The Lebanese Street
**
مثلها عام 1997 أكثر من 300 طالب وطالبة في معهد سيدة لبنان هاريس بارك سيدني ـ أستراليا. وتم تحويلها إلى مسرحية من عدة أشخاص.
**
أشخاص المسرحية
طنّوس (أبو سامي)
أم سامي (زوجة طنوس)
سامي (العريس)
نجيبة (العروس)
لبيبة (أم العروس)
بائع الذرة (مباحث)
أبو قشة (مباحث)
أم كلاكيش (مباحث)
أم يوسف
يوسف (ابن أم يوسف)
عدنان (ابن أم يوسف)
رامز (زوج حسنة)
حسنة (زوجة رامز)
سعدى (أخت رستم)
رستم (أخو سعدى)
عزيزة (حبيبة رستم وعمة العروس)
راجي (مرشح للانتخابات)
جبور
الخوري
مصورو الصحف والتلفزيون
**
المشهد الأول
(موسيقى راقصة ـ أحد شوارع هاريس بارك المكتظة باللبنانيين ـ عزيزة ونجيبة ترقصان وطنّوس يصفّق، يدخل الخوري محتجاً)
الخوري:
شو هَالْهَيْصَه حَدّ الِكْنِيسِه؟ ما عدتْ إِسْمَعْ صَوْتِي أنا وعَمْ قَدّس أَو أَعْرِف كِيف بَدِّي خَلِّصْ الْقدَّاسْ تا إِجِي وْحاكِيكُنْ..
نجيبة:
أللّـه مَعَكْ يا بُونا.. كِيفْ حالْ قِدْسَكْ الْيَوْم؟
الخوري:
فِيكِي تْقُولِيلِي لَيْش عَم تِرِقْصُوا بالشَّارِعْ؟
نجيبة:
مِتِلْ ما بْتَعْرِف يا بُونا.. شَارِعْنَا مْسَكَّرْ وْكِلُّو لِبْنانِيّين.. وْكِلُّنْ بِيحِبُّوا الرَّقِصْ..
الخوري:
هَالشَّارِعْ قَريب كْتِيرْ عَ ِكْنِيسِة سَيّدة لُبْنان، الْمَرّه التانْيِه بَدَلْ ما تْعَكّرُوا عْلَيْنا فُوتُوا سْمَعُوا الْقِدَّاسْ.. كَمانْ لا َتِنْسُوا إِنّو الْمُوسِيقَى الْعَالْيِه بِتْجِيبْ البُولِيس..
عزيزة:
لا تْخَافْ يَا بُونا.. الْبُولِيسْ مَا بْيِجِي لْعِنَّا.. وْإذا إِجَا مِنْطَعْمِيهْ كبِّه نَيِّه مَعْ كاسْ عَرَقْ..
تْفَضَّلْ ْهِزّ خَصْرَك شْوَي..
الخوري:
صَارْ لازِمْلِك إعتِرافْ يا عَزِيزِه.. بَرْكِي أَللّـه بْيِرِزْقِك عَريسْ وْبيقَصّرلِكْ لْسانِكْ شْوَيّ.
عزيزة:
لَيْش الرَّقص خَطِيِّه يا بُونا؟ تْعَا تا عَلّمَكْ الرَّقصْ.
الْخُوري:
عِنْدِي دَفْنِه بِكْنِيسِةْ مارْ شَرْبِلْ وما لازِمْ إِتْأَخَّرْ.
"يخرج الأبونا"
أم يوسف:
"تطل من شباك بيتها"
وَطُّوا صَوْتْكُنْ يا جَماعَه.. أنا مَرا خِتْيارَه وبدّي نَامْ.
عزيزة:
شُو بِكِي يَا إمْ يُوسِفْ هَيْئتِك مِتْل الْبُونا.. مَا بِتْخَلِّينَا لا نِحْكِي وْلا نِرْقُص..
أم يوسف:
"تخرج الى الشارع"
أنا مَرَا شَغِّيلِه.. عِنْدِي وْلادْ بَدِّي طَعْمِيهُنْ.. مُشْ مِتِلْكُنْ.. قَاعْدِينْ عَ الْمِدْرِي شُو إسْمُو؟
طنّوس:
إِسْمُو.. نَابِلّيُون بُونَا ِبرْتْ أُوفِيسْ.
أم يوسف:
بُونَا بِرْت أُوفِيسْ! كَانِتْ ظَبْطِت أَكْتَرْ لَوْ قِلْتْ بُونَا مَارُونْ.. بُونَا أَنْطُونْ.. إِسْمُو الأَنِمبْلُويْمِنْت أُوفيسْ.
طنوس:
شُو ما كَانْ إِسْمُو يْكُونْ.. لْسَانِي بَلَّشْ يِظْبُطْ بِالتِّنِكْلِيزِي..
أم يوسف:
أَللّـه يْجَرّصَكْ يَا طَنُّوسْ.. لْسَانَكْ مِتْل الْحَيِّه..
طنوس:
شُو عَمْ بِتْقُولِي يا أمّ يوسِف؟
أم يوسف:
ما قِلْتْ شِي أَبَداً.. لُغّتَكْ التِّنِكْلِيزِي مِمْتَازِه..
طنوس:
أَنَا عارِفْ هَالشِّي. مْبَارِحْ رِحِتْ عَ بُورْمَتَّا وِاشْتَرَيْت بِيسِي..
أم يوسف:
واللـه.. وْشُو لَوْنَا هالبيسي؟
طنوس:
لَوْنَا.. قَرِيب كْتِيرْ مِنْ لَوْنْ الْكَعْكُولاَّ.
عزيزة:
بْتَعْرِف يَا طَنُّوسْ.. إِذَا عِرْفِتْ فِيكْ شِرْكِةْ الْبِيبْسي كُولا والْكُوكَاكولاَ.. بْيِخِرْبُوا بَيْتَكْ..
طنوس:
بْيِخِرْبُوا بَيْتِي.. لَيْشْ شُو عْمِلْتْ؟!
عزيزة:
وْبَعْدَكْ عَم تِسْأَلْ.. رُوحْ عَ بَيْتَكْ قَبِلْ مَا تِنْزَعْ إِسِمْ شي شِرْكِه جْدِيدِه..
طنوس:
وَاللَّـه بْهَالشَّارِعْ مَا حَدَا عَم يِفْهَمْ عْلَيِّي.. حتّى مَرْتِي أم سامي.. بُكْرا رَحْ رُوحْ عَ سِيدْني.. وْمِدّ جْرَيِّي عَ الْبَحرْ..
عزيزة:
Say hello do the Darling Harbour
طنوس:
آخِدْ معي لَفْلُوفِةْ زَعْتَرْ.. مُشْ رَحْ آكُلْ هَامْبِرغَر.. الزَّعْتَرْ مْنِيحْ لِلْمَرَا الِـبْرِغْنَا..
أم يوسف:
لَيْش ما بِتْرُوحْ هَلَّق عَ سِيدْنِي وْبِتْرَيِّحْنا مِنَّكْ وْمِن غْلاظْتَكْ..
طنوس:
بَايْ بَايْ.. إِفِيرْ وَنْ.
أم يوسف:
أللـه مَعَكْ يَا طَنُّوسْ.. يَا مَنْحُوسْ
عزيزة:
هَالطّنُوسْ هَيْدَا.. مُشْ مَعْقُولْ يِحْكِي إِنْكْلِيزِي.. لاَزِمْ نْسَمِّيهْ طَنُّوسْ التِّنِكْلِيزِي.
أم يوسف:
صَرْلُو سِنْتَيْنْ عَمْ بِيرُوح عَ ْمَدْرَسة الإنكليزي.. وْكِلّ سِنِه بْيِعطُو شْهَادِه طُولو.. وْمَعْ هَيْدَا وْكِلُّو بيضَلّ حمار..
عزيزة:
مأكّد حَدَا عَم يِعْمِلُّو فَرْضُو..
نجيبة:
لا بَقَا تِحْكُوا عَ طنّوس.. خَلُّونَا بِالأَعْظَمْ ..
عزيزة:
وشُو هُوِّي الأَعْظَمْ يَا بِنْت خَيّي؟ الظّاهِر بَعْدِك بِتْحِبِّي إِبْنُو سامي.. صَحّ أم غِلْطانِه؟
نجيبة:
"تتلبّك بعض الشيء"
لا أبداً يا عَمّتي.. بَسّ جَايِي الإِنْتِخَابَاتْ وْلاَزِمْ نْكُونْ صَوْتْ واحِدْ..
عزيزة:
صَوْتْ وَاحِدْ!!.. بَدِّكْ عَجِيبِه مْنِ السَّمَا..
نجيبة:
لازِمْ نِنْتِخِبْ الشَّخْصْ الْقَادِرْ يْسَاعِدْنَا.. الشَّخْصْ الْـ بِيخَلِّينَا نْنَامْ بِبْيُوتْنَا مِنْ دُونْ فَزَعْ.. الشَّخْص اللّي مَا بْيِتْبَرْطَلْ..
عزيزة:
فَإِذَنْ.. لازِمْ نِنْتِخِبْ قِدِّيسْ مِنْ بَيْنْ هَالْقِدِّيسينْ..
أم يوسف:
بْسِيدْنِي بَسّ.. صارْ عنَّا مْرَشّحِينْ لبْنانيين عَ الانْتِخابات.. أَكْتَرْ ما عِنَّا مُغْتِرْبينْ!
عزيزة:
هَيْدي هِيِّي الدّيمقراطِيّه.. طِلِع مِنَّا رؤساء ووزراء ونُوّاب.. وأَللَّه يْزيدُنْ..
أم يوسف:
ما شِي بِالْكِتْرِي.. جِينَا عَ أُوسترالْيَا تا نْعِيشْ بِأَمَانْ.. وَيْنْ الأَمَانْ؟ الشّاطِرْ يْلاَقِيه..
"يطل طنوس مجدداً"
طنوس:
وْشُو بْتِعْطِينِي إِذَا لْقَيْتُو..
أم يوسف:
مَا حَدَا فِيه يْلاَقِيهْ.. صَرْلُو سْنِينْ ضَايِعْ..
طنوس:
تْعَا بِسْ بِسْ بِسْ .. تْعَا بِسْ بِسْ بِسْ
أم يوسف:
لْمِينْ عَمّ بِتْبِسْبِس يَا ذَكِي عَصْرَكْ؟
طنوس:
لِلأَمَانْ.. الأَمَانْ مِتِلْ الِبْسَيْنْ عَيِّطِيلُو بْيِجِي..
عزيزة:
هَيْهَاتْ عَ إِيَّامْ زَمَانْ.. كِنَّا نْحِطّْ مِصْرِيَّات الحِلاَّبْ قِدَّامْ الْبَابْ.. وكِنَّا نِشْتِرِي الْجَرِيدِه وْنِشْلَحْ حَقَّا عَ بَابْ المكتبه.. وْهَلَّقْ كِلْ شِي تْغَيَّرْ.. صِرْتْ إِنْتْ وْنَايِمْ عَم يِسِرْقُوا أَنْفَاسَكْ..
نجيبة:
مِينْ عَمْ يِعْمِلْ فِينَا هَيْكْ؟
"يدخل راجي"
راجي:
دُود الْخَلّْ مِنُّو وْفِيهْ.. يَا جَمَاعَه وْلاَدْنَا فِيهُنْ الْبَرْكِه..
طنوس:
لا تْوَطِّي حَيْطْنَا قِدَّامِ النّاسْ.. نِحْنَا أَحْسَنْ جَالْيِه..
راجي:
فِكَّرْتْ النَّعَامِه وَحْدَا بِتْحِبّ تْغَطِّي رَاسَا بِالرَّمِلْ.. تَارِي فِي نَعَامَاتْ كْتِيرْ.. غَطُّوا رَاسْكُنْ بِالرَّمِلْ بَرْكِي بْيِخْنِقْكُنْ.. وْمَا بِتْعُودُوا تْشُوفوا بِالْمَرَّه.
عزيزة:
قَدِّمْ عَ الإِنْتِخَابَات يَا رَاجي.. وْحَقّْ مَار مَانُوسْ حَدْشِيتْ بْتِرْبَحْ..
طنوس:
أَنَا ما بِنْتِخْبُو .. حَكْيُوا بِيفَزِّعْ.. بَدِّي رُوح عَ الْحِمَّامْ..
راجي:
كْتِيرْ نَاسْ عَمْ يِفْزَعُوا مْنِ الْحَقِيقَه.. بَسّ ما بيرُوحوا عَ الْحِمَّامْ..
"يغني على لحن ع الندّا"
ـ1ـ
عَ النَّدَّا النَّدّا النَّدَّا
مَا عَادْ حَدَا يِتْهَدَّى
هَلِّلي عَمْ يِنْكُرْ سِتُّو
مَرْتُو عَمْ تِنْكُرْ جِدَّا
ـ2ـ
يا شَعْبِي اللِّي كِنْتِ كْبِيرْ
وْمَاشِي بْهَالْكَوْن مْشَاوِيرْ
بِلَّشْت تْعِيش التِّعْتِيرْ
شُوفْ بْلادَكْ شُو بَدَّا
ـ3ـ
جَايِي عَ الْغِرْبِه تَا تْعِيِش
جْدُودَكْ بِالأَصْل دْرَاوِيشْ
جِسْمَكْ مَا بْيِلْبَقْلُو الرِّيشْ
جِلْدَكْ بِالْغُرْبِه صَدَّى
**
المشهد الثاني
"تدخل سعدى وهي تزغرد"
سعدى:
لي لي لي.. بَعِدْ سَاعِتَيْنْ.. خَيِّي رَاجِعْ مِنْ لُبْنَانْ.. وِاللِّي بِيحِبّو لاَزِمْ يِسْتَقِبْلُو عَ الْمَطَارْ..
طنوس:
كِلّ سِكَّانْ الشَّارِعْ بِيحِبُّوا خَيِّكْ.. بَدِّكْ يَاهُنْ يِنِزْلُوا عَ الْمَطَارْ؟
سعدى:
اللّي ما بْيِنْزِلْ حْسَابُو كْبِيرْ عِنَّا.. نِحْنَا مَا قِصَّرْنَا مَعْ حَدَا أَبَداً..
