ديوان أغنية حب الى أستراليا بصوت الشاعر شربل بعيني
**
أستراليا
ـ1ـ
شو بْخَبّرِكْ عَنْ أَرْضْ أَبْعَدْ مِنْ خَيَال
عَنْ شَعْبْ عِنْدُو لِلْبَشَرْ قِيمِه
حِبَّيْتها.. وِالْهَجْر أَتْقَلْ مِنِ جْبَال
بْصَخْرِةْ هُمُومِي زَرْعِت الآمَال
وْسِهْرِتْ لَيَالِي تْزِيدْ تَعْلِيمِي
ـ2ـ
شُو بْخَبّرِكْ عَنْ حُبّهَا وْإِحْسَانْهَا
تْجَمَّعْ بِـ قَلْبَا نَاسْ فِرْحَانِينْ
اخْتِزْلِي الْبَشَرْ.. بِتْكَوّنِي إِنْسَانْهَا
اخْتِزْلِي الإِيمَانْ.. بْتِحصْدِي إِيمَانْهَا
اخْتِزْلِي الدِّنِي.. تَا تَعِرْفِيهَا مِينْ؟
**
الشطّ الجنّه
يعتبر سرفيس بارادايز أطول وأجمل شاطىء في العالـم.
ـ1ـ
إِسْمَكْ جَنِّه.. وْشَطَّكْ جَنِّه
وْشَمْسَكْ عَمْ بِتْغَازِلْ شَمْسْ
وْرَمْلاتَكْ.. فِي إِلْهَا رَنِّه
عَ صَوْتَا.. شُو بْيِحْلَى الْهَمْسْ
تِبْرِ مْصَفَّى.. أَصْفَرْ .. بُنِّي
الْحِلْوِينْ بْعِبُّو بْتِنْدَسّ
يَا (سرفِسْ) رَح بِتْجَنِّنِي
حْبِسْنِي فِيكْ العمرْ.. وْبَسّ
مَوْجَكْ (آخْ) بْتِطْلَعْ مِنِّي
بْتِسْرُقْ نَفْسْ.. بْتِحْيِي نَفْسْ
ـ2ـ
زِرْتَكْ مَعْ (عبلَى) مِشْوَارْ
مَا حَبِّتْ تِرْجَعْ عَ الْبَيْتْ!
انْغَرْمِتْ فِيكْ!.. وْقَلْبِي انْهَارْ
وْمَا عَادَتْ تِنْفَعْ (يَا رَيْتْ)
غِرْت كْتِيرْ.. وْلَمَّا بْغَارْ
دَمِّي بْيُولَعْ مِتْلِ الزَّيْتْ!
يَوْمِيِّه عِنْدَكْ زُوَّارْ
لا تْقِلّي وَحْدَا اسْتِحْلَيْتْ؟!
تْرِكْلِي (عبلَى).. طَفِّي النَّارْ
قَبْلَكْ.. هَـ الْحِلْوِه.. حِبَّيْتْ
**
برزبن
عاصمة مقاطعة كوينزلاند المشهورة بشواطئها السياحية الساحرة.
بِنْتِ الْبَحْرْ الْـ مَا لُو حْدُودْ
وْإِخْتِ الشَّمْسِ الْـ مَا بِتْنَامْ
بْرِزْبِنْ.. هَـ الْكنْزْ الْمَرْصُودْ
الْـ عَمْ تِحْلَم فِيه الأَحْلاَمْ
زِرْتَا مَرَّه.. قِلْتْ : بْعُودْ
وِبْكَحِّلْ عَيْنِ الأَيَّامْ:
بِمْرُوجْ تْعَرْبِشْ عَ جْرُودْ
صلَّى فِيها الطَّير وْصَامْ
بِالْبَحْرْ.. الْـ مِنُّو مَوْلُودْ
الرَّمْل الْـ عَمْ يِنْصُبْ خْيَامْ
تَا يْبَودِرْ أَنْعَم خْدُودْ
وِيْدَهِّبْ أَحْلَى الأَجْسَامْ
يَا بْرِزْبِنْ.. شَطِّكْ مَقْصُودْ
عم بيمثِّلْ فَوقُو الْجُودْ
وْنِحْنَا فِيلْم مْنِ الأَفْلاَمْ
**
أدليد
عاصمة ولاية جنوب أستراليا، مشهورة ببساتين الكرمة والليمون والزيتون.
ـ1ـ
جْيُوش مْنِ الْكَرْمِه بْتِحْكِيلَكْ
عَنْ هَـ الْمَدينِه المِنْصَانِه
والزَّيْتُونَاتْ بْتُومِيلَكْ
بِغْصُونَا الْـ تِكْيِتْ حِمْلانِه
واللَّيْمُونَاتْ.. مْقَابِيلَكْ
بِتْغَنِّي لِلرِّيح غْنَانِي
غَطِّي عِينَيْكْ بْمِنْدِيلَكْ
أَدَلَيد الْجَنِّه الْخَضْرَا
رَح بِتْوَزِّعْلَكْ حِلْوَانِه
ـ2ـ
جْنُوبِيِّه.. وِجْبِينَا صَحْرَا
وِزْنُودَا جْنَيْنَاتِ الْخَيْرْ
وِنْهُودَا.. جْبَال بْتِتْعَرَّى
بِالشَّمْس.. وْبِتْغَازِلْ طَيْرْ
وْشَعْرَا حْرَاشْ.. الصَّبْغَه غَبْرَه
وْعَ جْرَيْهَا فِي عَجْقِة سَيْرْ
أَدَلَيْدْ.. مْرُوجَا زَهْرَه
وِشْوَارِعْهَا دَيْر مْضَوِّي
وِقْنَادِيلا شْمُوع الدَّيْرْ
**
ديدجيريدو
آلة موسيقيّة ابتكرها الشّعب الأبوردجيني، شعب أستراليا الأصلي.
ـ1ـ
شُو هَـ الصَّوْت الْـ عَمْ يِسْحِرْني
الْهَيْصَه وِالْفَرْحَه بْتِرْديدو؟
والشَّعْب الأَصْلِي الْـ غَامِرْني
بْحُبّو.. عَمْ بِيرَقِّصْ عِيدو
الْـ بَدُّو بالنَّغْمِه يْصَبِّرْنِي
يْسَمِّعْنِي (الدِّيدْجِيرِيدُو)
ـ2ـ
الأَبُورِدْجِيني.. صَيَّرْهَا
قَصْبِه.. بِتْرَكِّعْ أَنْفَاسْ
دَوَّرْهَا مْنِيحْ.. وْعَطَّرْهَا
أَطْوَلْ مِنّو.. لَوْ تِنْقَاسْ!
