْكين
صارتْ كوسى وباتِنْجان
ـ3ـ
وْبَلّشْ يْعَبّي جْيابُو
وِجْيابُو بِتْساع كْتيرْ
وَظّف أهلُو وأصْحابُو
وْبَرْطَلْ تا يْصَفّي وزيرْ
ـ4ـ
وبالوزارَه.. الشّطارَه
ما خلّا فيها بارَه
وْكتْروا أزلامو وْصارُوا
متل الْحارْجي بِرْبارَه
ـ5ـ
فَكَّرْ حالُو بِـ لُبْنانْ
كل شي بالدوله فلتانْ
لكن نحنا بسيدني هونْ
منْحاكِمْ أكبَرْ إِنْسان
ـ6ـ
تْطلّع فيه القاضي وقالْ:
رِسْمالَك أكبر رسمالْ
عَ سيدني جايي مَنْتُوف
كيفْ قدرتْ تْجَمّع مالْ
ـ7ـ
وَطّى راسُو.. والإعْلام
عَمْ بيصَوّر دَمْعاتُو
أوّل لَيْلِه بْحَبْسُو نام
وْمِحْيِت سيدني دَعْساتو
**
نسوان
ـ1ـ
بساحة الكنيسه النسْوانْ
لساناتُن متل السّكينْ
بْيِحْكوا عَ فلانه وفلانْ
عن حنّا اللاحِقْ فُوتين
جابْ منّا بْنات وصبيانْ
أَزْغَرْهُن عمرو عِشْرينْ
عن سامي الْمتل الشّيْطانْ
عنْ اخْتُو ستّ الحلوين
بدّو يْزَوّجها وْطمعانْ
بدوطه بْتِحْرُز وِبْساتينْ
بْزَنْكيل مْعَبّى وْحِرْزان
يْكُون عمْرو فوق السبعينْ
نسوان لسانُن فلتانْ
وتا حتّى يرضوا الدّيّان
ما بْيِنْسوا يْقُولوا: آمين
ـ2ـ
سمع الخوري بالقصّه
قال لازم إحْكي كلمه
بدّي وقّف هَـ الْجِرْصَه
الْعَمى شو صابا الحِرْمِه؟
قالْ الكلمِه من نصّا
شاف الضّحْكه مرتِسْمِه
السّمرا تْبوسو والبرْصَه
تقلّو: باركلي كَسْمي
وللشقرا إجِت الفرصه
عَلّت فستانا وقالت:
أوعا تلْبُط هَـ النّعْمه
ـ3ـ
والخوري اللي داق الْقَهر
وِتْرَمَّل.. صرلو شهرين
لعبتْ عَيْنو.. الْمَوسِم زهر
وكل زهره.. بِتْساوي تْنَيْنْ
تِقِبْروني.. انْعصرت عصرْ
بينْ شفافو.. ويخزي العين
وقلُّن: قالوا أعزب دهر
أهون من أرمل يومين
الخوريّه جوات القبرْ
رح تفرح لمّن بِتْشُوفْ
الصبايا بتوقفلي صفوف
وآخرتي بين الإجْرَيْنْ
**
