**
اشتقنا
ـ1ـ
موجات البحر بْتطوينا
وبِتشلّع كل مْفارقنا
بْتشلحنا دمعه ع المينا
جْنون النطره عم يحرقنا
يا بْلادي اللي بتحبّينا
لا تخلّي الغربه تخنقنا
إنتي فينا.. ضلّي فينا
وحياة الأرزات.. اشْتقنا
ـ2ـ
اشتقنا للراحوا وتركونا
وكانوا الدبكه والدلعونا
وشمس الضحكه العم بتزهّر
"فوق غصنك يا ليمونَه"
من جنوني أبيات بعمِّر
تا الغربه تخفّفلي جْنونا
مراية عمري عم بتكسِّر
فيها وجوه اللي حبّونا
ـ3ـ
اشتقنا والله.. اشتقنا عْليكي
يا ضيعه.. مدّي إيديكي
حنّي علينا.. ولا تنسينا
خبينا بزرقة عينيكي
كبرنا فيكي.. لا تجافينا
كلما بعدنا.. مْنرجع لَيْكي
الغربه مهما عتقوا سْنينا
ما منسى غبرة إجْريكي
ـ4ـ
الذكريات الحلوه بتمرُق
وما بفكّر إنّي عايشها
متل الزيبق.. لمّا بتدلُق
ضحكتها.. مين بيكمشها؟
عارف إيامي عم إحرُق
وعيوني.. القهر مْطمَّشها
وعارف شمسي مش رح تشرُق
وجودي بالغربه.. غاششها
**
مغترب
طلب أن يأتوه بحفنة من تراب لبنان، كي تعطّر ترابه في القبر:
جمّع تيابو.. ضبّها وزعلان
يترك وطن أرزات.. عم يبكي دما
شياطين عم بتهجّر الانسان
ولعت جهنم فوق هالقطعة سما
نص الشعب مزروع وين ما كان
واللي بقي مظلوم.. هيك بينسمى
حامل معو ترابات من لبنان
وكاتب وصيه ان مات بالهجران
تنزل معو بالقبر.. تا يشم الحمى
**
طفل البحر الملاك
وجدوا الطفل آلان كردي، ابن السنتين، جثة هامدة على الشاطىء، بعد أن بصقه البحر، ليرميه أمام أعيننا جميعاً، وقد أدار قفاه نحو جلادي البشرية، وكأنه يقول: هذه الأرض لا تعنيني، أنا مسكني الجنة.
ـ1ـ
درلُن إجْرَك.. إجْرَك فيهن
يا طفل البحر القديس
ع إجرامن رح هنّيهن
إجرامن أقوى من بليس
ـ2ـ
درلن إجْرَك.. لا تتأخّر
إنت ملاك.. وهني وحوش
صبّاطك من روسن أكبر
دَعْوِس بالصباط جيوش
ـ3ـ
ما منستاهل ضحكة سنّك
ما منستاهل نفرح فيك
افتكروا انو ارتاحوا منك
نحنا بالشعر منحييك
ـ4ـ
قللو لألله شو ما بدك
سمّي بالإسم الأشباح
قللو الدنيي كلاّ ضدك
لازم يمحيها ويرتاح
**
شلح الأرز
تغنّج يا شلح الأرز ببلادي
يا تاج أعلى جْبال منصانه
بلونك الأخضر فرحت الوادي
ورندح البلبل أجمل غناني
شلشك إذا بْيِمتدّ بزياده
بيرخص إلو الدّم الـ بِشرياني
بقلوبنا زرعوك أجدادي
منشان ينمى فكر إنساني
يوزّع ع كل الكون أمجادي
وبأرض سيدني يشعّ إيماني
بركع بصلّي العمر للفادي
يردّ الغضب عن أرض منهانه
يا أرز، فوق السطح عم نادي
وما همّ لولا بيتعب لساني:
شربل بعيني بيعبُد عباده
بيرق بيوحّد شعب لبناني
**
بيروت النا