بْيِنْفُخْ فِيها.. بِـ طَيَّرْهَا
نَغْمِه.. بْتِسْحُرْ كِلّ النَّاسْ
ـ3ـ
كْلِيكْ ـ سْتِيكْسْ: الْغَبْرَه طارِتْ
مِنْ تَحْتِ الإِجْرَيْنْ السّمرْ
السّاحَه جَنِّتْ.. شِعْلِتْ.. صَارْتْ
تِهْدِيِنَا مْنِ الْغَبْرَه غُمْرْ
لِمِّنْ دَارُوا.. السَّهرَه دَارِتْ
وْصَفَّى فِينَا يْدُورْ الْعُمرْ
**
موزه كبيره
مركز سياحي في منطقة غوفس هاربر المشهورة بزراعة الموز.
ـ1ـ
كانِتْ (عبلَى) عم بِتْسُوقْ
السيّارَه.. وْفِكْرِي مَعْجُوقْ
بِحْقُولْ الْمَوزْ الْمُخْضَرَّه
الْـ عَمْ بِتْقِلّي: تْفَضَّلْ دُوقْ
إنْتَ جُوَّا.. وْنِحْنَا بَرَّا
زَايِرْنَا فِي عِنْدُو حْقُوقْ
وِ(الْمَوزِه) الْحِلْوِه الْمُصْفَرَّه
وِقْفِتْ بِالْقَدِّ الْمَمْشُوقْ
عَ بِبّو عْيُونِي تِتْمَرَّى
تِقْلَعْلِي تْيَابَا.. تِتْعَرَّى
وْ(عبلَى) عَم بِتقلّي: رُوقْ!
ـ2ـ
(كُوفِسْ هارْبَر).. مَا مْنِنْسَاهَا
طْفِينا فيها تْلاتْ شْمُوعْ
عيَّدْنا الْعِيد.. كْتَبْنَاهَا
غِنِّيِّه.. والْحِبْر دْمُوعْ
وْأَحْلَى تْصَاويرْ رَسَمْنَاهَا
عَ رَمْلاَ.. الْـ بَعْدُو دَلُّوعْ
عَرْبَشْ عَ (عبلَى).. خَبَّاهَا
مِنْ خَصْرَا وْنَازِلْ غَطَّاهَا
وْكَانْ بْفِكْرُو.. يْشِدّ طْلُوعْ
**
بورت ماكواري
بورت ماكواري.. مدينة ساحلية جميلة، تعتبر من أجمل المدن الأسترالية الريفيّة.
بُورْتْ مَاكْوَارِي.. بُورْتْ مَاكْوَارِي
خايِفْ تِفْشِيلِي أَسْرَارِي
كمْ بَوْسِه بِسْتَا عَ الطَّايِرْ!
كِيفْ قِدَّمْتِلاَّ أَزْهَارِي!
الْبَحر مْزَنَّرْهَا عَ الدَّايِرْ
وْقَلْبِي غِرْقَانْ.. وْمُشْ دَارِي
حاسِسْ.. بَحْرَا مِنِّي غَايِرْ
حَاسِسْ.. شَطَّا لَـمّ خْبَارِي
وْرَمْلاَ.. مِتْل الْجَمْرَه.. صَايِرْ
وْمَوْجَا.. عَمْ يِهْرُبْ مِنْ نَارِي
وَاقِعْ فِيهَا! .. وْدَمِّي فَايِرْ
لَيْشْ عَم يِجْرِفْنِي تِيَّارِي؟
بُورْتْ مَاكْوَارِي.. مْدِينِه.. وْحَايِرْ
كيف حِبَّيْتَا؟! .. كِيفْ حَبِّتْنِي؟
وْكِيفْ سَرْقِتْ مِنِّي أشْعَارِي؟
**
بونداي.. الحريّه
شاطىء سياحي مشهور، يقع في وسط مدينة سيدني.
ـ 1 ـ
غِلِّي فِيِّي..
ناطِرْ حَتّى تْغِلِّي فِيِّي
وْتِشْهَقْ، مِنْ نُورِك، عِينَيِّي
وْ (بُونْدَايْ) الْـ عَمَّدْلِكْ جِسْمِكْ
يِكْسُرْ جِرْن الْمَعْمُودِيِّه
وْعَ ذَوْقُو يْنَقِّيلِكْ إِسْمِكْ
وِيْقَدِّمْلِكْ أَحْلَى هْدِيِّه:
شَطّ وْشَمْسَاتْ وْشَمْسِيِّه!
ـ2ـ
غِلِّي فِيِّي..
اشْتَاقُوا لِخْدُودِكْ إِيدَيِّي
لْجَدُّولات الشَّعْر الْجَعْدِي
الْـ نِشْفِتْ عَ شْوَاطِيهَا الْمَيِّي
حُورِيِّه!!.. وَرَحْ تِبْقِي عِنْدِي
حْكَايَات الرَّمْل الْمِمْحِيِّه
قَصْرِكْ.. وَاقِفْ حَدُّو جُنْدِي
لابِسْ بِرْنَيْطَه مِخْفِيِّه
وْزنْدِكْ عَمّ بِيرَقِّصْ زنْدِي
وْ (بُونْدَايْ) يْرَنْدِحْ غِنِيِّه
ـ3ـ
غِلِّي فِيِّي..
رِدِّيلِي سْنِينِي الْمِنْسِيِّه
طْيُور الْبَحْر الْـ طَارُوا وْعَلُّوا
حِمْلُونَا قَشِّةْ خَبْرِيِّه
وِالنَّاس اللّي صَارُوا يْدِلُّوا
عْلَيْنَا.. لَمَّا تْكِيتِي عْلَيِّي
ما شِفْتِيهُنْ لِمِّنْ طَلُّوا
صْدُورُنْ عَ فَرْشِه رَمْلِيِّه؟!
ما شِفْتِيهُنْ لِمِّنْ غَلُّوا
شْفَافُنْ بِشْفَافُنْ صِبْحِيِّه؟!
لا تْخَافِيهُنْ.. (بُونْدَايْ) كِلُّو:
حُبّ وْحَلْمَات وْحُرِيِّه!
**
تازمنيا
جزيرة أسترالية، هي مقاطعة بحدّ ذاتها، مشهورة بزراعة التفّاح، وبمناخها الرائع، وبمناظرها الخلابة التي تشبه إلى حدّ بعيد مناظر وطني لبنان.
