قصائد ديوان "مشّي معي" بصوت الشاعر شربل بعيني
**
شعر ووزن
ـ1ـ
قَالُوا: انْتِبِهْ.. فِي بْحُورْ فِي أَوْزَانْ
مِنْشَانْ يِبْقَى الشِّعْر بِقْصُورُو
قِلْتِلهُنْ: شِعْرِي أَنَا إِيمَانْ
وِسْع الْمُحِيطْ الْـ بَالِع بْحُورُو
ـ2ـ
وَيْن الْوَزن؟! ضَاع الْوَزن وِالنَّاسْ
عَمْ يِدْبَحُوا بَعْضُنْ بِـ أَوْطَانِي
وْوَزْنَاتْ أَللّـه الْيَوم عَمْ تِنْدَاسْ
وِالأَرْضْ عَمْ تِمْشِي خْلَيْفَانِي
ـ3ـ
الشِّعر عِنْدِي.. وْيِسْمَحُوا النّقَّادْ
أَهْدَاف تِتْفَاعَلْ بِلا تَفْعِيلْ
أَحْكَامْ تِخْلَقْ مُجْتَمَعْ وِبْلادْ
وِبْيُوتْ تِحْضُنْ أَلف جِيل وْجِيلْ
ـ4ـ
الشِّعر عِنْدِي.. كمْ بَوْسِه وْإِيدْ
تْغِلّ تِمْحِي مْنِ الصّدُور الْهَمّْ
وِشْفَافْ تِكْتُبْ عَ الْهَوَا مْوَاعِيدْ
وْأَحْبَابْ تَحْت جْوَانْحُو تِلْتَمّْ
ـ5ـ
الشِّعر عِنْدِي.. مِتل طَيْر حْمَامْ
رِجْعِ بْغُصنْ زَيْتُونْ مِنْقَارُو
أَمَّا الْغُرَاب الأَسْوَد الْمنْضَامْ
طَار وْيَا حَسْرَه انْقَطْعِت خْبَارُو
ـ6ـ
الشِّعر عِنْدِي.. دْمُوعْ بَيّ وْأُمّْ
وْثَوْرِة شَعبْ بِـ وِجّْ ظُلاَّمُو
وْقِصِّةْ بَطَلْ خَرْطَشْ بِحِبر الدَّمّْ
سْيُوف تِقْطَعْ نَسل حُكَّامُو
ـ7ـ
الشِّعر مَنُّو وَزنْ.. مَهْمَا يْصِيرْ
نِحْنَا الْـ خَلَقْنَا الْوَزن وعْبَدْنَاهْ
إِبن الْخَلِيلْ الْـ بَلَّش التِّعْتِيرْ
فَبْرَكْ عَ ذَوْقُو الْوَزن.. وِلْحِقْنَاهْ
ـ8ـ
عَادَاتْ.. خَلِّتْ شَرقنا يِنْهَارْ
وِالغَرْب يِبْسُطْ عَ الدِّنِي مْجَالُو
عِنَّا.. التَّمَرُّد عَ الْقَوَاعِدْ عَارْ!
وْعِنْدُو.. الْحَرفْ تَا يْفَهِّم طْفَالُو!
ـ9ـ
عَادَاتْ.. هِيِّي بِالْحَقِيقَه قْيُودْ
جْنَازِيرْ.. فَوق كْتَاف أُمِّتْنَا
خَلُّوا الأَدِيب بْكلّ رَاحَه يْجُودْ
وْيِكْتُبْ عَ صَدر الْكَوْنْ كِلْمِتْنَا..
**
يا مارْقَه حَدِّي
ـ1ـ
يا مارْقَه حَدِّي
حْبَسْتِكْ بِـ عينَيّي
زِنْدِكْ عَلى زِنْدي
وْمُشْ حاسِّه فيّي
ـ2ـ
تغزّلت تا نْبِحَّيْت
وِمْشِيتْ عَ مَهْلِي
قِلْتِي عَلى السّكَّيْت:
هالشّب شُو بَهْلي
ـ3ـ
أَيْوَه.. أَنا مَفْتُونْ
بِعْيُونِك الْحِلْوينْ
طِلَّعْتي مِنّي جْنُونْ
بيخَوِّف مْجانينْ
ـ4ـ
حِنّي عَلى الْمَغْرومْ
عَمْ حَلّفِكْ حِنِّي
اللي بْيظلُم الْمَظْلومْ
ما بْيِدْخُل الْجَنِّه
**
مشّي معي
ـ1ـ
مَشِّي مَعِي تَا نْطِيرْ
يَا حُلوتِي السَّمْرَا
وْنِبْعُدْ عَنِ التّفْكيرْ
وْنِسْكَرْ سَوَا.. وِنْصِيرْ
أَعْتَقْ مِنِ الْخَمْرَا
ـ2ـ
مَشِّي مَعِي.. لا اللَّيْلْ
رَحْ يِشْتِلِقْ وِيْصِيحْ
وْلا رَح تْجِنّ الرِّيحْ
انْ عِرْفِتْ عَ نَجْم سْهَيْلْ
رِحْنَا بْهَـ السَّهْرَه
ـ3ـ
نِحْنَا الأَزَلْ.. وِكْتَارْ
قَالُوا: الدِّنِي كِلاَّ
يَا حُلوِتي.. وْصَلَّى
رَبّ الْحُسنْ وِالْغَارْ
لِعْيُونْنَا مَرَّه
ـ4ـ
لا تِفْزَعِي مْنِ الْحُبّْ
حَدِّكْ أَنَا سَهْرَانْ
عَ حُبّنَا.. وْفِزْعَانْ
لَيِنْجِرِحْ هَـ الْقَلْبْ
وْنُوعَى مْنِ السَّكْرَه
**
كنت عنّي بعيد
ـ1ـ
مدَّيْت إِيدِي.. وْكِنْت عَنِّي بْعِيدْ
لا مْسِكِتْ إِيدِي وْلا الْفَرَحْ زَهَّرْ
يَا رَيْت فِيِّي إِرْجَع مْنِ جْدِيدْ
إِعْطِيكْ إِيدِي.. وِالْعُمرْ يِكْبَرْ
وِتْصِيرْ إِيدِي التَّلّْ
وِعْيُونَكْ الزَّهْرَاتْ
وْمِنِ شْفَافِي تْطِلّْ
عُصْفُورِة الْغَابَاتْ
تْرَدِّدْ مَوَاوِيلَكْ
وْعَنْ شَوْق عِينَيِّي
حْكَايَاتْ تِحْكِيلَكْ
تَا تْصِيرْ غِنِّيِّه
وَحْدِي أَنَا وْهِيِّي
مْنِقْدِر نْغَنِّيلَكْ
ـ2ـ
مِدَّيْتْ إِيدِي.. لَيْشْ
مَا خِدْتها بْإِيدَكْ؟!
ما عْرِفِتْنِي قِدَّيْشْ
مِتْشَوّقَه لْعِيدَكْ؟!
يَا حْرُوفْ كِبْرِتْ هَوْنْ
يَا شِعْر حُبّ وْلَوْنْ
يَا صَوْت شَعْب كْبِيرْ
عَاطِيهْ أَللّـه الْعَوْنْ
تْرِكْنِي.. تْرِكْنِي طِيرْ
إِيدَك وْإِيدِي جْنَاحْ
وْمَلْعَبْ عِينَيْنَا الْكَوْنْ.
