قصائد ديوان "مراهقة" بصوت الشاعر شربل بعيني
طبع: 1968ـ 1983 ـ 1987 ـ 1989 ـ 2010 ـ 2016 ـ 2018 ـ 2020
**
Cover by Paula Baini**
**
إلى روح عمي الأكبر بطرس يوسف الخوري بعيني، الذي آمن بي كشاعر، منذ البرعم الأول، وطبع هذا الكتاب في لبنان عام 1968، على نفقته الخاصة، تشجيعاً لي.
إلى كاهن رعية مجدليا الأب عبود جبرايل الذي احتفظ بمسودة هذا الكتاب لأكثر من نصف قرن، كي يقدّمها لي كهدية ثمينة بيوبيلي الذهبي عام 2018، كونها تحتوي على قصائد لم تنشر من قبل، وقد نشرت الآن في هذه الطبعة.
إلى كل الذين احتفلوا بيوبيل "مراهقة" الفضي عام 1993، والذهبي عام 2018، أهدي التقدير والحب.
**
مقدمة الطبعة الثالثة
بقلم ميشال حديّد
مقدمة الطبعة الثالثة
قد يقال أن "مراهقة" مجموعة قصائد متوحشة، بدائية، مجرّدة من الحس الوجداني والشعور الانساني العميق الهادف.
وقد يقال ايضاً ان الشاعر في "مراهقة" لا يهمه من المرأة سوى نهديها "المن مرمر" وشفتيها "المن نار"، وبالطبع تلك التنورة التي راحت تضيق وتتقلّص وتقصر حتى كاد أبو العلاء المعري يستعيد بصره ويهتف: ألله ما أجمل ما صنعت يداك!
ان الشاعر في "مراهقة" يتفجّر غرائزياً، ويسترسل في انزلاقه وراء شهواته العنيفة حتى يعلن المرأة الهاً من اثارة ولهو ومجون.
ليس في مراهقة أي أثر للحب. ليس فيه سوى الغزل الاباحي، الغزل الجنسي الجارف. فالجنس رمز العصر وغايته، والمرأة جسد جميل ولذيذ ولا غير:
وْتَخْت مَفْرُوش بْحَرِيرْ
بْزَنْبَق.. بْوَرْد.. بْعَبِيرْ
وْشَبّ عَمْ يِنْشُلْ غَرِيقَه
وْكِيفْ مَا تْحِرَّكِتْ كِيفْ
اللَّيْلْ وَاقِفْلِي عَرِيفْ
بْيِحْسُب عْلَيِّي الدّقِيقَه
ان هذا اللون من الغزل الاباحي، هجره الشاعر شربل بعيني منذ زمن طويل، لكنه يشكل مرحلة هامة من مسيرته الشعرية الطويلة. انها مرحلة البداية والتفتح والاطلالة الاولى على العالم من بين دفتيّ كتاب حمل اسم "مراهقة". فالقصائد في الكتاب هي تسجيل أمين لنبضات مرحلة الصبا في سني المراهقة. وقلما أجاد شاعر في رسم وتصوير تلافيف هذه المرحلة وانفعالاتها وتشنجاتها كما فعل شربل بعيني. مراهق يكتب مراهقاته ومغامراته الغزلية بلا حياء أو خوف أو تلعثم.
ان مغامرات شربل بعيني العاطفية في كتاب "مراهقة" تختلف عن مغامرات الآخرين أمثال: لامرتين في "البحيرة" وموسه في "الليالي"، وفيكتور هيغو في "القصاصات"، فهؤلاء الشعراء استمدوا وحيهم الشعري من جميع أشكال العاطفة لكنهم أخضعوها "العاطفة" لتتحول الى قيمة جمالية ابعد عن البحث الشخصي من اللذة. ويقول الكاتب "ألان" في هذا الصدد:
"ان ما يصنعه الانسان تحت تأثير الشهوات والانفعالات والاختلاجات، ليس جميلاً بالطبع.. والانسان عندما يكون فريسة الشهوة والانفعال، يئن ويصيح ويعج أو يحشرج حسب الظروف، وكل هذا ليس نطقاً وليس أنشودة".
وكثيرون هم الفلاسفة الذين دعوا الى تطهير الفن من الملذات والشهوات والى الارتقاء به الى "نوع من التحالف مع العناصر الكونية عن طريق الحواس التي أصبحت شفافة، وعن طريق الروح في آن واحد" (الشاعر الفرنسي بول كلوديل).
وكان أفلاطون قد سبقه الى القول: "ان الجمال لا يتحقق الا بقدرة الفنان على التحرر من الملذات العنيفة، والاسهام في الانسجام الذي يسود الكون".
لو تناولنا قصائد "مراهقة" بحسب المقاييس الجمالية الافلاطونية وسلالاتها عبر العصور، لحسبنا شربل بعيني أبشع من القرد، وألعن من إبليس. واما لو دفعنا بها الى مختبرات سيغموند فرويد العالم الجنسي، فلكنا حصلنا منه على تأشيرة دخول الى الجنة. فالكبت الجنسي هو ايضاً قوة تفجيرية كامنة في الانسان، وقد تتخذ هذه القوة أثناء تفجرها أشكالاً مختلفة وتتلبس صوراً حسيّة متباينة تعبّر عن شدّة الانفعال وضراوته، وتسلط المخيلة على العقل:
صَدْرِكْ.. قَاسِي وِمْحَجَّرْ
جِسْمِكْ.. أَحْلَى مْنِ الْمَرْمَرْ
...
هَـ الْحَلْمِة اللِّي مْشَوّبِه
يَا مَا قْلُوب مْدَوّبِه
وْمَكْتُوبْ حَدَّا عَ النَّهدْ
لا تِلمْسُونِي.. مْكَهِرْبِه!!
....
وْلِكْ.. قَصّرِي الْفُسْتَانْ
يَا مْرَاهْقَه أَكْتَرْ
تَا تْكَزْكِز الأَسْنَانْ
وِالْقَلْبْ يِتْحَسَّرْ
الشاعر كما هو واضح، بعتمد الصورة الحسيّة في وصف مراهقاته، وفي تصوير انفعالاته الشهوانية. انه مستسلم للجسد واشواقه واحلامه ومتطلباته، مسكون بالنهود والحلمات والشفاه. أليست هذه الاهتمامات والاشواق هي كل ما يفكر به المراهقون والمراهقات؟.
طبع كتاب "مراهقة" سنة 1968. واشتهر الكتاب كثيراً على الرغم من أن النقاد المتزمتين اجتماعياً ودينياً اعتبروه تجاوزاً خطيراً للقيم الاجتماعية السائدة، وتهديداً مباشراً للجيل الجديد، وقد روّج هؤلاء النقّاد لهذا الكتاب من حيث لا يدرون، فأقبل المراهقون والمراهقات على اقتنائه، وكم ردد هؤلاء "الصغار" في خلواتهم:
جِسْمِي شِعِلْ.. تِمِّي حِمِي
عَجِّلْ بِمَيَّكْ رِشّنِي
كتب أحدهم تحت اسم "توني سابا" في مجلة "الساخر" العدد السادس، حزيران 1970:
"المثل الدارج يقول: ألله بيبلي وبيعين.
وفي السطور التالية بعض تطبيقاته اللبنانية في حقل الشعر:
بلانا بغزل سيىء سخيف، زمخشري لرجل غبي قليل الذوق اسمه نزار قبّاني، صاحب البيت من الشعر الذي لا معنى له:
أخاف أن أقول للتي أحبّها، أحبها
فالخمر في جرارها تخسر شيئاً عندما نصبّها
وأعاننا بالغزل الارستقراطي الرفيع، ومنه هذه القصور لشربل بعيني "وينك يا مار شربل":
هَـ الْحَلْمِة اللِّي مْشَوّبِه
يَا مَا قْلُوب مْدَوّبِه
وْمَكْتُوبْ حَدَّا عَ النَّهدْ
لا تِلمْسُونِي.. مْكَهِرْبِه!
وكتبت عنه أيضاً "النهار" و"البيرق" و"الشعلة" ومما كتب مقالة بقلم تريز رعد، نشرت في البيرق العدد 1288، تاريخ 11/11/1968:
إلى شربل بعيني..
أحببتك لأنك جريء،
ما أروعك يا شاعري..
إنّي أراك بين السطور
تبتسم، تثور..
"مراهقة".. إسم جميل
أطلقته على كتابك الجميل
أعترف أنّك سحرتني
سيطرت عليّ تماماً
جعلتني أبني قصوراً من الأحلام
بالقرب من أبياتك الشعريّة.
قرأت "مراهقة" عدّة مرّات متتاليّة
دون أن أملّ..
وكيف أملّ من السحر والجمال
من اللّذة والخيال؟!
بالواقع ان شربل بعيني في كل ما كتب، كان ثائراً شجاعاً، داعياً الى التغيير، وتجاوز العقليات السائدة، والتقاليد الجامدة. ففي الغزل الاباحي، اضطر بعض النقاد الى الاستعانة بمار شربل مخلوف على شربل بعيني، وفي الشعر الوطني كان غرباله لا يرحم زعيماً ولا مسؤولاً ولا اقطاعياً. وفي شعره الصوفي ثار على رجال الدين ممن حوّلوا العبادة الى مهنة للارتزاق والتعيش، وثار على الاساطير والخرافات الدينية التي مسخت الانسان المؤمن، وقوّضت امكاناته وقدراته على الاقلاع والتحرر.