ـ1ـ
خَلِّيكِي الصَّخْرَه الْمَنْصُوبِه
مْزَارْ.. وْعَمْ إِحْرِقْلُو شْمُوعْ
وْرَتِلُّو آيِه مَكْتُوبِه
عَ صَفْحِةْ عُمْرِي بِدْمُوعْ
يِمْكِنْ هَـ الدِّنْيِي مَقْلُوبِه
يَا بَحْرِكْ بِيشِدّ طْلُوعْ!
وْصِلْتِلِّكْ.. تِعْبَانِه دْرُوبِي
جُوعَان.. وْقِرْفَان الْجُوعْ
يا (تازمَنْيَا) عَبِّي جْيُوبِي
تُفَّاح مْحَمَّرْ خَرُّوبِي
عَ الْـ مِتْلِي.. قَطْفُو مَمْنُوعْ!
ـ2ـ
خَلِّينِي بْمَيَّاتِكْ إِسْبَحْ
غِرْقِتْ بِالرَّمْلاَت جْرَيِّي
الْمَوْج الْباسِيفِيكي فَتَّحْ
طِلْعِتْ عِينَيْه بْعِينَيِّي
يا (تَازْمَنْيَا).. الْـ خِلْقِتْ مَطْرَحْ
مَا تْلاَقَى الصَّيْف بْشَتْوِيِّه
لا تْقُولِي: خَالِقْنَا زَيَّحْ
قُرْبَانُو.. لا تْقُولِي سَبَّحْ!
لازِمْ فِيكِي يْكُون الْمَذْبَحْ
وِيْكُونْ التِّقْدِيس عْلَيِّي!
**
مالبورن..
عاصمة ولاية فيكتوريا، مشهورة بنهر (يارا) الذي يقسمها إلى قسمين، وبشاطىء (سان كيلدا) السياحي، وباخضرارها الدائم.
ـ1ـ
جَنِّه.. وْمَا أَحْلَى بْسَاتِينَا
تْفَنَّنْ خَالِقْهَا بْتِكْوِينَا
(يارا) بْيِهْدِيهَا مَيَّاتُو
وْهِيِّي الْخَيْرَات بْتِهْدِينَا
وْ (سان كِيلدَا) الْـ دَهَّبْ رَمْلاَتُو
كِرْمَالْ عْيُون مْحِبِّينَا
غَسَّلْ إِجْرَيْهَا بْمَوْجَاتُو
وْنَخّ يْبَوِّسْ صَخْر جْبِينَا
ـ2ـ
(مَلْبُورْن).. النِّجْمِه الْمَسْحُورَه
بْطَلِّتْهَا الْمُضْوِيِّه بِسْكَرْ
شَوْقِي بْيِدْبَحْنِي تَا زُورَا
وْإِتْكَحَّلْ بِاللَّوْن الأَخْضَرْ
صُورَه.. وْشُو حِلْوِه هَـ الصُّورَه
مَحْفُورَه عَ زْنُود الْمَرْمَرْ
انْزَرْعِتْ بِشْوَارِعْهَا قْصُورَا
بْتِكْتَرْ.. كِل مَا الْجَنِّه تِكْبَرْ
**
سهره.. بشارع لايغون
شارع سياحي مشهور في مدينة ملبورن، تكثر فيه المطاعم السياحية الراقية، التي تستقبل زبائنها طوال الليل رغم البرودة الشديدة.
ـ1ـ
بْحِبِّكْ.. قِلْتَا لْحلْوِه سَمْرَا
مِنْ عُمْر الْغَارْدِينْيَا عُمْرَا
مَلْبُورْنِيِّه.. الْوِجّ مْزَهَّرْ
وِخْدُودَا الْوَرْدَات الْحَمْرَا
شَارِعْ (لايْغُونْ) فِيهَا تْنَوَّرْ
بِالضِّحْكِه.. الْـ رِمْيِتْنِي بْجَمْرَه
سَاعِدْنِي يَا (لايْغُونْ) إِسْهَرْ
مَعْ حلْوِه.. خَلِّتْنِي إِسْكَرْ
مِنْ دُونْ لا كَاسْ وْلا خَمْرَه
ـ2ـ
زِعْلُوا زُوَّارَكْ.. شَافُونِي
عَمّ وَدِّعْهَا بْدَمْع عْيُونِي
الْبِيتْزَا برْدِتْ.. مَا دِقْنَاهَا
وْطَالَبْنِي الْمَطْعَمْ بِدْيُونِي
لَحْظَات الْحُبّ الْـ عِشْنَاهَا
بْتِشْهَدْلا لَحْظَات جْنُونِي
وْأَحْلَى مْشَاوِيرْ مْشِينَاهَا
عَ رْصِيفَكْ.. يَا رْفِيق الْـ حَبُّوا
يَا مْسَيْهرْ كِلّ الْمَسْكُونِه
ـ3ـ
مْخَبَّى فِيكْ حْكَايِةْ حُبِّي
الْـ عَمْ إِحْكِيهَا وْفِكْرِي شَارِدْ
جِيتَكْ مِنْ (سِيدْنِي).. وْعَ دَرْبِي
وقف خْيَالا مِتْل الْمَارِدْ!
حِبَّيْتَا؟.. لا تِسْأَلْ قَلْبِي..
حُبَّا، مِنْ سَهْرَاتَكْ، شَاحِدْ
قَطْفِتْنِي مِنْ بَرْد الْغُرْبِه
وْجَبْرِتْنِي إِطْبَعْ عَ شْفَافِي:
يا (لايْغُونْ) لَيْلَكْ مُشْ بَارِدْ
**
درومانا
بلدة ساحلية سياحية تقع في مقاطعة (فيكتوريا)، أشهر ما فيها (مقعد أرثر).
ـ1ـ
دْرُومَانَا.. جْنَيْنَات كْتِيرِه
قَاعِدْ (أَرْثَر) يِتْأَمَّلْهَا
بْيُوتَا شْمُوعْ بْضَيْعَه كْبِيرِه
خَرْطَشْهَا الْبَحْر وْجَمَّلْهَا
عَلَّقْلا عَ الصَّدْر دْخِيرِه
تْقِيلِه.. مَا قِدْرِتْ تِحْمِلْهَا
قَسْمِتْهَا.. عَطْيِتْ لِلْجِيرِه
الْمَوْجَاتْ الْـ تَرْكِتْ مَعْمَلْهَا
وْخَبِّتْ مِنُّنْ مَوْجِه زْغِيرِه
نَاسِي الْمَعْمَل تَا يْكَمِّلْهَا!
