قصائد ديوان "مشوار" بصوت الشاعر شربل بعيني
**
مشوار
ـ1ـ
مشْوارْ جينا.. وْكيفْ رَحْ نِرْجَعْ
وكل ما ضحِكْنا.. الْعَيْن عَمْ تِدْمَعْ
وْلَيْش حَتَّى نْكَمِّلْ الْمشْوارْ
وِبْآخِرْ الْمشْوارْ رَحْ نِرْكَعْ
ـ2ـ
لا الدّارْ عَمْ تِحْضُنْ أَهالي الدَّارْ
وْلا الرَّبّ صَرْخِةْ ظُلْم عَمْ يِسْمَعْ
عَ الأَبْرِيا.. بْيِتْسَلَّطُوا الأشْرارْ
وْما في حَدا من خالْقُو بْيِفْزَعْ
ـ3ـ
عَمْ يِخْطفُوا بْنَيَّاتْ سِمْر زْغارْ
ما فَطَّمُوا.. نِصُّنْ عَمِ بْيِرْضَعْ
قالُوا بِـ إسْم السَّيِّد الْجَبَّارْ
مَعْلَيْش لَولا الطّفْل يِتْوَجَّعْ
ـ4ـ
وْمَعْلَيْش طُهْر الْبِنْت لَولا انْهارْ
قدّامْ بَغْل مْوَصَّلْ مْقَطَّعْ
وْمَعْلَيشْ مُجْرِم.. قاتِلْ وْقهّارْ
يِنْكَحْ شَمْس.. والْعَرْضْ يِتْشَلَّعْ
ـ5ـ
نِسْوانْ عَم بِـ بيعُنْ السِّمْسارْ
لِرْجالْ.. حَقّنْ زِبِل ما بْتِدْفَعْ
لِرْجالْ.. دَهْنُوا وْجُوهُن بْشِحْوارْ
بْتِفْنَى الدّني.. والفَحْم ما بْيِلْمَعْ
ـ6ـ
قالُوا: حَلالْ نْقَتِّل الْكفَّارْ
وْيِصِيرْ دَمّ النّاسْ.. مُسْتَنْقَعْ
قَتْلُوا بَعْض.. وِالْجارْ صَفَّى الْجارْ
وْبَعْدُو بِـ "جَنّة رَبّنا" بْيِطْمَعْ
ـ7ـ
هَدْمُوا الدِّني.. صارْ الْقَتلْ زنّارْ
بيلِفّ كَوْن مْشَرْبَكْ مْخَلّعْ
مشْوارْ أَوِّلْتُو حَريق وْنارْ
وِبْآخْرُو.. عَمْ يِصْرُخ الْمَدْفَعْ
**
رح ينتهي المشوار
ـ1ـ
رح ينتهي المشوار يا ربّي
سنين العمر رح ينطفي نورا
خبّيت ناس كتير بـ قلبي
وفي ناس زرتا.. وما عدت زورا
ـ2ـ
وفي ناس صاروا بهالدني مسبّه
وفي ناس فيك تشمّ بخّورا
حاولت إنفض غبرة الغربه
تاري الغربه مرتفع سورا
ـ3ـ
لولاك كنت وقعت بـ دربي
إنزل بجوره.. وأغطس بجوره
ما ندمت.. قادر إرفع الرقبه
ما خطيت.. حتّى وزّع ندورا
ـ4ـ
إمي، يا ربّي، عرفت تربّي
عيله ما عاشت يوم مقهوره
وبيي عطاني من الصلا طلبه
وقللي: يا إبني زيّح الصوره
**
آخدك مشوار
ـ1ـ
نطرت العمر تا آخدك مشوار
وخلصت سنينو وبعدك محلّك
ليش خفتي ليش؟ شو اللي صار؟
وقلبي، يا بنت الناس، بيجلّك
ـ2ـ
صرت شوفك بالحلم أزهار
وفستان من نفناف فصلّك
يا ممترسه بالبيت ليل نهار
نور الشمس بالصعب يوصلّك
ـ3ـ
بتصدقي من البيت صرت بغار
حجارو ع صدري قاعده.. بقلّك:
يا دل دلّك يهجم الختيار
متل النمر تا ياكلك كلّك
**
بداية المشوار
1ـ
مطلق طفل عم يبتدي المشوار
