اشتقنا

شربل بعيني

Charbel Baini

اشتقنا

Ishtaqna

MISSING YOU

**

Cover by Randa Baini

www.randabainiart.com.au

**

اشتقنا

مَوْجَاتِ الْبَحْرِ بْتِطْوِينَا

وْبِتْشَلِّعْ كُلِّ مْفَارِقْنَا

بْتِشْلْحَنَا دَمْعَه عَ الْمِينَا

جْنُونِ النَّطْرَه عَمْ يِحْرِقْنَا

يَا بْلادِي لْلِي بِتْحِبِّينَا

لا تْخَلِّي الْغُرْبِه تِخْنِقْنَا

إِنْتِي فِينَا.. ضَلِّي فِينَا

وِحْيَاةِ الْأَرْزَاتِ.. اشْتَقْنَا

اشْتَقْنَا لِلْرَاحُوا وْتَرْكُونَا

وْكَانُوا الدَّبْكِهْ وِالدَّلْعُونَا

وْشَمْسِ الضِّحْكِهْ الْعَمْ بِتْزَهِّرْ

"فُوقْ غُصْنِكْ يَا لَيمُونَهْ"

مْنِ جْنُونِي أَبْيَاتِ بْعَمِّرْ

تَا الْغُرْبِه تْخَفِّفْلِي جْنُونَا

مْرَايِةْ عُمْرِي عَمْ بِتْكَسِّرْ

فِيهَا وْجُوهِ لْلِي حَبُّونَا

اشْتَقْنَا وَالله.. اشْتَقْنَا عْلَيْكِي

يَا ضَيْعَه.. مُدِّي إِيدَيْكِي

حِنِّي عْلَيْنَا.. وْلا تِنْسِينَا

خَبِّينَا بْزِرْقِةْ عِينَيْكِي

كْبِرْنَا فِيكِي.. لا تْجَافِينَا

كِلْمَا بْعِدْنَا.. مْنِرْجَعْ لَيْكِي

الْغُرْبِهْ مَهْمَا عِتْقُوا سْنِينَا

مَا مْنِنْسَى غَبْرِةْ إِجْرَيْكِي

الذُّكْرَيَاتِ الْحِلْوِه بْتِمْرُقْ

وْمَا بْفَكِّرْ إِنِّي عَايِشْهَا

مِتْلِ الزَّيْبَقْ.. لَمَّا بْتِدْلُقْ

ضِحْكِتْهَا.. مِينِ بْيِكْمِشْهَا؟

عَارِفْ إِيَّامِي عَمْ إِحْرُقْ

وِعْيُونِي.. الْقَهْرِ مْطَمَّشْهَا

وْعَارِفْ شَمْسِي مُشْ رَحْ تِشْرُقْ

وْجُودِي بِالْغُرْبِهْ.. غَاشِشْهَا

**

مغترب

طلب أن يأتوه بحفنة من تراب لبنان، كي تعطّر ترابه في القبر:

جمّع تيابو.. ضبّها وزعلان

يترك وطن أرزات.. عم يبكي دما

شياطين عم بتهجّر الانسان

ولعت جهنم فوق هالقطعة سما

نص الشعب مزروع وين ما كان

واللي بقي مظلوم.. هيك بينسمى

حامل معو ترابات من لبنان

وكاتب وصيه ان مات بالهجران

تنزل معو بالقبر.. تا يشم الحمى

ليش حتى يسافر ومهموم

وكمشة ترابو تضيع بالغربه

لولا بقي كان الوطن بيقوم

رغم الحروب الهجّرت شعبي

تا يحس حالو بالهجر مظلوم

وخايف يموت بعيد.. يا ربي

تراب الوطن وحدو للي بيدوم

خايف يموت بغربتو يئسان

حبّه زغيره من أرض لبنان

بعتم القبر بتنور التربه

**

طفل البحر الملاك

وجدوا الطفل آلان كردي، ابن السنتين، جثة هامدة على الشاطىء، بعد أن بصقه البحر، ليرميه أمام أعيننا جميعاً، وقد أدار قفاه نحو جلادي البشرية، وكأنه يقول: هذه الأرض لا تعنيني، أنا مسكني الجنة.

ـ1ـ

درلُن إجْرَك.. إجْرَك فيهن

يا طفل البحر القديس

ع إجرامن رح هنّيهن

إجرامن أقوى من بليس

ـ2ـ

درلن إجْرَك.. لا تتأخّر

إنت ملاك.. وهني وحوش

صبّاطك من روسن أكبر

دَعْوِس بالصباط جيوش

ـ3ـ

ما منستاهل ضحكة سنّك

ما منستاهل نفرح فيك

افتكروا انو ارتاحوا منك

نحنا بالشعر منحييك

ـ4ـ

قللو لألله شو ما بدك

سمّي بالإسم الأشباح

قللو الدنيي كلاّ ضدك

لازم يمحيها ويرتاح

**

شلح الأرز

تْغَنَّجْ يَا شِلْحِ الْأَرِزْ بِبْلادِي

يَا تَاجْ أَعْلَى جْبَالْ مِنْصَانِهْ

بْلَوْنَكِ الْأَخْضَرْ فِرْحِتِ الْوَادِي

وْرَنْدَحِ الْبُلْبُلْ أَجْمَلِ غْنَانِي

شِلْشَكْ إِذَا بْيِمْتَدّْ بِزْيَادِهْ

بْيِرْخَصً إِلُو الدَّمِْ لْ بِشِرْيَانِي

بِقْلُوبْنَا زَرْعُوكْ أَجْدَادِي

مِنْشَانْ يِنْمَى فِكِرْ إِنْسَانِي

يْوَزِّعْ عَ كُلِّ الْكَوْنْ أَمْجَادِي

وِبْأَرْضْ سِيدْنِي يْشِعّْ إِيمَانِي

بِرْكَعِ بْصَلِّي الْعُمِرْ لِلْفَادِي

يْرِدِّ الْغَضَبْ عَنْ أَرْضْ مِنْهَانِهْ

يَا أَرْزْ، فَوْقِ السَّطِحْ عَمْ نَادِي

وْمَا هَمّْ لَوْلا بْيِتْعَبِ لْسَانِي:

شَرْبِلِ بْعَيْنِي بْيِعْبُدِ عْبَادِهْ

بَيْرَقْ بِيوَحِّدْ شَعِبْ لُبْنَانِي

**

يَا غْزَيِِّلْ

يَا غْزَيِِّلْ يَا بُو الْهِبَا

يَا حِلْوِه يَا طَيِّبَه

مِنْ يَوْم اللِّي حِبَّيْتِكْ

قَلْبي رِجِعْلُو الصِّبَا

مِنْ يَوْم اللِّي حِبَّيْتِكْ

خِفْت عْلَيْكِي وْخِبَّيْتِكْ

وَالله لَبْنِيلِكْ بَيْتِكْ

هَوْنِيكْ بْأَعْلَى الرُّبَى

مِنْ سِيدْنِي لْعِنْدِكْ جايِي

تْرَكْت الْغُرْبِه وَرَايِي

عَ صَدْرِي يَا حِلْوايِه

قِصِّةْ حُبِّكْ كَاتِبَا

يَا مِيجَانا وْيَا مِيجَانَا وْيَا مِيجَانَا

بَيْرُوتْ إِلْنا.. وْغَيْر حُبَّا مَا لِنَا

يَا غْزَيِّلْ قِلَّلا وْقِلَّلا

بَيْرُوتْ حَارِسْهَا أَلله

لَوْ زِرْت الدِّنْيِي كِلاّ

غَيْرِك مَنّي مْصَاحِبا

**

مخدة حجر

تعليقي على صورة طفل صغير ينام على حجر ويفترش الارض

مخدة حجر.. نوم الهنا

تراب الأرض فرشة سنا

لا تخاف ألله بيحرسك

نكايه بـ أصحاب الغنى

بحيّك بـ دمعي ملبسك

ومتل إبني بقدّسك

تا تعيش بـ قلبي أنا

**

هيهات يا بو الزلف

هيهات يا بو الزلف

عيني يا مولَيّا

بيروت لا تستحي

البوسه إلهيه

فرحان فيكي.. فرحي

يا نجمه بحريّه

جوات قلبي اسبحي

ع شطوط عينيّا

مشتاق.. جِد السعي

كافي البعد كافي

لازم يفيق الوعي

صرلك زمن غافي

يا مجدليا تعي

وهاتي الدوا الشافي

وقدام مجدو ركعي

يا حروف مضويه

يا مجدليا اسمعي

إسمك على شفافي

ع طول انتي معي

بالقلب لا تخافي

شربان من مدمعي

كاسك على الصافي

بالهجر جفنك وعي

وراسك ع إيديّا

**

مزرعة الشوف

يا مزرعه ل بالشوف مين قدّك؟

تركنا الوطن وقلوبنا حدّك

تا نحرسك الله عطانا العون

بالدّم.. بالأرواح منمدِّك

يا مزرعه ل بالشوف مين قدّك؟

بيت البعيني منبعو من هون

دماتنا البالقلب من جدِّك

صارت العيله أوسع من الكون

تا تنفِّذ الأكوان شو بدِّك

يا مزرعه ل بالشوف مين قدّك؟

بصرتك ورود بألف لون ولون

وختيار جايي حامل سنينو

ما سألتو الأحلام عن دينو

تا يبوّس الوردات ع خدّك

يا مزرعه ل بالشوف مين قدّك؟

**

وحش أزرق

مِينْ قَالْ لَوْنَكْ، يَا بَحِرْ، أَزْرَقْ

وْفِيك الْمَرَاكِبْ دَوْمْ عَمْ تَغْرَقْ؟

هَـ النَّاسْ يَلْلِي بَلْعِتُنْ أَمْوَاجْ

وْمِتْل الْغَنَمْ مَاتُوا فْوَاجِ فْوَاجْ

دَمُّنْ بِرَقْبِةْ مِينْ.. يَا أَحْمَقْ؟

تَرْكُوا بْلادُنْ.. خَايْفِين الْمَوْتْ

شَافُوكْ حُلْمِ كْبِيرْ.. فَاتِ الْفَوْتْ

غْدَرْت فِيهُنْ.. غِرَّقِتْ الِعْيَالْ

وْبَعْدَكْ بْتَاكُلْ، يَا وَحِشْ، أَطْفَالْ

صَرْخُوا: يَا أَلله.. وْضَاعْ فِيك الصَّوْتْ

رُوحْ غَسِّلْ مَوْجَك مْنِ الدَّمّْ

الرِّيحَهْ كَرِيهَهْ.. آخْ لَوْ بِتْشِمّْ

فَوْق ظُلْمِ الْحَرْبْ إِنْتِ ظْلَمِتْ

مَا رْحَمِتْ طُفْلِ زْغِيرْ.. مَا تْإِلَّمِتْ

بِحْلُفْ أَنَا.. بِحْلُفْ مَا عِنْدَكْ أُمّْ

**

همومي

ـ1ـ

ما عادْ فِيِّي إِتْحَمَّلْ..

ما عادْ فِيِّي إِتْحَمَّلْ..

هْمُومِي، أَكْبَرْ مِنْ رَاسِي

وِالْيَأْس مْعَبَّى كاسِي:

قهر وْحُزن وْمَآسِي

تَا صَفَّى رِيقِي حَنْظَلْ..

ـ2ـ

لَمَّا الْـ حِبَّيْتُنْ هَجْرُونِي

زَرْعُولِي الوِحْدِه بِعْيُونِي

وْضِجِرْ مِنِّي تْرَابْ الأَرْضْ

وْصّفَّى يْمَغِّطْ طُولِي.. عُرْضْ

وِيْقِللّي: فِي بْقَلْبَكْ بُغْضْ

بِـيدَمِّرْ هَـ الْمَسْكُونِه!

ـ3ـ

ضَايِع.. قَالِتْلِي الأَيَّامْ

بْدِنْيِي مَا فِيهَا أَحْلامْ

وْجُودَكْ ما بْيِنْعَدّ وْجُودْ

غَايِبْ.. مَعْ إِنَّكْ مَوْجُودْ

بْيِكْفِي بَقَى.. حِطّ حْدُودْ

لْمَهْزِلْتَكْ، تَا فِيكْ تْنَامْ!

ـ4ـ

غِنِّيَّاتِي وِالأَشْعَارْ

اللِّي كْتَبْتُنْ عَ وْرَاقْ الْغَارْ

زِعْلُوا مِنِّي وْقَالوا: عِيشْ..

