Charbel Baini
Laysh Hebbaytek?
why did I love you?
(مختارات من قصائد الشاعر)
Cover by PAULA BAINI
**
ليش حبّيتك؟
ـ1ـ
عَمْ تِسْأَلِينِي لَيْشْ حِبَّيْتِكْ
وْلَيْشْ جُوَّا الْقَلْبْ خِبَّيْتِكْ
وْمُشْ عَارْفِه تِخْمِينْ؟!
صَرْلِي سْنِينْ سْنِينْ
رَاسْمِكْ صُورَه بْعِينَيِّي
مْلَوّنِه بِالْحُبّْ
وِمْزَيّنِه بِزْهُورْ حِنِّيِّه
وْعَمْ فَتِّش عْلَيْكِي
عَ أَلْف دَرْب وْدَرْبْ
يِمْكِنْ عْلَيْهَا انْطَبْعِت جْرَيْكِي
وْيِمكِن تْكُون تْوَصِّل لْبَيْتِكْ
صَدّقِينِي.. دِخِتْ تَا لْقَيْتِكْ!
ـ2ـ
لْقَيْتِكْ حَقِيقَه سَاطْعَه قْبَالِي
مِتْل النّجوم الْـ بِالسَّمَا
وْمِن كِتِرْ وَهْجِكْ صِرْتْ خَافْ مْنِ الْعَمَى
وْصِرْتْ مِنْ حَالِي
غَارْ عَ حَالِي
وْيَامَا وْيَامَا عَنّ عَ بَالِي
إحرُم عْيُونِي
تِلْمَح خْدود.. شْفَافْ مَجْنُونِه
وْشَعرْ أَسْوَدْ حَامِل لْيَالِي..
ـ3ـ
لَوْ كَانْ فِيكِي تِجْمَعِي دْمُوعِي
كِنْتِي عْمِلْتِي نَهْرْ
وْلَوْ كَانْ عِنْدِكْ وَقْتْ تِقْرِي شِعْرْ
كان الشِّعر خَبَّرْ
قِدَّيْشْ دِقْت الْقَهْرْ
وْقِدَّيْشْ كِرْمَالِكْ كِنِتْ إِسْهَرْ
وْتِسْهَرْ مَعِي شْمُوعِي..
ـ4ـ
كِنْتِي بْقَلْبِي قَبِلْ مَا تْكُونِي
وْكِنْتِي وَحِي فْكَارِي
وْكِنْتِي تْنَامِي بَيْنْ أَشْعَارِي
وْعَ مْخَدّتِي يَامَا غْفِيتِي سْنِينْ
وْيَامَا رْقَصْتِي فَوْقْ آهَاتِي
عَ صَوْتْ قَلْبِي الْـ كانْ مِتْيَتَّمْ حَزِينْ
الْـ خَلاَّ الدُّمُوع تْجِفّ بِعْيُونِي
وْخَلاَّ حَيَاتِي تِكْرَه حْيَاتِي
وْخَلاَّ لْسَانِي يِعْلُن جْنُونِي
ـ5ـ
وْبِالآخْرَه لْقَيْتِكْ:
نَايْ وْمُوسِيقَى وْعطرْ
وْأَلْفْ قِطْعِةْ شِعرْ
بَدِّي جْنُونْ الدَّهرْ
تَا أَلِّفُنْ.. مَا عَادْ عِنْدِي عُمرْ
وِلْهَالسَّبَبْ يَا نُورْ عِينَيِّي
انْكَانْ بَدِّكْ تِشفقِي عْلَيِّي
لا تِسْاَلِينِي لَيْشْ حِبَّيْتِكْ؟
**
دمعات
شَمْس الْعُمرْ لَوْ يَوْمْ غَرَّقْهَا الضَّبَابْ
بِبْحُورْ عَتْم وْخَوْف وِجْنُون وْعَذَابْ
ضَلِّي اذْكرِي إِنْسَانْ سَكْبِكْ عَ الْوَرَقْ
تَا تْعَطِّرْ الدَّمْعَاتْ صَفْحَات الكتَابْ
**
يا ريت!
ـ1ـ
رَحْ ضَلّ حِبِّكْ لِلأَبَدْ رَحْ ضَلّْ
تَا يِخْلَص مْنِ الزَّيْت قِنْدِيلِي
وْمَا تْعُودْ إِيدِي تْطَالْ زَهْرِة فُلّْ
وْلا تِعْشَق النَّايَات تِرْتِيلِي
ـ2ـ
كِنْتِي اللِّقَا.. لَمَّا الشِّرَاع يْمِيلْ
صِرْتِي السَّفَرْ وِبْحُورِك الْغُرْبِه
وْصَارِت شْفَافِكْ تِنْزُف مْوَاويلْ
وْتِتْجَمَّع مْوَاوِيلْهَا بْقَلْبِي
ـ3ـ
وْبِالصُّورْةِ الْـ عَمْ تِضْحَكِيلِي نْهَارْ
دِبْلِتْ الضِّحْكِه وْكَرْجِت دْمُوعِكْ
شِفْت الأَسَى مْخَيَّمْ عَلَى التِّذْكَارْ
وْمَوْج السَّرَاب مْغَرَّق رْجُوعِكْ
ـ4ـ
يَا رَيْتْ فِيِّي إِسْرقِكْ يَا رَيْتْ
وْغَمِّض عْيُونِي عَ السَّعَادِه وْنَامْ!
لَكِنْ " يَا رَيْت " الْـ مَا بْتِبْنِي بَيْتْ
كِيفْ بَدّهَا تْحَقِّقْ الأَحْلاَمْ؟!
**
متل الزغار
ـ1ـ
لِمِّنْ شَمعْ جِسْمِكْ وِلِعْ
فِرح الرَّمل والشَّطّ
وِارْتَاحْ طَير البَطّ
وِالْمَوْجْ زَقَّفْ تَا شِبِعْ
وِتْعَمْشَق بْصدْرِكْ.. طِلِعْ
مِتل الزّغَار يْنِطّ
ـ2ـ
.. وْصَرْلِي سْنِين سْنِينْ
شْطُوطِي مِنْسِيِّينْ
لا شَمسْهَا بْتِطْلَعْ
وْلا نُورْهَا بْيِلْمَعْ
عَ تْلالِك الْحِلْوِينْ
ـ3ـ
وْمِنْ هَيْك صَار الْوَعدْ
يِتْأَخَّر زْيَادِه
يِدْنَقْ بلَيل الْجُرْدْ
وِيْعَتِّم الْوَادِي
وْوَحْدِي أَنَا نَاطِرْ
وِالْمَوْجْ عَمْ يِعْلاَ
وْتِعْلا مَعُو قْنَاطِرْ
مَا بْيِرْجَعُو أَهْلاَ
ـ4ـ
أُوفْ مِنِّكْ أُوفْ
يَا مْوَاجْ جِهْلانِه
دَمْعَاتْهَا بِتْطُوفْ
عَ صْخُورْ عطْشَانِه
وِالْوَقتْ مَا لُو عُمرْ
بِيمُوتْ قدَّامِي
بْيِقضِي عَ أَحْلامِي
الْـ عِتْقِتْ عَ إِيد الْجَمرْ
ـ5ـ
عْلَوَّاهْ لَو فِيِّي
لَوِّنْ بَحرْ أَزْرَقْ
لِعْيُونْ حُورِيِّه
بْتِنْطُر الصَّيْفِيِّه
تَا بْشَمسهَا تِغْرَقْ
وْإِتْسَبَّح قْبَالاَ
وِالْجِسمْ عَمْ يِلْوِي
وْإِشْهَقْ مَع خْيَالاَ
كل ما الشَّمعْ يِضْوِي!
**
لا تقوليلي..
ـ1ـ
لا تْقُولِيلِي: الْعِيد بْعِيدْ
رَح إِنْطُرْ عِيدِكْ
تَا تْلاَقِينِي بْتَوْب جْدِيدْ
وِالزَّهر بْإِيدِكْ
بَرْكِي فَرْحِتْنَا بِتْزِيدْ
وِبْتِخْضَرّ الْمَوَاعِيدْ
وِبْيِحْلاَ نْبِيدِكْ..
ـ2ـ
لا تْقُولِيلِي: لَيْلِي طَالْ
لَيْلِيِّه بْشُوفِكْ
مَادِدْلِكْ إِيدُو خيَّالْ
مَا خَافْ سْيُوفِكْ
يَا حُلْمِي الْمَارِقْ بِالْبَالْ
الشِّعْر الْـ قِلْتُو مَا بْيِنْقَالْ
لَوْلا مْنِ حْرُوفِكْ!
ـ3ـ
عُمْرِي وْعُمْرِكْ هَبِّةْ رِيحْ
بْدِنْيِي مِنْسِيِّه
مَرْقِتْ.. مَا تْرَكْنَاهَا تْصِيحْ
وِتْجِنّ شْوَيِّه
كْرُومِكْ لازِمْلا تِلْوِيحْ
شْفَافِكْ خِلْقِتْ للتِّسْبِيحْ
لا تِقْسِي عْلَيِّي..
**
خايف
ـ1ـ
خَايِفْ مِنِّكْ.. مِنْ نَهْدَاتِكْ
مِنْ تِطْلِيعَه بْتِدْبَحْ دَبْحْ
مِنْ شَمْس بْتِرْسُمْ ضِحْكَاتِكْ
وِبْتِتْرُكْ عَ شْفَافِكْ جُرحْ
وْكِيفْ بَدِّي جَرِّبْ لاَقِيكِي
كِيفْ بَدِّي إِتْطَلَّعْ فِيكِي
بْلَمْلِمْ صَوْتِي تَا حَاكِيكِي
وْصَوْتِي مْنِ الْخَوْف بْيِنْبَحّ
ـ2ـ
كل ما بْعِدْتِي وْغِبْتِي أَكْتَرْ
حُبِّي بْيِتْجَدَّدْ وِبْيِكْبَرْ
وِالنَّطْرَه بْتِمْشِي عَ سْكُوتِي
إِيدَيْن تْعَمِّرْلِي بْيُوتِي
وْمَوْقِدْ عَ سَهْرِتْنَا.. يِسْهَرْ
ـ3ـ
لَوْ بِقْدِرْ طَفِّي بْإِيدَيِّي
نَار الشَّهْوِه اللِّي بْعِينَيِّي
بْتِحْرِقْنِي الشَّهْوِه الْمَجْنُونِه
وْبِتْلَوِّنْ صَفْحَاتْ عْيُونِي
بِالدَّم الْـ عَمْ يِغْلِي فِيِّي
ـ4ـ
خَايِفْ قِلِّكْ إِنِّي بْحِبِّكْ
وْتِتْكِي قْبَالِي وْيُوقَفْ قَلْبِكْ
إِفْرِشْلِكْ صدْرِي وْغَطِّيكِي
وِبْبَوْسِه زْغِيرِه إِحْيِيكِي
وْتِفْرَح فِيِّي نْهَايِةْ دَرْبِكْ..
**
عم يندهوا..
ـ1ـ
عَمْ يِنْدَهُوا عْيُونِكْ!
غمَّضْتْ عِينَيِّي
بْحَيثْ مَا فِيِّي
إِتْحَمَّلْ فْنُونِكْ..
ـ2ـ
وْبَيْنِي وْبَيْنِكْ لَيْلْ
وِبْحُورْ وِمْسَافَاتْ
وْصَحْرَا، عَ دَعْس الْخَيْلْ،
عِرْيِتْ مِنِ الرَّمْلاتْ
ـ3ـ
وْكِيفْ بَدِّي عُودْ
جَارِرْ مَعِي سْنِينِي
وْصَرْخِة عَتَبْ وِوْعُودْ
مْنِ الصَّعْبْ تحْيِينِي؟!
ـ4ـ
عَمْ يِنْدَهُوا!.. وِالنَّارْ
شِعْلِتْ بأَعْصَابِي
وْصَار الْفَزَعْ زِنَّارْ
وِمْزَنَّر بْوَابِي
ـ5ـ
.. وْمَا عَادْ فِيِّي صِيحْ
صَيْحَاتْ مَسْمُوعَه
خَانِقْ بإِيدِي الرِّيحْ
وْغِرْقَان بِدْمُوعَا!
ـ6ـ
وِعْيُونِك الْحِلْوِينْ
مَا بْيِفْهَمُوا عْلَيِّي
سَنُّوا " اللَّحظ " سِكِّينْ
تَا يْقَطّعُوا فِيِّي!
**
فرقة غجر
ـ1ـ
سِكْرِ الْوَتَرْ
وْسِكْرِتْ مَعُو صَابِيعْ
فِرْقَه مْنِ الْغَجَرْ
وْطَلِّتْ صَبِيِّه تْبِيعْ
وْرُودْ
أَحْلَى مْنِ الْحَلاَ
وِعْقُودْ
مَا بْتَعْرِفْ غَلاَ..
حْبَالْ فِلّ وْيَاسمِينْ
.. وْيَا مِينْ يِشْنِقْنِي بْحَبل يَا مِينْ!
ـ2ـ
سِكْرِ الْوَتَرْ..
وْسِكْرِتْ مَعُو أَجْسَادْ
مَا بْتِعترفْ بِبْلادْ
بْلادْهَا: شَلْحِةْ نَظَرْ
وْسَاحَاتْ تِسْتَقْبِلْ بَشَرْ!
قُومِي ارْقصِي.. وِتْدَلّعِي عْلَيْهُنْ
بْرَقْصَاتِكْ الْحلْوِينْ
لْيَالِي الْفَرَحْ رِبْيِتْ عَ إِيدَيْهُنْ
وْإِيدَيْهُن بْسَاتِينْ
وْغَبْرِة رَقصْ عِلْقِتْ بِإِجْرَيْهُنْ
وِمْعَتّقَه مْنِ سْنِينْ!!
ـ3ـ
وْمِتْلُنْ أَنَا..
نَاصِبْ عَلَى كْتَافِي خِيَمْ
وِمْزَيَّنَا
بِزْهُورْ.. أَقْوَى مْنِ الْعَدَمْ
وِمْحَصَّنَا
بْمُوَّالْ
لْغَيْرِكْ بَعد ما انْقَالْ
وْلا رَنْدَحُو شلاَّلْ
وْلاَ فَارَق حْرُوفُو النَّغَمْ..
ـ4ـ
قُومِي ارْقصِي.. كْفُوف الصَّبَايَا نَارْ
مْنِ زْقِيفْهُنْ عَتم اللَّيَالِي انْهَارْ
وْفَلّ الضَّجَرْ
مَخْجُولْ مِنْ حَالُو
وْضِحْكِة غَجَرْ
عَمْ تِلْمَع قْبَالُو
وِالْعُودْ عَم بِيرِنّْ
وْمِتل الْحَجَرْ إِنْتِي
رَقْصُوا الْبَشَرْ وِالْجِنّْ
.. وْيَا رَيْتْ مَا كِنْتِي!
**
مجدك أكبر
ـ1ـ
مُشْ رَحْ إِحْكِي.. مَجْدِكْ أَكْبَرْ
مِنْ كِلْمَاتِي الْـ بَدِّي قُولاَ
مِنْ وَرْقَه عِتْقِتْ بِالدَّفْتَرْ
وْنِسْيِتْ حَتَّى تْعِيد فْصُولاَ
وِالْمَاضِي مَاضِي مَا بْيِرْجَعْ
مَهْمَا جِرُّو.. وْمَهْمَا إِدْفَعْ
عُمْرِي الْمَارِقْ دُونِكْ أَسْرَعْ
مِنْ أَيَّامْ
لَمَّا بْنَامْ
عَ رْمُوش الْعِينَيْن بْتِرْكَعْ
ـ2ـ
يَا حُبِّي الأَجْمَلْ.. لا تِمْرُقْ
مِتل حْكَايِه
تْخَبَّى بْعِينَيْهَا تَا تِسْرُقْ
مَجْدَا الْجَايِي
وْقِلاَّ: غْمرِينِي تَا إِفْرَحْ
مِتل النَّاسْ الْـ فِرْحُوا فِيكِي
وْبِكْيُوا لَمَّا بْكِيتِي قْبَالُنْ
وْلَفُّوكِي بْإِيشَارْب خْيَالُنْ
بَرْكِي الإِيشَارْب بْيِحْمِيكِي
وْبِتْصِيرِي أَوْسَعْ مِنْ مَطْرَحْ
يُوقَفْ شَعْبِكْ تَا يْلاَقِيكِي
وِكْفُوفُو خَشْبَات الْمَسْرَحْ!
**
جرح قلبي
ـ1ـ
تَا أُوصْفَكْ يَا جرح قَلْبِي صِرْتْ
رَجِّعْ لَيَالِيهَا
يَللِّي سْهِرتْ فِيهَا
وْقِدَّامْ عِينَيْهَا الْخَجُولِه كْبِرْتْ
شِفْتَكْ قَنَايِةْ دَمّْ
أَوْجَاعْ عَمْ بِتْلِمّْ
بْتِحْبَل كَأَنَّكْ أُمّْ
مَلْيُون "آخ" بْبَطنها سِفَّرْتْ!
ـ2ـ
تَا أُوصْفَكْ.. وِقَّعتْ تِطْلِيعِي
عَ جْوَانْبَك أَيَّامْ
وِحْرمتْ عَيْنِي تْنَامْ
قِلْتِلها: بْجرْحِي أَنَا ضِيعِي
وْصَارُوا عْيُونِي يِسْبَحُوا
بْخلْجَانَكْ الْـ عَمْ يِنْزَحُوا
عَ شْطُوطْ مَا بْتَعْرِفْ صَحُو
وْرَمْلاتْهَا بْتِفْرَحْ بِتِرْكِيعِي..
ـ3ـ
يَا جرحْ قَلْبِي.. كْتِيرْ بِتْرَجَّاكْ
لا تِدْلق شْفَافَكْ
بَرْكِي حَدَا شَافَكْ
وْخَافْ مِنَّكْ قبل ما نَجَّاكْ
مِنْ وَيْن بَدِّي جِيبْ
إِنْسَانْ مِنُّو تْطِيبْ
بِخْيَالْ إِيدُو تْغِيبْ
وْيِغْرَقْ بِإِسْمَكْ كِل ما هَجَّاكْ؟!
**
كمشة غبار
ـ1ـ
كِيفْ فِيكِي عَايْشِه بْدُونِي
وْضِحكتِكْ لِبْعِيدْ مَسْمُوعَه؟!
نْسِيتِي السَّهَرْ عَ مَرْفَأ عْيُونِي
مَطْرَحْ مَا كَانْ صْبَاحْنَا يُوعَى
ـ2ـ
وِالْياسمِينِه الْـ نَخِّتْ عْلَيِّي
وْهَبّجِتْ بِغْصُونْهَا دَيِّي
وْوَشوشِتْنِي: قْطِفلْهَا زَهْرَه
شُو بْقِلّها.. وْبَعْدُو الْجرح فِيِّي؟!
ـ3ـ
وِالْمَطْعَمْ الْـ مَا رَاحْ مِنْ بَالِي
عَ كِتِرْ مَا رَنْدَحْ أَسَامِينَا
مَا عِدْتْ زُورُو.. خِفتْ يِحْلالِي
قِلُّو الْحَقِيقَه.. وْبَغّضُو فِينَا
ـ4ـ
عِيشي عَ ذَوقِكْ.. جَرّحِي الذِّكْرَى
رَحْ تِرْجَعِيلِي وْفَايْضَه دْمُوعِكْ
بْتِشْهَد عْلَيِّي طَلّتِكْ بُكْرَا
وْكَمْشِة غْبَارْ بْتِسْبَق رْجُوعِكْ..
**
إنتي وأنا خيالين
ـ1ـ
.. وْهَيْكْ صِرْنَا تْنَيْنْ
عَمْ نِشترِي بِالدَّيْنْ
كِلْمِه تْفَرِّحْنَا
وْكِيفْ بَدّنا كِيفْ
نْسَدِّدْ مْصَارِيفْ
رَهْنِتْ مَطَارِحْنَا؟!
ـ2ـ
وْصِرْنَا عَ بَاب الْحُبّ
نُوقَفْ تَا نِسْتَعْطِي
وْيِنْبَحّ صَوْت الْقَلبْ
بَرْكِي حَدَا بْيِعْطِي
تِذْكَارْ شِي صُورَه
نِتْنَوَّرْ بْنُورَا
كِيفْ مَا رِحْنَا
شِي شْفَافْ مَسْحُورَه
بْلَحْظَاتْ مَسْتُورَه
بْبَوسِه تْرَيِّحْنَا
ـ3ـ
.. وْهَيْكْ صِرْنَا تْنَيْنْ
عَ دْرُوبْنَا عِينَيْنْ
بِدْمُوعْهَا سْبَحْنَا
وْنِرْكُضْ وَرَا الْمَجْهُولْ
عَ صَوْتْ دَقّ طْبُولْ
شَلَّعْ مَسَارِحْنَا
وْإِنْتِي وْأَنَا خْيَالَيْنْ
الْكِذْبِه تْمَرْجِحْنَا
الْعَتْمَاتْ تِمْسَحْنَا
إِنْتِي وْأَنَا طِفْلَيْنْ
مِنْ خَوفْنَا صِحْنَا!
