قصائد ديوان "عبلى" بصوت الشاعر شربل بعيني
**
مقدمة
بقلم شربل بعيني
طرحت سؤالاً على أصدقائي عبر "الفايس بوك"، مفاده:
هل يحق لي أن أكتب في الخامسة والستين قصائد إباحية وانشرها في ديواني الجديد "عبلى"؟
هل يحق لي أن أعود الى زمن المراهقة يوم نشرت ديواني الإباحي الأول "مراهقة" في لبنان عام 1968، وأحدث ضجة كبرى؟
ونشرت مع السؤال قصيدة إباحية من الديوان بعنوان "يا صبي" اعتبرتها الدكتورة بهية أبو حمد "قوية جداً" من ناحية الجرأة.
ووصلتني مئات الأجوبة المشجعة، كان أولها من الأديبة داليدا اسكندر التي كتبت "يحق للشاعر ما لا يحق لغيره. اكتب واستشعر فذهننا بحاجة ماسة لدفء حروفك.
وانا متعطشة لقراءة ديوانك "عبلى"، فكل العناصر الادبية الاساسية ستتفاعل ومنها عنصر الخيال لتظهر الصور الحسية والخيالية بأبهى جمالها".
وكتب الاعلامي المهجري أكرم برجس المغوّش: "أخي شربل ما شاء الله عليك لبطتك تهد الحائط، فلماذا لا تكتب الغزل الاباحي".
أما الشاعر مخايل القزي فلقد ارتجل هذه الأبيات الزجلية:
جود بأشعارك جود
الشاعر ما لو حدود
والحب بالأشعار
درب للخلود
فما كان من ابن بنت جبيل البار الدكتور علي بزي إلا أن لاقى الشاعر القزي زجلاً، فقال:
مراهق، يا شربل، إنت بالستين
بتبقى صبي لو صرت بالتسعين
تعتق خمر بخابية شعرك
ويْغلّ عمر الحب بـ عمرك
وإستر يا الله بعد عشر سنين
ولم يرضَ الاعلامي المصري أشرف حلمي الا ان يكتب: "يوجد مثل يقول: يموت الزمار واصابعه تعلب، واشرف يقول يعيش الكاتب وقلمه يكتب".
أما الكاتب العراقي صباح عبدالرحمن فلقد اكتفى بكلمتين ليدل على موافقته: "مبدع دائماً".
ولكي لا يقال أن الادب حكراً على الادباء علّقت الفنانة اللبنانية فيكي مارون قائلة: "أكيد يحق لك أستاذ شربل، المهم أن يظل القلم يسمع منك ويطاوعك، والله معك".
أما التعليق الذي سنتركه بلهجته اللبنانية التي كُتب بها الديوان، فلقد جاء من الشاعر والاعلامي سايد مخايل: "اللي متلك ما بيشيخوا، واذا كبروا بيصيروا متل الأرز الخالد، وكل قصيدة غصن من أرزة لبنانية".
وبالانكليزية علق الدكتور المصري صفوت رياض على الموضوع فكتب:
Dear Poet Mr. Charbel Baini age is just a number has nothing to do with your young emotional loving feelings.
So please give us more of these romantic poems which may ease us about the troubled current news in our Middle East countries.
وكتبت الاديبة شهلاء الألوان: "ابداع وشباب دائم".
أما الاديبة أميمة محمد فقالت:
"شربل...
أجد أننا نظلم هِرَمنا وكذلك المراهَقة بهكذا قول. أيام المراهقة لم يك لدينا أي مخزون بل محاولات كالحَبو. أما الان فالكتابة عن هكذا مشاعر أغزر وأجود وأجمل لوجود شواسِع نتكئ عليها في وجداننا. وصح لسانك".
ووصفت الأديبة مي سمعان القصيدة بـ"العارية الشفافة الناطقة".
وكما ترون، لم يترك المطرب العراقي اسماعيل فاضل، صاحب الصوت الذهبي، المناسبة تمر دون أن يكتب: "انت ذهب ومنور يا ذهب".
ومن أم الدنيا مصر علق الأديب عادل عطية بما يلي: "مشاعر الروح لا تشيخ ولا تتبدد".
ومن ألمانيا أطل الاعلامي اللبناني سعيد ب علم الدين قائلاً: "الشباب لحظة من لحظات الروح وليس فترة من فترات العمر. ابق شابا أخي شربل، يليق بك".
وليس بمستغرب على شاعر المرأة، كما يلقبونه، أسعد المكاري، أن يقول: "احلا مراهقه بهالعمر وبحروف دافيه متل حروفك.. انت الجنس اللطيف بيحبك".
أما الفنانة هند جبران فلقد بصمت لي بالعشرة حين قالت: "طبعاً يحق لك.. الرب يباركك".
وتمنى الناشط الاجتماعي جورج ديّوب أن يعود طفلا فكتب: "ليتني كنت صبياً صغيراً مثلك". تيمناً بالصبي بطل القصيدة.
وهذه الأبيات الشعرية من الصديق العزيز فاضل شباط تثبت أحقيتي في نشر ما أريد:
ما دام الحرف شرّف لحالو
وحب يلعب وشربل قبالو
مش هم شو بتقول عنو الناس
المهم ابو الشوش يغني موالو
ومن نبع محبته الغامرة غرف الدكتور قاسم مصطفى ليبل عطشي بهذه الكلمات الجميلة: "استاذ شربل.. جميل الحنين للزمن الجميل بحرف مختلف اكثر اناقة واغنى تجربة وثقافة ووعيا مطرزا بالوجد والفرح".
فادي الحاج الاعلامي المهجري قال: "كلما عاد الكلام عن الحب وخصوصا في غربة شاب فيه شعر المرء من مرارتها، تكون عودته بمثابة عودة الروح للجسد بعد انفصالها عنه، وتبدأ ترانيم الحياة بالحب، بالجاذبية الروحانية، بالتوحد، فيحلو كل مُر، ويعذب كل مالح، وتلمع العيون ببريق الأمل والسعادة، وتعزف أوتار القلب أعذب الألحان، ويأتي الربيع قبل الأوان وتذوب كل الآلام وتتلاشي الأحزان، ويصبح لون الغربة وردياً، وتتلون الأشياء بألوان الزهور وتتعطر برائحة السعادة التي هي أجمل وأزكى من أغلى أصناف العطور، ويشعر الإنسان بأنّ له جناحين قويين يطير بهما ويعلو فوق السحاب، حيث لا عذاب ولا عتاب وحيث ينهل من الحب بلا حساب، فما أحلى الكلام كلامك وما اروع الشعر كلام الحب ولو في عمر كبار الشباب".
أما الآنسة ميرنا نعمة فلقد كتبت: "كلمات رائعة من شاعر عظيم".
والمفاجأة الشعرية جاءت من المصور المعروف عبد المجيد حجازي فلقد كتب:
وكأني فيك هاك الصبي الما كبر
والصبية الحبيتها.. بعد بتفتكر
ونهدات تحت زخات العرق تطلع
تا شابو هالشعرات والنار بتستعر
بقي شاعران مهجريان عزيزان على قلبي لم أذكرهما، الأول فؤاد نعمان الخوري الذي قال: "مبروك يا صديقي، وسلمت يدٌ لا تتعب من العطاء"، والثاني روميو عويس الذي قال: " الشاعر عندما يكتب، يكتب لسواه من كل الاعمار وانت ادرى بذلك".
هذه مختارات قليلة من تعليقات مشجعة كثيرة، أفلا يحق لي إذن أن أنشر "عبلى" بعد مرور 48 سنة على ديوان "مراهقة" الذي قلت فيه:
هالحلمة اللي مشوبّه
يا ما قلوب مدوّبه
ومكتوب حدّا ع النهد
لا تلمسوني مكهربه
ـ2ـ
حلمتك يا زْغَيّرَه
متْعَجْرفه ومتكبّرَه
مين خَبّرا هيي الدني
يا زغيرتي والآخره
ـ3ـ
ما أطيبا هالفستقه
وهالفستقه يا مراهقه
عم تنعبد بهالدني
متل الإله الـ خالقا
بلى، يحق للشاعر أن يكتب في أي موضوع تقوده قريحته لطرق بابه شرط أن يوفق، وأتمنى أن أكون قد وفقت.
ملاحظة: بعض قصائد هذا الديوان نشرت باسم امرأة أخرى، ولكني وجدت أن "عبلى" هي الأحق بها، كيف لا وهي من أشهر نساء أمتنا العربية، وحبيبة عنتر بن شداد، فارس قبيلة بني عبس، وشاعرنا المبدع.