يا غزيِّل يا بُو الهبا
يا بيروت الطَّيِّبه
من يوم اللي حبّيتك
قلبي رِجِعْلو الصّبا
ـ2ـ
من يوم اللي حبيتِكْ
خفت عليكي وخبّيتِك
والله لَبْنيلك بيتك
هونيك بأعلى الرُّبى
ـ3ـ
يا ميجانا ويا ميجانا ويا ميجانا
بيروت إلنا.. وغير حُبّا ما لنا
ـ4ـ
يا غزيّل قلّلا وقلّلا
بيروت حارسها ألله
لو زرت الدنيي كلاّ
غيْرِك منّي مْصاحِبا
**
مخدة حجر
تعليقي على صورة طفل صغير ينام على حجر ويفترش الارض
مخدة حجر.. نوم الهنا
تراب الأرض فرشة سنا
لا تخاف ألله بيحرسك
نكايه بـ أصحاب الغنى
بحيّك بـ دمعي ملبسك
ومتل إبني بقدّسك
تا تعيش بـ قلبي أنا
**
هيهات يا بو الزلف
ـ1ـ
هيهات يا بو الزلف
عيني يا مولَيّا
بيروت لا تستحي
البوسه "عصاميه"
فرحان فيكي.. فرحي
يا نجمه بحريّه
جوات قلبي اسبحي
ع شطوط عينيّا
ـ2ـ
عصام جِد السعي
كافي البعد كافي
يا كبير يا ألمعي
صرلك زمن غافي
يا جبيل هلّق تعي
وهاتي الدوا الشافي
وقدام مجدو اركعي
يا حروف مضويه
ـ3ـ
يا مجدليا اسمعي
إسمك على شفافي
ع طول انتي معي
بالقلب لا تخافي
شربان من مدمعي
كاسك على الصافي
بالهجر جفنك وعي
وراسك ع إيديّا
**
المزرعة
ـ1ـ
يا مزرعه البـ الشوف مين قدّك؟
تركنا الوطن وقلوبنا حدّك
تا نحرسك الله عطانا العون
بالدّم.. بالأرواح منمدِّك
ـ2ـ
بيت البعيني منبعو من هون
دماتنا البالقلب من جدِّك
صارت العيله أوسع من الكون
تا تنفِّذ الأكوان شو بدِّك
ـ3ـ
بصرتك ورود بألف لون ولون
وختيار جايي حامل سنينو
ما سألتو الأحلام عن دينو
تا يبوّس الوردات ع خدّك
**
**
وحش أزرق
ـ1ـ
مين قال لونك، يا بحر، أزرق
وفيك المراكب دوم عم تغرق؟
هـ الناس يللي بلعتُن أمواج
ومتل الغنم ماتوا فواج فواج
دمُّن برقبة مين.. يا أحمق؟
ـ2ـ
تركوا بلادُن.. خايفين الموتْ
شافوك حلم كبير.. فات الفَوْت
غدرت فيهُن.. غرّقت العيال
وبعدك بتاكل، يا وحش، أطفال
صرخوا: يا ألله.. وضاع فيك الصوت
ـ3ـ
روح غسّل موجك من الدّم
الريحه كريهه.. آخ لو بتشم
فوق ظلم الحرب إنت ظلمت
ما رحمت طفل زغير.. ما تألّمت
بحلف أنا.. بحلف ما عندك أم
**
همومي
ـ1ـ
ما عادْ فِيِّي إِتْحَمَّلْ..
ما عادْ فِيِّي إِتْحَمَّلْ..
هْمُومِي، أَكْبَرْ مِنْ رَاسِي
وِالْيَأْس مْعَبَّى كاسِي:
قهر وْحُزن وْمَآسِي
تَا صَفَّى رِيقِي حَنْظَلْ..
ـ2ـ
لَمَّا الْـ حِبَّيْتُنْ هَجْرُونِي
زَرْعُولِي الوِحْدِه بِعْيُونِي
وْضِجِرْ مِنِّي تْرَابْ الأَرْضْ
وْصّفَّى يْمَغِّطْ طُولِي.. عُرْضْ
وِيْقِللّي: فِي بْقَلْبَكْ بُغْضْ
بِـيدَمِّرْ هَـ الْمَسْكُونِه!