**
ضجر
ـ1ـ
عُمْرِي ابْتَدَا مِنْ يَوْمْ مَا حِبَّيْتْ
وِتْغَلْغَلِتْ بِالشَّعر دَيَّاتُو
وْطَرْطَشْ دِينَيِّي بْأَلْفْ بَيْت وْبَيتْ
خَلُّوا السَّمَعْ يِغْرَقْ بِحَكْيَاتُو..
ـ2ـ
قَبْلُو.. مَا كَانْ الْعُمر يِحْلالِي
وْلا خَطْرِت الأَحْلامْ عَ بَالِي
كِنْتْ أُوقَعْ بِالْمَسَافِه وْقُومْ
حَامِلْ ضَجَر بِـ عَتْمِة لْيَالِي!
**
صرخة طفل
ـ1ـ
مَاتْ حُبِّكْ مَاتْ
قْبَرْتُو أَنَا بْدَيِّي
عَ شْطُوطْ سَهْرِيِّه
مَا دَغْدَغِتْ نِجْمَاتْ
وْلا رَنْدَحِتْ أَبْيَاتْ
انْسَكْبِتْ بِـ غِنِّيِّه..
ـ2ـ
ماتْ حُبِّكْ.. لَيْشْ؟
وْكَانْ السَّمَا مْضَوِّي
وْوَاقِفْ عَ بَابُو جَيْشْ
مَا بْتَاخْدُو قُوِّه
سْلاحُو أَلف مشْوَارْ
وِرْسُومْ وِحْكاياتْ
وْبَوْسَاتْ تِقْدَحْ نَارْ
وِتْجِنّ سَهْرِيَّاتْ..
ـ3ـ
ماتْ حُبِّكْ ماتْ
وِانْتَهْيِتْ سْنِينُو
وِانْطَفْيِت مْنَامَاتْ
خَلِّت مْحِبِّينُو
يِبْنُوا بْيُوت بْيُوتْ
بِتْزَنِّرَا جْنَيْنَاتْ
وْيِغْرَقُوا بِسْكُوتْ
أَجْمَل مِنِ الْحَكْيَاتْ..
ـ4ـ
مُشْ رَح بْقُولْ: نْدِمتْ
مُشْ رَح بْقُولْ: بْكِيتْ
لكِن وَقتْ ما قِمتْ
عَ جرح قَلْبِي مْشِيتْ
وِصْرَخْتْ مِنْ قَهْرِي
صَرْخِة طفل مَجْنُونْ:
يَا بْيِنْتِهِي عُمْرِي
يَا حُبِّك الْمَلْعُونْ..
**
كذبة
كْذِبتْ لِمِّنْ قِلْتْ: حُبِّكْ مَاتْ
وِخْجِلْتْ مِنْ حَالِي..
فِكَّرْتْ إِنُّو مْصَدَّقَه
هَـ الْحَرْتَقَه
الْـ رِمْيِتْ زَعَلْ
مَا بْيِنْحَمَلْ
وْحَاكْ الزَّعَلْ عَتْمَاتْ
بِتْخَوِّف لْيَالِي..
وِحْيَاةْ عَيْنِكْ بِسْرِقَا
هَاك الْقَصِيدِه وْبِحْرِقَا
لكِنْ أَنَا يَا زَنْبَقَه
عَ طُولْ كِذْبِي بْتِفْضَحُو كِلْمَاتْ
مَا بْتِخْطُر بْبَالِي..
**
بحس فيكي
ـ1ـ
بْحِسّ فِيكِي.. وَينْ مَا كِنْتِي
وِبْتِلْمَع قْبَالِي
عَ شَاشة خْيَالِي
حَبَّاتْ لُولُو مْنِ الْهَوَا صِنْتِي..
ـ2ـ
وْصَوْتِكْ.. يَا أَحْلَى صَوْتْ
مْعَلَّقْ بِـ دِينَيِّي
بْيِتْمَرْجَل عْلَيِّي
وْبِيشدّنِي لْصَوْبِكْ
تَا إِسْكُن بْقَلْبِكْ
وْبَيْنِي وْبَينِكْ.. مَوتْ!
ـ3ـ
مُشْ حَقّ حَاكِيكِي
أَوْ إِلْتِقِي فِيكِي
شَمْس الدِّنِي بْتِسْوَدّْ
انْ جِرَّبْتْ إِطْفِيكِي
انْ جَرَّبتْ إِنِّي مِدّْ
إِيدْ الْخَطِيِّه وْشِدّْ
وْبِالْعَارْ.. إِرْمِيكِي!
**
مقصوص
ـ1ـ
وَيْنْ نِصَّكْ وَيْنْ؟!
كِلْمَاتْ مَا بِتْرُوحْ مِنْ بَالِي
خَلِّتْ سَوَاد الْعَيْنْ
يِبْيَضّ بِلْيَالِي
مْجَالْهَا أَوْسَعْ مِنِ مْجَالِي..
وْصِرتْ خَايِفْ يُوقَعْ خْيَالِي
وِيْضِيعْ بَيْنِي وْبَيْنْ
إِيدَيْنْ..
فَوْق كْفُوفْهَا حْمَالِي
وْقَلْبْ نَاطِرْ طَلِّة طْفَالِي!
ـ2ـ
وِقْعَدْتْ دَرْدِشْ هَيْكْ لَحَالِي:
قَوْلكْ أَنَا مَقْصُوصْ
وْحَامِلْ عَذَاب تْنَيْنْ
وْكِل مَا شْمُوعِي تْنُوصْ
بِتْنُوصْ بِالنِّصَّيْنْ؟!
ـ3ـ
نِصِّي مَعِكْ.. تِخْمِينْ
وْمَا بعَرفِكْ مِينِكْ!
خْلِقْتِي إِلِي مْنِ سْنِينْ
وِتْأَخّرُوا سْنِينِكْ
وْصَرْلِي عُمر نَاطِرْ
تِتْزَنَّر قْنَاطِرْ
مَكْسُورة الْخَاطِرْ
بِزْهُورْ نِسْرِينِكْ..
**
زعلان
ـ1ـ
زِعْلانْ.. يِبْسِ الْوَرْدْ عَ تِمِّكْ
وْخِتْيَارْ صَارْ وْمَا قِدِرْ شَمِّكْ
وْلا حِمْلِك بْإِيدُو
وْزَيَّنْ سَهَرْ عِيدُو
وْخَلاَّ الْعُيُون بْلَحظها تْضُمِّكْ
ـ2ـ
زِعْلانْ.. رَاحْ وْبَيْعَد الْمشْوَارْ
حَامِل عَذَابُو نَار تِحْرُق نَارْ
وِشْفَافْ مشْتَاقِينْ
غِرْقُوا بْأَسَى تِشْرِينْ
وْخَزَّق تْيَابُو مْنِ الْقَهر نُوَّارْ
ـ3ـ
طلِّي انْدَهِيلُو.. بْيِسْمَعِكْ
غَاب وْتَرَكْ فِكْرُو مَعِكْ
والْعُمر عَم بِيمُرّْ
صَرْخِة ضَجَرْ
مِنْ تِمّ بَشَرْ
يِمْكِنْ عَ غَفْلِه تْوَقّعِكْ
بِالسِّرّْ..
**
غلال
ـ1ـ
نَاطْرَه غْلالِكْ
عَ بْيَادْرِي مْنِ سْنِينْ
طَلِّة جْمَالِكْ
الْـ رَح يِنقلُوا حْمَالِكْ
.. وْلَيْشْ مْأَخّرينْ؟!
ـ2ـ
وْتِعْبِتْ مِنِ خْيَالا
شْوَالاتْ عِرْقَانِه
بْيِخْطُرْ عَلَى بَالاَ
تِهْرُب مِنِ غْلاَلاَ
وْلا تْضَلّ تِعْبَانِه..
ـ3ـ
عَ بْيَادْرِي الأَحْزَانْ
عَمْ تِخْلَق مْنِ جْديدْ
بِغْلالِكْ اللِّي كَانْ
فِيهَا الْحَقل فِرْحَانْ
فَرْحِةْ طفل بِالْعِيدْ
ـ4ـ
الظَّاهِرْ جَنَاكِي وَهْمْ
مَحْصُودْ بِزْنُودِي
بْيِدْبَلْ عَ إِيد الْفهْمْ
بْيِلْحَقْ أَنِينْ السَّهْمْ
تَا يْفَرْفِط وْجُودِي..
**
لا تقسّي قلبك
ـ1ـ
نَاطِرْ عَ حْدُود الأَيَّامْ
رْجُوعِكْ لِيِّي
يَا هَـ الزَّهْرَه الْـ مَا بِتْنَامْ
غيرْ عَ دَيِّي
يَا هَـ النَّسْمِه الْـ مُشْ مَقْشُوعَه
يَا هَـ الأَحْلام الْـ عَم تُوعَى
وْتِتْرُكْ غَبْرِتْهَا بْعِينَيِّي
ـ2ـ
كِنْتِي حَدِّي.. وْفَجْأَه كْبِرْتِي
ضِيَّعْتِكْ.. مِدْرِي وَينْ صِرْتِي
نْدَهْتِلِّكْ تَا دَاخْ الْكَوْنْ
رْسَمْتِكْ عُصْفُورَه.. وِاللَّوْنْ
تْعَمْشَقْ فِيكِي لِمِّنْ طِرْتِي
ـ3ـ
حَاكِينِي.. لا تْقَسِّي قَلْبِكْ
وَحْدِي الْحَامِلْ رَايِةْ حُبِّكْ
وَحْدِي الْـ عَمْ إِكْتُبْ أَشْعَارْ
وْإِتْقَلَّبْ عَ جَمْر النَّارْ
وْإِتْحَفَّى وِالشَّوْك بْدَرْبِكْ
ـ4ـ
وْهَـ الْكِلْمَات الْـ عَمْ إِكْتِبْهَا
نْسِيتِي بْكم زَهْرَه مْطَيَّبْهَا
نْسِيتِي شُو غَمْرِتْ دِينَيْكِي
مِتل اللِّي مْفَصَّلْهَا عْلَيْكِي
وِبْقَالِبْ جِسْمِكْ صَابِبْهَا؟!
ـ5ـ
يَا تِرْتِيلِه مِن دُونْ وَزْنْ
احْتَرْقِتْ مِنْ نَهْدَاتِك كتْبِي
وِصْلِتْ نِيرَانِكْ عَ قَلْبِي
وْبَعْدِي مِتْمَسَّكْ بِـ حُبِّي
الْـ رَامِينِي بِبْحُور الْحزْنْ
ـ6ـ
اشْتَقْتِلِّكْ يَا دَمْع عْيُونِي
وِاشْتَاقُوا الشَّمْعَات لْعِيدِكْ
وِالزَّهْرَات لْلَمْسِةْ إِيدِكْ
وْيَا مَا بْسَهْرَاتِي صِلَّيْتْ
لِرْجُوعِكْ.. يَا سِتّ الْبَيْتْ
تَا إِفْرَحْ فِيكِي وِتْكُونِي
مَرْفَأ أَيَّامِي الْمَجْنُونِه..
**
صوت
ـ1ـ
فِقْتِي الصّبح وْجَوِّكْ رَايِقْ
وْبِعْيُونِكْ كَمْشِةْ آمَالْ
تْعِمْشَقْتِي بْإِيدَيِّي دْقَايِقْ
زْرَعْتِيلِي بْإِيدَيِّي غْلاَلْ
ـ2ـ
يَا عُمْرِي.. عُمْرِي مِنْ دُونِكْ
ضَايِعْ فَوْق دْرُوب دْرُوبْ
مَصْلُوب.. وْصَرْخَات عْيُونِكْ
مَا بْتَعْرِف إِنِّي مَصْلُوبْ
ـ3ـ
لَوْ فِيِّي إِكْتِبْلِكْ كِلْمِه
تْرَجِّعْنَا لْبَعْض مْنِ جْدِيدْ
تْضَوِّي بِالْعَتْمَاتْ النّجْمِه
وِتْزَيِّنْ سَهْرَات الْعِيدْ
ـ4ـ
عطْشَان.. الرَّجْفِه عَ شْفَافِي
وْبَيْنِي وْبَيْنِك صَحْرَا وْمَوْتْ
وِمْسَافِه بْتِغْتَال مْسَافِه
وْكِيفْ بَدُّو يُوصَلْ هَـ الصَّوْتْ؟!
**
تجسدي فِيّي
ـ1ـ
قْلَعْتِي تْيَابِكْ..
زَهّرتْ الِمْرُوجْ
وِالنَّارْ حَرْقِتْنِي
وْدَابِتْ عَ صدْرِي تْلُوجْ
بِالْبَردْ حَبْسِتْنِي
مِنْ سَاعِة غْيَابِكْ..
خَلِّي إِيدَيِّي تْمُوجْ
مِتل الرِّيَاح الْهُوجْ
عَ بَيْدَر شْبَابِكْ
ـ2ـ
الْعُمر حلْم زْغِيرْ
مِنْ إِيدْنَا بِيطِيرْ
بْلَيْلِه خَرِيفِيِّه
وْإِنْتِي وْأَنَا مِنْصِيرْ
مَجْمُوعة حْزَازِيرْ
عَ شْفَافْ خَبْرِيِّه
ـ3ـ
تْجَسّدِي فِيِّي..
قَبْلِك كْتَارْ تْجَسّدوا
بْأَحْبَابْ..
زَهْرَه مِسِتْحِيِّه
جْبِرْتِي عْيُونِي يِقْعَدُوا
عَ الْبَابْ
وْيِنْطروكِي الْعُمرْ
تَا يْحَوّشُوا عَنْ هَـ الْخُدُودْ السّمرْ
وِالشّفَاف الْحُمرْ
بَوْسَاتْ مِتل الْجَمرْ..
ـ4ـ
لِوَّنتْ شِعْرِي بْأَلْف لَوْن وْلَوْنْ
تَا إِشْلَحُو عْلَيْكِي
ما كِنتْ عَارِفْ رَح بْصَفِّي هَوْنْ
نَايِمْ عَ إِيدَيْكِي
طِفل.. عُمْرِي يَوْمْ
وْإِنْتِي تْغَنِّيلِي
تَا يْطِيرْ مِنِّي النَّوْمْ
وْيِسْهَر مْقَابِيلِي
ـ5ـ
تْجَسّدِي فِيِّي..
صِرْتِي أَنَا مْنِ زْمَانْ
وْمِنْ يَوْم كَان الْـ كَانْ
كِنْتِي بْعِينَيِّي..
**
حبك أعتق من أيامي
ـ1ـ
خَبِّي وِجِّكْ عَنْ عِينَيِّي
حْرَقْتِينِي.. حْرَقْتِينِي بْنُورِكْ
بِهْرُبْ مِنِّكْ.. بَسّ مَا فِيِّي
إِهْرُبْ مِنْ رِيحِةْ بَخُّورِكْ
يَا كْنِيسِه بْضَيْعَه مِنْسِيِّه
بْوَقْت الشِّدِّه بِرْجَعْ زُورِكْ
ـ2ـ
حِبَّيْتِكْ.. وِالْحُبّ حْكَايِه
مْخَرْطَشْهَا عَ وْرَاق دْفَاتِرْ
نْهَايِتْهَا بِتْكُونْ بْدَايِه
وِبْدَايِتْهَا قَلْبِي نَاطِرْ
يَا أَحْلَى مِنْ أَحْلَى آيِه
خَلِّينِي بِعْيُونِكْ سَافِرْ
ـ3ـ
حُبِّكْ.. أَعْتَقْ مِنْ أَيَّامِي
وْقَلْبِي عَ حُبِّكْ مَفْطُورْ
بِرْسِمْلِكْ شَكْلِكْ بِمْنَامِي
وْبِجْدِلِّكْ شَعْرِكْ بِزْهُورْ
وْعَ زْنُودِي لِمِّنْ بِتْنَامِي
مِنْ وِجِّكْ بِيشِعّ النُّورْ
ـ4ـ
دْرُوبِكْ عَمْ بِمْشِيهَا بْلَذِّه
وِالشَّوْك الْـ عَ دْرُوبِكْ زَهرْ
شِفْتِك بْحَالِكْ مِعْتَزِّه
وِشْفَافِكْ عَمْ تِقْطُرْ قَطْرْ
غْزَلْتِلِّكْ مِنْ جِلْدِي كَنْزِه
وْدِفَّيْتِكْ بَاقِي هَـ الْعُمرْ
ـ5ـ
صَوْتِكْ بِيرَقِّصْلِي حْوَاسِي
رَحْ إِحْبُس صَوْتِكْ عَ طُولْ
بْدِينَيِّي.. وْخَلِّي أَنْفَاسِي
تْدَوْزِنْلُو مْنِ الْلامَعْقُولْ
نُوتَه.. بْتِرْنِيمَاتَا قْدَاسِه
بْإِيدَيْنَا انْزَرْعِتْ بِحْقُولْ..
ـ6ـ
وَقْت الْـ بِتْغِيبِي.. أَفْكَارِي
بِتْجَرِّحْ عَقْلِي وْبِتْصِيرْ
تِقْدِفْلِي مَرْكَبْ أَشْعَارِي
بِبْحُور الْـ فِيهَا التّعْتِيرْ
مَطْرَحْ مَا بْتِيبَسْ أَزْهَارِي
وْبَعْدِي بْأَوّل عُمرِي.. زْغِيرْ!
ـ7ـ
يَا كِل الْكِلْمَات الْحلْوِه
مِنِّكْ مُشْ عَم يِطْلَعْ حِسّْ
بْكِلْمِه.. بِتْرِدِّيلِي الْقُوِّه
بْأَرْبَعْ خَمْس حْرُوف وْبَسّْ
"بْحِبَّكْ".. يَا عَتْمَاتِي ضَوِّي
وْزُوغِي مِنْ نُورِي يَا شَمْسْ
**
وجع بكرا
ـ1ـ
لَيْشْ الْمَحَارِمْ طَيّروا بْسُرْعَه
وِالْقَافْلِه مِشْيِتْ؟!
وْطَلِّتْ صَابِيعِكْ بِالْهَوَا تِرْعَى
وْعَ مْلاَمْحِي تِكْيِتْ..
ـ2ـ
وْشَكِّتْ السَّاعَه عْقَارِبَا بْقَلْبِي
وِازْدَادِتْ الدَّقَّاتْ
وْخَافِتْ عْيُونِي.. وْحَالْتِي صَعْبِه
تِتْوَجَّعْ الدَّمْعَاتْ..
ـ3ـ
وْصَارِتْ عَ وِجِّي تْطَرْطِشْ الْغَبْرَه
أَلْوَانْهَا وْتِمْشِي..
تِفْرُشْ عَلَى خْدُودِي وَجَعْ بُكْرَا
وِتْوَسِّع الْفَرْشِه..
ـ4ـ
وْمَا ضَلّْ عِنْدِي كْلاَمْ تَا قُولُو
ضَاع الْحَكِي فِيِّي
غْيَابِكْ قَتَلْنِي.. سَجّلِي فْصُولُو
وِتْرَحمِي عْلَيِّي!
**
ألف حجّة
ـ1ـ
كِيفْ بَدُّو يِرْفَع عْيُونُو
وْيِتْطَلَّع بْوِجِّي
وْخَانْنِّي مِنْ دُونْ مَا خُونُو
وْوَسَّخْ ضَمِيرُو بْغَبْرِة جْنُونُو
وْضَاعْ خَلْف مْوَاقْفُو الْحِرْجِه؟!..
وْرَغِمْ شَكِّي وْصِدِقْ إِحْسَاسِي
قِرَّرْتْ إِمْحِي الْوَهِمْ مِنْ رَاسِي
وْبَرِّرْ حَبِيبِي الزَّايْدِه فْنُونُو
وْإِتْصَبَّرْ.. وْإِخْلَقْ أَلفْ حِجِّه!
ـ2ـ
كِيفْ بَدُّو يْسَلِّمْ عْلَيِّي
وْيِزْرَعْ إِيدَيْهِ السّمر بِدَيِّي
وِيْقُولْ: مِشْتَقْلِكْ
إِنْتِي بْسَمَايِي نْجُومْ مُضْوِيِّه
إِنْتِي السَّعَادِه النَّايْمِه فِيِّي
إِنْتِي حَيَاتِي وْنُورْ عِينَيِّي
وْمَا حَدَا مِتْلِكْ؟!..
ـ3ـ
مِنْ جِهّتِي.. مَا عِدّتْ سِئْلانِه
تْعِوَّدْتْ عَ الْكِذْب وْعَ الِخْيَانِه..
وْصِرْتْ أَعْرِفْ كِيفْ إِتْعَمْشَقْ
بْخَشْبِةْ خَلاَصِي قَبِلْ مَا إِغْرَقْ
وْزِيدْ بَعْدِ الْيَأس إِيمَانِي
وْإِنْقُل جْبَالِي عَ بَحِرْ أَزْرَقْ
مَا لَطَّخ جْبِينُو وَلا زَوْرَقْ
وْغِبّ الْعَذَاب بْنَشْوِة السّكْرَانْ
الْـ صَار يِشْرَبْ خَمِرْ كِيفْ مَا كَانْ
وِيْحَسّبُو مْنِ الْخَمر الِمْعَتَّقْ!