**
فستان
عَ بُرْج سيدني خِدتْها مِشْوارْ
طْلِعْنا سَوا عَ سْطوحْ سكْرانه
بِتْهِزّ.. متْل جْرين شي خِتْيارْ
قلْت: البرج شارب دِمِلْجانه
داختْ شويّه.. والعلُو غدّارْ
ومَحْسوبْكن واقف سنديانه
تِكْيِتْ ع صدري.. وإيدها الزنار
والشَّعْر، متل الليل، غَطّاني
ما كان غَيْري وغَيْرها.. بِنْهارْ
مِشْوِبْ.. وْ"عَبْلى" كْتير عرقانه
قَلْعِتْ قَميصا.. فَكّت الأزْرارْ
حْبُوب الكرز لَوْنا أًرُجْواني
مِدَّيْت إيدي.. قِلتْ بِطْفِي النارْ
لا الرّيق طَفّاها ولا لْساني
ومنْ بعد بَوْسه وبَوسْتين انْهارْ
بُرْج سيدني.. وَفَقْعِتْ قْناني
وِشْوَشْتها: بَدّي كلينكس غْمارْ
دَمْعاتْ حُبّي نازْلِه عْيانِه
بْكَمِّل.. بْوَقِّفْ.. هَالْفِكْر مُحْتار
بِفْزَعْ تْقولي راحْ فِسْتاني
ضِحْكِتْ وقالتْ: لا تْكون حْمارْ
الفِسْتان مُشْ رَحْ إلِبْسُو تاني
**
حلم
ـ1ـ
كِنْتِي الْحُلْم الْـ عَاش بْبَالِي
الْغَيْم الْـ عَم بِيشَتِّي عْيَالِي
كِنْتِي الزَّلْغُوطَه الْـ نَاطِرْهَا
مِنْ إِمّي.. وِتْجنّ لْيَالِي
وِزْهُورِي تِعْلاَ قْنَاطِرْهَا
وِدْمُوعِي تْرَنْدِحْ مُوَّالِي
ـ2ـ
تْرَكْتِي الْبَيْت اللّي رَبَّاكِي
تا تْعِيشي بْبَيْتِي غِنِّيِّه
تْرَكْتِي إِشْيَا ما بْتِنْسَاكِي
وْصِرْتِي الْفَرْحَه اللِّي بْعِينَيّي
يا "عبلَى".. حُبِّكْ ضَوَّاكِي
شَمْس بْعَتْم الإِنْسَانِيِّه
ـ3ـ
وَيْنُو بَيِّي يُوقَفْ حَدِّي
وْإمّي تْزَلْغِط بِمْسَامِعْنَا
وَيْنُو بَيِّكْ، إِمِّكْ، بَدِّي
يِكْبَرْ هَـ الْعُرْس الْـ جَامِعْنَا
بُكْرَا بْتفْرُج بَعْد الشِّدِّه
وْأَللـه، بِالْحُبّ، بْيِجْمَعْنا
ـ4ـ
حبَّبيْتِك.. تا صَاروا جْنَاحِي
يِعْلُوا، وِالْغَيْمِه تِحْسِدْنِي
حِبَّيْتِك.. هِدَّيْتِي رْيَاحِي
الْـ كانِت عَ ذَوْقَا تْشَرِّدْنِي
عَنِّك، يا هَيْصِةْ أَفْرَاحِي
مُشْ مُمْكِنْ دِين يْبَعِّدْنِي
ـ5ـ
يَا رَبّ الْـ رَحْ بِتْكَلِّلْنا
سَجِّلْ هَـ الْكِلْمِه بِالدَّفْتَرْ
بَدّي يَاهَا، بْحِبَّا، حْمِلْنَا
عَ جْنَاحْ الْبَخُّور الأَصْفَرْ
لِعْيُونَا.. اشْتَاقُوا مْنَازِلْنَا
بَارِكْنَا.. تا الْفَرْحَه تِكْبَرْ
**
أميره
ـ1ـ
بْحِبِّكْ يَا "عبلَى" قَدّ ما بَدِّكْ
باقاتْ وَرْد مْزَيّنِه خَدِّكْ
إِنْتِي الأَمِيرَه.. وِالإِمارَه قَلْبْ
مْوَصَّى وْصِيِّه يِنْتِهِي حَدِّكْ
ـ2ـ
مْضارِبْ بَنِي عَبْس اللي حبَّيْتا
كرمال عَيْنِك بَسّ حاكَيْتا
بِالشّعر.. بالأمْجاد لِفَّيْتا
تا تْديرْ وِجّا.. وْأوصَلْ لْعِنْدِك
ـ3ـ
بِحْلَمْ شِي لَيْلِه غِلّْ بِلْحافِكْ
وْإكْتُب شِعْر عَ لَوْحِة كْتافِكْ
وْمَلْيُون بَوسِه.. بَوِّس شْفَافِكْ
وْزِندي الْقَوي يِغْفَى عَلَى زِنْدِكْ
ـ4ـ
لا تِسْمَعِي شُو ما انْحَكى بِالْحَيّْ
ولا تِفْزَعِي لَوْلا غِضِبْ شِي خَيّْ
رَحْ إِطْلبِكْ.. ما بخاف أم وْبَيّ
إلاّ إِلِي ما بْتِنْطَلَبْ يَدِّك
**
عبلى
يَا مَا وْيَا مَا نْدَهْت يَا "عبلَى" تَعِي
نْمَشْوِرْ عَ دَرْب اللَّيْلْ شِي مِشْوَارْ
وْإِسْقِي زْهُورِكْ مِنْ حَنَايَا مَدْمَعِي
وْعَلِّقْ عَ صدْرِكْ كَمْ نِجْمِه زْغَارْ
كاتِبْ قَصِيدِه.. آخ لَوْلا بِتِسْمَعِي
كِيفْ الْغَزَلْ بِيلَهِّبْ الأَشْعارْ
كِنْتِي بْقلبي، بْدُونْ ضَجِّه، بْتُوقَعِي
وْبِتْعَمّري عَ الصّدر أَجْمَلْ دارْ
وِبْتِنْزلي صَوبْ الفَرَحْ وِبْتِطْلَعي
مِتْل الأَميرَه.. مْتَوّجِه بِالْغارْ
ويا دِلّ "عَنْتَر عَبْس" لَمّا بْتِقْلَعِي
فستانِك اللّي مْطَعّم بْأَزْهارْ
مْأَكّدْ بِعَتْم اللَّيْل بَدِّكْ تِقْشَعِي
بُرْكانْ حُبّي.. تا الشّفافْ تْوَلِّعي
والنار تِشْرَب مِنْ عَطَشْها النار
**
مش خايف
مُشْ خَايِفْ يْقُولُوا:
هَدَّى السَّمَا بْطُولُو
وْغَطَّى الشَّمسْ بِالإِيدْ
وْصَارُوا يْغَنُّولُو..
خَايِفْ لَصَوْت جْدِيدْ
من تمّ شي هَبْلى
يْقِلِّلي: إِذَا بِتْرِيدْ
خَزِّقْ زِينات الْعِيدْ
ما حَبّتَكْ "عَبْلى"!
ـ2ـ
الاحلام عَمْ توعَى
مْن النّوم مَسْبوعَه
خايِفْ تِهِجْريني
وبالآخْ تِرْمِيني
وْصيرْ ذِكْرَى وْبَسّْ
وْتِفْرَح قَبيلة عَبْسْ
الْـ رَفْضِتْ تِحِبّيني
شِفْتِكْ بِعَيْني شَمْس
مُشْ حَقّ تِطْفِيني
كْتَبْتِكْ قصيدة عرسْ
وْجايي تْمَحّيني
يا طالْعَه مْن الأمس
لا تْطَلّعي ديني
**
عصفورة
ـ1ـ
لِزِّي فِيِّي.. لِزِّي كْتِيرْ
أَمِيرَه.. وْحَبِّتْ أَمِيرْ
وِجِّكْ مَرْجِه كِلاَّ زْهُورْ
وِفْرَاشَاتِي عَم بِتْطِيرْ
فَوْقَا.. تَا تْحَوِّشْ مِنْ نُورْ
الْوِجّ اللِّي مْدَوَّرْ تِدْوِيرْ
يَا "عبلى".. إِنْتِي الْبَخُّورْ
وْقَلْبِي بِيحِبّ التِّبْخِيرْ
عُصْفُورَه وْحَبِّتْ عُصْفُورْ
انْشَاللـه بِيجِيبُوا عْصَافِيرْ!
ـ2ـ
عُمْري بَدَّي إِهْديكي
وْمنِ عْيُونُنْ خَبّيكي
دَرْبي دَرْبِكْ طُول الْعُمْر
تا تِمْشينِي وْإِمْشيكي
وْعَ دَرْبِك رِشّلِكْ زَهْرْ
وِبِالْقَصايِدْ حاكِيكي
يا "عَبْلى" لو بِكْتُب دَهرْ
حَقِّك مُشْ رَح أُوفيكي
بوسيني.. مَحّيلي الْقَهْر
الْفَرْحَه مَزْرُوعَه فيكي
**
رحله العمر
"عبلى" السَّمَا.. اللِّي نْجُومْهَا لُولُو
وِمْشَكْشَكِه بْفِسْتَانْهَا الأَحْمَرْ!