**
عاشق أَنا
ـ1ـ
عَاشِقْ أَنَا
لاَ تْزِيدِي النَّارْ
خَلِّي الْهَنَا
يْهَنِّينِـي نْهَارْ
لَيْلِي طَوِيلْ
قَلْبِي عَلِيلْ
الْجفْنِ الْكَحِيلْ
خَلاَّنِي غَارْ
ـ2ـ
نَظْرِةْ عُيُونِكْ
فِيهَا دَلالْ
سَحْبِةْ جُفُونِكْ
سِحْرِ وْجَمَالْ
وْوَحْدِي الْمَتْعُوبْ
عَ دْرُوب دْرُوبْ
وْمُشْ قَادِرْ تُوبْ
أَنَا حَالِي حَالْ
ـ3ـ
كِيفْ بَدِّي عِيشْ
مِنْ دُونِكْ يَوْمْ
وْمِتْل الدَّرَاوِيشْ
مَا بْدُوقْ النَّوْمْ
ما فِي غَرَامْ
مِنْ دُونْ كَلاَمْ
وِعْيُون تْنَامْ
عَلَى صَدْرِي دَوْمْ
**
يُمَّا يُمَّا
ـ1ـ
يُمَّا يُمَّا يَا يُمَّا
الْوَرْدِه الْـ عَ خَدَّا شَمَّا
وْصَفَّى يِتْغَنْدَرْ فِرْحَانْ
وِالظَّاهِرْ مَنُّو فِهْمَانْ
إِنُّو الْوَرْدِه اللِّي شَمَّا
صَعْبِه يُوصَال لإِمَّا
ـ2ـ
شَهْر وْشَهْرَيْن وْأَكْتَرْ
فِكْرِي مِتْلَبَّكْ حَيْرَانْ
مِدْرِي مْنِ الدَّمْعَهْ بِسْكَرْ
مِدْرِي مْنِ السِّحْرِ الْفَتَّانْ
خوْتِتْنِي دَخِيل اللـه
قُولُوا شُو بِعْمِلْ وَاللـه
بْقِلْلاَّ حَاكِينِي وْهِيِّي
الْكِلْمِه بْتُوقَفْ عَ تِمَّا
ـ3ـ
بْغَارْ عْلَيْهَا وْيَا دِلِّي
الدَّمْ اللِّي بْقَلْبِـي بْيِغْلِي
بْقِلْلاَّ : حِبِّينِـي .. بِتْقُولْ :
لاَ تْعَبِّي الْمَيّ بْسَلِّه
السَّلِّه مَا بْتِجْمَعْلَك مَيّْ
ضْحِكْتِلاَّ وْقِلْتِلاَّ : خْطَيّْ
كِرْمَالِكْ كِلّ النّجْمَاتْ
بْوَقِّعْهَا .. وْبِرْجَعْ لِمَّا
**
نوَّر العيد
ـ1ـ
نَوَّر الْعِيدْ غَنُّولُو
نَوَّر الْعِيدْ
وْشَمْعَاتِ الْحُبّ ضَوُّولو
تَا الْفَرْحَه تْزِيدْ
ـ2ـ
نَوَّر الْعِيدْ يَا حَبِيبِـي
حَوِّشْلِي نُورْ
وْزَيِّنْ أَيَّامِي الْغَرِيبِه
بْبَاقَاتِ زْهُورْ
وْقِلْلاَّ : يَا شَمْس لا تْغِيبِـي
لِفِّي الْمَعْمُورْ
مْشَاوِير الْحُبّ قَرِيبِه
وِالْعُمْر بْعِيدْ
ـ3ـ
سَاعَات الْكَيْفْ سَاعَاتُو
وْنَغْمَات الْحُبّْ
غَنِيلِي شْوَيْ كِلْمَاتُو
وْفَرِّحْ هَـ الْقَلبْ
وْعَ رَمْلِ شْطُوطْ عَتْمَاتُو
صَوِّرْلِي دَرْبْ
تَا قَضِّي الْعِيد وْسَهْرَاتُو
وِالإِيدْ بِالإِيدْ
**
أفراح
ـ1ـ
لْيَالِينَا.. لْيَالِي الأَفْرَاحْ
مَرْحَى بْطَلِّتْكُنْ مَرْحَى
جِمَّعْنَا زْهُور التُّفّاحْ
وْحِيَّكْنَا أَجْمَلْ طَرْحَه
ـ2ـ
مِتل الْوَرْدِه بِالْبُسْتَانْ
مِحْمَرَّه خْدُودَا مْن زْمَانْ
حُسْنَا.. سُبْحَان الْخَالِقْ
مَارِقْ عَ وِجَّا مَارِقْ
فَصْل الصَّيْفِيِّه بْلُبْنَانْ
وْتَارِك عَ كْتَافَا طَرْحَه
ـ3ـ
قَاعِدْ حَدَّا عَ الشِّمَالْ
بَدْر مْنَوَّرْ بِالْجَمَالْ
حَفْلِه مَا صَارِتْ لِمْلُوكْ
هَنُّوهُنْ.. قُولُوا: مَبْرُوكْ
عِيشُوا هَـ الْعُمْر بْدَلالْ
وْطِيرِي يَا طْيُور الْفَرْحَه
ـ4ـ
دَبْكِه وْهَيْصَه وِغْنَانِي
وِقْلُوب النَّاسْ فِرْحَانِه
حُلْوِه يَا لْيَالِي الأَعْرَاسْ
بِشْرَبْ فِيكِي دْمُوع الْكَاسْ
وْيَا مَا عَ شْفَافِي قْنَانِي
انْجَرْحِتْ.. وْنِسْيِتْ جُرْحَا
**
خاتـم
ـ1ـ
لِمِّنْ حَبْسُونِي بْخَاتِـمْ
أَصْفَرْ وِزْغَيَّرْ نَاعِمْ
أُمِّي وْبَيِّي فِرْحُوا كْتِيرْ
وْحِسَّيْت بْحَالِي رَحْ طِيرْ
فَوْق جْنَاحْ النَّسَايِمْ
ـ2ـ
يَا مَا ويَا مَا حْلِمْنَا فِيكْ
يَا خَاتِـمْ.. حَتَّى نْلاقِيكْ
فَرْحَه بِعْيُون الْحِلْوِينْ
وْطَرْحَه بَيْضَا وِفْسَاتِينْ
وْزِينِة عِرْس وْعَزَايِمْ
ـ3ـ
إِنْت الْحَبْس الْـ بِيفَرِّحْنَا
إِنْت الدَّمْعَه الْـ مَا بْتِجْرَحْنَا
لَوْلاك زْهُور الْبُسْتَانْ
ما انْهَدْيِتْ مَرَّه لإِنْسَانْ
إِنْت الْمَحْبُوب الدَّايِمْ
ـ4ـ
حْبِسْنِي.. لا تِتْرِكْنِي ضِيعْ
وْيِمْرُق عْلَيِّي الرَّبِيعْ
مْرُوجِي مِشْتَاقَه للزَّهْر
يَا خَاتِـمْ.. شُو نَفْع الْعُمْر
لَوْ تِنْسَانِي يَا خَاتِـمْ
**
حكاية الفرقة
ـ1ـ
كْتَبْت عَ وَرْقَه
حْكَايِة الْفُرْقَه
لَمَّا هْجَرْتِينِي
لْوَحْدِي تْرَكْتِينِي
غُرْقَانْ بِالْحَرْقَه
ـ2ـ
وِشْكَلتْهَا قُونِه
بْصَدْرِي مَضْمُونِه
وْقِلْتِلّهَا: تْخَبِّي
يَا وَرِقْتِي بْعُبِّي
الْـ حَبُّونِي هَجْرُونِي
ـ3ـ
وْإِنْتِي الْوَحِيدِه
الْبَاقْيِه بْإِيدِي
حْكَايِه مَكْتُوبِي
عَنْ هَجرْ مَحْبُوبِي
عَنْ سِرّْ تِنْهِيدِه
ـ4ـ
يَا حْكَايْتِي الْمُرَّه
عَنْ لَوْعِةِ الْهُجْرَه
بْحَلّفِكْ ضَلِّي
بْهَالصَّدرْ صَلِّي
تَا تِرْجَعْ السَّمْرَا
**
رجعت من الغربة
عام 1969 لحّن الفنان المرحوم الياس المقدسي هذه الأغنيّة وغنّاها في لبنان، وبعد عشرين سنة نفض الفنان اللبناني الأميركي شربل صعب عنها الغبار وغنّاها بلحنها القديم في المهرجان الغنائي الذي أحياه في سيدني ـ أستراليا. وفي بداية تسعينات القرن الماضي لحّنها الدكتور المصري سامي نصير وغنّتها الفنانة المهجرية هند جبران.