ـ3ـ
ضَايِع.. قَالِتْلِي الأَيَّامْ
بْدِنْيِي مَا فِيهَا أَحْلامْ
وْجُودَكْ ما بْيِنْعَدّ وْجُودْ
غَايِبْ.. مَعْ إِنَّكْ مَوْجُودْ
بْيِكْفِي بَقَى.. حِطّ حْدُودْ
لْمَهْزِلْتَكْ، تَا فِيكْ تْنَامْ!
ـ4ـ
غِنِّيَّاتِي وِالأَشْعَارْ
اللِّي كْتَبْتُنْ عَ وْرَاقْ الْغَارْ
زِعْلُوا مِنِّي وْقَالوا: عِيشْ..
لا تْرَوِّحْ عُمْرَكْ بَخْشِيشْ
رَكِّبْ جْوانِحْ مِنْ رِيشْ
وْطِيرْ وْعَلِّي فَوْق النَّارْ
ـ5ـ
.. وْهِنِّي لَوْ حَسُّوا شْوَيِّه
بِاللِّي عَمْ يِغْلِي فِيِّي
كَانُوا سَكْتُوا بِالْمَرَّه
وْغِرْقُوا بِقْنَانِي الْخَمْرَه
الْخَمْرَه.. فِي عِنْدَا قِدْرَه
تْوَعِّي الإِشْيَا الْمِنْسِيِّه.
**
سراقه
ـ1ـ
إلّفتْ شعر كتير
وسرقتي منّي الشعر
وصار الفرح تعتير
ويبّس أنيني الزهر
ـ2ـ
فكّرت حبّي كبير
تاري المحبه غدر
متل الحلم بتطير
وما بيبقى غير القهر
**
طفل الحجر
رأيت إبن سبع سنوات يحمل حجراً أثقل منه فكتبت:
ليش قللي ليش قسيت هالدني
وكرمال "لقمه" ركّعت أطفالها؟
تقل الحجر تقلك يا طفل الولدني
إنت البطل.. مش عيب إنك تنحني
بدنيي ما عادت تفتخر برجالها
**
زلزال انطاكيه
إنطاكيه.. شو صار تا إبنك بكي
والزلازل هدّمت هالمملكه
يا ممكلمة ألله العظيمه بهالدني
بزنودنا بأموالنا رح تنبني
ومهما بعدنا قلوبنا كلاّ لكي
ع شرط إنّك تصمدي وما تشتكي
ـ2ـ
سمعت صوتا بأرض سوريّا
تحت الدمار تصيح البنيّه
وقالت إذا بتخلصوني بصير
إخدمكن.. وع الصدر خي زغير
الإعلام جنّ وركّز عليّا
ومتلا كتار بأرض تركيّا
ـ3ـ
تأخّر الإنقاذ عن شعبي
والانسانيه تحولت كذبه
الآلاف ماتوا بكترة الإهمال
وعيال عم تبكي ع فقد عيال
ملايين صارت حالتُن صعبه
مش حقّ تقسى هيك يا ربي
**
إبن سركيس
كتبتها بعمر 15 سنة
ـ1ـ
تفضلي طلعي بسيّارتي
لا تنطري السرفيس
إسمي أنا يا جارتي
شربل إبن سركيس
ـ2ـ
ـ صدفه جميله كتير
جمعتنا سوا
ـ وانشالله بكرا نصير
من أهل الهوى
ـ3ـ
ـ لا تشرب من البير
وترميه بحجاره
ـ بشرب أنا التعتير
تا إبسط الجاره
ـ4ـ
ـ يمكن إنت شاعر!؟
ـ والشاعر الحسّاس
بالحب بيتاجر
بقلوب كل الناس
**
أجمل الحلوين
كتبتها بعمر 15 سنة
ـ1ـ
لا القمر متلك
ولا شمس صنين
قلبي بيندهلك
يا أجمل الحلوين
ـ2ـ
البدر تمنى يكون بدالك
حاجي عليه تشوفي حالك
يا ما انحسدوا من جمالك
وغاروا زهرات الياسمين
ـ3ـ
قلبي مغروم بدلالك
وعليي ما درتي بالك
عني لو بيغيب خيالك
رح فكّر إيامي سنين
ـ4ـ
الدنيي عم تضحك لوجودك