طنوس:
يَا إِخْتِي عِنْدِكْ أَلْفْ نَسْمِه.. وَيْنْ بَدُّو يْسَاعُنْ الْمَطَارْ؟
سعدى:
لَيْشْ مَا حْكِيتْ هَالْحَكِي لِمِّنْ رِجْعِتْ مَرْتَكْ؟ الظَّاهِرْ نْسِيتْ يَا طنوس إِنَّكْ نِزَّلْتْ الطَّبِلْ وِالزَّمِرْ عَ الْمَطَارْ وِاسْتِأْجَرْتْ تْلاَتْ بْوَاسِطْ.. عِلَّقْتْ الْعَلَمْ اللُّبْنَانِي عْلَيْهُنْ.. وْخُودْ عَ تِزْمِيرْ وتِطْبِيلْ كِلّ الطَّرِيقْ..
طنوس:
كنْتْ زِعْلاَنْ أَنَا وْمَرْتِي وْحِبَّيْتْ رَاضِيهَا..
سعدى:
تَا تْرَاضِيهَا بْتِزْعُجْ الدِّنِي.. لَيْشْ ضَلّْ حَدَا مَا بَزَّقْ عْلَيْنَا...
راجي:
يَوْمِتْهَا عَ الْمَطَارْ .. صَارْ اللي مَا صَارْ.. كَانِتْ جَايِي طِيَّارَه لِلْمِيدِلْ إِيسْتْ.. وَهْجُومْ يَا إخْوَانْ.. تَا نِرْفَعْ إِسِمْ لُبْنَانْ.. أَكْتَرْ مِنْ عِشْرِينْ أَلْفْ نَسْمِه كَانُوا عَ مَطَارْ سِيدْنِي.. لا الِمْسَافْرِينْ قِدْرُوا يِطْلَعُوا.. وْلا الْبُولِيسْ قِدِرْ يِفْتَحْ الطَّرِيقْ تَا يْطَلِّعُنْ.. شِي بِيجَرِّصْ..
أم يوسف:
واللـه مَعَكْ حَقّ شِي بِيجَرِّصْ.. أَيْمَتَى بَدْنَا نْصِيرْ عَالَـمْ؟
سعدى:
صِيرُوا عَالَـم بَعِدْ مَا يِجِي خَيِّي.. وْلا تِجِبْرونِي إِسْتَأْجِرْ بْوَاسِطْ.. كِلّ وَاحِدْ يِنْزِلْ بْسِيَّارْتُو..
راجي:
تَا نْقُولْ عِنْدِكْ مِيةْ سِيَّارَه بِالشَّارِعْ.. وْكِلْ سِيَّارَه بَدَّا تِدْفَعْ بِالْبَرْكينغ خَمِسْ دُولاراتْ بَسّْ.. هَيْدِي 500 دُولاَر.. شُو رَأْيِكْ نْلِمَّا مِنْ بَعِضْنَا وْنِعْمِلُّو حَفْلِة إِسْتِقْبَالْ بْنِصْ دِينْ الشَّارِعْ.. طَبْخْ وْنَفِخْ وْفِرْقِةْ مُوسِيقَى..
سعدى:
وْبْيِجِي مْنِ الْمَطَارْ مِتْلِ الْمَقْطُوعْ .. بَاطِلْ.. لَوْ فِيكُنْ شَرَفْ بْتِعِمْلُولو التّنَيْنْ سَوَا.. الحفلِه وِالإِسْتِقْبَالْ..
راجي:
نَقِّي.. يَا الْحَفْلِه.. يَا الإِسْتِقْبَالْ.. يَا عَمِّي عَمْ يِضْحَكُوا عْلَيْنَا النَّاسْ.. لاَزِمْ نِتْعَلَّمْ مِنْ غَلَطْنَا وْنِتْصَرَّفْ صَحّْ..
سعدى:
مُشْ رَحْ إِرْضَى.. خَيِّي قِيمْتُو كْبِيرِه.. لازِمْ يِطْلَعْلُو عِزّ عَ الْمَطَارْ..
راجي:
أَنَا لْقِيتْ الْحَلّ.. مِنْأَلِّفْ وَفِدْ مْنِ تْلاتْ أَشْخَاصْ.. بِيمَثِّلْ شَارِع اللّبْنَانِيّينْ.. مِنْرُوحْ مْنِسْتَقِبْلُو وْمْنِعْمِلُّو حَفْلِه عَ شَرَفُو..
سعدى:
خَلِّيهُنْ خَمِسْ أَشْخَاصْ..
راجي:
تْلاَتِه بَسّ.. وِبْفَرْدْ سِيَّارَه..
سعدى:
طَيِّبْ أَرْبَعْ أَشْخَاصْ.. وَلَوْ مَا لِي إِكْرَامِيِّه عِنْدَكْ؟..
راجي:
تْلاَتِه.. يِعْنِي تْلاَتِه.. أَوْ بَدِّكْ تْرُوحِي تِسْتَقِبْلِيه وَحْدِكْ..
سعدى:
خُودْ وِعْطِي مَعِي شْوَيْ .. شُو نْسِيتْ إِنُّو خَيّي صَاحْبَكْ؟
راجي:
خَيِّكْ عَ الرَّاسْ وِالْعَيْنْ.. بَسّ إِسِمْنَا وْكَرَامِتْنَا وْسِمْعِتْنَا وَيْنْ بِتْرُوحِي فِيهُنْ؟.. إِنْتِي خَلِّيكِي هَوْنْ وْنِحْنَا مِنْرُوحْ عَ الْمَطَارْ..
سعدى:
بَدِّي رُوحْ إِسْتَقْبِلْ خَيِّي.. مُشْ عَمْ تِفْهَمُوا؟
راجي:
سَاعْدِي النِّسْوَانْ بْتِحْضِيرْ الْحَفْلِه.. وْلا تِنْسِي التَّبُّولِه وِالْكِبِّه النَّيِّه..
سعدى:
يَا راجي سْمَعْنِي شْوَيْ.. خَلّينا نِتْفَاهَمْ.. رْجَاع لْهَونْ.. هَيْئتو رَاح.. الْعَمَى إِذَا تَيّسُوا الرّجَالْ.. تَا رُوحْ بَلِّشْ بِالتَّبُّولِه وْبِالْكِبِّه النَّيِّه.. مْأَكَّدْ بِيكُونْ جُوعَانْ خَيّي..
**
المشهد الثالث
"سامي يركب دراجته وسط الشارع، يحاول أن يصدم جبور"
جبور
وْلِكْ شُو باكْ يا سَامي كلّي وْكبري مُشْ شَايِفْني.. كنْت ضْرَبتْني وِكْسَرْت إِيدي.. زِيح عَنِ الطَّرِيقْ.. أَحْسَن ما تِضرُب حَدا غَيْرِي..
سامي
وْمِينْ حَضِرْتَكْ تَا تْقِللي زِيح عَنِ الطَّرِيقْ.. هَوْنْ بَدّي إِرْكبْ البسيكلات.. وْرُوحْ بَلِّطْ الْبَحِرْ.. بَعِدْ نَاقِصْ.. رِجَّالْ مِنْ عُمِرْ بَيِّي بَدُّو يِتْحَكَّمْ فِيِّي.. زِيحْ أَحْسَنْ مَا مَرِّقْ البَسِيكْلاتْ عْلَيْكْ..
جبور
يَا إِمّ سَامِي.. تَعِي سْمَعِي إِبْنِك شُو عَمْ بِيقُول..
أم سامي
شُو بَاكْ يَا جبّور.. طَالِعْ صَوْتَكْ عَ سامي..
جبور
قِلْتِلّو زِيح عَنِ الطَّرِيقْ.. قَامْ عَبّش فِيِّي..
أم سامي
لَيْش هُوِّي طفل زْغِيرْ تا تِإِمْرُو؟ بَعد جمعتَين عرسُو.. ومن هَلَّق بْقِلَّكْ: حضرْتَك مُشْ مَعْزوم.
جبور
وَلَوْ يَا إِمّ سَامِي.. هَيْكْ بِتْحَاكِينِي..
أم سامي
وْلِكْ سْمَاعْ.. سْمَاعْ.. هَيْدَا إبن بو سامِي.. إِبن طَنُّوس.. وْيَا دِلّ دِلّو الْبِيقَرِّبْ عْلَيْهْ. بْيِخِتْفِي بْسَاعَه مَا فِيهَا ضَوّ قَمَرْ..
"تطل أم يوسف وسعدى من الشبّاك"
سعدى
شُو بِكِي يَا إِمْ سَامِي طَالِعْ صَوْتِكْ..
أم سامي
هَالْمَغْضُوبْ عَمّ بِيدِقّ بْإِبْني سامي.. سَبَّلّو بَيُّو وإِمُّو وْصَارْ يِضْرِبو..
جبور
لاَ تْصَدّقُوهَا يَا جِيرَانْ.. هُوِّي اللِّي كانْ ضَرَبْني بالبسيكلات..
أم سامي
لا بَقَى تْكَذِّبْ.. أَنا شِفْتَك عَمْ تِدِفْشُو وْتِحْلْشُو بْشَعْرُو تا صارْ يِبْكِي.. يقبِرْني رَيْتُو..
طنوس
مِينْ حَلَشْ إِبْنِي بْشَعْرُو.. مِينْ خَلاَّ إِبْنِي يِبْكِي؟
أم سامي
بَسِيطَه يَا رِجَّالْ.. وَاحِدْ أَزْعَرْ بَزِقْتُو الْحَرْبْ اللِّبْنَانِيِّه.. وْجَايِي يِتْفَلْسَفْ عْلَيْنَا..
جبور
إِنْتِي وْإبْنِكْ أَكْذَبْ مِنْ بَعِضْكُنْ.. الْعَمَى شُو لاَمِّي هَالِبْلاَدْ.. تْفُوهْ عَ السَّاعَه اللّي جِيتْ فِيهَا عَ أُسْتْرَالْيَا.. يَا رَيْتْنِي قْتِلْتْ بِالْحَرْبِ اللّبْنَانِيِّه.. وِانْقَبَرْتْ بِتْرَابْ بْلاَدي.. وْلاَ شِفِتْ هَالشَّوْفِه..
طنوس
وْلِكْ.. أَنَا اللّي بَدِّي إِقِبْرَكْ بِإِيدِي..
جبور
الظَّاهِرْ إِنْتْ اللِّي بَدَّكْ تِرْبَايِه.. مُشْ مَرْتَك وْإِبْنَك..
"جبور يضرب طنوس.. سامي يهرب"
أم سامي
شُو بَاكْ يَا طنوس.. ضْرِبْلَكْ ضَرْبِه وْلَنُّو..
طنوس
إِذَا بِتْحِبّي أَللـه رِدّيه عَنِّي.. ضَرِبْتُو مِتِلْ لَبْطِةْ الْفِدِّانْ..
جبور
لَوْ مَا بِيقُولوا ضَرَبْ مَرَا.. كِنْتْ لاَزِمْ رَبِّيكْ إِنْتْ وْمَرْتَكْ.. بَرْكِي بِتْرَبُّوا إِبِنْكُنْ اللّي هَرَبْ..
طنوس
سَاعْدِينِي يَا مَرَا.. ضَهْرِي رَحْ يِنِكْسِرْ.. تْفُوهْ عَ الِوْلاَدْ وْعَ اللِّي بِيخَلِّفُنْ.. مَا كَانِتْ لاَزْمِتِلْنَا هَالِخْنَاقَه..
أم سامي
تُقْبُرْ قَلْبِي انْشَاللـه.. رَيْتْنِي أَنَا وْلا إِنْتْ.. هَدِّي فِيِّي لا تْخافْ..
"طنوس وأم سامي يغنيان على لحن يا عين موليتين"
طنوس
يَا عِينْ مُولَيِّتِينْ
وِتْنَعِشْ مُولَيَّا
حَاسِسْ بِضَهْرِي انْقَطَشْ
وِانْكَسْرُوا إِيدَيَّا
أم سامي
يَا بُو سَامِي يَا بَطَلْ
يَا أَرْزِه دَهْرِيَّه
اللِّي ضَرْبَكْ هُوِّي الْبَصَلْ
وْمِحْشِي مْهَلَّبِيَّه
طنوس
يَا مَرَا حَاجِي تِحْكِي
وِتْقَوِّي إِجْرَيَّا
شُوفِينِي بَدِّي إِبْكِي
مِحْمَرَّه عينَيَّا
أم سامي
مَا فِينَا نْرَبِّي الِوْلاَدْ
وْلاَ نِزْرُبْ الِبْنَيَّه
نْسِينَا وَاللّـه بْهَالِبْلاَدْ
الْعَادِه اللِبْنَانِيَّه
**
المشهد الرابع
"سعدى وبعض النسوة يحضرن الأطعمة"
نجيبة
يَا حَبِيبِي عَ الْمِحْشِي مَلْفُوفْ يَا حَبِيبِي..
عزيزة
لا بَقى تْقُولي يا حبيبي.. مِن ساعْتَيْن صلخوه قَتْلِه
نجيبة
أللـه يكْسر إيدُو اللّي بيمدّ إيدو عليه
سعدى
عَنْ شُو عَم تِحْكِي يا نجيبة؟
نجيبة
عن المحشي ملفوف..
سعدى
خِدِي دُوقِي هَالْكِبِّه النَّيِّه وِتْرَحْمِي عْلَيِّي..
عزيزة
أَطْيَبْ مِنْ وَرْقَاتْ الْعِنَبْ اللّي طْبَخْتُنْ.. مَا فِي أَبَداً.. خِدُوا دُوقُوا.. تْفِنَّنْتْ فِيهُنْ كِرْمَالْ خَيِّكْ وْرَجِعْتُو مِنْ لُبْنَانْ..
سعدى
أَللـه يْزِيدْ الْكِتْرِه فِيكُنْ .. يَا جِيرَان يَا أَوَادِمْ..
وْلِكْ يا عَزِيزِه.. إنْتِي أَكْبَر وِلاَّ خَيِّي رِسْتُمْ؟
عزيزة
أكيد خَيِّكْ رسْتُمْ.. يا حَسِرْتي بَعْدِي ما فِقَّصْت مْنِ الْبَيْضَه
نجيبة
هَلَّق بِيكُون اسْتَوْرَد عَرُوس منْ لُبْنانْ
عزيزة
يَلاّ.. خَلُّوا العسَل بِجْرارُو تا تِغْلا أَسْعارُو..