بـ هالدني.. رح نسمع نحيبو
بيشوف قدّامو حكم أشرار
وإنسان عم تكتر مطاليبو
ـ2ـ
بأول شبابو همتو قنطار
وبنص عمرو الخوف بيصيبو
ومتل الكذب رح ينتهي ختيار
الدكتور مش قادر ع تطبيبو
ـ3ـ
هالطفل جايي ع زمن غدّار
من الصعب يفهم كيف تركيبو
بأيا عدل عم نشلحو بالنار؟
بأيا عدل ع الكون منجيبو؟
**
انتهى المشوار
ـ1ـ
أحباب كنّا وبالصداقه كبار
وغدرت فيي وصار هللي صار
ما كنت صدّق ع القساوه ربيت
ما كنت صدّق عشت باستهتار
ـ2ـ
عاملتك بإخلاص كيف نسيت
إنك بـ قلبي وصورتك بالدار؟
من دون سبب درت الضهر ومشيت
وتركت قلبي يحترق بالنار
ـ3ـ
قسيت عْلى حالك.. مش عليي قسيت
إسمك على شفافي انكتب: غدار
فكّرت حالي نص حالي لقيت
مش هيك لازم ينتهي المشوار
**
تا يحرز المشوار
ـ1ـ
"سهار بعد سهار
تا يحرز المشوار"
فيروز غنّتها
وسمعت أنّتها
وسعيد عقل الـ كان
وسع المدى بلبنان
عايش بنغمتها
ـ2ـ
وإنتْ شو صابك؟
سهران برا البيت
مسكّر ع أحبابك
وبالطيشنه جنّيت
يا حسرتي.. ويا ريت
لا عشقت.. لا حبيت
ولا بكيت ع غيابك
ـ3ـ
سنين إسمك ضلّ
ع شفاف هـ الجيران:
"الظاهر حبيبا طل
تا وجّها فرحان
وبإيدا زهرة فل"
وشو كنت إحلم فيك
وشوفك قمر نيسان
شو ما طلبت إعطيك
حب ووفا وتحنان
وقلك: يا سيد الكل
جوات قلبي غل
ـ4ـ
خليك عايش هيك
ضايع بسهراتك
ما عدت حنّ عليك
حْياتي مش حياتك
يا الـ كنت بو الهمّات
وترخصلك الدمّات
رح إزرع بدينيك
أربع خمس كلمات:
حبّك بـ قلبي مات
**
مشورت حتى تعبت
ـ1ـ
مِشْوَرْت حتى تعبت بالغربه
وما كنت شوفك ليش بـ دربي؟
ما في شمس رح تحجبا الحيطان
إنتي الشمس.. والكاينه قلبي
ـ2ـ
فتّشت عنك.. والعمر تعبان
سنينو من الترحال منقلبه
شفتك بـ حلمي من قديم زمان
قالوا: الحلم من أولو كذبه
ـ3ـ
وفجأه بتجي.. ومعرّقه الفستان
الخيّاط ناسي يحجب الرقبه
شفتك إلهه بجنة النسوان
ومن يومها عم يبتدي صلبي
**
أول المشوار
ـ1ـ
رح خبّرك كيف التلاقي صار
وكيف انتهى من أولو المشوار
شفتك قمر عم يلمع قبالي
تاري القمر من طلتك بيغار
ـ2ـ
شفتك شمس بـ عتمة ليالي
من ضحكتك عم تشرق الأنوار
وصرتي حلم عم يمرق ببالي
شوفك بليلي وإرسمك بنهار
ـ3ـ
ملكتي القلب.. صار الإسم غالي
كل ما ذكرتو إحترق بالنار
بعرف أنا من خلقتي عالي
كيف ركعت تا إربحك محتار؟
ـ4ـ
طلعتي لئيمه صعب تا تبالي
بمحبتي.. بتزغرد الأشعار
إنّبت حالي.. تا ربحت حالي
وشلحت خلفي طبعك الغدّار