حنّي شويّه ع معبودك
نغمة حبي برنة عودك
من قلبي إخدت تلحين
**
أقوى غري
كتبتها بعمر 15 سنة
ـ1ـ
غمرني وشد وفرفك الجسم الطري
ولا تستحي من الجسم لو إنّو عري
ألله خلقنا بهالدني لفترة زمان
وبكرا، يا روحي، بالقبر رح نهتري
ـ2ـ
مش حق إنّو تزعّل النسوان
ومن دونهن ما فيك بوسه تشتري
لا تخاف مني.. ومن جسم بردان
بدّو دفى.. قللي يا روحي بتأمري
ـ2ـ
شباع منّي شباع وعليك الأمان
بسهر معك ع قد ما قلت اسهري
اشتاق التخت عم يصرخوا الجسمان
لزّقونا، عجّلوا، بأقوى غري
**
الضيعه بلبنان
كتبتها بعمر 15 سنة
ـ1ـ
الضيعه بلبنان
جنّة عدن صورتها
بنات وصبيان
دمّاتُن من ميّتها
ـ2ـ
ع تلال تلال منشوره
بسحبة موّال مسحوره
بفضاوة بال مستوره
شعلة إيمان عيلتها
ـ3ـ
بسياج الخير مسيّجه
وبتاج العز متوّجه
ع العين صبايا مروّجه
تا تعبّي المي بجرتها
ـ4ـ
السحر بجمالا مسحور
بتتغنّى بإسما الطيور
فاحت فيها ريحة زهور
والنحل يبوّس زهرتها
ـ5ـ
بتعطي الخير غمار غمار
من شمسا شعّت أنوار
غفيت ع نغمة أطيار
وما صحيت من غفوتها
ـ6ـ
بضيعتنا اللبنانيه
لمّا تطل الصبحيه
الشمس بتسبح بالميه
وبتنسى عنا بلوزتها
**
انت وانا
كتبتها بعمر 15 سنة
ـ1ـ
إنت وأنا يا حبيبي
كتبنا قصتنا الغريبه
تحت ع رمل السواقي
فوق ع التله القريبه
ـ2ـ
وهون شو بيحلالنا
نغفى سوى بعرزالنا
نخلق حلم ما بينوجد
إلا بسما آمالنا
ـ3ـ
وياما تمرجحنا سوا
ع حبال طيرها الهوا
ننسى الدني وآلامها
بالحب منلاقي الدوا
ـ4ـ
ونبني سوا هالمملكه
الأبعد من جنون الحكي
بسور السعاده مزنره
لا خوف فيها ولا بكي
**
بدّي إتجنّد
كتبتها بعمر 15 سنة
ـ1ـ
بدّي إتجنّد بدّي
عطوني تياب الجنديه
تا يصفّي إسمي جندي
بين جنود الحريّه
ـ2ـ
تركوني إحمل مدفع
ع حدودي اللبنانيه
وبإيدي الرايه إرفع
فيها الأرزه الدهريّه
وشعبك يا بلادي إجمع
شباب وختياريه
شعبي لازم يتطوّع
ع الجبهه الجنوبيه
ـ3ـ
خلّوني شنّ الغاره
ورجّع أرضي المسلوبه
والأيادي الغداره
تصير بخنجر مضروبه
وإرجع ع الضيعه زياره
مزيّن بالمجد دروبي
إسقي زهور الدواره
وإهدي الورد لمحبوبي
**
بعدني تلميذ
كتبتها بعمر 15 سنة
ـ1ـ
دقت طعم الحب
ولقيتو لذيذ
لكن طويله الدرب
بعدني تلميذ
ـ2ـ
بدل ما قضّي السهر
عم إدرس بكتبي
صرت خبّر هالقمر
مين السرق قلبي
بليلات مليانه سمر
عم تقترب مني
ويرندح لحالو الوتر:
يا حلوتي حنّي
ـ4ـ
تلميذ بعدي.. وللسمر
عم إنصب حبالي
ما هم إمشي ع الجمر
إيام وليالي
المهم كاسات الخمر
ما تبوح بالأسرار