"تدخل حسنة على عجل"
شُو يَا حسنة مُشْ رَحْ تْبَطْلِي خَصِلْتِكْ.. عَ طُولْ بْتِتْأَخْرِي..
حسنة
لاَ حَدَا يْكَهْرِبْنِي أَكْتَرْ مَنِّي مْكَهِرْبِه.. تْخَانَقِتْ أَنَا وِمْعَلّمِه بْمدرسة سَيّدِة لُبْنَانْ وْوِصِلْ صَوْتِي لْعِنْدْ رَبّنَا.. قَالْ شُو.. زَرْبِت إِبْنِي لأَنُّو حَلَشْ رْفِيقُو بْشَعْرُو..
عليا
وْلاَزِمْ إِبْنِكْ يِحْلُشْ رْفِيقُو بْشَعْرُو.. وَلَوْ .. الزّرْبِه قَلِيله عَ إِبْنِكْ..
حسنة
وْشُو فِيهَا إِذَا حَلْشُوا بْشَعْرُو.. وَلَدْ وْحَبّ يِلْعَبْ..
عليا
وَاللـه أنَا رَايْحَه دِقّ عَ الْمَدِرْسِه.. إِذَا كَانْ إِبْنِكْ حَلِشْ إِبْنِي..
لإِحِلْشِكْ أَنَا بْجِمِّكْ هَالِكْبِيرْ وْرَكّعِكْ لِلأَرْضْ..
سعدى
رُوقِي دَخِيلِكْ ما بَدْنَا مَشَاكِلْ..
عليا
إِبْنَا وْإِبْنِي بْفَرْدْ صَفّ.. وْعَ طُولْ بْيِضْرُبْ إِبْنِي.. وْبَسّ تْقِلّو الِمْعَلّمِه كِلْمِه زْغِيرِه بَسّ.. بِتْرُوحْ بْتِفْجُرْ عْلَيْهَا.. قَالْ شُو لأَنْ المدرسه لبنانيّه..
عزيزة
جْدُودْنَا، أَللـه يِرْحَمُنْ، كَانُوا يْقُولُوا :
قُمْ لِلْمُعَلِّمِ وَفِّهِ التَّبْجِيلا
كَادَ الْمُعَلِّمُ أَنْ يَكُونَ رَسُولاَ
وْهَلَّقْ.. يَا حَرَامْ عَ الإِسْتَاذْ مَا حَدَا بِيقِلّو مَرْحَبَا
نجيبة
هَيْدَا إِذَا مَا إِكِلاَ مَلْيُونْ بَهِدْلِه .. لأَنْ الْوِحْدِه مِنَّا مَا بِتْحِبّ تْبَهْدِلْ الإِسْتَاذْ إِلاَّ قِدَّامْ تْلاَمِيذُو.. قَالْ شُو بْيِسْتْحِي أَكْتَرْ..
سعدى
بشَرَفْكُنْ.. مِينْ عَمْ يِدْفَعْ الثَّـمَنْ؟ وْلاَدْنَا اللّي عَمْ يِدْفَعُوا الثّـمَنْ.. مَا عِدْنَا نَعْرِفْ الْخَيّ مِنْ إِخْتُو..تْنَيْنَاتُنْ بْيِسْتَعِمْلُو نَفْسْ الشَّامْبُو.. وْنَفْسْ الْكِحْلِه وْنَفْسِ الْحَلَقْ.. قَالْ شُو.. مِنْحِبّ وْلاَدْنَا.. مَا هَيْدَا شِي طَبِيعِي.. وْمَا لِنَا بِالْمِنِّيِّه.. هَاللّي بِيحِبّ وْلاَدُو.. لاَزِمْ يْحَافِظْ عْلَيْهُنْ.. وْمَا يْصَدِّقْ كِلْ شِي بِيقُولُوا.. أُف.. هَيْئِتُنْ تْأَخّرُوا.. هَلَّقْ بْيِبْرُدْ الطَّبِخْ وْمَا بِيعُودْ يِتَّاكَلْ..
نجيبة
بِيكُونُوا أَخّرُو خَيِّكْ عَ الْجُمْرُكْ.. لأَنْ حَضْرِتُنْ بَسّْ يْشُوفُوا وَاحِدْ لِبْنَانِي.. بِيصِيرُوا يْفَلُّوا فِيهْ مْنِ كْعَابْ إجْرَيْهْ..
حسنة
لِمِّنْ بْيُوصَلُوا.. أَوِّلْ مَا بَعْرِفْ أَنَا.. وِقَّفِتْ إِبْنِي بْرَاسْ الشَّارِعْ وْحِمَّلْتُو طِبَّيْلِه.. وْقِلْتِلُّو بَسّ تْشُوفُنْ طَلُّوا.. طَبِّلْ يَا إِبْنِي طَبِّلْ..
سعدى
سَامْعَه صَوْتْ طِبَّيْلِه.. وِصِلْ خَيِّي.. زَلِغْطُوا يَا نِسْوَانْ
"يدخل رستم وهو يحمل حقيبة السفر، راجي يساعده بحمل الحقيبة"
"ترقص من الفرحة"
أَهْلاَ وْسَهْلاَ بِاللّي طَلّْ
وِجُّو أَبْيَضْ مِتْل الْفِلّْ
خَيِّي رِجْعِ مْنِ لُبْنَانْ
يَا أَهْلاَ بِـ خَيّ الْكِلّْ
رستم
أَهْلاَ وْسَهْلاَ فِيكِي يَا إِخْتِي. الْحَقِيقَه يا جيران غْمَرْتُونِي بِمْحَبِّتْكُنْ.. وْنِسَّيْتُونِي تَعَبْ الرِّحْلِه.. أَنَا بِشْكِرْكُنْ مِنْ كِلّْ قَلْبِي..
راجي
لا شُكِرْ عَلَى وَاجِبْ.. إِنْتَ خَيّنَا وْحَبِيبْنَا..
سعدى
لا تْصَدّقُو يَا خَيِّي .. مَنَعنِي رُوحْ عَ الْمَطَارْ..
رستم
وْلَشُو تَا تِنْزْلِي عَ الْمَطَارْ.. تا تْزِيدِي الْعَجْقَه هَوْنِيكْ..
سعدى
كِنْتْ زِلْغَطِّلَّكْ شْوَيْ وِطْلِعِتْ مِنْ قِيمْتَكْ..
راجي
زَلِغْطِي هَلَّقْ تَا تِشْبَعِي.. خَيّ.. الْيَوْمْ كَانْ أَحْسَنْ يَوْمْ عَ الْمَطَارْ.. طِيَّارَه فِيهَا تْلاتْمِيةْ لُبْنَانِي كَانْ بِاسْتِقْبَالُنْ مِيةْ شَخِصْ.. وِالْبَاقْيِينْ رِكْبُوا بِالتَّاكْسِي وْرَاحُوا عَ بْيُوتُنْ..
رستم
أَنَا هَيْكَ كِنْتْ بَدِّي إِعْمِلْ.. إِحْسُبْ حَالِي سِهْرَانْ بِالسِّيتِي وِانْقَطْعِتْ سِيَّارْتِي.. بِلْقُطْ تَاكْسِي وِبْرجع عَ الْبَيْتْ.. وْصدّقوني إنو الْمَطَارْ أَقْرَبْ مْنِ السِّيتِي.. بَدَلْ مَا نْعَذِّبْ النَّاسْ عَ الطُّرْقَاتْ مِنْفِيدْ شُوفَارِيتْ التَّاكْسِي.. وْمِنْفِيدْ أُسْتْرَالْيَا..
عزيزة
خَلّصُونَا مْنِ الْمَطَارْ وْعَجِقْتُو.. وْخَلُّونَا نِطَّمَّنْ عَنْ أَهِلْنَا.. عَنْ بَلَدْنَا..
رستم
الأَهْلْ بْخَيْرْ.. وْبَلَدْنَا بْخَيْرْ..
حسنة
صَحِيحْ مِتِلْ مَا عَمْ بِيقُولُوا: إِنُّو مَا بْيِنْعَاشْ بْلِبْنَانْ..
رستم
إِذَا بْلِبْنَانْ مَا بْيِنْعَاشْ.. وَيْنْ فِينَا نْعِيشْ؟!
عليا
بِيقُولُوا فِي غَلاَ.. فِي زباله.. فِي عَجْقَه..
رستم
وْلِكْ يِقْبِرْنِي لُبْنَانْ.. وْغَلاَ لُبْنَانْ.. وْوَسَخْ لُبْنَان.. وْعَجْقِة لُبْنَانْ..
"يغني على لحن أغنية متلي ما حبك إنسان"
ـ1ـ
مِتْلِي مَا حَبِّكْ إِنْسَانْ
وَاللّـه يَا بْلاَدِي
إِسْمَكْ غَالِي يَا لُبْنَانْ
وْحُبَّكْ زُوَّادِه
ـ2ـ
وْصِلْتِلِّكْ يَا أَرْضِ النُّورْ
وْكِحَّلْتْ عْيُونِي بِزْهُورْ
بَيْرُوتْ طْرَابْلُسْ مَعْ صُورْ
بِعْبِدْهَا عْبَادِه
ـ3ـ
زِرْتِ الأَرْزْ وْزِرْتِ الْبَحْرْ
وْزِرْت بْعَلْبَكْ إِخْتِ الدَّهْرْ
وِجْبَيْلْ وْزَحْلِه والنَّهْرْ
وِطْيُورْ الْوادِي
**
المشهد الخامس
"يدخل بائع الذرة"
بائع الذرة
عَ الدَّرَا الدَّرا... عَ الدَّرَا.. عَ الدَّرَا الدَّرَا .. عَ الدَّرَا.. زِحْلاَوِي يَا دَرَا.. حَدْشِيتِي يَا دَرَا.. كْفِرِصْغَابِي يَا دَرَا.. زْغِرْتَاوِي يَا دَرَا.. شِي رِجَّالْ يِشْتِرِي مِنِّي أَوْ شِي مَرَا.
عزيزة
يَا بِيَّاعْ .. عِنْدَكْ دَرَا شِغِلْ هَالِبْلاَدْ..
بائع الذرة
هاريس بارك يا دَرَا.. ماريلاندز يا درَا..
عزيزة
إذَا كَانُوا دْرَاياتَكْ شِغِلْ بَاراماتا.. عْطِينِي نِصّ دَزِّينِي..
بائع الذرة
باراماتا يَا دَرَا.... وَاللـه بَرْمِتْ يَا دَرَا..
حسنة
يَا بِيَّاعْ.. مَعَكْ لُوبْيِي..
بائع الذرة
دَرَا يَا مَرَا دَرَا.. ما بْيِنْفَعْ إِلاَّ الدَّرَا
حسنة
فِينِي دُوقْ دْرَايَاتَك قَبِل مَا إِشْتِرِي..
بائع الذرة
ضْرَاسِكْ صَاغْ أَمْ مْرَكْبِه وَجْبِه.. دْراياتي ما عِنْدُن أنشُورنْس
حسنة
صَاغْ.. صَاغْ.. وْبيقَرقْطُوا راسْ الحَيّه
أَبُو قَشِّه
بِحْيَاتَكْ يَا بِيَّاعْ .. بْتَعْرِف وَيْنْ مَقْبَرِة رُوكْوُودْ؟!
بائع الذرة
لَيْشْ الْمَوْتَى بْيَاكْلُوا دَرَا..
أَبُو قَشِّه
أَكِيدْ لأْ..
بائع الذرة
يَا حَبُّوبْ أَنَا مَا بَعْرِفْ إِلاَّ زْبُونَاتِي.. رُوحْ شِفْلَكْ شِي خُورِي وْهُوِّي بِيدِلَّكْ.. دَرا يا دَرا.. بْتَاعْ كِلُّو يَا دَرَا..
راجي
إِنْتَ مِنْ وَيْنْ يَا بِيَّاعْ؟
بائع الذرة
أَنَا مِنْ شَارِعْكُنْ.. شَارِعْ اللبْنَانِيينْ
راجي
وْلَيْشْ جِيتْ تِسْكُنْ بِشَارِعْنَا؟
بائع الذرة
لأَنُّو شَارِعْ رَايِقْ.. لاَ فِي سِرْقَه.. وْلا فِي قَتْل.. انْشَاللـه يْضَلّ هَيْكْ.. الِبْلاَدْ عَمْ تِخْرَبْ وْمَا حَدَا سِئْلانْ..
راجي
عِشْت بْلِبْنَان إِيَّام الْحَرْب كِلاَّ.. وْمَا كِنْتْ إِفْزَعْ هَالْقَدّ، مِنْ أَيَّا مَنْطَقَه مِنْ لِبْنَانْ إِنْتْ؟
بائع الذرة
لَيْشْ لُبْنَانْ كَمْ مَنْطَقَه؟!..
راجي
بْلُبْنَانْ فِي مَنَاطِقْ كْتِيرْ.. مِنْ وَيْنْ إِنْتْ؟
بائع الذرة
أَنَا مِنْ كِلّ لِبْنَان.. وْمِتِل مَا وَحّدِتْنَا الْغِرْبِه لازِمْ يْوَحِّدْنَا الْوَطَنْ.. عَ الدَّرَا الدَّرَا.. عَ الدَّرَا..
راجي
يسلم تِمّك عَ هالحكي.. والله اللي مِتلَك لازِم يبيعُوا.. دهبْ.
"يشتري منه راجي ويخرج ويبقى بائع الذرة، يدخل طنوس وأزلامه وهم يتهامسون"
طنوس
لاَزِمْ نْوَقِّعْ بِيَّاعْ الدَّرَا.. لاَزِمْ نِعْمِلْ الْمُسْتَحِيلْ تَا يِشْتِغِلْ مَعْنَا..
يوسف
بْأَمْرَكْ خَوَاجَه طَنُّوسْ.. نِحْنَا رَهِنْ إِشَارْتَكْ..
طنوس
مَا بَدّنَا نْضَيِّعْ وَقِتْ.. الإِنْتِخَابَاتْ قَرّبِتْ.. وْلاَزِمْلِي قِرْشَيْنْ.. بِيعُوا مِينْ ما كانْ.. ولا تِرْحَمُو حَدَا.. بَسّ إِيَّاكُنْ تْبِيعُوا إِبْنِي.. إِبْنِي سامي وْبَسْ.. فْهِمْتُو..