**
كيف انتهى المشوار؟
ـ1ـ
كيف انتهى المشوار قوليلي؟
لا تكذبي.. كذباتك تقيله
رحتي معو.. تركتي اللي حبّك عمر
شو صار قولي؟ عجّلي حكيلي
ـ2ـ
شايف ع خدك ألف دمعة قهر
دمعه ورا دمعه بتشكيلي
سنتين غبتي.. ملفلفه بالغدر
بدرس القساوه حافظه متيله
ـ3ـ
نسيتي الهدايا وألف باقة زهر
نسيتي الوفا يا ناكره جميلي
واليوم جايي تذكريني بشعر
قلتو إلك.. هالمنفقه شيلي
ـ4ـ
نسيتك أنا ومحيت أبشع ذكر
من دفتري خزّقت تشكيله
ومتلي قسي هالقلب جوّا الصدر
بفرح إذا بتبكي مقابيلي
**
ما انتهى المشوار
ـ1ـ
غيّرت فكري وقلت: رح زورك
وحقق بـ كلمه كامل ندورك
قلّك: بحبك.. رغم يللي صار
ما رضيت يدبل رونق زهورك
ـ2ـ
يا ما حلفت ما خشّ هاك الدار
بالعكس جايي فرّح شعورك
ع درب بيتك ما انتهى المشوار
بعدو بدينيي تزغرد طيورك
ـ3ـ
حبّي إلك أبعد من التذكار
حبّي حقيقه ساطعه بنورك
كان الحلم إدفى ع هاك النار
قمت احترقت بنار تنّورك
**
آخر المشوار
ـ1ـ
مشوار بعدو معلّق ببالي
بتذكرو ليالي ورا ليالي
كيف كنتي تركضي والطير
يركض وراكي.. والهوا شمالي
ـ2ـ
ومن دون حكي تقلّك: صباح الخير
أحلى شمس وتخربط خيالي
ومتل الملاك الطالع من الدير
شوفك قبالي.. والسما قبالي
ـ3ـ
حتى بجمالك ما بلاقي غير
لون البراءه بزهر الحقالي
وتا إلحقك بالسير.. جد السير
بركي يا روحي بآخر المشوار
باكل عنب من كرمك الغالي
**
كمشة حكي
ـ1ـ
كمشة حكي رميتي بدينيي
زعلان منّك ليش قلتيها
الغيره بتقتل.. فكري شويّه
ويمكن عيون الحب تعميها
ـ2ـ
رح خبرك هالبنت مين هيي
هاي جارتي اللي كنت ربيها
تمشّيت حدّا بفرد ليليه
وعنك وعني صرت إحكيها
ـ3ـ
كانت نجوم الليل مطفيه
ما رضيت درب العتم تمشيها
وصّلتها ع بيتها خْطيّه
تمشي لوحدا عيب خلّيها
ـ4ـ
حامل بإيدي شموع مضويه
وكتفا ع كتفي.. وضلّ هدّيها
خافت لَتوقع.. كبّشت فيي
زند الرجوله قلت بعطيها
ـ5ـ
كعنشتها بروحي الرياضيه
حبيت بالعتمات إحميها
بردت شويّه.. غمرتها بديي
ولبّستها الكنزه تا دفّيها
ـ6ـ
ولمن، يا روحي، تكيت عليي
صفّيت بالبوسات سلّيها
بوسات كانت عن حسن نيّه
هاي قصتي.. كل الصدق فيها
**
شربل الختيار
ـ1ـ
من الصعب قلّك، يا قمر، شو صار
دوري انتهى، وساعات عمري قصار
بسنتين يمكن إلبط السبعين
ويصير إسمي: شربل الختيار
ـ2ـ
إحمل عصا، وصلّي تا أللـه يعين
ونهار عم يتكي ع كتف نهار
كنتي بعيوني أجمل الحلوين