ـ1ـ
رْجِعْت مْنِ الْغُرْبِه
زَلْغِطْ يَا قَلْبِي
بُكْرَا رَحْ إِرْجَعْ إِتْلاقَى
مَعْ حُبِّي.. وْقَدِّمْلُو بَاقَه
وْقِلّو: يَا حُبِّي
يِقْطَع الْغُرْبِه شُو صَعْبِه
يِقْطَعْ الْغُرْبِه
ـ2ـ
بِتْذَكَّرْ عَ دَرْب الْعَيْنْ
كِنَّا نِمْشِي تْنَيْن تْنَيْنْ
وْفِي حُلْوِه بْإِيدَا جَرَّه
وْعَ رَاسَا طَرْحَه حَمْرَا
صِرْتْ إِسْأَلْهَا: مِنْ وَيْنْ
جِبْتِي هَـ الرَّوْعَه مِنْ وَيْنْ
دِوَّبْتِي قَلْبِي؟
ـ3ـ
يَا مَحْلَى لْيَالِي السَّهْرِيِّه
نِدْبُكْ دَبْكِه بْعَلْبَكِيِّه
وْنِشْبُكْ إِيدْ.. وْيِتْكِي خَصْرْ
وْتِغْزُل مْحَارِمْنَا الْحُمْرْ
وِالضَّيْعَه اللِّي بَعْدَا هِيِّي
رَاجِعْ تَا حُوشَا بْعِينَيِّي
وْخَبِّيهَا بْقَلْبِي!
**
لعبة
بِالْعِيد.. هْدِينِي لُعْبِه
يَا أُمِّي.. وِجَّا زْغَيَّرْ
وْقَلْبَا أَكْبَرْ مِنْ قَلْبِي
وْفُسْتَانَا لَوْنُو أَحْمَرْ
وْقُولِي لِلطِّفْل الْمَوْلُودْ
يِهْدِينِي مْغَارَه جْدِيدِه
بْيُوتَا مِبْنِيِّه بِجْرُودْ
حَابِبْ لَوِّنْهَا بْإِيدِي
وْحَابِبْ سَكِّنْ فِيهَا وْلادْ
مَا عِنْدُنْ أُمّ وْلا بَيّْ
تَا يْحِسُّوا بْطَعْم الأَعْيَادْ
وْيْقُولُوا مْنِ قْلُوبُنْ: خَيّْ
**
نسيوا
لِـمْ كِبْرُوا.. نَكْرُوه وْلادُو
قِرْفُوا مْنِ الْعُمْر اللِّي فِيهْ
نِسْيُوا حِنِّيتُو وِجْهَادُو
نِسْيُوا الْحُبّ الْـ عَمْ يِعْطِيهْ!
قَالُولُو وِالْحِقْد جْبَالْ:
إِنْت كْبِرْت.. خْرِفْت.. انْشَالْ
مْنِ الْبَيْت.. وْخَلِّصْنَا شْوَيّْ
تِعْبِتْ مِنْ حَكْيَكْ الِعْيَالْ
أَقْسَى مِنَّكْ مَا فِي بَيّْ!
وْمِتْل اللِّي انْكَسْرِتْ نَظْرَاتُو
وْدِبْلِتْ عَ خْدُودُو دَمْعَاتُو
تْطَلَّعْ فِيهُنْ.. غَصّ وْقَالْ:
هَـ الْـ بِيرَبِّي هَيْك عْيَالْ
أَفْضَلْ لَوْ يِطْفِي سَاعَاتُو!
**
ربي
كتبتها بعمر 16 سنة
ـ1ـ
هَـ الْعَصرْ.. عَصْرِي أَنَا
شُو هَـ الْعَصرْ؟!
عَصْر الْقَنَابِلْ وِالْفَنَا
عَصْر الْكُفرْ
عَصْر اللِّي مَوَّتْ بِالْغِنَى
أَهْل الْفُقرْ
مَا فِي طُهْر.. مَات الْهَنَا
بْعَصْر الْعُهرْ
وْقِصْر الْعُمْر.. أَحْسَنْ لِنَا
ظْلام الْقَبرْ
ـ2ـ
رَبِّي.. الزَّلازِلْ هَادْمِه
كُوخ وْقَصْرْ
وْبَعْدَا الْقُلُوب الظَّالْمِه
مِتْل الصَّخْرْ
رَبِّي.. الْقِيَامِه قَايْمِه
رَبِّي.. الصَّبْرْ
ـ3ـ
وْلا تْضَلّ عَنْ هَـ الْكَايْنِه
غَاضّ النَّظَرْ
وْسَاعْة الْخَطَرْ حَايْنِه
سَاعْة الْخَطَرْ
هَيْدِي خَلِيقَه خَايْنِه
حَابِّي الضَّرَرْ
حَالا بِـ حَالا دَايْنِه
رَغْم الْقَدَرْ
وْقِدَّيْش فِكْرَا مْضَايْنِه
وْهِيِّي بَشَرْ؟
**
شو هالدني؟
ـ1ـ
شُو هَـ الدِّنِي.. شُو هَـ الدِّنِي؟
تَا تْعِيشْ فِيهَا كْبِيرْ
صَعْب كْتِيرْ
وِالأَصْعَب مْنِ الْكِلّْ
إِنُّو تْضَلّْ
بِهَـ الدِّنِي عَايِشْ دَنِي!