لا تْرَوِّحْ عُمْرَكْ بَخْشِيشْ

رَكِّبْ جْوانِحْ مِنْ رِيشْ

وْطِيرْ وْعَلِّي فَوْق النَّارْ

ـ5ـ

.. وْهِنِّي لَوْ حَسُّوا شْوَيِّه

بِاللِّي عَمْ يِغْلِي فِيِّي

كَانُوا سَكْتُوا بِالْمَرَّه

وْغِرْقُوا بِقْنَانِي الْخَمْرَه

الْخَمْرَه.. فِي عِنْدَا قِدْرَه

تْوَعِّي الإِشْيَا الْمِنْسِيِّه.

**

سراقه

إِلَّفِتْ شِعْرِ كْتِيرْ

وِسْرَقْتِي مِنِّي الشِّعِرْ

وْصارِ الْفَرَحْ تِعْتِيرْ

وْيَبَّسْ أَنِينِي الزَّهِرْ

فِكَّرْتْ حُبِّي كْبِيرْ

تارِي الْمَحَبِّه غَدِرْ

مِتْلِ الْحِلِمْ بِتْطِيرْ

وْما بْيِبْقَى غَيْرِ الْقَهِرْ

غْدَرْتِي بْقَلْبِي وْصارْ

قَلْبِي فَحِمْ أَسْوَدْ

ما بْتِنْطِفِي هَالنَّارْ

لَوْ إِرْحَلِ وْإِبْعَدْ

بْغَدْرِكْ أَنا مِحْتارْ

كِيفْ قَلْبِكِ تْجَمَّدْ

وْكِنْتِي مَرِجْ أَزْهارْ

وْبِالْمَرْجْ عَمْ إِسْعَدْ

هَالصُّورِةِ لْ بِالْبالْ

رَحْ إِمِحِيَا كِلاَّ

وْلَمَّا الْوَجَعْ يِنْشالْ

رَحْ إِشْتِكِي لْ أَلله

**

طفل الحجر

رأيت إبن سبع سنوات يحمل حجراً أثقل منه فكتبت:

ليش قللي ليش قسيت هالدني

وكرمال "لقمه" ركّعت أطفالها؟

تقل الحجر تقلك يا طفل الولدني

إنت البطل.. مش عيب إنك تنحني

بدنيي ما عادت تفتخر برجالها

**

زلزال انطاكيه

إنطاكيه.. شو صار تا إبنك بكي

والزلازل هدّمت هالمملكه

يا ممكلمة ألله العظيمه بهالدني

بزنودنا بأموالنا رح تنبني

ومهما بعدنا قلوبنا كلاّ لكي

ع شرط إنّك تصمدي وما تشتكي

ـ2ـ

سمعت صوتا بأرض سوريّا

تحت الدمار تصيح البنيّه

وقالت إذا بتخلصوني بصير

إخدمكن.. وع الصدر خي زغير

الإعلام جنّ وركّز عليّا

ومتلا كتار بأرض تركيّا

ـ3ـ

تأخّر الإنقاذ عن شعبي

والانسانيه تحولت كذبه

الآلاف ماتوا بكترة الإهمال

وعيال عم تبكي ع فقد عيال

ملايين صارت حالتُن صعبه

مش حقّ تقسى هيك يا ربي

**

إبن سركيس

كتبتها بعمر 15 سنة

ـ1ـ

تْفَضّلِي طْلَعِي بْسِيّارْتِي

لا تِنْطِرِي السِّرْفِيسْ

إِسْمِي أَنا يا جَارْتِي

شَرْبِلْ إِبِنْ سَرْكِيسْ

صُدْفِهْ جَمِيلِه كْتِيرْ

جَمْعِتْنَا سَوَا

وِنْشَالله بُكْرَا نْصِيرْ

مِنْ أَهْلِ الْهَوَى

لا بِشْرَبِ مْنِ الْبِيرْ

وْلا بِرْمِي الِحْجَارَهْ

بِشْرَبْ أَنَا التِّعْتِيرْ

تَا تِفْرَحِ الْجَارَهْ

جَارِكْ خِلِقْ شَاعِرْ

وِالشَّاعِرِ الْحَسَّاسْ

بِالْحُبّ بِيتَاجِرْ

بِقْلُوبْ كُلِّ النَّاسْ

**

أجمل الحلوين

كتبتها بعمر 15 سنة

ـ1ـ

لا الْقَمَرْ مِتْلِكْ

وْلا شَمِسْ صَنِّينْ

قَلْبِي بْيِنْدَهْلِكْ

يَا أَجْمَلِ الْحِلْوِينْ

الْبَدْر تْمَنَّى يْكُونِ بْدَالِكْ

حَاجِي عْلَيْه تْشُوفِي حَالِكْ

يَا مَا انْحَسْدُوا مِنْ جَمَالِكْ

وْغَارُوا زَهْرَاتِ الْيَاسْمِينْ

قَلْبِي مَغْرُومِ بْدَلالِكْ

وِعْلَيِّي مَا دِرْتِي بَالِكْ

عَنِّي لَوْ بِيغِيبِ خْيَالِكْ

رَحْ فَكِّرْ إِيَّامِي سْنِينْ

الدِّنْيِي عَمْ تِضْحَكْ لِوْجُودِكْ

حِنِّي شْوَيِّه عَ مَعْبُودِكْ

نَغْمِةْ حُبِّي بْرَنِّةْ عُودِكْ

وْدَقَّاتِ الْقَلْبِ تْلاحِينْ

**

الضيعه بلبنان

كتبتها بعمر 15 سنة

ـ1ـ

الضَّيْعَه بْلُبْنَانْ

جَنِّةْ عَدَنْ صُورِتْهَا

بْنَاتِ وْصُبْيَانْ

دَمَّاتُنْ مِنْ مَيِّتْهَا

عَ تْلالِ تْلالْ مَنْشُورَه

بْسَحْبِةْ مُوَّالْ مَسْحُورَهْ

بِفَضَاوِةْ بَالْ مَسْتُورَهْ

شُعْلِةْ إِيمَانْ عَيْلِتْهَا

بِسْيَاجِ الْخَيْرِ مْسَيَّجِهْ

وِبْتَاجِ اْلعِزِّ مْتَوَّجِهْ

عَ  الْعَيْنْ صَبَايَا مْرَوَّجِهْ

تَا تْعَبِّي الْمَيِّ بْجَرِّتْها

السِّحْرِ بْجَمَالا مَسْحُورْ

يَا مَا تْغَنِّتْ فِيهَا طْيُورْ

وْفَاحِتْ فِيهَا رِيحْةِ زْهُورْ

وَحْدَا النَّحْلِه بَاسِتْها

بْتِعْطِي الْخَيْرِ غْمَارِ غْمَارْ

مِنْ شَمْسَا شَعِّتْ أَنْوَارْ

غِفْيِتْ عَ نَغْمِةْ أَطْيَارْ

وْمَا صِحْيِتْ مِنْ غَفْوِتْهَا

بْضَيْعِتْنَا اللُّبْنَانِيِّهْ

لَمَّا تْطُلّْ الصِّبْحِيِّهْ

الشَّمْسِ بْتِسْبَحْ بِالْمَيِّهْ

وِبْتِنْسَى عِنَّا بْلُوزِتْهَا

**

انت وانا

كتبتها بعمر 15 سنة

ـ1ـ

إنت وأنا يا حبيبي

كتبنا قصتنا الغريبه

تحت ع رمل السواقي

فوق ع التله القريبه

ـ2ـ

وهون شو بيحلالنا

نغفى سوى بعرزالنا

نخلق حلم ما بينوجد

إلا بسما آمالنا

ـ3ـ

وياما تمرجحنا سوا

ع حبال طيرها الهوا

ننسى الدني وآلامها

بالحب منلاقي الدوا

ـ4ـ

ونبني سوا هالمملكه

الأبعد من جنون الحكي

بسور السعاده مزنره

لا خوف فيها ولا بكي

**

جندي

بَدِّي إِتْجَنَّدْ بَدِّي

عْطُونِي تْيابِ الْجِنْدِيِّه

تا يْصَفِّي إِسْمِي جِنْدِي

بَيْنِ جْنُودِ الْحُرِيِّه

تْرِكُونِي إِحْمِلْ مَدْفَعْ

عَ حْدُودِي اللُّبْنانِيِّه

وِبْإِيدِي الرَّايِه إِرْفَعْ

فِيها الْأَرْزِه الدَّهْرِيِّه

وْشَعْبِكْ يا بْلادِي إِجْمَعْ

شَبابِ وْخِتْيارِيِّه

شَعْبِي لازِمْ يِتْطَوَّعْ

إِسْلامِ وْمَسِيحِيَّه

جِنْدِي وْعِنْدِي شَطارَه

إِحْمِي الرَّايِه الْمَنْصُوبِه

وِالْأَيادِي الْغِدَّارَه

تْصِير بْخَنْجَرْ مَضْرُوبِه

وْإِرْجَعْ عَ الضَّيْعَه زْيارَه

مْزَيَّنْ بِالْمَجْد دْرُوبِي

إِسْقِي زْهُورْ الدُّوَّارَه

وْإِهْدِي الْوَرْد لْمَحْبوبي

**

بعدني تلميذ

كتبتها بعمر 15 سنة

ـ1ـ

دِقِتْ طَعْمِ الْحُبّْ

وِلْقَيْتُو لَذِيذْ

لكِنْ طَوِيلِهْ الدَّرْبْ

بَعِدْنِي تِلْمِيذْ

بَدَلْ مَا قَضِّي السَّهَرْ

عَمْ إِدْرُسِ بْكُتْبِي

صِرْتْ خَبِّرْ هَالْقَمَرْ

مِينِ لْ سَرَقْ قَلْبِي

بْلَيْلاتْ مِلْيَانِهْ سَمَرْ

قَعْدِتْ جَنِبْ مِنِّي

وِيْرَنْدِحِ لْحَالُو الْوَتَرْ:

يَا حُلْوِتِي حِنِّي

تِلْمِيذْ بَعْدِي.. وْلِلْ سُمِرْ

عَمْ إِنْصُبِ حْبَالِي

مَا هَمّْ إِمْشِي عَ الْجَمِرْ

إِيَّامْ وِلْيَالِي

لِمْهِمّْ بَاقَاتِ الزَّهِرْ

مَا تْبُوحْ بِالْأَسْرَارْ

لَيْشْ تَا شْفَافُنْ حُمِرْ

وِزْغَارْ بَعْدِ زْغَارْ

**

حب فاشل

بعمري أنا حبّيت

مرتين وبس

من دون طرحه أو عرس

مرّه بعمر الولدنه

في بنت متل السوسنه

استحليتها

وبدّك الدغري يا دني 

حبّيتها

لاكن ضربني النحس

كان عمرها سبعه

انشالله العمر كلّو

وعمري أنا تسعه

وهالقلب يا دلّو

عم زيدها بسنتين 

مش أكتر

وصرت بدموع العين

عم إسكر

ومتل الكذب.. من دون وعي

قلتلها: بحبك

دربي أنا دربك

وْماعْرِفِتْ كِيفْ ضَرْبِتْ

خَدِّي أَنا وْهَرْبِتْ

وما قدرت اندهلا ارجعي

وخلصت الحفله

حفلة غرام

طفل مع طفله

متل الحمام

ومن بعد تسع سنين

نسيت هاك الحب

وتكاتروا الحلوين

واندق باب القلب

حبيت حلوه خدودها تفّاح

الظاهر ما حبّتني

راحت وتركتني

والقلب عم بيدق

وعم تهرب الافراح

رح قول كلمة حق:

بعدني لليوم

ما دقت طعم النوم

وكيف رح ارتاح

والباب ما بينشق

بقللو يا قلبي فتاح

ومضيّع المفتاح

**

حبيت السمرا

كتبتها بعمر 15 سنة

ـ1ـ

حِبَّيْتِ السَّمْرَا.. وْحِبَّيْتْ

عَمِّرْلا بِـ قَلْبِي بَيْتْ

وْقِلَّا: سِلَّمْتِكْ رُوحِي

إِنْتِي بَلْسَمْ لِجْرُوحِي

لَمَّا مْنِ قْبَالِي تْرُوحِي

خْيَالِكْ بِعْيُونِي خِبَّيْتْ

السَّمْرَا لْ أَلله خَالِقْهَا

وْجُوَّاتْ قَلْبِي مْعَلَّقْهَا

كِيفْ مَا بَدِّي إِعْشَقْهَا

وْعُمْرِي كِلُّو إِلْهَا عْطَيْتْ

بِسْتَحْلِي تِضْحَكْ مَرَّهْ

وْتِطْفِي بِـ قَلْبِي الْجَمْرَهْ

عْلَيِّي غُضْبَانِهْ السَّمْرَا

يَا رَيْتْ بْتِرْضَى يَا رَيْتْ

إِنْتِي النُّورْ لْ بِعْيُونِي

بِتْمَنَّى حَدِّي تْكُونِي

وْحُبِّي عَ طُولِ تْصُونِي

غَيْرِكْ، وَالله، مَا تْمِنَّيْتْ

**

خفت عليكي

كتبتها بعمر 15 سنة

ـ1ـ

خِفْتِ عْلَيْكِي كْتِير كْتِيرْ

وْوِقَّفْت عْيُونِي نْوَاطِيرْ

وْكِلْ مَا شَعْرِكْ جَنّ وْطَارْ 

إِتْعَمْشَقْ بِالشَّعْر وْطِيرْ

يَامَا تْغِنَّيْت بْإِسْمِكْ

وَقْت هْدِيتِينِي رَسْمِكْ

وِجْرَار الطِّيب نْدَلْقُوا

حَتَّى يِتْعَطَّرْ جِسْمِكْ

وِالْوَرْدِه الْحَدّ الْبِرْكِه

تِكْيِت وْصَارِتْ تِبْكِي

غَارِتْ مِنْ ضِحْكِةْ سِنِّكْ

وْغَصِّّتْ مَا قِدْرِتْ تِحْكِي

قِلْتِيلِي: لا تْخَاف الْحُبّْ

رَسْمَكْ، إِسْمَكْ.. جُوَّا الْقَلْبْ

وْقِلتِيلِي: لا تْخَاف النَّاسْ

حَدَّكْ رَحْ إِمْشِي هَالدَّرْبْ

**

خيانه

ليش قولي ليش خنتيني؟

بنار الغدر إنتي كويتيني

حرقتي القلب

محيتي الدرب

وبجهنم الحمرا رميتيني

قلبي عطيتك.. شو عطيتيني؟

غير الغدر

الكلو مكر

صرخت ارحميني.. ما رحمتيني

عم حس ليل نهار

عم إحترق بالنار

ونهر الغضب نازل من جبيني

محيتي القصايد تا محيتيني

محيتي الغزل والحب

ومشيتي خلف الكذب

يا خاينه.. عمري سلبتيني

وغرقان بجروحي تركتيني

ومين غيرك رح يداويني؟

**

زهره

كتبتها بعمر 15 سنة

لا تغمزي الشبّان بالجيره

بعدك بريئه كتير وزغيره

بفزع، يا حلوه، توقعي بالحب

ومتل الفراشه تلفّك الحيره

درب الغرام بعيد.. أصعب درب

بيحرق قلوب الناس بالغيره

ووحدي أنا.. عم إزرعك بالقلب

وعلّق الصوره برقبتي دخيره

هاي صورتك.. نعمه إلي من الرب

عنك أنا ما بقطع السيره

بْحِبِّكْ يا زَهْرَه.. بْلا خِداعِ وْكِذْبْ

سِيرِي عَ دَرْبِي بْتِفْرَحي.. سِيرِي

زهره.. يا زهره قبال عينك شب

ناطر تا حتّى يشمّك.. كبيره

**

سمرا وزغيره

كتبتها بعمر 15 سنة

سَمْرَا وِزْغِيرِه

وْكِلاّ ظَرَافِه

شِفْتَا بِالْجِيرِه

وِبْكِلّْ لَطَافِه

قِبْلِتْ عَزِيمِه

بْنِيِّه سَلِيمِه

نْشَلْحِتْ عَ سْرِيرِي

تْغَطِّتْ بِلْحَافِي

قَالِتْ نِعْسَانِه

عْيُونِي دِبْلانِه

وْحَاسِّه بِـ حَالِي

نِتْفِه بًرْدانِه

نَاوِلْنِي شَالِي

وْدَخْلَكْ غَطِّينِي

بْجِسْمَكْ دَفِّينِي

بْبَرْدِ اللَّيالِي

يا صَبِي عَجِّلْ

هَالْقِصَّه كَمِّلْ

سَاعَه ضِلَّيْنا

نْفَرْفِكْ إِيدَيْنا

وْفَجْأَه غَمْرِتْنِي

وْجِسْمَا صَارْ دَافي

فَاقِتْ.. لَقْيِتْنِي

عَ الْأَرِضْ غافِي

**

شهر العسل

كتبتها بعمر 15 سنة

ما بْتِذِكْرِي بْشَهْرِ الْعَسَلْ

قِدَّيْشْ سِمَّعْتِكْ غَزَلْ

وْبِالْلَيْلْ مَعْمَلْنا مِشِي

وْما وَقَّفِ دْقِيقَه الْعَمَلْ

قِدَّيْشْ كِنْتِي تِضْحَكِي

وِكْفُوفْ دَيْكِي تْفَرْفِكِي

وْتِتْغَنِّجِي عْلَيِّي

وْحُوشِكْ أَنا بْدَيِّي

وْبَوّْسِكْ مِنْ دُونْ حَكِي

وْنِغْفَى سَوَا وِنْنامْ

عَ فْراشْ مِنْ أَحْلامْ

وْغَطِّتْ الْعَتْمِه

جِسْمِكِ وْجِسْمِي