ـ4ـ
شُو هَمّنِي؟.. مَعْلَيْشْ
لَوْ خَانْنِّي نِتْفِه
وْعَ دْرُوبْ الطَّيْشْ
يِدْبَحِ الْعِفِّه
الِمْهِمّْ يِبْقَالِي
أَطْوَعْ مِنِ خْيَالِي
وِيْحِطّْ رَاسُو بْغِنْجْ عَ كِتْفِي
وْغَطِّيهْ بِـ شَالِي
وِيْقُولْ: مِتْلِكْ بِالدِّنِي مَا فِي
يَا مْرَيْحَه بَالِي..
وْرَغِمْ شَكِّي وْصِدقْ إِحْسَاسِي
قِرَّرْتْ إِمْحِي الْوَهم مِنْ رَاسِي
وْطَيّرُو عَ جْوَانِحِ الصِّدْفِه
وْإِضْحَكْ بْعِبِّي وْتَمْتِمِ لْكَاسِي:
وْجُودُو مَعِي بْيِكْفِي!
**
قلبي
ـ1ـ
شُو بِعْملْ.. دَخْلَكْ يَا قَلْبِي
تِشْرِينِي ابْتَدَا
وْحَبِيبِي بَعْدُو بِالْغُرْبِه
وْعَمْ حَاكِي الصَّدَى؟!
ـ2ـ
شُو بِعْملْ؟!.. حُبِّي نِسِينِي
عَ شْطُوطْ الدِّنِي
وْعَمْ يِكْبرْ فِيِّي حَنِينِي
مِنْ سِنِه لْسِنِه
يَا قَلْبِي يَللِّي مْجَافِينِي
سْأَلْنِي شُو بِنِي؟!
هجْرَانُو.. وْلَوْعِةْ أَنِينِي
أَقْوَى مْنِ الرَّدَى
ـ3ـ
أَحْلاَمِي الْـ بَعْدَا مَزْرُوعَه
بِلْيَالِي الْبِكِي
سِقْيِت الدِّنْيِي مْنِ دْمُوعَا
تَا دَاب الْحَكِي
يَا قَلْبِي.. الشَّمْس الْـ عَمْ تُوعَى
وْتِشْبَعْ تَكْتَكِه
سَرْقِتْ مِنْ عِينَيِّي شْمُوعَا
وْضَوِّتْ هَـ الْمَدَى
ـ4ـ
والنّجْمَاتْ اللِّي عَمْ تِسْهَرْ
عَ سْطُوح السَّمَا
مَمْنُوع يْحَاكِيهَا الْقَمَرْ
حَتَّى بِالْوَمَا
لَوَّنْلاَ بْآهَاتُو صُوَرْ
وْبِالآه ارْتَمَى
يَا قَلْبِي.. لَوْ يِبْكِي الْحَجَرْ
مَا بْيِشْفقْ حَدَا..
ـ5ـ
سْرِقْنِي يَا قَلْبِي مْنِ هْمُومِي
وْنَهْدَات الْعَذَابْ
سْرِقْنِي تَا إِدْفَى عَ نْجُومِي
بَرَّدْنِي الْغِيَابْ
وْإِزْرَع الضِّحْكِه بِكْرُومِي
وْإِسْبَحْ بِالضَّبَابْ
بَرْكِي يَا قَلْبِي مْنِ هْمُومِي
بِيطِلّ النَّدَى
**
اليوم عندي عيد
ـ1ـ
خدُونِي زْرَعُونِي بْعِينَيْهَا
صْلبُونِي عَ دَيْهَا
حْبسونِي بِـ قَلْبَا
وِرْمُونِي عَ دَرْبَا
هَـ الْبِنْت اللِّي بْحِبَّا
ـ2ـ
شُو نَفْع الأَرَاضي الْمَزْرُوعَه زَهرْ
إِذا مَا بْتِتْعَطَّر بِشْوَيِّة عِطرْ
مْن الْعِطر اللِّي عْلَيْهَا؟!
وْشُو نَفْع الصَّبَايَا الشِّقر والسِّمرْ
إِذا ما بْتِتْغَسَّلْ بِدْمُوع الْفَجرْ
الْمَسْكُوبِه عَ جْرَيْهَا؟!
ـ3ـ
لَوْ تِسْأَلُوا الْقَصَايِدْ عَمْ تِنْكَتَبْ لَمِينْ
بِتْجَاوِب الْقَصَايِدْ: لَشَعرها الْحَريرْ
لِلْخَدّْ الِمْنَوَّرْ.. لِلْمَبْسَم الْحَزِينْ
لِلْقَدّْ الِمْصَوَّرْ بِزْهُور الْيَاسَمِينْ
لِلصَّدْر اللِّي صَفَّى أُسْطُورَه وِحْزَازِيرْ
لْعِينَيْهَا الْمَشْقُوقَه مِتل الصُّبح بَكِّيرْ
لِشْفَافَا الْـ عَمْ تِنْدَه تَا إِرْجَع مْنِ سْنِينْ
وِسْنِينِي نِسْيِتْنِي بِبْلاد الْمِنْسِيِّينْ!
ـ4ـ
كْفَايِه بَقَى كْفَايِه
غُرْبِه وْشَقَا وِنْحِيبْ
يَا قَلْب لَوْلايِي
مَا دِقْت هَـ التّعْذِيبْ
كِيفْ دَخْلَكْ كِيفْ فَارَقْتَا
وِبْقَسَاوِه كْتِيرْ وِدَّعْتَا؟!
لا تْقُولْ إِنَّكْ مَا عْرِفْت وَقْتَا
قِدَّيْش رَحْ تِشْتَقِلْهَا قِدَّيْشْ
وْتِمْشِي الْعُمرْ وَحْدَكْ عَلَى الْبِقْبَيْشْ
خِنْتَكْ أَنَا.. مَعْلَيْشْ
بُكْرَا إِذَا بْلادِي
بِتْفَرِّخ مْنِ جْدِيدْ
بُوعْدَكْ رَحْ تِفْرَح زْيَادِه
وْتِلْتِقِي بِحْبَايْبَكْ عَ طُولْ
وْتِضْحَكْ بِـ عبَّكْ يَا قَلْبْ وِتْقُولْ:
الْيَوْم عِنْدِي عِيدْ!
**
قرّب ع شواطينا العيد
ـ1ـ
عِمَّرْتِي بْإِيدَيْكِي حْجَارِي
تَا عِيشْ بْبَيْتِي فِرْحَانْ
وْطِفَّيْتِي بْدَمْعَاتِكْ نَارِي
وِنْسِيتِي تْرِدِّي الطُّوفَانْ!
قْطَعت مْسَافَاتِكْ بِنْهَارِي
وِاللَّيْل قْبَالِي حِرْدَانْ
خَبِّينِي.. كِتْرِتْ أَسْرَارِي
وْزِتِّي عَ كْلاَمِي النِّسْيَانْ
ـ2ـ
عُمْرِي.. مِنْ أَوِّلْتُو حْكَايِه
جِمَّعت حْرُوفَا بِكْتَابْ
وْشَمْسِكْ بِكْتَابِي مْضُوَّايِه
صَفْحَه.. مَا بْيِطْوِيهَا غْيَابْ
يَا نُورْ.. مْنِ بْلادِي جَايِي
مَسِّحْ عَنْ عِينَيِّي ضْبَابْ
وِحْبِسْنِي جُوَّات مْرَايِه
بْيِتْمَرُّوا عْلَيْهَا الأَحْبَابْ
ـ3ـ
مادِدْ إِيدِي وِسْع الْمَطْرَحْ
تَا تْنَامِي عَ كَفِّي سْنِينْ
خَلِّينِي بِوْجُودِكْ إِفْرَحْ
بِالسَّاعَات الْمِنْسِيِّينْ
وْفَوق مْوَاج بْحُورِكْ إِسْبَحْ
وْلَوِّنْ بِالْكِحْلِه بْسَاتِينْ
وْكِلّ مَا مَرْج خْدُودِكْ إِجْرَحْ
يِنْكِسْرُوا قْلامْ التّلوِينْ
ـ4ـ
شُو نَفْعِي مِنْ دُون عْيُونِكْ؟!
شُو نَفْعِي مِنْ دُون شْفَافْ؟!
كِذْبِه هَـ الْعَالَـم مِنْ دُونِكْ
أَعْمَى.. وْعَمْ بِيقُولُوا: شَافْ!
حِبَّيْتِكْ بِلْيَالِي جْنُونِكْ
حِبِّيْتِكْ.. تَا حُبِّي طَافْ
وْغَطَّى بِالنَّهْدَات فْنُونِكْ
قَصَّلِّكْ مِنْ جِلْدِي لْحَافْ..
ـ5ـ
زْغِيرِه.. وْعَم بِتْضِيق سْهُولِي
وْتِفْرَح كل ما تْمدِّي الإِيدْ
مَلْعَبْ خِيَّالِه.. وِخْيُولِي
وَدِّتْ غَبْرِتْهَا لبْعِيدْ..
رِجْعِتْ غَبْرِتْهَا مَحْمُولِه
عَ العطر الْخِلْقَانْ جْدِيدْ
شُو بَدِّكْ تَا جِبْلِك قُولِي؟
قَرَّبْ عَ شْوَاطِينَا الْعِيدْ!
**
لا تمنعوني حب..
ـ1ـ
لا تِمْنَعُونِي حِبّْ
لا تْعَتّمُوا قَلْبِي
الْحُبّ أَجْمَلْ دَرْبْ
وِالرَّبّ مْحِبِّه
ـ2ـ
خَلُّوها تْزَهِّرْ إِيدَيِّي
وِتِغْرَقْ بِالْفَرْحَه عِينَيِّي
وْشَمْعَات الْحُبّ الْمِنْسِيِّه
تْنَوِّرْ عَتْمَاتِي بِالغُربِه
ـ3ـ
غَرِيبِه الْقِصَّه غَرِيبِه
أَللـه بْأَسْرَارُو الْعَجِيبِه
هُوِّي الْـ بِينَقِّي حَبِيبِي
لا تْرِشُّوا الآهات بْدَرْبِي
ـ4ـ
جِينَا عَ دِنْيِي.. سَرْقِتْنَا
وْصَارِتْ تِلْعَب بِمْحَبِّتْنَا
لا اخْتَرْنَاهَا وْلاَ اخْتَارِتْنَا
كِذْبِه.. وْعَمّ نْعِيش الْكِذْبِه!
**
كل ما تقولي..
ـ1ـ
كلْ مَا تْقُولِي: حبّنِي أَكْتَرْ
بْحِسّْ فِكْرِي مْلَبَّكْ مْحَيَّرْ
أَفْكَارْ تَاخِدْنِي لْخَلْف الْكَوْنْ
وْأَفْكَار تِزْرَعْنِي قْبَالِكْ هَوْنْ
وْقِدَّامْ عِينَيِّي الدِّنِي تِزْغَرْ
ـ2ـ
وْكِل مَا تْقُولِي: اشْتَقتْ يَا حُبِّي
ضَوّ وْعَبِيرْ بْتِفرشِي بْدَرْبِي
وْبِتْعَيّشينِي بْدِنْيِة الأَحْلامْ
وِبْتِحِرْمِينِي اللَّيْلْ كِلُّو نَامْ
وْبِتْصَوّرِيلِي قْلُوبْ عَ قَلْبِي
ـ3ـ
وْكِل مَا تْقُولِي: تْنَعَّم بْفَنِّي
بْتِخْلَقِيلِي مْلايْكِه وْجَنِّه
وِنْجُومْ مَشْرُورَه بْسَوَاد اللَّيْلْ
وْمَرْكَبِه بَيْضَا عَ لَوْن الْخَيْلْ
وْخِيَّالْ صُورَه مْزَغرَه عَنِّي
ـ4ـ
وْكل مَا تْقُولِي: ضْحَاكْ يَا أَسْمَرْ
بِتْفُوح مِنِّي رِيحْة الزَّعْتَرْ
وِزْهُورْ خِلْقَانِه بِالِبْرَارِي
وْمَا فِي حَدَا بِوْجُودْهَا دَارِي
وْمِنَّا لَحَالاَ بْهَـالدِّنِي تِكْبَرْ
ـ5ـ
وْكل ما تْقُولِي: بْغَارْ يَا عْيُونِي
بْتِزْرَعِيلِي الشَّوكْ بِظْنُونِي
وِبْتِسِكْبِيلِي الزَّيْت فَوْق النَّارْ
وْمِن غِيرْتِكْ.. يِمْكِنْ أَنَا رَح غَارْ
وْلِلْكَونْ كِلُّو إِعْلُن جْنُونِي..
**
أزهار
تْعِجَّبتْ كِيفِكْ لابْسِي بْنُوَّارْ
فسْتَانْ.. مِنْ وَرْدُو الْوَردْ بِيغَارْ
وْمِنْ كِترْ مَا صَفَّى الْجِسِمْ مَعْجُوقْ
وْوَرْدْ خَدِّكْ بِالْوَردْ مَخْنُوقْ
وِشْوَشْتِك.. وْإِيدِي تْفِكّ زْرَارْ:
الأَزْهَارْ مَا بِتْزَيِّنَا أَزْهَارْ!
**
أربعة مشاهد حب
المشهد الأوّل:
عَ قَدّْ مَا ضْحِكْتِي وَقَعْ
نِصّ الضّحكْ عَ الأَرْضْ
يَا ضِحْكِة الْـ مَا بْتِنْسَمَعْ
ردِّي عَن شْفَافِي وَجَعْ
أَسْوَد بِـ لَوْن الْبُغْضْ
**
المشهد الثاني:
ـ1ـ
طَلِّتْ..
وْيَا رَيْتْ مَا طَلِّتْ!
الْحُبّ كِلُّو سَرقتُو
وِشْوَيّ مَا خَلِّتْ
قَلْبِي انْجَرَحْ.. يَا خْطَيّتُو!
ـ2ـ
تِمْتَمِتْ: شُو بَدِّي فِيَا
مَا كنْتْ لازِمْ حَاكِيَا
وْلا إِبْصَرَا بْنَوْمِي
تَارِي إِذَا بِتْدَارِيَا
وْمِتل الزُّهورْ بْتِسْقِيَا
بْتِضْوِي متل نجْمِه
مْنِ الصَّعبْ إِنَّكْ تِطْفِيَا!
**
المشهد الثالث:
لَيْلِه مْنِ لْيَالِي السَّهَرْ
سَرْقِتْ حَالاَ مِنْ أَهْلاَ
الْحلْوِه.. وْمَا عِنْدُنْ خَبَرْ
وْصدْفِه بيطِلّ الْقَمَرْ
فِزْعِتْ.. مِشْيِتْ عَ مَهْلاَ
وْتَمْتَمِتْ وِمْنَرْفِزِه:
لَشُو تِطْلَعْ يَا قَمَرْ؟!
**
المشهد الرابع:
رَحْ ضَلّ حِبِّكْ تَا يْدُوبْ اللَّوْنْ
وْتِدْبَل عْيُون الْبَشَرْ كِلاَّ
وْمَا يْضَلّ غَيْرِي وْغَيْرِك بْهَالْكَوْنْ
نْفَبْرِكْ بَشَرْ.. تَا يعبْدُوا أَللــه!
**
بدي حبّك
ـ1ـ
بْيِكْفِينِي.. بْيِكْفِينِي بَسّْ
أُوقَفْ إِتْطَلَّعْ فِيكِي
وْخَبِّيكِي بِعْيُونِي شَمْسْ
كِل ما تْعَتِّمْ إِضْوِيكِي
ـ2ـ
لَوْ مَنْعُوا إِيدِي تِنْمَدّْ
وْحَطُّوا بَيْنِي وْبَيْنِكْ سَدّْ
بْيِكْفِينِي حَوِّشْلِكْ وَرْدْ
وِبْأَحْلامِي إِهْدِيكِي..