ان شعر شربل بعيني يبقى ثرثرة متى أفرغناه من ثوريته الجامحة الملتهبة.. وحتى قصائده في "مراهقة" كانت في تلك "الايام الستينات" دعوة جريئة الى التحرر الجنسي مع تحفظنا الشديد من خطورة تلك الدعوة، لأنها مبنية على الانفعالات النفسية. وقد نجد انفسنا مرغمين على التنازل عن "تحفظنا الشديد" لاننا امام شاعر لا امام عالم فيزيائي أو كيميائي او نفساني.
سيدني ـ آذار 1987
**
يوبيل ذهبي
ألقيتها بدعوة من "لقاء الأربعاء" بتاريخ 25 تموز 2018، في حفل يوبيل "مراهقة" الذهبي، أول كتاب صدر لي في لبنان عام 1968
ـ1ـ
يا "مراهقه" قلبك عم يقللي:
ليش الدّهب سمّوه عثملّي؟
وكل المناجم فتّحوها رفاق
ما يوم عرفوا البخل والقلّه
إلماز حبُّن صار بالأسواق
وتا إشتري الإلماز يا دلّي
لكن رفاقي كلّهُن أخلاق
قالوا: اللي بدّك خود.. ما تخلّي
وع قد ما قلبي إلُن مشتاق
تركت النجوم عليهن تدلّي
"شوكت" علم بالجاليه خفّاق
أشرف سياسي.. برفقتو ضلّي
و شوقي بـ قلبي غاص للأعماق
الغربه الطويله.. قاعد يحلّي
وكلمات قاسم بالمحبه عتاق
بمعبد إيمانو بتركعي تصلي
و"رامز" رمز للحب والأذواق
خلّى الجواهر.. تغمر السلّه
وخيي "علي حمّود" شو سبّاق
بالتضحيّه.. تا راسنا يعلّي
و"روميو" بشعرو مبدع وخلاّق
عندو نبع للشعر تا نملّي
ولطيف إبن اللطف والأشواق
متل العلم واقف على التلّه
يا "مراهقه" لو يوم صدرِك ضاق
طلّة "بهيه" بتطرد العلّه
خلت أدبنا يسوسح الآفاق
الفله ع طول بتقطف الفلّه
يا "مراهقه".. بهاليوم مجدك فاق
وعم يفرحوا الأحباب بالغلّه
رشّي الفرح.. صار الإسم عملاق
وغلّي الدهب يا "مراهقه" غلّي
ـ2ـ
تعبوا وإجوا من كافة الأقطار
أحباب حبّوا يوسّعوا مجالي
طلّي شوفيهن ضحكتن قنطار
هودي رفاقي، فرحتي ومالي
هودي بشر أكبر من الدولار
منروح.. وبيبقى الإسم عالي
يا "مراهقه" وقت اللي كنّا زغار
تنامي ع صدري ولفّك بشالي
لا تقوليلي صرت ختيار
بشِعري أنا وقّفتك قبالي
رسمتك قمر.. أجمل من الأقمار
تا توشوشيني: إنتْ رجّالي
وما رضيت مرّه إكشف الأسرار
وشو شفت مع هبّة هوا شمالي
وكيف كنّا بآخر المشوار
يتوحَّد خيالِك مع خيالي
بتتذكري بهاك المسا شو صار
عيب إحكي.. السَّكت أحلالي
هيدا أنا اللي قطّع الأزرار
ببلوزتك.. تا صدرك يلالي
ولِكْ بعدني عايش على التذكار
عم غار من حالي على حالي
يا "مراهقه" الشاعر إذا بيغار
بيطفي النجوم بعتمة ليالي
خمسين سنه عم إحترق بالنار
ولنّو شي مرّه ريّحي بالي
خسرت عمري.. غرقت بالأشعار
وما رضيت إخسر حبّك الغالي
**
بعد 50 سنه
أوّل قصيده
بكتبا بإيدي
بدمع اليتيم
بألف تنهيده
عمري مرق
فوق الورق
صرت القديم
وبعدِك جديده
**
عمر
ـ1ـ
بَيْني وْبَيْنَكْ، يا كْتابي، عُمرْ
وْغُرْبِة سْنين وْقَهْرْ
وِبْناتْ مِتل الزَّهْر
دِبْلِتْ عَلَى بْوابِي
تا تْفَرْفِحْ شْبابي
ـ2ـ
بَيْني وْبَيْنَكْ كِذْب مَا لُو حْدُود
بيطيرْ يَوْمِيِّه
مِنْ تِمّ مُشْ مَوْجُودْ
إِلاَّ بْخَبْرِيِّه
بْتُوقَعْ عَلَى الْمَاشِي
وِبْتِحْمِلا فْرَاشِه
عَ شْفَافْ زَهْرِيِّه
وْمِتْل الْحُلمْ بِتْضِيعْ بِغْبَاشِه!
ـ3ـ
بَيْنِي وْبَيْنَكْ سَالْفَيْن زْغَارْ
قَعْدِت عْلَيْهُنْ غَبْرِةْ الأيَّامْ
شَابُوا.. وْأَنَا مِنْ شَيْبِتُنْ مِنْضَامْ
وْمُحْتَارْ كِيف بْدَارِيُنْ مُحْتَارْ
تَا ضَلّْ شَبّْ زْغِيرْ
بِعْيُونْ فَرْفُورَه
بْتِكْرَهْ التَّنُّورَه
الْـ مُشْ لاحِقَا تِقْصِيرْ!
ـ4ـ
خَمْسينْ سِنِه يَا مْرَاهْقَه
مَرْقِتْ كَأَنَّا حُلْمْ
شَتِّتْ حُرُوب وْسِلْمْ
وِقْلُوبْ سَوْدَا مْنَافْقَه
وِقْلُوبْ مِتْل التَّلْجْ
خِلْقِتْ زْهُور بْمَرْجْ
وِقْمَارْ تِرْهُجْ رَهَجْ
وِبْحُورْ زَرْقَا رَايْقَه!
ـ5ـ
لا تِضْحَك عْلَيِّي
يَا بِكِرْ أَوْلادِي
يا حْرُوفْ بَعْدَا مْعَلّقَه فِيِّي
وْمِنْ نُورْ عِينَيِّي
عَمْ تَاكُل زْيَادِه
الْحُكَّامْ.. ظَلْمِتْنِي
وْبِالْهَجْر رِمْيِتْنِي
وْمِنْ أَرْض خَضْرَا بِعْبِدَا عْبَادِه
جَنِّت وْطَرْدِتْنِي
تَ الْجَوّْ يِصْفَالاَ
وْيِتْوَسَّع مْجَالاَ
وْكِل مَا بْيِحْلالاَ
تِتْزَعْرَن.. وْتِتْوَسَّخ بْلادِي!
**
كذبة
كِذْبِه الْعُمرْ.. مِينْ قَالْ مَا كْذِبْنَا
وْعُبّ الْفَرَحْ خَبَّى مَصَايِبْنَا؟!
نِحْنَا إِذَا مْنِتْعَبْ عَ دَرْب الْعُمْرْ
مُشْ قَدّ مَا الْمَحْبُوبْ يِتْعِبْنَا.
**
ـ1ـ
خِتْيَارْ.. يَا شَرْبِلْ صِرِتْ خِتْيَارْ
وْبَعْدَكْ بلا شَمْس وْبلا أَقْمَارْ
قِصْرَانْ؟.. أَمْ إِنَّكْ يَا شَاعِرْنَا
عِشْت الْعُمرْ كِلُّو بْإِسْتِهْتَارْ؟!
ـ2ـ
مْنَعْرِفْ بِـ شِعْرَكْ رَاسِم تْكَاوِينْ
مْنَعْرِفْ بِـ شِعْرَكْ عَامِل تْلاَحِينْ
مْنَعْرِفْ بِـ شِعْرَكْ جَنِّت الْحِلْوِينْ
لَكِنْ، يَا حَسْرَه، مِسْتِحِي وْمَخْجُولْ
تْنَقِّي شِي حِلْوِه.. تْخَزِّق الْمَرْيُولْ
وِتْلَبِّسَا فِسْتَانْ وَرْد وْغَارْ!
ـ3ـ
وْسَاعِتَا.. بْتْطَلِّقْ الدَّفْتَرْ
وْبِتْصِيرْ بَدَّكْ تِشْرَب وْتِسْكَرْ
وْخَلْف مِنَّكْ بَابَك مْسَكَّرْ
مِنْ رِيقْ أَنْقَى مِنْ نَبعْ كَوْثَرْ
مْنِ نْهُودْ أَغْلَى مْنِ الدِّنِي كِلاَّ
بْتِحْرُقْ صَابِيعْ اللِّي بْيُوصَلاَّ
وْكِلْ مَا انْحَرَقْت بْتِرْكَعْ لأَللَّـه
وْبِتْقُولْ بَدِّي إِنْحِرِقْ أَكْتَرْ
وْمِتْل الْفَرَاشِه إِنْتِحِرْ بِالنَّارْ
خِتْيَارْ يَا شَرْبِلْ صِرِتْ خِتْيَارْ!
**
يا مراهقة
ـ1ـ
وْلِكْ.. قَصّرِي الْفُسْتَانْ
يَا مْرَاهْقَه أَكْتَرْ
تَا تْكَزْكِز الأَسْنَانْ
وِالْقَلْبْ يِتْحَسَّرْ
وْلا تْغِرِّكْ الشُّبَّانْ
وِخْصُوصاً الأَسْمَرْ
الْـ مِنْ حُسْنِك الْفَتَّانْ
عِينَيْهْ عَمْ تِسْكَرْ!