ليش تا شفافن حمر
وزغار بعد زغار
**
بعمري انا حبيت
كتبتها بعمر 15 سنة
ـ1ـ
بعمري أنا حبّيت
مرتين وبس
مرّه بعمر الولدنه
في بنت متل السوسنه
استحليتها
وبدّك الدغري يا دني
حبّيتها
بلا عرس
ـ2ـ
كان عمرها سبعه
انشالله العمر كلّو
وعمري أنا تسعه
وهالقلب يا دلّو
عم زيدها بسنتين
مش أكتر
وصرت بدموع العين
عم إسكر
ـ3ـ
ومتل الكذب.. من دون وعي
مسكتها وشديت ع زنودا
وبستها بعنقا
وكتبت البوسات ع خدودا
حكاية الفرقه
وما قدرت اندهلا ارجعي
ـ4ـ
وخلصت الحفله
حفلة غرام
طفل مع طفله
متل الحمام
ومن بعد تسع سنين
نسيت هاك الحب
وتكاتروا الحلوين
واندق باب القلب
ـ5ـ
حبيت حلوه خدودها تفّاح
الظاهر ما حبّتني
راحت وتركتني
والقلب عم بيدق
وعم تهرب الافراح
رح قول كلمة حق:
بعدني لليوم
ما دقت طعم النوم
وكيف رح ارتاح
والباب ما بينشق
بقللو يا قلبي فتاح
ومضيّع المفتاح
**
حبيت السمرا
كتبتها بعمر 15 سنة
ـ1ـ
حبيت السمرا.. وحبيت
عمّرلا بـ قلبي بيت:
وقللا: يا عيني وروحي
إنتي بلسم لجروحي
لمّا من قبالي تروحي
خيالك بعيوني خبيت
ـ2ـ
السمرا ال ألله خالقها
وجوات قلبي معلّقها
كيف ما بدي إعشقها
وعمري كلو إلها عطيت
ـ3ـ
بستحلي تضحك مره
وتطفي بـ قلبي الجمره
عليي غضبانه السمرا
يا ريت بترضى يا ريت
ـ4ـ
إنتي النور ال بعيوني
بتمنى بقربي تكوني
وحبي ع طول تصوني
غيرك، والله، ما تمنيت
**
خفت عليكي
كتبتها بعمر 15 سنة
ـ1ـ
خفت عليكي كتير كتير
ووقفت عيوني نواطير
وكل ما شَعرك جن وطار
إتعمشق بالشَّعر وطير
ـ2ـ
وياما تغنّيت بإسمك
وقت هديتيني رسمك
وجرار الطيب اندلقوا
حتى يتعطّر جسمك
ـ3ـ
والورده الحد البركه
تكيت وصارت تبكي
غارت من ضحكة سنك
وغصّت ما قدرت تحكي
ـ4ـ
قلتيلي: لا تخاف الحب
رسمَك، إسمَك.. جوّا القلب
وقلتيلي: لا تخاف الناس
حدّك رح إمشي هالدرب
**
خيانة
كتبتها بعمر 15 سنة
ـ1ـ
ليش قولي ليش خنتيني؟
وبغدرك الناري كويتيني
حرقتي القلب
محيتي الدرب
وبجهنم الحمرا رميتيني
ـ2ـ
قلبي عطيتك.. شو عطيتيني؟
غير الغدر
الكلو مكر
صرخت ارحميني وما رحمتيني
عم حس ليل نهار
عم إحترق بالنار
ونهر الغضب نازل من جبيني
ـ3ـ
محيتي القصايد تا محيتيني
محيتي الغزل والحب
ومشيتي خلف الكذب
يا خاينه.. عمري سلبتيني
وغرقان بجروحي تركتيني
ومين غيرك رح يداويني؟
**
زهره
كتبتها بعمر 15 سنة
لا تغمزي الشبّان بالجيره
بعدك بريئه كتير وزغيره
بفزع، يا حلوه، توقعي بالحب
ومتل الكذب بتلفّك الحيره
درب الغرام بعيد.. أصعب درب