"عبلى" الْقَمَرْ والشَّمْسْ.. بِيقُولُوا
وْمَلْيُونْ زَهْرَه مْلَوّنِه وْأَكْتَرْ!
رِحْلِه الْعُمرْ.. لا تْفَكّرِي بْطُولُو
وْبَوْسَاتْ لَوْلا وْجُودْهَا مْنِضْجَرْ
أَحْلَى مَسَا بِيدِقّْ عَ طْبُولُو
وْإِنْتِي وْأَنَا عَمْ نِرْقُص بْهَاللَّيْلْ
وِعْيُونْنا مْنِ الْحُبّ، عَم تِسْكَرْ
**
تغنّجت نتفه
"عَبْلى" القَصِيده الْـ بَعد ما كْتَبْتا
لكنْ بِشِعْري كْتِير حِبَّبْتا
وصار القلبْ مِن فرْحتُو مُحْتارْ
كِيف قْدِرِتْ عَ الصّدر قِرَّبْتا
نِيّمْتْها.. وِشْفَافْها عَ نارْ
تْغِنَّجْتْ نِتْفِه.. كْتِيرْ عِذَّبْتا
وْمِنْ دُونْ وَعِي لِفَّيْتها بِزْنارْ
مْنِ زْنُود.. ما في يَوْم إِدَّبْتا
فَكِّتْ صَابيعِي بِالْقَميص زْرَارْ
وْحِمّالِة الْحَجْلَيْن خِرَّبْتا
وصرت إنْزِلْ.. والْعَرَقْ فُوّارْ
وْفَارِتْ قَضايا كْتِيرْ ما حْسَبْتا
وِبْشَيّبِة السّتينْ هَـ الْخِتْيَارْ
"عَبْلَى" وْشَبابا الْيَوْم شِيَّبْتا
وِصْرِيخْها وَعَّى حيطان الدّار
لِمِّنْ عَ تاني مَيْل قِلَّبْتا
**
فارس
عُمْرِكْ.. عُمْر الزَّهْر الْـ كانْ
يْلَوِّنْ صَفْحات الْبُسْتانْ
وْإِسْمِكْ "عبلَى".. وْصَفَّى اللَّيْلْ
يِسْرُقْ مِنْ إِسْمِكْ أَلْوَانْ
يْرَكِّعْلِكْ نَجْمات سْهَيْلْ
مْنِ النَّسْمِه يْجِبْلِكْ أَلْحانْ
وْيِمْحِي بالأشْعار الْوَيْل
يْغَنّيلِك أَحْلَى القصدان
وْمِنْ مَيْل يْبُوسِكْ.. مِنْ مَيْل
يْخَزِّقْ بِسْنانُو الْفسْتانْ
وِالشَّهْقَه تِتْفَجَّرْ سَيْل
وِيْشْكُر ربّو ع الطوفانْ
وْيِرْمِيكِي عَ ضْهُور الْخَيْلْ
وْحَدِّكْ "عنتر" إِبْن الْعِزّْ
فَارِسْ مِنْ أَحْلَى الْفُرْسَانْ
**
ممنونك
كِلْما تْخَبِّينِي بِعْيُونِكْ
يا "عَبْلَى".. بْقِلِّكْ مَمْنُونِكْ
دَفّيني بْريشاتْ رْمُوشْ
الْبَرد بْيِتْعِبْني بْكانُونِكْ
سْنيني رح حَوِّلْها قْرُوشْ
تا أُوفيلِكْ كلّ دْيُونِكْ
لا تْقُولي: حُبّي مَغْشُوشْ
عَنْتَرْ بِـ قَلْبُو بِيصُونِكْ
وْكِل ما الدِّنْيِي تْصَفِّي دْغُوشْ
بْطَفِّيلِكْ عَ الصّدْر جْنُونِكْ
وْلَوْلا وَدُّوا عْلَيِّي جْيُوشْ
بْحارِبْ بِالسَّيْف الْـ عَ جْفُونِكْ
**
كذبه
وِجِّكْ ضَوَّى بْلَيْل الْغُرْبِه
يا "عبلَى".. وْفَرَّحْلِي قَلْبِي
لا تْخَلِّي الْغُرْبِه تِغْلِبْنِي
وِتْخَبِّي الأَحْلامْ بْعلْبه
أَرْضِي وَحْدَا اللِّي بْتِعْجِبْنِي
رِشّيلي الأرزاتْ بْدَرْبي
الْغُرْبه عَ الخَوْف بْتِصْلبْني
وْبِتْكَحِّلْ عِينَيْها بْصَلْبي
سْنيني الْـ مَرْقِت بِتْعَذّبْني
رِدِّينِي بْإِيدِكْ يَا حُبِّي
وْجُودِي بِهَـ الْغُرْبِه.. كِذْبِه!
**
أجمل مرا
"عبلى" السَّما وِالأَرْض وِالنّجْماتْ
وِجَّا قَمَرْ.. شَعْرَا دَلَعْ غَيْمَاتْ
أَجْمَلْ مَرَا.. قَلْبِي عِشِقْهَا وْصَارْ
يْقَدِّمِلْهَا الأَشْعَارْ وِالْبَسْماتْ
وْيِجْمَعِلْهَا مْنِ جْنَيْنتُو أَزْهَارْ
بِتْجِنّ كِلْ مَا تْرَقِّصَا النَّسْمَاتْ
وِيْبَوِّسَا.. وِيْغَنِّجَا.. وِيْحْتارْ
بْأَيَّا طَريقَه يْسَمِّعَا الْكِلْمَاتْ
غنّيتْها بِـ أَجْمَلْ الأشْعارْ
تا صار إسْما شَهْقِةْ النّغماتْ
وِهْدِيتْها مْنِ مْحَبّتي زِنّارْ
وْكِرْمالْ عَيْنا بْتِرْخَصْ الدَّمَّاتْ
"عَبْلَى" الأنُوثِه مْحَبِّتا قِنْطارْ
مِتلا بنت ما جابِتْ الإِمّاتْ
بْبُوسا ما بِشْبَعْ.. بَوْسِتا مِنْ نارْ
وْجِسْما جْهَنّم شاعْلِه.. وِكْتارْ
لِمِّنْ بْمُوتْ بْيِسْأَلُوا: كِيفْ ماتْ؟
**
شمعات الحب
صِرْتِي بِالتِّسْعَه وْعِشْرِينْ
يا "عبلى".. يَا قَمُّورَه
كْبِرْتِي.. زْغِرْتِي.. مِتْلِكْ مِينْ
طَيَّرْ مِتْل الْعُصْفُورَه
وْقَطَّفْ زَهْرَات بْسَاتِينْ
كِل عُمْرِي حابِبْ زُورَا
إِنْتِي أَحْلَى مْن النّسْرِينْ
الشَّمْس بْتِهْدِيكِي نُورَا
غِلِّي بْقَلْبِي.. غِلِّي سْنِينْ
بَعْدِكْ طِفْلِه زْغَيُّورَه
وْ"عَنْتَرْ" بِيحِبّ الْحِلْوِينْ
وْإِنْتِي أَحْلَى مْنِ الصُّورَه
بْعِيدِكْ غَنِّتْ الِحْسَاسِينْ
وْرَقْصِتْلِكْ شَمْعات الْحُبّْ
وِالسِّنِه.. ابْتَدْيُوا شْهُورَا
**
قاصره
قَاصْرَه.. مِينْ قَالْ عَنِّكْ قَاصْرَه؟
يَا "عبلْتِي".. وْإِنْتِي الْعُمرْ كِلُّو
نِصّ الْعُمرْ مَسْكُوبْ تَحْت الْخَاصْرَه
سْنِينْ الْـ بِقُوا بِالصَّدرْ بِيغِلُّوا
بْصَفّ الْمَحَبّه كْتيرْ كِنْتي شَاطْرَه
نْجُوم الغَزَلْ بِـ لَيْلِكْ تْجَلّوا
إسْمِكْ.. إذا بِمْرَض بِفقْد الذّاكْرَه
رَحْ ضَلّ حِبّو وْقَدّسُو وْجِلُّو
إِنْتِي بْقَلْبِي الزَّنْبَقَه اللِّي نَاطْرَه
يْكُونْ الْقَلبْ إِخْلاصْ عَ حِلُّو
إِنْتِي الأَمِيرَه الْجَوْهَرَه اللِّي مْسَافْرَه
بِعْيُونْ "عنتر" وِالْمَرَاكِبْ وَرْدْ
وْمَوْجَاتْ.. فِينَا دَوْم يِتْسَلُّوا!