ـ2ـ
يَا مْدَهّبِه الشَّعْرَاتْ
وْلابْسِه الأَحْمَرْ
لا تْغَنْدرِي الْمَشْيَاتْ
بْتِسِحْرِي الأَشْقَرْ
وْيَا حُلْوِة الْحُلْوَاتْ
لَيْلِيِّه عَمْ إِسْهَرْ
تَا إِكْتُب حْكَايَاتْ
حُبِّك بْدَفْتَرْ!
**
عوينات
عْوَيْنَاتْ سُود كْبَارْ
خِفْيِت عْيُون زْغَارْ
غَطِّتْ مَسَاحَه وْصَارْ
وِجِّكْ عَتمْ وِنْهَارْ
يَا لابْسِه الإِيشَارْ
لا تِلْعَبِي بِالنَّارْ
حُبِّي وِقِفْ عَ شْوَارْ
هَيْدَا آخِرْ إِنْذَارْ
بْقلِّكْ مَع التِّكْرَارْ:
عْوَيْنَاتْ مِنْهَا بْغَارْ.
**
فن الغمز
مَبْرُوكْ هَـ الْفُسْتَانْ يَا جَارَه
الْمَقْصُوصْ شِبْر وْنُصّْ
وِالْـ بَيَّن عْوَامِيدْ مُحْتَارَه
عْوَامِيدْ حُلْوِه بُرْصْ
شُو قِصِّة الشُّبَّانْ بِالْحَارَه
الْمسْكِينْ صَايِرْ لِصّْ؟!
وْخِتْيَارْ عَمْ بِتْشَلوطُو حْرَارَه
وْعَ مَيْلْ قَلْبُو يْعُصّْ
وِيْقُولْ: هَـ الْفُسْتَانْ يَا خْسَارَه
لَوْ كَانْ بَعْد انْقَصّْ!
**
ريق ونهد
ـ1ـ
لِلْحَقِيقَه.. لِلْحَقِيقَه
سْكِرْتْ لَمَّا شْرِبِتْ رِيقَا
تِهِتْ وِنْسِيت الْخَلِيقَه!
ـ2ـ
وْصِرْت إِتْمَايَلْ يَمِينْ
وْمُجّ مَجِّه مِنِ جْبِينْ
الشَّمْسْ.. مِنْ أَحْلَى رْفِيقَه
ـ3ـ
وْتَخْت مَفْرُوش بْحَرِيرْ
بْزَنْبَق.. بْوَرْد.. بْعَبِيرْ
وْشَبّ عَمْ يِنْشُلْ غَرِيقَه
ـ4ـ
وْكِيفْ مَا تْحِرَّكِتْ كِيفْ
اللَّيْلْ وَاقِفْلِي عَرِيفْ
بْيِحْسُب عْلَيِّي الدّقِيقَه
ـ5ـ
بِنْطُرْ السَّاعَه الْعَزِيزِه
بِشْبَع.. بْطَفِّي الْغَرِيزِه
بْخَمْرِة النَّهْد الْعَتِيقَه
ـ6ـ
بْلَيْلِة الْحُبّ الطَّوِيلِه
بْفَيِّة الْحَلْمِه الْجَمِيلِه
بِرْتِفِعْ فَوْق الْخَلِيقَه!
يا جارة
ـ1ـ
مِنْ إِيدِكْ زِتِّي السِّيكَارَه
السِّيكَارَه مْضُرَّه يَا جَارَه
وْأَمْرَاض الْـ فِيهَا غِدَّارَه
ـ2ـ
مَشْحُونِه بْسِلّ وْسَرَطَانْ
وْيَا جَارَه عْلَيْكِي فِزْعَانْ
بْرَبِّكْ لا تْدُوقِي الدّخَّانْ
ـ3ـ
الدَّخْنِه اللِّي بْصَدْرِكْ بِتْصِيرْ
بْتِهْرِي الصّدْر كْتِير كْتِيرْ
وْبِتْقَصِّرْ عُمْرِك بَكِّيرْ
ـ4ـ
بْخَاف عْلَيْكِي مْنِ التّدْخِينْ
بْخَاف يْصِيرُوا دبْلانِينْ
خْدُود اللِّي نَاطِرْهَا سْنِينْ!
**
ـ1ـ
لَيْش الْبِكِي؟!.. دْمُوعِكْ مَطَرْ
شُو اللِّي عَلَى بَالِكْ خَطَرْ؟!
شُو مْزَعَّلِكْ.. قُولِي.. وْأَنَا
تَا إِبْسِطِكْ بِمْحِي الْبَشَرْ؟!
ـ2ـ
بْيِكْفِي بِكِي.. قَلْبِي انْفَطَرْ
وْمَا فِي حَدَا قَدِّي انْقَهَرْ
وْتَا تِضْحَكِي ضِحْكِةْ هَنَا
لا تْفَكّرِي بْهَاب الْخَطَرْ!
ـ3ـ
شُو مْزَعّلِكْ؟.. إِنْتِي الْقَمَرْ
إِنْتِي السِّحرْ فِيكِي انْسَحَرْ
لَيْلَى.. إِذَا بْكِيتِي بَعْدْ
عَمْ هَدِّدِكْ.. قَيْس انْتَحَرْ!
**
التخت تكسّر
هذه القصيدة نقلتها عام 1967 من الفصحى الى العامية بتصرف بعد أن قرأتها في إحدى الصحف اللبنانية دون ذكر اسم صاحبها. فإليه أينما كان أوجه تحيّتي.
ـ1ـ
صَدْرِكْ.. قَاسِي وِمْحَجَّرْ
جِسْمِكْ.. أَحْلَى مْنِ الْمَرْمَرْ
بِتْذَكَّرْ لَيْلِه بْتِشْرِينْ
شْرِبْنَا مْنِ اللّذِه أَكْتَرْ
تَلْج.. وْكِنَّا بِرْدَانِينْ
بْيِنْقِصْنَا الْجَمْر الأَحْمَرْ
ـ2ـ
تْنَاجَيْنَا.. وْكِتَّرْنَا نْبِيدْ
وْمِنْ أَوّلْ كاس مْنِسْكَرْ
عِبَّيْنَا الأُوضَه تِنْهِيدْ
مِسْكِين التَّخْت تْكَسَّرْ
وْكِل مَا شَهْوِتْنَا بِتْزِيدْ
بِتْصَفِّي اللّعْبِه أَخْطَرْ!
**
فرفورتي
ـ1ـ
فَرْفُورْتِي الْجَمِيلِه
يَا زْغَيَّرَه.. وْطَوِيلِه
وْيَا بِنْت سِتَّعْشَرْ سِنِه
أَوّلْ مَا قَلْبِي مْجَنِّنِه
وْمَا فِي بْيَدِّي حِيلِه!
ـ2ـ
فَرْفُورْتِي الْحَبِيبِه
أَعْمَالِك الْغَرِيبِه
أَعْمَالْ سِنّ الْوَلْدَنِه
وْأَمْرَارْ عَمْ تِتْشَيْطَنِي
بِظْرُوفِي هَـ الْعَصِيبِه!
ـ3ـ
فَرْفُورْتِي الصَّبِيِّه..
يَا مْرَاهْقَه.. وْغَبِيِّه
بِالْغَدْر عِمَّرْتِي دِنِي
وْبَعْدِكْ مِتِلْ شِي سَوْسَنِه
بْتِدَلَّعِي بْحِنِّيِّه!
ـ4ـ
يَا قَاسْيِه وْحَنُونِه
يَا مْطَيَّرَه جُنُونِي
بِالطَّيْش لا تِتْزَيَّنِي
وْبِالْحُبّ لا تِتْفَنَّنِي
الْحُبّ جُوَّا عْيُونِي!
ـ5ـ
فَرْفُورْتِي الْخَجُولِه
شُو صَايبِكْ؟.. قُولِي
تَا بْزِينْتِكْ عَمْ تِعْتِنِي
وْمِنْ دُونْ زِينِه مْجَنِّنِه
فَصِيلْة الرُّجُولِه!
**
ـ1ـ
صَدْرِكْ جَبَلْ عَالِي
وْأَنَا التَّلْجَاتْ
عَـمْ دُوبْ بِلْيَالِي
هَنَا وْآهَاتْ
حِنِّي عَلَى حَالِي
ـ2ـ
صَدْرِكْ صَخرْ مَرْمَرْ
وْفِي تَلْتَيْن بْرُوحْ
تْرَابُنْ جِلدْ أَسْمَرْ
عْلَيْهُنْ تِجِي وِتْرُوحْ
نَسْمِةْ هَوَا شْمَالِي
ـ3ـ
صَدْرِكْ هَـ الِمْكَبَّرْ
وْمِرْتِفِعْ رَاسُو
عْيُونِي عَمْ تِسْكَرْ
بِـ رَعْشِة حْوَاسُو
اللِّي خَمرْهَا غَالِي
ـ4ـ
ما أَلْطَفُو صَدْرِكْ
هَـ الدَّافِي بِكْوَانِينْ
وْلَوِّينِي عَ جَمْرِكْ
يَا أَجْمَل الْحِلْوِينْ
مَا عِدْتْ رَحْ بَالِي.
**
نهودك
ـ1ـ
شُو هَـ النُّهُود الْعَالْيِه
عْيُون الْخَلِيقَه مَالْيِه
وْمَهْمَا شِفِتْ عِنْد النِّسَا
بْتِبْقَى نْهُودِكْ غَالْيِه
تِحْيَا النُّهُود الْعَالْيِه!
ـ2ـ
صْدُور الصَّبَايا مْكَبَّسَا
وِمْرَوَّضَا.. وِمْدَرَّسَا
نْهُود النِّسَا اللِّي مْبَوَّسَا
صَارِتْ يَا رُوحِي بَالْيِه
وْبَعْدَا نْهُودِكْ عَالْيِه!