ـ3ـ
بَدِّي حِبِّكْ مَهْمَا صَارْ
غِيرِتْهُنْ بِتْطَفِّي النَّارْ
الْـ حَرْقِتْ قَلْبِي لَيْل نْهَارْ
وْفِكْرِي الْـ عَمْ بِينَاجِيكي
ـ4ـ
فِرْحُوا لِمِّنْ سَرْقُوكِي
وِبْكِذْبَاتُنْ لَفُّوكِي
وْنِسْيُوا مُشْ رَحْ يِعْطُوكِي
قَدّ مَا الْحُبّ بْيِعْطِيكِي
**
آخدك مشوار
ـ1ـ
نطرت العمر تا آخدك مشوار
وخلصت سنينو وبعدك محلّك
ليش خفتي ليش؟ شو اللي صار؟
وقلبي، يا بنت الناس، بيجلّك
ـ2ـ
صرت شوفك بالحلم أزهار
وفستان من نفناف فصلّك
يا ممترسه بالبيت ليل نهار
نور الشمس بالصعب يوصلّك
ـ3ـ
بتصدقي من البيت صرت بغار
حجارو ع صدري قاعده.. بقلّك:
يا دل دلّك يهجم الختيار
متل النمر تا ياكلك كلّك
**
تا يحرز المشوار
ـ1ـ
"سهار بعد سهار
تا يحرز المشوار"
فيروز غنّتها
وسمعت أنّتها
وسعيد عقل الـ كان
وسع المدى بلبنان
عايش بنغمتها
ـ2ـ
وإنتْ شو صابك؟
سهران برا البيت
مسكّر ع أحبابك
وبالطيشنه جنّيت
يا حسرتي.. ويا ريت
لا عشقت.. لا حبيت
ولا بكيت ع غيابك
ـ3ـ
سنين إسمك ضلّ
ع شفاف هـ الجيران:
"الظاهر حبيبا طل
تا وجّها فرحان
وبإيدا زهرة فل"
وشو كنت إحلم فيك
وشوفك قمر نيسان
شو ما طلبت إعطيك
حب ووفا وتحنان
وقلك: يا سيد الكل
جوات قلبي غل
ـ4ـ
خليك عايش هيك
ضايع بسهراتك
ما عدت حنّ عليك
حْياتي مش حياتك
يا الـ كنت بو الهمّات
وترخصلك الدمّات
رح إزرع بدينيك
أربع خمس كلمات:
حبّك بـ قلبي مات
**
مشورت حتى تعبت
ـ1ـ
مِشْوَرْت حتى تعبت بالغربه
وما كنت شوفك ليش بـ دربي؟
ما في شمس رح تحجبا الحيطان
إنتي الشمس.. والكاينه قلبي
ـ2ـ
فتّشت عنك.. والعمر تعبان
سنينو من الترحال منقلبه
شفتك بـ حلمي من قديم زمان
قالوا: الحلم من أولو كذبه
ـ3ـ
وفجأه بتجي.. ومعرّقه الفستان
الخيّاط ناسي يحجب الرقبه
شفتك إلهه بجنة النسوان
ومن يومها عم يبتدي صلبي
**
ما انتهى المشوار
ـ1ـ
غيّرت فكري وقلت: رح زورك
وحقق بـ كلمه كامل ندورك
قلّك: بحبك.. رغم يللي صار
ما رضيت يدبل رونق زهورك
ـ2ـ
يا ما حلفت ما خشّ هاك الدار
بالعكس جايي فرّح شعورك
ع درب بيتك ما انتهى المشوار
بعدو بدينيي تزغرد طيورك
ـ3ـ
حبّي إلك أبعد من التذكار
حبّي حقيقه ساطعه بنورك
كان الحلم إدفى ع هاك النار
قمت احترقت بنار تنّورك
**
آخر المشوار
ـ1ـ
مشوار بعدو معلّق ببالي
بتذكرو ليالي ورا ليالي
كيف كنتي تركضي والطير
يركض وراكي.. والهوا شمالي
ـ2ـ
ومن دون حكي تقلّك: صباح الخير
أحلى شمس وتخربط خيالي
ومتل الملاك الطالع من الدير
شوفك قبالي.. والسما قبالي
ـ3ـ
حتى بجمالك ما بلاقي غير
لون البراءه بزهر الحقالي
وتا إلحقك بالسير.. جد السير
بركي يا روحي بآخر المشوار
باكل عنب من كرمك الغالي
**
كمشة حكي
ـ1ـ
كمشة حكي رميتي بدينيي
زعلان منّك ليش قلتيها
الغيره بتقتل.. فكري شويّه
ويمكن عيون الحب تعميها
ـ2ـ
رح خبرك هالبنت مين هيي
هاي جارتي اللي كنت ربيها
تمشّيت حدّا بفرد ليليه
وعنك وعني صرت إحكيها
ـ3ـ
كانت نجوم الليل مطفيه
ما رضيت درب العتم تمشيها
وصّلتها ع بيتها خْطيّه
تمشي لوحدا عيب خلّيها
ـ4ـ
حامل بإيدي شموع مضويه
وكتفا ع كتفي.. وضلّ هدّيها
خافت لَتوقع.. كبّشت فيي
زند الرجوله قلت بعطيها
ـ5ـ
كعنشتها بروحي الرياضيه
حبيت بالعتمات إحميها
بردت شويّه.. غمرتها بديي
ولبّستها الكنزه تا دفّيها
ـ6ـ
ولمن، يا روحي، تكيت عليي
صفّيت بالبوسات سلّيها
بوسات كانت عن حسن نيّه
هاي قصتي.. كل الصدق فيها
**
شربل الختيار
ـ1ـ
من الصعب قلّك، يا قمر، شو صار
دوري انتهى، وساعات عمري قصار
بسنتين يمكن إلبط السبعين
ويصير إسمي: شربل الختيار
ـ2ـ
إحمل عصا، وصلّي تا أللـه يعين
ونهار عم يتكي ع كتف نهار
كنتي بعيوني أجمل الحلوين
من سحرك نجوم السما بتغار
ـ3ـ
وكل ما سنه تمرق وتطوي سنين
تدبل ع إيدي باقة الأزهار
ما رضيت أفضح سر حبّي.. مين
متل الحبيب بيكتم الأسرار؟
ـ4ـ
كنت الجبان الخايف المسكين
رحتي معو.. حسيت جسمي انهار
خسرتك أنا.. خسرت الفرح تخمين
بحكي لحالي.. بجاوب ومحتار
ليش بعدا صورتك بالدار؟
**
مجنونه
ـ1ـ
ع طول حدّي بحبّك تكوني
إنتي الوحيده الساكنه عيوني
كتبتك قصيده ما بتعرف وزن
وْلِكْ كيف جيتي هيك موزونه؟
ع الخد لما بشوف دمعة حزن
بتكون آخرتي يا مجنونه
فوتي ع قلبي بدون شرط وإذن
لعيونك الدقّات مرهونه
ـ2ـ
متلك حدا ما شفت كل العمر
بتزهّري.. لمّا بيدبل زهر
عكس البشر إنتي تكونتي
شمس السعاده الما بتعرف قهر
بحبّك تضلّي متل ما إنتي
تا ضلّ حبّك دهر يطوي دهر
كنتي بشعري قبل ما كنتي
ولولا وجودك ضاع مني الشعر
**
كلمة لأ
ـ1ـ
اسمالله عليكي كيف طلّيتي
متل الشمس صرتي.. تحلّيتي
وكل ما تغلّي بفرشتك عم قول:
يا ريت حدّي شوي غلّيتي
ـ2ـ
قولك أنا عم حوّش المجهول
وعم إحلم ببوسات خبّيتي
تا ضلّ ناطر هيك مش معقول
أكبر طعم ببحيرتي رمَيْتي
ـ3ـ
حبي إلك بـ دمعتي مجبول
وما يوم حبل الحب رخّيتي
بقدم زهوري.. بترفضي ع طول
وتمّك بـ كلمة "لأ" سدّيتي
ـ4ـ
بستقبلك ع صوت دق طبول
وحيطك بوجّي كتير علّيتي
زتي عليي نار.. ودّي سيول
لغيرك مرا.. ما بينفتح بيتي
**
محبس غرامي
ـ1ـ
فيكي تقوليلي ليش محبوبك هرب
وعندو شهامه بتفتخر فيها العرب؟
يمكن لقاكي مايعه متل الجليد
من دون نار الموقده وجمع الحطب
ـ2ـ
بتفكّري الشبّان لعيونك عبيد
بغمزه زغيره بيركضوا عند الطلب
تا يسكروا من ريقك الصاير نبيد
وتا يفرح المسكين لو حظّو ضرب
ـ3ـ
وهلق أنا واقف ع شباكك عنيد
حامل بقلبي الثأر أقوى من اللهب
رح ركعت قدّام بيتي واستعيد
كرامة شباب قلوبهن صارت خشب
ـ4ـ
وتمثالك المصنوع من كومة حديد
بإيدي انكسر.. ما عاد معرفلو نسب
رح إخلقك بالحب من راجع جديد
ورح تحملي محبس غرامي بكل إيد
وساعتا، يا بنت، مرفوع العتب
**
طلي تا نسكر
ـ1ـ
مش سامعه الكاسات وقناني العرق
عم يندهوا الأحباب حتى يسكروا؟
وإنتي بعيده كتير.. والقلب احترق
وبعدُن عيوني ع الطريق بينطروا
ـ2ـ
بسأل لحالي: كيف هـ العمر انسرق؟
وكيف افترقنا؟ وحبنا ما أكبرو
مدّي إيديكي وخلصيني من الغرق
من دونك المجنون.. أللـه يصبّرو
ـ3ـ
طلّي تا نسكر بالهوى.. ونعمل سبق
يا بتسبقي قلبي.. يا قلبك بغمرو
وبوشوشو قديش بـ وجّي انغلق
وما رضيت مرّه حطّمو أو إكسرو
**
يا مارْقَه حَدِّي
ـ1ـ
يا مارْقَه حَدِّي
حْبَسْتِكْ بِـ عينَيّي
زِنْدِكْ عَلى زِنْدي
وْمُشْ حاسِّه فيّي
ـ2ـ
صرّخت تا نْبِحَّيْت
وِمْشِيتْ عَ مَهْلِي
قِلْتِي عَلى السّكَّيْت:
هالشّب شُو بَهْلي
ـ3ـ
أَيْوَه.. أَنا مَفْتُونْ
بِعْيُونِك الْحِلْوينْ
طِلَّعْتي مِنّي جْنُونْ
بيخَوِّف مْجانينْ
ـ4ـ
حِنّي عَلى الْمَغْرومْ
عَمْ حَلّفِكْ حِنِّي
اللي بْيظلُم الْمَظْلومْ
ما بْيِدْخُل الْجَنِّه
**
مشّي معي
ـ1ـ
مَشِّي مَعِي تَا نْطِيرْ
يَا حُلوتِي السَّمْرَا
وْنِبْعُدْ عَنِ التّفْكيرْ
وْنِسْكَرْ سَوَا.. وِنْصِيرْ
أَعْتَقْ مِنِ الْخَمْرَا
ـ2ـ
مَشِّي مَعِي.. لا اللَّيْلْ
رَحْ يِشْتِلِقْ وِيْصِيحْ
وْلا رَح تْجِنّ الرِّيحْ
انْ عِرْفِتْ عَ نَجْم سْهَيْلْ
رِحْنَا بْهَـ السَّهْرَه
ـ3ـ
نِحْنَا الأَزَلْ.. وِكْتَارْ
قَالُوا: الدِّنِي كِلاَّ
يَا حُلوِتي.. وْصَلَّى
رَبّ الْحُسنْ وِالْغَارْ
لِعْيُونْنَا مَرَّه
ـ4ـ
لا تِفْزَعِي مْنِ الْحُبّْ
حَدِّكْ أَنَا سَهْرَانْ
عَ حُبّنَا.. وْفِزْعَانْ
لَيِنْجِرِحْ هَـ الْقَلْبْ
وْنُوعَى مْنِ السَّكْرَه
**
كنت عنّي بعيد
ـ1ـ
مدَّيْت إِيدِي.. وْكِنْت عَنِّي بْعِيدْ
لا مْسِكِتْ إِيدِي وْلا الْفَرَحْ زَهَّرْ
يَا رَيْت فِيِّي إِرْجَع مْنِ جْدِيدْ
إِعْطِيكْ إِيدِي.. وِالْعُمرْ يِكْبَرْ
وِتْصِيرْ إِيدِي التَّلّْ
وِعْيُونَكْ الزَّهْرَاتْ
وْمِنِ شْفَافِي تْطِلّْ
عُصْفُورِة الْغَابَاتْ
تْرَدِّدْ مَوَاوِيلَكْ
وْعَنْ شَوْق عِينَيِّي
حْكَايَاتْ تِحْكِيلَكْ
تَا تْصِيرْ غِنِّيِّه
وَحْدِي أَنَا وْهِيِّي
مْنِقْدِر نْغَنِّيلَكْ
ـ2ـ
مِدَّيْتْ إِيدِي.. لَيْشْ
مَا خِدْتها بْإِيدَكْ؟!
ما عْرِفِتْنِي قِدَّيْشْ
مِتْشَوّقَه لْعِيدَكْ؟!
يَا حْرُوفْ كِبْرِتْ هَوْنْ
يَا شِعْر حُبّ وْلَوْنْ
يَا صَوْت شَعْب كْبِيرْ
عَاطِيهْ أَللّـه الْعَوْنْ
تْرِكْنِي.. تْرِكْنِي طِيرْ
إِيدَك وْإِيدِي جْنَاحْ
وْمَلْعَبْ عِينَيْنَا الْكَوْنْ.
**
عاشق أَنا
ـ1ـ
عَاشِقْ أَنَا
لاَ تْزِيدِي النَّارْ
خَلِّي الْهَنَا
يْهَنِّينِـي نْهَارْ
لَيْلِي طَوِيلْ
قَلْبِي عَلِيلْ
الْجفْنِ الْكَحِيلْ
خَلاَّنِي غَارْ
ـ2ـ
نَظْرِةْ عُيُونِكْ
فِيهَا دَلالْ
سَحْبِةْ جُفُونِكْ
سِحْرِ وْجَمَالْ
وْوَحْدِي الْمَتْعُوبْ
عَ دْرُوب دْرُوبْ
وْمُشْ قَادِرْ تُوبْ
أَنَا حَالِي حَالْ
ـ3ـ
كِيفْ بَدِّي عِيشْ
مِنْ دُونِكْ يَوْمْ
وْمِتْل الدَّرَاوِيشْ
مَا بْدُوقْ النَّوْمْ
ما فِي غَرَامْ
مِنْ دُونْ كَلاَمْ
وِعْيُون تْنَامْ
عَلَى صَدْرِي دَوْمْ
**
حكاية الفرقة
ـ1ـ
كْتَبْت عَ وَرْقَه
حْكَايِة الْفُرْقَه
لَمَّا هْجَرْتِينِي
لْوَحْدِي تْرَكْتِينِي
غُرْقَانْ بِالْحَرْقَه
ـ2ـ
وِشْكَلتْهَا قُونِه
بْصَدْرِي مَضْمُونِه
وْقِلْتِلّهَا: تْخَبِّي
يَا وَرِقْتِي بْعُبِّي
الْـ حَبُّونِي هَجْرُونِي
ـ3ـ
وْإِنْتِي الْوَحِيدِه
الْبَاقْيِه بْإِيدِي
حْكَايِه مَكْتُوبِي
عَنْ هَجرْ مَحْبُوبِي
عَنْ سِرّْ تِنْهِيدِه
ـ4ـ
يَا حْكَايْتِي الْمُرَّه
عَنْ لَوْعِةِ الْهُجْرَه
بْحَلّفِكْ ضَلِّي
بْهَالصَّدرْ صَلِّي
تَا تِرْجَعْ السَّمْرَا
**
بحبّك
ـ1ـ
كل ما بْتِمْرُق قدّامي
بِرْجعْ شُوفَك بِمَنامي
يا سارِق مِنْ عَيْني النّوم
لا تِسْرِقْلي أَحْلامي
ـ2ـ
مُشْ رَح قِلَّكْ إِنّي بْحِبَّكْ
مِتْل خْيالَكْ بِمْشي بْدَرْبَكْ
حَتّى عيش الْعُمْر بْقُرْبَكْ
سَكّنّي بِـ جَنِّة قَلْبَكْ
فيك بْتِفْرَح أَيّامي
ـ3ـ
متل عْيُونَك ما في عْيُون
قلبي بْضِحْكاتَك مَفْتُون
بَعْرِفْ إِنُّو جْنُونِي فْنُونْ
وْإنّو حُبّي كِلّو ظْنُونْ
ويا دلّي مِنْ غَرامي
**
عطور
ـ1ـ
لوْلا بْتَعْرِف إنتَ وَيْن
بْأَيَّا قلبْ.. بْأَيّا عَيْن
بْتِهْديني باقاتْ زْهُورْ
وْعَ جْرَيي بِتْرِشّ عْطُورْ
أَرْخَصْها "كِلْفين كْلايْن"؟
ـ2ـ
كنْت بْتِهْديني "الشّنالْ"
"نمره خمسه".. مَعْ موّالْ
وِبتْقللي: بْحِبِّك كْتيرْ
أَغْلَى مِنِّكْ ما بيصيرْ
بْيِرْخَصْلِك دَمّي والمالْ
ـ3ـ
وحدَك إنْتَ الْساكنْ فيي
بدقّة قلبي.. وِبْعينيي
عم تِمْلِكْني طولْ وعرْض
بفزَع مَرّه يطلّ البغض
وتِتْركني حْكايِه مِنْسِيّه
**
مايا
ـ1ـ
مايا الحلوه جايي
تا تِحْكيلي حكايِه
يا مْرايه تْخَبّي بالأرضْ
مايا حلوه كفايِه
بِفْزَع تنكسري من البُغضْ
وما يْعود عِنْدا مْرايِه
ـ2ـ
مايا اللي حِبّيتا
وكْتَبْتا غِنّيّه
دَلِّتْني عَ بَيْتا
وما حَنّتْ عْلَيّي
لِمِّنْ قَلْبي عْطَيْتا
سَرْقِتْلي عِينّيّي
**
حاكيني
ـ1ـ
حَاكِينِي حَاكِينِي يَا زَهْرِة الْقَصَبْ
يَا صُورَه مَرْسُومِه عَ وَرَق الشَّجَرْ
كَتَبْتِكْ قَصِيدِه وِالشِّعْر اللِّي انْكَتَبْ
ضَايِعْ بِـ هَاللَّيْلْ وْما عَادْ لُو أَثَرْ
ـ2ـ
ضِحْكِتْلِي الإِيَّام وْقَطَفْنِي الْهَوَى
وْقِلْتِلِّك: لْوَيْنْ.. حَاكِينِي شُو بِكِي؟
لا تِقْسِي عَ الْجُرْح وْبِعْيُونِك الدَّوَا
الْجُرح الْـ بِشْكِي مِنُّو بْيِتْدَاوَى بِالْحَكِي
ـ3ـ
وِالسَّمَا الْمضْوِيِّه بِقْنَادِيل الْمَسَا
عْيُونِكْ يَا صَبِيِّه نَسِّتْنِي الْقَنَادِيلْ
خَايِف لَـ يِنْسُونِي وْخَطِيِّه إِنَّسَى
وْيِرْمُونِي بْخَبْرِيِّه خَبَّرْهَا الْمُسْتَحِيلْ
ـ4ـ
يَا رَيْتْ بِقْدِرْ سَكِّرْ بْوَابْ الْعِتَابْ
وْأُوقَفْ عَ نِصّ الدَّرْبْ وِالدِّنْيِي غيَابْ
وْقِلِّكْ: أَنَا لَوْلا عْيُونِكْ مُشْ أَنَا
وْلَوْلا وْجُودِكْ هَـ الْعُمرْ كلُّو عَذَابْ
**
نَطَرْتَكْ يَا حَبِيبِي
ـ1ـ
نَطَرْتَكْ يَا حَبِيبِي
عَ مْفَارِقْ اللَّيَالِي
مِتِلْ شِي غَرِيبِه
وْعَم فَتِّشْ عَلَى حَالِي
ـ2ـ
وِعْيُونِي الْمِسْوَدِّه
مِلْيَانِه بِالدَّمْعْ
وِالدَّمْع الْـ عَ خَدِّي
جَامِدْ مِتْل الشَّمْعْ
وِحْبُوب الدَّوَالِي
ـ3ـ
وِالْعَتْم الْـ عَمْ يِزْحَفْ
عَ قْلُوب الأَحِبَّه
وِصْل لْعِنْدِي وْوَقَّفْ
وَينْ بَدِّي إِتْخَبَّى
مِنْ عَتْم اللَّيَالِي؟
ـ4ـ
نَطَرْتَكْ.. وِالطَّرِيقْ
عَمْ تِطْوَل وْتِطْوَلْ
وْهَـ الْقَلْب الْغَرِيقْ
مُشْ قَادِرْ يِتْحَمَّلْ
هجْرَانَكْ يَا غَالِي
**
مشيتي معي
.. ومن بعد ما مشيتي معي
صار العمر أحلام
صوتك بيرن بمسمعي
وع ضحكتك عم نام
وكل ما جفن عيني وِعي
بتنوّري الايام
يا شمس ع قلبي تَعي
تا بوسّك من دون وَعي
الـ بيحبّ ما بينلام
**
عوينات
عْوَيْنَاتْ سُود كْبَارْ
خِفْيِت عْيُون زْغَارْ
غَطِّتْ مَسَاحَه وْصَارْ
وِجِّكْ عَتمْ وِنْهَارْ
يَا لابْسِه الإِيشَارْ
لا تِلْعَبِي بِالنَّارْ
حُبِّي وِقِفْ عَ شْوَارْ
هَيْدَا آخِرْ إِنْذَارْ
بْقلِّكْ مَع التِّكْرَارْ:
عْوَيْنَاتْ مِنْهَا بْغَارْ.
**
ليش البكي؟
ـ1ـ
لَيْش الْبِكِي؟!.. دْمُوعِكْ مَطَرْ
شُو اللِّي عَلَى بَالِكْ خَطَرْ؟!
شُو مْزَعَّلِكْ.. قُولِي.. وْأَنَا
تَا إِبْسِطِكْ بِمْحِي الْبَشَرْ؟!
ـ2ـ
بْيِكْفِي بِكِي.. قَلْبِي انْفَطَرْ
وْمَا فِي حَدَا قَدِّي انْقَهَرْ
وْتَا تِضْحَكِي ضِحْكِةْ هَنَا
لا تْفَكّرِي بْهَاب الْخَطَرْ!
ـ3ـ
شُو مْزَعّلِكْ؟.. إِنْتِي الْقَمَرْ
إِنْتِي السِّحرْ فِيكِي انْسَحَرْ
لَيْلَى.. إِذَا بْكِيتِي بَعْدْ
عَمْ هَدِّدِكْ.. قَيْس انْتَحَرْ!
**
كرمال عينك
ـ1ـ
كِرْمَالْ عَيْنِكْ شَمِعْتِي ضُوَّيْتْ
وِتْرَكِتْ عَيْش اللَّيْل يَا عْيُونِي
وْمَا عِدْتْ إِسْهَرْ يَوْم بَرَّا الْبَيْتْ
وْلا عِدْتْ إِشْرَبْ خَمْرِة جْنُونِي
وِبْشَبَابِي كْتِيرْ شُو انْغِرَّيْتْ
وْغَامَرْتْ مَعْ حِلْوِينْ غَشُّونِي
وْأَمْوَالْ بِسْبَاق الشَّقَا زِتَّيْتْ
خْسِرْتْ مَالِي.. وْخَابِت ظْنُونِي
وْعَ حَصِيرِه عَارْيِه صِفَّيْتْ
الأَصْحَابْ وِالأَحْبَابْ تَرْكُونِي
وْمَا يْئِسْتْ مَرَّه بْهَـ الدِّنِي تْرِبَّيْتْ
وِعْرِفْت لَيْش كْتَارْ نِسْيُونِي!
ـ2ـ
وْضِلَّيْتْ جَاهِدْ تَا رْجِعْت بْنَيْتْ
مَجْدِي الْـ فِقِدْ وِتْحَسّنِتْ حَالِي
وْيَا حَيَاتِي كْتِيرْ شُو انْحِبَّيْتْ
وْشُو كِتْرِت الأَصْحَابْ مَعْ مَالِي!
وْقِرَّرْت أَسِّسْ لِلسَّعَادِه بَيْتْ
حِبَّيْتْ حِلْوِه خِلِقْهَا عَالِي
وْلا تِسْأَلِينِي مِينْ هَـ الْـ حِبَّيْتْ
بْتَعِرْفِيهَا وْشَاغْلِه بَالِي؟
هَيْدِي الْحَقِيقَه وْسِرّ مَا خِبَّيْتْ
حْكِيتْ الصَّرَاحَه وْهَيْك أَحْلالِي
وْيَا مَا بْلَيَالِي بَارْدِه صِلَّيْتْ
تَا إِحْتِفِظ بِـ حُبِّك الْغَالِي
**
شاعر
بَيِّكْ طَرَدْنِي وْمَا قِبِلْ فِيِّي
كُونْ صِهْرُو.. وْطَبْطَبْ عْلَيِّي
سْأَلْت السَّبَبْ.. تَارِي السَّبَبْ إِنِّي
مْعَتَّرْ فَقِير.. وْشُو هَـ الِخْطِيِّه؟!
قُولِي لْبَيِّكْ يِعْتِذِرْ مِنِّي
وْقُولِي بْحِبُّو كْتِيرْ يَا بَيِّي
وْقُولِي النَّاس الْـ خَبَّرُو عَنِّي
عَمْ يِكْذِبُوا وِيْبَغِّضُو فِيِّي
شَاعِرْ أَنَا.. بْصَوِّرْ أَلِفْ جَنِّه
وْعِنْدِي الشِّعِرْ يَنْبُوعْ حِنِّيِّه
بْخَلِّي الدِّنِي تِتْلَهَّفْ لْفَنِّي
بْخَلِّي الْحَرْف صُنْدُوقْ مَالِيِّه!