**
عيونك حلوين
عْيُونِكْ يا "عبلَى" حِلْوِينْ
خَبِّينِي فِيهُنْ عَ طُولْ
تَا حَوِّشْ زَهْر بْسَاتِينْ
أَزْرَقْ.. بِيسَوْسِحْ الِعْقُولْ
حِبَّيْتِكْ.. عُمْرِكْ عِشْرِينْ
وْلاقَيْتِكْ آخِرْ أَيْلُولْ
وْلِمِّن هاجَمْني تِشْرينْ
لْغِيتي مْن الروزْنامَه فْصُولْ
تِخْمين بْحُبِّكْ تِخْمينْ
مْحٍيتْ الْمُمْكنْ وِالمَعْقُول
مَا وَقَّفْ بِـ وِجِّي الدِّينْ
وْلا خِفْت يْدِقُّولِي طْبُولْ
"عَبْلى".. يا زَهْرَةْ نِسْرِينْ
بْحِبِّكْ.. لِلْعَالَـمْ رَحْ قُولْ
**
شمس حبي
لا تِسْأَلُوا قَلْبِي
عَنْ إِسِمْهَا الْغَالِي
زَرْعِتْ هَنَا بْدَرْبِي
وْكِلّ الصَّفَا بْبَالِي
"عبلَى" شَمِس حُبِّي
الْـ ضَوِّتْلِي بِلْيَالِي
وْخَلِّتْنِي بِالْغُرْبِه
ما إِستحِي بْحَالِي
"عبلَى" هَـ الِمْحِبِّه
أَبْيَاتْ مُوّالِي
رَحْ خَلِّدَا بْكُتْبِي
تَا الشِّعْر يِحْلالِي
**
أوعا تتكحّل
مِتْل عْيُونَا مَا فِي عْيُونْ
الصُّبْح تْصَبَّحْ بِشْمُوعَا
كِلْ ما تْفَتِّحْهُنْ بِتْكُونْ
شَمْس الدِّنْيِي عَمْ تُوعَى
وْقَلْبِي الْـ طِيَّرْتُو حَسُّونْ
وِدَّيْتُو يْزُور رْبُوعَا
حَبّْ عْيُونَا.. جَنّ جْنُونْ
وْطَفَّى جْنُونُو بِدْمُوعَا
يَا رَبِّي.. بِتْمَنَّى كُونْ
رْمُوش عْيُونَا الدَّلُّوعَه
و"عبلَى" تْقِلِّي: يَا مَجْنُونْ
أُوعَا تِتْكَحَّلْ أُوعَا!
**
عصافير الجنّه
ـ1ـ
فَتَّحْ وَرْد الْجُورِي بْبَيْتِكْ
يا "عبلَى".. لِمِّنْ حِبَّيْتِكْ
وْحِسَّيْت عْصَافِير الْجَنِّه
عَ شِبَّاكِكْ عَمْ بِتْغَنِّي
وْضِحْكِه مِنِّكْ.. ضِحْكِه مِنِّي
زِغْتِي.. ضِعْتِي.. بْعِدْتِي عَنِّي
وْقَعْتِي بِالضِّحْكِه.. وْلِمَّيْتِكْ
ـ2ـ
مِدِّي إِيدِكْ.. تِعْبِتْ إِيدِي
عَ شْفَافِكْ عَمْ يِنْطُرْ عِيدِي
وْأَللَّـه عَمْ بِيهَيِّي الزِّينِه
حَاسِسْ إِنِّكْ بِتْحِبِّينِي
وْإِنِّكْ رَحْ بِتْعَبِّي سْنِينِي
وْعَ حْدُود الضَّوّ تْلاقِينِي
وِتْزَهِّرْ فِيكِي مْوَاعِيدِي!
ـ3ـ
أَللّـه مْحَبِّه.. مْحَبِّه.. مْحَبِّه
ما فِهْمُوا أَللـه.. يا حُبِّي
كِلّ الْـ عَمْ بِيزَغِّرْ أَللـه
قُولِيلُو حَاجِي يِتْسَلَّى
أَكْبَرْ مُجْرِمْ.. مَهْمَا صَلَّى
أَللـه.. الْـ وِسْع الدِّنْيِي كِلاَّ
هَيْدَا اللِّي بْقَلْبِكْ وِبْقَلْبِي
**
قلبك
ـ1ـ
قَلْبِكْ أَبْيَضْ مِتْل الزَّنْبَقْ
مِتْل التَّلْج الْـ عَ صِنِّينْ
هْنِيَّالْ اللِّي فِيكِي تْعَلَّقْ
مَا بِتْخَوِّفْ عُمْرُو سْنِينْ
رَبِيعُو.. بِيبَلِّشْ هَلَّقْ
وْتِشْرِيِنُو.. مَا فِي تِشْرِينْ!
ـ2ـ
قَلْبِكْ.. عَمْ يِنْدَهْ بِالْغُرْبِه
حِبَّيْتَكْ.. عَكْس التَّيَّارْ
شُو بِعْمُلْ؟!.. جَاوَبْنِي رَبِّي
حِبَّا.. عْبِدْهَا.. عْمِلْهَا مْزَارْ
"عبلَى".. حُبَّا مَنُّو كِذْبِه
الْـ بِيحِبُّوا مَنُّنْ كُفَّارْ!!
ـ3ـ
قَلْبِكْ.. داوِخْني بْدَقَّاتُو
وْشُو بْحِبّْ عْلَيْهُنْ إِتْسَمَّعْ
مْنِ شِعْرِي اسْتَوْحَى نَغْمَاتُو
وْمِنْ عُمْرِي نُوتَاتُو جَمَّعْ
قُولِيلُو يْخَفِّفْ ضَرْبَاتُو
بَسْ يُوجَعْ.. قَلْبِي بْيِتْوَجَّعْ
**
خايف
ـ1ـ
لا تْدَبّلي عْيُونِكْ.. يا "عَبْلى" لا
فَتّحيهُنْ.. أَحْسَن وْأَحْلَى
خايِفْ لَشي مَرَّه مْقابيلُنْ جِنّْ
وْإِسْمَع كلامْ النَّاسْ عَمْ بِيرِنّْ
شُوفُوا، يا حَسْرَه، خوْتِتُو "عَبْلى"!
ـ2ـ
خايِفْ عيُوني تْغُوصْ بِعْيُونِكْ
وِيْغِزّ فِيّي خَنْجَرْ جْفُونِكْ
وْمِن دُون وَعِي أُوقَع عَ صدْر الْحُبّْ
مَرْمِغْ شْفافي.. وْدقّ يا هَالْقَلبْ
وْإِحْرُقْ إِيدَيّي بْجَمْر كانُونِكْ
ـ3ـ
خايِف "بَنِي عَبْس" الْقَبيلِه تْثُورْ
مِينْ الْـ سَمَحْلِي شَعِّلْ التَّنُّور
وْلَيْش الْعَرَقْ نازِلْ مِتلْ شِلاّلْ
وْجِسْم الْمَرا بيعانِق الرجّالْ
وْرِجّالْ عَمْ يِفْلَح أَراضي بُورْ؟
ـ4ـ
خايِفْ يا "عَبْلى" مْن الْقَبيلِه كْتيرْ
تَعْرِف جَمَعْنا بِالليالي سْريرْ
وْإنّو شَرَفْها ضاعْ بِالصّحْرا
شو رَح نْقِلُّن لَوْ إِجا بُكْرا
ومن دون زواج نْطَيّر عْصَافيرْ
**
ضوي الدني
"عبلى".. يَا "عبلى".. تِسْلَمِي لْقَلْبِي
ضَوِّي الدِّنِي.. مُشْ حَقّ تِتْخَبِّي
نْسِيتْ الْقَهْر عَ صَدْرِكْ الجَهْلانْ
وْبَعد الْبُغضْ.. عَاد وْنِمِي حُبِّي
كِنْتي الحُلمْ بِـ عَتْمِة النّسْيانْ
صارْ الْحُلمْ إِنْسان عَ دَرْبي
وْصار القلبْ بِـ طَلِّتكْ فِرْحانْ
وْصِرْتِي الْوَطَنْ عَ صَفْحِة الْغرْبِه
شِفتِكْ صَلا بِشْبِيّة الإيمانْ
وْأشْعار "عَنْتَرْ" غَنِّت الطَّلْبِه
جِرَّبِتْ إِنِّي بُوسِك وْفِزْعانْ