من سحرك نجوم السما بتغار
ـ3ـ
وكل ما سنه تمرق وتطوي سنين
تدبل ع إيدي باقة الأزهار
ما رضيت أفضح سر حبّي.. مين
متل الحبيب بيكتم الأسرار؟
ـ4ـ
كنت الجبان الخايف المسكين
رحتي معو.. حسيت جسمي انهار
خسرتك أنا.. خسرت الفرح تخمين
بحكي لحالي.. بجاوب ومحتار
ليش بعدا صورتك بالدار؟
**
مجنونه
ـ1ـ
ع طول حدّي بحبّك تكوني
إنتي الوحيده الساكنه عيوني
كتبتك قصيده ما بتعرف وزن
وْلِكْ كيف جيتي هيك موزونه؟
ع الخد لما بشوف دمعة حزن
بتكون آخرتي يا مجنونه
فوتي ع قلبي بدون شرط وإذن
لعيونك الدقّات مرهونه
ـ2ـ
متلك حدا ما شفت كل العمر
بتزهّري.. لمّا بيدبل زهر
عكس البشر إنتي تكونتي
شمس السعاده الما بتعرف قهر
بحبّك تضلّي متل ما إنتي
تا ضلّ حبّك دهر يطوي دهر
كنتي بشعري قبل ما كنتي
ولولا وجودك ضاع مني الشعر
**
كلمة لأ
ـ1ـ
اسمالله عليكي كيف طلّيتي
متل الشمس صرتي.. تحلّيتي
وكل ما تغلّي بفرشتك عم قول:
يا ريت حدّي شوي غلّيتي
ـ2ـ
قولك أنا عم حوّش المجهول
وعم إحلم ببوسات خبّيتي
تا ضلّ ناطر هيك مش معقول
أكبر طعم ببحيرتي رمَيْتي
ـ3ـ
حبي إلك بـ دمعتي مجبول
وما يوم حبل الحب رخّيتي
بقدم زهوري.. بترفضي ع طول
وتمّك بـ كلمة "لأ" سدّيتي
ـ4ـ
بستقبلك ع صوت دق طبول
وحيطك بوجّي كتير علّيتي
زتي عليي نار.. ودّي سيول
لغيرك مرا.. ما بينفتح بيتي
**
وين المحبه؟
ـ1ـ
ليش ساكت هيك يا ربّي
انت المحبّه.. ووين المحبّه؟
صار البغض بين البشر نبراس
الأجيال قللي كيف منربّي؟
والكل صاروا يألهوا يوضاس
وصارت الكذبه تصدّق الكذبه
ـ2ـ
مدّيت إيدي.. قلت بنشل ناس
شايف بـ عيني ظروفُن الصعبه
جرّبت خفّف بس مر الكاس
شلحوا بدينيي أكبر مسبّه
تاري الشرف ع طول عم ينداس
والشرّ لعبه.. والضغينه أساس
ومجبور إنّي فوت باللعبه
**
حلم كذّاب
ـ1ـ
مجنون هلّلي بينغرم فيكي
شو جابرو حتّى يراضيكي
بيركص وراكي والحلم كذّاب
وبيحترق ع نار ماضيكي
ـ2ـ
بوجّو ع طول مسكره الأبواب
ومحتار كيف بدّو يلاقيكي
قلبك حجر.. عقلك متل دولاب
وهوّي بـ قلبو عم يخبيكي
ـ3ـ
ان كنتي ع طول بتحرقي الألباب
لا بد ما إنسان يشويكي
عم تظلمي وتفبركي الأسباب
استحيي بقى.. أللـه يخلّيكي
**
محبس غرامي
ـ1ـ
فيكي تقوليلي ليش محبوبك هرب
وعندو شهامه بتفتخر فيها العرب؟
يمكن لقاكي مايعه متل الجليد
من دون نار الموقده وجمع الحطب
ـ2ـ
بتفكّري الشبّان لعيونك عبيد