**
شعرك
ـ1ـ
شَعْرِكْ، يَا يِخْزِي الْعَيْن، مَا أَحْلاهْ
شَلاَّلْ وَرْد مْطَعَّم بْكَوْثَرْ
بْحِسّْ، لِمِّنْ بِلْمَحُو، إِنِّي إِلـهْ
وِبْدُوخْ، لِمِّنْ بِلْمِسُو، وْبِسْكَرْ
ـ2ـ
اللَّيْل.. خُصْلِةْ شَعْر مِنْ شَعْرِكْ
النَّجْمَاتْ، لَوْلا مْعَزّتُو، بِتْغِيبْ
مَشْلُوحْ، مِتْكِي بْغُنْج عَ ضَهْرِكْ
غَافِي.. وْعَمّ بِيفُوحْ مِنُّو الطِّيبْ
ـ3ـ
جْدَادِيلْ غَيْم مْعَلّْقَه بِالرِّيحْ
هْنِيَّالْ يَللِّي بْيُغْمُر الْغَيْمِه
مِتْل اللِّي قَضَّى الْعُمْر بِالتّسْبِيحْ
تَا يْنَالْ مِنْ رَبّ الْبَشَرْ نِعْمِه!
**
بيتك
ـ1ـ
يَا حُلْوتي.. هَـ الدَّارْ
الْمَبْنِيِّه عَ حْفَافِي
مِنْ ضُلُوعِي حْجَارْ
بَيْتِك الْغَافِي
عَ فْرَاشْ مِنْ أَزْهَارْ
نَايِـم وْدَافِي
ـ2ـ
بَيْتِكْ مَع النَّجْمَاتْ
بْيِتْغَامَزْ بْهَاللَّيْلْ
وْبِيدَرْدِشْ حْكَايَاتْ
وْبِيحَاكِي نَجْم سْهَيْلْ
وْنُور الْقَمَرْ لَوْحَاتْ
رَاسِمْ عَ تَانِي مَيْلْ
مِنْ هَـ الْفَضا الصَّافِي
ـ3ـ
بَيْتِكْ.. أَنَا بْزُورُو
كِلّ يَوْم صُبْحِيِّه
بْتِتْسَابَق طْيُورُو
تَا تْطِيرْ حْوَالَيِّي
وِبْبَوِّس زْهُورُو
بِرْمُوش عِينَيِّي
تَا حَرْقِص شْفَافِي
**
يا حلوة
ـ1ـ
يَا حُلْوِه الْـ عَمْ بِتْصَلِّي
وْبِعْيُونِكْ حُبّْ
يِمْكِن بْعَصْر الْقِلِّه
مَا تْلاقِي شَبّْ
ـ2ـ
صَايِرْ سَكْرَان بْحُبِّكْ
مَقْطُوع الْحَيْلْ
وْعَمْ بِحْلَمْ إِنِّي بْقُرْبِكْ
وِالدِّنْيِي لَيْلْ
ـ3ـ
تْوَقِّي تْوَقِّي يَا سَمْرَا
بِهَـ الأَيَّامْ
الْحُلْوِه اللِّي بْتِهْدِي زَهْرَه
مْنِ الصَّعْب تْنَامْ
ـ4ـ
رْمُوش عْيُونِكْ يَا عْيُونِي
جَوْز بْوَارِيدْ
بِرْصَاصَاتُنْ رِمْيُونِي
وْزَتُّونِي بْعِيدْ
**
يا قلب
شو كانْ بَدَّكْ يا قلْب منِّي
وعارِفْ غَرامي رَح يْجَنِّني
بُوقَفْ بِـ دَرْبا ما بْتِرْمي سْلامْ
بْقَرِّبْ لَحَدَّا.. بْتِبْتِعِدْ عَنِّي
وْمِتل الْيَتيمْ بْتِمْرقْ الإيّام
لا شَمّ، لا بَوساتْ، لا أَنّه
بْشُوف جِسْما من الْقهرْ مِنْضامْ
وْجِسْمي أنا.. عَنِّه ورا عَنِّه
حابِبْ شِي لَيْله فَوْق صدري تْنامْ
وْتِنسى الْبَشرْ.. تنسى الدّني كلاَّ
وْحَوِّشْ أَنا تفّاحة الْجَنِّه
**
ايام الصوم
ـ1ـ
"بشهر صْيامي.. عم يشكي
ويبكي المحروم"
قلتلا أكبر ضحكه
يصوم المغروم
ـ2ـ
يا حلوه أوعا تصومي
عن حبي دوْم
عيوني بحسنك مغرومه
وما بدوق النوم
ضلّي قبالي لا تقومي
بإيام الصوم
بشبع منّك.. مفهومه
وما بدّي صُومْ
**
ام الفستان الأحمر
ـ1ـ
أم الفسْتانْ الأَحْمَرْ
مَنْ حُبَّا عَمْ إِتْمَرْمَرْ
قِلْتِلاّ: إِنْتي الزَّهْرَه
قالِتْلي: الْبِنْت الشَّقْرا
بْيِعْجِبْها الشَّبّ الأَشْقَرْ
ـ2ـ
وْأَنا هَـ الأَسْمَراني
حُبّي ما إِلُو تاني
بْغَنِّيلا أَحْلى غْناني
وْهِيّي مَنْها سِئْلانِه
قَلْبا عَ طولْ مْسَكَّرْ
ـ3ـ
شو بِعْملْ قولوا يا ناسْ
عَمْ إِشْرَبْ مِنْ مُرّ الْكاسْ
بْحِبّا.. بْحِبّا بْدُونْ قْياسْ
والشَّقْرا الْـ متل الإلْماسْ
بْتِكْرَه اللّون الأَسْمَرْ
ـ4ـ
دْمُوعي عَ خْدُودي مِزْرابْ
وْإِيّامي متل الدّولابْ
الشَّقْرا اللّي عْيُونا عِنّابْ
حَرْقِت قْلوب الشَّباب
وْقَلْبِي واحدْ مُشْ أكْتَرْ
**
لو عندك ثقه فيي
ـ1ـ
لو عندِكْ ثقه فيي
كنتي بتهديني هديّه
من دون ما تخافي إمِّك
أو تستحيي من بيي
ـ2ـ
وكنتي بتزوري بيتي
ليليه عند السهر
بتقولي شو استحليتي
بجبلك.. لو كان القمر
ـ3ـ
بعمرلك دنيي جديده
من دون ما إشقع حجر
دنيي.. ببنيها يإيدي
مش ساكن فيها بشر
ـ4ـ
ومنصير نلعب ونغني
ونتفيّا تحت الشجر
إنتي وأنا بالجنه
ما منعود نعرف ضجر
**
كحله
ـ1ـ
شفتي جْبالي الْما بْتِنطالْ
رَحْ رَكّعْها كِرْمالِكْ
إنْتي الأرزِه الْـ عَم ناجيها
الِبْحُورْ الْـ عَمْ إِغْرَق فيها
وْكلْ ما جْبيني يِغْرَق أَكْتَرْ
قِلِّكْ:
يا حِلْوِه مَمْنُونِكْ
ـ2ـ
إنْتي الأَحلى مِنْ زَهْراتي
الْـ عَمْ إِسْقيها دْمُوع الْحُبّ
واقْعدْ إتْغَزَّلْ فيها
وإرسُم فَوْق وْراقا زيحْ
يِشْبَه هَالْكِحْلِه الْـ بِعْيُونِكْ
ـ3ـ
طِيَّرْتِكْ عُصْفُور زْغيرْ
ريشاتُو نِفْنافْ التَّلْج
وْعِلَّمْتُو يْغَنّيلِكْ شِعْر
مُشْ سامِع متلُو فَنَّانْ
بَرْكي بْيِحْملّي شِي "أُوف"
مِنْ صَوتِكْ..
مِنْ سِحْر فْنُونِكْ
ـ4ـ
يا هالصّرْخه الْـ ما بِسْمَعْها
يا هالْفَرْحه الْطايرْ مَعْها
يا عُمْري الْـ عَمْ عِيشُو فيكي
لَوْ غِبْتي سْنيني بْضَيِّعْها
وْما بْتِمْرُق لْحْظَه
مِنْ دُونِكْ
**
غيمه
لو فيّي إغزلْ منْ شَعْرِكْ
غَيْمِه
وْطَيِّرْها بالرّيحْ
لوّنها بْصَابيع الْحُمْرَه
الـ عَمْ تِتْرَقْوَصْ فَوْق شْفافِكْ
بَرْكي بِتْشَتّي أفراحْ
ـ2ـ
كِنتي الفَرْحَه
الـ عَمْ إِنْطِرْها
وإبْنيلا قْصُور مْضُوّايِه
إحْبِسْها بْقلبي..
تا قلبي
يْخَفّفْ دَقَّاتُو.. وْيِرْتاحْ
ـ3ـ
شِفْتِكْ جِنِّيِّه مَسْحُورَه
بْقَنينِه
وِالْبَحْر مْرايِه
مَوْجاتُو بِلَون عْيُونِكْ
وْمِتل الـ عَمْ بِيقلّي
فْتَحْها
خَلّصها..
الْبَوسِه مِفْتاحْ
ـ4ـ
..وْبِسْت الْقَنينِه تا صارْ
وِجّكْ عم بينَقِّطْ نارْ
وْفَجْأَه..
مِتل الْكِذْبِه جايي
حورِيّه
مِنْ قَلبْ حْكايه
عَ راسا إكْليل الْغارْ
وْعَ خْدُودا زَهْر التّفّاحْ
**
بنت بلادي
ـ1ـ
حابِبْ إِتْغَزَّلْ بِعْيُونِكْ
هَـ الأَصْفَى مْنِ الْخَمْرَه
وْأَنْقَى مْنِ الإِلْمَاس الْـ بَعْدُو
بْمَنْجَمْ طهْرُو نَاطِرْ..
حَابِبْ إِرْسِمْلِكْ نَهْدَاتِي
بْرِيشِه مَسْحُورَه
وْعَلِّقْهَا عَ الطُّرْقَاتْ
اللِّي مَا بْتِتْعَبْ مِنْ إِجْرَيْكِي..
ـ2ـ
حَابِبْ إِحْرِقْلِك بَخُّورِي
وْشِكّ بْشَعْرِك وَرْدِة عُمْرِي
الْمَقْطُوفِه مْنِ كْرُوم الْخَيْر
الْـ كَانِتْ تِتْدَلَّى حْوَالَيْكِي..
ـ3ـ
يَا أَجْمَلْ مِنْ وَاحَه
وْأَرْطَبْ مِنْ نقْطَات الْمَيّ
وْأَرْحَمْ مِنْ فَيَّات النَّخْلِه بْصَحْرَا
مَحْسُودِه مْن النُّور السَّاطِعْ مِنْ عِينَيْكِي..
ـ4ـ
زِعْلِت مِنِّي طْيُور الْغَابِه
وَقت الْـ سِمْعِتْنِي عَمْ غَنِّي
لإِسْمِكْ غِنِّيِّه شَعْبِيِّه
وْمَا قِدْرِتْ تِحْفَظْ كِلْمَاتَا
وْتِسْكِبْهَا كِلاَّ بْدِينَيْكِي..
ـ5ـ
يَا رَاحِة جِسْمِي وْأَفْكَارِي
بْسَاعَات الْهَمّْ الْـ عَمْ تِسْرُقْ عُمْرِي
وْتِشْلَحْنِي عَ دْرُوبِكْ
مِتل الأَيْتَام اللِّي شَمُّوا بْطَيِّة تَوْبِكْ
رِيحِة أُمُّنْ..
وِفْرِحْتِي وْهِيَّصْتِي لِمِّنْ مِنْ فَرْحِتْهُنْ
رَكْضُوا عْلَيْكِي..
ـ6ـ
خَبِّينِي بْحُضْنِك خَبِّينِي
خِتْيَرْتْ.. وْبَعْدِي مُشْ عَارِفْ
أَسْرَار الْغَصَّه اللِّي بْصَدْرِكْ
وِالتِّطْلِيعَه الْـ خَلْفَا إِشْيَا
وِالرَّجْفَاتْ اللِّي بْإِيدَيْكِي..
ـ7ـ
تْركِينِي بْشَعْرِكْ إِتْدَرَّى
وْإِتْخَبَّى مِنْ رِيح ظْنُونِي..
إِتْكِي عَ كِتْفِكْ
إِتْقَلَّدْ هَاكْ النّجْمَات الْغَنُّوجِه
الْمِتْكِيِّه عَ كْتَاف جْبَالِي..
ـ8ـ
ارْسمِينِي فَارِسْ أَحْلامِكْ..
شِدِّينِي بْدِرْعِكْ تَا رِدّ الضَّرْبَاتْ
وْإِرْفَعْ عَنْ شَعْبِي كَابُوس الظّلْمْ،
وْضَوِّي بْلَمْعِةْ سَيْفِي لْيَالِي..
ـ9ـ
شُو بْتِنْفَعْ أَيَّامِي وْإِنْتِي
أَبْعَدْ مِنْ إِيدِي الْمَمْدُودِه
وْأَصْعَبْ مِنْ أَحْلامِي الْـ عِتْقِتْ
عَ صَفْحَات خْيَالِي؟..
ـ10ـ
خَلِّينِي إِتْعَمْشَقْ فِيكِي،
بْجَدُّولات الشَّعْر الطَّايِرْ
مِتل الطّفل الْمِتْشَوَّقْ يِرْكُبْ مَرْجُوحَه
وْخَايِفْ مِنْ هَبَّات الرِّيحْ
مْنِ الْغَيْمَاتْ الْـ رَحْ بِتْطَالُو
كل مَا تْمَرْجَحْ صَوب الْعَالِي..
ـ11ـ
يَا أَكْبَرْ مِنْ كِلْمِه انْقَالِتْ
وَقْت الْـ كنَّا عَمْ نِتْشَرَّدْ
وِنْعدّ الأَطْفَال وْنرْكُضْ فِيهُنْ
تَا نْخَبِّيهُنْ
عَنْ عِينَيْن كْلابْ الْوَالِي..
ـ12ـ
يَا دْمُوع الْحِنِّيِّه
وْدَقِّةْ قَلْب الْبَيّ النَّاطِرْ رَجْعِةْ إِبْنُو..
حِبَّيْتِكْ مِنْ دُون حْكَايِه
يَا الْـ إِنْتِي حْكَايِةْ أَوْطَانِي
وْسِفْر الأَوْجَاعْ الْـ خَلِّتْنِي إِكْرَه حَالِي..
ـ13ـ
حِبَّيْتِكْ يَا بِنْت بْلادِي بْكلّ عْذَابِكْ..
بِالْكَدْمَاتْ اللِّي تَرْكُوهَا فَوْق زْنُودِكْ
فَوْق الصَّدْر الْـ بَعْدُو أَطْهَرْ
مِنْ كلّ " الْكُتْب " الْـ قِرْيُوهَا..
حِبَّيْتِكْ تَا صِرْتِي الْعُرْس
الْـ مُشْ رَحْ إِرْضَى يْفَارِقْ بَالِي..
**
حابب غيّر هَـ الكون
ومش قادر
ـ1ـ
يَا حلوة الْعِينَيْن الْمَزْرُوعَه بِالنَّارْ
إِيدَيْكِي كَتْبُونِي عَ حْجَار اللَّيْل وْمِحْيُونِي.
نَظْرَاتِكْ رِمْيُونِي بْإِشْيَا مُشْ مَقْشُوعَه
وْفِيهَا لذِّه..
حِكْيُولِي عَنِّك النَّاسْ
والنَّاس بْيِحْكُوا عَنْ حَالُنْ
قَالُولِي إِنِّكْ قَمْحَه مَا بِتْفَرِّخْ..
قَالُولِي إِنِّكْ تَلْجِه مِرْمِيِّه بِقَفْوِة جَبَلْ
وَرْدِه.. وِالنَّحْل بْيِهْرُب مِنِّكْ، قَالُولِي!
ـ2ـ
دَرْبِكْ..
مَهْمَا مْشِيت عْلَيْهَا مُشْ رَحْ أُوصَلْ
إِجْرَيِّي تِعْبُوا مِن نصّ الدَّرْبْ،
وِالْبَيْت الْـ عَ كتْف الْغَيْمِه.. بَعْدُو مْعَلَّقْ
لا الرِّيح بْتِقْربْ مِنُّو
وْلا النّسر الْعَالِي بِالْجَوّ!
إِنْتِي الطّفْلِه الْمَوْلُودِه عَ إِيدَيِّي
إِنْتِي الرَّعْشِه الْـ عَمْ بِتْنَام بْكل عْرُوقِي
شْفَافِي مشْتَاقَه لِلْحُمرَا الطَّازَه..
ـ3ـ
أَيَّامِي..
وِالْوَقْت هَارِبْ.
أَشْعَارِي..
وِالْفِكْر ضَايِعْ.
رَكْعُوا وْصَلُّولِكْ..
وْضَوُّولِكْ شَمْعَه مِنْسِيِّه بِزْوَايَا الْبُغْضْ
وْلَيْش الْبُغْضْ؟!
وَيْن مَا رحْت، وْوَيْن مَا مْشِيتْ،
بْشُوف الْبُغْضْ مِتْلِ الْمَارِدْ،
مِتْل الْحَاكِم الظَّالِـمْ،
مِتل الْجَلاَّدْ اللِّي بْتِسْجِدْلُو رْقَابْ الْكِلّْ!
الْعَالَـمْ جَنُّوا.. الْعَالَـمْ كَفْرُوا..
أَللَّـه صَفَّى بِعْيُونُنْ حلْم مزْعِجْ!
أَللـه..
أَللَّـه..
وَيْنَكْ؟!
وَيْن صْوَاعِق اللَّمْع النَّارِيِّه تْشِقّ اللَّيْل،
وْتِبْنِي أْسَاس نْهَار جْدِيدْ،
تِضْرُبْ،
تِشْقَعْ رُوس مْعِبَّايِه بِالْحِقْد الأَسْوَدْ
وْمَا بْتِسْتَاهِلْ إِنْهَا تْعِيشْ؟!
ـ4ـ
عَفْوِكْ.. عَفْو عْيُونِك اللَّوْزِيِّه،
كانْ الأَفْضَلْ إِنِّي إِسْكُتْ،
كانْ الأَفْضَلْ إِنِّي عَضّ عَ الْجرْح
وْإِسْكُتْ..
لكِن جُرْحِي مِتل النَّاسْ..
انْ مَا حْكِيتْ، بْيِحْكِي هُو!
انْ مَا شْكِيتْ، بْيِشْكِي هُو!
شِي عَجِيبْ..
الْوَاحِد الْـ مَا بَدُّو يْمُوتْ
صَارْ عَمْ يِطْلُبْ مِنْ رَبُّو تَا يْمُوتْ!
الآخْرَه هَوْنْ..
وِالْبِدَايِه كَانِتْ صَعْبِه.
الأَصْحَابْ فَلُّوا،
وْهَجْرُوا القْلُوب الْـ كَانُوا فِيهَا..
الْغَايِه بْهَـ الْعَصر بِتْبَرِّر الْوَاسْطَه
وِالْوَاسْطَه بْتِهْدُم بْيُوت النَّاس
الْـ مَا عِنْدُنْ غَايِه!
هْنِيَّالْ قَلْبِكْ شُو صَافِي،
مِتل الْبَحر الْبِكرْ،
الْـ مَا شَقِّت عْبَابُو بْوَاخِرْ.. شْخَاتِيرْ
الْـ مَا رِمْيُوا فِيهْ الصَّيَّادِين شْبَاكُنْ،
وِاللِّي حَافَظْ عَ سَمْكَاتُو
مِتلْ مَا حَافَظْتِي عَ طْهَارْتِكْ
بْعَصْر كِلُّو حِقْد وْضَغِينِه.
ـ5ـ
يَا حلْوِه..
حَابِبْ غَيِّرْ هَـ الْكَوْن وْمُشْ قَادِرْ..
حَابِبْ إِزْرَعْ نَاسْ،
وْإِقْطُفْ نَاس، وْمُشْ قَادِرْ..
إِنْسَانْ.. وْعَجْزِي أَكْبَرْ مِنْ حَالِي!
ـ6ـ
.. وِبْيِكْفِينِي إِنِّي كُونْ
طَيْر مْعَشْعَش بْقَرْمِيدِكْ
حَتَّى حُبِّك كلّ الْحُبّ
الْهرْبَانْ مِن دَعْسَات الْحقْد الأَسْوَدْ.
**
نحنا ملوك الحب
ـ1ـ
عَ السَّكْتْ..
مَشِّي مَعِي عَ السَّكْتْ..
الرِّيحْ.. مَا بْرِيدْهَا تَعْرِفْ..
تْوَقِّي، تْوَقِّي تِدْعَسِي عَ اللَّيْلْ،
بْخَافْ يِصْرُخْ..
وْمِنْ صَرْختُو يْفِيق النَّعَسْ.
ـ2ـ
النّجماتْ ما بِتْنَام..
وْشُو هَمّنِي؟!
بِقْشُرْ جِلدْ جِسْمِي
وْبِغزلُو شَرشفْ عَ لَون العَتْمْ
وْبِشْلَحُو عْلَيْكِي..