يوسف
تِكْرَمْ عَيْنَكْ يَا خَوَاجَه طَنُّوسْ.. مُشْ رَحْ نْقَرِّبْ عَ إِبْنَكْ..
طنوس
عَظِيمْ.. عَظِيمْ.. وْلا تِنْسُوا تْحِطُّوا دَعَاياتْ بِالْجَرايِدْ..
عدنان
حِطَّيْنَا دَعَايَاتْ بِالْجَرَايِدْ، بالإِذَاعاتْ، وْبالتِّلْفِزْيُونْ.. وْكِبَّرْنَا صُوَرَكْ وْعِلَّقْنَاهَا بْشَارِعْ اللُّبْنَانيّينْ وْكِلّ شَارِعْ..
طنوس
بْهَالشَّارِعْ بِيعَيّطُولِي طَنُّوس التِّنِكْلِيزِي.. وَاللـه لَبَوِّسُنْ
(يتوقّف قليلاً ثم يقول وهو يضع يده على قفاه)
إِيدِي. بْخَاطِرْكُنْ يا شَبَابْ.. وْلاَ تِنْسُوا بِيَّاعْ الدَّرَا..
"يقترب يوسف من بائع الذرة"
يوسف
يَا بِيَّاعْ الدَّرَا.. تَعَا لْهَوْنْ.. قِلْتِلَّكْ تَعَا لْهَوْنْ..
بائع الذرة
إِنْتِخَابَاتْ يَا دَرَا.. كِمْ عَرْنُوسْ بِتْحِبّْ تِشْتِرِي..
يوسف
عْطِينَا كِلّ شِي فِي مَعَكْ .. قَشِّه لَفِّه..
بائع الذرة
لا تْقُومْ بَدَّكْ تْبِيعْ دَرَا وِتْضَارِبْ عْلَيِّي..
يوسف
مْنِ الْيَومْ وْرَايِحْ.. بِدَّكْ تِقْبُرْ الفِقِرْ.. بَدَّكْ تْصِيرْ غَنِي وِتْعَمِّرْ قصر وْتِقْرِطْهَا بَطِنْ جَازِه..
بائع الذرة
أَنَا بَدِّي إِتْجَوَّزْ؟!.. دَخِيلْكُنْ.. قُولُولِي كِيفْ بَدِّي إغْتِنِي..
يوسف
أَوَّلاً: بِتقَطِّبْ تِمَّكْ.. تَانِياً: بْتِفْتَحْ دِينَيْكْ وِعْيُونَكْ.. تَالِتاً: بْتِعْمِلْ مِتِلْ مَا مِنْقِلَّكْ.. مَفْهُومْ..
بائع الذرة
مَفْهُومْ.. وْسِتِّينْ أَلِفْ مَفْهُومْ.. أَنَا بِعْجِبْكُنْ كْتِيرْ.. عَ شَرْط تْجَوّزوني..
يوسف
"يوسف يكلّم أخاه عدنان"
فَإِذَنْ.. سَلّمُو الْبَضَاعَه.. وْقِلُّلو وَيْنْ لاَزِمْ يْبِيعْ تَا مَا يْضَارِبْ عَ غَيْرو.. وْفَهّمُو إِنّو مَمْنُوعْ يْبِيع إِبْنِ الْخَوَاجَه طَنّوسْ..
عدنان
هَيْدِي بضاعَه بأَلفْ دولارْ.. وكل يوم بعطيك قدّا.. مفهوم؟
بائع الذرة
عَ الدَّرَا الدَّرَا.. عَ الدَّرَا..
عدنان
إي مْنِ الْيَوْمْ وْجِرّْ .. وَدِّعْ يَا دَرَا..
**
المشهد السادس
"عزيزة تدخل فرحانة"
عزيزة
هَنُّونِي .. هَنُّونِي هَنُّونِي هَنُّونِي..
نجيبة
خَيْرِ انْشَاللـه يا عمتي.. إِجَاكِي عَرِيسْ؟!
عزيزة
بَلا عَرِيسْ بَلا بَلُّوطْ.. صِرْتْ مُذِيعَه بِالإِذَاعَه..
وْبَدِّي قَدِّمْ مَا يَطْلُبُهُ الْمُسْتَمِعُونْ..
نجيبة
صَحِيحْ .. وْلِكْ رِيْتُو أَلِفْ مَبْرُوك..
وِانْشَاللـه رَحْ يِدْفَعُولِكْ مَصَارِي..
عزيزة
يِقْطَعْ الْمَصَارِي انْشَاللـه.. لا هِنِّي بْيِدْفَعُوا وْلاَ أَنَا فِكَّرْتْ فِيهَا.. بَدِّي مَرْكَزْ إِجْتِمَاعِي.. بَدِّي شُهْرَه.. بَدِّي رُوحْ عَ حَفْلاتْ الْكُوكْتِيلْ.. بَدِّي جِخّْ.. بَدِّي بَيِّنْ..
نجيبة
يِعْنِي.. فِيني إتِّصِلْ فِيكِي وْإطْلُبْ أَغَانِي وْإِهْدِيهَا لْسامي..
عزيزة
يِقْطَعِك عَ يِقْطَعْ سَامِي..
نجيبة
إذا عَمْ تِحْكِي عْلَيِّي وْعَ سامي هَيْك.. مُشْ رَحْ إتصّل فيكي
عزيزة
كِلّ يَوْمْ لازِمْ تِتصْلي فِيّي .. ولازِمْ تْغَيّري إِسْمِك وْصَوْتِك.. تا ما يَعِرْفُوا إِنّي عمّتِك..
"يدخل رستم"
رستم
شايِفْكُن مَعْجُوقِين.. خَير انْشاللّه؟
نجيبة
عمتي عزيزة صارت مذيعة كبيره.. يا هْنِيَّال الْبَدُّو يِتْجَوَّزَا..
"عزيزة تعرّم وتنفخ صدرها"
رستم
عظيم عظيم.. بما إني صحفي وراجع من لبنان
لازم تِعِمْلِي مَعِي مُقَابْلِه عَ الْهَوَا..
عزيزة
بِعْمِلْ مَعَكْ مُقَابْلِه عَ الْهَوَا.. عَ الْمَيّ .. عَ النَّارْ.. عَ شُو مَا بَدَّكْ..
رستم
هَاتِي .. سَمّعِينَا.. تَا نْشُوفْ..
عزيزة
سَيِّدَاتِي سَادَتِي .. مُقَابَلَتِي الْيَوْمْ سَتَكُونُ مَعَ الصُّحُفِي الْكَبِيرْ.. صَاحِبْ الْفِكْرِ الْمُنِيرْ.. وَالَّذِي يَعْرِفُهُ الْكَبِيرْ والصَّغِيرْ.. وَالِمُقَمَّطْ بِالسَّرِيرْ.. فِيكْ تْقِول للمستمعين شُو إِسْمَكْ؟
رستم
شُو بَدِّكْ بِإِسْمِي .. كِلُّنْ بْيَعِرْفُو صَوْتِي.. أَنَا صَاحِبْ جَرِيدْة (الشَّمْسْ) اللّي بْتِصْدُرْ مِنْ عَشِيِّه..
عزيزة
يَا إِسْتَاذْ رستم ..
رستم
قِلْتِلِّكْ بَلا أَسْمَاءْ .. الْعَالَمْ تِعْبُوا مْنِ الأَسْمَاءْ ..
عزيزة
طَيِّبْ .. فِيكْ تْقِلّلي مِينْ رَحْ تِنْتِخِبْ بْهَالإِنْتِخَابَاتْ..
رستم
بِنْتِخِبْ الّلي بْيِدْفَعْ أَكْتَرْ..
عزيزة
اللّي بْيِدْفَعْ شـُو..؟
رستم
قَصْدي .. اللي بْيِدْفَع شَعْبُو لْقِدَّامْ.. لَيْكِي .. هَيْدَا اللي إسمو طَنّوس .. بَدُّو يِرْبَحْ..
عزيزة
طَنُّوس التِّنِكْلِيزي.. مَا غَيْرُو؟!
رستم
كَانْ تِنِكْلِيزِي .. وْهَلَّقْ صَارْ فَوْقْ.. وْمَا فِي حَدَا يْطَالُو..
عزيزة
مُشْ مَعْقُول هَالْحَكِي .. طَنُّوسْ الْمَنْحُوسْ مْرَشَّحْ عَ الإِنْتِخَابَاتْ؟!
رستم
كَصُحُفِي عَتِيقْ .. ما كِنْتْ لاَزِمْ إِكْشُفْ هَالسِّرْ ..
بَسّ الْحَقِيقَه رَحْ تِظْهَرْ، وْلازِمْ كِلّنَا نِنْتِخبْ الْخَوَاجَه طَنُّوسْ..
عزيزة
عَ قَطِعْ رَاسِي.. زَلْمِي مَا بْيَعْرِف يِحْكِي كِلِمْتَيْنْ ..
كِيفْ بَدِّي إِنْتِخْبُو؟! رُوحْ صَحِّحْ مَعْلُومَاتَكْ ..
طَنُّوسْ زَلْمِي مْعَتَّرْ.. لا بيهِشّْ وْلا بِينِشّْ
رستم
قَصْدِكْ أَنَا كِذّابْ .. الْحَقّ عْلَيِّي اللّي فْضَحْتْ هَالسِّرْ..
بُكْرَا شُوفي صُورْتُو بِالْجَرِيدِه قَدّْ رَاسِكْ..
عزيزة
سَيِّدَاتِي سَادَتِي .. مِنِشْكُرْ صَاحِبْ جَرِيدِة الشَّمْسْ
عَ هَاللِّقَاءْ الْغَيْرْ شِكَلْ..
رستم
وْأَنَا كَمَانْ بْحِبّ إِشْكُرْ إِخْتِي سعدى.. وْكمانْ إِنْتِي.
عزيزة
بيشَرَفَك شُو رَأْيَكْ فِيِّي؟
رستم
لِلْحقِيقَه يا سَعْدى نْجَحْتي بالامتحان.. وصار فيني هَنِّي أهل شارِعْنا فيكي..
عزيزة
جَرِّبْنِي بَعد.. أنا بعجْبَك يا رورو
رستم
شُو هَيْدَا رُورو..
عزيزة
طَيّبْ شُو فِيها إذا غنّجتَك شْوَيّ.. إي رورو
رستم
ما فيها شي أبداً.. إسْم رورو عجَبْني.. شو الْمَطْلوب مِنّي هَلَّق؟
عزيزة
اتصل فيّي تلفونياً.. أَلله يخلّيكْ "يضع تلفونه النقال على أذنه"
رستم
أَلُو.. حَضْرِة الْمُذِيعَه .. بَدِّي إِهْدِي غِنّيِّه لأمي..
عزيزة
عَجِّلْ إِنْتَ عَ الْهَوَا.. فِيكْ تْقِلّي شُو إسْمَا..
رستم
صِرْتْ مِتْلَكْ بَيّ يَا بَيِّي..
عزيزة
سَيِّدَاتِي، سَادَتِي، بِمُنَاسَبَةِ عِيدِ الأُمْ نَسْتَمِعُ إِلَى أُغْنِيَةِ (أَنْتَ عُمْرِي) لأُم كَلسُونْ.. وهي مُهْدَاة مِنْ جَبُّورْ وَبَرْبُورْ وَحَنْتُورْ إِلَى وَالدِهِمْ الْمَقْهُورْ بِمُنَاسَبَةِ عِيدِ الأُم....
رستم
وَيْنْ الْغِنِّيِّه .. مُشْ سَامِع شِي؟!
عزيزة
يَا مْهَنْدِسِ الصَّوْتْ حِطّ الْغِنيِّه.. أَكِيدْ عَالِي مَعُو الشَّحِمْ بِالدَّمْ.. وْعَمْ بِيشَنْخِرْ بِالسّتِدْيُو.. سَيّدَاتِي سَادَتِي أعْتَذِرُ عَنْ هَذَا الْعِطْلِ الْفَنِّي.. وَأَتْرُكُكُمْ الآن على أمل اللقاء.
نجيبة
والله يا رستم.. إنت وْعمّتي لابقين لبعضكُنْ.. طَنْجرَه وْلقيت غطاها.. شوفو شو بدّكُن تعمْلُوا.. قبلْ تْهِرّوا عَ الأرضْ.
عزيزة
"تطلع بساعتها"
صار وقت برنامجي.. لا بقى تِحْكُوا..
"تسرع إلى الراديو.. تديره.. يعلو صوتها"
أَلُو مين مَعي؟
"يظهر الشاعر بو قشّه على طرف المسرح وهو يتكلم على الهاتف"
أبو قشه
مَعك الشَّاعِرْ أَبُو قَشِّه.. بْبَلِّشْ ..
عزيزة
تْفَضَّلْ..
أبو قشّه
كَانْ جِدِّي زَلْمِي خِتْيَارْ
وْكَانْ عِنْدُو شْوَارِبْ كْبَارْ
وْكَانْ يْحِب الْكُوسَى كْتِيرْ
وْصَابِيع الْبِبّو يَا خْيَارْ
وْكَانِتْ سِتِّي مِتْلِ الزِّيرْ
بِتْصَارِعْ أَكْبَرْ حْمَارْ
لَكِنْ فِي عِنْدَا صْرَاصِيرْ
بِتْخَافْ مِنُّنْ.. يَا سِتَّارْ..
عزيزة
هَيْدَا شِعِرْ وَلاَّ شْعِيرْ
هَيْدِي صُوَرْ وَلاَّ حْجَارْ
بَعْدِ مَا سْمِعْنَا التِّعْتِيرْ
انْقَطَشْ مِنْخَارَكْ وْطَارْ...
نُنْهِي بَرْنَامَجَ الْيَوْمْ ..
مَعَ الصَّوْتْ الْمَهْجَرِي الرَّائِعْ..
مَعَ دَلُّوعَةِ الْمَسْرَحْ أَلْفَنَّانَه الْكَبِيرَه إِمّ كْلاَكِيشْ.