ـ2ـ
ما عَادْ فِيك تْقُولْ: يَا قَلْبِي
رَحْ زَيّنَكْ بِالْحُبّْ
الْحُبّْ صَفَّى كِذْبْ
كِلُّو تْجَارَه وْمَنْفَقَه
وْأَلْف قِصَّه مْلَفَّقَه
يِعْنِي حَبِيبَكْ صَارْ مِتْل الْعَقِرْبِه!
ـ3ـ
وْما عادْ فيكْ تْأَمّنُو
لْخَيَّكْ إِذَا زَارَكْ
وْنَامْ بِدْيَارَكْ
لَيْحِطّْ عَيْنُو عَ الْمَرَا
وْيِعْمِلْ بِبَيْتَكْ مَجْزَرَه
وْبِالآخْرَه.. شُو الآخْرَه
خَيَّكْ مَا فِيكْ تَخْوّنُو
ـ4ـ
انْ جِرَّبتْ تِعْمِلْ قِيمْتَكْ
مَعْ نَاسْ ما عِنْدُنْ إِبَا
وْدَمَّاتْ قَلْبَكْ تِسْكِبَا
بْحَيْث الْكَرَمْ مِنْ شِيمْتَكْ
لَمَّا شِي مَرَّه بْيِلْتِقُوكْ
بِيجَرّبُوا تَا يِخْنِقُوكْ
بَرْكِي بْيِمْحُوا جْمِيلْتَكْ!
**
مين هيّي؟
مِينْ هِيِّي مِينْ.. يَا شَاعِرْ
الْـ سَرْقِتْ قَلبْ مَوْعُود بِالآمَالْ
وْخَلِّتْ حَيَاتَكْ بَاقِة مْشَاعِرْ
وِمْخَيّلِه فِيهَا الْخَيَالْ جْبَالْ
بِتْجَسِّدْ بْشِعْرَكْ أَلفْ ثَائـرْ
وْبِتْرَكِّعْ بْسَاحَكْ أَلفْ خِيَّالْ؟
وْتَا فَهّمَكْ قِدَّيْشنِي شَاطِرْ
وْقِدَّيْش عِنْدِي مْنِ الذّكَا رِسْمَالْ
سْمَحْلِي شِي مَرَّه بْإِسِمْهَا جَاهِرْ:
هَيْدِي بْلادَكْ.. حُلْمَك الْـ بِالْبَالْ
الْـ فَضَّيْت حَتَّى تْحَقِّقُو مْحَابِرْ
وِنْطَرْت تَا تِسْتَقْبِلُو أَجْيَالْ
كْتَارْ مِتْلَكْ عَقلْهُنْ طَايِرْ
بِمْحَبِّتَا.. وِلْهَالسَّبَبْ بِتْشُوفْ
أَطْفَالْنَا بْهَالْكَوْن خِلْقُوا رْجَالْ!
**
سألت الزهر
كتبتها بعمر 15 سنة
ـ1ـ
سْأَلْت الزَّهرْ عَنِّكْ
الْـ إِخْد السِّحرْ مِنِّكْ
قَلِّي الْوَردْ إِنِّكْ
لْغَيْرِي ضِحِكْ سِنِّكْ!
ـ2ـ
قْضِيتْ الْعُمرْ حَدِّكْ
شَمْشِمْ هَوَا خَدِّكْ
نْسِيت الْقَلبْ عِنْدِكْ
سَرْق الْقَلبْ بَدِّكْ
رَمْيِ الشَّبَكْ فَنِّكْ
ـ3ـ
تْعِلَّمْت مِنْكِ كْتَيرْ
وِعْرِفْت عَنْكِ كْتِيرْ
وْحِلَّيْت الِحْزَازِيرْ
الْـ حَلاَّ شَقَا وْتِعْتِيرْ
خَيَّبْتِلِكْ ظَنِّكْ
ـ4ـ
لا تِكْتِمِي أَسْرَارْ
ما عَادْ فِي أَسْرَارْ
وْلا تْدَرْدِشي أَخْبَارْ
وْلا تِنْظِمي أَشْعَارْ
غَابْ الْوَحِي عَنِّكْ
**
القنديل
مثلت كمسرحية في بلدة مجدليا ـ زغرتا
ـ1ـ
لَوَيْن بَعْدَكْ يَا قَدَرْ لَوَيْنْ
مَاشِي بْوِجَّكْ وِالدَّربْ عَتْمِه؟
وْلَيْش حَتَّى تْفَرِّقْ الْقَلْبَيْنْ
الْـ ضَوُّوا الْعَتمْ بِتْشِرْقُط الْبَسْمِه؟
ـ2ـ
كَانِتْ تِجِي تَا تْدَرْدِش بْهَاللَّيْلْ
مَعْ شَبّْ أَسْمَرْ حَبِّتُو
وِانْ غَارْ مَرَّه وْغَابْ نَجْم سْهَيْلْ
وْمَا عَادْ رَنِّتْ ضِحْكِتُو
تِرْكُضْ عَ قِنْدِيلاَ تْعَبِّي زَيْتْ
وِيْشَعْشِع الْقِنْدِيلْ وِيْضَوِّي
وْصِدْفِه انْطَفَى.. وْمَا عَادْ ضَوَّى الْبَيْتْ
وْلا عَادْ يِقْدِرْ يِلْمَحَا هُوِّي!
ـ3ـ
.. وْصَارْ يِقْعُدْ يِنْطِرَا وْيِبْكِي
وْيِتْذَكَّر لْيَالِي الْهَنَا وِالْحُبّْ
وْفِي يَوْم طَلِّتْ رَاسْهَا مِتْكِي
وْقِنْدِيلْهَا فَاضِي.. وْفَاضِي الْقَلْبْ
ـ4ـ
ـ يَا حُلوتي.. قْنَادِيلْ هَـ الْعُشَّاقْ
مْزَيّتِه بِالْحُبّ بِالأَشْوَاقْ
وْلَيْش حَتَّى طَافْيِه الْقِنْدِيلْ
وْقِنْدِيلِك لْنَار الْهَوَى مِشْتَاقْ
ـ تْرِكْنِي.. انْقَطَعْ حَبْل الْهَوَى
ـ بَيْنَاتْنَا؟
ـ .. وْمَا عَادْ يِنْفَعْنَا الْحَكِي
ـ وِالسِّنْديَانِه، جِذِعْهَا الْقَاسِي الْتَوَى
وْتَا تِشْتِكِي.. لَمِينْ بَدّهَا تِشْتِكِي؟
ـ ضجْرَانْ قَلْبِي مْنِ الْعِتَابْ
ـ وْزِهْقَانْ فِكْرِي مْن الْعَذَابْ
ـ لْسَانَكْ..