النّجْماتْ مَا بِتْشُوفْ بِالْعَتْمِه.
ـ3ـ
تْعَلّقِي فِيِّي،
تَا إِحملِكْ لَفَوْق هـ الْغَيْمَاتْ
لْحدّ عَرش أَللـه..
أَللـه بِيحِبّ الْعَاشْقِين كْتِيرْ
وْهَوْنِيكْ انْ جِعْنَا
مْنَاكُلْ الأَحْلامْ..
ـ4ـ
نِحْنَا مْلُوك الْحُبّ،
وِالْكَوْنْ طَايِعْنَا
وِالْقَدَرْ جُنْدِي
وَاقِفْ عَ عَتْبِة قَصرْنا مِتل الصَّنَمْ،
وِالأَزَل شِحَّادْ
عَمْ يِشْحَد الأَيَّامْ مِنْ أَعْمَارْنَا!
**
إنتي الدّني
ـ1ـ
لا تركضِي..
بْخَافْ إِنِّكْ تُوقَعِي
وْيِتْخَرْبَط مْسِيرْ الأَرْضْ
الأَرْضْ..
مْعَلّقَه بِزْرَارْ فسْتَانِك!
ـ2ـ
لا تضحَكِي..
بْخَافْ مِنْ كِتر الضِّحكْ
يِتْخَزّقُوا تْيَاب الْقَمَرْ
تْيَاب الْقَمرْ..
مَنْشُورَه عَ شْفَافِكْ!
ـ3ـ
إِنْتِي الدِّنِي..
وْشُو مْفَكّرَه يِعْنِي الدِّنِي
بَحر وْسَمَا وْنِتْفِة تْرَابْ؟!
لأْ..
لأْ..
ضِحْكِة شْفَافْ،
رَفِّة جفنْ،
شْوَيِّةْ دَلَعْ.. هَيْدِي الدِّنِي!
**
نامي تا غنيلك
ـ1ـ
نَامِي عَ إِيدَيِّي
تَا غَنِّيلِكْ وْأَنَا سَاكِتْ..
حْدُودْ صَوْتِي ضَيّقَه:
حُنجرَه
وِلْسَانْ..
ـ2ـ
نَامِي..
وْغَمّضِي عْيُونِكْ عَ حُلْم كْبِيرْ
وِاخْتِصْرِي الدِّنِي بْغَفْوِه
وْخَلِّي النَّعَسْ
يْحَيِّكْ الأَحْلامْ بِالإِبْرِه
يِبْنِي قْصُورْ
يْزَيِّنَا بْضَو الْبَرقْ
وْيِنقْلِكْ عَ سَمَا بْعِيدِه
بُعد الصَّحُو وِالنَّوْمْ!
ـ3ـ
مْخَدِّة وَردْ..
وِفْرَاشْ مَغْزُول بْعَبِيرْ
وْإِنْتِي وْأَنَا وِاللَّيْلْ
نَامِي..
وِاتْركِي شَعْرِك يْشَتِّي عَ وِجِّي نْعُومِيِّه
شَعْرِكْ غَيْمْ أَشْقَرْ!
**
إنتي المرا
ـ1ـ
إنتي الْمَرا.. الْما أكبَرا
صورةْ إله مْصَغّرَه
عَمْ تِخْلَقي بْأَمْرو بَشَرْ:
ضحكة طفولِه مْنَوَّرَه
لولاكي ما تْعَمَّرْ حَجَرْ
وَيْن الخليقَه يا تُرى؟
بْتِعْطي التَّمرْ متل الشَّجَرْ
ومِتْل الورود مْزَهّرَه
ـ2ـ
قالوا المَرَا.. هيّي الدّني
هيّي الأُمُومِه.. بْتِعْتِني
بْتِغْفَى عَ إيدا الوَلْدَني
وْبِتْبُوس إيدا الْخَتْيَرَه
ـ3ـ
متْل الصَّلا مِنْقَدِّسا
وتاج الطّهْر مِنْلَبِّسا
ما بْتَعِرْفْ جْنُون الْقَسا
ولا بْتعترف بِالزَّعْبَره
ـ4ـ
قِسْنا الدّني عَ قْياسْها
وْقِسْنا الْوَفَا بِمْقياسْها
رْموش الْعيون لْباسْها
وْضِحكة شْفافا الْمَسْطَره
ـ5ـ
إنتي المرا.. اللي بْتِنْسمى
شمْس الدّني بأعلى سَما
بْحضنِك نُجُومْ مْنِرْسِما
وما يَوم كنْتي مْكَبَّرَه
ـ6ـ
إنتي المَرَا.. وما أجملُو
وجِّك يا أمّي هالْحلُو
وْجُودِكْ يا أختي بْدَلّلُو
ويا بنْت كلّك مَقْدَرَه
ـ7ـ
إنتي الْمَرا.. يعني الكَنزْ
للتّربيِه.. صرتي رَمزْ
من دون لَفّ ولا غمزْ
مِتْلِك ما لاقوا جَوْهَرَه
ـ8ـ
إنتي الْمَرا.. يِعْني الشِّعِرْ
يِعْني الْغَزَلْ.. يِعْني الزّهرْ
مِنْغَسِّل جْريكي بْعطرْ
وْمِنَّشِّفا وْمِنْبَوْدِرا
ـ9ـ
ياما وْياما مْنِنْطِركْ
حتّى بْإيدَيْنا نْزَنِّركْ
بالحُبّ وَحْدو نْبَخِّركْ
تا يْصِيرْ إِسْمِك مَفْخَرَه
ـ10ـ
عَمْ حَلّفِكْ.. وَعِّي الْبَشَرْ
يِطْفُوا الْحرْب.. يِمْحُوا الْخَطَرْ
ما ضلّ طفل وما هَجَرْ
صِرْنا شُعوب مْطَيْشَرَه
ـ11ـ
إنتي المرا.. اللي بْحِبّها
وْبِحْلَم تا عيش بْقُربْها
وإمْشي الْعُمر عَ دربْها
منْ دون كذبْ وْشَوشَرَه
ـ12ـ
إنتي الْمَرا.. اللي بْيِظْلمِكْ
جاهِلْ غَبي.. ما بْيِفْهَمِكْ
كل ما قسي.. ما أَرْحَمِكْ
بْتِرْمي عْليْه الْمَغْفَرَه
ـ13ـ
إنتي الْمَرا.. بْيِركَعْ إلِكْ
أزغَر طفل.. أكْبَر مَلِكْ
يا مَيْمتي.. ما أجملِك
حَتّى بْتُراب الْمَقْبَرَه
**
فستان
عَ بُرْج سيدني خِدتْها مِشْوارْ
طْلِعْنا سَوا عَ سْطوحْ سكْرانه
بِتْهِزّ.. متْل جْرين شي خِتْيارْ
قلْت: البرج شارب دِمِلْجانه
داختْ شويّه.. والعلُو غدّارْ
ومَحْسوبْكن واقف سنديانه
تِكْيِتْ ع صدري.. وإيدها الزنار
والشَّعْر، متل الليل، غَطّاني
ما كان غَيْري وغَيْرها.. بِنْهارْ
مِشْوِبْ.. وْ"عَبْلى" كْتير عرقانه
قَلْعِتْ قَميصا.. فَكّت الأزْرارْ
حْبُوب الكرز لَوْنا أًرُجْواني
مِدَّيْت إيدي.. قِلتْ بِطْفِي النارْ
لا الرّيق طَفّاها ولا لْساني
ومنْ بعد بَوْسه وبَوسْتين انْهارْ
بُرْج سيدني.. وَفَقْعِتْ قْناني
وِشْوَشْتها: بَدّي كلينكس غْمارْ
دَمْعاتْ حُبّي نازْلِه عْيانِه
بْكَمِّل.. بْوَقِّفْ.. هَالْفِكْر مُحْتار
بِفْزَعْ تْقولي راحْ فِسْتاني
ضِحْكِتْ وقالتْ: لا تْكون حْمارْ
الفِسْتان مُشْ رَحْ إلِبْسُو تاني
**
حلم
ـ1ـ
كِنْتِي الْحُلْم الْـ عَاش بْبَالِي
الْغَيْم الْـ عَم بِيشَتِّي عْيَالِي
كِنْتِي الزَّلْغُوطَه الْـ نَاطِرْهَا
مِنْ إِمّي.. وِتْجنّ لْيَالِي
وِزْهُورِي تِعْلاَ قْنَاطِرْهَا
وِدْمُوعِي تْرَنْدِحْ مُوَّالِي
ـ2ـ
تْرَكْتِي الْبَيْت اللّي رَبَّاكِي
تا تْعِيشي بْبَيْتِي غِنِّيِّه
تْرَكْتِي إِشْيَا ما بْتِنْسَاكِي
وْصِرْتِي الْفَرْحَه اللِّي بْعِينَيّي
يا "عبلَى".. حُبِّكْ ضَوَّاكِي
شَمْس بْعَتْم الإِنْسَانِيِّه
ـ3ـ
وَيْنُو بَيِّي يُوقَفْ حَدِّي
وْإمّي تْزَلْغِط بِمْسَامِعْنَا
وَيْنُو بَيِّكْ، إِمِّكْ، بَدِّي
يِكْبَرْ هَـ الْعُرْس الْـ جَامِعْنَا
بُكْرَا بْتفْرُج بَعْد الشِّدِّه
وْأَللـه، بِالْحُبّ، بْيِجْمَعْنا
ـ4ـ
حبَّبيْتِك.. تا صَاروا جْنَاحِي
يِعْلُوا، وِالْغَيْمِه تِحْسِدْنِي
حِبَّيْتِك.. هِدَّيْتِي رْيَاحِي
الْـ كانِت عَ ذَوْقَا تْشَرِّدْنِي
عَنِّك، يا هَيْصِةْ أَفْرَاحِي
مُشْ مُمْكِنْ دِين يْبَعِّدْنِي
ـ5ـ
يَا رَبّ الْـ رَحْ بِتْكَلِّلْنا
سَجِّلْ هَـ الْكِلْمِه بِالدَّفْتَرْ
بَدّي يَاهَا، بْحِبَّا، حْمِلْنَا
عَ جْنَاحْ الْبَخُّور الأَصْفَرْ
لِعْيُونَا.. اشْتَاقُوا مْنَازِلْنَا
بَارِكْنَا.. تا الْفَرْحَه تِكْبَرْ
**
أميره
ـ1ـ
بْحِبِّكْ يَا "عبلَى" قَدّ ما بَدِّكْ
باقاتْ وَرْد مْزَيّنِه خَدِّكْ
إِنْتِي الأَمِيرَه.. وِالإِمارَه قَلْبْ
مْوَصَّى وْصِيِّه يِنْتِهِي حَدِّكْ
ـ2ـ
مْضارِبْ بَنِي عَبْس اللي حبَّيْتا
كرمال عَيْنِك بَسّ حاكَيْتا
بِالشّعر.. بالأمْجاد لِفَّيْتا
تا تْديرْ وِجّا.. وْأوصَلْ لْعِنْدِك
ـ3ـ
بِحْلَمْ شِي لَيْلِه غِلّْ بِلْحافِكْ
وْإكْتُب شِعْر عَ لَوْحِة كْتافِكْ
وْمَلْيُون بَوسِه.. بَوِّس شْفَافِكْ
وْزِندي الْقَوي يِغْفَى عَلَى زِنْدِكْ
ـ4ـ
لا تِسْمَعِي شُو ما انْحَكى بِالْحَيّْ
ولا تِفْزَعِي لَوْلا غِضِبْ شِي خَيّْ
رَحْ إِطْلبِكْ.. ما بخاف أم وْبَيّ
إلاّ إِلِي ما بْتِنْطَلَبْ يَدِّك
**
عبلى
يَا مَا وْيَا مَا نْدَهْت يَا "عبلَى" تَعِي
نْمَشْوِرْ عَ دَرْب اللَّيْلْ شِي مِشْوَارْ
وْإِسْقِي زْهُورِكْ مِنْ حَنَايَا مَدْمَعِي
وْعَلِّقْ عَ صدْرِكْ كَمْ نِجْمِه زْغَارْ
كاتِبْ قَصِيدِه.. آخ لَوْلا بِتِسْمَعِي
كِيفْ الْغَزَلْ بِيلَهِّبْ الأَشْعارْ
كِنْتِي بْقلبي، بْدُونْ ضَجِّه، بْتُوقَعِي
وْبِتْعَمّري عَ الصّدر أَجْمَلْ دارْ
وِبْتِنْزلي صَوبْ الفَرَحْ وِبْتِطْلَعي
مِتْل الأَميرَه.. مْتَوّجِه بِالْغارْ
ويا دِلّ "عَنْتَر عَبْس" لَمّا بْتِقْلَعِي
فستانِك اللّي مْطَعّم بْأَزْهارْ
مْأَكّدْ بِعَتْم اللَّيْل بَدِّكْ تِقْشَعِي
بُرْكانْ حُبّي.. تا الشّفافْ تْوَلِّعي
والنار تِشْرَب مِنْ عَطَشْها النار
**
مش خايف
مُشْ خَايِفْ يْقُولُوا:
هَدَّى السَّمَا بْطُولُو
وْغَطَّى الشَّمسْ بِالإِيدْ
وْصَارُوا يْغَنُّولُو..
خَايِفْ لَصَوْت جْدِيدْ
من تمّ شي هَبْلى
يْقِلِّلي: إِذَا بِتْرِيدْ
خَزِّقْ زِينات الْعِيدْ
ما حَبّتَكْ "عَبْلى"!
ـ2ـ
الاحلام عَمْ توعَى
مْن النّوم مَسْبوعَه
خايِفْ تِهِجْريني
وبالآخْ تِرْمِيني
وْصيرْ ذِكْرَى وْبَسّْ
وْتِفْرَح قَبيلة عَبْسْ
الْـ رَفْضِتْ تِحِبّيني
شِفْتِكْ بِعَيْني شَمْس
مُشْ حَقّ تِطْفِيني
كْتَبْتِكْ قصيدة عرسْ
وْجايي تْمَحّيني
يا طالْعَه مْن الأمس
لا تْطَلّعي ديني
**
عصفورة
ـ1ـ
لِزِّي فِيِّي.. لِزِّي كْتِيرْ
أَمِيرَه.. وْحَبِّتْ أَمِيرْ
وِجِّكْ مَرْجِه كِلاَّ زْهُورْ
وِفْرَاشَاتِي عَم بِتْطِيرْ
فَوْقَا.. تَا تْحَوِّشْ مِنْ نُورْ
الْوِجّ اللِّي مْدَوَّرْ تِدْوِيرْ
يَا "عبلى".. إِنْتِي الْبَخُّورْ
وْقَلْبِي بِيحِبّ التِّبْخِيرْ
عُصْفُورَه وْحَبِّتْ عُصْفُورْ
انْشَاللـه بِيجِيبُوا عْصَافِيرْ!
ـ2ـ
عُمْري بَدَّي إِهْديكي
وْمنِ عْيُونُنْ خَبّيكي
دَرْبي دَرْبِكْ طُول الْعُمْر
تا تِمْشينِي وْإِمْشيكي
وْعَ دَرْبِك رِشّلِكْ زَهْرْ
وِبِالْقَصايِدْ حاكِيكي
يا "عَبْلى" لو بِكْتُب دَهرْ
حَقِّك مُشْ رَح أُوفيكي
بوسيني.. مَحّيلي الْقَهْر
الْفَرْحَه مَزْرُوعَه فيكي
**
رحله العمر
"عبلى" السَّمَا.. اللِّي نْجُومْهَا لُولُو
وِمْشَكْشَكِه بْفِسْتَانْهَا الأَحْمَرْ!
"عبلى" الْقَمَرْ والشَّمْسْ.. بِيقُولُوا
وْمَلْيُونْ زَهْرَه مْلَوّنِه وْأَكْتَرْ!
رِحْلِه الْعُمرْ.. لا تْفَكّرِي بْطُولُو
وْبَوْسَاتْ لَوْلا وْجُودْهَا مْنِضْجَرْ
أَحْلَى مَسَا بِيدِقّْ عَ طْبُولُو
وْإِنْتِي وْأَنَا عَمْ نِرْقُص بْهَاللَّيْلْ
وِعْيُونْنا مْنِ الْحُبّ، عَم تِسْكَرْ
**
تغنّجت نتفه
"عَبْلى" القَصِيده الْـ بَعد ما كْتَبْتا
لكنْ بِشِعْري كْتِير حِبَّبْتا
وصار القلبْ مِن فرْحتُو مُحْتارْ
كِيف قْدِرِتْ عَ الصّدر قِرَّبْتا
نِيّمْتْها.. وِشْفَافْها عَ نارْ
تْغِنَّجْتْ نِتْفِه.. كْتِيرْ عِذَّبْتا
وْمِنْ دُونْ وَعِي لِفَّيْتها بِزْنارْ
مْنِ زْنُود.. ما في يَوْم إِدَّبْتا
فَكِّتْ صَابيعِي بِالْقَميص زْرَارْ
وْحِمّالِة الْحَجْلَيْن خِرَّبْتا
وصرت إنْزِلْ.. والْعَرَقْ فُوّارْ
وْفَارِتْ قَضايا كْتِيرْ ما حْسَبْتا
وِبْشَيّبِة السّتينْ هَـ الْخِتْيَارْ
"عَبْلَى" وْشَبابا الْيَوْم شِيَّبْتا
وِصْرِيخْها وَعَّى حيطان الدّار
لِمِّنْ عَ تاني مَيْل قِلَّبْتا
**
فارس
عُمْرِكْ.. عُمْر الزَّهْر الْـ كانْ
يْلَوِّنْ صَفْحات الْبُسْتانْ
وْإِسْمِكْ "عبلَى".. وْصَفَّى اللَّيْلْ
يِسْرُقْ مِنْ إِسْمِكْ أَلْوَانْ
يْرَكِّعْلِكْ نَجْمات سْهَيْلْ
مْنِ النَّسْمِه يْجِبْلِكْ أَلْحانْ
وْيِمْحِي بالأشْعار الْوَيْل
يْغَنّيلِك أَحْلَى الألحان
وْمِنْ مَيْل يْبُوسِكْ.. مِنْ مَيْل
يْخَزِّقْ بِسْنانُو الْفسْتانْ
وِالشَّهْقَه تِتْفَجَّرْ سَيْل
وِيْشْكُر ربّو ع الطوفانْ
وْيِرْمِيكِي عَ ضْهُور الْخَيْلْ
وْحَدِّكْ "عنتر" إِبْن الْعِزّْ
فَارِسْ مِنْ أَحْلَى الْفُرْسَانْ
**
ممنونك
كِلْما تْخَبِّينِي بِعْيُونِكْ
يا "عَبْلَى".. بْقِلِّكْ مَمْنُونِكْ
دَفّيني بْريشاتْ رْمُوشْ
الْبَرد بْيِتْعِبْني بْكانُونِكْ
سْنيني رح حَوِّلْها قْرُوشْ
تا أُوفيلِكْ كلّ دْيُونِكْ
لا تْقُولي: حُبّي مَغْشُوشْ
عَنْتَرْ بِـ قَلْبُو بِيصُونِكْ
وْكِل ما الدِّنْيِي تْصَفِّي دْغُوشْ
بْطَفِّيلِكْ عَ الصّدْر جْنُونِكْ
وْلَوْلا وَدُّوا عْلَيِّي جْيُوشْ
بْحارِبْ بِالسَّيْف الْـ عَ جْفُونِكْ
**
ليل الغربه
وِجِّكْ ضَوَّى بْلَيْل الْغُرْبِه
يا "عبلَى".. وْفَرَّحْلِي قَلْبِي
لا تْخَلِّي الْغُرْبِه تِغْلِبْنِي
وِتْخَبِّي الأَحْلامْ بْعلْبه
أَرْضِي وَحْدَا اللِّي بْتِعْجِبْنِي
رِشّيلي الأرزاتْ بْدَرْبي
الْغُرْبه عَ الخَوْف بْتِصْلبْني
وْبِتْكَحِّلْ عِينَيْها بْصَلْبي
سْنيني الْـ مَرْقِت بِتْعَذّبْني
رِدِّينِي بْإِيدِكْ يَا حُبِّي
وْجُودِي بِهَـ الْغُرْبِه.. كِذْبِه!