ـ2ـ
دْرُومَانَا.. هَـ السِّحْرِ الْـمَاشِي
الْـ وِقْفِتْ (فيكْتُورْيَا) تْلاَقِيهْ
غَزْلِتْلُو بْمغْزَلْهَا قْمَاشِه
خَضْرَا.. وْكَانْ قَصْدَا تْدَفِّيهْ
شَافَا قْبَالُو متل غْبَاشِه
تْفَشْكَلْ فِيهَا.. وَقْعِتْ فِيهْ
صَارِتْ زَهْرَه.. وْصَارْ فْرَاشِه
سِرُّنْ.. مُشْ مُمْكِنْ إِحْكِيهْ!
**
إنتي وأَنا والبرج
برج سيدني، آيةٌ من الجمال، يرتفع شامخاً في منتصف المدينة، وكأنه يراقب كل تحرّكاتها.
ـ1ـ
مِنْ بُرْج سِيدْنِي.. وِالْمَسَافِه لَيْلْ
شِفْت الأرْض بِالنُّورْ مَزْرُوعَه
وْشِفْت الصُّبحْ رَاكِبْ عَ ضَهْر الْخَيْلْ
وْدَعْسَاتْ خَيْلُو نْجُومْ مَطْبُوعَه
ـ2ـ
وْشِفت الْقَمَرْ عَمْ يِغْمُز الْمَوْجَاتْ
وِيَرَقِّص الأَنْوَارْ عَ الْمَيِّه
وْإنتي قْبَالِي تْصَوّري اللَّوْحَاتْ
وْآلة التِّصْوِيرْ.. عِينَيِّي
ـ3ـ
مِدْرِي أنا.. مِدْرِي الْبُرج سَكْرَانْ
وْكلّ الدِّنِي عَمْ تِكْرُج قْبَالُو
رَاسُو انْتَلَى.. هَزُّو هَوَا ضجْرَانْ
وْحَيَّكْ بِغَيْمَاتْ الْمَسَا شَالُو
ـ4ـ
.. وْمِتل الْكذبْ، طَلّ الضَّبَابْ وْصَارْ
يْقَلِّقْ شِتِي هِرْبَانْ مِنْ جُوعُو
يْمَحِّي شْطُوطْ مْكَحَّلِه بِالنَّارْ
وِيْجَرِّح الشّبّاكْ بِدْمُوعُو
ـ5ـ
بْعمْرُو الشِّتِي مَا كَانْ يِلْغِي حلْمْ
وْلا كَانْ يِطْفِي ضِحْكِة مْدِينِه
خِبَّيْتْ سِيدْنِي كِلّهَا بِالْفِلْمْ
يَا حُلْوتِي.. بِالْقَلبْ خَبِّينِي..
**
كانبرا.. حرش بمدينه
عاصمة أستراليا، صمّمها المهندس العالمي والتر بارلي غريفين وسمّيت بحيرتها باسمه.
ـ1ـ
عِلَّقِتْ حُبِّي عَ الشَّجَرْ زِينِه
يَا كَانْبرا.. يَا حُرْش بِمْدِينِه
وْفِكَّرْتْ حَالِي (غريفِنْ) الرَّسَّامْ
وْأَرْضِكْ اللَّوْحَه.. عْمَايْرِكْ الِقْلامْ
وْمَا قْدِرْت إرسُمْ.. لا تْوَاخْذِينِي!
ـ2ـ
رِيحة تْرَابِكْ عَطّرِتْ غَابَاتْ
مْسَيّجِه بِجْبَالْ مَا بْتِرْكَعْ
غَطّ التّلج عَ صْخُورْهَا وْصَقَّعْ
شَعَّلْ حَنِينُو.. فَيْلَت الآهَاتْ
تْدَفِّي بُحَيْرَه مْنِ الْبَحِرْ أَوْسَعْ!
ـ3ـ
بْيُوتِك الشَّقْرَا.. تْحَمَّمِتْ بِالْفَيّ
وِتْنَشَّفِتْ بالأَخْضَرْ الْفَاتِحْ
نَفَّضْ شَجَرْهَا وْرَاقْ كِلاّ مَيّ
عَمَّدْ شَوارِعْ.. مَا انْوَجَدْلا خَيّ
فَلْشِتْ كْفُوفَا لِلْهَوَا مْسَارِحْ
**
أَفَالون
منطقة ساحلية رائعة، تقع في مقاطعة نيو ساوث ويلز. يمتاز شطّها بأشجاره الوارفة، التي أستلهمت، في ظلالها، العديد من قصائدي.
ـ1ـ
أفالون.. الشَّطّ الدَّافِي
مَوْجَاتُو بِتْوَعِّي خْيَالِي
تَحْت الشَّجْرَه رْسَمْت مْسَافِه
زْغِيرِه.. وْمَا بِيحِدَّا مْجَالِي
وْعَ كَعْب الشَّجْرَه .. مْنِ كْتَافِي
بَصْمَات بْتِحْكِي عَنْ حَالِي
ـ2ـ
بْأَفَالُون.. سْكَبْتْ شْعُورِي
اسْتوْحَيْت مْنِ صْخُورُو جْبَالْ
مَوْجَاتُو انْ هَجْمِتْ عَ صْخُورِي
بْتِضْحَكْ تَحْت الْمَوْج رْمَالْ
مِنْ شَمْسُو عَم بِشْحَدْ نُورِي
بَيْنِي وْبَيْنُو وِحدة حالْ
**
سيدني
عاصمة مقاطعة نيو ساوث ويلز، وأكبر المدن الأسترالية. تشتهر بمنطقة (كينز كروس) السياحيّة التي لا تعرف النوم أبداً.