ـ3ـ
نْهُودِكْ يَا أَحْلَى مْنِ الدِّنِي
بِرْكَعْلِك قْبَالُنْ سِنِه
مِتْكَبَّر.. وْصَايِرْ دَنِي
كِرْمَالْ خَمْر الدَّالْيِه
وْعَيْن النُّهُود الْعَالْيِه!
**
بْتِسْمَحِي نِرْقُصْ سَوَا
يَا شَارْدِه بلَيْلِةْ سَهَرْ
تَا نْدَرْدِش كْلام الْهَوَى
وْنِتْغَزَّل بْحُسْن الْقَمَرْ
مْنِرْقُصْ عَلَى صْفِير الْهَوَا
وْعَ خَشِّة وْرَاق الشَّجَرْ
قَالُوا الرَّقصْ أَحْسَنْ دَوَا
الْـ بِيجَرِّبُو بْيِنْسَى الْبَشَرْ
وْمِتْلِكْ أَنَا قَلْبِي انْكَوَى
وْشُو خَيَّمْ عْلَيِّي الضَّجَرْ
وْرَحْ إِلْتِجِي بَعْد النَّوَى
لِلرَّقْص عَ بَرْد الْحَجَرْ!
**
سكّير
ـ1ـ
سِكِّير.. وْمَا بْدُوق الْخَمْر
سِكِّير لآخِرْ دَرْجِه
بِسْكَرْ مِنْ نَهْدَيْكِ السّمْرْ
وْمِنْ أَحْلَى صنْدُوقْ فُرْجِه!
ـ2ـ
بِشْرَبْ مِنْ خَدَّيْكِ الْحُمْرْ
كَاسَيْن تْلاتِه وْأَكْتَرْ
تَخْت وْعَتْم وْمَوْقِدْ جَمْرْ
وْمَعْ أَطْيَبْ مَازَه بِسْكَرْ
ـ3ـ
وْبِعْصِرْلِكْ نَهْدَيْكِ عَصْرْ
وْتِنْهِيدِكْ مَلاَّ الأُوضَه
وْبِسْهَرْ حَتَّى طْلُوع الْفَجْرْ
وْبِسْكَرْ عَ آخِرْ مُوضَه!
**
ـ1ـ
كِرْمَالْ عَيْنِكْ شَمِعْتِي ضُوَّيْتْ
وِتْرَكِتْ عَيْش اللَّيْل يَا عْيُونِي
وْمَا عِدْتْ إِسْهَرْ يَوْم بَرَّا الْبَيْتْ
وْلا عِدْتْ إِشْرَبْ خَمْرِة جْنُونِي
وِبْشَبَابِي كْتِيرْ شُو انْغِرَّيْتْ
وْغَامَرْتْ مَعْ حِلْوِينْ غَشُّونِي
وْأَمْوَالْ بِسْبَاق الشَّقَا زِتَّيْتْ
خْسِرْتْ مَالِي.. وْخَابِت ظْنُونِي
وْعَ حَصِيرِه عَارْيِه صِفَّيْتْ
الأَصْحَابْ وِالأَحْبَابْ تَرْكُونِي
وْمَا يْئِسْتْ مَرَّه بْهَـ الدِّنِي تْرِبَّيْتْ
وِعْرِفْت لَيْش كْتَارْ نِسْيُونِي!
ـ2ـ
وْضِلَّيْتْ جَاهِدْ تَا رْجِعْت بْنَيْتْ
مَجْدِي الْـ فِقِدْ وِتْحَسّنِتْ حَالِي
وْيَا حَيَاتِي كْتِيرْ شُو انْحِبَّيْتْ
وْشُو كِتْرِت الأَصْحَابْ مَعْ مَالِي!
وْقِرَّرْت أَسِّسْ لِلسَّعَادِه بَيْتْ
حِبَّيْتْ حِلْوِه خِلِقْهَا عَالِي
وْلا تِسْأَلِينِي مِينْ هَـ الْـ حِبَّيْتْ
بْتَعِرْفِيهَا وْشَاغْلِه بَالِي؟
هَيْدِي الْحَقِيقَه وْسِرّ مَا خِبَّيْتْ
حْكِيتْ الصَّرَاحَه وْهَيْك أَحْلالِي
وْيَا مَا بْلَيَالِي بَارْدِه صِلَّيْتْ
تَا إِحْتِفِظ بِـ حُبِّك الْغَالِي
**
جيرك
إسم رقصة عرفت بستينيات القرن الماضي
ـ1ـ
جِيرْكْ.. بَدِّكْ تِرِقْصِي؟!
تِكْرَم عْيُونِكْ..
لِلْجِيرْكْ فَاتِحْ مَدِرْسِه
نَاقْصَه بْدُونِكْ
وْرَقْصَاتْ فِيهَا مْكَدّسِه
تَأْلِيفْ مَجْنُونِكْ
وْرَحْ نِبْتِدِي يَا آنسِه
بَيّنِي فْنُونِكْ!
ـ2ـ
آهْ يَا مَشَاللّـه مْعَلّمِه
بْفَنّ الرَّقِصْ
وْجَايِي تَا تِتْعَلّمِي
عْطَيْتِي دَرِسْ!
رَيْتِكْ يَا حِلْوِه تِسْلَمِي
مِنْ كِلّ نَحِسْ
وْيَا هِنْد.. حَقِّكْ عَرّمِي
رْبِحْتِي "مَرِسْ"!
**
جسمي شعل
ـ1ـ
حْمِلْنِي.. عَ زِنْدَكْ حِطّنِي
وْعَ صَدرْ عَامِرْ شِدّنِي
وْخِدْنِي عَ دِنْيِي مْبَحْبَحَه
بِالْحُبّ.. أُوعَا تْرِدّنِي
ـ2ـ
خِدْنِي عَ أُوضَه مْعَتّمِه
عَ فْرَاشْهَا تَا نِرْتِمِي
جِسْمِي شِعِلْ.. دَمِّي حِمِي
عَجِّلْ بِمَيَّكْ رِشّنِي
ـ3ـ
خَدِّي لِهِبْ.. عُنْقِي احْتَرَقْ
قَلْبِي سَهمْ شَهْوِه اخْتَرَقْ
وعَ دَرْب جِسْمِي مَا مَرَقْ
غَيْرَكْ إِنِتْ.. لا تْصُدّنِي
**
ـ1ـ
هَـ الْحَلْمِة اللِّي مْشَوّبِه
يَا مَا قْلُوب مْدَوّبِه
وْمَكْتُوبْ حَدَّا عَ النَّهدْ
لا تِلمْسُونِي.. مْكَهِرْبِه!
ـ2ـ
حَلْمِتِكْ.. يَا زْغَيَّرَه
مِتْعَجِرْفِه.. وْمِتْكَبَّرَه
مِينْ خَبَّرَا.. هِيِّي الدِّنِي
يَا زْغِيرْتِي.. وِالآخِرَه؟!
ـ3ـ
ما أَطْيَبَا هَـ الْفُسْتَقَه
وْهَـ الْفُسْتَقَه يَا مْرَاهِقَه
عَمْ تِنْعَبَدْ بِهَـالدِّنِي
مِتْل الإِلَـه الْـ خَالِقَا!
**
ـ1ـ
جْنُون وْطَرَبْ وِزْقِيفْ وِغْنَانِي
وْصَالِةْ رَقصْ بِالنَّاسْ مِلْيَانِه
وْضَوّ خَافِتْ.. مِسْتِحِي وْمَحْمَرّْ
وْكِلّ شَبّْ حَدُّو بِنْتْ سِكْرَانِه!
ـ2ـ
وْكَاسَاتْ وِيسْكِي نَازْلِه دْمُوعَا
وْصَوْت مُطْرِبْ مَصْدَرُو آلِـه
وْعَ الْبَارْ قنِّينَاتْ مَجْرُوعَه
صْنَادِيقْ بِيرَه مُعْظَمَا خَالِي
وْخِيطَانْ زِينِه نِصّ مَقْطُوعَه
زِينِه قَدِيمِه خَيطْهَا بَالِي
وْعَ الأَرْضْ نِفَّيْخَاتْ مَفْقُوعَه
بْإِيدَيْنْ مَا بْتِرْحَمْ وَلا تْبَالِي
وْدِيسْكَاتْ بِالصّنْدُوقْ مَجْمُوعَه
عَ قَدّ مَا فِي نَاسْ بِالصَّالِه
وْضِحْكاتْ سِكْر وْطَيْش مَسْمُوعَه
وِالنَّاسْ مِتْل شْبَاحْ بِلْيَالِي
وْبَوْسَاتْ تِـمّ وْخَدّ مَطْبُوعَه
وْنَهْدَاتْ شَمّ وْضَمّ عَ الْعَالِي
وْبِيكْ ـ أبّ عَمْ بِيقَلِّد الْعُشَّاقْ
طُول الْوَقتْ حَاضِنْ إِسِطْوَانِه
**
بصران
ـ1ـ
بُصْرَانْ.. شُو بُصْرَان بِمْنَامِي؟
طَيْرَيْنْ بِيض زْغَارْ
وْمَوْقَدِه لِلنَّارْ
عَمْ تِنِشْوِي عَ جَمِرْهَا حْمَامِه!
ـ2ـ
بُصْرَانْ إِنِّي رَاكِب حْصَانِكْ
بْلَيْل مَا فِي نْجُومْ
وِمْسَيْرَحُو بِكْرومْ
فِيهَا الْعِنَبْ عَ كْتَافْ رُمَّانِكْ!