**
أجمل مرا
"عبلى" السَّما وِالأَرْض وِالنّجْماتْ
وِجَّا قَمَرْ.. شَعْرَا دَلَعْ غَيْمَاتْ
أَجْمَلْ مَرَا.. قَلْبِي عِشِقْهَا وْصَارْ
يْقَدِّمِلْهَا الأَشْعَارْ وِالْبَسْماتْ
وْيِجْمَعِلْهَا مْنِ جْنَيْنتُو أَزْهَارْ
بِتْجِنّ كِلْ مَا تْرَقِّصَا النَّسْمَاتْ
وِيْبَوِّسَا.. وِيْغَنِّجَا.. وِيْحْتارْ
بْأَيَّا طَريقَه يْسَمِّعَا الْكِلْمَاتْ
غنّيتْها بِـ أَجْمَلْ الأشْعارْ
تا صار إسْما شَهْقِةْ النّغماتْ
وِهْدِيتْها مْنِ مْحَبّتي زِنّارْ
وْكِرْمالْ عَيْنا بْتِرْخَصْ الدَّمَّاتْ
"عَبْلَى" الأنُوثِه مْحَبِّتا قِنْطارْ
مِتلا بنت ما جابِتْ الإِمّاتْ
بْبُوسا ما بِشْبَعْ.. بَوْسِتا مِنْ نارْ
وْجِسْما جْهَنّم شاعْلِه.. وِكْتارْ
لِمِّنْ بْمُوتْ بْيِسْأَلُوا: كِيفْ ماتْ؟
**
شمعات الحب
صِرْتِي بِالتِّسْعَه وْعِشْرِينْ
يا "عبلى".. يَا قَمُّورَه
كْبِرْتِي.. زْغِرْتِي.. مِتْلِكْ مِينْ
طَيَّرْ مِتْل الْعُصْفُورَه
وْقَطَّفْ زَهْرَات بْسَاتِينْ
كِل عُمْرِي حابِبْ زُورَا
إِنْتِي أَحْلَى مْن النّسْرِينْ
الشَّمْس بْتِهْدِيكِي نُورَا
غِلِّي بْقَلْبِي.. غِلِّي سْنِينْ
بَعْدِكْ طِفْلِه زْغَيُّورَه
وْ"عَنْتَرْ" بِيحِبّ الْحِلْوِينْ
وْإِنْتِي أَحْلَى مْنِ الصُّورَه
بْعِيدِكْ غَنِّتْ الِحْسَاسِينْ
وْرَقْصِتْلِكْ شَمْعات الْحُبّْ
وِالسِّنِه.. ابْتَدْيُوا شْهُورَا
**
قاصره
قَاصْرَه.. مِينْ قَالْ عَنِّكْ قَاصْرَه؟
يَا "عبلْتِي".. وْإِنْتِي الْعُمرْ كِلُّو
نِصّ الْعُمرْ مَسْكُوبْ تَحْت الْخَاصْرَه
سْنِينْ الْـ بِقُوا بِالصَّدرْ بِيغِلُّوا
بْصَفّ الْمَحَبّه كْتيرْ كِنْتي شَاطْرَه
نْجُوم الغَزَلْ بِـ لَيْلِكْ تْجَلّوا
إسْمِكْ.. إذا بِمْرَض بِفقْد الذّاكْرَه
رَحْ ضَلّ حِبّو وْقَدّسُو وْجِلُّو
إِنْتِي بْقَلْبِي الزَّنْبَقَه اللِّي نَاطْرَه
يْكُونْ الْقَلبْ إِخْلاصْ عَ حِلُّو
إِنْتِي الأَمِيرَه الْجَوْهَرَه اللِّي مْسَافْرَه
بِعْيُونْ "عنتر" وِالْمَرَاكِبْ وَرْدْ
وْمَوْجَاتْ.. فِينَا دَوْم يِتْسَلُّوا!
**
عيونك حلوين
عْيُونِكْ يا "عبلَى" حِلْوِينْ
خَبِّينِي فِيهُنْ عَ طُولْ
تَا حَوِّشْ زَهْر بْسَاتِينْ
أَزْرَقْ.. بِيسَوْسِحْ الِعْقُولْ
حِبَّيْتِكْ.. عُمْرِكْ عِشْرِينْ
وْلاقَيْتِكْ آخِرْ أَيْلُولْ
وْلِمِّن هاجَمْني تِشْرينْ
لْغِيتي مْن الروزْنامَه فْصُولْ
تِخْمين بْحُبِّكْ تِخْمينْ
مْحٍيتْ الْمُمْكنْ وِالمَعْقُول
مَا وَقَّفْ بِـ وِجِّي الدِّينْ
وْلا خِفْت يْدِقُّولِي طْبُولْ
"عَبْلى".. يا زَهْرَةْ نِسْرِينْ
بْحِبِّكْ.. لِلْعَالَـمْ رَحْ قُولْ
**
شمس حبي
لا تِسْأَلُوا قَلْبِي
عَنْ إِسِمْهَا الْغَالِي
زَرْعِتْ هَنَا بْدَرْبِي
وْكِلّ الصَّفَا بْبَالِي
"عبلَى" شَمِس حُبِّي
الْـ ضَوِّتْلِي بِلْيَالِي
وْخَلِّتْنِي بِالْغُرْبِه
ما إِستحِي بْحَالِي
"عبلَى" هَـ الِمْحِبِّه
أَبْيَاتْ مُوّالِي
رَحْ خَلِّدَا بْكُتْبِي
تَا الشِّعْر يِحْلالِي
**
أوعا تتكحّل
مِتْل عْيُونَا مَا فِي عْيُونْ
الصُّبْح تْصَبَّحْ بِشْمُوعَا
كِلْ ما تْفَتِّحْهُنْ بِتْكُونْ
شَمْس الدِّنْيِي عَمْ تُوعَى
وْقَلْبِي الْـ طِيَّرْتُو حَسُّونْ
وِدَّيْتُو يْزُور رْبُوعَا
حَبّْ عْيُونَا.. جَنّ جْنُونْ
وْطَفَّى جْنُونُو بِدْمُوعَا
يَا رَبِّي.. بِتْمَنَّى كُونْ
رْمُوش عْيُونَا الدَّلُّوعَه
و"عبلَى" تْقِلِّي: يَا مَجْنُونْ
أُوعَا تِتْكَحَّلْ أُوعَا!
**
عصافير الجنّه
ـ1ـ
فَتَّحْ وَرْد الْجُورِي بْبَيْتِكْ
يا "عبلَى".. لِمِّنْ حِبَّيْتِكْ
وْحِسَّيْت عْصَافِير الْجَنِّه
عَ شِبَّاكِكْ عَمْ بِتْغَنِّي
وْضِحْكِه مِنِّكْ.. ضِحْكِه مِنِّي
زِغْتِي.. ضِعْتِي.. بْعِدْتِي عَنِّي
وْقَعْتِي بِالضِّحْكِه.. وْلِمَّيْتِكْ
ـ2ـ
مِدِّي إِيدِكْ.. تِعْبِتْ إِيدِي
عَ شْفَافِكْ عَمْ يِنْطُرْ عِيدِي
وْأَللَّـه عَمْ بِيهَيِّي الزِّينِه
حَاسِسْ إِنِّكْ بِتْحِبِّينِي
وْإِنِّكْ رَحْ بِتْعَبِّي سْنِينِي
وْعَ حْدُود الضَّوّ تْلاقِينِي
وِتْزَهِّرْ فِيكِي مْوَاعِيدِي!
ـ3ـ
أَللّـه مْحَبِّه.. مْحَبِّه.. مْحَبِّه
ما فِهْمُوا أَللـه.. يا حُبِّي
كِلّ الْـ عَمْ بِيزَغِّرْ أَللـه
قُولِيلُو حَاجِي يِتْسَلَّى
أَكْبَرْ مُجْرِمْ.. مَهْمَا صَلَّى
أَللـه.. الْـ وِسْع الدِّنْيِي كِلاَّ
هَيْدَا اللِّي بْقَلْبِكْ وِبْقَلْبِي
**
قلبك
ـ1ـ
قَلْبِكْ أَبْيَضْ مِتْل الزَّنْبَقْ
مِتْل التَّلْج الْـ عَ صِنِّينْ
هْنِيَّالْ اللِّي فِيكِي تْعَلَّقْ
مَا بِتْخَوِّفْ عُمْرُو سْنِينْ
رَبِيعُو.. بِيبَلِّشْ هَلَّقْ
وْتِشْرِيِنُو.. مَا فِي تِشْرِينْ!
ـ2ـ
قَلْبِكْ.. عَمْ يِنْدَهْ بِالْغُرْبِه
حِبَّيْتَكْ.. عَكْس التَّيَّارْ
شُو بِعْمُلْ؟!.. جَاوَبْنِي رَبِّي
حِبَّا.. عْبِدْهَا.. عْمِلْهَا مْزَارْ
"عبلَى".. حُبَّا مَنُّو كِذْبِه
الْـ بِيحِبُّوا مَنُّنْ كُفَّارْ!!
ـ3ـ
قَلْبِكْ.. داوِخْني بْدَقَّاتُو
وْشُو بْحِبّْ عْلَيْهُنْ إِتْسَمَّعْ
مْنِ شِعْرِي اسْتَوْحَى نَغْمَاتُو
وْمِنْ عُمْرِي نُوتَاتُو جَمَّعْ
قُولِيلُو يْخَفِّفْ ضَرْبَاتُو
بَسْ يُوجَعْ.. قَلْبِي بْيِتْوَجَّعْ
**
خايف جن
ـ1ـ
لا تْدَبّلي عْيُونِكْ.. يا "عَبْلى" لا
فَتّحيهُنْ.. أَحْسَن وْأَحْلَى
خايِفْ لَشي مَرَّه مْقابيلُنْ جِنّْ
وْإِسْمَع كلامْ النَّاسْ عَمْ بِيرِنّْ
شُوفُوا، يا حَسْرَه، خوْتِتُو "عَبْلى"!
ـ2ـ
خايِفْ عيُوني تْغُوصْ بِعْيُونِكْ
وِيْغِزّ فِيّي خَنْجَرْ جْفُونِكْ
وْمِن دُون وَعِي أُوقَع عَ صدْر الْحُبّْ
مَرْمِغْ شْفافي.. وْدقّ يا هَالْقَلبْ
وْإِحْرُقْ إِيدَيّي بْجَمْر كانُونِكْ
ـ3ـ
خايِف "بَنِي عَبْس" الْقَبيلِه تْثُورْ
مِينْ الْـ سَمَحْلِي شَعِّلْ التَّنُّور
وْلَيْش الْعَرَقْ نازِلْ مِتلْ شِلاّلْ
وْجِسْم الْمَرا بيعانِق الرجّالْ
وْرِجّالْ عَمْ يِفْلَح أَراضي بُورْ؟
ـ4ـ
خايِفْ يا "عَبْلى" مْن الْقَبيلِه كْتيرْ
تَعْرِف جَمَعْنا بِالليالي سْريرْ
وْإنّو شَرَفْها ضاعْ بِالصّحْرا
شو رَح نْقِلُّن لَوْ إِجا بُكْرا
ومن دون زواج نْطَيّر عْصَافيرْ
**
ضوي الدني
"عبلى".. يَا "عبلى".. تِسْلَمِي لْقَلْبِي
ضَوِّي الدِّنِي.. مُشْ حَقّ تِتْخَبِّي
نْسِيتْ الْقَهْر عَ صَدْرِكْ الجَهْلانْ
وْبَعد الْبُغضْ.. عَاد وْنِمِي حُبِّي
كِنْتي الحُلمْ بِـ عَتْمِة النّسْيانْ
صارْ الْحُلمْ إِنْسان عَ دَرْبي
وْصار القلبْ بِـ طَلِّتكْ فِرْحانْ
وْصِرْتِي الْوَطَنْ عَ صَفْحِة الْغرْبِه
شِفتِكْ صَلا بِشْبِيّة الإيمانْ
وْأشْعار "عَنْتَرْ" غَنِّت الطَّلْبِه
جِرَّبِتْ إِنِّي بُوسِك وْفِزْعانْ
نِضْعَفْ سَوا.. وِتْبَلِّش اللِّعْبِه
جِسْمِكْ حلُو.. رَحْ شَبّهو بْبسْتانْ
كيفْ ما مْرَقِت عَم إلْمَحُو بْدَرْبي
مِدَّيْت إيدي حَوِّش الرّمانْ
تا فَرفطُو حبّه ورا حَبّه
سْمِعتْ صَوتِكْ ناعِمْ ورَنّانْ:
رِدّ إيدَكْ رِدّ يا جهلانْ
الرّمّان بَعْدُو ما اسْتَوَى بْعبّي
**
ضلّي اضحكي
ضَلِّي اضْحَكِي يا "عبْلتِي"، ضَلِّي اضْحَكي
اللُّولُو الْـ بِتِمِّكْ ما انْوَجَدْ إِلاَّ لِكِي
قَالُوا: الْمَرَا.. بْتِبْنِي الْبُيْوت.. بْتِسْعِدا
قِلْت: الأَمِيرَه.. عَمّرِتْلِي مَمْلَكِه
سِتّ الْحَلا.. مِنْ كلّ قَلْبِي بِعْبَدا
عِنْدا كَرَمْ.. بيغارْ مِنّو الْبَرْمَكي
يا بِنْت أَشْرَفْ ناسْ.. جُمْله بْرَدِّدا
وْبِحْكي لْعُيُونِكْ شِعْر.. ما بِشْبَع حَكِي
عَنْتَرْ أَنا.. بِتْخافْ مِنْ سَيْفي الْعِدا
ومِنْ سَيْف جِفْنِكْ.. هَالزّنود مْلَبَّكي
مِتْلِي أَنا بِالْكَوْن ما حَبِّكْ حَدا
رَغْم الْحَرْب.. رَغْم الْقِصَصْ الِمْفَبْرَكه
غِسّلتْ وِجّ الشّمسْ بِحْبُوب النّدى
وْرْمِيتْ سَيْفِي.. وْخِسِرْتْ هَالْمَعْرَكه
وْمِتل الْكِذبْ بًوَّسْت خَدِّكْ عَ الْهَدا
وْراسِي عَ صَدْرِكْ، غَصْب عَنْ راسِكْ تِكي
**
قنابل ذريّه
ـ1ـ
اللَّيْل مْغَطَّانَا جْناحُو
يا "عبلى".. غِلِّي فِيِّي
خْدُودِكْ عَ صدْري ارْتاحُوا
رَحْ إِفْرِشْلِكْ عِينَيِّي
ـ2ـ
ورح قلِّكْ: عَنْتَرْ شِدّادْ
بْإِسْمُو عَم تِتْغَنّى بْلادْ
شاعِرْ مَشْهُورْ وْأَمْجادْ
بْيِشْبَهْني مِيِّه الْمِيّه
ـ3ـ
تْذِكّرتْ الْبَوْسِه ع التِّمْ
وِالْبَوسِه بِتْشِيلْ الْهَمّْ
نِصِّكْ وَقَعْ.. قِلْت: بْلِمّْ
ما سِعْفُونِي إيديّي
ـ4ـ
يا "عَبْلَى" شِدّي الْهِمِّه
ما تْقُولي: بْتِزْعَلْ أمّي
الْبَوْسِه بِتْشَعِّلْ دَمّي
وِبِتْرَجِّفْلي إِجْرَيّي
ـ5ـ
بْحِبّكْ.. تا تْعيشي حَدّي
وْتِجْمَعْنا فَرْد مْخَدّه
وْهَدّي اْنكانْ فِيكي تْهَدّي
عِنْدي قْنابِلْ ذِرِيّه
**
حبّت أمير
"عبلى" بْحِبَّا كْتِير كْتِيرْ
أَجْمَلْ مِنْهَا ما بِيصِيرْ
بِفْرَحْ كِلّ ما النَّاس تْقُولْ:
أَمِيرَه.. وحَبِّتْ أَمِيرْ
لِعْيُونا.. رُوّضتْ خْيُولْ
مْنِ الأرضْ مْحِيتْ التّعْتيرْ
وْحُوّلتا جَنّاتْ حْقُولْ
وَردْ وْزَنْبَق وْعْصافيرْ
بْشِعْرِي عَمْ بِدْوِخْ الِعْقُولْ
أسْوَد.. لكِنْ إسْمي كْبِيرْ
بِعْشَقْها.. يا قَلْبي جُولْ
بْقَلْبَا.. في بْقَلْبا حْزازيرْ
غَنّجْها.. قِلْلاّ: "عَبّولْ"
حْبِسْها بْقَفَصْ ما بِيزولْ
لا تْخَلّي الْعَصْفُوره تْطِيرْ
**
حلوه زغيره
ـ1ـ
حِلْوِه زْغِيرِه.. عم بيقولوا
رَوْض.. وْغَامِرْتُو الأَزْهَارْ
ضِحْكِةْ سِنَّا حْبُوب اللُّولُو
شَمْس.. وْعَمْ بِتْزِتّ نْهَارْ
ـ2ـ
حِلْوِه زْغِيرِه.. فِيهَا فْرِحْنَا
وِجَّا بَدْر.. وْشَعْرَا غْيُومْ
بْتِزْرَعْ ضِحْكِتْهَا بْمَطْرَحْنَا
بِتْفَرِّخْ ضِحْكِتْهَا نْجُومْ
ـ3ـ
"عبلى".. مْرُوج وْعَمْ نِمْشِيهَا
وْعِينَيْنَا عَمْ تِحْصُدْ لَوْنْ
الْغُرْبِه كِلاَّ انْدَلْقِتْ فِيهَا
وَقْت الْـ خِلْقِتْ عِنَّا.. هَوْنْ
**
بالدّارج
حابِبْ حَاكِيكِي بِالدَّارِجْ
حَابِبْ قِلِّكْ إِنِّكْ اَكْبَرْ
إِنِّكْ أَشْطَرْ
وْصِرْتِي قَمْح الْحَقْل النَّاضِجْ
يا "عبلى".. الْـ مِنْ عُمْر النَّسْمِه
صَوْتِكْ صَفَّى الْحُلْم.. الْبَسْمِه
وْيَلِّلي الْكِلْمِه الْـ عَمْ تِحْكِيهَا
بْتِكَبَرْ فِيكِي حْرُوف الْكِلْمِه
مِدِّي إِيدَيْكِي.. فْتَحِيها
تْرَبِّتْ عَ إِيدَيْكي النَّغْمِه
**
مسرح
خَلّي صَابيعِكْ تِرْسُم الْمَطْرَحْ
الْخِيّال جايي يْرَقِّصْ حْصَانُو
وْمدِّي كْفُوفِكْ لِلْهَوا مَسْرَحْ
سَيْفُو انْكَسَرْ.. رَحْ يِسْحَبْ لْسَانُو
كِلّ ما هَجَمْ عَ خْيامِكْ بْيِفْرَح
وْكلّ ما رِجِعْ بِيخِفّ إيمانُو
قُولِي الْحَقِيقَه قَدّ ما تِجْرَحْ
قُولي: حَبيبي عَنْتَرْ زْمانُو
بِرْفُض عُيُوني بْهَالدّني تِسْرَحْ
لَوْ ما انْوَجَدْ هَالْقَلْب مِنْشَانُو
**
عم نكبر
بالعمر عم نِكْبَرْ
وبِالطُّول عَمْ نِقْصَرْ
يا "عَبْلَى" قَمْحِكْ لَيْشْ
ما زَيَّن الْبَيْدَرْ؟
لا تِسْأَلي قِدّيشْ
بِاللّيْل عَمْ إِسْهَرْ
وْوَقِّفْ عُيُوني جَيْش
عَ بابِكْ.. وْأَكْتَرْ
إِمْشِي عَلَى الطِّمَّيْشْ
وْجارْرْ مَعِي الْعَسْكَرْ
سْنِينْ الْعُمْر فُوفَيْشْ
عْلَوّاه لَوْ نِزْغَرْ
وْيِدِقّ فينا الطَّيْش
تا يْبَوّسِكْ.. عَنْتَرْ
**
عصفور أسود
عُصْفور أَسْوَدْ.. غَبَّرْ بْهَالدّارْ
والدَّارْ بَيْضَا مِتِلْ ضِحْكاتِكْ
وَسَّخْ الأُوضَه.. شَلَّعْ الأَزْهارْ
الْـ كانِت تْحبّ تْبُوسْ دَيَّاتِكْ
طَفَّى نَسايِمْ حامْلِتلي جْرارْ
مِنْ جْبالْ سِيَّجْتا بْنَظْراتِكْ
مَحِّي يا "عَبْلى" دَمعْتَيْن كْبارْ
حْبَسْتُنْ أَنا جُوَّا مْراياتِكْ
وْرِدِّي لْـ"عَنْتَرْ" ضِحِكْتُو الْقنطارْ
ما كِنْت من عُصْفُور بَدِّي غَارْ
لَوْ ما مِشِي، بالبيت، مَشْياتِكْ
**
مغروم
ـ1ـ
مَغْرومْ.. واقِعْ بينْ يَوم ويَومْ
مْهَسْتَرْ، كَأَنّي شارِب وْسكران
أَللّه سَتَرْ.. ما طَلّ شُرْطي النَّومْ
وْحَبْسِكْ بِقَلْبِي السَّاهِر وتِعبانْ
ـ2ـ
حُبِّكْ يا "عَبْلى".. كَحَّلْ عْيُوني
بْنَغْماتْ.. بِفْرَحْ حَمِّلا للرّيحْ
حُبِّكْ رَسَمْ عَ مْسارح جْنوني
ديكُورْ جامِدْ.. صعبْ إنّو يْزيحْ
**
خبيني بعينيكي الزرق
ـ1ـ
خَبِّيني بْعِينَيْكي الزُّرْق
مِنْ جمْعَه لْجُمْعَه
يَا "عَبْلى" .. فِي بْقَلْبِي حرْق
سْكبيلِك دَمْعَه