"تظهر الفنانة أم كلاكيش على طرف المسرح، تغني على لحن حدا يا حدي"
أم كلاكيش
ـ1ـ
غَزَالَ الْحَيّ
مَا عِنْدُو مَيّ
وَيْنِ الْمَيّ
يَا خَالَه
شَرْبِي PEPSI
مْنِيحَه الْـ PEPSI
أوْ شَرْبِي Coca-Cola
غَزَالَ الْحَيّ
مَا عِنْدُو مَيّ
وَيْنِ الْمَيّ
يا خَالَه
ـ2ـ
إِبِنْ لُبْنَانْ
بِـ هَالْهِجْرَانْ
كِيفْ مَا كَانْ
عَمْ يِمْشِي
بْيِمْشِي شَرْقْ
بْيِمْشِي غَرْبْ
بْيِمْشِي طْلُوعْ
مَعْ دَفْشِه
ـ3ـ
تْرَكْنَا الأَرْضْ
بسَاعِةْ بُغْضْ
بَرْكِي الْعَرْضْ
مِنْصُونُو
بِعْنَا الْعَرْضْ بْطُولْ وْعُرْضْ
وِتْسِلَّيْنَا بِعْيُونُو
حِدَا يَا حْدَيْ
غَزَالَ الْحَيّْ
وَرَدْ عَ الْمَيّ
تَا يْمَلِّي
**
المشهد السابع
"يوسف وعدنان بانتظار والدتهما أم يوسف"
يوسف
وَيْنِي هَالْخِرْفَانِه بَعِدْ مَا طَلِّتْ.. بِيكُونْ انْبَخَشْ دُولاَبْ التّرَانْ.. أَوْ قَبْعُوا الشَّجْرَه اللّي مْعَلّمِه فِيهَا الشَّارِعْ..
دَخِيلَكْ.. بَلَّشْ جِسْمِي يِبْرُدْ.. بَدِّي شِمّ..
عدنان
قَوِّي حَالَكْ شْوَيْ.. هَلَّقْ بْتُوصَلْ وْمَعَا الْقَبِضْ.. لَوْلاَ هَالْعَجُوزْ الْخِرْفَانِه كِنَّا مِتْنَا مْنِ الْجُوعْ..
يوسف
مَا كَانْ فِيِّي حَشِّشْ.. وْطِيرْ لَفُوقْ .. لَفُوقْ لَفُوقْ لَفُوقْ .. مِتْلِ الْعِرْنُوقْ يَا عِينِي مِتْلِ الْعِرْنُوقْ..
عدنان
سْمَاعْ يَا عِرْنَوْقْ.. أَنَا قَلِيلْ مْرُوِّه وْخَارِبْلِي بَيْتِي الْكَازِينُو.. بَسّْ إِنْتْ عَمْ تِقْتُلْ حَالَكْ.. شُو بَدَّكْ بِهَالِمْصِيبِه..
حَرَامْ تْمُوتْ بْأَوَّلْ عُمْرَكْ..
يوسف
حَكْيَكْ مِتِلْ حَكِي إِمَّكْ.. بِيقَرِّفْ
عدنان
بَدَلْ مَا تْحَشِّشْ .. شْرَابْ حَلِيبْ السّبَاعْ.. قَنِّينِة عَرَقْ مْتَلَّتْ.. وْعِيشْ يَا مَايْ بْرَازِرْ .. عِيشْ..
يوسف
إِنْتْ أَضْرَبْ مِنّي.. كِبْدَكْ رَحْ يِهِتْرِي.. وْبَعْدَكْ بِتْقُولْ.. عِيشْ
عدنان
لَيْكْ مِينْ عَمْ يِحْكِي لَيْكْ.. تْطَلَّعْ بِالِمْرَايِه بِتْشُوفْ عْيُونَكْ حِمِرْ مِنْ كِتْرِ السَّهَرْ..
يوسف
وَطِّي صَوْتَكْ.. وِصْلِتْ الْمَحْرُوسِه..
أم يوسف
مْبَيَّنْ هَوْنْ يَا وْلاَدِي؟!
يوسف
جِينَا نِسْتَقِبْلِكْ بْرَاس الشَّارِعْ.. وْنِسْأَلْ خَاطْرِكْ..
أم يوسف
لَيْقُومْ اسْتِقْبَالْكُنْ هَالْمَرَّه مِتِلْ كِلّ مَرَّه..
يوسف
بْتَعِرْفِينِي أَنَا ما بْكَذِّبْ .. بَدّنَا مَصَارِي..
أم يوسف
مَا مَعِي مَصَارِي.. مْرَقِتْ عَ الْبَنْكْ وِدْفَعِتْ دَفْعِةِ الْبَيْتْ..
يوسف
وْلِيشْ تَا تِدْفَعِي دَفْعِةِ الْبَيْتْ.. مَا قِلّتِلِّكْ أَنَا بِدْفَعَا..
أم يوسف
وْلَيْشْ مَا دْفَعْتَا الشّهر الْمَاضِي.. واللِّي قَبْلُو .. واللّي قَبِلْ قَبْلُو..
يوسف
لأَنِّي حِرّ.. وْهَيْكْ طِلْعِ بْرَاسِي..
أم يوسف
لا يَا إِبْنِي لا.. بَيَّكْ تَرَكْنِي وْإِنْتُو زْغَارْ.. وْمَا خِلَّيْتْكُنْ تِنْزَتُّوا بِالشَّارِعْ.. هَلَّقْ شِي صِرْتُو كْبَارْ .. بَدّكُنْ تِزِتّونِي بَرَّا.. رُوحُوا اشْتِغْلُوا .. صِيرُوا عَالَـمْ مِتِلْ هَالْعَالَـمْ..
يوسف
دَخِيلْ أَللـه بَلاَ مْوَاعِظْ .. عْطِينِي قِرْشَيْنْ وْخَلِّينِي رُوحْ..
أم يوسف
وَيْنْ تْشَاكْ الِحْكُومِه.. مْبَارِحْ قْبَضْتُو؟
يوسف
عِزْرَايِلْ يِقْبَضْ رَوْحِكْ انْشَاللّـه .. عْطِينِي الشَّنْطَه لْهَوْنْ..
عدنان
خُودْ الشَّنْطَه مِنْ إِمَّكْ بَسّ مَا تِضْرِبَا.. فْهِمْتْ
يوسف
هِيّي اشْتَرْيِتْ الْبَهْدَلِه لْحَالاَ.. يِقْلَعْ لِهَا وِلْهَالشَّنْطَه.. مْعَرِبْطَه فِيهَا كَأَنَّا رَحْ تَاخِدْهَا عَ الْقَبِرْ..
عدنان
هَاتْ تَا شُوفْ.. قِدَّيْشْ خِدِتْ مِنَّا..
أم يوسف
إِخِدْ دَفْعِة الْكَهْرَبَا.. وْدَفْعِةْ التَّلِفُونْ.. وْحَقِّ الأَكِلْ وِالشِّرِبْ
يوسف
لاَ بَدْنَا كَهْرَبَا وْلاَ بَدّنَا تَلِفُونْ وْلا بَدّنا نَاكُلْ وْنِشْرَبْ.. رُوحِي كِلِي عِنْدِ الْجِيرَانْ.. كِلُّنْ بِيحِبُّوكِي..
أم يوسف
لَيْشْ طِلِعْ حَظِّي هَيْكْ .. بِالإِنْجِيلْ فِي إِبِنْ شَاطِرْ وَاحِدْ .. عِنْدِي أَنَا في تْنَيْن.. لاَ بَيُّنْ طِلِعْ آدْمِي مَعِي.. وْلا وْلادِي طِلْعُوا أَوَادِمْ.. أَللَّـه يِحْمِيلِي يَاهُنْ تَا يْضَلُّوا طَيّبِينْ..
وْكَحِّلْ عْيُونِي بْشَوْفِتُنْ .. وْأَنَا رَاضْيِه يْضَلُّوا يِسِرْقُونِي.. وْيِضِرْبُونِي..
"تغني على لحن دقي يا ربابة"
ـ1ـ
دِقِّي دِقِّي يَا رَبَابَه
دِقِّي عَ الإِمّ وْشَبَابَا
جَوْزِي طَلَّقْنِي وْمَا فَكَّرْ
إِنُّو أَطْفَالُو غَلاَبَا
ـ2ـ
رَيَّشُوا .. كِبْرُوا وِصَارُوا
يِسْرِقُوا الْبَيْتْ وْحِجَارُو
مَرَّضُونِي.. عْيُونِي غَارُوا
وأَنَا فِي عِزِّ الشَّبَابَا
ـ3ـ
خَفِّفْ يَا رَبِّي عَذَابِي
رَجِّعْ الرَّحْمِه لْشَبَابِي
هِنّي الْحَرْقُولِي اغْتِرَابِي
وْزَرْعُولِي بْقَلْبِي الْمَصَابَا
ـ4ـ
مَحْلَى الْعِيشِه بْأَرْض بْلادِي
زَيْتُونْ وْجِبْنِه الزُّوَّادِه
كِنِتْ فِيهَا رْبِحْت وْلادِي
وْمَا دِقِتْ مُرِّ الْعَذَابَا
**
المشهد الثامن
"موسيقَى رَاقِصَة، عرس سامي ونجيبة، مدعوون ومدعوات"
عزيزة
آوِيهَا يَا بِنْتِ الْخَيّ يَا بِنْتِ الشَّهَامِه
آوِيهَا يَا بِنْتِ الْعِزّ يَا بِنْتِ الْكَرَامِه
آوِيهَا نِيَّالْ يَللّي تْجَوَّزِكْ نِيَّالْ
بَدْرِ السَّمَا إِنْتِي وْغَيْرِكْ صْرَامِه
أم سامي
شُو هَالْحَكِي يَا عَزِيزِه.. الظَّاهِرْ نَاوْيِه تِعِمْلِي مْشَاكِلْ؟
عزيزة
هَيْكْ أَنَا شَايْفِه بِنْتْ خَيِّي.. وْمَا حَدَا خَصُّو فِيِّي..
أم سامي
لا يَا سِتّْ عَزيزِه .. إِبْنِي كَمَانْ لُو قِيمْتُو.. مَاتِتْ عْلَيْه بَنَاتِ الشَّارِعْ.. كمان لا تِنْسِي إِنُّو بَيُّو مْرَشَّحْ عَ النّيابِه..
عَرِّمْ يَا مَامَا عَرِّمْ..
لبيبة
وْشُو بِهَا بِنْتِي؟ بِنْتِي قَمَرْ.. بِنْتِي شَمِسْ.. بِنْتِي صِرْمَايِتَا بِتْنَقِّطْ شَرَفْ..
أم سامي
وْلِكْ سْكِتِي.. ضِلَّيْتُو تْلاتْ تِيَّامْ تِنِتْفُو دَقْنَا.. وِتْحَنُّو شْوَارِبَا.. تَا ظَبْطِتْ
لبيبة
لَيْكْ كِيفْ بِتْفَنْجِرْ عْيُونَا لَيْكْ.. إِبْنِكْ مِتِلْ قَشِّةْ الْمِكِنْسِه..
وْمَا فْتَحْنَا تِمّنَا..
حسنة
يَا جَمَاعَه عَيْبْ.. صَرْلُنْ نِصّْ سَاعَه طَالْعِينْ مْنِ الِكْنِيسِه..
مَا حَلّكُنْ تْمَشِكْلُوهَا..
لبيبة
وْلِي بِنْتِي .. إِنْتِي شُو حِبَّيْتِي بْهَالْقِرْدْ؟..
نجيبة
عْيُونُو.. عْيُونُو بِيضَوُّوا مِتْلِ عْيُونْ الِبْسَيْنَاتْ..
لبيبة
قِلِّة بْسَيْنَاتْ بْهَالِبْلاَدْ يَا بِنْتِي.. كِنْتْ جِبْتِلِّكْ كِلّ بِسّ وْلاّ التَّانِي.. وْلا تْبِهْدَلْنَا هَالْبَهِدْلِه..
طنوس
وْإِنْتْ يَا إِبْنِي.. شُو حِبَّيْتْ بْهَالْمَقْرُودِه؟
سامي
شَعْرَا يَا بَابَا شَعْرَا.. كِلّ مَا يْدِقّ بْمِنْخَارِي بْصِيرْ عَطِّسْ..
طنوس
وِلِكْ يَا مَرَا لَيْشْ مَا عْمِلْتِيلُو فَاصُولْيَا؟
أم سامي
الْفَاصُولْيَا مَا بِتْعَطِّسْ .. بْتِعْمِلْ مَفْعُولْ عَكْسِي..
طنوس
طَيِّبْ .. لَيْشْ مَا رِشَّيْتِيلُو بْهَارْ بِمْنَاخِيرُو.. مَا كَانْ عَطَّسْ تَا شِبِعْ..
أم سامي
مْصِيبِه .. وْبَدَّا تُوقَعْ عَ رَاسْنَا..
لبيبة
بِنِتْنَا مْصِيبِه يَا بِنْتْ قَرَاقُوشْ.. وَيْنْ الْمُوبَايْلْ فُونْ.. عْطُونِي الْمُوبَايْلْ فُونْ عَجّلُوا..
حسنة
رُوقِي يَا إِمّ الْعَرُوسْ رُوقِي.. مَا بْيِسْوَا هَيْكْ..
لبيبة
الْخُورِي اللِّي جَوَّزَا بِيطَلِّقَا.. أَلُو أَبُونَا.. أَيْوَه .. أَيْوَه.. هَيْدَا أَنَا لبيبة إِمْ الْعَرُوسْ.. لا يَا بُونَا لاَ .. أَللّـه مُشْ رَحْ يْهَنِيهُنْ..
عزيزة
خَلِّينِي إِحْكِي مَعُو أَنَا.. أَلُو أَبُونَا.. الْعِرِسْ فَرَطْ.. وْإِذَا مَا بْتِجِي.. الدَّمْ رَحْ يُوصَلْ لِلْرِكَبْ.. بَدَّكْ تِحْكِي مَعْ بَيّ الْعَرِيسْ.. وْلِكْ لَشُو تِحْكِي مَعْ هَالْمَسْطُولْ..
طنوس
أَلُو أَبُونَا.. إِنْتْ بْتَعْرِفْنِي أَكْتَرْ مِنْ غَيْرَكْ.. أَقَلْ مِنْ خَمِسْ دُولارَاتْ مَا بْحِطّ بِالصَّيْنِيِّه.. وْكِلّ مَا شُوف سَيِّدْنَا بْنِخّ بُوس إِيدُو.. وِبْعَلِّمْ وْلاَدِي عِنْدْ الرَّاهْبَاتْ..
أم سامي
عْطِينِي هالتَّلِفُونْ لْهَوْنْ.. لَيْكْ يَا بُونَا.. كِلِمْتَيْنْ وْبَسّ.. بَدّنَا نْطِلِّقْ..