ـ3ـ
بُصْرَانْ حَالِي وِالشِّتِي عَايِمْ
عَمْ إِغْزُل مْلاحِفْ
عَمْ حَيِّك شْرَاشِفْ
وْمِتِّكِي عَ جَنْبِكِ.. وْنَايِمْ
**
قلْتْ: يَا دِنْيِي ارْحَمِي شَبّ احْتَرَفْ
عَادِه وَخِيمِه مِجِرْمِه.. سَلْب الشَّرَفْ
شَرَّدْ بَنَات كْتَارْ عَ دْرُوب الأَمَلْ
بَعْد اللَّيَالِي الْحَالْمِه.. لْيَالِي التَّرَفْ!
**
خطي
ما بْتِذِكْرِي بِالْحَيّْ
بُوَّسْتِكْ وْفِزْعَانْ
لا تْخَيّبِي ظَنِّي
وْمَا تِنْطرِينِي شْوَيّْ
تا حَوِّش الرُّمَّانْ
الْـ دَاخِلْ الْجَنِّه
شُو قِصّتِكْ يَا مَيّْ
بِتْوَلّعِي النِّيرَانْ
وِبْتِهِرْبِي مِنِّي
عَمْ تِقِتْلِينِي.. خْطَيّْ
لا تِقِتْلِي إِنْسَانْ
لا تِبِعْدِي عَنِّي!
**
انتبهي..
ـ1ـ
مْعَلّمِه الْبَوْسَاتْ عَ خْدُودِكْ..
عَ شْفَافِك الْحَمْرَا.. وْعَ زْنُودِكْ
وْعَ مْطَارِح الْـ فِيهَا إِثَارَه كْتِيرْ
عَ أَتُون النَّارْ.. عَ نْهُودِكْ!
ـ2ـ
وِمْبَيّنِه آثَارْ شَبّ زْغَيرْ
انْتِبْهِي مَا أمِّكْ تِشتْلِقْ لَيْهَا
وْيَا دِلّ دِلِّكْ كِيفْ رَحْ بِيصِيرْ
بِحْوَالِكْ.. وْشَافِتْ بِعِينَيْهَا
بْقَايَا حَبِيب مْقَطَّف وْرُودِكْ!
ـ3ـ
انْتِبْهِي مَا بَيِّكْ تِشْرُد عْيُونُو
وِيْشُوفِك وْتِتْلَبَّك فْكَارُو
وْيَا خْطَيّتِكْ لَوْ صَدْقِت ظْنُونُو
رَحْ يِرِجْمِكْ بِـ أَكْبَر حْجَارُو
وْيِصْرُخْ بِوِجِّكْ: عَاهْرَه مُوتِي
أَحْسَنْ ما يِبْقَى الْعَارْ بِوْجُودِكْ!
**
هند
هِنْد.. لَوْلا كْلامِكْ هَـ الْحِلُو
لَكِنْت عِفْتِكْ مِنْ زَمَان بعِيدْ
فِي بَنَات كْتَارْ عَمَّا يِسْأَلُوا
عَنْ قَلْب فَارِغْ للإيجَارْ جْدِيدْ!
**
بَيِّكْ طَرَدْنِي وْمَا قِبِلْ فِيِّي
كُونْ صِهْرُو.. وْطَبْطَبْ عْلَيِّي
سْأَلْت السَّبَبْ.. تَارِي السَّبَبْ إِنِّي
مْعَتَّرْ فَقِير.. وْشُو هَـ الِخْطِيِّه؟!
قُولِي لْبَيِّكْ يِعْتِذِرْ مِنِّي
وْقُولِي بْحِبُّو كْتِيرْ يَا بَيِّي
وْقُولِي النَّاس الْـ خَبَّرُو عَنِّي
عَمْ يِكْذِبُوا وِيْبَغِّضُو فِيِّي
شَاعِرْ أَنَا.. بْصَوِّرْ أَلِفْ جَنِّه
وْعِنْدِي الشِّعِرْ يَنْبُوعْ حِنِّيِّه
بْخَلِّي الدِّنِي تِتْلَهَّفْ لْفَنِّي
بْخَلِّي الْحَرْف صُنْدُوقْ مَالِيِّه!
**
شعرك
ـ1ـ
شَعْرِكْ، يَا يِخْزِي الْعَيْن، مَا أَحْلاهْ
شَلاَّلْ وَرْد مْطَعَّم بْكَوْثَرْ
بْحِسّْ، لِمِّنْ بِلْمَحُو، إِنِّي إِلـهْ
وِبْدُوخْ، لِمِّنْ بِلْمِسُو، وْبِسْكَرْ
ـ2ـ
اللَّيْل.. خُصْلِةْ شَعْر مِنْ شَعْرِكْ
النَّجْمَاتْ، لَوْلا مْعَزّتُو، بِتْغِيبْ
مَشْلُوحْ، مِتْكِي بْغُنْج عَ ضَهْرِكْ
غَافِي.. وْعَمّ بِيفُوحْ مِنُّو الطِّيبْ
ـ3ـ
جْدَادِيلْ غَيْم مْعَلّْقَه بِالرِّيحْ
هْنِيَّالْ يَللِّي بْيُغْمُر الْغَيْمِه
مِتْل اللِّي قَضَّى الْعُمْر بِالتّسْبِيحْ
تَا يْنَالْ مِنْ رَبّ الْبَشَرْ نِعْمِه!
**
قاضي
ـ1ـ
شُو هَـ الْعَادِه.. شُو هَـ الْعَادِه؟
بَعِّدْ عَنِّي.. إِيدَكْ عَنِّي
مَا عَادْ فِيِّي إِعْطِي زْيَادِه
بِفْزَعْ إِنَّكْ تِقْرَفْ مِنِّي
ـ2ـ
بْحِبَّكْ قَدّْ الدِّنِي كِلاَّ
وْجَنِّةْ جِسْمِي مَا بْيِحْتَلاَّ
غَيْرَكْ.. لَكِنْ مَا بْتِفْهَمْنِي
مَطْلُوبَكْ تِهْجُمْ تَاكِلْنِي
كِلّ ما كِنْت شْوَيِّه فَاضِي
ـ3ـ
وَقِّفْ.. وَقِّفْ.. لا ما بْيِسْوَى
إِيدَكْ دَخْلَكْ عَمْ إِتْلَوَّى
بْجَمْرَاتَكْ حَاجِي تِحْرِقْنِي
بِهْرُبْ مِنَّكْ وِبْتِلْحَقْنِي
جَلاَّدْ.. وْبِتْقِلِّي: قَاضِي!
**
ـ1ـ
يِقْطَعَكْ شُو تْقِيلْ
شْرِبْت مَيَّاتِي
وِسْرَقْت خَيْرَاتِي
وْمَا بْتِعِتْرِفْ بِجْمِيلْ
ـ2ـ
رْبِينَا سَوَا رْبِينَا
الْبَيْت حَدّ الْبَيْتْ
وِالْحَيْط.. مَا فِي حَيْطْ
وْكَرْجِتْ لَيالينَا
زْغَارْ.. ما بِيهِمّْ
الدَّمّ بَعْدُو دَمّْ
وْمِتِل شِي بَيّْ وْمِتِلْ شِي أُم
لْعِبْنَا تَا شْقِينَا
وْمَا بْتِعِتْرِفْ بِجْمِيلْ؟
تْقِيلْ إِنْت تْقِيلْ..
**
بدّي بوسك
ـ1ـ
بَدِّي بُوسِكْ تَحْت الرَّقْبِه
بَدِّي طَفِّي النَّار بْقَلْبِي
بَدِّي مِصّ خْدُودِكْ.. تِمِّكْ
مَا بِيهِمّ انْ زِعْلِتْ أُمِّكْ
عَلِّي.. عَلِّي شْوَيِّه كِمِّكْ
وْشُو ما قَالِتْ أُوعَا يْهِمِّكْ
إِنْتِي الشَّمْس الْـ ضَوِّتْ دَرْبِي
إِنْتِي الْحُلم بْلَيْل الْغُرْبِه
بِغْيَابِي.. رَح يِنْشَفْ دَمِّكْ
وْبِوْجُودِي.. بْبَوْسَاتِي بْطمِّكْ
ـ2ـ
نِيرَانِي عَمْ تِقْوَى أَكْتَرْ
كِل مَا كْبِرْت.. بْشِيبْ وْبِزْغَرْ
وِعْيُونِي بْتِفْضَحْ أَسْرَارِي
وِبْتِغْرَق بِاللَّوْن الأَحْمَرْ
يَا نَارِي.. طَفِّيلِي نَارِي
وْخَلِّينِي مِنْ رِيقِكْ إِسْكَرْ
إِزْرَع بْوَادِيكِي بْدَارِي
وْإِحصُد قَمح الصّدر الأَصْفَرْ
وْآخُدْ مِنْ حَلْمَاتِكْ تَارِي
عَضُّنْ.. إِقْرِصْهُنْ.. إِفْرِكْهُنْ
إِجْلِيهُنْ.. وِيْطقّ الْمَرْمَرْ
ـ3ـ
مُشْ رَحْ قِلِّكْ طَار صْوَابِي
مُشْ رَحْ إِحْكِيلِكْ عَ عْذَابِي
مُشْ رَحْ خَلِّيكِي تِشْتِلْقِي
عَ الْجُوع الْـ هَدَّلِّي رْكَابِي
مُشْ رَحْ إِحْكِي بْيِنْشَفْ حَلْقِي
وِبْتِعْرَقْ كِلْمَات كْتَابِي
مُشْ رَحْ إِحْكِي بْيِطْلَعْ خلْقِي
وِبْتِدبلْ ضِحْكِه كِذَّابِه
خَلِّينِي.. لازِمْ تِنْطِلْقِي
وْعَ دْرُوبِي يِتْعَرَّفْ جِسْمِكْ
وِتْرِدِّينِي لْعِزّ شْبَابِي..