وِتْوَقَّفُوا الإِيَّامْ

وْلِمِّنْ فِقِتْ بَكِّيرْ

شِفْتِكْ زْعِلْتِي كْتِيرْ

سْأَلْتِي بْدُونْ تِفْكِيرْ

إِنْ كانْ يَقْظَه الحُلْمْ

ليش انتهى هالفيلم؟

**

عذاب

كتبتها بعمر 15 سنة

قلبي مريض كتير صرلو زمان

وغيرك حدا.. ما حب

وين العطف؟ وين المحبّه والحنان؟

وحبّك دوا هالقلب

ع مملكة قلبي إنتْ كنت الملَك

وكنت الدني والروح

وكنت نجمه بالسما وصدري الفلَك

بس القلب مجروح

بُعدك سبب هالجرح يا قاسي

وقربك حلم عمري

عِذَّبِتني.. وحبي إلك ناسي

ورح موت من قهري

ليش قللي ليش أنتَ هيك

بتلعب بأعصابي

حرمه أنا.. من الصعب بإيديك

تلعب بهالطابه

حرمه أنا.. ومعوده ع القهر

فيي الأنوثه نور

بالعتم رح بتعيش طول العمر

معذّب ومقهور

**

عودي إلي

كتبتها بعمر 15 سنة

ـ1ـ

نزلت دموعي دم ع خدودي

ع رنّة وتر مجروح من عودي

وصرت اصرخ فاقد الاحساس

عودي إلي يا حلوتي عودي

ـ2ـ

عودي إلي تا تسكني بقلبي

وجودك سراج منوّر بدربي

وحبّك أنا رح صون مع حبّي

وكرمال عينك إحفظ عهودي

ـ3ـ

عودي إلي تا الحلم يتحقّق

وما عود إنطر بعد ع المفرق

غيابِك قهر.. والقلب عم يشهق

عودي بقى الإيام معدوده

ـ4ـ

عودي إلي تا نرجع نغنّي

غناني الهوى ونعيش بالجنه

وتا يغمرك هالقلب مستني

برجوعك بيتحقق وجودي

ـ5ـ

عودي إلي يا حلوتي مشتاق

ع جناح طير الحب والأشواق

باب الأمل لما بوجّي ضاق

صارت بواب الحب مسدوده

**

عيد الحب

عِيَّدِتْ بِالْغُرْبِه

وْشُو فِرِحْ قَلْبِي

حِسَّيْتْ إِنُّو الْعِيدْ

عَمْ يِفْرُشِ بْدَرْبِي

زْهُورْ وِزْغارِيدْ

وْحُبِّي الْلِي حارِسْنِي

جايِي يْلَبِّسْنِي

خاتِمِ وْيِحْبِسْنِي

وْطَقْمُو حِلُو وِجْدِيدْ

بِشْباطْ عِيدِ الْحُبّْ 

مَحْلاهْ لِمِّنْ طَلّْ

إِيدَيْنِ تِهْدِي الْقَلِبْ

باقاتْ وَرْدِ وْفُلّْ

وِبْغُرِبْتِي فَرْحانْ

وْناطِرِ وْسَهْرانْ

طَلِّةْ حَبيبي الْكانْ

بَيْرَقْ عَ راسِ التَّلّْ

عيدِ الْمَحَبِّه صارْ

مْشاوِيرْ فَوْقِ دْروبْ

وْعِشّاقْ حُبُّنْ نارْ

وِقْلوبْ عَمّْ بِتْدوبْ

ساعِدْني يا عيدِي

تا إِحْمِلْ بْإِيدِي

شي زَنْبَقَه جْدِيدِه

بِتْفَرِّحِ الْمَحْبوبْ

**

غاب الحبيب

كتبتها بعمر 15 سنة

ـ1ـ

لا تسألوني شو بني

لا تسألوا

غاب الحبيب صرلو سنه

وأكتر إلو

ـ2ـ

غاب وطوّل بغيابو

أغلى حبيب

غاب ودشّر أحبابو

متل الغريب

ـ3ـ

غاب ونسي هالقاسي

إنّي بحبّو

عذّبني وحبي ناسي

مْحَجَّرْ قلبو

ـ4ـ

ويا طير الطاير صوبو

دخلك قلّو

بدي إمشي ع دربو

شو ما صرلو

ـ5ـ

وبعدي بنطر تا يرجع

أغلى محبوب

وبقعد وحدي إتوجع

ع دروب دروب

ـ6ـ

قلب المحبوب محجّر

يا ربّ يحن

مسكينه، وعقلي معتّر

نتفه وبيجن

**

غني معي يا طيور

كتبتها بعمر 15 سنة

زَقْزِقِي وْغَنِّي مَعِي يَا طْيُورْ

السَّهْرَهْ بْأَوَّلْهَا

وِتْجَمَّعِي بْبَاقِةْ فَرَحْ يَا زْهُورْ

حَابِبْ تَا غَازِلْهَا

وْيَا هَالنُّجُومِ الْبِالسَّمَا 

قَلْبِي أَنَا مَسْرُورْ

شِعِّي بْعَتْمَاتِ الْحِمَى

لا تِبْخَلِي بِالنُّورْ

عَارِفْ أَنَا.. فَوْقِ الْخَلِيقَهْ سَاهْرَهْ

يَا حْبُوبْ مِنْ إِلْمَاسْ

صِيرِي عَقِدْ عَ صَدِرْهَا.. شُو نَاطْرَهْ

تَا يِحِسْدُوهَا النَّاسْ

سِتِّ الْحَلا عَمْ تِزْرَعِ الْمِشْوَارْ

عَ دْرُوبْ أَحْلامِي

كِرْمَالْهَا.. بِمْشِي عَ جَمْرِ النَّارْ

تَا قِلّْهَا نَامِي

وْلَنُّو دَقِيقَهْ بَسّْ

عَ زْنُودْ مِنْ أَزْهَارْ

وِتْغِيبْ عَنَّا الشَّمْسْ

وِنْهَارْ يِطْفِي نْهَارْ

**

قديش عمرك صار؟

شُو.. يَا مَشَالله مْقَصْرَه الْفُسْتَانْ

وْكِيفْ مَا مْشِيتِي بْتِغِمْزِي الشُّبَّانْ