أم كلاكيش
يَا جَمَاعَه.. تْرِكُوا لِلصُّلِحْ مَطْرَحْ.. خَلُّوا الْعِرْسَانْ يِتْهَنُّوا..
مْحَضّرتلُن غِنِّيِّه بِتْجَنِّنْ..
أبو قشّه
وأَنا كمانْ مْحَضّرْلُنْ قَصِيدِه من كَعب الدّستْ.. يا ضيعان الشِّعر..
بائع الذرة
هَلّق وَقت الغناني والشّعر.. شُوفوا شُو بَدّنَا نِعْمِلْ بِالِهْدِيِّه.. مِنْرَجِّعَا مَعْنَا عَ الْبَيْتْ؟
ابو قشّة
عَم بِيقُولُولَكْ فَرْطُوا.. حْمَالْ هْدِيتَكْ وِهْرُوبْ..
بائع الذرة
خَيّ .. هَيْدِي رَابِع مَرَّه بْيِفْرُطْ عِرْسْ.. وِبْوَفَّرْ حَقّ الدّراياتْ.. يَلْلاّ.. مَصَائِبُ قَوْمٍ عِنْدَ قَوْمٍ فَوَائِدُ..
أبو قشّه
لا تْقِللِّي لافِف عْرانيسْ دَرَا بْوَرْقِة الهديِّه؟
بائع الذرة
"يحمل هديته ومثله يفعل أبو قشّه وأم كلاكيش"
عَ الدَّرَا .. الدَّرا.. عَ الدَّرا
حسنة
يَا نَاسْ .. يَا هُو.. اللّي اخْتَلْفُوا هِنّي أَهْل الْعَرِيسْ وِالْعَرُوسْ.. الْعِرْسَانْ بَعْدُنْ مِتِّفْقِينْ.. شوفو كيف مْكَبّشِينْ بْبَعْضُنْ..
لبيبة
أَبَداً.. الْبِنْتْ اللِّبْنَانِيِّه مَا بِتْوَطِّي شْوَارِبْ بُوهَا..
أم سامي
والشَّبّ اللِّبْنَانِي مَا بْيِدْعَسْ كِلْمِةْ بَيُّو.. فْهِمْتُو..
"ينقسم المدعوون إلى قسمين.. قسم مع أهل العروس وقسم مع أهل العريس"
حسنة
وْلاَدْ مِرْضِيّينْ كْتِيرْ.. لاَ بِيهِشُّوا وْلاَ بِينِشُّوا..
رامز
هَلَّقْ بِيطَلّقُوهُنْ مِنْ مَيْلْ.. وْبْيِرْجَعُوا يْجَوْزُوهُنْ بْلِبْنَانْ مِنْ مَيْلْ تَانِي.. وْمَا حَدَا بْيَعْرِفْ أَيَّا بَيْتْ رَح يِخِتْرِبْ..
حسنة
وِالْمْصِيبِه.. مَا بِيقُولُوا إِنُّنْ كَانُوا مْجَوْزِينْ..
وْبِسّ يُوصَلُوا لْهَوْنْ بْيِنِكْشِفْ السِّرّ.. وِبْتِطْلَعْ الصَّرْخَه .. وِبْيِرَجَعْ الطَّلاَقْ يِمِدّ قْرُونُو مِنْ رَاجِعْ وِجْدِيدْ..
رامز
يَا عَمِّي شُو هَالزَّمَنْ هَيْدَا.. مْبَارِحْ شَبَّيْنْ لِبْنَانِيّي تْجَوْزُوا بَعْضُنْ عِنْدِ الِحْكُومِه.. صَارُوا إِهْلُنْ يِجْعَرُوا مِتْلِ الْبَقَرْ..
بَسّ شُو طَالِعْ بِالإِيدْ.. بْلاَدْ حِرِيِّه.. وِالْمُشْ عَاجْبُو يْبَلِّطْ الْبَحِرْ..
حسنة
سِتّ بَنَاتْ لِبْنَانِيِّي كَانُوا مَاشْيينْ بِالمَارْدِي غْرَا "محل ما النسوان بيحبّوا نسوان".. وْعَمّ بِيهَيّصُوا وِيْزَقّفُوا.. وْكِلّ مَا يْدِيرُوا عْلَيُّنْ الْكَامْرا.. كَانُوا يْهَوُّوا لِلنَّاسْ وِالدِّنِي مُشْ سَايْعِتْهُنْ.. أَللّـه يِسْتُرْ عَ بْنَات النَّاسْ تَا يِسْتُرْ عَ بْنَاتْنَا..
رامز
إِذَا الأَهْلِ رَحْ تْضَلّ جْمَاجِمُنْ مْسَكّرَه.. وْلاَدُنْ رَحْ يْضِيعُوا بْهَالِبْلاَدْ.. وْفَوْقْ هَيْدَا وْكِلُّوا بِيسِبُّوا أستراليا.. هِنِّي نَزَعُوهَا.. وِبْيِرْجَعُوا يْسِبُّوهَا.. شُوفُوا مِلاّ عْقُولْ مْتَيّسِه..
حسنة
كِلُّنْ بِدُّنْ الْوَجَاهَه.. حَتَّى طَنُّوسْ التِّنِكْلِيزِي مَا بَقَى يِتْحَكَى..
رامز
وَطِّي صَوْتِكْ لَيِسْمَعِكْ حَدَا مِنْ أَزْلاَمُو وْيِمْسَحْ فينا الأَرْضْ..
حسنة
َيا رَبِّي لا تْنَجِينَا.. مِنْ بَعِدْ مَا كَانْ زَلْمِةْ زَعِيمْ..
صَار عِنْدُو زِلِمْ..
رامز
خَلّينا بْمَوْضُوعْ الْعِرْسْ.. حَدَا يِتِصِّلْ بِالْخُورِي بَرْكِي بْيِقْدُرْ يْحِلاَّ..
حسنة
مُشْ رَحْ تِنْحَلّْ.. صَارِتْ قَضِيّتُنْ مْعَقّدِه مِتِلْ قَضِيِّةْ الشَّرْقْ الأَوْسَطْ
(يدخل الأبونا مسرعاً)
وِصِل الأَبُونَا.. يَا أَهْلاَ بِالأَبُونَا.. مَا فِي غَيْرَكْ بِيحِلاَّ..
الخوري
أَنَا جَايِي إِحْكِي مَعْ أَصْحَابْ الْعَلاقَه بَسّ.. مَع الْعَرِيسْ وِالْعَرُوسْ..
لبيبة
الْعَرُوسْ مَا بْتِحْكِي تَا تِحْكِي إِمَّا..
أم سامي
وِالْعَرِيسْ مَا بْيِحْكِي تَا تِحْكِي إِمُّو..
الخوري
أوَّلاً.. بِسْمِ الآبْ والإِبِنْ وَالرُّوحْ الْقُدُسْ الإلَه الْوَاحِدْ آمِينْ .. تَانِياً.. أَللّـه يِخْزِيكْ عَنَّا يَا شِيطانْ..
تَالِتاً.. إِنْتُو شُو خَصّكُنْ؟.. وَيْنْ إِمِّكْ وْوَيْنْ إِمَّا..
يِمْكِنْ مَكْتُوبْ مَا بِتْوَدُّولُنْ عَ لِبْنَانْ.. خَرِجْكُنْ بَسّ تِخِرْبُوا بْيُوتْ وْلادْكُنْ.. الْعَمَى، مَا بِتْخَافُوا أَللّـه؟.. قَرِّبْ يَا إِبْنِي.. وْقَرّبِي يَا بِنْتِي.. مِنْ نِصّ سَاعَه سْأَلْتْكُنْ إِذَا بَدكُنْ بَعِضْكُنْ.. قِلْتُو نَعَمْ يَا أَبَانَا.. صَحّ؟
نجيبة
صَحّ يَا أَبُونَا صَحّ.. بَسّ عَمّتِي عَزِيزِه شَعّلِتَا.. غَنِّتْ آوِيهَا مِنْ كَعْبِ الدِّسِتْ..
الخوري
عَمّتِكْ عَزِيزِه.. لا عِرْفِتْ تِتْجَوَّزْ وْلا رَحْ تْخَلِّي حَدَا يِتْجَوَّزْ.. بَدِّكْ تْصِيرِي مِتْلاَ؟
نجيبة
لا يَا أَبُونَا لا.. بْبُوسْ إيدَكْ صَالِحُنْ.. أَنَا بْحِبّْ جَوْزِي كْتِيرْ..
الخوري
وْإِنْتْ يَا إِبْنِي شُو قِصّتَكْ..
سامي
عَمِّتَا شَعّلِتَا.. وْإِمِّي لَغْمِتَا.. وْأَنَا رَحْ يِنْفَجّ رَاسِي..
مُشْ عَارِف مِينْ بَدِّي إِرْضِي..
الخوري
رْضِي رَبَّكْ وْمَرْتَكْ.. مَرْتَكْ صَارِتْ بَيْتَكْ.. حَدّا بْيِخْرُبْ بَيْتُو؟
سامي
أَنَا بْحِبْ مَرْتِي كْتير.. وْمَا بِيبَعِّدْنِي عَنَّا إِلاَّ الْمَوْتْ..
الخوري
فَإِذَنْ .. نْكَايِه فِيهُنْ كِلُّنْ .. مْسِكُوا بْإِيدَيْنْ بَعِضْكُنْ وْشِدُّوا.. وْقُولُولُن: اللّي بْيِنِرْبِطْ بِالسَّمَا مَا بْيِقْدِرْ يْفِكُّو إِنْسَانْ..
بائع الذرة
رَاحِتْ عْلَيِّي .. صَارْ بَدِّي قَدِّمْ الِهْدِيِّه..
الخوري
قَرّبُوا تْبَاوْسُوا وْسَلّموا عَ بَعِضْكُنْ.. وْقُولُوا لْعَزِيزِه تْرُوحْ تْخَيِّطْ بْغَيْرْ هَالِمْسَلِّه.. يَلَّلا وَيْنِ الْمُوسِيقَى.. الْعِرْسْ بْلا مُوسِيقى مِتْل الْقِدَّاسْ بْلاَ نْبِيدْ..
"موسيقى راقصة"
**
المشهد التاسع
"رامز وزوجته حسنة عائدان إلى بيتهما بعد انتهاء العرس"
رامز
عِجْبِكْ شُو هَالْمَسْخَرَه.. كَانْ فَرَطْ الْعِرْسْ عَ دَقْرَه زْغِيرِه..
حسنة
لَوْلا الأَبُونَا.. كَانُوا شَرْشَحُونَا..
رامز
قَلِيلِه السِتّ عَزِيزِه.. فَتْحِتْ مَشْكَلْ لا عَ الْبَالْ وْلاَ عَ الْخَاطِرْ.. شُو بَدَّا دَخْلِكْ بْهَالْحَكِي الْمَا لُو طَعْمِه..
حسنة
َبدْرِ السَّمَا إِنْتِي وْغَيْرِكْ صْرَامِه.. هَيْدَا شِعِرْ هَيْدَا.. هَلّلي بْيِعْمِلْ النَّاسْ صْرَامِه شُو بِيكونْ..
رامز
شُو بِيعَرِّفْنِي.. النَّاسْ بْهالايام ما بِتْفَتِّشْ إلاّ عن الْمشاكلْ
"يوسف وأخوه عدنان مقنعان، يعترضان طريقهما"
يوسف
DON'T MOVE.. RAISE YOUR HANDS
عدنان
GIVE US YOUR MONEY.. OR WE'LL KILL YOU
"حسنة تحاول أن تخفي جواهرها"
يوسف
GIVE US YOUR JEWELLERY..
YOUR WATCH.. HURRY UP
"يوسف وعدنان يهربان صوب بيتهما"
حسنة
عَجِّلْ اتِّصِلْ بِالْبُولِيسْ.. وْخِدْنِي نَامْ عِنْدْ بِنْتِي.. ما بَقَى بَدِّي عِيشْ بْهَالشّارِع.. بِيع الْبَيت وْأَللّـه يِتْحَنَّنْلُنْ فيه..
رامز
فيقوا ياجيران.. الحراميي سرْقُونا
"يتراكض أهل الحي"
أم يوسف
"تحاكي نفسها"
أللـه يستر ما يكونوا ولادي.. بس ولادي نايمين..
أم كلاكيش
شِفتِي شُو صَابُو رامز وْمَرْتُو.. كَانُوا دَبْحُوهُنْ الزِّعْرَانْ.. شلّحوهُن بْنصّ دين الشَّارِع.. الْعَمَى شُو مِجِرْمِينْ..
أم يوسف
"تجفل لدى سماع صوت أم كلاكيش"
شو عَمْ بِتْقُولي.. كنْت شارْدِه شْوَيّ؟
أم كلاكيش
حِبَّيْت إِسْكُنْ بْهالشَّارِع مَعْ خَيِّي بِيَّاعْ الدَّرَا وإبنْ عمي الشاعر بو قشّه لأَنُّو كِلُّو لِبْنَانِيّينْ.. وْمَعْ هَيْدَا وْكِلّو شوفي شو عَمْ بيصِيرْ.. قَوْلِكْ مِين عَمْ يِعْمِلْ فِينا هَيْك؟
أم يوسف
إي صحيح.. مين عم يِعمل فينا هَيْك؟
عليا
لاَزِمْ بِيعْ بَيْتِي.. وْإِنْقُلْ مِنْ هَالشَّارِع..
الْجَرِيمِه عَمْ تِكْتَرْ.. وْحَالِتْنَا صَارِتْ صَعْبِه..
"يدخل جبور"
جبور
انشّاللـه بِيكُونْ فِدَا عَنْكُنْ يَا جَمَاعَه.. قَتْلُوا بُو الْيَاسْ..
عليا
بُو الْيَاسْ مَا غَيْرُو.. الزَّلْمِي الْقَدِّيسْ الِمْعَتَّرْ..
اللّي بِيسَاعِدْ مِينْ مَا كَانْ بْهَالشَّارِعْ..
أم يوسف
"تحاكي نفسها مجدداً"
نشكرالله اللي شفْت بْعِينَيِّي إِنّو وْلادي نايمين بالبيت..
جبور
قَتْلُوهْ كِرْمَالْ خَمْسِينْ سَنْسْ.. افْتَكْرُوا مَعُو مَصَارِي..