**
تِيريزْ.. يَا دِنْيِةْ حَبَقْ
فِيكِي السِّحْر كِلُّو انْدَلَقْ
إِنْتِي الدِّنِي وْشَمْس الدِّنِي
يَا وَرْدِة الْعُمْر الْهَنِي
الْخَالِقْ.. عَ شَكْلِكْ مَا خَلَقْ.
**
غدّار
ـ1ـ
غَدَّارْ؟!..
مِينْ قَالْ عَنَّكْ هَيْكْ
وْإِنْت الْوَفَا بْعِينَيْكْ
وْإِنْت الْحَلاَ كِلُّو
وِعْلَيْك دَلُّوا عْلَيْكْ
نْجُومْ السَّمَا يَا جَارْ
وْبَعْدُنْ عَمِ يْدِلُّوا؟
ـ2ـ
غَدَّارْ!.. مُشْ مَعْقُولْ
عَنْ شَبّ مِتْلَكْ قُولْ
لَكِنْ يَا نُورْ الْعَيْنْ
عُزَّالْنَا مِنْ وَيْنْ
جَابُوا الْحَكِي الْمِسْوَدّْ
تَا فَرَّقُوا مَا بَيْنْ
قَلْبَيْنْ حَبُّوا بَعْضْ
وْمَا سَاعِتُنْ هَـ الأَرْضْ؟
ـ3ـ
غَدَّارْ!.. يَا دِلِّي
ما بْقُولْ هَـ الْكِلْمِه
وْلا بْفِيقْ مِنْ حُلْمِي
وْإِنْت الْحُلمْ يَللِّي
عَمْ بِحْلَمُو.. وْصَرْلِي
سِنْتَيْن نَاطِرْتُو
تْغَيَّرْ بِـ آخِرْتُو
وْضَاعْ مِنْ دَرْبِي
وْغَابْ عَنْ قَلْبِي
وْكِلّ اللِّي كَاتِبْتُو
عَنْ حُبَّكْ وْحُبِّي
رْمِيتُو بْقَلْب النَّارْ
وْصَارْ.. يِمْكِنْ صَارْ
دُخَّانْ أَوْ فَحْمِه!
**
شتي نازل
ـ1ـ
رِخْيِتْ شَعْرَا عَ كْتَافَا
مِتْل الشِّتِي النَّازِلْ
سَاعَه يْبَوِّسْلاَ شْفَافَا
وْسَاعَه بَدُّو يْقَاتِلْ!
ـ2ـ
عَمْ يِهْجُمْ عْلَيْهَا
تَا يْغطّي عِينَيْهَا
وْهِيِّي تْرِدُّو بْدَيْهَا
مَا بَدَّا مَشَاكِلْ.
**
إِيدَيِّي انْمَدِّتْ لِلرِّيحْ
لا تْخَبِّي دَيْكِي
رَحْ إِرْسُمْ إِيدَيِّي زِيحْ
يْوَصِّلْنِي عْلَيْكِي
عَ الصّدْر الْـ بَدُّو تِلْوِيحْ
عَ التِّمْ الْـ كِلُّو تْسَابِيحْ
عَ رْخَام إِجْرَيْكي..
**
بيتك
ـ1ـ
يَا حُلْوتي.. هَـ الدَّارْ
الْمَبْنِيِّه عَ حْفَافِي
مِنْ ضُلُوعِي حْجَارْ
بَيْتِك الْغَافِي
عَ فْرَاشْ مِنْ أَزْهَارْ
نَايِـم وْدَافِي
ـ2ـ
بَيْتِكْ مَع النَّجْمَاتْ
بْيِتْغَامَزْ بْهَاللَّيْلْ
وْبِيدَرْدِشْ حْكَايَاتْ
وْبِيحَاكِي نَجْم سْهَيْلْ
وْنُور الْقَمَرْ لَوْحَاتْ
رَاسِمْ عَ تَانِي مَيْلْ
مِنْ هَـ الْفَضا الصَّافِي
ـ3ـ
بَيْتِكْ.. أَنَا بْزُورُو
كِلّ يَوْم صُبْحِيِّه
بْتِتْسَابَق طْيُورُو
تَا تْطِيرْ حْوَالَيِّي
وِبْبَوِّس زْهُورُو
بِرْمُوش عِينَيِّي
تَا حَرْقِص شْفَافِي
**
عيونك
ـ1ـ
عْيُونَكْ شَمسْ.. يَا رَيْت بَعْرِفْ شُو فِيَا
مِنْ حُبّْ نَحْوِي وْمِنْ عَطفْ
تَا إِشكرَكْ عَ هَـ اللُّطْفْ
وِانْ كَانْ مَا فِيهَا حَنَان وْحُبّْ
بِرْكَع بْصَلِّي وْبِطْلُب مْنِ الرَّبّْ
يْوَدِّي صَوَاعِقْ عَ الْعُيُون وْيِفْقِيَا
ـ2ـ
صَرْلِي سِنِه بِتْطَلَّع بْعِينَيْكْ
وْما بْخَافْ إِنِّي إِحْتِرِقْ
وِبْخَبّرَكْ قَلْبِي غِرِقْ
بِبْحَيرتَكْ.. رَحْمِه انْشِلُو بْإِيدَيْكْ
ـ3ـ
لا تِظْلُم الْمَظْلُومْ أَكْتَرْ ما انْظَلَمْ
لَيْقُومْ أَللَّـه يِضِرْبَكْ
بِالآخْرَه.. وِيْعَذّبَكْ
وِتْصِيرْ تَعْرِفْ شُو الْمَحَبِّه.. وْشُو الأَلَـمْ؟
**
ـ1ـ
يَا حُلْوِه الْـ عَمْ بِتْصَلِّي
وْبِعْيُونِكْ حُبّْ
يِمْكِن بْعَصْر الْقِلِّه
مَا تْلاقِي شَبّْ
ـ2ـ
صَايِرْ سَكْرَان بْحُبِّكْ
مَقْطُوع الْحَيْلْ
وْعَمْ بِحْلَمْ إِنِّي بْقُرْبِكْ
وِالدِّنْيِي لَيْلْ
ـ3ـ
تْوَقِّي تْوَقِّي يَا سَمْرَا
بِهَـ الأَيَّامْ
الْحُلْوِه اللِّي بْتِهْدِي زَهْرَه
مْنِ الصَّعْب تْنَامْ
ـ4ـ
رْمُوش عْيُونِكْ يَا عْيُونِي
جَوْز بْوَارِيدْ
بِرْصَاصَاتُنْ رِمْيُونِي
وْزَتُّونِي بْعِيدْ
**
ـ1ـ
لَوْ كَانْ عِنْدِي لِلْخَطِيِّه مَيْلْ
كِنْتْ سْبَحِتْ بِبْحُورْ عِينَيْكِي
وْكِنْت وْصِلِتْ عَ شّطّ هَاك اللَّيْلْ
مَطْرَحْ مَا فِينِي إِحْصَل عْلَيْكِي!
ـ2ـ
كنت كْتَبتْ عَ وْرَاقْ وَرْدَاتِكْ
أَشْعَارْ صَعْب كْتِيرْ تِمْحِيهَا
تَا كِلّ مَا قْطَفْتِي بْدَيَّاتِكْ
وَرْدِه.. تْشِمِّيهَا وْتِقْرِيهَا
ـ3ـ
وْكِنتْ عَ بَابِكْ وْقِفت سْنِينْ
حامِلْ كَمَنْجَه وْبَاقِة رْيَاحِينْ
تَا كِيفْ مَا تْرُوحِي وْتِجِي عَ الدَّرْبْ
غَنِّي لْعُيُونِكْ أَجْمَل تْلاحِينْ
ـ4ـ
وْكنت بِالْغِيرِه زْرَعِتْ قَلْبِكْ
وْقَلْبِكْ طفلْ مَا دَاقْ طَعْم الْحُبّْ
تَا تْطَاوْعِينِي.. وْتشكرِي رَبِّكْ
عَ هَالْمَحَبِّه الْـ مُشْ سَايِعْهَا الْقَلبْ
ـ5ـ
لَوْ كانْ بَدِّي.. بَسّ مَا بَدِّي
وَسِّخْ ضَمِيرِي وْغَبِّرْ عْيُونِي
وْشَمْس الطَّهَارَه تْصِيرْ مِسْوَدِّه
كِرْمَالْ شَهْوِة جسم مَجْنُونِه
**
ـ1ـ
إِيدِك بْإِيدُو؟!.. عَيْبْ شُو صَابِكْ
مِتل الشّهُور بْيِمْرَقُوا حْبَابِكْ؟!
انْ كِنْتِي "السِّنِه" رُوزْنَامْتِكْ أَوْهَامْ
انْ كِنْتِي "الزَّهر" عُمر الزَّهر أَيَّامْ
وْنَاطِر خَرِيف وْبَرد عَ بْوَابِكْ؟!..