ـ لْسَانِي؟
ـ .. يَبَّسْ زْهُورِي
وْمَرْمَغَا بَيْن التُّرَابْ
ـ عَمْ يِكِذْبُوا عْلَيْكِي
شَافُوا السَّمَا
اسْتَحْلُوا السَّمَا
الْـ جُوَّاتْ عِينَيْكِي
لا تْصَدّقِي الْعُزَّالْ
عَمْ يِكِذْبُوا
وْمَا بْيِتْعَبُوا
تَا تِنْقِطِعْ الِحْبَالْ
وْقِنْدِيلِكْ الْمِطْفِي
بْحَلّفِكْ ضَوِّيهْ
وْلا تْسَكّرِي الدَّرْفِه
شُبَّاكِكْ خَلِّيهْ
مَفْتُوحْ لِلنَّسْمِه
لِلْكِلْمِه.. لِلْبَسْمِه
وْقِنْدِيلِكْ الْحِزْنَانْ
حَتَّى يْصِيرْ فرْحَانْ
لَيْلِيِّه زَيْتِيهْ
وْعَبِّيهْ لِلشِّفِّه
وِارْجَعِي ضَوِّيهْ
قِنْدِيلِكْ الْمِطْفِي
ـ تْرَاكْ قِنْدِيلِي
ـ الْقِنْدِيلْ بَدِّي وَلّعُو
بِالنَّارْ
وْعَلِّم الْـ بِيطَلّعُو
أَخْبَارْ
إِنُّو الْحَقِيقَه شَمْسْ
مَا بْتِحْجِبَا فْتِيلِه
ـ5ـ
وْضَوُّوا سَوَا الْقِنْدِيلْ
وِاللَّيْل فَرَّخْ شَمْسْ
وْصَار الْحَكِي مْوَاوِيلْ
وْطوْيُوا كْتَاب الأَمْسْ
وِتْشَابَكُوا الإِيدَيْنْ
وِتْغَامَزُوا الْعِينَيْنْ
وْبَدْر السَّمَا بِيطِلّْ
كِلْ مَا اجْتَمَعْ قَلْبَيْنْ
**
فقر وعيد
ـ1ـ
هَـ الْقِصَّه بْتِحْكِي عَنْ بَيْت
فِي مِتْلُو بْهَالدِّنْيِي كْتِيرْ
فَرْشُو: تَخْت وْقِنْدِيلْ زَيْت
وْسِتّ كْرَاسِي مَعْ حَصِيرْ
ـ2ـ
وْسِكَّانُو شِي سَبْع نْفُوسْ:
أُمّ وْبَيّ وْخَمْس وْلادْ
ما شَمُّوا رِيحِةْ الِفْلُوسْ
وْلا حَسُّوا مَرَّه بْأَعْيَادْ
ـ3ـ
بَيُّنْ أَعْمَى.. وْيَا لَطِيفْ
أُمُّنْ خِدَّامِة بْيُوتْ
إِجْرِتْهَا شِي كَم رْغِيفْ
لَوْلاهُنْ كَانِتْ بِتْمُوتْ
ـ4ـ
وْقَبلْ مَا يْنَامُوا يْصَلُّوا
وِيْقُولُوا: يَا رَبّ الْكَوْنْ
الْـ ما بِيخَافَكْ يَا دِلُّو
مِدّلْنَا يَا أَللّـه الْعَوْنْ
ـ5ـ
وْمَرَّه كَانُوا سِهْرَانِينْ
سِمْعُوا دَقَّه عَلَى الْبَابْ
صَرْخُوا كِلُّنْ.. قَالُوا: مِينْ
تْفَضَّلْ.. مَا سِمْعُوا جَوَابْ
ـ6ـ
افْتَكْرُوا إِنُّو صَوْت الرِّيحْ
وْصَوْت التَّلْج عَ الأَشْجَارْ
أَوْ شِي بُومِه عَمْ بِتْصِيحْ
رِجْعُوا الْتَفُّوا حَوْل النَّارْ
ـ7ـ
السَّاعَه تْنَعْش انْدَقُّوا جْرَاسْ
الدَّيْر.. وْكَانْ الْعَتْم غْمِيقْ
وْكِلْمِنْ وَاعِي مِنْ هَـ النَّاسْ
صَار يْقُول لِلنَّايـمْ: فِيقْ
ـ8ـ
وْصَرْخُوا كِلُّنْ: بْهَالْعِيدْ
صَعْب نْزُورَكْ يَا يَسُوعْ
ما فِي عِنَّا تَوْب جْدِيدْ
ما فِي عِنَّا غَيْر دْمُوعْ
ـ9ـ
وْقَالِتْلُنْ أُمُّنْ: رَحْ رُوحْ
زُورُو بْهَالْيَوْم السَّعِيدْ
وْصَلّيلُو وْإِشْكِيلُو وْنُوحْ
بَرْكِي بْيِرْحَمْنَا بْهَالْعِيدْ
ـ10ـ
وْفَتْحِتْ بَاب الْبَيْت وْصَارْ
التَّلْج يْفُوت وِالزَّمْهَرِيرْ
وْصَرْخُوا الْخَمْس وْلاد زْغَارْ:
عَمْ نِبْرُدْ يَا مَاما كْتِيرْ
ـ12ـ
انْصَابِتْ أُمُّنْ بِالْجَمْدِه
شَافِتْ صُنْدُوقَه كْبِيرِه
قَالِتْ: مِينْ جَابَا لْعِنْدِي
مَعْقُول تْكُونْ لِلْجِيرِه؟
ـ13ـ
فَتْحِتْهَا وْلَقْيِتْ وَرْقَه
قِرْيِتْهَا وْكَرْجِتْ دَمْعَه
عِرْفِتْ إِنُّو الصُّنْدُوقَه
هْدِيِّه مِنْ أَهْل الضَّيْعَه
ـ14ـ
وِبْهَالصُّنْدُوقَه مَوْجُودْ
تْيَاب جْدِيدِه وِفْسَاتِينْ
رَكْعُوا وْصَلُّوا لِلْمَوْلُودْ
وْخَتْمُوا صْلاتُنْ بِالآمِينْ
**
عواهر
كتبتها بعمر 14 سنة
اللي قَالْ: الْبِنْت أَغْلَى مْنِ الْجَوَاهِرْ
وْأَغْلَى مْنِ الْحَفِر بِـ قَصرْ عَامِرْ
حَبّ يْقُولْ لِلْعَالَـمْ بِأَسْرُو
رَبِّي وْلادَكْ.. وْخَلِّيكْ سَاهِرْ
إِذَا عْيُونَكْ عَ أَطْفَالَكْ مَا سِهْرُوا
رَحْ بِتْصِيرْ أُمْثُولِه يَا شَاطِرْ
مِتْل الْغَنِي اللِّي شَادْ قَصْرُو
حَتَّى يْكُونْ زَلْمِي مْنِ الأَكَابِرْ
شَكّ السَّيْف، يَا حَسْرَه، بِـ صَدْرُو
وَقْت الْـ شَافْ أَوْلادُو اللِّي كِبْرُوا
سِكْرَانِينْ.. وِبْنَاتُو عَوَاهِرْ!
**
مهرّب حشيشة
ـ1ـ
مْهَرِّبْ حَشِيشِه.. وْقَافْ يَا مَجْنُونْ
وِانْحِنِيلُو بْكلّ طَاعَه وْإِفْتِخَارْ
جَبَّار!.. مَا بِيخَافْ مِنْ قَانُونْ
وِالْمَالْ تَحْت مْخَدّتُو قِنْطَارْ!