وْلِمِّنْ مَا لَقْيُوا مَعُو شِي إِخْدُوا رُوحُو..
عليا
كِلّ يَوْمْ فِي جَرِيمِه جْدِيدِه.. بْهَالشَّارِعْ مَا بَقَى يِنْعَاشْ ..
لاَزِمْ نِنْقُلْ عَ شَارِعْ جْدِيدْ..
جبور
انْطِرُوا تَا نْبِيعْ بْيُوتْنَا بِالأَوَّلْ.. شُو مِفْتِكْرِينْ النَّقْلِه هَيّنِه..
عليا
لْعِمْرُنْ مَا يِنْبَاعُوا.. وَاحِدْنَا لازِمْ يْخَلِّصْ حَالُو بَسّ.. أَنَا شُو بَدِّي بِالْبَيْتْ إِذَا بِيمُوتْ وَلَدْ مْنِ وْلاَدِي..
"يدخل رستم مسرعاً"
رستم
قُولُوا أَللـه يَا جَمَاعَه.. إِبِنْ طَنُّوسْ التِّنِكْلِيزِي مَاتْ..
أم كلاكيش
ما هلّق كنّا بعرسو؟
رستم
تْجَوَّزْ وِتْجَنَّزْ..
أم يوسف
إِبِنْ طَنُّوسْ اللِّي مْقَدَّمْ عَ النِّيَابِه مَاتْ.. وْمِينْ قَتْلُو؟
رستم
هُوِّي قَتَلْ حَالُو.. إِخِدْ إِبْرِه عْيَارَا قَوِي..
ما فينا نْقُول إلآّ أَللـه يِرْحَمُو..
جبور
يَا حَرَامْ عَ طَنُّوسْ.. مَا كَانِتْ لاَزْمِتْلُو هَالِمْصِيبِه قَبْلِ الإِنْتِخَابَاتْ..
أم كلاكيش
لازِمْ نِهْرُبْ مِنْ هَالشَّارِعْ.. وْمَا لاَزِمْ نِتْأَخَّرْ دْقِيقَه وِحْدِه..
"تغني على لحن عندي سمكة"
ـ1ـ
لا تِضْحَكُوا عْلَيّي
مَا بْتِغْفَى عِينَيِّي
يَوْمِيِّه فِي خَلْع وْضَرْبْ
وِمْشَاكِلْ.. يَا مَحْلَى الْحَرْبْ
شَارِعْنَا يَا رَبِّي يَا رَبِّي
كِلُّو لِبْنَانِيّي
ـ2ـ
مْبَارِحْ سَرْقُوا جَارِتْنَا
وْقَتْلُوا شَبّ بْحَارِتْنَا
وْخَوَّفُوا كِلّ الْجِيرَانْ
وْبَكُّوا بْنَيَّاتْ وْصِبْيَانْ
وْصَارِتْ صَارِتْ سَاحِتْنَا
بِتْعَتِّمْ لَيْلِيِّه
ـ3ـ
سَاعِدْنِي يَا رَبِّي
إِتْغَلَّبْ عَ الْغِرْبِه
تَا قَدِّمْلَكْ عُمْرِي
تَا حَوِّشْلَكْ زَهْرِي
وْخَبِّيكْ جُوَّا قَلْبِي
وْإِفْرِشْلَكْ إِيدَيِّي
**
المشهد العاشر
(أزلام طنوس بيك)
يوسف
الِمْعَلِّمْ طَنُّوسْ زِعْلاَنْ كْتِيرْ.. كِلّ النَّاسْ عَمْ يِتِرْكُوا الشَّارِعْ.. شَعْبِيتُو عَمّْ بِتْخِفّ..
عدنان
وَاللـه مَعَكْ حَقّ.. مَاتْ إِبْنُو وْمَا زِعِلْ هَالْقَدّْ..
يوسف
بْتَعْرِفْ لَيْشْ لأَنُّو مِتِّكِلْ عَ اللِّبْنَانِيِّي تَا يِنْجَحْ ..
مَا لاَزِمْ نِتْرِكُنْ يْفِلُّوا
(أبو قشّه يحمل حقيبة السفر)
هَايْ .. إِنْتْ.. لْوَيْنْ حَامِلْ شَنِطْتَكْ وْرَايِحْ..
أبو قشّه
مِي .. نُو سْبِيكْ إِنْجْلِيشْ..
عدنان
لَيْشْ مِينْ عَمْ بِحَكِّيكْ إِنْجْليشْ..
مُشْ سَامْعُو عَمْ بِيقِلَّكْ: لْوَيْنْ رَايِحْ؟
أبو قشّه
وَاتْ.. وَاتْ .. وَاتْ دِيدْ يُو سَايْ..
يوسف
وَطْوَطْ رَقِبْتَكْ انْشَاللّه..
جَاوِبْنِي أَحْسَنْ مَا هِفَّكْ.. لْوَيْنْ رَايِحْ؟
أبو قشّه
مِي مِي مِي مِي مِي مِي.. فِتّ وْكُولْ..
يوسف
فِتّ وْكُولْ.. شُو هَايْ إِسِمْ مَنْطْقَه.. أَنَا مُشْ سَامِعْ فِيهَا..
أبو قشّه
رَاسُو أَسْوِدْ.. عْيُونُو كْبَارْ.. وِقِفْ بْوِجِّي وْصَاحْ:
عَ الدَّرَا الدَّرَا عَ الدَّرَا..
عدنان
هَيْئِتُو مَجْنُونْ .. تْرِكُو يْحِلّ عَنّا..
يوسف
قَبِلْ مَا إِتِرْكُوا لازِمْ إِسْأَلُو مِينْ بَدُّو يِنْتِخَبْ..
أبو قشّه
طَنُّوسْ التِّنِكْلِيزِي..
يوسف
إِسْمُو الِمْعَلِّمْ طَنُّوسْ.. فْهِمِتْ
أبو قشّه
وْبَدِّي غَنِّيلُو كَمَانْ:
طَنُّوسْ التِّنِكْلِيزِي
صَارْ يَعْرِفْ إِنِكْلِيزِي
كَانْ يْفَكِّرْهَا صَعْبِه
طِلْعِتْلُو فَاري إِيزِي
عدنان
قِلّتِلَّكْ كَحّشُو.. بَلّشِتْ عِقْدِةْ لْسَانُو تِنْفَكّْ..
أبو قشّه
شُو قِلتْ.. عَيْبْ عْلَيْكْ تْقُولْ هَالْكِلْمِه..
عدنان
فْرِقْنَا بَقَى.. الْعَمَى شُو هَالِمْصِيبِه..
أبو قشّه
يَا طَنُّوسْ يَا طَنُّوسْ.. مِينْ اللِّي قَلَّكْ مَنْحُوسْ
يوسف
هَيِئْتَكْ مُشْ رَاضِيهَا زْغِيرِه.. حْمَالْ شَنِطْتَكْ وْفِلّْ مِنْ هَوْنْ..
صوت بائع الذرة
عَ الدَّرَا الدَّرَا عَ الدَّرَا..
يوسف
مَا فِي غَيْرُو.. بِيَّاعْ الدَّرَا.. هُوِّي الْعَمْ يِشْتْغِلْ ضِدْنَا..
عدنان
أَنَا قِلْتِلُّو لِلِمْعَلِّمْ طَنُّوسْ.. بِيَّاعْ الدَّرَا هُوِّي اللِّي بَاعْ إِبْنَكْ.. مَا كَانْ يْصَدِّقْنِي..
يوسف
هَلَّقْ بِيكُونْ فَاتِحْ عَ حْسَابُو.. وْعَمْ بيضَارِبْ عْلَيْنَا..
عدنان
أَللـه يِسْتُرْ مَا يْقَدِّمْ عَ الإِنْتِخَابَاتْ ضِدّ الِمْعَلِّمْ طَنُّوسْ..
يوسف
هَيْكْ طَوِيلِه عَ رَقِبْتُو.. رْصَاصَه زْغِيرِه بِتْجِبْلُو آخِرْتُو..
عدنان
وْشُو بِيعَرّفَكْ مَا عِنْدُو زِلِـمْ.. شُو بِيعَرّفَكْ مَنُّو مَسْنُودْ..
قِلِّةْ عِصَابَاتْ بْهَالِبْلادْ؟
يوسف
لَهْ يَا بِيَّاعْ الدَّرَا لَهْ .. مِنْ يَوْمْ اللّي شِفْتَك بْهَالشَّارِعْ..
عْرِفِتْ إِنَّكْ حَرَامِي..
عدنان
رُوح تَا نْخَبِّرْ الِمْعَلِّمْ طَنُّوسْ.. وْهُو بِيقِلّنَا شُو لاَزِمْ نِعْمِلْ..
**
المشهد الحادي عشر
(الأهالي يتجمعون في شارع اللبنانيين مع مصوري الصحف والتلفزيون)
رامز
أَنَا قِلْتْ بَدِّكْ تِنْتِخْبِيهْ .. يِعْنِي بَدِّكْ تِنْتِخْبِيهْ..
حسنة
غَيْرْ طَنُّوسْ مَا بِنْتِخِبْ.. هَيْدَا قَرَارِي وْمَا بِتْرَاجَعْ عَنُّو..
رامز
رَاجِي زَلْمِي آدْمِي.. صَرْلُو بْهَالِبْلاَدْ عِشْرِينْ سِنِه ..
وْبَعْدَا حَالْتُو مِتِلْ حَالِتْنَا..
حسنة
وْمِينْ قَلَّكْ أَنَا رَاضْيِه بْهَالْحَالِه.. سِدَّيْتْ بُوزِي سْنِينْ حَلِّي بَقَى إِنِفْجِرْ..
رامز
هَلَّقْ بَعِدْ مَا كْبِرْنا.. عَمْ تِحْكِي هَالْحَكِي؟
حسنة
كِنْتْ غَشِيمِه .. غَشِيمِه كْتِيرْ
.. BUT NOT ANY MORE
رامز
مِنْ يَوْمْ مَا نِزْلِتْ صُورْتِكْ بِالْجَرِيدِه.. وْإِنْتِي عَمْ تِتْغَيّرِي..
حسنة
أَللـه يِحْمِي طَنُّوسْ .. نَزَّلْلِّي صُورْتِي مَعْ رئيس وزراء أستراليا.. هَزِّتْ الشَّارِعْ كِلُّو..
رامز
وَاللّـه فِي نَاسْ كتير عَم بِتْرَكِّعُنْ الصُّوَرْ.. يَا أَصْحَابْ الْجَرَايِدْ لا بَقَى تِنْشْرُوا صُوَرْ.. رَحْ تِخْتِرِبْ بْيُوتْنَا..
حسنة
إِنْتْ مَحْسُودْ مِنِّي .. وْحَسَدَكْ رَحْ يِقِتْلَكْ..
رامز
نْسيتي لمِّنْ سَرْقُونا حَدّ بيتنا، وْرحْتي تنامي عند بِنْتِك من كتْر الْفَزَعْ؟.. نْسِيتِي لِمِّنْ كِنْتِي تْقُولِي: أَللـه يْطَوِّلْ بْعِمْرَكْ يَا رِجَّالْ؟
حسنة
وْبَدَلْ مَا يْطَوِّلْ بْعُمْرَكْ.. قَامْ طَوَّلْ لْسَانَكْ
أم كلاكيش
أَللـه مَعْكُنْ يَا جَمَاعَه.. شُو بُو صَوْتْكُنْ طَالِعْ؟
حسنة
كِنْتْ عَمْ غَنّجو شْوَي.. جَوزِي بِيحِبّ الْغِنْجْ كْتِيرْ..
أم كلاكيش
بَعِدْ نِصّ سَاعَه.. رَحْ يِنْتِلِي الشَّارِعْ.. جَايِي التلفِزْيُونْ والْجَرَايِدْ والإِذَاعَاتْ..
حسنة
التِّلْفِزْيُون وِالْجَرَايِدْ.. يِعْنِي فِي أَخِدْ صُورْ.. عْطُونِي نِمْرِة الهيردريسّا.. حَدَا بْيَعْرِفْ نِمْرِة الهِيرْدْرِيسّا... أَكِيدْ فِي طَاوْلِة شَرَفْ..
عزيزة
طاوْلِةْ شَرَفْ.. وْمَا حَدَا قَللِّي.. شُو نِسِي الِمْعَلِّمْ طَنُّوسْ إِنِّي عَمّة الأرملِه اللّي ابْتَلْيِتْ بِالْمَرْحُوم إِبْنُو..
حسنة
إِذَا كِنْتي عمّة كنتُو.. أَنَا رَئِيسِةْ إِتِّحَادْ.. وْمَا بْتِلْبَقْ طَاوِلْةْ الشَّرَفْ إِلاَّ لْمَحْسُوبِتْكُنْ..
عزيزة
عَرِّمْ يَا جُوخْ عَرِّمْ.. طَاوْلاَتْ الشَّرَفْ مَرْبَطْ خَيِلْنَا..
حسنة
بْعِرْسْ بِنْتِي كَانْ فِي طَاوْلِة شَرَفْ.. وِحْيَاتْكُنْ خِلّيْتْهَا تِضْوِي.. وْصَارُوا النَّاسْ يْقُولُوا: إِنْتِي أَحْلَى مْنِ اللَّيْدِي دَيَانَا..
أبو قشّه
سْأَلُوا مْجَرِّبْ وْلاَ تِسْأَلُوا حَكِيمْ.. مَرَّه قَعْدْتْ عَ طَاوِلْةِ الشَّرَفْ.. وِانْحَشَرْ مَعِي الدَّقّ .. وْصَارْ وَيْلِي انْ مَا رِحِتْ عَ الحمّامْ.. وْوَيْلِي قُومْ عَنِ الطَّاوْلِه..
رامز
الْعَمَى.. إِجْتَكْ بْوَقْتِ الْحَشْرَه.. وْكِيفْ حِلَّيْتْ الْمَسْأَلِه؟
أبو قشّه
ضِلَّيْتْ قَاعِدْ.. وِاللِّي بَدُّو يْصِيرْ يْصِيرْ.. فِي عِنْدِي غسّالِه بِتْلَقِّطْ حَفْرَاتْ الْمَوْتْ..