ـ3ـ
إِيدِك بْإِيدُو؟!.. وْضحكتِكْ قِنْطَارْ
وْشَعْرِكْ عَلَى كْتَافُو عِمِلْ مشْوَارْ
وْصَابِيعِك بْيِتْفَاخْرُوا بْبَصْمَاتْ
يَا أَلف عَيْب الشُّومْ.. كِلاَّ عَارْ
وِتْطِيرْ مِنْ كِتْرِ الْجهل آهاتْ
مِنْ نَارْهَا.. يَا دِلّ دِلّ النَّارْ
وْتِقْرَفْ طَرِيقْ الْحُبّ مِنْ دَعْسَاتْ
أَتْقَلْ مِنِ الْحِقْد بْقَلب غَدَّارْ
يَا بِنت.. مُشْ زِعْلانْ عَ سَهْرَاتْ
يَا مَا تْرِجَّيْتِي وْقِلْتِي سْهَارْ
زِعْلانْ مِنْ حَالِي.. وْمِنْ كِلْمَاتْ
قْعَدْت إِكْتِبْهَا بْقَلَمْ مَجْرُوحْ
رحْتِي.. وْيَا حَسْرَه.. بِقْيِت الأَشْعَارْ!
**
دقِّيلو جراسك
ـ1ـ
دِقِّيلُو.. دِقِّيلُو جْرَاسِكْ
بَرْكِي بْيِحْضَرْلِكْ قدَّاسِكْ
حْسَابَاتِكْ كِلاَّ حْسِبْنَاهَا
وِمْحِينَا دْرُوب مْشينَاها
وْهَاك الدَّمْعَه اللِّي سْكَبْنَاهَا
خَمْرَه.. وْعَم بِتْئِنّ بْكَاسِكْ
ـ2ـ
دِقِّيلُو.. وْقَوِّيلُو الدَّقَه
دَقَّاتِكْ وَحْدَا الْـ رَحْ تِبْقَى
نِحْنَا مْرَقْنَا.. وْهُوِّي بْيِمْرُقْ
أَيَّام.. وْشَمْسُو مَا بْتِشْرُقْ
وْمَهْمَا وَهْج عْيُونِكْ يِسْرُقْ
رَح يِدْبَلْ عَ حْدُود الْمَلْقَى
ـ3ـ
حُبِّكْ.. مُشْ مَعْرُوفِه أْصُولُو
غَيْمِه صَيْفِيِّه.. بِيقُولُوا
غَبْرَه.. وْمُشْ مَحْسُوب حْسَابَا
إِيدَيْن.. بْتِشْحَدْ أَحْبَابَا
وْبِتْعَذِّبْهُنْ عُمر بْطُولُو..
ـ4ـ
مَوْجُودِه.. وْمَنِّكْ مَوْجُودِه
تَلْجَاتِكْ دَابِتْ عَ جْرُودِي
لَوْ رِجْعِتْ أَيَّام الْمَاضِي
وْصَفَّى الْعَالَـمْ كِلُّو رَاضِي
وْقَلْبِي مْنِ عْذَابَاتِكْ فَاضِي
إِنْتِي مُشْ مَسْمُوح تْعُودِي..
**
ـ1ـ
آخْ مِنَّكْ يَا أَلَمْ
نِشَّفتْ دَمْعَات الْقَلَمْ
وِتْرَكتني جَرْجِرْ خَيَالْ
مَصْلُوبْ عَ شْفَافُو سُؤالْ
وْمَكْتُوبْ عَ جْبِينُو النَّدَمْ
ـ2ـ
آخْ مِنَّكْ.. كِيفْ بَدِّي نَامْ
وْغَيْرِي مَعَا نَايِمْ
عَ زْهُورْهَا حَايِمْ
وْتَحتْ مِنُّو جِسِمْهَا مِنْضَامْ
وَحِدْهَا بْتِنْلاَمْ
وَحِدْهَا بْتِنْلاَمْ
وِانْ جِيتْ مَرَّه إِجْرَحَا
بْيُوسَعْ بِـ قَلْبِي مَطْرَحَا
وِالْكِلْمِةِ اللِّي بْتِقْهَرَا أَيَّامْ
بِلْغِيَا
أَوْ بِمْحِيَا
أَوْ خَلفْ ضَهْرِي بِشْلَحَا..
ـ3ـ
يَا رَيْتْ ما تْرَكْتُو يِجِي
وْيِلْعَبْ بِـ عَقْلاَ.. يْغَيِّرَا
يِغْرَقْ بِعُطر بْنَفْسَجِي
مْغَلْغَلْ بِطفْلِه زْغَيَّرَه
تَارِي الْمَحَبِّه زَعْبَرَه
وْمُطْلَقْ صَبِيِّه مْكَبَّرَه
بَدَّا حَدَا
أَيَّا حَدَا
يْكَحِّل عُيُون مْزَهَّرَه
يْفَرْفِحْ جِسِمْ وِسْع الْمَدَى
يْطَفِّي الشَّهْوِه.. يْجَمِّدَا
بْصَرْخَاتْ مَا إِلْهَا صَدَى..
**
متلك ما في
تا قِلّك متلِكْ ما في
بْأكّد هَيْدا مُش كافي
لكنْ رحْ بَوّس هالأرض
الـ عَمْ تِمْشيها بشْفافي
وإسبحْ فيكي طولْ وعرضْ
وْشَعْرِك يِغْزِلِّي لْحافي
مَجْمِجْ صدرِك.. عَضِّكْ عَضّْ
وراسِكْ تاكي عَ كْتافي
غَمِّقْ.. إِنْزَلْ.. راحْ الْعَرْضْ
وْإنْتي مُشْ عَمْ بِتْخافي
**
يا قلب
شو كانْ بَدَّكْ يا قلْب منِّي
وعارِفْ غَرامي رَح يْجَنِّني
بُوقَفْ بِـ دَرْبا ما بْتِرْمي سْلامْ
بْقَرِّبْ لَحَدَّا.. بْتِبْتِعِدْ عَنِّي
وْمِتل الْيَتيمْ بْتِمْرقْ الإيّام
لا شَمّ، لا بَوساتْ، لا أَنّه
بْشُوف جِسْما من الْقهرْ مِنْضامْ
وْجِسْمي أنا.. عَنِّه ورا عَنِّه
حابِبْ شِي لَيْله فَوْق صدري تْنامْ
وْتِنسى الْبَشرْ.. تنسى الدّني كلاَّ
وْحَوِّشْ أَنا تفّاحة الْجَنِّه
**
ألله مَعِكْ.. يا بِنْت جارِتْنا
يا الْـ شعرْها بْنَكْزِةْ هَوا بيطيرْ
وْلَنُّو ارْحَمي بِالْحَيّْ كَبْرِتْنا
رْميلِكْ شي ضِحْكه صَوبْنا بَكِّيرْ
لا تِفْزَعِي مِنْ تَلْجْ شَيْبِتْنا
بَعْدُو الْجِسِمْ بِالتَّخْت دافي كْتِيرْ
وْبَعْدا الشّفافْ بْلَيْل لِذّتْنا
بْتِنْقُر شْفافِكْ متلْ العصافيرْ
بْتِنْسي الدّني بِجْنُون بَوْسِتْنا
وِبْتِشْهَقي: مِينْ قالْ إنت كْبيرْ؟
**
نقطه بيضا
ـ1ـ
ساعة ما بْبَوِّسْ حَلْماتِكْ
بِتْرِنّ بْإِدْني شَهْقاتِكْ
وِبْراكيني بْتِشْعل جُوّا
وِرْجُوليتي كْرامِةْ حَوَّا
بِتْضِيع بْفَرْحِةْ صَرْخاتِكْ
ـ2ـ
وْلِمِّنْ بِغْفَى فَوْق زْنُودِكْ
بتصفّي تْحَرْقِصني نْهُودِكْ
وِتْقِلِّي لا تْضَيِّعْ وَقْتَكْ
هيّي خِلْقِتْ بَسّ لْتَخْتَكْ
تا يْجِنّ وْيِشْعل بارُودِكْ
ـ3ـ
وْلِمِّنْ بِتْناديني شْفافِكْ
راسي بْيِتْكي فَوْق كْتافِكْ
وْبتصيرْ اللعْبِه الْمَجْنونِه
تِتْرُكْ جَمْراتا بِعْيُوني
ونقطه بَيْضا فَوْق لْحافِكْ
**
بوسه
ضِحْكِتْ وقالتْ: طلّتَك عِرْسي
مِنْ طَلّتَكْ عم يِنْمحى أَمْسي
قِلّتلّها: عِرْسي أنا يا هِنْد
لِمِّنْ عَ تِمّي بْتِزْرَعي الْبَوْسِه
**
منام
حَبِّتْ عَ صدْري تِغْزُل مْناماتْ
تاري المَنامْ بْيِسْرِقا مِنِّي
بيفَرْفِطا بْأعلى سَما شاماتْ
بيطَيِّرا عْصافير بِتْغَنّي
وْتا فَيِّقَا مْن الْحُلْم بِالْكِلْماتْ
بْقِلّلا: بْحِبِّكْ.. دِنْيِتِكْ جَنِّه
فَجْأَه.. بْتِتْذَكَّر أبُو الْهِمّاتْ
بِتْصِيحْ: أُوعا تِبْتِعِدْ عَنِّي
**
.. وهلّقْ، بعد ما كْبِرتْ، يا كْتابي
لْبِستْ الدّهَبْ بِسْنينَكْ الْخَمْسينْ
في ناسْ ما حَبُّوكْ.. نِصّابِه
بالسّر عَمْ تِزْنِي بْإسْم الدّينْ
قالوا حَكي.. ما بْيِنْحكى بْغابِه
قالوا: الجنس بيفَرّخ شْياطينْ
هَيْدا شُعوري بْزَهْرِة شْبابي
وْبَعْدُو شُعوري بْشَيْبِة الستّينْ
متْل الكذبْ دِقَّيْت عَ بْوابي
شِفْتَكْ طفلْ.. ما عرفتْ إنتَ مينْ
تْلاعَبتْ فيّي متل شي طابِه
وْقِلّقِتْني بِعْيُون نِعْسانين
أكْتُبْ شعرْ تا فَرّح حْبابي
بْخيطان شِعري حَيِّك فْساتين
ما في وْلا كلْمه فيكْ كذّابه