ـ1ـ
إِنْتِي الْحُلْم الْـ عاش بْعَقْلِي
سْنِينْ.. وْمَا انْمَحْيِتْ آثَارُو
حوَّشْتِكْ مِنْ ضحكةْ أَهْلِي
مْنِ صْلاوَاتْ عْيُون احْتَارُوا
يَا سِيدْنِي.. الْـ وِقْفِتْ تِنْدَهْلِي
عَ الشَّطّ الْـ بوَّسْتْ غْبَارُو
حِبَّيْتِكْ.. يَا جْنُون السَّهْلِه
يَا جْبَال.. الْـ مِنْ جِهْلُنْ طَارُوا
ـ2ـ
كينز كْرُوس.. اللَّيْلْ الأَحْلَى
الْمتْشَمّس عَ شْطُوطْ بْعَادْ
تْعَوَّدْ عَ الأَهْلا والسَّهْلا
عَ السَّهْرَه مَعْ نَاس جْدَادْ
يَا رَيْت بْتِمْشِي عَ مَهْلا
الأيّامْ.. وْتِنْسَانَا وْلاَدْ
تَا نِعْلاَ عَ الْمَوْج الأَعْلَى
تا نِشْعِل.. وِنْصَفِّي رْمَادْ
**
رَبيع كاتومبا
كاتومبا.. مدينة جبليّة رائعة، ترتفع بها الصخرات الثلاث، المسماة بالأخوات.
ـ1ـ
تلْجِتْ الدِّنْيِي زْهُورْ
عَ خْدُودْ هَـ التَّلاَّتْ
وْصَار الْفَرَحْ نَاطُورْ
وْصِرْنَا الْغِنِّيَّاتْ
وْكِلْ مَا يْجَهْجِهْ نُورْ
وِيْقَلِّق الْغَفْوَاتْ
بْتِسْكُبْ سَمَانَا عْطُورْ
بْجَلْسَاتْ.. مُشْ جَلْسَاتْ
العُمْر اللِّي فِيهَا.. مَاتْ.
ـ2ـ
.. وْطَلّ صَوْتَكْ مَجْدْ
يْفَلْفِشْ أَمَانِينَا
يْرشّ السَّعادِه وَرْدْ
عَ دْرُوبْ مَاضِينَا
وْمِتْل الْـ خَيَالو جُرْدْ
خِيَّمْتْ.. دَفِّينَا
جَرَّح عِينَيْنَا الْبَرْدْ
مْنِ الْبَرْدْ خَبِّينَا
ـ3ـ
تْذَكَّرْ (كاتُومْبَا).. وْقُولْ:
كِيفْ الرَّبِيعْ انْشَالْ
مْنِ فْصُولْ شِغْل فْصُولْ
وْصَفَّى الْحُلمْ بِالبَالْ؟!
غَاباتْهَا!.. مَعْقُولْ
تِغْزُلْ صَدَاهَا شَالْ
تْغَطِّي بْشَجَرْهَا حْقُولْ
وِسْع الْحَكِي اللِّي انْقَالْ
طُولْ الْفَرَحْ بِالطُّولْ
وْبِالْعُرْضْ.. عُرْض جْبَالْ!
ـ4ـ
مِرْدَادْ.. مِتْل الشَّفَقْ
ضِحْكَاتَكْ.. تْوَقَّى
تْوَقِّعْ بَنَات الْحَبَقْ
بِالْحُبّ ، بِالرِّقَّه..
فَصْل الرَّبِيعْ انْسَرَقْ
مْنِ قْلُوبْ مُحْتِرْقَه
وْصَارِتْ (كَاتُومْبَا) نَفَقْ
بَيْن الْـ بِقِي بِالْبَالْ
وْبَيْن الْـ ما رَحْ يِبْقَى!
**
نانا..
إمرأة لبنانية مهاجرة
ـ1ـ
ـ1ـ
رَكْضِتْ.. زُوَّادِتْهَا بْإِيدَا
وِعْيُونَا تْسَابِقْ إِجْرَيْهَا
خَافِتْ تِكْذُبْ بِمْوَاعِيدَا
وْيِتْخَلَّقْ شِي (BOSS) عْلَيْهَا!
وِقْفِتْ.. مَا وَقَّفْ تِنْهِيدَا
وَقْعِتْ.. مَا سِعْفُوهَا دَيْهَا
سَكْبِتْ مِنْ عِينَيْهَا نْبِيدَا
تَا فِضْيِتْ جَرِّةْ عِينَيْهَا
ـ2ـ
جْدِيدِه بْشَغْلِتْهَا.. وِتْرَانَا
مَا بْيِنْطِرْهَا مَهْمَا صَارْ
وِصْلِتْ عَ مْدِينِه.. سُكَّانَا
بْقَلْب مْدِينِتْهُنْ زُوَّارْ
سِيدْنِي.. اللِّي بْيِتْعَبْ إِنْسَانَا
تَا يْجَمِّعْ أَوْهَامْ كْبَارْ!
حَبِّتْهَا.. لَكِنْ إِيمَانَا
بْغُرْبِتْهَا.. هَبَّات غْبَارْ
وْمِتل الْـ ناكِرْهَا بُسْتَانَا
رِبْيِتْ عَ بْرَاكِينْ النَّارْ
واللّقْمِه اللِّي فَوْق لْسَانَا
فِضْلِتْ عَنْ أَطْفَالْ زْغَارْ
.. هَـ الأُمّ الْـ سَمُّوهَا (نَانَا)
وْبَعْدُنْ مَا عِرْفُوا عِنْوَانَا
دِبْلِتْ ضِحْكِتْهَا.. بْنُوَّارْ!
**
فيكتُوريا..
ولاية أسترالية، مشهورة باخضرارها الدائـم، عاصمتها مدينة ملبورن.
ـ1ـ
بَيِّي وْأُمِّي عَاشُوا فِيكي
شِرْبُوا مِنْ مَيَّاتِكْ.. عُمْرْ
شَلْحُوا خَوْفُنْ عَ شْوَاطِيكِي
وْعَنْ وِجُّنْ نِفَّضْتِي الْقَهْرْ
يا (فِيكْتُورْيَا) الْـ عَمْ حَاكِيكِي
وْإِسْمِكْ فَوْق شْفَافِي زَهْرْ
سِحْرِكْ.. غِنِّيِّةْ وَادِيكِي
وِجْبَالِكْ مَرْجُوحِة عِطْرْ
عِيرِينِي هَيْصِةْ مَاضِيكِي
زِعْلانْ.. وْحَابِبْ غَنِّيكِي
وْزَوْزِق، بالضِّحْكَات، الشِّعْرْ
ـ2ـ
وِزَّعْتِي الْفَرْحَه عَ شْعُوبِكْ
مَا نْسِيتِي مْنِ شْعُوبِكْ فَرْدْ
كِرْمَالُنْ.. فِضَّيْتِي جْيُوبِكْ
شِبَّعْتِيهُنْ عِزّ وْمَجْدْ
قْلُوبُنْ.. صِيَّرْتِيهَا قْلُوبِكْ
وِنْصَبْتِي قَامَاتُنْ جُرْد
وِحَّدْتِيهُنْ.. مِشْيُوا دْروبِكْ
يَا (فِيكْتُورْيَا) الْعِزّ الدَّايِمْ
مِتْلِك لا قَبْل وْلا بَعْدْ..