بغمزه زغيره بيركضوا عند الطلب
تا يسكروا من ريقك الصاير نبيد
وتا يفرح المسكين لو حظّو ضرب
ـ3ـ
وهلق أنا واقف ع شباكك عنيد
حامل بقلبي الثأر أقوى من اللهب
رح ركعت قدّام بيتي واستعيد
كرامة شباب قلوبهن صارت خشب
ـ4ـ
وتمثالك المصنوع من كومة حديد
بإيدي انكسر.. ما عاد معرفلو نسب
رح إخلقك بالحب من راجع جديد
ورح تحملي محبس غرامي بكل إيد
وساعتا، يا بنت، مرفوع العتب
**
طلي تا نسكر
ـ1ـ
مش سامعه الكاسات وقناني العرق
عم يندهوا الأحباب حتى يسكروا؟
وإنتي بعيده كتير.. والقلب احترق
وبعدُن عيوني ع الطريق بينطروا
ـ2ـ
بسأل لحالي: كيف هـ العمر انسرق؟
وكيف افترقنا؟ وحبنا ما أكبرو
مدّي إيديكي وخلصيني من الغرق
من دونك المجنون.. أللـه يصبّرو
ـ3ـ
طلّي تا نسكر بالهوى.. ونعمل سبق
يا بتسبقي قلبي.. يا قلبك بغمرو
وبوشوشو قديش بـ وجّي انغلق
وما رضيت مرّه حطّمو أو إكسرو
**
حبقه
ـ1ـ
ليش القلب مجروح
من ضحكة الحبقه
هالريحتا بتفوح
ومنسرقا سرقه؟
ـ2ـ
والحبقه فيها روح
من هالبشر أنقى
منطّ فوق سطوح
وعميان بالخلقه
ـ3ـ
منبني صروح صروح
وبتبتدي الفرقه
أحباب تركوا جروح
وحرقه بضهر حرقه
ـ4ـ
رح إسأل ومبحوح:
شو بينفع الملقى
وفي ناس رح بتروح
وفي ناس رح تبقى؟
**
حلم
تمنّيت يحكي إسم سمّوه الجمال
تا يرسم الوج الحلو قدّامنا
رسمك بإيدو شمس بتشع بدلال
وصرتي "البهيّه" حلم من أحلامنا
لعيونك الأشعار غرقت بالخيال
وبعد السواد تلوّنت أقلامنا
**
دموعك
من وحي صورة لطفلة مشردة تبكي حظها التعيس في شرقنا العربي المنكوب
أوسخ حروب اختزلت دموعك
ومال الغني مسروق من جوعك
ان كنتي ع دين "المصطفى" رح قول
"محمد" بكي لما انطفوا شموعك
ان كنتي الصليب بترسمي ع طول
ع جبهتك مصلوب يسوعك
**
أدب راقي
ـ1ـ
صار الأدب "قطش وشلح" يا رفاق
متلو تعاسه صعب تا نلاقي
بيصدر ديوان تخربش البزّاق
وبيكرموا الـ كتبوه يا رفاقي
ـ2ـ
بـ هالأدب لا تشوهوا الأذواق
ع صفحة التاريخ مش باقي
قالوا: أدب راقي.. تا شبعوا نفاق
حابب أدبنا يكون مش راقي
**
لا تنتحر
ـ1ـ
لا تنتحر.. كرمال كيس طحين
أو ألف ليره.. حق منقوشه
بتموت وحدك إنت يا مسكين
بيبقى زعيم الخمر والسوشي
ـ2ـ
والأم هالْـ سهرت عليك سنين
تقلاّ يا أمي من الحزن طوشي
وعيلتك رح تتركا لَـ مين
لحكّام حقّن بس خرطوشه
ـ3ـ
لبنان بدّو رجال ما بتلين
لا تخذلو بظروف مغشوشه
ولّع الثوره.. شعّل البنزين