نِضْعَفْ سَوا.. وِتْبَلِّش اللِّعْبِه
جِسْمِكْ حلُو.. رَحْ شَبّهو بْبسْتانْ
كيفْ ما مْرَقِت عَم إلْمَحُو بْدَرْبي
مِدَّيْت إيدي حَوِّش الرّمانْ
تا فَرفطُو حبّه ورا حَبّه
سْمِعتْ صَوتِكْ ناعِمْ ورَنّانْ:
رِدّ إيدَكْ رِدّ يا جهلانْ
الرّمّان بَعْدُو ما اسْتَوَى بْعبّي
**
ضلّي اضحكي
ضَلِّي اضْحَكِي يا "عبْلتِي"، ضَلِّي اضْحَكي
اللُّولُو الْـ بِتِمِّكْ ما انْوَجَدْ إِلاَّ لِكِي
قَالُوا: الْمَرَا.. بْتِبْنِي الْبُيْوت.. بْتِسْعِدا
قِلْت: الأَمِيرَه.. عَمّرِتْلِي مَمْلَكِه
سِتّ الْحَلا.. مِنْ كلّ قَلْبِي بِعْبَدا
عِنْدا كَرَمْ.. بيغارْ مِنّو الْبَرْمَكي
يا بِنْت أَشْرَفْ ناسْ.. جُمْله بْرَدِّدا
وْبِحْكي لْعُيُونِكْ شِعْر.. ما بِشْبَع حَكِي
عَنْتَرْ أَنا.. بِتْخافْ مِنْ سَيْفي الْعِدا
ومِنْ سَيْف جِفْنِكْ.. هَالزّنود مْلَبَّكي
مِتْلِي أَنا بِالْكَوْن ما حَبِّكْ حَدا
رَغْم الْحَرْب.. رَغْم الْقِصَصْ الِمْفَبْرَكه
غِسّلتْ وِجّ الشّمسْ بِحْبُوب النّدى
وْرْمِيتْ سَيْفِي.. وْخِسِرْتْ هَالْمَعْرَكه
وْمِتل الْكِذبْ بًوَّسْت خَدِّكْ عَ الْهَدا
وْراسِي عَ صَدْرِكْ، غَصْب عَنْ راسِكْ تِكي
**
قنابل ذريّه
ـ1ـ
اللَّيْل مْغَطَّانَا جْناحُو
يا "عبلى".. غِلِّي فِيِّي
خْدُودِكْ عَ صدْري ارْتاحُوا
رَحْ إِفْرِشْلِكْ عِينَيِّي
ـ2ـ
ورح قلِّكْ: عَنْتَرْ شِدّادْ
بْإِسْمُو عَم تِتْغَنّى بْلادْ
شاعِرْ مَشْهُورْ وْأَمْجادْ
بْيِشْبَهْني مِيِّه الْمِيّه
ـ3ـ
تْذِكّرتْ الْبَوْسِه ع التِّمْ
وِالْبَوسِه بِتْشِيلْ الْهَمّْ
نِصِّكْ وَقَعْ.. قِلْت: بْلِمّْ
ما سِعْفُونِي إيديّي
ـ4ـ
يا "عَبْلَى" شِدّي الْهِمِّه
ما تْقُولي: بْتِزْعَلْ أمّي
الْبَوْسِه بِتْشَعِّلْ دَمّي
وِبِتْرَجِّفْلي إِجْرَيّي
ـ5ـ
بْحِبّكْ.. تا تْعيشي حَدّي
وْتِجْمَعْنا فَرْد مْخَدّه
وْهَدّي اْنكانْ فِيكي تْهَدّي
عِنْدي قْنابِلْ ذِرِيّه
**
حبّت أمير
"عبلى" بْحِبَّا كْتِير كْتِيرْ
أَجْمَلْ مِنْهَا ما بِيصِيرْ
بِفْرَحْ كِلّ ما النَّاس تْقُولْ:
أَمِيرَه.. وحَبِّتْ أَمِيرْ
لِعْيُونا.. رُوّضتْ خْيُولْ
مْنِ الأرضْ مْحِيتْ التّعْتيرْ
وْحُوّلتا جَنّاتْ حْقُولْ
وَردْ وْزَنْبَق وْعْصافيرْ
بْشِعْرِي عَمْ بِدْوِخْ الِعْقُولْ
أسْوَد.. لكِنْ إسْمي كْبِيرْ
بِعْشَقْها.. يا قَلْبي جُولْ
بْقَلْبَا.. في بْقَلْبا حْزازيرْ
غَنّجْها.. قِلْلاّ: "عَبّولْ"
حْبِسْها بْقَفَصْ ما بِيزولْ
لا تْخَلّي الْعَصْفُوره تْطِيرْ
**
حلوه زغيره
ـ1ـ
حِلْوِه زْغِيرِه.. عم بيقولوا
رَوْض.. وْغَامِرْتُو الأَزْهَارْ
ضِحْكِةْ سِنَّا حْبُوب اللُّولُو
شَمْس.. وْعَمْ بِتْزِتّ نْهَارْ
ـ2ـ
حِلْوِه زْغِيرِه.. فِيهَا فْرِحْنَا
وِجَّا بَدْر.. وْشَعْرَا غْيُومْ
بْتِزْرَعْ ضِحْكِتْهَا بْمَطْرَحْنَا
بِتْفَرِّخْ ضِحْكِتْهَا نْجُومْ
ـ3ـ
"عبلى".. مْرُوج وْعَمْ نِمْشِيهَا
وْعِينَيْنَا عَمْ تِحْصُدْ لَوْنْ
الْغُرْبِه كِلاَّ انْدَلْقِتْ فِيهَا
وَقْت الْـ خِلْقِتْ عِنَّا.. هَوْنْ
**
بالدّارج
حابِبْ حَاكِيكِي بِالدَّارِجْ
حَابِبْ قِلِّكْ إِنِّكْ اَكْبَرْ
إِنِّكْ أَشْطَرْ
وْصِرْتِي قَمْح الْحَقْل النَّاضِجْ
يا "عبلى".. الْـ مِنْ عُمْر النَّسْمِه
صَوْتِكْ صَفَّى الْحُلْم.. الْبَسْمِه
وْيَلِّلي الْكِلْمِه الْـ عَمْ تِحْكِيهَا
بْتِكَبَرْ فِيكِي حْرُوف الْكِلْمِه
مِدِّي إِيدَيْكِي.. فْتَحِيها
تْرَبِّتْ عَ إِيدَيْكي النَّغْمِه
**
مسرح
خَلّي صَابيعِكْ تِرْسُم الْمَطْرَحْ
الْخِيّال جايي يْرَقِّصْ حْصَانُو
وْمدِّي كْفُوفِكْ لِلْهَوا مَسْرَحْ
سَيْفُو انْكَسَرْ.. رَحْ يِسْحَبْ لْسَانُو
كِلّ ما هَجَمْ عَ خْيامِكْ بْيِفْرَح
وْكلّ ما رِجِعْ بِيخِفّ إيمانُو
قُولِي الْحَقِيقَه قَدّ ما تِجْرَحْ
قُولي: حَبيبي عَنْتَرْ زْمانُو
بِرْفُض عُيُوني بْهَالدّني تِسْرَحْ
لَوْ ما انْوَجَدْ هَالْقَلْب مِنْشَانُو
**
عم نكبر
بالعمر عم نِكْبَرْ
وبِالطُّول عَمْ نِقْصَرْ
يا "عَبْلَى" قَمْحِكْ لَيْشْ
ما زَيَّن الْبَيْدَرْ؟
لا تِسْأَلي قِدّيشْ
بِاللّيْل عَمْ إِسْهَرْ
وْوَقِّفْ عُيُوني جَيْش
عَ بابِكْ.. وْأَكْتَرْ
إِمْشِي عَلَى الطِّمَّيْشْ
وْجارْرْ مَعِي الْعَسْكَرْ
سْنِينْ الْعُمْر فُوفَيْشْ
عْلَوّاه لَوْ نِزْغَرْ
وْيِدِقّ فينا الطَّيْش
تا يْبَوّسِكْ.. عَنْتَرْ
**
عصفور أسود
عُصْفور أَسْوَدْ.. غَبَّرْ بْهَالدّارْ
والدَّارْ بَيْضَا مِتِلْ ضِحْكاتِكْ
وَسَّخْ الأُوضَه.. شَلَّعْ الأَزْهارْ