ـ2ـ
مْهَرِّبْ حَشِيشِه.. قَاتِلْ مْلايِينْ
بْمَسْحُوقْ مِتْل السَّمّ.. نِيَّالُو
فَاتِحْ مَطَارْ.. مْرَافَق الْحلْوِينْ
وِالصّدقْ وِالإِخْلاصْ رِسْمَالُو!
ـ3ـ
زِلْمُوا، يَا رَبِّي تْزِيدْ، بِالْمِيَّاتْ
بِيخَوّفُوا الطُّرْقَاتْ وِالسَّاحَاتْ
تَا يْوَزّعُوا اللّذِه عَ كِلّ النَّاسْ
أَطْفَالْ مِتْل الزَّهْر وِبْنَيَّاتْ!
ـ4ـ
هَيْك الرّجَال تْكُونْ يَا رَبِّي
تَاجْرُوا وْرِبْحُوا بوَزْنَاتَكْ
وْإِنتْ لَوْ مَا تْكُونْ مِتْخَبِّي
كِنْت ظْهَرِتْ لِلنَّاسْ ضَرْبَاتَكْ!
**
يا سايق
كتبتها بعمر 14 سنة
ـ1ـ
يَا سَايِقْ.. رَوِّقْ بَالَكْ
حَاجِي مَعْجُوقْ
يَا نَاسِي زِغْر طْفَالَكْ
عَ مَهْلَكْ سُوقْ
ـ2ـ
لَيْش مْعَجَّلْ يَا سَايِقْ
شُو فِي عِنْدَكْ؟
حَالَك بْحَالَكْ عَاجِقْ
رَاعِيكْ جِلْدَكْ
لَيشْ مَا بِتْضَلَّكْ رَايِقْ
كِرْمَالْ وِلْدَكْ
كاسَات الْمَوْت الْغَارِقْ
رَيْتَك مَا تْدُوقْ
ـ3ـ
يا سَايِق سُوقْ عَ مَهْلَكْ
حَتَّى تْوَصِّلْ
الرُّكَّابْ.. وْدَشِّرْ جِهْلَكْ
عَقْلَكْ شَغِّلْ
وْحِنّ خْطَيِّه عَ طِفْلَكْ
حَاجِي تْعَجِّلْ
أَهْل الرُّكَّابْ وْأَهْلَكْ
قَلْبُنْ مَحْرُوقْ
**
يا ليل
رْكِبْنَا فَوْق ضْهُور الْخَيْل
وْسَابَقْنَا هَبَّات الرِّيحْ
زْرَعْنَا اللَّيْل بْشَوْك الْوَيْلْ
وْجِرَّحْنَا نْجُومُو تِجْرِيحْ
وِالضَّوّ اللِّي بْتَانِي مَيْلْ
ضِحِكْ بْعِبُّو وْصَار يْصِيحْ:
انْكَنَّكْ رَحْ تِرْجَعْ يَا لَيْلْ
شِقّ الْخَابِي وْعَبِّي الْكَاسْ
وْشَرْبِي النَّاس نْبِيد مْنِيحْ
**
أمي
ـ1ـ
أُمِّي.. يَا أُمِّي.. يَا فِكِرْ شَارِدْ
طُول اللَّيَالِي سَاهِر وْسَاجِدْ
ما بِنْسَى عَ الْعُمرْ عَهْد الطُّفُولِه
ما بِنْسَى حْكَايْتِكْ عَنْ شَبّ مَارِدْ
ما بِنْسَى سَاعِة الْـ كِنْتِي تْقُولِي
إِلَهِي يِحِرْسَكْ مِنْ عَيْن حَاسِدْ
ـ2ـ
أُمِّي.. يَا أُمّي.. تِسْلَمِي لْطِفْلِكْ
تِسْلَمِي لِلصَارْ شَبّ كْبِيرْ
لا تْفَكّرِي رَحْ يِنْتَسَى فَضْلِكْ
مَهْمَا يَا ماما بِالدِّنِي بيصِيرْ
قِدَّامِك الْـ مَا بْيِنْحِني بْيِهْلِكْ
نَيْرُونْ بَعْدُو بِالْقَبرْ بِيصِيحْ:
عَفْوِك يَا أُمِّي.. كِنْت قَاسِي كْتِيرْ
**
إنتي الفرحة
ـ1ـ
بَدِّي قِلِّكْ كِلْمِه زْغِيرِه:
بْحِبِّك.. بْحِبِّكْ
يَا عْيُونِي مْنِ عْيُون الْغِيرِه
خَبِّينِي بْقَلْبِكْ
ـ2ـ
إِنْتِي الْفَرْحَه بْسَاعِةْ هَمِّي
وْضِحْكَاتِي كِلاَّ
وْحضْنِكْ مَمْلِكْتِي يَا أُمِّي
وِالْحَاكِمْ أَللَّـه
يَا صَوْتِي الْـ سَافَرْ لِبْعِيدْ
يَا غِنِّيِّه بْلَيْلِةْ عِيدْ
بْحِبِّكْ.. بْحِبِّكْ
ـ3ـ
مِينْ غَيْرِكْ صَيَّرْنِي حْكَايِه
مِينْ غَيْرِكْ قُولِي؟
وْبَشَّرْنِي بِالْمَجْد الْجَايِي
يْزَهِّرْ بِحْقُولِي
لِمِّنْ فَوْق شْفَافِي بْيِمْرُقْ
إِسْمِكْ.. شَمْس العُمْر بْتِشْرُقْ
وِبْقُول: بْحِبِّكْ..
**
نور العين
ـ1ـ
كِلْمَا تْطِلَّعْت بْعِينَيْكِي
بْفَكِّرْ حَالِي زْغِيرْ
عَمْ إِرْجَعْ عَرْبِشْ عَ دَيْكِي
وْإِرْسُم تْصَاوِيرْ
عَ خْدُودْ
أَحْلَى مِنْ دِنِي
عَ زْنُودْ
حِضْن الْوَلْدَنِي
عَ شْفَافْ تِغْنِجْلِي غُنِجْ
عَ صَدِرْ أَوْسَعْ مِنْ مَرِجْ
عَ رْكَابْ مِعْتَادِه عَ حِمْلِي كْتِيرْ
ـ2ـ
يا أُمّ مِتْلا ما انْوَجِدْ
يا جَفْن فَايِقْ لِلأَبَدْ
تَا غَمِّضْ الْعِينَيْنْ
بْعُمْرِي عَبْدْت تْنَيْنْ:
أَللَّـه الساكِنْ بِالسَّمَا
وْإِنْتِي يا نُور الْعَيْنْ
**
غنّي
ـ1ـ
بِفْرَحْ.. كِلْ مَا يْقُولُوا: غَنِّي
وْكِلْ مَا شْفَافُنْ تِسْأَلْ عَنِّي
وِعْيُونُنْ تِغْمُرْنِي بْحُبَّا
وِتْخَبِّينِي بْجَنِّةْ قَلْبَا
وْيَا أَللّـه شُو حلْوِه الْجَنِّه!