تا تعيش إنتْ بموطنك لبنان
وتقضي على وحوشك مع وحوشي
**
منامات
ـ1ـ
ما دام بيّي مات
حدّو أنا رح فوت
ورح إدفُن منامات
رسمت ضيَع وبيوت
ـ2ـ
وأموال ومْقامات
وكذبات لفّا سكوت
ونسيت "بو الهمّات"
مش أقوى من طاغوتْ
ـ3ـ
الـ بتخلفو الإمّات
رح ينتهي وممقوت
وإنّو العمر كلمات
بس تنكتب بتموت
ويا ما انحنت قامات
وانزويت بتابوت
**
رسمك معي
ـ1ـ
رسمك معي.. وكل الدني نسوان
رخ فرجيُن كيف الحلا بيكون
شفافك ورود مزيّنه البستان
وعيونك اللي بتختصر العيون
ـ2ـ
فيها سبحت يا حلوتي من زْمان
ومن شعرك الفيه العتم مفتون
تعلمت نظم الشعر والأوزان
من سنين زادوا بمشيتك الفنون
ـ3ـ
ومن قدّك الممشوق حسنك بان
وجبينك لتلج الجبل مديون
وتحت القميص مفرّخ الرمان
بيكبر لحالو.. بيكسر القانون
ـ4ـ
وفستان من كتر الدفى عرقان
معرّق بلون الموز والليمون
ووجّك قمر تا إرسمو.. الألوان
فوق الخدود بتختصر أحزان
عاشت بـ قلب الشاعر المجنون
**
شو هالوضع؟
ـ1ـ
يا وضع.. شو هالوضع؟
صار الزمن محتار
والطرح متل الجمع
والتلج متل النار
ـ2ـ
وصار الحكي المسموع
بيضحّك الطرشان
بالعين ما في دموع
تا نخفف الأحزان
ـ3ـ
وصارت ع ضو اللمع
تشتي الدنيي غبار
بلدان كلاّ قمع
بتطعم شعوبا الجوع
والجوع شو غدّار
**
زعلان
قالت: حبيبي ليش تا غضبان
وما في سبب تا اليوم تتخلّق
كل عمرك عاشق وولهان
وكرمال بوسه شفافك بتسبق
قلتلّها: من نظرتي زعلان
شردت عيوني صوب المعرّق
لمّا الهوا طيّرلِك الفستان
من دون وعي نخّيت حتّى شوف
انكنّو الهوا بفستانك معلّق
**
على دلعونا
ـ1ـ
على دلعونا وعلى دلعونا
ما قتلنا حدا.. ليش حبستونا؟
حكمتو هالدنيي بجندي وباروده
ورجّف إجريكن "فَيْروس كورونا"
ـ2ـ
كل دوله عظمى.. ما عادت عظمى
"كورونا" بياكل لحما مع عضما
بنيوا قنابل مدري شو إسما
ونسيوا المستشفى.. حتى يشفونا
ـ3ـ
كذبه قوّتكن.. كذبه مشهوره
كشفها "فَيْروس" غطّى المعموره
قرفنا ضحكتكن جوّات الصوره
حاكم يا ألله.. كل الحكمونا
ـ4ـ
يا ربي.. داوي بعطفك مرضانا
كتروا اللي ماتوا.. إرحم موتانا
ما كانوا قعدوا وحكموا لولانا
نحنا انتخبنا العم يسرقونا
**
طير الفينيق
ـ1ـ
ليش قللي ليش يا لبنان
ع طول عم بتلفّك الأحزان
هالإنفجار الصار بكّى الصخر
ونحنا بكينا دم بالهجران
ـ2ـ
بيكفي بقى موت ودموع وقهر
يا الكل عمرك موطن الإنسان
حكام لازم ينتهوا بالقبر
بس القبر ما بيحضن الزعران