الْـ كانِت تْحبّ تْبُوسْ دَيَّاتِكْ
طَفَّى نَسايِمْ حامْلِتلي جْرارْ
مِنْ جْبالْ سِيَّجْتا بْنَظْراتِكْ
مَحِّي يا "عَبْلى" دَمعْتَيْن كْبارْ
حْبَسْتُنْ أَنا جُوَّا مْراياتِكْ
وْرِدِّي لْـ"عَنْتَرْ" ضِحِكْتُو الْقنطارْ
ما كِنْت من عُصْفُور بَدِّي غَارْ
لَوْ ما مِشِي، بالبيت، مَشْياتِكْ
**
مغروم
ـ1ـ
مَغْرومْ.. واقِعْ بينْ يَوم ويَومْ
مْهَسْتَرْ، كَأَنّي شارِب وْسكران
أَللّه سَتَرْ.. ما طَلّ شُرْطي النَّومْ
وْحَبْسِكْ بِقَلْبِي السَّاهِر وتِعبانْ
ـ2ـ
حُبِّكْ يا "عَبْلى".. كَحَّلْ عْيُوني
بْنَغْماتْ.. بِفْرَحْ حَمِّلا للرّيحْ
حُبِّكْ رَسَمْ عَ مْسارح جْنوني
ديكُورْ جامِدْ.. صعبْ إنّو يْزيحْ
**
خبيني بعينيكي الزرق
ـ1ـ
خَبِّيني بْعِينَيْكي الزُّرْق
مِنْ جمْعَه لْجُمْعَه
يَا "عَبْلى" .. فِي بْقَلْبِي حرْق
سْكبيلِك دَمْعَه
ـ2ـ
هاتي مَرْجُوحَه تْطَيِّرْنِي
بِالْعَالِي الْعَالِي
تِشْلَحْني بْغَيْمِه تْصَيِّرْنِي
نِجْمِه بِلْيَالي
لا بَدِّي شْروقْ وْلا غْيابْ
بَدِّي تِنْسينِي بِكْتَابْ
وتقولي يا بو الأحباب
رَيّحْلِي بالي
ـ3ـ
بْحِبِّكْ .. مِنْ يَوْم اللي كِنْتْ
يَا عُمْري غَنِّي
وِالْحُبّ الْـ بِعْيُونِي صُنْتْ
جَنِّه وْشُو جَنِّه
خَليكي فِيها عَ طُولْ
مِسْتَحْلِي بِـ قَلْبِكْ جُولْ
وْمَهْمَا تْمِرّ عْلَيّي فْصولْ
ما تْغِييِي عَنّي
**
كيف بدّي حبّك
كِيفْ بَدِّي حبِّكْ مُحْتارْ
يا "عَبْلى".. ودَمْعِي قنْطارْ
بحرُقْ قدّامِكْ بَخّورْ
وْبِشْلَحْ عَ إِجْرَيْكي الغارْ
والعينْ اللي بْتُعطي نورْ
لَو غارِتْ.. بِمْنِعْها تْغارْ
بْحبِّكْ.. وِالْمَحَبِّه زْهورْ
مَزْروعَه بِقْلوب كْبارْ
بْحبِّكْ.. وِالْمَحَبِّه طْيُورْ
غَنِّتْلِكْ أحْلَى الأشْعارْ
ضحكاتِكْ.. لـمِّنْ بِتْفُورْ
بْتِسْقيلي قَلْبي الْـ عَ نارْ
وْمَهْما تْطَلَّعْ فيّي "الزّورْ"
صدْقِكْ خَيْمِه بْتِحْمي الحُب
الْـ خلاّ ليلي يْصَفِّي نْهارْ
**
كحله
مْبارِحْ عَ وِجِّكْ نِزْلِتْ الْكِحْلِه
مَعْ دَمْعتِك.. يا دَمْعِة عْيُوني
وْصِرْت حَدِّكْ وِزّ.. وِالنّحْلِه
شْفافي.. اللي صَارُوا عَم يِحِرْقُوني
اسْوَدِّتْ خْدُودِكْ.. قِلْتْ أَرْيَحْلِي
غَسِّلْ بِريقي خْدُود سَحْروني
وْصِرْت، متل الطّفل، إِسْتَحْلي
بْكِحْلِة عْيُونِكْ كَحِّلْ جْفُوني
وْبَوّس التِّم الـ كانْ يِشْرَحْلِي
كيف لازِمْ خَفِّف جْنُوني
وْيا رَيْت لَحْم الْصّدر يِسْمَحْلي
آكُلْ.. وْخَبّي لِلْمسا مونِه
إِشْرَبْ.. وْيِشْرَبْ مِنْ عَرَق زَحْلِه
وْلِفّو بْإيديّي وْعَلّقو قونِه
وْجُودِك بِتَخْتي كْتيرْ أَرْبَحلي
الليْلِه يا "عَبْلى" بْخَيمْتي كُوني
**
نيران دمعي
لِمّنْ ما نِمْتِي بِالْمَسا حَدِّي
بْنيرانْ دَمْعِي حْرَقِتْ الِمْخَدّه
وْشِعْلِتْ شْفافي مِتِلْ شِي تَنُّورْ
دُوسي الْجَمرْ.. بَعْدُو عَلَى خَدِّي
وْصِرْت إِنْدُرْ لِلْمَحبّه نْدُورْ
وْإنْدَهْ يا "عَبْلى".. الصَّوْت ما يْوَدِّي
إِرْسُمْ نْجُومْ.. وْتَحْت مِنْها بْدُورْ
وْإِكْتُبْ شِعْر.. وِالرّمْل مِسْوَدّه
بْتِشْهَدْ جْرَيْكِي عَ شْواطي "صُورْ"
وْدَعْسات، متل الكذبْ، بِتْنَدّي
حَدِّكْ فِي قَلْعَه مْسَيّجِه بِبْحُورْ
هَيْدِي إِلِي.. رُوحِي سْألي جِدِّي
بْأُوضَه قَديمِه.. فْراشْها مْنِ زْهُورْ
رَحْ إنْطرِك.. رَح شَعِّلْ البَخُّورْ
تا يصير فيها.. متل ما بَدّي
**
بعلبك
متل العامود بْقَلْعة بْعَلْبِكْ
رَحْ شِكّ سَيْفي.. وْقِلِّك: بْحِبِّكْ
وْكِلْ ما عَ دَرْبي تْكَتّري الدَّعساتْ
بَدْل الرّملْ بِفْرُشْ زَهرْ دَرْبِكْ
اشتاقِتْ إِيديّي لْغَنْجِةْ اللَّمْساتْ
اشْتاقِتْ تْخَبِّي سِرّها بْعِبِّكْ
وْبِلْسان شاعِرْ آخِدْ قْياساتْ
صَدْرِك، تا إِسْمَعْ شُو حِكي قَلْبِكْ
وْإسْبَحْ بِجِسْمِكْ.. إرْبَح الْكاسات
إتْعَبْ.. وْإِغْفَى الليْل عَ جَنْبِكْ
وكلْ ما عَ تِمّي تْرَشِرْشي الْبَوساتْ
بْتِرْضِي يا "عَبْلى" قَلْبِكْ، وْرَبِّكْ
**
جبيل
بدل الْخَيْمِه بْخَلّي جْبَيلْ
تْعَمّرْلِك قَلْعَه عَ الشّط
وْبِعْمِل صَدْرِك مَرْبَطْ خَيْلْ
وِخْيُولي مْعَوَّدْها تْنطّْ
يا "عَبْلى" نجْمات سْهَيلْ
شَكْلِه بْشَعْرِك بَدِّي حطّ
مِنْ مَيْل بْمَشِّط.. مِنْ مَيْل
بْغَنِّجْلِكْ.. طَّيْرَيْن الْبَط
ـ2ـ
وِجْبَيْل الأَبْجَدِيِّه
بْتِعْطِيكي مْنِ حْروفا نُورْ
بْتِزْرَع إِسْمِكْ غِنِّيِّه
صَعْبِه يِنْساها الْمَعْمُورْ
كِرْمالا حِنِّي عْلَيِّي
إيّامي بْدُونِكْ دَيْجُورْ