عزيزة
طَاوِلْةْ الشَّرَفْ لِهَا شْرُوطْ.. إِذَا بِدَّكْ تِقْعُدْ عْلَيْهَا.. لازِمْ تْضَلّ فَاتِحْ تِمَّكْ وْعَمْ تِضْحَكْ.. لأنْ مَا بْتَعْرِفْ أَيْمَتَى بْيَاخْدُولَكْ صُورَه..
حسنة
صُورَه.. صُورَه.. مُشْ عَمْ لاَقِي نِمْرِةْ الْهِيرْدْرَاسّا..
حَدَا يِعْطِينِي نِمْرِة الهِيردْرَاسّا..
عزيزة
(تهمس بأذن أم كلاكيش)
جَوْزَا بْيِشْتِغِلْ مِنْ مَيْلْ.. وِالْهِيرْدْرَاسَّا بْيِقْبِضْ مِنْ مَيْلْ ..
أم كلاكيش
يَا حَرَامْ عَ جَوْزَا جَيْبِتُو مَبْخُوشِه.. كِلّ مِصْرِيَّاتُو رَايْحَه عَ الِفْسَاتِينْ.. مْبَارِحْ شِفْتَا مَعْ رَئِيسْ تَحْرِيرْ جَرِيدِة الشَّمْسْ..
عزيزة
مع مين؟ مع رستم؟ وْمَا سْأَلْتِيهَا شُو عَمْ تِعْمِلْ مَعُو..؟
أم كلاكيش
سْأَلْتَا.. سْأَلْتَا.. قَالْ حَبّ يِعْمِلْ مَعَا حَدِيثْ.. بَسّ نِسِي قَلَمُو بِالْمَكْتَبْ..
عزيزة
(بصوت منخفض)
واللـه لَـ إِقبرَكْ يا رستُم
(تكمل بصوت عالٍ)
لَيْش مِينْ عَم يِقْرا جَرايِد بْهالأيّام؟ كِلُّنْ عَمّ يِتْفَرّجُوا عَ الصّوَر.. جَارْنَا بُو خَلِيلْ بْيِمْسُكْ الْجَرِيدِه بِالْقِلْبْ.. وْإِذَا شَافْ سِيَّارَه مَقْلُوبِه عَ ضَهْرَا .. بِيقُولْ: يَا حَرَامْ .. قَوِلْكُنْ حَدَا مَاتْ بْهَالْحَادِثْ..
أم كلاكيش
أَنَا مَا بِشِتْرِي الْجَرِيدِه.. إِلاَّ إِذَا كَاتْبِينْ عَنِّي شِي..
حسنة
إِي بْحَيَاتِكْ مَا انْكَتَبْ عَنِّكْ بِالْجَرِيدِه.. حَاجِي بَقَى تْفَنّصِي عْلَيْنَا.. الجمْعَه الماضْيِه كانِت صُورتي مْعِبّايِه الصّفْحَه
أم كلاكيش
أَنَا قِلْتْ إِذَا كَاتْبِينْ عَنِّي.. وِلْهَالسَّبَبْ مُشْ عَمْ إِشْتْرِي جَرَايِدْ.. فْهِمْتِي..
عزيزة
جَرَايِدْنَا خَزِّقْ لَزِّقْ.. وْعَرِّمْ بِالْحَفْلاتْ..
حسنة
كَتِّرْ خَيْرْ هَالْجَرَايِدْ.. كَتِّرْ خَيْرْ هَالإِذَاعَاتْ .. كَتِّرْ خَيْرْ هَالتِّلْفِزْيُون.. بالْقَلِيلِه عَمْ بِيسَلُّونَا بْهَالْغِرْبِه.. خَرِجْنَا بَسّ نِنْتِقِدْ.. وْوَقْتِ الشِّغِلْ مَا بْيِطْلَعْ مِنَّا شي..
أم كلاكيش
بْهَالْجَالْيِه فِي هَسْتِيرْيَا مُصَوَّرَه.. كِلُّنْ عَمْ يِرِكْضُوا وَرَا الصُّورَه..
حسنة
عَمْ بِتْقُولِي صُورَه.. رَحْ يُوصَلُوا الِمْصَوّرِينْ وْبَعْدِي مَا لْقِيتْ نِمْرِةْ الْ Hairdresser
جبور
حَدَا يِفْتَح الرَّادْيُو.. الِمْعَلِّمْ طَنُّوسْ عَ الْهَوَا..
أم كلاكيش
مَا سْمِعْتُو شُو عَمْ بِيقُولْ؟!.. وَلَوْ كِنْتْ سْمَعْلَكْ كِلْمِه..
جبور
عَمْ بِيقولْ للنَّاسْ تَا يِتْجَمّعُوا هَونْ.. بْشَارِعْ اللّبْنَانِييّنْ..
أم كلاكيش
يا مِيةْ أَهْلا وْسَهلا.. نِحْنا ناطْرينُو
حسنة
أَكِيدْ بَدُّو يِجِي عَالَـمْ أَللـه .. طَنُّوسْ إِبِنَّا وْلازِمْ نْشَجْعُو..
رامز
وْرَاجِي إِبِنَّا.. لَيْشْ مَا مِنْشَجْعُو كَمَانْ..
حسنة
رَاجِي مَا مَعُو يَاكُلْ.. وِالنَّاسْ جُوعَانِه بَدّا مِينْ يْطَعْمِيهَا..
رامز
نِحْنَا بْأُسْتْرَالْيَا.. وْمَا حَدَا جُوعَانْ.. الدَّوْلِه بْتِدْفَعْ مِنْ مَيْلْ.. وْمِنْدَبِّرْ حَالْنَا مِنْ مَيْلْ تَانِي..
رامز
هَيْدِي مَعْرَكِه بَيْنِ الْغَنِي وِالْفَقِيرْ.. وَعَ طُولْ الْغَنِي بْيِرْبَحْ..
حسنة
وْلا رامِزْ.. قبل ما إتْجَوّزَكْ ليش ما قِلْتِلِّي إِنَّك تابِعْ ماوْتسي تونغ؟
رامز
يَا دِلُّو الْمَا بْيِرْبَحْ آخِرْتُو.. كِلْ شِي بْهَالدِّنِي فَانِي.. وْمَا بِيصِحّ إِلاَّ الصَّحِيحْ..
عزيزة
كِلْ شِي عَمْ بيصِحّ.. إِلاَّ الصَّحِيحْ.. وْمَا حَدَا مِنَّا عَمْ بِيفَكِّرْ بْآخِرْتُو.. خِدُوا مَثَلاً بِيَّاعْ الدَّرَا .. كَانْ مَاشِي بْتَقْوَى أَللـه وْعَمْ بِيبيِع دَرَا.. فَجْأَه صارْ متل كلب السّلاقي.. عَمْ بِيشَمْشِمْ أَخْبارْ تا يِسْلِقَا مع دْراياتُو
جبور
بَعِدْ خَمْسِ دْقَايِقْ رَحْ يِبْتِدِي الْمِهْرِجَانْ.. مَا حَدَا بْيَعْرِفْ يِمْكِنْ نِطْلَعْ بْشِي صُورَه..
حسنة
شُو عَمْ بِتْقُولْ.. صُورَه.. وَيْنِ الصُّورَه؟..
بَدِّي إِطْلَعْ بِالصُّورَه..
ـ1ـ
يَا مِينْ يْحِنّ عْلَيّي
وِيْصَوِّرْنِي بْهَالْبُوزَاتْ
تَا خَبِّيه بْعِينَيِّي
وْقِلُّو يَا إِبْنِ الذَّوَاتْ
ـ2ـ
بِالْجَرِيدِه بْحَرْفِ كْبِيرْ
يِكْتُبْ إِسْمِي كْبِيرْ كْتِيرْ
تَحْتِ الصُّورَه الْعَمْ بِتْضَوِّي
الأَحْلَى مِنْهَا مَا بِيصِيرْ
ـ3ـ
جَوْزِي يِتْشَكَّى لإِمُّو
وْإِمّو تْخَفِّفْلُو هَمُّو
لا فِهْمُوا عْلَيِّي وْلاَ شِي
أَتْقَلْ مِنْ دَمَّا دَمُّو
ـ4ـ
الْمَا بْيِتْصَوَّرْ.. يَا دِلُّو
مْنِ الصَّعْبِ النَّاس تْجِلُّو
بْيِزْوِي بِالأُوضَه عَ طُولْ
وِجُّو أَسْوَدْ عَ حِلُّو
(صوت أزلام طنوس بيك)
يوسف
طَنُّوسْ بَيْكْ مِنْ لُبْنَانْ
رَافِعْ رَاسْنَا وَيْنْ مَا كَانْ
عدنان
طَنُّوسْ بَيْكْ نِيَّالَكْ
عَمْ يِرْقُصْ أَرْز جْبَالَكْ
يوسف
يَا طَنُّوسْ يَا إِبْنِ الأَرْزْ
رَجِّعْنَا عَ بْلاَدْ الْعِزّ
عدنان
مِنْحِبَّكْ يَا طَنُّوسْ بَيْكْ
الشَّمْسْ بْتِشْرُقْ مِنْ عِينَيْكْ
يوسف
طَنُّوسْ بَيْكْ بْغِرْبِتْنَا
بَدُّو يِحْمِي عَيْلِتْنَا
حسنة
(تدخل في الهوبرة)
يَا طَنُّوسْ يَا عَالِي الرَّاسْ
وِجَّكْ بِالصُّورَه بْيِنْبَاسْ
يوسف
اللَّحْظَه اللِّي إِنْتُو نَاطْرِينَا قَرّبِتْ.. النَّصْرْ اللُّبْنَانِي بْأُسْتْرَالْيَا قَرَّبْ.. زَقْفِه كْبِيرِه لِلنَّصْرْ.. الإِنْسَانْ اللِّي حِبَّيْتُو وْجِيتُو تَا تِسْمَعُو كْلاَمُو.. رَحْ يْطِلّ عْلَيْكُنْ.. خَلُّوا زْلاَغِيطْكُنْ تُوصَلْ لِلسَّمَا.. سَيِّدَاتِي، آنِسَاتِي، سَادَتِي، أَتْرُكُكُمْ الآنْ مَعَ حَبِيبِكُمْ، مَعَ حَبِيبِ الشَّعْبْ، مَعَ إِبِنْ لُبْنَانْ.. الْمُعَلِّمْ طَنُّوسْ..
(تصفيق حاد)
طنوس
خَفّفُوا زْقِيفْكُنْ .. تَا تِسْمَعُونِي.. يَا شَعِبْ لُبْنَانْ الْبَطَلْ..
يَا حَفِيدْ الأَرْزْ.. يَا إِبِنْ صِنِّينْ.. لا للإِجْرَامْ.. لا لِلْبِطَالَه..
لا لِلْمُخَدَّرَاتْ..
(يطل بائع الذرة)
بائع الذرة
عَ الدَّرَا.. الدَّرَا.. عَ الدَّرَا..
طنوس
مُشْ وَقْتَكْ يَا بِيَّاعْ الدَّرَا..
بائع الذرة
هََلَّقْ وَقْتِي.. صَرْلِي زْمَانْ نَاطِرْ هَالْيَوْمْ..
طنوس
شُو بَدَّكْ مِنِّي؟
بائع الذرة
بَدِّي يَاكْ تْقُولْ الْحَقِيقَه.. مِينْ سَرَقْ بْيُوتْ النَّاسْ؟..
مِينْ عَمْ بِيتَاجِرْ بِالْحَشِيشِه؟.. مِينْ قَتَلْ إِبْنَكْ؟..
طنوس
يَا رْجَالْ .. خِدُو مِنْ هَوْنْ .. رَيّحُونِي مِنُّو..
بائع الذرة
جَايِي تَا رَيِّحْ النَّاسْ مِنَّكْ.. قِرّ وَلاَّ بِقِتْلَكْ..
طنوس
يَا رْجَالْ.. خَلّصُونِي مِنّو
(يحاول أزلام طنوس أن يشهروا أسلحتهم، يسبقهم إلى ذلك أبو قشّة وأم كلاكيش)
أبو قشّه وأم كلاكيش
ما حَدا يِتْحرك..
سلّموا سلاحكن أحسنلكُنْ
الجمهور
بو قشه وأم كلاكيش.. مُش مَعْقُول؟!
أم كلاكيش
قلتِلّكُنْ.. ما حَدَا يِتْحَرَّكْ
(أزلام طنوس بيك يرمون أسلحتهم على الارض)
بائع الذرة
رْجَالَكْ سلّموا سْلاحُنْ.. قِرّ قبلْ ما فَرّغْ فَرْدي بْراسَكْ..
وَاحِدْ.. تْنَيْنْ..
(ينهار طنوس)
طنوس
سَامْحُونِي دَخِيلْكُنْ.. أَنَا اللّي سْرَقْتْ بْيُوتْكُنْ..
أَنَا الْعَمْ هَرِّبْ حَشِيشِه..
أَنَا اللِّي قْتَلْتْ إِبْنِي..
(تطل أم يوسف من بين الجمهور وبيدها مسدس)
أم يوسف
إِنْت ما قتلت إبنك بَسّ.. إنْت قْتَلْتني أَنا كَمانْ لِمِّن سرقت ولادي منّي وْمِشَّيْتُنْ عَ دْرُوب الْخَطِيِّه.. هَيْدي رْصَاصِةْ بْقَلْبَكْ مِنْ كلّ أم حْرَقْت قَلْبَا..
(تحاول أن تطلق النار، طنوس يقف أمامها)
طنوس
عْطِينِي فَرْدِك يا أم يوسف..
أم يوسف
إِذَا بِتْحِبّ أَللَّه تْرِكْنِي آخُد بْتَارِي.. وْتارْ هَالإمّاتْ الْعَمْ تِبْكِي مِتْلِي..
طنّوس
نِحْنا بْأسْترالْيا يا أمّ يوسِف.. هَوْن الْعَدالِه بْتاخُدْ مَجْرَاها..
(أم يوسف تسلمه مسدسها، يلتفت إلى طنوس)
فِيكْ تْضَلّ سَاكِتْ تَا كِنْتْ تْوَكِّلْ مُحَامِي..
يَا شَعِبْ لُبْنَانْ الْبَطَلْ.. قَبِلْ مَا تِرْجَعُوا عَ بْيُوتْكُنْ..
لازِمْ تْدُوقُوا دْراياتِي.. عَ الدَّرا الدَّرَا.. عَ الدَّرا..
**