ـ3ـ
خليك واقف.. متل أرز الرب
لولا ركعت هالكون رح يركع
نحنا معك مهما تْطُول الدرب
نحنا جناحك إسمك منرفع
ـ4ـ
منبنيك والله القلب فوق القلب
بدل الحجر.. لا تخاف ما منفزع
ع طول عم بتقوم بعد الحرب
طير الفينيق ان مات رح يرجع
**
مجنون
ـ1ـ
شعبي أنا.. مجنون يا ربّي
مألّه زعيمو.. وشالحك برّا
وفرحان إنّو يعيش بالكذبه
ومن كم ورقة تين يتعرّى
ـ2ـ
عم ياكل الضربه ورا الضربه
وبعدو بزعيمو عم بيتدرّى
أللـه رحوم كتير يا شعبي
عم يحرسك تا تعيش حر كبير
ومنّك زعيمك عم بيتبرّا
**
لا تفزعي
ـ1ـ
لا تفزعي لو قويت الشيبه
وغطى التلج راسي يا عينيي
بتبقي الصبيه الساكنه بقلبي
وعم تلعبي متل الهوا فيي
ـ2ـ
بترجعيني شب من غربه
غرزت ضافيرا السود بـ ديي
ولِكْ خلصيني.. تعبت من صلبي
الأشعار صارت تضحك عليي
**
صور
ـ1ـ
ع طول قاتلني الضجر
بركان بالراس انفجر
غربه طويله.. عشتها
عمري بلياليها انهدر
ـ2ـ
وهاك البلاد الشفتها
بالحلم أغلى من الدرر
بلحظة تعاسه حذفتها
وما عاد مسمعلا خبر
ـ3ـ
بيوت الشعر حلّفتها
تا تكون أقوى من القدر
دموع البشر جفّفتها
بالشعر.. ما عرفوا البشر
ـ4ـ
مسّحتها.. نضّفتها..
تاري القلب متل الحجر
وبقيت حقيقه عرفتها
مهما تعبنا بهالدني
منروح وبتبقى الصور
**
رعشه
ـ1ـ
كل ما الرّعشه تفوِّر دمِّك
وترفعلِك صوتِك بالعالي
يا عبلى.. بهجم ع تمِّك
تا خفّف صوتِك بليالي
ـ2ـ
ويا دلّك لو عرفت أمّك
لا تقوليلي مش رح بالي
كل عمري رح آكل همّك
وصوت الرعشه يبقى ببالي
**
غبار الضغينه
ـ1ـ
بعد الهجر.. حبّيت إنّي زور
ديارك يا عبلى.. وبوّس ترابا
شفت الشوارع خاطرا مكسور
وبيوت عم تنده ع أصحابا
ـ2ـ
لا صوت طالع.. لا ضحك.. لا نور
غبار الضغينه وسّخ عتابا
لوين راحوا لوين؟ والديجور
مخيّم ع ضيعه خنقت حبابا
ـ3ـ
وبيتك، يا عبلى، مسيّجينو بسور
متل الحبس.. هالناس شو صابا؟
زرعت زعل.. ما في قلب مسرور
جنون الحرب عم يحصد شبابا
ـ4ـ
وبالزور عم يمشي الوقت بالزور
الما مات بعدو عايش ومقبور
وكل المقابر فتحت بوابا
**
ناجي الفليطي
إلى روح الوالد ناجي الفليطي.. شهيد منقوشة الزعتر:
ـ1ـ
موتك يا ناجي بدّدُن
داس الكراسي وشرّدُن
وما ضلّ حاكم ما وطي
سيف الفقر رح يحصدُن
روسن استويت.. عدّدن
ما في زعيم وما خطي
ـ2ـ
ويا بنت ناجي إربطي
حبل الشنق.. لا تغلطي
جيبي الزعيم اللي سرق
فوق الجتت غنّى ومرق
وبخيال إجرامو لطي
**