ـ2ـ
هاتي مَرْجُوحَه تْطَيِّرْنِي
بِالْعَالِي الْعَالِي
تِشْلَحْني بْغَيْمِه تْصَيِّرْنِي
نِجْمِه بِلْيَالي
لا بَدِّي شْروقْ وْلا غْيابْ
بَدِّي تِنْسينِي بِكْتَابْ
وتقولي يا بو الأحباب
رَيّحْلِي بالي
ـ3ـ
بْحِبِّكْ .. مِنْ يَوْم اللي كِنْتْ
يَا عُمْري غَنِّي
وِالْحُبّ الْـ بِعْيُونِي صُنْتْ
جَنِّه وْشُو جَنِّه
خَليكي فِيها عَ طُولْ
مِسْتَحْلِي بِـ قَلْبِكْ جُولْ
وْمَهْمَا تْمِرّ عْلَيّي فْصولْ
ما تْغِييِي عَنّي
**
كيف بدّي حبّك
كِيفْ بَدِّي حبِّكْ مُحْتارْ
يا "عَبْلى".. ودَمْعِي قنْطارْ
بحرُقْ قدّامِكْ بَخّورْ
وْبِشْلَحْ عَ إِجْرَيْكي الغارْ
والعينْ اللي بْتُعطي نورْ
لَو غارِتْ.. بِمْنِعْها تْغارْ
بْحبِّكْ.. وِالْمَحَبِّه زْهورْ
مَزْروعَه بِقْلوب كْبارْ
بْحبِّكْ.. وِالْمَحَبِّه طْيُورْ
غَنِّتْلِكْ أحْلَى الأشْعارْ
ضحكاتِكْ.. لـمِّنْ بِتْفُورْ
بْتِسْقيلي قَلْبي الْـ عَ نارْ
وْمَهْما تْطَلَّعْ فيّي "الزّورْ"
صدْقِكْ خَيْمِه بْتِحْمي الحُب
الْـ خلاّ ليلي يْصَفِّي نْهارْ
**
نزلت كحله
مْبارِحْ عَ وِجِّكْ نِزْلِتْ الْكِحْلِه
مَعْ دَمْعتِك.. يا دَمْعِة عْيُوني
وْصِرْت حَدِّكْ وِزّ.. وِالنّحْلِه
شْفافي.. اللي صَارُوا عَم يِحِرْقُوني
اسْوَدِّتْ خْدُودِكْ.. قِلْتْ أَرْيَحْلِي
غَسِّلْ بِريقي خْدُود سَحْروني
وْصِرْت، متل الطّفل، إِسْتَحْلي
بْكِحْلِة عْيُونِكْ كَحِّلْ جْفُوني
وْبَوّس التِّم الـ كانْ يِشْرَحْلِي
كيف لازِمْ خَفِّف جْنُوني
وْيا رَيْت لَحْم الْصّدر يِسْمَحْلي
آكُلْ.. وْخَبّي لِلْمسا مونِه
إِشْرَبْ.. وْيِشْرَبْ مِنْ عَرَق زَحْلِه
وْلِفّو بْإيديّي وْعَلّقو قونِه
وْجُودِك بِتَخْتي كْتيرْ أَرْبَحلي
الليْلِه يا "عَبْلى" بْخَيمْتي كُوني
**
نيران دمعي
لِمّنْ ما نِمْتِي بِالْمَسا حَدِّي
بْنيرانْ دَمْعِي حْرَقِتْ الِمْخَدّه
وْشِعْلِتْ شْفافي مِتِلْ شِي تَنُّورْ
دُوسي الْجَمرْ.. بَعْدُو عَلَى خَدِّي
وْصِرْت إِنْدُرْ لِلْمَحبّه نْدُورْ
وْإنْدَهْ يا "عَبْلى".. الصَّوْت ما يْوَدِّي
إِرْسُمْ نْجُومْ.. وْتَحْت مِنْها بْدُورْ
وْإِكْتُبْ شِعْر.. وِالرّمْل مِسْوَدّه
بْتِشْهَدْ جْرَيْكِي عَ شْواطي "صُورْ"
وْدَعْسات، متل الكذبْ، بِتْنَدّي
حَدِّكْ فِي قَلْعَه مْسَيّجِه بِبْحُورْ
هَيْدِي إِلِي.. رُوحِي سْألي جِدِّي
بْأُوضَه قَديمِه.. فْراشْها مْنِ زْهُورْ
رَحْ إنْطرِك.. رَح شَعِّلْ البَخُّورْ
تا يصير فيها.. متل ما بَدّي
**
عامود ببعلبك
متل العامود بْقَلْعة بْعَلْبِكْ
رَحْ شِكّ سَيْفي.. وْقِلِّك: بْحِبِّكْ
وْكِلْ ما عَ دَرْبي تْكَتّري الدَّعساتْ
بَدْل الرّملْ بِفْرُشْ زَهرْ دَرْبِكْ
اشتاقِتْ إِيديّي لْغَنْجِةْ اللَّمْساتْ
اشْتاقِتْ تْخَبِّي سِرّها بْعِبِّكْ
وْبِلْسان شاعِرْ آخِدْ قْياساتْ
صَدْرِك، تا إِسْمَعْ شُو حِكي قَلْبِكْ
وْإسْبَحْ بِجِسْمِكْ.. إرْبَح الْكاسات
إتْعَبْ.. وْإِغْفَى الليْل عَ جَنْبِكْ
وكلْ ما عَ تِمّي تْرَشِرْشي الْبَوساتْ
بْتِرْضِي يا "عَبْلى" قَلْبِكْ، وْرَبِّكْ
**
جبيل
بدل الْخَيْمِه بْخَلّي جْبَيلْ
تْعَمّرْلِك قَلْعَه عَ الشّط
وْبِعْمِل صَدْرِك مَرْبَطْ خَيْلْ
وِخْيُولي مْعَوَّدْها تْنطّْ
يا "عَبْلى" نجْمات سْهَيلْ
شَكْلِه بْشَعْرِك بَدِّي حطّ
مِنْ مَيْل بْمَشِّط.. مِنْ مَيْل
بْغَنِّجْلِكْ.. طَّيْرَيْن الْبَط
ـ2ـ
وِجْبَيْل الأَبْجَدِيِّه
بْتِعْطِيكي مْنِ حْروفا نُورْ
بْتِزْرَع إِسْمِكْ غِنِّيِّه
صَعْبِه يِنْساها الْمَعْمُورْ
كِرْمالا حِنِّي عْلَيِّي
إيّامي بْدُونِكْ دَيْجُورْ
بَوْسِه زْغِيرِه بْعِينَيِّي
وَبَوسِه زْغِيرِه عَ شْفافي
بَرْكي بْيُولَعْ هَـ التَّنُّورْ
**
مجدليّه
يا مِجِدْلَيَّا.. هَـ الْمِجِدْلِيِّه
الْجايي لْعِنْدِكْ.. رَحّبي فيها
سِكَّنْتها جُوّات عِينيّي
وْصفّيتْ دَمْع الْعَيْن إِسْقيها
"عَبْلى" قَصيدةْ حُب مُضْوِيِّه
بْلادْ الْعُروبِه عَم تْغَنِّيها
كْتَبْتا بإيدي.. بَسّ ما فِيّي
عَنْ كَفّ إيد الشَّوق إِمْحيها
شِعْلِةْ وَفا.. بِتْفيضْ حِنِّيِّه
ألله.. مِتلْ قِنْديلْ ضَاويها
جْداديلْها عَ الضهر مِرْخِيِّه
متل الْـ كَأَنُّو الليل كاويها
وِشْفَافْها بْراكينْ نارِيّه
بَعْرِف بِريقي كيفْ إِطْفِيها
وِخْدُودْها جَنّه طَبيعيِّه
رِضْيِتْ تا يِحْميها حَراميها
بِسْرُق البَوْسِه.. بْطَوِّلْ شْوَيِّه
وِبْصيرْ، مِتل الدّيكْ، إِشْويها
مِتْلِك، يا ضَيْعَه، غالْيِه عْلَيِّي
كِرْمالْ عَنْتَر عَبسْ.. حِبِّيها
**
عنتر
عنتر إبِنْ شدّادْ بيقلِّكْ
مِتْلُي بَطَلْ.. ما بْيِقْدر يْجِلِّكْ
عَ السّيف حافِرْ إِسْمِك مْنِ زْمانْ
وْجُوّات قَلْبُي تارِك مْحَلِّكْ
"عَبْلَى" بشِعْري اخْتَصْرِت النِّسْوانْ
وْ"عَبْلَى" بتَخْتِي، جْنُون عَ حِلِّكْ
مِنْشانْ يِبْقَى هَـ الشَّرْف منْصَان
بِـ شَرْق ضدّ الْحُبّ تا يْذِلِّكْ
وْمِنْشَان سِدّ بْواز هَـ الجيرانْ
مَجْبُورْ إِنِّي آكْلِكْ كِلِّكْ
وْلَوْلا ما كانْ بْيِسْتِحِي الِحْصانْ
أَخْبارْ حُبّي كانْ وَصَّلِّكْ
إِنّي كْتَبِتْ إِسْمِك عَلَى الْحِيطانْ
إرْسُم الصُّورَه.. وْإِقْعَدْ بْظِلِّكْ
وْمِنْ دُونْ وَعي مِنْ كِتِرْ عَطْفُو كان
عَ دَرْب بَيْتِي، بْحافْرو، دَلِّكْ
لا تْصَدّقي شو ما حَكُوا الْعرْبانْ
عَنْ قَيْس لَيْلَى.. عَنْ وَفا خُوتانْ
وَحْدي أنا المَجْنون.. يا دِلِّكْ
**
صليب وهلال
بُكْرا صَليبي بْيِغْمُر هْلالِكْ
وْمِنْ هَـ الْمَحَبِّه بْتِنْبُت عْيالِكْ
لا طائفيّه، لا بُغض، لا حْروبْ
رضْعُوا حَليبِكْ.. وَزّعُوا خْصَالِكْ
مِنْ فَردْ كِلْمِه بْيِنْقَرا الْمَكتُوبْ
ألله مْحَبِّه.. وَسّعي مْجالِكْ
بيقَرِّبْ المَحْبوب ع المَحْبوبْ
بْيِزْرَع حَنانْ بْهَيْبة رْجالِكْ
لَيْش الشَّرق يا "عَبِلتي" مَغْضُوبْ
بْيِقْتُل بِإسْم الدِّينْ أَطْفالِكْ
نُور الشّمس بِيحَوّلو لِغْروبْ
بْيِمْنَعْ يَمينِكْ يِحْضُن شْمالِكْ
مَطْلُوبْ مِنّا.. نْنَفِّذ الْمَطْلُوبْ
نْخَلِّي الصَّحارى تْعانِقْ جْبالِكْ
نْخَلِّي الْفَقيرْ الـ ع الدّرب مَصْلُوبْ
يْبَوْرِدْ لَهيبو بْفَيِّة خْيالِكْ
مْنُوصَل لَ أَلله عَ دْرُوبْ دْروبْ
وْدَرْبِك الأسْرَع.. يا هْنِيّالِكْ
**
نار القبيله
ـ1ـ
لَيْش الْقَبيلِه مْشَعّلِه نارا
وحانْ الوقتْ زورِكْ
وْإِتْنَشَّق عْطُورِكْ؟
وْكيفْ بَدّي وَقّفْ زْيارَه
كِرمالْ ضَوّ بْيِكْشُف خْيامِكْ؟
وناطِرْ تا شِكّ السّيف قدّامِكْ
وْقِلّك: أنا بْحِبّكْ
نامْ حَدِّكْ.. يِزْعَل حْرامِكْ
كل ما إيديي تْفَلْفِشْ بْعِبِّكْ
ـ2ـ
النّار.. بعدا نارْ
وِعْيُونهُنْ زنّارْ
رْجال الْقبيلِه بْيِسْهَروا
تا يْفبِرْكوا أخبارْ
ولِكْ كيف بَدُّن يِنْطروا
شْفافي أنا
فَوق الصّدر يِتْحَمروا
وْيتْجَمّروا
بليلة هنا
وْلِكْ كِيف بَدّي نامْ
وْما كَسّر عْضامِو
وإغْمُر جسمْ منضامْ
مِنْ كِتْرِة صْيامُو
ـ3ـ
عَنْترْ إبن شدّادْ ما بيخافْ
سَيْفو إذا بْيِلْمَعْ
أَبْطالْ عَمْ تِرْكَعْ
وْتِرْجُفْ رُكَبْ وِشْفافْ
وْ"عَبْلى" بْتَعرِف مِينْ
وَدّالْها حْسَاسِينْ
تْقِلاّ: أنا جايي
حامِلْ تَلْج صنّينْ
رِدّي الْبِرْدايه
كل الدّفا تِخْمينْ
عندك.. يا دِفّايِه
ـ4ـ
رَح إنْطُر النيران حتّى تْخِفّ
وْتْصيرْ جَمْر وْتِنْطِفي
وْكل المَضارِبْ تِخْتِفي
جايي أنا بِالْخِفّْ
لا صْهيل.. لا دَعْساتْ
لازِمْ بحُبِّكْ إِحْتِفي
وْلِكْ.. حَضّري الْبَوساتْ
والشّم.. واللّمْسات
وْلا تِفْزَعي لو جفِنْ إِمِّكْ رَفّ
لابس أنا الْقِبْع الْخَفي
**
طرحة
مْنِ "طْرابْلُس" رَح إِشْتِري الطَّرْحَه
والدّهب والإلْماسْ
وْحَوّل عَلَى "الْبَتْرون" تا الْفَرْحَه
تِكْمَلْ بِعين النّاسْ
وْرَح جِبْلِك الليْمونْ
والقمح والزَّيتون
مِنْ "كورْتي" الْخَضْرا
وْمِنْ "إِهْدِن" وْ"أميونْ"
حَوِّشْلِكْ الْخِضْرَه
وتفّاحة "بْشَرّي"
بِتْوَرّد خْدودِكْ
لا تْخافي يا عُمْري
مِنْ تَلْجِة جْرودِكْ
مْنِنْزلْ عَلَى "زْغرتا"
تا ناكُل الْكِبّه
و"عكّار" خِبَّرْتا
تْلاقيكي بِمْحَبّه
وتْعَمّر الدّبْكِه
وْمنْ بَعْد شي مليونْ آويها
وصلنا عَ ضيْعَه مجدها بْيِحْكي
هايْ "مِجِدْلَيَّا"..
بَسّ حِبّيها
وْغَنّي "المُولَيّا"
وْ"يا بِيّاع الْعِنَبْ وِالْعَانْبَيّا"
حتّى تْراضيها
وبأجملْ الضّحكاتْ لاقيها
يا ساكنه بْقلْبي
وْدَرْبِك عَلَى دَرْبي
نْكايِه بالغُرْبِه
رَحْ نِنْتِهي فيها
**
حكي مسموع
خَلّي الْحَكي مَسْمُوعْ
ما بْحبّ إتْخَبّى
لْـ "عَبْلى" في عِنْدي جُوعْ
خدودها مْرَبّى
وِشْفافْها مْرَبّى
انْ جِرّبْتْ شِكّ نْزولْ
بِتْصِيح: مُش مَعْقُول
عَنْتَر مُش مْرَبّى
وْهَوْنيك في نارَيْن
بْتِحْرُق على الْمَيْلَيْن
بْتِمْشِي مع الإجْرَيْن
وِبْتِنْطفي بْعِبّا
وْبَس تِدْمَع الْعِينيْن
بِرْجَع بْشِد طْلُوعْ
وْتا حَقّق الْمَشْرُوعْ
بْقِلاّ: أنا بْحِبّا
**
مسكين
تا زَعِّلْ سْلاطينْ
وْحُكّامْ مَأْجُورينْ
رَحْ إِزْرَعِكْ شَامِه
عَ خَدّ شرْق بْتِحِكْمُو شْياطينْ
وبْكل بَيتْ بْيُوجَدْ حْرامي
فيكي يا "عَبْلى" تْعَقّلي مْجانينْ
فيكي يا "عَبْلى" تْوَزّعي شْهامه
وِتْحَوّلي هَـ النّاس قِدّيسين
لا بْيِحلْفوا بِألف دينْ وْدينْ
وْلا بيكذبوا.. ولا بْيِسِرْقُوا أْسامي
وْلِكْ لَيْش دَخْلِكْ لَيْش مَعْجوقينْ
تا يِطْلَعوا عَ جَنّة الْحلْوينْ
وْقبل وَقْتا.. تْقُوم الِقْيامه
وْبَعْدِي أنا المسكين
ناطِرْ قبل تِشْرينْ
تْجِيني يا "عَبْلى" منّك عْلامِه
تِرْضي غَرامي وكل أحلامي
زَيِّنْ الْفَرْشِه بْوَرْد وِبْنَسْرين
وْمن دُون ما قِلّك تركْضي تْنامي
**
يا صبي
ـ1ـ
حاجي بَقى.. بْدَقّات قَلْبي تِلْعَبي
وِتْنَكِرْزِيني.. وْتِنْدَهيلي: يا صَبي
روحي اسْألي شْفافِكْ عَن اللي ذَلّها
روحي اسْألي شَهْقاتْ طِلْعِت كلّها
وْلولا "الصبي" عِشْتي أُنُوثِه مْعَذَّبِه
ـ2ـ
مين اللي خلاّ خَيْمتِكْ تِفْرَحْ
وْ"عَبْلَى" عَ صدري تِسْرَح وْتِمْرَح
بِالليل لَمّا قْطَفت بَوْساتِكْ
ما عادْ إِلْهُنْ حِسّ دَعْساتِكْ
نِمْتي.. تا صَفّى جِسْمِك الْمَسْرَحْ
ـ3ـ
هَيْدا "الصّبي" اللي نَحْتِكْ بْإيدَيْه
آيِةْ جَمالْ.. وْحَبْسِك بْعِينَيْه
وْخَلاَّ الرّجولِه تْحَمِّرْ خْدُودِكْ
وِتْوَقّف الْكَرْزاتْ عَ نْهُودِكْ
وْراسِكْ ما يِتْكي غَيْر عَ إجْريْه
ـ4ـ
عَنْتَرْ أنا.. لا تْغَيّري إِسْمي
بْتِزْعَل الصّحْرا.. بْتِغضب النَّسْمِه
مِنْ يَوم كنّا زْغارْ حِبَّيْتِكْ
وْصرْتي عَ صَدْري تْعَمّري بَيْتِكْ
وْمِنّك لَحالِك تِغْرَقي بْجِسْمي
**
قطيع ولاد
ـ1ـ
إنسانْ متل الدّيبْ بيعَوّي
وْإنْسان كلّو عاطفه وْقُوّه
لَيْش الْبَشَرْ بِالْعَقلْ مخْتلْفينْ
بْيِخْلَق هابيلْ بْيِقتلو قايينْ
وْبَعْدا الشّمس عَ النّاس بِتْضَوّي
ـ2ـ
لَوْ كنت أَلله بْغَيّرْ اللّي صَارْ
بْفَجّرْ شَبابْ بْشَيْبِة الْخِتْيارْ
بِطْمُر جْهَنّم بِالْورد والحُبّ
بِمْحي الْخَطِيّه الْـ عَشْعَشِت بالْقَلْب
وْأَوَّل ما بِلْغي المَوْت.. يا جَبّار
ـ3ـ
لَوْ كنتْ أَلله.. بِخْلَقْ الإنسانْ
عَ صُورْتي، تا يْعَمّرْ الأكْوانْ
وِبْفَرْد لُغّه يِنْطُقْ الْمَعْمُورْ
وإمْحي الْفقْر.. خَلّي الشَّعبْ مَيْسُورْ
وْإِهْدُم حُدود مْقَسّمِه الْبُلْدانْ
ـ4ـ
لو كنت ألله بشنُقْ شْياطين
زَرْعُوا الفِتنِه بين دين ودين
وخلّوا السّياسِه تْفَرّق الأحبابْ
قَتْلُوا، وما حِسْبُوا للضّمير حْسابْ
وْحَرْقُوا الدّني.. تا يِفْرَح الْبَنْزينْ
ـ5ـ
لكنْ أنا عَنْتَر إبْن شدّاد
بْصدْري قلْب بيحبّ.. وسْع بْلادْ
وْ"عَبْلى" حياتي وْفَرْحتي كلاّ
كلْ ما بْشُوفا بِلْمَحو لألله
جارِرْ خلف منّو قَطيع وْلادْ
**
نور الحبّ
لمّا الْحزنْ بينَتِّف جْناحي
بْقِللاّ: يا ربّات الْوَحي ارْتاحي
كنتْ شُوفِك ماشْيِه ع الدَّربْ
تْطير الْعَبايِه.. تِفْرَح رْياحي
وكل ما ضْحِكْتي.. كانْ يِضْحَك قَلْبْ
وْكلْ ما حْكيتي سَلِّم سْلاحي
وْفَجْأَه انْطَفَى بالحَيّ نُور الْحُبّْ
وْصارتْ سَراب الكذب أفْراحي
عَنْتَر، يا "عَبْلى" بالقبيله شبّْ
سكْران فِيكي.. وْسَكرتُو مْن الرّب
ليشْ حَتَّى تْكَسّري قْداحي؟
**