جْهِلْتِي.. وْمَعِكْ عَمْ تِجْهَلِ الْجِيرِهْ

وْقِدَّيْشْ عُمْرِكْ صَارْ يَا زْغِيرِهْ؟

الْخِتْيَارْ صَفَّى بْحَيِّنَا جِهْلانْ

بِالسِّنْ بَعْدِكْ يَا بِنِتْ طِفْلِهْ

لا تِعْشَقِي غَيْرْ إِمِّكِ وْبَيِّكْ

وِبْعِيدْ مِيلادِكْ زَيّْنِي الْحَفْلِهْ

بْأَزْهَارْ عَمْ بِتْلَوِّنْ الْحَقْلِهْ

تَا تِفْرَحِي مَعْ إِخْتِكْ وْخَيِّكْ

وْبَسّْ تِكْبَرِي عَ السَّكْتْ.. عَ غَفْلِهْ

وَعْدِي إِلِكْ رَحْ يِنْتِهِي جَهْلِي

وْإِخْطِفِكْ.. تَا عَيِّشِكْ بِالْحُبْ

وْعِنْدِي قِفِلْ، يَا حُلْوِتِي، بِالْقَلْبْ

إِلاَّ إِلِكْ ما بْيِنْفِتِحْ قِفْلِي

**

متكبر

كتبتها بعمر 15 سنة

عَ شُو إِنِتْ يا شَبّْ مِتْكَبَّرْ

يا تْرابْ ماشِي بْهَالدِّنِي

يِمْكِنْ بِحالَكْ تِعْتِنِي

وِتْجِرّْ خَلْفَكْ كِمْ سِنِه 

وْتِكْبَرْ

وْمَهْما تْجِرِّ سْنينْ 

يا مْعَتَّرْ

رَحْ تُوقَع بْآخِرْ سِنِه

وْعَ الْعُمِرْ تِتْحَسَّرْ

وْقَلْبَكْ حَزِينْ

وشو حالك مفكّر

يا غْصُونْ تُوتِ وْتِينْ

تِيبَسِ وْتِتْكَسَّرْ

عَ كَعِبْ شِي شِجْرَه

وْيِتْشَلَّعْ الدَّفْتَرْ

وْتِتْطايَرِ الْغَبْرَه

وْعَ شو إِنِتْ يَا شَبّْ مِتْكَبَّرْ

**

هيدا حلم

كتبتها بعمر 15 سنة

بُوَّسِتْ خدِّكْ.. تا شِبِعْ خَدِّكْ

سْأَلْتِكْ بَعِدْ، يا حُلْوِتِي، بَدِّكْ

قِلْتِي: بَعِدْ

بَدِّي بَعِدْ

حِسَّيْتْ أَحْلَى مْنِ الْحَلا رَدِّكْ

وِرْكَضِتْ نَوِّسْ

قِنْدِيلِكِ وْبَوِّسْ

شْفافْ مِتْلِ النَّارْ

وْغايْبِه إِنْتِي

عَنِ الْوَعِي كِنْتِي

وْرَحْ خَبّْرِكْ شُو صارْ

صارْ فِي حَرْبَيْنْ

بَيْنْ هَالْجِسْمَيْنْ

جِسِمْ عَمْ بِيئِنّْ

وْجِسِمْ رَحْ بِيجِنّْ

وْإِيدِك بْإِيدِي

وِالْعَيْنْ تِغْمُزْ عَيْنْ

وْبَعْدِكْ عَمِ تْزِيدِي

وِتْبَوِّسِي الْخَدَيْنْ

وْتِعِمْلِي الْبَدِّكْ

ما قْدِرِتْ صِدِّكْ

هَيْدا حِلِمْ عَمْ إِحْلَمُو

مْنِ الصَّعِبْ يِتْحَقَّقْ

صَدِّكْ إِلِي.. ما بِفْهَمُو

بِالْقَهِرْ عَمْ إِغْرَقْ

بِشْتاقْ لِعْيُونِكْ

لَسَحْبِةْ جْفُونِكْ

مِشْتاقْ قِلِّكْ بَسّْ

حِنِّي عَ مَجْنُونِكْ

**

يا معلمي

كتبتها بعمر 15 سنة

عَارِفْ أَنَا.. كَانِتْ حَيَاتِي مِعْتِمِهْ

لَوْلَاكْ.. لَوْلَا نُورْ مِصْبَاحَكْ

مِشَّيْتِنِي بْدَرْبِ الْعِلِمْ يَا مْعَلّْمِي

وْخِزَّقِتْ تَوْبِ الْجَهِلْ بِرْيَاحَكْ

إِنْتَ الْمَلَكْ.. عَمْ تِحْكُمِ الْأَكْوَانْ

وِتْنَوِّرِ الْعَتْمَاتْ بِصْبَاحَكْ

وْمِتْلِ الْبَلَابِلْ فَوْقْ هَالْأَغْصَانْ

عَمْ تِكْتُبِ التَّارِيخْ بِجْنَاحَكْ

سْلَاحَكْ قَلَمْ عَمْ يِزْرَعِ التِّفْكِيرْ

وِحْمِيتْنَا مْنِ الْجَهِلْ بِسْلَاحَكْ

هَالْكَوْنْ كِلُّو مِتِلْ بَيْتِ زْغِيرْ

مَا بْيِنْفِتِحْ إِلَّا بْمِفْتَاحَكْ

**

ختيرت

كُلِّ الدِّنِي رَقْصِتْ حَوَالَيِّي

يَا بِنْتْ.. لَا تِتْغَنَّجِي عْلَيِّي

لِمِّنِ مْرَقْتِي.. شِفِتْ حَالِي طِرْتْ

لْأَبْعَدْ دِنِي.. لْجَنِّهْ سَمَاوِيِّهْ

كِنْتِي الْمَلَاكْ لْلِي بْجَمَالُو حْتَرْتْ

كِيفْ أَلله حَبَّبِكْ فِيِّي؟

يِمْكِنْ إِلُو ضُوَّيْتْ شَمْعَه.. نْدَرْتْ

وْصِلَّيْت حَتَّى يِلْتِفِتْ لِيِّي

وْتَا إِكْتُبِ الْأَشْعَارْ مَرّّهْ سْهِرْتْ

إِسْأَلْ لَحَالِي.. تْرِدّْ سَهْرِيِّهْ

هَالْبِنْتْ يَلْلِي بْإِسِمْهَا فِكَّرْتْ

وَضَوِّتْ بِعَتْمِ الْلَيْلْ.. مِينْ هِيِّي؟

هِيِّي لْلِي كِرْمَالَا أَنَا تْغِيَّرْتْ

وْطِلَّقْتْ إِيَّامِ الْعُزُوبِيِّهْ

مَا يَوْمْ قَالِتْلِي: إِنِتْْ خِتْيَرْتْ

وْكِنْتْ غَطِّي شَيْبِتِي بْدَيِّي

رْجِعِتْ شَبّْ.. بْحُبّْهَا تْزِنَّرْتْ