**
أوزي..
الاسم الذي ينادون به المواطن الأسترالي.
ـ1ـ
مِنْ أَوَّلْ نَظْرَه.. حِبَّيْتِكْ
غِمَّضْتْ عْيُونِي وْخِبَّيْتِكْ
شِفْتِكْ حُلْمِي الْـ رَحْ يِتْحَقَّقْ
شَخْتُورَه.. بِالْبَحْر الأَزْرَقْ
عَم تِنْشُلْ عَالَـم .. عَمْ يِغْرَقْ
ـ2ـ
يَا نَبْضَه.. بِالْقَلْبْ رْمَيْتِكْ
مِينْ يَبَّسْ زَهْرَاتْ الزَّنْبَقْ؟
مِينْ غَبَّرْ وِجِّكْ؟!.. مِينْ خَزَّقْ
هَاك الطَّلِّه الْـ شَلْحِتْ مَفْرَقْ
بَيْن الْقِلِّه وْبَيْن الْمُطْلَقْ!
شَعْبِكْ.. مِنْ هَـ الْحَالِه مْعَبَّقْ
وَضْعُو.. مِنْ هَـ الْوَضْع مْخَلَّقْ
عَ تْلالْ الْعِزّ اسْتِحْلَيْتِكْ
.. وِيْطِقُّوا فْقَاقِيع الزَّيْبَقْ.
ـ3ـ
يَا أُمّ.. هْدِيتِينِي بَيْتِكْ
وِنْدَهْتِينِي بْإِسْم مْزَوْزَقْ:
(أُوزِي).. هَالْـ (أُوزِي) شُو بْتِلْبَقْ
لِمْحِبِّينِكْ.. بُكْرَا وْهَلَّقْ
رَحْ خَبِّرْ عَنْ مَسْحِةْ زَيْتِكْ
عَنْ حُبِّكْ.. عَنْ مَجْد مْعَتَّقْ
رَحْ خَبِّرْ عَنْ عُمْر عْطَيْتِكْ
مِنْ دُونِكْ مَا كَان بْيِمْرَقْ
بالأَرْبَعْ جِهَّاتْ لْقَيْتِكْ
غِنِّيِّه.. نُوتِتْهَا بْتِشْهَقْ
صِيتِكْ.. فَوْق النَّجْم مْعَلَّقْ
كَفِّكْ خَيْرْ.. وْإِسْمِكْ بَيْرَقْ..
**
عاطل عن العمل
مهداة إلى أولئك المغتربين الذين جبلوا الغربة بعرق جبينهم، دون أن ينتظروا معونة أحد.
ـ1ـ
جَارِرْ حَالُو مِتْل الْخَايِفْ
إِيدُو.. مَا تْعَوَّدْ تِنْمَدّ
مَكْتَبْ الِحْكُومِه مُشْ شَايِفْ
بَيْنُو وْبَيْنْ الْمَكْتَبْ.. سَدّ
لُبْنَانِي.. عَرْقَاتُو قَاطِفْ
قَضَّى الْغُرْبِه كَدّ وْجَدّ
شِفْتُو عَ أَعْصَابُو وَاقِفْ
حَاكَيْتُو.. تْأَخَّرْ تَا رَدّ:
ـ يَا خَيِّي.. عَمْ قَيِّدْ إِسْمِي
تَا يْزِتُّونِي بْشَغْلِه.. بَسّ
صَرْلي مُدِّه بَرَّاتْ جِسْمِي
عَايِشْ.. مُشْ طَالِعْلِي حِسّ
قِرْفُوا الِمْعَامِلْ مِنْ كَسْمِي
وْضِجْرِتْ مِنْ صُبْحِيتِي الشَّمْسْ
بَدِّي شَغْلِه.. أَيَّا شَغْلِه
تِسْتِرْنِي، وْتِسْتُرْ الِعْيَالْ
عَاطِلْ.. رَحْ يِقْتِلْنِي حِمْلِي
أَتْقَلْ مِنْ صَرْخَات الْمَالْ
ـ2ـ
.. وْنَادُولو، والدَّمْع اللُّولُو
مْنِ عْيُونُو الْمَخْجُولِه بَانْ
الْمَوْت.. وْلا النَّاس يْقُولُولُو:
ـ تْحَرَّكْ.. لا تِبْقَى كِسْلانْ!
**
حريق 1994
سنة 1994 هاجمت النيران ضَواحِي مدينة سيدني، ومعظم غابات ولاية نيو ساوث ويلز، وألقت الرّعب في قلوب الناس.
غَابَاتِكْ.. صَارِتْ تِنِّينْ
لْسَانَاتْ النَّارْ.. لْسَانُو
وْنِحْنَا نِرْكُضْ فِزْعَانِينْ
مِنْ غَدْرُو.. وْمِنْ دخَّانُو
جْهَنَّمْ، قِلْنَا، لَكِنْ مِينْ
بْيِمْحِي الظّلْم وْشَيْطَانُو؟
طَلُّوا رْجَالِكْ!!.. وِالشَّرْبِينْ
الْعَالِي، جَنِّتْ أَغْصَانُو
كْتَافُنْ عَ كْتَافْ الْحِلْوِينْ
الأَحْلَى مْنِ الأَحْلَى كَانُوا
تَرْكُوا عْيَالُن مخْتَارِينْ
وْمَا تَرْكُوكِي.. وْلا خَانُوا
جَنِّة أَرْضِكْ، الِبْسَاتِينْ،
الْقِنّ الْـ حَاضِنْ صِيصَانُو
سَيَّارَاتُنْ مِلْيَانِينْ
شْمُوخ.. الْوِحْدِه عِنْوَانُو
وْنَبْرِيشُنْ مِتْل السِّكِّينْ
يْقِصّ اللّهْبِه بْطُوفَانُو
فِكَّرْنَاهُنْ: قِدِّيسِينْ
مَارْ جِرْجِسْ فَوْق حْصَانُو
يْطَفُّوا النَّارْ.. اللَّحْظَه سْنِينْ
وْيِحْمُوا الْبَيْتْ وْسِكَّانُو
سِيدْنِي.. يَا جْنَيْنِةْ نَسْرِينْ
مَزْرُوعَه عَ الباسِيفِيكْ
خَلَّصْ شَعْبِكْ.. إِيمَانُو
**
غولبرن
مدينة ريفيّة مشهورة بتربية الخراف، وقد ارتفع فيها نصب لخروف كبير، تقدر أن تدخله، كمحل تجاري، وتشتري حاجياتك منه.