بيحرق قلوب الناس بالغيره
ووحدي أنا.. عم إزرعك بالقلب
زهره.. يا زهره قبال عينك شب
ناطر تا حتّى يشمّك.. كبيره
**
سمرا وزغيره
كتبتها بعمر 15 سنة
ـ1ـ
سمرا وزغيري
وكلاّ ظرافه
شفتا بالجيره
وبكل لطافه
عزمتا العزيمه
بنيّه سليمه
انشلحت ع سْريري
تغطّت بلحافي
ـ2ـ
قالت نعسانه
عيوني دبلانه
وحاسّه بـ حالي
نتفه بردانه
ناولني شالي
ودخلك غطيني
بجسمك دفّيني
ببرد الليالي
ـ3ـ
طلبت.. لا تردا
يا صبي عجّل
وانشلح حدّا
هالقصه كمّل
ساعه ضلينا
نفرفك إيدينا
وفجأه غمرتني
وجسما صار دافي
فاقت.. لقيتني
ع الأرض غافي
**
شهر العسل
كتبتها بعمر 15 سنة
ـ1ـ
ما بتذكري بشهر العسل
قديش سمّعتِك غزل
وبالليل معملنا مشي
وما وقّف دقيقه العمل
ـ2ـ
وقديش كنتي تضحكي
وكفوف ديكي تفرفكي
وتتغنجي عليي
وحوشك أنا بديي
وداعبك من دون حكي
ـ3ـ
ونغفى سوى وننام
ع فراش من أحلام
وغطّت العتمه
جسمك وجسمي
اتحدوا سوا الأجسام
ـ4ـ
والتم عانق تم
وكان يقظه الحلم
ولمن فقتْ بكير
شفتِك زعلتي كتير
سألتي بدون تفكير
ليش انتهى هالفيلم؟
**
طلاق
كتبتها بعمر 15 سنة
ـ1ـ
قلبي مريض كتير صرلو زمان
وغيرك حدا.. ما حب
وين العطف؟ وين المحبّه والحنان؟
وحبّك دوا هالقلب
ـ2ـ
ع مملكة قلبي إنتْ كنت الملَك
وكنت الدني والروح
وكنت نجمه بالسما وصدري الفلَك
بس القلب مجروح
ـ3ـ
بُعدك سبب هالجرح يا قاسي
وقربك حلم عمري
طلّقتني.. وحبي إلك ناسي
ورح موت من قهري
ـ4ـ
ليش قللي ليش أنتَ هيك
بتلعب بأعصابي
حرمه أنا.. من الصعب بإيديك
تلعب بهالطابه
ـ5ـ
حرمه أنا.. ومعوده ع القهر
فيي الأنوثه نور
بالعتم رح بتعيش طول العمر
معذّب ومقهور
**
عودي إلي
كتبتها بعمر 15 سنة
ـ1ـ
نزلت دموعي دم ع خدودي
ع رنّة وتر مجروح من عودي
وصرت اصرخ فاقد الاحساس
عودي إلي يا حلوتي عودي
ـ2ـ
عودي إلي تا تسكني بقلبي
وجودك سراج منوّر بدربي
وحبّك أنا رح صون مع حبّي
وكرمال عينك إحفظ عهودي
ـ3ـ
عودي إلي تا الحلم يتحقّق
وما عود إنطر بعد ع المفرق
غيابِك قهر.. والقلب عم يشهق
عودي بقى الإيام معدوده
ـ4ـ
عودي إلي تا نرجع نغنّي
غناني الهوى ونعيش بالجنه
وتا يغمرك هالقلب مستني
برجوعك بيتحقق وجودي
ـ5ـ
عودي إلي يا حلوتي مشتاق
ع جناح طير الحب والأشواق
باب الأمل لما بوجّي ضاق
صارت بواب الحب مسدوده
**
عيد الفصح
كتبتها بعمر 15 سنة
ـ1ـ
بالعيد يا شعبي
شو فرح قلبي
وحسّيت إنّو العيد
عم يفرش بدربي
زهور وزغاريد
وحسّيت يا ربي
إنّك بقربي
ـ2ـ
عيد الفصح محلاه لمّا طل