بَوْسِه زْغِيرِه بْعِينَيِّي
وَبَوسِه زْغِيرِه عَ شْفافي
بَرْكي بْيُولَعْ هَـ التَّنُّورْ
**
مجدليّه
يا مِجِدْلَيَّا.. هَـ الْمِجِدْلِيِّه
الْجايي لْعِنْدِكْ.. رَحّبي فيها
سِكَّنْتها جُوّات عِينيّي
وْصفّيتْ دَمْع الْعَيْن إِسْقيها
"عَبْلى" قَصيدةْ حُب مُضْوِيِّه
بْلادْ الْعُروبِه عَم تْغَنِّيها
كْتَبْتا بإيدي.. بَسّ ما فِيّي
عَنْ كَفّ إيد الشَّوق إِمْحيها
شِعْلِةْ وَفا.. بِتْفيضْ حِنِّيِّه
ألله.. مِتلْ قِنْديلْ ضَاويها
جْداديلْها عَ الضهر مِرْخِيِّه
متل الْـ كَأَنُّو الليل كاويها
وِشْفَافْها بْراكينْ نارِيّه
بَعْرِف بِريقي كيفْ إِطْفِيها
وِخْدُودْها جَنّه طَبيعيِّه
رِضْيِتْ تا يِحْميها حَراميها
بِسْرُق البَوْسِه.. بْطَوِّلْ شْوَيِّه
وِبْصيرْ، مِتل الدّيكْ، إِشْويها
مِتْلِك، يا ضَيْعَه، غالْيِه عْلَيِّي
كِرْمالْ عَنْتَر عَبسْ.. حِبِّيها
**
عنتر
عنتر إبِنْ شدّادْ بيقلِّكْ
مِتْلُي بَطَلْ.. ما بْيِقْدر يْجِلِّكْ
عَ السّيف حافِرْ إِسْمِك مْنِ زْمانْ
وْجُوّات قَلْبُي تارِك مْحَلِّكْ
"عَبْلَى" بشِعْري اخْتَصْرِت النِّسْوانْ
وْ"عَبْلَى" بتَخْتِي، جْنُون عَ حِلِّكْ
مِنْشانْ يِبْقَى هَـ الشَّرْف منْصَان
بِـ شَرْق ضدّ الْحُبّ تا يْذِلِّكْ
وْمِنْشَان سِدّ بْواز هَـ الجيرانْ
مَجْبُورْ إِنِّي آكْلِكْ كِلِّكْ
وْلَوْلا ما كانْ بْيِسْتِحِي الِحْصانْ
أَخْبارْ حُبّي كانْ وَصَّلِّكْ
إِنّي كْتَبِتْ إِسْمِك عَلَى الْحِيطانْ
إرْسُم الصُّورَه.. وْإِقْعَدْ بْظِلِّكْ
وْمِنْ دُونْ وَعي مِنْ كِتِرْ عَطْفُو كان
عَ دَرْب بَيْتِي، بْحافْرو، دَلِّكْ
لا تْصَدّقي شو ما حَكُوا الْعرْبانْ
عَنْ قَيْس لَيْلَى.. عَنْ وَفا خُوتانْ
وَحْدي أنا المَجْنون.. يا دِلِّكْ
**
صليب وهلال
بُكْرا صَليبي بْيِغْمُر هْلالِكْ
وْمِنْ هَـ الْمَحَبِّه بْتِنْبُت عْيالِكْ
لا طائفيّه، لا بُغض، لا حْروبْ
رضْعُوا حَليبِكْ.. وَزّعُوا خْصَالِكْ
مِنْ فَردْ كِلْمِه بْيِنْقَرا الْمَكتُوبْ
ألله مْحَبِّه.. وَسّعي مْجالِكْ
بيقَرِّبْ المَحْبوب ع المَحْبوبْ
بْيِزْرَع حَنانْ بْهَيْبة رْجالِكْ
لَيْش الشَّرق يا "عَبِلتي" مَغْضُوبْ
بْيِقْتُل بِإسْم الدِّينْ أَطْفالِكْ
نُور الشّمس بِيحَوّلو لِغْروبْ
بْيِمْنَعْ يَمينِكْ يِحْضُن شْمالِكْ
مَطْلُوبْ مِنّا.. نْنَفِّذ الْمَطْلُوبْ
نْخَلِّي الصَّحارى تْعانِقْ جْبالِكْ
نْخَلِّي الْفَقيرْ الـ ع الدّرب مَصْلُوبْ
يْبَوْرِدْ لَهيبو بْفَيِّة خْيالِكْ
مْنُوصَل لَ أَلله عَ دْرُوبْ دْروبْ
وْدَرْبِك الأسْرَع.. يا هْنِيّالِكْ
**
نار القبيله
ـ1ـ
لَيْش الْقَبيلِه مْشَعّلِه نارا
وحانْ الوقتْ زورِكْ
وْإِتْنَشَّق عْطُورِكْ؟
وْكيفْ بَدّي وَقّفْ زْيارَه
كِرمالْ ضَوّ بْيِكْشُف خْيامِكْ؟
وناطِرْ تا شِكّ السّيف قدّامِكْ
وْقِلّك: أنا بْحِبّكْ
نامْ حَدِّكْ.. يِزْعَل حْرامِكْ
كل ما إيديي تْفَلْفِشْ بْعِبِّكْ
ـ2ـ
النّار.. بعدا نارْ
وِعْيُونهُنْ زنّارْ
رْجال الْقبيلِه بْيِسْهَروا
تا يْفبِرْكوا أخبارْ
ولِكْ كيف بَدُّن يِنْطروا
شْفافي أنا
فَوق الصّدر يِتْحَمروا
وْيتْجَمّروا
بليلة هنا
وْلِكْ كِيف بَدّي نامْ
وْما كَسّر عْضامِو
وإغْمُر جسمْ منضامْ
مِنْ كِتْرِة صْيامُو
ـ3ـ
عَنْترْ إبن شدّادْ ما بيخافْ
سَيْفو إذا بْيِلْمَعْ
أَبْطالْ عَمْ تِرْكَعْ
وْتِرْجُفْ رُكَبْ وِشْفافْ
وْ"عَبْلى" بْتَعرِف مِينْ
وَدّالْها حْسَاسِينْ
تْقِلاّ: أنا جايي
حامِلْ تَلْج صنّينْ
رِدّي الْبِرْدايه
كل الدّفا تِخْمينْ
عندك.. يا دِفّايِه
ـ4ـ
رَح إنْطُر النيران حتّى تْخِفّ
وْتْصيرْ جَمْر وْتِنْطِفي
وْكل المَضارِبْ تِخْتِفي
جايي أنا بِالْخِفّْ
لا صْهيل.. لا دَعْساتْ
لازِمْ بحُبِّكْ إِحْتِفي
وْلِكْ.. حَضّري الْبَوساتْ
والشّم.. واللّمْسات
وْلا تِفْزَعي لو جفِنْ إِمِّكْ رَفّ
لابس أنا الْقِبْع الْخَفي
**
طرحة
مْنِ "طْرابْلُس" رَح إِشْتِري الطَّرْحَه
والدّهب والإلْماسْ
وْحَوّل عَلَى "الْبَتْرون" تا الْفَرْحَه
تِكْمَلْ بِعين النّاسْ
وْرَح جِبْلِك الليْمونْ
والقمح والزَّيتون
مِنْ "كورْتي" الْخَضْرا
وْمِنْ "إِهْدِن" وْ"أميونْ"
حَوِّشْلِكْ الْخِضْرَه
وتفّاحة "بْشَرّي"
بِتْوَرّد خْدودِكْ
لا تْخافي يا عُمْري
مِنْ تَلْجِة جْرودِكْ
مْنِنْزلْ عَلَى "زْغرتا"
تا ناكُل الْكِبّه
و"عكّار" خِبَّرْتا
تْلاقيكي بِمْحَبّه
وتْعَمّر الدّبْكِه
وْمنْ بَعْد شي مليونْ آويها
وصلنا عَ ضيْعَه مجدها بْيِحْكي
هايْ "مِجِدْلَيَّا"..