ـ2ـ
صَوْتِي.. رَحْ بِيخَلِّي السَّهْرَه
تْوَدِّعْ يَوْمْ.. تْلاَقِي بُكْرَا
وْيَا نَاطِرْ عَ شْطُوطْ السَّكْرَه
عَبِّي الْقَنِّينِه مِنْ فَنِّي
وْدِقّ الْكَاسْ.. وْقِلِّلي: غَنِّي
ـ3ـ
دِقِّيلُنْ يَا طَبْلِه دِقِّي
وْيَا عُودْ تْقَاسِيمَكْ نَقِّي
هَوْدِي حْبَابِي الْـ صَانُوا حَقِّي
وْخَلُّوا النُّورْ يْشَرْقِطْ مِنِّي
وْكِرْمَال عْيُونُنْ رَحْ غَنِّي
**
تغرّبوا
ـ1ـ
تْغَرَّبُوا رْجَال بْلادِي
يا بْلادي.. لَيْش تْغَرَّبُوا
وْأَرْضِكْ أَرْض الْمَبَادِي
وْمِنْ نَبْع فْنُونِكْ يِشْرَبُوا؟!
ـ2ـ
تْغَرّبُوا.. وْرَاحُوا لبْعِيدْ
حَتَّى يْلاَقُوا فَجْر جْدِيدْ
يا بْلادِي طَوَّل الْعِيدْ
النَّاس.. هْمُوم بْيِسْكِبُوا
ـ3ـ
يَا عْصَافِير الْبَريِّه
يَا نَغْمِةْ حُبّ وْحُرِّيِّه
مِنْ يَوْم الْـ سَافَرْ بَيِّي
الْمَكْتُوب.. بْدَمْعِي بِكْتِبُو
**
يا بلادي
ـ1ـ
هَـ القِصَّه بْتِحْكِي عَنْ نَاسْ
لازِمْ نِحْكِي عَنُّنْ
هَجْرُوا بْلادُنْ.. شِرْبُوا الْكَاسْ
وْنِحْنَا صِرْنَا مِنُّنْ
ـ2ـ
لا تْقُولُوا بِيهَاجِرْ شَعْبْ
الشَّعْب بْيِبْقَى مْحَلُّو
لَكِنْ مِنْ وَيْلاتْ الْحَرْبْ
الْمَرَاكِبْ بِيطِلُّوا
يَا بْلادِي.. يَا دَمّ الْقَلْبْ
الْـ فَلُّوا.. لَيْش تَا فَلُّوا
وْتَرْكُوا خْيَالاتُنْ عَ الدَّرْبْ
وْبِيحِبُّوكِي كِلُّنْ؟
ـ3ـ
سِيدْنِي الأُمّ الْحِلْوِه السَّمْرَا
الْـ مَا مْنِنْسَاهَا نِحْنَا
غَمْرِتْنَا يَا بْلادِي غَمْرَه
وْبَعْد الْحُزْن فْرِحْنَا
حِبَّيْنَاهَا.. يْطَوِّلْ عُمْرَا
احْتَلِّتْ جَوَارِحْنَا
هِيِّي وِالأَرْزَات الْخَضْرَا
يَا بْلادِي مِنْحِبُّنْ
**
جدّي
ـ1ـ
اشْتَقْتِلَّكْ يَا جدِّي
يَا جدِّي كْتِيرْ
لازِمْ تِبْقَى حَدِّي
تَا جْنَاحِي يْطِيرْ
إِنْتَ اللّي ربَّيْتنِي
وْإِنْتَ اللّي خَلَّيْتنِي
حِبَّكْ يَا جدِّي..
يا جدِّي كْتِيرْ
ـ2ـ
هَـ الدَّمْعَه الْـ بِعْيُونِي
عَ فْرَاقَك يَا عْيُونِي
خَلِّتْنِي مَجْنُونِه
وِالْعُمْر حْزَازِيرْ
عَمْ بِبْرُدْ بِغْيَابَكْ
غَطِّينِي بِتْيَابَكْ
تْيَابَكْ يا جدّي..
بِتْدَفِّي كْتِيرْ
ـ3ـ
يا نَبْع الْحِنِّيِّه
إِنْتَ وْأُمِّي وْبَيِّي
كْبِرْتُوا بِـ عِينَيِّي
وِبْقَلْبِي الزّغِيرْ
مِينْ بَدُّو يِغْمُرْنِي
وْقِصَص يْخَبِّرْنِي؟
حْكَايَاتَكْ يَا جدّي..
بِتْسَلِّي كْتِيرْ
**
يا حمام
ـ1ـ
قَرَّبْ صَوْبِي طَيْر حْمَامْ
وْقَلِّي: غَنِّيلِي تَا نَامْ
يَا حَمَامْ
هَـ الأَيَّامْ
مُشْ رَح تِتْرُكْ عَيْن تْنَامْ
ـ2ـ
وْجُوه النَّاس رْسُوم رْسُوم
بْتِتْحَرَّكْ.. وِالشَّاشِه هْمُومْ
انْ ضِحْكِتْ شَمْس بْتِبْكِي نْجُومْ
عُمْر وْمَارِقْ بَصْر مْنَامْ
ـ3ـ
مَهْمَا الأُوفْ تْوَعِّي اللَّيْلْ
وْيِسْهَرْ مَعْنَا نَجْم سْهَيْلْ
بْيِبْقَى الْخَوْف بْتَانِي مَيْل
عَمْ يِزْرَعْ فِينَا الأَوْهَامْ
ـ4ـ
وْلاد زْغَار.. نْهَار جْدِيدْ
عَ شْفَافُنْ ضِحْكَاتْ الْعِيدْ
لَكِنْ عُمْرُنْ حلْم بْعِيدْ
وْهَيْهَات تْصِحّ الأَحْلامْ!
**
العالـم العربي
أغنية خاصة بجريدة "العالـم العربي"، غنتها مجموعة من فنّاني المهجر، ولحنها ووزع موسيقاها الفنان هاني المهندس.
ـ1ـ
مِينْ الْـ خَلاَّ الْغُرْبِه تْصِيرْ
خَضْرا، شْواطِيها جَنِّه؟
وْمِين الْـ خَلاَّ الْكِلْمِه تْطِيرْ
عُصْفُورَه عَمْ بِتْغَنِّي؟
ـ2ـ
مِينْ الْـ زَوْزَقْ عَتْم النَّاسْ
بْأَلْوان الصُّبْح الضَّاوِي؟
وْمِينْ الْـ جَمَّعْنا أَجْناسْ
بِحْرُوفُو الْجُرْح يْداوِي؟
ـ3ـ
مِينْ الْـ أَخْبارُو بِتْفُوحْ
بِالصّدقْ.. وْأَسْرَعْ مِنْ بَرْق؟
وْمِينْ الْـ خَلاَّ الْغَربْ يْسُوحْ
بِالشَّرقْ، وْيِحْلَم بِالشَّرقْ؟
ـ4ـ
كِلْمِتْها كِلْمِه مَسْمُوعَه
جَرِيدِه، وْأَكْبَرْ مِنْ هَيْكْ
عَ صَفْحاتَا الْكَون بْيُوعَى
تا تْخَبِّي الْكَون بْعِينَيْكْ
**
جوعان
ألقيتها عام 1988 عبر أثير إذاعة إس بي إس الحكوميّة، أثناء جمع التبرعات للصليب الأحمر.