وْصِرْتْ إِغْرَقْ بِالْعُيُونِ السُّودْ

وْإِهْدِي الْعُيُونِ دْمُوعْ عِينَيِّي

**

خبّيني بعيونِكْ

دَخْلِكْ خَبِّينِي بِعْيُونِكْ

عُمْرِي مَا بْيِمْرُقْ مِنْ دُونِكْ

حَابِبْ قِلِّكْ إِنِّي بْحِبِّكْ

حَابِبْ إِمْشِي الْعُمْر بْدَرْبِكْ

وْصَفِّي، يَا حِلْوِه، مَجْنُونِكْ

قَيْس وْلَيْلَى صَارُوا حْكَايِه

وْعَبْلَى وْعَنْتَرْ يَا حِلْوايِه

وْعَنّي وْعَنِّكْ شُو مَا صَارْ

مْأَكَّدْ رَحْ تِحْكِي الْأَشْعَارْ

إِنُّو عَقْلِي بْحُبِّكْ طَارْ

وْصِفَّيْنَا قِصَّهْ مْخِبَّايِهْ

إِسْمِي وْإِسْمِكْ شِعْلِةْ نُورْ

بِالْحُبّ مْنِمْحِي الدَّيْجُورْ

مَسْكِينْ اللّي مَا بْيِنْحَبْ

تَعِي تَا نْكَمِّلْ هَالدَّرْبْ

وِالْقَلْبِ يْعَانِقْ هَالْقَلْبْ

وِنْفَرِّحْ فِينَا الْمَعْمُورْ

**

حبّيني تا إزغر

ـ1ـ

مهما عيش وإكبر

بدّي حبّك أكتر

عمري ما لو نهايه

حدِّك يا حلوايه

حبّيني تا إزغر

ـ2ـ

لما بشوفك حدّي

عم تغفي ع زندي

بتتلاشى أوهامي

وبتحلى أحلامي

وايامي بتتغيّر

ـ3ـ

إنتي الدنيي كلاّ

اللي خالقها ألله

كوني الفرحه كوني

تا حطّك بعيوني

حبّك مش رح إخسر

**

قلبي عم يشعل

قَلْبِي عَمْ يِشْعِلْ بِغْيَابِكْ

رِدِّي.. كِلّْ مَا دِقّ بْوَابِكْ

بَيْنِي وْبَيْنِكْ شُو مَا صَارْ

وَحْدِكْ فِيكِي تِطْفِي النَّارْ

أُوعَا تِقْسِي عَ أْحْبَابِكْ

ضِحْكِةْ سِنِّكْ نُورِ الْبَدِرْ

وِالْعَتْمِهْ بْقَلْبِي كْبِيرِهْ

وِجِّكْ شَمْسِي بْلَيْلِ الْعُمِرْ

ضَوِّي عْلَيِّي يَا زْغِيرِهْ

النَّجْمِ مْعَلَّقْ فَوْقِ عْتَابِكْ

عَ صَدْرِي لِمِّنْ بِتْنَامِي

بِغْمُرْ فِيكِي الدِّنْيِي كِلاّ

يَا رْفِيقِةْ دَرْبِي وْإِيَّامِي

عَنِّكْ مُشْ مُمْكِنْ إِتْخَلَّى

وَاقِفْ حَدِّكْ شُو مَا صَابِكْ

**

لمن قلبي قال بحبك

لِمِّنْ قَلْبِي قَالْ: بْحِبِِّكْ

يَا عْيُونِي.. خَبِّينِي بْقَلْبِكْ

صَارِتْ أَشْعَارِي أَزْهَارْ

تَا رِشّْ الْأَزْهَار بْدَرْبِكْ

شِفْتِكْ غَيْمِهْ وْحُبِّي نَارْ

لا تْطَفِّينِي شُو مَا صَارْ

بَدِّي حِبِّكْ لَيْلِ نْهَارْ

وْقَضِّي بَاقِي الْعُمْر بْقُرْبِكْ

خَلِّينِي إِفْرَحْ بِوْجُودِكْ

مِتْل النَّحْلِهْ شِمّ وْرُودِكْ

وْكِلّْ مَا تْضُمِّينِي بِزْنُودِكْ

بِتْضُمِّي شَرْقِي مَعْ غَرْبِكْ

**

صور

عَ طُولْ بِيرُوحُوا الْبَشَرْ

مِنْ دُونْ سَلام وْلا خَبَرْ

فِي نَاسْ تَرْكُوا هَالدِّنِي

وْصِيتُنْ عَ طُولِ بْيِنْذَكَرْ

وَأْطْفَالْ عُمْرِ الْوَلْدَنِهْ

كِبْرُوا.. وْشَابُوا مْنِ الْكِبَرْ

وْكُلْ مَا سِنِهْ تِبْلَعْ سِنِهْ

مِنْعِيشْ نِحْنَا بِالصُّوَرْ

مَهْمَا بْحَالَكْ تِعْتِنِي

بِتْرُوحْ مَا بْتِتْرُكْ أَثَرْ

شُو بْيِنْفَعَكْ تِمْرُقْ دَنِي

فَكِّرْ.. إِذأ عِنْدَكْ نَظَرْ

مَا عَاشْ بِالدِّنْيِي غَنِي

إِلاَّ وْمِتِلْ غَيْرُو انْقَبَرْ

فَوْقِ الْقَبِرْ كَمْ سَوْسَنِهْ

وَمَكْتُوْب إِسْمُو عَ الْحَجَرْ

**

لا تستحي

غْمِرْنِي وْشِدّْ وْفَرْفِكِ الْجِسْمِ الطَّرِي

لا تِسْتِحِي.. وِتْقُولْ لازِمْ تِنْطِرِي

أَلله خَلَقْنا بْهَالدِّنِي لْفَتْرِةْ زَمانْ

وْبُكْرَا، يا رُوحي، بِالْقَبِرْ رَحْ نِهْتِرِي

النِّسْوان!.. أُوعا تْزَعِّلْ النِّسْوانْ

لْ مِنْ دُونْهُنْ ما فِيكْ بَوْسِه تِشْتِرِي

لا تْخافْ مِنِّي.. مِنْ جِسِمْ بَرْدانْ

بَدُّو دَفَى.. قِلْلِي يا رُوحي بْتُؤْمِرِي

قَرِّبْ، تَعَا، شُو بَاك؟.. وِعْلَيْكِ الْأَمانْ

بِسْهَرْ مَعَكْ عَ قَدّْ ما تْقُولِ سْهَرِي

أَكْبَرْ خَطِيِّه نْعِيشْ بِالْحِرْمانْ

وْلِكْ لزِّقْ الْجِسْمَيْنْ بِأَقْوَى غِرِي

**