بَسّ حِبّيها
وْغَنّي "المُولَيّا"
وْ"يا بِيّاع الْعِنَبْ وِالْعَانْبَيّا"
حتّى تْراضيها
وبأجملْ الضّحكاتْ لاقيها
يا ساكنه بْقلْبي
وْدَرْبِك عَلَى دَرْبي
نْكايِه بالغُرْبِه
رَحْ نِنْتِهي فيها
**
حكي مسموع
خَلّي الْحَكي مَسْمُوعْ
ما بْحبّ إتْخَبّى
لْـ "عَبْلى" في عِنْدي جُوعْ
العينين ضو شموع
وِشْفافْها مْرَبّى
انْ جِرّبْتْ شِكّ نْزولْ
بِتْصِيح: مُش مَعْقُول
عَنْتَر مُش مْرَبّى
وْهَوْنيك في نارَيْن
بْتِحْرُق على الْمَيْلَيْن
بْتِمْشِي مع الإجْرَيْن
وِبْتِنْطفي بْعِبّا
وْبَس تِدْمَع الْعِينيْن
بِرْجَع بْشِد طْلُوعْ
وْتا حَقّق الْمَشْرُوعْ
بْقِلاّ: أنا بْحِبّا
**
مسكين
تا زَعِّلْ سْلاطينْ
وْحُكّامْ مَأْجُورينْ
رَحْ إِزْرَعِكْ شَامِه
عَ خَدّ شرْق بْتِحِكْمُو شْياطينْ
وبْكل بَيتْ بْيُوجَدْ حْرامي
فيكي يا "عَبْلى" تْعَقّلي مْجانينْ
فيكي يا "عَبْلى" تْوَزّعي شْهامه
وِتْحَوّلي هَـ النّاس قِدّيسين
لا بْيِحلْفوا بِألف دينْ وْدينْ
وْلا بيكذبوا.. ولا بْيِسِرْقُوا أْسامي
وْلِكْ لَيْش دَخْلِكْ لَيْش مَعْجوقينْ
تا يِطْلَعوا عَ جَنّة الْحلْوينْ
وْقبل وَقْتا.. تْقُوم الِقْيامه
وْبَعْدِي أنا المسكين
ناطِرْ قبل تِشْرينْ
تْجِيني يا "عَبْلى" منّك عْلامِه
تِرْضي غَرامي وكل أحلامي
زَيِّنْ الْفَرْشِه بْوَرْد وِبْنَسْرين
وْمن دُون ما قِلّك تركْضي تْنامي
**
يا صبي
ـ1ـ
حاجي بَقى.. بْدَقّات قَلْبي تِلْعَبي
وِتْنَكِرْزِيني.. وْتِنْدَهيلي: يا صَبي
روحي اسْألي شْفافِكْ عَن اللي ذَلّها
روحي اسْألي شَهْقاتْ طِلْعِت كلّها
وْلولا "الصبي" عِشْتي أُنُوثِه مْعَذَّبِه
ـ2ـ
مين اللي خلاّ خَيْمتِكْ تِفْرَحْ
وْ"عَبْلَى" عَ صدري تِسْرَح وْتِمْرَح
بِالليل لَمّا قْطَفت بَوْساتِكْ
ما عادْ إِلْهُنْ حِسّ دَعْساتِكْ
نِمْتي.. تا صَفّى جِسْمِك الْمَسْرَحْ
ـ3ـ
هَيْدا "الصّبي" اللي نَحْتِكْ بْإيدَيْه
آيِةْ جَمالْ.. وْحَبْسِك بْعِينَيْه
وْخَلاَّ الرّجولِه تْحَمِّرْ خْدُودِكْ
وِتْوَقّف الْكَرْزاتْ عَ نْهُودِكْ
وْراسِكْ ما يِتْكي غَيْر عَ إجْريْه
ـ4ـ
عَنْتَرْ أنا.. لا تْغَيّري إِسْمي
بْتِزْعَل الصّحْرا.. بْتِغضب النَّسْمِه
مِنْ يَوم كنّا زْغارْ حِبَّيْتِكْ
وْصرْتي عَ صَدْري تْعَمّري بَيْتِكْ
وْمِنّك لَحالِك تِغْرَقي بْجِسْمي
**
خمسه وستين
صرتْ بِالْخَمْسِه وْسِتّينْ
وْبِتْحُومْ عْلَيّي فْساتينْ
يِمْكن بيحبّوا الأشعارْ
قاموا انْغَرْموا بِالْمسكينْ
شاعرْ ضجران.. وختيارْ
الْفَرْشِه ناكِرْتو مْن سْنينْ
اخْترَعْ "عَبْلى" مْن الأخبارْ
تا يْدَفّي بْإسْما تِشْرين
وْتِشْرينْ.. الْبَرْد الْغَدّارْ
الما بْيَعْرِف مَحْسُوبِكْ مينْ
دِفّيتُو.. وْخِلّيْت الدّارْ
تِحْمى.. وِتْجِن كْوانِينْ
عَمْ إِكْذُبْ.. كِذْباتي كْتارْ
الْمِتْلي بيصيروا مْجانينْ
إنتي بقلبي ليل نْهارْ
وما بِعْشَقْ غَيْرِكْ حلْوين
غْزَلْتِلّك إيدي زنّار
وْسِيَّجْتِكْ مِتْل بْساتين
حبّيتِك.. والورد زْرارْ
وقطفتك باقةْ نسرينْ
وْلِبَّسْتِك إكْليل الْغارْ
وفُستانِكْ زَهْر الْياسْمينْ
وْبُوّسْتِكْ.. بَوْساتْ كْبارْ
تَرْكِتْ عَ شْفافِكْ تِلْوينْ
حبّك نارْ.. وْصدرِك نارْ
وْعَم إتْلَوّى.. يا ستّار
بْجِسْمي شِعّلتي بْراكينْ
**
قطيع ولاد
ـ1ـ
إنسانْ متل الدّيبْ بيعَوّي
وْإنْسان كلّو عاطفه وْقُوّه
لَيْش الْبَشَرْ بِالْعَقلْ مخْتلْفينْ
بْيِخْلَق هابيلْ بْيِقتلو قايينْ
وْبَعْدا الشّمس عَ النّاس بِتْضَوّي
ـ2ـ
لَوْ كنت أَلله بْغَيّرْ اللّي صَارْ
بْفَجّرْ شَبابْ بْشَيْبِة الْخِتْيارْ
بِطْمُر جْهَنّم بِالْورد والحُبّ
بِمْحي الْخَطِيّه الْـ عَشْعَشِت بالْقَلْب
وْأَوَّل ما بِلْغي المَوْت.. يا جَبّار
ـ3ـ
لَوْ كنتْ أَلله.. بِخْلَقْ الإنسانْ
عَ صُورْتي، تا يْعَمّرْ الأكْوانْ
وِبْفَرْد لُغّه يِنْطُقْ الْمَعْمُورْ
وإمْحي الْفقْر.. خَلّي الشَّعبْ مَيْسُورْ
وْإِهْدُم حُدود مْقَسّمِه الْبُلْدانْ
ـ4ـ
لو كنت ألله بشنُقْ شْياطين
زَرْعُوا الفِتنِه بين دين ودين
وخلّوا السّياسِه تْفَرّق الأحبابْ
قَتْلُوا، وما حِسْبُوا للضّمير حْسابْ
وْحَرْقُوا الدّني.. تا يِفْرَح الْبَنْزينْ
ـ5ـ
لكنْ أنا عَنْتَر إبْن شدّاد
بْصدْري قلْب بيحبّ.. وسْع بْلادْ
وْ"عَبْلى" حياتي وْفَرْحتي كلاّ
كلْ ما بْشُوفا بِلْمَحو لألله
جارِرْ خلف منّو قَطيع وْلادْ
**
نور الحبّ
لمّا الْحزنْ بينَتِّف جْناحي
بْقِللاّ: يا ربّات الْوَحي ارْتاحي
كنتْ شُوفِك ماشْيِه ع الدَّربْ
تْطير الْعَبايِه.. تِفْرَح رْياحي
وكل ما ضْحِكْتي.. كانْ يِضْحَك قَلْبْ
وْكلْ ما حْكيتي سَلِّم سْلاحي
وْفَجْأَه انْطَفَى بالحَيّ نُور الْحُبّْ
وْصارتْ سَراب الكذب أفْراحي
عَنْتَر، يا "عَبْلى" بالقبيله شبّْ
سكْران فِيكي.. وْسَكرتُو مْن الرّب
ليشْ حَتَّى تْكَسّري قْداحي؟
**
رعشه
ـ1ـ
كل ما الرّعشه تفوِّر دمِّك
وترفعلِك صوتِك بالعالي
يا عبلى.. بهجم ع تمِّك
تا خفّف صوتِك بليالي
وبعد البوسه برجع ضمّك
وخيالِك بيصفّي خيالي
ـ2ـ
ويا دلّك لو عرفت أمّك
لا تقوليلي مش رح بالي
بيزعل بيّك، جدّك، عمّك
ويا تعتيرك من هالحاله
كل عمري رح آكل همّك
وصوت الرعشه يبقى ببالي
**
غبار الضغينه
بعد الهجر.. حبّيت إنّي زور
ديارك يا عبلى.. وبوّس ترابا
شفت الشوارع خاطرا مكسور
وبيوت عم تنده ع أصحابا
لا صوت طالع.. لا ضحك.. لا نور
غبار الضغينه وسّخ عتابا
لوين راحوا لوين؟ والديجور
مخيّم ع ضيعه خنقت حبابا
وبيتك، يا عبلى، مسيّجينو بسور
متل الحبس.. هالناس شو صابا؟
زرعت زعل.. ما في قلب مسرور
جنون الحرب عم يحصد شبابا
وبالزور عم يمشي الوقت بالزور
الما مات بعدو عايش ومقبور
وكل المقابر فتحت بوابا
**
مرجوحة الاحلام
ـ1ـ
مرجوحة الأحلام.. سمّيتو
بيتك المنصان
بمي الدهب بالتبر رشّيتو
وباللولو، بالمرجان
غطيتو
وعنتر يا عبلى العاشق الولهان
من بعد بيتو
بينسمى بيتو
ـ2ـ
بيتك، يا روحي، راسمو فنان
أحلى مْن قصور الدني لقيتو
هون السما بتحتار
ليش النجوم كتار
وليش السقف للغيم علّيتو
يمكن شي نجمه توقع وينهار
سقف السما وتتخربط الأكوان
ويزعل قمر جهلان
مديت ايدي.. السقف وطيتو
والبيت جوّا القلب خبّيتو
بركي بصدري بترقص القصدان
تا ينتهي القنديل من زيتو
ـ3ـ
هديتك أنا العصفور مع خيطو
تا يسمّعك، يا حلوتي، الألحان
طار منّك.. غطّ ع حيطو
وغل بالأشجار
وصار يمكن صار
شي لون عم يغرق بهالألوان
شي رسم عم بيزيّن االحيطان
فتشت عنّو بين هالأغصان
وبعدني لليوم ما لقيتو
ـ4ـ
ويا ريت مره بتنطق الاشعار
عن حب متل الزهر رشّيتو:
حابب بـ بيتك عيش ليل نهار
من فرد نظره كتير حبّيتو
**