حامل بإيدو تاج من غفران
تاج السعاده والهنا للكل
تاج المحبّه لكل بني الإنسان
ـ3ـ
انشالله، يا شعبي، تضل
سيّد.. على طول المدى
دعوتي.. من القلب رح بتطل
وعند رب الكون في إلها صدى
**
غاب الحبيب
كتبتها بعمر 15 سنة
ـ1ـ
لا تسألوني شو بني
لا تسألوا
غاب الحبيب صرلو سنه
وأكتر إلو
ـ2ـ
غاب وطوّل بغيابو
أغلى حبيب
غاب ودشّر أحبابو
متل الغريب
ـ3ـ
غاب ونسي هالقاسي
إنّي بحبّو
عذّبني وحبي ناسي
ما قْسى قلبو
ـ4ـ
ويا طير الطاير صوبو
دخلك قلّو
بدي إمشي ع دربو
شو ما صرلو
ـ5ـ
وبعدي بنطر تا يرجع
أغلى محبوب
وبقعد وحدي إتوجع
ع دروب دروب
ـ6ـ
قلب المحبوب محجّر
يا ربّ يحن
مسكينه، وعقلي معتّر
نتفه وبيجن
**
غني معي يا طيور
كتبتها بعمر 15 سنة
ـ1ـ
زقزقي وغنّي معي يا طيور
السهره بأولها
وتجمّعي بباقة فرح يا زهور
حابب تا غازلها
ـ2ـ
ويا هالنجوم البالسما
قلبي أنا مسرور
شعّي بعتمات الحمى
لا تبخلي بالنور
ـ3ـ
عارف أنا.. فوق الخليقه ساهره
يا حبوب من إلماس..
كوني عقد ع صدرها.. شو ناطره
تا يحسدوها الناس
ـ4ـ
ست الحلا عم تزرع المشوار
ع دروب أحلامي
كرمالها.. بمشي ع جمر النار
تا قلّها نامي
ولنو دقيقه بس
ع زنود من أزهار
وتغيب عنا الشمس
ونهار يطفي نهار
**
قديش عمرك صار
كتبتها بعمر 15 سنة
ـ1ـ
شو.. يا مشالله مقصره الفستان
ومن دون خجل عم تغمزي الشبّان
جهلتي.. ومعك عم تجهل الجيره
وقديش عمرك صار يا زغيره؟
ـ تنعشر سنه.. بِـ ستعش نيسان!
ـ2ـ
بالسن إنتي يا بنت طفله
لا تعشقي غير إمّك وبيّك
وبعيد ميلادك زيّني الحفله
تا تفرَحي مع إختك وخيّك
وبس تكبري ع السكت.. ع غفله
محسوبك بيهجم على حيّك
وبيخطفك.. تا يعيشّك بالحب
وعندي قفل، يا حلوتي، بالقلب
ورح تفتحي، بضحكة هنا، قفلي
**
متكبر
كتبتها بعمر 15 سنة
ع شو إنتْ يا شب متكبّر
يا تراب ماشي بهالدني
يمكن بحالك تعتني
وتجر خلفك كم سنه وتكبر
ومهما تجر سنين يا معتّر
رح توقع بآخر سنه
ورح تنتهي.. وشو حالك مفكّر
**
هيك صار
كتبتها بعمر 15 سنة
ـ1ـ
بوّست خدّك.. تا شبع خدّك
سألتك بعد، يا حلوتي، بدّك
قلتي: بعد
بدّي بعد
حسّيت أحلى من الحلا ردّك
ـ2ـ
وركضت نوّس
قنديلك وبوّس
شفاف متل النار
وغايبه إنتي
عن الوعي كنتي
ورح خبّرك شو صار
ـ3ـ
صار في حربين
بين هالجسمين
جسم عم بيئن
وجسم رح بيجن
وإيدك بإيدي
والعين تغمز عين
وبعدك عم تزيدي
وتبوّسي الخدين
وتعملي البدّك
ما قدرت صدّك
**
يا معلمي
كتبتها بعمر 15 سنة
ـ1ـ
عارف أنا.. كانت حياتي مِعْتِمه