ـ1ـ
لَيْلِه مِنْ لَيْلات الْحُبّ
وَقْعِتْ فيكي مْحَطِّتْنَا
يا (غُولْبِرْنْ).. وِيْدِقّ الْقَلْبْ
كِلْ مَا تِطْوَلْ سَهْرِتْنَا
الْبَرْد الْكاسِرْ غَطَّى الدَّرْبْ
وْشَكّ قْرُونُو بْغُرْفِتْنا
مَا قْدِرْنَا مْنِ الْفَرْشِه نْقِبّ
وْلا قْدِرْنَا نِلْعَبّ بِالنَّارْ
قِمْنَا دْنِقْنَا بْفَرْشِتْنا..
ـ2ـ
.. وْكلّ مَا الْبَرْدْ يْجِنّ ، يْصِيرْ
النَّوْمْ يْقَصِّرْ سَاعَاتُو
وْ(عبلَى) مَا بْتُوعَى بَكِّيرْ
وْلَيْلِي طارِتْ غَفْوَاتُو
فقْتْ.. وْمَا فَاقُوا عْصَافِيرْ
غُولْبِرنْ!!.. مِدْرِي وَينْ بَاتُوا!!
فَاقْ مَعِي خَرُوف كْبِيرْ
عْيُونُو عَ الدَّرْبْ نْوَاطِيرْ
سَهَّرْنِي هُوِّي بْذَاتُو
**
أورنج
مدينة في الجبال الزرقاء مشهورة ببساتين الكرز.
ـ1ـ
كَرْزَاتِكْ.. حَلْقَاتْ جْبَالْ
زَرْقَا.. عَمْ بِتْقَاوِمْ رِيحْ
بْتِتْزَيَّنْ فِيهَا.. بْتِخْتَالْ
قَمُّورَه.. والشَّكْل مْنِيحْ
يَا (أُورِنْجْ).. صُبْحِكْ بِالْبَالْ
غِنِّيِّه.. وْلَيْلِك تِسْبِيحْ
غْزِيليلي مْرَاعِيكِي شَالْ
هْدِينِي الصّخْر الْـ مَا بْيِنْشَالْ
تَا حَوِّشْ كِحْلِه مْنِ تْلاَلْ
وْإِرْسُمْ فَوْق عْيُونِك زِيحْ
ـ2ـ
جْنَيْنَاتِكْ.. بَاقِة أَلْوَانْ
بْتِفْرُشْ قِدَّامِي لُبْنَانْ
بِتْرَجِّعْنِي طِفل زْغِيرْ
عَ ضَيْعَه بْيُوتَا مِرْجَانْ
بِتْطَيِّرْ حَوْلِي عْصَافِيرْ
رَقْصِتْ عَ صَوْتَا الأَلْحَانْ
يَا (أُورِنْجْ).. هَـ الإِسْمْ كْبِيرْ
حَزُّورَه.. بْقَلْبَا حْزَازِيرْ
تَا حِلاَّ.. جِرَّبْت كْتِيرْ
الْـ بِيحِلاَّ.. وَحْدُو.. الدَّيَّانْ!
**
تاري
مدينة ريفيّة ساحلية
ـ1ـ
حَبِّتْ "عبلَى" تْمَحِّي اللَّيْلْ
فِيكِي.. وْتِفْرُشْ إِيدَيِّي
وْتِتْمَرَّى عَ نِجْم سْهَيْل
الْـ جَمَّعْ حَالُو بْعيِنَيِّي
افتَكْرِتْ مَوْجِكْ ضَهْرِ الْخَيلْ
وْصَدْرِي سِرْج وْطَاقِيِّه
طارِت فِينَا لْتَانِي مَيْلْ
وْعَ نِتْفِه.. غِرْقِتْ فِيِّي!
ـ2ـ
حَبِّتْ تِتْمَشَّى عَ الشَّطّ
وتِحْكِي لِلرَّمْلِ حْكَايِه
عَنْ ضَيْعَه.. بْيِعْشَقْهَا البَطّ
مِتْل النَّجْمِه مْضُوَّايِه
عَنْ (تَارِي).. اللّي فِيهَا حَطّ
الْخَيْر مْوَاسِمْ.. توصَايِه
بْـ (عبْلى) وْ (تَارِي) قَلْبِي غَطّ
وْصَارِتْ صَعْبِه التِّنْقَايِه!
**
نيو كاسل
مدينة ساحلية تجارية كبيرة
ـ1ـ
نْيُوكاسِلْ.. مِنْ عُمْر الْمَوْجْ
الْـ عَمْ يِرْكُضْ عَ شْوَاطِيهَا
فَوْجْ.. وْعَمْ بِيسَابِقْ فَوْجْ
تَا يْغَرِّقْ حَالُو فِيهَا!
ـ2ـ
عْصَافِيرَا.. جَوْقِةْ شِعَّارْ
بِتْغَنِّي لْهَبَّات الرِّيحْ
طَعْمِيهَا.. بْتِشْلَحْ زِنَّارْ
مْنِ الْفَرْحَه.. وْبِتْصِير تْصِيحْ
ـ3ـ
وْعُصْفُورْتِي بَيْن عْصَافِيرْ
نْيُوكَاسِل.. إِسْمَا "لُولُو"
سْرَقْتَا مِنُّنْ.. خِفْت تْطِيرْ
وْإِخْسَرْهَا الْعُمْر بْطُولُو!
**
الإنترنس
منطقة ساحلية سياحية في ولاية نيو ساوث ويلز، يقصدها الناس للنزهة واصطياد السمك.
ـ1ـ
سْنين فيكي عِشْتْ
لا البحر بَلّلني
ولا الطّيرْ زَعَّلْني
رَمْلاتْ صَفْرا فْرَشْتْ
متل الدَّهَبْ كانُوا
فَكِّر كأَنّو المَوْجْ
مادِدْ إِلي لْسانُو
وْفَوجْ يِبْلَع فَوْجْ
والرَّغْوِه عَ سْنانُو
ـ2ـ
وْزُوّارْ مِتْل النّيرْ
وْجُوهُنْ بِلا بَسْماتْ
عَمْ يِحِمْلوا صْنانيرْ
تا يْصَيّدوا السَّمْكاتْ
وْيِزْعَلُوا عْصافيرْ
عَ شْفافْها النّغْماتْ
وِصْرخِتْ: ما بيصيرْ
السّمكاتْ أَصْحابي!