ـ1ـ
جُوعانْ.. سَامِعْ صَرخْتُو مْنِ بْعِيدْ
بَعْدُو طفْل ما كَمَّل السّنْتَيْنْ
عْضَام صَدْرُو نافْرَه تْجاعيدْ
وْعَ خْدُودْ صَفْرَا وَقْعِت الْعِنَيْنْ
ـ2ـ
جُوعان.. كل النَّاسْ سِمْعُوا الصَّوتْ
وْدَبِّت النَّخْوِه بِالدِّنِي كلاَّ
إِبنْ أَللَّـه بْيِنْشُل مْنِ الْمَوْت
ما فِي بَخِيل بْيَعْرفُو أَللَّـه
**
على دلعونا
غنتها إحدى راهبات العائلة المقدسة المارونيات يوم افتتاح مأوى العجزة التابع لهن.
ـ1ـ
عَلَى دَلْعُونا.. عَلَى دَلْعُونا
عَ مَأْوَى الْعُجَّزْ بَاللَّـه دِلُّونا
ـ2ـ
شِفْتَكْ يا حُبِّي بِتْعِدّ لْيالِي
خَايِفْ لَـ تْخَتْيِرْ وِتْشِيب قْبالِي
عَ مَأْوَى الْعُجَّزْ يَلْلاَّ يا غَالِي
مَهْما خِتْيَرْنا بِيشَبْشِبُونَا
ـ3ـ
عَلَى دَلْعُونا.. عَلَى دَلْعُونا
الأُخْت بُو جَوْدِه ما بْتِغْفَى عْيُونا
ـ4ـ
مَأْوَى بْهَـ الْغُرْبِه سُبْحان الْخالِقْ
أَحْلَى مْن الضَّيْعَه الْـ ما فِيكْ تْفارِقْ
بِيعِيش بْقَلْبُو.. اللِّي بْقَلْبُو مارِقْ
خِدْمِه وْتَفانِي وْضِحْكِه حَنُونَه
ـ5ـ
عَلَى دَلْعُونا.. عَلَى دَلْعُونا
سَاعِدْ يا رَبِّي الْـ بِيسَاعِدُونَا
**
بحبّك
ـ1ـ
كل ما بْتِمْرُق قدّامي
بِرْجعْ شُوفَك بِمَنامي
يا سارِق مِنْ عَيْني النّوم
لا تِسْرِقْلي أَحْلامي
ـ2ـ
مُشْ رَح قِلَّكْ إِنّي بْحِبَّكْ
مِتْل خْيالَكْ بِمْشي بْدَرْبَكْ
حَتّى عيش الْعُمْر بْقُرْبَكْ
سَكّنّي بِـ جَنِّة قَلْبَكْ
فيك بْتِفْرَح أَيّامي
ـ3ـ
متل عْيُونَك ما في عْيُون
قلبي بْضِحْكاتَك مَفْتُون
بَعْرِفْ إِنُّو جْنُونِي فْنُونْ
وْإنّو حُبّي كِلّو ظْنُونْ
ويا دلّي مِنْ غَرامي
**
عطور
ـ1ـ
لوْلا بْتَعْرِف إنتَ وَيْن
بْأَيَّا قلبْ.. بْأَيّا عَيْن
بْتِهْديني باقاتْ زْهُورْ
وْعَ جْرَيي بِتْرِشّ عْطُورْ
أَرْخَصْها "كِلْفين كْلايْن"؟
ـ2ـ
كنْت بْتِهْديني "الشّنالْ"
"نمره خمسه".. مَعْ موّالْ
وِتْقللي: بْحِبِّك كْتيرْ
أَغْلَى مِنِّكْ ما بيصيرْ
بْيِرْخَصْلِك دَمّي والمالْ
ـ3ـ
وحدَك إنْتَ الْساكنْ فيي
بدقّة قلبي.. وِبْعينيي
عم تِمْلِكْني طولْ وعرْض
بفزَع مَرّه يطلّ البغض
وتِتْركني حْكايِه مِنْسِيّه
**
مايا
ـ1ـ
مايا الحلوه جايي
تا تِحْكيلي حكايِه
يا مْرايه تْخَبّي بالأرضْ
مايا حلوه كفايِه
بِفْزَع تنكسري من البُغضْ
وما يْعود عِنْدا مْرايِه
ـ2ـ
مايا اللي حِبّيتا
وكْتَبْتا غِنّيّه
دَلِّتْني عَ بَيْتا
وما حَنّتْ عْلَيّي
لِمِّنْ قَلْبي عْطَيْتا
سَرْقِتْلي عِينّيّي
ـ3ـ
يا مايا لا تروحي
حتى تداوي جروحي
شفتك متل الفلّه
بعطرك عم بتفوحي
ضلّي حدّي ضلّي
وبوحي بحبك بوحي
**
نظرة
قالت: حبيبي ليش تا غضبان
وما في سبب تا اليوم تتخلّق
كل عمرك عاشق وولهان
كرمال بوسه شفافك بتسبق
قلتلّها: من نظرتي زعلان
شردت عيوني صوب المعرّق
لمّا الهوا طيّرلِك الفستان
من دون وعي نخّيت حتّى شوف
انكنّو الهوا بفستانك معلّق
**
مشيتي معي
.. ومن بعد ما مشيتي معي
صار العمر أحلام
صوتك بيرن بمسمعي
وع ضحكتك عم نام
وكل ما جفن عيني وِعي
بتنوّري الايام
يا شمس ع قلبي تَعي
تا بوسّك من دون وَعي
البيحبّ ما بينلام
**
مشيتي معي
.. ومن بعد ما مشيتي معي
صار العمر أحلام
صوتك بيرن بمسمعي
وع ضحكتك عم نام
وكل ما جفن عيني وِعي
بتنوّري الايام
يا شمس ع قلبي تَعي
تا بوسّك من دون وَعي
البيحبّ ما بينلام
**
يَمّْ العينين اللوزيه
ـ1ـ
يَمّْ العينين اللوزيه
قوليلي شو عملتي فيي
مش عم بقدر دوق النوم
بتعيشي بحلمي ليليه
ـ2ـ
تركيني اغرق بعيونك
ارسم بالبوسات جفونك
يا حلوه لا تقسّي القلب
مشّيني ع نفس الدرب
تا قلك اني ممنونك
ـ3ـ
بدي خبّر كل الناس
حبيتك من دون قياس
وهللي بيحب بينحب
قال المتل من دون كذب
الجنه بدونك ما بتنداس
**
قطفتلك فلّه
ـ1ـ
قطفتلك فلّه من الفلّه
تا تشمّي عطرا وتتسلي
وزيّنت وراقا بأشعاري
وبوّستا.. بركي بتغاري
وبقلبي ع طول تْضلّي
ـ2ـ
مش عارف شو بدي قلِّك
زعلانه مني بتضلِّك
مغروم وقاتلني غنجك
يا روحي لا تعلّي برجك
لو طرتي فيني أوصلِّك
ـ3ـ
أحلى غنيّه غنيّتِكْ
وجوّات عيوني خبّيتِكْ
مشّيني ع دربِك مرّه
تا تْغار الشقرا والسمرا
وعمّرلِك بِـ قلبي بيتِك
**