لولاك.. لولا نور مصباحك
مشيتني بدرب العلم يا معلمي
وخزّقت توب الجهل برياحك
ـ2ـ
إنت الملك.. عم تحكم الأكوان
وتنوّر العتمات بصباحك
ومتل البلابل فوق هالأغصان
عم تكتب التاريخ بجناحك
ـ3ـ
سلاحك قلم عم يزرع التفكير
وحميتنا من الجهل بسلاحك
الكون كلو متل بيت زغير
ما بينفتح إلا بمفتاحك
**
يا بنت
ـ1ـ
كل الدني رقصت حواليي
يا بنت.. لا تتغنجي عليي
لمّن مرقتي.. شفت حالي طرت
لأبعد سما.. لجنه سماويه
ـ2ـ
وكنتي الملاك اللي بجمالو احترت
كيف ألله حبّبِك فيي؟
يمكن إلو ضويت شمعه.. ندرت
ويمكن ركعت وحامل شبيّه
ـ3ـ
وتا إكتب الأشعار مرّه سهرت
إسأل لَحالي.. ترد سهريه
هالبنت يللي بإسمها فكّرت
وضوّت بعتم الليل.. مين هيي؟
ـ4ـ
هيي اللي كرمالا أنا تغيّرت
وطلّقت إيّام العزوبيّه
ما يوم قالتلي: إنتْ ختيرتْ
وكنت غطي الشيب بـ ديّي
ـ5ـ
رجعت شب.. بحبّها تزنّرت
وصرت إغرق بالعيون السود
وإهدي العيون دموع عينيي
**
خبّيني بعيونِكْ
ـ1ـ
دخلِك خبّيني بعيونِكْ
عمري ما بيمرق من دونِكْ
حابب قلّك إنّي بحبِّك
حابب إمشي العمر بدربِكْ
وصفّي، يا حلوه، مجنونِكْ
ـ2ـ
قيس وليلى صاروا حكايه
وعبلى وعنتر أحلى رْوايه
وعّنا رح تحكي الأشعار
إنّو عقلي بحبّك طار
وصفّينا قصّه مخبّايه
ـ3ـ
شربل إسمي وإسمِك نور
بالحب منمحي الديجور
يلّلا تا نكمّل هالدرب
والقلب يعانق هالقلب
ونفرّح فينا المعمور
**
بدي حبّك أكتر
ـ1ـ
مهما عيش وإكبر
بدّي حبّك أكتر
عمري ما لو نهايه
حدِّك يا حلوايه
حبّيني تا إزغر
ـ2ـ
كل ما بشوفك حدّي
عم تغفي ع زندي
بتتلاشى أوهامي
وبتحلى أحلامي
وايامي بتتغيّر
ـ3ـ
إنتي الدنيي كلاّ
اللي خالقها ألله
كوني الفرحه كوني
تا حطّك بعيوني
حبّك مش رح إخسر
**
قلبي عم يشعل
ـ1ـ
قلبي عم يشعل بغيابك
ردّي.. كل ما دقّ بوابك
بيني وبينك شو ما صار
وحدك فيكي تطفي النار
أوعا تقسي ع أحبابك
ـ2ـ
ضحكة سنّك نور البدر
والعتمه بقلبي كبيره
وجّك نوري بليل العمر
ضوّي عليي يا زغيره
البدر معلّق فوق عتابك
ـ3ـ
ع صدري لمّن بتنامي
بغمر فيكي الدنيي كلاّ
يا رفيقة دربي وإيامي
عنك مش ممكن إتخلى
واقف حدّك شو ما صابك
**
لمن قلبي قال بحبك
ـ1ـ
لمّن قلبي قال: بحبِّك
يا عيوني.. خبّيني بقلبِك
صارت أشعاري أزهار
تا رشّ الأزهار بدربِك
ـ2ـ
شفتك غيمه وحبي نار
لا تطفيني شو ما صار
بدي حبّك ليل نهار
وقضّي باقي العمر بقربك
ـ3ـ
خليني إفرح بوجودك
متل النحله شم ورودك
وكل ما تضمّيني بزنودك
بتضمّي شرقي مع غربك
**