وِبْنَبْرَه كذَّابِه
رَدّوا.. وقالوا: زِيحْ
في بْإيدنا تْصاريحْ
تْلِفْلَفِتْ بِعْذابي
ـ3ـ
مْنِقْتُلْ جَمالْ الْكَوْن
تا نِشْبَع اللّقْمِه
يا جُوع وقّف هَوْن
لا تِسْرُق النّسْمِه
لا تِمْحي سحْر اللّون
ولا تدبح الكلمه
ألله عطانا العونْ
تا نِحْفَظ النّعمه
**
ساسنوك
تقع مدينة "ساسنوك" في منطقة "الهانتر فالي" المشهورة بحقول الكرمة والنبيذ المعتق.
ـ1ـ
عَ طْرافيها بْحور الكَرْمِه
وبْحُضنا نايم فرحانْ
قلتلو: تْركْني يا حُلْمي
غافي.. والفَرْشه فنْجانْ
من نْبيداتا بْشيل الكلمه
تا الكلمه تْوعّي الانسان
ساسْنوك، صارتْ أحْلى نَغْمِه
لَحّنْها العصْفور الدُّوري
وَعَمْ بيغنّيها.. وْسَكْران
ـ2ـ
عناقيد تْغطّي عناقيد
وتغمرْها.. تا الخير يزيدْ
حَبّاتا خْدود الالماسْ
ونْبيداتا فَجر جْديد
بْتِفْرَحْ بِضِحْكات النّاس
بْتِسْتقبلهُنْ بِزْغاريدْ
وكل ما التّم يْبُوس الكاس
بْيِرْجَعْ مِنْ أَوّلتُو.. العيدْ
**
ماريلاندز
منطقة في غرب سيدني بنيت فيها مسكني
ـ1ـ
ماريلاندز.. الْـ عايشْ فيها
مِنْ شَمْعِةْ عُمْري عاطيها
النّور الْـ عَمْ يِضْوي لْياليها
ـ2ـ
جيتْ عْلَيْها شَبّ زْغيرْ
ضِحْكاتُو مِتْل عْصافير
فَوْق شْوارِعْها بِتْطيرْ
ـ3ـ
بَيْتي عِمَّرْتُو تا صارْ
لِلْكلمِه، للشِّعرْ مْزارْ
وْكيفْ جَمَّعْ مَجْدُو.. بْتِحْتارْ؟
ـ4ـ
خَمْسين سِنِه فيها عِشتْ
حَضْنِتْني وْإيدَيْها فْرَشْتْ
وْمِن شَجْرِة حُبَّا حوَّشْتْ
ـ5ـ
أللـه فيها مْحَبَّبْني
وْنَبْرِة صَوتا بْتِعْجِبْني
بِتْناديني: يا إِبْني
ـ6ـ
ماريلاندز.. بْعِدّا أُمّي
مْحَبِّتْها عَمْ تِجْري بْدَمّي
صارِتْ غِنّيِّه معروفه
قطَّبتْ حْروفا عَ تِمِّي
**
مادجي
بلدة ريفية في ولاية نيو ساوث ويلز مشهورة بنبيذها الفاخر
ـ1ـ
بالأهلا.. لاقِتْني "مادْجي"
ضيْعَه بِجْنايِنْها فِرْجه
غاباتا فسْتان مْلَوَّنْ
وِالْبِرْنَيْطَه زْهور الْمَرْجِه
تا إِمْشِيها عَمْ إِتْمَرَّنْ
رَحْ إِطْلَعْها دَرْجِه دَرْجِه
ـ2ـ
نْبيداتا بْتِشْبَه أَشْعاري
بْتِفْضَحْني.. بْتِسْرُقْ أَفْكاري
بْتِرْمِيني عَ شْطوط الْفَرْحَه
وْأَنا بِالْفَرْحَه مُشْ داري
حْقُول الْكَرْمِه لِبْسِتْ طَرْحَه
عَريسَا جايِبْتُو عْياري
**
داروين
تعتبر داروين أصغر عاصمة لولاية أسترالية
ـ 1ـ
دارْوين.. حابِبْ إِنّي زورا
وْناطِرْ حتّى تْناديني
بَرْكي بِتْعَمَّدْ بِبْحُورا
وِبْمَوْجاتا تْخَبّيني
وْكل ما الشمس تْوَزّعْ نُورا
بْنُورا بَدّا تْدَفّيني
ـ2ـ
شِفْتا من الطّيّارَه مرَّه
ضَوّا مْشَعْشَعْ، حلْوه، حُرَّه
قِلْتلاّ: يا سيدني بْحِبِّكْ
لكنْ بَدّي جِبْلِكْ ضُرَّه
كْنُوزي عَمْ جَمِّعْها بْقَلْبكْ
وْهِيّي بْقَلْبي أغْلى دُرّه
**
بيرث
عاصمة ولاية غرب أستراليا
ـ1ـ
بيرث.. انْدهيني بِسْمَعِكْ
ساكبْ شعر بِـ مَسْمَعِكْ
وينْ ما تْكوني بْهالدِّني
رَحْ كُونْ، يا عْيُوني، مَعِكْ
إمْحي سْنين الْوَلْدَني
وإمْسَحْ وَجَع عَن مَدْمَعِكْ
ـ2ـ
يا بيرث.. يا مْدينة هَنا
جايي عَلى رْبُوعِكْ أَنا
جايي تا إهدي طَلّتِكْ
أَعْمال بِتْزيدِكْ غِنى
وْعَبّي الفَرَح بِـ سَلّتِكْ
مَع كمْ سَحْبِة مِيجانا
ـ3ـ
بْقَلبِك حَنان وْعاطْفِه
لِشْعوبْ رَمز الْمَعْرِفه
هْديتِك كُتُبْ شِعْر وْأَدَبْ
مِنْ كنْز أَمجادي اغْرفي
فيكي الشّمس متل الدّهبْ
وفيكي الْقَمَر ما بْيِنْطفي
**
لبنان وسيدني
بْقلبي بِتْلاقوا لُبْنان
وْحَدّو سيدني مَطْبوعه
لبنان زينةْ هَـ الْبُلْدان
وسيدني جَنّه بِرْبوعا
**