زِعّلْت حالي كْتيرْ تا إرضيكْ
وما رْضيتْ مَرَّه زَعِّل الْحلوين
**
ـ1ـ
"بشهر صْيامي.. عم يشكي
ويبكي المحروم"
قلتلا أكبر ضحكه
يصوم المغروم
ـ2ـ
يا حلوه أوعا تصومي
عن حبي دوْم
عيوني بحسنك مغرومه
وما بدوق النوم
ضلّي قبالي لا تقومي
بإيام الصوم
بشبع منّك.. مفهومه
وما بدّي صُومْ
**
حب
بدّي حبَّك كل الحُبّ
الـ ما حدا حبّو
وبدّي زتَّك جُوا القلب
تا يزهِّر قلبو
**
معوّد
معوّد ع شرب نبيد أحلى خدود
معوّد أنا صيّف بأعلى جرود
فيها الكرز محمر
والعنب مشقرّ
ومنو لحالو بيستوي العنقود
**
لا ترقصي
لا ترقصي.. ولا تهزهزي بخصرك
عم ترجف جفوني
وتعبت جريكي.. وانكسر ضهرك
ووقعتي بعيوني
بكرا بيقولوا الناس مين أمركْ
تا بسهرتي تكوني
ومين الـ عصر ع فرشتو صدرك
بلحظات ملعونه
سحرك سحرني.. آخ من سحرك
طيّر جنوني
ومن دون وعي بوّستك بشعرك
بوسات سكروني
**
ام الفستان الأحمر
ـ1ـ
أم الفسْتانْ الأَحْمَرْ
مَنْ حُبَّا عَمْ إِتْمَرْمَرْ
قِلْتِلاّ: إِنْتي الزَّهْرَه
قالِتْلي: الْبِنْت الشَّقْرا
بْيِعْجِبْها الشَّبّ الأَشْقَرْ
ـ2ـ
وْأَنا هَـ الأَسْمَراني
حُبّي ما إِلُو تاني
بْغَنِّيلا أَحْلى غْناني
وْهِيّي مَنْها سِئْلانِه
قَلْبا عَ طولْ مْسَكَّرْ
ـ3ـ
شو بِعْملْ قولوا يا ناسْ
عَمْ إِشْرَبْ مِنْ مُرّ الْكاسْ
بْحِبّا.. بْحِبّا بْدُونْ قْياسْ
والشَّقْرا الْـ متل الإلْماسْ
بْتِكْرَه اللّون الأَسْمَرْ
ـ4ـ
دْمُوعي عَ خْدُودي مِزْرابْ
وْإِيّامي متل الدّولابْ
الشَّقْرا اللّي عْيُونا عِنّابْ
حَرْقِت قْلوب الشَّباب
وْقَلْبِي واحدْ مُشْ أكْتَرْ
**
لو كان عندي بنتْ
سمّيتها بإسمِكْ
ولو كان عندي أختْ
زيّنتها بكسمِكْ
ويا ريت أصبا كنتْ
تا إغرق بْجِسْمِكْ
**
ـ1ـ
متكبرّه!.. ملكتي الدني
وراسك ما عمرو بينحني
وحكايتك متل الزعل
ما بيلتقي بعيش الهني
ـ2ـ
حلوه.. ما شالله بتسطعي
متل الشمس عم تلمعي
لكن يا حسره.. مكبّره
رغم الحسن بتفزّعي
ـ3ـ
يا مكبّره لو تسمعي
كلامي أنا وتتواضعي
رح إكفلك إنّو بسنه
بتتزوجي.. من دون سعي
**
عانس
ـ1ـ
حرمه أنا.. ومش مذنبه
ان كان الجنس من مطلبي
ربي حرم جسمي الهنا
وعانس تركني.. معذبه
ـ2ـ
عطشان جسمي للجنس
لحظة جنس عندي عرس
بحس الدني متل الحبس
رح إختنق ومشوّبه
ـ3ـ
وين الإيدين البارده
تبرّد جسم هالشارده
وليش الشباب مبيعدي
عن جسم عانس بعدها
وع جسم غيري مقرّبه
**
ـ1ـ
يا لابسه المريول
اللي بالشتي مبلول
وملتصق بالجسم
ما خلّى فينا عقول
ـ2ـ
مريولك مخيّط
ع قدّك الممشوق
الـ بيشوفك بيزحط
وبيلطم الـ بيسوق
واللي نبغ بالعلم
من طلتك مسطول
ـ3ـ
رح إسأل الفهمان
يا مزوّغه العيون
شو بيحكم الإنسان
تا بينقلب مسطول
بيحك راس الفهم
وإنتي السبب بيقول
ـ4ـ
كل شب أو ختيار
لو شافك بينهار
ويا حسرتي ع الجار
الـ بالعصفوريه صار
واللي بيقاتل زلم
من بوستك محلول
**
ليش؟
ـ1ـ
ليش رافقتي الخطيئه
ليش تا صرتي دنيئه
ليش انجرفتي بهالرياح
وليش ما طلبتي السماح
ليش ما كنتي جريئه؟
ـ2ـ
ليش ما رميتي السلام
وليش ما جيتي قوام
طلبتي من قلبي الأمان
وقلتي غدر فيي الزمان
ليش غيّرتي الكلام
تا تبيّني إنك بريئه؟
ـ3ـ
لا تلبسي تياب الألم
ولا تمسحي دموع الندم
ولا تغسلي وجّ الغدر
ولا تمحشي حكاية عمر
ولا تصرخي عيشي عدم
وسنيني بالغصه مليئه
**
ـ1ـ
بوستك ما نسيتها
يا معبودي
من ساعة اللي رخيتها
على خدودي
ـ2ـ
ومتذكره يا مراهقي
كيف كان
تمّي بتمك يلتقي
وشعلان
وبين البقي والما بقي
قلبي بحبّك يا شقي
فرحان
**
شفافك
شفافك ورده
بشمّا.. وبدّي
تبقى حدّي
لوقت الشده
لوقت الحشره
بليله حمرا
مجّ الخمره
وبُوس الورده
وحسّ بحالي
بمطرح عالي
وإنتي قبالي
أحلى مخدّه
**
مجنونه
ـ1ـ
لا تفكّرني شي مجنونه
الحب بقلبي كبير؟!
بين الحب وبين عيوني
في مجالات كتير
ـ2ـ
لا تفكّرني بعدي "نونه"
بتأثّر بكلام
بغمزات، بضحكه حنونه
وبرمية سلام
ـ3ـ
متل زهورك عندي مونه
حاجي تودي زهار
الأزهار الـ منّك بيجوني
برميهن بالنار
ـ4ـ
وبوساتك يللي خلوني
حس بنتفة روح
بالآخر قاموا جرحوني
بدل الجرح جروح
**
بكذبِك أنا إلّفت أطروحه
والصدق صابو من الكذب إحباط
أبواب تمّك دوم مفتوحه
من هيك طول الوقت مبحوحه
بعد الكذب.. عم يبتدي العياط
ـ2ـ
صرتي ع درب الغدر مشلوحه
وكنتي دهب موزون بالقيراط
عشتي معي إيام بحبوحه
سبقنا الشهور وضحكت الأشواط
رجعتي انتهيتي متل شهر شباط
**
لا تفزعي لو قويت الشيبه
وغطى التلج راسي يا عينيي
بتبقي الصبيه الساكنه بقلبي
وعم تلعبي متل الهوا فيي
بترجعيني شب من غربه
غرزت ضافيرا السود بـ ديي
ولِكْ خلصيني.. تعبت من صلبي
الأشعار صارت تضحك عليي
**
لو عندك ثقه فيي
ـ1ـ
لو عندِكْ ثقه فيي
كنتي بتهديني هديّه
من دون ما تخافي إمِّك
أو تستحيي من بيي
ـ2ـ
وكنتي بتزوري بيتي
ليليه عند السهر
بتقولي شو استحليتي
بجبلك.. لو كان القمر
ـ3ـ
بعمرلك دنيي جديده
من دون ما إشقع حجر
دنيي.. ببنيها يإيدي
مش ساكن فيها بشر
ـ4ـ
ومنصير نلعب ونغني
ونتفيّا تحت الشجر
إنتي وأنا بالجنه
ما منعود نعرف ضجر
**
ليلة عرسي
ـ1ـ
بدّي من شفافك بوسه
تكون كبيره
تفقع.. تا بليلة عرسي
تفيق الجيره
ـ2ـ
وبدّي أنّات وبدّي
تدليع شويْ
وبدّي شعّل المخده
وطفّيها بمي
ناديكي وإنتي حدي
ما تردي عليْ
وتوعى ستي مع جدّي
وأهالي الحيْ
واحد يركض تا يهدي
ووحده يا خطيْ
بلحظه حكمتها الجمده
وبعدا زغيره
**
شو نفع الدنيي
ـ1ـ
هالدنيي من دون تبويس
ومن دون شم وعصر نهود
ما بتسوى لعنه من بليس
ولا بتسوى قشّه ولا عود
ـ2ـ
شو نفع الدنيي يا ناس
لو ما فيها حرمه وكاس
والشبّ الـ بعدو ما باس
شفاف الحرمه.. وأحلى خدود
موجود.. ومَنّو موجود
**
